JKW-KABUM-02-KHA-002-003

🚧 This website is under continued development. We appreciate your patience!

Previous Text Back to Volume PageNext Text

Wylie title	rje nyid kyi gsol 'debs mos gus kyi dbyangs snyan
Location	mkhyen brtse'i bka' 'bum Volume 2, sde tshan 2, Text 3, Pages 289-292 (Folios 4a6 to 5b1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rje nyid kyi gsol 'debs mos gus kyi dbyangs snyan. In 'jam dbyangs mkhyen brtse'i dbang po'i bka' 'bum, Vol. 2: 289-292. Khams sde dge rdzong sar dgon: Rdzong sar blo gros phun tshogs, 2020.
Genre	Supplications - gsol 'debs
Colophon	།ཅེས་པའང་དད་དམ་བསོད་ནམས་ཀྱི་འབྱོར་བའི་གན་མཛོད་འཛིན་པ་ཚུལ་ཁྲིམས་རིན་ཆེན་ནས་འདི་ལྟ་བུ་ཞིག་བྲིས་ཤིག་ཅེས་བཀྲ་ཤིས་པའི་ལྷ་རྫས་དང་བཅས་རྒྱང་རིང་པོ་ནས་ཆེ་ཐང་དུ་བསྐུལ་བ་ལྟར། ཤཱཀྱའི་དགེ་སྦྱོང་སྤོང་བ་པ་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་རབ་ཚེས་དཀར་པོའི་ལོའི་ཆུ་སྟོད་ཟླ་བའི་དུས་དགེ་བར་བྲིས་པ་དོན་དང་ལྡན་པར་བླ་མ་རྒྱལ་བ་སྲས་དང་བཅས་པས་བྱིན་གྱིས་བརླབ་ཏུ་གསོལ།།
	ces pa'ang dad dam bsod nams kyi 'byor ba'i gan mdzod 'dzin pa tshul khrims rin chen nas 'di lta bu zhig bris shig ces bkra shis pa'i lha rdzas dang bcas rgyang ring po nas che thang du bskul ba ltar/_shAkya'i dge sbyong spong ba pa 'jam dbyangs bla ma dgyes pa'i 'bangs mkhyen brtse'i dbang pos rab tshes dkar po'i lo'i chu stod zla ba'i dus dge bar bris pa don dang ldan par bla ma rgyal ba sras dang bcas pas byin gyis brlab tu gsol

1 Texts in this Section (sde tshan or chos tshan)

3 289-292	རྗེ་ཉིད་ཀྱི་གསོལ་འདེབས་མོས་གུས་ཀྱི་དབྱངས་སྙན། rje nyid kyi gsol 'debs mos gus kyi dbyangs snyan Supplications - gsol 'debs	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

དཔལ་ལྡན་བླ་མས་འབྲལ་མེད་རྗེས་སུ་འཛིན་པའི་གསོལ་འདེབས་དོན་ཐམས་ཅད་གྲུབ་པའི་མོས་གུས་ཀྱི་དབྱངས་སྙན་ཅེས་བྱ་བ། །ན་མོ་གུ་རུ་མཉྫུ་གྷོ་ཥཱ་ཡ། འཇ༷མ་པའི་དབྱང༷ས་སོགས་ཕྱོགས་བཅུའི་རྣམ་འདྲེན་གྱི། །ཡེ་ཤེས་གཅིག་བསྡུས་མཁྱེ༷ན་བརྩེ༷འི་དབ༷ང་པོ༷་མཆོག །སྙིང་ནས་དྲན་པའི་གདུང་བས་གསོལ་འདེབས་ན། །བྱིན་རླབས་ཆར་ཆེན་ཕོབ་ཅིག་བླ་མ་རྗེ། །གང་སྐུ་རིག་གྲོལ་ཡོན་ཏན་རྨད་བྱུང་བའི། །རྒྱལ་སྲས་དགེ་འདུན་བྱེ་བའི་གཙུག་རྒྱན་ཆེས། །བྱང་ཆུབ་བར་དུ་འབྲལ་མེད་རྗེས་བཟུང་ནས། །ཕན་བདེའི་ལེགས་ཚོགས་སྤེལ་ཅིག་བླ་མ་རྗེ། །ཁྱོད་གསུང་ལུང་རྟོགས་དམ་ཆོས་རྒྱ་མཚོའི་སྤྲིན། །གདུལ་བྱའི་ཁམས་དང་འཚམས་པར་རབ་འཆར་བས། །བྱང་ཆུབ་བར་དུ་འབྲལ་མེད་རྗེས་བཟུང་ནས། །ཉོན་མོངས་གདུང་བ་སོལ་ཅིག་བླ་མ་རྗེ། །ཐུགས་ནི་རབ་འབྱམས་ཡི་དམ་ཞི་ཁྲོའི་ལྷ། །སངས་རྒྱས་ཀུན་དང་རོ་མཉམ་ཉིད་གྱུར་པས། །བྱང་ཆུབ་བར་དུ་འབྲལ་མེད་རྗེས་བཟུང་ནས། །དངོས་གྲུབ་རྣམ་གཉིས་སྩོལ་ཅིག་བླ་མ་རྗེ། །ཡོན་ཏན་དཔག་བསམ་རྒྱས་པའི་གྲིབ་བསིལ་ཅན། །གནོད་སྦྱིན་ནོར་ལྷའི་ཚོགས་དང་དབྱེར་མེད་པས། །བྱང་ཆུབ་བར་དུ་འབྲལ་མེད་རྗེས་བཟུང་ནས། །མཐུན་རྐྱེན་འདོད་རྒུར་སྩོལ་ཅིག་བླ་མ་རྗེ། །ཕྲིན་ལས་རྣམ་པ་བཞི་ཡི་འཁོར་ལོས་སྒྱུར། །མཁའ་འགྲོ་ཆོས་སྐྱོང་རྒྱ་མཚོའི་ཚོགས་ཀྱི་རྗེས། །བྱང་ཆུབ་བར་དུ་འབྲལ་མེད་རྗེས་བཟུང་ནས། །འགལ་རྐྱེན་བར་ཆད་སོལ་ཅིག་བླ་མ་རྗེ། །མདོར་ན་འདི་ནས་བྱང་ཆུབ་སྙིང་པོའི་བར། །མགོན་པོ་ཁྱོད་ལས་སྐྱབས་གཞན་མ་མཆིས་པས། །འདི་ཕྱི་བར་དོའི་གནས་སྐབས་ཐམས་ཅད་དུ། །འབྲལ་མེད་རྗེས་སུ་ཟུངས་ཤིག་བླ་མ་རྗེ། །སྲིད་ཞིའི་ལེགས་ཚོགས་ཀུན་གྱི་འབྱུང་གནས་ནི། །ལམ་སྟོན་དགེ་བའི་བཤེས་ལས་གཞན་མིན་ཕྱིར། །དྭངས་འདོད་ཡིད་ཆེས་མི་ཕྱེད་དད་པར་བཅས། །བསམ་པས་ཚུལ་བཞིན་བསྟེན་པར་བྱིན་གྱིས་རློབས། །ལུས་ངག་ཡིད་གསུམ་ལོངས་སྤྱོད་དང་བཅས་པའི། །དོན་ཡོད་རྣམ་བཞིས་དཔལ་ལྡན་བླ་མ་མཆོག །དགྱེས་པའི་ཕྲིན་ལས་མ་ལུས་རབ་བསྒྲུབ་པའི། །སྦྱོར་བས་ཚུལ་བཞིན་བསྟེན་པར་བྱིན༴ དེ་ལྟར་བསམ་དང་སྦྱོར་བས་རྩེ་གཅིག་ཏུ། །རྗེ་བཙུན་བླ་མའི་ཞབས་པད་ལེགས་བསྟེན་པས། །སྐུ་གསུང་ཐུགས་དང་ཡོན་ཏན་ཕྲིན་ལས་ཀྱི། །ཡེ་ཤེས་གཟིགས་པ་འཇུག་པར་བྱིན་གྱིས་རློབས། །དེ་མཐུས་ངེས་འབྱུང་ཚུལ་ཁྲིམས་རྣམ་པར་དག །རིན་ཆེན་བྱང་ཆུབ་སེམས་གཉིས་གཏིང་ནས་འབྱོངས། །བསྐྱེད་རྫོགས་ལམ་གྱི་རིམ་པ་མཐར་ཕྱིན་ནས། །རང་གཞན་དོན་གཉིས་འགྲུབ་པའི་བཀྲ་ཤིས་སྩོལ། །ཅེས་པའང་དད་དམ་བསོད་ནམས་ཀྱི་འབྱོར་བའི་གན་མཛོད་འཛིན་པ་ཚུལ་ཁྲིམས་རིན་ཆེན་ནས་འདི་ལྟ་བུ་ཞིག་བྲིས་ཤིག་ཅེས་བཀྲ་ཤིས་པའི་ལྷ་རྫས་དང་བཅས་རྒྱང་རིང་པོ་ནས་ཆེ་ཐང་དུ་བསྐུལ་བ་ལྟར། ཤཱཀྱའི་དགེ་སྦྱོང་སྤོང་བ་པ་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་རབ་ཚེས་དཀར་པོའི་ལོའི་ཆུ་སྟོད་ཟླ་བའི་དུས་དགེ་བར་བྲིས་པ་དོན་དང་ལྡན་པར་བླ་མ་རྒྱལ་བ་སྲས་དང་བཅས་པས་བྱིན་གྱིས་བརླབ་ཏུ་གསོལ།། །། ༈

[edit]

rje nyid kyi gsol 'debs mos gus kyi dbyangs snyan/__ dpal ldan bla mas 'bral med rjes su 'dzin pa'i gsol 'debs don thams cad grub pa'i mos gus kyi dbyangs snyan ces bya ba/_/na mo gu ru many+dzu g+ho ShA ya/_'jaXm pa'i dbyangaXs sogs phyogs bcu'i rnam 'dren gyi/_/ye shes gcig bsdus mkhyeXn brtseX'i dbaXng poX mchog__/snying nas dran pa'i gdung bas gsol 'debs na/_/byin rlabs char chen phob cig bla ma rje/_/gang sku rig grol yon tan rmad byung ba'i/_/rgyal sras dge 'dun bye ba'i gtsug rgyan ches/_/byang chub bar du 'bral med rjes bzung nas/_/phan bde'i legs tshogs spel cig bla ma rje/_/khyod gsung lung rtogs dam chos rgya mtsho'i sprin/_/gdul bya'i khams dang 'tshams par rab 'char bas/_/byang chub bar du 'bral med rjes bzung nas/_/nyon mongs gdung ba sol cig bla ma rje/_/thugs ni rab 'byams yi dam zhi khro'i lha/_/sangs rgyas kun dang ro mnyam nyid gyur pas/_/byang chub bar du 'bral med rjes bzung nas/_/dngos grub rnam gnyis stsol cig bla ma rje/_/yon tan dpag bsam rgyas pa'i grib bsil can/_/gnod sbyin nor lha'i tshogs dang dbyer med pas/_/byang chub bar du 'bral med rjes bzung nas/_/mthun rkyen 'dod rgur stsol cig bla ma rje/__/phrin las rnam pa bzhi yi 'khor los sgyur/_/mkha' 'gro chos skyong rgya mtsho'i tshogs kyi rjes/_/byang chub bar du 'bral med rjes bzung nas/_/'gal rkyen bar chad sol cig bla ma rje/_/mdor na 'di nas byang chub snying po'i bar/_/mgon po khyod las skyabs gzhan ma mchis pas/_/'di phyi bar do'i gnas skabs thams cad du/_/'bral med rjes su zungs shig bla ma rje/_/srid zhi'i legs tshogs kun gyi 'byung gnas ni/_/lam ston dge ba'i bshes las gzhan min phyir/_/dwangs 'dod yid ches mi phyed dad par bcas/_/bsam pas tshul bzhin bsten par byin gyis rlobs/_/lus ngag yid gsum longs spyod dang bcas pa'i/_/don yod rnam bzhis dpal ldan bla ma mchog__/dgyes pa'i phrin las ma lus rab bsgrub pa'i/_/sbyor bas tshul bzhin bsten par byin=__de ltar bsam dang sbyor bas rtse gcig tu/_/rje btsun bla ma'i zhabs pad legs bsten pas/_/sku gsung thugs dang yon tan phrin las kyi/_/ye shes gzigs pa 'jug par byin gyis rlobs/_/de mthus nges 'byung tshul khrims rnam par dag__/rin chen byang chub sems gnyis gting nas 'byongs/_/bskyed rdzogs lam gyi rim pa mthar phyin nas/_/rang gzhan don gnyis 'grub pa'i bkra shis stsol/_/ces pa'ang dad dam bsod nams kyi 'byor ba'i gan mdzod 'dzin pa tshul khrims rin chen nas 'di lta bu zhig bris shig ces bkra shis pa'i lha rdzas dang bcas rgyang ring po nas che thang du bskul ba ltar/_shAkya'i dge sbyong spong ba pa 'jam dbyangs bla ma dgyes pa'i 'bangs mkhyen brtse'i dbang pos rab tshes dkar po'i lo'i chu stod zla ba'i dus dge bar bris pa don dang ldan par bla ma rgyal ba sras dang bcas pas byin gyis brlab tu gsol//___//_!_