JKCL-KABUM-12-NA-068

🚧 This website is under continued development. We appreciate your patience!

Previous Text Back to Volume PageNext Text

Wylie title	mkha' 'gro gsang ba kun 'dus kyi lam rim smon lam 'og min bgrod pa'i them skas
Location	chos kyi blo gros bka' 'bum Volume 12, Text 68, Pages 319-326 (Folios 1a to 4b3)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. mkha' 'gro gsang ba kun 'dus kyi lam rim smon lam 'og min bgrod pa'i them skas. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 12: 319-326. Bir, H.P.: Khyentse Labrang, 2012.
Genre	Prayers - smon lam
Cycle	མཁའ་འགྲོ་གསང་བ་ཀུན་འདུས་ (mkha' 'gro gsang ba kun 'dus)
RTZ	In the Rinchen Terdzö: https://rtz.tsadra.org/index.php/Terdzo-NGI-062
Colophon	།ཅེས་པའང་མེ་ཡོས་ལོར་འཇམ་དབྱངས་བློ་གྲོས་རྒྱ་མཚོས་མཁའ་འགྲོ་གསང་བ་འདུས་པའི་སྒྲུབ་མཆོད་སྐབས་བསྙེན་པའི་ཐུན་སེང་ཞིག་ལ་ཤར་མར་བྲིས་པ་འདིས་ཀྱང་། བདག་གཞན་ཐམས་ཅད་བླ་མ་རྡོ་རྗེ་ཕག་མོས་རྗེས་སུ་འཛིན་པའི་རྒྱུར་གྱུར་ཅིག །སརྦ་དཱ་མངྒ་ལཾ། ཤུ་བྷཾ།།
	/ces pa'ang me yos lor 'jam dbyangs blo gros rgya mtshos mkha' 'gro gsang ba 'dus pa'i sgrub mchod skabs bsnyen pa'i thun seng zhig la shar mar bris pa 'dis kyang /__bdag gzhan thams cad bla ma rdo rje phag mos rjes su 'dzin pa'i rgyur gyur cig__/sarba dA mang+ga laM/__shu b+haM//

1 Texts in this Section (sde tshan or chos tshan)

319-326	མཁའ་འགྲོ་གསང་བ་ཀུན་འདུས་ཀྱི་ལམ་རིམ་སྨོན་ལམ་འོག་མིན་བགྲོད་པའི་ཐེམ་སྐས། mkha' 'gro gsang ba kun 'dus kyi lam rim smon lam 'og min bgrod pa'i them skas Prayers - smon lam	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

༄༅། །མཁའ་འགྲོ་གསང་བ་ཀུན་འདུས་ཀྱི་ལམ་རིམ་སྨོན་ལམ་འོག་མིན་བགྲོད་པའི་ཐེམ་སྐས་ཅེས་བྱ་བ་བཞུགས་སོ། ། བླ་མ་བཅོམ་ལྡན་རྡོ་རྗེ་ཕག་མོ་དང་། །དྷཱ་ཀི་རབ་འབྱམས་རྒྱ་མཚོའི་དཀྱིལ་འཁོར་རྣམས། །བདག་ཅག་རྡོ་རྗེའི་རྣལ་འབྱོར་མཆེད་ལྕམ་ལ། །ཡེ་ཤེས་ཐུགས་རྗེས་མི་འབྲལ་དགོངས་སུ་གསོལ། །མཚན་ཉིད་ལྡན་པའི་རྡོ་རྗེ་སློབ་དཔོན་ལས། །སྨིན་བྱེད་དབང་གིས་བདག་རྒྱུད་རབ་སྨིན་ནས། །སྡོམ་པ་དམ་ཚིག་སྲོག་ལྟར་བསྲུང་བ་དང་། །ཅི་གསུང་བཀའ་བཞིན་བསྒྲུབ་པས་མཉེས་བྱེད་ཤོག །སྲིད་པའི་གནས་ངན་ལེན་ལ་ངེས་འབྱུང་ཞིང་། །མེ་ཡི་འོབས་ནས་ཐར་བ་ལྟ་བུའི་བློས། །ཞི་བ་མཆོག་གི་གོ་འཕང་དོན་གཉེར་ནས། །རྣམ་གྲོལ་ཐར་པའི་སྒོ་ཆེན་རྙེད་པར་ཤོག །དལ་དང་འབྱོར་པས་བརྒྱན་པའི་ལུས་འདི་ནི། །རྙེད་དཀའ་འཇིག་སླ་མི་རྟག་མི་བརྟན་པའི། །ཚུལ་ལ་བསམ་ནས་ལས་འབྲས་སྤང་བླང་ལ། །བརྩོན་པས་འཁོར་བའི་ལམ་ལས་ལྡོག་པར་ཤོག །མཚན་ཐོས་ཙམ་གྱིས་སྲིད་ཞིའི་འཇིགས་པ་སྐྱོབས། །གཏན་བདེའི་མཆོག་སྩོལ་བསླུ་མེད་དཀོན་མཆོག་གསུམ། །རྩ་གསུམ་སྐུ་གསུམ་འདུས་པའི་བདག་ཉིད་ཆེ། །བླ་མ་མཆོག་ལ་སྐྱབས་སུ་འགྲོ་བར་ཤོག །ཐེག་ཆེན་ལམ་གྱི་རྩ་བ་སྨོན་འཇུག་སེམས། །གཡོ་སྒྱུ་མེད་པའི་གཞན་ཕན་བསམ་པ་ཡི། །བྱང་ཆུབ་སེམས་ཀྱི་ནོར་བུས་བློ་སྦྱངས་པས། །འཕྲལ་དང་ཡུན་གྱི་དོན་ཆེན་འགྲུབ་པར་ཤོག །གཉེན་པོ་སྟོབས་བཞི་གངྒཱའི་ཆུ་རྒྱུན་གྱིས། །བཅས་དང་རང་བཞིན་ཉེས་པའི་དྲི་མ་འཁྲུད། །རང་རྒྱུད་རྣམ་པར་དག་པ་ཤེལ་ལྟ་བུ། །སྡོམ་གསུམ་དམ་ཚིག་ཉམས་པ་སོར་ཆུད་ཤོག །ལེགས་བྱས་དགེ་ཚོགས་རྒྱ་མཚོའི་རྡུལ་ཆེན་པོ། །སྐུ་གསུམ་མཆོད་པའི་སྤྲིན་དུ་སྤྲོས་པ་ཡིས། །རང་གཞན་ཚོགས་གཉིས་གོང་དུ་འཕེལ་བ་དང་། །སྐུ་བཞིའི་ས་བོན་རྒྱུད་ལ་ཐེབས་པར་ཤོག །དབང་དུས་བླ་མས་བྱིན་གྱི་བརླབས་པ་ཡི། །ལམ་དུས་ཟབ་མོའི་རྣལ་འབྱོར་ལ་བརྩོན་ཞིང་། །གསོལ་འདེབས་དབང་བླང་ཐུགས་ཡིད་བསྲེ་བ་ཡིས། །རང་རིག་བླ་མ་ཆོས་སྐུར་རྟོགས་པར་ཤོག །ཏིང་འཛིན་རྣམ་པ་གསུམ་གྱིས་གཞི་བཟུང་ཞིང་། །རྟེན་དང་བརྟེན་པའི་དཀྱིལ་འཁོར་བསྒོམ་པ་དང་། །དམ་ཡེ་དབྱེར་མེད་ལྷར་སྣང་ཕྱག་རྒྱ་ཡི། །བསྐྱེད་པའི་རྣལ་འབྱོར་ཚད་དུ་ཕྱིན་པར་ཤོག །ཕུང་ཁམས་སྐྱེ་མཆེད་རྩ་ཐིག་རླུང་གསུམ་པོ། །གདོད་ནས་ལྷུན་གྲུབ་དྷཱ་ཀིའི་གྲོང་ཁྱེར་ཆེར། །གནད་དུ་བསྣུན་པས་སྐུ་ཡི་རྡོ་རྗེར་རྫོགས། །བསྐྱེད་རིམ་སྤྲུལ་སྐུའི་ཉམས་ལེན་མཐར་ཕྱིན་ཤོག །བསྐྱེད་པའི་བོགས་འདོན་རླུང་སྔགས་བཟླས་པ་ཡི། །རྣལ་འབྱོར་ཟབ་མོར་ཆུ་བོའི་རྒྱུན་བཞིན་བརྩོན། །བསྙེན་སྒྲུབ་རྣམ་བཞིར་དུས་དང་རྒྱུན་དུ་འབད། །རིག་འཛིན་བཞིས་བསྡུས་ལམ་ལྔ་མཐར་ཕྱིན་ཤོག །གཏུམ་མོས་གཞི་བཅའ་རླུང་སེམས་རྣལ་དུ་དབབ། །རྩ་འཁོར་གསལ་བ་ལས་རླུང་དྷཱུ་ཏིར་སྡུད། །གཏུམ་མོའི་མེ་ཡི་རེག་བྱས་དྲོད་སྦར་ཞིང་། །དེ་ལས་བྱུང་བའི་ཡེ་ཤེས་སྐྱེ་བར་ཤོག །སྟེང་སྒོ་ཧཾ་ཡིག་ཟླ་བ་ཞུ་བ་ལས། །འབར་དང་འཛག་པའི་འཕྲོ་འདུའི་སྦྱོར་བ་ཡིས། །ལུས་སེམས་ཟག་མེད་དགའ་བཞིས་ཁྱབ་པ་དང་། །བདེ་བ་ཐིག་ལེའི་ཉམས་ལེན་སྐྱེ་བར་ཤོག །དུས་གསུམ་སྤྲོས་པ་ཐམས་ཅད་དབྱིངས་སུ་བཅད། །རང་སེམས་དག་པ་ཡེ་ཤེས་ལྔ་རུ་རྫོགས། །དྷཱ་ཀི་རིགས་ལྔ་གཞན་ནས་བཙལ་དུ་མེད། །མི་རྟོག་ཡེ་ཤེས་ཉམས་ལེན་མཐར་ཕྱིན་ཤོག །ལམ་གྱི་བོགས་འདོན་སྒྱུ་ལུས་འབྱོངས་པ་ཡིས། །སྣོད་བཅུད་ལྷ་སྐུ་འཇའ་ཚོན་ལྟ་བུ་འཆར། །བདེ་ཆེན་རང་བཞིན་སྒྱུ་མའི་གཟུགས་བརྙན་ཆེ། །སྣང་སྲིད་མཁའ་འགྲོའི་དཀྱིལ་འཁོར་འཆར་བར་ཤོག །ལམ་གྱི་སྙིང་པོ་འོད་གསལ་གནས་ལུགས་ནི། །རྟོག་པའི་རྒྱུ་བ་ཤིན་ཏུ་ཕྲ་བ་འགགས། །མ་བཅོས་རིག་པའི་གནས་ལུགས་ཇི་བཞིན་འཆར། །འོད་གསལ་དེ་ཁོ་ན་ཉིད་རྟོགས་པར་ཤོག །ལམ་གྱི་ཚོད་འཛིན་རྨི་ལམ་སྒྱུ་མར་སྦྱངས། །ལྷ་སྐུར་ལྡང་ཞིང་འོད་གསལ་ངང་དུ་བསྲེས། །སྦྱངས་སྤེལ་སྤྲུལ་བསྒྱུར་གནད་ལ་གོམས་པ་ཡིས། །འཁྲུལ་པ་རྨི་ལམ་རང་སར་དག་པར་ཤོག །ལམ་གྱི་སུན་མ་འཕོ་བའི་ཉམས་ལེན་གྱིས། །རླུང་སེམས་རིག་པ་དབྱེར་མེད་ཐིག་ལེ་ཆེ། །རླུང་སྦྱོར་གྱིས་བསྐུལ་སྒྲ་ཡི་འཕོ་བ་དང་། །འོག་མིན་མཁའ་སྤྱོད་ཆེན་པོར་སྐྱེ་བར་ཤོག །ལམ་ཁྱེར་བར་དོ་ད་ལྟའི་སྣང་བ་ཀུན། །སེམས་རླུང་བདེ་བ་རྡོ་རྗེ་ཕག་མོ་ཡི། །སྐུ་གསུང་ཐུགས་ཀྱི་ངོ་བོར་ལམ་གྱིས་འཆར། །ཆགས་སྡང་རྨོངས་པའི་འཁྲུལ་རྟོག་ཀུན་སྦྱོངས་ཤོག །དེ་ལྟར་ཐབས་ལམ་སྙིང་པོ་ཆོས་དྲུག་གི །ཉམས་ལེན་ཟབ་མོར་རྟག་ཏུ་བརྩོན་པའི་མཐུས། །གསུང་གི་རྡོ་རྗེ་ལོངས་སྐུ་འགྲུབ་པའི་ཐབས། །གསང་བའི་དབང་གི་ཉམས་ལེན་མཐར་ཕྱིན་ཤོག །འོག་སྒོ་མཁའ་གསང་བདེ་ཆེན་རོལ་པ་ཡི། །ཆོས་ཀྱི་ཕྱག་རྒྱས་བདག་བྱིན་བརླབ་པ་དང་། །དམ་ཚིག་ཕྱག་རྒྱའི་ཉམས་ལེན་ལ་བརྩོན་པས། །སྣང་བ་ཐམས་ཅད་བདེ་བར་འཆར་བར་ཤོག །རྩོལ་མེད་བདེ་དང་འཛག་མེད་ཚུལ་ཁྲིམས་ཀྱི། །ཟག་མེད་ཉམས་མྱོང་རྒྱུད་ལ་སྐྱེས་པ་ན། །ལས་ཀྱི་ཕྱག་རྒྱ་པད་ཅན་ཕོ་ཉ་དང་། །འདུ་ཤེས་གསུམ་གྱི་རྣལ་འབྱོར་བརྩོན་པར་ཤོག །རྩ་ཡིག་བྱིན་བརླབ་སེམས་གསུམ་མངོན་དུ་བྱས། །འདྲེན་བཀྲམ་བརྟན་ཅིང་མི་རྟོག་དང་དུ་སྦ། །ཐུགས་ཀྱི་རྡོ་རྗེ་བདེ་ཆེན་ཆོས་སྐུ་ཡི། །ཉམས་ལེན་གསུམ་པའི་ལམ་མཆོག་མཐར་ཕྱིན་ཤོག །ལྟ་བ་ཀ་དག་ཆོས་སྐུར་ཐག་ཆོད་ཅིང་། །སྒོམ་པ་ལོངས་སྐུར་ཉམས་སུ་བླངས་པ་དང་། །སྤྱོད་པ་སྤྲུལ་སྐུར་རྩལ་སྦྱོང་རྣལ་འབྱོར་གྱིས། །བྱར་མེད་དོན་ལ་རྟག་ཏུ་བརྩོན་པར་ཤོག །ཕྱི་རོལ་སྣང་བ་སེམས་ཀྱི་རྩལ་ལས་ཤར། །སེམས་ཉིད་སྐྱེ་འགགས་གནས་པའི་ངོ་བོས་སྟོང་། སྟོང་པ་ཕྱོགས་སུ་མ་ལྷུང་གདོད་མའི་གཤིས། །འོད་གསལ་ལྷུན་གྲུབ་རང་ངོ་ཤེས་པར་ཤོག །གནས་འགྱུ་ཐམས་ཅད་རང་བབ་མ་བཅོས་བཞག །དགག་སྒྲུབ་ཆགས་སྡང་རེ་དོགས་ཀུན་བྲལ་ཞིང་། །གཟུང་འཛིན་སྤང་བླང་གདོད་ནས་རང་སར་གྲོལ། །རིག་སྟོང་ཡེ་ཤེས་རྡོ་རྗེར་འགྲུབ་པར་ཤོག །ལམ་གྱི་གེགས་སེལ་བོགས་འདོན་ཀུན་གྱི་སྙིང་། །དུས་གསུམ་རྒྱལ་བ་རྣམས་ཀྱིས་བསྔགས་པའི་ལམ། །ལམ་ཟབ་བླ་མའི་རྣལ་འབྱོར་ལ་བརྩོན་པས། །ལམ་གྱི་གེགས་འཁྲུལ་ཐམས་ཅད་རང་གྲོལ་ཤོག །དང་པོ་ཡང་དག་གོ་དོན་རྒྱུད་ལ་འཆར། །བར་དུ་བདེ་གསལ་མི་རྟོག་ཉམས་འཆར་ཞིང་། །ཐ་མ་སྤྲིན་ཐག་ཆད་པའི་ནམ་མཁའ་ལྟར། །རིག་པ་རྗེན་གཅེར་མངོན་སུམ་རྟོགས་པར་ཤོག །འཁོར་འདས་གཉིས་སྣང་འཁྲུལ་རྟོག་བར་ལག་ཕྱེད། །རེ་དོགས་མདུད་ཞིག་གནས་ལུགས་མཚང་བརྡོལ་ནས། །འཁོར་འདས་དབྱེར་མེད་འོད་གསལ་རྫོགས་པ་ཆེའི། །གདོད་མའི་ས་ལ་གཏན་སྲིད་ཟིན་པར་ཤོག །གལ་ཏེ་ཚེ་འདིར་གྲོལ་བར་མ་གྱུར་ན། །འཕོ་བའི་སྟོབས་ཀྱིས་རྡོ་རྗེ་བཙུན་མོའི་ཞིང་། །བླ་མ་བཛྲ་ཝཱ་ར་ཧི་ཉིད་ཀྱིས། །རྗེས་སུ་བཟུང་ནས་ལམ་མཆོག་མཐར་ཕྱིན་ཤོག །གལ་ཏེ་དེར་ཡང་བརྟན་པ་མ་ཐོབ་ན། །བར་དོ་ཁྱེར་སོ་གསུམ་གྱི་རྣལ་འབྱོར་གྱིས། །བླ་མ་བཅོམ་ལྡན་འདས་མས་ལག་མཁྲིག་ནས། །བཟུང་སྟེ་མཁའ་སྤྱོད་གནས་སུ་ཁྲིད་པར་ཤོག །མདོར་ན་སྐྱེ་དང་ཚེ་རབས་ཐམས་ཅད་དུ། །དཔལ་ཆེན་རྡོ་རྗེ་མཁའ་འགྲོའི་ལྷ་ཚོགས་ཀྱིས། །རྗེས་སུ་བཟུང་ནས་དོན་གཉིས་ལྷུན་གྱིས་གྲུབ། །བརྟན་གཡོའི་དངོས་ཀུན་བདེ་ཆེན་འགྲུབ་པར་ཤོག །ཅེས་པའང་མེ་ཡོས་ལོར་འཇམ་དབྱངས་བློ་གྲོས་རྒྱ་མཚོས་མཁའ་འགྲོ་གསང་བ་འདུས་པའི་སྒྲུབ་མཆོད་སྐབས་བསྙེན་པའི་ཐུན་སེང་ཞིག་ལ་ཤར་མར་བྲིས་པ་འདིས་ཀྱང་། བདག་གཞན་ཐམས་ཅད་བླ་མ་རྡོ་རྗེ་ཕག་མོས་རྗེས་སུ་འཛིན་པའི་རྒྱུར་གྱུར་ཅིག །སརྦ་དཱ་མངྒ་ལཾ། ཤུ་བྷཾ།། །།

[edit]

@#/__/mkha' 'gro gsang ba kun 'dus kyi lam rim smon lam 'og min bgrod pa'i them skas ces bya ba bzhugs so/__/ bla ma bcom ldan rdo rje phag mo dang /__/d+hA ki rab 'byams rgya mtsho'i dkyil 'khor rnams/__/bdag cag rdo rje'i rnal 'byor mched lcam la/__/ye shes thugs rjes mi 'bral dgongs su gsol/__/mtshan nyid ldan pa'i rdo rje slob dpon las/__/smin byed dbang gis bdag rgyud rab smin nas/__/sdom pa dam tshig srog ltar bsrung ba dang /__/ci gsung bka' bzhin bsgrub pas mnyes byed shog__/srid pa'i gnas ngan len la nges 'byung zhing /__/me yi 'obs nas thar ba lta bu'i blos/__/zhi ba mchog gi go 'phang don gnyer nas/__/rnam grol thar pa'i sgo chen rnyed par shog__/dal dang 'byor pas brgyan pa'i lus 'di ni/__/rnyed dka' 'jig sla mi rtag mi brtan pa'i/__/tshul la bsam nas las 'bras spang blang la/__/brtson pas 'khor ba'i lam las ldog par shog__/mtshan thos tsam gyis srid zhi'i 'jigs pa skyobs/__/gtan bde'i mchog stsol bslu med dkon mchog gsum/__/rtsa gsum sku gsum 'dus pa'i bdag nyid che/__/bla ma mchog la skyabs su 'gro bar shog__/theg chen lam gyi rtsa ba smon 'jug sems/__/g.yo sgyu med pa'i gzhan phan bsam pa yi/__/byang chub sems kyi nor bus blo sbyangs pas/__/'phral dang yun gyi don chen 'grub par shog__/gnyen po stobs bzhi gang+gA'i chu rgyun gyis/__/bcas dang rang bzhin nyes pa'i dri ma 'khrud/__/rang rgyud rnam par dag pa shel lta bu/__/sdom gsum dam tshig nyams pa sor chud shog__/legs byas dge tshogs rgya mtsho'i rdul chen po/__/sku gsum mchod pa'i sprin du spros pa yis/__/rang gzhan tshogs gnyis gong du 'phel ba dang /__/sku bzhi'i sa bon rgyud la thebs par shog__/dbang dus bla mas byin gyi brlabs pa yi/__/lam dus zab mo'i rnal 'byor la brtson zhing /__/gsol 'debs dbang blang thugs yid bsre ba yis/__/rang rig bla ma chos skur rtogs par shog__/ting 'dzin rnam pa gsum gyis gzhi bzung zhing /__/rten dang brten pa'i dkyil 'khor bsgom pa dang /__/dam ye dbyer med lhar snang phyag rgya yi/__/bskyed pa'i rnal 'byor tshad du phyin par shog__/phung khams skye mched rtsa thig rlung gsum po/__/gdod nas lhun grub d+hA ki'i grong khyer cher/__/gnad du bsnun pas sku yi rdo rjer rdzogs/__/bskyed rim sprul sku'i nyams len mthar phyin shog__/bskyed pa'i bogs 'don rlung sngags bzlas pa yi/__/rnal 'byor zab mor chu bo'i rgyun bzhin brtson/__/bsnyen sgrub rnam bzhir dus dang rgyun du 'bad/__/rig 'dzin bzhis bsdus lam lnga mthar phyin shog__/gtum mos gzhi bca' rlung sems rnal du dbab/__/rtsa 'khor gsal ba las rlung d+hU tir sdud/__/gtum mo'i me yi reg byas drod sbar zhing /__/de las byung ba'i ye shes skye bar shog__/steng sgo haM yig zla ba zhu ba las/__/'bar dang 'dzag pa'i 'phro 'du'i sbyor ba yis/__/lus sems zag med dga' bzhis khyab pa dang /__/bde ba thig le'i nyams len skye bar shog__/dus gsum spros pa thams cad dbyings su bcad/__/rang sems dag pa ye shes lnga ru rdzogs/__/d+hA ki rigs lnga gzhan nas btsal du med/__/mi rtog ye shes nyams len mthar phyin shog__/lam gyi bogs 'don sgyu lus 'byongs pa yis/__/snod bcud lha sku 'ja' tshon lta bu 'char/__/bde chen rang bzhin sgyu ma'i gzugs brnyan che/__/snang srid mkha' 'gro'i dkyil 'khor 'char bar shog__/lam gyi snying po 'od gsal gnas lugs ni/__/rtog pa'i rgyu ba shin tu phra ba 'gags/__/ma bcos rig pa'i gnas lugs ji bzhin 'char/__/'od gsal de kho na nyid rtogs par shog__/lam gyi tshod 'dzin rmi lam sgyu mar sbyangs/__/lha skur ldang zhing 'od gsal ngang du bsres/__/sbyangs spel sprul bsgyur gnad la goms pa yis/__/'khrul pa rmi lam rang sar dag par shog__/lam gyi sun ma 'pho ba'i nyams len gyis/__/rlung sems rig pa dbyer med thig le che/__/rlung sbyor gyis bskul sgra yi 'pho ba dang /__/'og min mkha' spyod chen por skye bar shog__/lam khyer bar do da lta'i snang ba kun/__/sems rlung bde ba rdo rje phag mo yi/__/sku gsung thugs kyi ngo bor lam gyis 'char/__/chags sdang rmongs pa'i 'khrul rtog kun sbyongs shog__/de ltar thabs lam snying po chos drug gi__/nyams len zab mor rtag tu brtson pa'i mthus/__/gsung gi rdo rje longs sku 'grub pa'i thabs/__/gsang ba'i dbang gi nyams len mthar phyin shog__/'og sgo mkha' gsang bde chen rol pa yi/__/chos kyi phyag rgyas bdag byin brlab pa dang /__/dam tshig phyag rgya'i nyams len la brtson pas/__/snang ba thams cad bde bar 'char bar shog__/rtsol med bde dang 'dzag med tshul khrims kyi/__/zag med nyams myong rgyud la skyes pa na/__/las kyi phyag rgya pad can pho nya dang /__/'du shes gsum gyi rnal 'byor brtson par shog__/rtsa yig byin brlab sems gsum mngon du byas/__/'dren bkram brtan cing mi rtog dang du sba/__/thugs kyi rdo rje bde chen chos sku yi/__/nyams len gsum pa'i lam mchog mthar phyin shog__/lta ba ka dag chos skur thag chod cing /__/sgom pa longs skur nyams su blangs pa dang /__/spyod pa sprul skur rtsal sbyong rnal 'byor gyis/__/byar med don la rtag tu brtson par shog__/phyi rol snang ba sems kyi rtsal las shar/__/sems nyid skye 'gags gnas pa'i ngo bos stong /__stong pa phyogs su ma lhung gdod ma'i gshis/__/'od gsal lhun grub rang ngo shes par shog__/gnas 'gyu thams cad rang bab ma bcos bzhag__/dgag sgrub chags sdang re dogs kun bral zhing /__/gzung 'dzin spang blang gdod nas rang sar grol/__/rig stong ye shes rdo rjer 'grub par shog__/lam gyi gegs sel bogs 'don kun gyi snying /__/dus gsum rgyal ba rnams kyis bsngags pa'i lam/__/lam zab bla ma'i rnal 'byor la brtson pas/__/lam gyi gegs 'khrul thams cad rang grol shog__/dang po yang dag go don rgyud la 'char/__/bar du bde gsal mi rtog nyams 'char zhing /__/tha ma sprin thag chad pa'i nam mkha' ltar/__/rig pa rjen gcer mngon sum rtogs par shog__/'khor 'das gnyis snang 'khrul rtog bar lag phyed/__/re dogs mdud zhig gnas lugs mtshang brdol nas/__/'khor 'das dbyer med 'od gsal rdzogs pa che'i/__/gdod ma'i sa la gtan srid zin par shog__/gal te tshe 'dir grol bar ma gyur na/__/'pho ba'i stobs kyis rdo rje btsun mo'i zhing /__/bla ma badz+ra wA ra hi nyid kyis/__/rjes su bzung nas lam mchog mthar phyin shog__/gal te der yang brtan pa ma thob na/__/bar do khyer so gsum gyi rnal 'byor gyis/__/bla ma bcom ldan 'das mas lag mkhrig nas/__/bzung ste mkha' spyod gnas su khrid par shog__/mdor na skye dang tshe rabs thams cad du/__/dpal chen rdo rje mkha' 'gro'i lha tshogs kyis/__/rjes su bzung nas don gnyis lhun gyis grub/__/brtan g.yo'i dngos kun bde chen 'grub par shog__/ces pa'ang me yos lor 'jam dbyangs blo gros rgya mtshos mkha' 'gro gsang ba 'dus pa'i sgrub mchod skabs bsnyen pa'i thun seng zhig la shar mar bris pa 'dis kyang /__bdag gzhan thams cad bla ma rdo rje phag mos rjes su 'dzin pa'i rgyur gyur cig__/sarba dA mang+ga laM/__shu b+haM//___//