JKCL-KABUM-08-NYA-011-049

🚧 This website is under continued development. We appreciate your patience!

Previous Text Back to Volume PageNext Text

Wylie title	'jig rten pa'i lha dmar mchod byed pa rnams la springs pa
Location	chos kyi blo gros bka' 'bum Volume 8, sde tshan 11, Text 49, Pages 406-410 (Folios 61b4 to 63b4)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. 'jig rten pa'i lha dmar mchod byed pa rnams la springs pa. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 8: 406-410. Bir, H.P.: Khyentse Labrang, 2012.
Genre	Advice - zhal gdams
Lotsawa House Link	https://www.lotsawahouse.org/tibetan-masters/jamyang-khyentse-chokyi-lodro/against-red-offerings
Colophon	།ཞེས་བརྩེ་བས་ལེགས་པར་འདོམས་པ་པོ་ནི་མཉྫུ་དྷརྨ་མ་ཏིས་བྲིས་པའོ།།
	/zhes brtse bas legs par 'doms pa po ni many+dzu d+harma ma tis bris pa'o//

1 Texts in this Section (sde tshan or chos tshan)

49 406-410	འཇིག་རྟེན་པའི་ལྷ་དམར་མཆོད་བྱེད་པ་རྣམས་ལ་སྤྲིངས་པ། 'jig rten pa'i lha dmar mchod byed pa rnams la springs pa Advice - zhal gdams	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

༈ འཇིག་རྟེན་པའི་ལྷ་དམར་མཆོད་བྱེད་པ་རྣམས་ལ་སྤྲིངས་པ། ཁྱེད་རྣམས་ཀྱིས་མཆོད་པའི་ལྷ་དེ་དབང་ཕྱུག་དང་། ཁྱབ་འཇུག། ལྷ་མོ་ཀརྟི་ཀ་དང་ཙནྟྲི་ཀ་ཡིན་ནམ་མིན། ཡིན་ན། དེ་རྣམས་ལ་སེམས་ཅན་ལ་བྱམས་སྙིང་རྗེ་ཡོད་པ་ཨི་རེད། བྱམས་སྙིང་རྗེ་མེད་ན་ཁྱོད་ཀྱི་མཆོད་པས་ཅི་ཞིག་ཕན། བྱམས་སྙིང་རྗེ་ཅན་ཡིན་ན། སེམས་ཅན་གསོད་རྒྱུ་དེ་ལ་བྱམས་སྙིང་རྗེ་མི་དགོས་པ་ཅི་རེད། བྱ་དང་གླང་བསད་པ་དེས་ཕན་ན། ཁྱེད་རང་རྣམས་བསད་ནས་ལྷ་ལ་མཆོད་ན་ཕན་སྟོབས་ཅི་ཡི་ཕྱིར་མི་ཆེ། རང་གི་སྲོག་ལ་རྩིས་ཆེན་བྱེད། གཞན་གྱི་སྲོག་ལ་འཚེ་བ་འདི་ནི་ཤིན་ཏུ་བླུན་པོ་མ་རབས་ཡིན་ནོ། །ལྷ་དབང་ཕྱུག་དང་ཁྱབ་འཇུག་སོགས་དཀར་ཕྱོགས་པ་ཡིན་ནམ་མིན། མཐོ་རིས་ཀྱི་ལྷ་ཡིན་ནམ་མིན། དཀར་ཕྱོགས་པ་དང་། མཐོ་རིས་སམ། གཙང་རིས་ཀྱི་ལྷ་ཡིན་ན་ཤ་ཁྲག་གི་དམར་མཆོད་བྱེད་པ་མི་འཐད། མིན་ན་འདྲེ་སྲིན་པོ་དང་ཁྱད་མེད། དབང་ཕྱུག་སོགས་འདྲེ་སྲིན་པོ་ཡིན་པ་ནི་ངེད་ཅག་སངས་རྒྱས་པ་རྣམས་ཀྱིས་ཀྱང་མི་བཤད་དོ། །དེས་ན་གཙང་མའི་ལྷ་སེམས་ཅན་ལ་བྱམས་ཐུགས་བརྩེ་བ་ཅན་རྣམས་ལ་སེམས་ཅན་གྱི་སྲོག་ལ་གནོད་འཚེ་བྱས་ནས་མཆོད་པ་ཤིན་ཏུ་མི་རིགས་པས་དེ་འདྲ་སྤངས་ནས་གཙང་མའི་མཆོད་པ་རྒྱ་ཆེན་པོས་ལྷ་མཆོད་པར་རིགས་ཤིང་འཐད་པ་ཡིན་ནོ། དེ་ལྟར་སྲོག་བཅད་པའི་རྣམ་སྨིན་གྱི་འབྲས་བུ་དམྱལ་བ། ཡི་དྭགས། དུད་འགྲོར་སྐྱེ་བ་དང་། ཁྱད་པར་དུ་དམྱལ་བ་ཡང་སོས་སུ་སྐྱེས་ནས་སྲོག་རེ་བཅད་པ་ལ་སྲོག་ལེན་ལྔ་བརྒྱ་རེ་འཇལ་དགོས་པ་དང་། རྒྱུ་མཐུན་གྱི་འབྲས་བུ་གར་སྐྱེས་ཀྱང་ཚེ་ཐུང་ནད་མང་། སྲོག་བཅད་བྱེད་པ་ལ་དགའ་བ་དང་། དབང་འབྲས་རང་སྐྱེ་བའི་ཡུལ་ས་ཕྱོགས་རྩུབ་མོ་ལ་སྐྱེ་བ་སོགས་ཉེས་པ་ཚད་མེད་པ་སྟེ། ཏིང་འཛིན་རྒྱལ་པོ་ལས། ལས་རྣམས་བྱེད་པ་མེད་པར་མི་འགྱུར་ཏེ། །དཀར་ནག་ཇི་བཞིན་འབྲས་བུ་སྨིན་པར་བྱེད། །ཅེས་དང་། བདེན་པ་པོའི་ལེའུ་ལས། རྒྱལ་པོ་ཁྱོད་ནི་སྲོག་གཅོད་མ་མཛད་ཅིང་། །སྐྱེ་བོ་ཀུན་ལ་སྲོག་ནི་རབ་ཏུ་ཕོངས། །དེ་བས་ཡུན་རིང་ཚེ་བསྲུངས་སུ་འདོད་པས། །ཡིད་ཀྱི་གུ་ལའང་སྲོག་བཅད་མི་བསམ་མོ། །ཞེས་གསུངས་པས། ཚེ་རིང་ནད་མེད་འདོད་ན་སྲོག་བཅད་སྤངས་དགོས་ཤིང་། དེ་ཡང་སྡིག་པ་བྱས་མ་ཐག་ཏུ་དེ་ཡི་མོད་ལ་རྣམ་སྨིན་མྱང་བ་མེད་ནའང་ཆུད་མི་ཟ་བར་ངེས་པར་མྱོང་སྟེ། མདོ་ལས། སྡིག་ལས་འཕྲལ་ཏུ་ངེས་པར་ནི། །མཚོན་བཞིན་གཅོད་པར་མི་བྱེད་ཀྱང་། །སྡིག་པའི་ལས་ཀྱི་འགྲོ་བ་དག། ཕ་རོལ་ཏུ་ནི་མངོན་པར་འགྱུར། །ཞེས་སོགས་གསུངས། རབ་ཏུ་བྱུང་བའི་བར་དུ་གཅོད་པའི་མདོ་ལས། སྲོག་གཅོད་ཀྱི་རྣམ་སྨིན་མེ་ལྕེ་ལ་རྒྱུ་བའི་བྱ་མེ་ཡི་རྩེ་མོ་ལ་གནས་ཀྱང་མི་ཚིག་པ་ཞིག་གི་སྲོག་བཅད་བའི་དམྱལ་བའི་སེམས་ཅན་དེས་མགོ་བརྟོལ་ནས་ཁྲག་འཐུང་བ་དང་། ཐོད་ཕྲག་ན་རྒྱུ་བའི་བྱས་ཀླད་པ་བརྟོལ་ཞིང་འཐུང་བ་དང་། ལྕེ་ཡི་ཤ་ཟ་ཞེས་བྱ་བའི་བྱས་ལྕེ་དྲལ་ནས་ཟ་བར་བྱེད། དེ་ལ་སོགས་དང་། མནར་མེད་ཀྱི་ཕྱོགས་གཅིག་ན། བྱ་འདབས་འཇིགས་ཞེས་བྱ་བ་དཔག་ཚད་སུམ་འབུམ་ཡོད་པ་དེ་དང་། དམྱལ་བའི་བྱ་གཞན་དག་དང་ལྷན་ཅིག་ལོ་བརྒྱ་སྟོང་དུ་མར་ཟ་བར་སྐྱེའོ། །དེ་ལས་ཐར་ནས་གཡང་སའི་ངམ་གྲོག་ཅེས་བྱ་བར་འཁོར་ཡུག་ཏུ་མེ་ཡི་ཕུང་པོ་བཅུ་གཅིག་གི་བསྐོར་ཏེ་ལས་ཀྱི་ཞགས་པས་བཅིངས་ནས་གྲོགས་མེད་པར་ཕྱིན་པས་ངམ་གྲོག་གཡང་ས་ཆེན་པོར་ལྷུང་ནས་རྐང་པ་ཐམས་ཅད་ཞུ། བཏེགས་ན་ནི་སོས་དེ་ལྟ་བུའི་སྡུག་བསྔལ་དང་། ཡང་བྱ་ཀངྐ་སོགས་ཀྱི་ལོ་བརྒྱ་སྟོང་དུ་མར་ཟ་བ་དང་། མེ་ལྕེའི་འཁོར་ལོ་སྟོང་ཕྲག་གིས་ལུས་དུམ་བུར་གཏོང་བ་དང་། རྐང་མཐིལ་ན་གསལ་ཤིང་གིས་ཕུག་པ་དང་། སྲོག་ཆགས་རྣམས་ཀྱི་ལུས་ཕྱི་ནང་ཐམས་ཅད་ཟ་བར་བྱེད་པ་དང་། མེ་མདག་གི་མེ་འབོགས་ནས་རྒྱུགས་པ་དང་། གཤིན་རྗེའི་སྐྱེས་བུའི་མཚོན་ཆས་ལུས་གཤགས་གཏུབ་སོགས་སྡུག་བསྔལ་དཔག་ཏུ་མེད་པར་མྱོང་དགོས་པར་གསུངས། ཁྱེད་ཅག་གི་སྟོན་པ་དབང་ཕྱུག་དང་། ཁྱབ་འཇུག་ལྷ་མོ་སོགས་བྱང་ཆུབ་སེམས་དཔའ་འགྲོ་བ་ལ་ཐུགས་བརྩེ་བ་ཅན་ཡིན་ན། ཤ་མི་བཟའ་སྟེ། ལང་ཀར་གཤེགས་པའི་མདོ་ལས། འདི་ལྟར་བྱང་ཆུབ་སེམས་དཔའ་སྙིང་བརྩེ་བའི་བདག་ཉིད་ཅན་གྱིས་ཤ་ཐམས་ཅད་མི་བཟའ་འོ། །ཞེས་དང་། གང་གི་ཐུབ་པའི་ཚིགས་འདས་ཏེ། །བསམ་པ་ངན་པས་ཤ་ཟ་ན། །ཤིན་ཏུ་མི་བཟད་དམྱལ་བར་ཡང་། །སྡིག་པའི་ལས་ཅན་དེ་དག་འདོང་། །ཞེས་སོགས་གསུངས། ཁྱབ་འཇུག་གི་འཇུག་པ་བཅུ་ཡི་ཡ་གྱལ་ཤཱཀྱ་ཐུབ་པའང་ཁྱབ་འཇུག་གི་སྤྲུལ་པར་བཤད་པས། དེ་ལྟར་ན་སྤྲུལ་གཞི་ཁྱབ་འཇུག་ཀྱང་། སངས་རྒྱས་འཕགས་པ་ཞིག་ཡིན་དགོས་ཤིང་། དེ་ལྟར་ན། བཅོམ་ལྡན་འདས་ཀྱི་ཞལ་ནས། གང་དག་བདེ་བས་ཐུབ་རྣམས་དགྱེས་འགྱུར་ཞིང་། །གང་ལ་གནོད་ན་མི་དགྱེས་འབྱུང་འགྱུར་བ། །དེ་དག་དགའ་བས་ཐུབ་དབང་ཀུན་དགྱེས་ཤིང་། །དེ་ལ་གནོད་བྱས་ཐུབ་ལ་གནོད་པ་བྱས། སོགས་བཀའ་སྩལ་བ་ལྟར་སེམས་ཅན་ལ་གནོད་པ་བྱས་ན་ཐུགས་མི་དགྱེས་བར་འགྱུར་བའི་ལས་ངན་ཚབ་པོ་ཆེ་བསགས་པར་འགྱུར་བས། དེས་ན་སེམས་ཅན་བསད་པའི་ཤ་ཁྲག་གི་དམར་མཆོད་འདི་ལ་ཤིན་ཏུ་འཛེམ་པར་བྱ་དགོས་པ་ཡིན་ནོ། །ཞེས་བརྩེ་བས་ལེགས་པར་འདོམས་པ་པོ་ནི་མཉྫུ་དྷརྨ་མ་ཏིས་བྲིས་པའོ།། །།

[edit]

!__'jig rten pa'i lha dmar mchod byed pa rnams la springs pa/__khyed rnams kyis mchod pa'i lha de dbang phyug dang /__khyab 'jug/__lha mo karti ka dang tsan+t+ri ka yin nam min/__yin na/__de rnams la sems can la byams snying rje yod pa i red/__byams snying rje med na khyod kyi mchod pas ci zhig phan/__byams snying rje can yin na/__sems can gsod rgyu de la byams snying rje mi dgos pa ci red/__bya dang glang bsad pa des phan na/__khyed rang rnams bsad nas lha la mchod na phan stobs ci yi phyir mi che/__rang gi srog la rtsis chen byed/__gzhan gyi srog la 'tshe ba 'di ni shin tu blun po ma rabs yin no/__/lha dbang phyug dang khyab 'jug sogs dkar phyogs pa yin nam min/__mtho ris kyi lha yin nam min/__dkar phyogs pa dang /__mtho ris sam/__gtsang ris kyi lha yin na sha khrag gi dmar mchod byed pa mi 'thad/__min na 'dre srin po dang khyad med/__dbang phyug sogs 'dre srin po yin pa ni nged cag sangs rgyas pa rnams kyis kyang mi bshad do/__/des na gtsang ma'i lha sems can la byams thugs brtse ba can rnams la sems can gyi srog la gnod 'tshe byas nas mchod pa shin tu mi rigs pas de 'dra spangs nas gtsang ma'i mchod pa rgya chen pos lha mchod par rigs shing 'thad pa yin no/__de ltar srog bcad pa'i rnam smin gyi 'bras bu dmyal ba/__yi dwags/__dud 'gror skye ba dang /__khyad par du dmyal ba yang sos su skyes nas srog re bcad pa la srog len lnga brgya re 'jal dgos pa dang /__rgyu mthun gyi 'bras bu gar skyes kyang tshe thung nad mang /__srog bcad byed pa la dga' ba dang /__dbang 'bras rang skye ba'i yul sa phyogs rtsub mo la skye ba sogs nyes pa tshad med pa ste/__ting 'dzin rgyal po las/__las rnams byed pa med par mi 'gyur te/__/dkar nag ji bzhin 'bras bu smin par byed/__/ces dang /__bden pa po'i le'u las/__rgyal po khyod ni srog gcod ma mdzad cing /__/skye bo kun la srog ni rab tu phongs/__/de bas yun ring tshe bsrungs su 'dod pas/__/yid kyi gu la'ang srog bcad mi bsam mo/__/zhes gsungs pas/__tshe ring nad med 'dod na srog bcad spangs dgos shing /__de yang sdig pa byas ma thag tu de yi mod la rnam smin myang ba med na'ang chud mi za bar nges par myong ste/__mdo las/__sdig las 'phral tu nges par ni/__/mtshon bzhin gcod par mi byed kyang /__/sdig pa'i las kyi 'gro ba dag/__pha rol tu ni mngon par 'gyur/__/zhes sogs gsungs/__rab tu byung ba'i bar du gcod pa'i mdo las/__srog gcod kyi rnam smin me lce la rgyu ba'i bya me yi rtse mo la gnas kyang mi tshig pa zhig gi srog bcad ba'i dmyal ba'i sems can des mgo brtol nas khrag 'thung ba dang /__thod phrag na rgyu ba'i byas klad pa brtol zhing 'thung ba dang /__lce yi sha za zhes bya ba'i byas lce dral nas za bar byed/__de la sogs dang /__mnar med kyi phyogs gcig na/__bya 'dabs 'jigs zhes bya ba dpag tshad sum 'bum yod pa de dang /__dmyal ba'i bya gzhan dag dang lhan cig lo brgya stong du mar za bar skye'o/__/de las thar nas g.yang sa'i ngam grog ces bya bar 'khor yug tu me yi phung po bcu gcig gi bskor te las kyi zhags pas bcings nas grogs med par phyin pas ngam grog g.yang sa chen por lhung nas rkang pa thams cad zhu/__btegs na ni sos de lta bu'i sdug bsngal dang /__yang bya kang+ka sogs kyi lo brgya stong du mar za ba dang /__me lce'i 'khor lo stong phrag gis lus dum bur gtong ba dang /__rkang mthil na gsal shing gis phug pa dang /__srog chags rnams kyi lus phyi nang thams cad za bar byed pa dang /__me mdag gi me 'bogs nas rgyugs pa dang /__gshin rje'i skyes bu'i mtshon chas lus gshags gtub sogs sdug bsngal dpag tu med par myong dgos par gsungs/__khyed cag gi ston pa dbang phyug dang /__khyab 'jug lha mo sogs byang chub sems dpa' 'gro ba la thugs brtse ba can yin na/__sha mi bza' ste/__lang kar gshegs pa'i mdo las/__'di ltar byang chub sems dpa' snying brtse ba'i bdag nyid can gyis sha thams cad mi bza' 'o/__/zhes dang /__gang gi thub pa'i tshigs 'das te/__/bsam pa ngan pas sha za na/__/shin tu mi bzad dmyal bar yang /__/sdig pa'i las can de dag 'dong /__/zhes sogs gsungs/__khyab 'jug gi 'jug pa bcu yi ya gyal shAkya thub pa'ang khyab 'jug gi sprul par bshad pas/__de ltar na sprul gzhi khyab 'jug kyang /__sangs rgyas 'phags pa zhig yin dgos shing /__de ltar na/__bcom ldan 'das kyi zhal nas/__gang dag bde bas thub rnams dgyes 'gyur zhing /__/gang la gnod na mi dgyes 'byung 'gyur ba/__/de dag dga' bas thub dbang kun dgyes shing /__/de la gnod byas thub la gnod pa byas/__sogs bka' stsal ba ltar sems can la gnod pa byas na thugs mi dgyes bar 'gyur ba'i las ngan tshab po che bsags par 'gyur bas/__des na sems can bsad pa'i sha khrag gi dmar mchod 'di la shin tu 'dzem par bya dgos pa yin no/__/zhes brtse bas legs par 'doms pa po ni many+dzu d+harma ma tis bris pa'o//___//