ཞལ་གདམས་བདུད་རྩིའི་ཐིག་ཕྲེང་།

🚧 This website is under continued development. We appreciate your patience!

Previous Text Back to Volume PageLast text in section.

Wylie title	zhal gdams bdud rtsi'i thig phreng
Location	chos kyi blo gros bka' 'bum Volume 8, sde tshan 11, Text 50, Pages 410-414 (Folios 63b4 to 65b5)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. zhal gdams bdud rtsi'i thig phreng. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 8: 410-414. Bir, H.P.: Khyentse Labrang, 2012.
Genre	Advice - zhal gdams
Colophon	།ཅེས་པའང་རང་སློབ་འཇམ་དབྱངས་ཐུབ་བསྟན་ཀྱི་བསྐུལ་ངོར་ཆོས་ཀྱི་བློ་གྲོས་པས་གྲོས་སུ་གདབ་པའོ།།
	/ces pa'ang rang slob 'jam dbyangs thub bstan kyi bskul ngor chos kyi blo gros pas gros su gdab pa'o//

1 Texts in this Section (sde tshan or chos tshan)

50 410-414	ཞལ་གདམས་བདུད་རྩིའི་ཐིག་ཕྲེང་། zhal gdams bdud rtsi'i thig phreng Advice - zhal gdams	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

༈ ཞལ་གདམས་བདུད་རྩིའི་ཐིག་ཕྲེང་ཅེས་བྱ་བ་བཞུགས་སོ། །ཨོཾ་སྭསྟི། ཀུན་མཁྱེན་འགྲོ་བའི་བླ་མ་རིགས་བརྒྱའི་བདག། བཀའ་དྲིན་མཉམ་མེད་དཔལ་ལྡན་བླ་མ་ཡི། །ཞབས་སེན་ཚངས་གནས་འཁོར་ལོར་མཆོད་བྱས་ནས། །རང་དང་གཞན་ལ་ཕན་པའི་གྲོས་ཞིག་གླེངས། ཀྱེ་མ། དལ་འབྱོར་རིན་ཆེན་རྙེད་པ་འདི། །སྟེས་དབང་མ་ཡིན་སྔོན་བསགས་དགེ་བ་ནི། །སྟོབས་ཆེན་བསགས་པའི་འབྲས་བུ་ད་རེས་ཐོབ། །དོན་མེད་ཆུད་ཟོས་བཏང་ན་གྱོང་ཆེན་བརྡབ། །འདི་ནི་མི་རྟག་མྱུར་དུ་འཇིག་པ་སྟེ། །རྩྭ་རྩེའི་ཟིལ་བ་ལྟ་བུར་ལུས་སྲོག་གཡོ། །སྐད་ཅིག་སྐད་ཅིག་ཚེ་ནི་འཛད་པ་ཡང་། །འཁྲུལ་པས་བསླུས་ཏེ་མི་ཤི་གསོན་དུ་རེ། །སྣོད་ཀྱི་འཇིག་རྟེན་མི་རྟག་གཡོ་ཞིང་འཇིག། བཅུད་ཀྱི་སེམས་ཅན་རྣམས་ཀྱང་སྐྱེ་ཞིང་འཕོ། །བདག་གི་སྲོག་ནི་ཆུ་ཡི་ཆུ་བུར་བཞིན། །ད་ལྟ་ཡོད་ཀྱང་ད་ལྟ་མེད་ཀྱང་སྲིད། །དེ་ཕྱིར་འཇིག་རྟེན་ཚེ་འདིའི་གྲབས་ཆིས་སྤངས། །འདི་ནི་མནོག་ཆུང་སྙིང་པོ་ཅུང་ཟད་མེད། །ཡུན་རིང་མ་འདུག་དབེན་པའི་རི་ལ་སོང་། །ཕྱི་མར་ཕན་ངེས་དམ་པའི་ལྷ་ཆོས་ཞིག། འཕྲལ་དང་འཕྲལ་དུ་སྒྲུབ་ན་མི་འཐད་དམ། །ཚེ་ནི་ཕྱི་མར་དགེ་སྡིག་གང་བསགས་དེའི། །རྣམ་སྨིན་ཁུར་བཏེགས་ལས་ནི་ཆུད་མི་འཛད། །རང་བྱས་རང་གི་ཐོག་ཏུ་སྨིན་པས་ན། །མི་དགེའི་ལས་རྣམས་སྤང་བར་མི་འཐད་དམ། །རང་ཅག་སངས་རྒྱས་བསྟན་པའི་སྒོར་ཞུགས་ནས། །སྐྲ་བྲེག་མགོ་ཟླུམ་ཀློག་འདོན་ཤེས་ཙམ་གྱིས། །ཆོས་པར་མི་འགྲོ་རང་སེམས་གྱོང་པོ་ལ། །བརྟགས་དཔྱད་བྱས་ནས་འདུལ་བར་མི་འཐད་དམ། །ཆོས་རྣམས་རྒྱུ་དང་འབྲས་བུ་འབྲེལ་བ་ཅན། །རྒྱུ་དང་རྐྱེན་གྱིས་བསྐྱེད་པའི་སྡུག་ཀུན་ཆོས། །དེ་འགོག་པ་ནི་ཐར་པ་དམ་པ་སྟེ། །དེ་ཕྱིར་ལམ་བདེན་བསྟེན་པར་མི་འཐད་དམ། །དམན་ལམ་རང་དོན་ཡིད་བྱེད་རྟོག་པ་ཡི། །བྱང་ཆུབ་ཆེན་པོའི་ལམ་ལས་རིང་བས་ན། །རྒྱལ་དང་དེ་སྲས་བསྒྲོད་པ་གཅིག་པའི་ལམ། །བྱང་ཆུབ་སེམས་མཆོག་བསྐྱེད་པར་མི་འཐད་དམ། །དེ་ཡི་སྔོན་འགྲོ་སྲིད་པའི་རྩེ་མོ་ནས། །མནར་མེད་ཡན་ཆད་རིགས་དྲུག་འཁོར་བའི་གནས། །སྡུག་བསྔལ་མ་གཏོགས་བདེ་བའི་སྐབས་མེད་པའི། །ཉེས་དྲན་ངེས་འབྱུང་བསྐྱེད་པ་མི་འཐད་དམ། །འགྲོ་ཀུན་རང་གི་ཕ་མར་མ་གྱུར་མེད། །ཕ་མ་སྡུག་བསྔལ་གནས་ལས་སྒྲོལ་བའི་ཕྱིར། །དཀོན་མཆོག་གསུམ་ལ་སྐྱབས་སུ་འགྲོ་བ་དང་། །གཞན་ཕན་སེམས་ལ་བློ་སྦྱོང་མི་འཐད་དམ། །རང་བདེ་འདོད་ལས་ཉེས་པ་ཀུན་འབྱུང་ཞིང་། །གཞན་བདེ་འདོད་ལས་འདི་ཕྱིའི་དོན་ཆེན་འགྲུབ། །དེ་སླད་བདག་ཏུ་འཛིན་པའི་འདྲེ་ཆེན་འདི། །བརླག་པའི་ཐབས་ལ་འབད་པ་མི་འཐད་དམ། །ལོངས་སྤྱོད་ཡོད་ན་སེར་སྣས་མ་བཅིངས་པར། །དཀོན་མཆོག་མཆོད་དང་སྦྱིན་ལ་བརྩོན་པ་དང་། །མེད་ཀྱང་རང་གི་ལུས་དང་དགེ་རྩ་འབུལ། །ཚོགས་གཉིས་བྲེ་ཁ་བསགས་པར་མི་འཐད་དམ། །བདེ་གཤེགས་སྙིང་པོ་ཡོན་ཏན་ལྷུན་གྲུབ་ཀྱང་། །རང་སེམས་གློ་བུར་དྲི་མས་སྒྲིབ་པས་ན། །དྲི་མ་དག་ཕྱིར་སྡིག་པ་སྦྱང་བའི་སྒོ། །གཉེན་པོ་སྟོབས་བཞི་བསྐྱེད་པ་མི་འཐད་དམ། །ཐར་པའི་ལམ་སྟོན་དགེ་བའི་བཤེས་གཉེན་དང་། །ཁྱད་པར་དབང་བསྐུར་རྒྱུད་དང་མན་ངག་སྟོན། །སྡོམ་གསུམ་བཀའ་དྲིན་ཆེན་པོས་སྩོལ་མཛད་པའི། །བླ་མར་མོས་གུས་བསྐྱེད་པ་མི་འཐད་དམ། །དེ་ཡང་རང་ལ་བླ་མས་ངོ་བསྟོད་དང་། །གསོལ་རས་གནང་སྦྱིན་བྱེད་དུས་དད་པ་ཡོད། །བཀའ་བཀྱོན་ཐུགས་སྡང་ཕྲ་མོ་ཙམ་བྱུང་ཀྱང་། །མི་དད་ལོག་ལྟ་སྤངས་བ་མི་འཐད་དམ། །རྡོ་རྗེ་འཆང་ཞེས་ཚིག་སྙན་བརྗོད་པ་ཙམ། །མོས་གུས་མིན་ལ་མཛད་སྤྱོད་དག་མ་དག། ཐམས་ཅད་རྒྱལ་བའི་ཕྲིན་ལས་ཤེས་པ་ཡི། །དད་མོས་གོ་བ་བསྐྱེད་པ་མི་འཐད་དམ། །དབང་བསྐུར་བརྒྱ་སྟོང་ཁྲི་འབུམ་ཐོབ་གྱུར་ཀྱང་། །བསྐྱེད་རྫོགས་ལམ་ལ་གོ་བ་མ་ཆགས་ཤིང་། །དབང་དོན་ཡེ་ཤེས་མྱོང་བ་རྡུལ་ཙམ་མེད། །དེ་འདྲའི་ལུགས་ངན་སྤངས་བར་མི་འཐད་དམ། །དམ་ཚིག་བསྲུངས་ཞེས་རང་གི་འདོད་པ་དང་། །མཐུན་ན་སྒྲུབ་ཅིང་མི་མཐུན་བཀའ་རྩི་མེད། །རང་གི་སྣང་བར་གང་དྲན་བྱེད་པ་ཡི། །དམ་ཉམས་དེ་འདྲ་བསྐྱུར་ན་མི་འཐད་དམ། །བསྐྱེད་རིམ་སྒོམ་ཟེར་རྡོས་བཅས་ཨ་འཐས་ཅན། །སྔགས་བཟླས་དུས་ན་ལོང་གཏམ་དང་བསྲེ་ཞིང་། །རྣམ་རྟོག་རྒྱ་འབྱམས་ཕྲེང་ནག་བསྐོར་དེད་བྱེད། །ལྷ་བསྒོམ་སྔགས་བཟླས་བཞག་ན་མི་འཐད་དམ། །རྫོགས་རིམ་སྒོམ་ལོའི་རླུང་ནི་སད་སུད་བཟུང་། །འཁྲིག་པའི་བདེ་བ་དང་འདྲའི་འབར་འཛག་སྒོམ། །དྲག་ན་བྱང་སེམས་འཆོར་ལ་སྙམས་བྱེད་པའི། །དེ་འདྲའི་རྫོགས་རིམ་འཇོག་པ་མི་འཐད་དམ། །སྣང་བ་ཐམས་ཅད་སེམས་སྣང་མ་ཤེས་པར། །འཁྲུལ་པའི་སྣང་བར་ཨ་འཐས་གཉིས་འཛིན་གྱི། །རྟོག་པས་བཅིངས་ནས་གཉུག་མའི་དོན་མ་རྟོགས། །ཡེ་ཤེས་ཡིན་ལོ་བསྐྱུར་བར་མི་འཐད་དམ། །མདོར་ན་སྦྱོར་བ་སེམས་བསྐྱེད་དམ་པ་དང་། །དངོས་གཞི་དམིགས་མེད་རྗེས་ལ་མི་དམིགས་བསྔོ། །དྲན་ཤེས་བག་ཡོད་བླ་མར་མོས་གུས་སྒོམ། །ཡེ་ཤེས་བསྐྱེད་ལ་འབད་པ་མི་འཐད་དམ། །དེ་ལྟར་གྲོས་ཀྱི་གདམས་པ་འདི་རྣམས་ཀྱང་། །རང་ཉམས་མ་ལོང་རང་སྐྱོན་ཤེས་བཞིན་དུ། །སྤངས་ན་དགའ་བའི་འདུན་པ་ཡོད་མོད་ཀྱང་། །ལག་ལེན་མ་ཐེབས་ཤེས་ཚོད་ཁྱོད་ལ་གདམས། །དེ་ཡི་དགེ་བས་བདག་གཞན་ཐམས་ཅད་ཀྱང་། །རྒྱལ་བའི་སྲས་ཀྱི་ལམ་བཟང་ལ་ཞུགས་ནས། །བྱང་ཆུབ་སྤྱོད་པ་ཚུལ་བཞིན་ཉམས་བླངས་པས། །རང་གཞན་དོན་གཉིས་ལྷུན་གྱིས་གྲུབ་པར་སྨོན། །ཅེས་པའང་རང་སློབ་འཇམ་དབྱངས་ཐུབ་བསྟན་ཀྱི་བསྐུལ་ངོར་ཆོས་ཀྱི་བློ་གྲོས་པས་གྲོས་སུ་གདབ་པའོ།། །།

[edit]

!_zhal gdams bdud rtsi'i thig phreng ces bya ba bzhugs so/__/oM swasti/__kun mkhyen 'gro ba'i bla ma rigs brgya'i bdag/__bka' drin mnyam med dpal ldan bla ma yi/__/zhabs sen tshangs gnas 'khor lor mchod byas nas/__/rang dang gzhan la phan pa'i gros zhig glengs/__kye ma/__dal 'byor rin chen rnyed pa 'di/__/stes dbang ma yin sngon bsags dge ba ni/__/stobs chen bsags pa'i 'bras bu da res thob/__/don med chud zos btang na gyong chen brdab/__/'di ni mi rtag myur du 'jig pa ste/__/rtswa rtse'i zil ba lta bur lus srog g.yo/__/skad cig skad cig tshe ni 'dzad pa yang /__/'khrul pas bslus te mi shi gson du re/__/snod kyi 'jig rten mi rtag g.yo zhing 'jig/__bcud kyi sems can rnams kyang skye zhing 'pho/__/bdag gi srog ni chu yi chu bur bzhin/__/da lta yod kyang da lta med kyang srid/__/de phyir 'jig rten tshe 'di'i grabs chis spangs/__/'di ni mnog chung snying po cung zad med/__/yun ring ma 'dug dben pa'i ri la song /__/phyi mar phan nges dam pa'i lha chos zhig/__'phral dang 'phral du sgrub na mi 'thad dam/__/tshe ni phyi mar dge sdig gang bsags de'i/__/rnam smin khur btegs las ni chud mi 'dzad/__/rang byas rang gi thog tu smin pas na/__/mi dge'i las rnams spang bar mi 'thad dam/__/rang cag sangs rgyas bstan pa'i sgor zhugs nas/__/skra breg mgo zlum klog 'don shes tsam gyis/__/chos par mi 'gro rang sems gyong po la/__/brtags dpyad byas nas 'dul bar mi 'thad dam/__/chos rnams rgyu dang 'bras bu 'brel ba can/__/rgyu dang rkyen gyis bskyed pa'i sdug kun chos/__/de 'gog pa ni thar pa dam pa ste/__/de phyir lam bden bsten par mi 'thad dam/__/dman lam rang don yid byed rtog pa yi/__/byang chub chen po'i lam las ring bas na/__/rgyal dang de sras bsgrod pa gcig pa'i lam/__/byang chub sems mchog bskyed par mi 'thad dam/__/de yi sngon 'gro srid pa'i rtse mo nas/__/mnar med yan chad rigs drug 'khor ba'i gnas/__/sdug bsngal ma gtogs bde ba'i skabs med pa'i/__/nyes dran nges 'byung bskyed pa mi 'thad dam/__/'gro kun rang gi pha mar ma gyur med/__/pha ma sdug bsngal gnas las sgrol ba'i phyir/__/dkon mchog gsum la skyabs su 'gro ba dang /__/gzhan phan sems la blo sbyong mi 'thad dam/__/rang bde 'dod las nyes pa kun 'byung zhing /__/gzhan bde 'dod las 'di phyi'i don chen 'grub/__/de slad bdag tu 'dzin pa'i 'dre chen 'di/__/brlag pa'i thabs la 'bad pa mi 'thad dam/__/longs spyod yod na ser snas ma bcings par/__/dkon mchog mchod dang sbyin la brtson pa dang /__/med kyang rang gi lus dang dge rtsa 'bul/__/tshogs gnyis bre kha bsags par mi 'thad dam/__/bde gshegs snying po yon tan lhun grub kyang /__/rang sems glo bur dri mas sgrib pas na/__/dri ma dag phyir sdig pa sbyang ba'i sgo/__/gnyen po stobs bzhi bskyed pa mi 'thad dam/__/thar pa'i lam ston dge ba'i bshes gnyen dang /__/khyad par dbang bskur rgyud dang man ngag ston/__/sdom gsum bka' drin chen pos stsol mdzad pa'i/__/bla mar mos gus bskyed pa mi 'thad dam/__/de yang rang la bla mas ngo bstod dang /__/gsol ras gnang sbyin byed dus dad pa yod/__/bka' bkyon thugs sdang phra mo tsam byung kyang /__/mi dad log lta spangs ba mi 'thad dam/__/rdo rje 'chang zhes tshig snyan brjod pa tsam/__/mos gus min la mdzad spyod dag ma dag/__thams cad rgyal ba'i phrin las shes pa yi/__/dad mos go ba bskyed pa mi 'thad dam/__/dbang bskur brgya stong khri 'bum thob gyur kyang /__/bskyed rdzogs lam la go ba ma chags shing /__/dbang don ye shes myong ba rdul tsam med/__/de 'dra'i lugs ngan spangs bar mi 'thad dam/__/dam tshig bsrungs zhes rang gi 'dod pa dang /__/mthun na sgrub cing mi mthun bka' rtsi med/__/rang gi snang bar gang dran byed pa yi/__/dam nyams de 'dra bskyur na mi 'thad dam/__/bskyed rim sgom zer rdos bcas a 'thas can/__/sngags bzlas dus na long gtam dang bsre zhing /__/rnam rtog rgya 'byams phreng nag bskor ded byed/__/lha bsgom sngags bzlas bzhag na mi 'thad dam/__/rdzogs rim sgom lo'i rlung ni sad sud bzung /__/'khrig pa'i bde ba dang 'dra'i 'bar 'dzag sgom/__/drag na byang sems 'chor la snyams byed pa'i/__/de 'dra'i rdzogs rim 'jog pa mi 'thad dam/__/snang ba thams cad sems snang ma shes par/__/'khrul pa'i snang bar a 'thas gnyis 'dzin gyi/__/rtog pas bcings nas gnyug ma'i don ma rtogs/__/ye shes yin lo bskyur bar mi 'thad dam/__/mdor na sbyor ba sems bskyed dam pa dang /__/dngos gzhi dmigs med rjes la mi dmigs bsngo/__/dran shes bag yod bla mar mos gus sgom/__/ye shes bskyed la 'bad pa mi 'thad dam/__/de ltar gros kyi gdams pa 'di rnams kyang /__/rang nyams ma long rang skyon shes bzhin du/__/spangs na dga' ba'i 'dun pa yod mod kyang /__/lag len ma thebs shes tshod khyod la gdams/__/de yi dge bas bdag gzhan thams cad kyang /__/rgyal ba'i sras kyi lam bzang la zhugs nas/__/byang chub spyod pa tshul bzhin nyams blangs pas/__/rang gzhan don gnyis lhun gyis grub par smon/__/ces pa'ang rang slob 'jam dbyangs thub bstan kyi bskul ngor chos kyi blo gros pas gros su gdab pa'o//___//