JKCL-KABUM-05-CA-039

🚧 This website is under continued development. We appreciate your patience!

Previous Text Back to Volume PageNext Text

Wylie title	tshe g.yang 'gugs pa'i dbang gi mtshams sbyor nyung ngu
Location	chos kyi blo gros bka' 'bum Volume 5, Text 39, Pages 561-570 (Folios 1a1 to 5b3)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. tshe g.yang 'gugs pa'i dbang gi mtshams sbyor nyung ngu. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 5: 561-570. Bir, H.P.: Khyentse Labrang, 2012.
Genre	Prosperity Rituals - gyang 'gugs
Colophon	།ཅེས་པའང་འཕགས་མཆོག་རིན་པོ་ཆེའི་ཡབ་རྗེ་རིག་འཛིན་གྱིས་རྟེན་བཅས་བསྐུལ་ངོར། ཆོས་ཀྱི་བློ་གྲོས་པས་སོ། །།
	/ces pa'ang 'phags mchog rin po che'i yab rje rig 'dzin gyis rten bcas bskul ngor/__chos kyi blo gros pas so/__//

1 Texts in this Section (sde tshan or chos tshan)

561-570	ཚེ་གཡང་འགུགས་པའི་དབང་གི་མཚམས་སྦྱོར་ཉུང་ངུ་། tshe g.yang 'gugs pa'i dbang gi mtshams sbyor nyung ngu Prosperity Rituals - gyang 'gugs	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

༄༅། །ཚེ་གཡང་འགུགས་པའི་དབང་གི་མཚམས་སྦྱོར་ཉུང་ངུ་བཞུགས་སོ། ། སློབ་མ་རྣམས་ལ་ཁྲུས་བགེགས་བསྐྲད་སྲུང་འཁོར་རྣམས་སྤྱི་ལྟར་བྱ། འོ། ནམ་མཁའ་དང་མཉམ་པའི་སེམས་ཅན་ཐམས་ཅད་སངས་རྒྱས་ས་ལ་འགོད་པར་བྱ། དེའི་ཆེད་དུ་རཏྣ་ཐོད་ཕྲེང་རྩལ་གྱི་དབང་བསྐུར་གསན་པར་བགྱིའོ་སྙམ་པས་ཀུན་སློང་བྱང་ཆུབ་ཀྱི་མཆོག་ཏུ་ཐུགས་བསྐྱེད་པ་གསལ་བཏབ་ནས་གསན་པ་གནང་བར་ཞུ། དེ་ལ་འདིར་གང་ཞིག་གསན་པར་བྱ་བའི་ཆོས་ནི། ཤིན་ཏུ་བསྐལ་པ་བརྒྱར་ཡང་རྙེད་པར་དཀའ་བའི་དལ་འབྱོར་རྟེན་བཟང་འདི་ལྟ་བུ་ཐོབ་པའི་སྐབས་སུ་དམ་པའི་ཆོས་རྣམ་པར་དག་པ་བསྒྲུབ་དགོས། དེའང་འགལ་རྐྱེན་ཉུང་མཐུན་རྐྱེན་ཚང་བ་གཙོ་བོ་གལ་ཆེ་བས། དེའི་ཡ་གྱལ་ཚེ་རིང་བ་དང་། འབྱོར་པས་བྲེལ་ཕོངས་མེད་པ་ཞིག་དགོས། དེ་ཉིད་སྒྲུབ་པར་བྱེད་པའི་ཐབས་གསང་སྔགས་རྡོ་རྗེ་ཐེག་པ་ལས་དབང་རྒྱས་ཀྱི་ལས་རབ་འབྱམས་གསུངས་པ་རྣམས་བཀའ་གཏེར་དག་སྣང་གསུམ་དུ་འདུ་ཞིང་། དེ་ལ་ཤིན་ཏུ་ཟབ་པ་དག་སྣང་གི་ཆོས་སྡེ་ལ་བཀའ་སྲོལ་མང་དུ་བཞུགས་པ་ལས། ཕྱི་མའི་དུས་ན་འགྲན་ཟླ་བྲལ་བའི་གྲུབ་ཐོབ་ཆེན་པོ་བི་མ་ལའི་རྣམ་པར་འཕྲུལ་བ་ལྷ་བཙུན་ནམ་མཁའ་འཇིགས་མེད་ཀྱི་ཟབ་གཏེར་རིག་འཛིན་སྲོག་སྒྲུབ་ཀྱི་ཚེ་སྒྲུབ་འོད་ཀྱི་དྲྭ་བ་དང་། གཡང་འགུགས་མེ་ཏོག་ཆར་བསིལ་ལ་གངས་ལྗོངས་ཙམ་ན་འགྲན་ཟླ་དང་བྲལ་བ་པདྨ་འོད་གསལ་མདོ་སྔགས་གླིང་པས་གྲུབ་པའི་མན་ངག་གིས་ལེགས་པར་ཕྱེ་བའི་གུ་རུ་རཏྣ་ཐོད་ཕྲེང་རྩལ་གྱི་དབང་བསྐུར་བསྒྲུབ་པར་བགྱི་བ་ལ། སློབ་དཔོན་གྱི་བགྱི་འོས་རྣམས་གྲུབ་ནས། ཁྱེད་རང་རྣམས་ཀྱི་ངོ་སྐལ་དུ་གྱུར་པ་ལ་དབང་བསྐུར་གསན་པའི་ཡོན་དུ་མཎྜལ་ཕུལ། ཅེས་མཚམས་སྦྱར་ནས་མཎྜལ་ཕུལ། སྙིམས་པ་མེ་ཏོག་དང་བཅས་གསོལ་བ་འདེབས་པ་འདིའི་རྗེས་ཟློས་མཛོད། ཀུན་མཁྱེན་ཡེ་ཤེས་ཕུང་པོ་སོགས་ལན་གསུམ། རྒྱུད་རྣམ་པར་དག་པར་བྱ་བའི་སླད་དུ་མདུན་རྟེན་བླ་མ་ནོར་ལྷ་རབ་འབྱམས་རྒྱ་མཚོ་མངོན་སུམ་བཞིན་བཞུགས་པའི་སྤྱན་སྔར་བསགས་སྦྱོང་སྤེལ་གསུམ་གྱི་གནད་བསྡུས་རྒྱུན་བཤགས་འདིའི་རྗེས་ཟློས་མཛོད། རྡོ་རྗེ་སློབ་དཔོན་སངས་རྒྱས་དཔལ། །སོགས་ལན་གསུམ། དེ་རྣམས་ཀྱིས་རྒྱུད་རྣམ་པར་དག་པར་བྱས་ཟིན་ནས། དབང་གི་གཞི་འགོད་པ་ཡེ་ཤེས་པ་དབབ་པ་ལ་དམིགས་པ་འདི་བཞིན་མཛོད། ཨ་མྲྀ་ཏས་བསང་། སྭ་བྷཱ་ཝས་སྦྱངས་ཆོས་ཐམས་ཅད་སྟོང་པར་གྱུར། སྟོང་པའི་ངང་ལས་གནས་རྣམ་པར་དག་པ་པདྨ་འོད་ཀྱི་ཕོ་བྲང་ནོར་བུའི་བ་གམ་བརྩེགས་པའི་གཞལ་ཡས་ཁང་། རྒྱན་བཀོད་པ་ཕུན་སུམ་ཚོགས་པའི་དབུས་སུ། པདྨ་ཉི་ཟླའི་ཁྲི་སྟེང་དུ་ཁྱེད་རང་རྣམས་ཀྱི་སེམས་ཉིད་ཀྱི་ངོ་བོ་ཧྲཱིཿསེར་པོ་དེ་ལས་འོད་ཟེར་འཕྲོ་འདུས་ཡོངས་སུ་གྱུར་པ་ལས་ཨོ་རྒྱན་ཚེ་དཔག་མེད་རྒྱས་པའི་ལས་མཛད་རཏྣ་ཐོད་ཕྲེང་རྩལ་སྐུ་མདོག་གསེར་བཙོ་མ་ལྟ་བུ་ཞི་འཛུམ་སྒེགས་པའི་ཉམས་ཅན། ཞལ་གཅིག་ཕྱག་གཉིས་ཀྱི་གཡས་མདའ་དར་འཕྱར་ཞིང་། གཡོན་མཉམ་གཞག་གིས་འཆི་མེད་ཚེ་ཡི་བུམ་པ་བདུད་རྩིའི་བཅུད་ཀྱིས་བཀང་བ་བསྣམས་པ། རང་འོད་ཀྱི་ཡུམ་རིན་ཆེན་མཁའ་འགྲོ་སྐུ་མདོག་སེར་མོ་གཡས་མདའ་དར། གཡོན་ཚེ་ཡི་བུམ་པ་འཛིན་པས་ཡབ་ལ་འཁྱུད་པ། ཞབས་རྡོ་རྗེ་དང་པདྨའི་སྐྱིལ་ཀྲུང་གིས་བཞུགས་ཤིང་། དར་དང་། རིན་པོ་ཆེ་དང་། རུས་པའི་རྒྱན་གྱིས་བརྒྱན་པ་འཇའ་ཟེར་འོད་ཕུང་འཁྲིགས་པའི་ཀློང་ན་བཞུགས་པར་གསལ་བའི་གནས་གསུམ་ཡིག་འབྲུ་གསུམ་གྱིས་མཚན་པ་དང་། བདག་མདུན་གྱི་ཐུགས་ཀ་ནས་འོད་ཟེར་འཕྲོས་པས། ཡེ་ཤེས་པ་བསམ་གྱིས་མི་ཁྱབ་པ་སྤྱན་དྲངས་ནས་ཁྱེད་རང་རྣམས་ལ་ཐིམ་པར་མོས། ཧཱུྃ་ཧྲཱིཿབསྟན་པ་འདི་ལ་ངོ་མཚར་རྨད་བྱུང་བ། །འཇིག་རྟེན་དབང་བསྒྱུར་པདྨ་རྒྱལ་པོ་ནི། །རིགས་ནི་ཨོ་རྒྱན་རྒྱལ་པོའི་སྲས་སུ་འཁྲུངས། །ཟ་ཧོར་ཡུལ་དུ་སྒྲོ་འདོགས་མ་ལུས་བཅད། །བསིལ་བ་ཚ་དུ་དངོས་གྲུབ་རྣམ་གཉིས་བརྙེས། །ཁ་བ་ཅན་འདིར་བསྟན་པ་རྒྱས་པར་མཛད། །ལྷོ་ནུབ་རྔ་ཡབ་སྲིན་པོའི་ཁ་གནོན་མཛད། །མྱ་ངན་མི་འདའ་འགྲོ་བའི་གཉེན་གཅིག་པ། །སྐུ་གསུམ་དབྱེར་མེད་ཆེ་མཆོག་ཧེ་རུ་ཀ། མཉམ་མེད་བླ་མ་མཆོག་ཁྱོད་དུས་འདིར་དྲན། །རྒྱལ་བའི་ཞིང་ཁམས་དག་པ་ཆེན་པོ་ནས། །བདེ་གཤེགས་རྩ་གསུམ་ཆོས་སྲུང་རྒྱ་མཚོ་དང་། །གནོད་སྦྱིན་ནོར་ལྷ་གཏེར་བདག་ཚོགས་དང་བཅས། །ཐོགས་མེད་ཐུགས་རྗེའི་དབང་གིས་འདིར་གཤེགས་ལ། །བཀྲ་ཤིས་གཞལ་ཡས་འདི་ལ་བྱིན་ཆེན་ཕོབས། །ཚེ་དང་ལོངས་སྤྱོད་འདོད་རྒུའི་དངོས་གྲུབ་སྩོལ། །ཨོཾ་ཨཱཿཧཱུྃ་བཛྲ་གུ་རུ་རཏྣ་ཐོད་ཕྲེང་རྩལ་བཛྲ་ས་མ་ཡ་ཛཿསིདྡྷི་ཕ་ལ་ཧཱུྃ་ཨཱཿཛྙཱ་ན་ཨཱ་བེ་ཤ་ཡ་ཨཱཿབཏགས་པ་མང་དུ་བརྗོད་པས་བྱིན་དབབ། ཏིཥྛ་བཛྲ། ཅེས་བརྗོད་པས་བརྟན་པར་གྱུར་པའི་མོས་པ་མཛོད། བདག་མདུན་ལྷ་ཚོགས་རྣམས་ཀྱི་ཐུགས་ཀ་ནས་འོད་ཟེར་བསམ་གྱིས་མི་ཁྱབ་པ་དང་ལྷ་མོ་མགྱོགས་མའི་ཚོགས་ཉི་ཟེར་གྱི་རྡུལ་ལྟར་འཕྲོས་སྣོད་བཅུད་ཐམས་ཅད་ལ་ཁྱབ་པས་བྱིན་རླབས་གཟི་བྱིན་འབར། རང་དང་བསྒྲུབ་བྱའི་བླ་ཚེ་ཆད་ཉམས་ཡར་བ་དང་། བརྟན་གཡོ་འཁོར་འདས་ཀྱི་ཚེ་བཅུད་མ་ལུས་པ་འཆི་མེད་བདུད་རྩིའི་རྣམ་པར་སྤྱན་དྲངས། བདག་དང་བསྒྲུབ་བྱ་རྟེན་རྫས་རྣམས་ལ་ཐིམ་པས་རྡོ་རྗེ་ཚེའི་དངོས་གྲུབ་ཐོབ་ཅིང་ནུས་པ་དང་ལྡན་པར་གྱུར། སོགས་ཚེ་འགུགས་བསྐུལ། དེ་ནས་ཚེ་ཡི་འབྲང་རྒྱས་ཨོ་རྒྱན་ཚེ་དཔག་མེད་དུ་གསལ་བའི་སྐུ་ལས་བདུད་རྩིའི་རྒྱུན་བབས་པས་བུམ་པའི་དབང་ཐོབ་ལུས་ལྷ་སྐུར་སྨིན་པའི་མོས་པ་མཛོད། ཨཱཿསྐྱེ་འཆི་མེད་པ་རྡོ་རྗེའི་ཚེ། །འོད་སྣང་དཔག་མེད་སྣང་སྲིད་ཁམས། །ཨཱ་ཡུ་ཚེ་ཡི་དཀྱིལ་འཁོར་དུ། །བདུད་རྩི་བུམ་པས་དབང་བསྐུར་རོ། །འཆི་མེད་ལུས་མཆོག་དེང་འདིར་སྩོལ། །ཨོཾ་ཨཱཿཧཱུྃ་བཛྲ་གུ་རུ་རཏྣ་ཐོད་ཕྲེང་རྩལ་སརྦ་སིདྡྷི་ཕ་ལ་ཧཱུྃ། ཞེས་དང་ཚེ་གཟུངས་མཐར། ཀཱ་ཡ་སིདྡྷི་ཨོཾ། འཁོར་འདས་ཀྱི་ཚེ་བཅུད་བསྡུས་པའི་བདུད་རྩི་མགྲིན་པར་བཞག་ཅིང་མྱོང་བས་གསང་བའི་དབང་ཐོབ་ངག་སྔགས་སུ་དག་པའི་མོས་པ་མཛོད། ཨཱཿསྟོང་པའི་དབྱིངས་ལས་ལྷུན་གྲུབ་པའི། །སྣང་བ་ལྷུན་གྲུབ་འཇའ་སྐུར་འབར། །ཟག་མེད་བདུད་རྩི་གྲགས་སྟོང་རྫས། །འགགས་མེད་ནུས་པའི་དབང་བསྐུར་བས། །སྙིང་པོ་གསུང་དབང་ཐོབ་པར་ཤོག །ཨོཾ་ཨཱཿཧཱུྃ་བཛྲ་གུ་རུ་རཏྣ་ཐོད་ཕྲེང་རྩལ་སརྦ་སིདྡྷི་ཕ་ལ་ཧཱུྃ། ཞེས་ལས་ཚེ་གཟུངས་མཐར། ཝཱ་ཀ་སིདྡྷི་ཨཱཿསྲིད་ཞིའི་དྭངས་བཅུད་འདུས་པའི་རིལ་བུ་སྙིང་གར་བཞག་ཅིང་མྱང་བས་ཤེས་རབ་ཡེ་ཤེས་ཀྱི་དབང་ཐོབ། ཡིད་ཐུགས་ཡེ་ཤེས་ཀྱི་འཁོར་ལོར་སྨིན་པའི་མོས་པ་མཛོད། ཨཱཿམི་ཤིགས་ཐུགས་ཀྱི་ཐིག་ལེ་ནི། །བདེ་སྟོང་དབྱེར་མེད་བྱང་སེམས་བཅུད། །ཕྱག་རྒྱ་ཆེན་པོར་ལྷུན་གྲུབ་པའི། །ཟག་མེད་སྐྱེ་འཆི་སྤངས་པའི་སྐུ། །ཤེས་རབ་ཡེ་ཤེས་དབང་ཐོབ་ཤོགཨོཾ་ཨཱཿཧཱུྃ་བཛྲ་གུ་རུ་རཏྣ་ཐོད་ཕྲེང་༴སོགས་དང་། ཚེ་གཟུངས་མཐར། ཙིཏྟ་སིདྡྷི་ཧཱུྃ། གཏོར་མ་རཏྣ་ཐོད་ཕྲེང་རྩལ་དུ་གསལ་བ་སྤྱི་བོར་བཞག་ཅིང་དབང་བསྐུར་བས་དབང་བཞི་པ་ཐོབ། ཀ་དག་ལྷུན་གྲུབ་དབྱེར་མེད་དགོངས་པའི་རྩལ་ཆེན་རྫོགས་པར་མོས་ཤིག །ཨཱཿབདེ་ཆེན་རྣམ་ཀུན་མཆོག་ལྡན་པའི། །ཐོག་མའི་སངས་རྒྱས་ཀུན་ཏུ་བཟང་། །འཇའ་ཟེར་འོད་མི་འགྱུར་བའི་སྐུ། །ཀ་དག་ལྷུན་གྲུབ་དབྱེར་མེད་པའི། །རྡོ་རྗེའི་ཚེ་དབང་ཐོབ་པར་ཤོག །ཨོཾ་ཨཱཿཧཱུྃ་བཛྲ་གུ་རུ་རཏྣ་ཐོད་ཕྲེང་རྩལ་སརྦ་སིདྡྷི་ཕ་ལ་ཧཱུྃ། ཅེས་དང་། ཚེ་གཟུངས་མཐར་སརྦ་སིདྡྷི་ཧྲཱིཿསོགས་སྔགས་བཅས་རྒྱས་གདབ་པ་ནི། ཚེ་མདའ་སྤྱི་བོར་རྒྱ་གྲམ་དུ་བཞག་པ་དང་ལྷན་ཅིག་འོད་གསལ་གཉུག་མའི་དབྱིངས་སུ་བཞག་པས་འཆི་མེད་གདོད་མའི་གནས་ལུགས་མངོན་དུ་གྱུར་པར་མོས། ཧཱུྃ་ཧྲཱིཿཆོས་སྐུ་མི་འགྱུར་ཡེ་ཤེས་འོད་ཀྱི་ཀློང་། །སྲིད་ཞིའི་ཉེས་དག་སྐྱེ་འཆི་བྲལ་བའི་སྐུ། །གཞོན་ནུ་བུམ་སྐུ་ཐིག་ལེ་ཉག་གཅིག་རྩེ། །གཏིང་གསལ་ཡེ་ཤེས་འཁོར་ལོར་ཚེ་སྦའོ། །ཞེས་པས་སྦས་ཤིང་། ཡེ་དྷརྨ། བརྗོད་ལ་རྒྱས་གདབ་པར་བྱའོ། །སླར་ཡང་བདག་མདུན་རྣམས་ཀྱི་ཐུགས་ཀ་ནས་འོད་ཟེར་ཉི་མ་བྱེ་བའི་གཟི་བརྗིད་ཅན་འཕྲོས། ཕྱོགས་བཅུའི་ཞིང་ཁམས་རབ་འབྱམས་རྣམས་སུ་ཁྱབ། འཁོར་འདས་ལམ་གསུམ་གྱི་ཚེ་བསོད་དཔལ་འབྱོར་ཕྱྭ་གཡང་ལོངས་སྤྱོད་ཐམས་ཅད་བཀྲ་ཤིས་རྫས་རྟགས་འཇའ་འོད་ཐིག་ལེ་ལ་སོགས་པའི་རྣམ་པར་སྤྱན་དྲངས། བདག་མདུན་རྟེན་རྫས་རྣམས་ལ་ཐིམ་པས་འདོད་རྒུའི་དངོས་གྲུབ་ཡིད་བཞིན་དུ་འགྲུབ་པར་གྱུར། ཅེས་གཡང་འགུགས་བསྐུལ་མཐར། ཕྱྭ་གཡང་གི་རྟེན་རྫས་བླ་མ་རྩ་གསུམ་ནོར་ལྷ་རབ་འབྱམས་དངོས་སུ་གསལ་བ་ཁྱེད་རང་རྣམས་ཀྱི་སྤྱི་བོར་བཞག་པས་སྲིད་ཞིའི་དངོས་གྲུབ་རྒྱ་མཚོའི་དཔལ་ལ་དབང་འབྱོར་བར་མོས་མཛོད༔ཧཱུྃ། བདེ་མཆོག་བདེ་སྤྱོད་ནམ་མཁའི་དཀྱིལ་ཡངས་ནས། །རྒྱལ་བའི་དཀྱིལ་འཁོར་སྲས་བཅས་ཐུགས་དམ་ཅན། །འཆི་མེད་རྩ་གསུམ་ནོར་ལྷ་རབ་འབྱམས་ཀྱི། །སྐུ་གསུང་ཐུགས་དང་མཉམ་སྦྱོར་དངོས་གྲུབ་ནི། །ཕྲིན་ལས་ཡིད་བཞིན་ལྷུན་གྱིས་གྲུབ་པའི་དཔལ། །བུམ་པ་བཟང་དང་དཔག་བསམ་ནོར་བུའི་ཚུལ། །ད་ལྟ་ཉིད་དུ་སྩལ་ཞིང་བརྟན་པར་མཛོད། །འགྱུར་མེད་སྐུ་ཡི་དངོས་གྲུབ་སྩལ་དུ་གསོལ། །འགགས་མེད་གསུང་གི༴འཁྲུལ་མེད་ཐུགས་ཀྱི༴ཡོན་ཏན་རེ་སྐོང་༴ཕྲིན་ལས་འགྲོ་འདུལ༴འཆི་མེད་ཚེ་ཡི༴འཛད་མེད་ནོར་གྱི༴ཐུན་མོང་ཡིད་བཞིན༴བླ་མེད་མཆོག་གི་དངོས་གྲུབ་སྩལ་དུ་གསོལ། །ཨོཾ་ཨཱཿཧཱུྃ་བཛྲ་གུ་རུ་རཏྣ་ཐོད་ཕྲེང་རྩལ་སརྦ་སིདྡྷི་ཕ་ལ་ཧཱུྃ་ཀཱ་ཡ་ཝཱ་ཀ་ཙིཏྟ་སིདྡྷི་ཧཱུྃ་ཧཱུྃ་ཧཱུྃ། སོགས་ཀྱི་རྟེན་རྫས་རྣམས་སྦྱིན། བཟའ་བཏུང་ལ་རོལ། མཐའ་རྟེན་བཀྲ་ཤིས་རྫས་རྟགས་རིན་ཆེན་བདུན་གྱི་མངའ་གསོལ་བ་སྤྱི་འགྲེའི་ཆོ་གས་སྦྱིན། འདིའི་ཚེ་དབང་ཁོལ་ཕྱུངས་བྱས་ཀྱང་རུང་བ་ཞལ་ལུང་ངོ་། །དེ་ལྟར་ན་ཚེ་སྦ་བསྟིམ་གྲུབ་ནས་མཐའ་རྟེན་བཀྲ་ཤིས་རྫས་རྟགས་སོགས་སྦྱིན་པ་ལ་འཇུག །སླར་ཡང་བླ་མ་རྩ་བ་གསུམ་གྱིས་ཤིས་པ་བརྗོད་པའི་ཚིག་བརྗོད་པས་དགེ་ལེགས་སུ་བྱས་པའི་མོས་པ་མཛོད། བཀྲ་ཤིས་ཅི་རིགས་བརྗོད། དེ་རྣམས་ཀྱིས་དབང་བསྐུར་གྲུབ་པ་ཡིན་པས་དམ་ཚིག་ཁས་བླང་བ་འདིའི་རྗེས་ཟློས། གཙོ་བོས་ཇི་ལྟར་བཀའ་སྩལ་པ། །དེ་དག་ཐམས་ཅད་བདག་གིས་བགྱི། གཏང་རག་མཎྜལ། དགེ་བསྔོ་སྤྱི་ལྟར་བྱའོ། །ཅེས་པའང་འཕགས་མཆོག་རིན་པོ་ཆེའི་ཡབ་རྗེ་རིག་འཛིན་གྱིས་རྟེན་བཅས་བསྐུལ་ངོར། ཆོས་ཀྱི་བློ་གྲོས་པས་སོ། །། །

[edit]

@#/__/tshe g.yang 'gugs pa'i dbang gi mtshams sbyor nyung ngu bzhugs so/__/ slob ma rnams la khrus bgegs bskrad srung 'khor rnams spyi ltar bya/__'o/__nam mkha' dang mnyam pa'i sems can thams cad sangs rgyas sa la 'god par bya/__de'i ched du rat+na thod phreng rtsal gyi dbang bskur gsan par bgyi'o snyam pas kun slong byang chub kyi mchog tu thugs bskyed pa gsal btab nas gsan pa gnang bar zhu/__de la 'dir gang zhig gsan par bya ba'i chos ni/__shin tu bskal pa brgyar yang rnyed par dka' ba'i dal 'byor rten bzang 'di lta bu thob pa'i skabs su dam pa'i chos rnam par dag pa bsgrub dgos/__de'ang 'gal rkyen nyung mthun rkyen tshang ba gtso bo gal che bas/__de'i ya gyal tshe ring ba dang /__'byor pas brel phongs med pa zhig dgos/__de nyid sgrub par byed pa'i thabs gsang sngags rdo rje theg pa las dbang rgyas kyi las rab 'byams gsungs pa rnams bka' gter dag snang gsum du 'du zhing /__de la shin tu zab pa dag snang gi chos sde la bka' srol mang du bzhugs pa las/__phyi ma'i dus na 'gran zla bral ba'i grub thob chen po bi ma la'i rnam par 'phrul ba lha btsun nam mkha' 'jigs med kyi zab gter rig 'dzin srog sgrub kyi tshe sgrub 'od kyi drwa ba dang /__g.yang 'gugs me tog char bsil la gangs ljongs tsam na 'gran zla dang bral ba pad+ma 'od gsal mdo sngags gling pas grub pa'i man ngag gis legs par phye ba'i gu ru rat+na thod phreng rtsal gyi dbang bskur bsgrub par bgyi ba la/__slob dpon gyi bgyi 'os rnams grub nas/__khyed rang rnams kyi ngo skal du gyur pa la dbang bskur gsan pa'i yon du maN+Dal phul/__ces mtshams sbyar nas maN+Dal phul/__snyims pa me tog dang bcas gsol ba 'debs pa 'di'i rjes zlos mdzod/__kun mkhyen ye shes phung po sogs lan gsum/__rgyud rnam par dag par bya ba'i slad du mdun rten bla ma nor lha rab 'byams rgya mtsho mngon sum bzhin bzhugs pa'i spyan sngar bsags sbyong spel gsum gyi gnad bsdus rgyun bshags 'di'i rjes zlos mdzod/__rdo rje slob dpon sangs rgyas dpal/__/sogs lan gsum/__de rnams kyis rgyud rnam par dag par byas zin nas/__dbang gi gzhi 'god pa ye shes pa dbab pa la dmigs pa 'di bzhin mdzod/__a mr-i tas bsang /__swa b+hA was sbyangs chos thams cad stong par gyur/__stong pa'i ngang las gnas rnam par dag pa pad+ma 'od kyi pho brang nor bu'i ba gam brtsegs pa'i gzhal yas khang /__rgyan bkod pa phun sum tshogs pa'i dbus su/__pad+ma nyi zla'i khri steng du khyed rang rnams kyi sems nyid kyi ngo bo hrIHser po de las 'od zer 'phro 'dus yongs su gyur pa las o rgyan tshe dpag med rgyas pa'i las mdzad rat+na thod phreng rtsal sku mdog gser btso ma lta bu zhi 'dzum sgegs pa'i nyams can/__zhal gcig phyag gnyis kyi g.yas mda' dar 'phyar zhing /__g.yon mnyam gzhag gis 'chi med tshe yi bum pa bdud rtsi'i bcud kyis bkang ba bsnams pa/__rang 'od kyi yum rin chen mkha' 'gro sku mdog ser mo g.yas mda' dar/__g.yon tshe yi bum pa 'dzin pas yab la 'khyud pa/__zhabs rdo rje dang pad+ma'i skyil krung gis bzhugs shing /__dar dang /__rin po che dang /__rus pa'i rgyan gyis brgyan pa 'ja' zer 'od phung 'khrigs pa'i klong na bzhugs par gsal ba'i gnas gsum yig 'bru gsum gyis mtshan pa dang /__bdag mdun gyi thugs ka nas 'od zer 'phros pas/__ye shes pa bsam gyis mi khyab pa spyan drangs nas khyed rang rnams la thim par mos/__hU~M hrIHbstan pa 'di la ngo mtshar rmad byung ba/__/'jig rten dbang bsgyur pad+ma rgyal po ni/__/rigs ni o rgyan rgyal po'i sras su 'khrungs/__/za hor yul du sgro 'dogs ma lus bcad/__/bsil ba tsha du dngos grub rnam gnyis brnyes/__/kha ba can 'dir bstan pa rgyas par mdzad/__/lho nub rnga yab srin po'i kha gnon mdzad/__/mya ngan mi 'da' 'gro ba'i gnyen gcig pa/__/sku gsum dbyer med che mchog he ru ka/__mnyam med bla ma mchog khyod dus 'dir dran/__/rgyal ba'i zhing khams dag pa chen po nas/__/bde gshegs rtsa gsum chos srung rgya mtsho dang /__/gnod sbyin nor lha gter bdag tshogs dang bcas/__/thogs med thugs rje'i dbang gis 'dir gshegs la/__/bkra shis gzhal yas 'di la byin chen phobs/__/tshe dang longs spyod 'dod rgu'i dngos grub stsol/__/oM AHhU~M badz+ra gu ru rat+na thod phreng rtsal badz+ra sa ma ya dzaHsid+d+hi pha la hU~M AHdz+nyA na A be sha ya AHbtags pa mang du brjod pas byin dbab/__tiSh+Tha badz+ra/__ces brjod pas brtan par gyur pa'i mos pa mdzod/__bdag mdun lha tshogs rnams kyi thugs ka nas 'od zer bsam gyis mi khyab pa dang lha mo mgyogs ma'i tshogs nyi zer gyi rdul ltar 'phros snod bcud thams cad la khyab pas byin rlabs gzi byin 'bar/__rang dang bsgrub bya'i bla tshe chad nyams yar ba dang /__brtan g.yo 'khor 'das kyi tshe bcud ma lus pa 'chi med bdud rtsi'i rnam par spyan drangs/__bdag dang bsgrub bya rten rdzas rnams la thim pas rdo rje tshe'i dngos grub thob cing nus pa dang ldan par gyur/__sogs tshe 'gugs bskul/__de nas tshe yi 'brang rgyas o rgyan tshe dpag med du gsal ba'i sku las bdud rtsi'i rgyun babs pas bum pa'i dbang thob lus lha skur smin pa'i mos pa mdzod/__AHskye 'chi med pa rdo rje'i tshe/__/'od snang dpag med snang srid khams/__/A yu tshe yi dkyil 'khor du/__/bdud rtsi bum pas dbang bskur ro/__/'chi med lus mchog deng 'dir stsol/__/oM AHhU~M badz+ra gu ru rat+na thod phreng rtsal sarba sid+d+hi pha la hU~M/__zhes dang tshe gzungs mthar/__kA ya sid+d+hi oM/__'khor 'das kyi tshe bcud bsdus pa'i bdud rtsi mgrin par bzhag cing myong bas gsang ba'i dbang thob ngag sngags su dag pa'i mos pa mdzod/__AHstong pa'i dbyings las lhun grub pa'i/__/snang ba lhun grub 'ja' skur 'bar/__/zag med bdud rtsi grags stong rdzas/__/'gags med nus pa'i dbang bskur bas/__/snying po gsung dbang thob par shog__/oM AHhU~M badz+ra gu ru rat+na thod phreng rtsal sarba sid+d+hi pha la hU~M/__zhes las tshe gzungs mthar/__wA ka sid+d+hi AHsrid zhi'i dwangs bcud 'dus pa'i ril bu snying gar bzhag cing myang bas shes rab ye shes kyi dbang thob/__yid thugs ye shes kyi 'khor lor smin pa'i mos pa mdzod/__AHmi shigs thugs kyi thig le ni/__/bde stong dbyer med byang sems bcud/__/phyag rgya chen por lhun grub pa'i/__/zag med skye 'chi spangs pa'i sku/__/shes rab ye shes dbang thob shoga.oM AHhU~M badz+ra gu ru rat+na thod phreng =sogs dang /__tshe gzungs mthar/__tsit+ta sid+d+hi hU~M/__gtor ma rat+na thod phreng rtsal du gsal ba spyi bor bzhag cing dbang bskur bas dbang bzhi pa thob/__ka dag lhun grub dbyer med dgongs pa'i rtsal chen rdzogs par mos shig__/AHbde chen rnam kun mchog ldan pa'i/__/thog ma'i sangs rgyas kun tu bzang /__/'ja' zer 'od mi 'gyur ba'i sku/__/ka dag lhun grub dbyer med pa'i/__/rdo rje'i tshe dbang thob par shog__/oM AHhU~M badz+ra gu ru rat+na thod phreng rtsal sarba sid+d+hi pha la hU~M/__ces dang /__tshe gzungs mthar sarba sid+d+hi hrIHsogs sngags bcas rgyas gdab pa ni/__tshe mda' spyi bor rgya gram du bzhag pa dang lhan cig 'od gsal gnyug ma'i dbyings su bzhag pas 'chi med gdod ma'i gnas lugs mngon du gyur par mos/__hU~M hrIHchos sku mi 'gyur ye shes 'od kyi klong /__/srid zhi'i nyes dag skye 'chi bral ba'i sku/__/gzhon nu bum sku thig le nyag gcig rtse/__/gting gsal ye shes 'khor lor tshe sba'o/__/zhes pas sbas shing /__ye d+harma/__brjod la rgyas gdab par bya'o/__/slar yang bdag mdun rnams kyi thugs ka nas 'od zer nyi ma bye ba'i gzi brjid can 'phros/__phyogs bcu'i zhing khams rab 'byams rnams su khyab/__'khor 'das lam gsum gyi tshe bsod dpal 'byor phywa g.yang longs spyod thams cad bkra shis rdzas rtags 'ja' 'od thig le la sogs pa'i rnam par spyan drangs/__bdag mdun rten rdzas rnams la thim pas 'dod rgu'i dngos grub yid bzhin du 'grub par gyur/__ces g.yang 'gugs bskul mthar/__phywa g.yang gi rten rdzas bla ma rtsa gsum nor lha rab 'byams dngos su gsal ba khyed rang rnams kyi spyi bor bzhag pas srid zhi'i dngos grub rgya mtsho'i dpal la dbang 'byor bar mos mdzod:hU~M/__bde mchog bde spyod nam mkha'i dkyil yangs nas/__/rgyal ba'i dkyil 'khor sras bcas thugs dam can/__/'chi med rtsa gsum nor lha rab 'byams kyi/__/sku gsung thugs dang mnyam sbyor dngos grub ni/__/phrin las yid bzhin lhun gyis grub pa'i dpal/__/bum pa bzang dang dpag bsam nor bu'i tshul/__/da lta nyid du stsal zhing brtan par mdzod/__/'gyur med sku yi dngos grub stsal du gsol/__/'gags med gsung gi='khrul med thugs kyi=yon tan re skong =phrin las 'gro 'dul='chi med tshe yi='dzad med nor gyi=thun mong yid bzhin=bla med mchog gi dngos grub stsal du gsol/__/oM AHhU~M badz+ra gu ru rat+na thod phreng rtsal sarba sid+d+hi pha la hU~M kA ya wA ka tsit+ta sid+d+hi hU~M hU~M hU~M/__sogs kyi rten rdzas rnams sbyin/__bza' btung la rol/__mtha' rten bkra shis rdzas rtags rin chen bdun gyi mnga' gsol ba spyi 'gre'i cho gas sbyin/__'di'i tshe dbang khol phyungs byas kyang rung ba zhal lung ngo /__/de ltar na tshe sba bstim grub nas mtha' rten bkra shis rdzas rtags sogs sbyin pa la 'jug__/slar yang bla ma rtsa ba gsum gyis shis pa brjod pa'i tshig brjod pas dge legs su byas pa'i mos pa mdzod/__bkra shis ci rigs brjod/__de rnams kyis dbang bskur grub pa yin pas dam tshig khas blang ba 'di'i rjes zlos/__gtso bos ji ltar bka' stsal pa/__/de dag thams cad bdag gis bgyi/__gtang rag maN+Dal/__dge bsngo spyi ltar bya'o/__/ces pa'ang 'phags mchog rin po che'i yab rje rig 'dzin gyis rten bcas bskul ngor/__chos kyi blo gros pas so/__//__/