JKCL-KABUM-02-KHA-041

🚧 This website is under continued development. We appreciate your patience!

Previous Text Back to Volume PageNext Text

Wylie title	bla ma dang dpal rdo rje 'jigs mdzad chen po la bstod pa bdud las rnam par rgyal ba'i rnga chen
Location	chos kyi blo gros bka' 'bum Volume 2, Text 41, Pages 477-480 (Folios 1a1 to 2b1)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. bla ma dang dpal rdo rje 'jigs mdzad chen po la bstod pa bdud las rnam par rgyal ba'i rnga chen. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 2: 477-480. Bir, H.P.: Khyentse Labrang, 2012.
Genre	Verses of Praise - bstod pa
Deity	'jigs byed
Colophon	ཅེས་པའང་ལྷག་པའི་ལྷ་མཆོག་འདི་ཡི་བསྙེན་སྒྲུབ་སྐབས་ལྕགས་ཡོས་གནམ་ལོ་གསར་ཚེས་ཀྱི་དགའ་བ་དང་པོར་འཇམ་དབྱངས་ཆོས་ཀྱི་བློ་གྲོས་པས་བསྟོད་ཅིང་གསོལ་འདེབས་སྨོན་ཚིག་ཏུ་བྲིས་པ་ཤིན་ཏུ་དགེ་ཞིང་བཀྲ་ཤིས་པར་གྱུར་ཅིག །སརྦ་དཱ་མངྒ་ལཾ། །
	ces pa'ang lhag pa'i lha mchog 'di yi bsnyen sgrub skabs lcags yos gnam lo gsar tshes kyi dga' ba dang por 'jam dbyangs chos kyi blo gros pas bstod cing gsol 'debs smon tshig tu bris pa shin tu dge zhing bkra shis par gyur cig__/sarba dA mang+ga laM/

1 Texts in this Section (sde tshan or chos tshan)

477-480	བླ་མ་དང་དཔལ་རྡོ་རྗེ་འཇིགས་མཛད་ཆེན་པོ་ལ་བསྟོད་པ་བདུད་ལས་རྣམ་པར་རྒྱལ་བའི་རྔ་ཆེན། bla ma dang dpal rdo rje 'jigs mdzad chen po la bstod pa bdud las rnam par rgyal ba'i rnga chen Verses of Praise - bstod pa	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

བླ་མ་དང་དཔལ་རྡོ་རྗེ་འཇིགས་མཛད་ཆེན་པོ་ལ་བསྟོད་པ་བདུད་ལས་རྣམ་པར་རྒྱལ་བའི་རྔ་ཆེན་ཅེས་བྱ་བ་བཞུགས་སོ། །ན་མོ་བཛྲ་བྷཻ་ར་ཝ་ཡེ། སྲིད་གསུམ་དགྲ་ལས་རྣམ་པར་རྒྱལ་བའི་དཔའ་བོ་ཆེན་པོ་འཇིགས་རུང་སྐུ། །གར་དགུའི་ཉམས་ལྡན་ཆོས་དབྱིངས་ཀློང་ནས་སྒྱུ་མའི་རོལ་པས་རྣམ་པར་རྩེན། །དུས་ཀྱི་དགྲ་ཆེན་བདུད་དང་གཤིན་རྗེའི་སྙིང་ལ་འཇིགས་པ་སྟེར་མཛད་པ། །ཁམས་གསུམ་དབང་ཕྱུག་བཅོམ་ལྡན་འདས་ལ་དེ་རིང་བདག་གིས་བསྟོད་པར་བགྱི། ༡། མི་ཐུང་སྒེག་པ་ཆར་སྤྲིན་ལྟར་གནག་འོད་ཟེར་བྱེ་བ་ཕྲག་བརྒྱ་འཕྲོ། །གཏི་མུག་གཤེད་པོ་མ་ཧེའི་ཞལ་ལྡན་དབྱིངས་ཡུམ་ཤེས་རབ་བཻ་ཏ་ལིར། །ཐབས་ཤེས་གཉིས་མེད་མཉམ་པར་སྦྱོར་བའི་རྗེས་ཆགས་བདེ་བ་ཆེ་ལ་རོལ། །ཧེ་རུ་ཀ་དཔལ་སྙིང་རྗེའི་རོས་མྱོས་དུས་དགྲའི་དབང་པོ་ཁྱོད་ལ་བསྟོད། ༢། མི་འགྱུར་རྡོ་རྗེ་མི་ཕྱེད་རྟག་བརྟན་སྲ་ཞིང་མཁྲེགས་པ་དམ་པའི་བདག །སྒྱུ་འཕྲུལ་རྡོ་རྗེ་གསུམ་པོ་ཆེ་ནི་ཁྲོ་ཞིང་རབ་ཁྲོས་ཆེར་འཁྲུགས་པ། །འཇིགས་བྱེད་འཇིགས་ཆེན་ཞལ་དགུའི་ཆོས་ཀྱི་སྒྲ་ཆེན་ཀུན་ཏུ་སྒྲོགས་པར་བྱེད། །སྟོང་ཉིད་བཅུ་དྲུག་ཞབས་ཀྱི་སྟངས་སྟབས་ས་གསུམ་ཁྱབ་པར་གནོན་ལ་བསྟོད། ༣། བྱང་ཆུབ་ཕྱོགས་ཆོས་ཕྱག་ནི་སོ་བཞིའི་ཞི་བའི་མཐའ་སྒྲོལ་དབུ་སྐྲ་འབར། །ཧཱུྃ་ཕཊ་ལ་སོགས་བཞད་པ་བརྒྱད་ཀྱི་ང་རོ་གཏུམ་པོའི་གད་རྒྱང་ཅན། །མཚོན་ཆ་སྣ་ཚོགས་རབ་ཏུ་འཕྱར་བས་བདེན་པ་གཉིས་ཀྱི་དོན་སྟོན་པ། །བརྐྱང་བསྐུམ་གར་གྱིས་འཇིག་རྟེན་ལྷ་ཆེན་བགེགས་ཚོགས་སྐྲག་མཛད་ཁྱོད་ལ་བསྟོད། ༤། ཉི་ཤུ་རྩ་བདུན་སྤྱན་མིག་བགྲད་ཅིང་སྨར་སྨིན་བསྐལ་པའི་མེ་ལྟར་འཕྲོ། །མི་བཟད་རྣོ་བའི་མཆེ་བ་ཟངས་ཡག་ལྟར་གཙིགས་རབ་དམར་ལྗགས་འདྲིལ་ཞིང་། །ཤངས་ནས་དུས་མཐའི་རླུང་དམར་བསྐྱོད་པས་བདུད་བགེགས་ཐལ་བ་བུན་བུན་གཏོར། །རྡོ་རྗེའི་རྭ་ཆེན་བལྟར་མི་མངོན་པས་སྲིད་ཞི་ཐལ་མར་འབིགས་ལ་བསྟོད། ༥། ཁྲག་ཞགས་ཐལ་བ་གླང་ཀོ་རུས་པ་སྦྲུལ་གྱི་རྒྱན་ཆས་རྣམ་པར་སྤྲས། །ལྷ་ཀླུ་སྲིན་པོའི་མགོ་བོའི་དོ་ཤལ་ཕྱག་ཞབས་མཐིལ་རྣམས་ཤིན་ཏུ་དམར། །ལྕགས་ཀྱུ་ལྟར་གུགས་སྡེར་མོ་རྣོན་པོས་ལྷ་མིན་འབྱུང་པོའི་སྙིང་འབྱིན་པ། །ལིང་ག་གྱེན་བསྒྲེངས་སྟོབས་ཆེན་ཤུགས་དྲག་མེ་ལྕེས་ཕྲེང་བས་མཛེས་ལ་བསྟོད། ༦། མཚན་དང་དཔེ་བྱད་དཔལ་དུ་འབར་ཞིང་དུག་གསུམ་རྩད་ནས་འཇོམས་མཛད་ཅིང་། །བདུད་ཀྱི་དགྲ་སྟེ་བདུད་རྣམས་ཀུན་བཅོམ་འཆི་བདག་གྲོང་ཁྱེར་ཕྱེ་མར་འཐགས། དཀྱིལ་འཁོར་བདག་པོ་འཇམ་དཔལ་ཁྲོས་པར་སྲིད་དང་ཞི་བའི་སྡེ་ཚོགས་ཀྱིས། །འདར་བཅས་ཐོར་ཚུག་གུས་པས་རབ་བསྙེན་འཇིགས་བྱེད་ཆེན་པོར་གུས་པས་བསྟོད། ༧། བདག་མེད་མཚན་བྲལ་སྒྱུ་མའི་རང་བཞིན་ཡེ་ཤེས་རྣམ་པ་ཐམས་ཅད་པ། །ཅིར་ཡང་འཆར་ཞིང་དུ་མར་འཕྲུལ་བས་བརྟན་གཡོའི་དངོས་ཀུན་ཐམས་ཅད་ཀྱི། །སྲོག་ཏུ་རབ་ཞུགས་དེ་ཁོ་ན་ཉིད་ཉི་ཚེའི་སྟོང་པ་ལས་འདས་ཤིང་། །མཆོག་ཏུ་འོད་གསལ་དང་པོའི་སངས་རྒྱས་འཇིགས་མཛད་རྒྱལ་པོར་བསྟོད་པར་བགྱི། ༨། དེ་ལྟར་བསྟོད་ལས་བྱུང་བའི་དགེ་ཚོགས་ནམ་མཁའི་མཐའ་ཡི་རྗེས་སོང་བ། །འདུན་པའི་ཞགས་པས་ཡོངས་སུ་བཅིངས་ཏེ་བསྟན་དང་འགྲོ་ལ་བསྔོ་བ་ཡི། །ལེགས་བསགས་མཐུ་དེས་རྒྱལ་བའི་བསྟན་དང་བསྟན་པ་འཛིན་རྣམས་དར་ཤིང་རྒྱས། །ནག་ཕྱོགས་མུན་པ་དྲུང་ནས་སངས་ཏེ་ཡེ་ཤེས་ཉི་མ་རྒྱས་གྱུར་ཅིག༩། བདག་ཀྱང་འཆི་མེད་རྡོ་རྗེའི་སྲོག་བརྟན་འཇིགས་མཛད་རྡོ་རྗེའི་གུར་དུ་ཚུད། །སྒོ་གསུམ་འཇམ་དཔལ་ཞི་དང་ཁྲོ་བོའི་གསང་བ་གསུམ་བདག་མཆོག་འགྲུབ་སྟེ། །དོན་གཉིས་ལྷུན་གྲུབ་དྲག་པོའི་འཁོར་ལོའི་ལྷ་མིན་ཀླ་ཀློ་འདུལ་བ་དང་། །རྫོགས་ལྡན་ཕྱི་མའི་དཔལ་ཡོན་རྒྱས་ཤིང་བཀྲ་ཤིས་དགེ་མཚན་སྟོང་འབར་ཤོག༡༠། ཅེས་པའང་ལྷག་པའི་ལྷ་མཆོག་འདི་ཡི་བསྙེན་སྒྲུབ་སྐབས་ལྕགས་ཡོས་གནམ་ལོ་གསར་ཚེས་ཀྱི་དགའ་བ་དང་པོར་འཇམ་དབྱངས་ཆོས་ཀྱི་བློ་གྲོས་པས་བསྟོད་ཅིང་གསོལ་འདེབས་སྨོན་ཚིག་ཏུ་བྲིས་པ་ཤིན་ཏུ་དགེ་ཞིང་བཀྲ་ཤིས་པར་གྱུར་ཅིག །སརྦ་དཱ་མངྒ་ལཾ། ། །།

[edit]

bla ma dang dpal rdo rje 'jigs mdzad chen po la bstod pa bdud las rnam par rgyal ba'i rnga chen ces bya ba bzhugs so/____/na mo badz+ra b+hai ra wa ye/__srid gsum dgra las rnam par rgyal ba'i dpa' bo chen po 'jigs rung sku/____/gar dgu'i nyams ldan chos dbyings klong nas sgyu ma'i rol pas rnam par rtsen/____/dus kyi dgra chen bdud dang gshin rje'i snying la 'jigs pa ster mdzad pa/____/khams gsum dbang phyug bcom ldan 'das la de ring bdag gis bstod par bgyi/__1/__mi thung sgeg pa char sprin ltar gnag 'od zer bye ba phrag brgya 'phro/____/gti mug gshed po ma he'i zhal ldan dbyings yum shes rab bai ta lir/____/thabs shes gnyis med mnyam par sbyor ba'i rjes chags bde ba che la rol/____/he ru ka dpal snying rje'i ros myos dus dgra'i dbang po khyod la bstod/__2/__mi 'gyur rdo rje mi phyed rtag brtan sra zhing mkhregs pa dam pa'i bdag__/sgyu 'phrul rdo rje gsum po che ni khro zhing rab khros cher 'khrugs pa/____/'jigs byed 'jigs chen zhal dgu'i chos kyi sgra chen kun tu sgrogs par byed/____/stong nyid bcu drug zhabs kyi stangs stabs sa gsum khyab par gnon la bstod/__3/__byang chub phyogs chos phyag ni so bzhi'i zhi ba'i mtha' sgrol dbu skra 'bar/____/hU~M phaT la sogs bzhad pa brgyad kyi nga ro gtum po'i gad rgyang can/____/mtshon cha sna tshogs rab tu 'phyar bas bden pa gnyis kyi don ston pa/____/brkyang bskum gar gyis 'jig rten lha chen bgegs tshogs skrag mdzad khyod la bstod/__4/__nyi shu rtsa bdun spyan mig bgrad cing smar smin bskal pa'i me ltar 'phro/____/mi bzad rno ba'i mche ba zangs yag ltar gtsigs rab dmar ljags 'dril zhing /____/shangs nas dus mtha'i rlung dmar bskyod pas bdud bgegs thal ba bun bun gtor/____/rdo rje'i rwa chen bltar mi mngon pas srid zhi thal mar 'bigs la bstod/__5/__khrag zhags thal ba glang ko rus pa sbrul gyi rgyan chas rnam par spras/____/lha klu srin po'i mgo bo'i do shal phyag zhabs mthil rnams shin tu dmar/____/lcags kyu ltar gugs sder mo rnon pos lha min 'byung po'i snying 'byin pa/____/ling ga gyen bsgrengs stobs chen shugs drag me lces phreng bas mdzes la bstod/__6/__mtshan dang dpe byad dpal du 'bar zhing dug gsum rtsad nas 'joms mdzad cing /____/bdud kyi dgra ste bdud rnams kun bcom 'chi bdag grong khyer phye mar 'thags/__dkyil 'khor bdag po 'jam dpal khros par srid dang zhi ba'i sde tshogs kyis/____/'dar bcas thor tshug gus pas rab bsnyen 'jigs byed chen por gus pas bstod/__7/__bdag med mtshan bral sgyu ma'i rang bzhin ye shes rnam pa thams cad pa/____/cir yang 'char zhing du mar 'phrul bas brtan g.yo'i dngos kun thams cad kyi/____/srog tu rab zhugs de kho na nyid nyi tshe'i stong pa las 'das shing /____/mchog tu 'od gsal dang po'i sangs rgyas 'jigs mdzad rgyal por bstod par bgyi/__8/__de ltar bstod las byung ba'i dge tshogs nam mkha'i mtha' yi rjes song ba/____/'dun pa'i zhags pas yongs su bcings te bstan dang 'gro la bsngo ba yi/____/legs bsags mthu des rgyal ba'i bstan dang bstan pa 'dzin rnams dar shing rgyas/____/nag phyogs mun pa drung nas sangs te ye shes nyi ma rgyas gyur cig9/__bdag kyang 'chi med rdo rje'i srog brtan 'jigs mdzad rdo rje'i gur du tshud/____/sgo gsum 'jam dpal zhi dang khro bo'i gsang ba gsum bdag mchog 'grub ste/____/don gnyis lhun grub drag po'i 'khor lo'i lha min kla klo 'dul ba dang /____/rdzogs ldan phyi ma'i dpal yon rgyas shing bkra shis dge mtshan stong 'bar shog10/__ces pa'ang lhag pa'i lha mchog 'di yi bsnyen sgrub skabs lcags yos gnam lo gsar tshes kyi dga' ba dang por 'jam dbyangs chos kyi blo gros pas bstod cing gsol 'debs smon tshig tu bris pa shin tu dge zhing bkra shis par gyur cig__/sarba dA mang+ga laM/__/____//__