JKCL-KABUM-09-TA-039

🚧 This website is under continued development. We appreciate your patience!

Previous Text Back to Volume PageNext Text

Wylie title	dbang mdzad pad+ma rgyal po'i sgrub thabs khams gsum myur 'gug
Location	chos kyi blo gros bka' 'bum Volume 9, Text 39, Pages 549-555 (Folios 1a to 4a4)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. dbang mdzad pad+ma rgyal po'i sgrub thabs khams gsum myur 'gug. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 9: 549-555. Bir, H.P.: Khyentse Labrang, 2012.
Genre	Sadhanas - Evocation Ritual - sgrub thabs
Deity	dbang mdzad pad+ma rgyal po
Colophon	ཅེས་པའང་ལྷ་རིགས་འབྲས་ལྗོངས་ཆོས་རྒྱལ་སྲས་བླ་མ་རིན་པོ་ཆེ་དོན་གྲུབ་རྣམ་རྒྱལ་ནས་བཀྲ་ཤིས་ལྷ་རེག་བཅས་གསུང་བསྐུལ་ངོར། འཇམ་དབྱངས་བློ་གྲོས་རྒྱ་མཚོའི་རིགས་ཁམས་ཀྱི་སྒྲོམ་བུ་ནས་ཐོན་པ་ཤིན་ཏུ་དགེ་ཞིང་བཀྲ་ཤིས་པར་བྱིན་གྱིས་བརླབ་ཏུ་གསོལ། དགེའོ། །མངྒ་ལཾ། ཤུ་བྷཾ། བཀྲ་ཤིས།།
	ces pa'ang lha rigs 'bras ljongs chos rgyal sras bla ma rin po che don grub rnam rgyal nas bkra shis lha reg bcas gsung bskul ngor/__'jam dbyangs blo gros rgya mtsho'i rigs khams kyi sgrom bu nas thon pa shin tu dge zhing bkra shis par byin gyis brlab tu gsol/__dge'o/__/mang+ga laM/__shu b+haM/__bkra shis//

Tibetan Text

Wylie

[edit]

༄༅། །དབང་མཛད་པདྨ་རྒྱལ་པོའི་སྒྲུབ་ཐབས་ཁམས་གསུམ་མྱུར་འགུག་ཅེས་བྱ་བ་བཞུགས་སོ། ། ན་མོ་གུ་རུ་པདྨ་རཱ་ཛཱ་ཡ། གང་གི་དྲན་པ་དེ་ཡི་མོད། །ཁབ་ལེན་རྡོ་ཡི་ལྕགས་སྡུད་བཞིན། །སྲིད་ཞིའི་དཔལ་འབྱོར་འགུགས་མཛད་པའི། །ཐབས་ཆེན་པདྨའི་ལྕགས་ཀྱུ་དབྱེ། །དེ་ལ་བསྟན་པ་དང་སེམས་ཅན་གྱི་བདེ་སྐྱིད་སྤེལ་བར་འདོད་པའི་ཀུན་སློང་བཟང་པོ་དང་ལྡན་པས་འདིར་འཇུག་པ་ལ། སྔོན་འགྲོ་སྐྱབས་སེམས་ནི། ན་མོཿབདག་དང་མཐའ་ཡས་སེམས་ཅན་ཀུན། །དབང་མཛད་ལྷ་ལ་སྐྱབས་སུ་མཆི། །འགྲོ་རྣམས་བདེ་བ་ལ་འགོད་ཕྱིར། །བདག་གི་རྣལ་འབྱོར་ཉམས་བླངས་བགྱི། །ལན་གསུམ། ཧཱུྃ་ཧཱུྃ་ཧཱུྃ། པདྨ་དབང་གི་ཧེ་རུ་ཀས། །སྤྲུལ་པའི་ཁྲོ་ཚོགས་རབ་སྤྲོ་བས། །བདུད་བགེགས་ལོག་འདྲེན་ཕྱིར་བསྐྲད་ཅིང་། །སྲུང་བའི་འཁོར་ལོས་ཕྱོགས་མཚམས་གཏམས། །ཨོཾ་བཛྲ་རཀྵ་རཀྵ་ཧཱུྃ། བྱིན་དབབ་མཆོད་བརླབ་ནི། ཧཱུྃ་ཧྲཱིཿཟླ་གམ་འོད་ཀྱི་གཞལ་ཡས་འདིར། །དབང་མཛད་ལྷ་རྣམས་སྤྱན་འདྲེན་གཤེགས། །གནས་དང་ཡོ་བྱད་བྱིན་གྱིས་རློབས། །ཀུན་བཟང་རྣམ་འཕྲུལ་ཆེན་པོར་གྱུར། །ཨོཾ་བཛྲ་ཨཱ་བེ་ཤ་ཡ་ཨ་ཨཱཿཨོཾ་སརྦ་པཱུ་ཛ་མེ་གྷ་ཨཱཿཧཱུྃ། དངོས་གཞི་ལྷ་བསྐྱེད་པ་ནི། ཨཱཿསྟོང་ཆེན་དེ་བཞིན་ཉིད་དབྱིངས་ལས། །སྙིང་རྗེ་སྒྱུ་མ་ཀུན་ཏུ་སྣང་། །རིག་རྩལ་རྒྱུ་ཡི་ཏིང་འཛིན་ཧྲཱིཿརབ་དམར་གསལ་འཚེར་འབར་ཞིང་འཕྲོ། །ཨེ་ཡཾ་རཾ་སུཾ་བྷྲཱུྃ་ཡིག་ཆད། །འབྱུང་ལྔ་རིམ་བརྩེགས་རི་རབ་དང་། །པད་ཉི་སྲུང་འཁོར་བཅས་པ་ཡི། །ལྟེ་བར་དབང་གི་ཕོ་བྲང་ནི། །པདྨ་རཱ་ག་འོད་འབར་བའི། །གཞལ་མེད་ཟླ་གམ་སྒོ་གཅིག་པ། །ནང་དབུས་པདྨ་འདབ་བཞིའི་སྟེང་། །དབུས་སུ་གུ་རུ་པདྨ་རྒྱལ། །དམར་པོ་ཉི་གཞོན་འཆར་ཁའི་མདོག །ཞལ་གཅིག་ཕྱག་གཉིས་འཛུམ་ཆགས་ཉམས། །དབུ་ལ་རིན་ཆེན་པྲོག་ཞུ་གསོལ། །སྐུ་ལ་དར་དམར་གསང་གོས་དང་། །བེར་ཕོད་རིན་ཆེན་པདྨའི་ཕྲེང་། །ཞབས་གཉིས་རྒྱལ་པོ་རོལ་སྟབས་བཞུགས། །ཕྱག་གཡས་སེང་ལྡིང་ཌཱ་རུ་དཀྲོལ། །གཡོན་པས་སྣང་གསལ་མེ་ལོང་འཛིན། །སྐུ་ལས་འོད་ཟེར་དཔག་མེད་འཕྲོས། །ཤར་དུ་སྒྲོལ་མ་དམར་མོ་ནི། །མཆོག་སྦྱིན་ནོར་བུ་ལྕགས་ཀྱུ་འཛིན། །ལྷོ་རུ་ཛཾ་བྷ་ལ་དམར་པོ། །ལྕགས་ཀྱུ་དང་ནི་ནེའུ་ལེ་བསྣམས། །ནུབ་ཏུ་པདྨ་མཁའ་འགྲོ་དམར། །ཕྱག་བཞི་མདའ་གཞུ་ལྕགས་ཀྱུ་དང་། །ཞགས་པ་འཛིན་ཅིང་ཞབས་གར་སྟབས། །པད་ཉི་རོ་ཡི་སྟེང་ན་འགྱིང་། །བྱང་དུ་ལྷ་ཆེན་དབང་ཕྱུག་དམར། །ལྕགས་ཀྱུ་དང་ནི་ཞགས་པ་གདེངས། །གཡོན་ནས་ཨུ་མ་དེ་ཝཱིས་བརྟེན། །ཀུན་ཀྱང་ཆགས་པའི་ཉམས་དང་ལྡན། །པད་ཟླ་ཉི་མའི་སྟེང་ན་བཞུགས། །དེ་ལྟར་གསལ་བའི་གནས་གསུམ་དུ། །ཡིག་འབྲུ་གསུམ་གྱིས་མཚན་པར་བསྒོམ། །ཧཱུྃ་ཧྲཱིཿཔདྨའི་རིགས་ཀྱི་ཞིང་ཁམས་ནས། །པདྨ་རྒྱལ་པོ་གཙོ་དང་འཁོར། །འདིར་གཤེགས་བྱིན་གྱིས་རློབས་པ་དང་། །སྒྲུབ་མཆོག་བདག་ལ་དངོས་གྲུབ་སྩོལ། །བཛྲ་ས་མཱ་ཛཿཛཿཧཱུྃ་བྃ་ཧོཿས་མ་ཡ་ཏིཥྛ་ལྷན། ཧཱུྃ་ཧྲཱིཿབླ་མེད་མཆོད་པའི་སྤྲིན་ཕུང་ནི། །ཀུན་བཟང་རྣམ་རོལ་ལས་བྱུང་བ། །ས་དང་ནམ་མཁའ་རབ་གང་བས། །དབང་མཛད་དཀྱིལ་འཁོར་ལྷ་ཚོགས་མཆོད། །ཨོཾ་གུ་རུ་པདྨ་རཱ་ཛ་མཎྜལ་ས་པ་རི་ཝཱ་ར་བཛྲ་ཨརྒྷཾ་ནས་ཤབྡའི་བར་དང་། རཱུ་པ་ཤབྡ་གནྡྷེ་རཱ་ས་སྤཪྴེ་མ་ཧཱ་པཉྩ་ཨ་མྲྀ་ཏ་རཀྟ་བ་ལིཾ་ཏ་ཁཱ་ཧི། ཧཱུྃ་ཧྲཱིཿཁམས་གསུམ་མ་ལུས་དབང་དུ་སྡུད། །ཆེ་བའི་ཡོན་ཏན་ཀུན་རྫོགས་པ། །དབང་མཛད་པདྨ་རྒྱལ་པོ་ཡི། །དཀྱིལ་འཁོར་ལྷ་ཚོགས་ཀུན་ལ་བསྟོད། །བཟླས་པ་ནི། གཙོ་བོའི་ཐུགས་ཀར་ཨུཏྤལ་དམར། །ཟེའུ་འབྲུར་ཉི་སྟེང་ཧྲཱིཿདམར་ལས། །སྔགས་ཀྱི་ཕྲེང་བ་དཔག་མེད་འཕྲོས། །འོད་ཟེར་སྤྲོ་བསྡུས་དོན་གཉིས་བྱས། །ཚུར་འདུས་སྣང་སེམས་དབང་འདུས་བསམ། ཨོཾ་ཨཱཿབཛྲ་གུ་རུ་པདྨ་རཱ་ཛ་ཨ་ནྲྀ་ཏྲི་ཛཿཛཿསརྦ་སིདྡྷི་ཝཱ་ཤཾ་ཀུ་རུ་ཧོཿཞེས་བཟླ། སླར་ཡང་གཙོ་བོའི་འོད་ཟེར་གྱིས། །འཁོར་རྣམས་བསྐུལ་བས་སྲིད་ཞི་ཡི། །དྭངས་བཅུད་མ་ལུས་དབང་དུ་བསྡུས། །ཁྱད་པར་ལྷ་མི་ཀླུ་གནོད་སྦྱིན། །ཟས་ནོར་རིན་ཆེན་ལ་སོགས་པ། །གང་འདོད་མ་ལུས་དབང་དུ་བསྡུས། །བདག་སྲོག་དྭངས་མའི་ཐིག་ལེར་བསྟིམ། །ཡུལ་དང་ཡུལ་ཅན་དབྱེར་མེད་བཞག །ཨོཾ་པདྨ་ཏཱ་རེ་སནྟ་ར་ཧྲཱིཿསརྦ་ལོ་ཀ་ཝཱ་ཤཾ་ཀུ་རུ་ཧོཿཨོཾ་པདྨ་ཛཾ་བྷ་ལ་ཧྲཱིཿསྭཱ་ཧཱ། ཨོཾ་པདྨ་ཌཱ་ཀི་ནཱི་ཀུ་རུ་ཀུལླེ་ཧྲཱིཿསྭཱ་ཧཱ། ཨོཾ་མ་ཧཱ་དེ་ཝ་ཛཿཨུ་མ་དེ་ཝཱི་ཧྲཱིང་ཧྲཱིང་ཛཿབཱ་ཤཾ་ཀུ་རུ་ཧོ། ཞེས་སོ་སོར་བཟླ། ཐུན་མཐར་གཏོར་མ་མཎྜལ་འབུལ། བཟའ་བཏུང་ཁ་དོག་དམར་པོ་གཙོ་བོར་གྱུར་པ་བཤམས་ལ། རྃ་ཡྃ་ཁྃ། ཨོཾ་ཨཱཿཧཱུྃ། ལན་གསུམ་གྱིས་བརླབ། གཏོར་མ་འདོད་རྒུའི་རྒྱ་མཚོར་གྱུར། །ལྷ་ཚོགས་རྣམས་ཀྱི་པདྨའི་ལྗགས། །འོད་ཀྱི་སྦུ་གུས་བཞེས་པར་གྱུར། །གོང་གི་རྩ་སྔགས་མཐར། ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་གསུམ་མམ་བདུན་གྱིས་ཕུལ། རྒྱས་པར་སྤྲོ་ན་འཁོར་སྔགས་སོ་སོའི་མཐར་ཨི་དཾ་བ་ལིཾ་ཏ་བཏགས་པ་ལན་གསུམ་རེས་ཕུལ། དབང་མཛད་ལྷ་ཚོགས་འཁོར་བཅས་རྣམས། །མཆོད་སྦྱིན་གཏོར་མ་འདི་བཞེས་ལ། །སོགས་ཀྱི་ཕྲིན་ལས་བཅོལ། ཙནྡན་དམར་པོའི་མཎྜལ་ལ་ཚོམ་བུ་བདུན་བཀོད་དེ། ཨོཾ་ཨཱཿཧཱུྃ། བདག་གཞན་ལུས་དང་ལོངས་སྤྱོད་དང་། །དགེ་ཚོགས་རྒྱ་མཚོ་དང་བཅས་པ། །མཎྜལ་སྟོང་གསུམ་ཁྱབ་པར་སྤྲུལ། །དབང་གི་ལྷ་ཚོགས་རྣམས་ལ་འབུལ། །རླུང་སེམས་སྣང་བ་དབང་འདུས་ཤོག །ཨོཾ་སརྦ་རཏྣ་མཎྜལ་པཱུ་ཛ་ཧོཿཞེས་ཅི་ནུས་སུ་འབུལ། ཐུན་མཐར་སྟོང་ཚིག་མཆོད་བསྟོད་དང་། བསྡུ་ལྡང་ནི། འཁོར་རྣམས་འོད་ཞུ་གཙོ་ལ་ཐིམ། །ལྷར་སྣང་འོད་གསལ་དབྱིངས་སུ་བསྡུ། །སླར་ཡང་རང་ཉིད་གཙོ་བོའི་སྐུར། །ལམ་གྱིས་ལྡང་ལ་གནས་གསུམ་དུ། ཨོཾ་ཨཱཿཧཱུྃ་གིས་མཚན་པར་གྱུར། །བསྔོ་སྨོན་ནི། དགེ་བ་འདི་ཡིས་སེམས་ཅན་ཀུན། །པདྨ་རྒྱལ་དང་རྣམ་དབྱེར་མེད། །ཁམས་གསུམ་དབྱིངས་སུ་དག་པ་དང་། །འཕོ་བ་ཆེན་པོ་འགྲུབ་པར་ཤོག །བཀྲ་ཤིས་ནི། རྩ་བརྒྱུད་བླ་མ་སྤྲིན་ལྟར་འཁྲིགས། ཡི་དམ་དངོས་གྲུབ་སྦྲང་ཆར་འབེབས། །མཁའ་འགྲོ་ཆོས་སྐྱོང་ཕྲིན་ལས་སྒྲུབ། །རྩ་གསུམ་རབ་འབྱམས་བཀྲ་ཤིས་ཤོག །ཅེས་པས་དགེ་ལེགས་སུ་བྱའོ། །གང་ཞིག་འདོད་པའི་དོན་ཀུན་བསྒྲུབ། །འབད་མེད་དངོས་གྲུབ་ཅི་དགར་འཇོ། །ཡིད་བཞིན་ནོར་བུ་པདྨ་རྒྱལ། །གང་དེ་བསྙེན་པས་ཅི་བསམ་འགྲུབ། །དགེ་བས་བསྟན་པ་ཕྱོགས་བཅུར་རྒྱས། །ཆོས་སྐྱོངས་རྒྱལ་པོའི་སྐུ་ཚེ་བརྟན། །མངའ་ཐང་དཔལ་འབྱོར་རབ་རྒྱས་ཤིང་། །བཀྲ་ཤིས་དགེ་ལེགས་ཕུན་ཚོགས་ཤོག །ཅེས་པའང་ལྷ་རིགས་འབྲས་ལྗོངས་ཆོས་རྒྱལ་སྲས་བླ་མ་རིན་པོ་ཆེ་དོན་གྲུབ་རྣམ་རྒྱལ་ནས་བཀྲ་ཤིས་ལྷ་རེག་བཅས་གསུང་བསྐུལ་ངོར། འཇམ་དབྱངས་བློ་གྲོས་རྒྱ་མཚོའི་རིགས་ཁམས་ཀྱི་སྒྲོམ་བུ་ནས་ཐོན་པ་ཤིན་ཏུ་དགེ་ཞིང་བཀྲ་ཤིས་པར་བྱིན་གྱིས་བརླབ་ཏུ་གསོལ། དགེའོ། །མངྒ་ལཾ། ཤུ་བྷཾ། བཀྲ་ཤིས།། །།

[edit]

@#/__/dbang mdzad pad+ma rgyal po'i sgrub thabs khams gsum myur 'gug ces bya ba bzhugs so/__/ na mo gu ru pad+ma rA dzA ya/__gang gi dran pa de yi mod/__/khab len rdo yi lcags sdud bzhin/__/srid zhi'i dpal 'byor 'gugs mdzad pa'i/__/thabs chen pad+ma'i lcags kyu dbye/__/de la bstan pa dang sems can gyi bde skyid spel bar 'dod pa'i kun slong bzang po dang ldan pas 'dir 'jug pa la/__sngon 'gro skyabs sems ni/__na moHbdag dang mtha' yas sems can kun/__/dbang mdzad lha la skyabs su mchi/__/'gro rnams bde ba la 'god phyir/__/bdag gi rnal 'byor nyams blangs bgyi/__/lan gsum/__hU~M hU~M hU~M/__pad+ma dbang gi he ru kas/__/sprul pa'i khro tshogs rab spro bas/__/bdud bgegs log 'dren phyir bskrad cing /__/srung ba'i 'khor los phyogs mtshams gtams/__/oM badz+ra rak+Sha rak+Sha hU~M/__byin dbab mchod brlab ni/__hU~M hrIHzla gam 'od kyi gzhal yas 'dir/__/dbang mdzad lha rnams spyan 'dren gshegs/__/gnas dang yo byad byin gyis rlobs/__/kun bzang rnam 'phrul chen por gyur/__/oM badz+ra A be sha ya a AHoM sarba pU dza me g+ha AHhU~M/__dngos gzhi lha bskyed pa ni/__AHstong chen de bzhin nyid dbyings las/__/snying rje sgyu ma kun tu snang /__/rig rtsal rgyu yi ting 'dzin hrIHrab dmar gsal 'tsher 'bar zhing 'phro/__/e yaM raM suM b+h+rU~M yig chad/__/'byung lnga rim brtsegs ri rab dang /__/pad nyi srung 'khor bcas pa yi/__/lte bar dbang gi pho brang ni/__/pad+ma rA ga 'od 'bar ba'i/__/gzhal med zla gam sgo gcig pa/__/nang dbus pad+ma 'dab bzhi'i steng /__/dbus su gu ru pad+ma rgyal/__/dmar po nyi gzhon 'char kha'i mdog__/zhal gcig phyag gnyis 'dzum chags nyams/__/dbu la rin chen prog zhu gsol/__/sku la dar dmar gsang gos dang /__/ber phod rin chen pad+ma'i phreng /__/zhabs gnyis rgyal po rol stabs bzhugs/__/phyag g.yas seng lding DA ru dkrol/__/g.yon pas snang gsal me long 'dzin/__/sku las 'od zer dpag med 'phros/__/shar du sgrol ma dmar mo ni/__/mchog sbyin nor bu lcags kyu 'dzin/__/lho ru dzaM b+ha la dmar po/__/lcags kyu dang ni ne'u le bsnams/__/nub tu pad+ma mkha' 'gro dmar/__/phyag bzhi mda' gzhu lcags kyu dang /__/zhags pa 'dzin cing zhabs gar stabs/__/pad nyi ro yi steng na 'gying /__/byang du lha chen dbang phyug dmar/__/lcags kyu dang ni zhags pa gdengs/__/g.yon nas u ma de wIs brten/__/kun kyang chags pa'i nyams dang ldan/__/pad zla nyi ma'i steng na bzhugs/__/de ltar gsal ba'i gnas gsum du/__/yig 'bru gsum gyis mtshan par bsgom/__/hU~M hrIHpad+ma'i rigs kyi zhing khams nas/__/pad+ma rgyal po gtso dang 'khor/__/'dir gshegs byin gyis rlobs pa dang /__/sgrub mchog bdag la dngos grub stsol/__/badz+ra sa mA dzaHdzaHhU~M ba~M hoHsa ma ya tiSh+Tha lhan/__hU~M hrIHbla med mchod pa'i sprin phung ni/__/kun bzang rnam rol las byung ba/__/sa dang nam mkha' rab gang bas/__/dbang mdzad dkyil 'khor lha tshogs mchod/__/oM gu ru pad+ma rA dza maN+Dal sa pa ri wA ra badz+ra ar+g+haM nas shab+da'i bar dang /__rU pa shab+da gan+d+he rA sa spaR+she ma hA pany+tsa a mr-i ta rak+ta ba liM ta khA hi/__hU~M hrIHkhams gsum ma lus dbang du sdud/__/che ba'i yon tan kun rdzogs pa/__/dbang mdzad pad+ma rgyal po yi/__/dkyil 'khor lha tshogs kun la bstod/__/bzlas pa ni/__gtso bo'i thugs kar ut+pal dmar/__/ze'u 'brur nyi steng hrIHdmar las/__/sngags kyi phreng ba dpag med 'phros/__/'od zer spro bsdus don gnyis byas/__/tshur 'dus snang sems dbang 'dus bsam/__oM AHbadz+ra gu ru pad+ma rA dza a nr-i tri dzaHdzaHsarba sid+d+hi wA shaM ku ru hoHzhes bzla/__slar yang gtso bo'i 'od zer gyis/__/'khor rnams bskul bas srid zhi yi/__/dwangs bcud ma lus dbang du bsdus/__/khyad par lha mi klu gnod sbyin/__/zas nor rin chen la sogs pa/__/gang 'dod ma lus dbang du bsdus/__/bdag srog dwangs ma'i thig ler bstim/__/yul dang yul can dbyer med bzhag__/oM pad+ma tA re san+ta ra hrIHsarba lo ka wA shaM ku ru hoHoM pad+ma dzaM b+ha la hrIHswA hA/__oM pad+ma DA ki nI ku ru kul+le hrIHswA hA/__oM ma hA de wa dzaHu ma de wI hrIng hrIng dzaHbA shaM ku ru ho/__zhes so sor bzla/__thun mthar gtor ma maN+Dal 'bul/__bza' btung kha dog dmar po gtso bor gyur pa bshams la/__ra~M ya~M kha~M/__oM AHhU~M/__lan gsum gyis brlab/__gtor ma 'dod rgu'i rgya mtshor gyur/__/lha tshogs rnams kyi pad+ma'i ljags/__/'od kyi sbu gus bzhes par gyur/__/gong gi rtsa sngags mthar/__sa pa ri wA ra i daM ba liM ta kha kha khA hi khA hi/__lan gsum mam bdun gyis phul/__rgyas par spro na 'khor sngags so so'i mthar i daM ba liM ta btags pa lan gsum res phul/__dbang mdzad lha tshogs 'khor bcas rnams/__/mchod sbyin gtor ma 'di bzhes la/__/sogs kyi phrin las bcol/__tsan+dan dmar po'i maN+Dal la tshom bu bdun bkod de/__oM AHhU~M/__bdag gzhan lus dang longs spyod dang /__/dge tshogs rgya mtsho dang bcas pa/__/maN+Dal stong gsum khyab par sprul/__/dbang gi lha tshogs rnams la 'bul/__/rlung sems snang ba dbang 'dus shog__/oM sarba rat+na maN+Dal pU dza hoHzhes ci nus su 'bul/__thun mthar stong tshig mchod bstod dang /__bsdu ldang ni/__'khor rnams 'od zhu gtso la thim/__/lhar snang 'od gsal dbyings su bsdu/__/slar yang rang nyid gtso bo'i skur/__/lam gyis ldang la gnas gsum du/__oM AHhU~M gis mtshan par gyur/__/bsngo smon ni/__dge ba 'di yis sems can kun/__/pad+ma rgyal dang rnam dbyer med/__/khams gsum dbyings su dag pa dang /__/'pho ba chen po 'grub par shog__/bkra shis ni/__rtsa brgyud bla ma sprin ltar 'khrigs/__yi dam dngos grub sbrang char 'bebs/__/mkha' 'gro chos skyong phrin las sgrub/__/rtsa gsum rab 'byams bkra shis shog__/ces pas dge legs su bya'o/__/gang zhig 'dod pa'i don kun bsgrub/__/'bad med dngos grub ci dgar 'jo/__/yid bzhin nor bu pad+ma rgyal/__/gang de bsnyen pas ci bsam 'grub/__/dge bas bstan pa phyogs bcur rgyas/__/chos skyongs rgyal po'i sku tshe brtan/__/mnga' thang dpal 'byor rab rgyas shing /__/bkra shis dge legs phun tshogs shog__/ces pa'ang lha rigs 'bras ljongs chos rgyal sras bla ma rin po che don grub rnam rgyal nas bkra shis lha reg bcas gsung bskul ngor/__'jam dbyangs blo gros rgya mtsho'i rigs khams kyi sgrom bu nas thon pa shin tu dge zhing bkra shis par byin gyis brlab tu gsol/__dge'o/__/mang+ga laM/__shu b+haM/__bkra shis//__//