JKW-KABUM-20-WA-001-040

🚧 This website is under continued development. We appreciate your patience!

Previous Text Back to Volume PageNext Text

Wylie title	dgon sar chos rje mchog sprul rin po che'i 'phrin lan bdud rtsi'i do shal
Location	mkhyen brtse'i bka' 'bum Volume 20, sde tshan 1, Text 40, Pages 73-75 (Folios 37a2 to 38a4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. dgon sar chos rje mchog sprul rin po che'i 'phrin lan bdud rtsi'i do shal. In 'jam dbyangs mkhyen brtse'i dbang po'i bka' 'bum, Vol. 20: 73-75. Khams sde dge rdzong sar dgon: Rdzong sar blo gros phun tshogs, 2020.
Genre	Official Letters - chab shog

1 Texts in this Section (sde tshan or chos tshan)

40 73-75	དགོན་སར་ཆོས་རྗེ་མཆོག་སྤྲུལ་རིན་པོ་ཆེའི་འཕྲིན་ལན་བདུད་རྩིའི་དོ་ཤལ། dgon sar chos rje mchog sprul rin po che'i 'phrin lan bdud rtsi'i do shal Official Letters - chab shog	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

དགོན་སར་ཆོས་རྗེ་མཆོག་སྤྲུལ་རིན་པོ་ཆེའི་འཕྲིན་ལན་བདུད་རྩིའི་དོ་ཤལ་ཅེས་བྱ་བའོ། །ཙྪནྡོབཱཀྟྲཾནཱམེ། སྤྲོས་པའི་ཆུ་གཏེར་ལས་བརྒལ་ཡང་། །སྙིང་རྗེའི་ཤིང་རྟ་ལ་ཆགས་པས། །གཞན་ཕན་བདུད་རྩིའི་མཆོག་སྦྱིན་པའི། །རྣམ་འདྲེན་ཤར་གྱི་ཐིག་ལེའི་དྲུང་། །སྤྲིན་བྲལ་ཉི་མ་གཞོན་ནུའི་རྡུལ་ཕྲེང་གིས། །ཡིད་འོང་ཨུཏྤལ་དམར་པོ་བྱེ་བ་བཞིན། །གང་གི་ཐུགས་རྗེས་བསྐུལ་བའི་གཞན་དབང་ལས། །དོན་ལྡན་སྙན་པར་སྨྲ་བའི་མཆིད་འདི་གསོལ། །གཟོད་མ་ཉིད་ནས་རྣམ་པར་གྲོལ་ཡང་ཐབས་མཁས་སྤྱོད་པའི་ཨུཏྤལ། །རྨད་བྱུང་ཡོན་ཏན་དུ་མའི་ཚོན་རིས་རྣམ་པར་གཡོ་བའི་དོག་པ་ནི། །ཡིད་ཅན་སྒེག་མོའི་རྣ་བར་དབྱངས་པས་སྲིད་དང་ཞི་བའི་ཕ་མཐའ་ལས། །རིང་དུ་གྱུར་པའི་སྤྲིང་ཡིག་གསར་པས་ཕྱོགས་ཀྱི་ཁོར་ཡུག་དཀྲིགས་པར་བྱས། ༣ །དེ་ཚེ་ཕྱི་ནང་རིག་པའི་གཞུང་ལུགས་དང་། །བསླབ་གསུམ་དོན་ལ་མཛའ་བའི་བརྟུལ་ཞུགས་ཀྱིས། །འཇམ་མགོན་བླ་མའི་ཆོས་ཀྱི་རྒྱལ་ཐབས་ཆེར། །ལྷར་བཅས་བསྔགས་པའི་རོལ་མོས་ཤིས་པ་བསྒྲུབས། ༤ །ཟབ་མོ་དབུ་མའི་གཞུང་ལུགས་ཟླ་གཞོན་གྱིས། །ཁྱོད་མཁྱེན་ཀུ་མུཏ་འཛུམ་དཀར་གྲོལ་བའི་མོད། །རྒྱལ་བ་གཉིས་པ་དཔལ་ལྡན་ཀླུ་ཡི་ཞབས། །གངས་ཅན་རི་བོའི་ཁོངས་སུ་རྒྱུ་བ་བཞིན། ༥ །གསང་རྒྱུད་རྒྱ་མཚོའི་མཐར་ཐུག་འདུས་པ་ཡི། །སྨིན་གྲོལ་ལང་ཚོ་རྒྱགས་པའི་མེ་ནཱ་ཀར། །བློ་མཆོག་ཟུར་མིག་གཡོ་བས་འཁྱུད་བཞིན་དུ། །བརྟན་མཁས་ཡོན་ཏན་རྫོགས་འདི་རིགས་སམ་ཅི། ༦ །དེ་སོགས་བསྔགས་འོས་རྣམ་ཐར་བྱེ་བ་ཡིས། །མངོན་པར་མཛེས་པའི་གསང་བ་གསུམ་གྱི་དངོས། །འཚོ་གཞེས་ཆོ་ག་མ་ཉམས་གསལ་བ་ལ། །གཅིག་ཏུ་གུས་པ་བཞིན་རས་ཅིར་ཡང་ངོམ། ༧ །ཁྱད་པར་ངེས་དོན་མཛེས་མའི་འགྲམ་པ་ནས། །འཕོས་པའི་ལེགས་བཤད་བདུད་རྩིའི་ཁ་ཆང་གིས། །བདག་ཉིད་མཆོག་ཏུ་དྭངས་པའི་བ་ཀུ་ལ། །དད་གསུམ་འདའ་བརྒྱ་གྲོལ་བའི་མཚར་སྡུག་གཡོས། ༨ །འདི་ན་གྱི་ནའི་སྤྱོད་ཚུལ་སྟུག་པོ་ཡིས། །དམ་ལ་བཞག་པའི་འདུ་ཤེས་གསུམ་པ་ཡང་། །ཐོས་བསམ་རི་མོར་བྲིས་པའི་མར་མེ་དང་། །མཚུངས་བཞིན་ལང་ཚོ་ཉེ་ཞོའི་ཕྱོགས་ཀྱིས་བཏང་། ༩ །སླད་མའི་ཆར་ཡང་སྲིད་པའི་ཟག་པ་རྒྱུ་དང་བཅས་པའི་འཆིང་བ་ཀུན། །འོད་གསལ་བདེ་ཆེན་དྭངས་མའི་ཐིག་ལེར་འཕོ་འགྱུར་མེད་པར་རྒྱས་བཏབ་པས། །སྐུ་གསུམ་མི་ཕྱེད་གྲུབ་པའི་རྡོ་རྗེ་རྣམ་པ་ཀུན་གྱི་མཆོག་ལྡན་ཞལ། །འཆི་མེད་རྟག་པའི་གོ་འཕང་ཆེན་པོར་གཡོ་བ་མེད་པར་འཚོ་གཞེས་ཤིང་། ༡༠ །བདག་ཀྱང་འདི་ནས་གཏན་དུ་བདེ་བའི་ལམ། །མངོན་དུ་རྙེད་མིན་དེ་སྲིད་མགོན་ཁྱོད་ཀྱི། །དགེ་བའི་བཤེས་སུ་ཡང་དག་མཛད་ནས་ཀྱང་། །རྣམ་གྲོལ་ཆོས་ཀྱི་ཆར་ཆེན་འབེབས་པ་དང་། ༡༡ །རིང་དུ་གནས་ནའང་ལེགས་པར་བཤད་པའི་གཏམ། །འཆད་མེད་སྩོལ་བའི་བཀའ་དྲིན་མི་འགོག་པས། །ཉི་མས་པདྨོར་ཇི་བཞིན་ཕན་བདེའི་དབྱིག །སྦྱིན་པའི་བྱེད་པོ་ཉིད་དུ་མཛོད་ཅེས་སྨྲེངས། ༡༢ །དེ་སྐད་ཞུ་བའི་མཆིད་ཚིག་མདོངས་མཐའ་མོ། །རྟེན་དངོས་གློག་གི་དོ་ཤལ་གཡོ་བ་དང་། །གུས་སྤྲོའི་སྒྲོ་གཤོག་ཟླུམ་པོའི་གར་བསྒྱུར་བཞིན། །ཁྱོད་ཞབས་དག་པའི་ཚལ་དུ་རྩེན་ལ་དེངས། ༡༣ །སརྦ་དཱ་ཀ་ལྱཱ་ཎཾ་བྷ་བ་ཏུ།། །། ༈

[edit]

dgon sar chos rje mchog sprul rin po che'i 'phrin lan bdud rtsi'i do shal/ dgon sar chos rje mchog sprul rin po che'i 'phrin lan bdud rtsi'i do shal ces bya ba'o/_/ts+tshan+dobAk+t+raMnAme/_spros pa'i chu gter las brgal yang /___/snying rje'i shing rta la chags pas/___/gzhan phan bdud rtsi'i mchog sbyin pa'i/___/rnam 'dren shar gyi thig le'i drung /___/sprin bral nyi ma gzhon nu'i rdul phreng gis/___/yid 'ong ut+pal dmar po bye ba bzhin/___/gang gi thugs rjes bskul ba'i gzhan dbang las/___/don ldan snyan par smra ba'i mchid 'di gsol/___/gzod ma nyid nas rnam par grol yang thabs mkhas spyod pa'i ut+pal/___/rmad byung yon tan du ma'i tshon ris rnam par g.yo ba'i dog pa ni/___/yid can sgeg mo'i rna bar dbyangs pas srid dang zhi ba'i pha mtha' las/___/ring du gyur pa'i spring yig gsar pas phyogs kyi khor yug dkrigs par byas/___3__/de tshe phyi nang rig pa'i gzhung lugs dang /___/bslab gsum don la mdza' ba'i brtul zhugs kyis/___/'jam mgon bla ma'i chos kyi rgyal thabs cher/___/lhar bcas bsngags pa'i rol mos shis pa bsgrubs/___4__/zab mo dbu ma'i gzhung lugs zla gzhon gyis/___/khyod mkhyen ku muta 'dzum dkar grol ba'i mod/___/rgyal ba gnyis pa dpal ldan klu yi zhabs/___/gangs can ri bo'i khongs su rgyu ba bzhin/___5__/gsang rgyud rgya mtsho'i mthar thug 'dus pa yi/___/smin grol lang tsho rgyags pa'i me nA kar/__/blo mchog zur mig g.yo bas 'khyud bzhin du/___/brtan mkhas yon tan rdzogs 'di rigs sam ci/___6_/de sogs bsngags 'os rnam thar bye ba yis/___/mngon par mdzes pa'i gsang ba gsum gyi dngos/___/'tsho gzhes cho ga ma nyams gsal ba la/___/gcig tu gus pa bzhin ras cir yang ngom/___7__/khyad par nges don mdzes ma'i 'gram pa nas/___/'phos pa'i legs bshad bdud rtsi'i kha chang gis/___/bdag nyid mchog tu dwangs pa'i ba ku la/___/dad gsum 'da' brgya grol ba'i mtshar sdug g.yos/___8__/'di na gyi na'i spyod tshul stug po yis/___/dam la bzhag pa'i 'du shes gsum pa yang /___/thos bsam ri mor bris pa'i mar me dang /___/mtshungs bzhin lang tsho nye zho'i phyogs kyis btang /___9__/slad ma'i char yang srid pa'i zag pa rgyu dang bcas pa'i 'ching ba kun/___/'od gsal bde chen dwangs ma'i thig ler 'pho 'gyur med par rgyas btab pas/___/sku gsum mi phyed grub pa'i rdo rje rnam pa kun gyi mchog ldan zhal/___/'chi med rtag pa'i go 'phang chen por g.yo ba med par 'tsho gzhes shing /___10__/bdag kyang 'di nas gtan du bde ba'i lam/___/mngon du rnyed min de srid mgon khyod kyi/___/dge ba'i bshes su yang dag mdzad nas kyang /___/rnam grol chos kyi char chen 'bebs pa dang /___11__/ring du gnas na'ang legs par bshad pa'i gtam/___/'chad med stsol ba'i bka' drin mi 'gog pas/___/nyi mas pad+mor ji bzhin phan bde'i dbyig__/sbyin pa'i byed po nyid du mdzod ces smrengs/___12__/de skad zhu ba'i mchid tshig mdongs mtha' mo/___/rten dngos glog gi do shal g.yo ba dang /___/gus spro'i sgro gshog zlum po'i gar bsgyur bzhin/___/khyod zhabs dag pa'i tshal du rtsen la dengs/___13__/sarba dA ka l+yA NaM b+ha ba tu//___//_!_