JKW-KABUM-02-KHA-001-014

🚧 This website is under continued development. We appreciate your patience!

Previous Text Back to Volume PageNext Text

Wylie title	nags tshal gyi gtam gzhi lam 'bras bu'i snang byed
Location	mkhyen brtse'i bka' 'bum Volume 2, sde tshan 1, Text 14, Pages 43-48 (Folios 21b6 to 24b2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. nags tshal gyi gtam gzhi lam 'bras bu'i snang byed. In 'jam dbyangs mkhyen brtse'i dbang po'i bka' 'bum, Vol. 2: 43-48. Khams sde dge rdzong sar dgon: Rdzong sar blo gros phun tshogs, 2020.
Genre	Discourses - gtam

1 Texts in this Section (sde tshan or chos tshan)

14 43-48	ནགས་ཚལ་གྱི་གཏམ་གཞི་ལམ་འབྲས་བུའི་སྣང་བྱེད། nags tshal gyi gtam gzhi lam 'bras bu'i snang byed Discourses - gtam	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

ནགས་ཚལ་གྱི་གཏམ་གཞི་ལམ་འབྲས་བུའི་སྣང་བྱེད་ཅེས་བྱ་བ། རང་བྱུང་རིག་པའི་ཀློང་སྤྲོས་པ་དང་བྲལ་བ་ལ་ཕྱག་འཚལ་ལོ། །དེ་ཡང་ནགས་ཚལ་མཐོང་ན་དགའ་ཞེས་བྱ་བ་ན། སྤང་ལྗོངས་གསེར་གྱི་མཎྜལ་ཕྱིས་པ་ལྟ་བུའི་ངོགས་སུ། འབབ་ཆུ་སྣ་ཚོགས་ལྷུང་ལྷུང་དུ་འབབ་ཅིང་གཞོལ་བ་ཕྱོགས་མཚམས་ཀུན་ཏུ་རི་དྭགས་རྣམས་བག་ཕབ་པར་རྒྱུ་ཞིང་ཕན་ཚུན་གཅིག་ཏུ་རྩེ་བ། ལྷའི་བྱ་ཚོགས་བཞིན་རས་པུཎྜ་རཱི་ཀའི་ཆུན་པོ་ལ་ཡན་ལག་པདྨའི་སྣལ་མ་ལྟར་ཕྲ་བ། སྤུ་སྡུག་ཨུཏྤལ་གསར་པ་ལྟར་མཛེས་ཤིང་། མགྲིན་པའི་སྒྲ་སྐད་དྲི་ཟའི་གླིང་བུ་ལྟར་མཉན་ན་ཆོག་མི་ཤེས་ཤིང་ཡིད་དུ་འོང་བར་སྒྲོག་པ་དང་། དེ་བཞིན་དུ་སྦྲང་རྩིའི་བཅུད་ཀྱིས་མྱོས་པའི་བུང་བ་གཞོན་ནུ་སྙན་པའི་གླུ་དང་། དགའ་བའི་གཤོག་རླབས་བསྒྱུར་བ་སོགས་དབེན་པའི་གནས་ཤིན་ཏུ་ཕུན་སུམ་ཚོགས་ཤིང་ཡིད་དུ་འོང་བ་ཞིག་ཡོད་དོ། །དེར་ཐབས་གཅིག་ཏུ་རང་བྱུང་སྒྱུ་མའི་རྣལ་འབྱོར་པ་ཡུལ་སྣང་བརྡ་དང་དཔེ་ཆར་ཤར་ཞིང་། ཀུན་རྟོག་ལྷའི་ཕྱག་རྒྱར་རྩལ་རྫོགས་པས་དག་པའི་འཁོར་ལོ་འབྱམས་སུ་ཀླས་པར་ཤར་བའི་རིག་པའི་ཟླ་བ་ཞེས་བྱ་བ་ཞིག་ལྷགས་པ་ན། ལྷའི་བྱ་དྲིལ་བུའི་སྒྲ་ཅན་བྱ་བ་ཞིག་གིས། སྣང་བ་འདི་ནི་ཀུན་ཏུ་བརྟགས་པ་སྟེ། །གཞན་དབང་འཁྲུལ་པར་སྤྱོད་བཞིན་སྲེད་པ་འཕེལ། །ཡོངས་གྲུབ་རིག་པའི་ཟླ་བའི་ངོ་བོ་ཉིད། །རྣམ་པ་ཐམས་ཅད་མཁྱེན་པའི་ཡེ་ཤེས་ཡིན། །ཞེས་བསྐུལ་བ་དང་རིག་རྩལ་གྱི་ཉམས་ལྷག་པར་འབར་ཏེ། བདེ་སྟོང་ཆུ་འཛིན་སྤྲིན་སྐྱེས་གཞོན་ནུའི་དབྱངས་རྟ་ལ་དྲངས་ཏེ་འདི་སྐད་ཅེས་བཞེངས་སོ། །ཨེ་མ་ཧོ། རྟག་པ་མ་ཡིན་ངོ་བོ་སྤྲོས་པ་བྲལ། །ཆད་པ་མ་ཡིན་རང་བཞིན་འགག་པ་མེད། །ཐ་དད་མ་དམིགས་གང་ཤར་རང་ངོར་གྲོལ། །སྣང་བའི་ངོ་རུ་སྣ་ཚོགས་སྣང་བ་ཀུན། །འདུས་པའི་འཁོར་ལོར་འབྱམས་སུ་ཀླས་བ་ཉིད། །རིག་པའི་གཤིས་སུ་དེར་འཛིན་མ་གྲུབ་པས། །སོར་རྟོག་ཤེས་རབ་རྩལ་ལས་སྣ་ཚོགས་ཤར། །འདི་ན་རྣམ་པར་བཀོད་པའི་ས་གཞི་དང་། །ནགས་ཚལ་སྨན་ལྗོངས་དྲྭ་བས་མཛེས་བྱས་ཤིང་། །རྩྭ་ལྗང་མྱུ་གུ་སྔོན་མོའི་རེག་བྱ་ལ། །ཡིད་འོང་པདྨ་གསར་པའི་ཐིག་ལེ་གཡོ། །ལྷུང་ལྷུང་དལ་གྱིས་འབབ་པའི་སྒྲ་སྐད་ལས། །མཉན་ན་ཆོག་མི་ཤེས་པའི་གླིང་བུ་དང་། །འདབ་ཆགས་རི་དྭགས་བག་ཕེབས་རབ་ཏུ་རྩེ། །སྦྲང་རྩིས་མྱོས་པའི་བུང་བ་གཞོན་ནུ་སོགས། །ངོ་མཚར་བཀོད་པ་རྣམ་པར་བཀྲ་བ་ཡང་། །ཕྱི་ལྟར་ཐ་དད་གཟུགས་ཀྱི་མཚན་མ་དང་། །ནང་ལྟར་རྡོ་རྗེའི་གླུ་ཡི་ངོ་བོ་ཉིད། །གསང་བ་ཡེ་ཤེས་ཆེན་པོའི་སྙིང་པོ་ཅན། །ལུགས་འབྱུང་སྲིད་པར་འཁྲུལ་པའི་བག་ཆགས་ནི། །ལུགས་ལྡོག་དག་པའི་རྩལ་མཆོག་འབའ་ཞིག་གོ །ཞེས་ཆེད་དུ་བརྗོད་མ་ཐག་ཏུ། བེམ་པོའི་ངང་ཚུལ་དག་ཀྱང་བདེ་ཆེན་གྱི། །རྣམ་པ་བྲལ་བའི་མཛེས་མས་འཁྱུད་པ་ལས། །རྣམ་བཅས་བདེ་སྟོང་ཡེ་ཤེས་ཆེན་པོའི་སྒྲ། །ཆོས་ཁམས་རྒྱ་མཚོར་སྨིན་པ་འདི་ལྟར་རོ། །ལྗོན་ཤིང་གི་རྩ་བ་ནས་འདུས་པའི་ཁྲིམས་ཀྱི་གཞི་རྣམ་པར་དག་པའི་གླུ་འདི་བྱུང་ངོ་། །ཨེ་མ། དམ་ཆོས་ཀུན་གྱི་དེ་ཉིད་འདི་ཡིན་ཏེ། །ལམ་དང་སྤྱོད་པ་རྒྱ་མཚོའི་གཞིར་གྱུར་ཅིང་། །བཅུ་བདུན་བླང་བྱའི་སྙིང་པོ་དང་ལྡན་པ། །འདུལ་ཁྲིམས་རྒྱ་མཚོའི་རྩ་བ་ཡིན་ཕྱིར་རོ། །ལོ་འདབ་དྲི་བཞོན་གྱིས་བསྐུལ་བ་ལས་སྲུང་སྡོམ་ལམ་གྱི་སྒྲ་འདི་བྱུང་ངོ་། །གཞན་གནོད་གཞིར་བཅས་ཡོངས་སུ་སྤངས་པ་ཡི། །ཉིས་བརྒྱ་ལྔ་བཅུའི་ཁྲིམས་ཀྱི་མངོན་རྟོགས་ནི། །སྲིད་ལས་ངེས་པར་འབྱུང་བའི་གྲིབ་བསིལ་ཅན། །རིགས་བདུན་འདུལ་བའི་ལོ་འདབ་རབ་ཏུ་གཡོ། །མེ་ཏོག་དང་འབྲས་བུ་ལས་དྲི་བསུང་དང་འགྲོགས་པའི་འབྲས་བུའི་སྒྲ་འདི་བྱུང་ངོ་། །བསླབ་བྱ་ངེས་པར་སྤྱད་པའི་སྙིང་པོ་ནི། །འཁོར་བའི་དགྲ་བཅོམ་མེ་ཏོག་མདའ་ཅན་འཇོམས། །ཞི་བསིལ་ལྷ་མིར་བཅས་པས་བསྟེན་བྱའི་ཡུལ། །འབྲས་བུ་སྲིད་ལས་རྣམ་པར་གྲོལ་བའོ། །མེ་ཏོག་གི་རྩ་བ་ནས་བྱང་སེམས་ཀྱི་ངེས་པའི་གཞི་སྟོན་པར ་བྱེད་པའི་སྒྲ་འདི་བྱུང་ངོ་། །གཞན་ཕན་ཀུནྡཱར་ཆགས་པའི་ཟླ་ཟེར་ཡང་། །ངོ་བོ་སྟོང་པ་ཉིད་ལས་རབ་སྐྱེས་ཤིང་། །དོན་གྱིས་སྲིད་ཞི་མཉམ་པར་སྦྱོར་བའི་ཕྱིར། །ཚད་མེད་བཞི་ཡི་རྩ་བ་ཉིད་ཡིན་ནོ། །ལོ་འདབ་ཀྱི་འཕྱང་འཕྲུལ་རྣམ་པར་གཡོ་བ་ལས་སྨོན་འཇུག་ལམ་གྱི་ཚིགས་སུ་བཅད་པ་འདི་དག་བྱུང་ངོ་། །སྨོན་པ་བདག་གཞན་མཉམ་བརྗེ་གཅེས་པ་སྟེ། །འགྲོ་ཀུན་དུས་གསུམ་དྲིན་དང་ལྡན་བའི་ཕྱིར། །སྲོག་ཀྱང་འདོར་ཕོད་སྙིང་སྟོབས་བསམ་པ་ནི། །ཤིན་ཏུ་བརླིང་བར་བྱས་པའི་ཡལ་ག་ལ། །ཆོས་དང་ཟང་ཟིང་མི་འཇིགས་སྦྱིན་པའི་ལམ། །སྤང་འཇུག་གཞན་ཕན་ཚུལ་ཁྲིམས་ཕ་རོལ་ཕྱིན། །གནོད་དང་ཆོས་དང་ཆོས་ཉིད་ཟབ་མོ་བཟོད། །དགེ་ལ་སྤྲོ་བཞིན་རབ་འཇུག་མི་ཞུམ་བརྩོན། །ཞི་ལྷག་ཟུང་འབྲེལ་མཉམ་ཉིད་ཏིང་འཛིན་བསྒོམ། །ཐོས་བསམ་སྒོམ་པའི་ཤེས་རབ་ཟབ་མོ་བསྐྱེད། །དེ་ལྟར་རྒྱལ་བའི་སྲས་ཀྱི་སྤྱོད་པ་ལ། །གཅིག་ཏུ་བརྩོན་པའི་ལོ་འདབ་རབ་གཡོ་བར། །རང་གཞན་འཁོར་བའི་ཚ་གདུང་སེལ་བར་བྱེད། །ཅེས་སོ། །ཡང་འབྲས་བུ་ལ་ཟུང་འཇུག་གི་གོ་འཕང་སྟོན་ཕྱིར་འདི་སྐད་ཅེས་བྱུང་ངོ་། །སྟོང་ཉིད་སྙིང་རྗེའི་སྙིང་པོ་ལ་ཆགས་པའི། །འབྲས་བུ་ཚོགས་གཉིས་ཟུང་འཇུག་ངོ་བོ་ཡིས། །ཆོས་དང་གཟུགས་སྐུའི་རང་བཞིན་ཐོབ་བགྱིད་པ། །བྱང་ཆུབ་སྤྱོད་པ་རྒྱ་མཚོའི་ནོར་བུ་ཡིན། །ཞེས་སོ། །དེ་ཡི་ཚེ་དྲེགས་པས་མྱོས་པའི་བུང་བ་གཞོན་ནུ་དག་སྦྲང་རྩིའི་བཅུད་ལ་རོལ་བཞིན་པར་གཟུངས་སྔགས་རྡོ་རྗེ་ཐེག་པའི་གཞིའི་གནད་གསང་སྟོན་པའི་གླུ་འདི་སྐད་ཅེས་བླངས་སོ། །འཁོར་འདས་གང་དུའང་མ་གྲུབ་གཞི་ཡི་དངོས། །འཁྲུལ་གྲོལ་ལས་འདས་ཀུན་བྱེད་མེ་ལོང་ངོགས། །སྣ་ཚོགས་སྣང་བའི་འཆར་སྒོ་གཉིས་འཛིན་དུ། །བཟུང་བས་མཐའ་མེད་འཁོར་བའི་རྒྱ་མཚོ་བྱུང་། །དེ་ཉིད་རང་ངོར་རིག་པའི་སྐད་ཅིག་མར། །ཁྱད་ཆོས་དྲུག་ལྡན་ཀུན་ཏུ་བཟང་པོའི་ཀློང་། །མངོན་པར་བྱང་ཆུབ་སྲིད་ཞི་ཡོངས་ཀྱི་དཔལ། །ཕཊ། བཀྲ་ཤིས། ཧ་ཧ་ཧ་སྐྱགས་གཏད་མེད་བྷྱོ། །སྣོད་བྷྱོ། ཡག་བྷྱོ།། །། ༈

[edit]

nags tshal gyi gtam gzhi lam 'bras bu'i snang byed/__ nags tshal gyi gtam gzhi lam 'bras bu'i snang byed ces bya ba/_rang byung rig pa'i klong spros pa dang bral ba la phyag 'tshal lo/_/de yang nags tshal mthong na dga' zhes bya ba na/_spang ljongs gser gyi maN+Dal phyis pa lta bu'i ngogs su/_'bab chu sna tshogs lhung lhung du 'bab cing gzhol ba phyogs mtshams kun tu ri dwags rnams bag phab par rgyu zhing phan tshun gcig tu rtse ba/_lha'i bya tshogs bzhin ras puN+Da rI ka'i chun po la yan lag pad+ma'i snal ma ltar phra ba/_spu sdug ut+pal gsar pa ltar mdzes shing /_mgrin pa'i sgra skad dri za'i gling bu ltar mnyan na chog mi shes shing yid du 'ong bar sgrog pa dang /_de bzhin du sbrang rtsi'i bcud kyis myos pa'i bung ba gzhon nu snyan pa'i glu dang /_dga' ba'i gshog rlabs bsgyur ba sogs dben pa'i gnas shin tu phun sum tshogs shing yid du 'ong ba zhig yod do/_/der thabs gcig tu rang byung sgyu ma'i rnal 'byor pa yul snang brda dang dpe char shar zhing /_kun rtog lha'i phyag rgyar rtsal rdzogs pas dag pa'i 'khor lo 'byams su klas par shar ba'i rig pa'i zla ba zhes bya ba zhig lhags pa na/_lha'i bya dril bu'i sgra can bya ba zhig gis/_snang ba 'di ni kun tu brtags pa ste/_/gzhan dbang 'khrul par spyod bzhin sred pa 'phel/_/yongs grub rig pa'i zla ba'i ngo bo nyid/_/rnam pa thams cad mkhyen pa'i ye shes yin/_/zhes bskul ba dang rig rtsal gyi nyams lhag par 'bar te/_bde stong chu 'dzin sprin skyes gzhon nu'i dbyangs rta la drangs te 'di skad ces bzhengs so/_/e ma ho/_rtag pa ma yin ngo bo spros pa bral/_/chad pa ma yin rang bzhin 'gag pa med/_/tha dad ma dmigs gang shar rang ngor grol/_/snang ba'i ngo ru sna tshogs snang ba kun/_/'dus pa'i 'khor lor 'byams su klas ba nyid/_/rig pa'i gshis su der 'dzin ma grub pas/__/sor rtog shes rab rtsal las sna tshogs shar/_/'di na rnam par bkod pa'i sa gzhi dang /_/nags tshal sman ljongs drwa bas mdzes byas shing /_/rtswa ljang myu gu sngon mo'i reg bya la/_/yid 'ong pad+ma gsar pa'i thig le g.yo/_/lhung lhung dal gyis 'bab pa'i sgra skad las/_/mnyan na chog mi shes pa'i gling bu dang /_/'dab chags ri dwags bag phebs rab tu rtse/_/sbrang rtsis myos pa'i bung ba gzhon nu sogs/_/ngo mtshar bkod pa rnam par bkra ba yang /_/phyi ltar tha dad gzugs kyi mtshan ma dang /_/nang ltar rdo rje'i glu yi ngo bo nyid/_/gsang ba ye shes chen po'i snying po can/_/lugs 'byung srid par 'khrul pa'i bag chags ni/_/lugs ldog dag pa'i rtsal mchog 'ba' zhig go__/zhes ched du brjod ma thag tu/_bem po'i ngang tshul dag kyang bde chen gyi/_/rnam pa bral ba'i mdzes mas 'khyud pa las/_/rnam bcas bde stong ye shes chen po'i sgra/_/chos khams rgya mtshor smin pa 'di ltar ro/_/ljon shing gi rtsa ba nas 'dus pa'i khrims kyi gzhi rnam par dag pa'i glu 'di byung ngo /_/e ma/_dam chos kun gyi de nyid 'di yin te/_/lam dang spyod pa rgya mtsho'i gzhir gyur cing /_/bcu bdun blang bya'i snying po dang ldan pa/_/'dul khrims rgya mtsho'i rtsa ba yin phyir ro/_/lo 'dab dri bzhon gyis bskul ba las srung sdom lam gyi sgra 'di byung ngo /_/gzhan gnod gzhir bcas yongs su spangs pa yi/_/nyis brgya lnga bcu'i khrims kyi mngon rtogs ni/_/srid las nges par 'byung ba'i grib bsil can/_/rigs bdun 'dul ba'i lo 'dab rab tu g.yo/_/me tog dang 'bras bu las dri bsung dang 'grogs pa'i 'bras bu'i sgra 'di byung ngo /_/bslab bya nges par spyad pa'i snying po ni/_/'khor ba'i dgra bcom me tog mda' can 'joms/_/zhi bsil lha mir bcas pas bsten bya'i yul/_/'bras bu srid las rnam par grol ba'o/_/me tog gi rtsa ba nas byang sems kyi nges pa'i gzhi ston par_ byed pa'i sgra 'di byung ngo /_/gzhan phan kun+dAr chags pa'i zla zer yang /_/ngo bo stong pa nyid las rab skyes shing /_/don gyis srid zhi mnyam par sbyor ba'i phyir/_/tshad med bzhi yi rtsa ba nyid yin no/_/lo 'dab kyi 'phyang 'phrul rnam par g.yo ba las smon 'jug lam gyi tshigs su bcad pa 'di dag byung ngo /_/smon pa bdag gzhan mnyam brje gces pa ste/_/'gro kun dus gsum drin dang ldan ba'i phyir/_/srog kyang 'dor phod snying stobs bsam pa ni/_/shin tu brling bar byas pa'i yal ga la/_/chos dang zang zing mi 'jigs sbyin pa'i lam/_/spang 'jug gzhan phan tshul khrims pha rol phyin/_/gnod dang chos dang chos nyid zab mo bzod/_/dge la spro bzhin rab 'jug mi zhum brtson/_/zhi lhag zung 'brel mnyam nyid ting 'dzin bsgom/_/thos bsam sgom pa'i shes rab zab mo bskyed/_/de ltar rgyal ba'i sras kyi spyod pa la/_/gcig tu brtson pa'i lo 'dab rab g.yo bar/_/rang gzhan 'khor ba'i tsha gdung sel bar byed/_/ces so/_/yang 'bras bu la zung 'jug gi go 'phang ston phyir 'di skad ces byung ngo /_/stong nyid snying rje'i snying po la chags pa'i/_/'bras bu tshogs gnyis zung 'jug ngo bo yis/_/chos dang gzugs sku'i rang bzhin thob bgyid pa/_/byang chub spyod pa rgya mtsho'i nor bu yin/_/zhes so/_/de yi tshe dregs pas myos pa'i bung ba gzhon nu dag sbrang rtsi'i bcud la rol bzhin par gzungs sngags rdo rje theg pa'i gzhi'i gnad gsang ston pa'i glu 'di skad ces blangs so/_/'khor 'das gang du'ang ma grub gzhi yi dngos/_/'khrul grol las 'das kun byed me long ngogs/_/sna tshogs snang ba'i 'char sgo gnyis 'dzin du/_/bzung bas mtha' med 'khor ba'i rgya mtsho byung /_/de nyid rang ngor rig pa'i skad cig mar/_/khyad chos drug ldan kun tu bzang po'i klong /_/mngon par byang chub srid zhi yongs kyi dpal/_/phaT/_bkra shis/_ha ha ha skyags gtad med b+h+yo/_/snod b+h+yo/_yag b+h+yo//___//_!_