JKW-KABUM-20-WA-001-012

🚧 This website is under continued development. We appreciate your patience!

Previous Text Back to Volume PageNext Text

Wylie title	sa skyong lha sras rin po che'i zhabs pad du phul ba'i mchid lan
Location	mkhyen brtse'i bka' 'bum Volume 20, sde tshan 1, Text 12, Pages 32-35 (Folios 16b6 to 18a1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. sa skyong lha sras rin po che'i zhabs pad du phul ba'i mchid lan. In 'jam dbyangs mkhyen brtse'i dbang po'i bka' 'bum, Vol. 20: 32-35. Khams sde dge rdzong sar dgon: Rdzong sar blo gros phun tshogs, 2020.
Genre	Official Letters - chab shog  ·  Replies to Questions - dris lan

1 Texts in this Section (sde tshan or chos tshan)

12 32-35	ས་སྐྱོང་ལྷ་སྲས་རིན་པོ་ཆེའི་ཞབས་པད་དུ་ཕུལ་བའི་མཆིད་ལན། sa skyong lha sras rin po che'i zhabs pad du phul ba'i mchid lan Official Letters - chab shog   ·   Replies to Questions - dris lan	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

ས་སྐྱོང་ལྷ་སྲས་རིན་པོ་ཆེའི་ཞབས་པད་དུ་ཕུལ་བའི་མཆིད་ལན། ཤྲཱི་བི་ཛ་ཡནྟུ། འཇིག་རྟེན་གསུམ་ན་དགེ་བའི་གཏམ་གྱི་རྔ། །དཔྱིད་ཀྱི་དུས་སྟོན་ཇི་བཞིན་དར་བབས་པས། །ལེགས་བྱས་སྣང་བ་ནུབ་པ་མེད་པའི་ཕུལ། །འཆི་མེད་གྲུབ་པའི་ལྷ་དེས་ཁྱོད་ལ་སྲུངས། ༡ །བསོད་ནམས་རྒྱ་མཚོའི་འདུ་འགོད་གཡོ་བ་ལས། །བསྔགས་འོས་ཟླ་རིས་དང་པོར་ཤར་ཙམ་གྱིས། །ཁོར་ཡུག་ཤིས་དགུའི་ཆུ་གཏེར་རྒྱས་མཛད་པའི། །སྔོན་མེད་ས་ཡི་ཚངས་པ་རྒྱལ་གྱུར་ཅིག ༢ །གང་ཚུལ་ཤིན་ཏུ་རྨད་བྱུང་རྣམ་པར་ཐར། །སྙིང་ལ་རི་མོ་བཞིན་དུ་བྲིས་གྱུར་པས། །ཉམས་ལྡན་ཚིག་གི་མེ་ཏོག་དར་བབས་པའི། །དོགས་པ་ཅུང་ཟད་འཐོར་བའི་བསྟི་སྟངས་འབུལ། ༣ །ཇི་ལྟར་དག་པའི་རིན་ཆེན་བཻཌཱུཪྻ། །འདི་ན་དབུལ་བ་མཐར་བྱེད་གཞན་ཡིན་ཏེ། །རྩོལ་མི་མངའ་ཡང་ཆོས་དང་སྲིད་ཀྱི་དཔལ། །འཇོ་མཁས་ཁྱོད་འདྲ་སྲིད་པ་གསུམ་ན་དབེན། ༤ །དང་པོར་རིགས་ཀྱི་ནོར་བུའི་ས་འཛིན་ལ། །ཕྱི་ནས་སྙིང་རྗེ་ཆེན་པོའི་བརླན་ཆགས་ཏེ། །ཤེས་བྱ་མཐའ་དག་གཟིགས་པའི་དཔག་བསམ་ནི། །དམ་པའི་ཡོན་ཏན་རྒྱ་མཚོའི་པདྨོ་འཛུམ། ༥ །དེ་སླད་ཅི་འདི་རིག་བྱེད་འབྱིན་པའི་བདག །ས་ལ་རྒྱུ་བ་ཉིད་ཅེས་འཁྲུལ་པའི་ཡིད། །བདག་ཅག་སྔོན་བསགས་ལེགས་བྱས་ཅོད་པན་གྱིས། །ཐོབ་པ་ཁོ་ནས་འཆད་པའི་གནས་སྐབས་ཐོབ། ༦ །ཡོན་ཏན་མཆོག་ལ་གུས་པའི་བརྟུལ་ཞུགས་དང་། །བར་མའི་ཡིད་ཅན་སྙོམས་པས་རྗེས་སུ་སྐྱོངས། །དམན་ལ་བྱམས་པའི་ཕྱག་གིས་དབུགས་དབྱུང་བས། །སྲོང་བཙན་ཞབས་ཉིད་སླར་ཡང་བྱོན་པ་བཞིན། ༧ །དེ་སླད་འཚོ་གཞེས་བརྟན་པའི་བདུད་རྩི་ཡིས། །རྣ་བའི་ཨུཏྤལ་ཀུན་དགར་བྱས་པའི་མོད། །མ་འདྲིས་བརྩེ་བའི་སྤྱན་ཟུར་འདིར་ལྷུང་བས། །རྫོགས་ལྡན་དང་པོའི་དགའ་སྟོན་གསར་དུ་བྱིན། ༨ །ལྷག་པར་ཚངས་སྲས་དགྱེས་པའི་ཏམྦུར། །མཁྱེན་རབ་སོར་མོས་བརྡུང་བའི་སྙན་འགྱུར་གྱིས། །ཡིད་ལ་བསམ་གཏན་བདུད་རྩིས་འདུ་འགོད་ལས། །ངོ་མཚར་ཨུཏྤལ་འདབ་བརྒྱ་མཆོག་ཏུ་གྲོལ། ༩ །འདི་ན་རྡུལ་མུན་སྙིང་སྟོབས་ཀུན་དཀྲིས་དང་། །མཚུངས་པར་སྤྱོད་ལྡན་འདུ་ཤེས་གསུམ་པ་ཡང་། །རྨོངས་དང་མ་རིག་རྒྱས་པའི་གཞན་དབང་གིས། །སྙོམས་ལས་ཁོ་ནའི་མལ་དུ་ངལ་འཚོ་ཐོབ། ༡༠ །སླར་ཡང་འགྱུར་བཅས་སྲིད་པའི་ཆོས་ཇི་སྙེད། །འཕོ་མེད་དབུ་མའི་སྲོག་ཏུ་སོང་བ་ལས། །ཡིད་སྲུབས་རེ་བ་བཅད་པའི་རྒྱལ་ཐབས་ལ། །ཤིས་པ་ཕྱོགས་ཀྱི་བུ་མོས་སྒྲོགས་བཞིན་དུ། ༡༡ །ཁེངས་ལྡན་བྱེ་བའི་འདར་བཅས་ཐོར་ཚུག་གིས། །ཡང་ཡང་ཕྱིས་པའི་མངོན་མཐོའི་ཟུར་ཕུད་ཀྱང་། །ཞབས་སེན་ཐུན་མཚམས་ལང་ཚོས་ཟིལ་མནན་པའི། །ཕུན་ཚོགས་བསྐལ་པ་རྒྱ་མཚོར་འབར་གྱུར་ཅིག ༡༢ །ཙནྡན་རྐང་པས་འཐུང་བའི་ནགས་ཀླུང་གིས། །ལྗོན་ཤིང་ཕལ་ཡང་རིན་ཐང་བྱེད་པ་ལྟར། །གང་གསུང་ལེགས་བཤད་བདུད་རྩིས་ཡིད་མྱོས་པའི། །མི་ཕྱེད་དགའ་བ་རྒྱས་པའི་མགྲིན་ལས་སྐྱེས། ༡༣ །སརྦ་དཱ་ཤུ་བྷཾ་སིདྡྷི་ར་སྟུ།། །། ༈

[edit]

sa skyong lha sras rin po che'i zhabs pad du phul ba'i mchid lan/ sa skyong lha sras rin po che'i zhabs pad du phul ba'i mchid lan/___shrI bi dza yan+tu/___'jig rten gsum na dge ba'i gtam gyi rnga/___/dpyid kyi dus ston ji bzhin dar babs pas/___/legs byas snang ba nub pa med pa'i phul/___/'chi med grub pa'i lha des khyod la srungs/___1__/bsod nams rgya mtsho'i 'du 'god g.yo ba las/___/bsngags 'os zla ris dang por shar tsam gyis/___/khor yug shis dgu'i chu gter rgyas mdzad pa'i/___/sngon med sa yi tshangs pa rgyal gyur cig__2__/gang tshul shin tu rmad byung rnam par thar/___/snying la ri mo bzhin du bris gyur pas/___/nyams ldan tshig gi me tog dar babs pa'i/___/dogs pa cung zad 'thor ba'i bsti stangs 'bul/___3__/ji ltar dag pa'i rin chen baiDUR+Ya/___/'di na dbul ba mthar byed gzhan yin te/___/rtsol mi mnga' yang chos dang srid kyi dpal/__/'jo mkhas khyod 'dra srid pa gsum na dben/___4__/dang por rigs kyi nor bu'i sa 'dzin la/___/phyi nas snying rje chen po'i brlan chags te/___/shes bya mtha' dag gzigs pa'i dpag bsam ni/___/dam pa'i yon tan rgya mtsho'i pad+mo 'dzum/___5__/de slad ci 'di rig byed 'byin pa'i bdag__/sa la rgyu ba nyid ces 'khrul pa'i yid/___/bdag cag sngon bsags legs byas cod pan gyis/___/thob pa kho nas 'chad pa'i gnas skabs thob/___6_/yon tan mchog la gus pa'i brtul zhugs dang /___/bar ma'i yid can snyoms pas rjes su skyongs/___/dman la byams pa'i phyag gis dbugs dbyung bas/___/srong btsan zhabs nyid slar yang byon pa bzhin/___7__/de slad 'tsho gzhes brtan pa'i bdud rtsi yis/___/rna ba'i ut+pal kun dgar byas pa'i mod/___/ma 'dris brtse ba'i spyan zur 'dir lhung bas/__/rdzogs ldan dang po'i dga' ston gsar du byin/___8_/lhag par tshangs sras dgyes pa'i tam+bur/___/mkhyen rab sor mos brdung ba'i snyan 'gyur gyis/___/yid la bsam gtan bdud rtsis 'du 'god las/___/ngo mtshar ut+pal 'dab brgya mchog tu grol/___9__/'di na rdul mun snying stobs kun dkris dang /___/mtshungs par spyod ldan 'du shes gsum pa yang /___/rmongs dang ma rig rgyas pa'i gzhan dbang gis/___/snyoms las kho na'i mal du ngal 'tsho thob/___10__/slar yang 'gyur bcas srid pa'i chos ji snyed/___/'pho med dbu ma'i srog tu song ba las/___/yid srubs re ba bcad pa'i rgyal thabs la/___/shis pa phyogs kyi bu mos sgrogs bzhin du/___11__/khengs ldan bye ba'i 'dar bcas thor tshug gis/___/yang yang phyis pa'i mngon mtho'i zur phud kyang /___/zhabs sen thun mtshams lang tshos zil mnan pa'i/___/phun tshogs bskal pa rgya mtshor 'bar gyur cig__12_/tsan+dan rkang pas 'thung ba'i nags klung gis/___/ljon shing phal yang rin thang byed pa ltar/___/gang gsung legs bshad bdud rtsis yid myos pa'i/___/mi phyed dga' ba rgyas pa'i mgrin las skyes/___13_/sarba dA shu b+haM sid+d+hi ra stu//__//_!__