JKW-KABUM-21-ZHA-002-003

🚧 This website is under continued development. We appreciate your patience!

Previous Text Back to Volume PageNext Text

Wylie title	smyung gnas btang tshul zin bris
Location	mkhyen brtse'i bka' 'bum Volume 21, sde tshan 2, Text 3, Pages 137-144 (Folios 10a5 to 13b4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. smyung gnas btang tshul zin bris. In 'jam dbyangs mkhyen brtse'i dbang po'i bka' 'bum, Vol. 21: 137-144. Khams sde dge rdzong sar dgon: Rdzong sar blo gros phun tshogs, 2020.
Genre	Notes - zin bris  ·  Ritual of Fasting and Silence - smyung gnas
Colophon	First colophon page 140: འདི་ནི་ཇོ་གདན་མཁན་ཆེན་བསོད་ནམས་བཟང་པོ་དང་། མུས་ཆེན་སེམས་དཔའ་ཆེན་པོ་སོགས་མཁས་གྲུབ་ཚད་ལྡན་གྱི་གསུང་ལྟར་བྲིས་པའོ། །མངྒ་ལཾ། Second colophon page 144: ཞེས་པའང་ཉེར་མཁོའི་ཟིན་ཆུང་དུ་བྲིས་པ་དགེ །ཞུ་ཆེན་རིན་པོ་ཆེའི་སྨྱུང་ཆོག་གཏོང་ཚུལ་ཏེ་གཞན་སྤྱི་ལའང་འགྲེ།
	First colophon page 140: 'di ni jo gdan mkhan chen bsod nams bzang po dang /__mus chen sems dpa' chen po sogs mkhas grub tshad ldan gyi gsung ltar bris pa'o/__/mang+ga laM/ Second colophon page 144: zhes pa'ang nyer mkho'i zin chung du bris pa dge__/zhu chen rin po che'i smyung chog gtong tshul te gzhan spyi la'ang 'gre/

1 Texts in this Section (sde tshan or chos tshan)

3 137-144	སྨྱུང་གནས་བཏང་ཚུལ་ཟིན་བྲིས། smyung gnas btang tshul zin bris Notes - zin bris   ·   Ritual of Fasting and Silence - smyung gnas	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

སྨྱུང་གནས་བཏང་ཚུལ་ཟིན་བྲིས་དགེ །ཨོཾ་སྭ་སྟི། སྨྱུང་གནས་དཀར་པོ་ཕྱོགས་བརྒྱད་སྦྲེལ་ཏེ་བཞུགས་པའི་སྐབས་སྔོན་གྱི་ཕྱག་བཞེས་རྙིང་པ་ཚད་ཐུབ་ཀྱི་དགོངས་པ་ལྟར་བྱེད་ན། ས་ག་ཟླ་བ་ལྟ་བུ་ལ་བཞུགས་པའི་ཚེ་ཟླ་བ་གསུམ་པའི་གནམ་སྟོང་ཉིན་གནས་ཁང་ཕྱག་དར་བྱ་ཞིང་སྐུ་གསུང་ཐུགས་ཀྱི་རྟེན་དགྲམ། དཀྱིལ་འཁོར་དང་མཆོད་པ་བཤམ། གཎྜཱིས་བསྐུལ་ཏེ་དགེ་འདུན་རྣམས་འདུས་ནས་གསོ་སྦྱོང་བྱ། མི་ཤེས་ན་ཆོས་སྤྱོད་གང་འོས་འདོན། འདོན་པ་བསྒྲིགས། སྨོན་ལམ་བཏོན་ལ་གྲོལ་བ་ནི་སྦྱོར་བའོ། །འདི་ཉིན་གསོ་སྦྱོང་གཞུང་ལ་ཇ་གཅིག །འདོན་བསྒྲིགས་སྐབས་ཇ་གཅིག་བཅས་གཉིས་བཏང་། ། ༈ ཟླ་བ་༤པའི་ཚེས་༡ལ་ནམ་ལངས་ལག་ཡིག་མཐོང་དུས་གཎྜཱིས་བསྐུལ་ཏེ་འདུས་ནས་སྒོའི་ཕྱི་རོལ་དུ་ལྷྭམ་ཕུད། ཡན་ལག་ལྔ་ཁྲུས་ལེགས་པར་བྱ། ནང་དུ་འོངས་ནས་རྟེན་གྱི་དྲུང་དུ་ཕྱག་འཚལ་རྗེས་ཙོག་པུར་འདུག་ནས་སྡོམ་པ་ལེན། དེ་ནས་བསླབ་གྲལ་ལྟར་གྲལ་ལ་འཁོད་ནས་སྔ་དྲོ་ཆོས་སྤྱོད་རིགས་རྒྱས་པ་དང་། ཆོ་གའང་དལ་འདོན་རྒྱས་པའི་མཇུག་ཏུ་སྨོན་ལམ་རྣམ་གསུམ་ལས་གང་འོས་འདོན། ཉིན་གུང་ཁྲིགས་ཁྲིགས་ལ་གུང་ཚིགས་སྐབས་དཀོན་མཆོག་རྗེས་དྲན། ཁ་ཕུད། ཇ་མཆོད་རྒྱས་པ། ཟས་དཀར་གསུམ་ལ་བརྟེན་པའི་གུང་ཚིགས་ཚར་ནས་ལྷག་མ་བསྔོ། ཟབ་མདོ་དང་བསྔོ་སྨོན་གང་རིགས་བྱ། ཕྱི་དྲོ་ཚར་གཉིས་ཀྱི་དང་པོ་འབྲིང་པོ་དང་། གཉིས་པ་བསྡུས་ཙམ་རྗེས། སྨོན་ལམ་རྣམ་གསུམ་སོགས་ཉི་ཚོད་དང་བསྟུན་པའི་རྒྱས་རྒྱས་བྱ། སྔ་དྲོ་ཆོས་སྤྱོད་སྐབས་ཇ་གཅིག །ཆོ་ག་ལ་ཇ་བཞི། ཕྱི་དྲོ་ཆོ་ག་ཚར་གཉིས་ལ་ཇ་ལྔ། སྨོན་ལམ་ལ་ཇ་གཅིག་བཅས་ཁྱོན་ཉིན་རེར་ཇ་བཅུ་གཉིས་རེ་བཏང་། ཇ་དང་གུང་ཚིགས་རྗེས་ཐམས་ཅད་དུ་ཆབ་ལེན། དེའང་ལས་རྡོར་གྱི་ཆུ་བུམ་དང་བཟེད་ཞལ་བཅས་ཆབ་བཀྱེ་ལ་ཞལ་བཤལ་བ་ལས་སྟངས་ཀ་ཙམ་གྱིས་མི་འཐུས། ཆབ་བསང་ཡར་འོང་དུས་སྒོ་དྲུང་དུ་ཆབ་བཀྱེ། གུང་ཚིགས་གདན་གཅིག་ཁོ་ན་ལས་སྔ་དྲོ་ཟ་བ་སོགས་མི་ཉན། ཕྱི་དྲོའི་ཇ་རྗེས་མའི་ཆབ་བླངས་ཚར་ནས་ཟས་སྐོམ་རྒྱུན་བཅད་པ་ནི་རྐྱང་པའོ། ། ༈ ཚེས་༢ལ་ནམ་ལངས་འདུས་ནས་སྡོམ་པ་ལེན་པ་སོགས་འདོན་རྒྱུ་ཐམས་ཅད་འདྲ། འདི་ཉིན་ངག་བཅད་ཤིན་ཏུ་དམ་པར་བྱེད། མཆིལ་མ་ཕྱིར་འདོར་བའམ། ཟས་ཀྱི་འདུ་ཤེས་མ་སྐྱེས་ན་ཁོང་དུ་སོང་ཡང་ཉེས་པ་མེད། བུམ་ཆུ་བཀྱེ་དུས་སྤྱི་བོར་བླུགས་ཤིང་ལྷག་མ་ཁྲུས་གཞོང་དུ་ཁ་བཤལ་བ་ཙམ་ལས་ཁོང་དུ་མི་འཐུང་། འོན་ཀྱང་སྐོམ་པ་སེལ་བའི་སྲེད་པ་མེད་ན་འཐུངས་ཀྱང་ཉེས་པ་མེད། གལ་སྲིད་ངག་ཤོར་ན་དེ་མ་ཐག་ཕྱི་རོལ་དུ་སོང་ལ་ཡན་ལག་ལྔ་ཁྲུས་བྱ། འདོན་བཟླས་རིགས་ལ་གཉིད་དང་གླལ་བ་སོགས་ཀྱིས་བར་དུ་མ་ཆོད་པ་སོགས་ཤིན་ཏུ་བསྒྲིམ་པ་ནི་ཁུགས་པའོ། ། ༈ ཚེས་༣ལ་སྐྱ་རེངས་ཤར་ཡག་རྗེས་ཐུག་པ་ཤིན་ཏུ་སླ་མོ་བཞིན་སྣང་བ་དྲོ་འཇམ་ཕོར་པ་རེ་བཏང་ནས་ངག་གྲོལ་སྡོམ་པ་བླངས་ལ་ཆོས་སྤྱོད་ནས་བཟུང་རྐྱང་པ་ལྟར་བྱ། ། ༈ དེ་ལྟར་རྐྱང་ཁུགས་སྤེལ་ནས་ཆ་དྲུག་སོང་མཚམས། ཚེས་༡༥དངོས་གཞི་ཁེལ་དགོས་པས། ཆ་བདུན་པ་ལ་ཚེས་༡༣གཉིས་ཀ་ལ་རྐྱང་པ། ཚེས་༡༥ཁུགས་པ་བྱ། ། ༈ ཚེས་༡༨ལ་སྡོམ་པ་ལེན་མི་དགོས། ངག་གྲོལ་ནས་རྗེས་ཆོག་གཏོང་རག་གི་སླད་དུ་ཆོ་ག་ཚར་གཅིག་དང་། སྨོན་ལམ་རྒྱས་པར་བྱ། ཇ་གསུམ་བཏང་། ། ༈ ཚེས་༡༩ཉིན་རྟེན་དྲུང་དུ་མཆོད་པ་ཅི་འབྱོར་བཤམ། དགེ་འདུན་རྣམས་ཚོགས་ནས་ཆོས་སྤྱོད་ཅི་རིགས་གསུང་སྐབས་ཇ་བཏང་། ཞལ་ཏ་པས་རྟེན་ལ་སྙན་ཤལ་དང་། སྒྲུབ་པ་པོ་རྣམས་ལ་ཡོན་འབུལ་མདུན་དུ་བཞག །འབྲས་སིལ་ལམ་གྲོ་མ་ལྟ་བུའི་ཞལ་ཟས་བཟང་པོའི་དགའ་སྟོན་བྱ། བསྔོ་སྨོན་དང་བཀྲ་ཤིས་རྒྱས་པར་བརྗོད་ལ་དཀྱིལ་འཁོར་བསྡུས་ཏེ་གྲོལ་བ་ནི་འཕགས་པ་བྱོན་པའི་དགའ་སྟོན་ལ་ལོངས་སྤྱོད་པའོ། །དེས་མཚོན་ཏེ་སྨྱུང་གནས་ཆ་གཅིག་ལྟ་བུ་ལའང་། ཉིན་དང་པོ་སྦྱོར་བ། གཉིས་པ་རྐྱང་། གསུམ་པ་ཁུགས། བཞི་པ་རྗེས་ཆོག །ལྔ་པ་ལ་འཕགས་པ་བྱོན་པའི་དགའ་སྟོན་བྱ་བ་སྟེ་ཉི་མ་ལྔ་རེ་དང་། རྐྱང་ཁུགས་གཉིས་ལ་ཆོ་ག་གསུམ་རེ། རྗེས་ལ་གཅིག་བཅས་ཆོ་ག་ཚར་བདུན་འགྲོ་དགོས། འདི་ནི་ཇོ་གདན་མཁན་ཆེན་བསོད་ནམས་བཟང་པོ་དང་། མུས་ཆེན་སེམས་དཔའ་ཆེན་པོ་སོགས་མཁས་གྲུབ་ཚད་ལྡན་གྱི་གསུང་ལྟར་བྲིས་པའོ། །མངྒ་ལཾ། ། ༈

མཆོད་བཤམ་ནི། བཅུ་གཅིག་ཞལ་ཕྱག་སྟོང་སྤྱན་སྟོང་རིགས་བཞིས་བསྐོར་བའི་བྲིས་སྐུ་གཙོ་བོར་གྱུར་བའི་སྐུ་གསུང་ཐུགས་རྟེན་གྱི་མདུན་སྟེགས་བུའི་དབུས་སུ་མཎྜ་ལར་རྡུལ་ཚོན་གྱི་པདྨ་འདབ་མ་བརྒྱད་པ། ལྟེ་བ་དཀར། ཤར་སྔོ། ལྷོ་སེར། ནུབ་དམར། བྱང་ལྗང་། མཚམས་བཞི་མཛེས་ཚོན། ཟླ་གདན་རེའི་སྟེང་དུ་དབུས་སུ་ཚོན་ཕུང་དཀར། ཤར་སྔོ། ལྷོ་སེར། ནུབ་དཀར། བྱང་ལྗང་གུ་བཀོད་པ་མཉྫིའི་ཁར་བཞག །དེའི་མདུན་དུ་གཏོར་མ་དཀར་ཟླུམ་རྒྱུན་བཞག་གཉིས་ཕྲེང་ཚར་དུ་བཤམས་པའི་བྱང་ཤར་དུ་མཚམས་འཛིན་མེ་ཏོག །ཤར་དུ་མཆོད་ཡོན་ནས་བརྩམས་ཏེ་ཆུ་གཉིས་སྔོན་འགྲོའི་ཉེར་སྤྱོད་ལ། མར་མེ་དང་། ཞལ་ཟས་གསུམ་རེ་བཤམ། དེའི་ཕྱི་རོལ་དུ་སྒོས་མཆོད་མཆོད་པ་རྣམ་ལྔའམ། སྤོས། མར་མེ། ཞལ་ཟས་རྣམས་ཤར་དུ་ཆ་གཉིས། ཕྱོགས་གཞན་རྣམས་སུ་ཆ་རེ་སྟེ་ཆ་ལྔ་བཤམ། ཆོ་ག་ཚར་རེ་བཞིན་སྒོས་མཆོད་ཀྱང་བརྗེ་གྲུབ་ན་ལེགས། མ་གྲུབ་ན་སྤྱི་མཆོད་ནི་ངེས་པར་བརྗེ་དགོས། སྤྱི་མཆོད་ཀྱི་མར་མེ་དབུས་མ་དེ་ཚེ་འབར་བྱུང་ན་ལེགས། བུམ་པ་ནི་མགུལ་ཆིངས་དཀར་པོ་ཅན་སྲད་བུ་དམར་པོ་ལ་གཟུངས་རིང་བཟླ་བཞིན་པས་རྡོ་རྗེའི་མདུད་པ་གསུམ་གདབ་པ་གདགས། ནང་དུ་དྲི་བཟང་གི་ཆུ་དང་བྱ་རྒྱུད་ལུགས་ཀྱི་བུམ་རྫས་ཉེར་ལྔ་བཏབ་པས་སུམ་གཉིས་དགང་བ་དཀྱིལ་འཁོར་གྱི་མདུན་ནམ། སློབ་དཔོན་གྱི་མདུན་གང་བདེར་བཤམས་པ་ལས་ལྷ་བསྐྱེད་སོགས་མེད་པས་མཆོད་པའི་དབུས་སུ་བཞག་མི་དགོས། འདས་གཏོར་དང་། ཆོས་སྲུང་གཏོར་མ་རྗེས་མ་རྣམས་ལ་མཐེབ་སྐྱུ་ཞལ་གསོ་བས་ཆོག་པས་རྒྱུན་བཞག་སྣུམ་ཟན་ལེགས་པར་བཞེངས། དཀར་རྩི་བྱུགས། དཀར་རྒྱན་ལས་ཚོན་ཁྲ་མི་བྱེད། གཞི་བདག་གཏོར་མ་ནི་དཀྱིལ་འཁོར་མདུན་དུ་སྟེགས་དམའ་བར་བཤམས་ལ་ཚར་རེ་བཞིན་འདོར་རྒྱུ་ཅན་བྱེད་དགོས། ཚེས་༡༥རྗེས་ཆོག་སྐབས་གཏོང་རག་གི་མཆོད་པ་སྒོས་མཆོད་ཆ་བཅོ་ལྔ་སོགས་གང་འབྱོར་རྒྱས་རྒྱས་དགོས། སྒྲུབ་པ་པོ་མང་དུ་ཡོད་ན་རོལ་མོ་དྲིལ་བུ། དུང་དཀར། རྒྱ་གླིང་། རྔ་སིལ་སོགས་ལས། དུང་དམར། རྐང་གླིང་། ཌཱ་མ་རུ་སོགས་མི་བྱ། མཎྜལ་སྒྲུབ་པ་པོ་རེ་རེ་བཞིན་ཡོད་ན་ལེགས། མེད་ཚེ་སློབ་དཔོན་གྱིས་ཕུལ། མཎྜལ་ཕུལ་ཚེ་དྲི་བཟང་གི་རླན་དང་བཅས་པ་བྱའོ། །ཤུབྷཾ། ། ༈

མཆོད་ཡོན་ལ་ཞི་བའི་སྐབས་སུ་རྫས་བདུན་ཅེས་འབྱུང་བ་ནི། བ་དམར་སེར་གྱི་འོ་མ། ཏིལ་དཀར་པོ། འབྲས། བ་ལུའམ་སེ་བ་ལྟ་བུ་སྨན་ཤིང་བཟང་པོའི་མེ་ཏོག་དཀར་པོ། ནས་དཀར་པོ། རྩྭ་ཀུ་ཤ །གུར་གུམ་རྣམས་ལེགས་པར་སྦྱར་ཏེ་བླུགས། ཞབས་བསིལ་ལ་ཤུན་པ་ལྔ་ཞེས་འབྱུང་བ། རྒྱ་གར་དུ་གྲགས་པའི་འོ་མ་ཅན་གྱི་ཤིང་། ནྱ་གྲོ་དྷ། ཨུ་དུམྦ་ར། བླ་ཀྵ། པིལྤ་ལྱ། གནྡྷ་མུནྡྷ་རྣམས་ཀྱི་བར་ཤུན་ཡིན་ཀྱང་བོད་འདིར་མི་འབྱོར་བས། བལ་བུ། འོམ་བུ། ཁམ་བུ། ལྕང་དཀར། ཤུག་པ་ལྔའི་བར་ཤུན་གྱི་སྟེང་། འདག་རྫས་ཉེ་ཤིང་དང་། སྲན་དཀར་གྱི་ཕྱེ་མ་བཅས་སྦྱར་ལ་བཏབ། མེ་ཏོག་ནི། ངོར་ལུགས་ཀྱི་ཕྱག་ལེན་ལ་སྟེགས་བུའི་སྟེང་དུ་ཏིང་ཕོར་ནང་འབྲུ་དཀར་བླུགས་པ་ཁོ་ན་ལས་བཅོས་མའི་མེ་ཏོག་སོགས་འཛུགས་སྲོལ་མེད། སྤྱིར་དངོས་དང་བཅོས་མའི་མེ་ཏོག་སོགས་ཇི་ཙམ་འབྱོར་ན་བཟང་བས་རྟེན་གྱི་དྲུང་དུ་བཀོད་པས་མཛེས་པར་བཤམས། བདུག་སྤོས་ནི་རྒྱུད་སྡེ་འོག་མའི་སྐབས་འདིར་གླ་རྩི་སོགས་མ་འདྲེས་པའི་སྤོས་རེང་ཏིང་ཕོར་ནང་བཙུག །སྤར་རྒྱུ་ཟུར་དུ་སྤོས་གཞོང་ལྟ་བུར་བཞག །གཞན་སྤོས་སྣོད་དུ་མེ་ཐལ་འཇམ་པོར། སྤོས་དཀར། ཙནྡན་དཀར་པོ། ཨ་ག་རུ་སོགས་བདུགས་པའི་དུ་བ་འཐུལ་བར་བྱའོ། །མར་མེ་ནི་རྩི་མར་བཟང་པོའི་ཁུ་བ་བཙག་བཅད་གྲུངས་ཐོན་པ་ཤིན་ཏུ་གསལ་བར་བྱ། དྲི་ཆབ་ལ་དྲི་ལྔ་བཏབ་ཅེས་འབྱུང་བས། ཁ་ཆེའམ་བལ་པོ་གུར་གུམ་ལ་གཞི་བྱས་ཏེ། ག་བུར། ཙནྡན་དཀར་པོ། ཛཱ་ཏི། ཨ་ག་རུ་ནག་པོའམ། འགའ་ཞིག་ཛཱ་ཏིའི་ཚབ་ཏུ་ཙནྡན་དམར་པོ་འབྱུང་སྟེ་དེ་རྣམས་ཀྱི་གྲུངས་ཆུ་ཀུ་ཤའི་འཐོར་གཡབ་བཅས་བཞག །ཞལ་ཟས་ཀྱི་རྒྱུར་དཀར་གསུམ་མངར་གསུམ་གཙང་མ་འབྱོར་ན་བསྲེས་ཀྱང་ལེགས། རོལ་མོ་འབུད་དཀྲོལ་བརྡུང་གསུམ་གྱི་ཟླས་ཕྱེ་བའི། དུང་དཀར། དྲིལ་བུ། སིལ་སྙན། རྔ། གཞན་ཏིང་ཤག་སོགས་བརྡུང་ན་ཆོག །རྒྱ་གླིང་ནི་གྲྭ་ས་ཆེ་བ་རྣམས་སུ་དེ་ཙམ་དག་འདོད་མི་མཛད་ཀྱང་ལྷ་མཆོད་པའི་བསམ་པས་འབུད་ཀྱང་འགལ་བ་ནི་མེད་དོ། །ཞེས་པའང་ཉེར་མཁོའི་ཟིན་ཆུང་དུ་བྲིས་པ་དགེ །ཞུ་ཆེན་རིན་པོ་ཆེའི་སྨྱུང་ཆོག་གཏོང་ཚུལ་ཏེ་གཞན་སྤྱི་ལའང་འགྲེ། ། ༈

[edit]

smyung gnas btang tshul zin bris/__ smyung gnas btang tshul zin bris dge__/oM swa sti/__smyung gnas dkar po phyogs brgyad sbrel te bzhugs pa'i skabs sngon gyi phyag bzhes rnying pa tshad thub kyi dgongs pa ltar byed na/__sa ga zla ba lta bu la bzhugs pa'i tshe zla ba gsum pa'i gnam stong nyin gnas khang phyag dar bya zhing sku gsung thugs kyi rten dgram/__dkyil 'khor dang mchod pa bsham/__gaN+DIs bskul te dge 'dun rnams 'dus nas gso sbyong bya/__mi shes na chos spyod gang 'os 'don/__'don pa bsgrigs/__smon lam bton la grol ba ni sbyor ba'o/__/'di nyin gso sbyong gzhung la ja gcig__/'don bsgrigs skabs ja gcig bcas gnyis btang /___/___!_zla ba 4pa'i tshes 1la nam langs lag yig mthong dus gaN+DIs bskul te 'dus nas sgo'i phyi rol du l+h+wam phud/__yan lag lnga khrus legs par bya/__nang du 'ongs nas rten gyi drung du phyag 'tshal rjes tsog pur 'dug nas sdom pa len/__de nas bslab gral ltar gral la 'khod nas snga dro chos spyod rigs rgyas pa dang /__cho ga'ang dal 'don rgyas pa'i mjug tu smon lam rnam gsum las gang 'os 'don/__nyin gung khrigs khrigs la gung tshigs skabs dkon mchog rjes dran/__kha phud/__ja mchod rgyas pa/__zas dkar gsum la brten pa'i gung tshigs tshar nas lhag ma bsngo/__zab mdo dang bsngo smon gang rigs bya/__phyi dro tshar gnyis kyi dang po 'bring po dang /__gnyis pa bsdus tsam rjes/__smon lam rnam gsum sogs nyi tshod dang bstun pa'i rgyas rgyas bya/__snga dro chos spyod skabs ja gcig__/cho ga la ja bzhi/__phyi dro cho ga tshar gnyis la ja lnga/__smon lam la ja gcig bcas khyon nyin rer ja bcu gnyis re btang /__ja dang gung tshigs rjes thams cad du chab len/__de'ang las rdor gyi chu bum dang bzed zhal bcas chab bkye la zhal bshal ba las stangs ka tsam gyis mi 'thus/__chab bsang yar 'ong dus sgo drung du chab bkye/__gung tshigs gdan gcig kho na las snga dro za ba sogs mi nyan/__phyi dro'i ja rjes ma'i chab blangs tshar nas zas skom rgyun bcad pa ni rkyang pa'o/___/___!_tshes 2la nam langs 'dus nas sdom pa len pa sogs 'don rgyu thams cad 'dra/__'di nyin ngag bcad shin tu dam par byed/__mchil ma phyir 'dor ba'am/__zas kyi 'du shes ma skyes na khong du song yang nyes pa med/__bum chu bkye dus spyi bor blugs shing lhag ma khrus gzhong du kha bshal ba tsam las khong du mi 'thung /__'on kyang skom pa sel ba'i sred pa med na 'thungs kyang nyes pa med/__gal srid ngag shor na de ma thag phyi rol du song la yan lag lnga khrus bya/__'don bzlas rigs la gnyid dang glal ba sogs kyis bar du ma chod pa sogs shin tu bsgrim pa ni khugs pa'o/___/___!_tshes 3la skya rengs shar yag rjes thug pa shin tu sla mo bzhin snang ba dro 'jam phor pa re btang nas ngag grol sdom pa blangs la chos spyod nas bzung rkyang pa ltar bya/___/___!_de ltar rkyang khugs spel nas cha drug song mtshams/__tshes 15dngos gzhi khel dgos pas/__cha bdun pa la tshes 13gnyis ka la rkyang pa/__tshes 15khugs pa bya/___/___!_tshes 18la sdom pa len mi dgos/__ngag grol nas rjes chog gtong rag gi slad du cho ga tshar gcig dang /__smon lam rgyas par bya/__ja gsum btang /___/___!_tshes 19nyin rten drung du mchod pa ci 'byor bsham/__dge 'dun rnams tshogs nas chos spyod ci rigs gsung skabs ja btang /__zhal ta pas rten la snyan shal dang /__sgrub pa po rnams la yon 'bul mdun du bzhag__/'bras sil lam gro ma lta bu'i zhal zas bzang po'i dga' ston bya/__bsngo smon dang bkra shis rgyas par brjod la dkyil 'khor bsdus te grol ba ni 'phags pa byon pa'i dga' ston la longs spyod pa'o/__/des mtshon te smyung gnas cha gcig lta bu la'ang /__nyin dang po sbyor ba/__gnyis pa rkyang /__gsum pa khugs/__bzhi pa rjes chog__/lnga pa la 'phags pa byon pa'i dga' ston bya ba ste nyi ma lnga re dang /__rkyang khugs gnyis la cho ga gsum re/__rjes la gcig bcas cho ga tshar bdun 'gro dgos/__'di ni jo gdan mkhan chen bsod nams bzang po dang /__mus chen sems dpa' chen po sogs mkhas grub tshad ldan gyi gsung ltar bris pa'o/__/mang+ga laM/___/___!_ mchod bsham ni/__bcu gcig zhal phyag stong spyan stong rigs bzhis bskor ba'i bris sku gtso bor gyur ba'i sku gsung thugs rten gyi mdun stegs bu'i dbus su maN+Da lar rdul tshon gyi pad+ma 'dab ma brgyad pa/__lte ba dkar/__shar sngo/__lho ser/__nub dmar/__byang ljang /__mtshams bzhi mdzes tshon/__zla gdan re'i steng du dbus su tshon phung dkar/__shar sngo/__lho ser/__nub dkar/__byang ljang gu bkod pa many+dzi'i khar bzhag__/de'i mdun du gtor ma dkar zlum rgyun bzhag gnyis phreng tshar du bshams pa'i byang shar du mtshams 'dzin me tog__/shar du mchod yon nas brtsams te chu gnyis sngon 'gro'i nyer spyod la/__mar me dang /__zhal zas gsum re bsham/__de'i phyi rol du sgos mchod mchod pa rnam lnga'am/__spos/__mar me/__zhal zas rnams shar du cha gnyis/__phyogs gzhan rnams su cha re ste cha lnga bsham/__cho ga tshar re bzhin sgos mchod kyang brje grub na legs/__ma grub na spyi mchod ni nges par brje dgos/__spyi mchod kyi mar me dbus ma de tshe 'bar byung na legs/__bum pa ni mgul chings dkar po can srad bu dmar po la gzungs ring bzla bzhin pas rdo rje'i mdud pa gsum gdab pa gdags/__nang du dri bzang gi chu dang bya rgyud lugs kyi bum rdzas nyer lnga btab pas sum gnyis dgang ba dkyil 'khor gyi mdun nam/__slob dpon gyi mdun gang bder bshams pa las lha bskyed sogs med pas mchod pa'i dbus su bzhag mi dgos/__'das gtor dang /__chos srung gtor ma rjes ma rnams la mtheb skyu zhal gso bas chog pas rgyun bzhag snum zan legs par bzhengs/__dkar rtsi byugs/__dkar rgyan las tshon khra mi byed/__gzhi bdag gtor ma ni dkyil 'khor mdun du stegs dma' bar bshams la tshar re bzhin 'dor rgyu can byed dgos/__tshes 15rjes chog skabs gtong rag gi mchod pa sgos mchod cha bco lnga sogs gang 'byor rgyas rgyas dgos/__sgrub pa po mang du yod na rol mo dril bu/__dung dkar/__rgya gling /__rnga sil sogs las/__dung dmar/__rkang gling /__DA ma ru sogs mi bya/__maN+Dal sgrub pa po re re bzhin yod na legs/__med tshe slob dpon gyis phul/__maN+Dal phul tshe dri bzang gi rlan dang bcas pa bya'o/__/shub+haM/___/___!_ mchod yon la zhi ba'i skabs su rdzas bdun ces 'byung ba ni/__ba dmar ser gyi 'o ma/__til dkar po/__'bras/__ba lu'am se ba lta bu sman shing bzang po'i me tog dkar po/__nas dkar po/__rtswa ku sha__/gur gum rnams legs par sbyar te blugs/__zhabs bsil la shun pa lnga zhes 'byung ba/__rgya gar du grags pa'i 'o ma can gyi shing /__n+ya gro d+ha/__u dum+ba ra/__bla k+Sha/__pilpa l+ya/__gan+d+ha mun+d+ha rnams kyi bar shun yin kyang bod 'dir mi 'byor bas/__bal bu/__'om bu/__kham bu/__lcang dkar/__shug pa lnga'i bar shun gyi steng /__'dag rdzas nye shing dang /__sran dkar gyi phye ma bcas sbyar la btab/__me tog ni/__ngor lugs kyi phyag len la stegs bu'i steng du ting phor nang 'bru dkar blugs pa kho na las bcos ma'i me tog sogs 'dzugs srol med/__spyir dngos dang bcos ma'i me tog sogs ji tsam 'byor na bzang bas rten gyi drung du bkod pas mdzes par bshams/__bdug spos ni rgyud sde 'og ma'i skabs 'dir gla rtsi sogs ma 'dres pa'i spos reng ting phor nang btsug__/spar rgyu zur du spos gzhong lta bur bzhag__/gzhan spos snod du me thal 'jam por/__spos dkar/__tsan+dan dkar po/__a ga ru sogs bdugs pa'i du ba 'thul bar bya'o/__/mar me ni rtsi mar bzang po'i khu ba btsag bcad grungs thon pa shin tu gsal bar bya/__dri chab la dri lnga btab ces 'byung bas/__kha che'am bal po gur gum la gzhi byas te/__ga bur/__tsan+dan dkar po/__dzA ti/__a ga ru nag po'am/__'ga' zhig dzA ti'i tshab tu tsan+dan dmar po 'byung ste de rnams kyi grungs chu ku sha'i 'thor g.yab bcas bzhag__/zhal zas kyi rgyur dkar gsum mngar gsum gtsang ma 'byor na bsres kyang legs/__rol mo 'bud dkrol brdung gsum gyi zlas phye ba'i/__dung dkar/__dril bu/__sil snyan/__rnga/__gzhan ting shag sogs brdung na chog__/rgya gling ni grwa sa che ba rnams su de tsam dag 'dod mi mdzad kyang lha mchod pa'i bsam pas 'bud kyang 'gal ba ni med do/__/zhes pa'ang nyer mkho'i zin chung du bris pa dge__/zhu chen rin po che'i smyung chog gtong tshul te gzhan spyi la'ang 'gre/___/___!_