JKW-KABUM-23-'A-001-022

🚧 This website is under continued development. We appreciate your patience!

Previous Text Back to Volume PageNext Text

Wylie title	gnyug ma'i glu dpe don dang 'brel ba
Location	mkhyen brtse'i bka' 'bum Volume 23, sde tshan 1, Text 22, Pages 43-44 (Folios 22a2 to 22b2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. gnyug ma'i glu dpe don dang 'brel ba. In 'jam dbyangs mkhyen brtse'i dbang po'i bka' 'bum, Vol. 23: 43-44. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

Tibetan Text

Wylie

[edit]

གཉུག་མའི་གླུ་དབྱངས་དཔེ་དོན་འབྲེལ་བ་ཞེས་བྱ་བ། ཨ་ཧོ། ཤིན་ཏུ་རྣམ་དག་གདོད་མའི་རིག་སྟོང་སྤྲོས་བྲལ་དབྱིངས། །གཟུང་འཛིན་ཐག་པས་བཅིངས་གྲོལ་སྤངས་པ་གཉུག་མའི་གཤིས། །སྐུ་གསུམ་ལྷན་སྐྱེས་བདེ་གཤེགས་སྙིང་པོའི་ངོ་བོ་ལ། །བཏང་བཞག་འགྲོ་འོང་བྲལ་བའི་ཕྱག་གིས་རྟག་ཏུ་འདུད། །འཁོར་བར་རབ་སྐྱོ་ངེས་འབྱུང་རླན་གྱིས་བསྐྱེད་པ་ལས། །ཐར་པ་ཉིན་མོའི་རྗེས་སུ་འཛུམ་དཀར་གྲོལ་བའི་གཟུགས། །རྟག་ཏུ་བསླབ་གསུམ་དྲི་བསུང་མངར་པོ་དང་འགྲོགས་པའི། །འཇུག་སྒོའི་ཐེམ་སྐས་མེ་ཏོག་གཞོན་ནུའི་སྟོན་པ་བཞིན། །ཐོས་པའི་རྒྱ་མཚོ་རྣམ་པར་གཡོ་བ་ལས་ཐོན་པའི། །བསམ་བྱུང་ཤེས་རབ་སྒྲ་དབྱངས་ཡོངས་རྫོགས་དུང་དཀར་གཟུགས། །སྒོམ་སྤང་དེ་ཉིད་རིག་པ་གཡས་སུ་ལེགས་འཁྱིལ་བ། །ཀུན་གྱི་འབབ་སྟེགས་སྲིད་པའི་རིམས་ནད་འཕྲོག་པར་བྱེད། །འོད་གསལ་རང་བྱུང་ཨ་ཝ་དྷཱུ་ཏིའི་ཁང་མཛེས་ན། །གཉུག་མའི་རིག་པ་མཐའ་བྲལ་ལུས་ཕྲའི་འཇོ་སྒེག་ལ། །ཚོགས་དྲུག་རང་གྲོལ་བདེ་སྟོང་མཉམ་རོལ་རྒྱན་གྱིས་སྤྲས།། ལྷན་སྐྱེས་འགྲོགས་འདི་གཏན་གྱི་གྲོགས་མཆོག་ཡིན་པར་ངེས། །རྟག་ཆད་ལ་སོགས་མཐའ་བརྒྱད་དགྲ་བོ་ཞེ་ལ་གནོན། ཁས་ལེན་ཀུན་བྲལ་མྱོང་ཐོག་ལ་བཟླའི་གོ་ཆ་ཅན། །ལྷུན་གྲུབ་སྐུ་གསུམ་འདུ་འབྲལ་མེད་པའི་མཚོན་རྣོན་པོས། །གཟུང་འཛིན་མ་རིག་སྲོག་རྩ་བྲལ་འདི་དཔའ་བོ་ཆེ། །སྣ་ཚོགས་སྣང་བ་ལས་སུ་མ་རུང་ལྕགས་ཀྱི་ཁམས། །ཞི་གནས་མེ་ལ་བཞུ་བཏུལ་དག་གིས་ཕམ་བྱས་ནས། །ལྷག་མཐོང་སོ་ལ་ཡིད་དཔྱོད་སྤངས་པའི་རྣོ་ངར་ཅན། །སྲིད་པའི་མ་རིག་ཀུན་ནས་ཕམ་པ་བགྱིས་པ་ལགས། །ལུས་ཅན་ཀུན་གྱི་རང་བཞིན་ཏིལ་གྱི་གོང་བུ་ལྟར། །རྣམ་པར་གནས་དེར་བདེ་གཤེགས་སྙིང་པོའི་མར་གྱིས་ཁྱབ། །སྒྲིབ་པའི་དྲི་མ་ཡོངས་སུ་གསལ་གྱུར་དེ་ཡི་ཚེ། །དོན་གཉིས་ལྷུན་གྲུབ་སྣང་བ་མཆོག་གི་དཔལ་ལ་རེག །དེ་སྐད་གང་ཤར་དཔེ་དོན་འབྲེལ་བའི་གཉུག་མའི་དབྱངས། །གྲགས་སྟོང་རང་གྲོལ་སྔགས་ཀྱི་རོལ་མོ་འདི་དཀྲོལ་བས། །བདག་གཞན་འགྲོ་ཀུན་ཉོན་མོངས་འཁྲུལ་ཆོས་ཀུན་དག་ནས། །གདོད་མའི་ཡེ་ཤེས་སྐད་ཅིག་རིག་པར་དབང་འབྱོར་ཤོག ། ༈

[edit]

gnyug ma'i glu dpe don dang 'brel ba/__ gnyug ma'i glu dbyangs dpe don 'brel ba zhes bya ba/__a ho/__shin tu rnam dag gdod ma'i rig stong spros bral dbyings/__/gzung 'dzin thag pas bcings grol spangs pa gnyug ma'i gshis/__/sku gsum lhan skyes bde gshegs snying po'i ngo bo la/__/btang bzhag 'gro 'ong bral ba'i phyag gis rtag tu 'dud/__/'khor bar rab skyo nges 'byung rlan gyis bskyed pa las/__/thar pa nyin mo'i rjes su 'dzum dkar grol ba'i gzugs/__/rtag tu bslab gsum dri bsung mngar po dang 'grogs pa'i/__/'jug sgo'i them skas me tog gzhon nu'i ston pa bzhin/__/thos pa'i rgya mtsho rnam par g.yo ba las thon pa'i/__/bsam byung shes rab sgra dbyangs yongs rdzogs dung dkar gzugs/_/sgom spang de nyid rig pa g.yas su legs 'khyil ba/__/kun gyi 'bab stegs srid pa'i rims nad 'phrog par byed/_/'od gsal rang byung a wa d+hU ti'i khang mdzes na/__/gnyug ma'i rig pa mtha' bral lus phra'i 'jo sgeg la/__/tshogs drug rang grol bde stong mnyam rol rgyan gyis spras//_lhan skyes 'grogs 'di gtan gyi grogs mchog yin par nges/__/rtag chad la sogs mtha' brgyad dgra bo zhe la gnon/__khas len kun bral myong thog la bzla'i go cha can/__/lhun grub sku gsum 'du 'bral med pa'i mtshon rnon pos/__/gzung 'dzin ma rig srog rtsa bral 'di dpa' bo che/__/sna tshogs snang ba las su ma rung lcags kyi khams/__/zhi gnas me la bzhu btul dag gis pham byas nas/__/lhag mthong so la yid dpyod spangs pa'i rno ngar can/__/srid pa'i ma rig kun nas pham pa bgyis pa lags/__/lus can kun gyi rang bzhin til gyi gong bu ltar/__/rnam par gnas der bde gshegs snying po'i mar gyis khyab/__/sgrib pa'i dri ma yongs su gsal gyur de yi tshe/__/don gnyis lhun grub snang ba mchog gi dpal la reg__/de skad gang shar dpe don 'brel ba'i gnyug ma'i dbyangs/__/grags stong rang grol sngags kyi rol mo 'di dkrol bas/__/bdag gzhan 'gro kun nyon mongs 'khrul chos kun dag nas/__/gdod ma'i ye shes skad cig rig par dbang 'byor shog___/__!