JKW-KABUM-23-'A-001-023

Previous Text Back to Volume PageNext Text

རང་གཞན་ཀུན་ལ་ཕན་པར་གདམས་པ་བྱམས་པའི་གླུ་དབྱངས་ཕན་བདེའི་ཐེམ་སྐས།

Wylie title	rang gzhan kun la phan par gdams pa byams pa'i glu dbyangs phan bde'i them skas
Location	mkhyen brtse'i bka' 'bum Volume 23, sde tshan 1, Text 23, Pages 44-54 (Folios 22b2 to 27b4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rang gzhan kun la phan par gdams pa byams pa'i glu dbyangs phan bde'i them skas. In 'jam dbyangs mkhyen brtse'i dbang po'i bka' 'bum, Vol. 23: 44-54. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu
Colophon	།ཞེས་པའང་གཞོན་ནུ་ཨ་བྷཱ་ཡས་རང་ལོ་བཅོ་ལྔ་པར་གང་ཤར་ལྷུག་པར་བརྗོད་པའོ།
	zhes pa'ang gzhon nu a b+hA yas rang lo bco lnga par gang shar lhug par brjod pa'o

Tibetan Text

Wylie

[edit]

རང་གཞན་ཀུན་ལ་ཕན་པར་གདམས་པ་བྱམས་པའི་གླུ་དབྱངས་ཕན་བདེའི་ཐེམ་སྐས་ཞེས་བྱ་བ། སྤངས་རྟོགས་ཡོན་ཏན་ཡོངས་རྫོགས་ཤིང་། །ཕན་བདེའི་འདོད་པ་འཇོ་བའི་གཉེན། །དྲན་པས་སྲིད་ཞིའི་གདུང་སེལ་བ། །ཁྱབ་བདག་འཁོར་ལོའི་མགོན་པོར་འདུད། །སྣ་ཚོགས་ལས་ཀྱི་འབྲས་བུ་ཡི། །ས་བོན་རིང་ནས་བཏབ་པའི་མཐུས། །སྣ་ཚོགས་འཁོར་བ་སྒྱུ་མའི་ཚལ། །ཀུན་ནས་ཀུན་ཏུ་རྒྱས་པ་དེར། །ཐོག་མཐའ་མི་མངོན་འཁྱམས་པའི་འགྲོ། །སྡུག་བསྔལ་གསུམ་གྱི་ཞགས་པས་བཅིངས། །བཟོད་པར་དཀའ་བའི་ངང་ཚུལ་ལ། །རབ་ཏུ་སྐྱོ་ཤས་བསྐྱེད་པར་འཚལ། །ཁྱད་པར་དལ་བརྒྱད་འབྱོར་བ་བཅུའི། །ཡལ་འདབ་རྣམ་པར་གཡོ་བའི་ལུས། །རིན་ཆེན་འཁྲི་ཤིང་འདི་ཐོབ་ཚེ། །ངེས་ལེགས་འབྲས་བཟང་སྨིན་པར་མཛོད། །དེ་ཡང་རྟག་པར་མ་མཆིས་ཏེ། །སྣོད་བཅུད་མཐའ་བཞིའི་མུ་ཁྱུད་ཀྱིས། །བསྐོར་བའི་ངང་ཚུལ་འདི་མཐོང་ནས། །མྱུར་དུ་ཐར་པའི་ལམ་ལ་འཇུག །མ་འདྲེས་ཟ་འོག་རི་མོ་ལྟར། །འཁོར་བའི་བདེ་སྡུག་སྣ་ཚོགས་ཀྱང་། །ལས་ལས་སྐྱེས་ཤིང་འབྱུང་བའི་ཕྱིར། །རྒྱུ་འབྲས་སྤང་བླང་ཞིབ་ཏུ་མཛོད། །གང་ཞིག་སྦྲུལ་གདུག་བསིལ་ཡབ་ཏུ། །བསྟེན་ན་དུག་གིས་ཉེན་པ་ལྟར། །སྡིག་པའི་གྲོགས་པོ་རིང་སྤངས་པའི། །དམ་བཅའ་རྟག་ཏུ་བཟུང་བར་རིགས། །མ་ལ་ཡ་ཡི་ཙནྡན་ཁྲོད། །རྐང་འཐུང་ཕལ་ཡང་དྲི་བཟང་བཞིན། །དགེ་བའི་བཤེས་ལ་བསྟེན་བྱས་ན། །དམ་པའི་སྤྱོད་ལམ་ཞར་ལ་འགོ། །མངོན་མཐོའི་ཐེམ་སྐས་ལ་བརྟེན་ནས། །ངེས་ལེགས་གྲོང་དུ་བགྲོད་པའི་ཕྱིར། །རྟག་ཏུ་མི་ཡི་ཆོས་ལུགས་ཀྱང་། །ཚུལ་བཞིན་མཐུན་པར་རབ་ཏུ་སྤྱད། །ཁྱད་པར་སྐལ་བཟང་སྐྱེས་བུ་ཡིས། །ཐར་པ་མཆོག་གི་ལམ་གཞོལ་ཚེ། །ཐོག་མར་བསྟེན་པར་བྱ་བ་ནི། །ཡོན་ཏན་ལྡན་པའི་བཤེས་གཉེན་ཏེ། །དེ་ཡང་ཐབས་མཁས་ཐུགས་བརྩེར་ལྡན། །མདོ་རྒྱུད་མན་ངག་རྗེས་སུ་ཞུགས། །འབྲས་བུ་མངོན་མཐོ་ཡང་དག་རིགས། །སྤྱི་བོའི་གཙུག་ནོར་བཞིན་དུ་བཀུར། །འདི་ན་ཐམས་ཅད་གཟིགས་པ་ཡིས། །དངོས་པོའི་ཤེས་རབ་ཐམས་ཅད་ཀུན། །མི་མཁྱེན་ཆོས་གང་མེད་པས་ན། །ཚུལ་རྣམས་ཀུན་ལ་བསླབ་པར་རིགས། །ཅི་ཕྱིར་དེ་བཞིན་གཤེགས་པ་ཡི། །གོ་འཕང་སྒྲུབ་པར་བྱེད་པ་ལ། །མགོན་པོ་གང་དེས་གསུངས་པའི་ཕྱིར། །བློ་གསལ་རྣམས་ཀྱིས་དང་དུ་ལོངས། །ཟག་པར་བཅས་པའི་འགྲོ་འདི་ནི། །སྡུག་བསྔལ་ཕུང་པོ་འབའ་ཞིག་གིས། །རབ་ཏུ་མནར་བ་རྟོགས་ནས་ཀྱང་། །ངེས་འབྱུང་སྙིང་རྗེའི་རང་བཞིན་བསྐྱེད། །གང་ཞིག་ཐོས་པའི་རྒྱ་མཚོ་ནི། །ངོམ་མེད་བཏུང་བའི་ཟིལ་དངར་གྱིས། །ཕན་བདེའི་དགའ་སྟོན་འགྲོ་རྣམས་ལ། །མངོན་པར་སྤྲོ་འདི་ངོ་མཚར་ཕུལ། །དེ་དོན་རྗེས་སུ་དཔྱད་པ་ཡི། །འགལ་འབྲེལ་ཉིན་མོའི་འཛུམ་ཟེར་གྱིས། །ཕས་རྒོལ་མུན་པ་བཟའ་བ་དང་། །བློ་ལྡན་པདྨོ་འཛུམ་པར་མཛོད། །ཁྱད་པར་དབེན་པའི་ནགས་ཚལ་དུ། །སྒོམ་སྤངས་ཟླ་བའི་མྱུ་གུ་ནི། །ཡར་ངོའི་ཁྲི་ལ་རིམ་འཛེགས་ཏེ། །སྤངས་རྟོགས་ཆ་ཤས་གང་ཕྱིར་བརྩོན། །དེ་ལྟར་རྣམ་པ་གསུམ་ལྡན་ན། །རྒྱལ་བསྟན་ཡོངས་རྫོགས་འཁྲི་ཤིང་སྟེ། །འདི་ནི་ཀུན་གྱི་སྙིང་པོ་རུ། །བསྟན་པ་ཉིད་དུ་རྟོགས་པར་བྱ། །ཆོས་རྣམས་ཐམས་ཅད་ངོ་བོ་ཡིས། །ཡོངས་སུ་སྟོང་བས་སྣང་སྲིད་ཀུན། །སྒྱུ་མ་ལྟ་བུར་ཤེས་པ་ཡིས། སྒྱུ་མའི་ཚུལ་གྱིས་ལྟ་བར་གྱིས། །སྟོན་པ་རྫོགས་པའི་སངས་རྒྱས་ཀྱིས། །མདོ་སྔགས་བསྟན་པ་བགྲང་ཡས་པ། །གསུངས་ཀྱང་མདོར་བསྡུས་སྡེ་སྣོད་བཞིར། །རྣམ་པར་གཏན་ལ་དབབ་པར་མཛད། །དེ་ཡང་འདུལ་བ་མདོ་སྡེ་དང་། །མངོན་པ་རིག་འཛིན་གསང་སྔགས་སོ། །དེ་དག་ཀུན་གྱི་ལྟ་བ་ཡང་། །རྣམ་པ་བཞི་རུ་ཡང་དག་གནས། །ཉན་ཐོས་བྱེ་བྲག་སྨྲ་བ་རྣམས། །གཞི་ལྔ་རྫས་སུ་འདོད་པ་དང་། །དེ་བཞིན་མདོ་སྡེ་པ་རྣམས་ཀྱིས། །བཏགས་ཡོད་ཙམ་དུ་ཁས་ལེན་ཕྱིར། །འདི་གཉིས་ཐེག་པ་དམན་པའོ། །ཐེག་ཆེན་དབུ་སེམས་རྣམ་པ་གཉིས། །ཆོས་རྣམས་ཀུན་བརྟག་གཞན་དབང་དང་། །ཡོངས་གྲུབ་གསུམ་དུ་གཏན་ལ་དབབ། ཁམས་གསུམ་སེམས་ཙམ་ལས་སྐྱེས་པར། །འདོད་པ་གང་དེའི་བྱེ་བྲག་ཏུ། །རྣམ་བདེན་པ་དང་རྣམ་རྫུན་པ། །དབྱེ་ཞིང་དེ་ལའང་ནང་གསེས་སུ། །སྔ་མར་གཟུང་འཛིན་གྲངས་མཉམ་དང་། །སྒོ་ང་ཕྱེད་ཚལ་གཉིས་མེད་གསུམ། །ཕྱི་མར་དྲི་བཅས་དྲི་མེད་སོགས། །འདོད་ཚུལ་ཕྲ་བ་སྣ་ཚོགས་སོ། །ཁྱད་པར་ཐེག་ཆེན་དབུ་མ་པར། །རང་རྒྱུད་པ་དང་ཐལ་འགྱུར་གཉིས། །དང་པོ་ལ་ཡང་རྣལ་འབྱོར་དང་། །མདོ་སྡེ་སྤྱོད་པའི་དབུ་མ་གཉིས། །དེ་ཡང་ཆོས་རྣམས་མཐའ་དག་ཀུན། །ཐ་སྙད་ཙམ་དུ་གྲུབ་པར་འདོད། །དོན་ལ་སྐྱེ་འགག་ལ་སོགས་ཀུན། །གཏན་ཚིགས་ཆེན་པོ་རྣམ་པ་ལྔས། །སྟོང་པ་ཉིད་དུ་ཁས་ལེན་ཏེ། །མདོར་ན་རིགས་པས་བསྒྲུབ་པ་ཡིས། །སྤྲོས་བྲལ་ནམ་མཁའ་ལྟ་བུ་ཉིད། །ངེས་དོན་མཐར་ཐུག་དག་ཏུ་འདོད། །གཉིས་པ་དབུ་མ་ཐལ་འགྱུར་བས། །འཁྲུལ་ངོར་སྣང་བའི་ཀུན་རྫོབ་ཆོས། །སྔགས་ཀྱི་མཐུ་ཡི་སྒྱུ་མ་ལྟར། །མཐོང་ཡང་དོན་ལ་མེད་པའི་ཕྱིར། །ཀུན་ཏུ་གཟིགས་ཚེ་རྣམ་པར་དག །གཟུང་འཛིན་ལས་འདས་སྤྲོས་བྲལ་དབྱིངས། །རྣམ་པར་མི་རྟོག་ཟུང་འཇུག་པ། །དོན་དམ་བདེན་པར་རབ་ཏུ་བསྟན། །འཇིག་རྟེན་རྣམས་ཀྱི་བློ་ངོ་ལ། །ལྟོས་པ་གཉིས་སུ་ཡང་དག་འཇོག །འདོད་པ་མཐར་ཐུག་ཡོད་མིན་དང་། །ཡིན་མིན་ལ་སོགས་ཁས་བླངས་ཀུན། །བརྗོད་དུ་མེད་པ་དེ་ཉིད་ལ། །རྟོགས་པ་ཞེས་བྱ་དེ་སྐད་དུ། ཁས་བླངས་པ་ཡི་དངོས་པོ་ནི། །ཕྲ་བ་ཙམ་ཡང་ཡོད་མིན་ཏེ། །གདོད་ནས་སྐྱེ་བ་མེད་པའི་ཕྱིར། །མོ་གཤམ་གྱི་ནི་བུ་བཞིན་ནོ། །ཞེས་གསུངས་འོན་ཀྱང་སྒྲོ་བཏག་ཏུ། །འཁྲུལ་དང་མ་འཁྲུལ་དབྱེ་བ་ལས། །བདེན་པ་རྣམ་གཉིས་རྣམ་བཞག་ཀུན། །ཐ་སྙད་དག་ལ་བརྟེན་ཏེ་སྒྲུབ། །གཞན་ཡང་ཕྱི་རོལ་རྒོལ་བ་ཀུན། །བཟློག་དང་བསྟན་བཅོས་ཆེན་པོ་སོགས། །རྩོད་རྩོམ་གཙོ་བོར་གྱུར་པ་ལ། །རགས་པ་ཕྱི་ཡི་དབུ་མ་ཞེས། །ཐལ་རང་རྣམ་གཉིས་བསྔགས་པ་དང་། །དོན་དམ་རྣལ་འབྱོར་ཉམས་ལེན་ཚེ། །ཕྲ་བ་ནང་གི་དབུ་མ་ཞེས། །མཐར་ཐུག་ངེས་དོན་དག་ཏུ་བཞེད། །དེ་ཡང་ཏིང་འཛིན་རྒྱལ་པོ་ལས། །མི་འཁྲུགས་འདུས་མ་བྱས་པ་ནི། །དག་པ་དྭངས་པ་འོད་གསལ་བ། །བདེ་བར་གཤེགས་པའི་སྙིང་པོ་སྟེ། །ཡེ་ནས་གནས་པའི་མཚན་ཉིད་དོ། །ཞེས་གསུངས་དེ་ཕྱིར་འགྲོ་ཀུན་དང་། །དབྱེར་མེད་བདེ་གཤེགས་སྙིང་པོའི་ཁམས། །གློ་བུར་དྲི་མ་བསལ་བཞག་ལས། །འཁོར་འདས་གཉིས་སུ་འདོད་པ་ཡང་། །ངོ་བོ་མཉམ་པ་ཉིད་དུ་བརྗོད། །ཆོས་རྣམས་ཐམས་ཅད་ཀུན་བརྟག་དང་། །གཞན་དབང་ཡོངས་གྲུབ་རྣམ་པ་གསུམ། །རེ་རེ་ལའང་གཉིས་གཉིས་ཀྱི། །དབྱེ་བ་གཏན་ལ་དབབ་བར་བྱེད། །སྒྲིབ་པ་བྲལ་སྟོབས་དང་མཐུན་པར། །སྐྱེ་འཕགས་རྫོགས་པའི་སངས་རྒྱས་སུ། །བཞག་སྟེ་ནམ་མཁར་ཁྱད་མེད་ཀྱང་། །བུམ་པའི་བཟང་ངན་དབྱེ་བ་བཞིན། །དོན་ལ་བདེ་གཤེགས་སྙིང་པོའི་དངོས། །བསལ་བཞག་བྲལ་བར་གནས་ཞེས་འདོད། །དེ་ཡང་སྣང་ཆས་སྐུ་ཞིང་ཁམས། །ལ་སོགས་གཟུགས་སྐུའི་ཡོན་ཏན་ཀུན། །འཆར་ཞིང་སྟོང་ཆས་ཆོས་སྐུ་ཡི། །ཡོན་ཏན་ཐམས་ཅད་རྫོགས་པའོ། །དེ་ལྟར་ཐེག་པ་ཆེ་ཆུང་གི །ལྟ་བའི་རིམ་པ་དེ་དག་ཀྱང་། །རང་བཞིན་ཤེས་པར་བྱས་ནས་ནི། །ཉམས་སུ་བླང་བ་ཉིད་དུ་འདོད། །ཁྱད་པར་རིག་འཛིན་སྡེ་སྣོད་དུ། །གཞི་རྒྱུད་ཀུན་ཁྱབ་གདོད་མའི་གཤིས། །ལྷན་སྐྱེས་བདེ་གཤེགས་སྙིང་པོ་ནི། །འབྱུང་སེམས་དྭངས་མ་ཐིག་ལེའི་གཟུགས། །སྙིང་དབུས་ཉིད་དུ་རྣམ་པར་གནས། །མི་ཤིགས་ཟག་མེད་བདེ་བ་ཆེ། །བསྐྱེད་པའི་གནས་དང་རྟེན་དུ་འདོད། །ཕུང་པོ་རྣམ་དཔྱད་སྟོང་ཉིད་དང་། །འགྱུར་མེད་ལས་འདས་རང་རིག་པ། །མི་འགྱུར་བདེ་བ་ཆེན་པོ་ནི། །རྣམ་པ་ཀུན་གྱི་མཆོག་ལྡན་ཏེ། །སྐུ་དང་ཡེ་ཤེས་ཐམས་ཅད་ཀུན། །པྲ་ཕབ་ཇི་བཞིན་སྣང་བར་འདོད། །དེ་ལྟར་དབང་པོའི་རིམ་པ་དང་། །རྗེས་སུ་མཐུན་པའི་ཐེག་པ་ཀུན། །ཉམས་སུ་བླང་བྱ་རྣམ་པ་གསུམ། །སོ་སོར་ཐར་དང་བྱང་ཆུབ་སེམས། །རིག་པ་འཛིན་དང་གསང་སྔགས་སོ། །དེ་ཡང་སྡོམ་པ་གསུམ་གྱིས་ཏེ། །དང་པོ་སོ་སོར་ཐར་པ་ལ། །དབྱེ་ན་མིང་དུ་རྣམ་པ་བདུན། །དགེ་བསྙེན་དགེ་ཚུལ་ཕ་མ་གཉིས། །དགེ་སློང་མ་དང་དགེ་སློང་གཉིས། །རྫས་སུ་རྣམ་པ་བཞི་ཡིན་ཏེ། །བསྙེན་གནས་དགེ་བསྙེན་དགེ་ཚུལ་དང་། །དགེ་སློང་དག་སྟེ་བསྲུང་བྱའི་ཁྲིམས། །དུས་དང་གཏན་དུ་བླང་བ་གཉིས། །དང་པོ་བསྙེན་གནས་ཡན་ལག་བརྒྱད། །ངེས་པའི་དུས་སུ་བླང་དང་བསྲུང་། །གཉིས་པོ་དགེ་བསྙེན་ཉིད་ལའང་། །སྐྱབས་གསུམ་འཛིན་དང་སྣ་གཅིག་སྤྱོད། །སྣ་འགའ་སྤྱོད་དང་འཕེལ་བར་སྤྱོད། །ཡོངས་རྫོགས་བསྲུང་བ་དག་ཏུ་འདོད། །དགེ་ཚུལ་སྤང་བྱ་ཡན་ལག་བཅུ། །དགེ་སློང་རྩ་བ་རྣམ་བཞི་དང་། །ལྷག་མ་བཅུ་གསུམ་སྤང་ལྟུང་ནི། །སུམ་ཅུ་ཉིད་དེ་ལྟུང་བྱེད་པ། །འབའ་ཞིག་དགུ་བཅུ་ཐམ་པ་དང་། །སོར་བཤགས་སྡེ་བཞི་ཉེས་བྱས་པ། །བརྒྱ་དང་བཅུ་གཉིས་བསྡོམས་པ་ཡིས། །ཉིས་བརྒྱ་ལྔ་བཅུ་རྩ་གསུམ་ནི། །སྤང་བའི་ཕྱོགས་ཏེ་བསླབ་བྱ་བ། །བཅུ་བདུན་གཞི་རུ་ངེས་པར་བཤད། །དེ་ཡང་ངེས་འབྱུང་བསམ་པ་ཡིས། །ཀུན་སློང་ཐར་བ་ཆ་མཐུན་གྱིས། །རབ་ཏུ་འབད་པར་བྱ་བ་སྟེ། །མདོར་ན་ལུས་ངག་ཉེས་བྱས་པ། །སྤོང་བདུན་འཁོར་དང་བཅས་པའོ། ། ༈ ཐེག་ཆེན་བྱང་ཆུབ་སེམས་དཔའ་ཡི། །བསླབ་བྱ་ཚུལ་ཁྲིམས་རྣམ་གསུམ་མམ། །སྨོན་དང་འཇུག་པ་གཉིས་སུ་འདུ། །དེ་ཡང་ཉེས་སྤྱོད་ཀུན་སྤང་ཞིང་། །གཞན་ཕན་སྒྲུབ་ལ་ཡང་དག་གནས། །སྨོན་པའི་བསླབ་བྱ་ཚད་མེད་བཞི། །དཀར་ནག་ཆོས་བརྒྱད་སྒྲུབ་དང་སྤངས། །འཇུག་པའི་བསླབ་བྱ་ཕར་ཕྱིན་དྲུག །སྦྱིན་དང་ཚུལ་ཁྲིམས་བཟོད་བརྩོན་འགྲུས། །བསམ་གཏན་ཤེས་རབ་རྣམ་པ་དྲུག །རེ་རེ་ལའང་གསུམ་གསུམ་མ། །དེ་ལྟར་བསླབ་ལ་བརྩོན་པ་ཡིས། །རྒྱལ་བ་ཀུན་གྱི་སྲས་འགྱུར་ཞིང་། །མྱུར་དུ་བྱང་ཆུབ་མཆོག་ལ་རེག ། ༈ རིག་འཛིན་སྔགས་ཀྱི་དམ་ཚིག་ལ། །དང་པོ་པ་ཡི་བསླབ་བྱ་ནི། །བརྟུལ་ཞུགས་ཉི་ཤུ་རྩ་ལྔ་དང་། །གཞན་ཡང་རྒྱུད་སྡེ་སོ་སོ་ལས། །དབྱེ་བ་དཔག་ཏུ་མེད་མོད་ཀྱང་། །མདོར་བསྡུས་རྩ་ལྟུང་བཅུ་བཞི་དང་། །དེ་ཡི་ཡན་ལག་སྦོམ་པོ་བརྒྱད། །ཁྱད་པར་དབང་བཞིའི་དམ་ཚིག་གོ །དེ་ཡང་སྨིན་པར་བྱེད་པ་ཡིས། །རྒྱུད་སྦྱངས་དམ་ཚིག་གྲོགས་དང་བཅས། །ཀུན་བརྟག་བསྐྱེད་པའི་རིམ་པ་དང་། །ཡོངས་གྲུབ་མ་བཅོས་རྫོགས་རིམ་སྟེ། །རིམ་གཉིས་མཉམ་པར་སྤྱོད་པ་ཡིས། །རྡོ་རྗེ་འཆང་གི་ས་རུ་འགྲོ། །ཐུན་མོང་ཐུན་མོང་མ་ཡིན་པའི། །དོན་གཉིས་ལྷུན་གྱིས་འགྲུབ་པར་འགྱུར། །དེ་ལྟར་རྣམ་པ་གསུམ་པོ་ཡང་། །གང་ཟག་གཅིག་གི་རྒྱུད་ཉིད་ལ། །ཇི་ལྟར་བསྲུང་བར་བྱ་ཞེ་ན། །ངོ་བོ་གནས་འགྱུར་ཡོན་ཏན་ནི། །ཡར་ལྡན་ཚུལ་དུ་རྣམ་པར་འགྲོ། །རང་ལྡོག་མ་འདྲེས་དགག་བྱ་དང་། །དགོས་པ་ཐམས་ཅད་ཡོངས་སུ་ཚང་། །གནད་ཀྱི་མི་འགལ་དུས་སྐབས་ནི། །ཕྱི་ནང་གང་གཙོ་དེར་སྤྱོད་བྱ། །མདོར་ན་སྤང་བསྒྱུར་གྲོལ་གསུམ་གྱི། །ལམ་ནི་གང་ཡང་ཉོན་མོངས་ཀྱིས། །འཆིང་བར་མི་འགྱུར་ཐབས་དག་ལས། །གཞན་མིན་དགོངས་པ་གཅིག་ཏུ་འབབས། །དེ་ལྟར་རྣམ་གསུམ་སྡོམ་པ་ཡང་། །ཐོབ་པར་བྱེད་པའི་ཆོ་ག་དང་། །ཐོབ་བྱ་སྡོམ་པའི་བསྲུང་ཚུལ་དང་། །ཉམས་ན་སླར་ཡང་གསོ་བ་དང་། །ཐོབ་བྱའི་འབྲས་བུ་བཞི་རུ་འདུས། །དེ་ཡང་ཐོས་དང་བསམ་པ་ཡི། །གྲུབ་མཐའི་དབྱེ་བསལ་ལེགས་ཤེས་ནས། །སྒོམ་པ་ཉམས་འོག་འཛུད་པའི་ཟླར། །སྡོམ་པ་གསུམ་གྱིས་རྒྱུད་བཅིངས་པས། །མྱུར་དུ་བྱང་ཆུབ་མཆོག་ལ་རེག །དུལ་བ་ལས་ནི་ཚུལ་ཁྲིམས་དང་། །ཕྲག་དོག་ལས་ནི་མི་དགེ་བ། །བཟོད་པ་ལས་ནི་དཀའ་ཐུབ་རྣམས། །ས་བོན་མྱུར་གུ་ཇི་བཞིན་ཕྱིར། །རྟག་ཏུ་བག་ཡོད་ཆོག་ཤེས་དང་། །བསླབ་པར་བྱ་བའི་ནོར་གྱིས་ཕྱུག །ཆགས་དང་སྙོམས་ལས་ང་རྒྱལ་གྱི། །དྲེགས་པ་རྣམ་པར་སྤང་བར་མཛོད། །གནས་སྐབས་ཚོགས་སྦྱོར་མཐོང་བསྒོམ་བཞིར། །སློབ་པའི་ཆོས་རྣམས་ཡོངས་རྫོགས་ཏེ། །མཐར་ཐུག་མྱ་ངན་ལས་འདས་པའི། །འབྲས་བུ་ཡེ་ཤེས་ཆེན་པོ་ནི། །ལྷུན་གྲུབ་སྐུ་གསུམ་དགོངས་པ་ཅན། །སྒྲིབ་བྲལ་ཟླ་བའི་ཆོས་སུ་རྫོགས། །ནང་གི་རྩ་མདུད་གྲོལ་སྟོབས་ལས། །ཕྱི་རོལ་ཡོན་ཏན་རིམ་འཆར་ཕྱིར། །གཟུང་འཛིན་མདུད་གྲོལ་ས་བཅུ་ཡི། །མངོན་རྟོགས་དེ་ཡིས་བརྙེས་ཞེས་འདོད། །དེ་སྐད་བསླབ་པར་བྱ་བའི་དོན། །རང་དང་སྐལ་མཉམ་གཞན་གྱི་ཕྱིར། །གང་ཤར་ཟླ་བའི་འཛུམ་ཟེར་གྱིས། །ཚིགས་སུ་བཅད་པའི་ཀུ་མུད་བཞད། །དེ་ལས་བྱུང་བའི་དགེ་བ་ནི། །སྤྲིན་དུས་ཆར་གྱི་རྗེས་འགྲོ་བས། །ཉོན་མོངས་ཚ་གདུང་རབ་བཅིལ་ཏེ། །ཕན་བདེའི་ཆུ་སྐྱེས་རྒྱས་གྱུར་ཅིག །ཞེས་པའང་གཞོན་ནུ་ཨ་བྷཱ་ཡས་རང་ལོ་བཅོ་ལྔ་པར་གང་ཤར་ལྷུག་པར་བརྗོད་པའོ། ། ༈

[edit]

byams pa'i glu phan bde'i them skas/__ rang gzhan kun la phan par gdams pa byams pa'i glu dbyangs phan bde'i them skas zhes bya ba/__spangs rtogs yon tan yongs rdzogs shing /__/phan bde'i 'dod pa 'jo ba'i gnyen/__/dran pas srid zhi'i gdung sel ba/__/khyab bdag 'khor lo'i mgon por 'dud/__/sna tshogs las kyi 'bras bu yi/__/sa bon ring nas btab pa'i mthus/__/sna tshogs 'khor ba sgyu ma'i tshal/__/kun nas kun tu rgyas pa der/__/thog mtha' mi mngon 'khyams pa'i 'gro/__/sdug bsngal gsum gyi zhags pas bcings/__/bzod par dka' ba'i ngang tshul la/__/rab tu skyo shas bskyed par 'tshal/__/khyad par dal brgyad 'byor ba bcu'i/__/yal 'dab rnam par g.yo ba'i lus/__/rin chen 'khri shing 'di thob tshe/__/nges legs 'bras bzang smin par mdzod/__/de yang rtag par ma mchis te/__/snod bcud mtha' bzhi'i mu khyud kyis/__/bskor ba'i ngang tshul 'di mthong nas/__/myur du thar pa'i lam la 'jug__/ma 'dres za 'og ri mo ltar/__/'khor ba'i bde sdug sna tshogs kyang /__/las las skyes shing 'byung ba'i phyir/__/rgyu 'bras spang blang zhib tu mdzod/__/gang zhig sbrul gdug bsil yab tu/__/bsten na dug gis nyen pa ltar/__/sdig pa'i grogs po ring spangs pa'i/__/dam bca' rtag tu bzung bar rigs/__/ma la ya yi tsan+dan khrod/__/rkang 'thung phal yang dri bzang bzhin/__/dge ba'i bshes la bsten byas na/__/dam pa'i spyod lam zhar la 'go/__/mngon mtho'i them skas la brten nas/__/nges legs grong du bgrod pa'i phyir/__/rtag tu mi yi chos lugs kyang /__/tshul bzhin mthun par rab tu spyad/__/khyad par skal bzang skyes bu yis/__/thar pa mchog gi lam gzhol tshe/__/thog mar bsten par bya ba ni/__/yon tan ldan pa'i bshes gnyen te/__/de yang thabs mkhas thugs brtser ldan/__/mdo rgyud man ngag rjes su zhugs/__/'bras bu mngon mtho yang dag rigs/__/spyi bo'i gtsug nor bzhin du bkur/__/'di na thams cad gzigs pa yis/__/dngos po'i shes rab thams cad kun/__/mi mkhyen chos gang med pas na/__/tshul rnams kun la bslab par rigs/__/ci phyir de bzhin gshegs pa yi/__/go 'phang sgrub par byed pa la/__/mgon po gang des gsungs pa'i phyir/__/blo gsal rnams kyis dang du longs/__/zag par bcas pa'i 'gro 'di ni/__/sdug bsngal phung po 'ba' zhig gis/__/rab tu mnar ba rtogs nas kyang /__/nges 'byung snying rje'i rang bzhin bskyed/__/gang zhig thos pa'i rgya mtsho ni/__/ngom med btung ba'i zil dngar gyis/__/phan bde'i dga' ston 'gro rnams la/__/mngon par spro 'di ngo mtshar phul/__/de don rjes su dpyad pa yi/__/'gal 'brel nyin mo'i 'dzum zer gyis/__/phas rgol mun pa bza' ba dang /__/blo ldan pad+mo 'dzum par mdzod/__/khyad par dben pa'i nags tshal du/__/sgom spangs zla ba'i myu gu ni/__/yar ngo'i khri la rim 'dzegs te/__/spangs rtogs cha shas gang phyir brtson/__/de ltar rnam pa gsum ldan na/__/rgyal bstan yongs rdzogs 'khri shing ste/__/'di ni kun gyi snying po ru/__/bstan pa nyid du rtogs par bya/__/chos rnams thams cad ngo bo yis/__/yongs su stong bas snang srid kun/__/sgyu ma lta bur shes pa yis/__sgyu ma'i tshul gyis lta bar gyis/__/ston pa rdzogs pa'i sangs rgyas kyis/__/mdo sngags bstan pa bgrang yas pa/__/gsungs kyang mdor bsdus sde snod bzhir/__/rnam par gtan la dbab par mdzad/__/de yang 'dul ba mdo sde dang /__/mngon pa rig 'dzin gsang sngags so/__/de dag kun gyi lta ba yang /__/rnam pa bzhi ru yang dag gnas/__/nyan thos bye brag smra ba rnams/__/gzhi lnga rdzas su 'dod pa dang /__/de bzhin mdo sde pa rnams kyis/__/btags yod tsam du khas len phyir/__/'di gnyis theg pa dman pa'o/__/theg chen dbu sems rnam pa gnyis/__/chos rnams kun brtag gzhan dbang dang /__/yongs grub gsum du gtan la dbab/__khams gsum sems tsam las skyes par/__/'dod pa gang de'i bye brag tu/__/rnam bden pa dang rnam rdzun pa/__/dbye zhing de la'ang nang gses su/__/snga mar gzung 'dzin grangs mnyam dang /__/sgo nga phyed tshal gnyis med gsum/__/phyi mar dri bcas dri med sogs/__/'dod tshul phra ba sna tshogs so/__/khyad par theg chen dbu ma par/__/rang rgyud pa dang thal 'gyur gnyis/__/dang po la yang rnal 'byor dang /__/mdo sde spyod pa'i dbu ma gnyis/__/de yang chos rnams mtha' dag kun/__/tha snyad tsam du grub par 'dod/__/don la skye 'gag la sogs kun/__/gtan tshigs chen po rnam pa lngas/__/stong pa nyid du khas len te/__/mdor na rigs pas bsgrub pa yis/__/spros bral nam mkha' lta bu nyid/__/nges don mthar thug dag tu 'dod/__/gnyis pa dbu ma thal 'gyur bas/__/'khrul ngor snang ba'i kun rdzob chos/__/sngags kyi mthu yi sgyu ma ltar/__/mthong yang don la med pa'i phyir/__/kun tu gzigs tshe rnam par dag__/gzung 'dzin las 'das spros bral dbyings/__/rnam par mi rtog zung 'jug pa/__/don dam bden par rab tu bstan/__/'jig rten rnams kyi blo ngo la/__/ltos pa gnyis su yang dag 'jog__/'dod pa mthar thug yod min dang /__/yin min la sogs khas blangs kun/___/brjod du med pa de nyid la/__/rtogs pa zhes bya de skad du/__khas blangs pa yi dngos po ni/__/phra ba tsam yang yod min te/__/gdod nas skye ba med pa'i phyir/__/mo gsham gyi ni bu bzhin no/__/zhes gsungs 'on kyang sgro btag tu/__/'khrul dang ma 'khrul dbye ba las/__/bden pa rnam gnyis rnam bzhag kun/__/tha snyad dag la brten te sgrub/__/gzhan yang phyi rol rgol ba kun/__/bzlog dang bstan bcos chen po sogs/__/rtsod rtsom gtso bor gyur pa la/__/rags pa phyi yi dbu ma zhes/__/thal rang rnam gnyis bsngags pa dang /__/don dam rnal 'byor nyams len tshe/__/phra ba nang gi dbu ma zhes/__/mthar thug nges don dag tu bzhed/__/de yang ting 'dzin rgyal po las/__/mi 'khrugs 'dus ma byas pa ni/__/dag pa dwangs pa 'od gsal ba/__/bde bar gshegs pa'i snying po ste/__/ye nas gnas pa'i mtshan nyid do/__/zhes gsungs de phyir 'gro kun dang /__/dbyer med bde gshegs snying po'i khams/__/glo bur dri ma bsal bzhag las/__/'khor 'das gnyis su 'dod pa yang /__/ngo bo mnyam pa nyid du brjod/__/chos rnams thams cad kun brtag dang /__/gzhan dbang yongs grub rnam pa gsum/__/re re la'ang gnyis gnyis kyi/__/dbye ba gtan la dbab bar byed/__/sgrib pa bral stobs dang mthun par/__/skye 'phags rdzogs pa'i sangs rgyas su/__/bzhag ste nam mkhar khyad med kyang /__/bum pa'i bzang ngan dbye ba bzhin/__/don la bde gshegs snying po'i dngos/__/bsal bzhag bral bar gnas zhes 'dod/__/de yang snang chas sku zhing khams/__/la sogs gzugs sku'i yon tan kun/__/'char zhing stong chas chos sku yi/__/yon tan thams cad rdzogs pa'o/__/de ltar theg pa che chung gi__/lta ba'i rim pa de dag kyang /__/rang bzhin shes par byas nas ni/__/nyams su blang ba nyid du 'dod/__/khyad par rig 'dzin sde snod du/__/gzhi rgyud kun khyab gdod ma'i gshis/__/lhan skyes bde gshegs snying po ni/__/'byung sems dwangs ma thig le'i gzugs/__/snying dbus nyid du rnam par gnas/__/mi shigs zag med bde ba che/__/bskyed pa'i gnas dang rten du 'dod/__/phung po rnam dpyad stong nyid dang /__/'gyur med las 'das rang rig pa/__/mi 'gyur bde ba chen po ni/__/rnam pa kun gyi mchog ldan te/_/sku dang ye shes thams cad kun/__/pra phab ji bzhin snang bar 'dod/__/de ltar dbang po'i rim pa dang /__/rjes su mthun pa'i theg pa kun/__/nyams su blang bya rnam pa gsum/__/so sor thar dang byang chub sems/__/rig pa 'dzin dang gsang sngags so/__/de yang sdom pa gsum gyis te/__/dang po so sor thar pa la/__/dbye na ming du rnam pa bdun/__/dge bsnyen dge tshul pha ma gnyis/__/dge slong ma dang dge slong gnyis/__/rdzas su rnam pa bzhi yin te/__/bsnyen gnas dge bsnyen dge tshul dang /__/dge slong dag ste bsrung bya'i khrims/__/dus dang gtan du blang ba gnyis/__/dang po bsnyen gnas yan lag brgyad/__/nges pa'i dus su blang dang bsrung /__/gnyis po dge bsnyen nyid la'ang /__/skyabs gsum 'dzin dang sna gcig spyod/__/sna 'ga' spyod dang 'phel bar spyod/__/yongs rdzogs bsrung ba dag tu 'dod/__/dge tshul spang bya yan lag bcu/__/dge slong rtsa ba rnam bzhi dang /__/lhag ma bcu gsum spang ltung ni/__/sum cu nyid de ltung byed pa/__/'ba' zhig dgu bcu tham pa dang /__/sor bshags sde bzhi nyes byas pa/__/brgya dang bcu gnyis bsdoms pa yis/__/nyis brgya lnga bcu rtsa gsum ni/__/spang ba'i phyogs te bslab bya ba/__/bcu bdun gzhi ru nges par bshad/__/de yang nges 'byung bsam pa yis/__/kun slong thar ba cha mthun gyis/__/rab tu 'bad par bya ba ste/__/mdor na lus ngag nyes byas pa/__/spong bdun 'khor dang bcas pa'o/___/__!_theg chen byang chub sems dpa' yi/__/bslab bya tshul khrims rnam gsum mam/__/smon dang 'jug pa gnyis su 'du/__/de yang nyes spyod kun spang zhing /__/gzhan phan sgrub la yang dag gnas/__/smon pa'i bslab bya tshad med bzhi/__/dkar nag chos brgyad sgrub dang spangs/__/'jug pa'i bslab bya phar phyin drug__/sbyin dang tshul khrims bzod brtson 'grus/__/bsam gtan shes rab rnam pa drug__/re re la'ang gsum gsum ma/__/de ltar bslab la brtson pa yis/__/rgyal ba kun gyi sras 'gyur zhing /__/myur du byang chub mchog la reg___/_!_rig 'dzin sngags kyi dam tshig la/__/dang po pa yi bslab bya ni/__/brtul zhugs nyi shu rtsa lnga dang /__/gzhan yang rgyud sde so so las/__/dbye ba dpag tu med mod kyang /__/mdor bsdus rtsa ltung bcu bzhi dang /__/de yi yan lag sbom po brgyad/__/khyad par dbang bzhi'i dam tshig go__/de yang smin par byed pa yis/__/rgyud sbyangs dam tshig grogs dang bcas/__/kun brtag bskyed pa'i rim pa dang /__/yongs grub ma bcos rdzogs rim ste/__/rim gnyis mnyam par spyod pa yis/__/rdo rje 'chang gi sa ru 'gro/__/thun mong thun mong ma yin pa'i/__/don gnyis lhun gyis 'grub par 'gyur/__/de ltar rnam pa gsum po yang /__/gang zag gcig gi rgyud nyid la/__/ji ltar bsrung bar bya zhe na/__/ngo bo gnas 'gyur yon tan ni/__/yar ldan tshul du rnam par 'gro/__/rang ldog ma 'dres dgag bya dang /__/dgos pa thams cad yongs su tshang /__/gnad kyi mi 'gal dus skabs ni/__/phyi nang gang gtso der spyod bya/__/mdor na spang bsgyur grol gsum gyi/__/lam ni gang yang nyon mongs kyis/__/'ching bar mi 'gyur thabs dag las/__/gzhan min dgongs pa gcig tu 'babs/__/de ltar rnam gsum sdom pa yang /__/thob par byed pa'i cho ga dang /__/thob bya sdom pa'i bsrung tshul dang /__/nyams na slar yang gso ba dang /__/thob bya'i 'bras bu bzhi ru 'dus/__/de yang thos dang bsam pa yi/__/grub mtha'i dbye bsal legs shes nas/__/sgom pa nyams 'og 'dzud pa'i zlar/__/sdom pa gsum gyis rgyud bcings pas/__/myur du byang chub mchog la reg__/dul ba las ni tshul khrims dang /__/phrag dog las ni mi dge ba/__/bzod pa las ni dka' thub rnams/__/sa bon myur gu ji bzhin phyir/__/rtag tu bag yod chog shes dang /__/bslab par bya ba'i nor gyis phyug__/chags dang snyoms las nga rgyal gyi/__/dregs pa rnam par spang bar mdzod/__/gnas skabs tshogs sbyor mthong bsgom bzhir/__/slob pa'i chos rnams yongs rdzogs te/__/mthar thug mya ngan las 'das pa'i/__/'bras bu ye shes chen po ni/__/lhun grub sku gsum dgongs pa can/__/sgrib bral zla ba'i chos su rdzogs/__/nang gi rtsa mdud grol stobs las/__/phyi rol yon tan rim 'char phyir/__/gzung 'dzin mdud grol sa bcu yi/__/mngon rtogs de yis brnyes zhes 'dod/__/de skad bslab par bya ba'i don/__/rang dang skal mnyam gzhan gyi phyir/__/gang shar zla ba'i 'dzum zer gyis/__/tshigs su bcad pa'i ku mud bzhad/__/de las byung ba'i dge ba ni/__/sprin dus char gyi rjes 'gro bas/__/nyon mongs tsha gdung rab bcil te/__/phan bde'i chu skyes rgyas gyur cig__/zhes pa'ang gzhon nu a b+hA yas rang lo bco lnga par gang shar lhug par brjod pa'o/___/__!_