JKW-KABUM-18-TSHA-001-011

🚧 This website is under continued development. We appreciate your patience!

Previous Text Back to Volume PageNext Text

Wylie title	khri 'don mnga' gsol lta bu'i legs 'bul gyi tshe
Location	mkhyen brtse'i bka' 'bum Volume 18, sde tshan 1, Text 11, Pages 150-161 (Folios 75b4 to 81a2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. khri 'don mnga' gsol lta bu'i legs 'bul gyi tshe. In 'jam dbyangs mkhyen brtse'i dbang po'i bka' 'bum, Vol. 18: 150-161. Khams sde dge rdzong sar dgon: Rdzong sar blo gros phun tshogs, 2020.
Genre	Official Letters - chab shog

1 Texts in this Section (sde tshan or chos tshan)

11 150-161	ཁྲི་འདོན་མངའ་གསོལ་ལྟ་བུའི་ལེགས་འབུལ་གྱི་ཚེ། khri 'don mnga' gsol lta bu'i legs 'bul gyi tshe Official Letters - chab shog	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

ཁྲི་འདོན་མངའ་གསོལ་ལྟ་བུའི་ལེགས་འབུལ་གྱི་ཚེ། གོང་རྒྱན་དང་འབེབས་ཞུས་སོགས་སྔ་མ་རྣམས་ལས་བླངས་པའམ། ཡང་ན། ཤྲཱི་བི་ཛ་ཡནྟུ། དགེ་མཚན་བྱེ་བ་ཕྲག་བརྒྱས་མངོན་གཏམས་ཡོན་ཏན་ཡིད་བཞིན་འབྱུང་གནས་ཆེ། །དྲན་པ་ཙམ་གྱིས་རྨོངས་པའི་འཇིགས་འཕྲོག་ཞི་བསིལ་བདུད་རྩི་སྦྱིན་པ་ལ། །གྲགས་པའི་རྔ་ཡབ་ཐ་གྲུར་གཡོ་བར་ཡིད་ཅན་རྒྱ་མཚོའི་དཔལ་གྱུར་པའི། །ཞབས་སེན་སྲིད་ཞིའི་ཐོད་ཀོས་བཏུད་བྱས་ནོར་བུའི་བ་གམ་གཡོ་བའི་དྲུང་། །ཞེས་སམ། ཤྲཱི་སྭསྟི་སིདྡྷནྟུ། ཚངས་སོགས་ཆེ་དགུའི་འདར་ལྡན་ཐོར་ཚུགས་ཀྱིས། །ཞབས་སེན་ནོར་བུའི་མེ་ལོང་ཕྱིས་པའི་ངོགས། །རྨད་བྱུང་དགེ་མཚན་བརྒྱ་ཕྲག་སྣང་བའི་དཔྱིད། །ཕྱོགས་ལས་རྣམ་པར་རྒྱལ་བའི་ཉེ་དྲུང་དུ། །ཞེས་སམ། ཤྲཱི་ཛཱི་བནྟུ། །དཔལ་ལྡན་རྒྱལ་བ་སྲས་བཅས་ཐུགས་རྗེའི་གར། །ཡེ་ཤེས་ཕུང་པོར་མངོན་པར་སྣང་བའི་གཟུགས། །ལྷར་བཅས་ཀུན་གྱི་གཙུག་གིས་ཉེར་བསྟེན་པའི། །ཞབས་སྟེགས་པདྨོ་སར་པའི་ཉེ་དྲུང་དུ། །ཞེས་སམ། ཨོཾ་སྭསྟི་ཀུརྦནྟུ། གཟོད་ནས་རྟག་པ་དམ་པའི་ཆོས་ཉིད་ལ། །ཤིན་ཏུ་བརྩེ་བའི་ཕྱག་གིས་ཉེར་འཁྱུད་ཀྱང་། །སྙིང་རྗེའི་སྒྱུ་འཕྲུལ་རོལ་མོ་མི་འགོག་པའི། །ཞབས་པད་གདོང་ལྔས་བསྟེན་པ་ག་ལ་བར། །ཞེས་སམ། སྭསྟི་བི་ཛ་ཡནྟུ། རྡུལ་བྲལ་ཆོས་དབྱིངས་ཆུ་གཏེར་ཆེ། །སྙིང་རྗེའི་ས་བརྟོལ་གྱིས་བསྲུབས་པས། །མཚན་དཔེའི་ཟླ་ཤེལ་དར་བབས་པའི། །ཞབས་སྟེགས་ལྷ་བརྒྱའི་ཅོད་པན་དྲུང་། །ཞེས་པ་ལྟ་བུའི་འབེབས་འོག་ནས། །འདི་ན་ཚངས་དབང་གཙུག་གི་རིན་ཆེན་རྣམ་པར་བཞུ་བའི་དོགས་པ་ཅན། །སྤྲིན་སྔོན་ཆུན་པོའི་གོམ་སྟབས་མཐོང་ཚེ་མདོངས་མཐའ་དགའ་བའི་ཟློས་གར་ལྟར། །བསྐལ་མང་བསོད་ནམས་ཟོང་གིས་ཉེར་ཐོབ་ཁྱོད་ཞབས་ལེགས་བྱས་དོ་ཀེར་རྩེར། །མངོན་པར་དབང་བསྐུར་ཤིས་པ་བསྒྲུབས་ཚེ་དད་སྤྲོའི་བརྗོད་པ་འདི་སྐད་དབྱེ། །ཞེས་སམ། རྡུལ་སྙེད་ལུས་ཀྱི་ཆུ་བ་ལྡེམས་པའི་ཕང་། །སོར་བཅུའི་མེ་ཏོག་སྤྱི་བོར་ཟླུམ་དང་བཅས། །རྣམ་གསུམ་དད་པའི་སྦྲང་རྩིའི་བརྟུལ་ཞུགས་ཅན། །གང་དེའི་མགྲིན་པའི་རྫ་རྔ་འདི་སྐད་འཁྲོལ། །ཞེས་སམ། བསྔགས་འོས་ཡོན་ཏན་ཡི་གེའི་དོ་ཤལ་གྱིས། །ཕྱོགས་ཀྱི་བུ་མོའི་འགྲམ་པར་རྒྱན་མཐོང་བས། །མི་ཕྱེད་དད་གུས་མགྲིན་པ་མཐོར་བཏེགས་ནས། །དགེ་ལེགས་ཤིས་པའི་བརྗོད་པ་འདི་སྐད་གླེངས། །ཞེས་སམ། མི་ཕྱེད་གུས་པའི་ཟླ་ཟེར་གྱིས་རེག་པས། །ངག་ཚིག་ཀུ་མུད་དགོད་པའི་འཛུམ་དཀར་ལས། །ཞུ་གསོལ་སྦྲང་རྩིའི་དོགས་པ་གཡོ་དང་བཅས། །ཡེ་ཤེས་གཟིགས་པའི་འབབས་སྟེགས་མཛེས་པར་བྱ། །ཞེས་སམ། ཇི་ལྟར་ཉིན་མོའི་ཐིགས་པ་ཡིས། །ཉེ་བར་ཕྱེ་བའི་པདྨོ་བཞིན། །དད་གསུམ་མཆུ་སྒྲོས་གཡོ་བ་ལས། །ཞུ་གསོལ་གུས་པའི་རྒྱུད་མངས་འཁྲོལ། །ཞེས་སོགས་གང་འོས་ཀྱི་མཐར། ལོག་རྟོག་ར་རིས་གཞར་ཡང་རིང་བཏང་སྐལ་བཟང་དད་པའི་མེ་ལོང་དུ། །རྨད་བྱུང་དམ་པའི་ཡོན་ཏན་གཟུགས་བརྙན་འགོག་པ་མེད་པ་རྒྱུ་བ་ཡིས། །གྲགས་སྙན་འབིགས་བྱེད་རླུང་གི་རྩེ་དགས་ལྷར་བཅས་སྲིད་པའི་ཁམས་འདི་ཡང་། །དགེ་མཚན་སྣང་བ་བརྒྱ་ཕྲག་འབར་བཞིན་ཕན་བདེའི་སིམ་པ་ཅིར་ཡང་ཐོབ། །དེ་ཚེ་མཚན་བཟང་མིག་གི་བདུད་རྩི་ངོ་མཚར་སྣང་བ་ལྷམ་མེ་བས། །བྲལ་སྨིན་ལམ་བདེན་རྒྱལ་རྔ་བརྡུངས་ནས་འགྲོ་རྣམས་ཐར་པའི་སར་བཀོད་ཅིང་། །ཡེ་ཤེས་ཕུང་པོ་གཞལ་དུ་མེད་པ་གཏིང་མཐའ་བྲལ་བར་སྙོམས་འཇུག་པའི། །རྣམ་ཐར་མཐའ་ཀླས་ཚངས་པའི་བློས་ཀྱང་རྫོགས་པར་འདྲེན་པའི་གོ་སྐབས་ཅི། །ཁྱད་པར་སྲིད་ཞིའི་ཐོར་ཚུགས་ཀྱིས་དུད་ཆོས་ཀྱི་རྒྱལ་ཐབས་ཆེན་པོ་ལ། །ཞབས་མཐིལ་འཁོར་ལོའི་རེ་ཁཱ་བཀོད་ཚེ་སྲས་བཅས་འདྲེན་པ་ཐམས་ཅད་ཀྱང་། །བསྔགས་པའི་མེ་ཏོག་ཆལ་ཆིལ་བསྙིལ་བས་ཕྱོགས་ཀྱི་ཁོར་ཡུག་དཀྲིགས་གྱུར་ན། །ལེགས་བྲིས་བཅས་པའི་ཡིད་ཅན་སུ་ཞིག་གུས་པའི་ཐལ་མོ་སྦྱོར་མི་བྱེད། །དེ་སླད་བྱང་ཆུབ་སྙིང་པོའི་བར་དུ་ཐུགས་རྗེའི་བརླན་གྱིས་མི་བཏང་ཕྱིར། །མི་ཕྱེད་དད་གསུམ་ག་བུར་རྡུལ་གྱིས་ཡིད་རབ་མྱོས་པའི་ཀུ་མུད་དཱས། །ཡིད་སྤྲུལ་མཎྜལ་རྒྱ་ཆེར་བཀོད་པས་ཡེ་ཤེས་གཟིགས་པ་མཛེས་བྱས་ཏེ། །དངོས་འབྱོར་མཆོད་སྤྲིན་སྦྲང་རྩིའི་ཐིག་པ་ཅུང་ཟད་གཡོ་བས་བསྙེན་བཀུར་བགྱི། །ཞེས་སམ། མགོན་ཁྱོད་གཟོད་ནས་གྲུབ་པའི་རྒྱལ་ཐབས་ཆེར། །རྣམ་གྲོལ་སྐུ་བཞིའི་རིན་ཆེན་སྔོན་བརྙེས་ཀྱང་། །ཡིད་ཅན་སྲིད་པའི་ཆུ་གཏེར་ལས་གདོན་ཕྱིར། །རྨད་བྱུང་ཐུགས་རྗེའི་སྒྱུ་འཕྲུལ་ཅི་ཡང་སྟོན། །ཁྱད་པར་དེང་འདིར་མཚན་བཟང་ཆུ་ཤེལ་དབང་། །མོས་ལྡན་ཡིད་མཁར་ཤར་བའི་དེ་མ་ཐག །ཡོན་ཏན་བདུད་རྩིའི་དོ་ཤལ་བརྒྱ་ཕྲག་གི །སྣང་བ་དམ་པས་འཇིག་རྟེན་མཛེས་པར་བྱས། །དེ་ཚེ་ཞབས་སེན་བནྡྷུ་ཛཱི་བ་ཀ །རྣམ་གྲོལ་ཆོས་ཀྱི་ཁྲི་ལ་མངའ་གསོལ་བར། །དད་སྤྲོའི་དགའ་སྟོན་ཉུང་ངུའི་མེ་ཏོག་གིས། །སྐལ་པ་བཟང་པོའི་ཤིས་པ་དེང་འདིར་བསྒྲུབས། །ཞེས་སམ། གང་ཁྱོད་ཚོགས་ཟུང་བརྒྱ་བྱིན་སོར་རྩེ་ཡིས། །རྣམ་པར་བྲིས་པའི་མཚན་བཟང་རི་དྭགས་ཀྱིས། །ཉེར་འཁྱུད་བྱིན་རླབས་བདུད་རྩིའི་འོད་སྣང་ཅན། །སྐལ་བཟང་མོས་པའི་རི་དབང་རྩེ་མོར་འཛེགས། །ཁྱད་པར་རིགས་ལས་ཐོབ་པའི་བསྔགས་འོས་ཀྱིས། །རྣམ་ཐར་རི་མོ་བསུབ་ཏུ་མེད་པ་གང་། །དད་གསུམ་བཞིན་གྱི་སྣོད་དུ་འཆར་བའི་མོད། །སྔོན་མེད་ངོ་མཚར་ལྟད་མོར་རིང་ཞིག་གཡེངས། །དེ་ཚེ་ལེགས་བྲིས་གདེངས་ཅན་བདག་པོ་སོགས། །ཆེ་དགུའི་རལ་ཁུར་སྣུམ་པོས་བརླིངས་བྱས་པའི། །ཆོས་ཀྱི་རྒྱལ་ཐབས་ཆེན་པོར་དབང་བསྐུར་བས། །དགེ་ལེགས་ཤིས་པའི་མཆོད་སྤྲིན་ཅུང་ཟད་སྟོབ། །ཅེས་སམ། འདི་ན་བྱང་ཆུབ་སྙིང་པོའི་བདུད་རྩིའི་བཅུད། །བླ་མེད་ཐར་པའི་སྲོག་ཏུ་སོང་བ་ལས། །རྡོ་རྗེའི་རྣལ་འབྱོར་ཡོངས་སུ་གྲུབ་པའི་དཔྱིད། །གཞན་ལ་ཕན་པའི་གར་དུ་ཟློས་པ་གང་། །ཇི་ལྟར་འདམ་ལས་སྐྱེས་པའི་པདྨོ་ཡང་། །དག་པའི་ཁ་དོག་བརྒྱ་ཕྲག་འཆང་བ་ལྟར། །སྲིད་པར་རྗེས་སུ་ཆགས་པའི་སྒྱུ་ཐབས་ཀྱིས། །བྲལ་སྨིན་ཡོན་ཏན་མཐའ་དག་བདག་གིར་མཛད། །དེ་ཚེ་སྲས་དང་བཅས་པའི་རྒྱལ་ཀུན་གྱིས། །རྨད་བྱུང་ཆོས་ཀྱི་ཁྲི་ལ་མངའ་གསོལ་བའི། །དགེ་མཚན་ཤིས་པའི་སྣང་བ་འབྱམས་ཀླས་པར། །དད་སྤྲོའི་མཆོད་སྤྲིན་ཕྲ་མོའི་དགའ་སྟོན་སྟོབ། །ཅེས་སམ། མགོན་ཁྱོད་གཟོད་ནས་རྣམ་གྲོལ་བའི། །ཡེ་ཤེས་ཕ་རོལ་ཕྱིན་བརྙེས་ཀྱང་། །ཐབས་མཁས་མཛད་པའི་གཞན་དབང་གིས། །ངོ་མཚར་ཟློས་གར་ཅི་ཡང་སྟོན། །ཁྱད་པར་དེང་འདིར་མོས་ལྡན་གྱིས། །ཡིད་ལ་བདུད་རྩིའི་དཔལ་སྟེར་བའི། །མཚན་དཔེའི་དཀྱིལ་འཁོར་སྣང་བ་དང་། །མཉམ་དུ་བསྔགས་འོས་ཆ་ཤས་རྫོགས། །དེ་སླད་སྲིད་ན་མངོན་མཐོ་བའི། །ཆོས་ཀྱི་རྒྱལ་ཐབས་ལ་འཛེགས་ཚེ། །ཤིས་པའི་སྒོ་འཕར་དབྱེ་བའི་ཕྱིར། །དད་སྤྲོའི་མཎྜལ་སྟོབ་ལ་ཕྱོགས། །ཞེས་པ་ལྟ་བུས་མཚོན་ཇི་ལྟར་རིགས་པ་སྔོན་དུ་འགྲོ་བས། དེ་ལྟར་ཚངས་པའི་སྲས་མོའི་རྒྱུད་མངས་ལ་ཅུང་ཟད་རེག་པའི་བརྗོད་པ་ཉུང་ངུས་མདུན་བསུས་ཏེ། སྐབས་སུ་བབས་པའི་གླེང་པར་བྱ་བ་ནི། འདི་ལྟར་ལྷ་དང་བཅས་པའི་འགྲོ་བ་ཀུན་གྱི། རྟེན་དང་། གླིང་དང་། དཔུང་གཉེན་གཅིག་པུར་གྱུར་པའི་སྐྱོབ་པ་ཁྱོད་ནི། །ཐོག་མ་མ་མཆིས་པའི་དུས་ནས་ཟད་པ་དང་མི་སྐྱེ་ཤེས་པའི་ཡེ་ཤེས་ཀྱི་བདུད་རྩིས་ཐུགས་ཀྱི་དཔལ་བེའུ་ཡོངས་སུ་གཏམས་ཏེ། བྱང་ཆུབ་སྙིང་པོའི་གོ་འཕང་ཕུན་སུམ་ཚོགས་པ་བརྙེས་སུ་ཟིན་ཀྱང་། སྨོན་ལམ་དང་སྙིང་རྗེའི་འཕེན་པ་ཁོ་ནས་ཡང་སྲིད་ཀུན་ཏུ་ཐབས་མཁས་ཀྱི་སྤྱོད་པ་མཐའ་ཀླས་པས་ཡིད་ཅན་ཐམས་ཅད་མངོན་མཐོ་དང་ངེས་ལེགས་ཀྱི་ལམ་ལ་དཀྲི་བར་མཛད་པ་ལས། དེང་གི་ཆར་དགེ་ཞིང་ཤིས་པའི་ལེགས་བྱས་ཀྱི་སྒོ་འཕར་བརྒྱ་ཕྲག་ཏུ་དབྱེ་བའི་སྐབས་འདིར། རྗེ་བཙུན་བླ་མ་དམ་པ་རིམ་པར་བྱོན་པ་རྣམས་ཀྱིས་བྱིན་གྱིས་བརླབས་པའི་ཆོས་ཀྱི་ཁྲི་མི་འཇིགས་བཞི་དང་ལྡན་པའི་འཕྲོག་བྱེད་ཀྱི་དབང་པོ་དྲེགས་པས་བསྒྱིངས་པའི་དོ་ཀེར་གྱི་རྩེ་ལ་ཞབས་སེན་གྱི་པདྨོ་བཀོད་པས་ཡིད་སྲུབས་ཀྱི་དཔུང་ཚོགས་སྡེ་དང་བཅས་པའི་ཕྱོགས་ལས་རྣམ་པར་རྒྱལ་བའི་གདན་སྲིད་རྩེར་བསྒྲེངས་བ་དང་ཆབ་ཅིག །ཕྱོགས་བཅུ་དུས་བཞིའི་རྣམ་འདྲེན་སྲས་དང་བཅས་པ་རྣམས་ཀྱི་ལེགས་སོའི་བསྔགས་བརྗོད་མེ་ཏོག་མནྡཱ་རའི་དོ་ཤལ་དུ་གཡོ་བས་དབུགས་དབྱུང་ཞིང་། མངའ་གསོལ་ཏེ། གང་ཞིག་ལེགས་བྲིས་ཀྱི་དབང་པོ་དང་། གདེངས་ཅན་གྱི་བདག་པོ་དང་། ནོར་འཛིན་ཡངས་པའི་ཁྱོན་ལ་སྟོབས་ཀྱི་འཁོར་ལོས་སྒྱུར་བ་རྣམས་ཀྱིས་མཚོན་མཆོག་དམན་བར་མའི་ཡིད་ཅན་རྒྱ་མཚོའི་རྡུལ་རྙེད་ཀྱི་བསླུ་བ་མེད་པའི་སྐྱབས་སུ་ངེས་པ་རྙེད་པས་ཡིད་དྲངས་ཏེ། ཞབས་སེན་གྱི་ནོར་བུ་སྤྱི་བོར་བསྙེན་ནས་གནས་སྐབས་དང་མཐར་ཐུག་གི་ཕན་བདེའི་དགའ་སྟོན་གཏན་པ་མེད་པར་ལོངས་སུ་སྤྱད་པའི་བཀའ་དྲིན་དང་ངོ་མཚར་ནི་སོ་སོ་སྐྱེ་བོའི་བློ་ཡི་ར་བ་ལས་རིང་དུ་བརྒལ་བའི་ཕྱིར་སྟོང་གསུམ་བཻཌཱུཪྻས་བསྐངས་ཀྱང་གཞལ་བར་ལྟ་ག་ལ། །དེ་ལྟ་ནའང་དངོས་པོའི་བདོག་པ་ཅུང་ཟད་འདིས་མཚོན་རང་གཞན་གྱི་རྒྱུད་ན་དུས་གསུམ་དུ་བསགས་པའི་ལུས་ལོངས་སྤྱོད་དགེ་བའི་རྩ་བ་དང་བཅས་པ་འཕགས་པ་ཀུན་ཏུ་བཟང་པོའི་མཆོད་སྤྲིན་དུ་དད་པས་སྤྲུལ་ཏེ་འབུལ་བའི་མཎྜལ་མཚོན་བྱེད་དུ། ཐོག་མར་དྲི་མ་མེད་པའི་སྙིང་རྗེ་ཆེན་པོའི་འཇུག་པས་གཞན་ལ་ཕན་པར་དགོངས་པའི་ཐུགས་བསྐྱེད་ཡལ་བར་མི་འདོར་བའི་རྟེན་འབྱུང་དུ་ལྷ་རྫས་ཀྱི་ཝསྟྲ་ཟླ་བ་ཞུན་མའི་མདོག་ཅན་དཀྱུས་སུ་རིང་བ། གང་སྐུ་མཚན་དཔེའི་ཕུང་པོ་ཞིང་ཁམས་འདི་ཁོ་ན་ལས་གཡོ་བ་མེད་པར་བསྐལ་པ་རྒྱ་མཚོར་བརྟན་པར་བཞུགས་པའི་དགེ་མཚན་དུ་རྒྱལ་བ་ཚེ་མཐའ་ཡས་པའི་སྐུ་བརྙན་འཆི་མེད་མཆོག་སྦྱིན། གང་གསུང་མི་ཤིགས་ནཱ་དའི་སྒྲ་དབྱངས་ཀྱིས་ཟབ་པ་དང་རྒྱ་ཆེ་བའི་ཞི་བསིལ་གྱི་བདུད་རྩི་རྒྱུན་ཆད་མེད་པ་སྩོལ་བའི་རྟེན་འབྱུང་དུ་མདོ་སྡེ་བསྐལ་པ་བཟང་པོའི་པུསྟ་ཀཿ གང་ཐུགས་རྡུལ་དང་ཤེས་བྱའི་ཡུལ་ལས་འདས་པའི་ཡེ་ཤེས་ཆེན་པོའི་ཐིག་ལེར་རྒྱུ་དང་མི་རྒྱུའི་དངོས་པོ་ཐམས་ཅད་གཅིག་ཏུ་བསྡམས་པའི་བརྡར་བཀའ་གདམས་མཆོད་རྟེན་པད་སྤུངས་རྙིང་མ། ཞེས་པ་ལ་སོགས་པའི་འབུལ་ཚན་རྣམས་རིམ་པར་བཀོད་པའི་མཐར། སླར་ཡང་ཛམ་བུའི་ལྗོན་པས་ཉེ་བར་མཚན་པའི་ལྗོངས་འདིར་ཕྲིན་ལས་ཀྱི་འཇུག་པ་དཀར་འཇམ་ཡུག་གཅིག་ཏུ་བརྡལ་བའི་རྟེན་འབྱུང་དུ་མཐའ་རྟེན་རས་དཀར་ཡུག་བཅས་རྣམ་གྲངས་བརྒྱ་ཕྲག་གསུམ་ལ་ཉག་མ་གསུམ་གྱི་ལྷག་པ་འབུལ་ལམ་ཞུས་པས་བརྩེ་ཆེན་ཡེ་ཤེས་ཀྱི་གཟིགས་པས་རྗེས་སུ་དགོངས་ཏེ་ཉེ་བར་བཞེས་པ་དང་། གུས་ལྡན་པ་ཁོ་བོ་ཅག་གིས་མཚོན་མཐའ་ཀླས་པའི་འགྲོ་བ་ཀུན་གྱི་ཆེད་དུ་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ་ངེས་པ་ལྔ་ལྡན་གྱི་རང་བཞིན་ཆེན་པོར་འཚོ་ཞིང་གཞེས་ལ་ཆོས་ཀྱང་སྟོན་པ་ནས། བྱང་ཆུབ་སྙིང་པོའི་བར་དུ་ཐུགས་རྗེའི་ཕྱག་གིས་མི་འདོར་བ་གསོལ་བ་འདེབས་པ་ལགས། ཞེས་པ་ལྟ་བུ་རྒྱས་བསྡུས་སྐབས་དང་སྦྱར་ཏེ་བཀོད་པའི་མཐར། སྔར་སྨོས་པའི་རྟེན་བཞུགས་གང་འོས་སམ། ཡང་ན། སླར་ཡང་སྨྲས་པ། གཟུང་འཛིན་རྩ་ཡི་མདུད་པ་ཇི་སྙེད་རྡོ་རྗེ་དྡྷཱུ་ཏིར་བསྡམས་པའི་སྐུ། །ཟླ་ཉིའི་རྒྱུ་བ་སྒྲ་གཅན་གྱིས་ཟོས་བྱེད་རྩོལ་བརྗོད་པ་བྲལ་བའི་གསུང་། །ཤེས་དང་ཤེས་བྱ་རོ་གཅིག་ཉིད་གྱུར་འོད་གསལ་རྣམ་ཀུན་མཆོག་ལྡན་ཐུགས། །མི་ཟད་རྒྱན་གྱི་འཁོར་ལོའི་རོལ་མོ་བསྐལ་པ་རྒྱ་མཚོར་འབར་གྱུར་ཅིག །ཚད་མེད་སྙིང་རྗེའི་ཐུར་མ་བརྒྱས་བཏེགས་བྱིན་རླབས་གདུགས་དཀར་གཡོ་བའི་གྲིབ། །བདག་སོགས་སྲིད་པའི་ཚ་གདུང་གིས་ཉེན་བྱང་ཆུབ་བར་དུ་དབུགས་དབྱུང་བས། །ཕན་བདེའི་ངལ་བསོ་ཅི་ཡང་ཐོབ་ལས་བསྐལ་བཟང་ཨུཏྤལ་དར་བབས་པའི། །རྨད་བྱུང་མཚར་སྡུག་ཆོ་ག་རྫོགས་པས་ཡིད་སྲུབས་དཔུང་བཅས་འཆིང་བར་མཛོད། །གང་ཞིག་སྐྱབས་སུ་ཐོབ་པ་ཙམ་ནས་གནས་སྐབས་མཐར་ཐུག་བསམ་པའི་དངོས། །ཡིད་བཞིན་འཇོ་བའི་དགའ་སྟོན་སྦྱིན་ལ་ནོར་བུའི་རེག་བྱས་མཚོན་མིན་པའི། །མཆོག་གསུམ་རྒྱ་མཚོ་འདུས་པའི་ཞལ་སྐྱིན་མགོན་པོ་ཁྱོད་ཀྱི་ཐུགས་རྗེ་ཡི། །ཕུན་ཚོགས་བཀྲ་ཤིས་སྣང་བ་གསར་པས་སྲིད་ཞིའི་ཁམས་ཀུན་མཛེས་གྱུར་ཅིག །ཛ་ཡ་ཛ་ཡ་སུ་ཛ་ཡ་སརྦ་ཤྲེ་ཡོ་བྷ་བནྟུ། །ཞེས་སམ། གང་ཞིག་སྲིད་དང་ཞི་བའི་ཡོན་ཏན་གྱིས། །ཡོངས་སུ་གཏམས་པའི་གསང་བ་མི་ཟད་པ། །མགོན་ཁྱོད་འཆི་མེད་གྲུབ་པའི་ཁྲི་འཕང་དུ། །རྟག་པ་རྒྱུན་གྱི་འཁོར་ལོར་འཚོ་གཞེས་ཤིང་། །བདག་སོགས་མོས་པའི་ཡིད་ཅན་རྡུལ་སྙེད་ཀུན། །རྣམ་གྲོལ་ཐར་པའི་གོ་འཕང་ལ་བཀོད་པའི། །ཞི་བསིལ་བདུད་རྩིའི་གྲུ་ཆར་དབབ་པ་དང་། །ལྷན་ཅིག་བྱང་ཆུབ་བར་དུ་རྗེས་སུ་ཟུངས། །གང་ཞིག་བསྟེན་ན་འཕྲལ་ཡུན་དགེ་ལེགས་ཀྱི། །འདོད་དགུ་གཅིག་ཆར་འཇོ་བའི་མ་ཎི་ཀཿ མཆོག་གསུམ་བཀྲ་ཤིས་ཉིན་མོའི་སྣང་བ་ཡིས། །བྲན་ལས་དོན་གཉིས་པདྨོར་ཛུམ་གྱུར་ཅིག །སརྦ་དཱ་སུ་ཤྲེ་ཡོ་དཱི་པཾ་བྷ་བནྟུ། ཞེས་སམ། ཡེ་ཤེས་མེ་དཔུང་འབར་བའི་མདའ་གཅིག་གིས། །ཚུལ་མིན་ཡིད་སྲུབས་སྡེར་བཅས་བསྲེགས་ནས་སླར། །འགྲོ་འདིའི་བསོད་ནམས་མཆོད་སྡོང་དམ་པ་རུ། །ཞབས་སེན་ནོར་བུའི་བ་གམ་རྟག་བརྟན་ཅིང་། །འདི་ན་གུས་པའི་སྐལ་བཟང་པད་དཀར་གྱིས། །ཉེ་བར་མཚན་པའི་ཡིད་ཅན་མཐའ་དག་ཀྱང་། །ཐུགས་རྗེའི་དཔྱིད་དཔལ་དར་བས་བསྲུང་བ་ལ། །དོན་གཉིས་མཚར་སྡུག་རྫོགས་པའི་བཀའ་དྲིན་སྩོལ། གང་ཞིག་མཚན་ཙམ་ཐོས་པའི་ཟླ་བས་ཀྱང་། །དགེ་མཚན་སྣང་བ་སྟེར་ལ་མི་ངལ་བའི། །མཆོག་གསུམ་བཀྲ་ཤིས་གྲུབ་པའི་ཆོ་ག་ཡིས། །ལྷར་བཅས་དགའ་བའི་དགའ་སྟོན་རྒྱས་གྱུར་ཅིག །སརྦ་དཱ་ལཀྵྨཱི་ཀ་ལྱཱ་ཎཾ་ཤུ་བྷ་ལཀྵྨ་པ་རི་བརྡྷ་ཀུརྦནྟུ། ཞེས་སམ། བགྲངས་ཡས་བསྐལ་པར་གོམས་པའི་བྱང་ཆུབ་སེམས། །གཞན་ཕྱིར་བརྩོན་པ་རྨད་བྱུང་གིས་བསྐྲུན་པའི། །གསང་གསུམ་རྟག་པ་རྒྱུན་གྱི་འཁོར་ལོ་རུ། །མི་ཤིགས་རྡོ་རྗེའི་ཆོས་སུ་ཞབས་བརྟན་ཅིང་། །རྨད་བྱུང་ཐུགས་རྗེའི་འོད་རིས་སར་པ་ཡིས། །རྨོངས་པར་གྱུར་པ་རྣམས་ལ་མིག་བྱིན་ནས། །གང་འདུལ་ཐར་པའི་ལམ་མཆོག་སྟོན་པ་ཡི། །དེད་དཔོན་མཚུངས་མེད་དེ་ནི་ཁྱོད་ཀྱིས་མཛོད། །འདི་ན་གུས་པའི་ཡིད་མཁར་འཕོས་ཙམ་གྱིས། །ངེས་ལེགས་གོ་འཕང་རྩེ་མོར་འགོད་མཛད་པའི། །སྐྱབས་གསུམ་བཀྲ་ཤིས་དཔག་བསམ་དབང་པོ་ཡིས། །ལྷར་བཅས་དགེ་མཚན་བསིལ་བ་སྦྱིན་གྱུར་ཅིག །སརྦ་དཱ་དི་གི་ཀཱ་ལ་སུ་ཤུ་བྷ་སྱ་དཱི་པཾ་རོ་ཙནྟུ། ཞེས་སམ། རྒྱལ་བ་ཀུན་དངོས་མགོན་ཁྱོད་ནི། །དམ་ཆོས་མཐའ་ཀླས་ཡོངས་ཀྱི་སྣོད། །དེ་སླད་འཕགས་ཚོགས་རྒྱ་མཚོ་ཡི། །སྤྱི་ཏོར་རྩེ་མོར་ཞབས་བརྟན་ཞིང་། །རྨད་བྱུང་ཐུགས་རྗེའི་རིན་ཆེན་དབྱིག །ཕྱོགས་ལྷུང་བྲལ་བར་སྦྱིན་པ་ཡིས། །སྲིད་གསུམ་ཕན་བདེའི་དགའ་སྟོན་ལ། །ངོམས་མེད་ལོངས་སུ་སྤྱོད་པར་མཛོད། །གང་ལ་བརྟེན་ནས་མི་བསླུ་བའི། །མཆོག་གསུམ་བཀྲ་ཤིས་གདུགས་དཀར་པོའི། །དགེ་མཚན་གྲིབ་མ་སྣུམ་པོ་རུ། །ལྷར་བཅས་དགའ་སྟོན་འཕེལ་གྱུར་ཅིག །སརྦ་དཱ་མང་ག་ལཾ་བྷཱུ་ཡ྄ཏ། ཞེས་པ་ལྟ་བུ་སྐབས་དང་བསྟུན་སྟེ་ཇི་ལྟར་འོས་པ་དག་སྦྱར་བར་བྱའོ། ། ༈

[edit]

khri 'don mnga' gsol lta bu'i legs 'bul gyi tshe/ khri 'don mnga' gsol lta bu'i legs 'bul gyi tshe/__gong rgyan dang 'bebs zhus sogs snga ma rnams las blangs pa'am/__yang na/__shrI bi dza yan+tu/__dge mtshan bye ba phrag brgyas mngon gtams yon tan yid bzhin 'byung gnas che/__/dran pa tsam gyis rmongs pa'i 'jigs 'phrog zhi bsil bdud rtsi sbyin pa la/__/grags pa'i rnga yab tha grur g.yo bar yid can rgya mtsho'i dpal gyur pa'i/__/zhabs sen srid zhi'i thod kos btud byas nor bu'i ba gam g.yo ba'i drung /__/zhes sam/__shrI swasti sid+d+han+tu/__tshangs sogs che dgu'i 'dar ldan thor tshugs kyis/__/zhabs sen nor bu'i me long phyis pa'i ngogs/__/rmad byung dge mtshan brgya phrag snang ba'i dpyid/__/phyogs las rnam par rgyal ba'i nye drung du/__/zhes sam/__shrI dzI ban+tu/__/dpal ldan rgyal ba sras bcas thugs rje'i gar/__/ye shes phung por mngon par snang ba'i gzugs/__/lhar bcas kun gyi gtsug gis nyer bsten pa'i/__/zhabs stegs pad+mo sar pa'i nye drung du/__/zhes sam/__oM swasti kurban+tu/__gzod nas rtag pa dam pa'i chos nyid la/__/shin tu brtse ba'i phyag gis nyer 'khyud kyang /__/snying rje'i sgyu 'phrul rol mo mi 'gog pa'i/__/zhabs pad gdong lngas bsten pa ga la bar/__/zhes sam/__swasti bi dza yan+tu/__rdul bral chos dbyings chu gter che/__/snying rje'i sa brtol gyis bsrubs pas/__/mtshan dpe'i zla shel dar babs pa'i/__/zhabs stegs lha brgya'i cod pan drung /__/zhes pa lta bu'i 'bebs 'og nas/__/'di na tshangs dbang gtsug gi rin chen rnam par bzhu ba'i dogs pa can/__/sprin sngon chun po'i gom stabs mthong tshe mdongs mtha' dga' ba'i zlos gar ltar/__/bskal mang bsod nams zong gis nyer thob khyod zhabs legs byas do ker rtser/__/mngon par dbang bskur shis pa bsgrubs tshe dad spro'i brjod pa 'di skad dbye/__/zhes sam/__rdul snyed lus kyi chu ba ldems pa'i phang /__/sor bcu'i me tog spyi bor zlum dang bcas/__/rnam gsum dad pa'i sbrang rtsi'i brtul zhugs can/__/gang de'i mgrin pa'i rdza rnga 'di skad 'khrol/__/zhes sam/__bsngags 'os yon tan yi ge'i do shal gyis/__/phyogs kyi bu mo'i 'gram par rgyan mthong bas/__/mi phyed dad gus mgrin pa mthor btegs nas/__/dge legs shis pa'i brjod pa 'di skad glengs/__/zhes sam/__mi phyed gus pa'i zla zer gyis reg pas/__/ngag tshig ku mud dgod pa'i 'dzum dkar las/__/zhu gsol sbrang rtsi'i dogs pa g.yo dang bcas/__/ye shes gzigs pa'i 'babs stegs mdzes par bya/__/zhes sam/__ji ltar nyin mo'i thigs pa yis/__/nye bar phye ba'i pad+mo bzhin/__/dad gsum mchu sgros g.yo ba las/__/zhu gsol gus pa'i rgyud mangs 'khrol/__/zhes sogs gang 'os kyi mthar/__log rtog ra ris gzhar yang ring btang skal bzang dad pa'i me long du/__/rmad byung dam pa'i yon tan gzugs brnyan 'gog pa med pa rgyu ba yis/__/grags snyan 'bigs byed rlung gi rtse dgas lhar bcas srid pa'i khams 'di yang /__/dge mtshan snang ba brgya phrag 'bar bzhin phan bde'i sim pa cir yang thob/__/de tshe mtshan bzang mig gi bdud rtsi ngo mtshar snang ba lham me bas/__/bral smin lam bden rgyal rnga brdungs nas 'gro rnams thar pa'i sar bkod cing /__/ye shes phung po gzhal du med pa gting mtha' bral bar snyoms 'jug pa'i/__/rnam thar mtha' klas tshangs pa'i blos kyang rdzogs par 'dren pa'i go skabs ci/__/khyad par srid zhi'i thor tshugs kyis dud chos kyi rgyal thabs chen po la/__/zhabs mthil 'khor lo'i re khA bkod tshe sras bcas 'dren pa thams cad kyang /__/bsngags pa'i me tog chal chil bsnyil bas phyogs kyi khor yug dkrigs gyur na/__/legs bris bcas pa'i yid can su zhig gus pa'i thal mo sbyor mi byed/__/de slad byang chub snying po'i bar du thugs rje'i brlan gyis mi btang phyir/__/mi phyed dad gsum ga bur rdul gyis yid rab myos pa'i ku mud dAs/__/yid sprul maN+Dal rgya cher bkod pas ye shes gzigs pa mdzes byas te/__/dngos 'byor mchod sprin sbrang rtsi'i thig pa cung zad g.yo bas bsnyen bkur bgyi/__/zhes sam/__mgon khyod gzod nas grub pa'i rgyal thabs cher/__/rnam grol sku bzhi'i rin chen sngon brnyes kyang /__/yid can srid pa'i chu gter las gdon phyir/__/rmad byung thugs rje'i sgyu 'phrul ci yang ston/__/khyad par deng 'dir mtshan bzang chu shel dbang /__/mos ldan yid mkhar shar ba'i de ma thag__/yon tan bdud rtsi'i do shal brgya phrag gi__/snang ba dam pas 'jig rten mdzes par byas/__/de tshe zhabs sen ban+d+hu dzI ba ka__/rnam grol chos kyi khri la mnga' gsol bar/__/dad spro'i dga' ston nyung ngu'i me tog gis/__/skal pa bzang po'i shis pa deng 'dir bsgrubs/__/zhes sam/__gang khyod tshogs zung brgya byin sor rtse yis/__/rnam par bris pa'i mtshan bzang ri dwags kyis/__/nyer 'khyud byin rlabs bdud rtsi'i 'od snang can/__/skal bzang mos pa'i ri dbang rtse mor 'dzegs/__/khyad par rigs las thob pa'i bsngags 'os kyis/__/rnam thar ri mo bsub tu med pa gang /__/dad gsum bzhin gyi snod du 'char ba'i mod/__/sngon med ngo mtshar ltad mor ring zhig g.yengs/__/de tshe legs bris gdengs can bdag po sogs/__/che dgu'i ral khur snum pos brlings byas pa'i/__/chos kyi rgyal thabs chen por dbang bskur bas/__/dge legs shis pa'i mchod sprin cung zad stob/__/ces sam/__'di na byang chub snying po'i bdud rtsi'i bcud/__/bla med thar pa'i srog tu song ba las/__/rdo rje'i rnal 'byor yongs su grub pa'i dpyid/__/gzhan la phan pa'i gar du zlos pa gang /__/ji ltar 'dam las skyes pa'i pad+mo yang /__/dag pa'i kha dog brgya phrag 'chang ba ltar/__/srid par rjes su chags pa'i sgyu thabs kyis/__/bral smin yon tan mtha' dag bdag gir mdzad/__/de tshe sras dang bcas pa'i rgyal kun gyis/__/rmad byung chos kyi khri la mnga' gsol ba'i/__/dge mtshan shis pa'i snang ba 'byams klas par/__/dad spro'i mchod sprin phra mo'i dga' ston stob/__/ces sam/__mgon khyod gzod nas rnam grol ba'i/__/ye shes pha rol phyin brnyes kyang /__/thabs mkhas mdzad pa'i gzhan dbang gis/__/ngo mtshar zlos gar ci yang ston/__/khyad par deng 'dir mos ldan gyis/__/yid la bdud rtsi'i dpal ster ba'i/__/mtshan dpe'i dkyil 'khor snang ba dang /__/mnyam du bsngags 'os cha shas rdzogs/__/de slad srid na mngon mtho ba'i/__/chos kyi rgyal thabs la 'dzegs tshe/__/shis pa'i sgo 'phar dbye ba'i phyir/__/dad spro'i maN+Dal stob la phyogs/__/zhes pa lta bus mtshon ji ltar rigs pa sngon du 'gro bas/__de ltar tshangs pa'i sras mo'i rgyud mangs la cung zad reg pa'i brjod pa nyung ngus mdun bsus te/__skabs su babs pa'i gleng par bya ba ni/__'di ltar lha dang bcas pa'i 'gro ba kun gyi/__rten dang /__gling dang /__dpung gnyen gcig pur gyur pa'i skyob pa khyod ni/__/thog ma ma mchis pa'i dus nas zad pa dang mi skye shes pa'i ye shes kyi bdud rtsis thugs kyi dpal be'u yongs su gtams te/__byang chub snying po'i go 'phang phun sum tshogs pa brnyes su zin kyang /__smon lam dang snying rje'i 'phen pa kho nas yang srid kun tu thabs mkhas kyi spyod pa mtha' klas pas yid can thams cad mngon mtho dang nges legs kyi lam la dkri bar mdzad pa las/__deng gi char dge zhing shis pa'i legs byas kyi sgo 'phar brgya phrag tu dbye ba'i skabs 'dir/__rje btsun bla ma dam pa rim par byon pa rnams kyis byin gyis brlabs pa'i chos kyi khri mi 'jigs bzhi dang ldan pa'i 'phrog byed kyi dbang po dregs pas bsgyings pa'i do ker gyi rtse la zhabs sen gyi pad+mo bkod pas yid srubs kyi dpung tshogs sde dang bcas pa'i phyogs las rnam par rgyal ba'i gdan srid rtser bsgrengs ba dang chab cig__/phyogs bcu dus bzhi'i rnam 'dren sras dang bcas pa rnams kyi legs so'i bsngags brjod me tog man+dA ra'i do shal du g.yo bas dbugs dbyung zhing /__mnga' gsol te/__gang zhig legs bris kyi dbang po dang /__gdengs can gyi bdag po dang /__nor 'dzin yangs pa'i khyon la stobs kyi 'khor los sgyur ba rnams kyis mtshon mchog dman bar ma'i yid can rgya mtsho'i rdul rnyed kyi bslu ba med pa'i skyabs su nges pa rnyed pas yid drangs te/__zhabs sen gyi nor bu spyi bor bsnyen nas gnas skabs dang mthar thug gi phan bde'i dga' ston gtan pa med par longs su spyad pa'i bka' drin dang ngo mtshar ni so so skye bo'i blo yi ra ba las ring du brgal ba'i phyir stong gsum baiDUR+Yas bskangs kyang gzhal bar lta ga la/__/de lta na'ang dngos po'i bdog pa cung zad 'dis mtshon rang gzhan gyi rgyud na dus gsum du bsags pa'i lus longs spyod dge ba'i rtsa ba dang bcas pa 'phags pa kun tu bzang po'i mchod sprin du dad pas sprul te 'bul ba'i maN+Dal mtshon byed du/__thog mar dri ma med pa'i snying rje chen po'i 'jug pas gzhan la phan par dgongs pa'i thugs bskyed yal bar mi 'dor ba'i rten 'byung du lha rdzas kyi was+t+ra zla ba zhun ma'i mdog can dkyus su ring ba/__gang sku mtshan dpe'i phung po zhing khams 'di kho na las g.yo ba med par bskal pa rgya mtshor brtan par bzhugs pa'i dge mtshan du rgyal ba tshe mtha' yas pa'i sku brnyan 'chi med mchog sbyin/__gang gsung mi shigs nA da'i sgra dbyangs kyis zab pa dang rgya che ba'i zhi bsil gyi bdud rtsi rgyun chad med pa stsol ba'i rten 'byung du mdo sde bskal pa bzang po'i pusta kaH__gang thugs rdul dang shes bya'i yul las 'das pa'i ye shes chen po'i thig ler rgyu dang mi rgyu'i dngos po thams cad gcig tu bsdams pa'i brdar bka' gdams mchod rten pad spungs rnying ma/__zhes pa la sogs pa'i 'bul tshan rnams rim par bkod pa'i mthar/__slar yang dzam bu'i ljon pas nye bar mtshan pa'i ljongs 'dir phrin las kyi 'jug pa dkar 'jam yug gcig tu brdal ba'i rten 'byung du mtha' rten ras dkar yug bcas rnam grangs brgya phrag gsum la nyag ma gsum gyi lhag pa 'bul lam zhus pas brtse chen ye shes kyi gzigs pas rjes su dgongs te nye bar bzhes pa dang /__gus ldan pa kho bo cag gis mtshon mtha' klas pa'i 'gro ba kun gyi ched du sku gsung thugs mi zad pa rgyan gyi 'khor lo nges pa lnga ldan gyi rang bzhin chen por 'tsho zhing gzhes la chos kyang ston pa nas/__byang chub snying po'i bar du thugs rje'i phyag gis mi 'dor ba gsol ba 'debs pa lags/__zhes pa lta bu rgyas bsdus skabs dang sbyar te bkod pa'i mthar/__sngar smos pa'i rten bzhugs gang 'os sam/__yang na/__slar yang smras pa/__gzung 'dzin rtsa yi mdud pa ji snyed rdo rje d+d+hU tir bsdams pa'i sku/__/zla nyi'i rgyu ba sgra gcan gyis zos byed rtsol brjod pa bral ba'i gsung /__/shes dang shes bya ro gcig nyid gyur 'od gsal rnam kun mchog ldan thugs/__/mi zad rgyan gyi 'khor lo'i rol mo bskal pa rgya mtshor 'bar gyur cig__/tshad med snying rje'i thur ma brgyas btegs byin rlabs gdugs dkar g.yo ba'i grib/__/bdag sogs srid pa'i tsha gdung gis nyen byang chub bar du dbugs dbyung bas/__/phan bde'i ngal bso ci yang thob las bskal bzang ut+pal dar babs pa'i/__/rmad byung mtshar sdug cho ga rdzogs pas yid srubs dpung bcas 'ching bar mdzod/__/gang zhig skyabs su thob pa tsam nas gnas skabs mthar thug bsam pa'i dngos/__/yid bzhin 'jo ba'i dga' ston sbyin la nor bu'i reg byas mtshon min pa'i/__/mchog gsum rgya mtsho 'dus pa'i zhal skyin mgon po khyod kyi thugs rje yi/__/phun tshogs bkra shis snang ba gsar pas srid zhi'i khams kun mdzes gyur cig__/dza ya dza ya su dza ya sarba shre yo b+ha ban+tu/__/zhes sam/__gang zhig srid dang zhi ba'i yon tan gyis/__/yongs su gtams pa'i gsang ba mi zad pa/__/mgon khyod 'chi med grub pa'i khri 'phang du/__/rtag pa rgyun gyi 'khor lor 'tsho gzhes shing /__/bdag sogs mos pa'i yid can rdul snyed kun/__/rnam grol thar pa'i go 'phang la bkod pa'i/__/zhi bsil bdud rtsi'i gru char dbab pa dang /__/lhan cig byang chub bar du rjes su zungs/__/gang zhig bsten na 'phral yun dge legs kyi/__/'dod dgu gcig char 'jo ba'i ma Ni kaH__mchog gsum bkra shis nyin mo'i snang ba yis/__/bran las don gnyis pad+mor dzum gyur cig__/sarba dA su shre yo dI paM b+ha ban+tu/__zhes sam/__ye shes me dpung 'bar ba'i mda' gcig gis/__/tshul min yid srubs sder bcas bsregs nas slar/__/'gro 'di'i bsod nams mchod sdong dam pa ru/__/zhabs sen nor bu'i ba gam rtag brtan cing /__/'di na gus pa'i skal bzang pad dkar gyis/__/nye bar mtshan pa'i yid can mtha' dag kyang /__/thugs rje'i dpyid dpal dar bas bsrung ba la/__/don gnyis mtshar sdug rdzogs pa'i bka' drin stsol/__gang zhig mtshan tsam thos pa'i zla bas kyang /__/dge mtshan snang ba ster la mi ngal ba'i/__/mchog gsum bkra shis grub pa'i cho ga yis/__/lhar bcas dga' ba'i dga' ston rgyas gyur cig__/sarba dA lak+Sh+mI ka l+yA NaM shu b+ha lak+Sh+ma pa ri bar+d+ha kurban+tu/__zhes sam/__bgrangs yas bskal par goms pa'i byang chub sems/__/gzhan phyir brtson pa rmad byung gis bskrun pa'i/__/gsang gsum rtag pa rgyun gyi 'khor lo ru/__/mi shigs rdo rje'i chos su zhabs brtan cing /__/rmad byung thugs rje'i 'od ris sar pa yis/__/rmongs par gyur pa rnams la mig byin nas/__/gang 'dul thar pa'i lam mchog ston pa yi/__/ded dpon mtshungs med de ni khyod kyis mdzod/__/'di na gus pa'i yid mkhar 'phos tsam gyis/__/nges legs go 'phang rtse mor 'god mdzad pa'i/__/skyabs gsum bkra shis dpag bsam dbang po yis/__/lhar bcas dge mtshan bsil ba sbyin gyur cig__/sarba dA di gi kA la su shu b+ha s+ya dI paM ro tsan+tu/__zhes sam/__rgyal ba kun dngos mgon khyod ni/__/dam chos mtha' klas yongs kyi snod/__/de slad 'phags tshogs rgya mtsho yi/__/spyi tor rtse mor zhabs brtan zhing /__/rmad byung thugs rje'i rin chen dbyig__/phyogs lhung bral bar sbyin pa yis/__/srid gsum phan bde'i dga' ston la/__/ngoms med longs su spyod par mdzod/__/gang la brten nas mi bslu ba'i/__/mchog gsum bkra shis gdugs dkar po'i/__/dge mtshan grib ma snum po ru/__/lhar bcas dga' ston 'phel gyur cig__/sarba dA mang ga laM b+hU ya?ta/__zhes pa lta bu skabs dang bstun ste ji ltar 'os pa dag sbyar bar bya'o/____/_!_