JKW-KABUM-11-DA-001-005

🚧 This website is under continued development. We appreciate your patience!

Previous Text Back to Volume PageNext Text

Wylie title	theg pa chen po'i blo sbyong thun brgyad ma
Location	mkhyen brtse'i bka' 'bum Volume 11, sde tshan 1, Text 5, Pages 40-60 (Folios 20b1 to 30b2)
Author	ཁམས་ལུང་པ་ཤཱཀྱ་ཡོན་ཏན་
Less details More details
Source Author(s)	འབྲོམ་སྟོན་པ་ ('brom ston pa)
Citation	Khams lung pa shAkya yon tan. theg pa chen po'i blo sbyong thun brgyad ma. In 'jam dbyangs mkhyen brtse'i dbang po'i bka' 'bum, Vol. 11: 40-60. Khams sde dge rdzong sar dgon: Rdzong sar blo gros phun tshogs, 2020.
Genre	Mind Training Texts - blo sbyong  ·  Pith Instructions - man ngag
DNZ	In the Damngak Dzö: https://dnz.tsadra.org/index.php/Wylie:Blo_sbyong_thun_brgyad_ma_lags_so

1 Texts in this Section (sde tshan or chos tshan)

5 40-60	ཐེག་པ་ཆེན་པོའི་བློ་སྦྱོང་ཐུན་བརྒྱད་མ། theg pa chen po'i blo sbyong thun brgyad ma Mind Training Texts - blo sbyong   ·   Pith Instructions - man ngag	Text page View PDF
	ཁམས་ལུང་པ་ཤཱཀྱ་ཡོན་ཏན་ (khams lung pa shAkya yon tan)

Tibetan Text

Wylie

[edit]

༄༅། །ཐེག་པ་ཆེན་པོའི་བློ་སྦྱོང་ཐུན་བརྒྱད་མ་བཞུགས་སོ། །ཐེག་ཆེན་དགེ་བའི་བཤེས་གཉེན་ལ་ཕྱག་འཚལ་ལོ། །སྤྱིར་ཇོ་བོ་ལ་སྔགས་ཕ་རོལ་ཏུ་ཕྱིན་པ་གསན་པའི་བླ་མ་བདུན་བཅུ་རྩ་གཉིས་ཡོད། ཁྱད་པར་གྱིས་ཀྱང་བྱང་ཆུབ་ཀྱི་སེམས་སྟོན་པའི་བླ་མ་གསུམ་ཡོད། བྱམས་པའི་རྣལ་འབྱོར་པ། དྷརྨཱ་རཀྵིཏ། གསེར་གླིང་པ་གསུམ་ཡིན་གསུངས། དེ་རྣམས་ཀྱི་ནང་ནས་ཀྱང་བླ་མ་གསེར་གླིང་པ་ལ་གུས་པའི་རྒྱུ་མཚན། བླ་མ་གཞན་ལ་གདུང་ཁང་མེད་དེ། གསེར་གླིང་པ་ལ་གདུང་ཁང་དངུལ་གདུགས་ཅན་ཡོད། བླ་མ་གཞན་ལ་ཟླ་མཆོད་མེད་དེ། གསེར་གླིང་པ་ལ་ཟླ་མཆོད་ཡོད། བླ་མ་གཞན་མཚན་ཐོས་པ་ཙམ་གྱིས་ཐལ་མོ་ཐུགས་ཁར་སྦྱར་ཏེ། མཉམ་མེད་གསེར་གླིང་པའི་མཚན་ཐོས་ཙ་ན་ཐལ་མོ་སྤྱི་བོར་སྦྱོར། བླ་མ་གཞན་དྲན་ཀྱང་སྤྱན་ཆབ་མི་འོང་སྟེ། བླ་མ་གསེར་གླིང་པ་དྲན་ཙམ་སྤྱན་ཆབ་ཡོང་སྐད། ཨ་ཏི་ཤ་ལ་བླ་མ་མང་དུ་ཡོད་པ་ལ་གསེར་གླིང་པ་ལ་དེ་ཙམ་གུས་པའི་རྒྱུ་མཚན་ཅི་ལགས་ཞུས་པ། ཇོ་བོའི་ཞལ་ནས། བདག་གཞན་བརྗེ་བའི་བྱང་ཆུབ་ཀྱི་སེམས་འདི་བླ་མ་གསེར་གླིང་པ་མིན་པ་ལ་མ་བྱུང་བ་ཡིན་གསུངས། བླ་མ་གསེར་གླིང་པ་དེས་བརྒྱུད་པའི་དབང་དུ་བྱས་ན། ཡང་དག་པར་རྫོགས་པའི་སངས་རྒྱས། རྗེ་བཙུན་བྱམས་པ། ཐོགས་མེད། དབྱིག་གཉེན། འཕགས་པ་རྣམ་གྲོལ་སྡེ། བཙུན་པ་གྲོལ་སྡེ། དེས་མཆོག་གི་སྡེ། དེས་འདུལ་བའི་སྡེ། དེས་མཁན་པོ་ཡང་དག་རྣམ་པར་སྣང་མཛད། དེས་སེང་གེ་བཟང་པོ། །དེས་རིན་ཆེན་མདོ། །དེས་བླ་མ་གསེར་གླིང་པ། དེས་དཔལ་ལྡན་ཨ་ཏི་ཤ །དེས་དགེ་བཤེས་སྟོན་པ། དེས་སྐུ་མཆེད་གསུམ། ཁྱད་པར་དུ་སྤྱན་སྔ་བ་ལ་གནང་། དེས་གླང་ཐང་པ་དང་། ཤ་ཕོ་སྒང་པ་གཉིས་ལ། གླང་ཐང་པས་ཞང་ཞུང་དང་ལུ་གུར་གཉིས་ལ། དེ་གཉིས་ཀྱི་ཕྱིས་ཇོ་བོ་ལ། དེས་ལུང་ནང་བ་མཁན་པོ་རིན་པོ་ཆེ། དེས་སློབ་དཔོན་བྲག་སྟོན་ཤེས་རབ་རིན་པོ་ཆེ་བསྟན་པའི་བདག་པོ་སློབ་དཔོན་གཞོན་ནུ་བསམ་གཏན། དེས་བུདྡྷ་རཏྣ། དེས་ཀིརྟི་ཤཱི་ལ། དེས་རྒྱལ་བའི་མཚན་ཅན། དེས་པུཎྱ་རཏྣ། དེས་གཞོན་ནུ་རྒྱལ་མཆོག །དེ་ཡན་ཆད་བླ་མ་བརྒྱུད་པའི་རིམ་པ་ཡིན་ཏེ། དེ་རྣམས་ཆོས་འདི་ལ་བརྟེན་ནས་གྲུབ་པ་ཐོབ། རྟོགས་པ་ཁྱད་པར་ཅན་འཁྲུངས་པ་ཡིན་གསུངས། ཐེག་པ་ཆེན་པོ་བློ་སྦྱོང་ཞེས་བྱ་བ་སྤྱིར་དུ་ཡང་བཀའ་སྡེ་སྣོད་ཀྱི་ཆོས་ཐམས་ཅད་ནས་གསུངས། ཁྱད་པར་གྱིས་ཀྱང་བྱང་ཆུབ་སེམས་དཔའི་སྤྱོད་པ་ལ་འཇུག་པའི་བསམ་གཏན་ལེའུ་ནས། བདག་ཉིད་སྐྱོན་བཅས་གཞན་ལ་ཡང་། །ཡོན་ཏན་རྒྱ་མཚོར་ཤེས་བྱས་ནས། །བདག་འཛིན་ཡོངས་སུ་དོར་བ་དང་། །གཞན་སླང་བ་ཡང་བསྒོམ་པར་བྱ། །ཞེས་གསུངས། དེ་ལ་སོགས་པའི་ཚིགས་སུ་བཅད་པ་དེ་རྣམས་ཀྱི་དོན་གོ་ཧྲིལ་གྱིས་དྲིལ་བ་ལ་སྤྱིར་འཁོར་བར་འཁྱམས་པར་བྱེད་པའི་རྒྱུ་ཉོན་མོངས་པ་བརྒྱད་ཁྲི་བཞི་སྟོང་། དེ་ཚུར་བསྡུ་ན་དྲུག །རྩ་བའི་ཉོན་མོངས་པའམ་ཉི་ཤུ་ཉེ་བའི་ཉོན་མོངས་པ། དེའི་རྩ་བ་བདག་ཏུ་འཛིན་པ་འདི་ཡིན་ཏེ་རང་བཞིན་གྲུབ་པ་མེད་པ་གཅིག་ལ། ང་བདག་ཏུ་བཟུང་ནས་འདིའི་ཁ་འཛིན་ཤག་འདེབས་བྱས་པས། ཚེ་འདི་ལ་དགེ་རྒྱུའི་ལས་མི་དགེ་བར་སོང་ནས། མི་དགེ་རྒྱུའི་ལས་སྡུག་བསྔལ་དུ་སོང་ནས་རང་ལ་རང་གིས་ཁ་འཛིན་ཤག་འདེབས་སྐྱར་བས་ལན། ད་འོག་མན་ཆད་དུ་ཡང་བདག་ཏུ་འཛིན་པ་འདི་མ་སྤངས་ན་དེ་ཁོ་ན་བཞིན་དུ་འཁྱམས་ནས་འདས་མ་འོངས་ད་ལྟ་དུས་གསུམ་དུ་སྡུག་ཏུ་འཇུག་མཁན་རང་གཅེས་པར་འཛིན་པའི་འགོང་བོ་ང་བདག་བྱ་བ་འདི་ཡིན་མིན་ལ་ཐེ་ཚོམ་མི་ཟ། འདིའི་ཁ་འཛིན་ཤག་འདེབས་བྱས་པས་ལན། མཐོང་བ་ཐོས་པ་ཡིད་ལ་འགྱུས་པ་རྣམས་ལག་ལེན་ལ་མ་བཏབ་པ་གཅིག་ཀྱང་མེད་དེ། འཁོར་བ་ལ་སྔར་འདྲེས་གང་ཡང་རིང་དུ་མ་སོང་བས་ད་ཡོད་གང་ལེགས་ཐོང་བྱུག་ལེགས་ལ་ཐོང་སྙམ་དུ་བྱས་ནས། རང་གཞན་དུ་ལོངས་ཐོང་། ལྷོད་དེ་ཀློད་ལ་ཐོང་། ཤིགས་ཀྱིས་བཤིག་ལ་ཐོང་། སེམས་ཅན་སྤྱིར་མི་ཡོང་བ་མིན། ཕ་མ་དྲིན་ཅན་ཤ་སྟག་ཡིན་པས་སེམས་ཅན་རྣམས་ཀྱི་རྒྱུའི་དུས་ཀྱི་སྡིག་པ། འབྲས་བུའི་དུས་ཀྱི་སྡུག་བསྔལ་ཀོ་བ་སྐྱི་གྲིས་བཞར་བ་བཞིན་དུ་བླངས་ནས་རང་གི་ལུས་པོ་འདིའི་སྟེང་དུ་ཧྲིལ་ཧྲིལ་སྨིན་པར་བསམ། རང་གི་བདེ་བ་དང་དགེ་བ་སེམས་ཅན་ལ་སྨིན་པར་བསམ། དེ་གཉིས་ཕར་ལོག་ཚུར་ལོག་ཏུ་བསྒོམ། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བ་ལ་ཡང་བློས་བླངས་ནས་སེམས་ཅན་ལ་སྨིན་པར་བསྒོམ། ཐེག་པ་ཆེན་པོའི་བློ་སྦྱོང་ཞེས་བྱ་བའི་གོ་དོན་དེ་ལྟ་བུ་གཅིག་ཡིན་གསུངས། མཁན་པོ་བའི་གསུང་ནས་བློ་སྦྱོང་ཞེས་བྱ་བ་བདག་ཁྱད་དུ་བསད་ནས་སེམས་ཅན་ལ་གུས། བདག་ཁྱད་དུ་བསད་པ་ཞེས་བྱ་བ་འཁོར་བ་ཐོག་མ་མེད་པ་ནས་སྡུག་ཏུ་འཇུག་མཁན་རང་གཅེས་པར་འཛིན་པའི་འགོང་པོ་ཡིན་པས། གཞི་འདི་བརླག་ན་ཡང་བརླག་གཞུག་གསུངས། དོན་དུ་མ་ལ་འཇུག་གསུངས། སེམས་ཅན་ལ་གུས་པར་བསྒོམ་པ་ནི་གཞན་ཁམས་གསུམ་འཁོར་བའི་སེམས་ཅན་འདི་རྣམས་སྤྱིར་མ་ཡིན། ཕ་མ་དྲིན་ཅན་ཤ་སྟག་ཡིན་པས་སེམས་ཅན་ལ་གུས་པར་བསྒོམ། ལུས་ངག་ཡིད་གསུམ་གྱི་ཞོ་ཤ་མི་བསྲི་བར་ཕན་འདོགས་གསུང་ངོ་། །དགེའོ།། །། ༈

ཟས་ལ་བརྟེན་པའི་བློ་སྦྱོང་བཞུགས་སོ། །ཡང་དགེ་བཤེས་སྟོན་པའི་གདམས་ངག་ལག་ལེན་དུ་བྱེད་ན། སྦྱིན་བདག་གི་བསོད་ནམས་ཀྱི་ཚོགས་རྫོགས་པའམ། གཞན་གྱིས་དད་ཟས་འཇུ་བར་བྱ་བའི་ཆེད་དུ་ཟས་ལ་བརྟེན་པའི་བློ་སྦྱོང་བགྱི་བ། སེམས་ཅན་གྱི་དོན་དུ་སངས་རྒྱས་ཐོབ་པར་བྱ། ཁྱད་པར་གྱིས་ཀྱང་རང་གི་ལུས་ལ་སྲིན་བུའི་རིགས་བརྒྱད་ཁྲི་བཞི་སྟོང་ཡོད་པས། དེ་རྣམས་ད་ལྟ་ཟང་ཟིང་གིས་སྡུད་ལ། མ་འོངས་པ་ན་ཆོས་ཀྱིས་སྡུད་སྙམ་དུ་བསམ། ཟས་ནང་དུ་མིད་པའི་དུས་སུ་སེམས་ཅན་རྣམས་ཀྱི་རྒྱུའི་དུས་ཀྱི་སྡིག་པ་འབྲས་བུའི་དུས་ཀྱི་སྡུག་བསྔལ་ཐམས་ཅད་ཀོ་བ་གྲིས་བཞར་བ་བཞིན་དུ་རང་གི་ལུས་འདིའི་སྟེང་དུ་ཧྲིལ་གྱིས་སྨིན་པར་བསྒོམ། དབུགས་ཕྱིར་རྒྱུ་བའི་དུས་སུ་རང་གི་བདེ་བ་དང་། དགེ་བ་སེམས་ཅན་ལ་སྨིན་པར་བསྒོམ། དེ་གཉིས་ཕར་ལོག་ཚུལ་ལོག་བསྒོམ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་དགེ་བའི་རྩ་བ་ཡང་བློས་བླངས་ནས་སེམས་ཅན་ལ་སྨིན་པར་བསྒོམ། དེ་ལྟར་སེམས་ཅན་རྣམས་ཀྱི་རྒྱུ་དུས་ཀྱི་སྡིག །འབྲས་བུའི་དུས་ཀྱི་སྡུག་བསྔལ་དང་བྲལ། བྱང་ཆུབ་མཆོག་ཏུ་ཐུགས་བསྐྱེད་ཚོགས་གཉིས་རྫོགས་ནས་སངས་རྒྱས་ཐོབ་པར་བསྒོམ། ཡང་རྒྱུའི་དུས་ཀྱི་སྡིག་པ། འབྲས་བུའི་དུས་ཀྱི་སྡུག་བསྔལ་དང་བྲལ། བྱང་ཆུབ་མཆོག་ཏུ་ཐུགས་བསྐྱེད། ཚོགས་གཉིས་རྫོགས་ནས་བཅོམ་ལྡན་འདས་མི་གཡོ་བར་ཀྲོང་ངེ་གྱུར་པ་བསྒོམ། དེ་ནས་རང་བཞིན་གྱི་གནས་ནས་བཅོམ་ལྡན་འདས་མི་གཡོ་བ་ཡེ་ཤེས་སེམས་དཔའ་ཚོན་གང་བ་གཅིག་སྤྱི་བོའི་སྟེང་དུ་བྱོན་པར་བསམ། དེ་ལ་ཡིད་ཀྱི་སྒོ་ནས་དད་པ་གུས་པ་བྱེད། ངག་གི་སྒོ་ནས་བསྟོད་པ་བྱེད། མཆོད་པ་འབུལ། གསོལ་བ་གདབ། དེ་ནས་ཚངས་པའི་བུ་ག་ན་མར་ཐིམ་སོང་ནས་སྟོང་པ་ཉིད་དུ་ཆམ་ཆམ་སྙིང་གི་ཐད་ཀར་སླེབ་ཙ་ན་སྟོང་པ་ཉིད་དུ་ཆམ་གྱུར་བར་བསྒོམ། དེའི་ངང་དུ་འབོལ་ལེ། ཤིག་གེ ལྷོད་དེ། ཁྲིལ་ལེ་བཞག །དེའི་འཕྲོ་ལ་སེམས་གནས་ན་གནས་སུ་གཞུག །དེའི་འཕྲོ་ལ་གཉིད་དུ་སོང་ན་གཉིད་དུ་འཁྱེར་བའི་མན་ངག་ཡིན། དེའི་འཕྲོ་ལ་ཤི་ན་འཆི་ཁ་མའི་མན་ངག་ཡིན་ཏེ། བར་དོ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་གསུང་ངོ་། །དེའི་འཕྲོ་ལ་བཟླས་པ་བྱས་ན་བྱིན་རླབས་ཤིན་ཏུ་ཆེ་སྟེ། སྐུ་གསུང་ཐུགས་ཀྱི་བཟླས་པར་འགྲོ་བ་ཡིན། ཡི་དམ་ལྷ་བསྒོམ་པ་དེ་སྐུའི་བཟླས་པ། སྙིང་པོ་བཟླས་པ་དེ་གསུང་གི་བཟླས་པ་ཡིན། སྟོང་པ་ཉིད་བསྒོམ་པ་དེ་ཐུགས་ཀྱི་བཟླས་པ་ཡིན་གསུངས། དེ་ལ་ལྡང་བར་འདོད་ན་ནམ་མཁའ་ལ་འཇའ་ཚོན་ཆགས་པ་བཞིན་དུ། སྟོང་པ་ཉིད་ཀྱི་ངང་ལས་བཅོམ་ལྡན་འདས་མི་གཡོ་བ་ལམ་སྟེ་བསྐྱེད། སྔར་བསྟིམ་པའི་སེམས་དཔའ་ཚོན་གང་བ་དེའི་སྤྱི་བོར་སྟེང་ན་བཞུགས་པར་བསམས་ལ། ཡིད་ཀྱི་སྒོ་ནས་དད་པ་དང་གུས་པ་བྱ། ངག་གི་སྒོ་ནས་བསྟོད་པ་བྱ། མཆོད་པ་འབུལ་གསོལ་བ་གདབ། དེ་ནས་རས་བྲིས་ཡོད་ན་དེ་ལ་བསྟིམ། མེད་ན་ལུགས་མའམ་གདུང་རྟེན་ལ་བསྟིམ། དེ་ལྟ་བུ་མི་བཞུགས་ན་རང་བཞིན་གྱི་གནས་སུ་གཤེགས་སུ་གསོལ། །སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། ཞེས་པའི་སྐྱབས་འགྲོ་སེམས་བསྐྱེད་ཀྱི་བསྔོ་བ་ལན་གསུམ་བྱ། ད་ལྟའི་སྣང་བ་འདི་རྨི་ལམ་སྒྱུ་མ་ལྟ་བུར་བསྒོམ་གསུངས། ཟས་ལ་བརྟེན་པའི་ལེའུ་སྟེ་དང་པོའོ།། །། ༈

གཉིས་པ་དབུགས་ལ་བརྟེན་པའི་བློ་སྦྱོང་ནི། སེམས་ཅན་དོན་དུ་སངས་རྒྱས་ཐོབ་པར་བྱ། དེའི་ཆེད་དུ་དབུགས་ལ་བརྟེན་པའི་བློ་སྦྱོང་བསྒོམ་སྙམ་དུ་བསམས་ནས་དབུགས་ནང་དུ་རྒྱུ་བའི་དུས་སུ། སེམས་ཅན་རྣམས་སྡུག་བསྔལ་རང་ལ་སྨིན་པར་བསྒོམ། དབུགས་ཕྱིར་རྒྱུ་བའི་དུས་སུ་རང་གི་བདེ་བ་དང་། དགེ་བ་སེམས་ཅན་ལ་སྨིན་པར་བསྒོམ། དེ་གཉིས་ཕར་ལོག་ཚུར་ལོག་ཏུ་བསྒོམ། སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་དགེ་བའི་རྩ་བ་བློས་བླངས་ནས་སེམས་ཅན་ལ་སྨིན་པར་བསྒོམ། དེ་ལྟར་རང་ཡང་སྡིག་སྡུག་དང་བྲལ། བྱང་ཆུབ་མཆོག་ཏུ་སེམས་བསྐྱེད་ལ། ཡི་དམ་གྱི་བསྒོམ་བཟླས་སྔར་བཞིན་བྱས་ལ། དབུགས་ལ་བརྟེན་པའི་ལེའུ་སྟེ་གཉིས་པའོ།། །། ༈

གསུམ་པ་ལུས་གང་གཱའི་ཀླུང་བྱེ་མ་སྙེད་དུ་སྤྲུལ་ནས་རིགས་དྲུག་གི་སྡུག་བསྔལ་དང་དུ་ལེན་པའི་བློ་སྦྱོང་བགྱི་བ། སེམས་ཅན་གྱི་དོན་དུ་སངས་རྒྱས་ཐོབ་པར་བྱ། དེའི་ཆེད་དུ་ལུས་གང་གཱའི་ཀླུང་གི་བྱེ་མ་སྙེད་དུ་སྤྲུལ་ནས་རིགས་དྲུག་གི་སྡུག་བསྔལ་དང་དུ་ལེན་སྙམ་པའི་བློ་སྦྱོང་སྙམ་དུ་བསམས་ལ། སེམས་ཅན་དམྱལ་བའི་གནས་སུ་རང་གི་ལུས་གངྒཱའི་ཀླུང་གི་བྱེ་མ་སྙེད་དུ་སྤྲུལ་ནས་སེམས་ཅན་དམྱལ་བ་རྣམས་ཀྱི་སྡིག་སྡུག་ཐམས་ཅད་རང་གི་ལུས་པོ་དེ་རྣམས་ཀྱི་ཐོག་ཏུ་ཧྲིལ་ཧྲིལ་སྨིན་པར་བསྒོམ། རང་གི་བདེ་བ་དང་དགེ་བ་ཐམས་ཅད་དམྱལ་བ་པ་རྣམས་ལ་སྨིན་པར་བསྒོམ། དེ་ལྟར་སེམས་ཅན་དམྱལ་བ་པ་རྣམས་སྡིག་སྡུག་དང་བྲལ། བྱང་ཆུབ་མཆོག་ཏུ་ཐུགས་བསྐྱེད་ཚོགས་གཉིས་རྫོགས་ནས་མི་ཐོ་རིས་ལྷ་མི་ཐོབ་པར་བསྒོམ། དེ་ལྟར་ཡི་དྭགས། དུད་འགྲོ། ལྷ་མ་ཡིན་རྣམས་ཀྱིས་ཀྱང་ལྷ་མིའི་ལུས་ཐོབ་པར་བསྒོམ། མིའི་གནས་སུ་ལུས་གངྒཱའི་ཀླུང་གི་བྱེ་མ་སྙེད་སྤྲུལ་ནས་མི་རྣམས་ཀྱི་སྡིག་སྡུག་ཐམས་ཅད་རང་གི་ལུས་པོ་དེ་རྣམས་ཀྱི་སྟེང་དུ་ཧྲིལ་ཧྲིལ་སྨིན་པར་བསྒོམ། རང་གི་བདེ་དགེ་མི་རྣམས་ལ་སྨིན་པར་བསྒོམ། དེ་གཉིས་ཕར་ལོག་ཚུར་ལོག་ཏུ་བསྒོམ། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བ་རྣམས་ཀྱང་བློས་བླངས་ནས་སེམས་ཅན་རྣམས་ལ་སྨིན་པར་བསྒོམ། དེ་ལྟར་མི་རྣམས་སྡིག་སྡུག་དང་བྲལ། བྱང་ཆུབ་མཆོག་ཏུ་སེམས་བསྐྱེད། ཚོགས་གཉིས་རྫོགས་ནས་སངས་རྒྱས་པར་བསྒོམ། དེ་ནས་ཕྱི་སྣོད་ཀྱི་འཇིག་རྟེན་འདི་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་གཅིག་ཏུ་བསྒོམ། རང་གི་ལུས་དུམ་བུར་གཏུབ་ལ་ཤ་ཁྲག་གིས་ཁེངས་པར་བསྒོམ། དེ་ལ་དམིགས་ལ། ཨོཾ་ཨཱཿཧཱུྃ་ལན་གསུམ་བརྗོད་པས་བདུད་རྩིར་གྱུར་པར་བསྒོམ། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཐུགས་ཀ་ནས་ཡེ་ཤེས་ཀྱི་བདུད་རྩི་བབས་པས་ཀྱང་ཁེངས་པར་བསྒོམ། སུམ་ཅུ་རྩ་གསུམ་དང་། བྱང་སྒྲ་མི་སྙན་དང་། འཇིག་རྟེན་གྱི་ཁམས་བདུད་རྩི་དང་བཅུད་ཀྱིས་ཁེངས་པར་བསྒོམ། དེ་ནས་བདུད་རྩི་རྣམས་དང་པོར་བླ་མ་ཡི་དམ་གྱི་ལྷ་ལ་འབུལ། དེ་སངས་རྒྱས་དང་བྱང་ཆུབ་སེམས་དཔའ་རྣམས་ལ་འབུལ། དེ་ནས་རིགས་དྲུག་རྣམས་ལ་ཕུལ་བས། དེ་རྣམས་ཐམས་ཅད་ཀྱི་རྣམ་པར་མི་རྟོག་པའི་ཡེ་ཤེས་ཆོས་སྐུ་བརྙེས་པར་བསམ། དེ་ལྟར་ལུས་ནི་སེམས་ཅན་ལ་དྲངས་ནས་མེད། སེམས་ལ་ནི་རང་བཞིན་གྲུབ་པ་མེད་པའི་ངང་ལ་ལྷན་གྱིས་བཞག །ཡི་དམ་གྱི་བསྒོམ་བཟླས་སྔར་བཞིན་བྱ། དགེ་བའི་རྩ་བ་བསྔོ། ལུས་གངྒཱའི་ཀླུང་གི་བྱེ་མ་སྙེད་དུ་སྤྲུལ་ནས་རིགས་དྲུག་གི་སྡུག་བསྔལ་དང་དུ་ལེན་པའི་ལེའུ་སྟེ་གསུམ་པའོ།། །། ༈

བཞི་པ་ཤ་ཁྲག་ལ་བརྟེན་པའི་བློ་སྦྱོང་ཞེས་བགྱི་བ། སེམས་ཅན་གྱི་དོན་དུ་སངས་རྒྱས་ཐོབ་པར་བྱ། དེའི་ཆེད་དུ་ཤ་ཁྲག་ལ་བརྟེན་པའི་བློ་སྦྱོང་སྙམ་དུ་བསམས་ནས། དེ་ནས་ཁང་པ་ཤ་ཁྲག་གིས་ཁེངས་པར་བསམས་ལ། ཡི་དྭགས་ཤ་ཁྲག་ལ་དགའ་བ་ཐམས་ཅད་འདུས་འདུས་བྱས་པས་འདུས་པར་བསྒོམ། དེ་ནས་ཤ་ལ་དགའ་བ་ཤ་ཟོ། ཁྲག་ལ་དགའ་བ་ཁྲག་འཐུང་། མགོ་བོ་ཡ་བདུད་རྒྱལ་པོས་ཁྱེར། རྐང་པ་མ་བདུད་རྒྱལ་མོས་ཁྱེར། བར་རྣམས་ལྷ་འདྲེ་གཉན་དབུས་ཁྱེར། རེངས་ན་རྗེན་པར་ཟོ། མི་རིངས་ན་ཚོས་ལ་ཟོ། ཐབས་ཇི་ལྟར་ལེགས་པ་བཞིན་དུ་གྱིས་བྱས་ནས་བྱིན་པས། ཤ་ཟོས། ཁྲག་འཐུང་། རུས་པ་ཀུན་ཡང་མུར་པར་བསམ། དེ་ལྟར་ལུས་ནི་ཁོང་རྣམས་ལ་བྱིན་ནས་མེད། སེམས་ལ་ནི་རང་བཞིན་མེད་པའི་ངང་དུ་ལྷན་ནེ་འཇོག་པ་ཡིན། དེ་ནས་བློ་རྒྱ་ཆེར་སོང་ནས་ལྕགས་རིའི་ནང་གང་ཙམ། ལུང་པ་གང་ཙམ། འཇིག་རྟེན་གྱི་ཁམས་ཐམས་ཅད་ཤ་ཁྲག་གིས་ཁེངས་པར་བསྒོམ་པ་ཡིན་གསུངས། དེ་ནས་ལྡང་བར་འདོད་ན་དགེ་བ་བསྔོ། རྨི་ལམ་ལྟ་བུར་བསྒོམ། ཤ་ཁྲག་བཏང་བའི་ལེའུ་སྟེ་བཞི་པའོ།། །། ༈

ལྔ་པ་གཏོར་མ་ལ་བརྟེན་པའི་བློ་སྦྱོང་བགྱི་བ། སེམས་ཅན་ཐམས་ཅད་ཀྱི་དོན་དུ་སངས་རྒྱས་ཐོབ་པར་བྱ། དེའི་ཆེད་དུ་གཏོར་མ་ལ་བརྟེན་པའི་བློ་སྦྱོང་བྱ་སྙམ་དུ་བསམས་ནས། ཕྱི་སྣོད་ཀྱི་འཇིག་རྟེན་འདི་རིན་པོ་ཆེ་ཡངས་ཤིང་རྒྱ་ཆེ་བ་གཅིག་ཏུ་བསྒོམ། རང་གི་ལུས་དུམ་བུར་གཏུབས་ལ་སྣོད་ཁེངས་པར་བསྒོམས་ནས། ཨོཾ་ཨཱཿཧཱུྃ་ལན་གསུམ་བརྗོད་པས་བདུད་རྩིར་གྱུར་པར་བསྒོམ། དེ་བཞིན་གཤེགས་པ་རིན་ཆེན་མང་ལ་སོགས་པ་བཞིའི་མཚན་བརྗོད་བྱས་པས། དམ་པ་ཆོས་སྐྱོང་བའི་སྲུང་མ་དཔལ་མགོན་དང་། ལྷ་མོ་ལ་སོགས་པ་སངས་རྒྱས་ཀྱི་བསྟན་པ་བསྲུང་བར་ཞལ་གྱིས་བཞེས་པ། དཀར་ཕྱོགས་ལ་མངོན་པར་དགའ་བ་རྣམས་ཀྱིས་བསྐོར་ནས་གསོལ་བར་བསམས་ལ། ན་མཿསརྦ་ཏ་ཐཱ་ག་ཏ་ཨཱ་བ་ལོ་ཀེ་ཏེ་ཨོཾ་སཾ་བྷ་ར། སཾ་བྷ་ར་ཧཱུྃ་ལན་གསུམ་བརྗོད་པས་སངས་ཀྱིས་གསོལ་བར་བསམ། རིགས་དྲུག་གི་སེམས་ཅན་ཐམས་ཅད་མཆོད་སྦྱིན་གྱི་གཏོར་མ་རྒྱ་ཆེན་པོ་འདི་བཞེས་ལ། བདག་དང་སེམས་ཅན་ཐམས་ཅད་ཀྱི་རྒྱུད་ལ་ཚོགས་རྫོགས་པར་གྱུར་ཅིག་ཅེས་བརྗོད། བདག་གི་བསོད་ནམས་སྟོབས་དང་ནི། ཞེས་པའི་ཚིགས་བརྗོད། དེ་ལྟར་ལུས་ནི་དྲངས་ནས་མེད། སེམས་ནི་རང་བཞིན་མེད་པས་རང་བཞིན་མེད་པའི་ངང་ལ་ལྷན་གྱིས་བཞག །དེ་ནས་ལྡང་བར་འདོད་ན། དགེ་བ་བསྔོ། རྨི་ལམ་སྒྱུ་མ་ལྟ་བུར་བསྒོམ། གཏོར་མ་ལ་བརྟེན་པའི་ལེའུ་སྟེ་ལྔ་པའོ།། །། ༈

དྲུག་པ་འབྱུང་བ་ལ་བརྟེན་པའི་བློ་སྦྱོང་བགྱི་བ། སྤྱོད་འཇུག་ལས། ས་སོགས་འབྱུང་བ་ཆེན་པོ་དང་། །ནམ་མཁའ་བཞིན་དུ་རྟག་པར་ཡང་། །སེམས་ཅན་དཔག་ཏུ་མེད་པ་ཡི། །རྣམ་མང་ཉེར་འཚོའི་རྒྱུར་ཡང་ཤོག །ཅེས་གསུངས་པས། སེམས་ཅན་གྱི་དོན་དུ་སངས་རྒྱས་ཐོབ་པར་བྱ། དེའི་ཆེད་དུ་འབྱུང་བ་ལ་བརྟེན་པའི་བློ་སྦྱོང་བསྒོམ་སྙམ་དུ་བསམས་ནས། རང་གི་ལུས་པོ་འདིའི་ཤ་དང་རུས་པ་རྣམས་ཕྱིའི་འབྱུང་བ་ལ་ཐིམ་པར་བསྒོམ། ཁྲག་དང་ཆུ་སེར་རྣམས་ཆུ་ལ་ཐིམ་པར་བསྒོམ། དབུགས་རྣམས་རླུང་ལ་ཐིམ་པར་བསྒོམ། དྲོད་རྣམས་མེ་ལ་ཐིམ་པར་བསྒོམ། ལུས་འབྱུང་བ་བཞིར་གྱུར་པ་འདི་སས་སྲ་ཞིང་བརྟན་པའི་སྒོ་ནས་སེམས་ཅན་གྱི་དོན་བྱེད། ཆུས་བརླན་ཞིང་གཤེར་བའི་སྒོ་ནས་སེམས་ཅན་གྱི་དོན་བྱེད། མེས་ཚ་ཞིང་བསྲེག་པའི་སྒོ་ནས་སེམས་ཅན་གྱི་དོན་བྱེད། རླུང་གིས་ཡང་ཞིང་གཡོ་བའི་སྒོ་ནས་སེམས་ཅན་གྱི་དོན་བྱེད། ཉི་མ་དང་ཟླ་བ་གཉིས་མིག་གཉིས་སུ་བྱས་ནས་སེམས་ཅན་གྱི་དོན་བྱེད་པ་ཡིན། སེམས་ཅན་ཟས་ཟ་བ་རྣམས་རང་གི་ཤ་ཟ་བར་བསྒོམ། གོས་གྱོན་པ་རྣམས་རང་གི་པགས་པ་གྱོན་པར་བསྒོམ། སྐོམ་འཐུང་པ་རྣམས་རང་གི་ཁྲག་འཐུང་བར་བསྒོམ། དེ་ནས་སེམས་ཅན་རྣམས་ཀྱི་སྡིག་སྡུག་རང་ལ་སྨིན་པར་བསྒོམ། རང་གི་བདེ་དགེ་སེམས་ཅན་ལ་སྨིན་པར་བསྒོམ། དེ་གཉིས་ཕར་ལོག་ཚུར་ལོག་ཏུ་བསྒོམ་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བ་ཡང་བློས་བླངས་ནས་སེམས་ཅན་ལ་སྨིན་པར་བསྒོམ། དེ་ལྟར་སེམས་ཅན་རྣམས་སྡིག་སྡུག་དང་བྲལ། བྱང་ཆུབ་མཆོག་ཏུ་སེམས་བསྐྱེད་ནས་ཚོགས་གཉིས་རྫོགས་སྒྲིབ་གཉིས་དག་ནས་སངས་རྒྱས་པར་བསྒོམ། འབྱུང་བ་བཞིའི་ལུས་ལ་ཨོཾ་ཨཱཿཧཱུྃ་ལན་བདུན་བརྗོད་པས་བདུད་རྩིར་གྱུར་པར་བསྒོམ། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཐུགས་ཀ་ནས་ཡེ་ཤེས་ཀྱི་བདུད་རྩི་བབས་པས་ཀྱང་ཁེངས་པར་བསྒོམ། སུམ་ཅུ་རྩ་གསུམ་དང་། བྱང་སྒྲ་མི་སྙན་དང་། འཇིག་རྟེན་གྱི་ཁམས་བདུད་རྩི་དང་བཅུད་དུ་གྱུར་པ་ཐམས་ཅད་ཀྱིས་ཀྱང་ཁེངས་པར་བསྒོམ། དེ་དང་པོ་བླ་མ་དང་ཡི་དམ་ལ་འབུལ། དེ་ནས་རིགས་དྲུག་གི་སེམས་ཅན་རྣམས་ལ་ཕུལ་བས། དེ་རྣམས་ཀྱི་བདུད་རྩི་རྣམས་མ་ལུས་པར་སངས་ཀྱིས་གསོལ་བར་བསམ། དེ་རྣམས་ཀྱི་རྣམ་པར་མི་རྟོག་པའི་ཡེ་ཤེས་ཀྱི་སྐུ་ཐོབ་པར་བསྒོམ། དེ་ལྟར་ལུས་ནི་བླ་མ་ཡི་དམ་གྱི་ལྷ་སངས་རྒྱས་དང་བྱང་ཆུབ་སེམས་དཔའ། རིགས་དྲུག་རྣམས་ལ་ཕུལ་ནས་མེད། སེམས་ནི་རང་བཞིན་གྱིས་གྲུབ་པ་མེད་པའི་ངང་ལ་ལྷན་གྱིས་འཇོག་པ་ཡིན་གསུངས། ཡི་དམ་གྱི་བསྒོམ་བཟླས་སྔར་བཞིན་བྱ། དགེ་བའི་རྩ་བ་བསྔོ། རྨི་ལམ་སྒྱུ་མ་ལྟ་བུར་བསྒོམ། འབྱུང་བ་ལ་བརྟེན་པའི་བློ་སྦྱོང་གི་ལེའུ་སྟེ་དྲུག་པའོ།། །། ༈

བདུན་པ་ལུས་ཡིད་བཞིན་གྱི་ནོར་བུ་རིན་པོ་ཆེར་བསྒྱུར་བའི་བློ་སྦྱོང་ཞེས་བགྱི་བ། སྤྱོད་འཇུག་ལས། ཡིད་བཞིན་ནོར་བུ་བུམ་པ་བཟང་། །རིགས་སྔགས་གྲུབ་དང་སྨན་ཆེན་དང་། །དཔག་བསམ་གྱི་ནི་ཤིང་དག་དང་། །ལུས་ཅན་རྣམས་ཀྱི་འདོད་འཇོར་འགྱུར། །ཞེས་གསུངས་པས། སེམས་ཅན་གྱི་དོན་དུ་སངས་རྒྱས་ཐོབ་པར་བྱ་བའི་དོན་དུ་ལུས་ཡིད་བཞིན་གྱི་ནོར་བུ་རིན་པོ་ཆེར་སྤྲུལ་པའི་བློ་སྦྱོང་བསྒོམ་སྙམ་དུ་བསམས་ནས། དེ་ནས་རང་གི་ལུས་པོ་འདི་ཡིད་བཞིན་གྱི་ནོར་བུ་རིན་པོ་ཆེ་ཁ་དོག་སྔོན་པོ་དབྱིབས་བརྒྱད་བཞོགས་ཆེ་ཆུང་མི་འབྲིང་པོའི་བརླ་ཙམ་དུ་གྱུར་པར་བསྒོམ། དེ་རྒྱལ་མཚན་གྱི་རྩེ་མོ་ལ་བཏགས་ནས་མཆོད་པ་ཕུལ་ཏེ་གསོལ་བ་བཏབ་པས་མི་མཉམ་པའི་ཆར་གཅིག་བབ། དེས་ས་གཞི་ལ་ཆག་ཆག་བཏབ་པར་བསྒོམ། ཡང་མཆོད་པ་ཕུལ་ནས་གསོལ་བ་བཏབ་པས། མི་མཉམ་པའི་རླུང་གཅིག་ལངས། དེས་ས་གཞི་ལ་ཕྱགས་དར་བྱས་པར་བསྒོམ། ཡང་མཆོད་པ་ཕུལ་ནས་གསོལ་བ་བཏབ་པས། བདུད་རྩིའི་ཆར་བབས་པས། སེམས་ཅན་རྣམས་ཀྱི་ལས་དང་ཉོན་མོངས་པ་དང་། ཐ་མལ་གྱི་ཤ་ཁྲག་འཐུག་པ་སྦྱངས་ནས་བྱང་ཆུབ་མཆོག་ཏུ་ཐུགས་བསྐྱེད། ཚོགས་གཉིས་རྫོགས་ནས་སངས་རྒྱས་པར་བསྒོམ། ཡང་མཆོད་པ་ཕུལ་ནས་གསོལ་བ་བཏབ་པས། རིན་པོ་ཆེའི་ཆར་འབེབས་པས་དེ་རྣམས་ལ་རིན་པོ་ཆེའི་རྒྱན་བཏགས་པར་བསྒོམ། ཡང་མཆོད་པ་ཕུལ་ནས་གསོལ་བ་བཏབ་པས། ལྷའི་ན་བཟའ་པཉྩ་ལི་ཀའི་ཆར་བབས་པས་དེ་རྣམས་ལ་ན་བཟའ་གསོལ་བར་བསམ། ཡང་མཆོད་པ་ཕུལ་ནས་གསོལ་བ་བཏབ་པས། ཟག་མེད་ཀྱི་བདུད་རྩིའི་ཆར་བབས་པ་འཇིག་རྟེན་གྱི་ཁམས་ཁེངས་པར་བསྒོམ། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཐུགས་ཀ་ནས་བདུད་རྩི་བབས་པས་ཀྱང་ཁེངས་པར་བསྒོམ། སུམ་ཅུ་རྩ་གསུམ་དང་། སྒྲ་མི་སྙན་དང་། འཇིག་རྟེན་གྱི་ཁམས་ཀྱི་བདུད་རྩི་དང་བཅུད་དུ་གྱུར་པ་ཐམས་ཅད་ཀྱིས་ཁེངས་པར་བསྒོམ། དེ་ཡང་དང་པོ་དེ་བླ་མ་དང་ཡི་དམ་གྱི་ལྷ་ལ་འབུལ། དེ་ནས་སངས་རྒྱས་དང་བྱང་ཆུབ་སེམས་དཔའ་རྣམས་ལ་དབུལ། དེ་ནས་རིགས་དྲུག་སངས་རྒྱས་པ་དེ་རྣམས་ལ་ཕུལ་བས། དེ་རྣམས་ཀྱི་བདུད་རྩི་དེ་ཚོ་མ་ལུས་པར་སངས་ཀྱིས་གསོལ་བས་དེ་ཐམས་ཅད་ཀྱི་རྣམ་པར་མི་རྟོག་པའི་ཡེ་ཤེས་ཆོས་ཀྱི་སྐུ་ཐོབ་པར་བསྒོམ། དེ་ལྟར་ལུས་ནི་བླ་མ་དང་ཡི་དམ་གྱི་ལྷ། སངས་རྒྱས་དང་། བྱང་ཆུབ་སེམས་དཔའ་དང་། རིགས་དྲུག་སངས་རྒྱས་པ་རྣམས་ལ་འབུལ། སེམས་ལ་རང་བཞིན་གྲུབ་པ་མེད་པས་རང་བཞིན་མ་གྲུབ་པའི་ངང་ལ་ལྷན་གྱིས་འཇོག །དེ་ལས་ལྡང་བར་འདོད་ན་དགེ་བའི་རྩ་བ་བསྔོ་རྨི་ལམ་སྒྱུ་མ་ལྟ་བུར་བསྒོམ། ལུས་ཡིད་བཞིན་གྱི་ནོར་བུ་རིན་པོ་ཆེར་སྤྲུལ་པའི་ལེའུ་སྟེ་བདུན་པའོ།། །། ༈

བརྒྱད་པ་བློ་སྦྱོང་འཆི་ཁ་མའི་མན་ངག་བགྱི་བ། འཆི་བ་ཕ་རོལ་ཏུ་ཕྱིན་པ་དྲུག་གི་སྒོ་ནས་འཆི་དགོས་པ་ཡིན། འཆི་བའི་དུས་སུ་ཡོ་བྱད་སུམ་ཆ་གསུམ་དུ་བགོས་ལ། ཆ་གཅིག་བླ་མ་དང་དཀོན་མཆོག་གསུམ་ལ་དབུལ། ཆ་གཅིག་ཚོགས་གསོག་བྱེད། ཆ་གཅིག་ལ་བཀྱེ་བཀང་ལ་སོགས་པ་ཅི་རིགས་སུ་བྱེད་པ་ཡིན་གསུང་ངོ་། །དེ་སྦྱིན་པ་ཡིན། ཚུལ་ཁྲིམས་ལ་སོ་སོར་ཐར་པའི་ལྟུང་བ་བཤགས་སྡོམ་བྱེད། སྨོན་འཇུག་གི་སེམས་བསྐྱེད་སོར་འཇུག་བྱེད། དེ་ཚུལ་ཁྲིམས་ཡིན། བཟོད་པ་སྔར་མཁོན་ཡོད་ན་བཟོད་གསོལ་བྱེད། རྩ་ན་མེད་ན་ཀ་ཆ་སྣ་གཅིག་ཙམ་བསྔོས་ནས་འོ་ཅག་གཉིས་འདི་ལྟ་བུ་ཞིག་ཡོད་པས་བཟོད་པ་མཛོད་ཟེར། ཁོས་བཟོད་པ་ལེན་དུ་མ་བཏུབ་ཀྱང་རང་གི་སེམས་ལ་མི་བདེ་བ་མེད་པར་བྱེད་པ་ཡིན། བརྩོན་འགྲུས་དེ་རྣམས་བྱེད་པ་ཐམས་ཅད་དགའ་སྤྲོ་དང་བཅས་པས་བྱེད་པ་ཡིན། བསམ་གཏན་དང་ཤེས་རབ་གཉིས་འདི་ཁོག་ན་ཡོད། དེ་ནས་དཀོན་མཆོག་གི་སྤྱན་སྔར་མཆོད་པ་གྲུབ་ན་ཡན་ལག་བདུན་པ་རྒྱས་པར་བྱེད། བདག་གི་རྒྱུད་ལ་ཐེག་པ་ཆེན་པོའི་བློ་སྦྱོང་གི་རྟོགས་པ་ཕྱིན་ཅི་མ་ལོག་པ་སྐྱེ་བར་བྱིན་གྱིས་བརླབ་ཏུ་གསོལ། བློ་སྦྱོང་བརྗེད་པའི་གནས་བཞིར་མི་བརྗེད་པར་བྱིན་གྱིས་བརླབ་ཏུ་གསོལ། འཆོར་བའི་གནས་བཞིར་མི་འཆོར་བར་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ། དེ་ནས་དཀོན་མཆོག་གི་སྤྱན་སྔར་ཡི་གེ་པཾ་དམར་པོ་གཅིག་བསྒོམ། དེ་འོད་དུ་ཞུ་བ་པདྨའི་སྡོང་པོ་གཅིག་ཏུ་གྱུར་པར་བསྒོམ། པདྨའི་ཟེའུ་འབྲུ་རིན་པོ་ཆེ་དར་ཟབ་ཀྱིས་བརྒྱན་པ་ལ་བླ་མ་དང་ཡི་དམ་ལྷ་ཐ་མི་དད་པར་བསྒོམས་ལ། སྔར་གྱི་མཆོད་པ་དེ་རྣམས་བློས་བླངས་དབུལ། ཡན་ལག་བདུན་པ་བྱ། སྔར་བཞིན་གསོལ་བ་གདབ། དེ་ནས་ས་ཕྱོགས་དབེན་པར་འབོལ་བའི་སྟན་ལ་ལུས་རྣམ་སྣང་ཆོས་བདུན་ནམ། བསམ་གཏན་གྱི་ཆོས་དྲུག་ལ་བསླབ་ཟེར་ནས། རྐང་པ་རྡོ་རྗེ་སྐྱིལ་ཀྲུང་བཅའ། སྒལ་ཚིག་གསེར་གྱི་དོང་རྩེ་བརྩེགས་པ་བཞིན་དུ་དྲང་ཏིག་སྟེ་དཔུངས། ལག་པ་གཉིས་ལྟེ་བའི་སོར་བཞི་ཙམ་གཞལ་བའི་སར་མཉམ་པར་བཞག །མགྲིན་པ་ལྕགས་ཀྱུ་ལྟར་བཀུག་ཅིང་རྒྱབ་མདུན་གཏམ་གསུངས། གཡོན་ཕྱོགས་སུ་ཆུས་ཆུས་པ་ལན་གསུམ་ཙམ་བྱས་པའི་སྣ་ཆུ་ཐིག་པ་ལྟེ་བའི་ཐད་ཀར་ཡོང་ཙམ་བྱ། མིག་སྣ་རྩེ་ལ་གཏད། སོ་བར་རྟ་རྔ་ཤོང་བ་ཙམ་བྱེད། ལྕེ་ཡ་རྐན་ལ་སྦྱར། མིག་བཙུམས་པའང་མིན། བཙུམས་ན་བྱིངས་ནས་འགྲོ། བགྲད་པའང་མིན། བགྲད་ན་ཡེངས་ནས་འགྲོ། ལྷའི་སྤྱན་ལྟར་ཟིམ་ཟིམ་དུ་བྱ། དེ་ནས་ཤེས་པ་དེ་ལྟེ་བའི་ཐད་ཀར་ཁྱིམ་ཁྱིལ་བ་ལན་གསུམ་བྱེད་པ་ཡིན་གསུངས། དེ་ནས་སེམས་ཅན་གྱི་དོན་དུ་སངས་རྒྱས་ཐོབ་པར་བྱ། དེའི་ཆེད་དུ་ཐེག་པ་ཆེན་པོའི་བློ་སྦྱོང་འཆི་ཁ་མའི་གདམས་ངག་བསྒོམ་སྙམ་དུ་བསམས་ནས་འཁོར་བའི་སྡུག་བསྔལ་འདི་ཐམས་ཅད་ལས་དགེ་མི་དགེ་མི་གཡོ་བའི་ལས་གསུམ་ལས་བྱུང་། དེ་ཉོན་མོངས་པས་ཀུན་ནས་བསླངས་པ་ལས་བྱུང་། ཉོན་མོངས་པ་བརྒྱད་ཁྲི་བཞི་སྟོང་དེ་རྩ་བ་བདག་ཏུ་འཛིན་པ་འདི་ཡིན་པས་རང་བཞིན་གྲུབ་པ་མེད་པ་གཅིག་ལ་ང་བདག་ཏུ་བཟུང་ནས་འདིའི་ཁ་འཛིན་ཤག་འདེབས་བྱེད་བྱེད་ནས་ལས་བསགས། ལས་ཀྱིས་འཁོར་བར་འཁྱམས་ནས་འཁོར་བའི་སྡུག་བསྔལ་ལ་ཐུག་པ་མེད་ཅིང་མཐའ་མི་མངོན་པ་ཞིག་ཉམས་སུ་མྱོང་། ཚེ་འདི་ལ་ཡང་ཁ་འཛིན་ཁ་འདེབས་བྱས་པས་བདེ་རྒྱུ་ལས་སྡུག་བསྔལ་དུ་སོང་བའམ། དགེ་རྒྱུ་ལས་མི་དགེ་བར་སོང་བས་རང་ལ་རང་གི་ཁ་འཛིན་དང་། ཤགས་འདེབས་བྱས་པས་ལན། ད་ཕན་ཆད་དུ་ཡང་བདག་ཏུ་འཛིན་པ་འདི་མ་སྤང་ན་སྔ་མ་ཁོ་ན་བཞིན་དུ་འཁོར་བར་འཁྱམས་པས། འདས་མ་འོངས་ད་ལྟར་དུས་གསུམ་དུ་གཅིག་སྡུག་བསྔལ་དུ་འཇུག་མཁན་རང་ལ་གཅེས་པར་འཛིན་པའི་འགོང་པོ་ང་བདག་བྱ་བ་འདི་ཡིན་མིན་ལ་ཐེ་ཚོམ་མི་ཟ། འདིའི་ཁ་འཛིན་ཤགས་འདེབས་བྱས་པས་ཕན་ན་མཐོང་བ་ཐོས་པ་ཡིད་ལ་འགྱུར་བ་རྣམས་ལག་ལེན་དུ་མ་བཏབ་པ་གཅིག་ཀྱང་མེད་དེ་འཁོར་བ་ལས་སྔར་འདྲས་གང་ཡང་རིང་དུ་མ་སོང་བས་ད་གང་ལེགས་ལ་ཐོང་། བྱུང་ལེགས་ལ་ཐོང་སྙམ་དུ་བགྱིས་ལ་རང་བཞིན་ལིང་སྐྱུར། ལྷོད་དེ་ཀློད། ཤིགས་ཀྱིས་བཤིག་ལ་ཞོག །གཞན་ཁམས་གསུམ་འཁོར་བའི་སེམས་ཅན་འདི་རྣམས་སྤྱིར་མི་ཡོང་བ་མིན་དྲིན་ཅན་གྱི་ཕ་མ་ཤ་སྟག་ཀྱང་ཡིན་པས་སེམས་ཅན་གྱི་སྡུག་བསྔལ་རང་ལ་སྨིན་པར་བསྒོམ། རང་གི་བདེ་བ་དང་། དགེ་བ་སེམས་ཅན་ལ་སྨིན་པར་བསྒོམ། དེ་གཉིས་ཕར་ལོག་ཚུར་ལོག་ཏུ་བསྒོམ། སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་དགེ་བའི་རྩ་བ་ཡང་བློས་བླངས་ནས་སེམས་ཅན་ལ་སྨིན་པར་བསྒོམ། དེ་ལྟར་སེམས་ཅན་རྣམས་སྡིག་སྡུག་དང་བྲལ་ནས་སངས་རྒྱས་པར་བསྒོམ། རང་ཡང་སྡིག་སྡུག་དང་བྲལ་ནས་ཡི་དམ་གྱི་ལྷའི་བསྒོམ་བཟླས་གོང་དང་མཐུན་ནོ། །དེ་ནས་དཀོན་མཆོག་གི་སྤྱན་སྔར་མཆོད་པ་གྲུབ་ན་རྒྱས་པར་བྱེད། ཡན་ལག་བདུན་པ་གྲུབ་ན་རྒྱས་པར་བྱེད། བདག་གི་རྒྱུད་ལ་ཐེག་པ་ཆེན་པོ་བློ་སྦྱོང་གི་རྟོགས་པ་ཕྱིན་ཅི་མ་ལོག་པ་སྐྱེ་བར་བྱིན་གྱིས་བརླབ་ཏུ་གསོལ། བློ་སྦྱོང་བརྗེད་པའི་གནས་བཞིར་མི་བརྗེད་པར་བྱིན་གྱིས་བརླབ་ཏུ་གསོལ། འཆོར་བའི་གནས་བཞིར་མི་འཆོར་བར་བྱིན་གྱིས་བརླབ་ཏུ་གསོལ། དེ་ནས་འཆི་བ་རང་གི་དུས་སུ་ཕྱི་དབུགས་ཆད་པའི་དུས་སུ་སེམས་གསལ་ལ་རྟོག་པ་མེད་པ་སྟོན་ཀའི་ནམ་མཁའ་སྤྲིན་བྲལ་བ་ལྟ་བུ་སེམས་ཅན་ཐམས་ཅད་ལ་ཡོང་། དེ་ཡང་སྔར་གྱི་དེ་གཉིས་གུང་བསྒྲིགས་པ་ཡིན། གུང་འགྲིགས་ན་ཆུ་སྣ་དང་བྲེང་འཕྲེང་བ་བཞིན་དུ་སོང་ནས་དེ་ལ་ལོའམ་ཟླ་བ་ཙམ་དུ་གནས་ནས། བར་དོར་ལོངས་སྤྱོད་རྫོགས་པའི་སྐུར་ལྡང་བ་ཡིན་ནོ། །བརྩོན་འགྲུས་ཅན་མཐོང་ཆོས་ལ་སངས་རྒྱ་བ་ཡིན་གསུངས། དེར་མ་ཟིན་ན་བར་དོའི་ཆོས་ལུས་སུ་ལྡང་བས་ཡིན་ཏེ། བར་དོ་བྱིས་པ་ལོ་ལྔ་ལེན་པའི་ཚོད་ཙམ་གཅིག་འོང་། ཁ་དོག་ལྷ་རྣམ་པ་ལྔའི་ཚུལ་དུ་ཡོད། དེར་སྒྱུ་མའི་དཔེ་བརྒྱད་དང་གཉིས་སུ་མེད་པར་ཤེས་ན་དུག་ལྔ་ཡེ་ཤེས་ལྔར་གྱུར་ནས་འགྲོ་སྟེ། ཆོས་ཀྱི་དབྱིངས་ཀྱི་ཡེ་ཤེས་དང་། མཉམ་ཉིད་ཡེ་ཤེས་གཉིས་ཆོས་ཀྱི་སྐུ། མེ་ལོང་ལྟ་བུ་ལོངས་སྐུ། བྱ་བ་གྲུབ་པའི་ཡེ་ཤེས་དང་། སོ་སོར་རྟོག་པའི་ཡེ་ཤེས་གཉིས་སྤྲུལ་པའི་སྐུའོ། །འོད་ཁ་དོག་ལྔ་པོ་དེ་ལ་ཆགས་ཤིང་མངོན་པར་ཞེན་ན་དུག་ལྔར་གནས་གྱུར་ན་རྒྱུ་དྲུག་ཏུ་འཁོར་ཞིང་རིགས་དྲུག་ཏུ་འཁྱམས་ཏེ་སྐྱེ་བ་ལེན་པ་ཡིན་གསུངས་སོ། །ལར་སྐྱེ་བ་འདིའི་བདུན་ནམ་བཅུ་དྲུག་ཐུག་པས་སངས་རྒྱས་པ་ཡིན་གསུངས་ཏེ། འཁོར་བ་ཐོགས་མཐའ་མེད་པ་ལ་ལྟོས་ནས་སང་གནངས་གྱི་ཚོད་ཙམ་ཡིན་གསུངས། ཤིན་ཏུ་ལེ་ལོ་ཅན་སྐྱེ་བ་བརྒྱུད་ནས་སངས་རྒྱས་པ་བྱ་བ་ཡིན་གསུངས། ཐུན་བརྒྱད་མའི་མན་ངག་དགེ་ལེགས་སུ་གྱུར་ཅིག །སརྦ་མངྒ་ལམ།། །། ༈

[edit]

/_/theg pa chen po'i blo sbyong thun brgyad ma bzhugs so/__/theg chen dge ba'i bshes gnyen la phyag 'tshal lo/__/spyir jo bo la sngags pha rol tu phyin pa gsan pa'i bla ma bdun bcu rtsa gnyis yod/__khyad par gyis kyang byang chub kyi sems ston pa'i bla ma gsum yod/__byams pa'i rnal 'byor pa/__d+harmA rak+Shita/__gser gling pa gsum yin gsungs/__de rnams kyi nang nas kyang bla ma gser gling pa la gus pa'i rgyu mtshan/__bla ma gzhan la gdung khang med de/__gser gling pa la gdung khang dngul gdugs can yod/__bla ma gzhan la zla mchod med de/__gser gling pa la zla mchod yod/__bla ma gzhan mtshan thos pa tsam gyis thal mo thugs khar sbyar te/__mnyam med gser gling pa'i mtshan thos tsa na thal mo spyi bor sbyor/__bla ma gzhan dran kyang spyan chab mi 'ong ste/__bla ma gser gling pa dran tsam spyan chab yong skad/__a ti sha la bla ma mang du yod pa la gser gling pa la de tsam gus pa'i rgyu mtshan ci lags zhus pa/__jo bo'i zhal nas/__bdag gzhan brje ba'i byang chub kyi sems 'di bla ma gser gling pa min pa la ma byung ba yin gsungs/__bla ma gser gling pa des brgyud pa'i dbang du byas na/__yang dag par rdzogs pa'i sangs rgyas/__rje btsun byams pa/__thogs med/__dbyig gnyen/__'phags pa rnam grol sde/__btsun pa grol sde/__des mchog gi sde/__des 'dul ba'i sde/__des mkhan po yang dag rnam par snang mdzad/__des seng ge bzang po/__/des rin chen mdo/__/des bla ma gser gling pa/__des dpal ldan a ti sha__/des dge bshes ston pa/__des sku mched gsum/__khyad par du spyan snga ba la gnang /__des glang thang pa dang /__sha pho sgang pa gnyis la/__glang thang pas zhang zhung dang lu gur gnyis la/__de gnyis kyi phyis jo bo la/__des lung nang ba mkhan po rin po che/__des slob dpon brag ston shes rab rin po che bstan pa'i bdag po slob dpon gzhon nu bsam gtan/__des bud+d+ha rat+na/__des kirti shI la/__des rgyal ba'i mtshan can/__des puN+ya rat+na/__des gzhon nu rgyal mchog__/de yan chad bla ma brgyud pa'i rim pa yin te/__de rnams chos 'di la brten nas grub pa thob/__rtogs pa khyad par can 'khrungs pa yin gsungs/__theg pa chen po blo sbyong zhes bya ba spyir du yang bka' sde snod kyi chos thams cad nas gsungs/__khyad par gyis kyang byang chub sems dpa'i spyod pa la 'jug pa'i bsam gtan le'u nas/__bdag nyid skyon bcas gzhan la yang /__/yon tan rgya mtshor shes byas nas/__/bdag 'dzin yongs su dor ba dang /__/gzhan slang ba yang bsgom par bya/__/zhes gsungs/__de la sogs pa'i tshigs su bcad pa de rnams kyi don go hril gyis dril ba la spyir 'khor bar 'khyams par byed pa'i rgyu nyon mongs pa brgyad khri bzhi stong /__de tshur bsdu na drug__/rtsa ba'i nyon mongs pa'am nyi shu nye ba'i nyon mongs pa/__de'i rtsa ba bdag tu 'dzin pa 'di yin te rang bzhin grub pa med pa gcig la/__nga bdag tu bzung nas 'di'i kha 'dzin shag 'debs byas pas/__tshe 'di la dge rgyu'i las mi dge bar song nas/__mi dge rgyu'i las sdug bsngal du song nas rang la rang gis kha 'dzin shag 'debs skyar bas lan/__da 'og man chad du yang bdag tu 'dzin pa 'di ma spangs na de kho na bzhin du 'khyams nas 'das ma 'ongs da lta dus gsum du sdug tu 'jug mkhan rang gces par 'dzin pa'i 'gong bo nga bdag bya ba 'di yin min la the tshom mi za/__'di'i kha 'dzin shag 'debs byas pas lan/__mthong ba thos pa yid la 'gyus pa rnams lag len la ma btab pa gcig kyang med de/__'khor ba la sngar 'dres gang yang ring du ma song bas da yod gang legs thong byug legs la thong snyam du byas nas/__rang gzhan du longs thong /__lhod de klod la thong /__shigs kyis bshig la thong /__sems can spyir mi yong ba min/__pha ma drin can sha stag yin pas sems can rnams kyi rgyu'i dus kyi sdig pa/__'bras bu'i dus kyi sdug bsngal ko ba skyi gris bzhar ba bzhin du blangs nas rang gi lus po 'di'i steng du hril hril smin par bsam/__rang gi bde ba dang dge ba sems can la smin par bsam/__de gnyis phar log tshur log tu bsgom/__sangs rgyas dang byang chub sems dpa' rnams kyi dge ba'i rtsa ba la yang blos blangs nas sems can la smin par bsgom/__theg pa chen po'i blo sbyong zhes bya ba'i go don de lta bu gcig yin gsungs/__mkhan po ba'i gsung nas blo sbyong zhes bya ba bdag khyad du bsad nas sems can la gus/__bdag khyad du bsad pa zhes bya ba 'khor ba thog ma med pa nas sdug tu 'jug mkhan rang gces par 'dzin pa'i 'gong po yin pas/__gzhi 'di brlag na yang brlag gzhug gsungs/__don du ma la 'jug gsungs/__sems can la gus par bsgom pa ni gzhan khams gsum 'khor ba'i sems can 'di rnams spyir ma yin/__pha ma drin can sha stag yin pas sems can la gus par bsgom/__lus ngag yid gsum gyi zho sha mi bsri bar phan 'dogs gsung ngo /__/dge'o//____//__! zas la brten pa'i blo sbyong bzhugs so/__/yang dge bshes ston pa'i gdams ngag lag len du byed na/__sbyin bdag gi bsod nams kyi tshogs rdzogs pa'am/__gzhan gyis dad zas 'ju bar bya ba'i ched du zas la brten pa'i blo sbyong bgyi ba/__sems can gyi don du sangs rgyas thob par bya/__khyad par gyis kyang rang gi lus la srin bu'i rigs brgyad khri bzhi stong yod pas/__de rnams da lta zang zing gis sdud la/__ma 'ongs pa na chos kyis sdud snyam du bsam/__zas nang du mid pa'i dus su sems can rnams kyi rgyu'i dus kyi sdig pa 'bras bu'i dus kyi sdug bsngal thams cad ko ba gris bzhar ba bzhin du rang gi lus 'di'i steng du hril gyis smin par bsgom/__dbugs phyir rgyu ba'i dus su rang gi bde ba dang /__dge ba sems can la smin par bsgom/__de gnyis phar log tshul log bsgom/__sangs rgyas dang byang chub sems dpa' thams cad kyi dge ba'i rtsa ba yang blos blangs nas sems can la smin par bsgom/__de ltar sems can rnams kyi rgyu dus kyi sdig_/'bras bu'i dus kyi sdug bsngal dang bral/__byang chub mchog tu thugs bskyed tshogs gnyis rdzogs nas sangs rgyas thob par bsgom/__yang rgyu'i dus kyi sdig pa/__'bras bu'i dus kyi sdug bsngal dang bral/__byang chub mchog tu thugs bskyed/__tshogs gnyis rdzogs nas bcom ldan 'das mi g.yo bar krong nge gyur pa bsgom/__de nas rang bzhin gyi gnas nas bcom ldan 'das mi g.yo ba ye shes sems dpa' tshon gang ba gcig spyi bo'i steng du byon par bsam/__de la yid kyi sgo nas dad pa gus pa byed/__ngag gi sgo nas bstod pa byed/__mchod pa 'bul/__gsol ba gdab/__de nas tshangs pa'i bu ga na mar thim song nas stong pa nyid du cham cham snying gi thad kar sleb tsa na stong pa nyid du cham gyur bar bsgom/__de'i ngang du 'bol le/__shig ge__lhod de/__khril le bzhag__/de'i 'phro la sems gnas na gnas su gzhug__/de'i 'phro la gnyid du song na gnyid du 'khyer ba'i man ngag yin/__de'i 'phro la shi na 'chi kha ma'i man ngag yin te/__bar do phyag rgya chen po mchog gi dngos grub thob gsung ngo /__/de'i 'phro la bzlas pa byas na byin rlabs shin tu che ste/__sku gsung thugs kyi bzlas par 'gro ba yin/__yi dam lha bsgom pa de sku'i bzlas pa/__snying po bzlas pa de gsung gi bzlas pa yin/__stong pa nyid bsgom pa de thugs kyi bzlas pa yin gsungs/__de la ldang bar 'dod na nam mkha' la 'ja' tshon chags pa bzhin du/__stong pa nyid kyi ngang las bcom ldan 'das mi g.yo ba lam ste bskyed/__sngar bstim pa'i sems dpa' tshon gang ba de'i spyi bor steng na bzhugs par bsams la/__yid kyi sgo nas dad pa dang gus pa bya/__ngag gi sgo nas bstod pa bya/__mchod pa 'bul gsol ba gdab/__de nas ras bris yod na de la bstim/__med na lugs ma'am gdung rten la bstim/__de lta bu mi bzhugs na rang bzhin gyi gnas su gshegs su gsol/__/sangs rgyas chos dang tshogs kyi mchog rnams la/__zhes pa'i skyabs 'gro sems bskyed kyi bsngo ba lan gsum bya/__da lta'i snang ba 'di rmi lam sgyu ma lta bur bsgom gsungs/__zas la brten pa'i le'u ste dang po'o//____//__!_ gnyis pa dbugs la brten pa'i blo sbyong ni/__sems can don du sangs rgyas thob par bya/__de'i ched du dbugs la brten pa'i blo sbyong bsgom snyam du bsams nas dbugs nang du rgyu ba'i dus su/__sems can rnams sdug bsngal rang la smin par bsgom/__dbugs phyir rgyu ba'i dus su rang gi bde ba dang /__dge ba sems can la smin par bsgom/__de gnyis phar log tshur log tu bsgom/__sangs rgyas dang byang chub sems dpa' rnams kyis dge ba'i rtsa ba blos blangs nas sems can la smin par bsgom/__de ltar rang yang sdig sdug dang bral/__byang chub mchog tu sems bskyed la/__yi dam gyi bsgom bzlas sngar bzhin byas la/__dbugs la brten pa'i le'u ste gnyis pa'o//____//__!_ gsum pa lus gang gA'i klung bye ma snyed du sprul nas rigs drug gi sdug bsngal dang du len pa'i blo sbyong bgyi ba/__sems can gyi don du sangs rgyas thob par bya/__de'i ched du lus gang gA'i klung gi bye ma snyed du sprul nas rigs drug gi sdug bsngal dang du len snyam pa'i blo sbyong snyam du bsams la/__sems can dmyal ba'i gnas su rang gi lus gang+gA'i klung gi bye ma snyed du sprul nas sems can dmyal ba rnams kyi sdig sdug thams cad rang gi lus po de rnams kyi thog tu hril hril smin par bsgom/__rang gi bde ba dang dge ba thams cad dmyal ba pa rnams la smin par bsgom/__de ltar sems can dmyal ba pa rnams sdig sdug dang bral/__byang chub mchog tu thugs bskyed tshogs gnyis rdzogs nas mi tho ris lha mi thob par bsgom/__de ltar yi dwags/__dud 'gro/__lha ma yin rnams kyis kyang lha mi'i lus thob par bsgom/__mi'i gnas su lus gang+gA'i klung gi bye ma snyed sprul nas mi rnams kyi sdig sdug thams cad rang gi lus po de rnams kyi steng du hril hril smin par bsgom/__rang gi bde dge mi rnams la smin par bsgom/__de gnyis phar log tshur log tu bsgom/__sangs rgyas dang byang chub sems dpa' rnams kyi dge ba'i rtsa ba rnams kyang blos blangs nas sems can rnams la smin par bsgom/__de ltar mi rnams sdig sdug dang bral/__byang chub mchog tu sems bskyed/__tshogs gnyis rdzogs nas sangs rgyas par bsgom/__de nas phyi snod kyi 'jig rten 'di rin po che'i snod yangs shing rgya che ba gcig tu bsgom/__rang gi lus dum bur gtub la sha khrag gis khengs par bsgom/__de la dmigs la/__oM AHhU~M lan gsum brjod pas bdud rtsir gyur par bsgom/__sangs rgyas dang byang chub sems dpa' rnams kyi thugs ka nas ye shes kyi bdud rtsi babs pas kyang khengs par bsgom/__sum cu rtsa gsum dang /__byang sgra mi snyan dang /__'jig rten gyi khams bdud rtsi dang bcud kyis khengs par bsgom/__de nas bdud rtsi rnams dang por bla ma yi dam gyi lha la 'bul/__de sangs rgyas dang byang chub sems dpa' rnams la 'bul/__de nas rigs drug rnams la phul bas/__de rnams thams cad kyi rnam par mi rtog pa'i ye shes chos sku brnyes par bsam/__de ltar lus ni sems can la drangs nas med/__sems la ni rang bzhin grub pa med pa'i ngang la lhan gyis bzhag__/yi dam gyi bsgom bzlas sngar bzhin bya/__dge ba'i rtsa ba bsngo/__lus gang+gA'i klung gi bye ma snyed du sprul nas rigs drug gi sdug bsngal dang du len pa'i le'u ste gsum pa'o//____//__!_ bzhi pa sha khrag la brten pa'i blo sbyong zhes bgyi ba/__sems can gyi don du sangs rgyas thob par bya/__de'i ched du sha khrag la brten pa'i blo sbyong snyam du bsams nas/__de nas khang pa sha khrag gis khengs par bsams la/__yi dwags sha khrag la dga' ba thams cad 'dus 'dus byas pas 'dus par bsgom/__de nas sha la dga' ba sha zo/__khrag la dga' ba khrag 'thung /__mgo bo ya bdud rgyal pos khyer/__rkang pa ma bdud rgyal mos khyer/__bar rnams lha 'dre gnyan dbus khyer/__rengs na rjen par zo/__mi rings na tshos la zo/__thabs ji ltar legs pa bzhin du gyis byas nas byin pas/__sha zos/__khrag 'thung /__rus pa kun yang mur par bsam/__de ltar lus ni khong rnams la byin nas med/__sems la ni rang bzhin med pa'i ngang du lhan ne 'jog pa yin/__de nas blo rgya cher song nas lcags ri'i nang gang tsam/__lung pa gang tsam/__'jig rten gyi khams thams cad sha khrag gis khengs par bsgom pa yin gsungs/__de nas ldang bar 'dod na dge ba bsngo/__rmi lam lta bur bsgom/__sha khrag btang ba'i le'u ste bzhi pa'o//____//__!__ lnga pa gtor ma la brten pa'i blo sbyong bgyi ba/__sems can thams cad kyi don du sangs rgyas thob par bya/__de'i ched du gtor ma la brten pa'i blo sbyong bya snyam du bsams nas/__phyi snod kyi 'jig rten 'di rin po che yangs shing rgya che ba gcig tu bsgom/__rang gi lus dum bur gtubs la snod khengs par bsgoms nas/__oM AHhU~M lan gsum brjod pas bdud rtsir gyur par bsgom/__de bzhin gshegs pa rin chen mang la sogs pa bzhi'i mtshan brjod byas pas/__dam pa chos skyong ba'i srung ma dpal mgon dang /__lha mo la sogs pa sangs rgyas kyi bstan pa bsrung bar zhal gyis bzhes pa/__dkar phyogs la mngon par dga' ba rnams kyis bskor nas gsol bar bsams la/__na maHsarba ta thA ga ta A ba lo ke te oM saM b+ha ra/__saM b+ha ra hU~M lan gsum brjod pas sangs kyis gsol bar bsam/__rigs drug gi sems can thams cad mchod sbyin gyi gtor ma rgya chen po 'di bzhes la/__bdag dang sems can thams cad kyi rgyud la tshogs rdzogs par gyur cig ces brjod/__bdag gi bsod nams stobs dang ni/__zhes pa'i tshigs brjod/__de ltar lus ni drangs nas med/__sems ni rang bzhin med pas rang bzhin med pa'i ngang la lhan gyis bzhag__/de nas ldang bar 'dod na/__dge ba bsngo/__rmi lam sgyu ma lta bur bsgom/__gtor ma la brten pa'i le'u ste lnga pa'o//____//__!_ drug pa 'byung ba la brten pa'i blo sbyong bgyi ba/__spyod 'jug las/__sa sogs 'byung ba chen po dang /__/nam mkha' bzhin du rtag par yang /__/sems can dpag tu med pa yi/__/rnam mang nyer 'tsho'i rgyur yang shog__/ces gsungs pas/__sems can gyi don du sangs rgyas thob par bya/__de'i ched du 'byung ba la brten pa'i blo sbyong bsgom snyam du bsams nas/__rang gi lus po 'di'i sha dang rus pa rnams phyi'i 'byung ba la thim par bsgom/__khrag dang chu ser rnams chu la thim par bsgom/__dbugs rnams rlung la thim par bsgom/__drod rnams me la thim par bsgom/__lus 'byung ba bzhir gyur pa 'di sas sra zhing brtan pa'i sgo nas sems can gyi don byed/__chus brlan zhing gsher ba'i sgo nas sems can gyi don byed/__mes tsha zhing bsreg pa'i sgo nas sems can gyi don byed/__rlung gis yang zhing g.yo ba'i sgo nas sems can gyi don byed/__nyi ma dang zla ba gnyis mig gnyis su byas nas sems can gyi don byed pa yin/__sems can zas za ba rnams rang gi sha za bar bsgom/__gos gyon pa rnams rang gi pags pa gyon par bsgom/__skom 'thung pa rnams rang gi khrag 'thung bar bsgom/__de nas sems can rnams kyi sdig sdug rang la smin par bsgom/__rang gi bde dge sems can la smin par bsgom/__de gnyis phar log tshur log tu bsgom sangs rgyas dang byang chub sems dpa' rnams kyi dge ba'i rtsa ba yang blos blangs nas sems can la smin par bsgom/__de ltar sems can rnams sdig sdug dang bral/__byang chub mchog tu sems bskyed nas tshogs gnyis rdzogs sgrib gnyis dag nas sangs rgyas par bsgom/__'byung ba bzhi'i lus la oM AHhU~M lan bdun brjod pas bdud rtsir gyur par bsgom/__sangs rgyas dang byang chub sems dpa' rnams kyi thugs ka nas ye shes kyi bdud rtsi babs pas kyang khengs par bsgom/__sum cu rtsa gsum dang /__byang sgra mi snyan dang /__'jig rten gyi khams bdud rtsi dang bcud du gyur pa thams cad kyis kyang khengs par bsgom/__de dang po bla ma dang yi dam la 'bul/__de nas rigs drug gi sems can rnams la phul bas/__de rnams kyi bdud rtsi rnams ma lus par sangs kyis gsol bar bsam/__de rnams kyi rnam par mi rtog pa'i ye shes kyi sku thob par bsgom/__de ltar lus ni bla ma yi dam gyi lha sangs rgyas dang byang chub sems dpa'/__rigs drug rnams la phul nas med/__sems ni rang bzhin gyis grub pa med pa'i ngang la lhan gyis 'jog pa yin gsungs/__yi dam gyi bsgom bzlas sngar bzhin bya/__dge ba'i rtsa ba bsngo/__rmi lam sgyu ma lta bur bsgom/__'byung ba la brten pa'i blo sbyong gi le'u ste drug pa'o//____//__!_ bdun pa lus yid bzhin gyi nor bu rin po cher bsgyur ba'i blo sbyong zhes bgyi ba/__spyod 'jug las/__yid bzhin nor bu bum pa bzang /__/rigs sngags grub dang sman chen dang /__/dpag bsam gyi ni shing dag dang /__/lus can rnams kyi 'dod 'jor 'gyur/__/zhes gsungs pas/__sems can gyi don du sangs rgyas thob par bya ba'i don du lus yid bzhin gyi nor bu rin po cher sprul pa'i blo sbyong bsgom snyam du bsams nas/__de nas rang gi lus po 'di yid bzhin gyi nor bu rin po che kha dog sngon po dbyibs brgyad bzhogs che chung mi 'bring po'i brla tsam du gyur par bsgom/__de rgyal mtshan gyi rtse mo la btags nas mchod pa phul te gsol ba btab pas mi mnyam pa'i char gcig bab/__des sa gzhi la chag chag btab par bsgom/__yang mchod pa phul nas gsol ba btab pas/__mi mnyam pa'i rlung gcig langs/__des sa gzhi la phyags dar byas par bsgom/__yang mchod pa phul nas gsol ba btab pas/__bdud rtsi'i char babs pas/__sems can rnams kyi las dang nyon mongs pa dang /__tha mal gyi sha khrag 'thug pa sbyangs nas byang chub mchog tu thugs bskyed/__tshogs gnyis rdzogs nas sangs rgyas par bsgom/__yang mchod pa phul nas gsol ba btab pas/__rin po che'i char 'bebs pas de rnams la rin po che'i rgyan btags par bsgom/__yang mchod pa phul nas gsol ba btab pas/__lha'i na bza' pany+tsa li ka'i char babs pas de rnams la na bza' gsol bar bsam/__yang mchod pa phul nas gsol ba btab pas/__zag med kyi bdud rtsi'i char babs pa 'jig rten gyi khams khengs par bsgom/__sangs rgyas dang byang chub sems dpa' rnams kyi thugs ka nas bdud rtsi babs pas kyang khengs par bsgom/__sum cu rtsa gsum dang /__sgra mi snyan dang /__'jig rten gyi khams kyi bdud rtsi dang bcud du gyur pa thams cad kyis khengs par bsgom/__de yang dang po de bla ma dang yi dam gyi lha la 'bul/__de nas sangs rgyas dang byang chub sems dpa' rnams la dbul/__de nas rigs drug sangs rgyas pa de rnams la phul bas/___de rnams kyi bdud rtsi de tsho ma lus par sangs kyis gsol bas de thams cad kyi rnam par mi rtog pa'i ye shes chos kyi sku thob par bsgom/__de ltar lus ni bla ma dang yi dam gyi lha/__sangs rgyas dang /___byang chub sems dpa' dang /__rigs drug sangs rgyas pa rnams la 'bul/__sems la rang bzhin grub pa med pas rang bzhin ma grub pa'i ngang la lhan gyis 'jog__/de las ldang bar 'dod na dge ba'i rtsa ba bsngo rmi lam sgyu ma lta bur bsgom/__lus yid bzhin gyi nor bu rin po cher sprul pa'i le'u ste bdun pa'o//____//__!_ brgyad pa blo sbyong 'chi kha ma'i man ngag bgyi ba/__'chi ba pha rol tu phyin pa drug gi sgo nas 'chi dgos pa yin/__'chi ba'i dus su yo byad sum cha gsum du bgos la/__cha gcig bla ma dang dkon mchog gsum la dbul/__cha gcig tshogs gsog byed/__cha gcig la bkye bkang la sogs pa ci rigs su byed pa yin gsung ngo /__/de sbyin pa yin/__tshul khrims la so sor thar pa'i ltung ba bshags sdom byed/__smon 'jug gi sems bskyed sor 'jug byed/__de tshul khrims yin/__bzod pa sngar mkhon yod na bzod gsol byed/__rtsa na med na ka cha sna gcig tsam bsngos nas 'o cag gnyis 'di lta bu zhig yod pas bzod pa mdzod zer/__khos bzod pa len du ma btub kyang rang gi sems la mi bde ba med par byed pa yin/__brtson 'grus de rnams byed pa thams cad dga' spro dang bcas pas byed pa yin/__bsam gtan dang shes rab gnyis 'di khog na yod/__de nas dkon mchog gi spyan sngar mchod pa grub na yan lag bdun pa rgyas par byed/__bdag gi rgyud la theg pa chen po'i blo sbyong gi rtogs pa phyin ci ma log pa skye bar byin gyis brlab tu gsol/__blo sbyong brjed pa'i gnas bzhir mi brjed par byin gyis brlab tu gsol/__'chor ba'i gnas bzhir mi 'chor bar byin gyis brlab tu gsol/__zhes gsol ba btab/__de nas dkon mchog gi spyan sngar yi ge paM dmar po gcig bsgom/__de 'od du zhu ba pad+ma'i sdong po gcig tu gyur par bsgom/__pad+ma'i ze'u 'bru rin po che dar zab kyis brgyan pa la bla ma dang yi dam lha tha mi dad par bsgoms la/__sngar gyi mchod pa de rnams blos blangs dbul/__yan lag bdun pa bya/__sngar bzhin gsol ba gdab/__de nas sa phyogs dben par 'bol ba'i stan la lus rnam snang chos bdun nam/__bsam gtan gyi chos drug la bslab zer nas/__rkang pa rdo rje skyil krung bca'/__sgal tshig gser gyi dong rtse brtsegs pa bzhin du drang tig ste dpungs/__lag pa gnyis lte ba'i sor bzhi tsam gzhal ba'i sar mnyam par bzhag__/mgrin pa lcags kyu ltar bkug cing rgyab mdun gtam gsungs/__g.yon phyogs su chus chus pa lan gsum tsam byas pa'i sna chu thig pa lte ba'i thad kar yong tsam bya/__mig sna rtse la gtad/__so bar rta rnga shong ba tsam byed/__lce ya rkan la sbyar/__mig btsums pa'ang min/__btsums na byings nas 'gro/__bgrad pa'ang min/__bgrad na yengs nas 'gro/__lha'i spyan ltar zim zim du bya/__de nas shes pa de lte ba'i thad kar khyim khyil ba lan gsum byed pa yin gsungs/__de nas sems can gyi don du sangs rgyas thob par bya/__de'i ched du theg pa chen po'i blo sbyong 'chi kha ma'i gdams ngag bsgom snyam du bsams nas 'khor ba'i sdug bsngal 'di thams cad las dge mi dge mi g.yo ba'i las gsum las byung /__de nyon mongs pas kun nas bslangs pa las byung /__nyon mongs pa brgyad khri bzhi stong de rtsa ba bdag tu 'dzin pa 'di yin pas rang bzhin grub pa med pa gcig la nga bdag tu bzung nas 'di'i kha 'dzin shag 'debs byed byed nas las bsags/__las kyis 'khor bar 'khyams nas 'khor ba'i sdug bsngal la thug pa med cing mtha' mi mngon pa zhig nyams su myong /__tshe 'di la yang kha 'dzin kha 'debs byas pas bde rgyu las sdug bsngal du song ba'am/__dge rgyu las mi dge bar song bas rang la rang gi kha 'dzin dang /__shags 'debs byas pas lan/_da phan chad du yang bdag tu 'dzin pa 'di ma spang na snga ma kho na bzhin du 'khor bar 'khyams pas/__'das ma 'ongs da ltar dus gsum du gcig sdug bsngal du 'jug mkhan rang la gces par 'dzin pa'i 'gong po nga bdag bya ba 'di yin min la the tshom mi za/__'di'i kha 'dzin shags 'debs byas pas phan na mthong ba thos pa yid la 'gyur ba rnams lag len du ma btab pa gcig kyang med de 'khor ba las sngar 'dras gang yang ring du ma song bas da gang legs la thong /__byung legs la thong snyam du bgyis la rang bzhin ling skyur/__lhod de klod/__shigs kyis bshig la zhog__/gzhan khams gsum 'khor ba'i sems can 'di rnams spyir mi yong ba min drin can gyi pha ma sha stag kyang yin pas sems can gyi sdug bsngal rang la smin par bsgom/__rang gi bde ba dang /__dge ba sems can la smin par bsgom/__de gnyis phar log tshur log tu bsgom/__sangs rgyas dang byang chub sems dpa' rnams kyis dge ba'i rtsa ba yang blos blangs nas sems can la smin par bsgom/__de ltar sems can rnams sdig sdug dang bral nas sangs rgyas par bsgom/__rang yang sdig sdug dang bral nas yi dam gyi lha'i bsgom bzlas gong dang mthun no/__/de nas dkon mchog gi spyan sngar mchod pa grub na rgyas par byed/__yan lag bdun pa grub na rgyas par byed/__bdag gi rgyud la theg pa chen po blo sbyong gi rtogs pa phyin ci ma log pa skye bar byin gyis brlab tu gsol/__blo sbyong brjed pa'i gnas bzhir mi brjed par byin gyis brlab tu gsol/__'chor ba'i gnas bzhir mi 'chor bar byin gyis brlab tu gsol/__de nas 'chi ba rang gi dus su phyi dbugs chad pa'i dus su sems gsal la rtog pa med pa ston ka'i nam mkha' sprin bral ba lta bu sems can thams cad la yong /__de yang sngar gyi de gnyis gung bsgrigs pa yin/__gung 'grigs na chu sna dang breng 'phreng ba bzhin du song nas de la lo'am zla ba tsam du gnas nas/__bar dor longs spyod rdzogs pa'i skur ldang ba yin no/__/brtson 'grus can mthong chos la sangs rgya ba yin gsungs/__der ma zin na bar do'i chos lus su ldang bas yin te/__bar do byis pa lo lnga len pa'i tshod tsam gcig 'ong /__kha dog lha rnam pa lnga'i tshul du yod/__der sgyu ma'i dpe brgyad dang gnyis su med par shes na dug lnga ye shes lngar gyur nas 'gro ste/__chos kyi dbyings kyi ye shes dang /__mnyam nyid ye shes gnyis chos kyi sku/__me long lta bu longs sku/__bya ba grub pa'i ye shes dang /__so sor rtog pa'i ye shes gnyis sprul pa'i sku'o/__/'od kha dog lnga po de la chags shing mngon par zhen na dug lngar gnas gyur na rgyu drug tu 'khor zhing rigs drug tu 'khyams te skye ba len pa yin gsungs so/__/lar skye ba 'di'i bdun nam bcu drug thug pas sangs rgyas pa yin gsungs te/__'khor ba thogs mtha' med pa la ltos nas sang gnangs gyi tshod tsam yin gsungs/__shin tu le lo can skye ba brgyud nas sangs rgyas pa bya ba yin gsungs/__thun brgyad ma'i man ngag dge legs su gyur cig__/sarba mang+ga lam//____//__!_