JKW-KABUM-04-NGA-001-005

🚧 This website is under continued development. We appreciate your patience!

Previous Text Back to Volume PageNext Text

Wylie title	g.yu thog snying tig gi dris lan
Location	mkhyen brtse'i bka' 'bum Volume 4, sde tshan 1, Text 5, Pages 121-126 (Folios 61a5 to 63b5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. g.yu thog snying tig gi dris lan. In 'jam dbyangs mkhyen brtse'i dbang po'i bka' 'bum, Vol. 4: 121-126. Khams sde dge rdzong sar dgon: Rdzong sar blo gros phun tshogs, 2020.
Genre	Replies to Questions - dris lan
Cycle	གཡུ་ཐོག་སྙིང་ཏིག་ (g.yu thog snying tig)

1 Texts in this Section (sde tshan or chos tshan)

5 121-126	གཡུ་ཐོག་སྙིང་ཏིག་གི་དྲིས་ལན། g.yu thog snying tig gi dris lan Replies to Questions - dris lan	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

ཨོཾ་སྭསྟི། གཡུ་ཐོག་སྙིང་ཏིག་གི་ཐད་སྐྱབས་རྗེ་དེ་ཞབས་རིན་པོ་ཆེ་འཇམ་པའི་རྡོ་རྗེ་མངོན་སུམ་པའི་ཡེ་ཤེས་གཟིགས་པས་མ་ཁྱབ་པ་ཞིག་སོ་སྐྱེ་ཆེས་ཐ་ཤལ་བློ་གྲོས་ཀྱི་མིག་གཉིས་ཀ་ལོང་བས་མཐོང་བའི་ཚུལ་གྱིས་རྒྱུ་མཚན་ཞུ་ན་ཧ་ཅང་ཐལ་པ་ལས་མ་འདས་རུང་། བླ་སློབ་ནང་ལུགས་བུས་ཕ་མའི་གམ་དུ་སྨྲ་བ་ལྟར་གང་དྲན་རང་གར་ཞུ་ན། སྤྱིར་གཞུང་འདི་ལ་སྨིན་གྲོལ་ཆ་ལག་གསུམ། གྲོལ་བྱེད་ལ་བསྐྱེད་རྫོགས་གཉིས། བསྐྱེད་རིམ་ལ། ཕྱི། ནང་། གསང་། དྲིལ། ཞར་བྱུང་བཅས་ལྔ། ཞར་ལས་བྱུང་བ་ལ། མཁའ་འགྲོའི་སྒོས་སྒྲུབ། གསང་སྒྲུབ། ཐུན་མོང་མ་ཡིན་པ་བླ་མའི་རྣལ་འབྱོར་སྙན་བརྒྱུད་སོགས་སུ་མཆིས་པ་ལས། སྟན་ཐོག་གཅིག་ཏུ་ཉམས་སུ་ལེན་པའི་ཚེ། སྔོན་འགྲོ་ཕྱི་སྒྲུབ་ཀྱིས་རྒྱུད་སྦྱངས། དངོས་གཞི་ནང་སྒྲུབ་རྒྱུད་སྡེ་བཞི་དང་འབྲེལ་བའི་ཉམས་ལེན་གྱི་ས་བོན་གདབ། གསང་སྒྲུབ་བླ་མེད་ཐུན་མོང་མ་ཡིན་པའི་སྒྲུབ་པ་དང་དྲིལ་སྒྲུབ་རྒྱུན་གྱི་ཉམས་ལེན་གྱིས་བསྐྱེད་བསྲིང་བས་དངོས་གྲུབ་ཀྱི་འབྲས་བུ་མངོན་དུ་བྱེད་པ་སྟེ། རིམ་བཞིན་བསྙེན་པ། སྒྲུབ་པ། སྒྲུབ་པ་ཆེན་པོའི་ཚུལ་ལམ། བསྙེན་སྒྲུབ་ལས་གསུམ་མམ། བསྐྱེད་རིམ་ཁོ་ནར་བསྙེན་སྒྲུབ་ཡན་ལག་བཞིར་དབྱེ་ན། ནང་སྒྲུབ་སྐབས་རྒྱུད་སྡེ་འོག་མ་གསུམ་དང་སྒོ་བསྟུན་པའི་ཉམས་ལེན་རྣམས་ཉེ་བསྙེན་དང་། བླ་མེད་ཀྱི་ཉམས་ལེན་སྒྲུབ་པར་བཞག་ཀྱང་རུང་། བསྐྱེད་རྫོགས་གཉིས་ཀ་བསྙེན་སྒྲུབ་བཞིའི་སྒོ་ནས་འདོན་པའི་དབང་དུ་བྱས་ནས། སྔོན་འགྲོ་ཕྱི་སྒྲུབ་བསྙེན་པ། ནང་སྒྲུབ་ཉེ་བསྙེན། གསང་སྒྲུབ་སྒྲུབ་པ། རྫོགས་རིམ་སྐུ་གསུམ། རང་ཤར་ལས་སྦྱོར་རྣམས་གཙོ་བོར་ཚོགས་ལམ། སྦྱོར་ལམ་དྲོད་རྩེ་བཟོད། ཆོས་མཆོག་ཆེན་པོའི་ངོ་སྐལ་གྱི་ཉམས་ལེན་ཏེ། ཆོས་མཆོག་གི་རྟེན་དེས་རླུང་སེམས་ཀྱི་ལྷ་སྐུ་སྒྲུབ་པས་རྡོ་རྗེ་གསུམ་གྱི་རྫོགས་རིམ་ཟབ་མོའི་ཉེ་རྒྱུས་མཆོག་གི་དངོས་གྲུབ་འོད་གསལ་གྱི་ལྷ་སྐུ་མངོན་དུ་བྱས་ཏེ། སློབ་པ་དང་མི་སློབ་པའི་ཟུང་འཇུག་གི་གོ་འཕང་བགྲོད་ཚུལ་རྒྱ་ཆེར་སྦྱར་དུ་ཡོད་པར་སེམས་ནའང་བློ་གྲོས་ཕུར་ཁུང་ཐུག་པས་དེ་ཙམ་ལས་ཞུ་རྔོ་མ་ཐོགས། བྱེ་བྲག་ནང་སྒྲུབ་སྐབས། ཐུན་ཁྱད་གཉིས། དང་པོ་ལ། རང་ཐ་མལ་པའི་ངང་ནས་ངག་ནས་ཧཱུྃ་ཞེས་བརྗོད་པའི་རྐྱེན་གྱིས་སྐད་ཅིག་གིས་ལྷ་སྐུར་དྲན་པ་ཙམ་བྱས་ཏེ་གནས་གསུམ་བྱིན་གྱིས་བརླབས་པ་ནི། བྱ་རྒྱུད་ཀྱི་ཉམས་ལེན་དང་སྒོ་མཐུན་པ་སྟེ། སྤྱིར་བྱ་རྒྱུད་ལ་བདག་བསྐྱེད་ཡོད་མེད་སོགས་རྩོད་གཞི་ཆེའང་། རྙིང་མ་རང་ལུགས་ལ་ཁྱད་པར་བར་བདག་གི་རྣལ་འབྱོར་བཞེད་པར་མ་ཟད། བདག་བསྐྱེད་མི་བཞེད་པའི་ཕྱོགས་ལ་རང་སྔགས་དང་ཕྱག་རྒྱ་སོགས་ཀྱིས་གཞི་ལུས་བྱིན་གྱིས་བརླབ་པར་བཤད་པས། སྐབས་འདིར་ཡང་གཞི་ལུས་བྱིན་གྱིས་བརླབ་པའི་ཕྱིར་ལྷར་དྲན་པ་ཙམ་ལས་བསྐྱེད་རིམ་དངོས་གཞི་མ་ཡིན་པའི་ཕྱིར་འགལ་བ་མེད། དེ་ནས་སྲུང་འཁོར་བསྒོམ་པ་སོགས་ཀྱི་རྗེས་ཡེ་ཤེས་པ་སྤྱན་དྲངས་ཏེ། དེའི་འོད་ཟེར་གྱིས་རང་ལུས་ལྷར་དྲན་པའི་གསལ་སྣང་སྔར་ལས་གསལ་ཞིང་བརྟན་པར་བསྒོམ་པ་སྤྱོད་རྒྱུད་ཀྱི་ཉམས་ལེན། ཡེ་ཤེས་པ་རང་ལ་ཐིམ་ནས་གནས་ལྔར་འབྲུ་ལྔས་རྒྱས་གདབ་པ་རྣལ་འབྱོར་རྒྱུད་ཀྱི་ཉམས་ལེན། སྙིང་མགོ་ཐུར་དུ་བལྟ་བ་བློས་གྱེན་དུ་བསློང་པའི་པདྨ་འདབ་བརྒྱད་ཀྱི་དབུས་དང་འདབ་མར་རྡོ་རྗེའི་ཆོ་ག་གསུམ་བསྐྱེད་ཚུལ་གྱིས་སྨན་བླ་དགུ་དང་། དེ་བཞིན་གནས་གཞན་གྱི་ལྷ་བསྒོམ་པ་དང་། དེ་རྣམས་ལ་སེམས་འཛིན་པ་དང་། བསྐྱེད་རིམ་ལ་ལྟས་པའི་རྫོགས་རིམ་ལྷ་སྐུ་བདེ་གསལ་སྟོང་ཉིད་དུ་བསྒོམ་པ་སོགས་བླ་མེད་ཀྱི་ཉམས་ལེན། ཁྱད་པར་བ་ནང་སྒྲུབ་ཞལ་གདམས་དངོས་གྲུབ་རྫིང་བུ་ལྟར་སྦྱར་བ་རྣམས་དཀྱུས་ལྟར། འོན་ཀྱང་སྤར་མ་འདི་དཔེ་ཧ་ཅང་མི་དག་པ་ཆེ་བས་དེ་ཕྱོགས་བྲིས་མ་དཔེ་རྙིང་ཁུངས་དག་ཡོད་སྲིད་ཚེ་གཟིགས་པ་བཙའ་བ་གལ་ཆེ་སྟེ། དཔེར་ན་ནང་སྒྲུབ་སྐབས། ལྡེབ་༤༨་༢བར་གང་གི་པདྨའི་འདབ་མ་བརྒྱད་ལ། ཕྱག་མཚན་བརྒྱད་ལ་སོགས་པ་ལས། ལྷ་བརྒྱད་རིམ་པ་བཞིན་ཀྲོང་བསྐྱེད་བྱ་སྟེ། རང་ལྷར་གསལ་བའི་སྙིང་ག་ཆོས་འཁོར་པདྨ་འདབ་བརྒྱད་ལྟེ་བ་དང་བཅས་པ་ལ་སྨན་བླ་དགུ་བསྒོམ། ཞེས་གསུངས་རྒྱུར། གང་གི་པདྨའི་ཨོ་རྒྱན་གྱི་པདྨ་འདབ་བརྒྱད་ལ་སོགས་བྲིས་ངན་བླུན་པོའི་ལག་རྗེས་སོར་བཞག་སྤར་དུ་བརྐོས་པས་ཅིའང་འབྲེལ་མེད་དུ་སོང་བས་མཚོན། ལས་བྱང་གི་སྐབས་མཆན་དཀྱུས་ཤོར་སོགས་ཐ་ན་ཐད་ཀར་འདོན་ཡང་མི་ལོ་བ་མང་པོ་འདུག་པ་ལྟར་ལས། གསང་སྒྲུབ་ནི་ཏིང་ངེ་འཛིན་གསུམ་གྱིས་ཁོག་ཕུབ་ནས། རྟེན་དང་བརྟེན་པའི་དཀྱིལ་འཁོར་བསྐྱེད་པ་སོགས་རྣལ་འབྱོར་བླ་མེད་ཐུན་མོང་མ་ཡིན་པའི་བསྐྱེད་རིམ་གྱི་ལུས་ཡོངས་སུ་རྫོགས་ཤིང་། ལས་བྱང་ཡང་འདི་དང་མཐུན་པ་བཅས་བསྙེན་སྒྲུབ་སྐབས་ཀྱི་ཉམས་ལེན་གཙོ་བོར་སེམས་ཤིང་། དྲིལ་སྒྲུབ་ནི། བསྙེན་སྒྲུབ་སྔོན་དུ་སོང་བའམ། མ་སོང་ཡང་རུང་སྟེ། རྒྱུན་གྱི་ཉམས་ལེན་འཇུག་བདེ་སྙིང་པོར་དྲིལ་བ་ལ་དེ་སྐད་དུ་ཐ་སྙད་བཏགས་པ་ལས། ཕྱི་ནང་གསང་བའི་དོན་དངོས་སུ་ཚང་བའི་དྲིལ་སྒྲུབ་ནི་མིན་པར་སེམས། འོན་ཀྱང་ཉམས་རྟགས་གསལ་བྱེད་དང་སྦྱར་ན། ཕྱི་ནང་གསང་བའི་བསྙེན་སྒྲུབ་རྒྱས་པར་སྔོན་དུ་སོང་ནས། དྲིལ་སྒྲུབ་ཁོ་ན་ལ་གནད་དུ་བསྣུན་ཅིང་སྤོག་ཆོག་གི་ཚུལ་དུ་ཉམས་སུ་བླངས་པས་གྲུབ་པའི་རྟགས་མཐར་དབྱུང་བའི་ཚུལ་དུ་གསལ། གཞན་ཡང་རྗེ་དྷརྨ་སྭ་མཱིས་གཡུ་ཐོག་སྙིང་ཏིག་གི་མ་ཚང་བ་ཁ་སྐོང་བའི་ཚུལ་དུ་ཆོས་ཚན་འགའ་ཞིག་མཛད་པའི་ནང་ནས་གེགས་སེལ་གྱི་རིམ་པ་ལ། འབྱུང་བ་ལུས་འཁྲུགས་ཀྱི་གེགས་སེལ། ཏིང་ངེ་འཛིན་སེམས་འཁྲུགས་ཀྱི་གེགས་སེལ། བར་ཆད་བདུད་ཀྱི་གེགས་སེལ། དེ་རྣམས་ཐུན་མོང་གི་གེགས་སེལ་དང་བཞིར་མཛད་ཅིང་། དང་པོ་རང་གཞུང་དུ་ཚིག་ལྷུག་པ་ས་བཅད་བཅོ་ལྔ་པ་དང་། དེ་ལས་རྒྱས་པར་འཕྲོས་ཏེ་བྱེ་བ་རིང་བསྲེལ་ཞེས་པའི་གསོ་དཔྱད་ཀྱི་གཞུང་འདི་བྱུང་། ནང་སྒྲུབ་ཀྱི་ལུས་དཀྱིལ་ནི། ཐུན་མོང་བ་ལུས་ལ་ལྷ་བཀོད་པ་ཙམ་ལས། རྫོགས་རིམ་ཐུན་མོང་མ་ཡིན་པའི་སྨིན་བྱེད་དུ་འགྲོ་བའི་ལུས་དཀྱིལ་དངོས་མ་ཡིན་ཏེ། འདི་ཙམ་རྣལ་འབྱོར་རྒྱུད་དུའང་རྙིང་མའི་བདག་འཇུག་ལ་དགོངས་པའི་ལུས་དཀྱིལ་ཙམ་པོ་པ་ཞིག་གསུངས་པ་དང་། སྒོ་མཐུན་པའི་ཕྱིར་གསང་སྒྲུབ་ཀྱི་ཞལ་གདམས་ལས་གསུངས་པའི་ལུས་དཀྱིལ་ནི། ལྷ་ཉིད་སྔགས་ཀྱི་གཟུགས་ཀྱིས་ནི། །སྒྲུབ་པ་པོ་ལ་དངོས་གྲུབ་སྟེར། ཞེས་པ་ལྟར་ངོ་བོ་ལྷ་ལ་རྣམ་པ་ཡི་གེར་བསྒོམ་པའི་ཟབ་མོའི་ལུས་དཀྱིལ་ཕྲ་ཐིག་སོགས་བསྐྱེད་རིམ་ལ་ལྟོས་པའི་རྫོགས་རིམ་རྣམས་དང་སྒོ་མཐུན་པར་སེམས་ལགས། བསྙེན་སྒྲུབ་སྔོན་དུ་སོང་བས། ཆ་ལག་ཕྱི་འཇིགས་པ་བརྒྱད་སོགས་སེལ་བའི་སྲུང་འཁོར། ནང་འབྱུང་བ་ལུས་འཁྲུགས་ཀྱི་བར་ཆད་སེལ་བ། གསང་བའི་བར་ཆད་བདུད་ཀྱི་གེགས་སེལ། བཀྲ་ཤིས་ཚེ་དང་། ཕྲིན་ལས་མེ་དང་། བསྟན་སྲུང་ཆོས་སྐྱོང་དང་། མངོན་ཤེས་པྲའི་སྒྲུབ་པ་སོགས་སོ། །དེ་ལྟར་གང་དྲན་གསོལ་བ་ལ། །ཉེས་པའི་ཚོགས་ཀུན་སྙིང་ནས་བཤགས། །ལེགས་པའི་དགེ་བས་ལེགས་བཤད་ཆར། །རྒྱ་ཆེར་འབེབས་པའི་རྒྱུར་གྱུར་ཅིག །མངྒལཾ།། །། ༈

[edit]

g.yu thog snying tig gi dris lan/__ oM swasti/__g.yu thog snying tig gi thad skyabs rje de zhabs rin po che 'jam pa'i rdo rje mngon sum pa'i ye shes gzigs pas ma khyab pa zhig so skye ches tha shal blo gros kyi mig gnyis ka long bas mthong ba'i tshul gyis rgyu mtshan zhu na ha cang thal pa las ma 'das rung /__bla slob nang lugs bus pha ma'i gam du smra ba ltar gang dran rang gar zhu na/__spyir gzhung 'di la smin grol cha lag gsum/__grol byed la bskyed rdzogs gnyis/__bskyed rim la/__phyi/__nang /_gsang /__dril/__zhar byung bcas lnga/__zhar las byung ba la/__mkha' 'gro'i sgos sgrub/__gsang sgrub/__thun mong ma yin pa bla ma'i rnal 'byor snyan brgyud sogs su mchis pa las/__stan thog gcig tu nyams su len pa'i tshe/__sngon 'gro phyi sgrub kyis rgyud sbyangs/__dngos gzhi nang sgrub rgyud sde bzhi dang 'brel ba'i nyams len gyi sa bon gdab/__gsang sgrub bla med thun mong ma yin pa'i sgrub pa dang dril sgrub rgyun gyi nyams len gyis bskyed bsring bas dngos grub kyi 'bras bu mngon du byed pa ste/__rim bzhin bsnyen pa/__sgrub pa/__sgrub pa chen po'i tshul lam/__bsnyen sgrub las gsum mam/__bskyed rim kho nar bsnyen sgrub yan lag bzhir dbye na/__nang sgrub skabs rgyud sde 'og ma gsum dang sgo bstun pa'i nyams len rnams nye bsnyen dang /__bla med kyi nyams len sgrub par bzhag kyang rung /__bskyed rdzogs gnyis ka bsnyen sgrub bzhi'i sgo nas 'don pa'i dbang du byas nas/__sngon 'gro phyi sgrub bsnyen pa/__nang sgrub nye bsnyen/__gsang sgrub sgrub pa/__rdzogs rim sku gsum/__rang shar las sbyor rnams gtso bor tshogs lam/__sbyor lam drod rtse bzod/__chos mchog chen po'i ngo skal gyi nyams len te/__chos mchog gi rten des rlung sems kyi lha sku sgrub pas rdo rje gsum gyi rdzogs rim zab mo'i nye rgyus mchog gi dngos grub 'od gsal gyi lha sku mngon du byas te/__slob pa dang mi slob pa'i zung 'jug gi go 'phang bgrod tshul rgya cher sbyar du yod par sems na'ang blo gros phur khung thug pas de tsam las zhu rngo ma thogs/__bye brag nang sgrub skabs/__thun khyad gnyis/__dang po la/__rang tha mal pa'i ngang nas ngag nas hU~M zhes brjod pa'i rkyen gyis skad cig gis lha skur dran pa tsam byas te gnas gsum byin gyis brlabs pa ni/__bya rgyud kyi nyams len dang sgo mthun pa ste/__spyir bya rgyud la bdag bskyed yod med sogs rtsod gzhi che'ang /__rnying ma rang lugs la khyad par bar bdag gi rnal 'byor bzhed par ma zad/__bdag bskyed mi bzhed pa'i phyogs la rang sngags dang phyag rgya sogs kyis gzhi lus byin gyis brlab par bshad pas/__skabs 'dir yang gzhi lus byin gyis brlab pa'i phyir lhar dran pa tsam las bskyed rim dngos gzhi ma yin pa'i phyir 'gal ba med/__de nas srung 'khor bsgom pa sogs kyi rjes ye shes pa spyan drangs te/__de'i 'od zer gyis rang lus lhar dran pa'i gsal snang sngar las gsal zhing brtan par bsgom pa spyod rgyud kyi nyams len/__ye shes pa rang la thim nas gnas lngar 'bru lngas rgyas gdab pa rnal 'byor rgyud kyi nyams len/__snying mgo thur du blta ba blos gyen du bslong pa'i pad+ma 'dab brgyad kyi dbus dang 'dab mar rdo rje'i cho ga gsum bskyed tshul gyis sman bla dgu dang /__de bzhin gnas gzhan gyi lha bsgom pa dang /__de rnams la sems 'dzin pa dang /__bskyed rim la ltas pa'i rdzogs rim lha sku bde gsal stong nyid du bsgom pa sogs bla med kyi nyams len/__khyad par ba nang sgrub zhal gdams dngos grub rdzing bu ltar sbyar ba rnams dkyus ltar/__'on kyang spar ma 'di dpe ha cang mi dag pa che bas de phyogs bris ma dpe rnying khungs dag yod srid tshe gzigs pa btsa' ba gal che ste/__dper na nang sgrub skabs/__ldeb 48 2bar gang gi pad+ma'i 'dab ma brgyad la/__phyag mtshan brgyad la sogs pa las/__lha brgyad rim pa bzhin krong bskyed bya ste/__rang lhar gsal ba'i snying ga chos 'khor pad+ma 'dab brgyad lte ba dang bcas pa la sman bla dgu bsgom/__zhes gsungs rgyur/__gang gi pad+ma'i o rgyan gyi pad+ma 'dab brgyad la sogs bris ngan blun po'i lag rjes sor bzhag spar du brkos pas ci'ang 'brel med du song bas mtshon/__las byang gi skabs mchan dkyus shor sogs tha na thad kar 'don yang mi lo ba mang po 'dug pa ltar las/__gsang sgrub ni ting nge 'dzin gsum gyis khog phub nas/__rten dang brten pa'i dkyil 'khor bskyed pa sogs rnal 'byor bla med thun mong ma yin pa'i bskyed rim gyi lus yongs su rdzogs shing /__las byang yang 'di dang mthun pa bcas bsnyen sgrub skabs kyi nyams len gtso bor sems shing /__dril sgrub ni/__bsnyen sgrub sngon du song ba'am/__ma song yang rung ste/__rgyun gyi nyams len 'jug bde snying por dril ba la de skad du tha snyad btags pa las/__phyi nang gsang ba'i don dngos su tshang ba'i dril sgrub ni min par sems/__'on kyang nyams rtags gsal byed dang sbyar na/__phyi nang gsang ba'i bsnyen sgrub rgyas par sngon du song nas/__dril sgrub kho na la gnad du bsnun cing spog chog gi tshul du nyams su blangs pas grub pa'i rtags mthar dbyung ba'i tshul du gsal/__gzhan yang rje d+harma swa mIs g.yu thog snying tig gi ma tshang ba kha skong ba'i tshul du chos tshan 'ga' zhig mdzad pa'i nang nas gegs sel gyi rim pa la/__'byung ba lus 'khrugs kyi gegs sel/__ting nge 'dzin sems 'khrugs kyi gegs sel/__bar chad bdud kyi gegs sel/__de rnams thun mong gi gegs sel dang bzhir mdzad cing /__dang po rang gzhung du tshig lhug pa sa bcad bco lnga pa dang /__de las rgyas par 'phros te bye ba ring bsrel zhes pa'i gso dpyad kyi gzhung 'di byung /__nang sgrub kyi lus dkyil ni/__thun mong ba lus la lha bkod pa tsam las/__rdzogs rim thun mong ma yin pa'i smin byed du 'gro ba'i lus dkyil dngos ma yin te/__'di tsam rnal 'byor rgyud du'ang rnying ma'i bdag 'jug la dgongs pa'i lus dkyil tsam po pa zhig gsungs pa dang /__sgo mthun pa'i phyir gsang sgrub kyi zhal gdams las gsungs pa'i lus dkyil ni/__lha nyid sngags kyi gzugs kyis ni/__/sgrub pa po la dngos grub ster/__zhes pa ltar ngo bo lha la rnam pa yi ger bsgom pa'i zab mo'i lus dkyil phra thig sogs bskyed rim la ltos pa'i rdzogs rim rnams dang sgo mthun par sems lags/__bsnyen sgrub sngon du song bas/__cha lag phyi 'jigs pa brgyad sogs sel ba'i srung 'khor/__nang 'byung ba lus 'khrugs kyi bar chad sel ba/__gsang ba'i bar chad bdud kyi gegs sel/__bkra shis tshe dang /__phrin las me dang /__bstan srung chos skyong dang /__mngon shes pra'i sgrub pa sogs so/__/de ltar gang dran gsol ba la/_/nyes pa'i tshogs kun snying nas bshags/__/legs pa'i dge bas legs bshad char/_/rgya cher 'bebs pa'i rgyur gyur cig__/mang+galaM//____//__!