JKW-KABUM-11-DA-007-004

🚧 This website is under continued development. We appreciate your patience!

Previous Text Back to Volume PageLast text in section.

Wylie title	rdo rje mi 'khrugs pa'i sgo nas tshe ldan sdig pa sbyong ba'i cho ga'i zur rgyan
Location	mkhyen brtse'i bka' 'bum Volume 11, sde tshan 7, Text 4, Pages 274-279 (Folios 15b4 to 18a1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rdo rje mi 'khrugs pa'i sgo nas tshe ldan sdig pa sbyong ba'i cho ga'i zur rgyan. In 'jam dbyangs mkhyen brtse'i dbang po'i bka' 'bum, Vol. 11: 274-279. Khams sde dge rdzong sar dgon: Rdzong sar blo gros phun tshogs, 2020.
Genre	Ritual and Liturgical Texts - cho ga phyag len  ·  Supplemental Instructions - zur 'debs - zur rgyan
Deity	rdo rje mi 'khrugs pa
Colophon	།ཞེས་པ་འདིའང་མཉྫུ་གྷོ་ཥས་ཉེར་མཁོའི་ཟིན་བྲིས་སུ་བགྱིས་པ་མངྒ་ལཾ་བྷ་བ་ཏུ།
	zhes pa 'di'ang many+dzu g+ho Shas nyer mkho'i zin bris su bgyis pa mang+ga laM b+ha ba tu

1 Texts in this Section (sde tshan or chos tshan)

4 274-279	རྡོ་རྗེ་མི་འཁྲུགས་པའི་སྒོ་ནས་ཚེ་ལྡན་སྡིག་པ་སྦྱོང་བའི་ཆོ་གའི་ཟུར་རྒྱན། rdo rje mi 'khrugs pa'i sgo nas tshe ldan sdig pa sbyong ba'i cho ga'i zur rgyan Ritual and Liturgical Texts - cho ga phyag len   ·   Supplemental Instructions - zur 'debs - zur rgyan	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །རྡོ་རྗེ་མི་འཁྲུགས་པའི་སྒོ་ནས་ཚེ་ལྡན་སྡིག་པ་སྦྱོང་བའི་ཆོ་གའི་ཟུར་རྒྱན་བཞུགས་སོ། ཨོཾ་སྭ་སྟི། མི་འཁྲུགས་ལྷ་དགུའི་སྒོ་ནས་ཚེ་ལྡན་གྱི་སྡིག་པ་སྦྱོང་བའི་ཚུལ་ལ། སྦྱོར་བའི་སྐབས་སུ་སྤྲོ་ན་ཤོག་བུ་ལ་སྡིག་པའི་ས་བོན་ཀྃ་ཡིག་ནག་པོ་བསྒྲུབ་བྱའི་མིང་ཡིག་དང་བཅས་བྲིས་པ་བཞག །དངོས་གཞིར་མཆོད་པ་བྱིན་རླབས་ནས་བཟུང་། བདག་མདུན་བུམ་གསུམ། ཆ་གསུམ། བདག་འཇུག་བཅས་གྲུབ་ནས། བསྒྲུབ་བྱ་མདུན་དུ་འཁོད་པའི་མདུན་སྦྱོང་བ་བཤམ་པ་ལ་ཆབ་བྲན། ཨོཾ་སརྦ་བིགྷྣཱན་སོགས་སྦྱོང་བ་ནས་བཟུང་། ཤིན་ཏུ་རྒྱལ་ཞིང་བཀྲ་ཤིས་པར་གྱུར་ཅིག །ཅེས་པའི་བར། གཤིན་པོ་རྗེས་འཛིན་སྐབས་ཇི་ལྟ་བ་ལ། ཚེ་འདས་ཞེས་པའི་ཚབ་ཏུ། ཚེ་དང་ལྡན་པ་ཞེས་བསྒྱུར། དེ་ནས་སློབ་དཔོན་གྱིས། ཁྱེད་རང་གི་མདུན་གྱི་ནམ་མཁར་བླ་མ་དང་གཉིས་སུ་མེད་པའི་རྡོ་རྗེ་མི་འཁྲུགས་པ་ལྷ་དགུའི་དཀྱིལ་འཁོར་གྱི་ལྷ་ཚོགས་ལ་སངས་རྒྱས་དང་བྱང་ཆུབ་སེམས་དཔའི་ཚོགས་དཔག་ཏུ་མེད་པས་བསྐོར་ནས་བཞུགས་པའི་སྤྱན་སྔར་སྒོ་གསུམ་གུས་པས་ཕྱག་འཚལ་ཞིང་སྐྱབས་སུ་འགྲོ་བ་དང་། ལུས་དབུལ་བའི་འདུན་པ་དང་བཅས་པས་ཚིག་འདི་རྣམས་ཀྱི་རྗེས་ཟློས་མཛོད། ཅེས་བརྡ་སྦྱར་ལ། སྤྲོ་ན། སངས་རྒྱས་ཐམས་ཅད་འདུས་པའི་སྐུ། སོགས་དང་། མགོན་པོ་ཐུགས་རྗེ་ཆེ་ལྡན་པ། སོགས་དང་། ཆོས་དབྱིངས་མཉམ་པ་ཉིད་ལས་སོགས་དང་། ཡོན་ཏན་མཆོག་སྟེར་སོགས་ནས། ལྷ་མོ་བརྒྱད་ལ་འདུད། ཅེས་དང་། ཕྱག་བྱར་འོས་པ་སོགས་ཀྱིས་ཕྱག་འཚལ་དུ་གཞུག །གང་ལྟར་ཡང་། གཙོ་བོ་རྒྱལ་བ་སོགས་གཞུང་ལྟར་ལ། ཚེ་འདས་ཞེས་པར། ཚེ་ལྡན་ཞེས་བསྒྱུར། ཀྃ་ཡིག་བསྲེག་པ་རྒྱུད་དང་བསྟན་བཅོས་དངོས་བསྟན་ལ་མེད་ཀྱང་། ཏིལ་སྦྱོང་དང་ཚུལ་མཐུན་པར་ཕྱག་ལེན་དུ་མཛད་པ་ལྟར་སྤྲོ་ན། སློབ་དཔོན་གྱིས་དཔལ་འབར་ལ་མེ་སྦར་བ་ཐོགས་ཏེ། སླར་ཡང་དམིགས་པ་འདི་བཞིན་དུ་མཛོད། ཆོས་ཐམས་ཅད་ཀྱི་གནས་ལུགས་སྤྲོས་བྲལ་དུ་ཤེས་པར་བྱས་ཏེ། དེའི་ངང་ནས་སློབ་དཔོན་ལ་རྡོ་རྗེ་མི་འཁྲུགས་པ་དངོས་ཡིན་སྙམ་པའི་མོས་གུས་བྱས་པས། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། ཁྱེད་རང་གི་སྤྱི་བོ་ནས་ཞུགས། ལུས་ཀྱི་ནང་ཐམས་ཅད་གང་བས། ཁྱེད་རང་གི་ཚེ་རབས་ཐོག་མ་མེད་པ་ནས་བསགས་པའི་སྡིག་པ་དང་སྒྲིབ་པ། སྒོ་གསུམ་གྱི་བར་དུ་གཅོད་པར་ཐམས་ཅད་སྨན་པ་མཁས་པས་སྐྱུག་སྨན་བཏང་པ་བཞིན། བ་སྤུའི་བུ་ག་དང་དབང་པོའི་སྒོ་རྣམས་ནས། ཀཾ་ཡིག་ནག་པོ་དང་དུད་ཁུ་དང་སོལ་ཁུའི་རྣམ་པ་ནག་ཉིལ་གྱིས་ཐོན། མདུན་གྱི་སྡིག་པའི་ས་བོན་ཀཾ་ཡིག་ནག་པོ་དེ་ཉིད་ལ་ཐིམ་པར་མོས་མཛོད། ཀྃ་ཡིག་དེ་ཉིད་འཁྲུལ་ངོར་སྣང་བ་ཁྱེད་རང་གིས་གཙོ་བྱས་པའི་སེམས་ཅན་ཐམས་ཅད་ཀྱི་སྡིག་སྒྲིབ་དང་སྡུག་བསྔལ་ཐམས་ཅད་ཀྱི་ངོ་བོ་བསྲེག་ཅིང་སྦྱོང་དུ་རུང་བ་དཔེ་བུད་ཤིང་དང་ཆོས་མཚུངས་པ་དེ་ཉིད། སློབ་དཔོན་གྱིས་ཆོས་ཐམས་ཅད་ཀྱི་རང་བཞིན་གྱི་སྟོང་པ་ཉིད་དུ་ཤེས་པའི་བདག་མེད་རྟོགས་པའི་ཡེ་ཤེས་རང་བཞིན་གྱིས་འོད་གསལ་བས་སྦྱོང་བྱེད་མེ་དང་ཆོས་མཚུངས་སུ་སྣང་བ་དེས་བསྲེགས་ཤིང་སྦྱངས་པས་འཁོར་བའི་སྡུག་བསྔལ་རྒྱུ་དང་བཅས་པ་ཐམས་ཅད་ཡེ་ཤེས་ཀྱི་སྣང་བ་ཆེན་པོ་གཅིག་ཏུ་འབར་བར་མོས་པ་མཛོད། ཅེས་དང་། སྟོང་ཉིད་ཡེ་ཤེས་འབར་བའི་མེས། །ཚེ་ལྡན་སྒྲིབ་པའི་བུད་ཤིང་དང་། །འཁོར་བའི་སྡུག་བསྔལ་མ་ལུས་ཀུན། །ཡེ་ཤེས་སྣང་བར་འབར་གྱུར་ཅིག །ཅེས་དང་། ཀྃ་ཀ་བརྗོད་ཅིང་བསྲེག་དེ་ནས། ནམ་མཁའི་མཐའ་དང་མཉམ་པའི་ཞེས་སོགས་མཚམས་སྦྱར་ཏེ་དབང་གི་དངོས་གཞི་མཐའ་རྟེན་དང་བཅས་པ་བསྐུར་ལ། ཆ་ཡིས་ཀྱང་ནི་སྤྱད་དུ་གསོལ། ཞེས་པའི་མཐར། དེ་རྣམས་ཀྱི་སྒོ་ནས་རྡོ་རྗེ་མི་འཁྲུགས་པ་ལྷ་དགུའི་དཀྱིལ་འཁོར་དུ་ཕྱིར་བཟློག་ལ་བརྟེན་ནས་སྡིག་པ་སྦྱོང་བ་དང་། དབང་བསྐུར་ཏེ་སྡིག་པ་སྦྱོང་བ་དང་བཅས་པ་ལེགས་པར་ཐོབ་པ་ཡིན་པས་རང་གཞན་གྱི་དོན་རྒྱ་ཆེན་པོ་མཛད་པར་ཞུ། ཅེས་དང་། བསོད་ནམས་འདི་ཡིས་སོགས་བརྗོད་ལ་བསྒྲུབ་བྱ་རང་གནས་སུ་བཏང་། རྗེས་ཆོག་གཞུང་ལྟར་བྱའོ།། །། ༈

གལ་ཏེ་ཕྱིར་ཟློག་རྐྱང་པ་བྱེད་ན། མིང་བྱང་བསྲེགས་ཟིན་པའི་དེ་མ་ཐག །དེ་རྣམས་ཀྱིས་རྡོ་རྗེ་མི་འཁྲུགས་པ་ལྷ་དགུའི་དཀྱིལ་འཁོར་དུ་ཕྱིར་བཟློག་གི་སྒོ་ནས་སྡིག་པ་སྦྱོང་བའི་རིམ་པ་ཕུལ་གྲུབ་པ་ཡིན་པས་དགའ་སྤྲོ་རྒྱ་ཆེན་པོ་མཛོད། ཅེས་དང་། །དགེ་བསྔོ་བྱའོ།། །། ༈

ཡང་ཕྱིར་ཟློག་རྐྱང་པའི་སྐབས། །གཞུང་གིས་དངོས་བསྟན་ལྟར་བྱང་སྡོམ་མདོར་བསྡུས་པའི་ཚུལ་གྱིས་འབོགས་ན། ཕྱག་འཚལ་སོགས་ཀྱི་བརྡ་སྤྲད་པའི་སྐབས་སྒོ་གསུམ་གུས་པས་ཕྱག་འཚལ་ཞིང་མཆོད་པ་འབུལ་བ་སོགས་ཡན་ལག་བདུན་གྱི་སྒོ་ནས་རྒྱུད་སྦྱོང་བ་དང་། སྐྱབས་སུ་གསོལ་ཞིང་ལུས་དབུལ་བའི་འདུན་པ་སོགས་འདྲ། ཕྱག་འཚལ་གྱི་རྗེས་སུ། །ཇི་སྙེད་སུ་དག་སོགས་ཡན་ལག་བདུན་པ་དང་། གཙོ་བོ་རྒྱལ་བ་སོགས། དེ་ནས་བླ་མ་དང་དཀྱིལ་འཁོར་གྱི་གཙོ་བོ་རྡོ་རྗེ་མི་འཁྲུགས་པ་ཐ་མི་དད་པ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་ཏེ་མངོན་སུམ་བཞིན་དུ་བཞུགས་པའི་སྤྱན་སྔར་སྐྱབས་གསུམ་སྔོན་དུ་འགྲོ་བས་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བགྱིའོ་སྙམ་པའི་སྨོན་པ་དང་། །དེའི་ཆེད་དུ་ཐེག་པ་ཆེན་པོའི་ལམ་ལ་བསླབ་པར་བགྱིའོ་སྙམ་པའི་འཇུག་པ་བྱང་ཆུབ་ཀྱི་མཆོག་ཏུ་སེམས་བསྐྱེད་པ་འདིའི་རྗེས་ཟློས་མཛོད། བྱང་ཆུབ་སྙིང་པོར་སོགས་ལན་གསུམ་དང་། ཇི་ལྟར་སྔོན་གྱི་སོགས་ལན་གསུམ་རྗེས་ཟློས་བྱར་གཞུག །དེ་ནས་མིང་བྱང་བསྲེག་པ་དཀྱུས་ལྟར་རྗེས། དེ་རྣམས་ཀྱིས་རྡོ་རྗེ་མི་འཁྲུགས་པ་ལྷ་དགུའི་དཀྱིལ་འཁོར་དུ་ཕྱིར་ཟློག་གི་སྒོ་ནས་སྡིག་པ་སྦྱོང་བ་བྱང་ཆུབ་མཆོག་ཏུ་སེམས་བསྐྱེད་པའི་སྡོམ་པ་དང་བཅས་ཕུལ་གྲུབ་པ་ཡིན་པས་དགའ་སྤྲོ་རྒྱ་ཆེན་པོ་མཛོད། ཅེས་དང་། བསོད་ནམས་འདི་ཡིས་སོགས་བསྔོ་སྨོན་རྒྱས་བསྡུས་གང་རིགས་བྱའོ། །ཞེས་པ་འདིའང་མཉྫུ་གྷོ་ཥས་ཉེར་མཁོའི་ཟིན་བྲིས་སུ་བགྱིས་པ་མངྒ་ལཾ་བྷ་བ་ཏུ། །

[edit]

rdo rje mi 'khrugs pa'i sgo nas tshe ldan sdig pa sbyong ba'i cho ga'i zur rgyan/__ @#/_/rdo rje mi 'khrugs pa'i sgo nas tshe ldan sdig pa sbyong ba'i cho ga'i zur rgyan bzhugs so/__oM swa sti/__mi 'khrugs lha dgu'i sgo nas tshe ldan gyi sdig pa sbyong ba'i tshul la/__sbyor ba'i skabs su spro na shog bu la sdig pa'i sa bon ka~M yig nag po bsgrub bya'i ming yig dang bcas bris pa bzhag__/dngos gzhir mchod pa byin rlabs nas bzung /__bdag mdun bum gsum/__cha gsum/__bdag 'jug bcas grub nas/__bsgrub bya mdun du 'khod pa'i mdun sbyong ba bsham pa la chab bran/__oM sarba big+h+nAn sogs sbyong ba nas bzung /__shin tu rgyal zhing bkra shis par gyur cig__/ces pa'i bar/__gshin po rjes 'dzin skabs ji lta ba la/__tshe 'das zhes pa'i tshab tu/__tshe dang ldan pa zhes bsgyur/__de nas slob dpon gyis/__khyed rang gi mdun gyi nam mkhar bla ma dang gnyis su med pa'i rdo rje mi 'khrugs pa lha dgu'i dkyil 'khor gyi lha tshogs la sangs rgyas dang byang chub sems dpa'i tshogs dpag tu med pas bskor nas bzhugs pa'i spyan sngar sgo gsum gus pas phyag 'tshal zhing skyabs su 'gro ba dang /__lus dbul ba'i 'dun pa dang bcas pas tshig 'di rnams kyi rjes zlos mdzod/__ces brda sbyar la/__spro na/__sangs rgyas thams cad 'dus pa'i sku/__sogs dang /__mgon po thugs rje che ldan pa/__sogs dang /__chos dbyings mnyam pa nyid las sogs dang /__yon tan mchog ster sogs nas/__lha mo brgyad la 'dud/__ces dang /__phyag byar 'os pa sogs kyis phyag 'tshal du gzhug__/gang ltar yang /__gtso bo rgyal ba sogs gzhung ltar la/__tshe 'das zhes par/__tshe ldan zhes bsgyur/__ka~M yig bsreg pa rgyud dang bstan bcos dngos bstan la med kyang /__til sbyong dang tshul mthun par phyag len du mdzad pa ltar spro na/__slob dpon gyis dpal 'bar la me sbar ba thogs te/__slar yang dmigs pa 'di bzhin du mdzod/__chos thams cad kyi gnas lugs spros bral du shes par byas te/__de'i ngang nas slob dpon la rdo rje mi 'khrugs pa dngos yin snyam pa'i mos gus byas pas/__slob dpon gyi thugs ka nas 'od zer 'phros/__khyed rang gi spyi bo nas zhugs/__lus kyi nang thams cad gang bas/__khyed rang gi tshe rabs thog ma med pa nas bsags pa'i sdig pa dang sgrib pa/__sgo gsum gyi bar du gcod par thams cad sman pa mkhas pas skyug sman btang pa bzhin/__ba spu'i bu ga dang dbang po'i sgo rnams nas/__kaM yig nag po dang dud khu dang sol khu'i rnam pa nag nyil gyis thon/__mdun gyi sdig pa'i sa bon kaM yig nag po de nyid la thim par mos mdzod/__ka~M yig de nyid 'khrul ngor snang ba khyed rang gis gtso byas pa'i sems can thams cad kyi sdig sgrib dang sdug bsngal thams cad kyi ngo bo bsreg cing sbyong du rung ba dpe bud shing dang chos mtshungs pa de nyid/__slob dpon gyis chos thams cad kyi rang bzhin gyi stong pa nyid du shes pa'i bdag med rtogs pa'i ye shes rang bzhin gyis 'od gsal bas sbyong byed me dang chos mtshungs su snang ba des bsregs shing sbyangs pas 'khor ba'i sdug bsngal rgyu dang bcas pa thams cad ye shes kyi snang ba chen po gcig tu 'bar bar mos pa mdzod/__ces dang /__stong nyid ye shes 'bar ba'i mes/__/tshe ldan sgrib pa'i bud shing dang /__/'khor ba'i sdug bsngal ma lus kun/__/ye shes snang bar 'bar gyur cig__/ces dang /__ka~M ka brjod cing bsreg de nas/__nam mkha'i mtha' dang mnyam pa'i zhes sogs mtshams sbyar te dbang gi dngos gzhi mtha' rten dang bcas pa bskur la/__cha yis kyang ni spyad du gsol/__zhes pa'i mthar/__de rnams kyi sgo nas rdo rje mi 'khrugs pa lha dgu'i dkyil 'khor du phyir bzlog la brten nas sdig pa sbyong ba dang /__dbang bskur te sdig pa sbyong ba dang bcas pa legs par thob pa yin pas rang gzhan gyi don rgya chen po mdzad par zhu/__ces dang /__bsod nams 'di yis sogs brjod la bsgrub bya rang gnas su btang /__rjes chog gzhung ltar bya'o//____//__!_ gal te phyir zlog rkyang pa byed na/__ming byang bsregs zin pa'i de ma thag__/de rnams kyis rdo rje mi 'khrugs pa lha dgu'i dkyil 'khor du phyir bzlog gi sgo nas sdig pa sbyong ba'i rim pa phul grub pa yin pas dga' spro rgya chen po mdzod/__ces dang /__/dge bsngo bya'o//____//__!_ yang phyir zlog rkyang pa'i skabs/__/gzhung gis dngos bstan ltar byang sdom mdor bsdus pa'i tshul gyis 'bogs na/__phyag 'tshal sogs kyi brda sprad pa'i skabs sgo gsum gus pas phyag 'tshal zhing mchod pa 'bul ba sogs yan lag bdun gyi sgo nas rgyud sbyong ba dang /__skyabs su gsol zhing lus dbul ba'i 'dun pa sogs 'dra/__phyag 'tshal gyi rjes su/__/ji snyed su dag sogs yan lag bdun pa dang /__gtso bo rgyal ba sogs/__de nas bla ma dang dkyil 'khor gyi gtso bo rdo rje mi 'khrugs pa tha mi dad pa la sangs rgyas dang byang chub sems dpa'i tshogs kyis bskor te mngon sum bzhin du bzhugs pa'i spyan sngar skyabs gsum sngon du 'gro bas sems can thams cad kyi don du rdzogs pa'i sangs rgyas kyi go 'phang thob par bgyi'o snyam pa'i smon pa dang /__/de'i ched du theg pa chen po'i lam la bslab par bgyi'o snyam pa'i 'jug pa byang chub kyi mchog tu sems bskyed pa 'di'i rjes zlos mdzod/__byang chub snying por sogs lan gsum dang /__ji ltar sngon gyi sogs lan gsum rjes zlos byar gzhug__/de nas ming byang bsreg pa dkyus ltar rjes/__de rnams kyis rdo rje mi 'khrugs pa lha dgu'i dkyil 'khor du phyir zlog gi sgo nas sdig pa sbyong ba byang chub mchog tu sems bskyed pa'i sdom pa dang bcas phul grub pa yin pas dga' spro rgya chen po mdzod/__ces dang /__bsod nams 'di yis sogs bsngo smon rgyas bsdus gang rigs bya'o/__/zhes pa 'di'ang many+dzu g+ho Shas nyer mkho'i zin bris su bgyis pa mang+ga laM b+ha ba tu/__/