PJCW-KABUM-04-NGA-022

🚧 This website is under continued development. We appreciate your patience!

Previous Text Back to Volume PageNext Text

Wylie title	'dus mdo'i dbang gi go don zin bris
Location	dpal sprul bka' 'bum Volume 4, Text 22, Pages (Folios to )
Author	དཔལ་སྤྲུལ་རིན་པོ་ཆེ་
Less details More details
Citation
Genre	Empowerment Ritual - dbang chog - dbang skur  ·  Notes - zin bris

Tibetan Text

[edit]

༄༅། །འདུས་མདོའི་དབང་གི་གོ་དོན་ཟིན་བྲིས་བཞུགས་སོ། །

བླ་མ་ལ་ཕྱག་འཚལ་ལོ། །སྒོ་འབྱེད་ཕྱག་རྡོར་གྱི་དབང་གི་དུས་དབང་མི་ཐོབ་པའི་གེགས་བརྒྱད་བཤད་པ་ནི། དབང་གཞུང་ལས། སངས་རྒྱས་ཀུན་གྱི་དངོས་གྲུབ་མཆོག །ཅེས་པ་ལ་སོགས་པས་བསྟན་པ་ལྟར་ཡིན་ཏེ། སློབ་དཔོན་གྱི་བཀའ་བཅག་ཅིང་བརྙས་པ་བྱེད་པ་དང་གཅིག །རྡོ་རྗེའི་སྤུན་ལ་འཁུ་ལྡོག་གིས་གདུང་སེམས་མེད་པ་དང་གཉིས། བྱང་ཆུབ་ཀྱི་སེམས་དང་ཡི་དམ་གྱི་ལྷ་སྤོངས་པ་དང་གསུམ། སེམས་ཅན་སྡུག་བསྔལ་བ་ལ་སྙིང་རྗེའི་ཐག་པ་གཅོད་པ་དང་བཞི། གསང་བ་སྣོད་མིན་ལ་སྦྱིན་པ་དང་ལྔ། བླ་མ་ལ་བཀུར་སྟི་མེད་ཅིང་སེར་སྣས་བཅིང་བ་དང་དྲུག །རང་བཟོ་དང་ཕོ་ཚོད་ཀྱིས་ཆོས་ལ་དབང་ཟ་བ་དང་བདུན། འདོད་པ་དང་ཁེ་དྲག་གི་དབང་གིས་གསང་བའི་དམ་ཚིག་སྤོངས་པ་དང་བརྒྱད་དོ། །ལྷ་མིའི་ཐེག་པའི་དུས། རྐྱེན་གྱུར་ལས་ཀྱི་བག་ཆགས་རགས་པ་ཞེས་ངན་སོང་དུ་ལྟུང་བྱེད་ཀྱི་ལས་མི་དགེ་བ་སོགས་ཡིན། འཇིག་རྟེན་ཕ་རོལ་ལ་ཡིད་ཆེས་པ་ནི་ཚེ་ཕྱི་མ་ཡོད་པ་ལ་ཡིད་ཆེས་པ་ཡིན། ལས་རྒྱུ་འབྲས་ནི་རྒྱུ་དགེ་མི་དགེ་གཉིས་ལས་འབྲས་བུ་བདེ་སྡུག་གཉིས་འབྱུང་བ་ལ་ཡིད་ཆེས་པ་ཡིན། འཇིག་རྟེན་པའི་ཡང་དག་པའི་ལྟ་བ་ཞེས་པ་ལས་རྒྱུ་འབྲས་ལ་ཡིད་ཆེས་པ་དེ་ཡིན། གཏན་ཁྲིམས་ཞེས་པ། ཤི་མ་སོང་བར་དུ་སྡོམ་པ་ལེན་པ་དེ་ཡིན། དུས་ཁྲིམས་ཡན་ལག་བརྒྱད་པ་ཞེས་པ་སང་ཉི་མ་མ་ཤར་གྱི་བར་དུ་སྡོམ་པ་ལེན་པ་དེ་ཡིན། རང་གི་འབྲས་བུ་འབྱིན་ནུས་ཀྱི་བར་ཞེས་པ་དགེ་བའི་ལས་གང་བྱེད་ཀྱང་ལས་དེ་མཐར་ཕྱིན་པ་ནས་འབྲས་བུ་བསྐྱེད་ནུས་པ་ཡིན་པས་དེ་ཙམ་ལ་ཟེར་བ་ཡིན། ཁམས་གོང་མར་སྐྱེ་བ་ལ་ཞི་རགས་ཀྱི་བསམ་གཏན་བསྒོམ་ཚུལ་ནི། དཔེར་ན་དང་པོ་བསམ་གཏན་གཅིག་ཀྱང་མ་ཐོབ་པའི་གོང་དུ་རང་རེ་འདོད་ཁམས་པ་རྣམས་ཀྱི་སེམས་རྣམ་པར་རྟོག་པའི་དབང་དུ་གྱུར་པ་འདི་ནི་ཤིན་ཏུ་རགས་པས། བསམ་གཏན་དང་པོ་བའི་སེམས་ཐོབ་ན་ནི་རྣམ་རྟོག་འདི་དག་ཞི་བས་ཤིན་ཏུ་ཞི་བ་ཡིན་པས་དེ་ཐོབ་པར་བྱའོ་སྙམ་ནས་འདོད་ཁམས་ཀྱི་རྣམ་རྟོག་རྣམས་བཀག་ནས་བསྒོམ་པས་བསམ་གཏན་དང་པོ་ཐོབ། དེ་ནས་བསམ་གཏན་དང་པོ་ནི་ད་དུང་རྟོག་དཔྱོད་ཀྱི་བློ་དང་བཅས་པ་ཡིན་པས་རགས་ལ། གཉིས་པ་ནི་རྟོག་དཔྱོད་དང་བྲལ་བ་ཡིན་པས་ཞི་བས་ན་དེ་ཐོབ་པར་བྱའོ་སྙམ་ནས་རྟོག་དཔྱོད་སྤངས་ནས་བསྒོམ་པས་བསམ་གཏན་གཉིས་པ་ཐོབ་པ་སོགས་ས་འོག་མ་དེའི་སྐྱོན་དུ་ལྟ་བས་དེའི་ཆགས་པ་དང་བྲལ་བར་བྱེད་པ་ཡིན། ཟག་པ་དང་བཅས་པའི་དགེ་བ་ཞེས་པ་འཁོར་བའི་བདེ་འབྲས་བསྐྱེད་ཅིང་ཐར་པའི་རྒྱུ་མ་ཡིན་པ་ལ་ཟེར། གཟུགས་ལ་ཆགས་བྲལ་ནི། བདག་ནི་སོགས། དེ་ནས་དཀྱིལ་འཁོར་སྒྲིབ་ལ་སློབ་བུ་རྣམས་ཕྱི་ན་བཞག་བཞིན། བགེགས་གཏོར་གཏོང་། གུ་གུལ་བདུག །སློབ་མ་རྣམས་ནང་དུ་རྫོགས་པ་དང་སྒོ་བཅད། རྡོར་སེམས་སྒོམ་བཟླས་བྱ། བསྲུང་འཁོར། མཎྜལ་འབུལ། གསོལ་གདབ་ནི། ཀྱེ་རིག་ལྔའི་སོགས། ༤ཡོལ་བ་བཀྲོལ། གཙོ་བོ་ལ་གསོལ་བ། ཀྱེ་མ་བླ་མ་སོགས། ༤ལན་གསུམ། བླ་མས། ཀྱེ་མཁྱེན་ནི་སོགས། སློབ་མས་བདག་ནི་འབྲས་བུ་སོགས། ༤ལན་གསུམ། བླ་མས། ཨེ་མ་ཨེ་མ་སོགས། ༡༢བདུད་རྩི་ལྕེ་ལ་བཞག །འདི་ནི་ཁྱོད་ཀྱི་སོགས། ༧བྱིན་འབེབ་ནི་སློབ་བུའི་སྙིང་གི་ནང་སོགས་ཚིག་རིང་། བྱིན་རྫས་བདུག །སློབ་བུ་རྣམས་ཤར་སྒོ་ནས་ཕྱག་འཚལ་ཏེ། ཀྱེ་ཤར་སྒོ་སོགས། ཕྱོགས་གཞན་དེའི་འགྲེ། མེ་ཏོག་དོར་བ་ནི། ཀྱེ་བདེ་གཤེགས་རིགས་ལྔའི་སོགས། ༤དོར་རོ། །མིག་དར་བཀྲོལ་བ་ནི། སྟོན་པ་རིགས་ལྔའི་སོགས། ༥ཞེས་བཀྲོལ། དེ་ནས་བླ་མས། ཀྱེ་མ་རིགས་ཀྱི་བུ་སོགས། ༧དཀྱིལ་འཁོར་རྣམ་དག་བཤད། དེ་ཡན་ཆད་སྔོན་འགྲོ་རྣམ་པ་བཅུའོ། །དབང་བསྐུར་བ་དངོས་ལ་མཎྜལ་ཕུལ། གསོལ་གདབ། ཀུན་བཟང་སོགས། ༢མཆོད་པ་བཀྱག །མེ་ཏོག་མགོའམ་དཔུང་གཡོན་བཏགས་པ། མེ་ཏོག་གང་ལ་སོགས། ༣དེ་ནས་རིགས་དབང་ལྔ་ལས་དང་པོ་མི་བསྐྱོད་པ་ཆུའི་དབང་། སློབ་མ་རྡོར་སེམས་སོགས་ཚིག་རིང་། ཧཱུྃ་གཟུགས་ཀྱི་ཕུང་པོ་སོགས། ༤སྣང་མཐའ་རྡོ་རྗེའི་དབང་ལ། སློབ་མ་སྣང་མཐའ་སོགས། ཚིག་རིང་། ཧཱུྃ་འདུ་ཤེས་སོགས། ༤རིགས་ཀྱི་བུ་སོགས། མིང་དབང་ནི། སློབ་མ་རྣམ་སྣང་སོགས། ཧཱུྃ་རྣམ་ཤེས་སོགས། རིགས་ཀྱི་བུ་སོགས། རིན་འབྱུང་དབུ་རྒྱན་ནི། སློབ་མ་རིན་འབྱུང་སོགས། ཚོར་བའི་སོགས། ༤འོ་རིགས་ཀྱི་བུ་སོགས། དོན་གྲུབ་དྲིལ་བུའི་དབང་ནི། སློབ་མ་དོན་གྲུབ་སོགས། ཨེ་མ་ཧོ་འགྲོ་མཆོག་སོགས། ཧཱུྃ་འདུ་བྱེད་སོགས། ༤འོ་རིགས་ཀྱི་བུ་སོགས། ཀུན་བཟང་རྡོ་དྲིལ་གྱི་དབང་ནི། སློབ་མ་ཀུན་ཏུ་བཟང་པོ་སོགས། ཨོཾ་ཨཱཿཧཱུྃ་ཐབས་དང་ཤེས་རབ་སོགས། འོ་རིགས་ཀྱི་བུ་སོགས། བུམ་དབང་ལ་བུམ་པ་བཅུའི་བདུད་རྩི་གཙོ་བོའི་བུམ་པར་བསྡུས་ཀྱང་རུང་། རེ་རེ་ནས་བསྐུར་ཡང་རུང་སྟེ། ཤར་བུམ། ནུབ་བུམ། དབུས་བུམ། ལྷོ་བུམ། བྱང་བུམ་རྣམས་རིམ་པར། ལྷ་ཐམས་ཅད་སོགས་ནས་ཧཱུྃ་རྡོ་རྗེ་སེམས་དཔའ་བཅོམ་ལྡན་སོགས། དེའི་རིགས་འགྲེ། སིདྡྷི་ཕ་ལ་ཧཱུྃ་ཨཱཿའོ་རིགས་ཀྱི་བུ་སོགས་ཀྱིས་བུམ་ཆུ་བླུད། ཁྲུས་བྱ། བརྡའི་དབང་ནི། རིག་ལྔའི་སྐུ་བསྟན་ལ། འོ་རིགས་འཁོར་བའི་རྒྱུ་འབྲས་གཉིས་ཡིན། དེ་བཞིན་དུ་ལམ་བདེན་རྒྱུ་འགོག་པ་འབྲས་བུ་ཡིན་པས་དེ་གཉིས་ཐར་བའི་རྒྱུ་འབྲས་གཉིས་ཡིན། དེ་ལ་སྤང་བླང་བྱེད་པའི་དུས། སྡུག་བསྔལ་ཤེས་པར་བྱ། ཀུན་འབྱུང་སྤང་བར་བྱ། འགོག་པ་ཐོབ་པར་བྱ། ལམ་རང་རྒྱུད་ལ་བརྟེན་དགོས་པ་ཡིན། བདེན་པ་བཞིའི་རྣམ་པ་བཅུ་དྲུག་ནི། མི་རྟག་པ། སྡུག་བསྔལ་བ། སྟོང་པ། བདག་མེད་བཞི་སྡུག་བསྔལ་གྱི་རྣམ་པ་བཞི་ཡིན། རྒྱུ་ཀུན་འབྱུང་། རྐྱེན། རབ་སྐྱེ་བཞི་ཀུན་འབྱུང་གི་རྣམ་པ། འགོག་པ། ཞི་བ། གྱ་ནོམ་པ། ངེས་པར་འབྱུང་བ་བཞི་འགོག་པའི་རྣམ་པ། ལམ་རིག་པ་བསྒྲུབ་པ་ངེས་པར། འབྱིན་པ་བཞི་ལམ་བདེན་གྱི་རྣམ་པའོ། །ཕྱི་གཟུང་ཡུལ་རགས་སྣང་ཞེས་པ། རི་རབ་ཁང་ཁྱིམ་སོགས་དངོས་པོ་རགས་པ་རྣམས་ཡིན། སེམས་ཀྱི་རྒྱུན་ཞེས་པ། སེམས་སྐད་ཅིག་མ་དུ་མ། མཐུད་པའི་ཆགས་སྡང་སོགས་ཀྱི་རྣམ་རྟོག་རགས་པ་རྣམས་ཡིན། རགས་སྣང་རྩོམ་གཞི་ཞེས་པ་ཕྱི་ཡུལ་རགས་པ་རྣམས་རྡུལ་ཕྲན་དུ་མ་འདུས་པ་དང་། རྣམ་རྟོག་རགས་པ་རྣམས་སྐད་ཅིག་དུ་མ་འདུས་པ་ཡིན་པས་རྡུལ་ཕྲན་དང་སྐད་ཅིག་གཉིས་ལ་རྩོམ་གཞི་ཟེར་བ་ཡིན། རྡུལ་ཕྲན་དང་སྐད་ཅིག་དེ་གཉིས་དོན་དམ་བདེན་གྲུབ་ཏུ་འདོད་པས་ཆོས་ཀྱི་བདག་མེད་མ་རྟོགས་པ་ཡིན། ང་དང་ང་ཡི་བ་གཉིས་ཀ་བདེན་མེད་དུ་རྟོགས་པས་གང་ཟག་གི་བདག་མེད་རྟོགས་པ་ཡིན་ནོ། །སོ་སོར་ཐར་ཞེས་བྱ་རྣམས་བརྒྱད། ཅེས་པ་སྤང་བྱ་ལྔ་སྤོང་བ་དགེ་བསྙེན། བརྒྱད་སྤོང་བ་བསྙེན་གནས། བཅུ་སྤོང་བ་དགེ་ཚུལ། ཐམས་ཅད་སྤོང་བ་དགེ་སློང་དང་བཞི་བོ་རེ་རེ་ལ་ཕོ་མོ་གཉིས་རེ་ཕྱེ་བས་སོ་ཐར་རིགས་བརྒྱད་ཡིན། དགེ་བསྙེན་གྱི་སྤང་བྱ་ལྔ་ནི་སྲོག་གཅོད། མ་བྱིན་ལེན། མི་ཚངས་སྤྱོད། རྫུན་དང་བཞི་རྩ་བ་བཞི་ཡིན་པས་དེའི་སྟེང་དུ་ཆང་དང་ལྔ་ཡིན། བསྙེན་གནས་ཀྱི་བརྒྱད་ནི་དེའི་སྟེང་དུ་གར་སོགས་ཕྲེང་སོགས། མལ་ཆེ་མཐོ། ཕྱི་དྲོས་ཁ་ཟས་དང་གསུམ་སྤང་བ་ཡིན། དགེ་ཚུལ་གྱི་བཅུ་ནི་དེ་བརྒྱད་ལས་གར་སོགས་དང་ཕྲེང་སོགས་སོ་སོར་བརྩིས་པས་དགུ། གསེར་དངུལ་ལེན་པ་བསྣན་ནས་བཅུ་ཡིན། དགེ་སློང་ནི་ཉིས་བརྒྱ་ལྔ་བཅུ་རྩ་གསུམ་པོ་ཡིན་ནོ། །ང་རྒྱལ་ལ་ཁམས་ཀྱི་རབ་དབྱེ་ཞེས་པ་ནི་ཁམས་བཅོ་བརྒྱད་ཀྱི་དབྱེ་བ་སྒོམ་པ་ཡིན་ནོ། །ཁམས་གསུམ་གྱི་ཉོན་མོངས་མཐོང་བས་སྤང་བར་བྱ་བ་ཞེས་པ་ནི། ཁམས་གསུམ་དུ་སྐྱེ་བར་བྱེད་པའི་ཉོན་མོངས་རྣམས་ལ་མཐོང་ལམ་གྱི་དུས་སྤོང་དགོས་པ་ཚོ་གཅིག་དང་སྒོམ་ལམ་གྱི་དུས་སྤང་དགོས་པ་ཚོ་གཅིག་ཡོད་པ་ལས་མཐོང་ལམ་གྱི་དུས་སྤང་དགོས་རྒྱུའི་ཉོན་མོངས་རྣམས་ལ་མཐོང་བས་སྤང་བ་ཟེར་བ་ཡིན། དེ་སྤོང་བྱེད་མཐོང་ལམ་གྱི་དུས་ཀྱི་ཡེ་ཤེས་བཅུ་དྲུག་སྐྱེ་བ་ནི། སྡུག་བསྔལ་ཆོས་ཤེས། སྡུག་བསྔལ་ཆོས་བཟོད། སྡུག་བསྔལ་རྗེས་ཤེས། སྡུག་བསྔལ་རྗེས་བཟོད་བཞི། ཀུན་འབྱུང་ཆོས་ཤེས། ཀུན་འབྱུང་ཆོས་བཟོད། ཀུན་འབྱུང་རྗེས་ཤེས། ཀུན་འབྱུང་རྗེས་བཟོད་དང་བཞི། འགོག་པ་ཆོས་ཤེས། འགོག་པ་ཆོས་བཟོད། འགོག་པ་རྗེས་ཤེས། འགོག་པ་རྗེས་བཟོད་དང་བཞི། ལམ་ཆོས་ཤེས། ལམ་ཆོས་བཟོད། ལམ་རྗེས་ཤེས། ལམ་རྗེས་བཟོད་དང་བཅུ་དྲུག་གོ ། ༈ རང་རྒྱལ་གྱི་སྐབས་སུ། མངོན་རྒྱུའི་བག་ཆགས་ཞེས་པ་ཉོན་མོངས་མངོན་གྱུར་ཞེ་སྡང་དྲག་པོ་ལང་བ་ལྟ་བུ་རིག་རྒྱུ་ཡོད་པ་དེ་ཡིན། ཕྱིའི་རྟེན་འབྲེལ་བཅུ་གཉིས་ནི། ས་བོན། མྱུ་གུ། སྡོང་བུ། ལོ་མ། མེ་ཏོག །འབྲས་བུ་སྟེ་རྒྱུད་དང་འབྲེལ་བ་དྲུག །ས་ཆུ་མེ་རླུང་ནམ་མཁའ་དུས་སྟེ་རྐྱེན་དང་འབྲེལ་བ་དྲུག་གོ །ནང་གི་རྟེན་འབྲེལ་བཅུ་གཉིས། ང་དང་བདག་ཏུ་འཛིན་པ་མ་རིག་པ། དགེ་སྡིག་གི་ལས་བསགས་པ་འདུ་བྱེད། རྣམ་ཤེས་འདི་ནས་ཕ་རོལ་དུ་འཕོ་བ་རྣམ་ཤེས། ཚོར་བ་སོགས་མིང་བཞི་དང་གཟུགས་ནི་མིང་གཟུགས། མིག་རྣ་བ་སྣ་ལྕེ་ལུས་ཡིད་དྲུག་ནི་སྐྱེ་མཆེད། ཕྱིའི་ཡུལ་ནང་གི་རྣམ་ཤེས་བར་གྱི་དབང་པོ་གསུམ་འདུས་པ་ནི་རེག་པ། དེ་གསུམ་ཕྲད་པས་བདེ་སྡུག་ཚོར་བ་ནི་ཚོར་བ། བདེ་བ་ཐོབ་འདོད་དང་སྡུག་བསྔལ་སྤོང་འདོད་ནི་སྲིད་པ། དེ་དང་དུ་ལེན་པ་ནི་ལེན་པ། དེས་སྐྱེ་བ་ཕྱི་མ་སྐྱེ་བ་ལེན་པ་ནི་སྐྱེ་བ། སྐྱེས་ནས་མི་ཤི་བར་རྒ་བ་དང་ཤི་བ་ཡིན་ནོ། །དེ་ལུགས་འབྱུང་དང་ལུགས་ལྡོག་ནི་མ་རིག་པ་ཡོད་ན་འདུ་བྱེད་ཡོད་པ་སོགས་ལུགས་འབྱུང་དང་། མ་རིག་འགགས་ན་འདུ་བྱེད་འགགས་པ་སྐྱེ་ངེས་ཀྱི་རྒྱུ་འགྲུབ་པ། དེས་ཕྱི་མར། སོགས་ལུགས་ལྡོག་ཏུ་གཞུང་འདིར་བཤད་པ་ཡིན་ནོ། །རང་རྒྱལ་རིགས་གསུམ་བཤད་པའི་བསེ་རུ་ལྟ་བུ་ནི་གཅིག་པུ་གནས་པ་ཡིན། ཚོགས་ན་སྤྱོད་པ་ནི་མང་པོ་ལྷན་ཅིག་ཏུ་གནས་པ་ཡིན། བསེ་རུ་ལྟ་བུས་ཚོགས་ལམ་དུ་བསྐལ་ཆེན་བརྒྱ་ཚོགས་བསགས་ནས་སྲིད་པ་ཐ་མའི་ཚེ་ལམ་ལྔ་སྟན་ཐོག་ཅིག་ཏུ་རྫོགས་པ་ཡིན། དེ་བཞིན་དུ་ཚོགས་སྤྱོད་ཆེན་པོའི་ལམ་བཞི་དང་། ཆུང་ངུས་ལམ་གསུམ་སྟན་ཐོག་ཅིག་ཏུ་རྫོགས་པ་ཡིན་ནོ། །མཁས་པ་དྲུག་གི་ཕུང་པོ་ལ་མཁས་པ་ནི་གཟུགས་ཚོར་བ་འདུ་ཤེས་འདུ་བྱེད་རྣམ་ཤེས་ལྔ་ཡིན། ༈ སྤྱིར་ཉན་ཐོས་ཀྱི་སྡེ་སྣོད་དུ་མ་གཏོགས་པའི་རང་རྒྱལ་གྱི་སྡེ་སྣོད་ཟུར་བ་ཞིག་དེང་སང་མེད་ཀྱང་། མ་སྐྱེས་དགྲའི་འགྱོད་པ་བསལ་བའི་མདོའི་ནང་ན་རང་རྒྱལ་གྱི་སྡེ་སྣོད་ཟུར་དུ་ཡོད་པར་བཤད་འདུག་གོ །ཁམས་ལ་མཁས་པ་ནི་མིག་གི་རྣམ་ཤེས་ཀྱི་ཁམས། རྣ་བའི་རྣམ་ཤེས་ཀྱི་ཁམས། སྣའི་རྣམ་ཤེས་ཀྱི་ཁམས། ལྕེའི་རྣམ་ཤེས་ཀྱི་ཁམས། ལུས་ཀྱི་རྣམ་ཤེས་ཀྱི་ཁམས། ཡིད་ཀྱི་རྣམ་ཤེས་ཀྱི་ཁམས་ཏེ་ནང་རྣམ་ཤེས་ཀྱི་ཁམས་དྲུག །དེ་བཞིན་དུ་མིག་གི་དབང་པོ། རྣ་བའི་དབང་པོ། སྣའི་དབང་པོ། ལྕེའི་དབང་པོ། ལུས་ཀྱི་དབང་པོ། ཡིད་ཀྱི་དབང་པོ་སྟེ་བར་དབང་པོའི་ཁམས་དྲུག །ཡང་གཟུགས་ཀྱི་ཁམས། སྒྲའི་ཁམས། དྲིའི་ཁམས། རོའི་ཁམས། རེག་བྱའི་ཁམས། ཆོས་ཀྱི་ཁམས་ཏེ་ཕྱི་ཡུལ་གྱི་ཁམས་དྲུག་དང་བཅོ་བརྒྱད་དོ། །སྐྱེ་མཆེད་ལ་མཁས་པར་བྱ་བ་ནི། མིག་གི་སྐྱེ་མཆེད། རྣ་བའི་སྐྱེ་མཆེད། སྣའི་སྐྱེ་མཆེད། ལྕེའི་སྐྱེ་མཆེད། ལུས་ཀྱི་སྐྱེ་མཆེད། ཡིད་ཀྱི་སྐྱེ་མཆེད་དང་དྲུག །གཟུགས་ཀྱི་སྐྱེ་མཆེད། སྒྲའི་སྐྱེ་མཆེད། དྲིའི་སྐྱེ་མཆེད། རོའི་སྐྱེ་མཆེད། རེག་བྱའི་སྐྱེ་མཆེད། ཆོས་ཀྱི་སྐྱེ་མཆེད་དྲུག་དང་བཅུ་གཉིས་སོ། །གནས་དང་གནས་མ་ཡིན་པ་ལ་མཁས་པ་ནི་ལས་དགེ་བ་བསྒྲུབ་ན་འབྲས་བུ་བདེ་བ་འབྱུང་བ་གནས་ཡིན་པ་དང་། དགེ་བའི་འབྲས་བུ་སྡུག་བསྔལ་འབྱུང་བ་གནས་མ་ཡིན་པ་སོགས་སོ། །བདེན་པ་ལ་མཁས་པ་ནི། བསྡུ་ན་ཀུན་རྫོབ་དོན་དམ་གཉིས། འབྲིང་དུ་བདེན་བཞི། རྒྱས་པར་བདེན་བཞི་རྣམ་པ་བཅུ་དྲུག་སོགས་སོ། ། ༈ བྱང་སེམས་ཐེག་པའི་སྐབས་སུ་སྲིད་ཞི་ལས་རྣམ་པར་གྲོལ་ཞེས་པ་ནི། ལས་དབང་གིས་འཁོར་བར་སྐྱེ་བ་སྲིད་པའི་མཐའ། ཉན་རང་ལྟར་རང་ཞི་བདེ་ཕྱོགས་གཅིག་ཏུ་ལྟུང་བ་ཞི་བའི་མཐའ་ཡིན་པས་དེ་གཉིས་ལས་གྲོལ་བ་ཡིན། སྤྲོས་པ་ཞི་བ་ཞེས་པའི་སྐབས་སུ། སྤྲོས་པ་ནི་རྟག༡། ཆད་༢སྐྱེ་༣འགགས་༤འགྲོ་༥འོང་༦གཅིག༧། ཐ་དད་༨རྣམས་སྤྲོས་པའི་མཐའ་བརྒྱད་ཡིན་པས་དེ་བརྒྱད་དང་བྲལ་བ་ལ་ཞི་བ་ཟེར་བ་ཡིན། སློབ་པའི་ལམ་བཞི་ཞེས་པ། ཚོགས་ལམ། སྦྱོར་ལམ། མཐོང་ལམ། སྒོམ་ལམ་བཞི་ཡིན། མཐར་ལམ་ཞེས་པ་ས་བཅུའི་རྒྱུན་མཐའ་ཡིན། ལམ་དེ་ཐམས་ཅད་ཀྱི་བསྒོམ་བྱ་རྣམས་ཞི་ལྷག་གཉིས་ལ་འདུ་བ་ཡིན་ནོ། །བསྡུ་དངོས་བཞི་ནི། སྦྱིན་དང་སྙན་སྨྲ་དོན་མཐུན་དོན་སྤྱོད་བཞི། འཕགས་པ་བཞི་ནི་ཉན་ཐོས་འཕགས་པ། རང་རྒྱལ་འཕགས་པ། བྱང་སེམས་འཕགས་པ། སངས་རྒྱས་འཕགས་པ་བཞི། དེ་བཞིའི་ཡུམ་ནི་ཤེས་རབ་ཀྱི་ཕ་རོལ་ཕྱིན་པ་ཡིན་ནོ། །བག་ཡོད་ནི་སྡིག་པའི་ལས་ལ་འཛེམ་བག་བྱེད་པ་དེ་ཡིན། དྲན་པ་ནི་སྤང་བླང་གི་གནས་མི་བརྗེད་པར་འཛིན་པ་དེ་ཡིན། ཤེས་བཞིན་ནི་དུས་དང་རྣམ་པ་ཐམས་ཅད་དུ་རང་རྒྱུད་དང་སྤྱོད་ལམ་ལ་བརྟགས་ནས་བྱ་ར་བྱེད་པ་དེ་ཡིན། ༈ བྱ་རྒྱུད་ཀྱི་སྐབས་སུ་དག་པ་གསུམ་ནི། ལྷ་དང་ཆོས་ཉིད་དག་པ། སྔགས་དང་ཏིང་འཛིན་དག་པ། རྫས་དང་ཡོ་བྱད་དག་པའོ། །མཐའ་བཞི་དང་བྲལ་ཞེས་པ་ནི་རྟག་ཆད་ཡོད་མེད་ཀྱི་མཐའོ། །མངོན་རྒྱུ་ཕྲ་མོ། ལྷན་སྐྱེས་བག་ཆགས་ལྷན་སྐྱེས་གནས་པའི་མ་རིག་པ། ཀུན་འགྲོའི་སྒྲིབ་པ་རྣམས་རྟོག་པ་འབྱུང་བ་ཡིན། ལྷ་དྲུག་ནི་བདག་གི་དེ་ཁོ་ན་ཉིད་སྟོང་པར་བསྒོམ་པ་སྟོང་པའི་ལྷ། དེའི་ངང་ལ་རང་སེམས་ཟླ་དཀྱིལ་དུ་བསྒོམ་པ་ཡི་གེའི་ལྷ། དེའི་སྟེང་དུ་ལྷ་རང་གི་སྔགས་རང་སྒྲ་སྒྲོག་པར་སྒྲའི་ལྷ། དེ་གཉིས་འདྲེས་པ་ལས་འོད་ཟེར་སྤྲོ་བསྡུ་དང་བཅས་ལྷར་སྒོམ་པ་གཟུགས་ཀྱི་ལྷ། རང་རིགས་ཀྱི་ཕྱག་རྒྱས་བྱིན་གྱིས་རློབས་པ་ཕྱག་རྒྱའི་ལྷ། གནས་སྐབས་ཐམས་ཅད་དུ་ལྷ་སྣང་དང་མི་འབྲལ་བ་མཚན་མའི་ལྷའོ། །རིགས་གསུམ་གྱི་ལྷ་ནི་སྐུའི་རིགས་འཇམ་དཔལ། གསུང་གི་རིགས་སྤྱན་རས་གཟིགས། ཐུགས་ཀྱི་རིགས་ཕྱག་རྡོར་རོ། །དམ་ཚིག་རྣམས་ནི་དབང་གཞུང་ལས་འབྱུང་བ་ལྟར་ཡིན། ཡེ་ཤེས་བཞི་ནི་མེ་ལོང་ཡེ་ཤེས། མཉམ་ཉིད་ཡེ་ཤེས། སོར་རྟོག་ཡེ་ཤེས། བྱ་གྲུབ་ཡེ་ཤེས་བཞི་ཡིན། ཡེ་ཤེས་ལྔ་ནི་དེ་སྟེང་ཆོས་དབྱིངས་ཡེ་ཤེས་དང་ལྔ་ཡིན་ནོ། །ལྟ་སྤྱོད་གོང་འོག་རྗེས་སུ་མཐུན། ཀྲི་ཡོག་གཉིས་ཀ་ལ་བརྟེན་པའི་ཐེག་པ་ཡིན་ཞེས་པ་ནི་ཨུ་པ་ནི་སྤྱོད་པ་ཀྲི་ཡ་དང་མཐུན་ལྟ་སྒོམ་ཡོ་ག་དང་མཐུན་པས་ལོགས་སུ་ཕྱེ་མི་དགོས་པ་ཡིན་ནོ། །ཕྱི་རྒྱུད་ལ་ཀྲི་ཡོག་གཉིས་སུ་འབྱེད་པའི་ལུགས་ཡིན་ཞེས་པ་ནི་ཀྲི་ཡ་ཡོ་ག་གཉིས་ལས་ཨུ་པ་མེད་པའོ། ། ༈ ཡོ་གའི་སྐབས་སུ་མཚན་བཅས་དང་མཚན་མེད་ཀྱི་ཏིང་ངེ་འཛིན་ཞེས་པ་ནི། མཚན་བཅས་ལྷ་སྒོམ་པ་དང་། མཚན་མེད་སྟོང་ཉིད་སྒོམ་པ་ཡིན་ནོ། །རིགས་ལྔའི་དམ་ཚིག་ནི་སངས་རྒྱས་རིགས་ཀྱི་དམ་ཚིག་སོགས་དབང་གཞུང་ལས་འབྱུང་བ་རྣམས་ཡིན། མངོན་བྱང་ལྔ་ནི་གདན་པད་ཟླ་ལ་མངོན་པར་བྱང་ཆུབ་པ། གསུང་ཡིག་འབྲུ་ལ་མངོན་པར་བྱང་ཆུབ་པ། ཐུགས་ཕྱག་མཚན་ལ་མངོན་པར་བྱང་ཆུབ་པ། སྐུ་ཡོངས་རྫོགས་ལ་མངོན་པར་བྱང་ཆུབ་པ། ཏིང་ངེ་འཛིན་ཡེ་ཤེས་སེམས་དཔའ་ལ་མངོན་པར་བྱང་ཆུབ་པའོ། །ཕྱག་རྒྱ་བཞིའི་རྒྱས་འདེབས་པ་ནི། དམ་ཚིག་གི་ཕྱག་རྒྱ། ལས་ཀྱི་ཕྱག་རྒྱ། ཆོས་ཀྱི་ཕྱག་རྒྱ། ཕྱག་རྒྱ་ཆེན་པོ་བཞི་ལས་ལྷ་རང་རང་གི་དམ་རྒྱ་བཅས་ནས་སྔགས་བརྗོད་ཅིང་དམ་ཡེ་དབྱེར་མེད་དུ་བསྟིམ་པ་དམ་རྒྱ། ལྷ་རྣམས་ཀྱི་ལྐོག་མར་པད་ཟླའི་སྟེང་དུ་རྡོ་རྗེའི་ལྟེ་བར་རང་སྔགས་བཀོད་ནས་བརྗོད་པ་ཆོས་རྒྱ། ལྷ་རྣམས་ཀྱི་ཐུགས་ཀར་སྣ་ཚོགས་རྡོ་རྗེ་རེ་བསམ་ནས་ལྷ་རང་རང་གི་ལས་རྒྱ་བཅའ་ཞིང་སྔགས་བརྗོད་པ་ལས་རྒྱ། ལྷ་ཐམས་ཅད་ཀྱི་ཐུགས་ཀར་དང་པོའི་རྡོ་རྗེ་རྩེ་ལྔ་བ་རེ་གསལ་བ་ནས་ལྷ་རང་རང་གི་ཕྱག་ཆེན་བཅའ་ཞིང་སྔགས་བརྗོད་པ་ཕྱག་རྒྱ་ཆེན་པོའོ། ། དངས་མ་མི་ཤིག་པ་ལྔ་ཞེས་པ་ནི་ས་ཆུ་མེ་རླུང་ནམ་མཁའི་ཁམས་ཀྱི་དངས་མ་ལྔ་འདུས་འོད་ལྔའི་ཐིག་ལེ་སྲན་མའི་འབྲུ་ཙམ་པ་ཞིག་རིག་པ་བྱང་ཆུབ་སེམས་ཀྱི་རྟེན་སྙིང་དབུས་ན་ཡོད་པ་དེའོ། །རིགས་ལྔ་ནི་རྒྱལ་བ་རིགས་ལྔ། ཡེ་ཤེས་ལྔ་ནི་ཆོས་དབྱིངས་ཡེ་ཤེས་སོགས་སོ། །

༈ མ་ཧཱ་ཡོ་གའི་སྐབས་སུ། སྤྱི་དང་ཁྱད་པར་ལྷག་པའི་དམ་ཚིག་ཅེས་པ་ནི། སྤྱིའི་དམ་ཚིག་ཉན་རང་བྱང་སེམས་ཀྲི་ཡོག་རྣམས་ཀྱི་བསླབ་བྱ། ཁྱད་པར་གྱི་དམ་ཚིག་ནི་རྩ་བ་སྐུ་གསུང་ཐུགས་ཀྱི་དམ་ཚིག་གསུམ། ཡན་ལག་གི་དམ་ཚིག་ཉི་ཤུ་རྩ་ལྔའོ། །དང་པོ་སྐུའི་དམ་ཚིག་བླ་མ་དང་རྡོ་རྗེའི་མཆེད་ལྕམ་ལ་གུས་པ། གསུང་གི་དམ་ཚིག་སྔགས་དང་ཕྱག་རྒྱ་རྒྱུན་མི་གཅད་པ། ཐུགས་ཀྱི་དམ་ཚིག་བླ་ན་མེད་པའི་བྱང་ཆུབ་ཀྱི་སེམས་མི་སྤངས་པ་དང་། གསང་བཅུ་མི་སྨྲ་བ་ཡིན། དང་པོ་བླ་མའི་དུས་བླ་མ་དྲུག་སྟེ་སྤྱིའི་སློབ་དཔོན་ཡུལ་སྤྱིའི་བཀུར་ཞིང་རང་གི་བཀའ་དྲིན་ཐོབ་པ། འདྲེན་པའི་སློབ་དཔོན་དང་པོ་ཆོས་སྒོར་འཇུག་པ་པོ། །ཉམས་ཆགས་སྐོང་བའི་སློབ་དཔོན་དམ་ཚིག་ཉམས་ཆགས་བྱུང་ན་བཤགས་ཡུལ། དམ་ཚིག་དབང་གི་སློབ་དཔོན་དང་པོ་རང་རྒྱུད་མ་སྨིན་པ་སྨིན་པར་བྱེད་པའི་དབང་བསྐུར་བའོ། །ཤེས་རབ་རྒྱུད་ཀྱི་སློབ་དཔོན་གསང་སྔགས་ཀྱི་རྒྱུད་སྡེའི་ཚིག་དོན་འཆད་པ་པོ། མན་ངག་ལུང་གི་སློབ་དཔོན་ཉམས་ལེན་གྱི་ཁྲིད་འཆད་པ་པོ་རྣམས་ཏེ་དེ་ཡང་ཕྱི་མ་གསུམ་གཙོ་བོའོ། །མཆེད་ནི་བཞི་སྟེ་སྤྱིའི་མཆེད་སེམས་ཅན་ཐམས་ཅད་བདེ་གཤེགས་སྙིང་པོའི་སྤུན། རིང་བའི་མཆེད་སངས་རྒྱས་ཀྱི་བསྟན་པ་ལ་ཞུགས་ཚད། ཉེ་བའི་མཆེད་གསང་སྔགས་ཀྱི་སྒོར་ཞུགས་ཚད། ནང་འདྲེས་པའི་མཆེད་བླ་མ་དང་དཀྱིལ་འཁོར་གཅིག་གིས་བསྡུས་པ་རྣམས་སོ། །སྔགས་གསུམ་ནི་རྒྱུ་མ་ནོར་པ་རྩ་བའི་སྔགས་ས་བོན་གྱི་ཡི་གེ། བསྐྱེད་པ་རྐྱེན་གྱི་སྔགས་བསྐྱེད་རིམ་གསལ་འདེབས་དུས་བརྗོད་རྒྱུ། བཟླས་པ་ལས་ཀྱི་སྔགས་བཟླ་བྱ་ཡིན། ཕྱག་རྒྱ་བཞི་ནི་རང་ལུས་ལྷར་སྒོམ་པ་ཕྱག་ཆེན། ཐུགས་ཀར་ཡེ་ཤེས་སེམས་དཔའ་དང་ཏིང་འཛིན་སེམས་དཔའ་ཕྱག་མཚན་སྒོམ་པ་ལ་སེམས་གཏད་པ་དམ་རྒྱ། སྔགས་ཕྲེང་བཀོད་པ་སོགས་དང་སྔགས་བཟླ་བ་ཆོས་རྒྱ། མཆོད་བསྟོད་སོགས་ཕྲིན་ལས་བྱ་བ་ལས་རྒྱའོ། །བླ་མེད་བྱང་ཆུབ་ཀྱི་སེམས་མི་སྤང་བ་ནི། བདེན་གཉིས་ཟུང་དུ་འཇུག་པའི་ཆོས་ཉིད་དོན་དམ་པའི་གནས་ལུགས་དང་གཅིག །དེ་མངོན་དུ་བྱེད་འདོད་ཀྱི་སྨོན་པ་དང་གཉིས། དེ་མངོན་དུ་བྱེད་འདོད་ཀྱི་སྒོ་ནས་བསྐྱེད་རྫོགས་ཉམས་སུ་ལེན་པ་དང་གསུམ་མོ། །གསང་བཅུ་མི་སྨྲ་བ་ནི། སྤྱི་གསང་བཞི། བར་གསང་བཞི། གསང་བར་འོས་པ་དང་གཉེར་གཏད་པ་གཉིས་སོ། །སྤྱི་གསང་བཞི་ནི། ལྟ་ཟབ་སྤྱོད་པ་རླང་པོ་དང་། །ལྷའི་མིང་གཟུང་དང་གྲུབ་རྟགས་རྣམས། །སྤྱི་གསང་རྣམ་པ་བཞི་ཡིན་ནོ། །བར་གསང་བཞི་ནི། སྒྲུབ་པའི་གནས་དུས་གྲོགས་དང་རྫས། །བར་དུ་གསང་ལ་བསྒྲུབ་པར་བྱ། །ཞེས་སོ་ཡན་ལག་དམ་ཚིག་ཉི་ཤུ་རྩ་ལྔ་ནི། ཤེས་བྱ་ལྟ་བའི་དམ་ཚིག་ལྔ། །བསྒྲུབ་བྱ་བསྒོམ་པའི་དམ་ཚིག་ལྔ། །སྤྱད་བྱ་སྤྱོད་པའི་དམ་ཚིག་བཅོ་ལྔའོ། །ཤེས་བྱ་ལྔ་ནི། ཕུང་ལྔ། འབྱུང་ལྔ། ཡུལ་ལྔ། ཁ་དོག་ལྔ་ལ་སོགས་པ་རིག་ལྔའི་རང་བཞིན་དུ་ཤེས་པ་དང་། བསྒྲུབ་བྱ་བསྒོམ་པའི་དམ་ཚིག་ལྔ་ནི། དེ་བཞིན་གཤེགས་དང་རྡོ་རྗེ་རིན་ཆེན་པདྨ་ལས་རིགས་ལྔ་མེ་ཏོག་གང་ལ་ཕོག་པའི་རིགས་གཙོ་བོར་བྱས་ཏེ་སྒྲུབ་པའོ། །སྤྱོད་པའི་དམ་ཚིག་ལྔ་ཚན་གསུམ་ལས། དང་པོ་སྤྱོད་བྱ་ལྔ་ནི་ཏ་ན་ག་ན། མ་བྱིན་ལེན། རྫུན། ངག་འཁྱལ་དང་ལྔ་ཡུལ་དུས་གནས་སྐབས་ཀྱི་དབྱེ་བསལ་ཤེས་པའི་ཉམས་སུ་བླང་ངོ་། །གཉིས་པ་མི་སྤང་བ་ལྔ་ནི་འདོད་ཆགས། ཞེ་སྡང་། གཏི་མུག །ང་རྒྱལ། ཕྲག་དོག་ལྔ་བོ་ཐབས་ཀྱི་ཟིན་པས་དུག་ལྔ་རང་རྒྱུད་དུ་མ་ཤོར་བར་ཉམས་སུ་བླང་ངོ་། །གསུམ་པ་དང་བླང་ལྔ་ནི་དྲི་ཆེན། དྲི་ཆུ། མཱཾ་ས། རཀྟ། ཟིལ་པ་ལྔ་སྟེ་རྫས་སུ་བརྟེན་དུས་གཙང་སྨེར་མི་བལྟ་ཞིང་། ཐ་མལ་བའི་སྣང་ངོར་བག་མེད་དུ་མི་སྤྱད་པའོ། །ལྷག་པའི་དམ་ཚིག་ནི། གཅན་གཟན་རྒྱལ་པོའི་ཁྲི་མི་བཤིག །ཟ་མ་ཏོག་ཏུ་དུག་མི་བླུག་པ་སོགས་བརྡ་ཚིག་གིས་བསྟན་པ་ཉི་ཤུའོ། །ཨ་ནུ་རང་ལུགས་ཀྱི་དཀྱིལ་འཁོར་གསུམ་ནི་དབྱིངས་སྐྱེ་བ་མེད་པ་ཡེ་ཇི་བཞིན་པའི་དཀྱིལ་འཁོར། ཡེ་ཤེས་འགགས་པ་མེད་པ་རང་བཞིན་ལྷུན་འགྲུབ་ཀྱི་དཀྱིལ་འཁོར། སྲས་བདེ་བ་ཆེན་པོ་རྩ་བ་བྱང་ཆུབ་སེམས་ཀྱི་དཀྱིལ་འཁོར་རོ། །དགེའོ། །