PJCW-KABUM-01-KA-002

Previous Text Back to Volume PageNext Text

Wylie title	gsang ba bsam gyis mi khyab pa'i mdo las bstan pa'i gsung dbyangs yan lag drug cu'i sdom tshig
Location	dpal sprul bka' 'bum Volume 1, Text 2, Pages (Folios to )
Author	དཔལ་སྤྲུལ་རིན་པོ་ཆེ་
Less details More details
Citation
Genre

Tibetan Text

[edit]

༄༅། །གསང་བ་བསམ་གྱིས་མི་ཁྱབ་པའི་མདོ་ལས་བསྟན་པའི་གསུང་དབྱངས་ཡན་ལག་དྲུག་ཅུའི་སྡོམ་ཚིག་བཞུགས་སོ། ། འདི་ཡི་འདྲེས་ལ་དམིགས་པ་རྣམ་པ་ལྔ། །མདོ་སྡོམ་གླེང་གཞི་ཇི་སྙེད་གཟུང་བསྟན་དམིགས། འདི་ཡི་མ་འདྲེས་པ་ལ་དམིགས་པ་བདུན། །མིང་ཚིག་ཡི་གེ་བདག་མེད་གཟུགས་གཟུགས་མེད། །འདི་ཡི་ཡོངས་སུ་ཤེས་པ་རྣམ་པ་ལྔ། །གཞི་དོན་ཤེས་པ་འབྲས་བུ་དེ་རབ་རིག །འདི་ཡི་རྣམ་པ་སྒོམ་དང་ལྡན་པ་བཞི། །གང་ཟག་ཆོས་ལ་བདག་མེད་མཐོང་དང་ཤེས། །རྣམ་པ་སྒོམ་དང་ལྡན་པ་སུམ་ཅུ་བདུན། །མི་སྡུག་སྡུག་བསྔལ་མི་རྟག་བདག་མེད་སྒོམ། །འཐོབ་བརྟེན་གསལ་བ་གཉེན་པོའི་རྣམ་པ་སྒོམ། །ཆོག་ཤེས་རྣམ་གཡེང་ཐེ་ཚོམ་རྒོད་ཞུམ་པའི། །གཉེན་པོ་སྒོམ་པ་སྡེ་ཚན་དང་པོ་གསུམ། །འཇིག་རྟེན་ལས་འདས་ཕུན་སུམ་ཚོགས་པ་ལ། །ཡིད་ཆེས་འབད་དང་མི་བརྗེད་སེམས་གནས་པ། །རྣམ་འབྱེད་དབང་བོ་ལྔ་དང་སྟོབས་ལྔའོ། །རྫོགས་པའི་བྱང་ཆུབ་རབ་ཏུ་སྣང་རྣམ་པ། །དེ་འབྱེད་སྤྲོ་དང་ཡིད་བདེ་ལས་སུ་རུང་། །སེམས་གནས་མཉམ་ཉིད་བྱང་ཆུབ་ཡན་ལག་བདུན། །ཐོབ་ངེས་ཡོངས་སུ་སྦྱོང་བའི་ས་ཤེས་པ། །གོ་འབྱེད་འཕགས་པ་དགྱེས་པའི་ཁྲིམས་ལ་བཞུགས། །ཡོ་བྱད་བསྙུང་ལྡན་སྔོན་ཐོབ་ལམ་གོམས་པ། །ཆོས་ལ་གནས་པའི་རྒྱུ་མཚན་མི་བརྗེད་ཅིང་། །མཚན་མ་མེད་སེམས་གནས་པ་གནས་གྱུར་བརྒྱད། །གནས་ངན་ལེན་སེལ་ལྟ་མཚན་སེལ་ཕན་ཡོན། །སྦྱོར་བའི་ཡིད་ལ་བྱེད་པ་རྣམ་པ་ལྔ། །ཏིང་ངེ་འཛིན་གྱི་སྤྱོད་ཡུལ་ལ་བརྟེན་ནས། །གྲངས་ལ་ཉེར་རྟོག་མིང་ཚིག་ཡི་གེའི་གྲངས། །གནས་པ་ཉེར་རྟོག་ཚད་ཡོད་ཚད་མེད་གནས། །ཀུན་རྟོག་ཉེར་རྟོག་གཉིས་བརྟེན་གཉིས་རྟོག་མིན། །རིམ་གནས་ཉེར་རྟོག་མིང་སྔོན་དོན་རྗེས་འཇུག །རྟོགས་པའི་སྦྱོར་བ་རྣམ་པ་བཅུ་གཅིག་ནི། །གློ་བུར་ཉིད་རྟོགས་སྣང་བའི་རྒྱུ་མཚན་རྟོགས། །དོན་དང་དམིགས་པ་མི་དམིགས་ཆོས་དབྱིངས་རྟོགས། །བདག་མེད་གཉིས་རྟོགས་བསམ་པ་དམན་པ་དང་། །ཡངས་ཤིང་བདག་ཉིད་ཆེན་པོའི་བསམ་པ་རྟོགས། །ཇི་ལྟར་རྟོགས་ཐོབ་ཆོས་ཉིད་རྣམ་བཞག་དང་། །རྣམ་པར་བཞག་པའི་ཆོས་རབ་རྟོགས་པའོ། །ཉོན་ཤེས་སྒྲིབ་དག་ཡོན་ཏན་མངོན་སྒྲུབ་དག །དབང་བསྒྱུར་ཡིད་ལ་བྱེད་པ་གསུམ་ཡིན་ནོ། །གཉེན་འཇམ་ཡིད་འོང་ཡིད་མཐའ་དག་དྲི་མེད། །གསལ་ཞིང་སྙན་འཇེབས་མཉན་འོས་མི་ཚུགས་པ། །སྙན་དུལ་མི་རྩུབ་མི་རླང་རབ་ཏུ་དུལ། །རྣར་སྙན་ལུས་དང་སེམས་ཚིམས་སྙིང་དགའ་བྱེད། །དགའ་དང་བདེ་བ་བསྐྱེད་པར་བྱེད་པ་ཉིད། །ཡོངས་སུ་གདུང་མེད་ཀུན་ཏུ་ཤེས་བྱ་བ། །རྣམ་པར་རེག་བྱ་རྣམ་གསལ་དགའ་བར་བྱེད། །མངོན་པར་དགའ་བར་བྱེད་ཅིང་ཀུན་ཤེས་བྱེད། །རྣམ་པར་རིག་བྱེད་རིག་དང་འབྲེལ་བར་ལྡན། །ཟློས་པའི་སྐྱོན་མེད་སེང་གེ་གླང་ཆེན་སྒྲ། །འབྲུག་སྒྲ་ཀླུ་དབང་དྲི་ཟའི་དབྱངས་སྙན་བཞིན། །ཀ་ལ་པིང་ཀ་ཚངས་པ་ཆེན་པོའི་དབྱངས། །ཤང་ཤང་ཏེའུ་ལྷ་དབང་དབྱངས་བཞིན་སྙན། །རྔ་ཡི་སྒྲ་འདྲ་མ་ཁེངས་མི་དམའི་སྒྲ། །ཐམས་ཅད་རྗེས་ཞུགས་ཚིག་ཟུར་ཆགས་པ་མེད། །མཚུངས་པ་མེད་དང་མ་ཞུམ་མི་ཞན་པ། །རབ་ཏུ་དགའ་བར་བྱེད་ཅིང་ཁྱབ་པ་ཉིད། །ཐ་བ་བཅས་དོན་རྒྱུན་ཆགས་སྣ་ཚོགས་འབྲེལ། །སྒྲ་ཀུན་རྫོགས་བྱེད་དབང་པོ་ཐམས་ཅད་ཚིམ། །མ་སྨད་མི་འགྱུར་མ་རྟབས་འཁོར་འདས་གྲགས། །རྣམ་པ་ཐམས་ཅད་མཆོག་དང་ལྡན་པ་སྟེ། །བདེ་གཤེགས་གསུངས་དབྱངས་ཡན་ལག་དྲུག་ཅུ་ཉིད། །གསང་བ་བསམ་གྱིས་མི་ཁྱབ་མདོ་བཞིན་ནོ། །དགེའོ།། །།མངྒ་ལམ།