JKW-KABUM-23-'A-001-047

🚧 This website is under continued development. We appreciate your patience!

Previous Text Back to Volume PageNext Text

Wylie title	snyan pa rab ldan
Location	mkhyen brtse'i bka' 'bum Volume 23, sde tshan 1, Text 47, Pages 92-94 (Folios 46b4 to 47b4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. snyan pa rab ldan. In 'jam dbyangs mkhyen brtse'i dbang po'i bka' 'bum, Vol. 23: 92-94. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

Tibetan Text

Wylie

[edit]

ན་མོ་གུ་རུ་ཛྙཱ་ནཱ་ཡ། སྙན་པར་རབ་ལྡན་མཚན་གྱི་སྤྲིང་ཡིག་ནི། །གང་དུ་བསྟི་བ་ཙམ་ནས་དོན་ཡོད་པའི། །སངས་རྒྱས་འཇིག་རྟེན་སྒྲོན་མར་གྱུར་བ་དང་། །མི་ཕྱེད་ཁྱབ་བདག་བླ་མས་དགེ་ལེགས་མཛོད། ༡ །གང་ཞིག་འཁོར་བའི་མཚོ་ལ་བྱིང་གྱུར་ཅིང་། །སྡུག་བསྔལ་གསུམ་གྱི་རླབས་ཕྲེང་གིས་འཁྱུད་ཚེ། །དལ་འབྱོར་རིན་ཆེན་གྲུ་བོ་མཆོག་ཐོབ་དུས། །མྱུར་དུ་དགེ་བའི་ཟུར་ཕུད་བསྒྲེང་བར་བྱ། ༢ །ཁྱད་པར་སྲིད་དང་ཞི་བའི་གནས་ཀུན་ཀྱང་། །རྟག་བརྟན་གཞོམ་བྲལ་ཕྱག་རྒྱས་བཏབ་མིན་ན། །ངེས་པར་འཆི་བའི་སེམས་པས་ཡིད་བསྐུལ་ཏེ། །ཐར་པ་མཆོག་གི་གླིང་དུ་བཀྲི་ལ་བརྩོན། ༣། བདེ་དང་སྡུག་བསྔལ་བར་མའི་འདུ་བྱེད་ཀྱིས། །མ་འདྲེས་ཐགས་སུ་བཏགས་པའི་ཟ་འོག་རིས། །དགེ་དང་གཅིག་ཤོས་ལས་ཀྱིས་བསྐྱེད་གྱུར་ན། །བསོད་ནམས་མ་ཡིན་ཚུལ་ལ་སུ་ཞིག་སྨོན། ༤ །དེ་ཕྱིར་རྒྱལ་ཀུན་ཐོར་ཚུགས་ཀྱིས་བསྙེན་པའི། །འཁོར་ལོའི་མགོན་པོའི་ཞལ་གྱི་པད་དཀར་ལས། །ལུང་རྟོགས་སྦྲང་རྩིའི་བཅུད་ལེན་རབ་བླངས་ཏེ། །དོན་ལྡན་ཐར་པའི་ལུས་སྟོབས་རབ་རྒྱས་ནས། ༥ །གཞི་ཡི་དབང་མཆོག་རང་གནས་ལྷན་ཅིག་སྐྱེས། །ལམ་དུས་རྒྱུ་གཉིས་རྐྱེན་བཞིས་སྨིན་པར་བྱེད། །འབྲས་བུ་འོད་ཟེར་ཆེན་པོའི་བྱེད་ལས་ཀྱིས། །མི་སློབ་ལམ་གྱི་སྐལ་བ་མཆོག་ལ་སྦྱོར། ༦ །སྣང་སྟོང་ཟུང་འཇུག་རིག་པའི་གདངས་རྩལ་ལས། །ཕྱག་རྒྱ་བཞི་ལྡན་ཡོངས་གྲུབ་གདན་གསུམ་སྐུ། །ཏིང་འཛིན་ཉམས་ལྔས་ལམ་གྱི་རྩལ་རྫོགས་པའི། །དང་པོའི་རིམ་པས་སྐྱེ་བའི་བག་ཆགས་སྦྱངས། ༧ །བདེ་ཆེན་མཆོག་གི་ཞུ་བདེའི་རོལ་མོ་ནི། །འཁོར་ལོ་བཞི་ཡི་དཀྱིལ་འཁོར་ནས་འཁྲོལ་བས། །གཟུང་འཛིན་རྟོག་པའི་དྲྭ་བ་རྣམ་དག་པའི། །རྫོགས་པའི་ཚུལ་འདིས་འཆི་བའི་དྲི་བཅས་འཆིང་། ༨ །མཉམ་བཞག་བློ་བྲལ་ཀ་དག་གདོད་མའི་གཞི། །རྗེས་ཐོབ་ལྷུན་གྲུབ་དབྱིངས་རིག་ཟུང་འཇུག་ལམ། །ལྷུན་གྲུབ་སྐུ་གསུམ་ནང་གསལ་ཆེན་པོའི་འབྲས། །ཚུལ་འདི་འབྲས་བུའི་ཐུས་ཀ་དག་ཏུ་བསྟན། ༩ །དེ་སོགས་གཞི་དང་ལམ་སོགས་དབྱེ་བའི་ཚུལ། །བདེན་རྣམ་ཤིང་རྟའི་བཞོན་པ་ལ་བརྟེན་ནས། །ཞི་བདེ་རིན་ཆེན་གླིང་དུ་ཉེར་བཀྲི་ཕྱིར། །རྣམ་ཀུན་བརྩོན་པའི་ལག་པས་ཉེར་བཟུང་འཚལ། ༡༠ །གང་ལ་དེ་སྐད་སྤྲིང་པའི་རྟེན་བཟང་པོ། །བདུད་རྩི་ཕུར་མ་རིལ་བུ་བཅས་པའི་སྐྱེས། །འདི་ཉིད་ཕུལ་བས་དུས་རྣམས་ཐམས་ཅད་དུ། །མི་ཕྱེད་དགེ་མཚན་གསར་པས་མཛའ་གྱུར་ཅིག ༡༡ ། སརྦ་ས་མནྟ་ཤུ་བྷཾ། ། ༈

[edit]

snyan pa rab ldan/__ na mo gu ru dz+nyA nA ya/__snyan par rab ldan mtshan gyi spring yig ni/__/gang du bsti ba tsam nas don yod pa'i/__/sangs rgyas 'jig rten sgron mar gyur ba dang /__/mi phyed khyab bdag bla mas dge legs mdzod/__1_/gang zhig 'khor ba'i mtsho la bying gyur cing /__/sdug bsngal gsum gyi rlabs phreng gis 'khyud tshe/__/dal 'byor rin chen gru bo mchog thob dus/__/myur du dge ba'i zur phud bsgreng bar bya/__2_/khyad par srid dang zhi ba'i gnas kun kyang /__/rtag brtan gzhom bral phyag rgyas btab min na/__/nges par 'chi ba'i sems pas yid bskul te/__/thar pa mchog gi gling du bkri la brtson/_3/_bde dang sdug bsngal bar ma'i 'du byed kyis/__/ma 'dres thags su btags pa'i za 'og ris/__/dge dang gcig shos las kyis bskyed gyur na/__/bsod nams ma yin tshul la su zhig smon/__4_/de phyir rgyal kun thor tshugs kyis bsnyen pa'i/__/'khor lo'i mgon po'i zhal gyi pad dkar las/__/lung rtogs sbrang rtsi'i bcud len rab blangs te/__/don ldan thar pa'i lus stobs rab rgyas nas/__5_/gzhi yi dbang mchog rang gnas lhan cig skyes/__/lam dus rgyu gnyis rkyen bzhis smin par byed/__/'bras bu 'od zer chen po'i byed las kyis/__/mi slob lam gyi skal ba mchog la sbyor/__6_/snang stong zung 'jug rig pa'i gdangs rtsal las/__/phyag rgya bzhi ldan yongs grub gdan gsum sku/__/ting 'dzin nyams lngas lam gyi rtsal rdzogs pa'i/__/dang po'i rim pas skye ba'i bag chags sbyangs/__7_/bde chen mchog gi zhu bde'i rol mo ni/__/'khor lo bzhi yi dkyil 'khor nas 'khrol bas/__/gzung 'dzin rtog pa'i drwa ba rnam dag pa'i/__/rdzogs pa'i tshul 'dis 'chi ba'i dri bcas 'ching /__8_/mnyam bzhag blo bral ka dag gdod ma'i gzhi/__/rjes thob lhun grub dbyings rig zung 'jug lam/__/lhun grub sku gsum nang gsal chen po'i 'bras/__/tshul 'di 'bras bu'i thus ka dag tu bstan/__9_/de sogs gzhi dang lam sogs dbye ba'i tshul/__/bden rnam shing rta'i bzhon pa la brten nas/__/zhi bde rin chen gling du nyer bkri phyir/__/rnam kun brtson pa'i lag pas nyer bzung 'tshal/__10_/gang la de skad spring pa'i rten bzang po/__/bdud rtsi phur ma ril bu bcas pa'i skyes/__/'di nyid phul bas dus rnams thams cad du/__/mi phyed dge mtshan gsar pas mdza' gyur cig__11_/_sarba sa man+ta shu b+haM/___/__!_