JKW-KABUM-22-ZA-007-008

🚧 This website is under continued development. We appreciate your patience!

Previous Text Back to Volume PageNext Text

Wylie title	'chi med pad+mA ka ra'i rnal 'byor dang 'brel ba'i gsol 'debs smon lam dang bcas pa grub gnyis dga' ston
Location	mkhyen brtse'i bka' 'bum Volume 22, sde tshan 7, Text 8, Pages 217-220 (Folios 17a4 to 18b3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. 'chi med pad+mA ka ra'i rnal 'byor dang 'brel ba'i gsol 'debs smon lam dang bcas pa grub gnyis dga' ston. In 'jam dbyangs mkhyen brtse'i dbang po'i bka' 'bum, Vol. 22: 217-220. Khams sde dge rdzong sar dgon: Rdzong sar blo gros phun tshogs, 2020.
Genre	Guru Yoga Texts - bla ma'i rnal 'byor
Deity	pad+ma 'byung gnas
Colophon	།ཅེས་པའང་རིག་འཛིན་གྲུབ་པའི་དཔྱིད་གཞོན་ནུ་ཨ་བྷཱ་ཡས་སྙིང་ནས་གུས་པ་ཆེན་པོས་གང་ཤར་གསོལ་བ་བཏབ་པ་སིདྡྷི་རསྟུ།
	ces pa'ang rig 'dzin grub pa'i dpyid gzhon nu a b+hA yas snying nas gus pa chen pos gang shar gsol ba btab pa sid+d+hi rastu

1 Texts in this Section (sde tshan or chos tshan)

8 217-220	འཆི་མེད་པདྨཱ་ཀ་རའི་རྣལ་འབྱོར་དང་འབྲེལ་བའི་གསོལ་འདེབས་སྨོན་ལམ་དང་བཅས་པ་གྲུབ་གཉིས་དགའ་སྟོན། 'chi med pad+mA ka ra'i rnal 'byor dang 'brel ba'i gsol 'debs smon lam dang bcas pa grub gnyis dga' ston Guru Yoga Texts - bla ma'i rnal 'byor	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

འཆི་མེད་པདྨཱ་ཀ་རའི་རྣལ་འབྱོར་དང་འབྲེལ་བའི་གསོལ་འདེབས་སྨོན་ལམ་དང་བཅས་པ་གྲུབ་གཉིས་དགའ་སྟོན་ཅེས་བྱ་བ། ན་མོ་གུ་རུ་པདྨཱ་ཀ་རཱ་ཡ། མཆོག་ཏུ་མི་འགྱུར་འོད་གསལ་རྡོ་རྗེའི་དབྱིངས། །ཟུང་འཇུག་སྒྱུ་འཕྲུལ་དྲྭ་བའི་རྣམ་རོལ་ཅན། །སྐུ་གསུམ་རིགས་འདུས་པདྨ་ཐོད་ཕྲེང་དང་། །དབྱེར་མེད་དྲིན་ཆེན་བླ་མར་གསོལ་བ་འདེབས། །མཁའ་ཁྱབ་རྒྱལ་བ་ཀུན་གྱི་ཡེ་ཤེས་ནི། །གང་འདུལ་ཅིར་ཡང་འཆར་བའི་མིག་འཕྲུལ་ལས། །དེང་འདིར་མཆོག་གི་སྤྲུལ་སྐུའི་ཟློས་གར་ཅན། །ཨོ་རྒྱན་སངས་རྒྱས་གཉིས་པར་གསོལ་བ་འདེབས། །ཁྱོད་ནི་སྐྱབས་གནས་ཀུན་འདུས་བླ་མ་སྟེ། །དངོས་གྲུབ་རྣམ་གཉིས་ཆར་འབེབས་ཡི་དམ་ལྷ། །གནས་ཡུལ་དཔའ་བོ་མཁའ་འགྲོའི་ཚོགས་ཀྱི་རྗེར། །ཡོངས་ཤར་རིགས་བརྒྱའི་ངོ་བོར་གསོལ་བ་འདེབས། །ཀྱེ་མ་སྙིགས་མའི་ཡང་མཐར་སྐྱེས་པ་ཡི། །བདག་དང་བདག་འདྲའི་མགོན་མེད་ཉམས་ཐག་འགྲོ། །བཟོད་དཀའི་སྡུག་བསྔལ་གསུམ་གྱིས་མནར་བ་ལ། །རྨད་བྱུང་ཐུགས་རྗེ་ཆེན་པོས་ཉེར་དགོངས་ནས། །རྡུལ་བྲལ་ཐམས་ཅད་གཟིགས་པའི་ཡེ་ཤེས་སྐུ། །མངོན་སུམ་མིག་གི་དཔྱིད་དུ་བསྟན་ནས་ཀྱང་། །སྨིན་གྲོལ་བདུད་རྩིས་བརླན་པའི་དགེ་མཚན་གྱིས། །དོན་བརྒྱུད་བྱིན་རླབས་པདྨོ་འཛུམ་པར་མཛོད། །དེ་མཐུས་སྲིད་ལས་ངེས་པར་འབྱུང་བ་དང་། །དད་དང་སྙིང་རྗེའི་བློ་གྲོས་ཕུན་ཚོགས་ཤིང་། །རྣམ་དག་བསྟན་ལ་རིམ་བཞིན་བསླབ་དང་བཅས། །རབ་ཞི་ནོར་བུའི་གླིང་དུ་བསྙེན་གྱུར་ཅིག །ཁྱད་པར་མཚན་ཉིད་ཀུན་ལྡན་བླ་མ་མཆོག །མཉེས་བ་གསུམ་གྱི་བྱ་བས་ལེགས་བསྟེན་ནས། །ངེས་དོན་རིག་པ་འཛིན་པའི་སྡེ་སྣོད་ལ། །ཐོས་བསམ་བསྒོམ་པའི་ཕ་མཐར་སོན་པར་ཤོག །སྣོད་བཅུད་པདྨ་འོད་ཀྱི་དཀྱིལ་འཁོར་དུ། །རྟག་པར་ཞེན་མེད་གསལ་བཏབ་སྒྲར་གྲགས་ཀུན། །སྔགས་ཀྱི་རོལ་མོར་འཁྲོལ་ཞིང་རྟོག་པའི་འགྲོས། །གང་ཤར་རང་གྲོལ་དབྱིངས་སུ་ཐིམ་གྱུར་ཅིག །ནམ་ཞིག་འདིར་སྣང་ནུབ་པར་གྱུར་པའི་མོད། །ནང་གསལ་ཀ་དག་དོན་གྱི་མཚོ་སྐྱེས་རྗེ། །ངོ་ཤེས་ཐག་ཆོད་བརྟན་པ་ཐོབ་པའི་མཐུས། །འཆི་སྲིད་ཆོས་ཀྱི་སྐུ་རུ་རོ་གཅིག་ཤོག །གལ་ཏེ་གཉིས་འཛིན་དྲྭ་བས་བཅིངས་པ་ལས། །ལྷུན་གྲུབ་སྒྱུ་མའི་སྣང་ཆ་འཆར་སྲིད་ན། །འགག་མེད་པདྨ་ཐོད་ཕྲེང་རོལ་པ་རུ། །ཟུང་འཇུག་ལོངས་སྤྱོད་རྫོགས་སྐུ་འགྲུབ་གྱུར་ཅིག །དེར་ཡང་མཆོག་གི་གོ་འཕང་མ་ཐོབ་ན། །རྣམ་དག་སྨོན་ལམ་ཐུགས་རྗེའི་འཕེན་པ་ལ། །བརྟེན་ནས་རང་བཞིན་སྤྲུལ་པའི་ཞིང་ཁམས་ཆེ། །རྔ་ཡབ་ཟངས་མདོག་དཔལ་རིར་བགྲོད་པར་ཤོག །དེ་ཚེ་གཟོད་ནས་སྤྲོས་པ་ལས་འདས་ཀྱང་། །འགག་མེད་སྙིང་རྗེ་ཆེན་པོའི་ཡེ་ཤེས་དང་། །མི་ཕྱེད་བདེ་ཆེན་རྡོ་རྗེའི་ངོ་བོ་ཉིད། །ཟུང་འཇུག་པདྨཱ་ཀ་ར་མཐོང་གྱུར་ཅིག །དེ་མཐུས་གློ་བུར་བསལ་རུང་སྒྲིབ་གཉིས་ཚོགས། །ཟབ་ཞི་སྤྲོས་བྲལ་ཀློང་དུ་ཐིམ་པ་ལས། །ཟག་མེད་དགེ་ཚོགས་རྒྱ་མཚོའི་འདུ་བྱེད་ཀྱིས། །ལམ་ལྔ་ས་བཅུ་མྱུར་དུ་ཐོབ་པར་ཤོག །གཞན་ཡང་གནས་སྐབས་མི་མཐུན་ཕྱོགས་ཀུན་ཞི། །ཚེ་བསོད་དཔལ་འབྱོར་ལུང་རྟོགས་ཡོན་ཏན་རྒྱས། །སྣང་སེམས་དབང་འདུས་གཟུང་འཛིན་དགྲ་བགེགས་ཚོགས། །སྲིད་ཞི་དབྱེར་མེད་ཀློང་དུ་སྒྲོལ་གྱུར་ཅིག །ཕྱི་སྣོད་འབྱུང་བའི་དཔྱིད་དཔལ་ངང་གིས་སྙོམས། །ནང་བཅུད་འགྲོ་རྣམས་དགེ་བཅུའི་སྤྱོད་པས་འཚོ། །རྫོགས་ལྡན་གསར་པའི་དགའ་སྟོན་དར་བབས་པའི། །བཀྲ་ཤིས་དཔལ་གྱིས་རྟག་ཏུ་ཁྱབ་པར་ཤོག །མཐར་ཐུག་སྐུ་དང་ཡེ་ཤེས་ཕྲིན་ལས་རྣམས། མགོན་པོ་ཁྱོད་དང་རྣམ་དབྱེར་མི་ཕྱེད་པས། །མཁའ་མཉམ་ཡིད་ཅན་སྲིད་པའི་ཆུ་གཏེར་ལས། །སྒྲོལ་བའི་དེད་དཔོན་ཆེན་པོར་བདག་གྱུར་ཅིག །མདོར་ན་རྩེ་གཅིག་གསོལ་བཏབ་སྨོན་པའི་མཐུས། །རྩ་གསུམ་ཀུན་འདུས་པདྨ་འབྱུང་གནས་དང་། །དབྱེར་མེད་དཔལ་ལྡན་བླ་མའི་ཐུགས་རྗེ་ཡིས། །དོན་གཉིས་མྱུར་དུ་འགྲུབ་པར་བྱིན་གྱིས་རློབས། །ཅེས་པའང་རིག་འཛིན་གྲུབ་པའི་དཔྱིད་གཞོན་ནུ་ཨ་བྷཱ་ཡས་སྙིང་ནས་གུས་པ་ཆེན་པོས་གང་ཤར་གསོལ་བ་བཏབ་པ་སིདྡྷི་རསྟུ། ། ༈

[edit]

'chi med pad+mA ka ra'i rnal 'byor dang 'brel ba'i gsol 'debs smon lam dang bcas pa grub gnyis dga' ston/ 'chi med pad+mA ka ra'i rnal 'byor dang 'brel ba'i gsol 'debs smon lam dang bcas pa grub gnyis dga' ston ces bya ba/__na mo gu ru pad+mA ka rA ya/__mchog tu mi 'gyur 'od gsal rdo rje'i dbyings/__/zung 'jug sgyu 'phrul drwa ba'i rnam rol can/__/sku gsum rigs 'dus pad+ma thod phreng dang /__/dbyer med drin chen bla mar gsol ba 'debs/__/mkha' khyab rgyal ba kun gyi ye shes ni/__/gang 'dul cir yang 'char ba'i mig 'phrul las/__/deng 'dir mchog gi sprul sku'i zlos gar can/__/o rgyan sangs rgyas gnyis par gsol ba 'debs/__/khyod ni skyabs gnas kun 'dus bla ma ste/__/dngos grub rnam gnyis char 'bebs yi dam lha/__/gnas yul dpa' bo mkha' 'gro'i tshogs kyi rjer/__/yongs shar rigs brgya'i ngo bor gsol ba 'debs/__/kye ma snyigs ma'i yang mthar skyes pa yi/__/bdag dang bdag 'dra'i mgon med nyams thag 'gro/__/bzod dka'i sdug bsngal gsum gyis mnar ba la/__/rmad byung thugs rje chen pos nyer dgongs nas/__/rdul bral thams cad gzigs pa'i ye shes sku/__/mngon sum mig gi dpyid du bstan nas kyang /__/smin grol bdud rtsis brlan pa'i dge mtshan gyis/__/don brgyud byin rlabs pad+mo 'dzum par mdzod/__/de mthus srid las nges par 'byung ba dang /__/dad dang snying rje'i blo gros phun tshogs shing /__/rnam dag bstan la rim bzhin bslab dang bcas/__/rab zhi nor bu'i gling du bsnyen gyur cig__/khyad par mtshan nyid kun ldan bla ma mchog__/mnyes ba gsum gyi bya bas legs bsten nas/__/nges don rig pa 'dzin pa'i sde snod la/__/thos bsam bsgom pa'i pha mthar son par shog__/snod bcud pad+ma 'od kyi dkyil 'khor du/__/rtag par zhen med gsal btab sgrar grags kun/__/sngags kyi rol mor 'khrol zhing rtog pa'i 'gros/__/gang shar rang grol dbyings su thim gyur cig__/nam zhig 'dir snang nub par gyur pa'i mod/__/nang gsal ka dag don gyi mtsho skyes rje/__/ngo shes thag chod brtan pa thob pa'i mthus/__/'chi srid chos kyi sku ru ro gcig shog__/gal te gnyis 'dzin drwa bas bcings pa las/__/lhun grub sgyu ma'i snang cha 'char srid na/__/'gag med pad+ma thod phreng rol pa ru/__/zung 'jug longs spyod rdzogs sku 'grub gyur cig__/der yang mchog gi go 'phang ma thob na/__/rnam dag smon lam thugs rje'i 'phen pa la/__/brten nas rang bzhin sprul pa'i zhing khams che/__/rnga yab zangs mdog dpal rir bgrod par shog__/de tshe gzod nas spros pa las 'das kyang /__/'gag med snying rje chen po'i ye shes dang /__/mi phyed bde chen rdo rje'i ngo bo nyid/__/zung 'jug pad+mA ka ra mthong gyur cig__/de mthus glo bur bsal rung sgrib gnyis tshogs/__/zab zhi spros bral klong du thim pa las/__/zag med dge tshogs rgya mtsho'i 'du byed kyis/__/lam lnga sa bcu myur du thob par shog__/gzhan yang gnas skabs mi mthun phyogs kun zhi/__/tshe bsod dpal 'byor lung rtogs yon tan rgyas/__/snang sems dbang 'dus gzung 'dzin dgra bgegs tshogs/__/srid zhi dbyer med klong du sgrol gyur cig__/phyi snod 'byung ba'i dpyid dpal ngang gis snyoms/__/nang bcud 'gro rnams dge bcu'i spyod pas 'tsho/__/rdzogs ldan gsar pa'i dga' ston dar babs pa'i/__/bkra shis dpal gyis rtag tu khyab par shog__/mthar thug sku dang ye shes phrin las rnams/__mgon po khyod dang rnam dbyer mi phyed pas/__/mkha' mnyam yid can srid pa'i chu gter las/__/sgrol ba'i ded dpon chen por bdag gyur cig__/mdor na rtse gcig gsol btab smon pa'i mthus/__/rtsa gsum kun 'dus pad+ma 'byung gnas dang /__/dbyer med dpal ldan bla ma'i thugs rje yis/__/don gnyis myur du 'grub par byin gyis rlobs/_/ces pa'ang rig 'dzin grub pa'i dpyid gzhon nu a b+hA yas snying nas gus pa chen pos gang shar gsol ba btab pa sid+d+hi rastu/__/__!_