JKW-KABUM-22-ZA-007-007

🚧 This website is under continued development. We appreciate your patience!

Previous Text Back to Volume PageNext Text

Wylie title	pad+mA ka ra la brten pa'i bla ma'i rnal 'byor rig 'dzin lam bzang
Location	mkhyen brtse'i bka' 'bum Volume 22, sde tshan 7, Text 7, Pages 213-217 (Folios 15a2 to 17a4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. pad+mA ka ra la brten pa'i bla ma'i rnal 'byor rig 'dzin lam bzang. In 'jam dbyangs mkhyen brtse'i dbang po'i bka' 'bum, Vol. 22: 213-217. Khams sde dge rdzong sar dgon: Rdzong sar blo gros phun tshogs, 2020.
Genre	Guru Yoga Texts - bla ma'i rnal 'byor
Deity	pad+ma 'byung gnas

1 Texts in this Section (sde tshan or chos tshan)

7 213-217	པདྨཱ་ཀ་ར་ལ་བརྟེན་པའི་བླ་མའི་རྣལ་འབྱོར་རིག་འཛིན་ལམ་བཟང་། pad+mA ka ra la brten pa'i bla ma'i rnal 'byor rig 'dzin lam bzang Guru Yoga Texts - bla ma'i rnal 'byor	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །རྗེ་བཙུན་པདྨཱ་ཀ་ར་ལ་བརྟེན་པའི་བླ་མའི་རྣལ་འབྱོར་རིག་པ་འཛིན་པའི་ལམ་བཟང་ཞེས་བྱ་བ། ན་མོ་གུ་རུ་པདྨཱ་ཀ་རཱ་ཡ། །བདེ་ཆེན་འཁོར་ལོའི་ཆུ་སྐྱེས་དབུས། །བླ་མ་འཆི་མེད་ཐོད་ཕྲེང་རྩལ། །བསྙེན་ལས་དངོས་གྲུབ་མཆོག་ཐོབ་སླད། །སྐྱབས་སེམས་སྔོན་སོང་འདི་ལྟར་བསྒོམ། །ཧྲཱིཿ ཆོས་ཀུན་གདོད་ནས་རིག་སྟོང་གཉུག་མའི་ངང་། །སྣོད་བཅུད་ཐམས་ཅད་པདྨ་འོད་ཀྱི་ཞིང་། །རིག་འཛིན་གྲུབ་པ་རྒྱ་མཚོའི་དགའ་བའི་ཚལ། །མེ་ཏོག་ཆར་འབེབས་འཇའ་ཟེར་འཁྲིགས་པའི་ཀློང་། །བདེ་སྟོང་ཆུ་སྐྱེས་ཉི་མ་བམ་རོའི་སྟེང་། །རང་ཉིད་གཞི་ལུས་དབང་ཆེན་ཧེ་རུ་ཀ །ཐུགས་རྗེ་ཆགས་པའི་སྐུ་མདོག་དམར་པོ་ལ། །ཞལ་གཅིག་ཕྱག་གཉིས་གྲི་གུག་ཐོད་པ་འཛིན། །གར་དགུའི་ཉམས་ལྡན་ཁྲོ་བོའི་ཆས་ཀུན་རྫོགས། །རང་འོད་རྡོ་རྗེ་ཕག་མོ་ཡུམ་དང་སྦྱོར། །ཐབས་ཤེས་སྤྱི་བོར་རྟ་གདོང་ཕག་ཞལ་བཞད། །སྣང་སྟོང་དབྱེར་མེད་ཆེན་པོར་གསལ་བ་ཡི། །བདེ་ཆེན་འཁོར་ལོར་པད་དཀར་ཉི་ཟླའི་སྟེང་། །ངོ་བོ་ཁྱབ་བདག་དྲིན་ཅན་བླ་མ་ལ། །རྣམ་པ་འཆི་མེད་པདྨ་ཐོད་ཕྲེང་རྩལ། །སྐུ་མདོག་དཀར་དམར་ཁྲོ་འཛུམ་གཟི་བརྗིད་འབར། །ཕྱག་གཡས་རྡོ་རྗེ་གཡོན་པས་ཐོད་བུམ་བསྣམས། །སྐུ་ལ་གསང་ཕོད་ཆོས་གོས་ཟབ་བེར་དང་། །དབུ་ལ་རབ་མཛེས་པདྨའི་མཉེན་ཞུ་གསོལ། །ལྷན་སྐྱེས་འདུ་འབྲལ་མེད་པའི་ཌཱཀྐི་ནི། །མནྡཱ་ར་བ་གྲི་ཐོད་འཛིན་པས་འཁྱུད། །ཞབས་གཉིས་ཕྱེད་སྐྱིལ་མཉམ་པར་རོལ་པ་ཡི། །སྤྱི་བོར་ལོངས་སྐུ་འཕགས་མཆོག་སྙིང་རྗེའི་གཏེར། །དེ་ཡི་སྤྱི་བོར་ཆོས་སྐུ་སྣང་མཐའ་ཡས། །སྐུ་གསུམ་དབྱེར་མེད་བདེ་བ་ཆེན་པོར་བཞུགས། །ཕྱི་རོལ་སྟོང་གསལ་འོད་ལྔའི་དཀྱིལ་འཁོར་དབུས། །ཐོད་ཕྲེང་སྡེ་ལྔ་སྤྲུལ་པའི་མཚན་བརྒྱད་སོགས། །སྒྱུ་འཕྲུལ་རྡོ་རྗེའི་རྣམ་རོལ་བསམ་མི་ཁྱབ། །བར་མཚམས་བརྒྱུད་གསུམ་རིག་འཛིན་བླ་མ་དང་། །སྒྲུབ་སྡེ་བརྒྱད་སོགས་ཡི་དམ་ཞི་ཁྲོའི་ལྷ། །གནས་གསུམ་དཔའ་བོ་མཁའ་འགྲོ་ཆོས་སྲུང་ཚོགས། །སྣང་སྟོང་ཆུ་ཟླ་ལྟ་བུར་གསལ་བ་ཡི། །སྤྱི་མགྲིན་སྙིང་གར་རྡོ་རྗེ་གསུམ་གྱི་དངོས། །རྣམ་ཐར་གསུམ་ལྡན་ཡི་གེ་འབྲུ་གསུམ་མཚན། །སྙོམས་འཇུག་རྗེས་ཆགས་རོལ་མོའི་འོད་ཟེར་སྤྲིན། །དཔག་ཡས་ནམ་མཁའ་ཁྱབ་པར་འཕྲོས་པ་ཡིས། །འོག་མིན་བདེ་ཆེན་པདྨ་འོད་ལ་སོགས། །ཕྱོགས་བཅུ་དུས་བཞིའི་ཞིང་ཁམས་རབ་འབྱམས་ནས། །ཡེ་ཤེས་སྤྱན་དྲངས་གཉིས་སུ་མེད་པར་གྱུར། །ཧྲཱིཿ རྗེ་བཙུན་ཨོ་རྒྱན་པདྨ་ཐོད་ཕྲེང་རྩལ། །སངས་རྒྱས་ཀུན་དངོས་ཡེ་ཤེས་སྒྱུ་མའི་སྐུ། །རྩ་གསུམ་རྒྱལ་བ་རྒྱ་མཚོའི་འཁོར་དང་བཅས། །རྩེ་གཅིག་མོས་པས་གནས་འདིར་སྤྱན་འདྲེན་ན། །གཤེགས་དང་བཞུགས་པའི་མཚན་མ་མི་མངའ་ཡང་། །འགག་མེད་སྙིང་རྗེ་ཆེན་པོའི་གཞན་དབང་གིས། །བདག་སོགས་འཁོར་བའི་མཚོ་ལས་བསྒྲལ་བ་དང་། །བྱིན་རླབས་དངོས་གྲུབ་སྩོལ་ཕྱིར་སྐུར་བཞེངས་ཤིག །ཧྲཱིཿ གཉིས་སུ་འཛིན་པའི་སྣང་བ་རྣམ་དག་པ། །རོ་གཅིག་གཉུག་མའི་ངང་དུ་ཕྱག་འཚལ་ལོ། །གང་ཤར་བདེ་སྟོང་རོལ་མོར་འཆར་བའི་དཔྱིད། །འོད་གསལ་ཐིག་ལེ་ཆེན་པོའི་མཆོད་པར་འབུལ། །བློས་བྱས་འཁྲུལ་པའི་སྡིག་ལྟུང་ཇི་སྙེད་ཀུན། །འགྱུར་མེད་ཡོངས་གྲུབ་ཀ་དག་ཀློང་དུ་བཤགས། །མཁའ་ལྟར་རབ་ཞི་སྐྱེ་བ་མེད་པའི་དོན། །དྲན་འཛིན་གཉེན་པོ་བྲལ་ལ་རྗེས་ཡི་རང་། །སྒྲ་ཚིག་མཚན་མའི་ཆོས་ལས་རྣམ་གྲོལ་བའི། །དོན་དམ་རྟོགས་པའི་ཆོས་འཁོར་བསྐོར་བར་བསྐུལ། །ཡོངས་གྲུབ་རྟག་པ་དམ་པའི་བདག་ཉིད་ཆེ། །རྣམ་ཀུན་མཆོག་ལྡན་ཆེན་པོར་བཞུགས་གསོལ་འདེབས། །འདིས་མཚོན་དགེ་ཚོགས་འཁོར་གསུམ་ལས་འདས་པ། །སྲིད་ཞི་མི་གནས་དབུ་མའི་དབྱིངས་སུ་བསྔོ། །ཧྲཱིཿ འཆི་མེད་རིག་འཛིན་པདྨ་ཐོད་ཕྲེང་རྩལ། །ཉེ་རྒྱུའི་བདེ་སྟེར་མནྡཱ་ར་བར་བཅས། །རབ་འབྱམས་རྩ་གསུམ་དཀྱིལ་འཁོར་ལྷ་ཚོགས་ལ། །རྟག་ཏུ་སྙིང་ནས་གུས་པས་གསོལ་འདེབས་ན། །གནས་སྐབས་དངོས་ཉམས་རྨི་ལམ་སྣང་ཆ་རུ། །མགོན་པོ་དགྱེས་པའི་འཛུམ་ཞལ་མྱུར་མཐོང་ཞིང་། །མཐར་ཐུག་རིག་འཛིན་རྣམ་བཞིའི་ཐེམ་སྐས་ལ། །བརྟེན་ནས་སྐུ་བཞིའི་ཕ་མཐར་ཕྱིན་གྱུར་ཅིག །ཁྱད་པར་ཚེ་འདིའི་སྣང་བ་ནུབ་མ་ཐག །རླུང་སེམས་ཟུང་འཇུག་སྒྱུ་མའི་སྐུར་ལྡང་སྟེ། །བདེ་ཆེན་པདྨ་འོད་ཀྱི་ཕོ་བྲང་དུ། །འཆི་མེད་གདོད་མའི་གོ་འཕང་མངོན་གྱུར་ཤོག །ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ཞེས་པས་གསོལ་འདེབས་བསྙེན་པར་འབད། །སྐབས་སུ་མོས་གུས་དྲག་པའི་ངང་། །བྱིན་རླབས་ཚད་མེད་རྡོ་རྗེའི་གསུང་། །གསོལ་འདེབས་རྒྱུད་བསྐུལ་ཅི་རིགས་བྱ། །རེས་འགའ་སྣང་གྲགས་རིགས་གསུམ་ཀུན། །བླ་མའི་སྐུ་གསུང་ཐུགས་སུ་བལྟ། །ལམ་ཁྱེར་ཧཱུྃ་ལྔའི་སྣང་གླུ་ལེན། །ཐུན་མཐར་དབང་བཞི་བླང་བ་ནི། །རྩེ་གཅིག་གུས་པས་བསྙེན་ཅིང་གསོལ་བཏབ་མཐུས། །སྐྱབས་ཀུན་འདུས་ཞལ་འཆི་མེད་པདྨ་འབྱུང་། །ཡབ་ཡུམ་མཉམ་པར་སྦྱོར་བའི་མཁའ་གསང་ནས། །བདེ་ཆེན་བྱང་ཆུབ་སེམས་ཀྱི་བདུད་རྩིའི་རྒྱུན། །ཟླ་བ་ཞུན་མའི་མདོག་ཅན་དཔག་མེད་བབས། །སྤྱི་བོ་ནས་ཞུགས་རྩ་ཁམས་ཀུན་ཁྱབ་པས། །དབང་བཞི་ཐོབ་ཅིང་སྒྲིབ་བཞིའི་འཆིང་བ་སྦྱངས། །སྐུ་བཞིའི་གོ་འཕང་འགྲུབ་པའི་སྐལ་བ་བཞག །མཐར་ཐུག་ལྷ་ཚོགས་འོད་ཞུ་རང་ཉིད་དང་། །དབྱེར་མེད་མ་བཅོས་འོད་གསལ་བློ་འདས་ངང་། །རིག་སྟོང་སྤྲོས་བྲལ་གདོད་མའི་ཐོད་ཕྲེང་རྩལ། །ལྷུན་གྲུབ་རིག་འཛིན་རང་ཞལ་མཐོང་བར་གྱུར། །ཞེས་བརྗོད་རིག་སྟོང་རྗེན་པར་བཞག །དེ་ལྟར་མོས་གུས་རྩེ་གཅིག་གིས། །ཟབ་མོའི་ལམ་འདི་ཉམས་བླངས་ན། །དོན་གཉིས་འགྲུབ་པར་ཐེ་ཚོམ་མེད། །མཉམ་གཞག་རྣམ་པར་མི་རྟོག་དང་། །རྗེས་ཐོབ་ངེས་གསང་གདམས་པ་འདི། །རྣལ་འབྱོར་གཞོན་ནུའི་རྟོག་ཆོས་ཏེ། །སྐལ་བཟང་རྣམས་ཀྱི་དཔལ་དུ་ཤོག །བདེ་ཆེན་སྙིང་དབུས་དབུ་མའི་ཀློང་། །འོད་གསལ་སྟོང་པའི་ཧེ་རུ་ཀས། །འདུ་འབྲལ་མེད་པར་རྗེས་བཟུང་ནས། །རྣམ་ཀུན་མཆོག་ལྡན་ཉིད་གྱུར་ཅིག ། ༈

[edit]

pad+mA ka ra la brten pa'i bla ma'i rnal 'byor rig 'dzin lam bzang /__ @#/_/rje btsun pad+mA ka ra la brten pa'i bla ma'i rnal 'byor rig pa 'dzin pa'i lam bzang zhes bya ba/__na mo gu ru pad+mA ka rA ya/__/bde chen 'khor lo'i chu skyes dbus/__/bla ma 'chi med thod phreng rtsal/__/bsnyen las dngos grub mchog thob slad/__/skyabs sems sngon song 'di ltar bsgom/__/hrIH__chos kun gdod nas rig stong gnyug ma'i ngang /__/snod bcud thams cad pad+ma 'od kyi zhing /__/rig 'dzin grub pa rgya mtsho'i dga' ba'i tshal/__/me tog char 'bebs 'ja' zer 'khrigs pa'i klong /__/bde stong chu skyes nyi ma bam ro'i steng /__/rang nyid gzhi lus dbang chen he ru ka__/thugs rje chags pa'i sku mdog dmar po la/__/zhal gcig phyag gnyis gri gug thod pa 'dzin/__/gar dgu'i nyams ldan khro bo'i chas kun rdzogs/__/rang 'od rdo rje phag mo yum dang sbyor/__/thabs shes spyi bor rta gdong phag zhal bzhad/__/snang stong dbyer med chen por gsal ba yi/__/bde chen 'khor lor pad dkar nyi zla'i steng /__/ngo bo khyab bdag drin can bla ma la/__/rnam pa 'chi med pad+ma thod phreng rtsal/__/sku mdog dkar dmar khro 'dzum gzi brjid 'bar/__/phyag g.yas rdo rje g.yon pas thod bum bsnams/__/sku la gsang phod chos gos zab ber dang /__/dbu la rab mdzes pad+ma'i mnyen zhu gsol/__/lhan skyes 'du 'bral med pa'i DAk+ki ni/__/man+dA ra ba gri thod 'dzin pas 'khyud/__/zhabs gnyis phyed skyil mnyam par rol pa yi/__/spyi bor longs sku 'phags mchog snying rje'i gter/__/de yi spyi bor chos sku snang mtha' yas/__/sku gsum dbyer med bde ba chen por bzhugs/__/phyi rol stong gsal 'od lnga'i dkyil 'khor dbus/__/thod phreng sde lnga sprul pa'i mtshan brgyad sogs/__/sgyu 'phrul rdo rje'i rnam rol bsam mi khyab/__/bar mtshams brgyud gsum rig 'dzin bla ma dang /__/sgrub sde brgyad sogs yi dam zhi khro'i lha/__/gnas gsum dpa' bo mkha' 'gro chos srung tshogs/__/snang stong chu zla lta bur gsal ba yi/__/spyi mgrin snying gar rdo rje gsum gyi dngos/__/rnam thar gsum ldan yi ge 'bru gsum mtshan/__/snyoms 'jug rjes chags rol mo'i 'od zer sprin/__/dpag yas nam mkha' khyab par 'phros pa yis/__/'og min bde chen pad+ma 'od la sogs/__/phyogs bcu dus bzhi'i zhing khams rab 'byams nas/__/ye shes spyan drangs gnyis su med par gyur/__/hrIH__rje btsun o rgyan pad+ma thod phreng rtsal/__/sangs rgyas kun dngos ye shes sgyu ma'i sku/__/rtsa gsum rgyal ba rgya mtsho'i 'khor dang bcas/__/rtse gcig mos pas gnas 'dir spyan 'dren na/__/gshegs dang bzhugs pa'i mtshan ma mi mnga' yang /__/'gag med snying rje chen po'i gzhan dbang gis/__/bdag sogs 'khor ba'i mtsho las bsgral ba dang /__/byin rlabs dngos grub stsol phyir skur bzhengs shig__/hrIH__gnyis su 'dzin pa'i snang ba rnam dag pa/__/ro gcig gnyug ma'i ngang du phyag 'tshal lo/__/gang shar bde stong rol mor 'char ba'i dpyid/__/'od gsal thig le chen po'i mchod par 'bul/__/blos byas 'khrul pa'i sdig ltung ji snyed kun/__/'gyur med yongs grub ka dag klong du bshags/__/mkha' ltar rab zhi skye ba med pa'i don/__/dran 'dzin gnyen po bral la rjes yi rang /__/sgra tshig mtshan ma'i chos las rnam grol ba'i/__/don dam rtogs pa'i chos 'khor bskor bar bskul/__/yongs grub rtag pa dam pa'i bdag nyid che/__/rnam kun mchog ldan chen por bzhugs gsol 'debs/__/'dis mtshon dge tshogs 'khor gsum las 'das pa/__/srid zhi mi gnas dbu ma'i dbyings su bsngo/__/hrIH__'chi med rig 'dzin pad+ma thod phreng rtsal/__/nye rgyu'i bde ster man+dA ra bar bcas/__/rab 'byams rtsa gsum dkyil 'khor lha tshogs la/__/rtag tu snying nas gus pas gsol 'debs na/__/gnas skabs dngos nyams rmi lam snang cha ru/__/mgon po dgyes pa'i 'dzum zhal myur mthong zhing /__/mthar thug rig 'dzin rnam bzhi'i them skas la/__/brten nas sku bzhi'i pha mthar phyin gyur cig__/khyad par tshe 'di'i snang ba nub ma thag__/rlung sems zung 'jug sgyu ma'i skur ldang ste/__/bde chen pad+ma 'od kyi pho brang du/__/'chi med gdod ma'i go 'phang mngon gyur shog__/oM AHhU~M badz+ra gu ru pad+ma sid+d+hi hU~M/__zhes pas gsol 'debs bsnyen par 'bad/__/skabs su mos gus drag pa'i ngang /__/byin rlabs tshad med rdo rje'i gsung /__/gsol 'debs rgyud bskul ci rigs bya/__/res 'ga' snang grags rigs gsum kun/__/bla ma'i sku gsung thugs su blta/__/lam khyer hU~M lnga'i snang glu len/__/thun mthar dbang bzhi blang ba ni/__/rtse gcig gus pas bsnyen cing gsol btab mthus/__/skyabs kun 'dus zhal 'chi med pad+ma 'byung /__/yab yum mnyam par sbyor ba'i mkha' gsang nas/__/bde chen byang chub sems kyi bdud rtsi'i rgyun/__/zla ba zhun ma'i mdog can dpag med babs/__/spyi bo nas zhugs rtsa khams kun khyab pas/__/dbang bzhi thob cing sgrib bzhi'i 'ching ba sbyangs/__/sku bzhi'i go 'phang 'grub pa'i skal ba bzhag__/mthar thug lha tshogs 'od zhu rang nyid dang /__/dbyer med ma bcos 'od gsal blo 'das ngang /__/rig stong spros bral gdod ma'i thod phreng rtsal/__/lhun grub rig 'dzin rang zhal mthong bar gyur/__/zhes brjod rig stong rjen par bzhag__/de ltar mos gus rtse gcig gis/__/zab mo'i lam 'di nyams blangs na/__/don gnyis 'grub par the tshom med/__/mnyam gzhag rnam par mi rtog dang /__/rjes thob nges gsang gdams pa 'di/__/rnal 'byor gzhon nu'i rtog chos te/__/skal bzang rnams kyi dpal du shog__/bde chen snying dbus dbu ma'i klong /__/'od gsal stong pa'i he ru kas/__/'du 'bral med par rjes bzung nas/__/rnam kun mchog ldan nyid gyur cig__/__!