JKW-KABUM-21-ZHA-001-004

🚧 This website is under continued development. We appreciate your patience!

Previous Text Back to Volume PageNext Text

Wylie title	sgrub thabs 'dod 'jo dang rjes 'brel 'jam dbyangs smra seng dpa' bo bcu gnyis kyi ril bu sgrub pa'i ngag 'don
Location	mkhyen brtse'i bka' 'bum Volume 21, sde tshan 1, Text 4, Pages 15-23 (Folios 8a6 to 12a1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. sgrub thabs 'dod 'jo dang rjes 'brel 'jam dbyangs smra seng dpa' bo bcu gnyis kyi ril bu sgrub pa'i ngag 'don. In 'jam dbyangs mkhyen brtse'i dbang po'i bka' 'bum, Vol. 21: 15-23. Khams sde dge rdzong sar dgon: Rdzong sar blo gros phun tshogs, 2020.
Genre	Liturgy - ngag 'don  ·  Medicinal Pills - Making and Activating Practices - sman sgrub
Cycle	སྒྲུབ་ཐབས་འདོད་འཇོའི་བུམ་བཟང་ (sgrub thabs 'dod 'jo'i bum bzang)
Deity	'jam dpal smra ba'i seng ge

1 Texts in this Section (sde tshan or chos tshan)

4 15-23	སྒྲུབ་ཐབས་འདོད་འཇོ་དང་རྗེས་འབྲེལ་འཇམ་དབྱངས་སྨྲ་སེང་དཔའ་བོ་བཅུ་གཉིས་ཀྱི་རིལ་བུ་སྒྲུབ་པའི་ངག་འདོན། sgrub thabs 'dod 'jo dang rjes 'brel 'jam dbyangs smra seng dpa' bo bcu gnyis kyi ril bu sgrub pa'i ngag 'don Liturgy - ngag 'don   ·   Medicinal Pills - Making and Activating Practices - sman sgrub	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

སྒྲུབ་ཐབས་འདོད་འཇོ་དང་རྗེས་འབྲེལ་འཇམ་དབྱངས་སྨྲ་སེང་དཔའ་བོ་བཅུ་གཉིས་ཀྱི་རིལ་བུ་སྒྲུབ་པའི་ངག་འདོན་ནི། གྲུབ་ན་རིལ་བུ་ལ་དམིགས་ཏེ་སྦྱོང་ཁྲུས་སྤྱི་ལྟར་བྱ། གང་ལྟར་ཡང་། འགྲོ་རྣམས་བསྒྲལ་འདོད་བསམ་པ་ཡིས། །སངས་རྒྱས་ཆོས་དང་དགེ་འདུན་ལ། །བྱང་ཆུབ་སྙིང་པོར་མཆིས་ཀྱི་བར། །རྟག་པར་བདག་ནི་སྐྱབས་སུ་མཆི། །ལན་ཇི་ལྟར་རིགས་པས་སྐྱབས་སུ་འགྲོ། ཤེས་རབ་སྙིང་བརྩེ་དང་བཅས་པའི། །བརྩོན་པས་སེམས་ཅན་དོན་དུ་བདག །སངས་རྒྱས་མདུན་དུ་གནས་བཅས་ཏེ། །རྫོགས་པའི་བྱང་ཆུབ་སེམས་བསྐྱེད་བགྱི། །ལན་གསུམ་གྱིས་སེམས་བསྐྱེད། སེམས་ཅན་ཐམས་ཅད་བདེ་བ་དང་སོགས་ཚད་མེད་བཞི་བསྒོམ་པ་སྔོན་དུ་འགྲོ་བས། སྭ་བྷཱ་བས་སྟོང་པར་སྦྱང་། སྟོང་པའི་ངང་ལས་པྃ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་སིཾ་ལས་སེང་གེ་སྔོན་པོ་མགོ་བོ་གཡས་སུ་བསྟན་ཅིང་གདོང་གྱེན་དུ་ཕྱོགས་པ། རལ་པ་དམར་སེར་གྲོལ་བ་ཉལ་སྟབས་སུ་གནས་པའི་སྟེང་དུ་པད་ཉི་ལ་གནས་པའི་དྷཱིཿཡིག་གུར་གུམ་གཞོན་ནུའི་མདོག་ཅན། དེ་ཡོངས་སུ་གྱུར་པ་ལས། བདག་ཉིད་རྗེ་བཙུན་འཇམ་དབྱངས་སྐུ་མདོག་དམར་སེར་ཕྱག་གཉིས་ཆོས་འཆད་ཀྱི་ཕྱག་རྒྱ་མཛད་པའི་མཐེབ་མཛུབ་ཀྱི་བར་ནས་བྱུང་བའི་ཨུཏྤ་ལའི་སྡོང་བུ་སྙན་གཡས་གཡོན་གྱི་ཐད་ཀར་ཁ་བྱེ་བའི་གཡས་ན་རལ་གྲི་དང་གཡོན་ན་གླེགས་བམ་ཅན། བཅུ་དྲུག་ལོན་པའི་ལང་ཚོ་དང་ལྡན་པ་དབུ་སྐྲ་ཟུར་ཕུད་ལྔ་པའི་རྩེ་མོར་ནོར་བུས་སྤྲས་ཤིང་། ཞབས་གཉིས་རྒྱལ་པོ་རོལ་པའི་སྟབས་ཀྱིས་སེང་གེ་ལ་བཞུགས་པ། དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། ཞི་འཛུམ་སྒེག་པའི་ཆ་ལུགས་ཅན་འོད་ཟེར་དམར་པོ་འཕྲོ་བ། དེ་ལས་འོད་ཟེར་འཕྲོས་པས་བསྒོམས་པ་དང་འདྲ་བའི་ཡེ་ཤེས་སེམས་དཔའ་བཛྲ་ས་མཱ་ཛཿས་མདུན་གྱི་ནམ་མཁའ་སྤྱན་དྲངས། ཨོཾ་བཛྲ་ཨརྒྷཾ་ལ་སོགས་པས་མཆོད། ཛཿཧཱུྃ་བྃ་ཧོཿགཉིས་སུ་མེད་པར་གྱུར། སླར་ཡང་རང་གི་ཐུགས་ཀ་ནས་འོད་ཟེར་འཕྲོས་པས་དབང་གི་ལྷ་རིགས་ལྔ་འཁོར་དང་བཅས་པ་བཛྲ་ས་མ་ཛཿ ཨོཾ་བཛྲ་ཨརྒྷཾ་སོགས། དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་བ་སྩལ་དུ་གསོལ། ཨོཾ་བཛྲཱི་བྷ་བ་ཨ་བྷི་ཥིཉྩ་ཧཱུྃ། ཞེས་གསུང་ཞིང་དབང་གི་ལྷ་རྣམས་ཀྱིས་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང་། དྲི་མ་དག །ཆུའི་ལྷག་མ་ཡར་ལུད་པ་ལས་མི་བསྐྱོད་པས་དབུ་བརྒྱན་པར་གྱུར། མདུན་གྱི་རིལ་བུ་གདན་འཁོར་དང་བཅས་པ་བསང་སྦྱང་། སྟོང་པའི་ངང་ལས་མདུན་གྱི་གདན་བྲིས་པ་ཇི་ལྟ་བའི་དབུས་སུ་ཤེས་རབ་ཀྱི་འཁོར་ལོ་རྩིབས་བཞི་པའི་ལྟེ་བར་པདྨ་དང་ཟླ་བའི་གདན་གྱི་སྟེང་དུ་རིལ་བུ་རྣམས་ཧྲཱིཿཡིག་མཐིང་ཞུན་གྱི་མདོག་ལྟ་བུ་ཡོངས་སུ་གྱུར་པ་ལས་ལྷ་མོ་དབྱངས་ཅན་མ་སྐུ་མདོག་སྔོན་མོ་ལྷ་མོའི་ཆ་ལུགས་ཡོངས་སུ་རྫོགས་ཤིང་། ཞབས་ཙོག་པུའི་ཕྱེད་ཀྲུང་གིས་བཞུགས་པ། བུད་མེད་སྒྱུ་མའི་ང་རྒྱལ་གྱིས་འགྱིང་ཞིང་ཕྱག་གཉིས་ཆོས་འཆད་ཀྱི་ཕྱག་རྒྱ་མཛད་པའི་མཐེབ་མཛུབ་ཀྱི་བར་ནས་བྱུང་བའི་ཨུཏྤ་ལའི་སྡོང་བུ་སྙན་གཡས་གཡོན་གྱི་ཐད་ཀར་ཁ་བྱེ་བའི་གཡས་ན་རལ་གྲི་དང་གཡོན་ན་གླེགས་བམ་ཅན་བཅུ་དྲུག་ལོན་པའི་ལང་ཚོ་དང་ལྡན་པ་དབུ་སྐྲ་ཟུར་ཕུད་ལྔ་པའི་རྩེ་མོར་ནོར་བུས་སྤྲས་པ། དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། ཞི་འཛུམ་སྒེག་པའི་ཉམས་ཅན། འོད་ཟེར་སྔོན་པོ་འཕྲོ་བ། རྩིབས་བཞི་ལ། ཤར་དུ་དྷྲྀ་ལས་ཡུལ་འཁོར་སྲུང་དཀར་པོ་པི་ཝང་འཛིན་པ། ལྷོར་བི་ལས་འཕགས་སྐྱེས་པོ་སྔོན་པོ་རལ་གྲི་འཛིན་པ། ནུབ་ཏུ་བི་ལས་མིག་མི་བཟང་དམར་པོ་སྦྲུལ་ཞགས་འཛིན་པ། བྱང་དུ་བཻ་ལས་རྣམ་ཐོས་སྲས་སེར་པོ་རྒྱལ་མཚན་འཛིན་པ། ཐམས་ཅད་ཀྱང་ལྷའི་གོས་དང་ཡ་ལད་མནབས་པ། ཞི་ཞིང་བརྗིད་པའི་ཉམས་དང་ལྡན་པའོ། །དེ་ཐམས་ཅད་ཀྱི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ། ཐུགས་ཀའི་དབུས་སུ་རང་རང་གི་ས་བོན་གྱིས་མཚན་པ། དེ་ལས་འོད་ཟེར་འཕྲོས་པས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་འཕགས་མ་སྒྲ་དབྱངས་ལྷ་མོ་འཁོར་དང་བཅས་པའི་རྣམ་པར་བཛྲ་ས་མཱ་ཛཿ ཨོཾ་བཛྲ་ཨརྒྷཾ་སོགས་ཀྱིས་མཆོད། ཛཿཧཱུྃ་བྃ་ཧོཿ མདུན་བསྐྱེད་ལ་གཉིས་སུ་མེད་པར་ཐིམ། སླར་ཡང་རང་གི་ཐུགས་ཀ་ནས་འོད་ཟེར་འཕྲོས་པས་དབང་གི་ལྷ་རིགས་ལྔ་འཁོར་དང་བཅས་པ་བཛྲ་ས་མཱ་ཛཿ ཨོཾ་བཛྲ་ཨརྒྷཾ་སོགས་ཀྱིས་མཆོད། དེ་བཞིན་གཤེགས་པ་ཐམས་ཅད་ཀྱིས་འདི་རྣམས་ལ་མངོན་པར་དབང་བསྐུར་བ་སྩལ་དུ་གསོལ། ཨོཾ་བཛྲཱི་བྷ་ཝ་ཨ་བྷི་ཥིཉྩ་ཧཱུྃ། ཞེས་གསུངས་ཤིང་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང་། དྲི་མ་དག །ཆུའི་ལྷག་མ་ཡར་ལུད་པ་ལས་གཙོ་འཁོར་ཐམས་ཅད་ལ་རྗེ་བཙུན་འཇམ་པའི་དབྱངས་ཀྱིས་དབུར་བརྒྱན། དེ་རྣམས་ཀྱི་རྒྱབ་ཏུ་སངས་རྒྱས་དང་བྱང་ཆུབ་སེམས་དཔའི་ཚོགས་ཐམས་ཅད་མགྲོན་ཐབས་ཀྱི་ཚུལ་དུ་བཞུགས་པར་གྱུར། མཆོད་པ་བསང་སྦྱང་། སྟོང་པའི་ངང་ལས་ལྷ་རྫས་དང་ཏིང་ངེ་འཛིན་ལས་གྲུབ་པའི་མཆོད་པའི་སྤྲིན་ཕུང་ཡེ་ཤེས་ཀྱི་རྣམ་རོལ་མཁའ་ཁྱབ་ཏུ་འཆར་བར་གྱུར། ཨོཾ་བཛྲ་ཨརྒྷཾ་ཨཱཿཧཱུྃ་ནས། ཤབྡ་ཨཱཿཧཱུྃ་གི་བར་གྱིས་བརླབ། བདག་མདུན་ཐུན་མོང་དུ། རབ་འབྱམས་རྒྱ་མཚོ་དཔག་མེད་ན། མཆོད་ཡོན་ཇི་སྙེད་ཡོད་པ་དང་། བདག་གིས་གུས་པས་བཤམས་པ་འདི། །འཇམ་དབྱངས་སྨྲ་བའི་སེང་གེ་དང་། །འཕགས་མ་འཁོར་དང་བཅས་ལ་འབུལ། །བློ་དང་ངག་གི་དངོས་གྲུབ་སྩོལ། །ཨོཾ་ཨཱཪྻ་མཉྫུ་ཤྲཱི་སྭ་ར་སྭ་སྟི་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱ་ཧཱ། དེ་བཞིན་དུ་ཞབས་བསིལ་ལ། པཱདྱཾ། མེ་ཏོག །པུཥྤེ། བདུག་སྤོས། དྷཱུ་པེ། སྣང་གསལ། ཨཱ་ལོ་ཀེ། དྲི་མཆོག །གནྡྷེ། ཞལ་ཟས། ནཻ་བིདྱཱ། རོལ་མོ། ཤབྡ་ཞེས་སྦྱར་བས་མཆོད། བསྟོད་པ་རྒྱས་བསྡུས་གང་རུང་གིས་བསྟོད། རང་གི་ཐུགས་ཀར་འཁོར་ལོ་དམར་པོ་རྩིབས་བཞི་པ་དང་། མདུན་གྱི་དབྱངས་ཅན་མའི་ཐུགས་ཀར་པདྨ་འདབ་མ་བརྒྱད་པ། དེ་གཉིས་ཀྱི་དབུས་སུ་རལ་གྲི་ལ་སོ་སོའི་ས་བོན་སྔགས་ཀྱིས་བསྐོར་བ། བདག་མདུན་སངས་རྒྱས་དང་བྱང་ཆུབ་སེམས་དཔའི་ཚོགས་དང་བཅས་པའི་ཐུགས་ཀའི་ས་བོན་ལས་འོད་ཟེར་འཕྲོས། སྣོད་གཞལ་ཡས་ཁང་དང་། བཅུད་འཇམ་དཔལ་དང་། དབྱངས་ཅན་མའི་སྐུར་གྱུར། རང་གི་ཐུགས་ཀའི་དྷཱིཿལས་འོད་ཟེར་འཕྲོས། ཤངས་བུག་གཡས་ནས་ཐོན། མདུན་གྱི་དབྱངས་ཅན་མའི་ཤངས་བུག་གཡོན་དུ་ཞུགས། ཐུགས་ཀའི་ཧྲཱིཿལ་ཐིམ། དེ་ལས་འོད་ཟེར་འཕྲོས། མདུན་བསྐྱེད་ཀྱི་ཤངས་བུག་གཡས་ནས་བྱུང་། བདག་གི་གཡོན་དུ་ཞུགས་ནས་དྷཱིཿལ་ཐིམ་པས་མི་ཤེས་པའི་མུན་པ་བསལ། ཤེས་རབ་ཀྱི་སྣང་བ་མཆོག་ཏུ་རྒྱས། སླར་ཡང་འོད་ཟེར་འཕྲོས་པས་འཁོར་གྱི་རྒྱལ་ཆེན་བཞི་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་རྒྱུད་བསྐུལ། དེ་རྣམས་ཀྱི་ཐུགས་ཀ་ནས་འཕྲོས་པའི་འོད་ཟེར་དང་། རང་དང་མདུན་གྱི་ལྷ་མོའི་བར་དུ་འཁོར་བའི་སྔགས་ཕྲེང་ལས་ཤེས་རབ་ཀྱི་བུང་བའི་ཚོགས་དཔག་ཏུ་མེད་པ་འཕྲོས། འཁོར་འདས་སྣོད་བཅུད་ཀྱི་ཡོན་ཏན་ཐམས་ཅད་བསྡུས་ནས་རིལ་བུ་ལྷར་གསལ་བ་དང་། འཁོར་ལོ་ཁ་སྦྱར་ལ་ཐིམ་པས་བྱིན་རླབས་ཀྱི་གཟི་བྱིན་མཆོག་ཏུ་འབར་བར་གྱུར། ཨོཾ་ཧྲཱིཿདྷཱིཿམ་མེ་དཱི་པཾ་སྭ་ར་སྭ་སྟཱི་མཉྫུ་ཤྲཱི་མཱུྃ་ཧྲཱིཿཔྲཛྙཱ་ཝརྡྷཱ་ནི་ཧྲཱིཿདྷཱིཿསྭཱ་ཧཱ། ཞེས་ཅི་ནུས་སུ་བཟླ། ཐུན་འཇོག་པ་ན། སླར་ཡང་མཆོད་བསྟོད་རྒྱས་བསྡུས་གང་རིགས་བྱ། གཏོར་མ་བསང་སྦྱང་། སྟོང་པའི་ངང་ལས་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བའི་ནང་དུ་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པ་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ། ལན་གསུམ། བདག་མདུན་གྱི་ལྷའི་ལྗགས་རྡོ་རྗེའི་སྦུ་གུའི་འོད་ཟེར་གྱིས་གཏོར་མའི་བཅུད་དྲངས་ཏེ་གསོལ་བར་གྱུར། ཨོཾ་ཧྲཱིཿདྷཱིཿམ་མེ་དཱི་པཾ་སྭ་ར་སྭ་སྟཱི་མཉྫུ་ཤྲཱི་མཱུྃ་ཧྲཱིཿཔྲཛྙཱ་ཝརྡྷ་ནི་ཧྲཱིཿདྷཱིཿསྭཱ་ཧཱ། ཨི་དཾ་བ་ལིཾ་ཏཾ་ཁ་ཁ་ཁཱ་ཧི་ཁཱ་ཧི། ལན་བདུན་གྱིས་འབུལ། མཆོད་ཅིང་བསྟོད། རྗེ་བཙུན་འཇམ་པའི་དབྱངས་ཡབ་ཡུམ་གྱིས་བདག་དང་སེམས་ཅན་ཐམས་ཅད་ཀྱི་མ་རིག་པའི་མུན་པ་བསལ་ནས་ཤེས་རབ་ཀྱི་སྣང་བ་རྒྱས་པར་མཛད་དུ་གསོལ། ཁྱད་པར་དུ་སྒྲུབ་པའི་རྫས་འདི་རྣམས་མཐོང་ཐོས་མྱང་རེག་ཐམས་ཅད་གཟུངས་དང་། བློ་གྲོས་དང་སྤོབས་པ་ཟད་མི་ཤེས་པ་ལ་དབང་འབྱོར་བར་བྱིན་གྱིས་བརླབ་ཏུ་གསོལ། ཅེས་འདོད་དོན་གསོལ། མ་རྙེད་ཡོངས་སུ་མ་ཚང་དང་། །ཞེས་སོགས་དང་ཡི་གེ་བརྒྱ་པས་ནོངས་པ་བཤགས། མདུན་བསྐྱེད་ཀྱི་སངས་རྒྱས་བྱང་སེམས་རྣམས་མཐའ་ནས་རིམ་པར་འོད་དུ་ཞུ་སྟེ་གཙོ་འཁོར་ལྔ་ལ་ཐིམ། དེ་རྣམས་ཀྱང་སྨན་གྱི་རིལ་བུ་འོད་འབར་བའི་རྣམ་པ་མཐོང་ཐོས་མྱང་རེག་ཐམས་ཅད་ལ་བློ་གྲོས་ཀྱི་མཐུ་ཐོགས་པ་མེད་པར་སྩོལ་བའི་ནུས་བྱིན་མཆོག་ཏུ་འབར་བར་གྱུར་པར་བསམས་ལ། བརྟན་བཞུགས་རྒྱས་བསྡུས་གང་རིགས་དང་། ཡེ་དྷརྨཱ་མང་དུ་བརྗོད་ཅིང་མེ་ཏོག་འཐོར་བས་བརྟན་པར་བྱ། བདག་གི་ཐུགས་ཀའི་འོད་ཀྱིས་དག་པའི་སྣོད་བཅུད་ཐམས་ཅད་བསྡུས་ནས་རང་ལ་ཐིམ། རང་ཐུགས་ཀའི་འཁོར་ལོ་ས་བོན་གྱི་བར། དེའང་མི་དམིགས་པ་འོད་གསལ་སྟོང་པ་ཉིད་ཀྱི་ངང་དུ་གྱུར་པར་བསམ། སླར་ཡང་ནམ་མཁའ་ནས་དྷཱིཿཡིག་གི་རང་སྒྲ་གྲགས་པའི་རྐྱེན་གྱིས་རང་ཉིད་སྐད་ཅིག་གིས་རྗེ་བཙུན་འཇམ་པའི་དབྱངས་ཀྱི་སྐུར་གྱུར། དགེ་བ་འདི་ཡིས་མྱུར་དུ་བདག །འཇམ་དཔལ་ཡབ་ཡུམ་འགྲུབ་གྱུར་ནས། །ཞེས་སོགས་བསྔོ་སྨོན་ཇི་ལྟར་རིག་པ་དང་། ཆེ་བའི་ཆེ་མཆོག་ལྟ་བུའི་ཤིས་བརྗོད་གང་རུང་བྱའོ། ། ༈

[edit]

sgrub thabs 'dod 'jo dang rjes 'brel 'jam dbyangs smra seng dpa' bo bcu gnyis kyi ril bu sgrub pa'i ngag 'don/ sgrub thabs 'dod 'jo dang rjes 'brel 'jam dbyangs smra seng dpa' bo bcu gnyis kyi ril bu sgrub pa'i ngag 'don ni/__grub na ril bu la dmigs te sbyong khrus spyi ltar bya/__gang ltar yang /__'gro rnams bsgral 'dod bsam pa yis/__/sangs rgyas chos dang dge 'dun la/__/byang chub snying por mchis kyi bar/__/rtag par bdag ni skyabs su mchi/__/lan ji ltar rigs pas skyabs su 'gro/__shes rab snying brtse dang bcas pa'i/__/brtson pas sems can don du bdag__/sangs rgyas mdun du gnas bcas te/__/rdzogs pa'i byang chub sems bskyed bgyi/__/lan gsum gyis sems bskyed/__sems can thams cad bde ba dang sogs tshad med bzhi bsgom pa sngon du 'gro bas/__swa b+hA bas stong par sbyang /__stong pa'i ngang las pa~M las pad+ma dang a las zla ba'i dkyil 'khor gyi steng du siM las seng ge sngon po mgo bo g.yas su bstan cing gdong gyen du phyogs pa/__ral pa dmar ser grol ba nyal stabs su gnas pa'i steng du pad nyi la gnas pa'i d+hIHyig gur gum gzhon nu'i mdog can/__de yongs su gyur pa las/__bdag nyid rje btsun 'jam dbyangs sku mdog dmar ser phyag gnyis chos 'chad kyi phyag rgya mdzad pa'i mtheb mdzub kyi bar nas byung ba'i ut+pa la'i sdong bu snyan g.yas g.yon gyi thad kar kha bye ba'i g.yas na ral gri dang g.yon na glegs bam can/__bcu drug lon pa'i lang tsho dang ldan pa dbu skra zur phud lnga pa'i rtse mor nor bus spras shing /__zhabs gnyis rgyal po rol pa'i stabs kyis seng ge la bzhugs pa/__dar dang rin po che'i rgyan thams cad kyis brgyan pa/__zhi 'dzum sgeg pa'i cha lugs can 'od zer dmar po 'phro ba/__de las 'od zer 'phros pas bsgoms pa dang 'dra ba'i ye shes sems dpa' badz+ra sa mA dzaHsa mdun gyi nam mkha' spyan drangs/__oM badz+ra ar+g+haM la sogs pas mchod/__dzaHhU~M ba~M hoHgnyis su med par gyur/__slar yang rang gi thugs ka nas 'od zer 'phros pas dbang gi lha rigs lnga 'khor dang bcas pa badz+ra sa ma dzaH__oM badz+ra ar+g+haM sogs/__de bzhin gshegs pa thams cad kyis bdag la mngon par dbang bskur ba stsal du gsol/__oM badz+rI b+ha ba a b+hi Shiny+tsa hU~M/__zhes gsung zhing dbang gi lha rnams kyis bum pa'i chus spyi bo nas dbang bskur/__sku gang /__dri ma dag__/chu'i lhag ma yar lud pa las mi bskyod pas dbu brgyan par gyur/__mdun gyi ril bu gdan 'khor dang bcas pa bsang sbyang /__stong pa'i ngang las mdun gyi gdan bris pa ji lta ba'i dbus su shes rab kyi 'khor lo rtsibs bzhi pa'i lte bar pad+ma dang zla ba'i gdan gyi steng du ril bu rnams hrIHyig mthing zhun gyi mdog lta bu yongs su gyur pa las lha mo dbyangs can ma sku mdog sngon mo lha mo'i cha lugs yongs su rdzogs shing /__zhabs tsog pu'i phyed krung gis bzhugs pa/__bud med sgyu ma'i nga rgyal gyis 'gying zhing phyag gnyis chos 'chad kyi phyag rgya mdzad pa'i mtheb mdzub kyi bar nas byung ba'i ut+pa la'i sdong bu snyan g.yas g.yon gyi thad kar kha bye ba'i g.yas na ral gri dang g.yon na glegs bam can bcu drug lon pa'i lang tsho dang ldan pa dbu skra zur phud lnga pa'i rtse mor nor bus spras pa/__dar dang rin po che'i rgyan thams cad kyis brgyan pa/__zhi 'dzum sgeg pa'i nyams can/__'od zer sngon po 'phro ba/__rtsibs bzhi la/__shar du d+hr-i las yul 'khor srung dkar po pi wang 'dzin pa/__lhor bi las 'phags skyes po sngon po ral gri 'dzin pa/__nub tu bi las mig mi bzang dmar po sbrul zhags 'dzin pa/__byang du bai las rnam thos sras ser po rgyal mtshan 'dzin pa/__thams cad kyang lha'i gos dang ya lad mnabs pa/__zhi zhing brjid pa'i nyams dang ldan pa'o/__/de thams cad kyi dpral bar oM dkar po/__mgrin par AHdmar po/__thugs kar hU~M sngon po/__thugs ka'i dbus su rang rang gi sa bon gyis mtshan pa/__de las 'od zer 'phros pas phyogs bcu'i sangs rgyas dang byang chub sems dpa' thams cad 'phags ma sgra dbyangs lha mo 'khor dang bcas pa'i rnam par badz+ra sa mA dzaH__oM badz+ra ar+g+haM sogs kyis mchod/__dzaHhU~M ba~M hoH__mdun bskyed la gnyis su med par thim/__slar yang rang gi thugs ka nas 'od zer 'phros pas dbang gi lha rigs lnga 'khor dang bcas pa badz+ra sa mA dzaH__oM badz+ra ar+g+haM sogs kyis mchod/__de bzhin gshegs pa thams cad kyis 'di rnams la mngon par dbang bskur ba stsal du gsol/__oM badz+rI b+ha wa a b+hi Shiny+tsa hU~M/__zhes gsungs shing bum pa'i chus spyi bo nas dbang bskur/__sku gang /__dri ma dag__/chu'i lhag ma yar lud pa las gtso 'khor thams cad la rje btsun 'jam pa'i dbyangs kyis dbur brgyan/__de rnams kyi rgyab tu sangs rgyas dang byang chub sems dpa'i tshogs thams cad mgron thabs kyi tshul du bzhugs par gyur/__mchod pa bsang sbyang /__stong pa'i ngang las lha rdzas dang ting nge 'dzin las grub pa'i mchod pa'i sprin phung ye shes kyi rnam rol mkha' khyab tu 'char bar gyur/__oM badz+ra ar+g+haM AHhU~M nas/__shab+da AHhU~M gi bar gyis brlab/__bdag mdun thun mong du/__rab 'byams rgya mtsho dpag med na/__mchod yon ji snyed yod pa dang /__bdag gis gus pas bshams pa 'di/__/'jam dbyangs smra ba'i seng ge dang /__/'phags ma 'khor dang bcas la 'bul/__/blo dang ngag gi dngos grub stsol/__/oM AR+Ya many+dzu shrI swa ra swa sti sa pa ri wA ra ar+g+haM pra tIts+tsha swA hA/__de bzhin du zhabs bsil la/__pAd+yaM/__me tog__/puSh+pe/__bdug spos/__d+hU pe/__snang gsal/__A lo ke/__dri mchog__/gan+d+he/__zhal zas/__nai bid+yA/__rol mo/__shab+da zhes sbyar bas mchod/__bstod pa rgyas bsdus gang rung gis bstod/__rang gi thugs kar 'khor lo dmar po rtsibs bzhi pa dang /__mdun gyi dbyangs can ma'i thugs kar pad+ma 'dab ma brgyad pa/__de gnyis kyi dbus su ral gri la so so'i sa bon sngags kyis bskor ba/__bdag mdun sangs rgyas dang byang chub sems dpa'i tshogs dang bcas pa'i thugs ka'i sa bon las 'od zer 'phros/__snod gzhal yas khang dang /__bcud 'jam dpal dang /__dbyangs can ma'i skur gyur/__rang gi thugs ka'i d+hIHlas 'od zer 'phros/__shangs bug g.yas nas thon/__mdun gyi dbyangs can ma'i shangs bug g.yon du zhugs/__thugs ka'i hrIHla thim/__de las 'od zer 'phros/__mdun bskyed kyi shangs bug g.yas nas byung /__bdag gi g.yon du zhugs nas d+hIHla thim pas mi shes pa'i mun pa bsal/__shes rab kyi snang ba mchog tu rgyas/__slar yang 'od zer 'phros pas 'khor gyi rgyal chen bzhi dang /__sangs rgyas dang byang chub sems dpa' thams cad kyi thugs rgyud bskul/__de rnams kyi thugs ka nas 'phros pa'i 'od zer dang /__rang dang mdun gyi lha mo'i bar du 'khor ba'i sngags phreng las shes rab kyi bung ba'i tshogs dpag tu med pa 'phros/__'khor 'das snod bcud kyi yon tan thams cad bsdus nas ril bu lhar gsal ba dang /__'khor lo kha sbyar la thim pas byin rlabs kyi gzi byin mchog tu 'bar bar gyur/__oM hrIHd+hIHma me dI paM swa ra swa stI many+dzu shrI mU~M hrIHpradz+nyA war+d+hA ni hrIHd+hIHswA hA/__zhes ci nus su bzla/__thun 'jog pa na/__slar yang mchod bstod rgyas bsdus gang rigs bya/__gtor ma bsang sbyang /__stong pa'i ngang las rin po che las grub pa'i snod yangs shing rgya che ba'i nang du gtor ma kha dog dri ro nus pa phun sum tshogs pa bdud rtsi'i rgya mtsho chen por gyur/__oM AHhU~M/__lan gsum/__bdag mdun gyi lha'i ljags rdo rje'i sbu gu'i 'od zer gyis gtor ma'i bcud drangs te gsol bar gyur/__oM hrIHd+hIHma me dI paM swa ra swa stI many+dzu shrI mU~M hrIHpradz+nyA war+d+ha ni hrIHd+hIHswA hA/__i daM ba liM taM kha kha khA hi khA hi/__lan bdun gyis 'bul/__mchod cing bstod/__rje btsun 'jam pa'i dbyangs yab yum gyis bdag dang sems can thams cad kyi ma rig pa'i mun pa bsal nas shes rab kyi snang ba rgyas par mdzad du gsol/__khyad par du sgrub pa'i rdzas 'di rnams mthong thos myang reg thams cad gzungs dang /__blo gros dang spobs pa zad mi shes pa la dbang 'byor bar byin gyis brlab tu gsol/__ces 'dod don gsol/__ma rnyed yongs su ma tshang dang /__/zhes sogs dang yi ge brgya pas nongs pa bshags/__mdun bskyed kyi sangs rgyas byang sems rnams mtha' nas rim par 'od du zhu ste gtso 'khor lnga la thim/__de rnams kyang sman gyi ril bu 'od 'bar ba'i rnam pa mthong thos myang reg thams cad la blo gros kyi mthu thogs pa med par stsol ba'i nus byin mchog tu 'bar bar gyur par bsams la/__brtan bzhugs rgyas bsdus gang rigs dang /__ye d+harmA mang du brjod cing me tog 'thor bas brtan par bya/__bdag gi thugs ka'i 'od kyis dag pa'i snod bcud thams cad bsdus nas rang la thim/__rang thugs ka'i 'khor lo sa bon gyi bar/__de'ang mi dmigs pa 'od gsal stong pa nyid kyi ngang du gyur par bsam/__slar yang nam mkha' nas d+hIHyig gi rang sgra grags pa'i rkyen gyis rang nyid skad cig gis rje btsun 'jam pa'i dbyangs kyi skur gyur/__dge ba 'di yis myur du bdag__/'jam dpal yab yum 'grub gyur nas/__/zhes sogs bsngo smon ji ltar rig pa dang /__che ba'i che mchog lta bu'i shis brjod gang rung bya'o/__/__!