JKW-KABUM-07-JA-008

🚧 This website is under continued development. We appreciate your patience!

Previous Section Back to Volume PageNext Section

Wylie title	bde mchog mkha' 'gro snyan brgyud lhan skyes yab yum gyi bdag 'jug nye bar bsdus pa
Location	mkhyen brtse'i bka' 'bum Volume 7, sde tshan 8, Pages 131-157 (Folios 1a to 14a6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. bde mchog mkha' 'gro snyan brgyud lhan skyes yab yum gyi bdag 'jug nye bar bsdus pa. In 'jam dbyangs mkhyen brtse'i dbang po'i bka' 'bum, Vol. 7: 131-157. Khams sde dge rdzong sar dgon: Rdzong sar blo gros phun tshogs, 2020.
Genre	Self-Initiation - bdag 'jug
Cycle	བདེ་མཆོག་མཁའ་འགྲོ་སྙན་བརྒྱུད་ (bde mchog mkha' 'gro snyan brgyud)
Deity	'khor lo bde mchog, rdo rje rnal 'byor ma
Colophon	།ཞེས་པའང་ལམ་འདི་ལ་མཁས་ཤིང་དངོས་གྲུབ་བརྙེས་པའི་དམ་པ་སྔ་མ་དག་གིས་མཛད་པའི་ཡབ་བཀའ་ལྷན་སྐྱེས་ཀྱི་བདག་འཇུག་ལ། སྦྱོར་བའི་སྐབས་སོགས་སུ་གསལ་བྱེད་ཅུང་ཟད་དང་། ཡུམ་བཀའི་ཁྱད་པར་རྣམས་ཀྱང་བསྣན་ནས་མདོར་བསྡུས་སྙིང་པོར་དྲིལ་བའི་ཚུལ་གྱིས་སྦྱར་བ་སྟེ། དགེ་བས་འགྲོ་ཀུན་དཔལ་ཧེ་རུ་ཀའི་གོ་འཕང་མཆོག་ལ་རེག་པའི་རྒྱུར་གྱུར་ཅིག། །སརྦ་དཱ་མངྒ་ལཾ་བྷ་བ་ཏུ།།
	zhes pa'ang lam 'di la mkhas shing dngos grub brnyes pa'i dam pa snga ma dag gis mdzad pa'i yab bka' lhan skyes kyi bdag 'jug la/__sbyor ba'i skabs sogs su gsal byed cung zad dang /__yum bka'i khyad par rnams kyang bsnan nas mdor bsdus snying por dril ba'i tshul gyis sbyar ba ste/__dge bas 'gro kun dpal he ru ka'i go 'phang mchog la reg pa'i rgyur gyur cig/__/sarba dA mang+ga laM b+ha ba tu/

1 Texts in this Section (sde tshan or chos tshan)

131-157	བདེ་མཆོག་མཁའ་འགྲོ་སྙན་བརྒྱུད་ལྷན་སྐྱེས་ཡབ་ཡུམ་གྱི་བདག་འཇུག་ཉེ་བར་བསྡུས་པ། bde mchog mkha' 'gro snyan brgyud lhan skyes yab yum gyi bdag 'jug nye bar bsdus pa Self-Initiation - bdag 'jug	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །བདེ་མཆོག་མཁའ་འགྲོ་སྙན་བརྒྱུད་ལྷན་སྐྱེས་ཡབ་ཡུམ་གྱི་བདག་འཇུག་ཉེ་བར་བསྡུས་པ་བཞུགས་སོ།། །།

ན་མོ་གུ་རུ་བྷྱཿ འདིར་རྗེ་བཙུན་རས་ཆུང་ལུགས་ཀྱི་སྙན་བརྒྱུད་འཁོར་ལོ་བདེ་མཆོག་ལྷན་སྐྱེས་ཡབ་ཡུམ་གྱི་བདག་འཇུག་ཇི་ལྟར་བླང་བའི་ཚུལ་ལ་གཉིས། ཡབ་བཀའ་དང་། ཡུམ་བཀའ་འོ། །དང་པོ་ལ་གསུམ། སྦྱོར་བ། དངོས་གཞི་རྗེས་སོ། །དང་པོ་ནི། གནས་དབེན་པར་སྟེགས་བུའི་དབུས་སུ་རྡུལ་ཚོན་ནམ། རས་བྲིས་ཀྱི་དཀྱིལ་འཁོར་ཆོས་འབྱུང་ཁ་ཁྱེར་དང་བཅས་པའི་ནང་དུ་སྣ་ཚོགས་པདྨ། ཉི་མ། སྣ་ཚོགས་རྡོ་རྗེ། དེའི་ལྟེ་བར་མེ་རི། རྡོ་ར། དུར་ཁྲོད་བརྒྱད་དང་བཅས་པས་ཡོངས་སུ་བསྐོར་བའི་པདྨ་འདབ་མ་བརྒྱད་པའི་ཟེའུ་འབྲུར་ཉི་གདན་ལ་ཚོམ་བུ་སྔོན་པོ་དང་། དེའི་མདུན་དུ་ཚོམ་བུ་དམར་པོ་བཀོད་པའམ། ས་བོན་ཧཱུྃ་མཐིང་གས་མཚན་པ་བྲི། མདུན་དུ་གཏོར་མ་གཉིས། མཐར་གཡོན་སྐོར་གྱིས་ཉེར་སྤྱོད་དང་། ཉེ་ལོགས་ཅི་བདེ་བར་བུམ་པ་ཟུང་དང་། དབུ་རྒྱན། རྡོར་དྲིལ་སོགས་འོག་ཏུ་དགོས་པའི་དབང་རྫས་རྣམས་དང་། ཚོགས་ཀྱི་ཡོ་བྱད་དང་། སྔོན་གཏོར་གྱིས་མཚོན་ཉེར་མཁོ་ཐམས་ཅད་ཚང་བར་བྱ། དེ་ནས་སྔོན་འགྲོ་གཏོར་མ་བཏང་བ་ནས་བརྩམས་ཏེ། ནང་མཆོད་དང་གནས་ཡོ་བྱིན་རླབས། སྐྱབས་སེམས། ཚད་མེད། རྡོར་སེམས་བསྒོམ་བཟླས། བླ་མའི་རྣལ་འབྱོར་རྣམས་སྔོན་དུ་འགྲོ་བས་བདག་བསྐྱེད་བཟླས་པ་དང་བཅས་པ། བུམ་པ་བསྒྲུབ་པ། མདུན་བསྐྱེད་བསྒྲུབ་ཅིང་མཆོད་བསྟོད་ཀྱི་བར་དཀྱིལ་ཆོག་ལས་འབྱུང་བ་བཞིན་བྱའོ། །གཉིས་པ་བདག་འཇུག་དངོས་གཞི་ལའང་གསུམ། དཀྱིལ་འཁོར་དུ་འཇུག་པ་དང་། ཞུགས་ནས་དབང་བླང་བ། རྗེས་ཀྱི་བྱ་བའོ། །དང་པོ་ཡབ་བཀའི་སྡོམ་ཚིག་ཏུ། ཁྲུས་བྱས་བགེགས་བསྐྲད་མཎྜལ་ཕུལ། །གསོལ་གདབ་ཆོས་བཤད་སྡོམ་གཉིས་བཟུང་། །མེ་ཏོག་དང་བཅས་གདོང་གཡོགས་བཅིང་། །གཞུག་ཅིང་ཕྱག་འཚལ་མེ་ཏོག་དོར། མིག་ཕྱེ་མཐོང་བསྟན་བཅུ་གཉིས་སོ། །ཞེས་ཕྱི་ནང་གི་ཐ་སྙད་མི་བྱེད་པར་འཇུག་པ་ལྟར། དང་པོ་ཁྲུས་བྱ་བ་ནི། ཇི་ལྟར་བལྟམས་པ་ཙམ་ནས། ཤྲི་ཡེ་ཧཱུྃ་གི་བར་བརྗོད་ཅིང་། ལས་བུམ་གྱི་ཆུས་བཀྲུས་པས་སྒོ་གསུམ་དག་པར་བསམ། གཉིས་པ་བགེགས་བསྐྲད་པ་ནི། དཀྱིལ་འཁོར་གཙོ་བོའི་སྤྲུལ་ཡུམ་བཀའི་སྐབས་དཀྱིལ་འཁོར་གྱི་གཙོ་མོའི་སྤྲུལ་ཞེས་བསྒྱུར། མཆན་པ་ཞལ་གཅིག་ཕྱག་གཉིས་པའི་སྐུ་ལས་སྐྱེས་པའི་ཡེ་ཤེས་ཀྱི་མེ་དང་། ཐུགས་ཀའི་མཚོན་ཆའི་ཆར་གྱིས་བསྐྲད་པར་བསམས་ལ་ཐུན་གྱིས་བྲབ། དྲིལ་བུ་དྲག་ཏུ་འཁྲོལ་ཞིང་། སུམྦྷ་སོགས་ཀྱི་སྔགས་བརྗོད། གསུམ་པ་མཎྜལ་ནི་རྒྱས་བསྡུས་སྐབས་དང་སྦྱར། བཞི་པ་གསོལ་བ་གདབ་པ་ནི། རྡོ་རྗེ་ཕག་ཡུམ་བཀའི་སྐབས། རྗེ་བཙུན་མ་དང་དབྱེར་མེད་པའི་སོགས། མཆན། མོས་མགྲིན་འཁྱུད་པའི། །དགའ་ཆེན་ཁྱོད་བདག་སྟོན་པ་སྟེ། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་སྟོན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོས་བདག་ནི་གཞུག་ཏུ་གསོལ། །ལན་གསུམ། ལྔ་པ་ཆོས་བཤད་པ་ནི། སློབ་དཔོན་གྱིས་ཆོས་བཤད་པར་བསམས་ལ་ངག་ཏུ། སྡུག་བསྔལ་ཆུ་བོ་བཞི་འབབ་ཅིང་། །གཏིང་མཐའ་མེད་པའི་སྲིད་མཚོ་འདིར། །སྐྱོ་བའི་སེམས་ནི་རབ་བསྐྱེད་ལ། །རྙེད་དཀའི་རྟེན་མཆོག་གྲུ་གཟིངས་འདི། །སྟོང་ཉིད་སྙིང་རྗེའི་སྐྱེ་བར་ནས། །བརྩོན་འགྲུས་དྲག་པོས་དྲངས་བྱས་ཏེ། །བླ་མེད་ཐར་པའི་གླིང་མཆོག་ཏུ། །དོན་གཉིས་ནོར་བུ་ལོན་པར་གྱིས། །ཞེས་པས་ཐུན་མོང་གི་ཆོས་དང་། །བསྐལ་པར་བསགས་པའི་མུན་པ་ཡང་། །ཉི་ཟླ་སྒྲོན་མེ་ལ་སོགས་པའི། །འོད་ཀྱི་སྣང་བ་སྐད་ཅིག་མས། །སེལ་བ་ཇི་བཞིན་ཐོག་མེད་ནས། །བསགས་པའི་སྡིག་སྒྲིབ་མ་ལུས་པ། །ཡེ་ཤེས་སྣང་བ་སྐད་ཅིག་མས། །སེལ་ཐབས་རྡོ་རྗེ་ཐེག་པ་ཡི། །གསང་བ་ལས་ཀྱང་ཆེས་གསང་བའི། །བདེ་མཆོག་མཁའ་འགྲོ་སྙན་བརྒྱུད་ཀྱི། དབང་བསྐུར་ཟབ་མོ་སྦྱིན་བྱ་ཡིས། །ཁྱོད་རྣམས་དགའ་དང་སྤྲོ་བར་གྱིས། །ཞེས་བརྗོད། དྲུག་པ་སྡོམ་པ་གཉིས་བཟུང་བ་ནི། །བླ་མ་ཡི་དམ་གཙོར་བཞུགས་པའི། །སྲས་བཅས་སངས་རྒྱས་ཐམས་ཅད་དང་། །དཔའ་བོ་རྣལ་འབྱོར་མ་ཚོགས་ཀུན། །ཐམས་ཅད་བདག་ལ་དགོངས་སུ་གསོལ། །ཆེ་གེ་མོ་རང་གི་མིང་བརྗོད་ཞེས་བགྱི་བ་བདག །བླ་མེད་བྱང་ཆུབ་མ་ཐོབ་པར། །དཀོན་མཆོག་གསུམ་ལ་བདག་སྐྱབས་མཆི། །སོགས་ལན་གསུམ་གྱིས་ཐུན་མོང་གི་སྡོམ་པ་དང་། བླ་མ་ཡི་དམ་ནས་དགོངས་གསོལ་གྱི་མཐར། བདག་ནི་རྡོ་རྗེ་འཛིན་པ་ཡིས། །དུས་འདི་ཉིད་ནས་བཟུང་ནས་ནི། །ཇི་སྲིད་བྱང་ཆུབ་སྙིང་པོའི་བར། །ཇི་ལྟར་དུས་གསུམ་མགོན་པོ་རྣམས། །ཞེས་སོགས་ལན་གསུམ་གྱིས་སྔགས་སྡོམ་བཟུང་། བདུན་པ་མེ་ཏོག་དང་བཅས་གདོང་གཡོགས་བཅིང་བ་ནི། སློབ་དཔོན་གྱིས་མེ་ཏོག་གཏད་ཅིང་གདོང་གཡོགས་བཅིང་བར་བསམ། ཨཱ་ཁཾ་ཝཱི་ར་ཧཱུྃ། བརྒྱད་པ་ནང་དུ་གཞུག་པ་ནི། །དཀྱིལ་གཙོ་མོའི་སྤྲུལ་པ་རྗེ་བཙུན་མ། མཆན། འཁོར་གཙོ་བོའི་སྤྲུལ་པ་ཧེ་རུ་ཀ་ཞལ་གཅིག་ཕྱག་གཉིས་པ་ཞིག་སྲུང་འཁོར་གྱི་ཕྱི་རོལ་དུ་བྱོན་པས་རང་གི་ལག་ནས་ཁྲིད་དེ་རྫུ་འཕྲུལ་གྱིས་སྐད་ཅིག་ལ་སྲུང་འཁོར་ནང་དུ་ཚུད་པར་གྱུར། ཛཿཧཱུྃ་བྃ་ཧོཿ ཞེས་བརྗོད་ཅིང་དགུག་གཞུག་གི་ཕྱག་རྒྱ་བྱ། དགུ་པ་ཕྱག་བྱ་བ་ནི། དཀྱིལ་འཁོར་གྱི་ཤར་སྒོ་ནས་ཕྱག་འཚལ་བར་བསམས་ལ། སངས་རྒྱས་ཐམས་ཅད་འདུས་པའི་སྐུ། །ཡིད་བཞིན་ནོར་བུ་གཙུག་གི་རྒྱན། །ཚོགས་ཀྱི་སློབ་དཔོན་ཚོགས་ཀྱི་མཆོག །དཔལ་ལྡན་སྐུ་ལ་སྐྱབས་སུ་མཆི། །དེ་བཞིན་དུ་ལྷོ་ནས། འཁོར་བའི་འཁོར་ལོ་རྒྱུན་གཅོད་ཅིང་། །ཆོས་ཀྱི་འཁོར་ལོ་སྐོར་མཛད་པ། །བདེ་མཆོག་འཁོར་ལོ་བདེ་བའི་མཆོག །དཔལ་ལྡན་སྐུ་ལ་སྐྱབས་སུ་མཆི། །ནུབ་ནས། སངས་རྒྱས་ཐམས་ཅད་སྐྱེད་པའི་ཡུམ། །བཅོམ་ལྡན་འདས་མ་རྗེ་བཙུན་མ། །མ་གཅིག་རྡོ་རྗེ་རྣལ་འབྱོར་མ། །དཔལ་ལྡན་མ་ལ་སྐྱབས་སུ་མཆི། །བྱང་ནས། དཔའ་བོ་དཔའ་མོ་རྡོ་རྗེ་ཡི། །སྤྱན་ཅན་ཆོས་སྐྱོང་རྡོ་རྗེ་སྤུན། །མ་ལུས་ལུས་པ་མེད་པ་ལ། །ཕྱག་འཚལ་གུས་པས་སྐྱབས་སུ་མཆི། །ཞེས་ཕྱག་འཚལ། བཅུ་པ་མེ་ཏོག་དོར་བ་ནི། ལྷག་པའི་ལྷ་ལ་མེ་ཏོག་འབུལ་བར་བསམས་ལ། ཨོཾ་པུཥྤེ་མཱ་ལ་པྲ་ཏཱི་ཙྪ་ཧོཿ ཞེས་ཕུལ་བས་མཉེས་ཏེ་མེ་ཏོག་གི་ཕྲེང་བ་སྤྱི་བོར་བཅིང་ཞིང་། ལྷ་དེ་ལས་གཉིས་པ་ཞིག་བྱེ་སྟེ་སྤྱི་བོར་ཐིམ་པར་བསམས་ལ་མེ་ཏོག་མགོ་ལ་བཞག་ཅིང་། ཨོཾ་པུཥྤེ་མཱ་ལ་ས་མ་ཡ་ཧཱུྃ། ཞེས་བརྗོད། བཅུ་གཅིག་པ་མིག་དབྱེ་བ་ནི། སློབ་དཔོན་གྱིས་མ་རིག་པའི་ལིང་ཏོག་བསལ་བར་བསམ་ལ། ཕྱག་རྒྱ་དང་བཅས་མིག་དར་ཡོད་ན་བསལ། ཧེ་རུ་རྣལ་འབྱོར་མ་མཆན་ཀ་དཔལ་དེང་ཁྱོད་ཀྱི། །མིག་འབྱེད་པར་ནི་བརྩོན་པར་མཛད། །རྡོ་རྗེའི་མིག་ནི་བླ་ན་མེད། །ཕྱེ་བས་ཡེ་ཤེས་མཐོང་བར་འགྱུར། ཨོཾ་བཛྲ་ནི་ཏྲ་ཨ་པ་ཧ་ར་པ་ཏྲ་ལཾ་ཧྲཱིཿཏྲྃ། ཞེས་བརྗོད། བཅུ་གཉིས་པ་དཀྱིལ་འཁོར་བསྟན་པ་ནི། སློབ་དཔོན་གྱིས། ཐར་པ་ཆེན་པོའི་གྲོང་ཁྱེར་མཆོག །ལྟོས་ཤིག་ལྟོས་ཤིག་སེམས་དཔའ་ཆེ། །དཀྱིལ་འཁོར་བཟང་པོ་འདི་ལ་ལྟོས། །མེ་ཏོག་གང་དུ་ལྷུང་གྱུར་པ། །དེ་ནི་ཁྱོད་ཀྱི་ལྷག་པའི་ལྷ། །དེ་ལ་དད་པ་རབ་ཏུ་བསྐྱེད། །སྔགས་དང་ཕྱག་རྒྱས་བྱིན་གྱིས་བརླབས། །བསྐལ་པ་བྱེ་བ་དུ་མ་རུ། །སྔོན་དུ་སྡིག་པ་བྱས་པ་གང་། །དཀྱིལ་འཁོར་འདི་འདྲ་མཐོང་མ་ཐག །དེ་དག་ཟད་པར་འགྱུར་ཡིན་ན། །གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་ན་སྨོས་ཅི་དགོས། །སྐྱོབ་པའི་གསང་སྔགས་བཟླས་ན་ནི། །གོ་འཕང་བླ་ན་མེད་པར་འགྱུར། །བདག་ཉིད་ཆེན་པོ་ཁྱེད་རྣམས་ཀྱིས། །རྙེད་པ་མཉམ་མེད་དེ་རིང་རྙེད། །དེ་ཕྱིར་ཁྱེད་རྣམས་སྐལ་ལྡན་གྱུར། །དཔའ་བོ་རྣལ་འབྱོར་མ་རིགས་སྐྱེས། །དམ་ཚིག་མཆོག་ལ་གནས་པར་གྱིས། །ཞེས་དཀྱིལ་འཁོར་བསྟན་ཅིང་མཐོང་བར་བསམ། གཉིས་པ་ཞུགས་ནས་དབང་བླང་བ་ལ་བཞི་ལས། །དང་པོ་བུམ་དབང་ལ་སྡོམ་ནི། གསོལ་གདབ་སྒོ་གསུམ་ཧཱུྃ་དུ་བསྒྱུར། །ལྷར་བསྐྱེད་གོ་བགོ་ཡེ་ཤེས་དབབ། །དབང་བསྐུར་ནས་ནི་མངའ་གསོལ་ཞིང་། །བུམ་པའི་དབང་དོན་སྤྲད་དང་བརྒྱད། །ཅེས་པའི་དང་པོ་སྤྲོ་ན་མཎྜལ་ཕུལ། གསོལ་བ་གདབ་པ་ནི། མཁྱེན་བརྩེ་ཡེ་ཤེས་ལྔ་ཡི་བདག །འགྲོ་བའི་དེད་དཔོན་བླ་མ་མཆོག །བཅོམ་ལྡན་ཧེ་རུ་ཀ་རྗེ་བཙུན་རྡོ་རྗེ་རྣལ་འབྱོར་མ་མཆན་དཔལ་གྱིས། །བདག་ལ་བུམ་དབང་བསྐུར་དུ་གསོལ། །ཞེས་གསོལ་བ་གདབ། གཉིས་པ་སྒོ་གསུམ་ཧཱུྃ་དུ་བསྒྱུར་བ་ནི། བླ་མ་དཀྱིལ་འཁོར་གྱི་གཙོ་བོ་ཡབ་ཡུམ་དུ་གསལ་བའི་ཐུགས་ཀའི་ཧཱུྃ་གི་འོད་ཀྱིས་སྒོ་གསུམ་གྱི་དྲི་མ་སྦྱངས། འོད་དུ་ཞུ་ཧཱུྃ་དུ་གྱུར་པ་ཡབ་ཀྱི་ཞལ་དུ་དྲངས་ཤིང་ཞུགས་པས་ཐུགས་ཀར་རྗེས་ཆགས་ཀྱི་མེས་འོད་དུ་ཞུ། བདེ་བ་ཆེན་པོའི་རང་བཞིན་ཐིག་ལེར་གྱུར་པ་གསང་གནས་ནས་བརྒྱུད་དེ་ཡུམ་གྱི་མཁའ་ནང་དུ་བྱོན་པས། གསུམ་པ་ལྷར་བསྐྱེད་པ་ནི། ཁྱེད་རང་བཅོམ་ལྡན་འདས་འཁོར་ལོ་སྡོམ་པའི་སྐུ་གྲུབ་ཅིང་གསལ་བ་ནི་སྐུ་མདོག་སྔོན་པོ་ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་འཛིན་པ་ཡུམ་ལ་འཁྱུད་པ། ཁྲོ་གཉེར་གཡོ་བའི་ཞལ་མཆེ་བ་གཙིགས་ཤིང་། ཞེས་པ་ནས། གཉིས་ཀའང་ཡེ་ཤེས་ཀྱི་མེ་རབ་ཏུ་འབར་བའི་དབུས་ནས་ཞུགས་པ་ཡུམ་གྱི་རྩིབས་ལོགས་གཡོན་ནས་འཕྲོས་ཏེ་དཀྱིལ་འཁོར་གྱི་གཙོ་བོའི་མདུན་དུ་པད་ཉི་འཇིགས་བྱེད་དུས་མཚན་གྱི་གདན་ལ་བཞུགས་པར་གྱུར། ཕྱག་རྒྱ་དང་བཅས། ཨོཾ་ཨཱཿཧཱུྃ་པདྨ་ཀ་མ་ལཱ་ཡ་སྟྭཾ། ཞེས་བརྗོད། བཞི་པ་གོ་བགོ་བ་ནི། བཅོམ་ལྡན་འདས་ཀྱི་ཐུགས་ཀར་ཞེས་དང་། རྡོ་རྗེ་ཕག་མོའི་ལྟེ་བར་ཞེས་སོགས་ནས། སྣང་ལ་རང་བཞིན་མེད་པར་གྱུར་གྱི་བར་སྒྲུབ་ཐབས་ལྟར། ལྔ་པ་ཡེ་ཤེས་དབབ་པ་ནི། བླ་མ་དང་དཀྱིལ་འཁོར་གྱི་ལྷ་ཚོགས་ཐམས་ཅད་ཀྱིས་བདག་ལ་དཔལ་ཧེ་རུ་ཀ་དབབ་པར་མཛད་དུ་གསོལ། ཞེས་གསོལ་བ་བཏབ་པས། སློབ་དཔོན་གྱི་ཐུགས་ཀའི་ཧཱུྃ་དང་རང་ལུས་ཡི་དམ་དུ་གསལ་བའི་སྟོང་རའི་ནང་དུ་རྩ་དབུ་མ་པདྨ་སྔོན་པོ་འདབ་བརྒྱད་དང་། ཁམས་དམར་པོ་ཉི་མ་དཀར་པོ་ཟླ་བའི་གདན་གྱི་སྟེང་དུ་རང་འདྲའི་ཏིང་ངེ་འཛིན་སེམས་དཔའ་ཧེ་རུ་ཀ་ཚོན་གང་ཙམ་གསལ་ལ་དོད་པ་མགར་བའི་སོལ་མལ་ནས་འཐོན་པའི་ལྕགས་བསྲེག་ལྟ་བུ་ལས་འོད་ཟེར་ཕྱོགས་བཅུར་འཕྲོས་པས། ཕྱོགས་བཅུའི་བླ་མ་ཡི་དམ་སངས་རྒྱས་བྱང་ཆུབ་སེམས་དཔའ་ཐམས་ཅད་རང་འདྲའི་སྐུ་དང་ཕྱག་མཚན་ཡིག་འབྲུ་མེའི་རང་བཞིན་འོད་ཟེར་རབ་ཏུ་འབར་བའི་རྣམ་པར་སྤྱན་དྲངས་པ་དང་། དཀྱིལ་འཁོར་གྱི་གཙོ་བོ་ལས་ཀྱང་རང་འདྲ་དཔག་ཏུ་མེད་པ་འཕྲོས། ཚེག་སྒྲ་འུར་སྒྲ་དང་བཅས་སྙིང་གའི་ཧེ་རུ་ཀ་དང་ལུས་ལ་ཐིམ་པས་ཧེ་རུ་ཀ་མེར་འབར་བ་དང་དྲག་ཏུ་འབར་ཞིང་རང་ལུས་མེར་འབར་བས་མི་བཟོད་པའི་བདེ་བ་རྒྱས་པར་བསམས་ལ་རིག་པ་ཧུར་ཕྱུང་ལ་རོལ་མོ་དྲག་ཏུ་འཁྲོལ་ཞིང་། ཨོཾ་ཤྲཱི་ཧེ་ཧེ་རུ་རུ་ཀཾ་བཛྲ་ཛྙཱ་ན་ཨཱ་ཝེ་ཤ་ཡ་ཛཿཧཱུྃ་བྃ་ཧོཿ ཞེས་ལན་གསུམ་བརྗོད་ཅིང་སྤྱི་བོར་རྡོ་རྗེ་རྒྱ་གྲམ་དུ་བཞག་པ་དང་བཅས་ཨོཾ་ཤྲཱི་ཛྙཱ་ན་ཧེ་རུ་ཀ་སུ་པྲ་ཏིཥྛ་བཛྲཱ་ཡེ་སྭཱ་ཧཱ། ཞེས་དང་། དྲུག་པ་དབང་བསྐུར་བ་ནི། བླ་མ་དང་དཀྱིལ་འཁོར་གྱི་ལྷ་ཚོགས་ཐམས་ཅད་ཀྱིས་བདག་ལ་མངོན་པར་དབང་བསྐུར་དུ་གསོལ། ཞེས་གསོལ་བ་བཏབ་པས། བླ་མས་དཀྱིལ་འཁོར་ལྷ་ཚོགས་ཐམས་ཅད་ཀྱིས་མི་བསྐྱོད་པ་ཆུའི་རང་བཞིན་གྱི་བུམ་ཆུས་དབང་བསྐུར་བར་བསམས་ཏེ། རྣམ་རྒྱལ་བུམ་པ་ཐོགས་ལ། ཧེ་རུ་ཀ་དཔལ་འཁོར་བཅས་ཀྱི། །སྐུ་གསུང་ཐུགས་ལས་བྱུང་བ་ཡི། །སྒྲིབ་གཉིས་བག་ཆགས་སྦྱོང་བྱེད་པའི། །རྡོ་རྗེའི་དབང་བསྐུར་ཆེན་པོ་སྦྱིན། ཨོཾ་བཛྲ་ཨུ་ད་ཀ་ཨ་བྷི་ཥིཉྩ་ཧཱུྃ། བུམ་ཆུ་འཐུང་གཞུག །ཞེས་གསུང་ཞིང་བུམ་པའི་ཆུས་སྤྱི་བོ་ནས་དབང་བསྐུར་བས་སྒོ་གསུམ་གྱི་དྲི་མ་ཐམས་ཅད་དག །ལུས་ཐམས་ཅད་བདུད་རྩིའི་རྒྱུན་གྱིས་གང་སྟེ་སྤྱི་བོར་འཁྱིལ་པ་རྡོ་རྗེ་འཆང་ཡབ་ཡུམ་དུ་གྱུར་ནས་དབུ་བརྒྱན་པར་གྱུར་པའི་མོས་པ་མཛོད། དེས་མི་བསྐྱོད་པ་ཆུའི་དབང་གི་གོ་བཅད་ནས། རིན་འབྱུང་ཅོད་པན་གྱི་དབང་ནི། བླ་མ་དཀྱིལ་འཁོར་གཙོ་བོའི་ཐུགས་ཀ་ནས་རིན་འབྱུང་གི་རང་བཞིན་དབང་རྫས་དབུ་རྒྱན་གྱི་རྣམ་པར་འཕྲོས་ཏེ་མགོ་བོར་བཅིངས་པར་གྱུར་པའི་མོས་པ་མཛོད། སངས་རྒྱས་ཀུན་གྱི་དབུ་རྒྱན་དབང་། །དེ་རིང་ཁྱོད་ལ་བསྐུར་བར་བྱ། །སངས་རྒྱས་མཆོག་ཏུ་བསྒྲུབ་བྱའི་ཕྱིར། །དབུ་རྒྱན་འདི་ཡིས་མཛེས་པར་བྱོས། ཨོཾ་རཏྣ་མུ་ཀུ་ཊ་ཨ་བྷི་ཥིཉྩ་ཧཱུྃ། འོད་དཔག་མེད་རྡོ་རྗེའི་དབང་ནི། བླ་མ་དཀྱིལ་འཁོར་གཙོ་བོའི་ཐུགས་ཀ་ནས་འོད་དཔག་མེད་ཀྱི་རང་བཞིན་དབང་རྫས་རྡོ་རྗེའི་རྣམ་པར་འཕྲོས་ཏེ་ལག་ཏུ་གཏད་པར་གྱུར་པའི་མོས་པ་མཛོད། སངས་རྒྱས་ཀུན་གྱི་རྡོ་རྗེའི་དབང་། །དེ་རིང་ཁྱོད་ལ་བསྐུར་བར་བྱ། །སངས་རྒྱས་ཀུན་ཏུ་རྒྱལ་བས་བསྔགས། །རྡོ་རྗེ་འདི་ནི་ཁྱོད་ཀྱིས་ཟུངས། །ཨོཾ་མ་ཧཱ་བཛྲ་ཨ་བྷི་ཥིཉྩ་ཧཱུྃ། དོན་ཡོད་གྲུབ་པ་དྲིལ་བུའི་དབང་ནི། བླ་མ་དཀྱིལ་འཁོར་གཙོ་བོའི་ཐུགས་ཀ་ནས་དོན་གྲུབ་ཀྱི་རང་བཞིན་དབང་རྫས་དྲིལ་བུའི་རྣམ་པར་སྤྲོས་ཏེ་ལག་ཏུ་གཏད་པར་གྱུར་པའི་མོས་པ་མཛོད། འདི་དེ་སངས་རྒྱས་ཐམས་ཅད་ཀྱི། །ཤེས་རབ་དབྱིངས་ཀྱི་རྗེས་འགྲོར་བཤད། །བྱང་ཆུབ་མཆོག་ཏུ་རྒྱལ་བས་བཞེད། །ཁྱོད་ཀྱིས་ཀྱང་ནི་རྟག་ཏུ་ཟུངས། ཨོཾ་མ་ཧཱ་གཎྜེ་ཨ་བྷི་ཥིཉྩ་ཧཱུྃ། རྣམ་སྣང་མིང་གི་དབང་ནི། བླ་མ་དཀྱིལ་འཁོར་གཙོ་བོས་ཕྱག་གཡས་སྤྱི་བོར་བཞག་ཅིང་གཡོན་མི་འཇིགས་པའི་ཕྱག་རྒྱ་དང་བཅས། རྡོར་དྲིལ་སྤྱི་བོར་བསྣོལ་ལ། །སངས་རྒྱས་ཀུན་གྱི་མིང་གི་དབང་། །དེ་རིང་ཁྱོད་ལ་བསྐུར་བར་བྱ། །སངས་རྒྱས་མཆོག་ཏུ་བསྒྲུབ་བྱའི་ཕྱིར། །རྡོ་རྗེའི་མིང་ནི་ཁྱོད་ཀྱིས་ཟུངས། ཨོཾ་ཤྲཱི་ཧེ་རུ་ཀ་གསང་མཚན་དཔེར་ན་མི་བསྐྱོད་རྡོ་རྗེ་ནཱ་མ་ཨ་དྷི་པ་ཏི་སྟྭཾ་ཨ་བྷི་ཥིཉྩ་ཧཱུྃ། མི་བསྐྱོད་རྡོ་རྗེ་སོགས་གསང་མཚན་འདི་ཞེས་བྱ་བའི་དེ་བཞིན་གཤེགས་པའོ། །བརྟུལ་ཞུགས་རྡོ་རྗེ་སེམས་དཔའི་དབང་ནི། དཀྱིལ་འཁོར་གཙོ་བོས། འདི་དེ་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་ངོ་བོ་སྟེ། །རྡོ་རྗེ་སེམས་དཔའི་ཕྱག་ན་གནས། །ཁྱོད་ཀྱིས་ཀྱང་ནི་རྟག་ཏུ་ཟུངས། །ལག་ན་རྡོ་རྗེའི་བརྟུལ་ཞུགས་བརྟན། ཨོཾ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ་སྟྭཾ་ཨེ་ཥ་དྷ་ར་ཡཱ་མི་ཧི་ཧི་ཧི་ཧི་ཧཱུྃ། ཞེས་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་ངོ་བོ་རྡོ་རྗེ་རྩེ་ལྔ་པ་བྱིན་པས་སྙིང་གར་རྡོར་སེམས་གསལ་བར་གྱུར་པའི་མོས་པ་མཛོད་ལ། དེ་རྣམས་ཀྱི་དབང་དོན་གཅིག་ཆར་དུ་ངོ་སྤྲད་པ་ནི། དེ་ལྟར་དབང་ཐོབ་པས་ཉོན་མོངས་པ་ལྔ་ཡེ་ཤེས་ལྔ། འབྱུང་བ་ལྔ་ཡུམ་ལྔ་ཕུང་པོ་ལྔ་རྒྱལ་བ་རིགས་ལྔར་ཡེ་ནས་གྲུབ་པ་ལ་ཡིད་ཆེས་པར་གྱིས་ཤིག །ཅེས་བརྗོད། བདུན་པ་མངའ་དབུལ་བ་ནི། ལྕང་ལོ་བྱུག་རྫས་སོགས་གཅིག་ཅར་དུ་སྦྱིན་པའི་མོས་པ་མཛོད། ཙཀླི་རྣམས་ཕྱོགས་གཅིག་ཏུ་ཐོགས་ནས་བྱིན་པའི་མོས་པ་མཛོད། སྐལ་ལྡན་ཁྱེད་རྣམས་ལྕང་ལོ་ཐོར་ཚུགས་འཆང་། །བྱུག་རྫས་བྱུག་ཅིང་རྒྱན་རྣམས་འདོགས་པ་དང་། །ཕྱག་མཚན་འཛིན་ཅིང་མཆོད་བསྟོད་ཕུན་ཚོགས་པས། །ཡི་དམ་འཁོར་ལོ་སྡོམ་པར་མངའ་གསོལ་ལོ། །ཨོཾ་ཨཱཿཧཱུྃ། ཞེས་བརྗོད། ཨོཾ་ཤྲཱི་ཙཀྲ་སམྦ་ར་ས་པ་རི་ཝཱ་ར་ཨརྒྷཾ་ནས། ཤཔྡའི་བར་གྱིས་མཆོད། ཆོས་དབྱིངས་རྣམ་དག་མ་དང་། དཔལ་ལྡན་སངས་རྒྱས་མཁའ་འགྲོ་མ་སོགས་ཀྱིས་བསྟོད། བརྒྱད་པ་དབང་དོན་ངོ་སྤྲད་པ་ནི། དེ་ལྟར་བུམ་པའི་དབང་ཐོབ་པས་སྦྱང་གཞི་ལུས་ལྷ་ལ། སྦྱང་བྱ་དམན་པར་འཛིན་པའི་དྲི་མ་སྦྱངས། སྦྱོང་བྱེད་བསྐྱེད་རིམ་བསྒོམ་པ་ལ་དབང་། སྦྱངས་འབྲས་མཆོག་གི་སྤྲུལ་སྐུ་ཐོབ་པར་འགྱུར་རོ། །གཉིས་པ་གསང་དབང་ལ་གསུམ་གྱི་དང་པོ་སྤྲོ་ན་མཎྜལ་དང་། གསོལ་བ་གདབ་པ་ནི། ཧེ་རུ་ཀ་དཔལ་འགྲོ་བའི་མགོན། །བཀའ་དྲིན་མཉམ་མེད་རྗེ་བཙུན་གྱིས། །བླ་མེད་གསང་བའི་དབང་གིས་ཀྱང་། །བདག་ཅག་སྨིན་པར་མཛད་དུ་གསོལ། །གཉིས་པ་དབང་དངོས་ནི། བླ་མ་ཡབ་ཡུམ་སྦྱོར་མཚམས་ནས། །ཨཱ་ལི་ཀཱ་ལིའི་རྒྱུན་བྱུང་བས། །རྩ་གསུམ་འཁོར་ལོ་བཞི་སོགས་གང་། །གསལ་དྭངས་ཐོགས་མེད་ལུས་སུ་གྱུར་པར་བསམ། །འཁོར་ལོ་སྡོམ་པ་ཡབ་ཡུམ་གྱི། །གསང་བ་སྐུ་ཡི་དཀྱིལ་འཁོར་ལས། །བྱུང་བའི་བྱང་སེམས་དཀར་དམར་གྱིས། །སྐལ་ལྡན་ཁྱོད་ལ་དབང་བསྐུར་རོ། །ཨོཾ་བཛྲ་གུ་ཧྱ་ཨ་བྷི་ཥིཉྩ་ཧཱུྃ། ཞེས་བརྗོད་ཅིང་བདུད་རྩི་ལྕེ་ཐོག་ཏུ་བྱིན། གསུམ་པ་དབང་དོན་ངོ་སྤྲད་པ་ནི། དེ་ལྟར་གསང་བའི་དབང་ཐོབ་པས་སྦྱང་གཞི་ངག་སྔགས་ལ། སྦྱང་བྱ་དམན་པར་འཛིན་པའི་དྲི་མ་སྦྱངས། སྦྱོང་བྱེད་གཏུམ་མོ་བསྒོམ་པ་ལ་དབང་། སྦྱངས་འབྲས་ཆོས་ཐམས་ཅད་བྲག་ཆ་ལྟར་སྟོང་པར་རྟོགས་པས་ཆོས་སྐུ་ཐོབ་པར་འགྱུར་རོ། །གསུམ་པ་ཤེར་དབང་ལ་གསུམ་གྱི་དང་པོ་སྤྲོ་ན་མཎྜལ་ཕུལ། གསོལ་བ་གདབ་པ་ནི། ཟག་མེད་བདེ་ཆེན་ལ་གནས་པའི། །བཅོམ་ལྡན་ཧེ་རུ་ཀ་དཔལ་གྱི། །བདེ་ཆེན་ལྷན་སྐྱེས་དབང་གིས་ཀྱང་། །བདག་ཅག་སྨིན་པར་མཛད་དུ་གསོལ། །གཉིས་པ་དབང་དངོས་ནི། གསང་སྔགས་བླ་མེད་དོན་རིག་པས། །ཟས་ལ་རྨེ་གཙང་མེད་པ་དང་། །འཁོར་འདས་གཉིས་སུ་མི་རྟོག་པའི། །དམ་ཚིག་ཁྱོད་ཀྱིས་བསྲུང་ནུས་སམ། །ཞེས་སྤྲོ་བ་དྲིས་པས་ལན་བཏབ་པར་བསམས་ལ། གསང་སྔགས་བླ་མེད་སོགས་ཀྱི་མཐར། །དམ་ཚིག་བདག་གིས་བསྲུང་ནུས་སོ། །ཞེས་བརྗོད། རྗེ་བཙུན་མ་མར་མེ་གཅིག་ལས་གཉིས་མཆེད་ཀྱི་ཚུལ་དུ་བྱུང་བ་རང་དང་མཉམ་པར་སྦྱོར་བས་སེམས་འོད་གསལ་དུ་ཐིམ་པར་བསམ། སྲེད་པའི་འདོད་ཆགས་སྤངས་ནས་ནི། །འཁོར་བའི་མཚོ་ལས་སྒྲོལ་བའི་ཐབས། །ཟག་མེད་དགའ་བཞིའི་དཔལ་སྐྱེད་པའི། །ཡེ་ཤེས་ལྷ་མོ་འདི་བཞེས་ཤིག །ཨོཾ་མ་ཧཱ་སུ་ཁ་པྲ་ཛྙཱ་ཛྙཱ་ན་ཨ་བྷི་ཥིཉྩ་ཧཱུྃ། ཁ་ཊྭཱཾ་བཟུང་། གསུམ་པ་དབང་དོན་ངོ་སྤྲད་པ་ནི། དེ་ལྟར་ཤེས་རབ་ཡེ་ཤེས་ཀྱི་དབང་ཐོབ་པས་སྦྱང་གཞི་སེམས་ཀྱི་འཆར་སྒོ་སྣང་སྟོང་ཟུང་འཇུག་ལ། སྦྱང་བྱ་ཐབས་དང་གཉིས་སུ་འཛིན་པའི་དྲི་མ་སྦྱངས། སྦྱོང་བྱེད་ཕོ་ཉ་བསྒོམ་པ་ལ་དབང་། སྦྱངས་འབྲས་ཟུང་འཇུག་ལོངས་སྐུ་ཐོབ་པར་འགྱུར་རོ། །བཞི་པ་ཚིག་དབང་ལ་གསུམ་གྱི་དང་པོ་སྤྲོ་ན་མཎྜལ་ཕུལ། གསོལ་བ་གདབ་པ་ནི། བྱང་ཆུབ་རྡོ་རྗེས་སངས་རྒྱས་ལ། །མཆོད་ཆེན་ཇི་ལྟར་སྩལ་བ་ལྟར། །བདག་ཀྱང་སྐྱོབ་བའི་དོན་སླད་དུ། །ནམ་མཁའི་རྡོ་རྗེ་དེང་བདག་སྩོལ། །གཉིས་པ་དབང་དངོས་ནི་སྒོ་གསུམ་མཉམ་པར་བཞག་མཛོད། བུ་དེ་བཞིན་ཉིད་ཀྱི་ཡེ་ཤེས་ནི། །མཆོག་ཏུ་མི་འགྱུར་བདེས་གང་བ། །བདེ་མཆོག་འཁོར་ལོ་བདེ་བའི་མཆོག །དེ་ནི་རང་གི་སེམས་ཉིད་ཡིན། །ལྟོས་ཤིག་རང་གི་སེམས་ལ་ལྟོས། །རང་གི་སེམས་ལ་བལྟས་པས་ན། །དབང་བསྐུར་ལ་སོགས་སྣང་བ་རྣམས། །གདོད་ནས་རང་གི་སེམས་སུ་གསལ། །གསལ་ཙམ་ཉིད་ནས་སྟོང་པ་སྟེ། །སྟོང་པ་ཉིད་རང་གསལ་བའི་ཕྱིར། །སྣང་སྟོང་ཟུང་འཇུག་སེམས་ཀྱི་དོན། །སྨྲ་བསམ་བརྗོད་མེད་ཤེས་པར་གྱིས། །གསུམ་པ་དབང་དོན་ངོ་སྤྲད་པ་ནི། །དེ་ལྟར་ཚིག་དབང་ཐོབ་པས་སྦྱང་གཞི་སྒོ་གསུམ་དབྱེར་མེད་བློ་འདས་བརྗོད་བྲལ། སྦྱང་བྱ་རྟོག་འཛིན་སྨྲ་བརྗོད་ཀྱི་དྲི་མ་སྦྱངས། སྦྱོང་བྱེད་བློ་འདས་ཕྱག་རྒྱ་ཆེན་པོ་བསྒོམ་པ་ལ་དབང་། སྦྱངས་འབྲས་ངོ་བོ་ཉིད་སྐུ་ཐོབ་པར་འགྱུར་རོ། །གཉིས་པ་མཐའ་རྟེན་ལ། བརྒྱུད་པ་སྨིན་གྲོལ་བཟླས་པ་དང་། ཞེས་པ་ལྟར་བཞི་ལས། དང་པོ་བརྒྱུད་པ་ཡིད་བཞིན་ནོར་བུའི་རྗེས་གནང་ནི། ནོར་བུ་སྤྱི་བོར་བཞག་སྟེ། སྤྲུལ་སྐུ་བླ་མ་ཡིད་བཞིན་གྱི། །ནོར་བུ་རིན་ཆེན་གཙུག་གི་རྒྱན། །རྡོ་རྗེ་འཆང་དང་དབྱེར་མེད་པའི། །བཀའ་བརྒྱུད་བླ་མའི་བརྒྱུད་པ་ཟུངས། །སྨོན་ལམ་ཡིད་བཞིན་ནོར་བུའི་རྗེས་གནང་ནི། རྣམ་རྒྱལ་བུམ་པ་ཐོགས་ལ། མཁྱེན་བརྩེས་འགྲོ་བ་རྗེས་བཟུང་ཕྱིར། །དཀྱིལ་འཁོར་ཆོ་ག་བཞིན་བྲིས་ནས། །དབང་བཞིས་སྐལ་ལྡན་གདུལ་བྱ་རྣམས། །སྨིན་བྱེད་ལས་ལ་བརྩོན་པར་གྱིས། །གྲོལ་ལམ་ཡིད་བཞིན་ནོར་བུའི་རྗེས་གནང་ནི། རལ་གྲི་ཐོགས་ལ། འགྲོ་ཀུན་འཁོར་བར་འཆིང་བྱེད་པའི། །མ་རིག་ཞགས་པ་ཇི་སྙེད་པ། །ཤེས་རབ་རལ་གྲིས་བཅད་ནས་ཀྱང་། །རྣམ་གྲོལ་ལམ་ལ་འགོད་པར་གྱིས། བཟླས་པའི་རྗེས་གནང་ནི། །བཅོམ་ལྡན་བདག་གིས་བཟུང་ལགས་ཀྱིས། །བདག་ལ་འགོ་བར་མཛད་དུ་གསོལ། །དེ་ལྟར་གསོལ་བ་བཏབ་པ་ལས། །སློབ་དཔོན་དཀྱིལ་འཁོར་གཙོ་བོ་ཡི། ཐུགས་ཀའི་སྔགས་ཀྱི་ཕྲེང་བ་ལས། །སྔགས་ཕྲེང་གཉིས་པ་ཞལ་ནས་འཐོན། །རང་གི་ཁར་ཞུགས་སྙིང་གར་ནི། །པད་ཉིའི་སྟེང་དུ་ཧཱུྃ་གི་མཐར། །གཡོན་དུ་བསྐོར་ལས་འོད་འཕྲོས་པས། །ཕྲིན་ལས་རྣམ་བཞི་ཀུན་འགྲུབ་འགྱུར། །ཞེས་ཡབ་ཡུམ་གཉིས་ཀྱི་སྙིང་པོ་ཉེ་སྙིང་བཟླས་ཏེ་ཕྲེང་བ་ཐོགས་ལ། རིན་ཆེན་ཐོད་པའི་བགྲང་ཕྲེང་འདིས། །ཧེ་རུ་ཀ་དཔལ་འཁོར་བཅས་ཀྱི། །མཁྱེན་བརྩེའི་ཡེ་ཤེས་ཐུགས་རྒྱུད་ནི། །སྙིང་པོ་སྔགས་ཀྱིས་བསྐུལ་བར་གྱིས། །ཞེས་དང་། བཅོམ་ལྡན་འདི་ལ་སྩལ་ལགས་ཀྱིས། །འདི་ལ་འགོ་བར་མཛད་དུ་གསོལ། །སྔགས་ཀྱི་དངོས་གྲུབ་སྩལ་དུ་གསོལ། །བརྟུལ་ཞུགས་བརྟན་པར་མཛད་དུ་གསོལ། །གཉིས་པ་ལུང་བསྟན་པ་ནི། རྡོར་དྲིལ་སྤྱི་བོར་བསྣོལ་ལ། །དཀྱིལ་འཁོར་འདིར་ནི་དབང་ཐོབ་པས། །དེང་ནས་རྡོ་རྗེ་སློབ་དཔོན་གྱི། །ལས་དང་བྱ་བ་མཐའ་དག་ཀུན། །འགྲོ་བའི་དོན་དུ་བསྒྲུབ་པ་ལ། །དབང་ཞིང་མ་འོངས་པ་ཡི་དུས། །མི་བསྐྱོད་རྡོ་རྗེ་ཞེས་བྱ་བའི། །དེ་བཞིན་གཤེགས་པར་བུད་མེད་རྣམས་ལ་གཤེགས་མར་འགྱུར་མཆན། འགྱུར་རོ་ཀྱེ། །གསུམ་པ་དབུགས་དབྱུང་བ་དང་། བཞི་པ་གཟེངས་བསྟོད་གཉིས་གཅིག་ཅར་དུ་བྱ་བ་ནི། ཟབ་མོའི་དབང་ནི་ཐོབ་ཙམ་གྱིས། །མི་མཐུན་ཕྱོགས་ལས་རབ་རྒྱལ་ཞིང་། །བྱང་ཆུབ་ཆེན་པོའི་ལམ་ཞུགས་པས། །ཁྱོད་རྣམས་དགའ་དང་སྤྲོ་བར་གྱིས། །ཞེས་བརྗོད། གསུམ་པ་རྗེས་ནི། གཙོ་བོས་ཇི་ལྟར་བཀའ་སྩལ་པ། །དེ་དག་ཐམས་ཅད་བདག་གིས་བགྱིད། །ལན་གསུམ། བདག་གི་སྒོ་གསུམ་ལོངས་སྤྱོད་བཅས། །དེང་ནས་འདྲེན་པ་ཁྱེད་ལ་འབུལ། །ཉེས་ལྟུང་དྲི་མས་གོས་གྱུར་ན། །ཆ་ཡིས་སྤྱད་ཅིང་བསྐྱབ་ཏུ་གསོལ། །དེ་ནས་མཎྜལ་ཕུལ་ལོ། །སྤྱི་དོན་གསུམ་པ་དཀྱིལ་འཁོར་གྱི་རྗེས་ཆོག་ནི། གཏོར་བསྔོ་ཚོགས་མཆོད་སྐོང་བཤགས་དང་བཅས་པ་སོང་ནས། སླར་མཆོད་བསྟོད་ཕུལ། ཏིང་ངེ་འཛིན་གྱི་དབང་བཞི་ཞུ་བའི་ཚེ། དཀྱིལ་འཁོར་ལྷ་ཚོགས་ཐམས་ཅད་ཀྱི་སྤྱི་བོ་ཨོཾ་དཀར་པོ་ལས། ཞེས་སོགས་འདོན་པ་བསྒྱུར་ལ་དཀྱིལ་འཁོར་ལྷ་ཚོགས་ལས་དབང་བླང་། ཡིག་བརྒྱ་བཟླ་ཞིང་བཟོད་པར་གསོལ། །འདོད་དོན་གསོལ་བ་གདབ། དཀྱིལ་འཁོར་ཚོམ་བུ་ཡིན་ན། ཚོམ་བུའི་དཀྱིལ་འཁོར་རྟེན་དང་བརྟེན་པར་བཅས་པ་འོད་ཀྱི་རྣམ་པར་རང་གི་ཐུགས་ཀར་ཛཿཧཱུྃ་བྃ་ཧོཿ ཚོམ་བུ་ནས་ཅུང་ཟད་མགོ་བོར་བཞག་དཀྱིལ་འཁོར་རས་བྲིས་ཡིན་ན། དཀྱིལ་འཁོར་རས་བྲིས་འདི་ཉིད་འབྱུང་བ་ས་ཆུ་མེ་རླུང་གི་གནོད་པས་མ་ཞིག་གི་བར་དུ་ཡེ་ཤེས་པ་རྣམས་བརྟན་པར་བཞུགས་ནས་བསྟན་པ་དང་སེམས་ཅན་གྱི་དོན་རྒྱ་ཆེན་པོ་མཛད་དུ་གསོལ། འདིར་ནི་གཟུགས་དང་ལྷན་ཅིག་ཏུ། །སོགས་ནས། ཨོཾ་སུ་པྲ་ཏིཥྛ་བཛྲཱ་ཡ་སྭཱ་ཧཱ། ཞེས་ཡེ་ཤེས་པ་རྣམས་རས་བྲིས་ལ་བསྟིམ། མཆོད་སྦྱིན་གནས་འདིར་གང་ལྷགས་པའི། །ཞེས་སོགས་ཀྱིས་འཇིག་རྟེན་པ་རྣམས་རང་གནས་སུ་སོང་བར་བསམ་ཞིང་བསྔོ་བ་སྨོན་ལམ་བཀྲ་ཤིས་ཀྱི་ཚིགས་བཅད་དང་བཅས་པ་བརྗོད་དེ་ལས་ཀྱི་རྗེས་མི་མངོན་པར་བྱའོ།། །། ༈ གཉིས་པ་ཡུམ་བཀའ་ལྷན་ཅིག་སྐྱེས་མའི་བདག་འཇུག་གི་ཁྱད་པར་ལའང་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། སྟེགས་བུའི་དབུས་སུ་རྡུལ་ཚོན་ནམ་རས་བྲིས་གང་རུང་གི་སྐུ་ཚོམ་བུའི་དཀྱིལ་འཁོར་རྡོ་ར་མེ་རིས་བསྐོར་བའི་ཆོས་འབྱུང་གི་ནང་དུ། པདྨ་འདབ་མ་བཞི་པའི་མཐར་དུར་ཁྲོད་ཀྱིས་བསྐོར་བའི་པདྨའི་ལྟེ་བར་ཚོམ་བུ་དམར་པོའམ། བྃ་ཡིག་དམར་པོ་འགོད། དེའི་དབུས་སུ་བར་བདུད་རྩིའི་དཀྱིལ་འཁོར་མཉྫིའི་ཁར་ཐོད་པ་མཚན་ལྡན་དུ་ནང་མཆོད་བདུད་རྩི་རིལ་བུ་དང་སྦྱར་བ་བླུགས། དེའི་ཁར་སིནྡྷུ་རའི་དཀྱིལ་འཁོར་མཎྜ་ལར་བདུད་རྩིས་ཅུང་ཟད་བརླན་པར་སིནྡྷུ་ར་ཁོད་སྙོམས་པར་བཀྲམ་ལ་པདྨ་འདབ་བརྒྱད་ཀྱི་དབུས་སུ་བྃ་ཡིག་གིས་མཚན་པ་བྲི། གཞན་མཆོད་གཏོར་སོགས་ཡབ་བཀའ་དང་འདྲ་ཞིང་དབང་རྫས་བུམ་པ་གཉིས་མ་གཏོགས་གཞན་དབུ་རྒྱན་སོགས་མི་དགོས། སྔོན་གཏོར་ནས་བརྩམས་ཏེ་བདག་བསྐྱེད་བཟླས་པ་དང་བཅས་པ་དང་། བུམ་པ་བསྒྲུབ་པའི་བར་ཡུམ་བཀའི་དཀྱིལ་ཆོག་བཞིན་ལ། མདུན་བསྐྱེད་བསྒྲུབ་ཅིང་མཆོད་པའི་ཐོག་མར། ཐོད་པའི་ནང་དུ་རྗེ་བཙུན་རྡོ་རྗེ་རྣལ་འབྱོར་མ་ལྷན་ཅིག་སྐྱེས་མ་སྐད་ཅིག་གིས་གསལ་ལ་མཆོད་བསྟོད་ཕུལ། བཟླས་པ་ཅུང་ཟད་བྱ། ཛཿཧཱུྃ་བྃ་ཧོཿ ཡེ་ཤེས་པ་རང་ལ་ཐིམ། དམ་ཚིག་པའི་ཐུགས་ཀའི་ཧཱུྃ་ལས་འོད་ཟེར་འཕྲོས་པས་བདུད་རྩིར་ཞུ་བར་བསམས་ལ། ཨོཾ་ཨཱཿཧཱུྃ་ཞེས་བརྗོད། དེ་ནས་འོག་ཚོམ་བུའི་དཀྱིལ་འཁོར་གྱིས་སྤྲུལ་སྐུ་དང་། བར་བདུད་རྩིའི་དཀྱིལ་འཁོར་གྱིས་ལོངས་སྐུ་མཚོན་པའི་དོན་དྲན་པས། སྟེང་ཆོས་སྐུ་མཚོན་པའི་སིནྡྷུ་རའི་དཀྱིལ་འཁོར་བསང་སྦྱང་སོགས་མདུན་བསྐྱེད་དཀྱུས་བཞིན་བྱའོ། །གཉིས་པ་དངོས་གཞིའི་ཁྱད་པར་ལ། དང་པོ་དཀྱིལ་འཁོར་དུ་འཇུག་པའི་ཆོས་བཅུ་གཉིས་ལས། གསོལ་འདེབས། རྗེ་བཙུན་མ་དང་དབྱེར་མེད་པའི། དགའ་ཆེན་ཁྱོད་བདག་སོགས་ཁ་བསྒྱུར་བས་མཚོན་གོང་འོག་གི་ཁྱད་པར་ཕྲ་མོ་རྣམས་མཆན་བུས་གསལ་བ་ལྟར་མ་གཏོགས་གཞན་འདྲ། ཞུགས་ནས་དབང་བླང་བའི་ཆོས་བརྒྱད་ལས། །གཉིས་པ་སྒོ་གསུམ་བྃ་དུ་བསྒྱུར་བ་ནི། བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་པའི་ཐུགས་ཀའི་ས་བོན་གྱི་འོད་ཀྱིས་སྒོ་གསུམ་གྱི་དྲི་མ་སྦྱངས། ལུས་འོད་ཀྱི་གོང་བུའི་རྣམ་པས་ཞལ་དུ་དྲངས། ཐུགས་ཀར་རྗེས་ཆགས་ཀྱི་མེས་འོད་དུ་ཞུ། བདེ་བ་ཆེན་པོའི་རང་བཞིན་ཐིག་ལེར་གྱུར་པ་མཁའ་ནང་དུ་ལྷུང་བས་ཡི་གེ་བྃ་དུ་གྱུར་པ་སླར་ཡང་ཐུགས་ཀ་ནས་སྤྲོས་ཏེ་པད་ཉི་རོའི་གདན་ལ་བཞག་པར་བསམ། བྃ་ཞེས་རང་གི་ལག་པ་སྤྱི་བོར་རེག །གསུམ་པ་ལྷར་བསྐྱེད་པ་ནི། བྃ་ཡོངས་སུ་གྱུར་པ་ལས་རང་ཉིད་རྡོ་རྗེ་རྣལ་འབྱོར་མ་སོགས་ནས། ཡེ་ཤེས་ཀྱི་མེ་འབར་བའི་དབུས་ན་བཞུགས་པར་གྱུར། བཞི་པ་གོ་ཆ་བགོ་བ་ནི། རང་གི་ལྟེ་བར་ཨོཾ་བྃ་ཕག་མོ་དམར་མོ་སོགས་ནས་རང་བཞིན་མེད་པར་གྱུར། ལྔ་པ་ཡེ་ཤེས་དབབ་པ་ནི། དེའི་སྤྱི་བོར་ཨོཾ་སོགས་ནས། ཛཿཧཱུྃ་བྃ་ཧོཿབར་བདག་བསྐྱེད་ལྟར་གསལ་གདབ། སྤྲོ་ན་སྔགས་ཀྱི་མཐར། བཛྲ་ཛྙཱ་ན་ཨཱ་བེ་ཤ་ཡ་ཨཱ་བེ་ཤ་ཡ་ཛཿཧཱུྃ་བྃ་ཧོ། ཞེས་བརྗོད་ཅིང་ཌ་དྲིལ་འཁྲོལ། སྤྱི་བོར་རྡོ་རྗེ་རྒྱ་གྲམ་དུ་བཞག་ཅིང་། ཨོཾ་ཤྲཱི་ཛྙཱ་ན་ཡོ་གི་ནཱི་སུ་པྲ་ཏིཥྛ་བཛྲཱ་ཡ་སྭཱ་ཧཱ། དྲུག་པ་དབང་བསྐུར་བ་ནི། བླ་མ་རྗེ་བཙུན་རྣལ་འབྱོར་མས། །བདག་ལ་མངོན་པར་དབང་བསྐུར་གསོལ། །ལན་གསུམ། རྣལ་འབྱོར་མ་དཔལ་འཁོར་བཅས་ཀྱི། སོགས་ནས། ཆེན་པོ་སྦྱིན། ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་ས་མ་ཡ་ཤྲཱི་ཧཱུྃ། ཞེས་གསུང་ཞིང་རིགས་ལྔ་འཁོར་བཅས་ཀྱིས་གླུ་དང་རོལ་མོ་འདོད་ཡོན་སྣ་ཚོགས་པས་མཆོད་པའི་ངང་ནས་རིན་པོ་ཆེའི་བུམ་པ་བདུད་རྩིས་གང་བས་དབང་བསྐུར། སྐུ་གང་། དྲི་མ་ཐམས་ཅད་དག་བདུད་རྩིའི་རྒྱུན་ཡར་ལུད་དེ་སྤྱི་བོར་འཁྱིལ་པ་རྣམ་སྣང་དུ་གྱུར་ནས་དབུ་བརྒྱན་པར་བསམ། བདུན་པ་མངའ་གསོལ་བ་ནི། སྐལ་ལྡན་ཁྱེད་རྣམས་ནས། ཡི་དམ་རྡོ་རྗེ་ཕག་མོར་མངའ་གསོལ་ལོ། །ཨོཾ་ཨཱཿཧཱུྃ། དེ་ནས་སྐབས་འདིར་ཡུམ་བཀའི་ཁྱད་ཆོས་དབང་བཞི་བྱིན་རླབས་ཀྱི་ཚུལ་དུ་བླང་བ་ནི་རྣལ་འབྱོར་བདག་གི་སྒོ་གསུམ་ལ། །བླ་མ་རྗེ་བཙུན་རྣལ་འབྱོར་མས། །རྡོ་རྗེའི་སྐུ་གསུང་ཐུགས་ཀྱིས་ནི། །བྱིན་གྱིས་རློབ་པར་མཛད་དུ་གསོལ། །ཞེས་སམ། ཡང་ན། བླ་མ་དང་རྗེ་བཙུན་རྡོ་རྗེ་རྣལ་འབྱོར་མས་བདག་གི་ལུས་ངག་ཡིད་གསུམ་ཆ་མཉམ་དང་བཅས་པ་སྐུ་གསུང་ཐུགས་ཡེ་ཤེས་རྡོ་རྗེའི་ངོ་བོར་བྱིན་གྱིས་བརླབ་ཏུ་གསོལ། ལན་གསུམ། ཞེས་གསོལ་བ་བཏབ་པས། བླ་མ་རྡོ་རྗེ་རྣལ་འབྱོར་མའི་སྤྱི་བོར་ཨོཾ་དཀར་པོ་ལས་འོད་ཟེར་དཀར་པོ་དཔག་ཏུ་མེད་པ་འཕྲོས། ཁྱོད་རང་གི་སྤྱི་བོར་ཐིམ། སྐུ་ལས་ཀྱང་སྐུ་དཔག་ཏུ་མེད་པ་འཕྲོས། ལུས་ལ་ཐིམ་པས་སྐྱེ་བ་དང་ཚེ་རབས་ཐམས་ཅད་དུ་ལུས་ཀྱི་སྒོ་ནས་བསགས་པའི་སྡིག་སྒྲིབ་ཉེས་ལྟུང་དྲི་མའི་ཚོགས་ཐམས་ཅད་བྱང་ཞིང་དག་པར་བྱས། སྐུ་བུམ་པའི་དབང་ཐོབ། ལུས་སྐུ་རྡོ་རྗེའི་རང་བཞིན་དུ་བྱིན་གྱིས་བརླབས། ལམ་བསྐྱེད་རིམ་བསྒོམ་པ་ལ་དབང་། འབྲས་བུ་སྤྲུལ་སྐུ་ཐོབ་པའི་སྐལ་ལྡན་དུ་གྱུར་པར་བསམ། དེ་བཞིན་དུ། མགྲིན་པའི་ཨཱཿདམར་པོ་ལས་འོད་ཟེར་དམར་པོ་ཁྱེད་རང་གི་མགྲིན་པར༴ ཞལ་ནས་ཀྱང་ཨཱ་ལི་ཀཱ་ལི་ལ་སོགས་ཏེ་སྔགས་ཀྱི་ཕྲེང་བ་དཔག་ཏུ་མེད་པ་འཕྲོས། ལྕེ་ལ་ཐིམ༴ ངག་གི་སྒོ་ནས༴ གསུང་གསང་བའི༴ ངག་གསུང་རྡོ་རྗེའི༴ ལམ་གཏུམ་མོ༴ འབྲས་ངག་དང་ཆོས་སྐུ་སྦྱར་བ་འདིའི་ཆོས་སྐད་དམིགས་བསལ་བུ་ཆོས་སྐུ༴ ཐུགས་ཀའི་ཧཱུྃ་སྔོན་པོ༴ སྙིང་གར༴ སླར་ཡང་རྡོ་རྗེ་དྲིལ་བུ་གྲི་གུག་ཐོད་པ་ཌཱ་མ་རུ་ཁ་ཊྭཱཾ་ག་སོགས་ཕྱག་མཚན་དཔག་ཏུ་མེད་པ་འཕྲོས། སྙིང་གར༴ ཡིད་ཀྱི༴ ཐུགས༴ ཤེས་རབ༴ ཡེ་ཤེས་ཀྱི༴ ཡིད༴ ཐུགས་རྡོ་རྗེའི༴ ལམ་ཕོ་ཉ༴ འབྲས་བུ་ལོངས་སྐུ༴ སླར་ཡང་མདུན་བསྐྱེད་ཀྱི་དཀྱིལ་འཁོར་རྗེ་བཙུན་རྡོ་རྗེ་རྣལ་འབྱོར་མའི་སྐུ་ལས་རང་འདྲ་བའི་སྐུ་གཉིས་པ་མར་མེ་གཅིག་ལས་གཉིས་མཆེད་ཀྱི་ཚུལ་དུ་བྱེ་སྟེ་བྱོན་པ་འོད་དུ་ཞུ་ནས་ཁྱེད་རང་ལ་ཐིམ་པས་སྐྱེ་བ་དང་ཚེ་རབས་ཐམས་ཅད་དུ་སྒོ་གསུམ་ཆ་མཉམ་གྱི་སྒོ་ནས་བསགས་པའི༴ བཞི་པ་ཚིག་དབང་རིན་པོ་ཆེ་ཐོབ། སྒོ་གསུམ་སྐུ་གསུང་ཐུགས་རྡོ་རྗེའི༴ ལམ་ཕྱག་རྒྱ་ཆེན་པོ་བསྒོམ་པ་ལ་དབང་། འབྲས་བུ་ངོ་བོ་ཉིད་སྐུ་ཐོབ་པའི་སྐལ་ལྡན་དུ་གྱུར་པར་བསམ། དེ་བརྟན་པར་བྱ་བའི་ཕྱིར། ཨོཾ་ཨཱཿཧཱུྃ། ཞེས་གཡོན་པའི་སྲིན་ལག་གིས་མཎྜལ་གྱི་སིནྡྷུ་ར་ལེན་པའི་ཚུལ་བྱས་ལ་རང་གི་གནས་གསུམ་དུ་རེག །ཛཿཧཱུྃ་བྃ་ཧོཿ ཞེས་ལག་གཉིས་ཀྱིས་དཀྱིལ་འཁོར་སྤྱི་བོར་ལེན་པའི་ཚུལ་བྱ། སྤྲོ་ན། གསོལ་འདེབས་ཀྱི་ཚིག་ཕྲལ་ཏེ་སོ་སོའི་མགོར་སྦྱར་བ་དང་། མཚམས་རྣམས་སུ་སྙིང་པོ་དང་ཉེ་སྙིང་བརྗོད་ཅིང་སྤོས་རོལ་བྱ། གསུམ་པ་མཐའ་རྟེན་ལ། རྗེས་གནང་ལུང་བསྟན་དབུགས་དབྱུང་དང་། །གཟེངས་བསྟོད་བྱིན་རླབས་བདུད་རྩི་བསྟེན། །སྨོན་ལམ་བཏབ་དང་བདུན་ཡིན་ནོ། །ཞེས་པས་དང་པོ་རྗེས་གནང་དང་། གཉིས་པ་ལུང་བསྟན་ལྷན་ཅིག་ཏུ་བྱ་བ་ནི། རྡོར་དྲིལ་སྤྱི་བོར་བསྣོལ་ལ། དཀྱིལ་འཁོར་འདིར་ནི་དབང་ཐོབ་པས། སོགས། གསུམ་པ་དབུགས་དབྱུང་དང་བཞི་པ་གཟེངས་བསྟོད་ཡབ་བཀའ་དང་འདྲ། ལྔ་པ་བྱིན་རླབས་ནི་དངོས་གཞིའི་དབང་གི་སྐབས་སུ་སྐུ་གསུང་ཐུགས་ཀྱི་བྱིན་གྱིས་བརླབས་པ་དེས་འཐུས་ཤིང་། དྲུག་པ་གཉིས་མེད་བདུད་རྩི་བསྟེན་པ་ནི། དཀྱིལ་འཁོར་ཐོད་པའི་བདུད་རྩི་གཡོན་དུ་བཟུང་བའི་ཁ་ལག་གཡས་པས་བཀབ་པའི་ཚུལ་དང་བཅས་རྣལ་འབྱོར་མ་དཔལ་བདུད་རྩིའི་གཟུགས། །བདུད་རྩི་རྣལ་འབྱོར་མ་རང་ཡིན། །ཐབས་ཤེས་གཉིས་མེད་བདུད་རྩི་འདི། །གང་བསྟེན་གྲོལ་ལོ་བུ་རྣམས་ཀྱི། །རྩ་བརྒྱུད་བླ་མ་ཐམས་ཅད་ཀྱང་། །གཉིས་མེད་བདུད་རྩི་བསྟེན་པས་གྲོལ། །ཡི་དམ་ལྷ་ཚོགས་ཐམས་ཅད་ཀྱང་། །གཉིས་མེད་བདུད་རྩི༴ མ་དང་མཁའ་འགྲོ་ཐམས་ཅད་ཀྱང་། །གཉིས་མེད་བདུད་རྩི༴། ཆོས་སྐྱོང་མ་མགོན་ལྕམ་དྲལ་ཡང་། །གཉིས་མེད༴ རྡོ་རྗེ་མཆེད་ལྕམ་ཐམས་ཅད་ཀྱང་། །གཉིས་མེད་བདུད་རྩི་བསྟེན་པས་གྲོལ། །དེ་ཕྱིར་སྐལ་ལྡན་ཁྱོད་རྣམས་ཀྱང་། །རྡོ་རྗེ་ཕག་མོ་ཞུ་བ་ཡི། །གཉིས་མེད་བདུད་རྩི་འདི་བསྟེན་པས། །གྲོལ་བར་འགྱུར་རོ་བུ་རྣམས་ཀྱེ། །ཞེས་བརྗོད་ཅིང་ལྕེ་ཐོག་ཏུ་བླངས། བདུན་པ་འབྲལ་མེད་སྨོན་ལམ་གདབ་པ་ནི། བླ་མ་ཡི་དམ་མཁའ་འགྲོ་དང་། །ཆོས་སྐྱོང་སྲུང་མ་རྡོ་རྗེ་སྤུན། །མཁྱེན་བརྩེ་ལྡན་པའི་མཆོད་འོས་ཀུན། །བདག་ལ་བརྩེ་བས་དགོངས་སུ་གསོལ། །བདག་སོགས་སེམས་ཅན་ཐམས་ཅད་ནི། །དེང་ནས་བྱང་ཆུབ་མ་ཐོབ་བར། །བླ་མ་ཡི་དམ་མཁའ་འགྲོ་དང་། །ཆོས་སྐྱོང་སྲུང་མ་རྡོ་རྗེ་སྤུན། །ཚོགས་ཞིང་དམ་པ་རྣམས་དང་ནི། །ནམ་ཡང་མི་འབྲལ་འགྲོགས་པར་ཤོག །དམ་ཆོས་མཁའ་འགྲོའི་གསང་ཚིག་དང་། །ནམ་ཡང༴ དེ་ལྟར་གྱུར་པའི་མཐུ་ནུས་ཀྱིས། །བརྒྱུད་པའི་རྣམ་ཐར་འཁྱོངས་པ་དང་། །རྒྱུ་དང་མི་རྒྱུའི་འགྲོ་བ་ཀུན། །བདག་གིས་སྨིན་ཅིང་གྲོལ་བར་ཤོག །རྗེས་ཀྱི་ཆོས་རྣམས་འདྲའོ། །གསུམ་པ་དཀྱིལ་འཁོར་གྱི་རྗེས་ཆོག་སྐབས། གཞན་འདྲ་བ་ལ། བསྡུ་རིམ་གྱི་ཚེ། འོག་སྤྲུལ་སྐུའི་དཀྱིལ་འཁོར་འོད་དུ་ཞུ་ནས་བར་ལོངས་སྐུའི་དཀྱིལ་འཁོར་དང་། དེ་ཆོས་སྐུའི་དཀྱིལ་འཁོར་ལ་ཐིམ། དེ་ཉིད་རྟེན་དང་བརྟེན་པར་བཅས་པ་ཛཿཧཱུྃ་བྃ་ཧོཿ རང་ལ་ཐིམ་པར་བསམས་ལ། དབུས་ཀྱི་བྃ་ཡིག་ནས་མཐེབ་སྲིན་གྱི་བླངས་ལ་དཔྲལ་བར་ཐིག་ལེ་བྱའོ། །ཡབ་ཡུམ་གྱི་དཀྱིལ་འཁོར་འདི་དག་ཏུ་སློབ་མ་རྗེས་སུ་འཛིན་ན། བདག་འཇུག་ཡན་གྲུབ་ནས། སློབ་མ་རྣམས་ཁྲུས་བྱས། བགེགས་ཕྲལ། སྲུང་འཁོར་བསྒོམ། མཎྜལ་ཕུལ། རྗེས་ལོ་རྒྱུས་ཇི་ལྟར་རིགས་པ་དང་། འཇུག་པའི་ཆོས་བཅུ་གཉིས་པ་དཀྱིལ་འཁོར་བསྟན་པའི་སྐབས། དེ་ལྟར་དཀྱིལ་འཁོར་ལ་བལྟ་བར་བསྐུལ་ཞིང་སྤྲོ་བ་བསྐྱེད་པ་སྔོན་དུ་འགྲོ་བས། གང་ལ་བལྟ་བའི་དཀྱིལ་འཁོར་ནི། འདི་ན་བཅོམ་ལྡན་འདས་དཔལ་འཁོར་ལོ་སྡོམ་པ་ལྷན་ཅིག་སྐྱེས་པའི་དཀྱིལ་འཁོར་བཞུགས་པ་ཡིན་ཏེ། དེའང་ནམ་མཁའི་དབྱིངས་སུ་ཆོས་ཀྱི་འབྱུང་གནས་ཁ་སྦྱོར་གྱི་ནང་དུ་པདྨ་དང་ཉི་མའི་དཀྱིལ་འཁོར། དེའི་དབུས་སུ་སྣ་ཚོགས་རྡོ་རྗེ་སོགས་བསྐྱེད་ཆོག་དོར་བས། །དཔའ་བོ་དང་མཁའ་འགྲོ་མ་དཔག་ཏུ་མེད་པས་གང་བ་སྟེ། མདོར་ན་རྟེན་དང་བརྟེན་པར་བཅས་པ་ཐམས་ཅད་མངོན་སུམ་བཞིན་དུ་མཐོང་བར་མོས་ཏེ་དད་གུས་དང་སྤྲོ་བ་ཁྱད་པར་ཅན་བསྐྱེད་འཚལ། ཞེས་པ་ལྟ་བུ་རྒྱས་བསྡུས་ཇི་ལྟར་རིགས་པས་བརྡ་སྤྲད། ཡུམ་བཀའི་སྐབས། འདི་ན་དངོས་གྲུབ་ཀུན་གྱི་འབྱུང་གནས་བླ་མ་རྡོ་རྗེ་སློབ་དཔོན་གྱི་སྐུ་རང་བཞིན་ལྷུན་གྱིས་གྲུབ་པའི་དཀྱིལ་འཁོར་དང་། དེས་མཚོན་ཏེ་མདུན་གྱི་འོག་ཚོམ་བུའི་དཀྱིལ་འཁོར་གྱིས་སྤྲུལ་སྐུ། བར་བདུད་རྩིའི་དཀྱིལ་འཁོར་གྱིས་ལོངས་སྐུ། སྟེང་སིནྡྷུ་རའི་དཀྱིལ་འཁོར་གྱིས་ཆོས་སྐུ་མཚོན་ལ། མཚོན་བྱ་ཆོས་ཀྱི་སྐུ་ཉིད་མཚོན་བྱེད་གཟུགས་ཀྱི་རྣམ་པར་ཤར་བ་རྗེ་བཙུན་རྡོ་རྗེ་རྣལ་འབྱོར་མ་ལྷན་ཅིག་སྐྱེས་མའི་ཡེ་ཤེས་ཀྱི་དཀྱིལ་འཁོར་བཞུགས་པ་ཡིན་ཏེ། དེའང་ནམ་མཁའི་དབྱིངས་སུ་ཆོས་ཀྱི་འབྱུང་གནས་སོགས་ཁྲིད་ཡིག་གི་ཡུམ་བཀའ་མངོན་རྟོགས་ལྟར་བརྡ་སྤྲད་པས་མཚོན་གོང་འོག་ཀུན་ཏུ་མཚམས་སྦྱོར་གྱི་ཁྱད་པར་རྣམས་མ་འཁྲུལ་བར་སྦྱར་ཤེས་པར་བྱའོ། །ཞེས་པའང་ལམ་འདི་ལ་མཁས་ཤིང་དངོས་གྲུབ་བརྙེས་པའི་དམ་པ་སྔ་མ་དག་གིས་མཛད་པའི་ཡབ་བཀའ་ལྷན་སྐྱེས་ཀྱི་བདག་འཇུག་ལ། སྦྱོར་བའི་སྐབས་སོགས་སུ་གསལ་བྱེད་ཅུང་ཟད་དང་། ཡུམ་བཀའི་ཁྱད་པར་རྣམས་ཀྱང་བསྣན་ནས་མདོར་བསྡུས་སྙིང་པོར་དྲིལ་བའི་ཚུལ་གྱིས་སྦྱར་བ་སྟེ། དགེ་བས་འགྲོ་ཀུན་དཔལ་ཧེ་རུ་ཀའི་གོ་འཕང་མཆོག་ལ་རེག་པའི་རྒྱུར་གྱུར་ཅིག། །སརྦ་དཱ་མངྒ་ལཾ་བྷ་བ་ཏུ།། །། �

[edit]

bde mchog mkha' 'gro snyan brgyud lhan skyes yab yum gyi bdag 'jug nye bar bsdus pa/ @#/__/bde mchog mkha' 'gro snyan brgyud lhan skyes yab yum gyi bdag 'jug nye bar bsdus pa bzhugs so//__// na mo gu ru b+h+yaH__'dir rje btsun ras chung lugs kyi snyan brgyud 'khor lo bde mchog lhan skyes yab yum gyi bdag 'jug ji ltar blang ba'i tshul la gnyis/__yab bka' dang /__yum bka' 'o/__/dang po la gsum/__sbyor ba/__dngos gzhi rjes so/__/dang po ni/__gnas dben par stegs bu'i dbus su rdul tshon nam/__ras bris kyi dkyil 'khor chos 'byung kha khyer dang bcas pa'i nang du sna tshogs pad+ma/__nyi ma/__sna tshogs rdo rje/__de'i lte bar me ri/__rdo ra/__dur khrod brgyad dang bcas pas yongs su bskor ba'i pad+ma 'dab ma brgyad pa'i ze'u 'brur nyi gdan la tshom bu sngon po dang /__de'i mdun du tshom bu dmar po bkod pa'am/__sa bon hU~M mthing gas mtshan pa bri/__mdun du gtor ma gnyis/__mthar g.yon skor gyis nyer spyod dang /__nye logs ci bde bar bum pa zung dang /__dbu rgyan/__rdor dril sogs 'og tu dgos pa'i dbang rdzas rnams dang /__tshogs kyi yo byad dang /__sngon gtor gyis mtshon nyer mkho thams cad tshang bar bya/__de nas sngon 'gro gtor ma btang ba nas brtsams te/__nang mchod dang gnas yo byin rlabs/__skyabs sems/__tshad med/__rdor sems bsgom bzlas/__bla ma'i rnal 'byor rnams sngon du 'gro bas bdag bskyed bzlas pa dang bcas pa/__bum pa bsgrub pa/__mdun bskyed bsgrub cing mchod bstod kyi bar dkyil chog las 'byung ba bzhin bya'o/__/gnyis pa bdag 'jug dngos gzhi la'ang gsum/__dkyil 'khor du 'jug pa dang /__zhugs nas dbang blang ba/__rjes kyi bya ba'o/__/dang po yab bka'i sdom tshig tu/__khrus byas bgegs bskrad maN+Dal phul/__/gsol gdab chos bshad sdom gnyis bzung /__/me tog dang bcas gdong g.yogs bcing /__/gzhug cing phyag 'tshal me tog dor/__mig phye mthong bstan bcu gnyis so/__/zhes phyi nang gi tha snyad mi byed par 'jug pa ltar/__dang po khrus bya ba ni/__ji ltar bltams pa tsam nas/__shri ye hU~M gi bar brjod cing /__las bum gyi chus bkrus pas sgo gsum dag par bsam/__gnyis pa bgegs bskrad pa ni/__dkyil 'khor gtso bo'i sprul yum bka'i skabs dkyil 'khor gyi gtso mo'i sprul zhes bsgyur/__mchan pa zhal gcig phyag gnyis pa'i sku las skyes pa'i ye shes kyi me dang /__thugs ka'i mtshon cha'i char gyis bskrad par bsams la thun gyis brab/__dril bu drag tu 'khrol zhing /__sum+b+ha sogs kyi sngags brjod/__gsum pa maN+Dal ni rgyas bsdus skabs dang sbyar/__bzhi pa gsol ba gdab pa ni/__rdo rje phag yum bka'i skabs/__rje btsun ma dang dbyer med pa'i sogs/__mchan/__mos mgrin 'khyud pa'i/__/dga' chen khyod bdag ston pa ste/__/slob dpon khyod ni dgongs su gsol/__/byang chub chen po'i tshul ston pa/__/mgon po chen po bdag 'tshal lo/__/dam tshig de nyid bdag la stsol/__/byang chub sems kyang bdag la stsol/__/sangs rgyas chos dang dge 'dun te/__/skyabs gsum dag kyang bdag la stsol/__/thar pa chen po'i grong mchog tu/__/mgon pos bdag ni gzhug tu gsol/__/lan gsum/__lnga pa chos bshad pa ni/__slob dpon gyis chos bshad par bsams la ngag tu/__sdug bsngal chu bo bzhi 'bab cing /__/gting mtha' med pa'i srid mtsho 'dir/__/skyo ba'i sems ni rab bskyed la/__/rnyed dka'i rten mchog gru gzings 'di/__/stong nyid snying rje'i skye bar nas/__/brtson 'grus drag pos drangs byas te/__/bla med thar pa'i gling mchog tu/__/don gnyis nor bu lon par gyis/__/zhes pas thun mong gi chos dang /__/bskal par bsags pa'i mun pa yang /__/nyi zla sgron me la sogs pa'i/_/'od kyi snang ba skad cig mas/__/sel ba ji bzhin thog med nas/__/bsags pa'i sdig sgrib ma lus pa/__/ye shes snang ba skad cig mas/__/sel thabs rdo rje theg pa yi/__/gsang ba las kyang ches gsang ba'i/__/bde mchog mkha' 'gro snyan brgyud kyi/__dbang bskur zab mo sbyin bya yis/__/khyod rnams dga' dang spro bar gyis/__/zhes brjod/__drug pa sdom pa gnyis bzung ba ni/__/bla ma yi dam gtsor bzhugs pa'i/__/sras bcas sangs rgyas thams cad dang /__/dpa' bo rnal 'byor ma tshogs kun/__/thams cad bdag la dgongs su gsol/__/che ge mo rang gi ming brjod zhes bgyi ba bdag__/bla med byang chub ma thob par/__/dkon mchog gsum la bdag skyabs mchi/__/sogs lan gsum gyis thun mong gi sdom pa dang /__bla ma yi dam nas dgongs gsol gyi mthar/__bdag ni rdo rje 'dzin pa yis/__/dus 'di nyid nas bzung nas ni/__/ji srid byang chub snying po'i bar/__/ji ltar dus gsum mgon po rnams/__/zhes sogs lan gsum gyis sngags sdom bzung /__bdun pa me tog dang bcas gdong g.yogs bcing ba ni/__slob dpon gyis me tog gtad cing gdong g.yogs bcing bar bsam/__A khaM wI ra hU~M/__brgyad pa nang du gzhug pa ni/__/dkyil gtso mo'i sprul pa rje btsun ma/_mchan/__'khor gtso bo'i sprul pa he ru ka zhal gcig phyag gnyis pa zhig srung 'khor gyi phyi rol du byon pas rang gi lag nas khrid de rdzu 'phrul gyis skad cig la srung 'khor nang du tshud par gyur/__dzaHhU~M ba~M hoH__zhes brjod cing dgug gzhug gi phyag rgya bya/__dgu pa phyag bya ba ni/__dkyil 'khor gyi shar sgo nas phyag 'tshal bar bsams la/__sangs rgyas thams cad 'dus pa'i sku/__/yid bzhin nor bu gtsug gi rgyan/__/tshogs kyi slob dpon tshogs kyi mchog__/dpal ldan sku la skyabs su mchi/__/de bzhin du lho nas/__'khor ba'i 'khor lo rgyun gcod cing /__/chos kyi 'khor lo skor mdzad pa/__/bde mchog 'khor lo bde ba'i mchog__/dpal ldan sku la skyabs su mchi/__/nub nas/__sangs rgyas thams cad skyed pa'i yum/__/bcom ldan 'das ma rje btsun ma/__/ma gcig rdo rje rnal 'byor ma/__/dpal ldan ma la skyabs su mchi/__/byang nas/__dpa' bo dpa' mo rdo rje yi/__/spyan can chos skyong rdo rje spun/__/ma lus lus pa med pa la/__/phyag 'tshal gus pas skyabs su mchi/__/zhes phyag 'tshal/__bcu pa me tog dor ba ni/__lhag pa'i lha la me tog 'bul bar bsams la/__oM puSh+pe mA la pra tI ts+tsha hoH__zhes phul bas mnyes te me tog gi phreng ba spyi bor bcing zhing /__lha de las gnyis pa zhig bye ste spyi bor thim par bsams la me tog mgo la bzhag cing /__oM puSh+pe mA la sa ma ya hU~M/__zhes brjod/__bcu gcig pa mig dbye ba ni/__slob dpon gyis ma rig pa'i ling tog bsal bar bsam la/__phyag rgya dang bcas mig dar yod na bsal/__he ru rnal 'byor ma mchan ka dpal deng khyod kyi/___/mig 'byed par ni brtson par mdzad/__/rdo rje'i mig ni bla na med/__/phye bas ye shes mthong bar 'gyur/__oM badz+ra ni tra a pa ha ra pa tra laM hrIHtra~M/__zhes brjod/__bcu gnyis pa dkyil 'khor bstan pa ni/__slob dpon gyis/__thar pa chen po'i grong khyer mchog___/ltos shig ltos shig sems dpa' che/__/dkyil 'khor bzang po 'di la ltos/__/me tog gang du lhung gyur pa/__/de ni khyod kyi lhag pa'i lha/__/de la dad pa rab tu bskyed/__/sngags dang phyag rgyas byin gyis brlabs/__/bskal pa bye ba du ma ru/__/sngon du sdig pa byas pa gang /__/dkyil 'khor 'di 'dra mthong ma thag__/de dag zad par 'gyur yin na/__/grags pa mtha' yas sngags spyod pa'i/__/tshul la gnas na smos ci dgos/__/skyob pa'i gsang sngags bzlas na ni/__/go 'phang bla na med par 'gyur/__/bdag nyid chen po khyed rnams kyis/__/rnyed pa mnyam med de ring rnyed/__/de phyir khyed rnams skal ldan gyur/__/dpa' bo rnal 'byor ma rigs skyes/__/dam tshig mchog la gnas par gyis/__/zhes dkyil 'khor bstan cing mthong bar bsam/__gnyis pa zhugs nas dbang blang ba la bzhi las/__/dang po bum dbang la sdom ni/__gsol gdab sgo gsum hU~M du bsgyur/__/lhar bskyed go bgo ye shes dbab/__/dbang bskur nas ni mnga' gsol zhing /__/bum pa'i dbang don sprad dang brgyad/__/ces pa'i dang po spro na maN+Dal phul/__gsol ba gdab pa ni/__mkhyen brtse ye shes lnga yi bdag__/'gro ba'i ded dpon bla ma mchog__/bcom ldan he ru ka rje btsun rdo rje rnal 'byor ma mchan dpal gyis/__/bdag la bum dbang bskur du gsol/__/zhes gsol ba gdab/__gnyis pa sgo gsum hU~M du bsgyur ba ni/__bla ma dkyil 'khor gyi gtso bo yab yum du gsal ba'i thugs ka'i hU~M gi 'od kyis sgo gsum gyi dri ma sbyangs/__'od du zhu hU~M du gyur pa yab kyi zhal du drangs shing zhugs pas thugs kar rjes chags kyi mes 'od du zhu/__bde ba chen po'i rang bzhin thig ler gyur pa gsang gnas nas brgyud de yum gyi mkha' nang du byon pas/__gsum pa lhar bskyed pa ni/__khyed rang bcom ldan 'das 'khor lo sdom pa'i sku grub cing gsal ba ni sku mdog sngon po zhal gcig phyag gnyis rdo rje dang dril bu 'dzin pa yum la 'khyud pa/__khro gnyer g.yo ba'i zhal mche ba gtsigs shing /__zhes pa nas/__gnyis ka'ang ye shes kyi me rab tu 'bar ba'i dbus nas zhugs pa yum gyi rtsibs logs g.yon nas 'phros te dkyil 'khor gyi gtso bo'i mdun du pad nyi 'jigs byed dus mtshan gyi gdan la bzhugs par gyur/__phyag rgya dang bcas/__oM AHhU~M pad+ma ka ma lA ya s+t+waM/__zhes brjod/__bzhi pa go bgo ba ni/__bcom ldan 'das kyi thugs kar zhes dang /__rdo rje phag mo'i lte bar zhes sogs nas/__snang la rang bzhin med par gyur gyi bar sgrub thabs ltar/__lnga pa ye shes dbab pa ni/__bla ma dang dkyil 'khor gyi lha tshogs thams cad kyis bdag la dpal he ru ka dbab par mdzad du gsol/__zhes gsol ba btab pas/__slob dpon gyi thugs ka'i hU~M dang rang lus yi dam du gsal ba'i stong ra'i nang du rtsa dbu ma pad+ma sngon po 'dab brgyad dang /__khams dmar po nyi ma dkar po zla ba'i gdan gyi steng du rang 'dra'i ting nge 'dzin sems dpa' he ru ka tshon gang tsam gsal la dod pa mgar ba'i sol mal nas 'thon pa'i lcags bsreg lta bu las 'od zer phyogs bcur 'phros pas/__phyogs bcu'i bla ma yi dam sangs rgyas byang chub sems dpa' thams cad rang 'dra'i sku dang phyag mtshan yig 'bru me'i rang bzhin 'od zer rab tu 'bar ba'i rnam par spyan drangs pa dang /__dkyil 'khor gyi gtso bo las kyang rang 'dra dpag tu med pa 'phros/__tsheg sgra 'ur sgra dang bcas snying ga'i he ru ka dang lus la thim pas he ru ka mer 'bar ba dang drag tu 'bar zhing rang lus mer 'bar bas mi bzod pa'i bde ba rgyas par bsams la rig pa hur phyung la rol mo drag tu 'khrol zhing /__oM shrI he he ru ru kaM badz+ra dz+nyA na A we sha ya dzaHhU~M ba~M hoH__zhes lan gsum brjod cing spyi bor rdo rje rgya gram du bzhag pa dang bcas oM shrI dz+nyA na he ru ka su pra tiSh+Tha badz+rA ye swA hA/__zhes dang /__drug pa dbang bskur ba ni/__bla ma dang dkyil 'khor gyi lha tshogs thams cad kyis bdag la mngon par dbang bskur du gsol/__zhes gsol ba btab pas/__bla mas dkyil 'khor lha tshogs thams cad kyis mi bskyod pa chu'i rang bzhin gyi bum chus dbang bskur bar bsams te/__rnam rgyal bum pa thogs la/__he ru ka dpal 'khor bcas kyi/__/sku gsung thugs las byung ba yi/__/sgrib gnyis bag chags sbyong byed pa'i/__/rdo rje'i dbang bskur chen po sbyin/__oM badz+ra u da ka a b+hi Shiny+tsa hU~M/__bum chu 'thung gzhug__/zhes gsung zhing bum pa'i chus spyi bo nas dbang bskur bas sgo gsum gyi dri ma thams cad dag__/lus thams cad bdud rtsi'i rgyun gyis gang ste spyi bor 'khyil pa rdo rje 'chang yab yum du gyur nas dbu brgyan par gyur pa'i mos pa mdzod/__des mi bskyod pa chu'i dbang gi go bcad nas/__rin 'byung cod pan gyi dbang ni/__bla ma dkyil 'khor gtso bo'i thugs ka nas rin 'byung gi rang bzhin dbang rdzas dbu rgyan gyi rnam par 'phros te mgo bor bcings par gyur pa'i mos pa mdzod/__sangs rgyas kun gyi dbu rgyan dbang /__/de ring khyod la bskur bar bya/__/sangs rgyas mchog tu bsgrub bya'i phyir/__/dbu rgyan 'di yis mdzes par byos/__oM rat+na mu ku Ta a b+hi Shiny+tsa hU~M/__'od dpag med rdo rje'i dbang ni/__bla ma dkyil 'khor gtso bo'i thugs ka nas 'od dpag med kyi rang bzhin dbang rdzas rdo rje'i rnam par 'phros te lag tu gtad par gyur pa'i mos pa mdzod/__sangs rgyas kun gyi rdo rje'i dbang /__/de ring khyod la bskur bar bya/__/sangs rgyas kun tu rgyal bas bsngags/__/rdo rje 'di ni khyod kyis zungs/__/oM ma hA badz+ra a b+hi Shiny+tsa hU~M/__don yod grub pa dril bu'i dbang ni/__bla ma dkyil 'khor gtso bo'i thugs ka nas don grub kyi rang bzhin dbang rdzas dril bu'i rnam par spros te lag tu gtad par gyur pa'i mos pa mdzod/__'di de sangs rgyas thams cad kyi/__/shes rab dbyings kyi rjes 'gror bshad/__/byang chub mchog tu rgyal bas bzhed/__/khyod kyis kyang ni rtag tu zungs/__oM ma hA gaN+De a b+hi Shiny+tsa hU~M/__rnam snang ming gi dbang ni/__bla ma dkyil 'khor gtso bos phyag g.yas spyi bor bzhag cing g.yon mi 'jigs pa'i phyag rgya dang bcas/__rdor dril spyi bor bsnol la/__/sangs rgyas kun gyi ming gi dbang /__/de ring khyod la bskur bar bya/__/sangs rgyas mchog tu bsgrub bya'i phyir/__/rdo rje'i ming ni khyod kyis zungs/__oM shrI he ru ka gsang mtshan dper na mi bskyod rdo rje nA ma a d+hi pa ti s+t+waM a b+hi Shiny+tsa hU~M/__mi bskyod rdo rje sogs gsang mtshan 'di zhes bya ba'i de bzhin gshegs pa'o/__/brtul zhugs rdo rje sems dpa'i dbang ni/__dkyil 'khor gtso bos/__'di de sangs rgyas thams cad kyi/__/sku gsung thugs kyi ngo bo ste/__/rdo rje sems dpa'i phyag na gnas/__/khyod kyis kyang ni rtag tu zungs/__/lag na rdo rje'i brtul zhugs brtan/__oM sarba ta thA ga ta sid+d+hi badz+ra sa ma ya s+t+waM e Sha d+ha ra yA mi hi hi hi hi hU~M/__zhes sangs rgyas thams cad kyi sku gsung thugs kyi ngo bo rdo rje rtse lnga pa byin pas snying gar rdor sems gsal bar gyur pa'i mos pa mdzod la/__de rnams kyi dbang don gcig char du ngo sprad pa ni/__de ltar dbang thob pas nyon mongs pa lnga ye shes lnga/__'byung ba lnga yum lnga phung po lnga rgyal ba rigs lngar ye nas grub pa la yid ches par gyis shig__/ces brjod/__bdun pa mnga' dbul ba ni/__lcang lo byug rdzas sogs gcig car du sbyin pa'i mos pa mdzod/__tsakli rnams phyogs gcig tu thogs nas byin pa'i mos pa mdzod/__skal ldan khyed rnams lcang lo thor tshugs 'chang /__/byug rdzas byug cing rgyan rnams 'dogs pa dang /__/phyag mtshan 'dzin cing mchod bstod phun tshogs pas/__/yi dam 'khor lo sdom par mnga' gsol lo/__/oM AHhU~M/__zhes brjod/__oM shrI tsakra sam+ba ra sa pa ri wA ra ar+g+haM nas/__shap+da'i bar gyis mchod/__chos dbyings rnam dag ma dang /__dpal ldan sangs rgyas mkha' 'gro ma sogs kyis bstod/__brgyad pa dbang don ngo sprad pa ni/__de ltar bum pa'i dbang thob pas sbyang gzhi lus lha la/__sbyang bya dman par 'dzin pa'i dri ma sbyangs/__sbyong byed bskyed rim bsgom pa la dbang /__sbyangs 'bras mchog gi sprul sku thob par 'gyur ro/_/gnyis pa gsang dbang la gsum gyi dang po spro na maN+Dal dang /__gsol ba gdab pa ni/__he ru ka dpal 'gro ba'i mgon/__/bka' drin mnyam med rje btsun gyis/__/bla med gsang ba'i dbang gis kyang /__/bdag cag smin par mdzad du gsol/__/gnyis pa dbang dngos ni/__bla ma yab yum sbyor mtshams nas/__/A li kA li'i rgyun byung bas/__/rtsa gsum 'khor lo bzhi sogs gang /__/gsal dwangs thogs med lus su gyur par bsam/__/'khor lo sdom pa yab yum gyi/__/gsang ba sku yi dkyil 'khor las/__/byung ba'i byang sems dkar dmar gyis/__/skal ldan khyod la dbang bskur ro/__/oM badz+ra gu h+ya a b+hi Shiny+tsa hU~M/__zhes brjod cing bdud rtsi lce thog tu byin/__gsum pa dbang don ngo sprad pa ni/__de ltar gsang ba'i dbang thob pas sbyang gzhi ngag sngags la/__sbyang bya dman par 'dzin pa'i dri ma sbyangs/__sbyong byed gtum mo bsgom pa la dbang /__sbyangs 'bras chos thams cad brag cha ltar stong par rtogs pas chos sku thob par 'gyur ro/__/gsum pa sher dbang la gsum gyi dang po spro na maN+Dal phul/__gsol ba gdab pa ni/__zag med bde chen la gnas pa'i/__/bcom ldan he ru ka dpal gyi/__/bde chen lhan skyes dbang gis kyang /__/bdag cag smin par mdzad du gsol/__/gnyis pa dbang dngos ni/__gsang sngags bla med don rig pas/__/zas la rme gtsang med pa dang /__/'khor 'das gnyis su mi rtog pa'i/__/dam tshig khyod kyis bsrung nus sam/__/zhes spro ba dris pas lan btab par bsams la/__gsang sngags bla med sogs kyi mthar/__/dam tshig bdag gis bsrung nus so/__/zhes brjod/__rje btsun ma mar me gcig las gnyis mched kyi tshul du byung ba rang dang mnyam par sbyor bas sems 'od gsal du thim par bsam/__sred pa'i 'dod chags spangs nas ni/__/'khor ba'i mtsho las sgrol ba'i thabs/__/zag med dga' bzhi'i dpal skyed pa'i/__/ye shes lha mo 'di bzhes shig__/oM ma hA su kha pra dz+nyA dz+nyA na a b+hi Shiny+tsa hU~M/__kha T+wAM bzung /__gsum pa dbang don ngo sprad pa ni/__de ltar shes rab ye shes kyi dbang thob pas sbyang gzhi sems kyi 'char sgo snang stong zung 'jug la/__sbyang bya thabs dang gnyis su 'dzin pa'i dri ma sbyangs/__sbyong byed pho nya bsgom pa la dbang /__sbyangs 'bras zung 'jug longs sku thob par 'gyur ro/__/bzhi pa tshig dbang la gsum gyi dang po spro na maN+Dal phul/__gsol ba gdab pa ni/__byang chub rdo rjes sangs rgyas la/__/mchod chen ji ltar stsal ba ltar/__/bdag kyang skyob ba'i don slad du/__/nam mkha'i rdo rje deng bdag stsol/__/gnyis pa dbang dngos ni sgo gsum mnyam par bzhag mdzod/__bu de bzhin nyid kyi ye shes ni/__/mchog tu mi 'gyur bdes gang ba/__/bde mchog 'khor lo bde ba'i mchog__/de ni rang gi sems nyid yin/__/ltos shig rang gi sems la ltos/__/rang gi sems la bltas pas na/__/dbang bskur la sogs snang ba rnams/__/gdod nas rang gi sems su gsal/__/gsal tsam nyid nas stong pa ste/__/stong pa nyid rang gsal ba'i phyir/__/snang stong zung 'jug sems kyi don/__/smra bsam brjod med shes par gyis/__/gsum pa dbang don ngo sprad pa ni/__/de ltar tshig dbang thob pas sbyang gzhi sgo gsum dbyer med blo 'das brjod bral/__sbyang bya rtog 'dzin smra brjod kyi dri ma sbyangs/__sbyong byed blo 'das phyag rgya chen po bsgom pa la dbang /__sbyangs 'bras ngo bo nyid sku thob par 'gyur ro/__/gnyis pa mtha' rten la/__brgyud pa smin grol bzlas pa dang /__zhes pa ltar bzhi las/__dang po brgyud pa yid bzhin nor bu'i rjes gnang ni/__nor bu spyi bor bzhag ste/__sprul sku bla ma yid bzhin gyi/__/nor bu rin chen gtsug gi rgyan/__/rdo rje 'chang dang dbyer med pa'i/__/bka' brgyud bla ma'i brgyud pa zungs/__/smon lam yid bzhin nor bu'i rjes gnang ni/__rnam rgyal bum pa thogs la/__mkhyen brtses 'gro ba rjes bzung phyir/__/dkyil 'khor cho ga bzhin bris nas/__/dbang bzhis skal ldan gdul bya rnams/__/smin byed las la brtson par gyis/__/grol lam yid bzhin nor bu'i rjes gnang ni/__ral gri thogs la/__'gro kun 'khor bar 'ching byed pa'i/__/ma rig zhags pa ji snyed pa/__/shes rab ral gris bcad nas kyang /__/rnam grol lam la 'god par gyis/__bzlas pa'i rjes gnang ni/__/bcom ldan bdag gis bzung lags kyis/__/bdag la 'go bar mdzad du gsol/__/de ltar gsol ba btab pa las/__/slob dpon dkyil 'khor gtso bo yi/__thugs ka'i sngags kyi phreng ba las/___/sngags phreng gnyis pa zhal nas 'thon/__/rang gi khar zhugs snying gar ni/__/pad nyi'i steng du hU~M gi mthar/__/g.yon du bskor las 'od 'phros pas/__/phrin las rnam bzhi kun 'grub 'gyur/__/zhes yab yum gnyis kyi snying po nye snying bzlas te phreng ba thogs la/__rin chen thod pa'i bgrang phreng 'dis/__/he ru ka dpal 'khor bcas kyi/__/mkhyen brtse'i ye shes thugs rgyud ni/__/snying po sngags kyis bskul bar gyis/__/zhes dang /__bcom ldan 'di la stsal lags kyis/__/'di la 'go bar mdzad du gsol/__/sngags kyi dngos grub stsal du gsol/__/brtul zhugs brtan par mdzad du gsol/__/gnyis pa lung bstan pa ni/__rdor dril spyi bor bsnol la/__/dkyil 'khor 'dir ni dbang thob pas/__/deng nas rdo rje slob dpon gyi/__/las dang bya ba mtha' dag kun/__/'gro ba'i don du bsgrub pa la/__/dbang zhing ma 'ongs pa yi dus/__/mi bskyod rdo rje zhes bya ba'i/__/de bzhin gshegs par bud med rnams la gshegs mar 'gyur mchan/_'gyur ro kye/__/gsum pa dbugs dbyung ba dang /__bzhi pa gzengs bstod gnyis gcig car du bya ba ni/__zab mo'i dbang ni thob tsam gyis/__/mi mthun phyogs las rab rgyal zhing /__/byang chub chen po'i lam zhugs pas/__/khyod rnams dga' dang spro bar gyis/__/zhes brjod/__gsum pa rjes ni/__gtso bos ji ltar bka' stsal pa/__/de dag thams cad bdag gis bgyid/__/lan gsum/__bdag gi sgo gsum longs spyod bcas/__/deng nas 'dren pa khyed la 'bul/__/nyes ltung dri mas gos gyur na/__/cha yis spyad cing bskyab tu gsol/__/de nas maN+Dal phul lo/__/spyi don gsum pa dkyil 'khor gyi rjes chog ni/__gtor bsngo tshogs mchod skong bshags dang bcas pa song nas/__slar mchod bstod phul/__ting nge 'dzin gyi dbang bzhi zhu ba'i tshe/__dkyil 'khor lha tshogs thams cad kyi spyi bo oM dkar po las/__zhes sogs 'don pa bsgyur la dkyil 'khor lha tshogs las dbang blang /__yig brgya bzla zhing bzod par gsol/__/'dod don gsol ba gdab/__dkyil 'khor tshom bu yin na/__tshom bu'i dkyil 'khor rten dang brten par bcas pa 'od kyi rnam par rang gi thugs kar dzaHhU~M ba~M hoH__tshom bu nas cung zad mgo bor bzhag dkyil 'khor ras bris yin na/__dkyil 'khor ras bris 'di nyid 'byung ba sa chu me rlung gi gnod pas ma zhig gi bar du ye shes pa rnams brtan par bzhugs nas bstan pa dang sems can gyi don rgya chen po mdzad du gsol/__'dir ni gzugs dang lhan cig tu/__/sogs nas/__oM su pra tiSh+Tha badz+rA ya swA hA/__zhes ye shes pa rnams ras bris la bstim/__mchod sbyin gnas 'dir gang lhags pa'i/__/zhes sogs kyis 'jig rten pa rnams rang gnas su song bar bsam zhing bsngo ba smon lam bkra shis kyi tshigs bcad dang bcas pa brjod de las kyi rjes mi mngon par bya'o//___//__! gnyis pa yum bka' lhan cig skyes ma'i bdag 'jug gi khyad par la'ang gsum/__sbyor ba/__dngos gzhi/__rjes so/__/dang po ni/__stegs bu'i dbus su rdul tshon nam ras bris gang rung gi sku tshom bu'i dkyil 'khor rdo ra me ris bskor ba'i chos 'byung gi nang du/__pad+ma 'dab ma bzhi pa'i mthar dur khrod kyis bskor ba'i pad+ma'i lte bar tshom bu dmar po'am/__ba~M yig dmar po 'god/__de'i dbus su bar bdud rtsi'i dkyil 'khor many+dzi'i khar thod pa mtshan ldan du nang mchod bdud rtsi ril bu dang sbyar ba blugs/__de'i khar sin+d+hu ra'i dkyil 'khor maN+Da lar bdud rtsis cung zad brlan par sin+d+hu ra khod snyoms par bkram la pad+ma 'dab brgyad kyi dbus su ba~M yig gis mtshan pa bri/__gzhan mchod gtor sogs yab bka' dang 'dra zhing dbang rdzas bum pa gnyis ma gtogs gzhan dbu rgyan sogs mi dgos/__sngon gtor nas brtsams te bdag bskyed bzlas pa dang bcas pa dang /__bum pa bsgrub pa'i bar yum bka'i dkyil chog bzhin la/__mdun bskyed bsgrub cing mchod pa'i thog mar/__thod pa'i nang du rje btsun rdo rje rnal 'byor ma lhan cig skyes ma skad cig gis gsal la mchod bstod phul/__bzlas pa cung zad bya/__dzaHhU~M ba~M hoH__ye shes pa rang la thim/__dam tshig pa'i thugs ka'i hU~M las 'od zer 'phros pas bdud rtsir zhu bar bsams la/__oM AHhU~M zhes brjod/__de nas 'og tshom bu'i dkyil 'khor gyis sprul sku dang /__bar bdud rtsi'i dkyil 'khor gyis longs sku mtshon pa'i don dran pas/__steng chos sku mtshon pa'i sin+d+hu ra'i dkyil 'khor bsang sbyang sogs mdun bskyed dkyus bzhin bya'o/__/gnyis pa dngos gzhi'i khyad par la/__dang po dkyil 'khor du 'jug pa'i chos bcu gnyis las/__gsol 'debs/__rje btsun ma dang dbyer med pa'i/__dga' chen khyod bdag sogs kha bsgyur bas mtshon gong 'og gi khyad par phra mo rnams mchan bus gsal ba ltar ma gtogs gzhan 'dra/__zhugs nas dbang blang ba'i chos brgyad las/__/gnyis pa sgo gsum ba~M du bsgyur ba ni/__bla ma dang dkyil 'khor gyi gtso bo tha mi dad pa'i thugs ka'i sa bon gyi 'od kyis sgo gsum gyi dri ma sbyangs/__lus 'od kyi gong bu'i rnam pas zhal du drangs/__thugs kar rjes chags kyi mes 'od du zhu/__bde ba chen po'i rang bzhin thig ler gyur pa mkha' nang du lhung bas yi ge ba~M du gyur pa slar yang thugs ka nas spros te pad nyi ro'i gdan la bzhag par bsam/__ba~M zhes rang gi lag pa spyi bor reg__/gsum pa lhar bskyed pa ni/__ba~M yongs su gyur pa las rang nyid rdo rje rnal 'byor ma sogs nas/__ye shes kyi me 'bar ba'i dbus na bzhugs par gyur/__bzhi pa go cha bgo ba ni/__rang gi lte bar oM ba~M phag mo dmar mo sogs nas rang bzhin med par gyur/__lnga pa ye shes dbab pa ni/__de'i spyi bor oM sogs nas/__dzaHhU~M ba~M hoHbar bdag bskyed ltar gsal gdab/__spro na sngags kyi mthar/__badz+ra dz+nyA na A be sha ya A be sha ya dzaHhU~M ba~M ho/__zhes brjod cing Da dril 'khrol/__spyi bor rdo rje rgya gram du bzhag cing /__oM shrI dz+nyA na yo gi nI su pra tiSh+Tha badz+rA ya swA hA/__drug pa dbang bskur ba ni/__bla ma rje btsun rnal 'byor mas/__/bdag la mngon par dbang bskur gsol/__/lan gsum/__rnal 'byor ma dpal 'khor bcas kyi/__sogs nas/__chen po sbyin/__oM sarba ta thA ga ta a b+hi Shiny+tsa sa ma ya shrI hU~M/__zhes gsung zhing rigs lnga 'khor bcas kyis glu dang rol mo 'dod yon sna tshogs pas mchod pa'i ngang nas rin po che'i bum pa bdud rtsis gang bas dbang bskur/__sku gang /__dri ma thams cad dag bdud rtsi'i rgyun yar lud de spyi bor 'khyil pa rnam snang du gyur nas dbu brgyan par bsam/__bdun pa mnga' gsol ba ni/__skal ldan khyed rnams nas/__yi dam rdo rje phag mor mnga' gsol lo/__/oM AHhU~M/__de nas skabs 'dir yum bka'i khyad chos dbang bzhi byin rlabs kyi tshul du blang ba ni rnal 'byor bdag gi sgo gsum la/__/bla ma rje btsun rnal 'byor mas/__/rdo rje'i sku gsung thugs kyis ni/__/byin gyis rlob par mdzad du gsol/__/zhes sam/__yang na/__bla ma dang rje btsun rdo rje rnal 'byor mas bdag gi lus ngag yid gsum cha mnyam dang bcas pa sku gsung thugs ye shes rdo rje'i ngo bor byin gyis brlab tu gsol/__lan gsum/__zhes gsol ba btab pas/__bla ma rdo rje rnal 'byor ma'i spyi bor oM dkar po las 'od zer dkar po dpag tu med pa 'phros/__khyod rang gi spyi bor thim/__sku las kyang sku dpag tu med pa 'phros/__lus la thim pas skye ba dang tshe rabs thams cad du lus kyi sgo nas bsags pa'i sdig sgrib nyes ltung dri ma'i tshogs thams cad byang zhing dag par byas/__sku bum pa'i dbang thob/__lus sku rdo rje'i rang bzhin du byin gyis brlabs/__lam bskyed rim bsgom pa la dbang /__'bras bu sprul sku thob pa'i skal ldan du gyur par bsam/__de bzhin du/__mgrin pa'i AHdmar po las 'od zer dmar po khyed rang gi mgrin par=__zhal nas kyang A li kA li la sogs te sngags kyi phreng ba dpag tu med pa 'phros/__lce la thim=__ngag gi sgo nas=__gsung gsang ba'i=__ngag gsung rdo rje'i=__lam gtum mo=__'bras ngag dang chos sku sbyar ba 'di'i chos skad dmigs bsal bu chos sku=__thugs ka'i hU~M sngon po=__snying gar=__slar yang rdo rje dril bu gri gug thod pa DA ma ru kha T+wAM ga sogs phyag mtshan dpag tu med pa 'phros/__snying gar=__yid kyi=__thugs=__shes rab=__ye shes kyi=__yid=__thugs rdo rje'i=__lam pho nya=__'bras bu longs sku=__slar yang mdun bskyed kyi dkyil 'khor rje btsun rdo rje rnal 'byor ma'i sku las rang 'dra ba'i sku gnyis pa mar me gcig las gnyis mched kyi tshul du bye ste byon pa 'od du zhu nas khyed rang la thim pas skye ba dang tshe rabs thams cad du sgo gsum cha mnyam gyi sgo nas bsags pa'i=__bzhi pa tshig dbang rin po che thob/__sgo gsum sku gsung thugs rdo rje'i=__lam phyag rgya chen po bsgom pa la dbang /__'bras bu ngo bo nyid sku thob pa'i skal ldan du gyur par bsam/__de brtan par bya ba'i phyir/__oM AHhU~M/__zhes g.yon pa'i srin lag gis maN+Dal gyi sin+d+hu ra len pa'i tshul byas la rang gi gnas gsum du reg__/dzaHhU~M ba~M hoH__zhes lag gnyis kyis dkyil 'khor spyi bor len pa'i tshul bya/__spro na/__gsol 'debs kyi tshig phral te so so'i mgor sbyar ba dang /__mtshams rnams su snying po dang nye snying brjod cing spos rol bya/__gsum pa mtha' rten la/__rjes gnang lung bstan dbugs dbyung dang /__/gzengs bstod byin rlabs bdud rtsi bsten/__/smon lam btab dang bdun yin no/__/zhes pas dang po rjes gnang dang /__gnyis pa lung bstan lhan cig tu bya ba ni/__rdor dril spyi bor bsnol la/__dkyil 'khor 'dir ni dbang thob pas/__sogs/__gsum pa dbugs dbyung dang bzhi pa gzengs bstod yab bka' dang 'dra/__lnga pa byin rlabs ni dngos gzhi'i dbang gi skabs su sku gsung thugs kyi byin gyis brlabs pa des 'thus shing /__drug pa gnyis med bdud rtsi bsten pa ni/__dkyil 'khor thod pa'i bdud rtsi g.yon du bzung ba'i kha lag g.yas pas bkab pa'i tshul dang bcas rnal 'byor ma dpal bdud rtsi'i gzugs/__/bdud rtsi rnal 'byor ma rang yin/__/thabs shes gnyis med bdud rtsi 'di/__/gang bsten grol lo bu rnams kyi/__/rtsa brgyud bla ma thams cad kyang /__/gnyis med bdud rtsi bsten pas grol/__/yi dam lha tshogs thams cad kyang /_/gnyis med bdud rtsi=__ma dang mkha' 'gro thams cad kyang /__/gnyis med bdud rtsi=/_chos skyong ma mgon lcam dral yang /__/gnyis med=__rdo rje mched lcam thams cad kyang /____/gnyis med bdud rtsi bsten pas grol/__/de phyir skal ldan khyod rnams kyang /__/rdo rje phag mo zhu ba yi/__/gnyis med bdud rtsi 'di bsten pas/__/grol bar 'gyur ro bu rnams kye/__/zhes brjod cing lce thog tu blangs/__bdun pa 'bral med smon lam gdab pa ni/__bla ma yi dam mkha' 'gro dang /__/chos skyong srung ma rdo rje spun/_/mkhyen brtse ldan pa'i mchod 'os kun/__/bdag la brtse bas dgongs su gsol/__/bdag sogs sems can thams cad ni/__/deng nas byang chub ma thob bar/__/bla ma yi dam mkha' 'gro dang /__/chos skyong srung ma rdo rje spun/__/tshogs zhing dam pa rnams dang ni/_/nam yang mi 'bral 'grogs par shog__/dam chos mkha' 'gro'i gsang tshig dang /___/nam yang=__de ltar gyur pa'i mthu nus kyis/__/brgyud pa'i rnam thar 'khyongs pa dang /__/rgyu dang mi rgyu'i 'gro ba kun/__/bdag gis smin cing grol bar shog___/rjes kyi chos rnams 'dra'o/__/gsum pa dkyil 'khor gyi rjes chog skabs/__gzhan 'dra ba la/__bsdu rim gyi tshe/__'og sprul sku'i dkyil 'khor 'od du zhu nas bar longs sku'i dkyil 'khor dang /__de chos sku'i dkyil 'khor la thim/__de nyid rten dang brten par bcas pa dzaHhU~M ba~M hoH__rang la thim par bsams la/__dbus kyi ba~M yig nas mtheb srin gyi blangs la dpral bar thig le bya'o/__/yab yum gyi dkyil 'khor 'di dag tu slob ma rjes su 'dzin na/__bdag 'jug yan grub nas/__slob ma rnams khrus byas/__bgegs phral/__srung 'khor bsgom/__maN+Dal phul/__rjes lo rgyus ji ltar rigs pa dang /__'jug pa'i chos bcu gnyis pa dkyil 'khor bstan pa'i skabs/__de ltar dkyil 'khor la blta bar bskul zhing spro ba bskyed pa sngon du 'gro bas/__gang la blta ba'i dkyil 'khor ni/__'di na bcom ldan 'das dpal 'khor lo sdom pa lhan cig skyes pa'i dkyil 'khor bzhugs pa yin te/__de'ang nam mkha'i dbyings su chos kyi 'byung gnas kha sbyor gyi nang du pad+ma dang nyi ma'i dkyil 'khor/_de'i dbus su sna tshogs rdo rje sogs bskyed chog dor bas/__/dpa' bo dang mkha' 'gro ma dpag tu med pas gang ba ste/__mdor na rten dang brten par bcas pa thams cad mngon sum bzhin du mthong bar mos te dad gus dang spro ba khyad par can bskyed 'tshal/__zhes pa lta bu rgyas bsdus ji ltar rigs pas brda sprad/__yum bka'i skabs/__'di na dngos grub kun gyi 'byung gnas bla ma rdo rje slob dpon gyi sku rang bzhin lhun gyis grub pa'i dkyil 'khor dang /__des mtshon te mdun gyi 'og tshom bu'i dkyil 'khor gyis sprul sku/__bar bdud rtsi'i dkyil 'khor gyis longs sku/__steng sin+d+hu ra'i dkyil 'khor gyis chos sku mtshon la/__mtshon bya chos kyi sku nyid mtshon byed gzugs kyi rnam par shar ba rje btsun rdo rje rnal 'byor ma lhan cig skyes ma'i ye shes kyi dkyil 'khor bzhugs pa yin te/__de'ang nam mkha'i dbyings su chos kyi 'byung gnas sogs khrid yig gi yum bka' mngon rtogs ltar brda sprad pas mtshon gong 'og kun tu mtshams sbyor gyi khyad par rnams ma 'khrul bar sbyar shes par bya'o/__/zhes pa'ang lam 'di la mkhas shing dngos grub brnyes pa'i dam pa snga ma dag gis mdzad pa'i yab bka' lhan skyes kyi bdag 'jug la/__sbyor ba'i skabs sogs su gsal byed cung zad dang /__yum bka'i khyad par rnams kyang bsnan nas mdor bsdus snying por dril ba'i tshul gyis sbyar ba ste/__dge bas 'gro kun dpal he ru ka'i go 'phang mchog la reg pa'i rgyur gyur cig/__/sarba dA mang+ga laM b+ha ba tu//__// [�]