JKW-KABUM-23-'A-001-064

🚧 This website is under continued development. We appreciate your patience!

Previous Text Back to Volume PageNext Text

རྫོགས་པ་ཆེན་པོ་རང་གྲོལ་རྣམ་ལྔའི་ངོ་སྤྲོད་ཡེ་ཤེས་སྙིང་པོ།

Wylie title	rdzogs pa chen po rang grol rnam lnga'i ngo sprod ye shes snying po
Location	mkhyen brtse'i bka' 'bum Volume 23, sde tshan 1, Text 64, Pages 123-126 (Folios 62a6 to 63b4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rdzogs pa chen po rang grol rnam lnga'i ngo sprod ye shes snying po. In 'jam dbyangs mkhyen brtse'i dbang po'i bka' 'bum, Vol. 23: 123-126. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

Tibetan Text

Wylie

[edit]

རྫོགས་པ་ཆེན་པོ་རང་གྲོལ་རྣམ་ལྔའི་ངོ་སྤྲོད་ཡེ་ཤེས་སྙིང་པོ་ཞེས་བྱ་བ། ན་མོ་ཛྙཱ་ན་གུ་རུ་བྷྱཿ དེ་ལ་སྙིང་ཐག་པ་ནས་མངོན་སུམ་རང་གྲོལ་གྱི་དོན་ལ་མོས་པ་བརྟན་པའི་སྐལ་བཟང་གི་སློབ་མ་གཅིག་གམ། གཉིས་སམ། །གསུམ་ལ་སོགས་པར། ཤིན་ཏུ་དབེན་པའི་ནགས་ཚལ་དུ་ལམ་ཟབ་མོ་བླ་མའི་རྣལ་འབྱོར་གྱི་བྱིན་རླབས་བརྒྱུད་པའི་གསོལ་འདེབས་དབྱངས་དང་བཅས་པ་སྔོན་དུ་འགྲོ་བས་རྡོ་རྗེའི་གླུ་འདི་སྐད་དུ་བླངས་ནས་ངོ་སྤྲོད་བཙན་ཐབས་སུ་གདབ་པར་བྱའོ། །ཨེ་མ་ཧོ། གཞི་གྲོལ་རིག་པའི་ཡེ་ཤེས་ནི། །ལྷུན་གྱིས་གྲུབ་པའི་ཆོས་ཉིད་ཅན། །ཁྱབ་བདག་རྡོ་རྗེ་སེམས་དཔའ་ཡིས། །ཤིན་ཏུ་ཉེ་བའི་སློབ་བུ་རྣམས། །རྡོ་རྗེའི་ཐུགས་སུ་བྱིན་གྱིས་རློབས། །ཕ྄ཊ། ལྟོས་ཤིག་ལྟོས་ཤིག་བདེ་བ་ཆེ། །བལྟས་པས་མཐོང་བ་མེད་ན་ཡང་། །བསམ་གྱིས་མི་ཁྱབ་སྨྲ་བརྗོད་བྲལ། །འདི་ལ་རང་གྲོལ་ལྟ་བ་མཛོད། །ཕ྄ཊ། དེ་ཡི་ངང་དུ་མ་ཡེངས་ཤིང་། །ཆེད་དུ་འཛིན་པའི་དམིགས་གཏད་ནུབ། །བར་མེད་ཁྱབ་བརྡལ་ཆེན་པོར་ཡལ། །འདི་ལ་རང་གྲོལ་སྒོམ་པ་མཛོད། །ཕ྄ཊ། སྣ་ཚོགས་རྟོག་པའི་སྤུ་རིས་ལ། །བཟང་ངན་གྲུབ་བསལ་ཅི་ཤར་ཡང་། །ཐམས་ཅད་ཆོས་དབྱིངས་རོལ་པར་སྦྱོར། །འདི་ལ་རང་གྲོལ་སྤྱོད་པ་མཛོད། །ཕ྄ཊ། གང་ནས་མ་འོངས་གར་མི་འགྲོ། །ཀུན་ཁྱབ་ནམ་མཁའི་སྲོག་ཤིང་ཅན། །ཐ་མལ་ཤེས་པ་རྗེན་པའི་གཤིས། །འདི་ལ་རང་གྲོལ་འབྲས་བུ་མཛོད། །ཕ྄ཊ། སེམས་དང་བྲལ་བའི་རིག་པ་ལ། །ཀ་དག་གཏིང་གསལ་མིག་གིས་ལྟོས། །བློ་དང་བྲལ་བའི་ཡེ་ཤེས་ལ། །གཉིས་འཛིན་མེད་པའི་ངང་དུ་ཞོག །ཕ྄ཊ། ཅེར་གྱིས་གྲོལ་བའི་རིག་གདངས་ལ། །དུས་གསུམ་རྟོག་པ་དབྱིངས་སུ་ཡལ། །ཀུན་གཞི་ལས་འདས་ཆོས་ཀྱི་སྐུར། །བྱར་མེད་བདེ་ཆེན་བཙན་ས་ཟིན། །ཕ྄ཊ། ཨ་ཧོ་ངོ་མཚར་རྡོ་རྗེའི་གླུས། །ཡིད་དཔྱོད་བྲལ་བའི་དགོངས་པ་བསྟན། །འདི་ལས་གཞན་དུ་མ་འདའ་ཞིག །སངས་རྒྱས་ཀུན་གྱི་དམ་ཚིག་གོ །ཕ྄ཊ། ཅེས་ལན་གསུམ་བཏབ་མཐར། ཨ་ཉི་ཤུ་རྩ་གཅིག་བརྩེགས་མར་བརྗོད་ལ། །ཕ྄ཊ། ཅེས་བྱ་བས་མ་མཐོང་བའི་མཐོང་བ་བསྟན། །སློབ་དཔོན་གྱིས་ལུས་གནད་མཉམ་བཞག་དང་། མིག་ནམ་མཁའ་སྤྲིན་བྲལ་ལ་གཏད་ཅིང་། དཔོན་སློབ་གཉིས་ཀ་མཉམ་པར་བཞག་པ་ཡུན་རིང་དུ་བྱས་ལ་དགོངས་པའི་དྲོད་གཏད། སླར་རོལ་མོའི་སྒྲས་ཉམས་དེ་ལས་སད་པར་བྱས་ཏེ། ཆོས་ཐམས་ཅད་ནི་རྨི་ལམ་ལྟ་བུའོ། །སྒྱུ་མ་ལྟ་བུའོ། །ཞེས་བརྗོད་ལ་ཧཱུྃ་ཞེས་ངར་ཆ་དང་བཅས་པ་འདྲེན་ནས་རྗེས་ཐོབ་ཀྱི་ཆོས་ཐམས་ཅད་སྣང་ལ་མ་གྲུབ་པར་ཐག་བཅད། དེ་ནས། ཀྱཻ། སྐལ་ལྡན་རིགས་ཀྱི་བུ། དེ་རིང་ནས་མི་ཕྱེད་པ་ཆོས་སྐུའི་གྲོང་ཁྱེར་མངོན་དུ་མཐོང་བ་ཡིན་པས་ན་ལམ་འདི་ལས་འདའ་བར་མི་བྱའོ། །དགའ་དང་སྤྲོ་བའི་དྲན་པ་ཉེ་བར་བཞག་ནས་རྡོ་རྗེའི་རྣལ་འབྱོར་ལ་བརྩོན་པར་གྱིས་ཤིག །ཅེས་ལན་གསུམ་དུ་བརྗོད་ལ་དབུགས་དབྱུང་ཞིང་། གཟེངས་བསྟོད་དེ། ཤིས་པ་བརྗོད་པས་མངའ་གསོལ་བར་བྱའོ། །ས་མ་ཡ། ངོ་སྤྲོད་ཀྱི་རྡོ་རྗེའི་གླུའི་རིམ་པའོ། ། ༈ འོད་གསལ་རང་བྱུང་གཉུག་མའི་ཕོ་བྲང་དུ། །འོད་གསལ་འགྲོ་འོང་བྲལ་བར་འབྱམས་ཀླས་པའི། །འོད་གསལ་གྲུབ་པའི་དཔའ་བོ་ཧེ་རུ་ཀཿ ཨོ་རྒྱན་འོད་གསལ་གླིང་པ་ལ་གསོལ་བ་འདེབས། །འདིའང་རྨི་ལམ་དུ་སྔགས་སྲུང་མས་བསྐུལ་བར་བརྟེན་ནས་བྲིས་པའོ། །ཀུན་མཁྱེན་བླ་མས། དེ་ཚེ་རང་གཞན་ཐམས་ཅད་ཀྱི་སྤྱོད་ཚུལ། །ཆོས་ལྟར་བཅོས་པའི་གཟུགས་བརྙན་ལ་བལྟས་པས། །སྙིང་ནས་ངེས་འབྱུང་སྐྱོ་ཤས་ཀྱི་ཕོ་ཉས། །ཡིད་ནི་རྩེ་གཅིག་མཉམ་བཞག་ལ་སྨོན་སོང་། ། ༈

[edit]

ngo sprod ye shes snying po/__ rdzogs pa chen po rang grol rnam lnga'i ngo sprod ye shes snying po zhes bya ba/__na mo dz+nyA na gu ru b+h+yaH__de la snying thag pa nas mngon sum rang grol gyi don la mos pa brtan pa'i skal bzang gi slob ma gcig gam/__gnyis sam/__/gsum la sogs par/__shin tu dben pa'i nags tshal du lam zab mo bla ma'i rnal 'byor gyi byin rlabs brgyud pa'i gsol 'debs dbyangs dang bcas pa sngon du 'gro bas rdo rje'i glu 'di skad du blangs nas ngo sprod btsan thabs su gdab par bya'o/__/e ma ho/__gzhi grol rig pa'i ye shes ni/__/lhun gyis grub pa'i chos nyid can/__/khyab bdag rdo rje sems dpa' yis/__/shin tu nye ba'i slob bu rnams/__/rdo rje'i thugs su byin gyis rlobs/__/pha?T/__ltos shig ltos shig bde ba che/__/bltas pas mthong ba med na yang /__/bsam gyis mi khyab smra brjod bral/__/'di la rang grol lta ba mdzod/__/pha?T/__de yi ngang du ma yengs shing /__/ched du 'dzin pa'i dmigs gtad nub/__/bar med khyab brdal chen por yal/__/'di la rang grol sgom pa mdzod/__/pha?T/__sna tshogs rtog pa'i spu ris la/__/bzang ngan grub bsal ci shar yang /__/thams cad chos dbyings rol par sbyor/__/'di la rang grol spyod pa mdzod/__/pha?T/__gang nas ma 'ongs gar mi 'gro/__/kun khyab nam mkha'i srog shing can/__/tha mal shes pa rjen pa'i gshis/__/'di la rang grol 'bras bu mdzod/__/pha?T/__sems dang bral ba'i rig pa la/__/ka dag gting gsal mig gis ltos/__/blo dang bral ba'i ye shes la/__/gnyis 'dzin med pa'i ngang du zhog__/pha?T/__cer gyis grol ba'i rig gdangs la/__/dus gsum rtog pa dbyings su yal/__/kun gzhi las 'das chos kyi skur/__/byar med bde chen btsan sa zin/__/pha?T/__a ho ngo mtshar rdo rje'i glus/__/yid dpyod bral ba'i dgongs pa bstan/__/'di las gzhan du ma 'da' zhig__/sangs rgyas kun gyi dam tshig go__/pha?T/__ces lan gsum btab mthar/__a nyi shu rtsa gcig brtsegs mar brjod la/__/pha?T/__ces bya bas ma mthong ba'i mthong ba bstan/__/slob dpon gyis lus gnad mnyam bzhag dang /__mig nam mkha' sprin bral la gtad cing /__dpon slob gnyis ka mnyam par bzhag pa yun ring du byas la dgongs pa'i drod gtad/__slar rol mo'i sgras nyams de las sad par byas te/__chos thams cad ni rmi lam lta bu'o/__/sgyu ma lta bu'o/__/zhes brjod la hU~M zhes ngar cha dang bcas pa 'dren nas rjes thob kyi chos thams cad snang la ma grub par thag bcad/__de nas/__kyai/__skal ldan rigs kyi bu/__de ring nas mi phyed pa chos sku'i grong khyer mngon du mthong ba yin pas na lam 'di las 'da' bar mi bya'o/__/dga' dang spro ba'i dran pa nye bar bzhag nas rdo rje'i rnal 'byor la brtson par gyis shig__/ces lan gsum du brjod la dbugs dbyung zhing /__gzengs bstod de/__shis pa brjod pas mnga' gsol bar bya'o/__/sa ma ya/__ngo sprod kyi rdo rje'i glu'i rim pa'o/__/_!_'od gsal rang byung gnyug ma'i pho brang du/__/'od gsal 'gro 'ong bral bar 'byams klas pa'i/__/'od gsal grub pa'i dpa' bo he ru kaH__o rgyan 'od gsal gling pa la gsol ba 'debs/__/'di'ang rmi lam du sngags srung mas bskul bar brten nas bris pa'o/__/kun mkhyen bla mas/__de tshe rang gzhan thams cad kyi spyod tshul/__/chos ltar bcos pa'i gzugs brnyan la bltas pas/__/snying nas nges 'byung skyo shas kyi pho nyas/__/yid ni rtse gcig mnyam bzhag la smon song /_/__!