JKW-KABUM-23-'A-001-016

🚧 This website is under continued development. We appreciate your patience!

Previous Text Back to Volume PageNext Text

བདེ་ཆེན་རྡོ་རྗེའི་སྤྱོད་པ་ལ་ལྷག་པར་སྐུལ་བའི་གླུ་བདེ་བ་ཆེན་པོའི་བཞད་སྒྲ།

Wylie title	bde chen rdo rje'i spyod pa la lhag par skul ba'i glu bde ba chen po'i bzhad sgra
Location	mkhyen brtse'i bka' 'bum Volume 23, sde tshan 1, Text 16, Pages 30-32 (Folios 15b6 to 16b4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. bde chen rdo rje'i spyod pa la lhag par skul ba'i glu bde ba chen po'i bzhad sgra. In 'jam dbyangs mkhyen brtse'i dbang po'i bka' 'bum, Vol. 23: 30-32. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

Tibetan Text

Wylie

[edit]

བདེ་ཆེན་རྡོ་རྗེའི་སྤྱོད་པ་ལ་ལྷག་པར་སྐུལ་བའི་གླུ་བདེ་བ་ཆེན་པོའི་བཞད་སྒྲ་ཞེས་བྱ་བ། ངོ་མཚར་དང་ཨ་ཧོ། ཀ་ཡེ་མཚན་ལྡན་རིག་མ་གན་རྐྱལ་གྱི་ཚུལ་དུ། །ཁ་དོག་ལྷོད་འབོལ་ལྡན་པའི་མལ་སྟན་འདིར་བཞུགས་དང་། །ག་ལེར་དྲོ་འཇམ་བརླ་འོག་བརླ་སྟེང་དུ་བླངས་ཏེ། །ང་ཅག་འདོད་ཡོན་མཆོག་གི་དགའ་སྟོན་ལ་སྤྱོད་དོ། །ཅ་རེ་ཟུར་མིག་གསང་གནས་ཕན་ཚུན་དུ་ལྟ་ཞིང་། །ཆ་ག་ཡིད་འཕྲོག་མ་མཆུ་འཇིབས་རེས་དང་བཅས་ཏེ། །ཇ་ཆང་བདུད་རྩིས་མི་མཚོན་ཞལ་ནང་གི་མཆིལ་མ། །ཉ་རྒྱས་ཟླ་བའི་ཟིལ་དངར་ངོམས་མེད་དུ་འཐུང་ངོ་། །ཏ་ན་དཀར་མཛེས་མཁྲེགས་པའི་སྙེ་མ་ལ་རེག་པས། །ཐ་དད་ཆགས་པའི་མེ་ཆེན་དབང་མེད་དུ་སྦར་ཏེ། །ད་གཟོད་རྡོ་རྗེ་པདྨའི་ཐོ་ཕྱི་ལ་དྲུད་སོགས། །ན་མར་འདོད་པའི་སྒྱུ་རྩལ་མིག་འཕྲུལ་ལྟར་བརྩེའོ། །པ་ལ་ཤ་ལྟར་འཇམ་མཉེན་གསང་གནས་གཉིས་སྦྱར་ཚེ། །ཕ་རོལ་ཆགས་བྲལ་རྣམས་ཀྱང་འགོག་པ་ལས་བསླངས་ན། །བ་ལང་སྐྱེ་བོའི་ཚོགས་རྣམས་སྨོས་ཀྱང་ཞིག་ཅི་དགོས། །མ་ལུས་རྒྱལ་བ་རྣམས་ཀྱང་གཟིགས་མོ་ལ་ཕེབས་སོ། །ཙ་མ་ར་ལྟར་དྲེགས་ལྡན་ཐབས་མཆོག་གི་རྡོ་རྗེ། །ཚ་དྲོད་ཆུ་རླབས་འཕྱུར་བའི་པདྨོ་ལ་བསྣུན་ནས། །ཛ་ཧུའི་རྒྱུན་ལྟར་དལ་བུར་ཡང་ཡང་དུ་བསྲུབས་བཞིན། །ཝ་ལེར་བདེ་སྟོང་སེམས་ཀྱི་རང་ཞལ་ལ་ལྟའོ། །ཞ་རེངས་བྲལ་བའི་དབུ་མའི་ཐིག་ལེ་ཡི་ཆར་རྒྱུན། །ཟ་མ་ཏོག་བཞིན་ནོར་བུའི་རྩེ་མོ་རུ་བསྐྱིལ་ནས། །འ་འུར་གྱེན་དུ་དྲངས་ཏེ་རྩ་གནས་སུ་བཀྲམ་པས། །ཡ་མཚན་དཔེ་ཡི་ཡེ་ཤེས་གསེང་ལམ་ལ་ཆས་འགྲོ། །རཱ་མེ་ཤྭ་རཱི་ལ་སོགས་གནས་ཡུལ་དང་དུར་ཁྲོད། །ལ་ལ་ཙམ་མིན་ཐམས་ཅད་ཕུང་ཁམས་ལ་རྫོགས་པས། །ཤ་སྟག་གསང་བ་མཆོག་གི་སྦྱིན་སྲེག་ལ་བརྩོན་ནས། །ས་ལམ་ཨ་བ་དྷཱུ་ཏཱིའི་ཐེམ་སྐས་ལ་འཛེགས་འགྲོ། །ཧ་རིའི་དྲི་བསུང་འཐུལ་བའི་མཚན་ལྡན་གྱི་འདུ་བར། །ཨ་ཧྃ་གསང་བ་ཆེན་པོའི་ཚོགས་འཁོར་ལ་སྤྱོད་བཞིན། །ཧ་ཧའི་རྡོ་རྗེའི་གླུ་གར་སྒྱུ་མ་ཡི་རྩེད་འཇོས། །ཨ་ཏི་ཁྱབ་གདལ་རྟོགས་པའི་དངོས་གྲུབ་ཞིག་ཞུའོ། །ཡུལ་ལ་དགེ་བཅུའི་གཡང་ཆགས་ཡར་ཀླུང་གི་སྨན་ལྗོངས། །གནས་ལ་བཀྲ་ཤིས་བྱིན་ཆགས་ཤེལ་བྲག་གི་ཕུག་པ། །ཧེ་རུ་ཀ་དཔལ་དགྱེས་པའི་ཚོགས་ཁང་གི་འདབས་སུ། །བརྟུལ་ཞུགས་སྤྱོད་པ་ནམ་མཁའི་རྣལ་འབྱོར་གྱིས་བླངས་སོ། ། ༈

[edit]

bde chen rdo rje'i spyod pa la lhag par skul ba'i glu bde ba chen po'i bzhad sgra/ bde chen rdo rje'i spyod pa la lhag par skul ba'i glu bde ba chen po'i bzhad sgra zhes bya ba/__ngo mtshar dang a ho/__ka ye mtshan ldan rig ma gan rkyal gyi tshul du/__/kha dog lhod 'bol ldan pa'i mal stan 'dir bzhugs dang /__/ga ler dro 'jam brla 'og brla steng du blangs te/__/nga cag 'dod yon mchog gi dga' ston la spyod do/__/ca re zur mig gsang gnas phan tshun du lta zhing /__/cha ga yid 'phrog ma mchu 'jibs res dang bcas te/__/ja chang bdud rtsis mi mtshon zhal nang gi mchil ma/__/nya rgyas zla ba'i zil dngar ngoms med du 'thung ngo /__/ta na dkar mdzes mkhregs pa'i snye ma la reg pas/__/tha dad chags pa'i me chen dbang med du sbar te/__/da gzod rdo rje pad+ma'i tho phyi la drud sogs/__/na mar 'dod pa'i sgyu rtsal mig 'phrul ltar brtse'o/__/pa la sha ltar 'jam mnyen gsang gnas gnyis sbyar tshe/__/pha rol chags bral rnams kyang 'gog pa las bslangs na/__/ba lang skye bo'i tshogs rnams smos kyang zhig ci dgos/__/ma lus rgyal ba rnams kyang gzigs mo la phebs so/__/tsa ma ra ltar dregs ldan thabs mchog gi rdo rje/__/tsha drod chu rlabs 'phyur ba'i pad+mo la bsnun nas/__/dza hu'i rgyun ltar dal bur yang yang du bsrubs bzhin/__/wa ler bde stong sems kyi rang zhal la lta'o/__/zha rengs bral ba'i dbu ma'i thig le yi char rgyun/__/za ma tog bzhin nor bu'i rtse mo ru bskyil nas/__/'a 'ur gyen du drangs te rtsa gnas su bkram pas/__/ya mtshan dpe yi ye shes gseng lam la chas 'gro/__/rA me shwa rI la sogs gnas yul dang dur khrod/__/la la tsam min thams cad phung khams la rdzogs pas/__/sha stag gsang ba mchog gi sbyin sreg la brtson nas/__/sa lam a ba d+hU tI'i them skas la 'dzegs 'gro/__/ha ri'i dri bsung 'thul ba'i mtshan ldan gyi 'du bar/__/a ha~M gsang ba chen po'i tshogs 'khor la spyod bzhin/__/ha ha'i rdo rje'i glu gar sgyu ma yi rtsed 'jos/__/a ti khyab gdal rtogs pa'i dngos grub zhig zhu'o/__/yul la dge bcu'i g.yang chags yar klung gi sman ljongs/__/gnas la bkra shis byin chags shel brag gi phug pa/__/he ru ka dpal dgyes pa'i tshogs khang gi 'dabs su/__/brtul zhugs spyod pa nam mkha'i rnal 'byor gyis blangs so/___/__!_