བདེ་ཆེན་རྡོ་རྗེའི་འདོད་ཡོན་ལ་སྐུལ་བའི་གླུ་བདེ་བ་ཆེན་པོའི་དགའ་སྟོན།

🚧 This website is under continued development. We appreciate your patience!

Previous Text Back to Volume PageNext Text

Wylie title	bde chen rdo rje'i 'dod yon la skul ba'i glu bde ba chen po'i dga' ston
Location	mkhyen brtse'i bka' 'bum Volume 23, sde tshan 1, Text 15, Pages 29-30 (Folios 15a3 to 15b6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. bde chen rdo rje'i 'dod yon la skul ba'i glu bde ba chen po'i dga' ston. In 'jam dbyangs mkhyen brtse'i dbang po'i bka' 'bum, Vol. 23: 29-30. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

Tibetan Text

Wylie

[edit]

བདེ་ཆེན་རྡོ་རྗེའི་འདོད་ཡོན་ལ་སྐུལ་བའི་གླུ་བདེ་བ་ཆེན་པོའི་དགའ་སྟོན་ཅེས་བྱ་བ། ཨ་ལ་ལ་ཧོ། གཟུགས་མཛེས་མཐར་ཐུག་ཕྱག་རྒྱའི་བྷ་ག་ལ་བལྟས་པས། །ཅིར་སྣང་དངོས་ཀུན་བདེ་བ་ཆེན་པོ་རུ་ཤར་སོང་། །སྤང་གི་ཨུཏྤལ་ཚོལ་སྒྲུབ་མེད་པ་འདི་དགའ་ཡོ། །ལྡུམ་རའི་མེ་ཏོག་མེལ་ཚེ་མ་དགོས་པས་སྐྱིད་དོ། །སྒྲ་སྙན་མཆོག་གྱུར་ཨ་ཧཾ་རོལ་མོ་ལ་ཉན་པས། །མི་ཤིགས་ནཱ་དའི་དབྱངས་སྙན་མངོན་སུམ་དུ་ཐོས་བྱུང་། །རྔ་དང་རོལ་མོའི་འུར་ཆོམ་མེད་པ་འདི་དགའ་ཡོ། །དུང་དང་གླིང་བུའི་དབུགས་སྐོར་མ་དགོས་པས་སྐྱིད་དོ། །དྲི་མཆོག་པདྨའི་ཟེའུ་འབྲུའི་བསུང་ཞིམ་ལ་བསྣོམས་པས། །ཚོར་བ་ཐམས་ཅད་བདེ་བའི་དགའ་སྟོན་ལ་ལངས་སོང་། །ལྷན་སྐྱེས་ཤུག་པའི་སྤོས་བདུག་མེད་པ་འདི་དགའ་ཡོ། །སྦྱར་བྱུང་རེང་བུའི་སྦར་ཆོག་མ་དགོས་པས་སྐྱིད་དོ། །རོ་མངར་འདོད་པ་རྒྱས་པའི་ཆུ་བཅུད་ལ་མྱངས་པས། །ཟག་མེད་ཏིང་འཛིན་ཚོགས་ཀྱི་བཅུད་ལེན་ལ་སྤྱོད་བྱུང་། །སྡིག་ཟས་ཤ་ཡི་ཡོ་ལང་མེད་པ་འདི་དགའ་ཡོ། །མྱོས་བྱེད་ཆང་གི་འདུ་འགོད་མ་དགོས་པས་སྐྱིད་དོ། །རེག་བྱ་མཚན་ལྡན་རིག་མའི་གསང་ལམ་ལ་སྦྱར་བས། །ལུས་སེམས་བཅུ་དྲུག་དགའ་བའི་གཟི་བྱིན་གྱིས་ཁྱབ་སོང་། །སྡིག་གོས་ལུ་གུའི་ཚར་སློག་མེད་པ་འདི་དགའ་ཡོ། །གཡོ་སྒྱུའི་ཐེར་གྲུགས་རྩོལ་སྒྲུབ་མ་དགོས་པས་སྐྱིད་དོ། །ཆོས་མཆོག་རྡོ་རྗེ་པདྨའི་སྒུལ་སྐྱོད་ཀྱི་བྱེད་པས། །དཔེ་དང་དོན་གྱི་ཡེ་ཤེས་རྩོལ་མེད་དུ་མཚོན་བྱུང་། །རྟོག་བཅས་བསྐྱེད་རིམ་བཟླས་བརྗོད་མེད་པ་འདི་དགའ་ཡོ། །རྟོག་མེད་རྫོགས་རིམ་སེམས་འཛིན་མ་དགོས་པས་སྐྱིད་དོ། །དགའ་ཡོ་སྐྱིད་དོའི་རྒྱངས་གླུ་ཕར་ཕྱིན་གྱི་གྲངས་ལྡན། །བྲག་དཀར་བཀྲ་ཤིས་སྡིང་གི་དབེན་ཁང་དུ་བླངས་པས། །གནས་གསུམ་མཁའ་འགྲོའི་སྙིང་རྩ་དབང་མེད་དུ་བསྒུལ་ནས། །ཉེ་རྒྱུའི་སྤྱོད་མཆོག་གྲུབ་པའི་སྨོན་ལམ་ཞིག་ཞུའོ། ། ༈

[edit]

bde chen rdo rje'i 'dod yon la skul ba'i glu bde ba chen po'i dga' ston/ bde chen rdo rje'i 'dod yon la skul ba'i glu bde ba chen po'i dga' ston ces bya ba/__a la la ho/__gzugs mdzes mthar thug phyag rgya'i b+ha ga la bltas pas/__/cir snang dngos kun bde ba chen po ru shar song /__/spang gi ut+pal tshol sgrub med pa 'di dga' yo/__/ldum ra'i me tog mel tshe ma dgos pas skyid do/__/sgra snyan mchog gyur a haM rol mo la nyan pas/__/mi shigs nA da'i dbyangs snyan mngon sum du thos byung /__/rnga dang rol mo'i 'ur chom med pa 'di dga' yo/__/dung dang gling bu'i dbugs skor ma dgos pas skyid do/__/dri mchog pad+ma'i ze'u 'bru'i bsung zhim la bsnoms pas/__/tshor ba thams cad bde ba'i dga' ston la langs song /__/lhan skyes shug pa'i spos bdug med pa 'di dga' yo/__/sbyar byung reng bu'i sbar chog ma dgos pas skyid do/__/ro mngar 'dod pa rgyas pa'i chu bcud la myangs pas/__/zag med ting 'dzin tshogs kyi bcud len la spyod byung /__/sdig zas sha yi yo lang med pa 'di dga' yo/__/myos byed chang gi 'du 'god ma dgos pas skyid do/__/reg bya mtshan ldan rig ma'i gsang lam la sbyar bas/__/lus sems bcu drug dga' ba'i gzi byin gyis khyab song /__/sdig gos lu gu'i tshar slog med pa 'di dga' yo/__/g.yo sgyu'i ther grugs rtsol sgrub ma dgos pas skyid do/__/chos mchog rdo rje pad+ma'i sgul skyod kyi byed pas/__/dpe dang don gyi ye shes rtsol med du mtshon byung /__/rtog bcas bskyed rim bzlas brjod med pa 'di dga' yo/__/rtog med rdzogs rim sems 'dzin ma dgos pas skyid do/__/dga' yo skyid do'i rgyangs glu phar phyin gyi grangs ldan/__/brag dkar bkra shis sding gi dben khang du blangs pas/__/gnas gsum mkha' 'gro'i snying rtsa dbang med du bsgul nas/__/nye rgyu'i spyod mchog grub pa'i smon lam zhig zhu'o/___/__!_