JKW-KABUM-22-ZA-012-039

🚧 This website is under continued development. We appreciate your patience!

Previous Text Back to Volume PageNext Text

པཎ་ཆེན་དྲི་མེད་བཤེས་གཉེན་དང་ཀུན་མཁྱེན་ཆོས་ཀྱི་རྒྱལ་པོ་གཉིས་སུ་མེད་པར་བསྔགས་པའི་རྡོ་རྗེའི་ཐོལ་གླུ་དད་པའི་ཏམྦུ་ར།

Wylie title	paN chen dri med bshes gnyen dang kun mkhyen chos kyi rgyal po gnyis su med par bsngags pa'i rdo rje'i thol glu dad pa'i tam+bu ra
Location	mkhyen brtse'i bka' 'bum Volume 22, sde tshan 12, Text 39, Pages 479-481 (Folios 68a4 to 69a5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. paN chen dri med bshes gnyen dang kun mkhyen chos kyi rgyal po gnyis su med par bsngags pa'i rdo rje'i thol glu dad pa'i tam+bu ra. In 'jam dbyangs mkhyen brtse'i dbang po'i bka' 'bum, Vol. 22: 479-481. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu
Colophon	།ཞེས་པའང་ལྷོ་མོན་ནགས་མའི་ལྗོངས་ཀྱི་ནུབ་ཕྱོགས་ལྷ་ལུང་ཐེག་མཆོག་རབ་རྒྱས་གླིང་དུ་ཀུན་མཁྱེན་ཆེན་པོ་དེ་ཉིད་ཀྱི་དབུ་ཀླད་རིང་བསྲེལ་གྱི་ཕུང་པོ་ངོ་མཚར་ཟད་མི་ཤེས་པ་མངོན་སུམ་འདྲེན་བྱེད་བདུད་རྩིར་ལོངས་སྤྱད་པའི་རྗེས་ཐོག་ཏུ་དད་གདུང་ཆེར་འབར་ཏེ་བརྗོད་པ་འགྲོ་ཀུན་ཀ་དག་དང་ལྷུན་གྲུབ་ཟུང་དུ་འཇུག་པའི་ནང་དབྱིངས་ཆེན་པོར་སྐད་ཅིག་ལ་གྲོལ་བའི་རྒྱུར་གྱུར་ཅིག།
	zhes pa'ang lho mon nags ma'i ljongs kyi nub phyogs lha lung theg mchog rab rgyas gling du kun mkhyen chen po de nyid kyi dbu klad ring bsrel gyi phung po ngo mtshar zad mi shes pa mngon sum 'dren byed bdud rtsir longs spyad pa'i rjes thog tu dad gdung cher 'bar te brjod pa 'gro kun ka dag dang lhun grub zung du 'jug pa'i nang dbyings chen por skad cig la grol ba'i rgyur gyur cig

1 Texts in this Section (sde tshan or chos tshan)

39 479-481	པཎ་ཆེན་དྲི་མེད་བཤེས་གཉེན་དང་ཀུན་མཁྱེན་ཆོས་ཀྱི་རྒྱལ་པོ་གཉིས་སུ་མེད་པར་བསྔགས་པའི་རྡོ་རྗེའི་ཐོལ་གླུ་དད་པའི་ཏམྦུ་ར། paN chen dri med bshes gnyen dang kun mkhyen chos kyi rgyal po gnyis su med par bsngags pa'i rdo rje'i thol glu dad pa'i tam+bu ra Vajra Songs - rdo rje'i glu	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

པཎྜི་ཏ་ཆེན་པོ་དྲི་མེད་བཤེས་གཉེན་དང་ཀུན་མཁྱེན་ཆོས་ཀྱི་རྒྱལ་པོ་གཉིས་སུ་མེད་པར་བསྔགས་པའི་རྡོ་རྗེའི་ཐོལ་གླུ་དད་པའི་ཏམྦུར་ཞེས་བྱ་བ། ཨ་ཧོ། ཀ་དག་ལྷུན་གྲུབ་དབྱེར་མེད་ཀྱི་གྲོང་དུ། །ཟུང་འཇུག་གྲུབ་པའི་ངལ་གསོལ་རོ་ལ་ཀྱང་། །འཕོ་ཆེན་འཇའ་ལུས་རྡོ་རྗེ་རུ་བཞེངས་པའི། །པཎ་ཆེན་དྲི་མེད་བཤེས་གཉེན་ལ་འདུད་དོ། །གང་གི་ཡེ་ཤེས་ཆེན་པོ་ཡི་སྒྱུ་འཕྲུལ། །ཚུར་མཐོང་གདན་གསུམ་རྩེ་དགའ་རུ་ཆགས་པས། །སྙིང་པོའི་བསྟན་པའི་ཤིང་རྟ་རུ་སྣང་བའི། །ཀུན་མཁྱེན་ཆོས་ཀྱི་རྒྱལ་པོ་ལ་འདུད་དོ། །རྨད་བྱུང་ཟག་བྲལ་ཚུལ་ཁྲིམས་ཀྱི་ལང་ཚོར། །རིག་གྲོལ་སྤོབས་པའི་འཇོ་སྒེག་གིས་འཁྱུད་པས། །ཟབ་ཅིང་རྒྱ་ཆེའི་བློ་གྲོས་ཀྱི་མཚར་སྡུག །དཔྱོད་ལྡན་ཀུན་ཡིད་འཕྲོག་པ་ལ་འདུད་དོ། །ང༷ག་གི༷་དཔལ་གྱུར་འཇམ་མགོན་གྱི་ཞབས་སེན། །སྙིང་དབུས་མི་ཤིགས་དགའ་ཚལ་དུ་བཀོད་པས། །ཤེས་བྱའི་གནས་ཀུན་ཐོགས་མེད་དུ་གཟིགས་པའི། །ངོ་མཚར་གྲུབ་པའི་དབ༷ང་པོ༷་ལ་འདུད་དོ། །དྲི་བྲལ་དབྱིངས་རིག་དབྱེར་མེད་ཀྱི་ཆོ༷ས་ཉི༷ད། །འོད་གསལ་འཇའ་ཟེར་ཐིག་ལེ་ཡི་གར་མཁན། །ཡིད་དཔྱོད་དང་བྲལ་མངོ༷ན་སུ༷མ་དུ་གཟིགས་པས། །མཐའ་གཉིས་འཕྲང་ལས་བརྒལ་བ་ལ་འདུད་དོ། །འཁྲུལ་ཆོས་ལས་འདས་སྣང་ཉ༷མས་ཀྱི་རོལ་མོ། །གོ༷ང་འཕེ༷ལ་དབྱིངས་ཀྱི་བཀོད་པ་ལ་སྦྱར་བས། །སྣ་ཚོགས་ཡུལ་གྱི་རྒྱུ་བ་ཀུན་མ་ལུས། །གང་ཤར་རང་སར་གྲོལ་བ་ལ་འདུད་དོ། །གཞི་འཛིན་ལྷག་མཐོང་ཡུལ་སྣང་གི་རི༷ག་པ༷། །དབྱེར་མེད་དག་པ་ཚ༷ད་ཕེ༷བས་ཀྱི་ནམ་མཁར། །བློས་བྱས་འཛིན་རྩོལ་སྤྲིན་ཚོགས་ཀུན་དེངས་པའི། །རྡོ་རྗེའི་རྣལ་འབྱོར་གྲུབ་པ་ལ་འདུད་དོ། །ཤིན་ཏུ་ཕྲ་བ་ཆོ༷ས་ཉི༷ད་ཀྱི་ཀློང་དུ། །སྤང་གཉེན་བསལ་བཞག་མཚན་མ་ཀུན་ཟ༷ད་པ༷ས། །བདེ་ཆེན་མཆོག་ཏུ་མི་འགྱུར་བའི་ཡེ་ཤེས། །རབ་འབྱམས་རྒྱལ་ཀུན་ངོ་བོ་ལ་འདུད་དོ། །རྟག་པར་གཞན་ཕན་སྙིང་རྗེ་ཡིས་དྲངས་པས། །བསམ་ཡས་སྤྲུལ་པའི་ཕྲིན་ལས་དང་སྦྲགས་ནས། །འགྲོ་ཁམས་རྒྱ་མཚོ་ཐར་པ་ལ་སྦྱོར་བའི། །ཡོན་ཏན་ཕ་མཐའ་ཡས་པ་ལ་འདུད་དོ། །རང་སྣང་རྡུལ་བྲལ་འོག་མིན་གྱི་ཞིང་དུ། །ཁ་སྦྱོར་རྡོ་རྗེའི་མཚན་དཔེ་ཡི་གཟི་བརྗིད། །ཡན་ལག་བདུན་ལྡན་ཆེན་པོ་རུ་འབར་བའི། །ལོངས་སྤྱོད་ཡོངས་རྫོགས་འཁོར་ལོ་ལ་འདུད་དོ། །གཞི་ལས་འཕགས་པའི་གཞི་སྣང་གི་ཕྱག་རྒྱར། །ཀློང་ཡངས་ནང་གསལ་ཟུང་འཇུག་གི་སྣང་བས། །དྲི་བཅས་འཁྲུལ་པའི་མུན་པ་ཀུན་ཟོས་པས། །འཕོ་མེད་ཁྱད་ཆོས་དྲུག་ལྡན་ལ་འདུད་དོ། །དེ་སྐད་མགྲིན་པ་ལོངས་སྤྱོད་ཀྱི་རྒྱུད་མངས། །གང་ཤར་བསྔགས་པའི་སོར་མོ་ཡིས་བསྐུལ་བས། །རང་སྣང་པདྨ་དྲྭ་བ་ཡི་གླིང་དུ། །མཆོག་དངོས་གྲུབ་པའི་སྨོན་ལམ་ཞིག་ཞུའོ། །ཞེས་པའང་ལྷོ་མོན་ནགས་མའི་ལྗོངས་ཀྱི་ནུབ་ཕྱོགས་ལྷ་ལུང་ཐེག་མཆོག་རབ་རྒྱས་གླིང་དུ་ཀུན་མཁྱེན་ཆེན་པོ་དེ་ཉིད་ཀྱི་དབུ་ཀླད་རིང་བསྲེལ་གྱི་ཕུང་པོ་ངོ་མཚར་ཟད་མི་ཤེས་པ་མངོན་སུམ་འདྲེན་བྱེད་བདུད་རྩིར་ལོངས་སྤྱད་པའི་རྗེས་ཐོག་ཏུ་དད་གདུང་ཆེར་འབར་ཏེ་བརྗོད་པ་འགྲོ་ཀུན་ཀ་དག་དང་ལྷུན་གྲུབ་ཟུང་དུ་འཇུག་པའི་ནང་དབྱིངས་ཆེན་པོར་སྐད་ཅིག་ལ་གྲོལ་བའི་རྒྱུར་གྱུར་ཅིག། །། ༈

[edit]

paN chen dri med bshes gnyen dang kun mkhyen chos kyi rgyal po gnyis su med par bsngags pa'i rdo rje'i thol glu dad pa'i tam+bu ra/__ paN+Di ta chen po dri med bshes gnyen dang kun mkhyen chos kyi rgyal po gnyis su med par bsngags pa'i rdo rje'i thol glu dad pa'i tam+bur zhes bya ba/__a ho/__ka dag lhun grub dbyer med kyi grong du/__/zung 'jug grub pa'i ngal gsol ro la kyang /__/'pho chen 'ja' lus rdo rje ru bzhengs pa'i/__/paN chen dri med bshes gnyen la 'dud do/__/gang gi ye shes chen po yi sgyu 'phrul/__/tshur mthong gdan gsum rtse dga' ru chags pas/__/snying po'i bstan pa'i shing rta ru snang ba'i/__/kun mkhyen chos kyi rgyal po la 'dud do/__/rmad byung zag bral tshul khrims kyi lang tshor/__/rig grol spobs pa'i 'jo sgeg gis 'khyud pas/__/zab cing rgya che'i blo gros kyi mtshar sdug__/dpyod ldan kun yid 'phrog pa la 'dud do/__/ngaXg giX dpal gyur 'jam mgon gyi zhabs sen/__/snying dbus mi shigs dga' tshal du bkod pas/__/shes bya'i gnas kun thogs med du gzigs pa'i/__/ngo mtshar grub pa'i dbaXng poX la 'dud do/__/dri bral dbyings rig dbyer med kyi choXs nyiXd/__/'od gsal 'ja' zer thig le yi gar mkhan/__/yid dpyod dang bral mngoXn suXm du gzigs pas/__/mtha' gnyis 'phrang las brgal ba la 'dud do/__/'khrul chos las 'das snang nyaXms kyi rol mo/__/goXng 'pheXl dbyings kyi bkod pa la sbyar bas/__/sna tshogs yul gyi rgyu ba kun ma lus/__/gang shar rang sar grol ba la 'dud do/__/gzhi 'dzin lhag mthong yul snang gi riXg paX/__/dbyer med dag pa tshaXd pheXbs kyi nam mkhar/__/blos byas 'dzin rtsol sprin tshogs kun dengs pa'i/__/rdo rje'i rnal 'byor grub pa la 'dud do/__/shin tu phra ba choXs nyiXd kyi klong du/__/spang gnyen bsal bzhag mtshan ma kun zaXd paXs/__/bde chen mchog tu mi 'gyur ba'i ye shes/__/rab 'byams rgyal kun ngo bo la 'dud do/__/rtag par gzhan phan snying rje yis drangs pas/__/bsam yas sprul pa'i phrin las dang sbrags nas/__/'gro khams rgya mtsho thar pa la sbyor ba'i/__/yon tan pha mtha' yas pa la 'dud do/__/rang snang rdul bral 'og min gyi zhing du/__/kha sbyor rdo rje'i mtshan dpe yi gzi brjid/__/yan lag bdun ldan chen po ru 'bar ba'i/__/longs spyod yongs rdzogs 'khor lo la 'dud do/__/gzhi las 'phags pa'i gzhi snang gi phyag rgyar/__/klong yangs nang gsal zung 'jug gi snang bas/__/dri bcas 'khrul pa'i mun pa kun zos pas/__/'pho med khyad chos drug ldan la 'dud do/__/de skad mgrin pa longs spyod kyi rgyud mangs/__/gang shar bsngags pa'i sor mo yis bskul bas/__/rang snang pad+ma drwa ba yi gling du/__/mchog dngos grub pa'i smon lam zhig zhu'o/__/zhes pa'ang lho mon nags ma'i ljongs kyi nub phyogs lha lung theg mchog rab rgyas gling du kun mkhyen chen po de nyid kyi dbu klad ring bsrel gyi phung po ngo mtshar zad mi shes pa mngon sum 'dren byed bdud rtsir longs spyad pa'i rjes thog tu dad gdung cher 'bar te brjod pa 'gro kun ka dag dang lhun grub zung du 'jug pa'i nang dbyings chen por skad cig la grol ba'i rgyur gyur cig/__//__!_