JKW-KABUM-22-ZA-012-004

Previous Text Back to Volume PageNext Text

Wylie title
Location	mkhyen brtse'i bka' 'bum Volume 22, sde tshan 12, Text 4, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 22: . Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

1 Texts in this Section (sde tshan or chos tshan)

4 359-361	གཉུག་མར་གནས་པ་དང་གློ་བུར་ལྷག་པའི་འབྱུང་པོ་ཀུན་ལ་གཏམ་དུ་བྱ་བའི་རྡོ་རྗེའི་ཐོལ་གླུ་ཧེ་རུ་ཀའི་ཞལ་ལུང་། gnyug mar gnas pa dang glo bur lhag pa'i 'byung po kun la gtam du bya ba'i rdo rje'i thol glu he ru ka'i zhal lung Vajra Songs - rdo rje'i glu	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

གཉུག་མར་གནས་པ་དང་གློ་བུར་ལྷག་པའི་འབྱུང་པོ་ཀུན་ལ་གཏམ་དུ་བྱ་བའི་རྡོ་རྗེའི་ཐོལ་གླུ་ཧེ་རུ་ཀའི་ཞལ་ལུང་། གཉུག་མར་གནས་པ་དང་གློ་བུར་ལྷགས་པའི་འབྱུང་པོ་ཀུན་ལ་གཏམ་དུ་བྱ་བའི་རྡོ་རྗེའི་ཐོལ་གླུ་ཧེ་རུ་ཀའི་ཞལ་ལུང་ཞེས་བྱ་བ། ཨ་ཧོ། ཆོས་ཅན་གྱི་སྣང་བ་ཐམས་ཅད་ཀུན། །ཆོས་ཉིད་ཀྱི་ཀློང་དུ་རང་གྲོལ་བ། །སྐུ་གསུམ་པོ་དབྱེར་མེད་ཐིག་ལེའི་གཟུགས། །དཔལ་ཁྱབ་བདག་ཐོག་མའི་མགོན་པོར་འདུད། །ཁྱེད་སྣང་ཞིང་སྲིད་པའི་འབྱུང་པོ་ཀུན། །འཁྲུལ་པ་ལ་བདག་ཏུ་བཟུང་བའི་མཐུས། །ཉིང་འཁྲུལ་གྱི་ཟློས་གར་རྒྱུན་ཆད་མེད། །གཞན་དག་ལ་གནོད་འཚེའི་བསམ་སྦྱོར་འཆང་། །ང་འོད་གསལ་སེམས་ཀྱི་རྡོ་རྗེ་ལས། །ཟུང་འཇུག་གི་ལྷ་སྐུ་ཀཱི་ལ་ཡཿ གདན་གསུམ་གྱི་ཕྱག་རྒྱའི་མངོན་རྟོགས་ཅན། །སྙིང་རྗེ་ཡི་རང་རྩལ་འབར་བས་བཞེངས། །སྒྲར་གྲགས་ཀུན་སྔགས་ཀྱི་རོལ་མོ་ལས། །ཐ་མལ་གྱི་འཇུག་ལྡངས་བྲལ་བ་ཡིས། །ཁམས་གསུམ་གྱི་དྲེགས་པ་ཐམས་ཅད་ཀུན། །དབང་མེད་དུ་འདར་ཞིང་འདུད་པར་བྱེད། །དོན་རིག་སྟོང་གདོད་ནས་དག་པའི་ཆོས། །སྙིང་དབུས་ཀྱི་དྷུ་ཏིར་སྦས་པའི་རླབས། །བསལ་བཞག་དང་བྲལ་བར་བསྐྱངས་པ་ཡིས། །རེ་དོགས་ཀྱི་འགྱུ་འཕྲོ་སྤྲིན་བཞིན་དེངས། །སྣ་ཚོགས་ཀྱི་ཆོ་འཕྲུལ་ཅིར་སྣང་ཡང་། །སྤང་བླང་གི་དངོས་པོ་རྡུལ་ཙམ་མེད། །ཐམས་ཅད་ཀྱི་ཆོས་ཉིད་ཁྱབ་གདལ་ཀློང་། །བྲལ་ཐོབ་ལས་འདས་པའི་གདངས་སུ་སྨིན། །དོན་དེ་ཕྱིར་སྟོང་ཉིད་སྙིང་རྗེ་གཉིས། །མཉམ་རྗེས་ཀྱི་རིམ་པར་འཆར་བ་ཡི། །གཏད་མེད་ཀྱི་རྣལ་འབྱོར་གཞོན་ནུ་ཡིས། །ཕྱག་རྒྱ་དེས་བརྟན་གཡོ་ཐམས་ཅད་བཏབ། །དམ་ཚིག་གི་གནས་ནི་འདའ་དཀའ་བ། །རྡོ་རྗེ་ལྟར་མི་ཕྱེད་སྙིང་པོ་ཅན། །ནང་དབྱིངས་སུ་འབར་བའི་དྲྭ་བ་ཡིས། །དུས་གསུམ་དུ་བསྡོམ་པར་གདོན་མི་ཟ། །ཨ་ཧོ་ངེས་པའི་གླུ་འདི་ཉོན། །རང་གཞན་ལ་འཚེ་བའི་རྣམ་འགྱུར་སྤང་། །སྨོན་འཇུག་གི་བྱང་ཆུབ་སེམས་བསྐྱེད་ནས། །འཕྲལ་ཡུན་དུ་དགེ་བའི་དཔལ་ཐོབ་མཛོད། །འདི་ཉིད་ལས་བྱུང་བའི་དགེ་ཚོགས་ཀུན། །འཁོར་གསུམ་ལས་འདས་པ་དབུ་མའི་ཀློང་། །འཕོ་འགྱུར་དང་བྲལ་བར་རོ་གཅིག་པས། །གདོད་མ་ཡི་གཏན་སྲིད་ཟིན་པར་ཤོག །ཅེས་པའང་དགོས་པ་འགའ་ཞིག་གི་ཆེད་དུ་སྨྲས་པའོ།། །། ༈

[edit]

gnyug mar gnas pa dang glo bur lhag pa'i 'byung po kun la gtam du bya ba'i rdo rje'i thol glu he ru ka'i zhal lung /__ gnyug mar gnas pa dang glo bur lhags pa'i 'byung po kun la gtam du bya ba'i rdo rje'i thol glu he ru ka'i zhal lung zhes bya ba/__a ho/__chos can gyi snang ba thams cad kun/__/chos nyid kyi klong du rang grol ba/__/sku gsum po dbyer med thig le'i gzugs/__/dpal khyab bdag thog ma'i mgon por 'dud/__/khyed snang zhing srid pa'i 'byung po kun/__/'khrul pa la bdag tu bzung ba'i mthus/__/nying 'khrul gyi zlos gar rgyun chad med/__/gzhan dag la gnod 'tshe'i bsam sbyor 'chang /__/nga 'od gsal sems kyi rdo rje las/__/zung 'jug gi lha sku kI la yaH__gdan gsum gyi phyag rgya'i mngon rtogs can/__/snying rje yi rang rtsal 'bar bas bzhengs/__/sgrar grags kun sngags kyi rol mo las/__/tha mal gyi 'jug ldangs bral ba yis/__/khams gsum gyi dregs pa thams cad kun/__/dbang med du 'dar zhing 'dud par byed/__/don rig stong gdod nas dag pa'i chos/__/snying dbus kyi d+hu tir sbas pa'i rlabs/__/bsal bzhag dang bral bar bskyangs pa yis/__/re dogs kyi 'gyu 'phro sprin bzhin dengs/__/sna tshogs kyi cho 'phrul cir snang yang /__/spang blang gi dngos po rdul tsam med/__/thams cad kyi chos nyid khyab gdal klong /__/bral thob las 'das pa'i gdangs su smin/__/don de phyir stong nyid snying rje gnyis/__/mnyam rjes kyi rim par 'char ba yi/__/gtad med kyi rnal 'byor gzhon nu yis/__/phyag rgya des brtan g.yo thams cad btab/__/dam tshig gi gnas ni 'da' dka' ba/__/rdo rje ltar mi phyed snying po can/__/nang dbyings su 'bar ba'i drwa ba yis/__/dus gsum du bsdom par gdon mi za/__/a ho nges pa'i glu 'di nyon/__/rang gzhan la 'tshe ba'i rnam 'gyur spang /__/smon 'jug gi byang chub sems bskyed nas/__/'phral yun du dge ba'i dpal thob mdzod/__/'di nyid las byung ba'i dge tshogs kun/__/'khor gsum las 'das pa dbu ma'i klong /__/'pho 'gyur dang bral bar ro gcig pas/__/gdod ma yi gtan srid zin par shog__/ces pa'ang dgos pa 'ga' zhig gi ched du smras pa'o//____//__!