JKW-KABUM-21-ZHA-001-014

🚧 This website is under continued development. We appreciate your patience!

Previous Text Back to Volume PageNext Text

ཐབ་ལྷ་བསྟོད་པ།

Wylie title	thab lha bstod pa
Location	mkhyen brtse'i bka' 'bum Volume 21, sde tshan 1, Text 14, Pages 50-55 (Folios 25b6 to 28a3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. thab lha bstod pa. In 'jam dbyangs mkhyen brtse'i dbang po'i bka' 'bum, Vol. 21: 50-55. Khams sde dge rdzong sar dgon: Rdzong sar blo gros phun tshogs, 2020.
Genre	Verses of Praise - bstod pa

1 Texts in this Section (sde tshan or chos tshan)

14 50-55	ཐབ་ལྷ་བསྟོད་པ། thab lha bstod pa Verses of Praise - bstod pa	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

ཐབ་ལྷ་བསྟོད་པ་བཞུགས་སོ། །རྩ་བ་གསུམ་ལ་ཕྱག་འཚལ་ལོ། །ཐབ་ལྷ་བསྟོད་པར་འདོད་པས། ཐབ་དང་ཉེ་སྐོར་ཐམས་ཅད་ཕྱག་དར་ལེགས་པར་བྱ། ཐབ་ལ་སྣུམ་བྱུག་ཅིང་ཟས་དཀར་གསུམ་གཡོ། ཐབ་ཀྱི་མདོར་བསང་དུད་ཟས་སྣ་དང་སྦྱར། བསང་མཆོད་རྒྱས་པའམ་ཁྱིམ་ལྷ་བསྟོད་པ་དང་འབྲེལ་ན་ལེགས། གང་ལྟར་ཡང་ཁྲུས་བྱ་བ་ནི། ཇི་ལྟར་བདེ་གཤེགས་བལྟམས་པའི་ཚེ། །ཚངས་པ་ལྷ་ཡིས་ཁྲུས་གསོལ་ལྟར། །ཡེ་ཤེས་བདུད་རྩི་དྲི་མེད་ཆུས། །ཐབ་ཀྱི་ལྷ་ལ་ཁྲུས་གསོལ་ལོ། །དམེ་མནོལ་ཐབ་གཞོབ་མི་གཙང་གིས། །ཐབ་ལྷ་ཟས་ལྷ་ཐམས་ཅད་ལ། །ཉམས་གྲིབ་ཕོག་པ་དག་གྱུར་ཅིག །ཟག་མེད་བདེ་བས་དགྱེས་པར་ཤོག །ཨོཾ་ཤུདྡྷེ་ཤུདྡྷེ་ཤཱ་དྷ་ན་ཡེ་སརྦ་ཤཱིནྟཾ་ཀུ་རུ་སྭཱ་ཧཱ། ཞེས་དང་ཁྲུས་སྔགས་ཇི་ལྟར་རིགས་པ་བཟླ་ཞིང་ཁྲུས་ཆུ་འཐོར། ཐབ་བསང་ལ་ཆབ་བྲན། ཀྱེ། ཐབ་ལྷ་བསྟོད་པ་གར་སྲིད་ན། །སྔོན་ཚེ་བསྐལ་པ་དང་པོའི་དུས། །རྒྱལ་པོ་གསེར་གྱི་ཤིང་རྟ་ཡིས། །མཐུ་རྩལ་ནུས་ལྡན་རིག་སྔགས་འཆང་། །ཞི་བའི་སྙིང་པོ་སྤྱན་དྲངས་ནས། །ཐབ་ལྷ་སྔགས་དང་ཕྱག་རྒྱས་བཀུགས། །མཆོད་ཅིང་གསོལ་བས་མཉེས་པར་མཛད། །དམ་ཚིག་གནས་ལ་བཞག་པ་ཡིས། །ཁྱིམ་དེར་བདེ་སྐྱིད་ཕུན་སུམ་ཚོགས། །ཐབ་དང་གཡོ་བསྐོལ་རྒྱུན་མ་ཆད། །ཟས་ནོར་འདོད་ཡོན་རྒྱ་མཚོར་འཁྱིལ། །སྔོན་བྱུང་སྲིད་པ་དེ་བཞིན་དུ། །དེ་རིང་བཀྲ་ཤིས་དགེ་བའི་དུས། །རིག་འཛིན་སྔགས་འཆང་བདག་ཅག་གིས། །ཐབ་ལྷ་འབོད་དོ་སྙན་མ་སྲ། །ཐབ་ལྷ་གཡབ་པོ་སྤྱན་མ་བཏུལ། །ཐབ་ལྷ་མཆོད་དོ་ངོ་མ་ཆུང་། །ཐབ་ལྷ་བསྟོད་དོ་འཕང་མ་དམའ། །བདུད་རྩི་ཅན་གྱི་ཤིང་སྣ་ལ། །བསོད་ནམས་འབར་བའི་མེ་སྦར་ཏེ། །དཀར་གསུམ་མངར་གསུམ་ཤིང་ཏོག་དང་། །ཕྱེ་མར་འོ་བསྐོལ་འབྲུ་སྣ་སོགས། །ཟས་མཆོག་དྭངས་མའི་བཅུད་ཆེན་སྦྱར། །གཡའ་ཆུ་གངས་ཆུ་གཙང་མ་བྲན། །ཨོཾ་ཨཱཿཧཱུྃ་གིས་སྦྱངས་སྤེལ་བསྒྱུར། །ཧ་ཧོ་ཧྲཱི་ཡིས་བྱིན་རླབས་པས། །ཁ་དོག་དྲི་རོ་ནུས་ལྡན་པའི། །འདོད་ཡོན་བསང་གི་མཆོད་པ་འདིས། །བླ་མ་ཡི་དམ་དཀོན་མཆོག་མཆོད། །མཁའ་འགྲོ་ཆོས་སྐྱོང་སྲུང་མ་བརྔན། །མེ་ཐབ་འདི་ལ་བྱིན་གྱིས་རློབས། །དངོས་གྲུབ་རྒྱ་མཚོ་ཆར་ལྟར་ཕོབ། །ཟ་འདྲེ་ལྟོག་འགོང་རྡུལ་དུ་རློག །ཕྱྭ་གཡང་དཔལ་བཅུད་འདུ་བར་མཛོད། ཀྱཻ། ཁྱད་པར་ཐབ་ལ་མགོན་མཛད་པའི། །ལྷ་ཆེན་ཚོགས་ཀྱི་བདག་པོ་ནི། །སྐུ་མདོག་དམར་ལ་འོད་ཟེར་འཕྲོ། །ཕྱག་ན་འགུགས་བྱེད་ཕྱག་རྒྱ་འཛིན། །དར་དང་རིན་ཆེན་རྒྱན་གྱིས་བརྒྱན། །ལྷ་ཡི་དགེ་བསྙེན་འབུམ་ཕྲག་བཅས། །འདིར་གཤེགས་བསང་གི་མཆོད་པ་བཞེས། །གུས་པས་བསྟོད་ཅིང་དགྱེས་པ་བསྐྱེད། །བདག་དང་རྒྱུ་སྦྱོར་ཡོན་བདག་གི། །ཐབ་ཁ་འདི་ཡི་མགོན་མཛོད་ཅིག །མེ་དང་དུ་བ་རྒྱུན་མ་བཅད། །ཟས་དང་གཡོ་བསྐོལ་རྒྱ་མཚོར་བསྐྱིལ། །བཅུད་དང་དམུ་ཡང་རོ་ནུས་བསྐྱེད། །ཟ་འདྲེ་ལྟོག་འགོང་རྡུལ་དུ་རློག །འདོད་དགུའི་ལོངས་སྤྱོད་དངོས་གྲུབ་སྩོལ། །བཀྲ་ཤིས་བདེ་ལེགས་མཛད་དུ་གསོལ། ཀྱཻ། ཁྱད་པར་ཐབ་ལ་མགོན་མཛད་པའི། །གནོད་སྦྱིན་ཐབ་ལྷ་ཡུ་མོ་ནི། །བུད་མེད་ལུས་ལ་གཡུ་ཆས་ཅན། །དར་སྣའི་ན་བཟའ་སྐུ་ལ་གསོལ། །ཕྱག་ན་གསེར་གྱི་གཟར་བུ་འཛིན། །གནོད་སྦྱིན་བུ་མོ་འབུམ་དང་བཅས། །འདིར་གཤེགས་བསང་གི་མཆོད་པ་བཞེས། གུས་པས་བསྟོད་ཅིང་སོགས་འགྲེ། ཀྱཻ། ཁྱད་པར་ཐབ་ལ་མགོན་མཛད་པའི། །ཀླུ་རྒྱལ་མི་མགོན་དཀར་པོ་ནི། །སྐུ་མདོག་ཤེལ་གྱི་ཕུང་པོ་འདྲ། །ཕྱག་ན་བསམ་འཕེལ་ནོར་བུ་འཛིན། །སྦྲུལ་མགོའི་གདེངས་ཀ་རྔམས་ཤིང་བརྗིད། །བཻཌུཪ་སྔོན་པོའི་དབུ་རྒྱན་འཆང་། །ཀླུ་ཡི་སེམས་དཔའ་འབུམ་ཕྲག་བཅས། །འདིར་གཤེགས་བསང་གི་སོགས་འགྲེ། ཀྱཻ། གཞན་ཡང་ཐབ་ལ་འགོ་བ་ཡི། །ལྷ་ཀླུ་གནོད་སྦྱིན་དྲི་ཟ་སོགས། །དཀར་ཕྱོགས་སྐྱོང་བའི་ཚོགས་རྣམས་ཀུན། །ཞི་དང་ཕན་པའི་སེམས་བསྐྱེད་ལ། །འདིར་གཤེགས་སོགས་འགྲེ། ཀྱཻ། སྲིད་པ་མེ་ཡི་བདག་པོ་ནི། །འོད་དང་གཟི་བརྗིད་དཔལ་དུ་འབར། །ལས་ལ་མྱུར་བའི་བྱིན་ཤུག་འཆང་། །དཀྱིལ་འཁོར་ཀུན་གྱི་གསོལ་ཁ་བ། །མེ་ལྷའི་རྒྱལ་པོ་མཐུ་བོ་ཆེ། །སྐུ་མདོག་མེ་ཡི་ཕུང་པོ་འདྲ། །བགྲང་ཕྲེང་རིལ་བ་སྤྱིལ་བླུགས་བསྣམས། །དྲང་སྲོང་ཆ་བྱད་དྭངས་རེ་སྤྲོ། །དེང་གི་བཀྲ་ཤིས་གནས་འདིར་གཤེགས། འབར་བ་མེ་ཡི་ཀློང་དུ་བཞུགས། །འདོད་ཡོན་བདུད་རྩིའི་བསྲེག༷ས་བླུགས་བཞེས། །མཆོད་ཅིང་བསྟོད་དེ་ཕྱག་ཀྱང་འཚལ། །འབར་བ་མེ་ཡི་མགོན་མཛོད་ལ། །ཡེ་ཤེས་མེ་རུ་བྱིན་གྱིས་རློབས། །བཟའ་བཏུང་གཡོ་བསྐོལ་ལོངས་སྤྱོད་ཀྱི། །ཕུད་ཀྱིས་དཀོན་མཆོག་རྒྱ་མཚོ་མཆོད། །མགོན་པོ་ཡོན་ཏན་ཐུགས་དམ་བསྐང་། །རོ་བཅུད་ཕུན་སུམ་ཚོགས་པ་ཡི། །བདག་དང་རྒྱུ་སྦྱོར་ཡོན་བདག་གི། །ནད་གདོན་རྒུད་པ་ཞི་བ་དང་། ཚེ་བསོད་སྟོབས་རྩལ་རྒྱས་པར་སྤེལ། །བཀྲ་ཤིས་བདེ་ལེགས་མཛད་དུ་གསོལ། །ཀྱཻ། དེ་ལྟར་བཀྲ་ཤིས་ཐབ་ཀྱི་ལྷ། །མཆོད་ཅིང་བསྟོད་པས་མངའ་གསོལ་ན། །ཐབ་ཁ་འདི་ལ་དགྱེས་པས་དགོངས། །རྟག་ཏུ་བྱིན་རློབས་དངོས་གྲུབ་སྩོལ། །འགོ་ཞིང་སྡོང་གྲོགས་མཐུ་དཔུང་སྐྱེད། །ལོངས་སྤྱོད་འབྱོར་པ་སྤྲིན་ལྟར་གཏིབས། །རོ་བཅུད་ནུས་པའི་དམུ་ལད་བསྐྱེད། །ཚེ་རིང་ནད་མེད་མཐུ་རྩལ་ཕྱུངས། །ཀོ་ལོང་རུ་ང་ཕྲག་དོག་སྤོངས། །བསམ་པ་སྒྲུབ་ལ་རེ་བ་སྐོང་། །བར་དུ་གཅོད་པའི་རྐྱེན་རྣམས་བཟློག །མཆོད་དོ་མཆོད་དོ་ལྷ་མཆོད་དོ། །རྒྱལ་ལོ་རྒྱལ་ལོ་ལྷ་རྒྱལ་ལོ། །དགེའོ་དགེའོ་བཀྲ་ཤིས་དགེ། །བདེ་སྐྱིད་ཕུན་ཚོགས་བཀྲ་ཤིས་ཤོག །ཅེས་བརྗོད། ཐབ་ཀྱི་ནང་དུའང་ཟས་ཕུད་དང་འབྲུ་སྣ་འཐོར། བཀྲ་ཤིས་རྒྱ་ཆེན་བརྗོད། མཆོད་ཡོན་རྣམས་དཀར་གསུམ་སོགས་བཟའ་བཏུང་བཟང་པོས་ཞལ་བསྲོ། བཀྲ་ཤིས་སྐྱིད་པའི་གླུ་བླངས་པ་སོགས་རྟེན་འབྲེལ་ལེགས་ཚོགས་སུ་བསྐྱེད་པར་བྱའོ། །མངྒ་ལཾ། ། ༈

[edit]

thab lha bstod pa/ thab lha bstod pa bzhugs so/__/rtsa ba gsum la phyag 'tshal lo/__/thab lha bstod par 'dod pas/__thab dang nye skor thams cad phyag dar legs par bya/__thab la snum byug cing zas dkar gsum g.yo/__thab kyi mdor bsang dud zas sna dang sbyar/__bsang mchod rgyas pa'am khyim lha bstod pa dang 'brel na legs/__gang ltar yang khrus bya ba ni/__ji ltar bde gshegs bltams pa'i tshe/__/tshangs pa lha yis khrus gsol ltar/__/ye shes bdud rtsi dri med chus/__/thab kyi lha la khrus gsol lo/__/dme mnol thab gzhob mi gtsang gis/__/thab lha zas lha thams cad la/__/nyams grib phog pa dag gyur cig__/zag med bde bas dgyes par shog__/oM shud+d+he shud+d+he shA d+ha na ye sarba shIn+taM ku ru swA hA/__zhes dang khrus sngags ji ltar rigs pa bzla zhing khrus chu 'thor/__thab bsang la chab bran/__kye/__thab lha bstod pa gar srid na/__/sngon tshe bskal pa dang po'i dus/__/rgyal po gser gyi shing rta yis/__/mthu rtsal nus ldan rig sngags 'chang /__/zhi ba'i snying po spyan drangs nas/__/thab lha sngags dang phyag rgyas bkugs/__/mchod cing gsol bas mnyes par mdzad/__/dam tshig gnas la bzhag pa yis/__/khyim der bde skyid phun sum tshogs/__/thab dang g.yo bskol rgyun ma chad/__/zas nor 'dod yon rgya mtshor 'khyil/__/sngon byung srid pa de bzhin du/__/de ring bkra shis dge ba'i dus/__/rig 'dzin sngags 'chang bdag cag gis/__/thab lha 'bod do snyan ma sra/__/thab lha g.yab po spyan ma btul/__/thab lha mchod do ngo ma chung /__/thab lha bstod do 'phang ma dma'/__/bdud rtsi can gyi shing sna la/__/bsod nams 'bar ba'i me sbar te/__/dkar gsum mngar gsum shing tog dang /__/phye mar 'o bskol 'bru sna sogs/__/zas mchog dwangs ma'i bcud chen sbyar/__/g.ya' chu gangs chu gtsang ma bran/__/oM AHhU~M gis sbyangs spel bsgyur/__/ha ho hrI yis byin rlabs pas/__/kha dog dri ro nus ldan pa'i/__/'dod yon bsang gi mchod pa 'dis/__/bla ma yi dam dkon mchog mchod/__/mkha' 'gro chos skyong srung ma brngan/__/me thab 'di la byin gyis rlobs/__/dngos grub rgya mtsho char ltar phob/__/za 'dre ltog 'gong rdul du rlog__/phywa g.yang dpal bcud 'du bar mdzod/__kyai/__khyad par thab la mgon mdzad pa'i/__/lha chen tshogs kyi bdag po ni/__/sku mdog dmar la 'od zer 'phro/__/phyag na 'gugs byed phyag rgya 'dzin/__/dar dang rin chen rgyan gyis brgyan/__/lha yi dge bsnyen 'bum phrag bcas/__/'dir gshegs bsang gi mchod pa bzhes/__/gus pas bstod cing dgyes pa bskyed/__/bdag dang rgyu sbyor yon bdag gi/__/thab kha 'di yi mgon mdzod cig__/me dang du ba rgyun ma bcad/__/zas dang g.yo bskol rgya mtshor bskyil/__/bcud dang dmu yang ro nus bskyed/__/za 'dre ltog 'gong rdul du rlog__/'dod dgu'i longs spyod dngos grub stsol/__/bkra shis bde legs mdzad du gsol/__kyai/__khyad par thab la mgon mdzad pa'i/__/gnod sbyin thab lha yu mo ni/__/bud med lus la g.yu chas can/__/dar sna'i na bza' sku la gsol/__/phyag na gser gyi gzar bu 'dzin/__/gnod sbyin bu mo 'bum dang bcas/__/'dir gshegs bsang gi mchod pa bzhes/__gus pas bstod cing sogs 'gre/__kyai/__khyad par thab la mgon mdzad pa'i/__/klu rgyal mi mgon dkar po ni/__/sku mdog shel gyi phung po 'dra/__/phyag na bsam 'phel nor bu 'dzin/__/sbrul mgo'i gdengs ka rngams shing brjid/__/baiDuRa sngon po'i dbu rgyan 'chang /__/klu yi sems dpa' 'bum phrag bcas/__/'dir gshegs bsang gi sogs 'gre/__kyai/__gzhan yang thab la 'go ba yi/__/lha klu gnod sbyin dri za sogs/__/dkar phyogs skyong ba'i tshogs rnams kun/__/zhi dang phan pa'i sems bskyed la/__/'dir gshegs sogs 'gre/__kyai/__srid pa me yi bdag po ni/__/'od dang gzi brjid dpal du 'bar/__/las la myur ba'i byin shug 'chang /__/dkyil 'khor kun gyi gsol kha ba/__/me lha'i rgyal po mthu bo che/__/sku mdog me yi phung po 'dra/__/bgrang phreng ril ba spyil blugs bsnams/__/drang srong cha byad dwangs re spro/__/deng gi bkra shis gnas 'dir gshegs/__'bar ba me yi klong du bzhugs/__/'dod yon bdud rtsi'i bsregaXs blugs bzhes/__/mchod cing bstod de phyag kyang 'tshal/__/'bar ba me yi mgon mdzod la/__/ye shes me ru byin gyis rlobs/__/bza' btung g.yo bskol longs spyod kyi/__/phud kyis dkon mchog rgya mtsho mchod/__/mgon po yon tan thugs dam bskang /__/ro bcud phun sum tshogs pa yi/__/bdag dang rgyu sbyor yon bdag gi/__/nad gdon rgud pa zhi ba dang /__tshe bsod stobs rtsal rgyas par spel/__/bkra shis bde legs mdzad du gsol/__/kyai/__de ltar bkra shis thab kyi lha/__/mchod cing bstod pas mnga' gsol na/__/thab kha 'di la dgyes pas dgongs/__/rtag tu byin rlobs dngos grub stsol/__/'go zhing sdong grogs mthu dpung skyed/__/longs spyod 'byor pa sprin ltar gtibs/___/ro bcud nus pa'i dmu lad bskyed/____/tshe ring nad med mthu rtsal phyungs/__/ko long ru nga phrag dog spongs/__/bsam pa sgrub la re ba skong /__/bar du gcod pa'i rkyen rnams bzlog__/mchod do mchod do lha mchod do/___/rgyal lo rgyal lo lha rgyal lo/__/dge'o dge'o bkra shis dge/__/bde skyid phun tshogs bkra shis shog__/ces brjod/__thab kyi nang du'ang zas phud dang 'bru sna 'thor/__bkra shis rgya chen brjod/__mchod yon rnams dkar gsum sogs bza' btung bzang pos zhal bsro/__bkra shis skyid pa'i glu blangs pa sogs rten 'brel legs tshogs su bskyed par bya'o/__/mang+ga laM/___/___!