JKW-KABUM-23-'A-001-054

Previous Text Back to Volume PageNext Text

Wylie title
Location	mkhyen brtse'i bka' 'bum Volume 23, sde tshan 1, Text 54, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 23: . Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

Tibetan Text

Wylie

[edit]

རང་གྲོལ་སྐོར་ལྔ། རྫོགས་པ་ཆེན་པོ་ལྟ་བ་གཅེར་མཐོང་རང་གྲོལ་ཞེས་བྱ་བ། རང་བཞིན་དྲི་བྲལ་ཤིན་ཏུ་རྣམ་དག་པའི། །བློ་འདས་བྱར་མེད་རྒྱ་ཡན་ལྷུག་པའི་ངང་། །སྤང་བླང་ཡེ་ཟད་ངོ་བོ་མཐོང་བ་ཡིས། །རྟག་ཏུ་འདུ་འབྲལ་མེད་པར་ཕྱག་བགྱིའོ། །ཀྱེ་ཧོ་ཉོན་དང་སྐལ་བཟང་དད་པ་ཅན། །ད་ནི་ཐར་པའི་ལམ་མཆོག་མྱུར་སྒྲུབ་ཕྱིར། །འཁོར་འདས་ཀུན་ལ་ཁྱབ་པའི་འོད་གསལ་དོན། །རིག་པ་གཅེར་མཐོང་རང་གྲོལ་མཁྱེན་ལགས་སམ། །ཕྱི་རོལ་སྣང་བའི་ཡུལ་ལ་ཕར་བརྟགས་པས། །ཆོས་ཀུན་སྒྱུ་མ་ལྟ་བུར་ཡོངས་ཤེས་ཤིང་། །ནང་དུ་རང་གི་སེམས་ལ་ཚུར་བལྟས་པས། །བསམ་གྱིས་མི་ཁྱབ་བརྗོད་དུ་མེད་པར་མཐོང་། །མཐོང་ཞེས་བྱའང་བླ་དྭགས་ཙམ་ཡིན་ཏེ། །རྟག་པས་མ་བཅིང་ཆད་པར་མ་ལྷུང་ཞིང་། །དབུ་མར་མི་གནས་འཛིན་ཞེན་ཟད་པ་འདི། །དཔལ་མགོན་བླ་མའི་དྲིན་གྱིས་རྟོགས་རྒྱུ་ཡིན། །རང་ལ་ཡོད་ཀྱང་རང་གིས་བསྒྲིབས་བྱས་ཤིང་། །གཞན་ནས་མ་བྱུང་གཞི་ལས་གཞི་སྣང་ནི། །ཕྲ་བའི་ཡེ་ཤེས་མེད་འཛིན་གྱིས་བཟུང་བས། །མཐའ་མེད་འཁོར་བའི་རྒྱ་མཚོ་འདི་རུ་ལྷུང་། །དེ་ཕྱིར་མྱོང་ཞེན་ཙམ་གྱི་གོ་ཡུལ་དང་། །ཡིད་ལ་བྱེད་པའི་ལྟ་བ་རྟོགས་པ་ཡང་། །བློ་དང་བཅས་པའི་སྦུབས་སུ་འཐུམས་པས་ན། །རང་བཞིན་རྡོ་རྗེ་སྙིང་པོའི་དོན་ལས་རིང་། །དོན་བརྒྱུད་ཡེ་ཤེས་སྙིང་དབུས་སིམ་པ་ལས། །གཞོན་ནུ་མ་ལ་པྲ་ཕབ་སྣང་བ་བཞིན། །རིག་སྟོང་རྗེན་པར་འདི་ཀར་ཅེར་གྲོལ་བས། །མཐོང་བ་ཙམ་གྱིས་མཐོང་བྱེད་འགགས་པར་འགྱུར། །མདོར་ན་དེ་ལས་མང་དུ་སྨོས་ཅི་དགོས། །བླ་མས་མ་བསྟན་སློབ་མས་མ་རྟོགས་ཤིང་། །བློ་ཡིས་མ་བསྐྱེད་རྒྱུ་རྐྱེན་མེད་པ་ཡི། །ཐ་མལ་ཤེས་པ་རང་གྲོལ་འདི་ཀ་ཡིན། །དེ་ཉིད་མ་རྟོགས་ཐབས་ཀྱི་ལམ་སྤྱོད་ཀྱང་། །ལྷག་མར་བཅས་ཕྱིར་གྲོལ་བར་མི་འགྱུར་ཞིང་། །སྣ་ཚོགས་ལམ་མང་འཚོལ་བས་དུབ་པའི་མཐར། །རང་གཞན་གཉིས་ཀ་ངལ་བའི་རྒྱུ་རུ་ཟད། །འདི་ནི་ཐེག་མཆོག་སྙིང་པོའི་ཡེ་ཤེས་ལ། །གོ་མྱང་བརྟན་པའི་བདུད་རྩིས་མྱོས་པ་ལས། །ཟུང་འཇུག་གཞོན་ནུ་བུམ་སྐུའི་གཏེར་མཛོད་ནས། །བསྟན་པར་ཕངས་ཀྱང་གང་ཤར་ལྷུག་པར་གདམས། །ཤུ་བྷཾ། ། ༈

[edit]

rang grol skor lnga/__ rdzogs pa chen po lta ba gcer mthong rang grol zhes bya ba/__rang bzhin dri bral shin tu rnam dag pa'i/__/blo 'das byar med rgya yan lhug pa'i ngang /__/spang blang ye zad ngo bo mthong ba yis/__/rtag tu 'du 'bral med par phyag bgyi'o/__/kye ho nyon dang skal bzang dad pa can/__/da ni thar pa'i lam mchog myur sgrub phyir/__/'khor 'das kun la khyab pa'i 'od gsal don/__/rig pa gcer mthong rang grol mkhyen lags sam/__/phyi rol snang ba'i yul la phar brtags pas/__/chos kun sgyu ma lta bur yongs shes shing /__/nang du rang gi sems la tshur bltas pas/__/bsam gyis mi khyab brjod du med par mthong /__/mthong zhes bya'ang bla dwags tsam yin te/__/rtag pas ma bcing chad par ma lhung zhing /__/dbu mar mi gnas 'dzin zhen zad pa 'di/__/dpal mgon bla ma'i drin gyis rtogs rgyu yin/__/rang la yod kyang rang gis bsgribs byas shing /__/gzhan nas ma byung gzhi las gzhi snang ni/__/phra ba'i ye shes med 'dzin gyis bzung bas/__/mtha' med 'khor ba'i rgya mtsho 'di ru lhung /__/de phyir myong zhen tsam gyi go yul dang /__/yid la byed pa'i lta ba rtogs pa yang /__/blo dang bcas pa'i sbubs su 'thums pas na/__/rang bzhin rdo rje snying po'i don las ring /__/don brgyud ye shes snying dbus sim pa las/__/gzhon nu ma la pra phab snang ba bzhin/__/rig stong rjen par 'di kar cer grol bas/__/mthong ba tsam gyis mthong byed 'gags par 'gyur/__/mdor na de las mang du smos ci dgos/__/bla mas ma bstan slob mas ma rtogs shing /__/blo yis ma bskyed rgyu rkyen med pa yi/__/tha mal shes pa rang grol 'di ka yin/__/de nyid ma rtogs thabs kyi lam spyod kyang /__/lhag mar bcas phyir grol bar mi 'gyur zhing /__/sna tshogs lam mang 'tshol bas dub pa'i mthar/__/rang gzhan gnyis ka ngal ba'i rgyu ru zad/__/'di ni theg mchog snying po'i ye shes la/__/go myang brtan pa'i bdud rtsis myos pa las/__/zung 'jug gzhon nu bum sku'i gter mdzod nas/__/bstan par phangs kyang gang shar lhug par gdams/__/shu b+haM/___/__!_