JKW-KABUM-23-'A-001-024

Previous Text Back to Volume PageNext Text

Wylie title
Location	mkhyen brtse'i bka' 'bum Volume 23, sde tshan 1, Text 24, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 23: . Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

Tibetan Text

Wylie

[edit]

འོད་གསལ་གྲུབ་པའི་ཐོལ་གླུ་ཌཱ་ཀི་དགྱེས་རོལ། འོད་གསལ་གྲུབ་པའི་ཐོལ་གླུ་ཌཱཀྐི་དགྱེས་པའི་རོལ་མོ་ཞེས་བྱ་བ། འཁོར་འདས་ཀུན་གྱི་རྩ་བ་རང་རིག་གཤིས། །བརྟག་ན་དངོས་པོའི་བདེན་གྲུབ་རབ་དབེན་པའི། །ཟུང་འཇུག་བློ་འདས་ཆེན་པོར་ཕྱག་བགྱིས་ནས། །ཟབ་ཞི་སྤྲོས་བྲལ་ཚིག་གིས་གཏན་ལ་དབབ། །མ་རིག་རྟོག་པའི་ལས་རླུང་གཡོ་བ་ཡིས། །གཉིས་འཛིན་དྲ་བར་ཀུན་ཏུ་འཐུམས་གྱུར་པའི། །འགྲོ་ཁམས་བདེ་གཤེགས་སྙིང་པོའི་རང་བཞིན་གྱིས། །ཏིལ་མར་བཞིན་དུ་ཁྱབ་བདལ་གྱུར་འདི་མཚར། །རྒྱུ་ཡིས་བསྐྱེད་དུ་མེད་པའི་ཆོས་ཉིད་གཤིས། །ལམ་གྱིས་བསྒོམ་དུ་མེད་པའི་རང་གྲོལ་དངོས། །འབྲས་བུ་ཟིན་དུ་མེད་པའི་ཡེ་ནས་རྫོགས། །ཐེག་པ་ཀུན་གྱི་ལྟོས་གྲུབ་ཟད་པའི་ཀློང་། །སྨྲ་བའི་ཡུལ་དུ་མ་མཆིས་མཚན་མས་དབེན། །བསམ་པས་དཔྱད་དུ་བྲལ་དེ་བློ་འདས་གཤིས། །མཐའ་བརྒྱད་སྤྲོས་པ་ལས་འདས་རིག་སྟོང་ཡུལ། །འོད་གསལ་གཉུག་མའི་ངང་དུ་ཅི་བདེར་གྲོལ། །དེ་ལྟའང་སྣ་ཚོགས་རྟོག་པའི་སྒྱུ་མ་ཡིས། །རྨི་ལམ་བཞིན་དུ་འཁོར་བའི་གྲོང་ཁྲིད་ཀྱང་། །རང་ངོར་བལྟས་པས་བདེན་པས་སྟོང་པའི་ཕྱིར། །ལྷུན་གྲུབ་སངས་རྒྱས་རང་ལས་ཅི་ཞིག་འཚོལ། །བྱས་པའི་ཆོས་ཀྱིས་བསྒྱུར་དུ་མི་བཏུབ་ཅིང་། །རང་བབ་བཞག་པས་དེ་ལས་གཡོ་བ་མེད།། གཉེན་པོ་བསྟན་ན་གོལ་སྒྲིབ་ཀུན་གྱི་གཞི། །རང་ངོར་གྲོལ་བས་མན་ངག་ཡོངས་ཀྱི་བཅུད། །སྒོམ་དུ་མེད་པའི་དེ་བཞིན་ཉིད་ལའང་། །བསྟེན་གོམས་བྱས་པས་ཉོན་མོངས་རང་སར་བྲི། །རྒྱུད་མངས་བསྐུལ་ལྟར་ཐང་ལྷོད་སྤངས་པ་ཡིས། །རྩེ་གཅིག་མ་ཡེངས་དྲན་པའི་ངང་མདངས་བསྐྱང་། །དཔྱད་པའི་སྒོམ་པ་གང་གིས་འཚང་མི་རྒྱ། །ཡུལ་སོགས་བློ་ཡིས་བགྲོད་པའི་རྒྱུ་ཡིན་ཏེ། །ཐ་སྙད་མཚོན་པས་དེ་ལ་ཅི་ཞིག་བྱ། །དེ་བས་སྐད་ཅིག་རྟོག་པའི་ཡེ་ཤེས་སོ། །ཆོས་རྣམས་སྟོང་ཉིད་ཙམ་དུ་ཁས་ལེན་པ། །གཞན་དུ་ཡོད་མོད་དབང་གིས་སྟོན་པ་ཡི། །ལྷན་སྐྱེས་རིག་སྟོང་ད་ལྟའི་ཤེས་པ་ཉིད། །བསྒོམ་པས་ལས་རུང་ཁྱད་པར་འཕགས་པའི་ཆོས། ཡིད་དཔྱོད་ལས་འདས་ཅེར་གྲོལ་སྐད་ཅིག་མ། །མ་བཅོས་ཅོག་བཞག་རྫོགས་པ་ཆེན་པོ་སྟེ། །དེ་ཡང་སྟོང་པས་རྒྱས་འདེབས་མ་ཡིན་ཞིང་། །དབྱིངས་སུ་རིག་པ་གཏོད་པའི་འཛིན་པའང་མིན། །ག༷ང་ཤར༷་རི༷ག་ངོར༷་མྱང༷་ཐི༷ག་ལ༷་བཟླ༷་བ༷། །ཐུན༷་མོང༷་མིན༷་པའི༷་བཅུད༷་དུ་མཁྱེན་པར་མཛོད། །ཁྱད་པར་སྙིགས་མའི་རང་མདངས་མངོན་བརྡོལ་བས། །ལྟ་ཕྱོགས་སྤྱོད་པར་ཤོར་བའི་སྟོང་ཉིད་དང་། །སྤྱོད་ཕྱོགས་ལྟ་བར་ཤོར་བའི་རྒྱུ་འབྲས་རྣམས། །སྟོན་པའི་བཀའ་ལས་གཞན་པར་ཤེས་པར་བྱ། །དེ་སྐད་མན་ངག་རྒྱ་མཚོ་ལས་འོང་ཞིང་། །ཉམས་མྱོང་རིན་ཆེན་ཀུན་གྱི་བཤེས་གྱུར་པ། །བླ་མའི་བྱིན་རླབས་སྙིང་གར་སིམ་པ་ལས། །གང་ཤར་རང་སར་གྲོལ་བའི་ངང་ནས་སྨྲས། །དགེ་བས་མཐར་འཛིན་ལྟ་བའི་མུར་འདུག་དཔུང་། །སྤྲོས་བྲལ་བདེ་ཆེན་དཔའ་བོས་བཅོམ་ནས་ཀྱང་། །འོད་གསལ་གཉུག་མའི་རྡོ་རྗེའི་རྫོང་ཟིན་ནས། །འཁོར་འདས་ཡོངས་གྲོལ་སྲིད་ལ་གནས་གྱུར་ཅིག། །། ༈

[edit]

'od gsal grub pa'i thol glu DA ki dgyes rol/__ 'od gsal grub pa'i thol glu DAk+ki dgyes pa'i rol mo zhes bya ba/__'khor 'das kun gyi rtsa ba rang rig gshis/__/brtag na dngos po'i bden grub rab dben pa'i/__/zung 'jug blo 'das chen por phyag bgyis nas/__/zab zhi spros bral tshig gis gtan la dbab/__/ma rig rtog pa'i las rlung g.yo ba yis/__/gnyis 'dzin dra bar kun tu 'thums gyur pa'i/__/'gro khams bde gshegs snying po'i rang bzhin gyis/__/til mar bzhin du khyab bdal gyur 'di mtshar/__/rgyu yis bskyed du med pa'i chos nyid gshis/__/lam gyis bsgom du med pa'i rang grol dngos/__/'bras bu zin du med pa'i ye nas rdzogs/__/theg pa kun gyi ltos grub zad pa'i klong /__/smra ba'i yul du ma mchis mtshan mas dben/__/bsam pas dpyad du bral de blo 'das gshis/__/mtha' brgyad spros pa las 'das rig stong yul/__/'od gsal gnyug ma'i ngang du ci bder grol/__/de lta'ang sna tshogs rtog pa'i sgyu ma yis/__/rmi lam bzhin du 'khor ba'i grong khrid kyang /__/rang ngor bltas pas bden pas stong pa'i phyir/__/lhun grub sangs rgyas rang las ci zhig 'tshol/__/byas pa'i chos kyis bsgyur du mi btub cing /__/rang bab bzhag pas de las g.yo ba med//_gnyen po bstan na gol sgrib kun gyi gzhi/__/rang ngor grol bas man ngag yongs kyi bcud/__/sgom du med pa'i de bzhin nyid la'ang /__/bsten goms byas pas nyon mongs rang sar bri/__/rgyud mangs bskul ltar thang lhod spangs pa yis/__/rtse gcig ma yengs dran pa'i ngang mdangs bskyang /__/dpyad pa'i sgom pa gang gis 'tshang mi rgya/__/yul sogs blo yis bgrod pa'i rgyu yin te/__/tha snyad mtshon pas de la ci zhig bya/__/de bas skad cig rtog pa'i ye shes so/__/chos rnams stong nyid tsam du khas len pa/__/gzhan du yod mod dbang gis ston pa yi/__/lhan skyes rig stong da lta'i shes pa nyid/__/bsgom pas las rung khyad par 'phags pa'i chos/__yid dpyod las 'das cer grol skad cig ma/_/ma bcos cog bzhag rdzogs pa chen po ste/__/de yang stong pas rgyas 'debs ma yin zhing /__/dbyings su rig pa gtod pa'i 'dzin pa'ang min/__/gaXng sharaX riXg ngoraX myangaX thiXg laX bzlaX baX/__/thunaX mongaX minaX pa'iX bcudaX du mkhyen par mdzod/__/khyad par snyigs ma'i rang mdangs mngon brdol bas/__/lta phyogs spyod par shor ba'i stong nyid dang /__/spyod phyogs lta bar shor ba'i rgyu 'bras rnams/__/ston pa'i bka' las gzhan par shes par bya/__/de skad man ngag rgya mtsho las 'ong zhing /__/nyams myong rin chen kun gyi bshes gyur pa/__/bla ma'i byin rlabs snying gar sim pa las/__/gang shar rang sar grol ba'i ngang nas smras/__/dge bas mthar 'dzin lta ba'i mur 'dug dpung /__/spros bral bde chen dpa' bos bcom nas kyang /_/'od gsal gnyug ma'i rdo rje'i rdzong zin nas/__/'khor 'das yongs grol srid la gnas gyur cig/__//__!_