JKW-KABUM-10-THA-006

🚧 This website is under continued development. We appreciate your patience!

Previous Section Back to Volume PageNext Section

ཐེག་ཆེན་ཤིན་ཏུ་རྒྱས་པའི་ལུགས་ཀྱི་སེམས་བསྐྱེད་སྡོམ་ཆོག་བྱང་ཆུབ་སེམས་དཔའི་ལམ་བཟང་།

Wylie title	theg chen shin tu rgyas pa'i lugs kyi sems bskyed sdom chog byang chub sems dpa'i lam bzang
Location	mkhyen brtse'i bka' 'bum Volume 10, sde tshan 6, Pages 411-493 (Folios 1a to 42a3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. theg chen shin tu rgyas pa'i lugs kyi sems bskyed sdom chog byang chub sems dpa'i lam bzang. In 'jam dbyangs mkhyen brtse'i dbang po'i bka' 'bum, Vol. 10: 411-493. Khams sde dge rdzong sar dgon: Rdzong sar blo gros phun tshogs, 2020.
Genre	Vows - sdom pa
DNZ	In the Damngak Dzö: https://dnz.tsadra.org/index.php/theg chen shin tu rgyas pa'i sems bskyed dang sdom pa'i cho ga byang chub sems dpa'i lam bzang
Colophon	Colophon page 490: །ཅེས་པའང་ཡོངས་རྫོགས་བསྟན་པའི་མངའ་བདག་ཁམས་གསུམ་ཆོས་ཀྱི་རྒྱལ་པོ། དཔལ་ས་སྐྱ་པ་འཇམ་དཔལ་གཞོན་ནུ་ངག་དབང་རྡོ་རྗེ་རིན་ཆེན་བཀྲ་ཤིས་གྲགས་པའི་རྒྱལ་མཚན་དཔལ་བཟང་པོའི་ཞལ་སྔ་ནས་ཀྱི་ཐུགས་བཞེད་བསྒྲུབ་པ་དང་། དོན་གཉེར་ཅན་གཞན་ལའང་ཕན་པའི་བསམ་པ་བཟང་པོས། ཡོངས་འཛིན་དམ་པ་ཆོས་བཞིན་དུ་སྤྱོད་པ་དུ་མའི་བཀའ་དྲིན་ལས་ཐེག་པ་ཆེན་པོའི་གཞུང་ལུགས་མང་དུ་ཐོས་པའི་ཤཱཀྱའི་བཙུན་པ་རྨོངས་བརྟུལ་ཀུན་ཏུ་རྒྱུ་འཇམ་དབྱངས་མཁྱེན་བརྩེའི་དབང་པོས། རྒྱལ་བའི་སྲས་པོ་ཐོགས་མེད་བཟང་པོ་དཔལ་གྱི་གསུང་རབས་ལ་ཚིག་གི་མཐའ་བསྐྱེད་ཚུལ་མི་འགལ་བས་ཟུར་བརྒྱན་ཏེ། ཡོན་ཏན་རིན་པོ་ཆེ་དུ་མའི་འབྱུང་གནས་དཔལ་ཨེ་ཝཾ་ཆོས་ལྡན་གྱི་བླ་བྲང་ཐར་པ་རྩེར་སྦྱར་བའོ། Lineage Statement page 490: །ཐེག་པ་ཆེན་པོ་ཤིན་ཏུ་རྒྱས་པའི་ལུགས་ཀྱི་སེམས་བསྐྱེད་དང་སྡོམ་པ་རྣམ་པར་དག་པ་ཐོབ་པའི་བརྒྱུད་པ་ནི། ཡང་དག་པར་རྫོགས་པའི་སངས་རྒྱས། མགོན་པོ་བྱམས་པ། འཕགས་པ་ཐོགས་མེད། སློབ་དཔོན་དབྱིག་གཉེན། འཕགས་པ་གྲོལ་སྡེ། བཙུན་པ་རྣམ་གྲོལ་སྡེ། མཆོག་གི་སྡེ། དུལ་བའི་སྡེ། སློབ་དཔོན་སེངྒེ་བཟང་པོ། ཀུ་སཱ་ལི་ཆེ་ཆུང་གཉིས། གསེར་གླིང་པ་ཆོས་ཀྱི་གྲགས་པ། ཇོ་བོ་རྗེ་དཔལ་མར་མེ་མཛད། རྒྱལ་བ་འབྲོམ་སྟོན་པ། སྤྱན་སྔ་ཚུལ་ཁྲིམས་འབར། །དགེ་བཤེས་བྱ་ཡུལ་བ། རྒྱལ་སྲས་མུས་སྨན་པའང་ཟེར། ཚར་ཆེན་པ། གྲོལ་སྟོན་བདུད་རྩི་གྲགས། སངས་རྒྱས་སྒམ་པ་སེངྒེ་སྐྱབས། མཆིམས་ནམ་མཁའ་གྲགས། མཁན་ཆེན་སེངྒེ་སྐྱབས། མཁས་བཙུན་བསོད་ནམས་ཡེ་ཤེས། བྱང་སེམས་བསོད་ནམས་གྲགས་པ། རྒྱལ་སྲས་ཐོགས་མེད་བཟང་པོ་དཔལ། གྲུབ་ཆེན་བུདྡྷཱ་ཤྲཱི། ངོར་ཆེན་ཀུན་དགའ་བཟང་པོ། མཁས་གྲུབ་དཔལ་ལྡན་རྡོ་རྗེ། མཁན་ཆེན་དཀོན་མཆོག་ཚུལ་ཁྲིམས། སྒོ་རུམ་པ་ཀུན་དགའ་ལེགས་པ། འཇམ་དབྱངས་མཁྱེན་བརྩེའི་དབང་ཕྱུག །རྗེ་དབང་ཕྱུག་རབ་བརྟན། མཁན་ཆེན་ངག་དབང་ཆོས་གྲགས། འཇམ་མགོན་ཀུན་དགའ་བསོད་ནམས། དེ་སྲས་བསོད་ནམས་དབང་ཕྱུག །ལྷ་ཁང་མཁན་ཆེན་དོན་གྲུབ་ལེགས་བཟང་། རྨོར་ཆེན་ཀུན་དགའ་ལྷུན་གྲུབ། གནས་གསར་བ་ལེགས་པའི་འབྱུང་གནས། ས་ཆེན་ཀུན་དགའ་བློ་གྲོས། མུས་ཆེན་བསོད་ནམས་དཔལ་བཟང་། མུས་ཆེན་ཆོས་ཉིད་ཡེ་ཤེས། མུས་ཆེན་ཡེ་ཤེས་རྒྱལ་མཆོག །ཡོངས་འཛིན་རིན་པོ་ཆེ་བློ་གྲོས་རྒྱ་མཚོ། དཔལ་ས་སྐྱ་པ་འཇམ་མགོན་བླ་མ་ངག་དབང་རྡོ་རྗེ་རིན་ཆེན། དེས་བདག་ཅག་ལ་བཀའ་དྲིན་ཆེན་པོས་ཁྱབ་པར་མཛད་པ་ཡིན་ནོ། །ཡང་ན། བྱང་སེམས་བསོད་ནམས་གྲགས་པ་ནས། བུ་སྟོན་རིན་ཆེན་གྲུབ། ཐུགས་སྲས་རིན་ཆེན་རྣམ་རྒྱལ། མཁན་ཆེན་གྲུབ་པ་ཤེས་རབ། པཎ་ཆེན་དགེ་འདུན་གྲུབ། འདུལ་འཛིན་བློ་གྲོས་སྦས་པ། པཎ་ཆེན་ལུང་རིགས་རྒྱ་མཚོ། རྗེ་སྐྱབས་མཆོག་དཔལ། དབེན་ས་བ་བློ་བཟང་དོན་འགྲུབ། མཁས་གྲུབ་སངས་རྒྱས་ཡེ་ཤེས། པཎ་ཆེན་བློ་བཟང་ཆོས་རྒྱན། དྲུང་པ་བརྩོན་འགྲུས་རྒྱལ་མཚན། རྟ་ཕུག་པ་དམ་ཆོས་རྒྱལ་མཚན། སྒྲུབ་ཁང་པ་དགེ་ལེགས་རྒྱ་མཚོ། ཕུར་བུ་ལྕོག་ངག་དབང་བྱམས་པ། ཡོངས་འཛིན་ཡེ་ཤེས་རྒྱལ་མཚན། བཤེས་གཉེན་བློ་བཟང་རྒྱལ་མཚན། རྒྱལ་སྲས་སེམས་དཔའ་རིན་པོ་ཆེ་རིན་ཆེན་བློ་གསལ་བསྟན་སྐྱོང་། དེས་བདག་ལའོ། །ཡང་ན། རྒྱལ་སྲས་ཐོགས་མེད་ནས། ལོ་ཆེན་བྱང་ཆུབ་རྩེ་མོ། དེ་དབོན་ལོ་ཆེན་གྲགས་རྒྱལ། བོ་དོང་པ་པཎ་ཆེན་ཕྱོགས་ལས་རྣམ་རྒྱལ། བྱམས་གླིང་པཎ་ཆེན་བསོད་ནམས་རྣམ་རྒྱལ། གསེར་མདོག་པཎ་ཆེན་ཤཱཀྱ་མཆོག་ལྡན། པཎ་ཆེན་དོན་ཡོད་གྲུབ་པ། རྗེ་བཙུན་ཀུན་དགའ་གྲོལ་མཆོག །མཁན་ཆེན་ལུང་རིགས་རྒྱ་མཚོ། རྗེ་བཙུན་ཀུན་དགའ་སྙིང་པོ། རྒྱལ་ཚབ་ཡེ་ཤེས་རྒྱ་མཚོ། རྗེ་ཡོན་ཏན་མགོན་པོ། གྲུབ་ཆེན་མགོན་པོ་དཔལ་འབྱོར། མཚུངས་མེད་མགོན་པོ་གྲགས་པ། གྲུབ་དབང་མགོན་པོ་རྣམ་རྒྱལ། རིག་འཛིན་འཇམ་དབྱངས་རྒྱ་མཚོ། ཀུན་གཟིགས་ཕྲིན་ལས་ཤིང་རྟ། རྨོག་ལྕོག་པ་ཀུན་དགའ་དགེ་ལེགས། ཀུན་དགའ་ལྷུན་གྲུབ་རྒྱ་མཚོ། རྗེ་བཀའ་བརྒྱུད་བསྟན་འཛིན། བླ་མ་ཀརྨ་ལྷག་མཐོང་། གྲུབ་དབང་ཀརྨ་ནོར་བུ། ངེས་པར་ཐམས་ཅད་མཁྱེན་དངོས་ངག་གི་དབང་ཕྱུག་བློ་གྲོས་མཐའ་ཡས། དེས་བདག་ལ་བཀའ་དྲིན་ཆེན་པོས་སྩལ་བའོ། །སརྦ་དཱ་ཀ་ལྱཱ་ཎཾ་བྷ་ཝ་ཏུ།
	Colophon page 490: ces pa'ang yongs rdzogs bstan pa'i mnga' bdag khams gsum chos kyi rgyal po/__dpal sa skya pa 'jam dpal gzhon nu ngag dbang rdo rje rin chen bkra shis grags pa'i rgyal mtshan dpal bzang po'i zhal snga nas kyi thugs bzhed bsgrub pa dang /__don gnyer can gzhan la'ang phan pa'i bsam pa bzang pos/__yongs 'dzin dam pa chos bzhin du spyod pa du ma'i bka' drin las theg pa chen po'i gzhung lugs mang du thos pa'i shAkya'i btsun pa rmongs brtul kun tu rgyu 'jam dbyangs mkhyen brtse'i dbang pos/__rgyal ba'i sras po thogs med bzang po dpal gyi gsung rabs la tshig gi mtha' bskyed tshul mi 'gal bas zur brgyan te/__yon tan rin po che du ma'i 'byung gnas dpal e waM chos ldan gyi bla brang thar pa rtser sbyar ba'o/ Lineage Statement page 490: theg pa chen po shin tu rgyas pa'i lugs kyi sems bskyed dang sdom pa rnam par dag pa thob pa'i brgyud pa ni/__yang dag par rdzogs pa'i sangs rgyas/__mgon po byams pa/__'phags pa thogs med/__slob dpon dbyig gnyen/__'phags pa grol sde/__btsun pa rnam grol sde/__mchog gi sde/__dul ba'i sde/__slob dpon seng+ge bzang po/__ku sA li che chung gnyis/__gser gling pa chos kyi grags pa/__jo bo rje dpal mar me mdzad/__rgyal ba 'brom ston pa/__spyan snga tshul khrims 'bar/__/dge bshes bya yul ba/__rgyal sras mus sman pa'ang zer/__tshar chen pa/__grol ston bdud rtsi grags/__sangs rgyas sgam pa seng+ge skyabs/__mchims nam mkha' grags/__mkhan chen seng+ge skyabs/__mkhas btsun bsod nams ye shes/__byang sems bsod nams grags pa/__rgyal sras thogs med bzang po dpal/__grub chen bud+d+hA shrI/__ngor chen kun dga' bzang po/__mkhas grub dpal ldan rdo rje/__mkhan chen dkon mchog tshul khrims/__sgo rum pa kun dga' legs pa/__'jam dbyangs mkhyen brtse'i dbang phyug__/rje dbang phyug rab brtan/__mkhan chen ngag dbang chos grags/__'jam mgon kun dga' bsod nams/__de sras bsod nams dbang phyug__/lha khang mkhan chen don grub legs bzang /__rmor chen kun dga' lhun grub/__gnas gsar ba legs pa'i 'byung gnas/__sa chen kun dga' blo gros/__mus chen bsod nams dpal bzang /__mus chen chos nyid ye shes/__mus chen ye shes rgyal mchog__/yongs 'dzin rin po che blo gros rgya mtsho/__dpal sa skya pa 'jam mgon bla ma ngag dbang rdo rje rin chen/__des bdag cag la bka' drin chen pos khyab par mdzad pa yin no/__/yang na/__byang sems bsod nams grags pa nas/__bu ston rin chen grub/__thugs sras rin chen rnam rgyal/__mkhan chen grub pa shes rab/__paN chen dge 'dun grub/__'dul 'dzin blo gros sbas pa/__paN chen lung rigs rgya mtsho/__rje skyabs mchog dpal/__dben sa ba blo bzang don 'grub/__mkhas grub sangs rgyas ye shes/__paN chen blo bzang chos rgyan/__drung pa brtson 'grus rgyal mtshan/__rta phug pa dam chos rgyal mtshan/__sgrub khang pa dge legs rgya mtsho/__phur bu lcog ngag dbang byams pa/__yongs 'dzin ye shes rgyal mtshan/__bshes gnyen blo bzang rgyal mtshan/__rgyal sras sems dpa' rin po che rin chen blo gsal bstan skyong /__des bdag la'o/__/yang na/__rgyal sras thogs med nas/__lo chen byang chub rtse mo/__de dbon lo chen grags rgyal/__bo dong pa paN chen phyogs las rnam rgyal/__byams gling paN chen bsod nams rnam rgyal/__gser mdog paN chen shAkya mchog ldan/__paN chen don yod grub pa/__rje btsun kun dga' grol mchog__/mkhan chen lung rigs rgya mtsho/__rje btsun kun dga' snying po/__rgyal tshab ye shes rgya mtsho/__rje yon tan mgon po/__grub chen mgon po dpal 'byor/__mtshungs med mgon po grags pa/__grub dbang mgon po rnam rgyal/__rig 'dzin 'jam dbyangs rgya mtsho/__kun gzigs phrin las shing rta/__rmog lcog pa kun dga' dge legs/__kun dga' lhun grub rgya mtsho/__rje bka' brgyud bstan 'dzin/__bla ma karma lhag mthong /__grub dbang karma nor bu/__nges par thams cad mkhyen dngos ngag gi dbang phyug blo gros mtha' yas/__des bdag la bka' drin chen pos stsal ba'o/__/sarba dA ka l+yA NaM b+ha wa tu/

1 Texts in this Section (sde tshan or chos tshan)

411-493	ཐེག་ཆེན་ཤིན་ཏུ་རྒྱས་པའི་ལུགས་ཀྱི་སེམས་བསྐྱེད་སྡོམ་ཆོག་བྱང་ཆུབ་སེམས་དཔའི་ལམ་བཟང་། theg chen shin tu rgyas pa'i lugs kyi sems bskyed sdom chog byang chub sems dpa'i lam bzang Vows - sdom pa	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །ཐེག་པ་ཆེན་པོ་ཤིན་ཏུ་རྒྱས་པའི་ལུགས་ཀྱི་སེམས་བསྐྱེད་དང་སྡོམ་པའི་ཆོ་ག་བྱང་ཆུབ་སེམས་དཔའི་ལམ་བཟང་ཞེས་བྱ་བ་བཞུགས་སོ།། །།

ཕུན་ཚོགས་སྲིད་ཞིའི་ཕན་བདེ་ཇི་སྙེད་རྫོགས་པའི་སངས་རྒྱས་མཐུ་ལས་བྱུང་། །སངས་རྒྱས་རྒྱལ་བའི་སྲས་པོ་ཉིད་དང་དེ་ཡང་བྱང་སེམས་ལས་འཁྲུངས་ཕྱིར། །རིན་ཆེན་རིན་ཐང་མེད་པའི་མཆོག་སྦྱིན་དགེ་བའི་བཤེས་ལ་གུས་བཏུད་ནས། །ཤིན་ཏུ་རྒྱས་པའི་སེམས་བསྐྱེད་ཆོ་ག་གཞན་ལ་ཕན་ཕྱིར་གསལ་བར་བཤད། །འདི་ལྟར་འཇིག་རྟེན་དང་འཇིག་རྟེན་ལས་འདས་པའི་དགེ་ལེགས་མཐའ་དག་གི་འབྱུང་གནས། ཉན་ཐོས་དང་རང་སངས་རྒྱས་ཐམས་ཅད་ཀྱི་བླ་མ། བྱང་ཆུབ་སེམས་དཔའ་ཐམས་ཅད་ཀྱི་ཡབ། གཅིག་ཏུ་སྐྱོན་གྱི་དྲི་མ་བག་ཆགས་དང་བཅས་པ་གཏན་ནས་སྤངས་ཤིང་། བསམ་གྱིས་མི་ཁྱབ་པའི་ཡོན་ཏན་རྒྱ་མཚོ་ཉམས་པ་མེད་པ་ལ་དབང་འབྱོར་བ། ཡིད་ཅན་ཐམས་ཅད་ཀྱི་མ་འདྲིས་པའི་མཛའ་བཤེས་གཅིག་པུ་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་འདོད་པས། དེ་ཡི་ཐབས་བྱང་ཆུབ་མཆོག་ཏུ་སེམས་བསྐྱེད་ནས་རྒྱལ་སྲས་ཀྱི་སྤྱོད་པ་ལ་འཇུག་དགོས། དེའང་ཐོག་མར་སྡོམ་པའི་ཆོ་ག་ལ་ལྟོས་པས། ཇི་སྐད་བཤད་པའི་མཚན་ཉིད་དང་ལྡན་པའི་དགེ་བའི་བཤེས་གཉེན་གྱིས། རིགས་དང་སྐལ་བར་ལྡན་པའི་སློབ་མ་རྣམས་བྱང་ཆུབ་ཆེན་པོའི་ལམ་དུ་གཞུག་པའི་ཕྱིར། ཐེག་པ་ཆེན་པོ་ཤིན་ཏུ་རྒྱས་པའི་ལུགས་ཀྱི་སེམས་བསྐྱེད་དང་སྡོམ་པའི་ཆོ་ག་བྱེད་པར་འདོད་པས་སྦྱོར་བ། དངོས་གཞི། རྗེས་གསུམ་ལས། དང་པོ་ནི། གནས་གཙང་ཞིང་ཡིད་དུ་འོང་བར། སྟོན་པ་ཐུབ་པའི་དབང་པོ་ཤཱཀྱ་སེངྒེའི་སྣང་བརྙན་གཙོ་བོར་གྱུར་པའི་རྟེན་ཁྱད་པར་ཅན་གྱི་དྲུང་དུ། ཉེར་སྤྱོད་སྤྱི་དང་། ཁྱད་པར་སྤོས། མར་མེ། ཞལ་ཟས་རྣམས་ཀྱི་ཕྲེང་བ་ཚར་དུ་དངར་བས་མཚོན་ཅི་འབྱོར་བའི་མཆོད་པ་རྣམས་གཙང་ཞིང་བཀོད་པས་མཛེས་པ་དང་། གཏོར་མ་འབུལ་བར་འདོད་ན། ཟླུམ་གཏོར་དཀར་པོ་གཉིས་དང་། གཞི་བདག་གི་གཏོར་མ་དང་བཅས་པའང་བཤམས། དེ་ནས་སློབ་དཔོན་རང་ཉིད་ཁྲུས་བྱ། གྲུབ་ན་སེམས་བསྐྱེད་དང་སྡོམ་པ་བླང་། གང་ལྟར་ཡང་ལྟུང་བཤགས་སོགས་ཆོས་སྤྱོད་ཀྱི་རིམ་པ་ཇི་ལྟར་རིགས་པ་བྱ། དེ་ནས་སྟན་མཐོན་པོ་ལ་འདུག་སྟེ། སློབ་མ་རྣམས་ཕྱི་རོལ་ཏུ་ཁྲུས་བྱས། ནང་དུ་རང་རང་གི་སྟན་དམའ་བར་མེ་ཏོག་དང་བཅས་ཏེ་གུས་པའི་ཚུལ་གྱིས་འཁོད་དུ་གཞུག་གོ། །།གཉིས་པ་དངོས་གཞི་ནི། སློབ་དཔོན་གྱིས་ཆོས་ཐམས་ཅད་སྟོང་ཉིད་དུ་རྟོགས་པའི་ཤེས་རབ་དང་། སེམས་ཅན་ཐམས་ཅད་ཕན་བདེ་ལ་འགོད་པར་འདོད་པའི་བརྩེ་བ་དང་། ཁྱད་པར་སློབ་མ་རྣམས་ལ་བྱང་ཆུབ་ཀྱི་སེམས་བསྐྱེད་པར་འདོད་པའི་བསམ་པ་བཟང་པོ་དང་ལྡན་པས། གསལ་ཞིང་སྙན་པའི་ངག་གིས་འདི་སྐད་ཅེས་བརྡ་སྤྲོད་པར་བྱའོ། །འོ་སྐོལ་རྣམས་ཀྱིས་རྙེད་པར་དཀའ་བའི་དལ་འབྱོར་གྱི་རྟེན་ཁྱད་པར་རྙེད། མཇལ་བར་དཀའ་བའི་སངས་རྒྱས་ཀྱི་བསྟན་པ་རིན་པོ་ཆེ་དང་མཇལ། འཁོར་འདས་ཀྱི་འདམ་ཁ་རང་དབང་ཡོད་པའི་དུས་འདིར་དལ་འབྱོར་ལ་སྙིང་པོ་ལེན་པའི་ཆོས་རྣམ་པར་དག་པ་ཞིག་ལ་ཅི་ནས་ཀྱང་འབད་དགོས་ཏེ། སློབ་དཔོན་ཆེན་པོ་འཕགས་པ་ཀླུ་སྒྲུབ་ཀྱིས། རྒྱ་མཚོ་གཅིག་གནས་གཉའ་ཤིང་བུ་ག་དང་། །རུས་སྦལ་འཕྲད་པ་བས་ཀྱང་དུད་འགྲོ་ལས། །མི་ཉིད་ཆེས་ཐོབ་དཀའ་བས་མི་དབང་གིས། །དམ་ཆོས་སྤྱད་པས་དེ་འབྲས་མཆིས་པར་མཛོད། །ཅེས་གསུངས་ཤིང་། དམ་ཆོས་ཀྱི་ནང་ནས་ཀྱང་། བདག་གཞན་ཐམས་ཅད་སྡུག་བསྔལ་བ་དང་བཅས་པ་ལས་སྒྲོལ་ཤིང་། གནས་སྐབས་དང་། མཐར་ཐུག་གི་བདེ་བ་ཐམས་ཅད་ཐོབ་པར་བྱེད་པའི་རྒྱུ། བསོད་ནམས་དང་ཡོན་ཏན་མཐའ་ཡས་པའི་གཏེར་དུ་གྱུར་པ་ནི་བྱང་ཆུབ་ཀྱི་སེམས་ཁོ་ན་ཡིན་ཏེ། སློབ་དཔོན་ཆེན་པོ་ཞི་བ་ལྷས། །སྡུག་བསྔལ་མཐར་འབྱིན་འདོད་པ་དང་། བདེ་བའི་མཐར་ཡང་འགྲོ་འདོད་པས། །དད་པའི་རྩ་བ་བརྟན་བྱས་ནས། །བྱང་ཆུབ་ལ་ནི་བློ་བརྟན་བྱ། །ཞེས་དང་། །སློབ་དཔོན་ཆེན་པོ་ཙཱནྡྲ་གོ་མིས། །ཕྱོགས་དུས་ཀུན་ན་བཞུགས་པ་ཡི། །བྱང་ཆུབ་སེམས་དཔའ་རྣམས་ཀྱི་ཁྲིམས། །བསོད་ནམས་ཀུན་གྱི་གཏེར་གྱུར་གང་། ཞེས་གསུངས་པས་མཚོན་རྒྱལ་བ་སྲས་དང་བཅས་པས་བགྲོད་པ་གཅིག་པའི་ལམ་དུ་བསྔགས་པར་མཛད་པ་བྱང་ཆུབ་ཀྱི་སེམས་དེ་ཡང་ཀུན་རྫོབ་ཆོ་ག་ལས་ཐོབ་པ་དང་། དོན་དམ་པ་སྒོམ་པའི་སྟོབས་ཀྱིས་སྐྱེས་པ་གཉིས་ལས། དང་པོ་ལ། བསྐྱེད་བྱ་སེམས་ཀྱི་མཚན་ཉིད་ནི། གཞན་དོན་དུ་རྫོགས་བྱང་ལ་དམིགས་པའི་ཐེག་ཆེན་སློབ་པའི་སེམས་གང་ཞིག་བྱང་འཕགས་ཀྱི་མཉམ་བཞག་གི་ངོ་བོར་གྱུར་པའི་སེམས་བསྐྱེད་རྣམ་པར་བཅད་པའོ། །མཚན་གཞི་ནི། ཐེག་ཆེན་ཚོགས་སྦྱོར་བའི་རྒྱུད་ཀྱི་སེམས་བསྐྱེད་རྣམས་དང་། བྱང་འཕགས་ཀྱི་རྗེས་ཐོབ་ཀྱི་ངོ་བོར་གྱུར་པའི་སེམས་བསྐྱེད་ལྟ་བུའོ། །དབྱེ་ན། གྲོགས་དགེ་བའི་བཤེས་གཉེན་གྱི་སྟོབས་དང་། རྒྱུ་རིགས་སད་པའི་སྟོབས་དང་། འབྲས་བུ་དགེ་རྩ་རྒྱས་པའི་སྟོབས་དང་། ལམ་ཐེག་ཆེན་གྱི་སྡེ་སྣོད་ཐོས་པའི་སྟོབས་དང་། ཐོས་པ་དེ་ཉིད་མང་དུ་གོམས་པས་བསྐྱེད་པ་དང་ལྔ་ལས། དང་པོ་ནི་གྲོགས་ལ་རག་ལས་པས་མི་བརྟན་པའི་སེམས་བསྐྱེད་དང་། ཕྱི་མ་བཞི་ནི་མི་མཐུན་ཕྱོགས་ཀྱིས་ཉམས་དཀའ་བས་བརྟན་པའི་སེམས་བསྐྱེད་དེ། མདོ་སྡེ་རྒྱན་ལས། གྲོགས་སྟོབས་རྒྱུ་སྟོབས་རྩ་བའི་སྟོབས། །ཐོས་སྟོབས་དགེ་བ་གོམས་པ་ལས། །མི་བརྟན་པ་དང་བརྟན་འབྱུང་བ། །གཞན་གྱིས་བསྟན་པའི་སེམས་བསྐྱེད་བཤད། །ཅེས་གསུངས་པ་ལྟར། གཙོ་བོར་གཞན་གྱི་མཐུ་ལས་བྱུང་བ་ཀུན་རྫོབ་བྱང་ཆུབ་ཀྱི་སེམས་དེ་ལའང་། མ་ཐོབ་པ་ཐོབ་པར་བྱེད་པའི་ཆོ་ག །ཐོབ་པ་མི་ཉམས་པར་བསྲུང་བའི་ཚུལ། ཉམས་ན་ཕྱིར་བཅོས་པ་རྣམས་སུ་འདུ་བ་ལས། འདིར་དང་པོ་མ་ཐོབ་པ་ཐོབ་པར་བྱེད་པ་སེམས་བསྐྱེད་དང་སྡོམ་པའི་ཆོ་ག་བགྱིད་པའི་སྐབས་སུ་བབས་པ་ལགས། དེ་ཡང་འདི་ལ་སྔོན་གྱི་མཁས་པ་རྣམས་ཀྱི་གསུངས་ལས། སེམས་བསྐྱེད་ལ་དབུ་མ་ལུགས་དང་། སེམས་ཙམ་ལུགས་གཉིས་ཡོད། དབུ་མ་ལུགས་ནི་སྡོང་བོ་བཀོད་པ་དང་། ནམ་མཁའི་སྙིང་པོས་ཞུས་པ་ལ་སོགས་པའི་མདོའི་རྗེས་སུ་འབྲངས། འཕགས་པ་འཇམ་དཔལ་གྱིས་གསུངས། སློབ་དཔོན་ཆེན་པོ་ཀླུ་སྒྲུབ་ནས་བརྒྱུད། སློབ་དཔོན་ཆེན་པོ་ཞི་བ་ལྷ་ཡི་ལུགས། སློབ་དཔོན་དགྲ་ལས་རྣམ་རྒྱལ་ལ་སོགས་པའི་ཕྱག་ལེན། བསྟན་པའི་མངའ་བདག་ཆེན་པོ་དཔལ་ལྡན་ས་སྐྱ་པ་ལ་སོགས་པས་མཛད་པ་འདི་ཡིན། སེམས་ཙམ་ལུགས་ནི། བྱང་ཆུབ་སེམས་དཔའི་སྡེ་སྣོད་ལ་སོགས་པའི་མདོའི་རྗེས་སུ་འབྲངས། འཕགས་པ་བྱམས་པས་གསུངས་འཕགས་པ་ཐོགས་མེད་ནས་བརྒྱུད། སློབ་དཔོན་ཆེན་པོ་ཙནྡྲ་གོ་མིའི་ལུགས། ཇོ་བོ་ཆེན་པོ་རྗེ་ཡི་ཕྱག་ལེན། དགེ་བའི་བཤེས་གཉེན་བཀའ་གདམས་པ་རྣམས་ཀྱིས་མཛད་པ་འདི་ཡིན། འདི་གཉིས་ལ་བླང་བའི་ཡུལ། ལེན་པ་པོའི་གང་ཟག །ལེན་པའི་ཆོ་ག །བླངས་ནས་སྲུང་ཚུལ། ཉམས་ན་ཕྱིར་བཅོས་པ་རྣམས་ལ་མི་འདྲ་བའི་ཁྱད་པར་མང་དུ་ཡོད་ཅེས་གསུངས་ཤིང་། ཡང་མཁས་པ་འགའ་ཞིག་དེ་གཉིས་ཀྱི་དབྱེ་བ་དང་ཁྱད་པར་ལ་སོགས་པ་མི་འཐད་ཅེས་གསུང་ཡང་། འདིར་དེ་ལྟ་བུའི་དགག་སྒྲུབ་ཀྱི་རིམ་པ་རྣམས་བཏང་སྙོམས་སུ་བཞག་ནས། སློབ་དཔོན་ཆེན་པོ་འཕགས་པ་ཐོགས་མེད་དང་། ཇོ་བོ་རྗེ་དཱི་པཾ་ཀཱ་ར་ཤྲཱི་ཛྙཱ་ནའི་གསུང་རབས་ལས་འབྱུང་བ་ལྟར། ཡང་དག་པ་རྫོགས་པའི་སངས་རྒྱས་ནས། བདག་ཅག་གི་ཡོངས་སུ་འཛིན་པ་ཆེན་པོའི་བར་བུ་བརྒྱུད་པ་བར་མ་ཆད་པ་ལས་བྱོན་པའི་ཕྱག་ལེན་བཞིན་འབུལ་བ་ལ་དོན་རྣམ་པ་གསུམ་སྟེ། སེམས་བསྐྱེད་དང་སྡོམ་པའི་རྟེན་ངེས་པར་བྱ་བ་དང་། སྦྱོར་བ་རྗེས་སུ་སྒྲུབ་པ་དང་། རང་བཞིན་གཏན་ལ་དབབ་པའོ། །དང་པོ་རྟེན་ངེས་པར་བྱ་བ་ལ་གསུམ་སྟེ། སྡུག་བསྔལ་འཁོར་བའི་མཐའ་ལ་སྐྱོ་བ་བསྐྱེད་པ་དང་། ཞི་བ་མྱང་འདས་ཀྱི་མཐའ་ལ་ཞེན་པ་དགག་པ་དང་། མཐའ་གཉིས་དང་བྲལ་བའི་བྱང་ཆུབ་ཀྱི་སེམས་ལ་སྤྲོ་བ་བསྐྱེད་པའོ། །དང་པོ་སྡུག་བསྔལ་འཁོར་བའི་མཐའ་ལ་སྐྱོ་བ་བསྐྱེད་པ་ནི། འདི་ལྟར་ངེས་པར་བྱ་སྟེ། འོ་སྐོལ་རྣམས་ཀྱིས་དལ་འབྱོར་གྱི་མི་ལུས་ཐོབ་པའི་སྐབས་འདིར། འཁོར་བ་སྡུག་བསྔལ་གྱི་རྒྱ་མཚོ་ལས་བརྒལ་ཞིང་། བླ་ན་མེད་པའི་བྱང་ཆུབ་ཐོབ་པར་བྱ་བའི་ཕྱིར་འབད་དགོས། དེ་ཡི་རྒྱུ་མཚན་ཡང་དོན་དེ་གཉིས་རྟེན་འདི་ལ་བསྒྲུབ་ནུས་ཤིང་གཞན་གྱིས་མི་ནུས་པའི་ཕྱིར་ཏེ། སློབ་སྤྲིང་ལས། གང་ཞིག་ཐོབ་ན་སྐྱེ་བའི་རྒྱ་མཚོ་མཐར་འབྱིན་ཞིང་། །བྱང་ཆུབ་མཆོག་གི་ས་བོན་དགེ་བའང་འདེབས་བྱེད་པ། །ཡིད་བཞིན་ནོར་བུ་བས་ཀྱང་ཡོན་ཏན་ཆེས་ལྷག་པའི། །མི་ཉིད་ཐོབ་ནས་སུ་ཞིག་འབྲས་བུ་མེད་པར་བྱེད། །བདེ་གཤེགས་ལམ་བསྟེན་འགྲོ་བ་འདྲེན་པར་ཆས་གྱུར་ཅིང་། །སེམས་ཀྱི་སྟོབས་ཆེན་མི་ཡི་རྙེད་པ་གང་ཡིན་པའི། །ལམ་དེ་ལྷ་དང་ཀླུ་ཡིས་མི་རྙེད་ལྷ་མིན་དང་། །མཁའ་ལྡིང་རིག་འཛིན་མིའམ་ཅི་དང་ལྟོ་འཕྱེས་མིན། །ཞེས་གསུངས་སོ། །དལ་འབྱོར་དེའང་རྙེད་པར་དཀའ་སྟེ། སྡོང་པོ་བཀོད་པ་ལས། མིར་གྱུར་པ་ཡང་རྙེད་པར་དཀའ། དལ་བ་ཕུན་སུམ་ཚོགས་པ་རྣམ་པར་དག་པ་ཡང་རྙེད་པ་དཀའ། ཞེས་གསུངས་ཤིང་། སློབ་དཔོན་ཞི་བ་ལྷས། མི་ཡི་གྲུ་ལ་བརྟེན་ནས་ནི། །སྡུག་བསྔལ་ཆུ་བོ་ཆེ་ལས་སྒྲོལ། །གྲུ་འདི་ཕྱི་ནས་རྙེད་དཀའ་ཡིས། །རྨོངས་པ་དུས་སུ་གཉིད་མ་ལོག །ཅེས་གསུངས། རྙེད་པ་དེ་ཡང་དུས་རིང་དུ་མི་གནས་ཏེ། འཕགས་པ་ཀླུ་སྒྲུབ་ཀྱིས། ཚེ་འདི་གནོད་མང་རླུང་གིས་བཏབ་པ་ཡི། །ཆུ་ཡི་ཆུ་བུར་བས་ཀྱང་མི་རྟག་ན། །དབུགས་དབྱུང་དབུགས་རྔུབ་གཉིད་ཀྱིས་ལོག་པ་ལས། །སད་ཁོམ་གང་ལགས་དེ་ནི་ངོ་མཚར་ཆེ། །ཞེས་གསུངས་པས། མྱུར་དུ་དགེ་བ་ལ་འབད་དགོས། དེ་ལ་མ་འབད་པར་སྡིག་པ་བྱས་ན་ངན་འགྲོར་ལྷུང་སྟེ། ཞི་བ་ལྷས། དགེ་བ་དག་ཀྱང་མ་བྱས་ལ། །སྡིག་པ་དག་ཀྱང་ཉེར་བསགས་ན། །བསྐལ་པ་བྱེ་བ་བརྒྱར་ཡང་ནི། །བདེ་འགྲོའི་སྒྲ་ཡང་ཐོས་མི་འགྱུར། །ཞེས་གསུངས་ཤིང་། ངན་སོང་དུ་སྐྱེས་ན། དམྱལ་བ་ལ་ཚ་གྲང་ལ་སོགས་པའི་སྡུག་བསྔལ་དཔག་ཏུ་མེད་པ་ཡོད་དེ། འཕགས་པ་ཀླུ་སྒྲུབ་ཀྱིས། འདི་ན་ཉིན་གཅིག་མདུང་ཐུང་སུམ་བརྒྱ་ཡིས། །རབ་ཏུ་དྲག་བཏབ་སྡུག་བསྔལ་གང་ཡིན་པ། དེས་ནི་དམྱལ་བའི་སྡུག་བསྔལ་ཆུང་ངུ་ལའང་། །འོལ་ཡང་མི་ཉེ་ཆར་ཡང་མི་ཕོད་དོ། །ཞེས་གསུངས་སོ། །ཡི་དྭགས་ལའང་བཀྲེས་སྐོམ་ལ་སོགས་པའི་སྡུག་བསྔལ་མང་པོ་ཡོད་དེ། ཡི་དྭགས་ན་ཡང་འདོད་པས་ཕོངས་པ་ཡིས། །བསྐྱེད་པའི་སྡུག་བསྔལ་རྒྱུན་ཆགས་མི་འཆོས་པ། །བཀྲེས་སྐོམ་གྲང་དྲོ་ངལ་དང་འཇིགས་པ་ཡིས། །བསྐྱེད་པ་ཤིན་ཏུ་མི་བཟད་བསྟེན་འཚལ་ལོ། །ཞེས་གསུངས་སོ། །དུད་འགྲོ་ལའང་། གཅིག་ལ་གཅིག་ཟ་བ་ལ་སོགས་པའི་སྡུག་བསྔལ་ཡོད་དེ། དུད་འགྲོའི་སྐྱེ་གནས་ན་ཡང་བསད་པ་དང་། །བཅིངས་དང་བརྡེག་སོགས་སྡུག་བསྔལ་སྣ་ཚོགས་པ། །ཞི་འགྱུར་དགེ་བ་སྤངས་པ་རྣམས་ལ་ནི། གཅིག་ལ་གཅིག་ཟ་ཤིན་ཏུ་མི་བཟད་པ། ཞེས་གསུངས་པས་སྡིག་པ་སྤང་བ་ལ་འབད་དགོས་ཤིང་། དགེ་བ་ཡང་ཐར་པའི་ལམ་དུ་འགྱུར་བར་མ་བསྒྲུབས་ན་བསོད་ནམས་དང་མི་གཡོ་བའི་ལས་ཀྱིས་བདེ་འགྲོར་སྐྱེས་ཀྱང་དེ་དག་ཁ་ཅིག་ལ་སྡུག་བསྔལ་ཆེན་པོ་ཡོད་ཅིང་། དེ་མེད་པ་རྣམས་ཀྱང་དེ་ནས་ཤི་འཕོས་ནས་དམྱལ་བ་ལ་སོགས་པའི་སྡུག་བསྔལ་མྱོང་བ་འགྱུར་ཏེ། ལྷ་ཡུལ་འདོད་བདེ་ཤིན་ཏུ་ཆེན་པོ་དང་། །ཚངས་ཉིད་ཆགས་བྲལ་བདེ་བ་ཐོབ་ནས་སླར། །མནར་མེད་མེ་ཡི་བུད་ཤིང་འགྱུར་བ་ཡི། །སྡུག་བསྔལ་རྒྱུན་མི་འཆད་པ་བསྟེན་འཚལ་ལོ། །ཞེས་གསུངས་སོ། །མདོར་ན་འཁོར་བ་སྡུག་བསྔལ་གྱི་རང་བཞིན་ཏེ། མགོན་པོ་བྱམས་པས། མི་གཙང་བ་ལ་དྲི་ཞིམ་མེད་བཞིན་འགྲོ་ལྔ་དག་ལ་བདེ་བ་མེད། །དེ་ཡི་སྡུག་བསྔལ་རྟག་ཏུ་མེ་མཚོན་རྒྱ་ཚྭ་ལ་སོགས་རེག་སྐྱེས་བཞིན། །ཞེས་གསུངས་པས་དེ་ལ་ཐར་པའི་ཐབས་ལ་འབད་དགོས་ཏེ། འཕགས་པ་ཀླུ་སྒྲུབ་ཀྱིས། མགོའམ་གོས་ལ་གློ་བུར་མེ་ཤོར་ན། །དེ་དག་བཟློག་ཕྱིར་བགྱི་བ་བཏང་ནས་ཀྱང་། །ཡང་སྲིད་མེད་པར་བགྱི་སླད་འབད་འཚལ་ཏེ། །དེ་བས་ཆེས་མཆོག་དགོས་པ་གཞན་མ་མཆིས། །ཞེས་གསུངས་པས། འཁོར་བ་ལས་ཐར་བར་བྱ་བའི་དམ་པའི་ཆོས་ལ་འབད་པར་བྱའོ་སྙམ་པའི་བསམ་པ་ཞེ་ཐག་པ་ནས་བསྐྱེད་པ་ཞུ། གཉིས་པ་ཞི་བ་མྱང་འདས་ཀྱི་མཐའ་ལ་ཞེན་པ་དགག་པ་ནི། རང་ཉིད་འཁོར་བ་ལས་ཐར་ཀྱང་གཞན་གྱི་དོན་རྒྱུན་ཆད་པའི་ཕུང་པོ་ལྷག་མེད་ཀྱི་མྱང་འདས་དོན་དུ་གཉེར་བ་ནི། མ་ཆུས་ཁྱེར་བ་མཐོང་ཞིང་གདོན་པའི་ནུས་པ་ཡོད་བཞིན་དུ་དེ་མི་འདོན་པར་རང་ཉིད་སྐམས་ན་ཡིད་བདེ་བར་གནས་པ་ལྟར་ཤིན་ཏུ་མི་རིགས་པའི་ཕྱིར་ཐེག་ཆེན་པས་དོན་དུ་གཉེར་བྱ་མ་ཡིན་ཏེ། སློབ་དཔོན་ཙཱནྡྲ་གོ་མིས། ཉེ་དུ་འཁོར་བའི་རྒྱལ་མཚོའི་ནང་དུ་ཆུད་གྱུར་པ། །ཀློང་གི་ནང་དུ་ལྷུང་བ་ལྟ་བུར་སྣང་བཞིན་དུ། །སྐྱེ་ཤི་འཕོས་པས་ངོ་མ་ཤེས་པ་དེ་བོར་ནས། །གལ་ཏེ་གཅིག་ཐར་བྱེད་ན་དེ་ལས་ཁྲེལ་བོར་མེད། །བྱིས་པ་པང་ན་བཙས་པ་ཅི་ཡང་མི་ནུས་པ། །གང་གི་ནུ་ཞོ་བྱམས་པའི་ཤུགས་ཀྱིས་ཟགས་འཐུངས་པ། །ངལ་བ་མང་བསྟེན་བྱམས་པས་བསྟེན་པ་དེ་དག་འདིར། །ཤིན་ཏུ་མ་རབས་ཤིག་ནའང་སྤོང་བར་སུ་ཞིག་སྤྲོ། །ཞེས་གསུངས་པས། གཞན་དོན་དོར་ནས་རང་ཉིད་གཅིག་པུ་ཞི་བདེ་ཐོབ་པར་འདོད་པའི་བློ་སྤང་འཚལ་ལོ། །གསུམ་པ་མཐའ་གཉིས་དང་བྲལ་བའི་བྱང་ཆུབ་ཀྱི་སེམས་ལ་སྤྲོ་བ་བསྐྱེད་པ་ནི། མགོན་པོ་བྱམས་པས། བདག་སྲེད་མ་ལུས་ཤེས་རབ་ཀྱིས་བཅད་ནས། །སེམས་ཅན་སྲེད་ཕྱིར་བློ་ལྡན་ཞི་ཐོབ་མིན། །དེ་ལྟར་བློ་བརྩེ་བྱང་ཆུབ་ཐབས་བསྟན་ནས། །འཕགས་པ་འཁོར་བ་མྱ་ངན་འདས་མི་འགྱུར། །ཞེས་པ་ལྟར་འཁོར་འདས་གཉིས་ལ་མི་གནས་པའི་མྱང་འདས་ཡང་དག་པར་རྫོགས་པའི་སངས་རྒྱས་ཞེས་བྱ་བ་སྒྲིབ་པ་བག་ཆགས་དང་བཅས་པ་སྤངས། ཤེས་བྱ་ཇི་ལྟ་བ་དང་ཇི་སྙེད་པ་མངོན་སུམ་དུ་མཁྱེན། ཕྲིན་ལས་ཚད་ལས་འདས་ཤིང་རྒྱུན་མི་འཆད་པར་འབད་མེད་ལྷུན་གྲུབ་ཏུ་མཛད་པ་དེ་ཐོབ་པར་བྱ་བ་ཡིན་ལ། དེའི་རྒྱུ་ཡང་བྱང་ཆུབ་ཀྱི་སེམས་ཡིན་ཏེ། མདོ་སྡུད་པ་ལས། ཆུ་ཡི་ཐིགས་པས་བུམ་པ་དང་པོ་ཐ་མའི་བར། །རིམ་གྱིས་ཉུང་ངུ་ཉུང་ངུས་དེ་ཡོངས་འགེངས་པ་ལྟར། །དེ་བཞིན་དང་པོའི་སེམས་ཀྱང་བྱང་ཆུབ་མཆོག་རྒྱུ་སྟེ། །རིམ་གྱིས་དཀར་པོའི་ཡོན་ཏན་རྫོགས་པའི་སངས་རྒྱས་འགྱུར། །ཞེས་གསུངས་ཤིང་། རྣམ་སྣང་མངོན་བྱང་ལས་ཀྱང་། གསང་བའི་བདག་པོ་ཐམས་ཅད་མཁྱེན་པའི་ཡེ་ཤེས་དེ་ནི་སྙིང་རྗེའི་རྩ་བ་ལས་བྱུང་བ་ཡིན། བྱང་ཆུབ་ཀྱི་སེམས་ཀྱི་རྒྱུ་ལས་བྱུང་བ་ཡིན། ཐབས་ཀྱིས་མཐར་ཕྱིན་པ་ཡིན་ནོ། །ཞེས་གསུངས། སྡོང་པོ་བཀོད་པ་ལས་ཀྱང་། རིགས་ཀྱི་བུ་བྱང་ཆུབ་ཀྱི་སེམས་ནི་སངས་རྒྱས་ཀྱི་ཆོས་ཐམས་ཅད་བསྐྱེད་པས་ས་བོན་ལྟ་བུའོ། །ཞེས་གསུངས་པས། སེམས་ཅན་ཐམས་ཅད་ཀྱི་དོན་དུ་སངས་རྒྱས་ཐོབ་པར་བྱ་བའི་ཕྱིར་བྱང་ཆུབ་ཏུ་སེམས་བསྐྱེད་པར་བྱའོ་སྙམ་པའི་འདུན་པ་དྲག་པོ་དུང་བ་རེ་བསྐྱེད་མཛོད། གཉིས་པ་སྦྱོར་བ་རྗེས་སུ་སྒྲུབ་པ་ལ་གཉིས་ཏེ། སྨོན་པ་དང་འཇུག་པའོ། །དང་པོ་ལའང་སྦྱོར་དངོས་རྗེས་གསུམ་གྱི་སྦྱོར་བ་ལ་གསུམ་སྟེ། ཡུལ་ཁྱད་པར་ཅན་ལ་གསོལ་བ་གདབ་པ་དང་། རྟེན་ཁྱད་པར་ཅན་ལ་སྐྱབས་སུ་འགྲོ་བ་དང་། ཐབས་ཁྱད་པར་ཅན་གྱི་སྒོ་ནས་ཚོགས་བསགས་པའོ། །དང་པོ་ཡུལ་ཁྱད་པར་ཅན་ལ་གསོལ་བ་གདབ་པ་ནི། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་སྤྱན་དྲངས་ནས། ཕྱག་དང་མཆོད་པ་ཕུལ་ཏེ་དགེ་བའི་བཤེས་གཉེན་ལ་སྟོན་པའི་འདུ་ཤེས་བསྐྱེད་ལ་ཕྱག་དང་མཎྜལ་ཕུལ་ནས་འདི་ལྟར་གསོལ་བ་གདབ་པར་བྱ་སྟེ། ཞེས་འབྱུང་བས། ཐོག་མར་ཁྱེད་རང་རྣམས་ཀྱིས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་མོས་གུས་གདུང་ཤུགས་དྲག་པོས་གསོལ་བ་བཏབ་པས་མདུན་གྱི་ནམ་མཁར་མངོན་སུམ་ལྟ་བུར་བྱོན་པ་ལ་ཕྱག་དང་མཆོད་པ་ཕུལ་བའི་ཡིད་ཀྱིས་ཡན་ལག་ལྔ་ས་ལ་གཏུགས་པའི་ཕྱག་དང་བཅས་ཏེ་འདི་གསུང་བར་ཞུ། ཇི་སྙེད་སུ་དག །སོགས་ནས། རྒྱལ་བ་ཀུན་ལ་ཕྱག་འཚལ་མཆོད་པར་བགྱི། བར་ལན་གཅིག །སླར་ཡང་དགེ་བའི་བཤེས་གཉེན་ལ་སྟོན་པའི་འདུ་ཤེས་བསྐྱེད་དེ་ཕྱག་གསུམ་མཛད་པར་ཞུ། ཞེས་བརྗོད་ལ་ཕྱག་གསུམ་འཚལ་དུ་གཞུག །དེ་ནས་སྨོན་པ་བྱང་ཆུབ་གྱི་མཆོག་ཏུ་སེམས་བསྐྱེད་པའི་ཡོན་དུ་དམིགས་ཏེ་མཎྜལ་ཞིག་འབུལ་བར་ཞུ། ཞེས་བརྡ་སྦྱར་ལ། མཎྜལ་ཚོམ་བུ་བདུན་མ་སྤྱི་ལྟར་ལ། མ་ཚང་བ་མེད་པ་འདི་ཉིད་བླ་མ་རྒྱལ་བ་སྲས་དང་བཅས་པ་ལ་སྨོན་པ་བྱང་ཆུབ་གྱི་མཆོག་ཏུ་སེམས་བསྐྱེད་པ་ཞུ་བའི་ཡོན་དུ། སོགས་སྦྱར་ལ་འབུལ་དུ་གཞུག །དེ་ལྟར་མཎྜལ་ཕུལ་ནས་ཕྱག་སྙིམ་པ་མེ་ཏོག་དང་བཅས་པས་ཐལ་མོ་སྦྱར་ཏེ་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛད་པར་ཞུ། ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དང་། བྱང་ཆུབ་སེམས་དཔའ་ས་ཆེན་པོ་ལ་བཞུགས་པ་རྣམས་ཀྱིས། དང་པོར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཐུགས་བསྐྱེད་པ་དེ་བཞིན་དུ། རང་རང་གི་མིང་ནས་སྨོས་ཏེ་བདག་མིང་འདི་ཞེས་བགྱི་བ་ཡང་། སློབ་དཔོན་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དུ་གསོལ། ཞེས་ལན་གསུམ་བརྗོད་དོ། །གཉིས་བརྟེན་ཁྱད་པར་ཅན་ལ་སྐྱབས་སུ་འགྲོ་བ་ནི། ཐུན་མོང་གི་སྐྱབས་འགྲོ་ལས་ཁྱད་པར་གསུམ་གྱིས་ཁྱད་པར་དུ་འཕགས་པའི་ཐེག་ཆེན་གྱི་སྐྱབས་འགྲོ་བྱེད་པ་ཡིན་ཏེ། དུས་ཀྱི་ཁྱད་པར་ནི་བྱང་ཆུབ་སྙིང་པོའི་བར་ཡིན་ལ། ཡུལ་གྱི་ཁྱད་པར་ནི། སངས་རྒྱས་སྐུ་གསུམ་གྱི་བདག་ཉིད། རྟོགས་པའི་ཆོས་ཐེག་ཆེན་གྱི་འགོག་ལམ་དང་། ལུང་གི་ཆོས་ཐེག་ཆེན་གྱི་གསུང་རབ་དགེ་འདུན་ནི་བྱང་སེམས་འཕགས་པ་ཕྱིར་མི་ལྡོག་པ་རྣམས་ཡིན་ནོ། །བསམ་པའི་ཁྱད་པར་ནི། སེམས་ཅན་ཐམས་ཅད་ཀྱིས་ཐོག་མ་མེད་པ་ནས་ལན་གྲངས་དཔག་ཏུ་མེད་པར་ཕན་བཏགས་པས་དྲིན་ཆེ་ལ། དྲིན་ཆེན་དེ་རྣམས་འཁོར་བར་སྡུག་བསྔལ་དྲག་ལ་ཡུན་རིང་བས་གཙོས་ཤིང་ལས་དང་ཉོན་མོངས་པའི་འཆིང་བས་བཅིངས་པས་ཐར་པའི་ཐབས་མེད་པས་སྙིང་རེ་རྗེ་སྙམ་དུ་བསམས་ལ། འདི་རྣམས་གནས་སྐབས་དང་མཐར་ཐུག་གི་བདེ་བ་དང་ལྡན་ཞིང་སྡུག་བསྔལ་དང་བྲལ་བར་བདག་གིས་བྱེད་དགོས་པ་ལ། ད་ལྟ་བདག་ལ་དེའི་ནུས་པ་མེད་ཅིང་། དེ་ལྟར་ནུས་པ་ནི་སངས་རྒྱས་ཁོ་ན་ཡིན་པས་བདག་གིས་སངས་རྒྱས་ཐོབ་པར་བྱེད་དགོས། དེའང་དཀོན་མཆོག་ལ་རག་ལས་པས། བདག་གིས་སེམས་ཅན་ཐམས་ཅད་སྡུག་བསྔལ་ལས་སྒྲོལ་ནུས་ཀྱི་སངས་རྒྱས་ཐོབ་པའི་དོན་དུ་དཀོན་མཆོག་ལ་སྐྱབས་ཤིང་བློ་གཏོད་པས་བདག་དེ་ལྟར་འགྱུར་བར་དཀོན་མཆོག་མཁྱེན་སྙམ་པའི་འདུན་པ་དྲག་པོ་བྱ་སྟེ། མདོ་སྡེ་རྒྱན་ལས། དེ་ནི་དེ་དངོས་འདོད་པས་ཁས་ལེན་དེ་ཡང་སྙིང་རྗེ་ལས་རིག་བྱ། ཞེས་གསུངས་པས་ད་ལྟ་བདག་ལ་སེམས་ཅན་སྡུག་བསྔལ་ལས་སྒྲོལ་བའི་ནུས་པ་མི་འདུག་པས། མ་ལག་ཞ་མའི་བུ་ཆུས་ཁྱེར་བ་གཞན་ལ་རམ་མདའ་ཟློག་ཟེར་བ་ལྟར་དྲིན་ཅན་སེམས་ཅན་རྣམས། སྡུག་བསྔལ་དང་ཀུན་འབྱུང་གི་ཆུས་ཁྱེར་རོ་རམ་མདའ་བཟློག་ཟེར་བའི་ཚུལ་དུ་བྱེད་པ་ཡིན་གསུང་། དེས་ན་ད་ལྟ་སེམས་ཅན་རྣམས་སྡུག་བསྔལ་ལས་སྒྲོལ་བ་དང་། མ་འོངས་པ་ན་བདག་ལ་སེམས་ཅན་ཐམས་ཅད་སྒྲོལ་བའི་ནུས་པ་ཡོད་པ་དཀོན་མཆོག་མཁྱེན་སྙམ་པའི་བསམ་པ་ཁྱད་པར་ཅན་དང་ལྡན་པས། བདག་ཀྱང་རྨི་ལམ་དང་སྒྱུ་མ་ལྟར་བདེན་པ་མེད་པར་ཤེས་པར་བྱས་ནས། སེམས་གཞན་དུ་མ་ཡེངས་པར་རྩེ་གཅིག་པའི་ཡིད་ཀྱིས་སྐྱབས་སུ་འགྲོ་བ་འདིའི་རྗེས་ཟློས་ལན་གསུམ་གནང་བར་ཞུ། སློབ་དཔོན་དགོངས་སུ་གསོལ། རང་རང་གི་མིང་ནས་སྨོས་ཏེ། བདག་མིང་འདི་ཞེས་བགྱི་བས་དུས་འདི་ནས་བཟུང་སྟེ། ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ། རྐང་གཉིས་རྣམས་ཀྱི་མཆོག་སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །སློབ་དཔོན་དགོངས་སུ་གསོལ། རང་རང་མིང་ནས་སྨོས་ཏེ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ། ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ། ཆོས་རྣམས་ཀྱི་མཆོག་ཞི་བ་འདོད་ཆགས་དང་བྲལ་བའི་ཆོས་རྣམས་ལ་སྐྱབས་སུ་མཆིའོ། །སློབ་དཔོན་དགོངས་སུ་གསོལ། རང་རང་གི་མིང་ནས་སྨོས་ཏེ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ། ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ། ཚོགས་རྣམས་ཀྱི་མཆོག །འཕགས་པ་བྱང་ཆུབ་སེམས་དཔའ་ཕྱིར་མི་ལྡོག་པའི་དགེ་འདུན་རྣམས་ལ་སྐྱབས་སུ་མཆིའོ། །ཞེས་པས་སྐྱབས་སུ་སོང་ནས། དེ་ཡི་བསླབ་བྱ་ལ། དེང་ཕྱིན་ཆད་སངས་རྒྱས་ལ་སྟོན་པ། ཐེག་ཆེན་གྱི་ཆོས་ལ་ལམ། བྱང་སེམས་འཕགས་པ་རྣམས་ལ་ལམ་སྒྲུབ་པའི་གྲོགས་སུ་བཟུང་བའི་བསམ་སྦྱོར་བརྟན་པོ་བསྐྱེད་དགོས་པ་ལགས། གསུམ་པ་ཐབས་ཁྱད་པར་ཅན་གྱི་སྒོ་ནས་ཚོགས་བསག་ཅིང་སྒྲིབ་པ་སྦྱང་བ་ནི། འགའ་ཞིག་ཕྱག་དང་མཆོད་པ་ཙམ་ལས་མི་མཛད་ནའང་། ཇོ་བོ་ཆེན་པོས་ཡན་ལག་བདུན་ཚང་བར་བྱེད་པར་བཤད་པས། ཐོག་མར་ཡན་ལག་བདུན་པ་འབུལ་བའི་ཡུལ་གསལ་གདབ་པ་ནི། མདུན་གྱི་ནམ་མཁར་བསྟན་པའི་བདག་པོ་བཅོམ་ལྡན་ཐུབ་པ་ཆེན་པོ་ལ། འཁོར་ཉེ་བའི་སྲས་བརྒྱད་ལ་སོགས་པས་བསྐོར་བས་གཙོ་བྱས་པའི་སངས་རྒྱས་དང་བྱང་ཆུབ་སེམས་དཔའ་དཔག་ཏུ་མེད་པ་བཞུགས་པ་བསམས་ནས། དེ་རྣམས་དང་སློབ་དཔོན་ལྷན་གཅིག་པའི་སྤྱན་སྔར་བདག་གཞན་སེམས་ཅན་ཐམས་ཅད་ཀྱིས་ལུས་ཞིང་གི་རྡུལ་རྙེད་དུ་སྤྲུལ་ནས། སྒོ་གསུམ་གུས་པ་ཆེན་པོས་ཕྱག་འཚལ་བའི་མོས་པས། རྗེས་ཟློས་ཀྱི་ཚིག་རྣམས་དལ་ཞིང་དོད་ལ་སྐབས་ཕྱེད་པར་བརྗོད་པ་ཤིན་ཏུ་གལ་ཆེ་བས། ཡན་ལག་ལྔ་ས་ལ་གཏུགས་པའི་ཕྱག་དང་བཅས་ཏེ་འདིའི་རྗེས་ཟློས་ལན་གསུམ་མཛོད། སངས་རྒྱས་ཐམས་ཅད་འདུས་པའི་སྐུ། །རྡོ་རྗེ་འཛིན་པའི་ངོ་བོ་ཉིད། །དཀོན་མཆོག་གསུམ་གྱི་རྩ་བ་སྟེ། །བླ་མ་རྣམས་ལ་ཕྱག་འཚལ་ལོ། །ཞེས་ཚིགས་བཅད་རེ་དང་ཕྱག་རེ་སྦྲགས་པ་ལན་གསུམ་བྱེད་དུ་གཞུག །དེ་བཞིན་དུ། །མགོན་པོ་ཐུགས་རྗེ་ཆེ་ལྡན་པ། །ཐམས་ཅད་མཁྱེན་པའི་སྟོན་པ་པོ། །བསོད་ནམས་ཡོན་ཏན་རྒྱ་མཚོའི་གཞི། །དེ་བཞིན་གཤེགས་ལ་ཕྱག་འཚལ་ལོ། །དག་པས་འདོད་ཆགས་བྲལ་བའི་རྒྱུ། །དགེ་བས་ངན་སོང་ལས་སྒྲོལ་ཞིང་། །གཅིག་ཏུ་དོན་དམ་མཆོག་གྱུར་པ། །ཞི་གྱུར་ཆོས་ལ་ཕྱག་འཚལ་ལོ། །གྲོལ་ནས་གྲོལ་བའི་ལམ་ཡང་སྟོན། །བསླབ་པ་དག་ལ་རབ་ཏུ་གུས། །ཞིང་གི་དམ་པ་ཡོན་ཏན་ཞིང་། །དགེ་འདུན་ལ་ཡང་ཕྱག་འཚལ་ལོ། །ཞེས་ཕྱག་དང་བཅས་ཏེ་བྱར་གཞུག་གོ །དེ་ལྟར་བླ་མ་དང་དཀོན་མཆོག་ལ་ཕྱག་འཚལ་བ་སྔོན་དུ་སོང་ནས། གཉིས་པ་མཆོད་པ་འབུལ་བ་ལ་ལྔ་ལས། དང་པོ་དངོས་སུ་བཤམས་པའི་མཆོད་པ་ནི། ཐོག་མར་སློབ་དཔོན་གྱིས་སོ་སོའི་རིག་པས་བྱིན་གྱིས་བརླབས་པར་བྱ་བ་ཡིན་ཏེ། ཞེས་མཚམས་སྦྱར་ལ། སློབ་དཔོན་གྱིས། རིན་པོ་ཆེ་ལ་སོགས་པའི་སྣོད་ཕུན་སུམ་ཚོགས་པར་དངོས་སུ་བཤམས་པའི་མཆོད་པ་རྣམས་སོ་སོའི་རིག་པས་བྱིན་གྱིས་བརླབས་པའི། ལྷ་རྫས་ཀྱི་མཆོད་ཡོན། མེ་ཏོག །བདུག་སྤོས། སྣང་གསལ། དྲི་མཆོག །ཞལ་ཟས། རོལ་མོ་ལ་སོགས་པ་མཆོད་པའི་བྱེ་བྲག་བསམ་གྱིས་མི་ཁྱབ་པར་གྱུར། ཨོཾ་བཛྲ་ཨརྒྷཾ་ཨཱཿཧཱུྃ། ཨོཾ་བཛྲ་པུཥྤེ་ཨཱཿཧཱུྃ། ནས་ཤབྡའི་བར་སྦྱར་བས་བྱིན་གྱིས་བརླབ། དེ་ལྟར་བྱིན་གྱིས་བརླབས་ནས་དངོས་སུ་བཤམས་པའི་མཆོད་པ་རྣམས་རྒྱུར་བྱས་པ་ལས་བྱུང་བའི་ལྷ་རྫས་ཀྱི་མཆོད་པའི་སྤྲིན་ཕུང་ནམ་མཁའི་ཁམས་ཁྱབ་པར་གྱུར་པ་དང་། གཞན་ཡང་འཇིག་རྟེན་གྱི་ཁམས་དཔག་ཏུ་མེད་པ་ན་ཡོད་པའི་མེ་ཏོག་ལ་སོགས་པ་རྣམས། བླ་མ་རྒྱལ་བ་སྲས་དང་བཅས་པ་ལ་འབུལ་ལོ་སྙམ་པས་འདི་གསུང་བར་ཞུ། ཨོཾ་སརྦ་ཏ་ཐཱ་ག་ཏ་ཨརྒྷཾ་པྲ་ཏཱིཙྪ་པཱུ་ཛ་མེ་གྷ་ས་མུ་དྲྭ་སྥ་ར་ཎ་ས་མ་ཡེ་ཧཱུྃ། དེ་བཞིན་དུ། པུཥྤེ་ནས་ཤབྡའི་བར་སྦྱར་བས་མཆོད་དུ་གཞུག །སྤྲོ་ན། མཆོད་ཡོན་ཕལ་ཆེར། སོགས་ཚིགས་བཅད་ཇི་ལྟར་རིགས་པ་དང་སྤེལ་ནས་ཀྱང་རུང་ངོ་། །གཉིས་པ་བདག་པོས་ཡོངས་སུ་མ་བཟུང་བའི་མཆོད་པ་ནི། ཕྱོགས་བཅུ་རབ་འབྱམས་མུ་མཐའ་མེད་པའི་འཇིག་རྟེན་གྱི་ཁམས་ཇི་སྙེད་ན། བདག་པོས་ཡོངས་སུ་མ་བཟུང་བའི་རིན་པོ་ཆེའི་རི་དཔག་བསམ་གྱི་ཤིང་། འབྲུ་དང་མེ་ཏོག །སྨན་དང་ནགས་ཚལ་ལ་སོགས་པ་ཐམས་ཅད་རབ་ཏུ་དྭང་བའི་བློས་བླངས་ཏེ་སངས་རྒྱས་དང་། བྱང་ཆུབ་སེམས་དཔའ་རྣམས་ལ་འབུལ་ན། བདག་དང་མཐའ་ཡས་པའི་སེམས་ཅན་ཐམས་ཅད་ཚོགས་རྫོགས་པའི་དོན་དུ་ཁྱེད་རྣམས་ཀྱིས་བཞེས་སུ་གསོལ་སྙམ་པའི་སྒོ་ནས་འདིའི་རྗེས་ཟློས་མཛོད། །མེ་ཏོག་འབྲས་བུ་ཇི་སྙེད་ཡོད་པ་དང་། །སྨན་གྱི་རྣམ་པ་གང་དག་ཡོད་པ་དང་། །འཇིག་རྟེན་རིན་ཆེན་ཇི་སྙེད་ཡོད་པ་དང་། །ཆུ་གཙང་ཡིད་དུ་འོང་བ་ཅི་ཡོད་དང་། །རིན་ཆེན་རི་བོ་དང་ནི་དེ་བཞིན་དུ། །ནགས་ཚལ་ས་ཕྱོགས་དབེན་ཞིང་ཉམས་དགའ་དང་། །ལྗོན་ཤིང་མེ་ཏོག་རྒྱན་སྤྲས་སྤུད་པ་དང་། །ཤིང་གང་འབྲས་བཟང་ཡལ་ག་དུད་པ་དང་། །ལྷ་སོགས་འཇིག་རྟེན་ན་ཡང་དྲི་དང་ནི། །སྤོས་དང་དཔག་བསམ་ཤིང་དང་རིན་ཆེན་ཤིང་། །མ་རྨོས་འཁྲུངས་པའི་ལོ་ཏོག་རྣམ་པ་དང་། །མཚོ་དང་རྫིང་བུ་པདྨས་བརྒྱན་པ་དག །ངང་པ་སྐད་སྙན་ཤིན་ཏུ་ཡིད་འོང་ལྡན། །གཞན་ཡང་མཆོད་པར་འོས་པའི་རྒྱན་རྣམས་ནི། །ནམ་མཁའ་རབ་འབྱམས་ཁམས་ཀྱི་མཐའ་གཏུགས་པ། །ཡོངས་སུ་བཟུང་བ་མེད་པ་དེ་དག་ཀུན། །བློ་ཡིས་བླངས་ནས་ཐུབ་པ་སྐྱེས་ཀྱི་མཆོག །སྲས་དང་བཅས་པ་རྣམས་ལ་ལེགས་འབུལ་ན། །ཡོན་གནས་དམ་པ་ཐུགས་རྗེ་ཆེ་རྣམས་ཀྱིས། །བདག་ལ་བརྩེར་དགོངས་བདག་གི་འདི་དག་བཞེས། །གསུམ་པ་ལུས་འབུལ་ནི། བདག་གི་ལུས་འདི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་བྲན་དུ་ཕུལ་ནས། དེ་དག་གི་བྱ་བ་སེམས་ཅན་གྱི་དོན་འབའ་ཞིག་བྱ་སྙམ་པའི་སྒོ་ནས་འདིའི་རྗེས་ཟློས་མཛོད། རྒྱལ་དང་དེ་སྲས་རྣམས་ལ་བདག་གིས་ནི། །བདག་གི་ལུས་ཀུན་གཏན་དུ་དབུལ་བར་བགྱི། །སེམས་དཔའ་མཆོག་རྣམས་བདག་ནི་ཡོངས་བཞེས་ཤིག །གུས་པས་ཁྱེད་ཀྱི་འབངས་སུ་མཆི་བར་བགྱི། །བཞི་པ་བློས་སྤྲུལ་པའི་མཆོད་པ་ནི། །བདག་གི་ཚིག་ལས་འབྱུང་བའི། ཁྲུས་ཀྱི་ཁང་པ་ཞེས་པ་ལ་སོགས་པ་འདི་རྣམས་ཚིགས་བཅད་ལས་ཇི་ལྟར་བྱུང་བའི་རིམ་པ་བཞིན་དུ་ལམ་ལམ་བྱུང་བར་མོས་ནས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་འབུལ་བར་ཞུ། ཞེས་བརྡ་སྦྱར་ནས་རང་གིས་ཚིག་དལ་ལ་དད་པ་སྐབས་ཕྱེད་པས་འདི་རྣམས་བརྗོད་པར་བྱའོ། །ཁྲུས་ཀྱི་ཁང་པ་ཤིན་ཏུ་དྲི་ཞིམ་པ། །ཤེལ་གྱི་ས་གཞི་གསལ་ཞིང་འཚེར་བ་བསྟར། །རིན་ཆེན་འབར་བའི་ཀ་བ་ཡིད་འོང་ལྡན། །མུ་ཏིག་འོད་ཆགས་བླ་རེ་བྲེས་པ་དེར། །དེ་བཞིན་གཤེགས་དང་དེ་ཡི་སྲས་རྣམས་ལ། །རིན་ཆེན་བུམ་པ་མང་པོ་སྤོས་ཀྱི་ཆུ། །ཡིད་འོང་ལེགས་པ་བཀང་བ་གླུ་དང་ནི། །རོལ་མོར་བཅས་པ་དུ་མས་སྐུ་ཁྲུས་གསོལ། །དེ་དག་སྐུ་ལ་མཚུངས་པ་མེད་པའི་གོས། །གཙང་ལ་དྲི་རབ་བསྒོས་པས་སྐུ་ཕྱིའོ། །དེ་ནས་དེ་ལ་ཁ་དོག་ལེགས་བསྒྱུར་བའི། །ན་བཟའ་ཤིན་ཏུ་དྲི་ཞིམ་དམ་པ་འབུལ། །གོས་བཟང་སྲབ་ལ་འཇམ་པ་སྣ་ཚོགས་དང་། །རྒྱན་མཆོག་བརྒྱ་ཕྲག་དེ་དང་དེ་དག་གིས། །འཕགས་པ་ཀུན་ཏུ་བཟང་དང་འཇམ་དབྱངས་དང་། །འཇིག་རྟེན་དབང་ཕྱུག་སོགས་ལའང་བརྒྱན་པར་བགྱི། །སྟོང་གསུམ་ཀུན་ཏུ་དྲི་ངད་ལྡང་བ་ཡི། །དྲི་མཆོག་རྣམས་ཀྱིས་ཐུབ་དབང་རྣམས་ཀྱི་སྐུ། །གསེར་སྦྱངས་བཙོ་མ་བྱི་དོར་བྱས་པ་ལྟར། །འོད་ཆགས་འབར་བ་དེ་དག་བྱུག་པར་བགྱི། །ཐུབ་དབང་མཆོད་གནས་མཆོག་ལ་ཡིད་འོང་བའི། །མེ་ཏོག་མནྡ་ར་དང་པདྨ་དང་། །ཨུཏྤལ་ལ་སོགས་དྲི་ཞིམ་ཐམས་ཅད་དང་། །ཕྲེང་བ་སྤེལ་ལེགས་ཡིད་འོང་རྣམས་ཀྱིས་མཆོད། །སྤོས་མཆོག་ཡིད་འཕྲོག་དྲི་ངད་ཁྱབ་པ་ཡི། །བདུག་པའི་སྤྲིན་ཚོགས་རྣམས་ཀྱང་དེ་ལ་དབུལ། །ཞལ་ཟས་བཟའ་བཏུང་སྣ་ཚོགས་བཅས་པ་ཡི། །ལྷ་བཤོས་རྣམས་ཀྱང་དེ་ལ་དབུལ་བར་བགྱི། །གསེར་གྱི་པདྨ་ཚར་དུ་དངར་བ་ཡི། །རིན་ཆེན་སྒྲོན་མེ་རྣམས་ཀྱང་དབུལ་བར་བགྱི། །ས་གཞི་བསྟར་བ་སྤོས་ཀྱིས་བྱུགས་པ་དེར། །མེ་ཏོག་ཡིད་འོང་སིལ་མ་དགྲམ་པར་བགྱི། །གཞལ་མེད་ཕོ་བྲང་བསྟོད་དབྱངས་ཡིད་འོང་ལྡན། །མུ་ཏིག་རིན་ཆེན་རྒྱན་འཕྱང་མཛེས་འབར་བ། །དཔག་ཡས་ནམ་མཁའི་རྒྱན་གྱུར་དེ་དག་ཀྱང་། །ཐུགས་རྗེའི་རང་བཞིན་ཅན་ལ་དབུལ་བར་བགྱི། །རིན་ཆེན་གདུགས་མཛེས་གསེར་གྱི་ཡུ་བ་ཅན། །ཁོར་ཡུག་རྒྱན་གྱི་རྣམ་པ་ཡིད་འོང་ལྡན། །དབྱིབས་ལེགས་ལྟ་ན་སྡུག་པ་བསྒྲེང་བ་ཡང་། །རྟག་ཏུ་ཐུབ་དབང་རྣམས་ལ་དབུལ་བར་བགྱི། །ལྔ་པ་མཆོད་པ་ཡོངས་སུ་བསྔོ་བ་ནི། །དེ་དག་ལས་གཞན་ཡང་མཆོད་པའི་བྱེ་བྲག་མཐའ་ཀླས་པས་སངས་རྒྱས་དང་བྱང་ཆུབ་སེམས་དཔའ་དཔག་ཏུ་མེད་པ་མཉེས་པར་བྱེད་ཅིང་། །སེམས་ཅན་ཐམས་ཅད་ཀྱི་སྡུག་བསྔལ་ཞི་བར་བྱེད་པའི་ཚོགས་ནམ་མཁའི་ཁམས་ཁྱབ་པར་གནས་ཤིང་མཆོད་པའི་སྤྲིན་གྱི་ཆར་ཆེན་པོ་འབབས་པར་གྱུར་ཅིག་སྙམ་པས་འདིའི་རྗེས་ཟློས་མཛོད། དེ་ལས་གཞན་ཡང་མཆོད་པའི་ཚོགས། །རོལ་མོ་དབྱངས་སྙན་ཡིད་འོང་ལྡན། །སེམས་ཅན་སྡུག་བསྔལ་སེལ་བྱེད་པའི། །སྤྲིན་རྣམས་སོ་སོར་གནས་གྱུར་ཅིག །ཅེས་ལན་གཅིག་དང་། ན་མོ་རཏྣ་ཏྲ་ཡཱ་ཡ། ན་མོ་བྷ་ག་ཝཱ་ཏེ། བཛྲ་སཱ་ར་པྲ་མརྡྷ་ནེ། ཏ་ཐཱ་ག་ཏཱ་ཡ། ཨརྷ་ཏེ། སམྱཀྶཾ་བུདྡྷ་ཡ། ཏདྱ་ཐཱ། ཨོཾ་བཛྲེ་བཛྲེ། མ་ཧཱ་བཛྲེ། མ་ཧཱ་བིདྱཱ་བཛྲེ། མ་ཧཱ་བིདྱ་བོ་དྷི་ཙིཏྟ་བཛྲེ། མ་ཧཱ་བོ་དྷི་མཎྜོ་པ་སཾ་ཀྲ་མ་ཎ་བཛྲེ། སརྦ་ཀརྨ་ཨཱ་ཝ་ར་ཎ་བི་ཤོ་དྷ་ན་བཛྲེ་སྭཱ་ཧཱ། ཞེས་མཆོད་པའི་སྤྲིན་གྱི་གཟུངས་ལན་གསུམ་བརྗོད་དུ་གཞུག་གོ །དེ་ནས་སྐབས་འདིར་གཏོར་མ་འབུལ་བར་སྤྲོ་ན། དེ་རྣམས་ཀྱིས་མཆོད་པའི་ཡན་ལག་དངོས་གཞི་གྲུབ་ནས། རྗེས་འབྲེལ་དུ་གཏོར་མ་འབུལ་བ་ནི་སློབ་དཔོན་གྱིས་བགྱི་བར་གདའ་སྟེ། ཞེས་མཚམས་སྦྱར་ལ། གཏོར་མ་རྣམས་ལ་ཆབ་བྲན། སློབ་དཔོན་གྱིས། རིན་པོ་ཆེ་ལ་སོགས་པའི་གཏོར་སྣོད་ཀྱི་ནང་དུ་གཟུགས་སྒྲ་དྲི་རོ་རེག་བྱའི་སྐྱེ་མཆེད་ཀྱི་ངོ་བོར་གྱུར་པའི་གཏོར་མ་འདོད་པའི་ཡོན་ཏན་བསམ་གྱིས་མི་ཁྱབ་པས་གང་བར་གྱུར། ཨོཾ་ཨ་ཀཱ་རོ། སོགས་ལན་གསུམ་གྱིས་བརླབས་ནས། གཏོར་མ་དང་པོ། ཨོཾ་སརྦ་གུ་རུ་བུདྡྷ་དྷརྨ་སངྒྷ་ས་པ་རི་ཝཱ་ར་ཨོཾ་ཨ་ཀཱ་རོ། སོགས་བཏགས་པ་གསུམ་མམ་ལྔས་བླ་མ་དང་དཀོན་མཆོག་གསུམ་ལ་ཕུལ་ནས། བླ་མ་དང་དཀོན་མཆོག་རིན་པོ་ཆེ་རྣམ་པ་གསུམ་གྱིས་མཆོད་སྦྱིན་གྱི་གཏོར་མ་རྒྱ་ཆེན་པོ་འདི་བཞེས་ལ། བདག་ཅག་དཔོན་སློབ་རྣམས་ཀྱི་རྒྱུད་ལ་བྱམས་པ་དང་སྙིང་རྗེ་བྱང་ཆུབ་ཀྱི་སེམས་རིན་པོ་ཆེ་བཅོས་མ་མ་ཡིན་པ་སྐྱེ་བ་དང་། སྐྱེས་པ་གོང་ནས་གོང་དུ་འཕེལ་བར་མཛད་དུ་གསོལ། ཞེས་གསོལ་བ་གདབ། གཏོར་མ་གཉིས་པ། ཨོཾ་དྷརྨ་པཱ་ལ་ས་པ་རི་ཝཱ་ར་ཨོཾ་ཨ་ཀཱ་རོ། སོགས་བཏགས་པ་ལན་གསུམ་གྱིས་ཆོས་སྐྱོང་སྤྱི་ལ་ཕུལ་ནས། དཔལ་རྡོ་རྗེ་ནག་པོ་ཆེན་པོ་ལ་སོགས་པ་ཆོས་སྐྱོང་བའི་སྲུང་མ་རྣམས་དང་། དཀར་ཕྱོགས་ལ་མངོན་པར་དགའ་བའི་ལྷ་ཀླུ་གནོད་སྦྱིན་འབྱུང་པོའི་ཚོགས་རྣམས་མཆོད་སྦྱིན་གྱི་གཏོར་མ་རྒྱ་ཆེན་པོ་འདི་བཞེས་ལ། སངས་རྒྱས་ཀྱི་བསྟན་པ་དར་བ་དང་། འཇིག་རྟེན་དུ་དགེ་ལེགས་རྒྱ་ཆེན་པོ་འབྱུང་བ་དང་། བདག་ཅག་དཔོན་སློབ་རྣམས་ཀྱི་རྒྱུད་ལ་བྱང་ཆུབ་ཀྱི་སེམས་རིན་པོ་ཆེ་མི་ཉམས་ཤིང་གོང་ནས་གོང་དུ་འཕེལ་བ་དང་། བར་ཆད་ཐམས་ཅད་ཞི་བའི་ཕྲིན་ལས་དང་སྟོང་གྲོགས་དམ་པ་མཛད་དུ་གསོལ། ཞེས་འདོད་དོན་གསོལ། གཏོར་མ་གསུམ་པ། གཉུག་མར་གནས་པའི་གཞིའི་བདག་པོ་རྣམས་མདུན་དུ་མངོན་སུམ་བཞིན་འཁོད་པར་བསམས་ལ། ཨོཾ་བྷཱུ་མི་པ་ཏི་ས་པ་རི་ཝཱ་ར་ཨོཾ་ཨ་ཀཱ་རོ། སོགས་བཏགས་པ་ལན་གསུམ་གྱིས་བསྔོས་ལ། མཆོད་སྦྱིན་གྱི་གཏོར་མ་རྒྱ་ཆེན་པོ་འདི་གཞི་བདག །གནས་བདག གྲོང་བདག །དཀོར་བདག །གཉུག་མར་གནས་པ་རྣམས་ལ་འབུལ་ལོ། །མཆོད་དོ། །སྟོབ་བོ། །བཞེས་ཤིག །སངས་རྒྱས་ཀྱི་བསྟན་པ་དར་བ་དང་། འཇིག་རྟེན་གྱི་ཁམས་སུ་བདེ་ལེགས་ཐམས་ཅད་འབྱུང་བ་དང་། བདག་ཅག་དཔོན་སློབ་རྣམས་ཀྱིས་བྱང་ཆུབ་ཀྱི་སེམས་རིན་པོ་ཆེ་བསྐྱེད་པ་ལ་དགའ་ཞིང་རྗེས་སུ་ཡི་རངས་ནས། བར་དུ་གཅོད་པ་ཐམས་ཅད་བསྲུང་བའི་སྟོང་གྲོགས་དམ་པ་མཛོད་ཅིག །ཅེས་ཕྲིན་ལས་གཞོལ། གསུམ་པ་སྡིག་པ་བཤགས་པ་ནི། རང་གཞན་ཐམས་ཅད་ཀྱིས། རྒྱུ་དུག་གསུམ་གྱིས་ཀུན་ནས་བསླངས་ཤིང་། བྱེད་པ་པོ་སྒོ་གསུམ་དང་རྗེས་སུ་འབྲེལ་བས་སྔར་བསགས་པའི་སྡིག་ལྟུང་ཐམས་ཅད་དྲན་ཡུལ་དུ་བྱས་ནས་དེ་ལ་འགྱོད་པ་དྲག་པོ་བསྐྱེད་པ་དང་། ད་ཕྱིན་ཆད་སྲོག་ལ་བབས་ཀྱང་སྡིག་པ་མི་བྱེད་སྙམ་པའི་ཞེ་བཅད་ཆེན་པོ་དང་། ད་ནི་གཞན་དོན་དུ་སངས་རྒྱས་ཐོབ་པར་བྱ་བའི་ཕྱིར་རྟེན་དཀོན་མཆོག་གསུམ་ལ་བརྟེན་ནས་སྡིག་པའི་གཉེན་པོའི་ཆོས་རྣམས་ཚུལ་བཞིན་དུ་ཉམས་སུ་བླང་བར་བྱའོ་སྙམ་པའི་བསམ་པ་ཞེ་ཐག་པའི་སྒོ་ནས་སྡིག་བཤགས་ཀྱི་ཚིག་བརྗོད་པས་སྡིག་པ་ཐམས་ཅད་སངས་སངས་དག་པའི་མོས་པ་དང་བཅས་ཏེ་འདིའི་རྗེས་ཟློས་མཛོད། །འདོད་ཆགས་ཞེ་སྡང་གཏི་མུག་དབང་གིས་ནི། །ལུས་དང་ངག་དང་དེ་བཞིན་ཡིད་ཀྱིས་ཀྱང་། །སྡིག་པ་བདག་གིས་བགྱིས་པ་ཅི་མཆིས་པ། །དེ་དག་ཐམས་ཅད་བདག་གིས་སོ་སོར་བཤགས། བཞི་པ་དགེ་བ་ལ་རྗེས་སུ་ཡི་རང་བ་ནི། འཕགས་པ་དང་སོ་སོར་སྐྱེ་བོའི་བདེ་བ་དང་དགེ་བའི་རྩ་བ་ཐམས་ཅད་ལ་ཞེ་ཐག་པ་ནས་དགའ་བའི་བསམ་པས་འདི་ཡི་རྗེས་ཟློས་མཛོད། །ཕྱོགས་བཅུའི་རྒྱལ་བ་ཀུན་དང་སངས་རྒྱས་སྲས། །རང་རྒྱལ་རྣམས་དང་སློབ་དང་མི་སློབ་དང་། །འགྲོ་བ་ཀུན་གྱི་བསོད་ནམས་གང་ལ་ཡང་། །དེ་དག་ཀུན་གྱི་རྗེས་སུ་བདག་ཡི་རངས། ལྔ་པ་ཆོས་ཀྱི་འཁོར་ལོ་བསྐོར་བར་བསྐུལ་བ་ནི། ཕྱོགས་བཅུའི་འཇིག་རྟེན་གྱི་ཁམས་ན་སངས་རྒྱས་བཅོམ་ལྡན་འདས་གང་དག་སངས་རྒྱས་ནས་ཞུ་བ་པོའི་ཚོགས་རྫོགས་པར་བྱ་བ་ལ་སོགས་པའི་དོན་དུ་ཆོས་ཀྱི་འཁོར་ལོ་མི་བསྐོར་བའང་ཡོད་པས། དེ་རྣམས་ལ་གདུལ་བྱ་རྣམས་ཀྱི་དོན་དུ་ཆོས་ཀྱི་འཁོར་ལོ་བསྐོར་བར་ཞུ་སྙམ་པའི་བསམ་པ་ཞེ་ཐག་པས་གསོལ་བ་གདབ་པ་འདིའི་རྗེས་ཟློས་མཛོད། །གང་རྣམས་ཕྱོགས་བཅུའི་འཇིག་རྟེན་སྒྲོན་མ་དག །བྱང་ཆུབ་རིམ་པར་སངས་རྒྱས་མ་ཆགས་བརྙེས། །མགོན་པོ་དེ་དག་བདག་གིས་ཐམས་ཅད་ལ། །འཁོར་ལོ་བླ་ན་མེད་པ་བསྐོར་བར་བསྐུལ། །དྲུག་པ་མྱ་ངན་ལས་མི་འདའ་བར་གསོལ་བ་གདབ་པ་ནི། གང་དག་ཕྱོགས་བཅུའི་འཇིག་རྟེན་གྱི་ཁམས་ན། སངས་རྒྱས་འགའ་ཞིག་སངས་རྒྱས་ལ་དཀོན་པའི་འདུ་ཤེས་བསྐྱེད་པ་ལ་སོགས་པའི་དོན་དུ་མྱ་ངན་ལས་འདའ་བའི་ཚུལ་སྟོན་པར་བཞེད་པའང་ཡོད་པས། དེ་རྣམས་ལ་ཞིང་དེ་རྣམས་ཀྱི་གདུལ་བྱའི་དོན་དུ་མྱ་ངན་ལས་མི་འདའ་བར་ཡུན་རིང་དུ་བཞུགས་སུ་གསོལ་སྙམ་པའི་བསམ་པ་ཞེ་ཐག་པས་མྱ་ངན་ལས་མི་འདའ་བར་གསོལ་བ་གདབ་པ་འདིའི་རྗེས་ཟློས་མཛོད། མྱ་ངན་འདའ་སྟོན་གང་བཞེད་དེ་དག་ལ། །འགྲོ་བ་ཀུན་ལ་ཕན་ཞིང་བདེ་བའི་ཕྱིར། །བསྐལ་པ་ཞིང་གི་རྡུལ་རྙེད་བཞུགས་པར་ཡང་། །བདག་གིས་ཐལ་མོ་རབ་སྦྱར་གསོལ་བར་བགྱི། བདུན་པ་བསྔོ་བ་ནི། དེ་ལྟར་ཕྱག་འཚལ་བ་ལ་སོགས་པའི་དགེ་བའི་རྩ་བ་མཚོན་དུས་གསུམ་དུ་བསགས་པའི་དགེ་བའི་རྩ་བས་རྣམས་སེམས་ཅན་ཐམས་ཅད་ཀྱི་སྡུག་བསྔལ་སེལ་བ་དང་། གནས་སྐབས་དང་མཐར་ཐུག་གི་བདེ་བ་ཐམས་ཅད་འགྲུབ་པའི་རྒྱུར་བྱང་ཆུབ་ཆེན་པོར་ཡོངས་སུ་བསྔོ་བར་བགྱིའོ་སྙམ་པའི་ཡིད་ཀྱིས་འདིའི་རྗེས་ཟློས་མཛོད། ཕྱག་འཚལ་བ་དང་མཆོད་ཅིང་བཤགས་པ་དང་། །རྗེས་སུ་ཡི་རང་བསྐུལ་ཞིང་གསོལ་བ་ཡིས། །དགེ་བ་ཅུང་ཟད་བདག་གིས་ཅི་བསགས་པ། །ཐམས་ཅད་རྫོགས་པའི་བྱང་ཆུབ་ཕྱིར་བསྔོའོ། །དེ་རྣམས་ཀྱིས་སྦྱོར་བའི་རིམ་པ་གྲུབ་ནས། གཉིས་པ་དངོས་གཞི་ནི། ཇི་སྐད་དུ། དེ་ལ་དང་པོ་རིགས་ནུས་ལས། །སྙིང་རྗེའི་ས་བོན་རབ་སད་ཅིང་། །སྦྱོར་དང་བསམ་པ་ཕུན་ཚོགས་པས། །བྱང་ཆུབ་སེམས་ནི་ཡོངས་སུ་བཟུང་། ཞེས་འབྱུང་བས། སེམས་བསྐྱེད་དེ་རང་སྟོབས་དང་། གཞན་སྟོབས་དང་། སྦྱོར་བའི་སྟོབས་ལས་སྐྱེ་བ་ལས། དང་པོ་ནི། རང་ལ་ཐེག་ཆེན་གྱི་རིགས་ཡོད་པ་ཡིན་ཏེ། ཁྱེད་རྣམས་ལ་བྱང་ཆུབ་ཏུ་སེམས་བསྐྱེད་པར་འདོད་པའི་བློ་བྱུང་བས་དེ་ཡོད་པར་གྲུབ། གཉིས་པ་ནི། སངས་རྒྱས་ཀྱི་ཡོན་ཏན་དང་བྱང་ཆུབ་ཀྱི་སེམས་ཀྱི་ཕན་ཡོན་ཐོས་པ་དང་། ཐེག་ཆེན་གྱི་ཆོས་ལ་ཐོས་བསམ་སྒོམ་གསུམ་བྱས་པ་ལ་སོགས་པས་སྐྱེ་བ་ཡིན་ཏེ། དེ་དག་ཀྱང་ཅི་རིགས་པར་ཚང་། གསུམ་པ་ནི། བླ་མ་ལ་སངས་རྒྱས་ཀྱི་འདུ་ཤེས་དང་། རང་ལ་རྨི་ལམ་སྒྱུ་མ་ལྟ་བུའི་འདུ་ཤེས། སེམས་ཅན་ཐམས་ཅད་ལ་བྱམས་པ་དང་སྙིང་རྗེའི་འདུ་ཤེས་བྱེད་པ་སྟེ། དང་པོ་ནི། བླ་མ་འདིས་བདག་ལ་སངས་རྒྱས་ཀྱི་རྒྱུའི་གཙོ་བོ་བྱང་ཆུབ་ཀྱི་སེམས་བསྐྱེད་པར་བྱེད་པས་ན་སངས་རྒྱས་དངོས་ཡིན་སྙམ་པ་བྱ། དེ་ལྟར་སངས་རྒྱས་ཀྱི་འདུ་ཤེས་སྐྱེས་ན་ཤིན་ཏུ་ལེགས། དེ་མ་སྐྱེས་ནའང་སེམས་བསྐྱེད་ཀྱི་སློབ་དཔོན་དུ་འོས་པའི་བྱང་ཆུབ་སེམས་དཔའ་ཡིན་སྙམ་པའི་བསམ་པ་ངེས་པར་བསྐྱེད་དགོས་སོ། །གཉིས་པ་ནི། ཕུང་པོ་ལྔ་ལ་བདག་ཅེས་བཏགས་ཤིང་བློ་འཁྲུལ་པས་བདག་ཏུ་བཟུང་བ་མ་གཏོགས་བདག་བདེན་པར་མ་གྲུབ་པས་སྒྱུ་མའམ་རྨི་ལམ་ལྟ་བུ་ཡིན་སྙམ་དུ་བསམ་མོ། །གསུམ་པ་ནི། དབུ་མ་སྙིང་པོ་ལས། བྱམས་པ་དང་ནི་སྙིང་རྗེ་དང་། །ཤེས་རབ་ཆེན་པོས་བརྒྱན་པ་ཡི། །སངས་རྒྱས་ས་བོན་བྱང་ཆུབ་སེམས། །དེ་ཕྱིར་མཁས་པས་དེ་མི་བཏང་། །ཞེས་པ་དང་། མདོ་སྡེ་རྒྱན་ལས། དེ་ཡི་རྩ་བ་སྙིང་རྗེར་འདོད། །ཅེས་པ་དང་། བྱང་ཆུབ་སེམས་དཔའི་སྡེ་སྣོད་ཀྱི་མདོ་སྡེ་ལས། འདི་ལ་བྱང་ཆུབ་སེམས་དཔའི་བྱང་ཆུབ་ཏུ་མངོན་པར་མོས་པའི་སྔོན་དུ་འགྲོ་བ་ནི་སྙིང་རྗེ་ཆེན་པོ་ཡིན་ནོ། །ཞེས་གསུངས་པས་འདི་ལྟར་ངེས་པར་བྱ་སྟེ། མཐའ་ཡས་པའི་སེམས་ཅན་ཐམས་ཅད་ཀྱིས་ཐོག་མ་མེད་པ་ནས་ལན་གྲངས་དཔག་ཏུ་མེད་པར་བདག་གི་མར་བྱས་ཤིང་གནོད་པ་ལས་སྐྱོབས། ཕན་པ་སྒྲུབ། རང་བས་ཀྱང་གཅེས་པའི་འདུ་ཤེས་ཀྱིས། རང་གི་སྡིག་པ་དང་སྡུག་བསྔལ་ཐམས་ཅད་ཁྱད་དུ་བསད་ནས་ང་ལ་ཕན་པ་སྣ་ཚོགས་བྱས། ང་བདེ་བ་ལྡན་ཞིང་བདེ་བ་དང་མི་འབྲལ་བའི་དོན་དུ་ཚ་གྲང་བཀྲེས་སྐོམ་ངལ་དུབ་ལ་སོགས་པ་དང་ལྡན་པའི་འབད་རྩོལ་ཆེན་པོ་གྲངས་མེད་པར་བྱས་ཤིང་། ང་ན་དང་འཆི་བ་ལ་སོགས་པའི་སྡུག་བསྔལ་མ་བཟོད་ནས་ངུས་པའི་འཆི་མ་བསགས་ཀྱང་རྒྱ་མཚོ་ཆེན་པོ་བས་ཀྱང་ལྷག་པ་ཡོད་དེ། དེ་ལྟར་གནོད་པ་ལས་བཟློག་ཅིང་ཕན་པ་བསྒྲུབས་པས་འདི་རྣམས་ཤིན་ཏུ་དྲིན་ཆེ་སྙམ་དུ་ལེགས་པར་བསམས་ལ། འདི་རྣམས་གནས་སྐབས་དང་མཐར་ཐུག་གི་བདེ་བ་དང་ལྡན་ན་ཅི་མ་རུང་སྙམ་པ་དང་། དེ་ལ་བདག་གིས་དགོད་པར་བྱའོ་སྙམ་པའི་བྱམས་པ་དང་། འདི་རྣམས་བདེ་བར་འདོད་ཀྱང་སྡུག་བསྔལ་དང་ལྡན་ཏེ། དམྱལ་བ་ལ་ཚ་གྲང་། ཡི་དྭགས་ལ་བཀྲེས་སྐོམ། དུད་འགྲོ་ལ་གཅིག་ལ་གཅིག་ཟ་བ་ལ་སོགས་པ་དང་། མི་ལ་སྐྱེ་རྒ་ན་འཆི་ལ་སོགས་པ་དང་། ལྷ་མ་ཡིན་ལ་འཐབ་རྩོད་ལ་སོགས་པ་དང་། འདོད་ཁམས་ཀྱི་ལྷ་ལ་འཆི་ལྟས་ལ་སོགས་པའི་སྡུག་བསྔལ་བསམ་གྱིས་མི་ཁྱབ་པ་ཡོད་ལ། ཁམས་གོང་མ་དག་ལའང་དེ་ལས་ཉམས་ནས་དམྱལ་བ་ལ་སོགས་པར་སྐྱེ་བར་འགྱུར་བས་མཚོན་སྡུག་བསྔལ་ཁོ་ན་ལས་མ་འདས་པའི་ཚུལ། མདོ་དྲན་པ་ཉེར་བཞག་ལས། སེམས་ཅན་དམྱལ་བ་དམྱལ་མེས་ཉམས། །ཡི་དྭགས་བཀྲེས་ཤིང་སྐོམ་པས་ཉམས། །དུད་འགྲོ་གཅིག་ལ་གཅིག་ཟས་ཉམས། །མི་དག་འཚོ་བ་ཐུང་བས་ཉམས། །ལྷ་དག་བག་མེད་པ་ཡིས་ཉམས། །འཁོར་བ་ཁབ་ཀྱི་རྩེ་ཙམ་ལ། །བདེ་བ་ནམ་ཡང་ཡོད་མ་ཡིན། །ཞེས་དང་། གཞན་ཡང་མདོ་ལས། འདོད་པའི་ཁམས་ཀྱང་སྐྱོན་དང་བཅས་པ་སྟེ། །གཟུགས་ཀྱི་ཁམས་ཀྱང་སྐྱོན་དང་བཅས་པའོ། །དེ་བཞིན་གཟུགས་མེད་ཁམས་ཀྱང་སྐྱོན་དང་བཅས། །ཞེས་དང་། འདུལ་བ་ལུང་ལས། །སྲེད་སྲིད་མ་རིག་དབང་གིས་སྐྱེ་བོ་རྣམས། །མི་དང་ལྷ་དང་ངན་སོང་རྣམ་གསུམ་སྟེ། །འགྲོ་བ་ལྔ་པོ་དག་ཏུ་མི་མཁས་འཁོར། །དཔེར་ན་རྫ་མཁན་འཁོར་ལོ་འཁོར་བ་བཞིན། །སྲིད་གསུམ་རྒ་དང་ནད་ཀྱི་སྡུག་བསྔལ་འབར། །འདི་ན་འཆི་མེད་རབ་འབར་མགོན་མེད་དེ། །སྲིད་ལས་བྱུང་ལ་འགྲོ་བ་རྟག་ཏུ་རྨོངས། །བུམ་པར་ཆུད་པའི་བུང་བ་འཁོར་བ་བཞིན། །ཞེས་གསུངས་པ་ལྟར། མདོར་ན་གནས་ཁམས་གསུམ་དུ་རྟེན་རིགས་དྲུག་གང་དུ་སྐྱེས་ཀྱང་སྡུག་བསྔལ་གྱི་སྡུག་བསྔལ་དང་། འགྱུར་བའི་སྡུག་བསྔལ་དང་། ཁྱབ་པ་འདུ་བྱེད་ཀྱི་སྡུག་བསྔལ་ཁོ་ནས་དུས་རྟག་ཏུ་སྡུག་བསྔལ་བར་གྱུར་བའི་སེམས་ཅན་དེ་དག་སྡུག་བསྔལ་དེ་ལས་ཐར་བར་འདོད་ཀྱང་། ལས་དང་ཉོན་མོངས་པའི་འཆིང་བ་དམ་པོས་བཅིངས། །དགེ་བའི་བཤེས་གཉེན་གྱིས་མ་ཟིན། ཐར་པར་འགྲོ་བའི་གྲོགས་བཟང་པོ་དང་བྲལ། འཕགས་པ་རྣམས་ཀྱི་གདུལ་བྱར་ཡང་མ་གྱུར་པས་སྡུག་བསྔལ་ལས་ཐར་པའི་ཐབས་མི་འདུག་པས་སྙིང་རེ་རྗེ་སྙམ་དུ་སེམས་ཅན་ཐམས་ཅད་ཀྱི་སྡུག་བསྔལ་རང་ཐོག་དུ་བབ་པ་ཙམ་དུ་བསམས་ལ། འདི་རྣམས་སྡུག་བསྔལ་རྒྱུ་དང་བཅས་པ་ཐམས་ཅད་དང་བྲལ་ན་ཅི་མ་རུང་། དེ་དང་བྲལ་བར་བདག་གིས་བྱའོ་སྙམ་པའི་སྙིང་རྗེ་དྲག་ཏུ་བསྒོམས་པ་དང་། དེ་ལྟར་འདི་རྣམས་བདེ་བ་ལ་དགོད་ཅིང་སྡུག་བསྔལ་ཐམས་ཅད་ལས་སྒྲོལ་བའི་ཁུར་ང་ལ་བབ་ཅིང་། སྤྲོ་ཡང་ད་ལྟ་དེའི་ནུས་པ་མེད་པར་མ་ཟད། ང་བས་ལྷག་པའི་ཚངས་པ་དང་བརྒྱ་བྱིན། དེ་བས་ལྷག་པའི་ཉན་རང་དགྲ་བཅོམ་པ་ལ་སོགས་པ་ལ་ཡང་མེད། དེ་ལྟར་སུས་ནུས་ན་དོན་གཉིས་ཕུན་སུམ་ཚོགས་པའི་རྫོགས་པའི་སངས་རྒྱས་ཁོ་ནས་ནུས་པས་དེ་ཐོབ་པར་བྱ། དེའི་རྒྱུའི་གཙོ་བོ་སེམས་བསྐྱེད་ཡིན་པས་དེ་བླང་བར་བྱ་སྙམ་དུ་ཞེ་ཐག་པ་ནས་བསམས་ལ། སེམས་བསྐྱེད་ནས་དེའི་བསླབ་བྱ་རྣམས་ལ་བསླབས་པས་བདག་གིས་གདོན་མི་ཟ་བར་སངས་རྒྱས་ཐོབ་ངེས། དེ་ཐོབ་ནས་སེམས་ཅན་རྣམས་སྡུག་བསྔལ་གྱི་ཆུ་བོ་ལས་བསྒྲལ། ལས་དང་ཉོན་མོངས་པའི་འཆིང་བ་ལས་སྒྲོལ། གནས་སྐབས་སུ་སྡུག་བསྔལ་ལས་དབུགས་དབྱུང་། མཐར་ཐུག་མྱ་ངན་ལས་བཟླ་སྙམ་དུ་བསམས་ལ། མདུན་གྱི་ནམ་མཁར་ཐུབ་པ་ཆེན་པོ་ལ་སོགས་པ་སངས་རྒྱས་དང་བྱང་ཆུབ་སེམས་དཔའ་དཔག་ཏུ་མེད་པ་མངོན་སུམ་དུ་བཞུགས་པར་མོས་པ་དང་བཅས་ཏེ་དགོངས་སུ་གསོལ་ཞེས་བརྗོད་པའི་ཚེ་འདི་རྣམས་ཀྱི་ཡེ་ཤེས་དང་ཐུགས་རྗེས་ངེས་པར་གཟིགས་སྙམ་དུ་བསམ་པ་ཤུགས་དྲག་ཏུ་བསྐྱེད་ལ། པུས་མོ་གཡས་པའི་ལྷ་ང་ས་ལ་བཙུག་པའམ་ཙོག་པུར་འདུག་སྟེ། ཐལ་མོ་སྦྱར་ནས་དོན་དྲན་བཞིན་པས་སེམས་རྩེ་གཅིག་ཏུ་བྱས་ཏེ། ཚིག་འདི་རྣམས་ཀྱི་རྗེས་སུ་བཟླས་པ་ལན་གསུམ་གྱི་སྒོ་ནས་སེམས་བསྐྱེད་དགོས་པས་རྗེས་ཟློས་དང་པོ་གནང་བར་ཞུ། ། ༈ ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། སློབ་དཔོན་བདག་ལ་དགོངས་སུ་གསོལ། སོ་སོ་རང་རང་གི་མིང་ནས་སྨོས་ཏེ། བདག་གི་མིང་འདི་ཞེས་བགྱི་བས་སྐྱེ་བ་འདི་དང་སྐྱེ་བ་གཞན་དང་གཞན་དག་ཏུ་སྦྱིན་པའི་རང་བཞིན་དང་། ཚུལ་ཁྲིམས་ཀྱི་རང་བཞིན་དང་། བསྒོམས་པའི་རང་བཞིན་གྱི་དགེ་བའི་རྩ་བ་ཅི་བགྱིས་པ་དང་། བགྱིད་དུ་སྩལ་བ་དང་། བགྱིད་པ་ལ་རྗེས་སུ་ཡི་རང་བའི་དགེ་བའི་རྩ་བ་དེས། ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དང་། ས་ཆེན་པོ་ལ་རབ་ཏུ་བཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་བླ་ན་མེད་པར་ཡང་དག་པར་རྫོགས་པའི་བྱང་ཆུབ་ཏུ་ཐུགས་བསྐྱེད་པར་མཛད་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཆེན་པོར་སེམས་བསྐྱེད་པར་བགྱིའོ། །སེམས་ཅན་མ་བསྒྲལ་བ་རྣམས་བསྒྲལ་བར་བགྱིའོ། །མ་གྲོལ་བ་རྣམས་དགྲོལ་བར་བགྱིའོ། །དབུགས་མ་དབྱུང་བ་རྣམས་དབུགས་དབྱུང་བར་བགྱིའོ། །ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་བཟླ་བར་བགྱིའོ། །ཞེས་ལན་གཅིག་བརྗོད་དུ་གཞུག །དེའི་རྗེས་ཟློས་དང་པོ་སོང་ནས། གཉིས་པ་དང་གསུམ་པའང་ལན་རེ་རེ་ཞིང་བློ་སྦྱོང་ཞིང་བྱ་བར་གསུངས་པས་ན་བསམ་པ་འདི་བཞིན་དུ་མཛོད། ནམ་མཁའ་ལ་མཐའ་མེད་པ་བཞིན་སེམས་ཅན་གྱི་ཁམས་ལའང་མཐའ་མེད། མཐའ་མེད་པའི་སེམས་ཅན་རེ་རེས་ཀྱང་རང་ཉིད་གྱི་ཕ་མ་གྲངས་མེད་པ་བྱས་ཤིང་བྱས་རེས་བཞིན་དུ་ད་ལྟའི་ཕ་མ་དང་མཚུངས་པར་ཕན་པ་ཚད་མེད་པ་བཏགས། གནོད་པ་ལས་ཅི་ནུས་ཀྱིས་བསྐྱབས་པའི་དྲིན་ཅན་ཤ་སྟག་ཡིན་པས། བདག་གིས་ཀྱང་དེ་རྣམས་ལ་དྲིན་བཟོ་བའི་སླད་དུ་ཕན་པ་བསྒྲུབ་ཅིང་། གནོད་པ་ལས་བཟློག་པར་བྱ། དེ་ཡང་གང་གིས་ཕན་ན་བདེ་བས་དངོས་སུ་ཕན་ཞིང་། དགེ་བས་བརྒྱུད་ནས་ཕན་པའི་ཕྱིར་མ་དྲིན་ཅན་འདི་རྣམས་བདེ་བ་དང་བདེ་བའི་རྒྱུ་དང་ལྡན་པར་གྱུར་ན་ཅི་མ་རུང་སྙམ་པའི་བྱམས་པ་དང་། སྡུག་བསྔལ་གྱིས་དངོས་སུ་གནོད་ཅིང་། སྡིག་པས་བརྒྱུད་ནས་གནོད་པའི་ཕྱིར་སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་བྱུང་ན་ཅི་མ་རུང་སྙམ་པའི་སྙིང་རྗེ་དང་། ཚུལ་དེ་ཐམས་ཅད་ཀྱང་བདག་ཁོ་ནས་བགྱིའོ་སྙམ་དུ་ཁུར་ཁྱེར་བ་ལྷག་པའི་བསམ་པ་རྣམ་པར་དག་པ་སྔོན་དུ་འགྲོ་བས། དེ་ལྟར་སེམས་ཅན་ཐམས་ཅད་ཕན་བདེ་མཐའ་དག་ལ་དགོད་ནུས་པ་ནི་རྫོགས་པའི་སངས་རྒྱས་ཀྱི་གོ་འཕང་ཐོབ་པ་ཁོ་ན་ལ་རགས་ལས་པའི་ཕྱིར། བདག་གིས་ཀྱང་མ་རྒན་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་དེ་ཅི་ནས་ཀྱང་ཐོབ་ངེས་པ་ཞིག་བྱ། དེ་ཡང་རྒྱུ་མེད་རྐྱེན་མེད་ལས་མི་འབྱུང་བས། རྒྱུ་རྐྱེན་གྱི་གཙོ་བོ་རྣམ་པ་ཀུན་ཏུ་དགེ་བའི་རྩ་བ་ཇི་སྙེད་ཅིག་བསགས་པའི་མཐུ་ལ་བརྟེན་ནས་བྱང་ཆུབ་ཀྱི་སེམས་རིན་པོ་ཆེ་བསྐྱེད་ཅིང་། རྒྱལ་བའི་སྲས་ཀྱི་ལམ་ལས་རྣམ་པ་ཐམས་ཅད་མཁྱེན་པ་རྫོགས་པའི་སངས་རྒྱས་ཀྱི་འབྲས་བུ་ཐོབ་པར་བྱས་ཏེ། སེམས་ཅན་ཐམས་ཅད་སྡུག་བསྔལ་གྱི་ཆུ་གཏེར་ལས་བསྒྲལ་ཞིང་ཀུན་འབྱུང་གི་འཆིང་བ་ལས་སྒྲོལ་བ་དང་། སྲིད་པའི་ཁམས་ལས་དབུགས་དབྱུང་ཞིང་མི་གནས་པའི་མྱ་ངན་ལས་འདས་པ་ཆེན་པོར་བཟླ་བར་བགྱིའོ་སྙམ་པའི་མོས་པ་ཤུགས་དྲག་ཏུ་བསྐྱེད་ཅིང་ཚིག་ཏུ་བརྗོད་པ་ན་རྒྱལ་བ་སྲས་དང་བཅས་པའི་ཡེ་ཤེས་གཟིགས་པ་དམ་པས་མངོན་སུམ་དུ་མཁྱེན་ངེས་སྙམ་པའི་དད་གུས་ཀྱི་སེམས་རྩེ་གཅིག་པ་དང་བཅས་པས་རྗེས་ཟློས་གཉིས་པ་མཛད་པར་ཞུ། ཕྱོགས་བཅུ་ན་བཞུགས་པའི་ནས་བཟླ་བར་བགྱིའོ། །བར་ལན་གཅིག །སླར་ཡང་འདི་ལྟར་ངེས་པར་བྱ་སྟེ། བླ་མ་དང་དཀོན་མཆོག་རིན་པོ་ཆེ་རྣམ་པ་གསུམ་ལ་ཚད་མེད་པའི་མོས་གུས་བསྐྱེད་པ་སྔོན་དུ་འགྲོ་བས། བདག་དང་སེམས་ཅན་ཐམས་ཅད་དོན་དམ་པར་བདེན་པར་མ་གྲུབ་ཀྱང་། ཀུན་རྫོབ་ཏུ་ང་དང་ང་ཡིར་འཛིན་པའི་དབང་གིས་སྒྱུ་མ་དང་རྨི་ལམ་ལྟར་བདེ་སྡུག་སྣ་ཚོགས་པ་ཉམས་སུ་མྱོང་བའི་སྐབས་འདིར། བདེ་བ་འདོད་ཅིང་སྡུག་བསྔལ་མི་འདོད་པར་རྣམ་པ་ཀུན་ཏུ་མཚུངས་པས་ནས། གནས་སྐབས་སུ་བདག་གི་བདེ་བ་དང་དགེ་བའི་རྩ་བ་ཅི་མཆིས་པ་རྣམས་མར་གྱུར་དྲིན་ཅན་ཐམས་ཅད་ལ་ཕོངས་པ་མེད་པར་གཏོང་ཞིང་། དེ་རྣམས་ཀྱི་སྡུག་བསྔལ་རྒྱུ་དང་བཅས་པ་རང་ཉིད་ཀྱིས་དང་དུ་བླང་བར་བགྱིའོ་སྙམ་པ་དང་། མཐར་ཐུག་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་བྱས་ནས། སེམས་ཅན་ཐམས་ཅད་ལ་རེ་རེ་ཞིང་ཕན་པ་དང་བདེ་བ་མཐའ་དག་བསྒྲུབ་པར་བགྱི། དེའི་ཆེད་དུ་རྒྱལ་བ་སྲས་དང་བཅས་པས་བགྲོད་པ་གཅིག་པའི་ལམ་བྱང་ཆུབ་ཀྱི་སེམས་རིན་པོ་ཆེ་བསྐྱེད་པར་བགྱིའོ་སྙམ་པ་སྟེ། མདོར་ན་བླ་མ་དང་དཀོན་མཆོག་ལ་དད་པ་ཆེན་པོ་དང་། སེམས་ཅན་ལ་བརྩེ་བ་ཆེན་པོ་དང་། སངས་རྒྱས་ཐོབ་འདོད་ཀྱི་འདུན་པ་ཆེན་པོ་སྟེ་ཆེན་པོ་གསུམ་དང་ལྡན་པའི་སྒོ་ནས་རྗེས་ཟློས་གསུམ་པ་འདི་ཤིན་ཏུ་གལ་ཆེ་བ་ལགས་པས་བཤད་པ་བརྡ་འཕྲོད་པ་དང་། དམ་བཅའི་ཚིག་རྣམས་དལ་ཞིང་དོད་ལ་སྐབས་ཕྱེད་པས་འདིའི་རྗེས་ཟློས་མཛོད། ཕྱོགས་བཅུ་ན་བཞུགས་པའི། ནས། བཟླ་བར་བགྱིའོ། །བར་ལན་གཅིག །དེས་ཁྱེད་རྣམས་ཀྱི་རྒྱུད་ལ་བྱང་ཆུབ་ཏུ་སྨོན་པའི་སེམས་ཁྱད་པར་ཅན་སྐྱེ་བ་ཡིན་པས་སྐྱེས་ངེས་སྙམ་པའི་ཐོབ་ཤེས་ཀྱི་དགའ་བ་བསྐྱེད་པར་ཞུ། གསུམ་པ་རྗེས་ཀྱི་ཆོ་ག་ལ་གསུམ་ལས། དང་པོ་སེམས་གཟེངས་བསྟོད་པ་ནི། བདག་གིས་ཐོག་མ་མེད་པ་ནས་ལུས་དཔག་ཏུ་མེད་པ་བླངས་ཀྱང་། དོན་ཆེན་པོ་མ་གྲུབ་པས་འཁོར་བར་ལུས་པ་ཡིན་པ་ལ། ད་རེས་རང་གཞན་ཐམས་ཅད་ཀྱི་ཕན་བདེའི་རྒྱུ་གཅིག་པུ་བྱང་ཆུབ་ཀྱི་སེམས་རིན་པོ་ཆེ་རྒྱུད་ལ་སྐྱེས་པས། དལ་འབྱོར་གྱི་རྟེན་འཚོ་བ་དང་བཅས་པ་དོན་ཡོད་ཅིང་། རྒྱལ་བའི་སྲས་སུ་གྱུར་པས་དོན་ཐམས་ཅད་གྲུབ་སྙམ་པ་དང་། ཇི་ལྟར་འབྱུང་བའི་ཚིག་རྣམས་ཀྱི་དོན་ལ་ཡང་ལེགས་པར་སེམས་ཤིང་དགའ་སྤྲོ་ཁྱད་པར་ཅན་བསྐྱེད་བཞིན་པའི་ངང་ནས་འདིའི་རྗེས་ཟློས་མཛོད། དེང་དུས་བདག་ཚེ་འབྲས་བུ་ཡོད། །མི་ཡི་སྲིད་པ་ལེགས་པར་ཐོབ། །དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་ད་གྱུར་ཏོ། །ཞེས་ལན་གཅིག་བརྗོད་དུ་གཞུག །གཉིས་པ་བསླབ་བྱ་བསྟན་པ་ལ་རྣམ་པ་ལྔ་ཡོད་པ་ནི། ཚིག་འདི་རྣམས་ལ་གསན་པས་ཁྱབ་པར་གདའ་སྟེ། དེ་ཡང་དང་པོ་ཡང་དང་ཡང་དུ་སེམས་བསྐྱེད་པར་གདམས་པ་ནི། མདོ་ལས། ཁྱོད་ལ་བསྒོ་ཞིང་ཁོང་དུ་ཆུད་པར་བྱ། །ཇི་ལྟ་ཇི་ལྟར་མང་དུ་མིས་བརྟགས་ན། །དེ་ལ་གནས་པའི་རྣམ་པར་རྟོག་པ་དེས། །དེ་ལྟ་དེ་ལྟར་དེ་ལ་སེམས་གཞོལ་འགྱུར། །ཞེས་གསུངས་ཤིང་། དགེ་བའི་བཤེས་གཉེན་ཤ་ར་བའི་ཞལ་ནས་ཀྱང་། བྱང་ཆུབ་ཀྱི་སེམས་ཏིང་ངེ་འཛིན་དུ་ཅི་འོང་བྱ། ཐེག་ཆེན་གྱི་བསམ་གཏན་གྱི་དམིགས་པ་ཡང་འདི་ཁོ་ན་ཡིན་གསུང་སྐད། དེས་ན་ཡན་ལག་བདུན་པ་དང་སྐྱབས་འགྲོ་སེམས་བསྐྱེད་ཀྱི་ཆོ་ག་རྒྱས་བསྡུས་ཅི་རིགས་པའི་སྒོ་ནས་ཡང་དང་ཡང་དུ་སེམས་བསྐྱེད་ཅིང་། བྱང་ཆུབ་ཀྱི་སེམས་འཕེལ་བར་བྱ་བའི་ཕྱིར་ཐ་ནའང་ཉིན་ལན་གསུམ་མཚན་ལན་གསུམ་དུ། སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །བྱང་ཆུབ་བར་དུ་བདག་ནི་སྐྱབས་སུ་མཆི། །བདག་གིས་སྦྱིན་སོགས་བགྱིས་པ་འདི་དག་གིས། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་པས་ཞེ་ཐག་པ་ནས་སེམས་བསྐྱེད་པར་བྱའོ། །གཉིས་པ་ཚོགས་གཉིས་བསག་པ་ལ་བསླབ་པ་ནི། སྟོང་པ་ཉིད་དང་སྙིང་རྗེ་ཟུང་དུ་འབྲེལ་བའི་བློས་སྦྱིན་པ་ལ་སོགས་པའི་དགེ་བ་ལ་མྱུར་དུ་འབད་པར་བྱ་སྟེ། ཇོ་བོའི་ཞལ་ནས། དགེ་བ་ཐམས་ཅད་ལ་ཚུལ་སྣ་ཚོགས་ནས་འབད་པར་བྱ་ཞིང་འཕྲལ་ལ་ཐམས་ཅད་མཁྱེན་པར་བསྔོ། དེ་ལྟར་བྱས་ན་བསོད་ནམས་ཀྱང་ཡེ་ཤེས་དང་། ཡེ་ཤེས་ཀྱང་བསོད་ནམས་ཀྱི་ཚོགས་སུ་འགྲོ་བས་ཚོགས་གཉིས་ཐ་མི་དད་དུ་བྱ་སྟེ། ཐམས་ཅད་མཁྱེན་པ་ཚོགས་གཉིས་ཀྱི་འབྲས་བུ་ཡིན་པས་སོ། །ཞེས་གསུང་སྐད། །གསུམ་པ་ཆོས་བཞིའི་སྤང་བླང་ལ་བསླབ་པ་ནི། བྱང་ཆུབ་ཀྱི་སེམས་ཉམས་པར་བྱེད་པའི་ཆོས་བཞི་སྤངས་ནས། མི་ཉམས་པར་བྱེད་པའི་ཆོས་བཞི་ལ་སློབ་པར་བྱེད་པ་ཡིན་ཏེ། དེ་དག་ཀྱང་སྤང་གཉེན་དུ་བླ་མ་རྣམས་བཞེད་པས། དེ་ལ་བླ་མ་དང་མཆོད་པར་འོས་པ་བསླུ་བ་ནི། ལྟུང་བ་གླེངས་པ་ན་བྱུང་བཞིན་དུ་མ་བྱུང་ཞེས་སྨྲ་བའམ། དགེ་བ་བསྒྲུབ་པའི་ནུས་པ་ཡོད་བཞིན་དུ་མེད་ཅེས་པ་ལྟ་བུ་རྫུན་གྱིས་བསླུ་བ་ཡིན་ལ། དེའི་གཉེན་པོར་སྲོག་གི་ཕྱིར་ཡང་བསམས་བཞིན་དུ་རྫུན་མི་སྨྲ་བ་ལ་བསླབ་པར་བྱའོ། །གཞན་འགྱོད་པའི་གནས་མ་ཡིན་པ་ལ་འགྱོད་པ་བསྐྱེད་པ་ནི། སྤྱིར་དགེ་བ་ལ་ཞུགས་པ་དང་། ཁྱད་པར་དུ་ཐེག་པ་ཆེན་པོ་ལ་ཞུགས་པ་ལ་འགྱོད་པ་བསྐྱེད་པ་ཡིན་ཏེ། དེའི་གཉེན་པོར་སེམས་ཅན་འགའ་ཞིག་དགེ་བ་ལ་འགོད་པ་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་འགོད་ཀྱི། ཉན་ཐོས་དང་། རང་སངས་རྒྱས་ཀྱི་ས་ལ་མ་ཡིན་ནོ། །ཞེས་པའི་དོན་ལ་བསླབ་པར་བྱའོ། །སེམས་བསྐྱེད་པའི་བྱང་ཆུབ་སེམས་དཔའ་ལ་ཞེ་སྡང་གི་ཚིགས་སུ་བཅད་པ་མ་ཡིན་པ་བརྗོད་པའི་གཉེན་པོར། སེམས་བསྐྱེད་པའི་བྱང་ཆུབ་སེམས་དཔའ་ལ་སྟོན་པའི་འདུ་ཤེས་བསྐྱེད་ཅིང་ཕྱོགས་བཅུར་ཡང་དག་པའི་ཡོན་ཏན་བརྗོད་པ་ལ་བསླབ་པར་བྱ་སྟེ། ཆོས་ཐམས་ཅད་འབྱུང་བ་མེད་པར་བསྟན་པ་ལས། །ཉིན་དང་དེ་བཞིན་མཚན་མོ་ལན་གསུམ་དུ། །བྱང་ཆུབ་སེམས་དཔའ་རྣམས་ལ་མགོས་ཕྱག་འཚལ། །རྟག་ཏུ་འདོད་བཞིན་སྤྱད་པ་སྤྱོད་པ་ན། །དེ་དག་འཁྲུལ་པ་ཙམ་ཡང་མི་བཙལ་ལོ། །ཞེས་གསུངས་པ་ལྟར་བྱའོ། །སེམས་ཅན་ཐམས་ཅད་ལ་སྒྱུ་དང་གཡོས་སྤྱོད་པའི་གཉེན་པོར། སེམས་ཅན་ཐམས་ཅད་ལ་ལྷག་པའི་བསམ་པ་རྣམ་པར་དག་པས་གནས་པར་བྱའི། གཡོ་དང་སྒྱུས་མ་ཡིན་པ་ལ་བསླབ་པར་བྱའོ། །ལྷག་པའི་བསམ་པ་ནི། སེམས་ཅན་ཐམས་ཅད་ཕན་བདེ་ལ་སྦྱོར་བར་འདོད་པའོ། །བཞི་པ་སེམས་ཅན་བློས་མི་སྤང་བ་ལ་བསླབ་པ་ནི། སེམས་ཅན་ཁྱུ་རིལ་དུ་སྤངས་པ་ནི་སེམས་ཅན་གྱི་སྐྱོན་མཐོང་བའམ། ཐེག་ཆེན་གྱི་ལམ་སྒྲུབ་དཀའ་བ་ལ་སོགས་པའི་རྒྱུས་གཞན་དོན་དུ་སངས་རྒྱས་ཐོབ་འདོད་ཀྱི་བློ་སྤངས་པ་སྟེ། དེ་བྱུང་ན་ཐར་པ་གཏན་མི་འདོད་དམ་ཉན་རང་གི་ཐར་པ་འདོད་ཀྱང་རུང་། སྨོན་འཇུག་གཉིས་ཀ་གཏོང་སྟེ། མདོ་སྡུད་པ་ལས། གལ་ཏེ་བསྐལ་པ་བྱེ་བར་དགེ་བའི་ལས་ལམ་བཅུ། སྤྱོད་ཀྱང་རང་རྒྱལ་དགྲ་བཅོམ་ཉིད་ལ་འདོད་སྤྱད་ན། །དེ་ཚེ་ཚུལ་ཁྲིམས་སྐྱོན་བྱུང་ཚུལ་ཁྲིམས་ཉམས་པ་ཡིན། །སེམས་བསྐྱེད་དེ་ནི་ཕས་ཕམ་བས་ཀྱང་ཤིན་ཏུ་ལྕི། །ཞེས་གསུངས་སོ། །ཉི་ཚེ་བ་སྤོང་བ་ནི། སེམས་ཅན་འགའ་ཞིག་ལ་བདག་གིས་ཕན་གདགས་དགོས་ཤིང་ནུས་ཀྱང་མི་གདགས་སྙམ་དུ་བློས་འདོར་བ་སྟེ། དེས་ཀྱང་སེམས་ཅན་ལ་དམིགས་པའི་སེམས་བསྐྱེད་གཏོང་བས་ཐུན་ཚོད་ཀྱི་ནང་དུ་གང་བློས་སྤངས་པ་དེ་ཕན་སེམས་ཀྱིས་བློས་བཟུང་ལ། དེ་ལ་དངོས་སུ་ཕན་མ་ཐོགས་ཀྱང་རང་གི་བློ་མ་གནོད་པར་བྱ་གསུང་། དེས་ན། གཞན་ཕན་ལས་ལ་མཐུ་མེད་ཀྱང་། །དེ་ཡི་བསམ་པ་རྟག་ཏུ་བྱ། །གང་ལ་བསམ་པ་དེ་ཡོད་པ། །དེ་ནི་དེ་ལ་དོན་གྱིས་ཞུགས། །ཞེས་པས་སེམས་ཅན་ཐམས་ཅད་ལ་ཕན་སེམས་བསྐྱེད་པར་བྱའོ། །ལྔ་པ་བྱང་ཆུབ་སེམས་ཀྱི་ཕན་ཡོན་དྲན་པར་བྱ་བ་ནི། སྡོང་པོ་བཀོད་པའི་མདོ་ལས། བྱང་ཆུབ་ཀྱི་སེམས་ནི་སངས་རྒྱས་ཀྱི་ཆོས་ཐམས་ཅད་ཀྱི་ས་བོན་ལྟ་བུའོ། །ཞེས་དང་། མདོར་ན་སངས་རྒྱས་ཀྱི་ཆོས་ཐམས་ཅད་དང་། སངས་རྒྱས་ཀྱི་ཡོན་ཏན་ཇི་སྙེད་ཡོད་པ། བྱང་ཆུབ་སེམས་ཀྱི་ཕན་ཡོན་ཡང་དེ་སྙེད་དོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའི་སྤྱོད་པའི་དཀྱིལ་འཁོར་ཐམས་ཅད་ཀྱང་འདི་ལས་བྱུང་སྟེ། འདས་པ་དང་མ་འོངས་པ་དང་ད་ལྟར་བྱུང་བའི་དེ་བཞིན་གཤེགས་པ་ཐམས་ཅད་ཀྱང་འདི་ལས་སྐྱེས་སོ། །ཞེས་གསུངས་པ་ལ་སོགས་པའི་ཕན་ཡོན་རྣམས་ཡང་དང་ཡང་དུ་དྲན་པར་བྱའོ། །གཞན་ཡང་གཞུང་ལས། ཁྱད་པར་དུ་མངོན་པར་ཤེས་པ་མྱུར་དུ་ཐོབ་པར་འདོད་པས་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་གིས་ཞུས་པའི་ཆོས་བདུན་པ་ཞེས་བྱ་བའི་ཐེག་པ་ཆེན་པོའི་མདོ་ལ་བསླབ་པར་བྱའོ། །ཞེས་འབྱུང་བས། མདོ་དེའི་དོན། རྣམ་རྟོག་གིས་ཀྱང་འདོད་པ་མི་བསྟེན་ན། དབང་པོ་གཉིས་སྤྲོད་པ་ལྟ་ཅི་སྨོས་ཤིང་། རྨི་ལམ་དུའང་མི་དགེ་བའི་བཤེས་གཉེན་ལ་མི་བསྟེན་པ་དང་། བྱ་དང་འདྲ་བར་སེམས་ཀྱིས་ཡོངས་སུ་འཛིན་པ་མེད་པ་དང་། ཐབས་ཤེས་གཉིས་ལ་མཁས་ཀྱང་ང་རྒྱལ་མེད་པ་དང་། དངོས་པོར་འཛིན་པ་སྤངས་ནས་སྟོང་ཉིད་ཀྱི་རྣམ་ཐར་བརྟན་པར་བྱ་བ་དང་། ཡང་དག་པར་བདེན་པ་མ་ཡིན་པས་སྒྱུ་མ་དང་འདྲ་བའི་ཤེས་པས་སྤྱད་པ་དང་། སེམས་ཅན་ལ་ལྷག་པའི་བསམ་པ་རྣམ་པར་དག་པས་གནས་པ་དང་། རྒྱུ་དང་འབྲས་བུ་ལ་སྐུར་པ་མི་གདབ་པ་སྟེ་ཆོས་བདུན་པོ་དེ་བསྟན་པས་དེ་དག་ལ་བསླབ་པར་བྱའོ། །ཡང་། ནག་པོའི་ཆོས་བཞི་དང་། སེམས་ཅན་བློས་སྤངས་པའི་ལྟུང་བ་བྱུང་ནས་ཉིན་ཞག་གཅིག་གི་དྲུག་ཆའི་ཐུན་ཚོད་ལས་འདས་ན་སེམས་བསྐྱེད་གཏོང་བས་བཤགས་སྡོམ་བྱས་ལ་སླར་བླང་། ཐུན་ཚོད་ཀྱི་ནང་དུ་གཉེན་པོ་སྐྱེས་ན་བཤགས་དུས་སྔ་ཕྱི་འདྲ་ཞིང་། བཤགས་ཡུལ་བྱང་ཆུབ་སེམས་དཔའ་འམ། མ་རྙེད་ན་སོ་ཐར་གྱི་དགེ་བསྙེན་ཡན་ཆད་ཀྱི་མདུན་དུ་ལྟུང་བ་འདི་བྱུང་སྟེ་ཞེས་དངོས་པོ་བརྗོད་ནས་བཤགས་པར་བྱ་གསུངས་སོ། །སྨོན་པ་སེམས་བསྐྱེད་ཀྱི་སྐོར་འདི་རྒྱལ་བ་བྱམས་པ་ནས་ཇོ་བོའི་བར་དུ་སྙན་ནས་སྙན་དུ་བརྒྱུད་པའི་གདམས་པ་ཁོ་ན་ལས་བྱོན་པ་ཡིན། འདིའི་བློ་སྦྱོང་དང་། ཆོ་ག་དང་། བསླབ་བྱ་དང་། བཅས་པ་འདི་གཞུང་གཞན་ན་མི་བཞུགས་པས། འདི་དང་སྐྱབས་འགྲོ་ཁོ་ནས་ཇོ་བོ་བོད་ལ་བཀའ་དྲིན་ཆེ་བ་ཡིན། དེས་ནས་སྨོན་པ་སེམས་བསྐྱེད་སྐོར་དང་བཅས་པ་འདི་ཇོ་བོའི་གདམས་ངག་རྣམས་ཀྱི་མཆོག་ཏུ་གྱུར་པ་ཡིན་ནོ་གསུངས་ཤིང་། འདི་ལ་སློབ་མའང་ངེས་པ་མེད་པས་ཐམས་ཅད་ལ་གནང་བ་ལགས། གསུམ་པ་གཏང་རག་གི་མཆོད་པ་དབུལ་བ་ནི། དེ་ལྟར་བྱང་ཆུབ་ཀྱི་སེམས་སྐྱེས་པ་དེ་བླ་མ་དང་དཀོན་མཆོག་གི་བཀའ་དྲིན་ཡིན་པས། དེའི་དྲིན་ལན་དུ་སྔར་སྦྱོར་བའི་སྐབས་སུ་ཇི་སྐད་བཤད་པའི་དམིགས་པ་རྣམས་ཡིད་ལ་དྲན་བཞིན་པས་དངོས་སུ་བཤམས་པའི་མཆོད་པ་དང་། ལུས་དབུལ་བའི་མཆོད་པ་དང་། དེ་ལས་གཞན་ཡང་བློས་སྤྲུལ་པའི་བྱེ་བྲག་བསམ་གྱིས་མི་ཁྱབ་པ་དང་བཅས་པ་རྣམས་རིམ་བཞིན་དུ་འབུལ་བར་ཞུ། ཞེས་བརྡ་སྦྱར་ལ། དངོས་སུ་བཤམས་པའི་མཆོད་པ་རྣམས་ཁ་གསོས་ལ། སློབ་དཔོན་གྱིས་སྦྱོར་པའི་སྐབས་ལྟར་བྱིན་གྱིས་བརླབས་ནས། དཔོན་སློབ་ཐུན་མོང་དུ། ཨོཾ་གུ་རུ་སརྦ་ཏ་ཐཱ་ག་ཏ་ཨརྒྷཾ་སོགས་ཀྱིས་མཆོད། ལུས་འབུལ་བའི་མཆོད་པ། རྒྱལ་དང་དེ་སྲས་རྣམས་ལ་བདག་གིས་ནི། །བདག་གི་ལུས་ཀུན་གཏན་དུ་དབུལ་བར་བགྱི། །སེམས་དཔའ་མཆོག་རྣམས་བདག་ནི་ཡོངས་བཞེས་ཤིག །གུས་པས་ཁྱེད་ཀྱི་འབངས་སུ་མཆི་བར་བགྱི། ཤློ་ཀ་གཅིག་དང་། གཞན་ཡང་། མེ་ཏོག་དམ་པ་ཕྲེང་བ་དམ་པ་དང་། །སིལ་སྙན་རྣམས་དང་བྱུག་བ་གདུགས་མཆོག་དང་། །སོགས་ཤློ་ཀ་གསུམ་རྣམས་ཚར་རེ་བརྗོད་དུ་གཞུག་གོ། །དེ་ལྟར་ན་དེ་རྣམས་ཀྱི་སྒོ་ནས་སྨོན་པ་སེམས་བསྐྱེད་ཀྱི་ཆོ་ག་ཡན་ལག་དང་བཅས་པ་ལེགས་པར་ཕུལ་གྲུབ་ནས། གཉིས་པ་འཇུག་པའི་སེམས་བསྐྱེད་ནི། བྱང་ཆུབ་སེམས་དཔའི་ས་ལས། བྱང་ཆུབ་སེམས་དཔའི་སྡོམ་པ་ཞེས་གསུངས་ཤིང་། དེའི་ཆོ་ག་ཡང་གསལ་བོར་གསུངས་པ་བཞིན་དུ། ཇོ་བོ་ཆེན་པོས་ཆོ་གའི་གཞུང་མཛད་པའི་ཚུལ་ལྟར། འདིར་སྡོམ་པ་འབོགས་པའི་ཆོ་ག་ལ་གསུམ་ལེན་པ་པོའི་གང་ཟག །བླང་བའི་ཡུལ། བླང་བའི་ཆོ་གའོ། །དེ་ལ་དང་པོ་ལེན་པོའི་གང་ཟག་ནི། སྨོན་པའི་སེམས་སྐྱེས་ཤིང་བྱང་ཆུབ་སེམས་དཔའི་བསླབ་པ་ཚུལ་ཁྲིམས་གསུམ་ལ་ངེས་པར་སློབ་པར་འདོད་པའི་འདུན་པ་དང་ལྡན་པ་སྟེ། བྱང་ས་ལས། དེ་ལ་བྱང་ཆུབ་སེམས་དཔའ་ཁྱིམ་པའམ། རབ་ཏུ་བྱུང་བ་བྱང་ཆུབ་སེམས་དཔའི་བསླབ་པ་ཚུལ་ཁྲིམས་ཀྱི་ཕུང་པོ་རྣམ་པ་གསུམ་པོ་འདི་དག་ལ་བསླབ་པར་འདོད་ཅིང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་བཏབ་པས་ཞེས་གསུངས་ཤིང་། སོ་སོ་ཐར་པ་རིགས་བདུན་གང་རུང་གི་སྡོམ་པ་དང་ལྡན་དགོས་ཏེ། ཇོ་བོས། སོ་སོ་ཐར་པ་རིགས་བདུན་གྱི། །རྟག་ཏུ་སྡོམ་གཞན་ལྡན་པ་ལ། །བྱང་ཆུབ་སེམས་དཔའི་སྡོམ་པ་ཡི། །སྐལ་པ་ཡོད་ཀྱི་གཞན་དུ་མིན། ཞེས་གསུངས་སོ། །གཉིས་པ་གང་ལས་བླང་བའི་ཡུལ་ནི། རང་ཉིད་བྱང་ཆུབ་སེམས་དཔའི་སྡོམ་པ་དང་ལྡན་ཞིང་། སྡོམ་པའི་ཆོ་ག་ལ་མཁས་པ། སློབ་མས་གོ་བར་ནུས་པའི་ཚིག་གི་སྒོ་ནས་སྡོམ་པ་འབོགས་པར་ནུས་པ་སྟེ། སྡོམ་པ་ཉི་ཤུ་པ་ལས། བླ་མ་སྡོམ་ལ་གནས་ཤིང་མཁས། །ནུས་དང་ལྡན་ལས་བླང་བར་བྱ། ཞེས་གསུངས་སོ། །གསུམ་པ་ཇི་ལྟར་བླང་བའི་ཚུལ་ལ་སྦྱོར་བ། དངོས་གཞི། མཇུག་གི་ཆོ་གའོ། །དང་པོ་ལའང་ལྔ། གསོལ་བ་གདབ་པ་དང་། བསམ་པ་བརྟག་པ་དང་། མྱུར་དུ་སྦྱིན་པར་གསོལ་བ་གདབ་པ་དང་། བར་ཆད་དྲི་བ་དང་། བསླབ་པའི་གནས་གོ་བར་བྱས་ནས་སྤྲོ་བ་དྲི་བའོ། །དང་པོ་གསོལ་བ་གདབ་པ་ལ། ཐོག་མར་སློབ་དཔོན་ལ་སྟོན་པའི་འདུ་ཤེས་བསྐྱེད་ནས་ཕྱག་གསུམ་མཛད་པར་ཞུ། ཞེས་ཕྱག་གསུམ་འཚལ་དུ་གཞུག །དེ་ནས་འཇུག་པ་བྱང་ཆུབ་མཆོག་ཏུ་སེམས་བསྐྱེད་པའི་སྡོམ་པ་ཞུ་བའི་ཡོན་དུ་དམིགས་ཏེ་མཎྜལ་ཞིག་འབུལ་བར་ཞུ། ཞེས་བརྡ་སྦྱར་ལ་མཎྜལ་འབུལ་དུ་གཞུག །དེ་ལྟར་མཎྜལ་ཕུལ་ནས། ཕྱག་སྙིམ་པ་མེ་ཏོག་དང་བཅས་པས་ཐལ་མོ་སྦྱར་ཏེ་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། སློབ་དཔོན་ཁྱོད་ལ་བདག་བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་ཡང་དག་པར་བླང་བ་ལེན་པར་འཚལ་གྱིས། དེ་ལ་གནོད་པ་མ་མཆིས་ན་བདག་ལ་ཐུགས་བརྩེ་བའི་སླད་དུ་ཅུང་ཟད་ཅིག་གསན་ཅིང་སྩལ་བའི་རིགས་སོ། །ལན་གསུམ། གཉིས་པ་བསམ་པ་བརྟག་ལ་གསུམ་ལས། དང་པོ་བློ་རྩལ་ལ་བརྟག་པ་ནི། བྱང་ཆུབ་སེམས་དཔའི་སྡོམ་པ་ལེན་པ་ལ་ངས་མི་འགྲུབ་པའམ། མི་ནུས་པ་གང་ཡང་མེད་སྙམ་པའི་བློ་རྩལ་དགོས་པས། སྣོད་དུ་བྱེད་པའི་ཆོས་བཞི་བརྗོད་ལ་བརྟག་པར་བྱ་བར་གསུངས་པས་ངེད་ཀྱིས་དྲིས་པའི་ཚིག་འདི་རྣམས་ལ་ལན་དྲང་པོར་ཐོབ་མཛོད། ཅེས་བརྡ་སྦྱར་ལ་སློབ་དཔོན་གྱིས། འདི་ལྟར་བྱང་ཆུབ་སེམས་དཔས་སེམས་ཅན་ཐམས་ཅད་སྨིན་པར་བྱེད་དགོས་ལ། དེ་ལ་བསླབ་པ་གྲངས་མེད་པ་ལ་བསླབ་དགོས་ན། སེམས་ཅན་ཐམས་ཅད་སྨིན་པར་བྱེད་པའི་བསླབ་པ་རྣམས་ལ། སློབ་པར་ནུས་སམ། ཞེས་དྲིས་ལ། སློབ་མས། ནུས་ལགས། ཞེས་བརྗོད་པས་ཁས་བླང་ངོ་། །དེ་བཞིན་དུ། སློབ་དཔོན་གྱིས། བྱང་ཆུབ་སེམས་དཔའ་ཞིང་ཁམས་གྲངས་མེད་པ་སྦྱོང་བ་དང་། སངས་རྒྱས་གྲངས་མེད་པ་མཉེས་པར་བྱ་དགོས་ན། ཞིང་ཁམས་གྲངས་མེད་པ་སྦྱོང་བ་དང་། སངས་རྒྱས་གྲངས་མེད་པ་མཉེས་པར་བྱེད་པ་ལ་སློབ་པར་ནུས་སམ། ཞེས་དྲིས་ལ། སློབ་མས། ནུས་ལགས་ཞེས་བརྗོད་པས་ཁས་བླང་ངོ་། །སློབ་དཔོན་གྱིས། བྱང་སེམས་ཀྱི་སྡོམ་པ་དེ་ཉམས་ན་སེམས་ཅན་ཐམས་ཅད་བདེ་བ་ལ་འགོད་པར་དམ་བཅས་ནས་དེ་དག་ཐམས་ཅད་བསླུས་པར་འགྱུར་ཏེ། ཇི་སྐད་དུ། སྤྱོད་འཇུག་ལས། དངོས་པོ་ཕལ་པ་ཅུང་ཟད་ལའང་། །ཡིད་ཀྱིས་སྦྱིན་ཞེས་བསམ་བྱས་ནས། །མི་གང་སྦྱིན་པར་མི་བྱེད་པ། །དེ་ཡང་ཡི་དྭགས་རྒྱུར་གསུངས་ན། །བླ་ན་མེད་པའི་བདེ་བ་ལ། །བསམ་པ་ཐག་པས་འགྲོན་གཉེར་ནས། །འགྲོ་བ་ཐམས་ཅད་བསླུས་བྱས་ན། །བདེ་འགྲོར་ཅི་ག་འགྲོར་འགྱུར་རམ། །ཞེས་གསུངས་པས། སེམས་ཅན་ཐམས་ཅད་བསླུས་པའི་རྣམ་སྨིན་གྱིས་དམྱལ་བ་ལ་སོགས་པར་སྐྱེ་བར་འགྱུར་བའི་ཉེས་དམིགས་ཆེན་པོ་ཡོད་ན། ཉེས་དམིགས་དེས་མི་འཇིགས་སམ། ཞེས་དྲིས་པ་ལ། ཉམས་ན་ཉེས་དམིགས་ཆེ་ཡང་མ་ཉམས་པ་བྱས་པས་ཆོག་སྙམ་དུ་གོ་བ་བསྐྱེད་ལ་ལན་ཐོབ་མཛོད། ཅེས་བརྗོད་ལ། སློབ་མས་མི་འཇིགས་ལགས། ཞེས་བརྗོད་ཅིང་ཁས་བླང་ངོ་། །ཡང་སློབ་དཔོན་གྱིས། ཡང་བསླབ་པ་དེ་མ་ཉམས་པར་བསྲུངས་ན། སྤྱོད་འཇུག་ལས། །གང་ནས་བཟུང་སྟེ་སེམས་ཅན་ཁམས། །མཐའ་ཡས་རབ་ཏུ་བསྒྲལ་བའི་ཕྱིར། །མི་ལྡོག་པ་ཡི་སེམས་ཀྱིས་སུ། །སེམས་དེ་ཡང་དག་བླངས་གྱུར་པ། །དེང་ནས་བཟུང་སྟེ་གཉིད་ལོག་གམ། །བག་མེད་གྱུར་ཀྱང་བསོད་ནམས་ཤུགས། །རྒྱུན་མི་འཆད་པ་དུ་མ་ཞིག །ནམ་མཁའ་མཉམ་པ་རབ་ཏུ་འབྱུང་། །ཞེས་གསུངས་པ་ལྟར་བསོད་ནམས་རྒྱུན་མི་འཆད་པར་འབྱུང་བ་ལ་སོགས་པའི་ཕན་ཡོན་ཆེན་པོ་ཡོད་ན། ཕན་ཡོན་ཆེན་པོ་དེ་ཐོབ་པར་འདོད་པས་བསླབ་པ་དེ་ལ་བསླབ་པར་སྤྲོའམ། ཞེས་དྲིས་ལ། སློབ་མས། སྤྲོ་ལགས། ཞེས་བརྗོད་པས་ཁས་བླང་ངོ་། །གཉིས་པ་ཤེས་རབ་ལ་བརྟག་པ་ནི། སློབ་དཔོན་གྱིས། རིགས་ཀྱི་བུ་ཞེས་བརྗོད་པ་སྔོན་དུ་འགྲོ་བས། སློབ་མ་སོ་སོའི་མིང་ནས་སྨོས་ལ། མིང་འདི་ཞེས་བྱ་བ་ཁྱོད་ཀྱིས་བྱང་ཆུབ་སེམས་དཔའི་སྡེ་སྣོད་ཀྱི་མ་མོ་ཐོས་སམ། ཞེས་དྲིས་ལ། སློབ་མས། ཅུང་ཟད་ཐོས་སོ། །ཞེས་ལན་བཏབ། དེ་བཞིན་དུ། བྱང་ཆུབ་སེམས་དཔའི་སྡེ་སྣོད་ཀྱི་མ་མོ་ཤེས་སམ། ཞེས་དྲིས་ལ། ཅུང་ཟད་ཤེས་སོ། །ཞེས་ལན་བཏབ། བྱང་ཆུབ་སེམས་དཔའི་སྡེ་སྣོད་ཀྱི་མ་མོ་ལ་དད་དམ། ཞེས་དྲིས་ལ། ཤིན་ཏུ་དད་དོ། །ཞེས་ལན་བཏབ། བྱང་ཆུབ་སེམས་དཔའི་སྡེ་སྣོད་ཀྱི་མ་མོ་ལས་གསུངས་པའི་བསླབ་པའི་གཞི་རྣམས་བསྲུང་བར་ནུས་སམ། ཞེས་དྲིས་ལ། བསྲུང་བར་ནུས་ལགས། ཞེས་ཁས་བླང་དུ་གཞུག་གོ །གསུམ་པ་འདུན་པ་ལ་བརྟག་པ་ནི། ཐོག་མར་འདི་ལྟར་ངེས་པར་བྱ་སྟེ། བྱང་ཆུབ་སེམས་དཔའི་སྡོམ་པ་ལ་བརྟེན་ནས། བདག་ཉིད་སངས་རྒྱས་ཐོབ་ཅིང་སེམས་ཅན་ཐམས་ཅད་སྡུག་བསྔལ་ལས་སྒྲོལ་བ་ལ་སོགས་པའི་ཡོན་ཏན་དཔག་ཏུ་མེད་པ་དང་ལྡན་པས་དེ་ལ་འཇུག་པར་བྱའོ་སྙམ་པའི་འདུན་པ་རྩེ་གཅིག་ཏུ་བསྐྱེད་ལ་ངེད་ཀྱིས་དྲིས་པའི་ཚིག་འདི་རྣམས་ལ་ལན་ཐོབ་མཛོད། ཞེས་བརྡ་སྦྱར་ལ། སློབ་དཔོན་གྱིས། རིགས་ཀྱི་བུ་ཁྱོད་ཉོན་ཅིག །ཁྱོད་འདི་ལྟར་སེམས་ཅན་མ་བསྒྲལ་བ་རྣམས་བསྒྲལ་བ་དང་། མ་གྲོལ་བ་རྣམས་དགྲོལ་བ་དང་། དབུགས་མ་ཕྱིན་པ་རྣམས་དབུགས་དབྱུང་བ་དང་། ཡོངས་སུ་མྱ་ངན་ལས་མ་འདས་པ་རྣམས་མྱ་ངན་ལས་འདའ་བ་དང་། སངས་རྒྱས་ཀྱི་གདུང་རྒྱུན་མི་འཆད་པར་འདོད་དམ། ཞེས་དྲིས་ལ། སློབ་མས། འདོད་ལགས་ཞེས་ལན་བཏབ་པ་ལ། སློབ་དཔོན་གྱིས། དེ་ལ་ཁྱེད་ཀྱིས་སེམས་བསྐྱེད་བརྟན་པ་དང་། ཡི་དམ་བརྟན་པར་བྱའོ། །ཞེས་གདམས། ཡང་སློབ་དཔོན་གྱིས། གཞན་དང་འགྲན་པའི་ཆེད་དུ་མ་ཡིན་ནམ། ཞེས་དྲིས་ལ། སློབ་མས། མ་ཡིན་ལགས། ཞེས་ལན་བཏབ་བོ། །གཞན་གྱིས་ནན་གྱིས་ལེན་དུ་བཅུག་པ་མ་ཡིན་ནམ། ཞེས་དྲིས་ལ། མ་ཡིན་ལགས། ཞེས་ལན་བཏབ་བོ། །གསུམ་པ་མྱུར་དུ་སྦྱིན་པར་གསོལ་བ་གདབ་པ་ལ། མཆོད་པ་འབུལ་བ་དང་ཕྱག་འཚལ་བ་སྔོན་དུ་འགྲོ་བའི་སྒོ་ནས་གསོལ་བ་གདབ་པར་གསུངས་པས། ཐོག་མར་བཅོམ་ལྡན་འདས་ཐུབ་པ་ཆེན་པོ་ལ་སོགས་པའི་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་མདུན་གྱི་ནམ་མཁར་མངོན་སུམ་ལྟ་བུར་བཞུགས་པར་བསམས་ལ། དེ་རྣམས་ཀྱི་མཁྱེན་བརྩེ་ནུས་པའི་ཡོན་ཏན་ཚད་མེད་པ་རྗེས་སུ་དྲན་པས་དང་འདོད་ཡིད་ཆེས་ཀྱི་དད་པ་ཤུགས་དྲག་ཏུ་བསྐྱེད་བཞིན་པའི་ངང་། དངོས་སུ་བཤམས་པའི་མཆོད་པ་དང་། ལུས་དབུལ་བའི་མཆོད་པ་དག་རིམ་བཞིན་དུ་གནང་བར་ཞུ། ཞེས་བརྡ་སྦྱར་ལ། མཆོད་པ་གསར་དུ་བཤམས་པ་རྣམས་སློབ་དཔོན་གྱིས་སྔར་ལྟར་བྱིན་གྱིས་བརླབས། དེ་ནས་དཔོན་སློབ་ཐུན་མོང་དུ། མཆོད་ཕྲེང་ཚིགས་བཅད་དང་བཅས་རྒྱས་པར་བྱ་བའམ། བསྡུ་ན། ཨོཾ་སརྦ་ཏ་ཐཱ་ག་ཏ་ཨརྒྷཾ་པྲ་ཏཱི་ཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། དེ་བཞིན་དུ། པུཥྤེ། ནས་ཤབྡའི་བར་སྦྱར་བ་དང་། རྒྱལ་དང་དེ་སྲས་རྣམས་ལ་བདག་གིས་ནི། །བདག་གི་ལུས་ཀུན་གཏན་དུ་འབུལ་བ་བགྱི། །སེམས་དཔའ་མཆོག་རྣམས་བདག་ནི་ཡོངས་བཞེས་ཤིག །གུས་པས་ཁྱེད་ཀྱི་འབངས་སུ་མཆི་བར་བགྱི། །ཤྭ་ལོ་ཀ་གཅིག་བརྗོད་དུ་གཞུག །སློབ་དཔོན་ལ་སྟོན་པའི་འདུ་ཤེས་བསྐྱེད་དེ་ཕྱག་གསུམ་མཛད་པར་ཞུ། ཞེས་ཕྱག་གསུམ་འཚལ་ཟིན་པ་དང་། རང་རང་གི་གྲལ་ལ་ཙོག་ཙོག་པུར་འཁོད་དེ་ཕྱག་སྙིམ་པ་མེ་ཏོག་དང་བཅས་པས་ཐལ་མོ་སྦྱར་ཏེ་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། སློབ་དཔོན་གྱིས་བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་ཡང་དག་པར་བླང་བ་བདག་ལ་མྱུར་དུ་སྩལ་དུ་གསོལ། ལན་གསུམ། བཞི་པ་བར་ཆད་དྲི་བ་ནི། སྡོམ་པའི་རྟེན་དུ་བྱང་སེམས་ཀྱི་རིགས་ལ་གནས་ཤིང་སྨོན་པའི་སེམས་སྐྱེས་པ་དགོས་པས་དེ་ལྟ་བུའི་རིགས་ཅན་ཡིན་ནམ་ཞེས་དྲིས་པ་འདི་ལ་ལན་ཐོབ་མཛོད། རིགས་ཀྱི་བུ། མིང་འདི་ཞེས་བྱ་བ་ཁྱོད་བྱང་ཆུབ་སེམས་དཔའ་ཡིན་ནམ། ཞེས་དྲིས་ལ། ཡིན་ལགས། ཞེས་ལན་བཏབ། བྱང་ཆུབ་ཏུ་སྨོན་ལམ་བཏབ་བམ། ཞེས་དྲིས་ལ། བཏབ་ལགས ཞེས་ལན་བཏབ་བོ། །ལྔ་པ་བསླབ་པའི་གནས་གོ་བར་བྱ་ཞིང་སྤྲོ་བ་དྲི་བ་ལ། དང་པོར་བསླབ་པའི་གནས་གོ་བར་བྱ་བ་ནི། མི་ཟད་པ་དཔག་ཏུ་མེད་པ་བླ་ན་མེད་པའི་བསོད་ནམས་ཀྱི་གཏེར། སངས་རྒྱས་ཀྱི་ཡོན་ཏན་ཐམས་ཅད་ཀྱི་འབྱུང་གནས། བྱང་ཆུབ་སེམས་དཔའ་སྡོམ་པ་མྱུར་དུ་ཐོབ་པར་འགྱུར་རོ་སྙམ་དུ་དགའ་བ་ཁྱད་པར་ཅན་བསྐྱེད་པ་དང་བཅས་ཚིག་འདི་ལ་གསན་པས་ཁྱབ་པར་གདའ་སྟེ། མི་དགེ་བ་མཐའ་དག་སྤོང་བའི་སེམས་པ་ས་བོན་དང་བཅས་པ་སྡོམ་པའི་ཚུལ་ཁྲིམས། ཕར་ཕྱིན་དྲུག་ལ་སོགས་པའི་དགེ་བ་སྒྲུབ་འདོད་ཀྱི་སེམས་པ་ས་བོན་དང་བཅས་པ་དགེ་བ་ཆོས་སྡུད་ཀྱི་ཚུལ་ཁྲིམས། སེམས་ཅན་ཐམས་ཅད་ཀྱི་དོན་བྱེད་པར་འདོད་པའི་སེམས་པ་ས་བོན་དང་བཅས་སེམས་ཅན་དོན་བྱེད་གྱི་ཚུལ་ཁྲིམས་ཡིན་ཞིང་། དེ་དག་དུས་གསུམ་གྱི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བསླབ་པའི་གཞི་དང་ཚུལ་ཁྲིམས་ཡིན་ནོ། །ཞེས་གོ་བ་བསྐྱེད་ནས། དེ་ལྟ་བུའི་བྱང་ཆུབ་སེམས་དཔའི་བསླབ་པའི་གཞི་རྣམས་དང་། ཚུལ་ཁྲིམས་དེ་དག་བདག་ལས་ལེན་པར་འདོད་དམ་ཞེས་སྤྲོ་བ་དྲིས་པ་འདི་ལ་ལན་ཐོབ་མཛོད། བྱང་ཆུབ་སེམས་དཔའ་ཐམས་ཅད་ཀྱི་བསླབ་པའི་གཞི་རྣམས་དང་། བྱང་ཆུབ་སེམས་དཔའ་ཐམས་ཅད་ཀྱི་ཚུལ་ཁྲིམས་དེ་དག་ཅི་བདག་ལས་ལེན་པར་འདོད་དམ། ཞེས་དྲིས་ལ། སློབ་མས། ལེན་པར་འཚལ་ལོ། །ཞེས་ལན་བཏབ། གཉིས་པ་དངོས་གཞི་ནི། སྤྱིར་བསླབ་པ་ནོད་པར་ལན་གསུམ་དུ་ཁས་བླངས་པ་ཉིད་ཀྱིས་སྡོམ་པ་སྐྱེ་བ་ཡིན་ནའང་། ཐོག་མར་བསམ་པ་འདི་ལྟར་ངེས་པ་གལ་ཆེ་སྟེ། ཆོས་ཐམས་ཅད་དོན་དམ་པར་ཡོད་མེད་ལ་སོགས་པ་སྤྲོས་པའི་མཐའ་ཐམས་ཅད་དང་བྲལ་ཞིང་། ཀུན་རྫོབ་ཏུ། མདོ་ཏིང་ངེ་འཛིན་རྒྱལ་པོ་ལས། སྒྱུ་མ་བྱེད་པ་དག་གིས་གཟུགས་སྤྲུལ་ཏེ། །རྟ་དང་གླང་པོ་ཤིང་རྟ་སྣ་ཚོགས་བྱས། །དེ་ལ་ཇི་བཞིན་སྣང་བ་གང་ཡང་མེད། །ཆོས་རྣམས་ཐམས་ཅད་དེ་འདྲར་ཤེས་པར་གྱིས། །ཞེས་གསུངས་པ་ལྟར་སྣང་བ་ཐམས་ཅད་སྣང་ཡང་བདེན་པ་མེད་པར་ཤེས་པར་བྱས་ནས། དེ་ལྟ་བུའི་དོན་མ་རྟོགས་པར། གཟུངས་འཛིན་ལ་བདེན་པར་ཞེན་པའི་དབང་གིས་ཁམས་གསུམ་གྱི་འཁོར་བའི་གནས་སུ་བདེ་བ་འདོད་བཞིན་དུ་བདེ་བ་དང་ནི་བྲལ། སྡུག་བསྔལ་མི་འདོད་བཞིན་དུ་སྡུག་བསྔལ་བསམ་གྱིས་མི་ཁྱབ་པ་དང་ནི་ལྡན། བདེ་བ་བསྒྲུབ་ཅིང་སྡུག་བསྔལ་འདོར་བའི་ཐབས་མི་ཤེས་པའི་རིགས་དྲུག་གི་སེམས་ཅན་འདི་ཐམས་ཅད་ཀྱིས་ཐོག་མ་མེད་པ་ནས་ཡང་ནས་ཡང་དུ་བདག་གི་ཕ་མར་བྱས་ཏེ། ཕན་བདེ་སྒོ་དུ་མ་ནས་ནི་བསྒྲུབས། གནོད་འཚེ་ཐམས་ཅད་ལས་ནི་ཅི་ནུས་ཀྱིས་བསྐྱབས། བསམ་རྒྱུ་དང་དྲན་རྒྱུ་ནི་བདག་ལས་མེད་པ་བྱས་ཤིང་། བདག་གི་ཆེད་དུ་ལུས་སྲོག་ཀྱང་གྲངས་མེད་པར་བཏང་བའི་དྲིན་ཅན་ཤ་སྟག་ཡིན་པས། དེ་ཐམས་ཅད་སྡུག་བསྔལ་ལས་བསྒྲལ་ཞིང་བདེ་བ་ལ་འགོད་པར་བྱ་དགོས་ནའང་། ད་ལྟ་བདག་ལ་དེའི་ནུས་པ་མེད་ཅིང་སེམས་ཅན་ཐམས་ཅད་སྡུག་བསྔལ་ལས་སྒྲོལ་ཞིང་བདེ་བ་ལ་འགོད་ནུས་པ་སངས་རྒྱས་ཁོ་ན་ཡིན། དེ་བདག་གིས་ཐོབ་པར་བྱ། དེའང་རྒྱུ་མེད་པར་མི་ཐོབ་ཅིང་། དེའི་རྒྱུའི་གཙོ་བོ་ནི་བྱང་ཆུབ་སེམས་དཔའི་སྡོམ་པ་ཡིན་པས། དེ་བདག་གིས་བླངས་ནས། བསླབ་པ་གསུམ་ཀ་ཡུལ་ཐམས་ཅད་དུ། དུས་ཐམས་ཅད་ཀྱི་ཚེ། ཚེ་རབས་ཐམས་ཅད་དུ་བསྲུང་བར་བྱ་སྙམ་དུ་བསམས་ནས། བླ་མ་ལ་སངས་རྒྱས་དང་། རང་ལ་སྒྱུ་མ་ལྟ་བུར་ཤེས་པ་དང་ལྡན་པས། སེམས་རྩེ་གཅིག་ཏུ་གྱིས་ལ་ལན་ཐོབ་མཛོད། ཅེས་བརྗོད་ནས། སློབ་དཔོན་གྱིས། རིགས་ཀྱི་བུ། མིང་འདི། ཞེས་བྱ་བ་ཁྱོད། བདག་བྱང་ཆུབ་སེམས་དཔའ་སློབ་དཔོན་རང་ཉིད་ཀྱི་མིང་ནས་སྨོས་ལ། མིང་འདི། ཞེས་བྱ་བ་ལས། འདས་པའི་བྱང་ཆུབ་སེམས་དཔའ་ཐམས་ཅད་ཀྱི་བསླབ་པའི་གཞིར་གྱུར་པ་གང་ཡིན་པ་དང་། ཚུལ་ཁྲིམས་སུ་གྱུར་པ་གང་ཡིན་པ་དང་། མ་བྱོན་པའི་བྱང་ཆུབ་སེམས་དཔའ་ཐམས་ཅད་ཀྱི་བསླབ་པའི་གཞིར་གྱུར་པ་གང་ཡིན་པ་དང་། ཚུལ་ཁྲིམས་སུ་གྱུར་པ་གང་ཡིན་པ་དང་། ད་ལྟར་ཕྱོགས་བཅུའི་འཇིག་རྟེན་ན་བཞུགས་པའི་བྱང་ཆུབ་སེམས་དཔའ་ཐམས་ཅད་ཀྱི་བསླབ་པའི་གཞིར་གྱུར་པ་གང་ཡིན་པ་དང་། ཚུལ་ཁྲིམས་སུ་གྱུར་པ་གང་ཡིན་པའི་བསླབ་པའི་གཞི་གང་དག་དང་། ཚུལ་ཁྲིམས་གང་དག་ལ་འདས་པའི་བྱང་ཆུབ་སེམས་དཔའ་ཐམས་ཅད་ཀྱིས་བསླབ་པར་གྱུར་པ་དང་། མ་བྱོན་པའི་བྱང་ཆུབ་སེམས་དཔའ་ཐམས་ཅད་སློབ་པར་འགྱུར་པ་དང་། ཕྱོགས་བཅུ་དག་ན་ད་ལྟར་བཞུགས་པའི་བྱང་ཆུབ་སེམས་དཔའ་ཐམས་ཅད་ད་ལྟར་སློབ་པའི་བྱང་ཆུབ་སེམས་དཔའི་བསླབ་པའི་གཞི་ཐམས་ཅད་དང་། བྱང་ཆུབ་སེམས་དཔའི་ཚུལ་ཁྲིམས་ཐམས་ཅད་དེ་སྡོམ་པའི་ཚུལ་ཁྲིམས་དང་། དགེ་བའི་ཆོས་སྡུད་པའི་ཚུལ་ཁྲིམས་དང་། སེམས་ཅན་གྱི་དོན་བྱེད་པའི་ཚུལ་ཁྲིམས་རྣམས་ནོད་དམ། ཞེས་བརྗོད་ལ། སློབ་མས། ནོད་ལགས། ཞེས་ཁས་བླང་ངོ་། །དེས་ཁས་བླངས་པ་དང་པོ་སོང་ནས། ལན་རེ་རེ་བཞིན་བློ་སྦྱོང་བསྒོམ་ཞིང་བྱ་བར་གསུངས་པས་བསམ་པ་འདི་བཞིན་དུ་མཛོད། མཐའ་ཡས་པའི་མར་གྱུར་སེམས་ཅད་ཐམས་ཅད་བདེ་བ་དང་ལྡན་ཞིང་། སྡུག་བསྔལ་ལས་སྒྲོལ་བའི་སླད་དུ་བདག་གིས་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་དེ་ཅི་ནས་ཀྱང་ཐོབ་པ་ཞིག་བྱ། །དེ་ཡང་རྒྱུ་མེད་རྐྱེན་མེད་ལས་མི་འབྱུང་བས། རྒྱུ་རྐྱེན་གྱི་གཙོ་བོ་དུས་གསུམ་དུ་གཤེགས་ཤིང་བཞུགས་ལ་འབྱོན་པར་འགྱུར་བའི་རྒྱལ་སྲས་བྱང་ཆུབ་སེམས་དཔའ་རྣམས་ཀྱིས་བསླབ་པར་བྱ་བའི་གཞི། ཚུལ་ཁྲིམས་རྣམ་པ་གསུམ་ཡང་དག་པར་བླངས་ཏེ་ཕྱོགས་དང་དུས་དང་གནས་སྐབས་ཐམས་ཅད་དུ་བསྲུང་བར་བགྱིའོ་སྙམ་དུ་སྡོམ་པ་བཟུང་བ་ལ་མཆོག་ཏུ་སྤྲོ་བའི་ཡིད་ཀྱིས་དྲི་བ་གཉིས་པའི་ལན་ཐོབ་མཛོད། ཅེས་བརྡ་སྦྱར་ལ། དྲི་བ་དང་། ཁས་བླངས་པ། གོང་བཞིན་བྱ། སླར་ཡང་འདི་ལྟར་ངེས་པར་བྱ་སྟེ། དགེ་བའི་བཤེས་གཉེན་ལ་སྟོན་པའི་འདུ་ཤེས་བསྐྱེད་པ་དང་བཅས་ཏེ་དཀོན་མཆོག་གསུམ་ལ་མི་བསླུ་བའི་སྐྱབས་སུ་ངེས་པའི་དད་པ་ཆེན་པོ་དང་། བདག་དང་སེམས་ཅན་ཐམས་ཅད་དོན་དམ་པ་རང་བཞིན་གྱིས་མ་གྲུབ་ཀྱང་། ཀུན་རྫོབ་སྒྱུ་མ་དང་རྨི་ལམ་ལྟར་འཁྲུལ་སྣང་གི་སྡུག་བསྔལ་འབའ་ཞིག་ལ་ལོངས་སྤྱོད་པ་རྣམས་ཕན་བདེ་ལ་འགོད་པར་འདོད་པའི་བརྩེ་བ་ཆེན་པོ་དང་། དེའི་ཆེད་དུ་མཐའ་གཉིས་ལ་མི་གནས་པ་རྣམ་པ་ཐམས་ཅད་མཁྱེན་པ་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་འདོད་པའི་འདུན་པ་ཆེན་པོ་སྟེ་ཆེན་པོ་གསུམ་དང་ལྡན་པའི་སྒོ་ནས། སངས་རྒྱས་ཐོབ་པའི་རྒྱུ་ཡི་གཙོ་བོ། རྒྱལ་སྲས་རྣམས་ཀྱི་བསླབ་པར་བྱ་བའི་གཞི། བསོད་ནམས་དང་ཡོན་ཏན་མཐའ་ཡས་པའི་གཏེར་དུ་གྱུར་པ་བྱང་ཆུབ་སེམས་དཔའི་སྡོམ་པ་ཉིད་ཡང་དག་པར་བླངས་ཏེ། རྣམ་པ་ཀུན་ཏུ་བསླབ་པར་བགྱིའོ་སྙམ་པའི་འདུན་པ་རྩེ་གཅིག་པས་དྲི་བ་གསུམ་པའི་ལན་ཐོབ་མཛོད། ཅེས་བརྗོད་ལ། དྲི་བ་དང་། ཁས་བླངས་པ་སྔར་བཞིན་བྱ། དེ་ལྟར་ལན་གསུམ་གྱི་བར་དུ་དྲིས་ཤིང་ཁས་བླངས་པས་ཁྱེད་རང་རྣམས་ཀྱི་རྒྱུད་ལ་བྱང་ཆུབ་སེམས་དཔའི་སྡོམ་པའི་དངོས་གཞི་ངེས་པར་སྐྱེ་བ་ཡིན་པས་སྐྱེས་ངེས་སྙམ་དུ་ཐོབ་ཤེས་ཀྱི་དགའ་བ་ཁྱད་པར་ཅན་བསྐྱེད་མཛོད། ཅེས་བརྗོད་པར་བྱའོ། །གསུམ་པ་མཇུག་གི་ཆོ་ག་ལ། མཁྱེན་པར་གསོལ་བ་དང་། ཕན་ཡོན་བསྟན་པ་དང་། གསང་བར་གདམས་པ་དང་། བསླབ་བྱ་བསྟན་པ་དང་། གཏང་རག་དབུལ་བ་སྟེ་རྣམ་པ་ལྔར་ཡོད་པ་ལས། དང་པོ་མཁྱེན་པར་གསོལ་བ་ནི་སློབ་དཔོན་གྱིས་བགྱི་བར་གདའ་སྟེ། ཞེས་བརྡ་སྦྱར་ལ། སློབ་མ་རྣམས་ཙོག་ཙོག་པུར་འཁོད་དུ་གཞུག །སློབ་དཔོན་རང་ཉིད་ཁྲི་ལས་བབས་ཏེ། རྟེན་རྣམས་ཀྱི་དྲུང་དུ་ཞལ་ཤར་དུ་ཕྱོགས་པས་འཁོད་པའི་མདུན་དུ། མེ་ཏོག་སིལ་མས་བཀང་བའི་སྣོད་དང་། བདུག་སྤོས་ཀྱི་རེང་བུའམ་སྤོས་ཕོར་དག་བཤམས། དེ་ནས་ཤར་ཕྱོགས་སུ་ཕྱག་གསུམ་འཚལ་ལ། ཕྱག་རེ་རེ་ལ། ཤར་ཕྱོགས་ཀྱི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་གུས་པ་ཆེན་པོས་ཕྱག་འཚལ་ལོ། །ཞེས་ལན་རེ་བརྗོད་པའི་མཐར་མེ་ཏོག་སྙིམ་པ་གང་ཤར་ཕྱོགས་སུ་གཏོར་ཞིང་། བདུག་སྤོས་ཀྱང་འབུལ་བའི་ཚུལ་བྱ། ཡིད་ཀྱིས་ཤར་ཕྱོགས་འཇིག་རྟེན་གྱི་ཁམས་བསམ་གྱིས་མི་ཁྱབ་པ་ན་བཞུགས་པའི་རྒྱལ་བ་སྲས་དང་བཅས་པའི་སྤྱན་སྔར་ཕྱག་འཚལ་ཞིང་མཆོད་པའི་སྤྲིན་གྱི་ཆར་ཆེན་པོ་ཕབ་པར་བསམ། ཚུལ་དེ་བཞིན་གྱིས་རིགས་འགྲེ་བས། ལྷོ་ཕྱོགས་སོགས་ཕྱོགས་ལྷག་མ་གསུམ་དང་། མཚམས་བཞི་དང་། འོག་ཕྱོགས་ཀྱི་དོད་དུ་ནུབ་དང་། སྟེང་ཕྱོགས་ཀྱི་དོད་དུ་ཤར་རྣམས་སུ་ཕྱག་དང་མཆོད་པ་འབུལ་བ་རྣམས་གོ་རིམ་མ་འཁྲུལ་བར་བྱས་པའི་མཐར། རྟེན་ལ་ཞལ་ཕྱོགས་པས་པུས་མོ་གཡས་པའི་ལྷ་ང་ས་ལ་བཙུག །མེ་ཏོག་དང་བཅས་པའི་ཐལ་མོ་སྙིང་ཁར་སྦྱར། མདུན་དུ་སྤོས་བཏུལ་ལ་འདུན་པ་རྩེ་གཅིག་པས་མཁྱེན་པར་གསོལ་བ་ནི། བྱང་ཆུབ་སེམས་དཔའ། སློབ་མས་སོ་སོའི་མིང་ནས་སྨོས་ལ། མིང་འདི་ཞེས་བྱ་བས། བདག་བྱང་ཆུབ་སེམས་དཔའ། རང་གི་མིང་ནས་སྨོས་ལ། ཞེས་བྱ་བ་ལས། བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་ཡང་དག་པར་བླང་བར་བྱ་བ་ལ་ལན་གསུམ་གྱི་བར་དུ་ཡང་དག་པར་མནོས་པ་ལགས་ཏེ། བྱང་ཆུབ་སེམས་དཔའ། སློབ་མའི་མིང་ནས་སྨོས་ལ། ཞེས་བགྱི་བས་བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་ཡང་དག་པར་བླངས་པ་ལ། བདག །རང་གི་མིང་ནས་སྨོས་ལ། ཞེས་བགྱི་བ་དབང་དུ་གྱུར་པས། འཕགས་པའི་མཆོག་ལྐོག་ཏུ་གྱུར་ཀྱང་། ཕྱོགས་བཅུའི་འཇིག་རྟེན་གྱི་ཁམས་ཀྱི་མཐའ་གཏུགས་པའི་ཆོས་ཐམས་ཅད་ལྐོག་ཏུ་མ་གྱུར་པའི་ཐུགས་མངའ་བ་ཐམས་ཅད་ལ་མཁྱེན་པར་གསོལ་ལོ། །ཞེས་མེ་ཏོག་འཐོར་བ་དང་བཅས་པས་ལན་གསུམ་དུ་བརྗོད་པ་ན་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཡེ་ཤེས་གཟིགས་པས་མངོན་སུམ་མཁྱེན་ཅིང་རྗེས་སུ་བརྩེ་བས་དགོངས་པར་བསམ་མོ། །དེ་ནས་སློབ་དཔོན་གྱིས། དེ་དག་གིས་མཁྱེན་པར་གསོལ་བའི་དངོས་གཞི་གྲུབ་པ་ལགས་པས། ཁྱེད་རང་རྣམས་ཀྱིས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཞབས་ཀྱི་པདྨོ་དྲི་མ་མེད་པ་ལ་མགོ་བོས་རབ་ཏུ་གཏུགས་ཏེ་གུས་པས་ཕྱག་འཚལ་བའི་མོས་པ་དང་བཅས་སློབ་དཔོན་དང་ལྷན་ཅིག་ཏུ་ཕྱག་གསུམ་མཛད་པར་ཞུ། ཞེས་བརྡ་སྦྱར་ལ། སློབ་དཔོན་རང་ཉིད་ཀྱིས་བསྐུལ་ཏེ། ཇི་སྙེད་སུ་དག་ཕྱོགས་བཅུའི་འཇིག་རྟེན་ན། སོགས་ནས། བདེ་བར་གཤེགས་པ་ཐམས་ཅད་བདག་གིས་བསྟོད། །ཞེས་པའི་བར་བརྗོད་ནས་རྟེན་ལ་ཕྱག་གསུམ་བཙལ། དེ་ལྟར་ཕྱག་འཚལ་ནས། སླར་ཡང་བདག་དང་སེམས་ཅན་ཐམས་ཅད་འཁོར་བ་ལས་ལངས་པར་བསམས་ལ་ཀེར་གྱིས་ལངས་ཏེ་ཐལ་མོ་སྤྱི་བོར་སྦྱར་བར་ཞུ། ཞེས་བརྗོད་ལ་དེ་ལྟར་བྱེད་དུ་གཞུག་གོ །དེ་ནས་སློབ་དཔོན་དང་། སློབ་མ་གཉིས་ཀ་འགྲེང་བཞིན་དུ། སློབ་དཔོན་གྱིས་ཕྱག་གཡས་པ་སྐྱབས་སྦྱིན་གྱི་ཚུལ་དང་བཅས་ཏེ། འདི་སྐད་དུ། དེས་མཁྱེན་པར་གསོལ་བ་ཡན་ལག་དང་བཅས་པ་གྲུབ་ནས། གཉིས་པ་ཕན་ཡོན་བསྟན་པ་ནི། འདི་ལ་གསན་པས་ཁྱབ་པར་གདའ་སྟེ། བྱང་ཆུབ་སེམས་དཔའ་ཞེས་སྔོན་དུ་འགྲོ་བས་སློབ་མ་རྣམས་ཀྱི་མིང་ནས་སྨོས་ལ། མིང་འདི། ཞེས་བྱ་བ་ཁྱོད་ཉོན་ཅིག །འདི་ལྟར་བྱང་ཆུབ་སེམས་དཔའི་སྡོམ་པ་ཉི་ཤུ་པ་ལས། དེ་ཚེ་དེ་ལ་དགེ་བའི་ཕྱིར། །རྒྱལ་བ་སྲས་དང་བཅས་རྣམས་ཀྱིས། །དགེ་བའི་ཐུགས་ཀྱིས་རྟག་པར་ཡང་། །བུ་སྡུག་འདྲ་བར་དགོངས་པར་འགྱུར། །ཞེས་གསུངས་པ་ལྟར། འདི་ནི་ཆོས་ཉིད་ཡིན་ཏེ། གང་གི་ཚེ་བྱང་ཆུབ་སེམས་དཔའ་བྱང་ཆུབ་སེམས་དཔའི་སྡོམ་པ་ཡང་དག་པར་ལེན་པའི་ལས་བརྗོད་པ་རྫོགས་པའི་ཚེ། ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་ཀྱི་སངས་རྒྱས་དང་བྱང་ཆུབ་སེམས་དཔའ་རྣམས་ལ་འདི་ལྟ་བུའི་ལྟས་འབྱུང་བར་འགྱུར་ཏེ། སངས་རྒྱས་དང་བྱང་ཆུབ་སེམས་དཔའ་དེ་དག་གིས་འདི་ལྟར་སངས་རྒྱས་ཀྱི་ཞིང་འདི་ལྟ་བུ་ཞིག་ན། བྱང་ཆུབ་སེམས་དཔའ། སློབ་མའི་མིང་ནས་སྨོས་ལ། མིང་འདི། ཞེས་བྱ་བ། བྱང་ཆུབ་སེམས་དཔའ་རང་གི་མིང་ནས་སྨོས་ལ། མིང་འདི། ཞེས་བྱ་བ་ལས། བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་ཡང་དག་པར་བླང་བ་མངོན་ཤེས་ཡང་དག་པར་མཁྱེན་པར་འགྱུར་རོ། །དེ་ལ་སངས་རྒྱས་བཅོམ་ལྡན་འདས་དེ་དག་དང་། བྱང་ཆུབ་སེམས་དཔའ་དེ་རྣམས་ཀྱིས་ཆོས་ཀྱི་བརྩེ་བས་བུ་དང་སྤུན་ཟླའི་ཚུལ་དུ་དགོངས་པར་མཛད་ལ། དེ་ལྟར་དགོངས་པར་མཛད་པས་བསོད་ནམས་དང་ཡེ་ཤེས་ཀྱི་ཚོགས་འཕེལ་བར་འགྱུར་རོ། །ཞེས་བརྗོད་པར་བྱའོ། །དེ་ནས་དཔོན་སློབ་གཉིས་ཀ་འདུག་ནས། སློབ་དཔོན་གྱིས། གསུམ་པ་བྱང་ཆུབ་སེམས་དཔའི་སྡོམ་པ་བླངས་པ་འདི་ཉིད་དད་པ་མེད་པ་རྣམས་ཀྱི་མདུན་དུ་སྨྲ་བར་མི་བྱའོ། །ཞེས་གསང་བར་གདམས་པ་ནི་འདི་ཡིན་ཏེ། བྱང་ཆུབ་སེམས་དཔའ། མིང་འདི། ཞེས་བྱ་བ་ཁྱོད་ཉོན་ཅིག །བྱང་ཆུབ་སེམས་དཔའི་སྡོམ་པ་ཡང་དག་པར་བླང་བ། འདི་དད་པ་མེད་པ་རྣམས་ཀྱི་མདུན་དུ་སྨྲ་བར་མི་བྱ་སྟེ། གང་གི་ཕྱིར་དད་པ་མེད་པ་རྣམས་ལ་བྱང་ཆུབ་སེམས་དཔའི་སྡོམ་པ་རབ་ཏུ་བསྟན་ན། དད་པ་མེད་པའི་སེམས་ཅན་དེ་དག་གིས་བྱང་ཆུབ་སེམས་དཔའི་སྡོམ་པ་ལ་མ་དད་པས་སྤོང་བར་བྱེད་དེ། དེས་ན་ཇི་སྲིད་བྱང་ཆུབ་སེམས་དཔའི་སྡོམ་པ་ལ་གནས་པས་བསོད་ནམས་ཀྱི་ཕུང་པོ་དང་ལྡན་པ་དེ་སྙེད་ཀྱི་བསོད་ནམས་མ་ཡིན་པའི་ཕུང་པོའང་དེ་སྙེད་དང་ལྡན་པར་འགྱུར་རོ། །གང་གི་ཕྱིར་བྱང་ཆུབ་སེམས་དཔས་སེམས་ཅན་ཐམས་ཅད་སྡུག་བསྔལ་ཐམས་ཅད་ལས་ཡོངས་སུ་བསྲུང་བར་བྱ་བ་ཡིན་པས། སྡིག་པ་ལས་བཟློག་པར་བྱ་སྟེ། དེའི་ཕྱིར་མཆོག་ཏུ་དགེ་བའི་བྱང་ཆུབ་སེམས་དཔས་གསང་བར་བྱ་བ་ཡིན་ནོ། །ཞེས་བརྗོད་པར་བྱའོ། །བཞི་པ་བསླབ་བྱ་བསྟན་པ་ནི། དེ་ལྟར་སྡོམ་པ་བླངས་པ་ཙམ་གྱིས་མི་ཆོག །དེའི་མི་མཐུན་པའི་ཕྱོགས་སྤང་བྱ་རྣམས་སྤོང་ཞིང་། མཐུན་པའི་ཕྱོགས་བསླབ་བྱ་རྣམས་ལ་སློབ་དགོས། དེའང་སྤང་བླང་གི་ཡུལ་ངོ་ཤེས་པ་ལ་རགས་ལས་པས། དེའི་ཚུལ་རྒྱས་པར་ནི། ཐེག་པ་ཆེན་པོའི་མདོ་དང་བསྟན་བཅོས་རྣམས་ལས་རྒྱ་ཆེར་འབྱུང་བ་ལྟར་ཤེས་པར་བྱ་བ་ཡིན་ནའང་། འདིར་དེ་དག་གི་སྙིང་པོ་མདོར་བསྡུས་ཏེ་གདམས་པའང་འདི་ལ་གསན་པས་ཁྱབ་པར་གདའ་སྟེ། དེ་ལ་སྤང་བྱ་ནི། སློབ་དཔོན་ཙནྡྲ་གོ་མཱིས་སྡོམ་པ་ཉི་ཤུ་པ་ལས། །རྙེད་དང་བཀུར་སྟིར་ཆགས་པ་ཡིས། །བདག་བསྟོད་གཞན་ལ་སྨོད་པ་དང་། །སྡུག་བསྔལ་མགོན་མེད་གྱུར་པ་ལ། །སེར་སྣས་ཆོས་ནོར་མི་སྟེར་དང་། །གཞན་གྱིས་བཤད་ཀྱང་མི་ཉན་པར། །ཁྲོས་ནས་གཞན་ལ་འཚོག་པ་དང་། །ཐེག་པ་ཆེན་པོ་སྤོང་བྱེད་ཅིང་། །དམ་ཆོས་འདྲར་སྣང་སྟོན་པའོ། །ཞེས་གསུངས་པའི་ཆོས་བཞི་པོ་འདི་ལ་ཀུན་ནས་དཀྲིས་པ་ཆེ་འབྲིང་ཆུང་གསུམ་དུ་ཡོད་དེ། འཕགས་པ་ཐོགས་མེད་ཀྱིས། བྱང་ས་ལས། ཕམ་པའི་གནས་ལྟ་བུ་བཞི་པོ་འདི་དག་ནི་ཀུན་ནས་དཀྲིས་པ་ཆུང་ངུ་དང་། འབྲིང་གིས་ནི་ཚུལ་ཁྲིམས་ཀྱི་སྡོམ་པ་ཡང་དག་པར་བླངས་པ་དེ་བྱང་ཆུབ་སེམས་དཔས་བཏང་བར་མི་འགྱུར་རོ། །ཀུན་ནས་དཀྲིས་པ་ཆེན་པོས་ནི་བཏང་བར་འགྱུར་ཏེ། གང་གི་ཕྱིར་བྱང་ཆུབ་སེམས་དཔའ་ཕམ་པའི་གནས་ལྟ་བུའི་ཆོས་བཞི་པོ་འདི་དག་རྒྱུན་མི་འཆད་པར་ཀུན་ཏུ་སྤྱད་པ་དང་། ངོ་ཚ་ཤེས་པ་དང་ཁྲེལ་ཡོད་པ་ཆུང་ངུ་ཙམ་ཡང་མི་བསྐྱེད་པ་དང་། དེས་མགུ་བར་བྱེད་ཅིང་དེ་ལ་དགའ་བ་དང་། དེ་ཉིད་ལ་ཡོན་ཏན་དུ་ལྟ་བ་ཅན་དུ་གྱུར་པ་ནི་ཀུན་ནས་དཀྲིས་པ་ཆེན་པོ་ཡིན་པར་རིག་པར་བྱའོ། །ཞེས་གསུངས་པས་ཡན་ལག་གསུམ་པོ་དེ་ཚང་ན་ཀུན་ནས་དཀྲིས་པ་ཆེན་པོ་ཞེས་བྱའོ། །ཡང་བྱང་ས་ལས། མདོར་བསྡུ་ན་རྒྱུ་གཉིས་ཁོ་ནས་བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་ཡང་དག་པར་བླངས་པ་བཏང་བར་འགྱུར་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་པ་ཡོངས་སུ་བཏང་བ་དང་། ཕམ་པའི་གནས་ལྟ་བུའི་ཆོས་ཀུན་ནས་དཀྲིས་པ་ཆེན་པོས་ཀུན་ཏུ་སྤྱོད་པའོ། །ཞེས་གསུངས་ཤིང་། རྣམ་པར་གཏན་ལ་དབབ་པ་བསྡུ་བ་ལས། དེ་གཏོང་བ་ནི་མདོར་བསྡུ་ན་རྒྱུ་བཞིས་འགྱུར་ཏེ། ཡང་དག་པར་ལེན་པའི་སེམས་ཀྱིས་མི་འདྲ་བར་ངེས་པའི་སེམས་སྐྱེད་པར་བྱེད་པ་དང་། མི་བརྡ་ཕྲད་པའི་དྲུང་དུ་འབུལ་བ་དང་ལྡན་པའི་ཚིག་རྗོད་པར་བྱེད་པ་དང་། ཕམ་པའི་གནས་ལྟ་བུའི་ཆོས་བཞི་པོ་དེ་དག་ལས་ཐམས་ཅད་དམ་རེ་རེའི་ཉེས་པ་འབྱིན་པ་དང་། ཕམ་པའི་གནས་ལྟ་བུའི་ཆོས་བཞི་པོ་ཐམས་ཅད་རེ་རེ་ལ་ཀུན་ནས་དཀྲིས་པ་ཆེན་པོའི་ཉེས་པ་འབྱིན་པར་བྱེད་ན་བྱང་ཆུབ་སེམས་དཔའི་སྡོམ་པ་བཏང་བར་བརྗོད་པར་བྱའོ། །ཞེས་གསུངས་པས་སྨོན་པ་བཏང་བ་དང་། ཀུན་ནས་དཀྲིས་པ་ཆེན་པོས་ཞི་བའི་གནས་ལྟ་བུའི་ཆོས་བཞི་གང་རུང་སྤྱད་པ་དང་། ཀུན་ནས་དཀྲིས་པ་འབྲིང་པོ་ཡན་ཆད་ཀྱིས་བཞི་ཀ་ཚང་བར་སྤྱད་པ་དང་། བྱང་སེམས་ཀྱི་སྡོམ་པ་ལས་བཟློག་པའི་སྡོམ་མིན་སྐྱེས་པ་དང་། བསླབ་པ་ཕུལ་བ་དང་ལྔས་སྡོམ་པ་བཏང་བས། དེ་དག་བྱུང་ན་བཤགས་དང་བསག་སྦྱང་བྱས་ལ་སྡོམ་པ་སླར་ཡང་བླང་བར་བྱ་སྟེ། སྡོམ་པ་ཉི་ཤུ་པ་ལས་སྡོམ་པ་སླར་ཡང་བླང་བར་བྱ། ཞེས་གསུངས་སོ། །ཀུན་ནས་དཀྲིས་པ་འབྲིང་དང་ཆུང་ངུས་བཞི་པོ་གང་རུང་སྤྱད་པ་ནི། ཉེས་བྱས་སུ་གཏོགས་ལ། དེ་ཡང་ཆོས་གང་རུང་དེ་ལ་ངོ་ཚ་དང་ཁྲེལ་ཡོད་ཅུང་ཟད་སྐྱེ་ཞིང་གཞན་གྱིས་གསོལ་བ་བཏབ་ན་ལྡོག་པ་ནི་འབྲིང་ཡིན་ལ། དེ་ནི་གང་ཟག་གསུམ་ཡན་ཆད་ལ་བཤགས་པར་བྱ་སྟེ། སྔ་མ་ལས། ཟག་པ་འབྲིང་ནི་གསུམ་ལ་བཤགས། །ཞེས་སོ། །ཆོས་གང་རུང་དེ་ལ་ངོ་ཚ་ཆེར་བསྐྱེད་ཅིང་གཞན་གྱིས་མ་བཟློག་ཀྱང་རང་ཉིད་མྱུར་དུ་དེ་ལས་ལྡོག་པ་ནི་ཆུང་ངུ་ཡིན་ལ། དེ་དང་འོག་ནས་འབྱུང་བའི་ཉེས་བྱས་བཞི་བཅུ་རྩ་བཞི་པོ་རྣམས་ནི་གང་ཟག་ཅིག་ཡན་ཆད་ལ་བཤགས་པར་བྱ་སྟེ། དེ་ཉིད་ལས། གཅིག་གི་མདུན་དུ་ལྷག་མ་རྣམས། །ཞེས་སོ། །དེ་བཞིན་དུ་སྡོམ་པ་ཉི་ཤུ་པ་ལས། དཀོན་མཆོག་གསུམ་ལ་མི་མཆོད། ཅེས་པ་ལ་སོགས་པ་ཉེས་བྱས་བཞི་བཅུ་རྩ་བཞི་པོ་ཀུན་སློང་གི་དབང་གིས་ཉོན་མོངས་ཅན་དང་། ཉོན་མོངས་ཅན་མ་ཡིན་པ་དང་། ལྟུང་མེད་དུ་འགྱུར་པའང་ཡོད་ལ། དེ་དག་ནི་བཤགས་ཡུལ་མེད་ན་རང་གི་སེམས་ཀྱིས་བཤགས་པས་འདག་སྟེ། སྔ་མ་ལས། ཉོན་མོངས་མི་མོངས་བདག་སེམས་བཞིན། །ཞེས་སོ། །ཡང་བྱམས་པ་དང་སྙིང་རྗེ་ཆེན་པོས་ཀུན་ནས་བསླངས་ཏེ་གཞན་ལ་ཕན་པ་ཆེན་པོར་འགྱུར་ངེས་པར་མཐོང་ནས་སྤྱད་ན་ཕལ་ཆེར་ལྟུང་མེད་དུ་འགྱུར་ཏེ། དེ་ཉིད་ལས། སྙིང་རྗེར་ལྡན་ཞིང་བྱམས་ཕྱིར་དང་། །སེམས་དགེ་བ་ལ་ཉེས་པ་མེད། །ཅེས་གསུངས་སོ། །བསླབ་བྱ་ནི། ཚུལ་ཁྲིམས་གསུམ་པོ་ཡིན་ཏེ། བྱང་ས་ལས། ཚུལ་ཁྲིམས་རྣམ་པ་གསུམ་པོ་དེ་དག་ཀྱང་མདོར་བསྡུ་ན། བྱང་ཆུབ་སེམས་དཔའི་བྱ་བ་རྣམ་པ་གསུམ་བྱེད་དེ། སྡོམ་པའི་ཚུལ་ཁྲིམས་ཀྱིས་ནི་གནས་པར་བྱེད་དོ། །དགེ་བའི་ཆོས་སྡུད་པས་ནི་བདག་གི་སངས་རྒྱས་ཀྱི་ཆོས་ཡོངས་སུ་སྨིན་པར་བྱེད་དོ། །སེམས་ཅན་གྱི་དོན་བྱ་བའི་ཚུལ་ཁྲིམས་ཀྱིས་ནི་སེམས་ཅན་ཡོངས་སུ་སྨིན་པར་བྱེད་དོ། །བྱང་ཆུབ་སེམས་དཔའི་བྱ་བ་ནི་གསུམ་པོ་དེ་དག་ཏུ་ཟད་དེ། འདི་ལྟ་སྟེ། ཚེ་འདི་ལ་བདེ་བར་གནས་པར་བྱ་བའི་ཕྱིར་སེམས་གནས་པར་བྱ་བ་དང་། ལུས་དང་སེམས་དུབ་པ་མེད་པར་སངས་རྒྱས་ཀྱི་ཆོས་ཡོངས་སུ་སྨིན་པར་བྱ་བ་དང་། སེམས་ཅན་ཡོངས་སུ་སྨིན་བྱེད་པ་ཡིན་ཏེ། བྱང་ཆུབ་སེམས་དཔའི་ཚུལ་ཁྲིམས་ནི་དེ་དག་ཏུ་ཟད་དོ། །ཞེས་གསུངས་པས། བྱང་ཆུབ་སེམས་དཔའི་བསླབ་བྱ་ཐམས་ཅད་གསུམ་པོ་དེར་འདུས་པས་གསུམ་པོ་དེ་ལ་འབད་དེ་བསླབ་པར་བྱའོ། །ཡང་རང་དང་གཞན་ལ་ཚེ་འདིར་སྡུག་བསྔལ་ཡང་ཕྱི་མ་ཕན་ཆད་དུ་ཕན་པར་འགྱུར་བའི་དགེ་བ་ནི་བསྒྲུབ་ཅིང་བསྒྲུབ་ཏུ་གཞུག་པར་བྱའོ། །འདི་དང་ཕྱི་མ་གཉིས་ཀར་ཕན་པ་དང་བདེ་བར་འགྱུར་ན་བསྒྲུབ་ཅིང་། འདིར་བདེ་ཡང་ཕྱི་མ་ཕན་ཆད་དུ་སྡུག་བསྔལ་གྱི་རྒྱུར་འགྱུར་བ་ནི་འདོར་ཞིང་འདོར་དུ་གཞུག་པར་བྱ་སྟེ། །སྡོམ་པ་ཉི་ཤུ་པ་ལས། གཞན་རྣམས་དང་ནི་བདག་ལའང་རུང་། སྡུག་བསྔལ་ཡིན་ཡང་གང་ཕན་པ། ཕན་དང་བདེ་བ་རྣམས་བྱ་སྟེ། བདེ་ཡང་མི་ཕན་མི་བྱའོ། །ཞེས་གསུངས་སོ། །དེ་ལྟར་སྤང་བྱ་དང་བསྒྲུབ་བྱ་ཐམས་ཅད་ཀྱང་བྱང་ཆུབ་སེམས་དཔའི་ས་ལ་སོགས་པ་ལས་ལེགས་པར་ཤེས་པར་བྱས་ཏེ། གནས་སྐབས་ཐམས་ཅད་དུ་དྲན་པ་དང་ཤེས་བཞིན་གྱིས་ཟིན་པར་བྱས་ནས་བསླབ་པར་བྱ་སྟེ། སློབ་དཔོན་ཆེན་པོ་ཞི་བ་ལྷས། བསླབ་པ་བསྲུང་བར་འདོད་པ་ཡིས། རབ་ཏུ་བསྒྲིམས་ཏེ་སེམས་བསྲུང་བྱ། ཞེས་པ་དང་། སེམས་བསྲུང་འདོད་པ་རྣམས་ཀྱིས་ནི། དྲན་པ་དང་ནི་ཤེས་བཞིན་དག །སྲོག་ལ་བབ་ཀྱང་སྲུངས་ཤིག་ཅེས། །བདག་ནི་དེ་སྐད་འདོམས་པར་བྱེད། །ཅེས་གསུངས་པས་དྲན་ཤེས་བཞིན་དང་ལྡན་པས་བསླབ་པ་རྣམས་ལ་ལེགས་པར་བསླབ་པར་བྱའོ། །ལྔ་པ་གཏང་རག་འབུལ་བ་ནི། དེ་ལྟར་བྱང་ཆུབ་སེམས་དཔའི་སྡོམ་པ་ཡང་དག་པར་བླང་བ་ཐོབ་པ་དེ་ཉིད་བླ་མ་དང་དཀོན་མཆོག་གི་བཀའ་དྲིན་ལས་བྱུང་བས་ན། གཏང་རག་གི་སླད་དུ་ཕྱག་དང་། མཆོད་པས་བསྙེན་བཀུར་བ་སྐབས་སུ་བབས་པ་ཡིན་པས། ཐོག་མར་གནས་ལྔ་ས་ལ་གཏུགས་པའི་ཕྱག་དང་བཅས་ཏེ་འདི་གསུང་བར་ཞུ། ཇི་སྙེད་སུ་དག་སོགས་ཤློ་ཀ་བཞི་ཚར་གཅིག །དེ་ནས་མཆོད་པ་གསར་པ་བཟང་དུ་བཤམས་ལ། སློབ་དཔོན་གྱིས་སྔར་བཞིན་བྱིན་གྱིས་བརླབས་ཟིན་པ་དང་། དེ་ནས་མཆོད་པ་འབུལ་བ་ལ། དངོས་སུ་བཤམས་པའི་མཆོད་པ་དང་། ལུས་དབུལ་བའི་མཆོད་པ་དང་། དེ་ལས་གཞན་ཡང་མཆོད་པའི་སྤྲིན་རབ་འབྱམས་ཀྱིས་མཆོད་པ་དང་གསུམ་པོ་སྔར་ཇི་སྐད་བཤད་པའི་དམིགས་པ་རྣམས་ཡིད་ལ་དྲན་བཞིན་པའི་སྒོ་ནས་རིམ་བཞིན་དུ་འབུལ་བར་ཞུ། ཞེས་བརྡ་སྦྱར་ལ། ཨོཾ་གུ་རུ་སརྦ་ཏ་ཐཱ་ག་ཏ་ཨརྒྷཾ་སོགས་སྔགས་རྐྱང་པའམ། ཚིགས་བཅད་དང་སྤེལ་བ་ཇི་ལྟར་རིགས་པས་དངོས་བཤམས། རྒྱལ་དང་དེ་སྲས་རྣམས་ལ། སོགས་ཤློ་ཀ་གཅིག་གིས་ལུས་དབུལ་བ། མེ་ཏོག་དམ་པ། སོགས་ཤློ་ཀ་གཅིག་གིས་ཡིད་སྤྲུལ་གྱི་མཆོད་པ་རྣམས་འབུལ་དུ་གཞུག་གོ། །དེ་རྣམས་ཀྱིས་སྤྱིར་བླ་མ་དང་དཀོན་མཆོག་ལ་ཕྱག་དང་མཆོད་པ་ཕུལ་ནས། ཁྱད་པར་སློབ་དཔོན་ལ་བཀའ་དྲིན་རྗེས་སུ་དྲན་པས་གུས་པའི་འདུ་ཤེས་བསྐྱེད་དེ་ཕྱག་གསུམ་མཛད་པར་ཞུ། ཞེས་ཕྱག་གསུམ་འཚལ་དུ་བཅུག་ཟིན་པ་དང་། འགྲེང་སྟེ་འདུད་པ་དང་བཅས་པས། བཀའ་དྲིན་ཆེ་ལགས། ཞེས་བརྗོད་དུ་གཞུག་གོ །སྤྱི་དོན་གསུམ་པ་རང་བཞིན་གཏན་ལ་དབབ་པ་ནི། སྨོན་འཇུག་གི་སེམས་དེ་ཉིད་གང་ལས་སྐྱེ་བའི་རྒྱུ་དང་། རང་གི་ངོ་བོ་དང་། དེ་ཡི་རབ་ཏུ་དབྱེ་བ་དང་། གནས་སྐབས་དང་མཐར་ཐུག་གི་འབྲས་བུ་འབྱིན་པའི་ཕན་ཡོན་ལ་སོགས་པ་ཡིན་ནའང་། སྔ་མ་རྣམས་ནི་ཐེག་པ་ཆེན་པོ་ཤིན་ཏུ་རྒྱས་པའི་མདོ་སྡེ་རྣམས་དང་། རྒྱལ་བའི་སྲས་པོ་མ་ཕམ་པའི་མདོ་སྡེའི་རྒྱན་དང་། འཕགས་པ་ཐོགས་མེད་ཞབས་ཀྱི་བྱང་ཆུབ་སེམས་དཔའི་ས་དང་། སློབ་དཔོན་ཆེན་པོ་ཙཱནྡྲ་གོ་མིའི་སྡོམ་པ་ཉི་ཤུ་པ་སོགས་ལས་རྒྱ་ཆེར་གསུངས་པས་དེ་རྣམས་སུ་གཟིགས་པས་ཁྱབ་ཅིང་། ཕན་ཡོན་ནི། ཆོ་ག་ཤིན་ཏུ་རྒྱས་པར་བྱེད་ན་ཆོ་གའི་སྐབས་སུའང་བཤད་པར་བྱ་བ་ཡིན་པས། འདིར་ཅུང་ཟད་བརྗོད་པར་བྱ་སྟེ། བྱམས་པའི་སྨོན་ལམ་གྱི་མདོ་ལས། །ངན་འགྲོ་ཐམས་ཅད་བཟློག་བགྱིད་ཅིང་། །མཐོ་རིས་ལམ་ནི་རབ་སྟོན་ལ། །རྒ་ཤི་མེད་པར་འདྲེན་བགྱིད་པའི། །བྱང་ཆུབ་སེམས་ལ་ཕྱག་འཚལ་ལོ། །ཞེས་གསུངས། དཔའ་བྱིན་གྱིས་ཞུས་པ་ལས། །བྱང་ཆུབ་སེམས་ཀྱི་བསོད་ནམས་གང་། །གལ་ཏེ་དེ་ལ་གཟུགས་མཆིས་ན། །ནམ་མཁའི་ཁམས་ནི་ཀུན་བཀངས་ཏེ། །དེ་བས་ཀྱང་ནི་ལྷག་པར་འགྱུར། །གངྒཱའི་བྱེ་མའི་གྲངས་སྙེད་ཀྱི། །སངས་རྒྱས་ཞིང་ཀུན་མི་གང་གིས། །རིན་ཆེན་དག་གིས་ཀུན་བཀངས་ཏེ། །འཇིག་རྟེན་མགོན་ལ་ཕུལ་བ་བས། །གང་གིས་ཐལ་མོ་སྦྱར་བགྱིས་ཏེ། །བྱང་ཆུབ་ཏུ་ནི་སེམས་བཏུད་ནས། མཆོད་པ་དེ་ནི་ཁྱད་པར་འཕགས། །དེ་ལ་མཐའ་ནི་མ་མཆིས་སོ། །ཞེས་གསུངས་ཤིང་། དེ་ལྟར་བསོད་ནམས་མཐའ་ཡས་པ་འབྱུང་བའི་གཏན་ཚིགས་ཀྱང་། རིན་ཆེན་ཕྲེང་བ་ལས། སེམས་ཅན་ཁམས་ནི་ཚད་མེད་ལ། །ཕན་འདོད་དེ་ནི་དེ་འདྲའོ། །ཞེས་གསུངས། བློ་གྲོས་རྒྱ་མཚོས་ཞུས་པ་ལས། །རྫོགས་པའི་བྱང་ཆུབ་སེམས་དང་ཆོས་འཛིན་དང་། །ཆོས་སྒྲུབ་པ་དང་སྲོག་ཆགས་སྙིང་བརྩེ་བ། །ཆོས་བཞི་འདི་དག་ཡོན་ཏན་མཐའ་མེད་དེ། །འདི་དག་མཐའ་ནི་རྒྱལ་བས་མི་གསུང་ངོ་། །ཞེས་གསུངས། སེངྒེས་ཞུས་པ་ལས། །སེམས་ཅན་ཐམས་ཅད་ཐར་བྱའི་ཕྱིར། །བྱང་ཆུབ་དོན་དུ་སེམས་བཏུད་པ། །དེས་ནི་ཆོས་རྣམས་བསྡུ་བ་ཐོབ། །དེ་ནི་དགའ་བར་ཐོབ་པར་འགྱུར། །ཞེས་གསུངས། སྡོང་པོ་བཀོད་པའི་མདོ་ལས་ཀྱང་། རིགས་ཀྱི་བུ་བྱང་ཆུབ་ཀྱི་སེམས་ནི་སངས་རྒྱས་ཀྱི་ཆོས་ཐམས་ཅད་ཀྱི་ས་བོན་ལྟ་བུའོ། །འགྲོ་བ་ཐམས་ཅད་ཀྱི་ཆོས་དཀར་པོ་ཐམས་ཅད་རྣམ་པར་འཕེལ་བར་བྱེད་པས་ཞིང་ས་ལྟ་བུའོ། །འཇིག་རྟེན་ཐམས་ཅད་བསྟེན་པས་ས་ལྟ་བུའོ། །ཞེས་བྱ་བ་ནས། བྱང་ཆུབ་སེམས་དཔའ་ཐམས་ཅད་བསྲུང་བས་ཕ་ལྟ་བུའོ། །ཞེས་བྱ་བའི་བར་དང་། དེ་བཞིན་དུ་སྦྱར་ཏེ། དབུལ་བ་ཐམས་ཅད་གཅོད་པས་རྣམ་ཐོས་ཀྱི་བུ་ལྟ་བུའོ། །དོན་ཐམས་ཅད་ཡང་དག་པར་བསྒྲུབས་པས་ཡིད་བཞིན་གྱི་ནོར་བུའི་རྒྱལ་པོ་ལྟ་བུའོ། །བསམ་པ་ཐམས་ཅད་ཡོངས་སུ་རྫོགས་པར་བྱེད་པས་བུམ་པ་བཟང་པོ་ལྟ་བུའོ། །ཉོན་མོངས་པའི་དགྲ་ཕམ་པར་བྱེད་པས་མདུང་ཐུང་ལྟ་བུའོ། །ཚུལ་བཞིན་མ་ཡིན་པའི་ཡིད་ལ་བྱེད་པ་འགེབས་པས་གོ་ཆ་ལྟ་བུའོ། །ཉོན་མོངས་པའི་མགོ་ལྟུང་བར་བྱེད་པས་རལ་གྲི་ལྟ་བུའོ། །ཉོན་མོངས་པའི་ཤིང་གཅོད་པ་སྟྭ་རེ་ལྟ་བུའོ། །འཚེ་བ་ཐམས་ཅད་ལས་སྐྱོབ་པས་མཚོན་ཆ་ལྟ་བུའོ། །འཁོར་བའི་ཆུ་ནང་ན་གནས་པ་སྟེང་དུ་འབྱིན་པས་མཆིལ་པ་ལྟ་བུའོ། །སྒྲིབ་པས་ཁེབས་པའི་རྩ་ཐམས་ཅད་རྣམ་པར་འཐོར་བས་རླུང་གི་དཀྱིལ་འཁོར་ལྟ་བུའོ། །བྱང་ཆུབ་སེམས་དཔའི་སྤྱོད་པ་དང་སྨོན་ལམ་བསྡུས་པའི་ཕྱིར་མདོར་བསྟན་པ་ལྟ་བུའོ། །ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་ན་མཆོད་རྟེན་ལྟ་བུ་སྟེ། རིགས་ཀྱི་བུ་དེ་ལྟར་བྱང་ཆུབ་ཀྱི་སེམས་ནི་ཕན་ཡོན་དེ་དག་དང་ཡོན་ཏན་གྱི་བྱེ་བྲག་ཚད་མེད་པ་གཞན་དང་ཡང་ལྡན་ནོ། །ཞེས་གསུངས། གཞན་ཡང་། མཁས་པས་བྱང་ཆུབ་སེམས་བསྒོམས་ན། །རྒྱལ་བ་སྲས་དང་བཅས་རྣམས་མཆོད། །འདི་ནི་སྐྱོན་མེད་མེ་ཏོག་སྟེ། །རབ་ཏུ་དྲི་ཞིམ་རྣམ་པར་མཛེས། །ཐབས་འདིས་རིང་པོར་མི་ཐོགས་པར། །རྒྱལ་མཆོག་སངས་རྒྱས་ཉིད་དུ་འགྱུར། །གཞན་ཡང་འདོད་པའི་འབྲས་རྣམས་འགྲུབ། །ཅེས་གསུངས། འཕགས་པ་ཀླུ་སྒྲུབ་ཀྱིས། །བདག་ཉིད་དང་ནི་འཇིག་རྟེན་འདིས། །བླ་མེད་བྱང་ཆུབ་ཐོབ་འདོད་ན། །དེའི་རྩ་བ་བྱང་ཆུབ་སེམས། །རི་དབང་རྒྱལ་པོ་ལྟར་བརྟན་དང་། །ཕྱོགས་མཐས་གཏུགས་པའི་སྙིང་རྗེ་དང་། །གཉིས་ལ་མི་བརྟེན་ཡེ་ཤེས་ལགས། །ཞེས་གསུངས། གཞན་ཡང་མདོ་ལས་འབྱུང་བའི་དོན་བྱང་ཆུབ་སེམས་དཔའི་སྤྱོད་པ་ལ་འཇུག་པར་མང་དུ་གསུངས་པ་སོགས་ལ་ངེས་ཤེས་ཁྱད་པར་ཅན་བསྐྱེད་དེ། ཇི་སྐད་བཤད་པའི་བསླབ་བྱ་རྣམས་ལ་སྤང་བླང་ཚུལ་བཞིན་དུ་བསྒྲུབས་པའི་ལེགས་བྱས་ཀྱི་སྣང་བས་རང་གཞན་རྣམས་ཀྱི་ཕན་བདེའི་པདྨོ་མཆོག་ཏུ་རྒྱས་པའི་ཐབས་ལ་བརྩོན་པར་བྱའོ། །ཞེས་བརྗོད། སྐབས་འདིར་ཕྱག་ལེན་འགའ་ཞིག་ལ་གཏང་རག་གི་མཎྜལ་སོགས་བཤད་ཀྱང་སྤྲོ་ན་འགལ་བ་མེད་མོད། སྔར་གཏོང་རག་གི་ཕྱག་མཆོད་རྒྱས་པར་གྲུབ་པའི་ཕྱིར་མ་བྱས་ཀྱང་ཆོག་གོ །དེ་ལྟར་ན་དེ་རྣམས་ཀྱི་སྒོ་ནས་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་བགྲོད་པ་གཅིག་པའི་ལམ། མཐའ་ཡས་པའི་རྒྱལ་བའི་སྲས་པོ་རྣམས་ཀྱི་འཇུག་སྒོ། །སངས་རྒྱས་ཀྱི་གསུང་རབ་ཐེག་པ་ཆེན་པོ་ཤིན་ཏུ་རྒྱས་པའི་ལུགས་ཀྱི་བྱང་ཆུབ་མཆོག་ཏུ་སེམས་བསྐྱེད་པའི་ཆོ་ག །སྨོན་སེམས་དང་། འཇུག་སྡོམ་སོ་སོར་བཟུང་བའི་ཚུལ་དགེ་བའི་བཤེས་གཉེན་བརྒྱུད་པ་དང་བཅས་པའི་ཕྱག་ལེན་བཞིན་ལེགས་པར་ཕུལ་གྲུབ་པའི་སྐབས་འདིར། རང་རེ་རྣམས་ཀྱིས་ཆོས་ཉན་བཤད་བྱས་པ་ལས་བྱུང་བའི་བསོད་ནམས་ཀྱི་ཕུང་པོ་དཔག་ཏུ་མེད་པ་ཞིག་ཡོད་པ་དེ་དག་བར་མ་དོར་ཆུད་མི་འཛའ་བར། བྱང་ཆུབ་ཆེན་པོའི་རྒྱུར་སྨིན་པའི་སླད་ཡོངས་སུ་བསྔོ་བས་རྒྱས་གདབ་དགོས་པས་བསྔོ་བ་དང་སྨོན་ལམ་གྱི་མཐུན་འགྱུར་ཐུགས་ལ་འདོགས་པར་ཞུ། ཞེས་མཚམས་སྦྱར་ལ། སྤྱི་བསྔོ་རྒྱས་བསྡུས་ཇི་ལྟར་རིགས་པར་བྱ་བའམ། ཡང་ན། བསྔོ་བས་རྒྱས་གདབ་དགོས་པས། ཞེས་པ་ཡན་གོང་ལྟར་ལ། བསྔོ་བ་དང་སྨོན་ལམ་ལྷན་ཅིག་ཏུ་གནང་བར་ཞུ། ཞེས་དང་། འཕགས་པ་བཟང་པོ་སྤྱོད་པ་དང་། བྱམས་པའི་སྨོན་ལམ་སོགས་བསྔོ་སྨོན་རྒྱས་པར་བྱ་ཞིང་། གང་ལྟར་ཡང་། མདོ་སྡེ་ལས་འབྱུང་བའི་བཀྲ་ཤིས་ཀྱི་ཚིགས་སུ་བཅད་པ་དང་བཅས་མེ་ཏོག་གི་ཆར་སིལ་མ་དགྲམ་པར་བྱའོ། །འདིར་འཕྲོས་དོན་ཅུང་ཟད་བརྗོད་ན། གོང་དུ་བཤད་པ་བཞིན་སྨོན་སེམས་རྐྱང་པར་སོ་ཐར་རིགས་བརྒྱད་གང་རུང་སྔོན་དུ་འགྲོ་བ་དང་། སྣོད་བརྟག་པ་སོགས་གང་ཡང་མི་དགོས་པས་དོན་གཉེར་ཐམས་ཅད་ལ་སྦྱིན་དུ་རུང་བའི་ཕྱིར། སྐྱེ་བོ་མང་པོ་ཚོགས་པ་ལ་སེམས་བསྐྱེད་ན་འདིའི་སྨོན་པ་སེམས་བསྐྱེད་ཁོ་ན་བྱ། དེ་ཡང་གོང་བཤད་ཀྱི་སྐབས་སུ་སེམས་བསྐྱེད་དང་སྡོམ་པའི་ཆོ་ག་ཞེས་པ་ལ། སེམས་བསྐྱེད་ཀྱི་ཆོ་ག་ཞེས་དང་། སེམས་བསྐྱེད་དང་སྡོམ་པའི་རྟེན་ངེས་པར་བྱ་བ་ལ། སེམས་བསྐྱེད་ཀྱི་རྟེན་ངེས་པར་བྱ་བ་ཞེས་དང་། གཉིས་པ་སྦྱོར་བ་རྗེས་སུ་སྒྲུབ་པ་ལ་སྦྱོར་དངོས་རྗེས་གསུམ་ལས། དང་པོ་སྦྱོར་བ་ལའང་གསུམ་སྟེ། སོགས་དཀྱུས་བཞིན་ལ། སྨོན་སེམས་ཀྱི་གཏོང་རག་དབུལ་བའི་བར་བྱས་ནས། དེ་རྣམས་ཀྱི་སྒོ་ནས་ཐེག་པ་ཆེན་པོ་ཤིན་ཏུ་རྒྱས་པའི་ལུགས་ཀྱི་སེམས་བསྐྱེད་ཀྱི་ཆོ་ག་ཡན་ལག་དང་བཅས་པ་ལེགས་པར་ཕུལ་གྲུབ་པའི་སྐབས་འདིར། རང་རེ་རྣམས་ཀྱིས་ཆོས་ཉན་བཤད་བྱས་པ་ལས་བྱུང་བའི། ཞེས་སོགས་གོང་བཞིན་སྦྲེལ་ལ་དགེ་བ་བསྔོས་པས་དོན་འགྲུབ་བོ། །གལ་ཏེ་དོན་གཉེར་དམིགས་བསལ་ལ་འཇུག་སྡོམ་སྦྱིན་ན། སྤྱིར་ཡང་ལེན་པ་པོའི་གང་ཟག་གི་སྐབས་སུ་བཤད་པའི་མཚན་ཉིད་ཐམས་ཅད་ཚང་བ་དང་། ཁྱད་པར་ཐེག་པ་ཆེན་པོའི་མདོ་སྡེ་ཇི་སྙེད་པའམ། དེ་ཙམ་མ་ནུས་ཀྱང་བྱང་སའམ། བསླབ་བཏུས་ལྟ་བུ་ཉན་ནས་གོ་དོན་འཕྲོད་པ་བྱུང་ན་ཤིན་ཏུ་ལེགས། མ་མཐའ་ཡང་འཕགས་པ་དཀོན་མཆོག་སྤྲིན་ནས། ནམ་མཁའི་སྙིང་པོས་ཞུས་པ་ལྟ་བུའི་མདོ་སྡེ་ཞིག་གི་བཀླག་ལུང་ཙམ་ངེས་པ་ཐོབ་པ་གལ་ཆེ་སྟེ། སྔར་ལས་རིམ་དང་བློ་སྦྱོང་སོགས་བརྗོད་བྱ་དོན་གྱི་ཐེག་ཆེན་ཉན་པ་ཞིག་ཡིན་དུ་ཟིན་ནའང་རྗོད་བྱེད་ཚིག་གི་ཐེག་ཆེན་གྱི་མདོ་སྡེ་ཞིག་མ་ཐོས་པའི་ཐབས་མེད་དོ། །དེ་བཞིན་དུ་ཕྱག་ལེན་གྱི་རིམ་པའང་གོང་དུ་ཇི་སྐད་བཤད་པ་བཞིན་ལས་སྔགས་ཀྱི་ཆོ་གས་རྒྱས་བཀབ་པ་དང་། སླ་ཆོས་སོགས་གང་དྲན་བྱས་ན་ཆོས་ལ་དབང་ཟ་བའི་ཉེས་པ་ནི་ཚད་མེད་པའི་ཕྱིར་བག་ཡོད་པར་བྱའོ། །དེ་ལྟར་སེམས་བསྐྱེད་དང་སྡོམ་པའི་ཚུལ་ལ་གནས་པའི་གང་ཟག་གིས་ཐེག་པ་ཆེན་པོའི་ལམ་ལ་སློབ་པར་བྱ་བ་ཡིན་པས། དེ་དག་གི་བློ་གྲོས་ཀྱི་སྒོ་དབྱེ་བའི་ཕྱིར་ལམ་གྱི་རིམ་པའང་མདོར་བསྡུ་ན། མགོན་པོ་བྱམས་པས་མདོ་སྡེའི་རྒྱན་ལས། །རིགས་དང་ཆོས་ལ་མོས་པ་དང་། །དེ་བཞིན་དུ་ནི་སེམས་བསྐྱེད་དང་། །སྦྱིན་པ་ལ་སོགས་བསྒྲུབ་པ་དང་། །སེམས་ཅན་ཡོངས་སུ་སྨིན་བྱེད་དང་། །སྐྱོན་མེད་པ་ལ་འཇུག་ཉིད་དང་། །ཞིང་ནི་ཡོངས་སུ་དག་པ་དང་། །མི་གནས་མྱ་ངན་འདས་པ་དང་། །བྱང་ཆུབ་མཆོག་ལམ་སྟོན་པའོ། །ཞེས་གསུངས་པ་ལྟར། ཐོག་མར་སྐལ་བ་དང་ལྡན་པའི་གཞི་ཐེག་པ་ཆེན་པོའི་རིགས་སད་པའི་རྟགས་སུ་སྙིང་རྗེ་དང་། མོས་པ་དང་། བཟོད་པ་དང་། དགེ་བ་སོགས་ལ་མངོན་པར་སྤྲོ་བའི་གང་ཟག་གིས། ཆོས་འདི་པ་ལ་མི་ཕྱེད་པའི་མོས་པས་མཚམས་སྦྱར་ཏེ་བསྟན་པ་སྤྱིའི་འཇུག་སྒོ་སྐྱབས་འགྲོ་དང་། བྱེ་བྲག་ཐེག་ཆེན་གྱི་འཇུག་སྒོ་བྱང་ཆུབ་མཆོག་ཏུ་སེམས་བསྐྱེད་པ་སྔོན་དུ་འགྲོ་བས། རང་སྨིན་པར་བྱེད་པ་སྦྱིན་པ་ལ་སོགས་པ་ཕ་རོལ་ཏུ་ཕྱིན་པ་དྲུག་བསྒྲུབ་ཅིང་། གཞན་སེམས་ཅན་རྣམས་ཡོངས་སུ་སྨིན་པར་བྱེད་པ་བསྡུ་བའི་དངོས་པོ་བཞི་ལ་མཉམ་རྗེས་གཉིས་ཀྱི་སྒོ་ནས་ཅི་ནུས་སུ་འབད་པས་རང་ཤུགས་ཀྱིས་ཆོས་ལས་བློ་གཞན་དུ་མི་འགྲོ་ཞིང་། དད་པ་དང་། ངེས་འབྱུང་དང་། བསྒོམ་པ་སོགས་ལ་སུན་པ་མེད་པར་པདྨོའི་མཚོ་ལ་ངང་མོ་འཇུག་པ་བཞིན་སྤྲོ་བ་ངང་གིས་འཕེལ་བ་ན་ཚོགས་ལམ་ཆུང་ངུ་ཐོག་མར་རྒྱུད་ལ་སྐྱེས་པ་ཡིན་ནོ། །དེ་ནས་ཏིང་ངེ་འཛིན་སྐྱོན་མེད་པ་དང་། ཞིང་ཡོངས་སུ་དག་པ་འཕགས་པའི་ཆོས་ལ་འཇུག་པའི་སླད་དུ་ལམ་ལ་འབད་པས། བདེན་པ་བཞིའི་དོན་ལ་གསལ་སྣང་ཅུང་ཟད་རྙེད་པ་ནི་ཚོགས་ལམ་དེ་ཉིད་བསྒོམས་པའི་སྟོབས་དང་། ཚོགས་བསགས་པའི་སྟོབས་གཉིས་འཛོམས་པས་ཕུང་པོ་ལྔ་སྒྱུ་མ་ལྟ་བུ་རྟོགས་ཤིང་། ཆོས་ཀྱི་བདག་མེད་ལ་གསལ་སྣང་རིམ་གྱིས་རྙེད་པ་ནི་སྦྱོར་ལམ། བདག་མེད་གཉིས་ཀྱི་དོན་ཇི་བཞིན་པ་དང་པོར་མཐོང་བ་མཐོང་ལམ། མཐོང་ཟིན་པའི་ཏིང་ངེ་འཛིན་ཁྱད་པར་ཅན་གྱི་འཇུག་ངོགས་ལ་གོམ་པར་བྱེད་པ་བསྒོམ་ལམ། ཤེས་བྱ་དང་སྤང་བྱ་མཐར་ཕྱིན་པ་མི་སློབ་པའི་ལམ་སྟེ། དེ་ཡང་མཐོང་ལམ་གྱི་ཡེ་ཤེས་ཁོང་དུ་ཆུད་པ་དང་། ས་དང་པོ་གསར་དུ་ཐོབ་པ་དུས་མཉམ། དེ་ནས་བསྒོམ་ལམ་གྱིས་ས་དགུ་པའི་བར་བགྲོད་ནས། མི་སློབ་པའི་ལམ་དུ་ས་བཅུ་པ་ཆོས་ཀྱི་སྤྲིན་རྒྱ་མཚོར་འཇུག་པ་སྟེ། མདོར་ན་དེ་ལྟ་བུའི་ལམ་དང་ས་དེ་དག་ཀྱང་། དོན་དམ་སེམས་བསྐྱེད་ལ་བརྟེན་ནས། ཤེས་རབ་སྟོང་ཉིད་བསྒོམས་པས་ཉེར་ལེན་གྱི་རྒྱུ་དང་། ཐབས་སྙིང་རྗེ་ཆེན་པོས་ལྷན་ཅིག་བྱེད་པའི་རྐྱེན་བྱས་ནས་ལམ་ལྔ་འགྲུབ། ཀུན་རྫོབ་སེམས་བསྐྱེད་ལ་བརྟེན་ནས། ཐབས་སྙིང་རྗེས་ཉེར་ལེན་གྱི་རྒྱུ་དང་། ཤེས་རབ་སྟོང་པ་ཉིད་ཀྱིས་ལྷན་ཅིག་བྱེད་པའི་རྐྱེན་བྱས་ནས་ས་བཅུ་ཐོབ་ལ། སངས་རྒྱས་པ་ན་ཡང་ལམ་མཐར་ཐུག་པ་ཆོས་སྐུ་དང་། ས་མཐར་ཐུག་པ་གཟུགས་སྐུ་ཡིན་ནོ། །དེ་ལྟར་ས་ལམ་མཐར་ཕྱིན་པའི་འབྲས་བུ་ནི། ཤེས་རབ་ཆེན་པོས་འཁོར་བ་དང་། སྙིང་རྗེ་ཆེན་པོས་མྱ་ངན་ལས་འདས་པའི་མཐའ་ལ་མི་གནས། བྱང་ཆུབ་མཆོག་སྟེ་སངས་རྒྱས་ཀྱི་སའི་ཡོན་ཏན་མཐའ་དག་ལྷུན་གྱིས་གྲུབ། ནམ་མཁའ་ཇི་སྲིད་བར་དུ་སེམས་ཅན་གྱི་ཁམས་ལ་ལམ་སྟོན་པའི་ཕྲིན་ལས་རྒྱུན་མི་འཆད་པར་འགྱུར་བ་ནི་ངེས་པའོ། །དེ་ལྟར་ཐེག་ཆེན་ཤིན་ཏུ་རྒྱས་པའི་སེམས་བསྐྱེད་སྡོམ་པའི་ཆོ་གའི་ཚུལ། །བྱང་ཆུབ་སེམས་དཔའི་ལམ་བཟང་གང་དེ་གསལ་བར་བཤད་པའི་ལེགས་བྱས་ཀྱིས། །ཤེས་རབ་ཆེན་པོས་སྲིད་ལས་འདས་ཀྱང་སྙིང་རྗེས་ཞི་མཐར་ལྷུང་མིན་པའི། །སྐུ་དང་ཡེ་ཤེས་ཕྲིན་ལས་རྨད་བྱུང་ཀུན་མཁྱེན་གོ་འཕང་མྱུར་ཐོབ་ཤོག །ཅེས་པའང་ཡོངས་རྫོགས་བསྟན་པའི་མངའ་བདག་ཁམས་གསུམ་ཆོས་ཀྱི་རྒྱལ་པོ། དཔལ་ས་སྐྱ་པ་འཇམ་དཔལ་གཞོན་ནུ་ངག་དབང་རྡོ་རྗེ་རིན་ཆེན་བཀྲ་ཤིས་གྲགས་པའི་རྒྱལ་མཚན་དཔལ་བཟང་པོའི་ཞལ་སྔ་ནས་ཀྱི་ཐུགས་བཞེད་བསྒྲུབ་པ་དང་། དོན་གཉེར་ཅན་གཞན་ལའང་ཕན་པའི་བསམ་པ་བཟང་པོས། ཡོངས་འཛིན་དམ་པ་ཆོས་བཞིན་དུ་སྤྱོད་པ་དུ་མའི་བཀའ་དྲིན་ལས་ཐེག་པ་ཆེན་པོའི་གཞུང་ལུགས་མང་དུ་ཐོས་པའི་ཤཱཀྱའི་བཙུན་པ་རྨོངས་བརྟུལ་ཀུན་ཏུ་རྒྱུ་འཇམ་དབྱངས་མཁྱེན་བརྩེའི་དབང་པོས། རྒྱལ་བའི་སྲས་པོ་ཐོགས་མེད་བཟང་པོ་དཔལ་གྱི་གསུང་རབས་ལ་ཚིག་གི་མཐའ་བསྐྱེད་ཚུལ་མི་འགལ་བས་ཟུར་བརྒྱན་ཏེ། ཡོན་ཏན་རིན་པོ་ཆེ་དུ་མའི་འབྱུང་གནས་དཔལ་ཨེ་ཝཾ་ཆོས་ལྡན་གྱི་བླ་བྲང་ཐར་པ་རྩེར་སྦྱར་བའོ། །འདིས་ཀྱང་རང་གཞན་ཐམས་ཅད་ཀྱི་རྒྱུད་ལ་བྱང་ཆུབ་ཀྱི་སེམས་རིན་པོ་ཆེ་བཅོས་མ་མ་ཡིན་པ་སྐྱེས་པའི་མཐུ་ལས། བསྟན་པ་དང་སེམས་ཅན་ལ་ཕན་པ་རྒྱ་ཆེན་པོ་འབྱུང་བའི་རྒྱུར་གྱུར་ཅིག །ཐེག་པ་ཆེན་པོ་ཤིན་ཏུ་རྒྱས་པའི་ལུགས་ཀྱི་སེམས་བསྐྱེད་དང་སྡོམ་པ་རྣམ་པར་དག་པ་ཐོབ་པའི་བརྒྱུད་པ་ནི། ཡང་དག་པར་རྫོགས་པའི་སངས་རྒྱས། མགོན་པོ་བྱམས་པ། འཕགས་པ་ཐོགས་མེད། སློབ་དཔོན་དབྱིག་གཉེན། འཕགས་པ་གྲོལ་སྡེ། བཙུན་པ་རྣམ་གྲོལ་སྡེ། མཆོག་གི་སྡེ། དུལ་བའི་སྡེ། སློབ་དཔོན་སེངྒེ་བཟང་པོ། ཀུ་སཱ་ལི་ཆེ་ཆུང་གཉིས། གསེར་གླིང་པ་ཆོས་ཀྱི་གྲགས་པ། ཇོ་བོ་རྗེ་དཔལ་མར་མེ་མཛད། རྒྱལ་བ་འབྲོམ་སྟོན་པ། སྤྱན་སྔ་ཚུལ་ཁྲིམས་འབར། །དགེ་བཤེས་བྱ་ཡུལ་བ། རྒྱལ་སྲས་མུས་སྨན་པའང་ཟེར། ཚར་ཆེན་པ། གྲོལ་སྟོན་བདུད་རྩི་གྲགས། སངས་རྒྱས་སྒམ་པ་སེངྒེ་སྐྱབས། མཆིམས་ནམ་མཁའ་གྲགས། མཁན་ཆེན་སེངྒེ་སྐྱབས། མཁས་བཙུན་བསོད་ནམས་ཡེ་ཤེས། བྱང་སེམས་བསོད་ནམས་གྲགས་པ། རྒྱལ་སྲས་ཐོགས་མེད་བཟང་པོ་དཔལ། གྲུབ་ཆེན་བུདྡྷཱ་ཤྲཱི། ངོར་ཆེན་ཀུན་དགའ་བཟང་པོ། མཁས་གྲུབ་དཔལ་ལྡན་རྡོ་རྗེ། མཁན་ཆེན་དཀོན་མཆོག་ཚུལ་ཁྲིམས། སྒོ་རུམ་པ་ཀུན་དགའ་ལེགས་པ། འཇམ་དབྱངས་མཁྱེན་བརྩེའི་དབང་ཕྱུག །རྗེ་དབང་ཕྱུག་རབ་བརྟན། མཁན་ཆེན་ངག་དབང་ཆོས་གྲགས། འཇམ་མགོན་ཀུན་དགའ་བསོད་ནམས། དེ་སྲས་བསོད་ནམས་དབང་ཕྱུག །ལྷ་ཁང་མཁན་ཆེན་དོན་གྲུབ་ལེགས་བཟང་། རྨོར་ཆེན་ཀུན་དགའ་ལྷུན་གྲུབ། གནས་གསར་བ་ལེགས་པའི་འབྱུང་གནས། ས་ཆེན་ཀུན་དགའ་བློ་གྲོས། མུས་ཆེན་བསོད་ནམས་དཔལ་བཟང་། མུས་ཆེན་ཆོས་ཉིད་ཡེ་ཤེས། མུས་ཆེན་ཡེ་ཤེས་རྒྱལ་མཆོག །ཡོངས་འཛིན་རིན་པོ་ཆེ་བློ་གྲོས་རྒྱ་མཚོ། དཔལ་ས་སྐྱ་པ་འཇམ་མགོན་བླ་མ་ངག་དབང་རྡོ་རྗེ་རིན་ཆེན། དེས་བདག་ཅག་ལ་བཀའ་དྲིན་ཆེན་པོས་ཁྱབ་པར་མཛད་པ་ཡིན་ནོ། །ཡང་ན། བྱང་སེམས་བསོད་ནམས་གྲགས་པ་ནས། བུ་སྟོན་རིན་ཆེན་གྲུབ། ཐུགས་སྲས་རིན་ཆེན་རྣམ་རྒྱལ། མཁན་ཆེན་གྲུབ་པ་ཤེས་རབ། པཎ་ཆེན་དགེ་འདུན་གྲུབ། འདུལ་འཛིན་བློ་གྲོས་སྦས་པ། པཎ་ཆེན་ལུང་རིགས་རྒྱ་མཚོ། རྗེ་སྐྱབས་མཆོག་དཔལ། དབེན་ས་བ་བློ་བཟང་དོན་འགྲུབ། མཁས་གྲུབ་སངས་རྒྱས་ཡེ་ཤེས། པཎ་ཆེན་བློ་བཟང་ཆོས་རྒྱན། དྲུང་པ་བརྩོན་འགྲུས་རྒྱལ་མཚན། རྟ་ཕུག་པ་དམ་ཆོས་རྒྱལ་མཚན། སྒྲུབ་ཁང་པ་དགེ་ལེགས་རྒྱ་མཚོ། ཕུར་བུ་ལྕོག་ངག་དབང་བྱམས་པ། ཡོངས་འཛིན་ཡེ་ཤེས་རྒྱལ་མཚན། བཤེས་གཉེན་བློ་བཟང་རྒྱལ་མཚན། རྒྱལ་སྲས་སེམས་དཔའ་རིན་པོ་ཆེ་རིན་ཆེན་བློ་གསལ་བསྟན་སྐྱོང་། དེས་བདག་ལའོ། །ཡང་ན། རྒྱལ་སྲས་ཐོགས་མེད་ནས། ལོ་ཆེན་བྱང་ཆུབ་རྩེ་མོ། དེ་དབོན་ལོ་ཆེན་གྲགས་རྒྱལ། བོ་དོང་པ་པཎ་ཆེན་ཕྱོགས་ལས་རྣམ་རྒྱལ། བྱམས་གླིང་པཎ་ཆེན་བསོད་ནམས་རྣམ་རྒྱལ། གསེར་མདོག་པཎ་ཆེན་ཤཱཀྱ་མཆོག་ལྡན། པཎ་ཆེན་དོན་ཡོད་གྲུབ་པ། རྗེ་བཙུན་ཀུན་དགའ་གྲོལ་མཆོག །མཁན་ཆེན་ལུང་རིགས་རྒྱ་མཚོ། རྗེ་བཙུན་ཀུན་དགའ་སྙིང་པོ། རྒྱལ་ཚབ་ཡེ་ཤེས་རྒྱ་མཚོ། རྗེ་ཡོན་ཏན་མགོན་པོ། གྲུབ་ཆེན་མགོན་པོ་དཔལ་འབྱོར། མཚུངས་མེད་མགོན་པོ་གྲགས་པ། གྲུབ་དབང་མགོན་པོ་རྣམ་རྒྱལ། རིག་འཛིན་འཇམ་དབྱངས་རྒྱ་མཚོ། ཀུན་གཟིགས་ཕྲིན་ལས་ཤིང་རྟ། རྨོག་ལྕོག་པ་ཀུན་དགའ་དགེ་ལེགས། ཀུན་དགའ་ལྷུན་གྲུབ་རྒྱ་མཚོ། རྗེ་བཀའ་བརྒྱུད་བསྟན་འཛིན། བླ་མ་ཀརྨ་ལྷག་མཐོང་། གྲུབ་དབང་ཀརྨ་ནོར་བུ། ངེས་པར་ཐམས་ཅད་མཁྱེན་དངོས་ངག་གི་དབང་ཕྱུག་བློ་གྲོས་མཐའ་ཡས། དེས་བདག་ལ་བཀའ་དྲིན་ཆེན་པོས་སྩལ་བའོ། །སརྦ་དཱ་ཀ་ལྱཱ་ཎཾ་བྷ་ཝ་ཏུ། །

�

[edit]

theg chen shin tu rgyas pa'i lugs kyi sems bskyed sdom chog byang chub sems dpa'i lam bzang / @#/__/theg pa chen po shin tu rgyas pa'i lugs kyi sems bskyed dang sdom pa'i cho ga byang chub sems dpa'i lam bzang zhes bya ba bzhugs so//__// phun tshogs srid zhi'i phan bde ji snyed rdzogs pa'i sangs rgyas mthu las byung /__/sangs rgyas rgyal ba'i sras po nyid dang de yang byang sems las 'khrungs phyir/__/rin chen rin thang med pa'i mchog sbyin dge ba'i bshes la gus btud nas/__/shin tu rgyas pa'i sems bskyed cho ga gzhan la phan phyir gsal bar bshad/__/'di ltar 'jig rten dang 'jig rten las 'das pa'i dge legs mtha' dag gi 'byung gnas/__nyan thos dang rang sangs rgyas thams cad kyi bla ma/__byang chub sems dpa' thams cad kyi yab/__gcig tu skyon gyi dri ma bag chags dang bcas pa gtan nas spangs shing /__bsam gyis mi khyab pa'i yon tan rgya mtsho nyams pa med pa la dbang 'byor ba/__yid can thams cad kyi ma 'dris pa'i mdza' bshes gcig pu rdzogs pa'i sangs rgyas kyi go 'phang rin po che thob par 'dod pas/__de yi thabs byang chub mchog tu sems bskyed nas rgyal sras kyi spyod pa la 'jug dgos/__de'ang thog mar sdom pa'i cho ga la ltos pas/__ji skad bshad pa'i mtshan nyid dang ldan pa'i dge ba'i bshes gnyen gyis/__rigs dang skal bar ldan pa'i slob ma rnams byang chub chen po'i lam du gzhug pa'i phyir/__theg pa chen po shin tu rgyas pa'i lugs kyi sems bskyed dang sdom pa'i cho ga byed par 'dod pas sbyor ba/__dngos gzhi/__rjes gsum las/__dang po ni/__gnas gtsang zhing yid du 'ong bar/__ston pa thub pa'i dbang po shAkya seng+ge'i snang brnyan gtso bor gyur pa'i rten khyad par can gyi drung du/__nyer spyod spyi dang /__khyad par spos/__mar me/__zhal zas rnams kyi phreng ba tshar du dngar bas mtshon ci 'byor ba'i mchod pa rnams gtsang zhing bkod pas mdzes pa dang /__gtor ma 'bul bar 'dod na/__zlum gtor dkar po gnyis dang /__gzhi bdag gi gtor ma dang bcas pa'ang bshams/__de nas slob dpon rang nyid khrus bya/__grub na sems bskyed dang sdom pa blang /__gang ltar yang ltung bshags sogs chos spyod kyi rim pa ji ltar rigs pa bya/__de nas stan mthon po la 'dug ste/__slob ma rnams phyi rol tu khrus byas/__nang du rang rang gi stan dma' bar me tog dang bcas te gus pa'i tshul gyis 'khod du gzhug go/__//gnyis pa dngos gzhi ni/__slob dpon gyis chos thams cad stong nyid du rtogs pa'i shes rab dang /__sems can thams cad phan bde la 'god par 'dod pa'i brtse ba dang /__khyad par slob ma rnams la byang chub kyi sems bskyed par 'dod pa'i bsam pa bzang po dang ldan pas/__gsal zhing snyan pa'i ngag gis 'di skad ces brda sprod par bya'o/__/'o skol rnams kyis rnyed par dka' ba'i dal 'byor gyi rten khyad par rnyed/__mjal bar dka' ba'i sangs rgyas kyi bstan pa rin po che dang mjal/__'khor 'das kyi 'dam kha rang dbang yod pa'i dus 'dir dal 'byor la snying po len pa'i chos rnam par dag pa zhig la ci nas kyang 'bad dgos te/__slob dpon chen po 'phags pa klu sgrub kyis/__rgya mtsho gcig gnas gnya' shing bu ga dang /__/rus sbal 'phrad pa bas kyang dud 'gro las/__/mi nyid ches thob dka' bas mi dbang gis/__/dam chos spyad pas de 'bras mchis par mdzod/__/ces gsungs shing /__dam chos kyi nang nas kyang /__bdag gzhan thams cad sdug bsngal ba dang bcas pa las sgrol shing /__gnas skabs dang /__mthar thug gi bde ba thams cad thob par byed pa'i rgyu/__bsod nams dang yon tan mtha' yas pa'i gter du gyur pa ni byang chub kyi sems kho na yin te/__slob dpon chen po zhi ba lhas/__/sdug bsngal mthar 'byin 'dod pa dang /__bde ba'i mthar yang 'gro 'dod pas/__/dad pa'i rtsa ba brtan byas nas/__/byang chub la ni blo brtan bya/__/zhes dang /__/slob dpon chen po tsAn+d+ra go mis/__/phyogs dus kun na bzhugs pa yi/__/byang chub sems dpa' rnams kyi khrims/__/bsod nams kun gyi gter gyur gang /__zhes gsungs pas mtshon rgyal ba sras dang bcas pas bgrod pa gcig pa'i lam du bsngags par mdzad pa byang chub kyi sems de yang kun rdzob cho ga las thob pa dang /__don dam pa sgom pa'i stobs kyis skyes pa gnyis las/__dang po la/__bskyed bya sems kyi mtshan nyid ni/__gzhan don du rdzogs byang la dmigs pa'i theg chen slob pa'i sems gang zhig byang 'phags kyi mnyam bzhag gi ngo bor gyur pa'i sems bskyed rnam par bcad pa'o/__/mtshan gzhi ni/__theg chen tshogs sbyor ba'i rgyud kyi sems bskyed rnams dang /__byang 'phags kyi rjes thob kyi ngo bor gyur pa'i sems bskyed lta bu'o/__/dbye na/__grogs dge ba'i bshes gnyen gyi stobs dang /__rgyu rigs sad pa'i stobs dang /__'bras bu dge rtsa rgyas pa'i stobs dang /__lam theg chen gyi sde snod thos pa'i stobs dang /__thos pa de nyid mang du goms pas bskyed pa dang lnga las/__dang po ni grogs la rag las pas mi brtan pa'i sems bskyed dang /__phyi ma bzhi ni mi mthun phyogs kyis nyams dka' bas brtan pa'i sems bskyed de/__mdo sde rgyan las/__grogs stobs rgyu stobs rtsa ba'i stobs/__/thos stobs dge ba goms pa las/__/mi brtan pa dang brtan 'byung ba/__/gzhan gyis bstan pa'i sems bskyed bshad/__/ces gsungs pa ltar/__gtso bor gzhan gyi mthu las byung ba kun rdzob byang chub kyi sems de la'ang /__ma thob pa thob par byed pa'i cho ga__/thob pa mi nyams par bsrung ba'i tshul/__nyams na phyir bcos pa rnams su 'du ba las/__'dir dang po ma thob pa thob par byed pa sems bskyed dang sdom pa'i cho ga bgyid pa'i skabs su babs pa lags/__de yang 'di la sngon gyi mkhas pa rnams kyi gsungs las/__sems bskyed la dbu ma lugs dang /__sems tsam lugs gnyis yod/__dbu ma lugs ni sdong bo bkod pa dang /__nam mkha'i snying pos zhus pa la sogs pa'i mdo'i rjes su 'brangs/__'phags pa 'jam dpal gyis gsungs/__slob dpon chen po klu sgrub nas brgyud/__slob dpon chen po zhi ba lha yi lugs/__slob dpon dgra las rnam rgyal la sogs pa'i phyag len/__bstan pa'i mnga' bdag chen po dpal ldan sa skya pa la sogs pas mdzad pa 'di yin/__sems tsam lugs ni/__byang chub sems dpa'i sde snod la sogs pa'i mdo'i rjes su 'brangs/__'phags pa byams pas gsungs 'phags pa thogs med nas brgyud/__slob dpon chen po tsan+d+ra go mi'i lugs/__jo bo chen po rje yi phyag len/__dge ba'i bshes gnyen bka' gdams pa rnams kyis mdzad pa 'di yin/__'di gnyis la blang ba'i yul/__len pa po'i gang zag__/len pa'i cho ga__/blangs nas srung tshul/__nyams na phyir bcos pa rnams la mi 'dra ba'i khyad par mang du yod ces gsungs shing /__yang mkhas pa 'ga' zhig de gnyis kyi dbye ba dang khyad par la sogs pa mi 'thad ces gsung yang /__'dir de lta bu'i dgag sgrub kyi rim pa rnams btang snyoms su bzhag nas/__slob dpon chen po 'phags pa thogs med dang /__jo bo rje dI paM kA ra shrI dz+nyA na'i gsung rabs las 'byung ba ltar/__yang dag pa rdzogs pa'i sangs rgyas nas/__bdag cag gi yongs su 'dzin pa chen po'i bar bu brgyud pa bar ma chad pa las byon pa'i phyag len bzhin 'bul ba la don rnam pa gsum ste/__sems bskyed dang sdom pa'i rten nges par bya ba dang /__sbyor ba rjes su sgrub pa dang /__rang bzhin gtan la dbab pa'o/__/dang po rten nges par bya ba la gsum ste/__sdug bsngal 'khor ba'i mtha' la skyo ba bskyed pa dang /__zhi ba myang 'das kyi mtha' la zhen pa dgag pa dang /__mtha' gnyis dang bral ba'i byang chub kyi sems la spro ba bskyed pa'o/__/dang po sdug bsngal 'khor ba'i mtha' la skyo ba bskyed pa ni/__'di ltar nges par bya ste/__'o skol rnams kyis dal 'byor gyi mi lus thob pa'i skabs 'dir/__'khor ba sdug bsngal gyi rgya mtsho las brgal zhing /__bla na med pa'i byang chub thob par bya ba'i phyir 'bad dgos/__de yi rgyu mtshan yang don de gnyis rten 'di la bsgrub nus shing gzhan gyis mi nus pa'i phyir te/__slob spring las/__gang zhig thob na skye ba'i rgya mtsho mthar 'byin zhing /__/byang chub mchog gi sa bon dge ba'ang 'debs byed pa/__/yid bzhin nor bu bas kyang yon tan ches lhag pa'i/__/mi nyid thob nas su zhig 'bras bu med par byed/__/bde gshegs lam bsten 'gro ba 'dren par chas gyur cing /_/sems kyi stobs chen mi yi rnyed pa gang yin pa'i/__/lam de lha dang klu yis mi rnyed lha min dang /__/mkha' lding rig 'dzin mi'am ci dang lto 'phyes min/__/zhes gsungs so/__/dal 'byor de'ang rnyed par dka' ste/__sdong po bkod pa las/__mir gyur pa yang rnyed par dka'/__dal ba phun sum tshogs pa rnam par dag pa yang rnyed pa dka'/__zhes gsungs shing /__slob dpon zhi ba lhas/__mi yi gru la brten nas ni/__/sdug bsngal chu bo che las sgrol/__/gru 'di phyi nas rnyed dka' yis/__/rmongs pa dus su gnyid ma log__/ces gsungs/__rnyed pa de yang dus ring du mi gnas te/__'phags pa klu sgrub kyis/__tshe 'di gnod mang rlung gis btab pa yi/__/chu yi chu bur bas kyang mi rtag na/__/dbugs dbyung dbugs rngub gnyid kyis log pa las/__/sad khom gang lags de ni ngo mtshar che/__/zhes gsungs pas/__myur du dge ba la 'bad dgos/__de la ma 'bad par sdig pa byas na ngan 'gror lhung ste/__zhi ba lhas/__dge ba dag kyang ma byas la/__/sdig pa dag kyang nyer bsags na/__/bskal pa bye ba brgyar yang ni/__/bde 'gro'i sgra yang thos mi 'gyur/__/zhes gsungs shing /__ngan song du skyes na/__dmyal ba la tsha grang la sogs pa'i sdug bsngal dpag tu med pa yod de/__'phags pa klu sgrub kyis/__'di na nyin gcig mdung thung sum brgya yis/__/rab tu drag btab sdug bsngal gang yin pa/__des ni dmyal ba'i sdug bsngal chung ngu la'ang /__/'ol yang mi nye char yang mi phod do/__/zhes gsungs so/__/yi dwags la'ang bkres skom la sogs pa'i sdug bsngal mang po yod de/__yi dwags na yang 'dod pas phongs pa yis/__/bskyed pa'i sdug bsngal rgyun chags mi 'chos pa/__/bkres skom grang dro ngal dang 'jigs pa yis/__/bskyed pa shin tu mi bzad bsten 'tshal lo/__/zhes gsungs so/__/dud 'gro la'ang /__gcig la gcig za ba la sogs pa'i sdug bsngal yod de/__dud 'gro'i skye gnas na yang bsad pa dang /__/bcings dang brdeg sogs sdug bsngal sna tshogs pa/__/zhi 'gyur dge ba spangs pa rnams la ni/__gcig la gcig za shin tu mi bzad pa/__zhes gsungs pas sdig pa spang ba la 'bad dgos shing /__dge ba yang thar pa'i lam du 'gyur bar ma bsgrubs na bsod nams dang mi g.yo ba'i las kyis bde 'gror skyes kyang de dag kha cig la sdug bsngal chen po yod cing /__de med pa rnams kyang de nas shi 'phos nas dmyal ba la sogs pa'i sdug bsngal myong ba 'gyur te/__lha yul 'dod bde shin tu chen po dang /__/tshangs nyid chags bral bde ba thob nas slar/__/mnar med me yi bud shing 'gyur ba yi/__/sdug bsngal rgyun mi 'chad pa bsten 'tshal lo/__/zhes gsungs so/__/mdor na 'khor ba sdug bsngal gyi rang bzhin te/__mgon po byams pas/__mi gtsang ba la dri zhim med bzhin 'gro lnga dag la bde ba med/__/de yi sdug bsngal rtag tu me mtshon rgya tshwa la sogs reg skyes bzhin/__/zhes gsungs pas de la thar pa'i thabs la 'bad dgos te/__'phags pa klu sgrub kyis/__mgo'am gos la glo bur me shor na/__/de dag bzlog phyir bgyi ba btang nas kyang /__/yang srid med par bgyi slad 'bad 'tshal te/__/de bas ches mchog dgos pa gzhan ma mchis/__/zhes gsungs pas/__'khor ba las thar bar bya ba'i dam pa'i chos la 'bad par bya'o snyam pa'i bsam pa zhe thag pa nas bskyed pa zhu/__gnyis pa zhi ba myang 'das kyi mtha' la zhen pa dgag pa ni/__rang nyid 'khor ba las thar kyang gzhan gyi don rgyun chad pa'i phung po lhag med kyi myang 'das don du gnyer ba ni/__ma chus khyer ba mthong zhing gdon pa'i nus pa yod bzhin du de mi 'don par rang nyid skams na yid bde bar gnas pa ltar shin tu mi rigs pa'i phyir theg chen pas don du gnyer bya ma yin te/__slob dpon tsAn+d+ra go mis/__nye du 'khor ba'i rgyal mtsho'i nang du chud gyur pa/__/klong gi nang du lhung ba lta bur snang bzhin du/__/skye shi 'phos pas ngo ma shes pa de bor nas/__/gal te gcig thar byed na de las khrel bor med/__/byis pa pang na btsas pa ci yang mi nus pa/__/gang gi nu zho byams pa'i shugs kyis zags 'thungs pa/__/ngal ba mang bsten byams pas bsten pa de dag 'dir/__/shin tu ma rabs shig na'ang spong bar su zhig spro/__/zhes gsungs pas/__gzhan don dor nas rang nyid gcig pu zhi bde thob par 'dod pa'i blo spang 'tshal lo/__/gsum pa mtha' gnyis dang bral ba'i byang chub kyi sems la spro ba bskyed pa ni/__mgon po byams pas/__bdag sred ma lus shes rab kyis bcad nas/__/sems can sred phyir blo ldan zhi thob min/__/de ltar blo brtse byang chub thabs bstan nas/__/'phags pa 'khor ba mya ngan 'das mi 'gyur/__/zhes pa ltar 'khor 'das gnyis la mi gnas pa'i myang 'das yang dag par rdzogs pa'i sangs rgyas zhes bya ba sgrib pa bag chags dang bcas pa spangs/__shes bya ji lta ba dang ji snyed pa mngon sum du mkhyen/__phrin las tshad las 'das shing rgyun mi 'chad par 'bad med lhun grub tu mdzad pa de thob par bya ba yin la/__de'i rgyu yang byang chub kyi sems yin te/__mdo sdud pa las/__chu yi thigs pas bum pa dang po tha ma'i bar/__/rim gyis nyung ngu nyung ngus de yongs 'gengs pa ltar/__/de bzhin dang po'i sems kyang byang chub mchog rgyu ste/__/rim gyis dkar po'i yon tan rdzogs pa'i sangs rgyas 'gyur/__/zhes gsungs shing /__rnam snang mngon byang las kyang /__gsang ba'i bdag po thams cad mkhyen pa'i ye shes de ni snying rje'i rtsa ba las byung ba yin/__byang chub kyi sems kyi rgyu las byung ba yin/__thabs kyis mthar phyin pa yin no/__/zhes gsungs/__sdong po bkod pa las kyang /__rigs kyi bu byang chub kyi sems ni sangs rgyas kyi chos thams cad bskyed pas sa bon lta bu'o/__/zhes gsungs pas/__sems can thams cad kyi don du sangs rgyas thob par bya ba'i phyir byang chub tu sems bskyed par bya'o snyam pa'i 'dun pa drag po dung ba re bskyed mdzod/__gnyis pa sbyor ba rjes su sgrub pa la gnyis te/__smon pa dang 'jug pa'o/__/dang po la'ang sbyor dngos rjes gsum gyi sbyor ba la gsum ste/__yul khyad par can la gsol ba gdab pa dang /__rten khyad par can la skyabs su 'gro ba dang /__thabs khyad par can gyi sgo nas tshogs bsags pa'o/__/dang po yul khyad par can la gsol ba gdab pa ni/__phyogs bcu'i sangs rgyas dang byang chub sems dpa' thams cad spyan drangs nas/__phyag dang mchod pa phul te dge ba'i bshes gnyen la ston pa'i 'du shes bskyed la phyag dang maN+Dal phul nas 'di ltar gsol ba gdab par bya ste/__zhes 'byung bas/__thog mar khyed rang rnams kyis phyogs bcu'i sangs rgyas dang byang chub sems dpa' thams cad la mos gus gdung shugs drag pos gsol ba btab pas mdun gyi nam mkhar mngon sum lta bur byon pa la phyag dang mchod pa phul ba'i yid kyis yan lag lnga sa la gtugs pa'i phyag dang bcas te 'di gsung bar zhu/__ji snyed su dag__/sogs nas/__rgyal ba kun la phyag 'tshal mchod par bgyi/__bar lan gcig__/slar yang dge ba'i bshes gnyen la ston pa'i 'du shes bskyed de phyag gsum mdzad par zhu/__zhes brjod la phyag gsum 'tshal du gzhug__/de nas smon pa byang chub gyi mchog tu sems bskyed pa'i yon du dmigs te maN+Dal zhig 'bul bar zhu/__zhes brda sbyar la/__maN+Dal tshom bu bdun ma spyi ltar la/__ma tshang ba med pa 'di nyid bla ma rgyal ba sras dang bcas pa la smon pa byang chub gyi mchog tu sems bskyed pa zhu ba'i yon du/__sogs sbyar la 'bul du gzhug__/de ltar maN+Dal phul nas phyag snyim pa me tog dang bcas pas thal mo sbyar te gsol ba 'debs pa 'di'i rjes zlos lan gsum mdzad par zhu/__ji ltar sngon gyi de bzhin gshegs pa dgra bcom pa yang dag par rdzogs pa'i sangs rgyas rnams dang /__byang chub sems dpa' sa chen po la bzhugs pa rnams kyis/__dang por bla na med pa yang dag par rdzogs pa'i byang chub tu thugs bskyed pa de bzhin du/__rang rang gi ming nas smos te bdag ming 'di zhes bgyi ba yang /__slob dpon gyis bla na med pa yang dag par rdzogs pa'i byang chub tu sems bskyed du gsol/__zhes lan gsum brjod do/__/gnyis brten khyad par can la skyabs su 'gro ba ni/__thun mong gi skyabs 'gro las khyad par gsum gyis khyad par du 'phags pa'i theg chen gyi skyabs 'gro byed pa yin te/__dus kyi khyad par ni byang chub snying po'i bar yin la/__yul gyi khyad par ni/__sangs rgyas sku gsum gyi bdag nyid/__rtogs pa'i chos theg chen gyi 'gog lam dang /__lung gi chos theg chen gyi gsung rab dge 'dun ni byang sems 'phags pa phyir mi ldog pa rnams yin no/__/bsam pa'i khyad par ni/__sems can thams cad kyis thog ma med pa nas lan grangs dpag tu med par phan btags pas drin che la/__drin chen de rnams 'khor bar sdug bsngal drag la yun ring bas gtsos shing las dang nyon mongs pa'i 'ching bas bcings pas thar pa'i thabs med pas snying re rje snyam du bsams la/__'di rnams gnas skabs dang mthar thug gi bde ba dang ldan zhing sdug bsngal dang bral bar bdag gis byed dgos pa la/__da lta bdag la de'i nus pa med cing /__de ltar nus pa ni sangs rgyas kho na yin pas bdag gis sangs rgyas thob par byed dgos/__de'ang dkon mchog la rag las pas/__bdag gis sems can thams cad sdug bsngal las sgrol nus kyi sangs rgyas thob pa'i don du dkon mchog la skyabs shing blo gtod pas bdag de ltar 'gyur bar dkon mchog mkhyen snyam pa'i 'dun pa drag po bya ste/__mdo sde rgyan las/__de ni de dngos 'dod pas khas len de yang snying rje las rig bya/__zhes gsungs pas da lta bdag la sems can sdug bsngal las sgrol ba'i nus pa mi 'dug pas/__ma lag zha ma'i bu chus khyer ba gzhan la ram mda' zlog zer ba ltar drin can sems can rnams/__sdug bsngal dang kun 'byung gi chus khyer ro ram mda' bzlog zer ba'i tshul du byed pa yin gsung /__des na da lta sems can rnams sdug bsngal las sgrol ba dang /__ma 'ongs pa na bdag la sems can thams cad sgrol ba'i nus pa yod pa dkon mchog mkhyen snyam pa'i bsam pa khyad par can dang ldan pas/__bdag kyang rmi lam dang sgyu ma ltar bden pa med par shes par byas nas/__sems gzhan du ma yengs par rtse gcig pa'i yid kyis skyabs su 'gro ba 'di'i rjes zlos lan gsum gnang bar zhu/__slob dpon dgongs su gsol/__rang rang gi ming nas smos te/__bdag ming 'di zhes bgyi bas dus 'di nas bzung ste/__ji srid byang chub snying po la mchis kyi bar du/__rkang gnyis rnams kyi mchog sangs rgyas bcom ldan 'das rnams la skyabs su mchi'o/__/slob dpon dgongs su gsol/__rang rang ming nas smos te/__bdag ming 'di zhes bgyi ba dus 'di nas bzung ste/__ji srid byang chub snying po la mchis kyi bar du/__chos rnams kyi mchog zhi ba 'dod chags dang bral ba'i chos rnams la skyabs su mchi'o/__/slob dpon dgongs su gsol/__rang rang gi ming nas smos te/__bdag ming 'di zhes bgyi ba dus 'di nas bzung ste/__ji srid byang chub snying po la mchis kyi bar du/__tshogs rnams kyi mchog__/'phags pa byang chub sems dpa' phyir mi ldog pa'i dge 'dun rnams la skyabs su mchi'o/__/zhes pas skyabs su song nas/__de yi bslab bya la/__deng phyin chad sangs rgyas la ston pa/__theg chen gyi chos la lam/__byang sems 'phags pa rnams la lam sgrub pa'i grogs su bzung ba'i bsam sbyor brtan po bskyed dgos pa lags/__gsum pa thabs khyad par can gyi sgo nas tshogs bsag cing sgrib pa sbyang ba ni/__'ga' zhig phyag dang mchod pa tsam las mi mdzad na'ang /__jo bo chen pos yan lag bdun tshang bar byed par bshad pas/__thog mar yan lag bdun pa 'bul ba'i yul gsal gdab pa ni/__mdun gyi nam mkhar bstan pa'i bdag po bcom ldan thub pa chen po la/__'khor nye ba'i sras brgyad la sogs pas bskor bas gtso byas pa'i sangs rgyas dang byang chub sems dpa' dpag tu med pa bzhugs pa bsams nas/__de rnams dang slob dpon lhan gcig pa'i spyan sngar bdag gzhan sems can thams cad kyis lus zhing gi rdul rnyed du sprul nas/__sgo gsum gus pa chen pos phyag 'tshal ba'i mos pas/__rjes zlos kyi tshig rnams dal zhing dod la skabs phyed par brjod pa shin tu gal che bas/__yan lag lnga sa la gtugs pa'i phyag dang bcas te 'di'i rjes zlos lan gsum mdzod/__sangs rgyas thams cad 'dus pa'i sku/__/rdo rje 'dzin pa'i ngo bo nyid/__/dkon mchog gsum gyi rtsa ba ste/__/bla ma rnams la phyag 'tshal lo/__/zhes tshigs bcad re dang phyag re sbrags pa lan gsum byed du gzhug__/de bzhin du/__/mgon po thugs rje che ldan pa/__/thams cad mkhyen pa'i ston pa po/__/bsod nams yon tan rgya mtsho'i gzhi/__/de bzhin gshegs la phyag 'tshal lo/__/dag pas 'dod chags bral ba'i rgyu/__/dge bas ngan song las sgrol zhing /__/gcig tu don dam mchog gyur pa/__/zhi gyur chos la phyag 'tshal lo/__/grol nas grol ba'i lam yang ston/__/bslab pa dag la rab tu gus/__/zhing gi dam pa yon tan zhing /__/dge 'dun la yang phyag 'tshal lo/__/zhes phyag dang bcas te byar gzhug go__/de ltar bla ma dang dkon mchog la phyag 'tshal ba sngon du song nas/__gnyis pa mchod pa 'bul ba la lnga las/__dang po dngos su bshams pa'i mchod pa ni/__thog mar slob dpon gyis so so'i rig pas byin gyis brlabs par bya ba yin te/__zhes mtshams sbyar la/__slob dpon gyis/__rin po che la sogs pa'i snod phun sum tshogs par dngos su bshams pa'i mchod pa rnams so so'i rig pas byin gyis brlabs pa'i/__lha rdzas kyi mchod yon/__me tog__/bdug spos/__snang gsal/__dri mchog__/zhal zas/__rol mo la sogs pa mchod pa'i bye brag bsam gyis mi khyab par gyur/__oM badz+ra ar+g+haM AHhU~M/__oM badz+ra puSh+pe AHhU~M/__nas shab+da'i bar sbyar bas byin gyis brlab/__de ltar byin gyis brlabs nas dngos su bshams pa'i mchod pa rnams rgyur byas pa las byung ba'i lha rdzas kyi mchod pa'i sprin phung nam mkha'i khams khyab par gyur pa dang /__gzhan yang 'jig rten gyi khams dpag tu med pa na yod pa'i me tog la sogs pa rnams/__bla ma rgyal ba sras dang bcas pa la 'bul lo snyam pas 'di gsung bar zhu/__oM sarba ta thA ga ta ar+g+haM pra tIts+tsha pU dza me g+ha sa mu drwa s+pha ra Na sa ma ye hU~M/__de bzhin du/__puSh+pe nas shab+da'i bar sbyar bas mchod du gzhug__/spro na/__mchod yon phal cher/__sogs tshigs bcad ji ltar rigs pa dang spel nas kyang rung ngo /__/gnyis pa bdag pos yongs su ma bzung ba'i mchod pa ni/__phyogs bcu rab 'byams mu mtha' med pa'i 'jig rten gyi khams ji snyed na/__bdag pos yongs su ma bzung ba'i rin po che'i ri dpag bsam gyi shing /__'bru dang me tog__/sman dang nags tshal la sogs pa thams cad rab tu dwang ba'i blos blangs te sangs rgyas dang /__byang chub sems dpa' rnams la 'bul na/__bdag dang mtha' yas pa'i sems can thams cad tshogs rdzogs pa'i don du khyed rnams kyis bzhes su gsol snyam pa'i sgo nas 'di'i rjes zlos mdzod/__/me tog 'bras bu ji snyed yod pa dang /__/sman gyi rnam pa gang dag yod pa dang /__/'jig rten rin chen ji snyed yod pa dang /__/chu gtsang yid du 'ong ba ci yod dang /__/rin chen ri bo dang ni de bzhin du/__/nags tshal sa phyogs dben zhing nyams dga' dang /__/ljon shing me tog rgyan spras spud pa dang /__/shing gang 'bras bzang yal ga dud pa dang /__/lha sogs 'jig rten na yang dri dang ni/__/spos dang dpag bsam shing dang rin chen shing /__/ma rmos 'khrungs pa'i lo tog rnam pa dang /__/mtsho dang rdzing bu pad+mas brgyan pa dag__/ngang pa skad snyan shin tu yid 'ong ldan/__/gzhan yang mchod par 'os pa'i rgyan rnams ni/__/nam mkha' rab 'byams khams kyi mtha' gtugs pa/__/yongs su bzung ba med pa de dag kun/__/blo yis blangs nas thub pa skyes kyi mchog__/sras dang bcas pa rnams la legs 'bul na/__/yon gnas dam pa thugs rje che rnams kyis/__/bdag la brtser dgongs bdag gi 'di dag bzhes/__/gsum pa lus 'bul ni/__bdag gi lus 'di sangs rgyas dang byang chub sems dpa' rnams kyi bran du phul nas/__de dag gi bya ba sems can gyi don 'ba' zhig bya snyam pa'i sgo nas 'di'i rjes zlos mdzod/__rgyal dang de sras rnams la bdag gis ni/__/bdag gi lus kun gtan du dbul bar bgyi/__/sems dpa' mchog rnams bdag ni yongs bzhes shig__/gus pas khyed kyi 'bangs su mchi bar bgyi/__/bzhi pa blos sprul pa'i mchod pa ni/__/bdag gi tshig las 'byung ba'i/__khrus kyi khang pa zhes pa la sogs pa 'di rnams tshigs bcad las ji ltar byung ba'i rim pa bzhin du lam lam byung bar mos nas/__sangs rgyas dang byang chub sems dpa' thams cad la 'bul bar zhu/__zhes brda sbyar nas rang gis tshig dal la dad pa skabs phyed pas 'di rnams brjod par bya'o/__/khrus kyi khang pa shin tu dri zhim pa/__/shel gyi sa gzhi gsal zhing 'tsher ba bstar/__/rin chen 'bar ba'i ka ba yid 'ong ldan/__/mu tig 'od chags bla re bres pa der/__/de bzhin gshegs dang de yi sras rnams la/__/rin chen bum pa mang po spos kyi chu/__/yid 'ong legs pa bkang ba glu dang ni/__/rol mor bcas pa du mas sku khrus gsol/__/de dag sku la mtshungs pa med pa'i gos/__/gtsang la dri rab bsgos pas sku phyi'o/__/de nas de la kha dog legs bsgyur ba'i/__/na bza' shin tu dri zhim dam pa 'bul/__/gos bzang srab la 'jam pa sna tshogs dang /__/rgyan mchog brgya phrag de dang de dag gis/__/'phags pa kun tu bzang dang 'jam dbyangs dang /__/'jig rten dbang phyug sogs la'ang brgyan par bgyi/__/stong gsum kun tu dri ngad ldang ba yi/__/dri mchog rnams kyis thub dbang rnams kyi sku/__/gser sbyangs btso ma byi dor byas pa ltar/__/'od chags 'bar ba de dag byug par bgyi/__/thub dbang mchod gnas mchog la yid 'ong ba'i/__/me tog man+da ra dang pad+ma dang /__/ut+pal la sogs dri zhim thams cad dang /__/phreng ba spel legs yid 'ong rnams kyis mchod/__/spos mchog yid 'phrog dri ngad khyab pa yi/__/bdug pa'i sprin tshogs rnams kyang de la dbul/__/zhal zas bza' btung sna tshogs bcas pa yi/__/lha bshos rnams kyang de la dbul bar bgyi/__/gser gyi pad+ma tshar du dngar ba yi/__/rin chen sgron me rnams kyang dbul bar bgyi/__/sa gzhi bstar ba spos kyis byugs pa der/__/me tog yid 'ong sil ma dgram par bgyi/__/gzhal med pho brang bstod dbyangs yid 'ong ldan/__/mu tig rin chen rgyan 'phyang mdzes 'bar ba/__/dpag yas nam mkha'i rgyan gyur de dag kyang /__/thugs rje'i rang bzhin can la dbul bar bgyi/__/rin chen gdugs mdzes gser gyi yu ba can/__/khor yug rgyan gyi rnam pa yid 'ong ldan/__/dbyibs legs lta na sdug pa bsgreng ba yang /__/rtag tu thub dbang rnams la dbul bar bgyi/__/lnga pa mchod pa yongs su bsngo ba ni/__/de dag las gzhan yang mchod pa'i bye brag mtha' klas pas sangs rgyas dang byang chub sems dpa' dpag tu med pa mnyes par byed cing /__/sems can thams cad kyi sdug bsngal zhi bar byed pa'i tshogs nam mkha'i khams khyab par gnas shing mchod pa'i sprin gyi char chen po 'babs par gyur cig snyam pas 'di'i rjes zlos mdzod/__de las gzhan yang mchod pa'i tshogs/__/rol mo dbyangs snyan yid 'ong ldan/__/sems can sdug bsngal sel byed pa'i/__/sprin rnams so sor gnas gyur cig__/ces lan gcig dang /__na mo rat+na tra yA ya/__na mo b+ha ga wA te/__badz+ra sA ra pra mar+d+ha ne/__ta thA ga tA ya/__ar+ha te/__samyak+saM bud+d+ha ya/__tad+ya thA/__oM badz+re badz+re/__ma hA badz+re/__ma hA bid+yA badz+re/__ma hA bid+ya bo d+hi tsit+ta badz+re/__ma hA bo d+hi maN+Do pa saM kra ma Na badz+re/__sarba karma A wa ra Na bi sho d+ha na badz+re swA hA/__zhes mchod pa'i sprin gyi gzungs lan gsum brjod du gzhug go__/de nas skabs 'dir gtor ma 'bul bar spro na/__de rnams kyis mchod pa'i yan lag dngos gzhi grub nas/__rjes 'brel du gtor ma 'bul ba ni slob dpon gyis bgyi bar gda' ste/__zhes mtshams sbyar la/__gtor ma rnams la chab bran/__slob dpon gyis/__rin po che la sogs pa'i gtor snod kyi nang du gzugs sgra dri ro reg bya'i skye mched kyi ngo bor gyur pa'i gtor ma 'dod pa'i yon tan bsam gyis mi khyab pas gang bar gyur/__oM a kA ro/__sogs lan gsum gyis brlabs nas/__gtor ma dang po/__oM sarba gu ru bud+d+ha d+harma sang+g+ha sa pa ri wA ra oM a kA ro/__sogs btags pa gsum mam lngas bla ma dang dkon mchog gsum la phul nas/__bla ma dang dkon mchog rin po che rnam pa gsum gyis mchod sbyin gyi gtor ma rgya chen po 'di bzhes la/__bdag cag dpon slob rnams kyi rgyud la byams pa dang snying rje byang chub kyi sems rin po che bcos ma ma yin pa skye ba dang /__skyes pa gong nas gong du 'phel bar mdzad du gsol/__zhes gsol ba gdab/__gtor ma gnyis pa/__oM d+harma pA la sa pa ri wA ra oM a kA ro/__sogs btags pa lan gsum gyis chos skyong spyi la phul nas/__dpal rdo rje nag po chen po la sogs pa chos skyong ba'i srung ma rnams dang /__dkar phyogs la mngon par dga' ba'i lha klu gnod sbyin 'byung po'i tshogs rnams mchod sbyin gyi gtor ma rgya chen po 'di bzhes la/__sangs rgyas kyi bstan pa dar ba dang /__'jig rten du dge legs rgya chen po 'byung ba dang /__bdag cag dpon slob rnams kyi rgyud la byang chub kyi sems rin po che mi nyams shing gong nas gong du 'phel ba dang /__bar chad thams cad zhi ba'i phrin las dang stong grogs dam pa mdzad du gsol/__zhes 'dod don gsol/__gtor ma gsum pa/__gnyug mar gnas pa'i gzhi'i bdag po rnams mdun du mngon sum bzhin 'khod par bsams la/__oM b+hU mi pa ti sa pa ri wA ra oM a kA ro/__sogs btags pa lan gsum gyis bsngos la/__mchod sbyin gyi gtor ma rgya chen po 'di gzhi bdag__/gnas bdag__grong bdag__/dkor bdag__/gnyug mar gnas pa rnams la 'bul lo/__/mchod do/__/stob bo/__/bzhes shig__/sangs rgyas kyi bstan pa dar ba dang /__'jig rten gyi khams su bde legs thams cad 'byung ba dang /__bdag cag dpon slob rnams kyis byang chub kyi sems rin po che bskyed pa la dga' zhing rjes su yi rangs nas/__bar du gcod pa thams cad bsrung ba'i stong grogs dam pa mdzod cig__/ces phrin las gzhol/__gsum pa sdig pa bshags pa ni/__rang gzhan thams cad kyis/__rgyu dug gsum gyis kun nas bslangs shing /__byed pa po sgo gsum dang rjes su 'brel bas sngar bsags pa'i sdig ltung thams cad dran yul du byas nas de la 'gyod pa drag po bskyed pa dang /__da phyin chad srog la babs kyang sdig pa mi byed snyam pa'i zhe bcad chen po dang /__da ni gzhan don du sangs rgyas thob par bya ba'i phyir rten dkon mchog gsum la brten nas sdig pa'i gnyen po'i chos rnams tshul bzhin du nyams su blang bar bya'o snyam pa'i bsam pa zhe thag pa'i sgo nas sdig bshags kyi tshig brjod pas sdig pa thams cad sangs sangs dag pa'i mos pa dang bcas te 'di'i rjes zlos mdzod/__/'dod chags zhe sdang gti mug dbang gis ni/__/lus dang ngag dang de bzhin yid kyis kyang /__/sdig pa bdag gis bgyis pa ci mchis pa/__/de dag thams cad bdag gis so sor bshags/__bzhi pa dge ba la rjes su yi rang ba ni/__'phags pa dang so sor skye bo'i bde ba dang dge ba'i rtsa ba thams cad la zhe thag pa nas dga' ba'i bsam pas 'di yi rjes zlos mdzod/__/phyogs bcu'i rgyal ba kun dang sangs rgyas sras/__/rang rgyal rnams dang slob dang mi slob dang /__/'gro ba kun gyi bsod nams gang la yang /__/de dag kun gyi rjes su bdag yi rangs/__lnga pa chos kyi 'khor lo bskor bar bskul ba ni/__phyogs bcu'i 'jig rten gyi khams na sangs rgyas bcom ldan 'das gang dag sangs rgyas nas zhu ba po'i tshogs rdzogs par bya ba la sogs pa'i don du chos kyi 'khor lo mi bskor ba'ang yod pas/__de rnams la gdul bya rnams kyi don du chos kyi 'khor lo bskor bar zhu snyam pa'i bsam pa zhe thag pas gsol ba gdab pa 'di'i rjes zlos mdzod/__/gang rnams phyogs bcu'i 'jig rten sgron ma dag__/byang chub rim par sangs rgyas ma chags brnyes/__/mgon po de dag bdag gis thams cad la/__/'khor lo bla na med pa bskor bar bskul/__/drug pa mya ngan las mi 'da' bar gsol ba gdab pa ni/__gang dag phyogs bcu'i 'jig rten gyi khams na/__sangs rgyas 'ga' zhig sangs rgyas la dkon pa'i 'du shes bskyed pa la sogs pa'i don du mya ngan las 'da' ba'i tshul ston par bzhed pa'ang yod pas/__de rnams la zhing de rnams kyi gdul bya'i don du mya ngan las mi 'da' bar yun ring du bzhugs su gsol snyam pa'i bsam pa zhe thag pas mya ngan las mi 'da' bar gsol ba gdab pa 'di'i rjes zlos mdzod/__mya ngan 'da' ston gang bzhed de dag la/__/'gro ba kun la phan zhing bde ba'i phyir/__/bskal pa zhing gi rdul rnyed bzhugs par yang /__/bdag gis thal mo rab sbyar gsol bar bgyi/__bdun pa bsngo ba ni/__de ltar phyag 'tshal ba la sogs pa'i dge ba'i rtsa ba mtshon dus gsum du bsags pa'i dge ba'i rtsa bas rnams sems can thams cad kyi sdug bsngal sel ba dang /__gnas skabs dang mthar thug gi bde ba thams cad 'grub pa'i rgyur byang chub chen por yongs su bsngo bar bgyi'o snyam pa'i yid kyis 'di'i rjes zlos mdzod/__phyag 'tshal ba dang mchod cing bshags pa dang /__/rjes su yi rang bskul zhing gsol ba yis/__/dge ba cung zad bdag gis ci bsags pa/__/thams cad rdzogs pa'i byang chub phyir bsngo'o/__/de rnams kyis sbyor ba'i rim pa grub nas/__gnyis pa dngos gzhi ni/__ji skad du/__de la dang po rigs nus las/__/snying rje'i sa bon rab sad cing /__/sbyor dang bsam pa phun tshogs pas/__/byang chub sems ni yongs su bzung /__zhes 'byung bas/__sems bskyed de rang stobs dang /__gzhan stobs dang /__sbyor ba'i stobs las skye ba las/__dang po ni/__rang la theg chen gyi rigs yod pa yin te/__khyed rnams la byang chub tu sems bskyed par 'dod pa'i blo byung bas de yod par grub/__gnyis pa ni/__sangs rgyas kyi yon tan dang byang chub kyi sems kyi phan yon thos pa dang /__theg chen gyi chos la thos bsam sgom gsum byas pa la sogs pas skye ba yin te/__de dag kyang ci rigs par tshang /__gsum pa ni/__bla ma la sangs rgyas kyi 'du shes dang /__rang la rmi lam sgyu ma lta bu'i 'du shes/__sems can thams cad la byams pa dang snying rje'i 'du shes byed pa ste/__dang po ni/__bla ma 'dis bdag la sangs rgyas kyi rgyu'i gtso bo byang chub kyi sems bskyed par byed pas na sangs rgyas dngos yin snyam pa bya/__de ltar sangs rgyas kyi 'du shes skyes na shin tu legs/__de ma skyes na'ang sems bskyed kyi slob dpon du 'os pa'i byang chub sems dpa' yin snyam pa'i bsam pa nges par bskyed dgos so/__/gnyis pa ni/__phung po lnga la bdag ces btags shing blo 'khrul pas bdag tu bzung ba ma gtogs bdag bden par ma grub pas sgyu ma'am rmi lam lta bu yin snyam du bsam mo/__/gsum pa ni/__dbu ma snying po las/__byams pa dang ni snying rje dang /__/shes rab chen pos brgyan pa yi/__/sangs rgyas sa bon byang chub sems/__/de phyir mkhas pas de mi btang /__/zhes pa dang /__mdo sde rgyan las/__de yi rtsa ba snying rjer 'dod/__/ces pa dang /__byang chub sems dpa'i sde snod kyi mdo sde las/__'di la byang chub sems dpa'i byang chub tu mngon par mos pa'i sngon du 'gro ba ni snying rje chen po yin no/__/zhes gsungs pas 'di ltar nges par bya ste/__mtha' yas pa'i sems can thams cad kyis thog ma med pa nas lan grangs dpag tu med par bdag gi mar byas shing gnod pa las skyobs/__phan pa sgrub/__rang bas kyang gces pa'i 'du shes kyis/__rang gi sdig pa dang sdug bsngal thams cad khyad du bsad nas nga la phan pa sna tshogs byas/__nga bde ba ldan zhing bde ba dang mi 'bral ba'i don du tsha grang bkres skom ngal dub la sogs pa dang ldan pa'i 'bad rtsol chen po grangs med par byas shing /__nga na dang 'chi ba la sogs pa'i sdug bsngal ma bzod nas ngus pa'i 'chi ma bsags kyang rgya mtsho chen po bas kyang lhag pa yod de/__de ltar gnod pa las bzlog cing phan pa bsgrubs pas 'di rnams shin tu drin che snyam du legs par bsams la/__'di rnams gnas skabs dang mthar thug gi bde ba dang ldan na ci ma rung snyam pa dang /__de la bdag gis dgod par bya'o snyam pa'i byams pa dang /__'di rnams bde bar 'dod kyang sdug bsngal dang ldan te/__dmyal ba la tsha grang /__yi dwags la bkres skom/__dud 'gro la gcig la gcig za ba la sogs pa dang /__mi la skye rga na 'chi la sogs pa dang /__lha ma yin la 'thab rtsod la sogs pa dang /__'dod khams kyi lha la 'chi ltas la sogs pa'i sdug bsngal bsam gyis mi khyab pa yod la/__khams gong ma dag la'ang de las nyams nas dmyal ba la sogs par skye bar 'gyur bas mtshon sdug bsngal kho na las ma 'das pa'i tshul/__mdo dran pa nyer bzhag las/__sems can dmyal ba dmyal mes nyams/__/yi dwags bkres shing skom pas nyams/__/dud 'gro gcig la gcig zas nyams/__/mi dag 'tsho ba thung bas nyams/__/lha dag bag med pa yis nyams/__/'khor ba khab kyi rtse tsam la/__/bde ba nam yang yod ma yin/__/zhes dang /__gzhan yang mdo las/__'dod pa'i khams kyang skyon dang bcas pa ste/__/gzugs kyi khams kyang skyon dang bcas pa'o/__/de bzhin gzugs med khams kyang skyon dang bcas/__/zhes dang /__'dul ba lung las/__/sred srid ma rig dbang gis skye bo rnams/__/mi dang lha dang ngan song rnam gsum ste/__/'gro ba lnga po dag tu mi mkhas 'khor/__/dper na rdza mkhan 'khor lo 'khor ba bzhin/__/srid gsum rga dang nad kyi sdug bsngal 'bar/__/'di na 'chi med rab 'bar mgon med de/__/srid las byung la 'gro ba rtag tu rmongs/__/bum par chud pa'i bung ba 'khor ba bzhin/__/zhes gsungs pa ltar/__mdor na gnas khams gsum du rten rigs drug gang du skyes kyang sdug bsngal gyi sdug bsngal dang /__'gyur ba'i sdug bsngal dang /__khyab pa 'du byed kyi sdug bsngal kho nas dus rtag tu sdug bsngal bar gyur ba'i sems can de dag sdug bsngal de las thar bar 'dod kyang /__las dang nyon mongs pa'i 'ching ba dam pos bcings/__/dge ba'i bshes gnyen gyis ma zin/__thar par 'gro ba'i grogs bzang po dang bral/__'phags pa rnams kyi gdul byar yang ma gyur pas sdug bsngal las thar pa'i thabs mi 'dug pas snying re rje snyam du sems can thams cad kyi sdug bsngal rang thog du bab pa tsam du bsams la/__'di rnams sdug bsngal rgyu dang bcas pa thams cad dang bral na ci ma rung /__de dang bral bar bdag gis bya'o snyam pa'i snying rje drag tu bsgoms pa dang /__de ltar 'di rnams bde ba la dgod cing sdug bsngal thams cad las sgrol ba'i khur nga la bab cing /__spro yang da lta de'i nus pa med par ma zad/__nga bas lhag pa'i tshangs pa dang brgya byin/__de bas lhag pa'i nyan rang dgra bcom pa la sogs pa la yang med/__de ltar sus nus na don gnyis phun sum tshogs pa'i rdzogs pa'i sangs rgyas kho nas nus pas de thob par bya/__de'i rgyu'i gtso bo sems bskyed yin pas de blang bar bya snyam du zhe thag pa nas bsams la/__sems bskyed nas de'i bslab bya rnams la bslabs pas bdag gis gdon mi za bar sangs rgyas thob nges/__de thob nas sems can rnams sdug bsngal gyi chu bo las bsgral/__las dang nyon mongs pa'i 'ching ba las sgrol/__gnas skabs su sdug bsngal las dbugs dbyung /__mthar thug mya ngan las bzla snyam du bsams la/__mdun gyi nam mkhar thub pa chen po la sogs pa sangs rgyas dang byang chub sems dpa' dpag tu med pa mngon sum du bzhugs par mos pa dang bcas te dgongs su gsol zhes brjod pa'i tshe 'di rnams kyi ye shes dang thugs rjes nges par gzigs snyam du bsam pa shugs drag tu bskyed la/__pus mo g.yas pa'i lha nga sa la btsug pa'am tsog pur 'dug ste/__thal mo sbyar nas don dran bzhin pas sems rtse gcig tu byas te/__tshig 'di rnams kyi rjes su bzlas pa lan gsum gyi sgo nas sems bskyed dgos pas rjes zlos dang po gnang bar zhu/____/_!__phyogs bcu na bzhugs pa'i sangs rgyas dang byang chub sems dpa' thams cad bdag la dgongs su gsol/__slob dpon bdag la dgongs su gsol/__so so rang rang gi ming nas smos te/__bdag gi ming 'di zhes bgyi bas skye ba 'di dang skye ba gzhan dang gzhan dag tu sbyin pa'i rang bzhin dang /__tshul khrims kyi rang bzhin dang /__bsgoms pa'i rang bzhin gyi dge ba'i rtsa ba ci bgyis pa dang /__bgyid du stsal ba dang /__bgyid pa la rjes su yi rang ba'i dge ba'i rtsa ba des/__ji ltar sngon gyi de bzhin gshegs pa dgra bcom pa yang dag par rdzogs pa'i sangs rgyas rnams dang /__sa chen po la rab tu bzhugs pa'i byang chub sems dpa' sems dpa' chen po rnams kyis bla na med par yang dag par rdzogs pa'i byang chub tu thugs bskyed par mdzad pa de bzhin du/__bdag ming 'di zhes bgyi bas kyang dus 'di nas bzung ste ji srid byang chub snying po la mchis kyi bar du bla na med pa yang dag par rdzogs pa'i byang chub chen por sems bskyed par bgyi'o/__/sems can ma bsgral ba rnams bsgral bar bgyi'o/__/ma grol ba rnams dgrol bar bgyi'o/__/dbugs ma dbyung ba rnams dbugs dbyung bar bgyi'o/__/yongs su mya ngan las ma 'das pa rnams yongs su mya ngan las bzla bar bgyi'o/__/zhes lan gcig brjod du gzhug__/de'i rjes zlos dang po song nas/__gnyis pa dang gsum pa'ang lan re re zhing blo sbyong zhing bya bar gsungs pas na bsam pa 'di bzhin du mdzod/__nam mkha' la mtha' med pa bzhin sems can gyi khams la'ang mtha' med/__mtha' med pa'i sems can re res kyang rang nyid gyi pha ma grangs med pa byas shing byas res bzhin du da lta'i pha ma dang mtshungs par phan pa tshad med pa btags/__gnod pa las ci nus kyis bskyabs pa'i drin can sha stag yin pas/__bdag gis kyang de rnams la drin bzo ba'i slad du phan pa bsgrub cing /__gnod pa las bzlog par bya/__de yang gang gis phan na bde bas dngos su phan zhing /__dge bas brgyud nas phan pa'i phyir ma drin can 'di rnams bde ba dang bde ba'i rgyu dang ldan par gyur na ci ma rung snyam pa'i byams pa dang /__sdug bsngal gyis dngos su gnod cing /__sdig pas brgyud nas gnod pa'i phyir sdug bsngal dang sdug bsngal gyi rgyu dang bral bar byung na ci ma rung snyam pa'i snying rje dang /__tshul de thams cad kyang bdag kho nas bgyi'o snyam du khur khyer ba lhag pa'i bsam pa rnam par dag pa sngon du 'gro bas/__de ltar sems can thams cad phan bde mtha' dag la dgod nus pa ni rdzogs pa'i sangs rgyas kyi go 'phang thob pa kho na la rags las pa'i phyir/__bdag gis kyang ma rgan sems can thams cad kyi don du rdzogs pa'i sangs rgyas kyi go 'phang de ci nas kyang thob nges pa zhig bya/__de yang rgyu med rkyen med las mi 'byung bas/__rgyu rkyen gyi gtso bo rnam pa kun tu dge ba'i rtsa ba ji snyed cig bsags pa'i mthu la brten nas byang chub kyi sems rin po che bskyed cing /__rgyal ba'i sras kyi lam las rnam pa thams cad mkhyen pa rdzogs pa'i sangs rgyas kyi 'bras bu thob par byas te/__sems can thams cad sdug bsngal gyi chu gter las bsgral zhing kun 'byung gi 'ching ba las sgrol ba dang /__srid pa'i khams las dbugs dbyung zhing mi gnas pa'i mya ngan las 'das pa chen por bzla bar bgyi'o snyam pa'i mos pa shugs drag tu bskyed cing tshig tu brjod pa na rgyal ba sras dang bcas pa'i ye shes gzigs pa dam pas mngon sum du mkhyen nges snyam pa'i dad gus kyi sems rtse gcig pa dang bcas pas rjes zlos gnyis pa mdzad par zhu/__phyogs bcu na bzhugs pa'i nas bzla bar bgyi'o/__/bar lan gcig__/slar yang 'di ltar nges par bya ste/__bla ma dang dkon mchog rin po che rnam pa gsum la tshad med pa'i mos gus bskyed pa sngon du 'gro bas/__bdag dang sems can thams cad don dam par bden par ma grub kyang /__kun rdzob tu nga dang nga yir 'dzin pa'i dbang gis sgyu ma dang rmi lam ltar bde sdug sna tshogs pa nyams su myong ba'i skabs 'dir/__bde ba 'dod cing sdug bsngal mi 'dod par rnam pa kun tu mtshungs pas nas/__gnas skabs su bdag gi bde ba dang dge ba'i rtsa ba ci mchis pa rnams mar gyur drin can thams cad la phongs pa med par gtong zhing /__de rnams kyi sdug bsngal rgyu dang bcas pa rang nyid kyis dang du blang bar bgyi'o snyam pa dang /__mthar thug rdzogs pa'i sangs rgyas kyi go 'phang rin po che thob par byas nas/__sems can thams cad la re re zhing phan pa dang bde ba mtha' dag bsgrub par bgyi/__de'i ched du rgyal ba sras dang bcas pas bgrod pa gcig pa'i lam byang chub kyi sems rin po che bskyed par bgyi'o snyam pa ste/__mdor na bla ma dang dkon mchog la dad pa chen po dang /__sems can la brtse ba chen po dang /__sangs rgyas thob 'dod kyi 'dun pa chen po ste chen po gsum dang ldan pa'i sgo nas rjes zlos gsum pa 'di shin tu gal che ba lags pas bshad pa brda 'phrod pa dang /__dam bca'i tshig rnams dal zhing dod la skabs phyed pas 'di'i rjes zlos mdzod/__phyogs bcu na bzhugs pa'i/__nas/__bzla bar bgyi'o/__/bar lan gcig__/des khyed rnams kyi rgyud la byang chub tu smon pa'i sems khyad par can skye ba yin pas skyes nges snyam pa'i thob shes kyi dga' ba bskyed par zhu/__gsum pa rjes kyi cho ga la gsum las/__dang po sems gzengs bstod pa ni/__bdag gis thog ma med pa nas lus dpag tu med pa blangs kyang /__don chen po ma grub pas 'khor bar lus pa yin pa la/__da res rang gzhan thams cad kyi phan bde'i rgyu gcig pu byang chub kyi sems rin po che rgyud la skyes pas/__dal 'byor gyi rten 'tsho ba dang bcas pa don yod cing /__rgyal ba'i sras su gyur pas don thams cad grub snyam pa dang /__ji ltar 'byung ba'i tshig rnams kyi don la yang legs par sems shing dga' spro khyad par can bskyed bzhin pa'i ngang nas 'di'i rjes zlos mdzod/__deng dus bdag tshe 'bras bu yod/__/mi yi srid pa legs par thob/__/de ring sangs rgyas rigs su skyes/__/sangs rgyas sras su da gyur to/__/zhes lan gcig brjod du gzhug__/gnyis pa bslab bya bstan pa la rnam pa lnga yod pa ni/__tshig 'di rnams la gsan pas khyab par gda' ste/__de yang dang po yang dang yang du sems bskyed par gdams pa ni/__mdo las/__khyod la bsgo zhing khong du chud par bya/__/ji lta ji ltar mang du mis brtags na/__/de la gnas pa'i rnam par rtog pa des/__/de lta de ltar de la sems gzhol 'gyur/__/zhes gsungs shing /__dge ba'i bshes gnyen sha ra ba'i zhal nas kyang /__byang chub kyi sems ting nge 'dzin du ci 'ong bya/__theg chen gyi bsam gtan gyi dmigs pa yang 'di kho na yin gsung skad/__des na yan lag bdun pa dang skyabs 'gro sems bskyed kyi cho ga rgyas bsdus ci rigs pa'i sgo nas yang dang yang du sems bskyed cing /__byang chub kyi sems 'phel bar bya ba'i phyir tha na'ang nyin lan gsum mtshan lan gsum du/__sangs rgyas chos dang tshogs kyi mchog rnams la/__/byang chub bar du bdag ni skyabs su mchi/__/bdag gis sbyin sogs bgyis pa 'di dag gis/__/'gro la phan phyir sangs rgyas 'grub par shog__/ces pas zhe thag pa nas sems bskyed par bya'o/__/gnyis pa tshogs gnyis bsag pa la bslab pa ni/__stong pa nyid dang snying rje zung du 'brel ba'i blos sbyin pa la sogs pa'i dge ba la myur du 'bad par bya ste/__jo bo'i zhal nas/__dge ba thams cad la tshul sna tshogs nas 'bad par bya zhing 'phral la thams cad mkhyen par bsngo/__de ltar byas na bsod nams kyang ye shes dang /__ye shes kyang bsod nams kyi tshogs su 'gro bas tshogs gnyis tha mi dad du bya ste/__thams cad mkhyen pa tshogs gnyis kyi 'bras bu yin pas so/__/zhes gsung skad/__/gsum pa chos bzhi'i spang blang la bslab pa ni/__byang chub kyi sems nyams par byed pa'i chos bzhi spangs nas/__mi nyams par byed pa'i chos bzhi la slob par byed pa yin te/__de dag kyang spang gnyen du bla ma rnams bzhed pas/__de la bla ma dang mchod par 'os pa bslu ba ni/__ltung ba glengs pa na byung bzhin du ma byung zhes smra ba'am/__dge ba bsgrub pa'i nus pa yod bzhin du med ces pa lta bu rdzun gyis bslu ba yin la/__de'i gnyen por srog gi phyir yang bsams bzhin du rdzun mi smra ba la bslab par bya'o/__/gzhan 'gyod pa'i gnas ma yin pa la 'gyod pa bskyed pa ni/__spyir dge ba la zhugs pa dang /__khyad par du theg pa chen po la zhugs pa la 'gyod pa bskyed pa yin te/__de'i gnyen por sems can 'ga' zhig dge ba la 'god pa de dag bla na med pa yang dag par rdzogs pa'i byang chub la 'god kyi/__nyan thos dang /__rang sangs rgyas kyi sa la ma yin no/__/zhes pa'i don la bslab par bya'o/__/sems bskyed pa'i byang chub sems dpa' la zhe sdang gi tshigs su bcad pa ma yin pa brjod pa'i gnyen por/__sems bskyed pa'i byang chub sems dpa' la ston pa'i 'du shes bskyed cing phyogs bcur yang dag pa'i yon tan brjod pa la bslab par bya ste/__chos thams cad 'byung ba med par bstan pa las/__/nyin dang de bzhin mtshan mo lan gsum du/__/byang chub sems dpa' rnams la mgos phyag 'tshal/__/rtag tu 'dod bzhin spyad pa spyod pa na/__/de dag 'khrul pa tsam yang mi btsal lo/__/zhes gsungs pa ltar bya'o/__/sems can thams cad la sgyu dang g.yos spyod pa'i gnyen por/__sems can thams cad la lhag pa'i bsam pa rnam par dag pas gnas par bya'i/__g.yo dang sgyus ma yin pa la bslab par bya'o/__/lhag pa'i bsam pa ni/__sems can thams cad phan bde la sbyor bar 'dod pa'o/__/bzhi pa sems can blos mi spang ba la bslab pa ni/__sems can khyu ril du spangs pa ni sems can gyi skyon mthong ba'am/__theg chen gyi lam sgrub dka' ba la sogs pa'i rgyus gzhan don du sangs rgyas thob 'dod kyi blo spangs pa ste/__de byung na thar pa gtan mi 'dod dam nyan rang gi thar pa 'dod kyang rung /__smon 'jug gnyis ka gtong ste/__mdo sdud pa las/__gal te bskal pa bye bar dge ba'i las lam bcu/__spyod kyang rang rgyal dgra bcom nyid la 'dod spyad na/__/de tshe tshul khrims skyon byung tshul khrims nyams pa yin/__/sems bskyed de ni phas pham bas kyang shin tu lci/__/zhes gsungs so/__/nyi tshe ba spong ba ni/__sems can 'ga' zhig la bdag gis phan gdags dgos shing nus kyang mi gdags snyam du blos 'dor ba ste/__des kyang sems can la dmigs pa'i sems bskyed gtong bas thun tshod kyi nang du gang blos spangs pa de phan sems kyis blos bzung la/__de la dngos su phan ma thogs kyang rang gi blo ma gnod par bya gsung /__des na/__gzhan phan las la mthu med kyang /__/de yi bsam pa rtag tu bya/__/gang la bsam pa de yod pa/__/de ni de la don gyis zhugs/__/zhes pas sems can thams cad la phan sems bskyed par bya'o/__/lnga pa byang chub sems kyi phan yon dran par bya ba ni/__sdong po bkod pa'i mdo las/__byang chub kyi sems ni sangs rgyas kyi chos thams cad kyi sa bon lta bu'o/__/zhes dang /__mdor na sangs rgyas kyi chos thams cad dang /__sangs rgyas kyi yon tan ji snyed yod pa/__byang chub sems kyi phan yon yang de snyed do/__/de ci'i phyir zhe na/__byang chub sems dpa'i spyod pa'i dkyil 'khor thams cad kyang 'di las byung ste/__'das pa dang ma 'ongs pa dang da ltar byung ba'i de bzhin gshegs pa thams cad kyang 'di las skyes so/__/zhes gsungs pa la sogs pa'i phan yon rnams yang dang yang du dran par bya'o/__/gzhan yang gzhung las/__khyad par du mngon par shes pa myur du thob par 'dod pas byang chub sems dpa' 'phags pa spyan ras gzigs dbang phyug gis zhus pa'i chos bdun pa zhes bya ba'i theg pa chen po'i mdo la bslab par bya'o/__/zhes 'byung bas/__mdo de'i don/__rnam rtog gis kyang 'dod pa mi bsten na/__dbang po gnyis sprod pa lta ci smos shing /__rmi lam du'ang mi dge ba'i bshes gnyen la mi bsten pa dang /__bya dang 'dra bar sems kyis yongs su 'dzin pa med pa dang /__thabs shes gnyis la mkhas kyang nga rgyal med pa dang /__dngos por 'dzin pa spangs nas stong nyid kyi rnam thar brtan par bya ba dang /__yang dag par bden pa ma yin pas sgyu ma dang 'dra ba'i shes pas spyad pa dang /__sems can la lhag pa'i bsam pa rnam par dag pas gnas pa dang /__rgyu dang 'bras bu la skur pa mi gdab pa ste chos bdun po de bstan pas de dag la bslab par bya'o/__/yang /__nag po'i chos bzhi dang /__sems can blos spangs pa'i ltung ba byung nas nyin zhag gcig gi drug cha'i thun tshod las 'das na sems bskyed gtong bas bshags sdom byas la slar blang /__thun tshod kyi nang du gnyen po skyes na bshags dus snga phyi 'dra zhing /__bshags yul byang chub sems dpa' 'am/__ma rnyed na so thar gyi dge bsnyen yan chad kyi mdun du ltung ba 'di byung ste zhes dngos po brjod nas bshags par bya gsungs so/__/smon pa sems bskyed kyi skor 'di rgyal ba byams pa nas jo bo'i bar du snyan nas snyan du brgyud pa'i gdams pa kho na las byon pa yin/__'di'i blo sbyong dang /__cho ga dang /__bslab bya dang /__bcas pa 'di gzhung gzhan na mi bzhugs pas/__'di dang skyabs 'gro kho nas jo bo bod la bka' drin che ba yin/__des nas smon pa sems bskyed skor dang bcas pa 'di jo bo'i gdams ngag rnams kyi mchog tu gyur pa yin no gsungs shing /__'di la slob ma'ang nges pa med pas thams cad la gnang ba lags/__gsum pa gtang rag gi mchod pa dbul ba ni/__de ltar byang chub kyi sems skyes pa de bla ma dang dkon mchog gi bka' drin yin pas/__de'i drin lan du sngar sbyor ba'i skabs su ji skad bshad pa'i dmigs pa rnams yid la dran bzhin pas dngos su bshams pa'i mchod pa dang /__lus dbul ba'i mchod pa dang /__de las gzhan yang blos sprul pa'i bye brag bsam gyis mi khyab pa dang bcas pa rnams rim bzhin du 'bul bar zhu/__zhes brda sbyar la/__dngos su bshams pa'i mchod pa rnams kha gsos la/__slob dpon gyis sbyor pa'i skabs ltar byin gyis brlabs nas/__dpon slob thun mong du/__oM gu ru sarba ta thA ga ta ar+g+haM sogs kyis mchod/__lus 'bul ba'i mchod pa/__rgyal dang de sras rnams la bdag gis ni/__/bdag gi lus kun gtan du dbul bar bgyi/__/sems dpa' mchog rnams bdag ni yongs bzhes shig__/gus pas khyed kyi 'bangs su mchi bar bgyi/__sh+lo ka gcig dang /__gzhan yang /__me tog dam pa phreng ba dam pa dang /__/sil snyan rnams dang byug ba gdugs mchog dang /__/sogs sh+lo ka gsum rnams tshar re brjod du gzhug go/__/de ltar na de rnams kyi sgo nas smon pa sems bskyed kyi cho ga yan lag dang bcas pa legs par phul grub nas/__gnyis pa 'jug pa'i sems bskyed ni/__byang chub sems dpa'i sa las/__byang chub sems dpa'i sdom pa zhes gsungs shing /__de'i cho ga yang gsal bor gsungs pa bzhin du/__jo bo chen pos cho ga'i gzhung mdzad pa'i tshul ltar/__'dir sdom pa 'bogs pa'i cho ga la gsum len pa po'i gang zag__/blang ba'i yul/__blang ba'i cho ga'o/__/de la dang po len po'i gang zag ni/__smon pa'i sems skyes shing byang chub sems dpa'i bslab pa tshul khrims gsum la nges par slob par 'dod pa'i 'dun pa dang ldan pa ste/__byang sa las/__de la byang chub sems dpa' khyim pa'am/__rab tu byung ba byang chub sems dpa'i bslab pa tshul khrims kyi phung po rnam pa gsum po 'di dag la bslab par 'dod cing /__bla na med pa yang dag par rdzogs pa'i byang chub tu smon lam btab pas zhes gsungs shing /__so so thar pa rigs bdun gang rung gi sdom pa dang ldan dgos te/__jo bos/__so so thar pa rigs bdun gyi/__/rtag tu sdom gzhan ldan pa la/__/byang chub sems dpa'i sdom pa yi/__/skal pa yod kyi gzhan du min/__zhes gsungs so/__/gnyis pa gang las blang ba'i yul ni/__rang nyid byang chub sems dpa'i sdom pa dang ldan zhing /__sdom pa'i cho ga la mkhas pa/__slob mas go bar nus pa'i tshig gi sgo nas sdom pa 'bogs par nus pa ste/__sdom pa nyi shu pa las/__bla ma sdom la gnas shing mkhas/__/nus dang ldan las blang bar bya/__zhes gsungs so/__/gsum pa ji ltar blang ba'i tshul la sbyor ba/__dngos gzhi/__mjug gi cho ga'o/__/dang po la'ang lnga/__gsol ba gdab pa dang /__bsam pa brtag pa dang /__myur du sbyin par gsol ba gdab pa dang /__bar chad dri ba dang /__bslab pa'i gnas go bar byas nas spro ba dri ba'o/__/dang po gsol ba gdab pa la/__thog mar slob dpon la ston pa'i 'du shes bskyed nas phyag gsum mdzad par zhu/__zhes phyag gsum 'tshal du gzhug__/de nas 'jug pa byang chub mchog tu sems bskyed pa'i sdom pa zhu ba'i yon du dmigs te maN+Dal zhig 'bul bar zhu/__zhes brda sbyar la maN+Dal 'bul du gzhug__/de ltar maN+Dal phul nas/__phyag snyim pa me tog dang bcas pas thal mo sbyar te gsol ba 'debs pa 'di'i rjes zlos lan gsum mdzod/__slob dpon khyod la bdag byang chub sems dpa'i tshul khrims kyi sdom pa yang dag par blang ba len par 'tshal gyis/__de la gnod pa ma mchis na bdag la thugs brtse ba'i slad du cung zad cig gsan cing stsal ba'i rigs so/__/lan gsum/__gnyis pa bsam pa brtag la gsum las/__dang po blo rtsal la brtag pa ni/__byang chub sems dpa'i sdom pa len pa la ngas mi 'grub pa'am/__mi nus pa gang yang med snyam pa'i blo rtsal dgos pas/__snod du byed pa'i chos bzhi brjod la brtag par bya bar gsungs pas nged kyis dris pa'i tshig 'di rnams la lan drang por thob mdzod/__ces brda sbyar la slob dpon gyis/__'di ltar byang chub sems dpas sems can thams cad smin par byed dgos la/__de la bslab pa grangs med pa la bslab dgos na/__sems can thams cad smin par byed pa'i bslab pa rnams la/__slob par nus sam/__zhes dris la/__slob mas/__nus lags/__zhes brjod pas khas blang ngo /__/de bzhin du/__slob dpon gyis/__byang chub sems dpa' zhing khams grangs med pa sbyong ba dang /__sangs rgyas grangs med pa mnyes par bya dgos na/__zhing khams grangs med pa sbyong ba dang /__sangs rgyas grangs med pa mnyes par byed pa la slob par nus sam/__zhes dris la/__slob mas/__nus lags zhes brjod pas khas blang ngo /__/slob dpon gyis/__byang sems kyi sdom pa de nyams na sems can thams cad bde ba la 'god par dam bcas nas de dag thams cad bslus par 'gyur te/__ji skad du/__spyod 'jug las/__dngos po phal pa cung zad la'ang /__/yid kyis sbyin zhes bsam byas nas/__/mi gang sbyin par mi byed pa/__/de yang yi dwags rgyur gsungs na/__/bla na med pa'i bde ba la/__/bsam pa thag pas 'gron gnyer nas/__/'gro ba thams cad bslus byas na/__/bde 'gror ci ga 'gror 'gyur ram/__/zhes gsungs pas/__sems can thams cad bslus pa'i rnam smin gyis dmyal ba la sogs par skye bar 'gyur ba'i nyes dmigs chen po yod na/__nyes dmigs des mi 'jigs sam/__zhes dris pa la/__nyams na nyes dmigs che yang ma nyams pa byas pas chog snyam du go ba bskyed la lan thob mdzod/__ces brjod la/__slob mas mi 'jigs lags/__zhes brjod cing khas blang ngo /__/yang slob dpon gyis/__yang bslab pa de ma nyams par bsrungs na/__spyod 'jug las/__/gang nas bzung ste sems can khams/__/mtha' yas rab tu bsgral ba'i phyir/__/mi ldog pa yi sems kyis su/__/sems de yang dag blangs gyur pa/__/deng nas bzung ste gnyid log gam/__/bag med gyur kyang bsod nams shugs/__/rgyun mi 'chad pa du ma zhig__/nam mkha' mnyam pa rab tu 'byung /__/zhes gsungs pa ltar bsod nams rgyun mi 'chad par 'byung ba la sogs pa'i phan yon chen po yod na/__phan yon chen po de thob par 'dod pas bslab pa de la bslab par spro'am/__zhes dris la/__slob mas/__spro lags/__zhes brjod pas khas blang ngo /__/gnyis pa shes rab la brtag pa ni/__slob dpon gyis/__rigs kyi bu zhes brjod pa sngon du 'gro bas/__slob ma so so'i ming nas smos la/__ming 'di zhes bya ba khyod kyis byang chub sems dpa'i sde snod kyi ma mo thos sam/__zhes dris la/__slob mas/__cung zad thos so/__/zhes lan btab/__de bzhin du/__byang chub sems dpa'i sde snod kyi ma mo shes sam/__zhes dris la/__cung zad shes so/__/zhes lan btab/__byang chub sems dpa'i sde snod kyi ma mo la dad dam/__zhes dris la/__shin tu dad do/__/zhes lan btab/__byang chub sems dpa'i sde snod kyi ma mo las gsungs pa'i bslab pa'i gzhi rnams bsrung bar nus sam/__zhes dris la/__bsrung bar nus lags/__zhes khas blang du gzhug go__/gsum pa 'dun pa la brtag pa ni/__thog mar 'di ltar nges par bya ste/__byang chub sems dpa'i sdom pa la brten nas/__bdag nyid sangs rgyas thob cing sems can thams cad sdug bsngal las sgrol ba la sogs pa'i yon tan dpag tu med pa dang ldan pas de la 'jug par bya'o snyam pa'i 'dun pa rtse gcig tu bskyed la nged kyis dris pa'i tshig 'di rnams la lan thob mdzod/__zhes brda sbyar la/__slob dpon gyis/__rigs kyi bu khyod nyon cig__/khyod 'di ltar sems can ma bsgral ba rnams bsgral ba dang /__ma grol ba rnams dgrol ba dang /__dbugs ma phyin pa rnams dbugs dbyung ba dang /__yongs su mya ngan las ma 'das pa rnams mya ngan las 'da' ba dang /__sangs rgyas kyi gdung rgyun mi 'chad par 'dod dam/__zhes dris la/__slob mas/__'dod lags zhes lan btab pa la/__slob dpon gyis/__de la khyed kyis sems bskyed brtan pa dang /__yi dam brtan par bya'o/__/zhes gdams/__yang slob dpon gyis/__gzhan dang 'gran pa'i ched du ma yin nam/__zhes dris la/__slob mas/__ma yin lags/__zhes lan btab bo/__/gzhan gyis nan gyis len du bcug pa ma yin nam/__zhes dris la/__ma yin lags/__zhes lan btab bo/__/gsum pa myur du sbyin par gsol ba gdab pa la/__mchod pa 'bul ba dang phyag 'tshal ba sngon du 'gro ba'i sgo nas gsol ba gdab par gsungs pas/__thog mar bcom ldan 'das thub pa chen po la sogs pa'i phyogs bcu'i sangs rgyas dang byang chub sems dpa' thams cad mdun gyi nam mkhar mngon sum lta bur bzhugs par bsams la/__de rnams kyi mkhyen brtse nus pa'i yon tan tshad med pa rjes su dran pas dang 'dod yid ches kyi dad pa shugs drag tu bskyed bzhin pa'i ngang /__dngos su bshams pa'i mchod pa dang /__lus dbul ba'i mchod pa dag rim bzhin du gnang bar zhu/__zhes brda sbyar la/__mchod pa gsar du bshams pa rnams slob dpon gyis sngar ltar byin gyis brlabs/__de nas dpon slob thun mong du/__mchod phreng tshigs bcad dang bcas rgyas par bya ba'am/__bsdu na/__oM sarba ta thA ga ta ar+g+haM pra tI ts+tsha pU dza me g+ha sa mu dra s+pha ra Na sa ma ye hU~M/__de bzhin du/__puSh+pe/__nas shab+da'i bar sbyar ba dang /__rgyal dang de sras rnams la bdag gis ni/__/bdag gi lus kun gtan du 'bul ba bgyi/__/sems dpa' mchog rnams bdag ni yongs bzhes shig__/gus pas khyed kyi 'bangs su mchi bar bgyi/__/shwa lo ka gcig brjod du gzhug__/slob dpon la ston pa'i 'du shes bskyed de phyag gsum mdzad par zhu/__zhes phyag gsum 'tshal zin pa dang /__rang rang gi gral la tsog tsog pur 'khod de phyag snyim pa me tog dang bcas pas thal mo sbyar te gsol ba 'debs pa 'di'i rjes zlos lan gsum mdzod/__slob dpon gyis byang chub sems dpa'i tshul khrims kyi sdom pa yang dag par blang ba bdag la myur du stsal du gsol/__lan gsum/__bzhi pa bar chad dri ba ni/__sdom pa'i rten du byang sems kyi rigs la gnas shing smon pa'i sems skyes pa dgos pas de lta bu'i rigs can yin nam zhes dris pa 'di la lan thob mdzod/__rigs kyi bu/__ming 'di zhes bya ba khyod byang chub sems dpa' yin nam/__zhes dris la/__yin lags/__zhes lan btab/__byang chub tu smon lam btab bam/__zhes dris la/__btab lags__zhes lan btab bo/__/lnga pa bslab pa'i gnas go bar bya zhing spro ba dri ba la/__dang por bslab pa'i gnas go bar bya ba ni/__mi zad pa dpag tu med pa bla na med pa'i bsod nams kyi gter/__sangs rgyas kyi yon tan thams cad kyi 'byung gnas/__byang chub sems dpa' sdom pa myur du thob par 'gyur ro snyam du dga' ba khyad par can bskyed pa dang bcas tshig 'di la gsan pas khyab par gda' ste/__mi dge ba mtha' dag spong ba'i sems pa sa bon dang bcas pa sdom pa'i tshul khrims/__phar phyin drug la sogs pa'i dge ba sgrub 'dod kyi sems pa sa bon dang bcas pa dge ba chos sdud kyi tshul khrims/__sems can thams cad kyi don byed par 'dod pa'i sems pa sa bon dang bcas sems can don byed gyi tshul khrims yin zhing /__de dag dus gsum gyi sangs rgyas dang byang chub sems dpa' thams cad kyi bslab pa'i gzhi dang tshul khrims yin no/__/zhes go ba bskyed nas/__de lta bu'i byang chub sems dpa'i bslab pa'i gzhi rnams dang /__tshul khrims de dag bdag las len par 'dod dam zhes spro ba dris pa 'di la lan thob mdzod/__byang chub sems dpa' thams cad kyi bslab pa'i gzhi rnams dang /__byang chub sems dpa' thams cad kyi tshul khrims de dag ci bdag las len par 'dod dam/__zhes dris la/__slob mas/__len par 'tshal lo/__/zhes lan btab/__gnyis pa dngos gzhi ni/__spyir bslab pa nod par lan gsum du khas blangs pa nyid kyis sdom pa skye ba yin na'ang /__thog mar bsam pa 'di ltar nges pa gal che ste/__chos thams cad don dam par yod med la sogs pa spros pa'i mtha' thams cad dang bral zhing /__kun rdzob tu/__mdo ting nge 'dzin rgyal po las/__sgyu ma byed pa dag gis gzugs sprul te/__/rta dang glang po shing rta sna tshogs byas/__/de la ji bzhin snang ba gang yang med/__/chos rnams thams cad de 'drar shes par gyis/__/zhes gsungs pa ltar snang ba thams cad snang yang bden pa med par shes par byas nas/__de lta bu'i don ma rtogs par/__gzungs 'dzin la bden par zhen pa'i dbang gis khams gsum gyi 'khor ba'i gnas su bde ba 'dod bzhin du bde ba dang ni bral/__sdug bsngal mi 'dod bzhin du sdug bsngal bsam gyis mi khyab pa dang ni ldan/__bde ba bsgrub cing sdug bsngal 'dor ba'i thabs mi shes pa'i rigs drug gi sems can 'di thams cad kyis thog ma med pa nas yang nas yang du bdag gi pha mar byas te/__phan bde sgo du ma nas ni bsgrubs/__gnod 'tshe thams cad las ni ci nus kyis bskyabs/__bsam rgyu dang dran rgyu ni bdag las med pa byas shing /__bdag gi ched du lus srog kyang grangs med par btang ba'i drin can sha stag yin pas/__de thams cad sdug bsngal las bsgral zhing bde ba la 'god par bya dgos na'ang /__da lta bdag la de'i nus pa med cing sems can thams cad sdug bsngal las sgrol zhing bde ba la 'god nus pa sangs rgyas kho na yin/__de bdag gis thob par bya/__de'ang rgyu med par mi thob cing /__de'i rgyu'i gtso bo ni byang chub sems dpa'i sdom pa yin pas/__de bdag gis blangs nas/__bslab pa gsum ka yul thams cad du/__dus thams cad kyi tshe/__tshe rabs thams cad du bsrung bar bya snyam du bsams nas/__bla ma la sangs rgyas dang /__rang la sgyu ma lta bur shes pa dang ldan pas/__sems rtse gcig tu gyis la lan thob mdzod/__ces brjod nas/__slob dpon gyis/__rigs kyi bu/__ming 'di/__zhes bya ba khyod/__bdag byang chub sems dpa' slob dpon rang nyid kyi ming nas smos la/__ming 'di/__zhes bya ba las/__'das pa'i byang chub sems dpa' thams cad kyi bslab pa'i gzhir gyur pa gang yin pa dang /__tshul khrims su gyur pa gang yin pa dang /__ma byon pa'i byang chub sems dpa' thams cad kyi bslab pa'i gzhir gyur pa gang yin pa dang /__tshul khrims su gyur pa gang yin pa dang /__da ltar phyogs bcu'i 'jig rten na bzhugs pa'i byang chub sems dpa' thams cad kyi bslab pa'i gzhir gyur pa gang yin pa dang /__tshul khrims su gyur pa gang yin pa'i bslab pa'i gzhi gang dag dang /__tshul khrims gang dag la 'das pa'i byang chub sems dpa' thams cad kyis bslab par gyur pa dang /__ma byon pa'i byang chub sems dpa' thams cad slob par 'gyur pa dang /__phyogs bcu dag na da ltar bzhugs pa'i byang chub sems dpa' thams cad da ltar slob pa'i byang chub sems dpa'i bslab pa'i gzhi thams cad dang /__byang chub sems dpa'i tshul khrims thams cad de sdom pa'i tshul khrims dang /__dge ba'i chos sdud pa'i tshul khrims dang /__sems can gyi don byed pa'i tshul khrims rnams nod dam/__zhes brjod la/__slob mas/__nod lags/__zhes khas blang ngo /__/des khas blangs pa dang po song nas/__lan re re bzhin blo sbyong bsgom zhing bya bar gsungs pas bsam pa 'di bzhin du mdzod/__mtha' yas pa'i mar gyur sems cad thams cad bde ba dang ldan zhing /__sdug bsngal las sgrol ba'i slad du bdag gis rdzogs pa'i sangs rgyas kyi go 'phang rin po che de ci nas kyang thob pa zhig bya/__/de yang rgyu med rkyen med las mi 'byung bas/__rgyu rkyen gyi gtso bo dus gsum du gshegs shing bzhugs la 'byon par 'gyur ba'i rgyal sras byang chub sems dpa' rnams kyis bslab par bya ba'i gzhi/__tshul khrims rnam pa gsum yang dag par blangs te phyogs dang dus dang gnas skabs thams cad du bsrung bar bgyi'o snyam du sdom pa bzung ba la mchog tu spro ba'i yid kyis dri ba gnyis pa'i lan thob mdzod/__ces brda sbyar la/__dri ba dang /__khas blangs pa/__gong bzhin bya/__slar yang 'di ltar nges par bya ste/__dge ba'i bshes gnyen la ston pa'i 'du shes bskyed pa dang bcas te dkon mchog gsum la mi bslu ba'i skyabs su nges pa'i dad pa chen po dang /__bdag dang sems can thams cad don dam pa rang bzhin gyis ma grub kyang /__kun rdzob sgyu ma dang rmi lam ltar 'khrul snang gi sdug bsngal 'ba' zhig la longs spyod pa rnams phan bde la 'god par 'dod pa'i brtse ba chen po dang /__de'i ched du mtha' gnyis la mi gnas pa rnam pa thams cad mkhyen pa rdzogs pa'i sangs rgyas kyi go 'phang rin po che thob par 'dod pa'i 'dun pa chen po ste chen po gsum dang ldan pa'i sgo nas/__sangs rgyas thob pa'i rgyu yi gtso bo/__rgyal sras rnams kyi bslab par bya ba'i gzhi/__bsod nams dang yon tan mtha' yas pa'i gter du gyur pa byang chub sems dpa'i sdom pa nyid yang dag par blangs te/__rnam pa kun tu bslab par bgyi'o snyam pa'i 'dun pa rtse gcig pas dri ba gsum pa'i lan thob mdzod/__ces brjod la/__dri ba dang /__khas blangs pa sngar bzhin bya/__de ltar lan gsum gyi bar du dris shing khas blangs pas khyed rang rnams kyi rgyud la byang chub sems dpa'i sdom pa'i dngos gzhi nges par skye ba yin pas skyes nges snyam du thob shes kyi dga' ba khyad par can bskyed mdzod/__ces brjod par bya'o/__/gsum pa mjug gi cho ga la/__mkhyen par gsol ba dang /__phan yon bstan pa dang /__gsang bar gdams pa dang /__bslab bya bstan pa dang /__gtang rag dbul ba ste rnam pa lngar yod pa las/__dang po mkhyen par gsol ba ni slob dpon gyis bgyi bar gda' ste/__zhes brda sbyar la/__slob ma rnams tsog tsog pur 'khod du gzhug__/slob dpon rang nyid khri las babs te/__rten rnams kyi drung du zhal shar du phyogs pas 'khod pa'i mdun du/__me tog sil mas bkang ba'i snod dang /__bdug spos kyi reng bu'am spos phor dag bshams/__de nas shar phyogs su phyag gsum 'tshal la/__phyag re re la/__shar phyogs kyi sangs rgyas dang byang chub sems dpa' thams cad la gus pa chen pos phyag 'tshal lo/__/zhes lan re brjod pa'i mthar me tog snyim pa gang shar phyogs su gtor zhing /__bdug spos kyang 'bul ba'i tshul bya/__yid kyis shar phyogs 'jig rten gyi khams bsam gyis mi khyab pa na bzhugs pa'i rgyal ba sras dang bcas pa'i spyan sngar phyag 'tshal zhing mchod pa'i sprin gyi char chen po phab par bsam/__tshul de bzhin gyis rigs 'gre bas/__lho phyogs sogs phyogs lhag ma gsum dang /__mtshams bzhi dang /__'og phyogs kyi dod du nub dang /__steng phyogs kyi dod du shar rnams su phyag dang mchod pa 'bul ba rnams go rim ma 'khrul bar byas pa'i mthar/__rten la zhal phyogs pas pus mo g.yas pa'i lha nga sa la btsug__/me tog dang bcas pa'i thal mo snying khar sbyar/__mdun du spos btul la 'dun pa rtse gcig pas mkhyen par gsol ba ni/__byang chub sems dpa'/__slob mas so so'i ming nas smos la/__ming 'di zhes bya bas/__bdag byang chub sems dpa'/__rang gi ming nas smos la/__zhes bya ba las/__byang chub sems dpa'i tshul khrims kyi sdom pa yang dag par blang bar bya ba la lan gsum gyi bar du yang dag par mnos pa lags te/__byang chub sems dpa'/__slob ma'i ming nas smos la/__zhes bgyi bas byang chub sems dpa'i tshul khrims kyi sdom pa yang dag par blangs pa la/__bdag__/rang gi ming nas smos la/__zhes bgyi ba dbang du gyur pas/__'phags pa'i mchog lkog tu gyur kyang /__phyogs bcu'i 'jig rten gyi khams kyi mtha' gtugs pa'i chos thams cad lkog tu ma gyur pa'i thugs mnga' ba thams cad la mkhyen par gsol lo/__/zhes me tog 'thor ba dang bcas pas lan gsum du brjod pa na phyogs bcu'i sangs rgyas dang byang chub sems dpa' thams cad kyi ye shes gzigs pas mngon sum mkhyen cing rjes su brtse bas dgongs par bsam mo/__/de nas slob dpon gyis/__de dag gis mkhyen par gsol ba'i dngos gzhi grub pa lags pas/__khyed rang rnams kyis phyogs bcu'i sangs rgyas dang byang chub sems dpa' thams cad kyi zhabs kyi pad+mo dri ma med pa la mgo bos rab tu gtugs te gus pas phyag 'tshal ba'i mos pa dang bcas slob dpon dang lhan cig tu phyag gsum mdzad par zhu/__zhes brda sbyar la/__slob dpon rang nyid kyis bskul te/__ji snyed su dag phyogs bcu'i 'jig rten na/__sogs nas/__bde bar gshegs pa thams cad bdag gis bstod/__/zhes pa'i bar brjod nas rten la phyag gsum btsal/__de ltar phyag 'tshal nas/__slar yang bdag dang sems can thams cad 'khor ba las langs par bsams la ker gyis langs te thal mo spyi bor sbyar bar zhu/__zhes brjod la de ltar byed du gzhug go__/de nas slob dpon dang /__slob ma gnyis ka 'greng bzhin du/__slob dpon gyis phyag g.yas pa skyabs sbyin gyi tshul dang bcas te/__'di skad du/__des mkhyen par gsol ba yan lag dang bcas pa grub nas/__gnyis pa phan yon bstan pa ni/__'di la gsan pas khyab par gda' ste/__byang chub sems dpa' zhes sngon du 'gro bas slob ma rnams kyi ming nas smos la/__ming 'di/__zhes bya ba khyod nyon cig__/'di ltar byang chub sems dpa'i sdom pa nyi shu pa las/__de tshe de la dge ba'i phyir/__/rgyal ba sras dang bcas rnams kyis/__/dge ba'i thugs kyis rtag par yang /__/bu sdug 'dra bar dgongs par 'gyur/__/zhes gsungs pa ltar/__'di ni chos nyid yin te/__gang gi tshe byang chub sems dpa' byang chub sems dpa'i sdom pa yang dag par len pa'i las brjod pa rdzogs pa'i tshe/__phyogs bcu'i sangs rgyas kyi zhing thams cad kyi sangs rgyas dang byang chub sems dpa' rnams la 'di lta bu'i ltas 'byung bar 'gyur te/__sangs rgyas dang byang chub sems dpa' de dag gis 'di ltar sangs rgyas kyi zhing 'di lta bu zhig na/__byang chub sems dpa'/__slob ma'i ming nas smos la/__ming 'di/__zhes bya ba/__byang chub sems dpa' rang gi ming nas smos la/__ming 'di/__zhes bya ba las/__byang chub sems dpa'i tshul khrims kyi sdom pa yang dag par blang ba mngon shes yang dag par mkhyen par 'gyur ro/__/de la sangs rgyas bcom ldan 'das de dag dang /__byang chub sems dpa' de rnams kyis chos kyi brtse bas bu dang spun zla'i tshul du dgongs par mdzad la/__de ltar dgongs par mdzad pas bsod nams dang ye shes kyi tshogs 'phel bar 'gyur ro/__/zhes brjod par bya'o/__/de nas dpon slob gnyis ka 'dug nas/__slob dpon gyis/__gsum pa byang chub sems dpa'i sdom pa blangs pa 'di nyid dad pa med pa rnams kyi mdun du smra bar mi bya'o/__/zhes gsang bar gdams pa ni 'di yin te/__byang chub sems dpa'/__ming 'di/__zhes bya ba khyod nyon cig__/byang chub sems dpa'i sdom pa yang dag par blang ba/__'di dad pa med pa rnams kyi mdun du smra bar mi bya ste/__gang gi phyir dad pa med pa rnams la byang chub sems dpa'i sdom pa rab tu bstan na/__dad pa med pa'i sems can de dag gis byang chub sems dpa'i sdom pa la ma dad pas spong bar byed de/__des na ji srid byang chub sems dpa'i sdom pa la gnas pas bsod nams kyi phung po dang ldan pa de snyed kyi bsod nams ma yin pa'i phung po'ang de snyed dang ldan par 'gyur ro/__/gang gi phyir byang chub sems dpas sems can thams cad sdug bsngal thams cad las yongs su bsrung bar bya ba yin pas/__sdig pa las bzlog par bya ste/__de'i phyir mchog tu dge ba'i byang chub sems dpas gsang bar bya ba yin no/__/zhes brjod par bya'o/__/bzhi pa bslab bya bstan pa ni/__de ltar sdom pa blangs pa tsam gyis mi chog__/de'i mi mthun pa'i phyogs spang bya rnams spong zhing /__mthun pa'i phyogs bslab bya rnams la slob dgos/__de'ang spang blang gi yul ngo shes pa la rags las pas/__de'i tshul rgyas par ni/__theg pa chen po'i mdo dang bstan bcos rnams las rgya cher 'byung ba ltar shes par bya ba yin na'ang /__'dir de dag gi snying po mdor bsdus te gdams pa'ang 'di la gsan pas khyab par gda' ste/__de la spang bya ni/__slob dpon tsan+d+ra go mIs sdom pa nyi shu pa las/__/rnyed dang bkur stir chags pa yis/__/bdag bstod gzhan la smod pa dang /__/sdug bsngal mgon med gyur pa la/__/ser snas chos nor mi ster dang /__/gzhan gyis bshad kyang mi nyan par/__/khros nas gzhan la 'tshog pa dang /__/theg pa chen po spong byed cing /__/dam chos 'drar snang ston pa'o/__/zhes gsungs pa'i chos bzhi po 'di la kun nas dkris pa che 'bring chung gsum du yod de/__'phags pa thogs med kyis/__byang sa las/__pham pa'i gnas lta bu bzhi po 'di dag ni kun nas dkris pa chung ngu dang /__'bring gis ni tshul khrims kyi sdom pa yang dag par blangs pa de byang chub sems dpas btang bar mi 'gyur ro/__/kun nas dkris pa chen pos ni btang bar 'gyur te/__gang gi phyir byang chub sems dpa' pham pa'i gnas lta bu'i chos bzhi po 'di dag rgyun mi 'chad par kun tu spyad pa dang /__ngo tsha shes pa dang khrel yod pa chung ngu tsam yang mi bskyed pa dang /__des mgu bar byed cing de la dga' ba dang /__de nyid la yon tan du lta ba can du gyur pa ni kun nas dkris pa chen po yin par rig par bya'o/__/zhes gsungs pas yan lag gsum po de tshang na kun nas dkris pa chen po zhes bya'o/__/yang byang sa las/__mdor bsdu na rgyu gnyis kho nas byang chub sems dpa'i tshul khrims kyi sdom pa yang dag par blangs pa btang bar 'gyur te/__bla na med pa yang dag par rdzogs pa'i byang chub tu smon pa yongs su btang ba dang /__pham pa'i gnas lta bu'i chos kun nas dkris pa chen pos kun tu spyod pa'o/__/zhes gsungs shing /__rnam par gtan la dbab pa bsdu ba las/__de gtong ba ni mdor bsdu na rgyu bzhis 'gyur te/__yang dag par len pa'i sems kyis mi 'dra bar nges pa'i sems skyed par byed pa dang /__mi brda phrad pa'i drung du 'bul ba dang ldan pa'i tshig rjod par byed pa dang /__pham pa'i gnas lta bu'i chos bzhi po de dag las thams cad dam re re'i nyes pa 'byin pa dang /__pham pa'i gnas lta bu'i chos bzhi po thams cad re re la kun nas dkris pa chen po'i nyes pa 'byin par byed na byang chub sems dpa'i sdom pa btang bar brjod par bya'o/__/zhes gsungs pas smon pa btang ba dang /__kun nas dkris pa chen pos zhi ba'i gnas lta bu'i chos bzhi gang rung spyad pa dang /__kun nas dkris pa 'bring po yan chad kyis bzhi ka tshang bar spyad pa dang /__byang sems kyi sdom pa las bzlog pa'i sdom min skyes pa dang /__bslab pa phul ba dang lngas sdom pa btang bas/__de dag byung na bshags dang bsag sbyang byas la sdom pa slar yang blang bar bya ste/__sdom pa nyi shu pa las sdom pa slar yang blang bar bya/__zhes gsungs so/__/kun nas dkris pa 'bring dang chung ngus bzhi po gang rung spyad pa ni/__nyes byas su gtogs la/__de yang chos gang rung de la ngo tsha dang khrel yod cung zad skye zhing gzhan gyis gsol ba btab na ldog pa ni 'bring yin la/__de ni gang zag gsum yan chad la bshags par bya ste/__snga ma las/__zag pa 'bring ni gsum la bshags/__/zhes so/__/chos gang rung de la ngo tsha cher bskyed cing gzhan gyis ma bzlog kyang rang nyid myur du de las ldog pa ni chung ngu yin la/__de dang 'og nas 'byung ba'i nyes byas bzhi bcu rtsa bzhi po rnams ni gang zag cig yan chad la bshags par bya ste/__de nyid las/__gcig gi mdun du lhag ma rnams/__/zhes so/__/de bzhin du sdom pa nyi shu pa las/__dkon mchog gsum la mi mchod/__ces pa la sogs pa nyes byas bzhi bcu rtsa bzhi po kun slong gi dbang gis nyon mongs can dang /__nyon mongs can ma yin pa dang /__ltung med du 'gyur pa'ang yod la/__de dag ni bshags yul med na rang gi sems kyis bshags pas 'dag ste/__snga ma las/__nyon mongs mi mongs bdag sems bzhin/__/zhes so/__/yang byams pa dang snying rje chen pos kun nas bslangs te gzhan la phan pa chen por 'gyur nges par mthong nas spyad na phal cher ltung med du 'gyur te/__de nyid las/__snying rjer ldan zhing byams phyir dang /__/sems dge ba la nyes pa med/__/ces gsungs so/__/bslab bya ni/__tshul khrims gsum po yin te/__byang sa las/__tshul khrims rnam pa gsum po de dag kyang mdor bsdu na/__byang chub sems dpa'i bya ba rnam pa gsum byed de/__sdom pa'i tshul khrims kyis ni gnas par byed do/__/dge ba'i chos sdud pas ni bdag gi sangs rgyas kyi chos yongs su smin par byed do/__/sems can gyi don bya ba'i tshul khrims kyis ni sems can yongs su smin par byed do/__/byang chub sems dpa'i bya ba ni gsum po de dag tu zad de/__'di lta ste/__tshe 'di la bde bar gnas par bya ba'i phyir sems gnas par bya ba dang /__lus dang sems dub pa med par sangs rgyas kyi chos yongs su smin par bya ba dang /__sems can yongs su smin byed pa yin te/__byang chub sems dpa'i tshul khrims ni de dag tu zad do/__/zhes gsungs pas/__byang chub sems dpa'i bslab bya thams cad gsum po der 'dus pas gsum po de la 'bad de bslab par bya'o/__/yang rang dang gzhan la tshe 'dir sdug bsngal yang phyi ma phan chad du phan par 'gyur ba'i dge ba ni bsgrub cing bsgrub tu gzhug par bya'o/__/'di dang phyi ma gnyis kar phan pa dang bde bar 'gyur na bsgrub cing /__'dir bde yang phyi ma phan chad du sdug bsngal gyi rgyur 'gyur ba ni 'dor zhing 'dor du gzhug par bya ste/__/sdom pa nyi shu pa las/__gzhan rnams dang ni bdag la'ang rung /__sdug bsngal yin yang gang phan pa/__phan dang bde ba rnams bya ste/__bde yang mi phan mi bya'o/__/zhes gsungs so/__/de ltar spang bya dang bsgrub bya thams cad kyang byang chub sems dpa'i sa la sogs pa las legs par shes par byas te/__gnas skabs thams cad du dran pa dang shes bzhin gyis zin par byas nas bslab par bya ste/__slob dpon chen po zhi ba lhas/__bslab pa bsrung bar 'dod pa yis/__rab tu bsgrims te sems bsrung bya/__zhes pa dang /__sems bsrung 'dod pa rnams kyis ni/__dran pa dang ni shes bzhin dag__/srog la bab kyang srungs shig ces/__/bdag ni de skad 'doms par byed/__/ces gsungs pas dran shes bzhin dang ldan pas bslab pa rnams la legs par bslab par bya'o/__/lnga pa gtang rag 'bul ba ni/__de ltar byang chub sems dpa'i sdom pa yang dag par blang ba thob pa de nyid bla ma dang dkon mchog gi bka' drin las byung bas na/__gtang rag gi slad du phyag dang /__mchod pas bsnyen bkur ba skabs su babs pa yin pas/__thog mar gnas lnga sa la gtugs pa'i phyag dang bcas te 'di gsung bar zhu/__ji snyed su dag sogs sh+lo ka bzhi tshar gcig__/de nas mchod pa gsar pa bzang du bshams la/__slob dpon gyis sngar bzhin byin gyis brlabs zin pa dang /__de nas mchod pa 'bul ba la/__dngos su bshams pa'i mchod pa dang /__lus dbul ba'i mchod pa dang /__de las gzhan yang mchod pa'i sprin rab 'byams kyis mchod pa dang gsum po sngar ji skad bshad pa'i dmigs pa rnams yid la dran bzhin pa'i sgo nas rim bzhin du 'bul bar zhu/__zhes brda sbyar la/__oM gu ru sarba ta thA ga ta ar+g+haM sogs sngags rkyang pa'am/__tshigs bcad dang spel ba ji ltar rigs pas dngos bshams/__rgyal dang de sras rnams la/__sogs sh+lo ka gcig gis lus dbul ba/__me tog dam pa/__sogs sh+lo ka gcig gis yid sprul gyi mchod pa rnams 'bul du gzhug go/__/de rnams kyis spyir bla ma dang dkon mchog la phyag dang mchod pa phul nas/__khyad par slob dpon la bka' drin rjes su dran pas gus pa'i 'du shes bskyed de phyag gsum mdzad par zhu/__zhes phyag gsum 'tshal du bcug zin pa dang /__'greng ste 'dud pa dang bcas pas/__bka' drin che lags/__zhes brjod du gzhug go__/spyi don gsum pa rang bzhin gtan la dbab pa ni/__smon 'jug gi sems de nyid gang las skye ba'i rgyu dang /__rang gi ngo bo dang /__de yi rab tu dbye ba dang /__gnas skabs dang mthar thug gi 'bras bu 'byin pa'i phan yon la sogs pa yin na'ang /__snga ma rnams ni theg pa chen po shin tu rgyas pa'i mdo sde rnams dang /__rgyal ba'i sras po ma pham pa'i mdo sde'i rgyan dang /__'phags pa thogs med zhabs kyi byang chub sems dpa'i sa dang /__slob dpon chen po tsAn+d+ra go mi'i sdom pa nyi shu pa sogs las rgya cher gsungs pas de rnams su gzigs pas khyab cing /__phan yon ni/__cho ga shin tu rgyas par byed na cho ga'i skabs su'ang bshad par bya ba yin pas/__'dir cung zad brjod par bya ste/__byams pa'i smon lam gyi mdo las/__/ngan 'gro thams cad bzlog bgyid cing /__/mtho ris lam ni rab ston la/__/rga shi med par 'dren bgyid pa'i/__/byang chub sems la phyag 'tshal lo/__/zhes gsungs/__dpa' byin gyis zhus pa las/__/byang chub sems kyi bsod nams gang /__/gal te de la gzugs mchis na/__/nam mkha'i khams ni kun bkangs te/__/de bas kyang ni lhag par 'gyur/__/gang+gA'i bye ma'i grangs snyed kyi/__/sangs rgyas zhing kun mi gang gis/__/rin chen dag gis kun bkangs te/__/'jig rten mgon la phul ba bas/__/gang gis thal mo sbyar bgyis te/__/byang chub tu ni sems btud nas/__mchod pa de ni khyad par 'phags/__/de la mtha' ni ma mchis so/__/zhes gsungs shing /__de ltar bsod nams mtha' yas pa 'byung ba'i gtan tshigs kyang /__rin chen phreng ba las/__sems can khams ni tshad med la/__/phan 'dod de ni de 'dra'o/__/zhes gsungs/__blo gros rgya mtshos zhus pa las/__/rdzogs pa'i byang chub sems dang chos 'dzin dang /__/chos sgrub pa dang srog chags snying brtse ba/__/chos bzhi 'di dag yon tan mtha' med de/__/'di dag mtha' ni rgyal bas mi gsung ngo /__/zhes gsungs/__seng+ges zhus pa las/__/sems can thams cad thar bya'i phyir/__/byang chub don du sems btud pa/__/des ni chos rnams bsdu ba thob/__/de ni dga' bar thob par 'gyur/__/zhes gsungs/__sdong po bkod pa'i mdo las kyang /__rigs kyi bu byang chub kyi sems ni sangs rgyas kyi chos thams cad kyi sa bon lta bu'o/__/'gro ba thams cad kyi chos dkar po thams cad rnam par 'phel bar byed pas zhing sa lta bu'o/__/'jig rten thams cad bsten pas sa lta bu'o/__/zhes bya ba nas/__byang chub sems dpa' thams cad bsrung bas pha lta bu'o/__/zhes bya ba'i bar dang /__de bzhin du sbyar te/__dbul ba thams cad gcod pas rnam thos kyi bu lta bu'o/__/don thams cad yang dag par bsgrubs pas yid bzhin gyi nor bu'i rgyal po lta bu'o/__/bsam pa thams cad yongs su rdzogs par byed pas bum pa bzang po lta bu'o/__/nyon mongs pa'i dgra pham par byed pas mdung thung lta bu'o/__/tshul bzhin ma yin pa'i yid la byed pa 'gebs pas go cha lta bu'o/__/nyon mongs pa'i mgo ltung bar byed pas ral gri lta bu'o/__/nyon mongs pa'i shing gcod pa s+t+wa re lta bu'o/__/'tshe ba thams cad las skyob pas mtshon cha lta bu'o/__/'khor ba'i chu nang na gnas pa steng du 'byin pas mchil pa lta bu'o/__/sgrib pas khebs pa'i rtsa thams cad rnam par 'thor bas rlung gi dkyil 'khor lta bu'o/__/byang chub sems dpa'i spyod pa dang smon lam bsdus pa'i phyir mdor bstan pa lta bu'o/__/lha dang mi dang lha ma yin du bcas pa'i 'jig rten na mchod rten lta bu ste/__rigs kyi bu de ltar byang chub kyi sems ni phan yon de dag dang yon tan gyi bye brag tshad med pa gzhan dang yang ldan no/__/zhes gsungs/__gzhan yang /__mkhas pas byang chub sems bsgoms na/__/rgyal ba sras dang bcas rnams mchod/__/'di ni skyon med me tog ste/__/rab tu dri zhim rnam par mdzes/__/thabs 'dis ring por mi thogs par/__/rgyal mchog sangs rgyas nyid du 'gyur/__/gzhan yang 'dod pa'i 'bras rnams 'grub/__/ces gsungs/__'phags pa klu sgrub kyis/__/bdag nyid dang ni 'jig rten 'dis/__/bla med byang chub thob 'dod na/__/de'i rtsa ba byang chub sems/__/ri dbang rgyal po ltar brtan dang /__/phyogs mthas gtugs pa'i snying rje dang /__/gnyis la mi brten ye shes lags/__/zhes gsungs/__gzhan yang mdo las 'byung ba'i don byang chub sems dpa'i spyod pa la 'jug par mang du gsungs pa sogs la nges shes khyad par can bskyed de/__ji skad bshad pa'i bslab bya rnams la spang blang tshul bzhin du bsgrubs pa'i legs byas kyi snang bas rang gzhan rnams kyi phan bde'i pad+mo mchog tu rgyas pa'i thabs la brtson par bya'o/__/zhes brjod/__skabs 'dir phyag len 'ga' zhig la gtang rag gi maN+Dal sogs bshad kyang spro na 'gal ba med mod/__sngar gtong rag gi phyag mchod rgyas par grub pa'i phyir ma byas kyang chog go__/de ltar na de rnams kyi sgo nas dus gsum gyi de bzhin gshegs pa thams cad kyi bgrod pa gcig pa'i lam/__mtha' yas pa'i rgyal ba'i sras po rnams kyi 'jug sgo/__/sangs rgyas kyi gsung rab theg pa chen po shin tu rgyas pa'i lugs kyi byang chub mchog tu sems bskyed pa'i cho ga__/smon sems dang /__'jug sdom so sor bzung ba'i tshul dge ba'i bshes gnyen brgyud pa dang bcas pa'i phyag len bzhin legs par phul grub pa'i skabs 'dir/__rang re rnams kyis chos nyan bshad byas pa las byung ba'i bsod nams kyi phung po dpag tu med pa zhig yod pa de dag bar ma dor chud mi 'dza' bar/__byang chub chen po'i rgyur smin pa'i slad yongs su bsngo bas rgyas gdab dgos pas bsngo ba dang smon lam gyi mthun 'gyur thugs la 'dogs par zhu/__zhes mtshams sbyar la/__spyi bsngo rgyas bsdus ji ltar rigs par bya ba'am/__yang na/__bsngo bas rgyas gdab dgos pas/__zhes pa yan gong ltar la/__bsngo ba dang smon lam lhan cig tu gnang bar zhu/__zhes dang /__'phags pa bzang po spyod pa dang /__byams pa'i smon lam sogs bsngo smon rgyas par bya zhing /__gang ltar yang /__mdo sde las 'byung ba'i bkra shis kyi tshigs su bcad pa dang bcas me tog gi char sil ma dgram par bya'o/__/'dir 'phros don cung zad brjod na/__gong du bshad pa bzhin smon sems rkyang par so thar rigs brgyad gang rung sngon du 'gro ba dang /__snod brtag pa sogs gang yang mi dgos pas don gnyer thams cad la sbyin du rung ba'i phyir/__skye bo mang po tshogs pa la sems bskyed na 'di'i smon pa sems bskyed kho na bya/__de yang gong bshad kyi skabs su sems bskyed dang sdom pa'i cho ga zhes pa la/__sems bskyed kyi cho ga zhes dang /__sems bskyed dang sdom pa'i rten nges par bya ba la/__sems bskyed kyi rten nges par bya ba zhes dang /__gnyis pa sbyor ba rjes su sgrub pa la sbyor dngos rjes gsum las/__dang po sbyor ba la'ang gsum ste/__sogs dkyus bzhin la/__smon sems kyi gtong rag dbul ba'i bar byas nas/__de rnams kyi sgo nas theg pa chen po shin tu rgyas pa'i lugs kyi sems bskyed kyi cho ga yan lag dang bcas pa legs par phul grub pa'i skabs 'dir/__rang re rnams kyis chos nyan bshad byas pa las byung ba'i/__zhes sogs gong bzhin sbrel la dge ba bsngos pas don 'grub bo/__/gal te don gnyer dmigs bsal la 'jug sdom sbyin na/__spyir yang len pa po'i gang zag gi skabs su bshad pa'i mtshan nyid thams cad tshang ba dang /__khyad par theg pa chen po'i mdo sde ji snyed pa'am/__de tsam ma nus kyang byang sa'am/__bslab btus lta bu nyan nas go don 'phrod pa byung na shin tu legs/__ma mtha' yang 'phags pa dkon mchog sprin nas/__nam mkha'i snying pos zhus pa lta bu'i mdo sde zhig gi bklag lung tsam nges pa thob pa gal che ste/__sngar las rim dang blo sbyong sogs brjod bya don gyi theg chen nyan pa zhig yin du zin na'ang rjod byed tshig gi theg chen gyi mdo sde zhig ma thos pa'i thabs med do/__/de bzhin du phyag len gyi rim pa'ang gong du ji skad bshad pa bzhin las sngags kyi cho gas rgyas bkab pa dang /__sla chos sogs gang dran byas na chos la dbang za ba'i nyes pa ni tshad med pa'i phyir bag yod par bya'o/__/de ltar sems bskyed dang sdom pa'i tshul la gnas pa'i gang zag gis theg pa chen po'i lam la slob par bya ba yin pas/__de dag gi blo gros kyi sgo dbye ba'i phyir lam gyi rim pa'ang mdor bsdu na/__mgon po byams pas mdo sde'i rgyan las/__/rigs dang chos la mos pa dang /__/de bzhin du ni sems bskyed dang /__/sbyin pa la sogs bsgrub pa dang /__/sems can yongs su smin byed dang /__/skyon med pa la 'jug nyid dang /__/zhing ni yongs su dag pa dang /__/mi gnas mya ngan 'das pa dang /__/byang chub mchog lam ston pa'o/__/zhes gsungs pa ltar/__thog mar skal ba dang ldan pa'i gzhi theg pa chen po'i rigs sad pa'i rtags su snying rje dang /__mos pa dang /__bzod pa dang /__dge ba sogs la mngon par spro ba'i gang zag gis/__chos 'di pa la mi phyed pa'i mos pas mtshams sbyar te bstan pa spyi'i 'jug sgo skyabs 'gro dang /__bye brag theg chen gyi 'jug sgo byang chub mchog tu sems bskyed pa sngon du 'gro bas/__rang smin par byed pa sbyin pa la sogs pa pha rol tu phyin pa drug bsgrub cing /__gzhan sems can rnams yongs su smin par byed pa bsdu ba'i dngos po bzhi la mnyam rjes gnyis kyi sgo nas ci nus su 'bad pas rang shugs kyis chos las blo gzhan du mi 'gro zhing /__dad pa dang /__nges 'byung dang /__bsgom pa sogs la sun pa med par pad+mo'i mtsho la ngang mo 'jug pa bzhin spro ba ngang gis 'phel ba na tshogs lam chung ngu thog mar rgyud la skyes pa yin no/__/de nas ting nge 'dzin skyon med pa dang /__zhing yongs su dag pa 'phags pa'i chos la 'jug pa'i slad du lam la 'bad pas/__bden pa bzhi'i don la gsal snang cung zad rnyed pa ni tshogs lam de nyid bsgoms pa'i stobs dang /__tshogs bsags pa'i stobs gnyis 'dzoms pas phung po lnga sgyu ma lta bu rtogs shing /__chos kyi bdag med la gsal snang rim gyis rnyed pa ni sbyor lam/__bdag med gnyis kyi don ji bzhin pa dang por mthong ba mthong lam/__mthong zin pa'i ting nge 'dzin khyad par can gyi 'jug ngogs la gom par byed pa bsgom lam/__shes bya dang spang bya mthar phyin pa mi slob pa'i lam ste/__de yang mthong lam gyi ye shes khong du chud pa dang /__sa dang po gsar du thob pa dus mnyam/__de nas bsgom lam gyis sa dgu pa'i bar bgrod nas/__mi slob pa'i lam du sa bcu pa chos kyi sprin rgya mtshor 'jug pa ste/__mdor na de lta bu'i lam dang sa de dag kyang /__don dam sems bskyed la brten nas/__shes rab stong nyid bsgoms pas nyer len gyi rgyu dang /__thabs snying rje chen pos lhan cig byed pa'i rkyen byas nas lam lnga 'grub/__kun rdzob sems bskyed la brten nas/__thabs snying rjes nyer len gyi rgyu dang /__shes rab stong pa nyid kyis lhan cig byed pa'i rkyen byas nas sa bcu thob la/__sangs rgyas pa na yang lam mthar thug pa chos sku dang /__sa mthar thug pa gzugs sku yin no/__/de ltar sa lam mthar phyin pa'i 'bras bu ni/__shes rab chen pos 'khor ba dang /__snying rje chen pos mya ngan las 'das pa'i mtha' la mi gnas/__byang chub mchog ste sangs rgyas kyi sa'i yon tan mtha' dag lhun gyis grub/__nam mkha' ji srid bar du sems can gyi khams la lam ston pa'i phrin las rgyun mi 'chad par 'gyur ba ni nges pa'o/__/de ltar theg chen shin tu rgyas pa'i sems bskyed sdom pa'i cho ga'i tshul/__/byang chub sems dpa'i lam bzang gang de gsal bar bshad pa'i legs byas kyis/__/shes rab chen pos srid las 'das kyang snying rjes zhi mthar lhung min pa'i/__/sku dang ye shes phrin las rmad byung kun mkhyen go 'phang myur thob shog__/ces pa'ang yongs rdzogs bstan pa'i mnga' bdag khams gsum chos kyi rgyal po/__dpal sa skya pa 'jam dpal gzhon nu ngag dbang rdo rje rin chen bkra shis grags pa'i rgyal mtshan dpal bzang po'i zhal snga nas kyi thugs bzhed bsgrub pa dang /__don gnyer can gzhan la'ang phan pa'i bsam pa bzang pos/__yongs 'dzin dam pa chos bzhin du spyod pa du ma'i bka' drin las theg pa chen po'i gzhung lugs mang du thos pa'i shAkya'i btsun pa rmongs brtul kun tu rgyu 'jam dbyangs mkhyen brtse'i dbang pos/__rgyal ba'i sras po thogs med bzang po dpal gyi gsung rabs la tshig gi mtha' bskyed tshul mi 'gal bas zur brgyan te/__yon tan rin po che du ma'i 'byung gnas dpal e waM chos ldan gyi bla brang thar pa rtser sbyar ba'o/__/'dis kyang rang gzhan thams cad kyi rgyud la byang chub kyi sems rin po che bcos ma ma yin pa skyes pa'i mthu las/__bstan pa dang sems can la phan pa rgya chen po 'byung ba'i rgyur gyur cig__/theg pa chen po shin tu rgyas pa'i lugs kyi sems bskyed dang sdom pa rnam par dag pa thob pa'i brgyud pa ni/__yang dag par rdzogs pa'i sangs rgyas/__mgon po byams pa/__'phags pa thogs med/__slob dpon dbyig gnyen/__'phags pa grol sde/__btsun pa rnam grol sde/__mchog gi sde/__dul ba'i sde/__slob dpon seng+ge bzang po/__ku sA li che chung gnyis/__gser gling pa chos kyi grags pa/__jo bo rje dpal mar me mdzad/__rgyal ba 'brom ston pa/__spyan snga tshul khrims 'bar/__/dge bshes bya yul ba/__rgyal sras mus sman pa'ang zer/__tshar chen pa/__grol ston bdud rtsi grags/__sangs rgyas sgam pa seng+ge skyabs/__mchims nam mkha' grags/__mkhan chen seng+ge skyabs/__mkhas btsun bsod nams ye shes/__byang sems bsod nams grags pa/__rgyal sras thogs med bzang po dpal/__grub chen bud+d+hA shrI/__ngor chen kun dga' bzang po/__mkhas grub dpal ldan rdo rje/__mkhan chen dkon mchog tshul khrims/__sgo rum pa kun dga' legs pa/__'jam dbyangs mkhyen brtse'i dbang phyug__/rje dbang phyug rab brtan/__mkhan chen ngag dbang chos grags/__'jam mgon kun dga' bsod nams/__de sras bsod nams dbang phyug__/lha khang mkhan chen don grub legs bzang /__rmor chen kun dga' lhun grub/__gnas gsar ba legs pa'i 'byung gnas/__sa chen kun dga' blo gros/__mus chen bsod nams dpal bzang /__mus chen chos nyid ye shes/__mus chen ye shes rgyal mchog__/yongs 'dzin rin po che blo gros rgya mtsho/__dpal sa skya pa 'jam mgon bla ma ngag dbang rdo rje rin chen/__des bdag cag la bka' drin chen pos khyab par mdzad pa yin no/__/yang na/__byang sems bsod nams grags pa nas/__bu ston rin chen grub/__thugs sras rin chen rnam rgyal/__mkhan chen grub pa shes rab/__paN chen dge 'dun grub/__'dul 'dzin blo gros sbas pa/__paN chen lung rigs rgya mtsho/__rje skyabs mchog dpal/__dben sa ba blo bzang don 'grub/__mkhas grub sangs rgyas ye shes/__paN chen blo bzang chos rgyan/__drung pa brtson 'grus rgyal mtshan/__rta phug pa dam chos rgyal mtshan/__sgrub khang pa dge legs rgya mtsho/__phur bu lcog ngag dbang byams pa/__yongs 'dzin ye shes rgyal mtshan/__bshes gnyen blo bzang rgyal mtshan/__rgyal sras sems dpa' rin po che rin chen blo gsal bstan skyong /__des bdag la'o/__/yang na/__rgyal sras thogs med nas/__lo chen byang chub rtse mo/__de dbon lo chen grags rgyal/__bo dong pa paN chen phyogs las rnam rgyal/__byams gling paN chen bsod nams rnam rgyal/__gser mdog paN chen shAkya mchog ldan/__paN chen don yod grub pa/__rje btsun kun dga' grol mchog__/mkhan chen lung rigs rgya mtsho/__rje btsun kun dga' snying po/__rgyal tshab ye shes rgya mtsho/__rje yon tan mgon po/__grub chen mgon po dpal 'byor/__mtshungs med mgon po grags pa/__grub dbang mgon po rnam rgyal/__rig 'dzin 'jam dbyangs rgya mtsho/__kun gzigs phrin las shing rta/__rmog lcog pa kun dga' dge legs/__kun dga' lhun grub rgya mtsho/__rje bka' brgyud bstan 'dzin/__bla ma karma lhag mthong /__grub dbang karma nor bu/__nges par thams cad mkhyen dngos ngag gi dbang phyug blo gros mtha' yas/__des bdag la bka' drin chen pos stsal ba'o/__/sarba dA ka l+yA NaM b+ha wa tu/__/ [�]