View source for JKCL-KABUM-08-NYA-017

{{Text
|classification=Tibetan Publications
|subclass=Tibetan Texts
|fulltitletib=དེ་བཞིན་གཤེགས་པ་ཀུན་གྱི་དགོངས་པའི་མཐིལ་མཐའ་བྲལ་དབུ་མ་ཆེན་པོ་ཐལ་འགྱུར་བའི་ངེས་གསང་ཟླ་བའི་ཞལ་ལུང་།
|fulltitle=de bzhin gshegs pa kun gyi dgongs pa'i mthil mtha' bral dbu ma chen po thal 'gyur ba'i nges gsang zla ba'i zhal lung
|citation=[['jam dbyangs mkhyen brtse chos kyi blo gros]]. ''de bzhin gshegs pa kun gyi dgongs pa'i mthil mtha' bral dbu ma chen po thal 'gyur ba'i nges gsang zla ba'i zhal lung''. In ''Rdzong sar mkhyen brtse 'jam dbyangs chos kyi blo gros kyi gsung 'bum'', Vol. 8: 593-597. Bir, H.P.: Khyentse Labrang, 2012.
|collectiontitletib=ཆོས་ཀྱི་བློ་གྲོས་བཀའ་འབུམ་
|collectiontitle=chos kyi blo gros bka' 'bum
|author='jam dbyangs mkhyen brtse chos kyi blo gros
|authortib=འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
|associatedpeople=Candrakīrti
|associatedpeopletib=ཟླ་བ་གྲགས་པ་
|tibgenre=Madhyamaka - dbu ma
|terma=No
|jkcloutline=Ten
|language=Tibetan
|volumenumber=008
|volnumtib=༨
|volyigtib=ཉ་
|totalvolumes=12
|textnuminvol=017
|pagenumbers=593-597
|totalpages=5
|beginfolioline=1a1
|endfolioline=3a1
|totalfolios=3
|multivolumework=No
|colophontib=།ཅེས་པའང་དབུ་མ་ཆེན་པོར་མོས་པ་ལམ་དུ་བྱེད་བ་འཇམ་དབྱངས་ཆོས་ཀྱི་བློ་གྲོས་པས་འཕགས་པའི་ས་བརྙེས་ཀླུ་སྒྲུབ་ཡབ་སྲས་ཀྱི་དགོངས་པ་བཞིན་ཆུ་ལུག་སྨིན་ཟླའི་ཚེས་གཅིག་ལ་ངེས་པར་བརྗོད་པ་དགེ་ལེགས་འཕེལ།  སརྦ་དཱ་མངྒ་ལཾ།།
|colophonwylie=/ces pa'ang dbu ma chen por mos pa lam du byed ba 'jam dbyangs chos kyi blo gros pas 'phags pa'i sa brnyes klu sgrub yab sras kyi dgongs pa bzhin chu lug smin zla'i tshes gcig la nges par brjod pa dge legs 'phel/__sarba dA mang+ga laM//
|lotsawalink=https://www.lotsawahouse.org/tibetan-masters/jamyang-khyentse-chokyi-lodro/words-of-candra
|pdflink=File:JKCL-KABUM-08-NYA-017.pdf
}}
{{Header}}
<h1 style="font-size: 24px !important;">Tibetan Text</h1>
<onlyinclude>
{{TibP|དེ་བཞིན་གཤེགས་པ་ཀུན་གྱི་དགོངས་པའི་མཐིལ་མཐའ་བྲལ་དབུ་མ་ཆེན་པོ་ཐལ་འགྱུར་བའི་ངེས་གསང་ཟླ་བའི་ཞལ་ལུང་བཞུགས་སོ།  །བླ་མ་དང་མགོན་པོ་འཇམ་པའི་དབྱངས་ལ་ཕྱག་འཚལ་ལོ།  །ཟབ་མོ་མཐའ་དང་བྲལ་བ་ཡི།  །སངས་རྒྱས་ཀུན་གྱི་ཐུགས་ཀྱི་གསང་།  །ངེས་དོན་ཟབ་མོ་ཤེར་ཕྱིན་གྱི།  །སྦས་པ་དབུ་མའི་དོན་བརྗོད་བྱ།  །བདག་དང་ཕུང་པོ་རྣམ་རིག་སོགས།  །སྤྲོས་པ་རྣམས་ཀྱི་མ་སྤྲོས་ཤིང་།  །རྣམ་རྟོག་མེད་ཅིང་ཐ་དད་མེད།  །མཐའ་དང་བྲལ་བ་དབུ་མའི་ལམ།  །བདག་གཞན་དངོས་པོར་སྣང་བ་རྣམས།  །སྐྱེ་བ་མེད་ཅིང་འགགས་པ་མེད།  །གནས་མེད་དམིགས་མེད་འགྲོ་འོང་བྲལ།  །རྟག་དང་ཆད་པ་ལས་འདས་པའི།  །ཟབ་མོ་བརྒྱད་ལྡན་དབུ་མ་ཆེ།  །དེ་ཉིད་མ་རྟོགས་བྱིས་པ་རྣམས།  །ང་དང་བདག་ཅེས་ལྷན་སྐྱེས་ཀྱི།  །ཞེན་ཅིང་འཛིན་པས་འཁོར་བར་འཁྱམས།  །ཉོན་མོངས་པ་རྣམས་རྒྱས་ཕྱིར་རོ།  །མུ་སྟེགས་ལོག་པའི་བློ་ཅན་གྱིས།  །བདག་གཅིག་རྟག་པར་སྒྲོ་བཏགས་ཀྱིས།  །དངོས་པོར་སྨྲ་བ་ཁ་ཅིག་གིས།  །བདག་ཕུང་རྫས་གཅིག་འདོད་པ་རྣམས།  །གཞི་མེད་སྒྲོ་འདོགས་ཉིད་ཀྱི་ཕྱིར།  །སྲིད་པར་འཆིང་བའི་རྒྱུ་མིན་ཡང་།  །ལོག་པར་རྟོག་ཡིན་རིགས་པས་གཞོམ།  །རྡུལ་དང་ཤེས་པ་བདེན་སྨྲ་ཡང་།  །ཡང་དག་དུ་ན་གཅིག་པ་དང་།  །དུ་མའི་རང་བཞིན་བྲལ་བའི་ཕྱིར།  །རང་བཞིན་མེད་དེ་གཟུགས་བརྙན་བཞིན།  །ཆོས་རྣམས་སེམས་ཙམ་སྟོན་པ་ཡང་།  །སེམས་ཉིད་བདེན་དངོས་མ་གྲུབ་དང་།  །སྐད་ཅིག་ཆ་དང་བཅས་པའི་ཕྱིར།  །རང་བཞིན་དམིགས་སུ་མེད་པས་ན།  །དེ་ཕྱིར་སེམས་དང་དེར་སྣང་རྣམས།  །ཡང་དག་དོན་ལ་གྲུབ་པ་མེད།  །གཞན་དབང་རྣམ་ཤེས་ཚོགས་རྣམས་ཀྱང་།  །འདུས་བྱས་ཉིད་ཡིན་དེའི་རང་བཞིན།  །རང་གསལ་བདེན་གྲུབ་ཅེས་བྱ་བ།  །འདི་ཡི་ཡོད་པ་གང་གི་ཤེས།  །རང་རིག་མྱོང་བ་ཡོད་ཅེ་ན།  །མྱོང་བྱ་མྱོང་བྱེད་གཉིས་སུ་འགྱུར།  །མེད་ན་དེ་ཉིད་གང་གི་མྱོང་།  །དེ་ཕྱིར་ལྟོས་པ་ཉིད་དུ་གྲུབ།  །བདེན་པར་བློ་ཡི་སྒྲོ་འདོགས་པའོ།  །དབུ་མར་སྨྲ་བ་འགའ་ཞིག་ཀྱང་།  །ཀུན་རྫོབ་ཏུ་ཡོད་དོན་དམ་དུ།  །མེད་པར་སྨྲ་བ་གང་ཡིན་པའང་།  །བདེན་གཉིས་རེས་འཇོག་འགལ་བའི་ཕྱིར།  །ཡང་དག་དོན་ལ་གནས་པ་མེད།  །དངོས་པོ་རྒྱུ་ལས་སྐྱེ་བའང་།  །ཐ་སྙད་གཞན་སྐྱེ་ཡིན་པར་འདོད།  །གཞན་སྐྱེ་འཇིག་རྟེན་ལ་མ་གྲགས།  །དེ་ལ་རིགས་པས་གནོད་པར་འགྱུར།  །ཁ་ཅིག་ཆོས་ཉིད་ཡོངས་གྲུབ་ཏུ།  །བདེན་གྲུབ་སྨྲ་བ་གང་དེ་ཡང་།  །གནས་ལུགས་དོན་ལ་གཞལ་ལོ་སྐད།  །གནས་ལུགས་མཉམ་པར་བཞག་པའི་སྐབས།  །བསམ་བརྗོད་བྲལ་བ་འདོད་བཞིན་དུ།  །རྗེས་ཤེས་བདེན་གྲུབ་སྨྲ་བ་ཅི།  །བདེན་པར་གྲུབ་ན་བདེན་དངོས་འགྱུར།  །ཆོས་དབྱིངས་མཚན་མ་ཅན་དུ་ལྷུངས།  །ཅི་ཕྱིར་བདེན་པར་གྲུབ་འཛིན་པས།  །མཚན་མར་འཛིན་པ་ཉིད་དུ་ངེས།  །ལ་ལ་རིགས་པས་དཔྱད་པ་ན།  །ཅི་ཡང་མེད་པ་ཉིད་དུ་འཛིན།  །མེད་པ་དོན་དམ་ཉིད་ཅེ་ན།  །རི་བོང་རྭ་ཡང་དེར་ཐལ་འགྱུར།  །ཐ་སྙད་ཚད་མས་གྲུབ་ཅེས་སྨྲ།  །ཚད་མས་གྲུབ་རྒྱུ་གང་ཡིན་དྲི།  །སྣང་ཙམ་ཉིད་དུ་གྲུབ་ཅེ་ན།  །དེ་ནི་དཔྱད་མེད་འཇོག་པས་ཆོག།  དཔྱད་པས་བཞག་གོ་ཞེ་ན་ནི།  །རང་མཚན་ཚད་མས་གྲུབ་དགོས་ན།  །དེ་ནི་རང་ཚིག་དང་འགལ་ཞིང་།  །མ་དག་ཀུན་རྫོབ་འཁྲུལ་རྟོག་ཕྱིར།  །ཚད་མས་གྲུབ་པ་མི་སྲིད་དོ།  །དེ་ལྟར་བློ་ཡིས་དཔྱད་པ་རྣམས།  །ཕན་ཚུན་འཆོལ་བ་རབ་སྤངས་ནས།  །ཆོས་དང་གང་ཟག་བདག་ཉིད་དུ།  །གྲུབ་པར་འཛིན་པའི་རྟོག་ངན་ནི།  །ངར་འཛིན་ལྷན་སྐྱེས་ཞེས་བྱ་བ།  །དེ་ཡི་གཟུང་ཡུལ་ཆོས་རྣམས་དང་།  །འཛིན་པའི་སེམས་རྣམས་མ་སྐྱེས་པ།  །གདོད་ནས་རབ་ཞི་མཉམ་པ་ཉིད།  །མཁའ་ལྟར་ཟབ་ཅིང་སྤྲོས་བྲལ་བ།  །འདི་ནི་དངོས་ཀུན་དེ་ཁོ་ན།  །མཐའ་བྲལ་དབུ་མའི་ལམ་ཡིན་ཏེ།  །ཀུན་རྫོབ་དོན་དམ་གདོད་མ་ནས།  །དབྱེར་མི་ཕྱེད་ཅིང་ཡང་དག་པ།  །འགྱུར་མེད་མཉམ་པ་ཆེན་པོ་ལ།  །དབུ་མ་ཞེས་སུ་གྲགས་པའོ།  །འཁོར་དང་མྱ་ངན་འདས་པ་རྣམས།  །སྒྱུ་མ་ལྟ་བུའི་ངོ་བོ་ཉིད།  །སྟོང་དང་རྟེན་འབྱུང་དབྱེར་མི་ཕྱེད།  །སྨྲ་བསམ་བརྗོད་པ་ལས་འདས་ཏེ།  །ཡོད་དང་མེད་དང་གཉིས་ཀ་དང་།  །གཉིས་མིན་མཐའ་ལས་རབ་གྲོལ་ཞིང་།  །རྣམ་པར་འཇོག་བྱ་འཇོག་བྱེད་ཀུན།  །མཉམ་ཉིད་དོན་ལ་རྡུལ་ཙམ་མེད།  །དབུ་མའང་དམིགས་སུ་ཡོད་མ་ཡིན།  །སེམས་དང་ཡིད་དང་རྣམ་ཤེས་ཀྱི།  །སྤྲོས་ལས་རབ་འདས་མཚན་མ་བྲལ།  །ཡང་དག་ཉིད་ལ་ཡང་དག་པར།  །མཐོང་བར་གནས་ལུགས་དོན་མཐོང་ཞེས།  །ཚིག་གི་བརྗོད་པ་ཙམ་དུ་ཟད།  །དོན་ལ་མཐོང་བར་བྱ་བ་མེད།  །མ་མཐོང་མཐོང་བ་ཆེན་པོའོ།  །དངོས་ཀུན་སྐྱེ་མེད་རབ་ཞི་བ།  །བློ་ཡང་སྐྱེ་མེད་ཉིད་ཀྱི་ནི།  །སྐྱེ་མེད་ཉིད་དུ་རྟོགས་པ་ལ།  །ཆོས་དབྱིངས་མཐོང་བའི་ཐ་སྙད་མཛད།  །གཞི་ལམ་འབྲས་བུའི་ཆོས་ཐམས་ཅད།  །རང་བཞིན་སྐྱེ་མེད་གཏན་ལ་དབབ།  །ཇི་བཞིན་ཉིད་དུ་བཞག་པ་ཡིས།  །སྐུ་བཞིའི་གོ་འཕང་ཐོབ་པར་འགྱུར།  །འདི་ལྟར་བརྗོད་པའི་དགེ་བའི་མཐུས།  །རྟག་དང་ཆད་པའི་མཐའ་ལས་གྲོལ།  །སངས་རྒྱས་ཀུན་གྱི་གསང་བ་ཆེ།  །ཟབ་མོ་དབུ་མའི་དོན་རྟོགས་ཤོག།  །ཅེས་པའང་དབུ་མ་ཆེན་པོར་མོས་པ་ལམ་དུ་བྱེད་བ་འཇམ་དབྱངས་ཆོས་ཀྱི་བློ་གྲོས་པས་འཕགས་པའི་ས་བརྙེས་ཀླུ་སྒྲུབ་ཡབ་སྲས་ཀྱི་དགོངས་པ་བཞིན་ཆུ་ལུག་སྨིན་ཟླའི་ཚེས་གཅིག་ལ་ངེས་པར་བརྗོད་པ་དགེ་ལེགས་འཕེལ།  སརྦ་དཱ་མངྒ་ལཾ།།   །།}}
</onlyinclude>
{{TsagliCall}}
<headertabs/>
== Footnotes ==
<references/>
==Other Information==
{{Footer}}
[[Category:JKCL-KABUM-Volume-08-NYA]]
[[Category:Khyentse Lineage Project]]