View source for JKCL-KABUM-07-JA-005

{{Text
|classification=Tibetan Publications
|subclass=Tibetan Texts
|fulltitletib=བླ་མ་རིན་འབྱུང་དང་ཐང་རྒྱལ་གཡང་སྐྱབས་སྦྲག་སྒྲུབ་ཀྱི་འདོན་ཟིན་ཕྱྭ་གཡང་འགུགས་པའི་ལྕགས་ཀྱུ།
|fulltitle=bla ma rin 'byung dang thang rgyal g.yang skyabs sbrag sgrub kyi 'don zin phywa g.yang 'gugs pa'i lcags kyu
|citation=[['jam dbyangs mkhyen brtse chos kyi blo gros]]. ''bla ma rin 'byung dang thang rgyal g.yang skyabs sbrag sgrub kyi 'don zin phywa g.yang 'gugs pa'i lcags kyu''. In ''Rdzong sar mkhyen brtse 'jam dbyangs chos kyi blo gros kyi gsung 'bum'', Vol. 7: 243-270. Bir, H.P.: Khyentse Labrang, 2012.
|collectiontitletib=ཆོས་ཀྱི་བློ་གྲོས་བཀའ་འབུམ་
|collectiontitle=chos kyi blo gros bka' 'bum
|author='jam dbyangs mkhyen brtse chos kyi blo gros
|authortib=འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
|associatedpeople=thang stong rgyal po
|associatedpeopletib=ཐང་སྟོང་རྒྱལ་པོ་
|tibgenre=Prosperity Rituals - gyang 'gugs
|terma=No
|jkcloutline=Six
|language=Tibetan
|volumenumber=007
|volnumtib=༧
|volyigtib=ཇ་
|totalvolumes=12
|textnuminvol=005
|pagenumbers=243-270
|totalpages=28
|beginfolioline=1a1
|endfolioline=14b6
|totalfolios=14
|multivolumework=No
|colophontib=།ཅེས་པའང་ལྕགས་ར་བསམ་འགྲུབ་རྩེའི་ལྷ་བྲིས་པ་བློ་གྲོས་ཆོས་འཕེལ་ནས་བཟང་གོས་སྟེགས་ཁེབས་བཅས་བསྐུལ་ངོར།  འཇམ་དབྱངས་ཆོས་ཀྱི་བློ་གྲོས་པས་གྲོ་བཞིན་ཟླ་བའི་ཡར་ཚེས་བརྒྱད་བཟང་པོར་འདོན་བདེར་བསྒྲིགས་པའི།  ཡི་གེ་པ་ཆབ་མདོ་སྐྱོ་མདའ་སྤྲུལ་སྐུ་འཇམ་དབྱངས་ཆོས་ཀྱི་ཉིན་བྱེད་ཀྱིས་སྒོ་གསུམ་གུས་པས་བགྱིས་པ་སྟེ་འདིས་ཀྱང་མཐའ་ཡས་པའི་བསྟན་པ་དང་སེམས་ཅན་ལ་ཕན་བདེ་རྒྱ་ཆེན་པོ་འབྱུང་ཞིང་།  འདོད་རྒུའི་འབྱོར་པ་རྫོགས་ལྡན་དཔལ་གྱིས་ཁྱབ་པའི་རྒྱུར་གྱུར་ཅིག  །།།
|colophonwylie=/ces pa'ang lcags ra bsam 'grub rtse'i lha bris pa blo gros chos 'phel nas bzang gos stegs khebs bcas bskul ngor/__'jam dbyangs chos kyi blo gros pas gro bzhin zla ba'i yar tshes brgyad bzang por 'don bder bsgrigs pa'i/__yi ge pa chab mdo skyo mda' sprul sku 'jam dbyangs chos kyi nyin byed kyis sgo gsum gus pas bgyis pa ste 'dis kyang mtha' yas pa'i bstan pa dang sems can la phan bde rgya chen po 'byung zhing /__'dod rgu'i 'byor pa rdzogs ldan dpal gyis khyab pa'i rgyur gyur cig__///
|pdflink=File:JKCL-KABUM-07-JA-005.pdf
}}
{{Header}}
<h1 style="font-size: 24px !important;">Tibetan Text</h1>
<onlyinclude>
{{TibP|༄༅།  །བླ་མ་རིན་འབྱུང་དང་ཐང་རྒྱལ་གཡང་སྐྱབས་སྦྲག་སྒྲུབ་ཀྱི་འདོན་ཟིན་ཕྱྭ་གཡང་འགུགས་པའི་ལྕགས་ཀྱུ་ཅེས་བྱ་བ་བཞུགས་སོ།  །
ཨོཾ་སྭསྟི།  བསྐལ་མང་སྔོན་ནས་ཐུགས་བསྐྱེད་རྒྱ་མཚོ་ལས།  །འཐོན་པའི་བླ་མ་རིན་ཆེན་འབྱུང་ལྡན་དང་།  རྩ་གསུམ་ནོར་ལྷའི་ཚོགས་ལ་གུས་བཏུད་ནས།  །འདོད་དགུའི་དཔལ་འབྱོར་སྤེལ་བའི་ཆོ་ག་དབྱེ།  །དེ་ལ་འདིར་བླ་མ་རིན་འབྱུང་གི་བྱིན་རླབས་དང་།  རྗེ་གྲུབ་ཐོབ་ཆེན་པོའི་གཡང་འབོད་ཀྱིས་ལུང་ལེགས་པར་ནོས་ནས།  ཉི་མ་བྱང་བགྲོད་ཀྱི་ཡར་ངོའི་གཟའ་སྐར་ཚེས་དུས་བཟང་པོར་འཛུག་པར་བྱ་སྟེ།  གོང་དུ་བླ་མ་རིན་འབྱུང་གི་སྣང་བརྙན་སོགས་ནོར་ལྷའི་སྐུ་བྲིས་འབུར་ཡོད་ན་བཤམས་ཤིང་།  མཆོད་པའི་མཎྜལ་ཚོམ་བུ་ལྔ་པ།  ཉེར་སྤྱོད་བརྒྱ་རྩ་སོགས་དང་།  བཀྲ་ཤིས་རྫས་རྟགས།  སྣ་བདུན་སོགས་ཚོགས་བསགས་པ་གལ་ཆེ་བས་མཆོད་པ་ཅི་འབྱོར་གང་རྒྱས་སྤྲོས་བཅས་སུ་བཤམས།  སྟེགས་བུ་ཁེབས་ལྡན་གྱི་སྟེང་དུ་འབྲུ་དཀར་གྱི་གཡུང་དྲུང་རིས་དང་།  དགའ་འཁྱིལ་གྱིས་མཚན་པར་གཡང་བཤོས་རིན་པོ་ཆེ་འབར་བ།  གཡང་སྒྱེ་གཡང་ཕོར།  གཡང་རྫས་སོགས་ཕྱྭ་གཡང་ཆགས་པའི་རྫས་ཅི་འབྱོར་བཀྲམ་ཤིང་།  དེའི་མདུན་དུ་དཀར་མངར་སྐྱེམས་ཕུད།  བཟའ་བཅའི་རིགས་སྣ་ཚོགས་པ་དང་།  ཉེར་སྤྱོད་རྣམས་བཤམས།  ཆོ་གའི་ལས་རིམ་དངོས་ལ།  བདག་བསྐྱེད་དང་།  མདུན་རྟེན་བསྐྱེད་པའོ།  །དང་པོ་ནི།  མ་ནམ་མཁའ་དང་མཉམ་པའི་སེམས་ཅན་ཐམས་ཅད་བླ་མ་སངས་རྒྱས་རིན་པོ་ཆེ་ལ་སྐྱབས་སུ་མཆིའོ།  །སངས་རྒྱས་ཆོས་དང་དགེ་འདུན་རྣམས་ལ་སྐྱབས་སུ་མཆིའོ།  །བླ་མ་ཡི་དམ་མཁའ་འགྲོའི་ཚོགས་ལ་སྐྱབས་སུ་མཆིའོ།  །རང་སེམས་སྟོང་གསལ་ཆོས་ཀྱི་སྐུ་ལ་སྐྱབས་སུ་མཆིའོ།  །ཞེས་ཅི་ནུས་དང་།  སངས་རྒྱས་ཆོས་ཚོགས་སོགས་ལན་གསུམ་གྱིས་སྐྱབས་སེམས་དང་།  སེམས་ཅན་ཐམས་ཅད་བདེ་བ་དང་སོགས་ཚད་མེད་བཞི་བསྒོམ།  ཨོཾ་སྭ་བྷཱ་ཝ་སོགས།  སྟོང་པའི་ངང་ལས་རང་ཉིད་སྐད་ཅིག་གིས་འཕགས་པ་ཐུགས་རྗེ་ཆེན་པོ་འགྲོ་འདུལ་ཡིད་བཞིན་ནོར་བུ་སྐུ་མདོག་དཀར་གསལ་ཞལ་གཅིག་ཕྱག་བཞི་པ།  ཕྱག་དང་པོ་གཉིས་ཐུགས་ཀར་ཐལ་མོ་སྦྱར་བའི་བར་དུ་ཡིད་བཞིན་ནོར་བུ་དང་གཡས་འོག་མས་ཤེལ་ཕྲེང་དང་།  གཡོན་འོག་མས་མེ་ཏོག་པདྨ་དཀར་པོ་བསྣམས་པ།  རི་དྭགས་ཀྲིཥྞ་སཱ་རའི་པགས་པས་ནུ་མ་གཡོན་པ་བཀབ་ཅིང་དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ།  པདྨ་དང་ཟླ་བའི་གདན་ལ་ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པའི་སྐུར་གྱུར་པར་བསམ་ལ།  ཨོཾ་མ་ཎི་པདྨེ་ཧཱུྃ།  ཞེས་ཅི་ནུས་བཟླས་མཐར།  འཕགས་པ་ཐུགས་རྗེ་ཆེན་པོས་བདག་དང་སེམས་ཅན་ཐམས་ཅད་ལ་འདོད་རྒུའི་འབྱོར་པ་ཟད་མི་ཤེས་པའི་དངོས་གྲུབ་མ་ལུས་པ་སྩལ་དུ་གསོལ།  ཞེས་གསོལ་བ་གདབ།  །གཉིས་པ་མདུན་རྟེན་བསྐྱེད་པ་ལ།  རྟེན་བསྐྱེད་པ།  ཚོགས་བསགས་པ།  གསོལ་བ་གདབ་པ།  ཕྱྭ་གཡང་བསྡུ་བ།  སྔགས་བཟླ་བ།  གཡང་ལེན།  བླ་མའི་རྣལ་འབྱོར་གྱི་བསྒྲུབ་པ་དང་ལས་སྦྱོར།  གཡང་ཆོག་གི་རྗེས་ཀྱི་རིམ་པའོ།  །དང་པོ་ནི་མདུན་གྱི་རྟེན་ལ་དམིགས་ཏེ།  ཨོཾ་སྭ་བྷཱ་ཝ་སོགས་ནས།  སྟོང་པའི་ངང་ལས་རང་གནས་པའི་ས་ཕྱོགས་འདི་ཉིད་བཻཌཱུཪྻའི་ས་གཞི་ཡངས་ཤིང་རྒྱ་ཆེ་བའི་སྟེང་དུ་རིན་པོ་ཆེ་སྣ་ཚོགས་ཀྱི་ཁྲི་ལྷུན་སྟུག་པ།  བཀོད་པ་ལེགས་པ།  འོད་ཆགས་པ།  རྒྱ་ཆེ་ཞིང་དཔང་མཐོ་བ།  དེའི་སྟེང་དུ་སྣ་ཚོགས་པདྨའི་སྡོང་བུ་འདབ་མ་བརྒྱད་པ།  དེའི་སྟེང་དུ་ཉི་མའི་དཀྱིལ་འཁོར།  དེའི་སྟེང་དུ་ཟླ་བའི་དཀྱིལ་འཁོར་དང་བཅས་པ་གདན་ལྔ་བརྩེགས་ཀྱི་སྟེང་དུ་ཕྱྭ་གཡང་གི་རྟེན་རྣམས་ངོ་བོ་རྩ་བའི་བླ་མ་དམ་པ་དང་དབྱེར་མེད་པའི་རྣམ་པ་བཅོམ་ལྡན་འདས་ཡོན་ཏན་རིན་ཆེན་འབྱུང་ལྡན་སྐུ་མདོག་གསེར་གཙོ་མ་ལྟ་བུ་ཞལ་གཅིག་ཕྱག་གཉིས་པ།  ཕྱག་གཡོན་མཉམ་གཞག་གི་སྟེང་ན་དགོས་འདོད་ཐམས་ཅད་འབྱུང་བའི་ནོར་བུ་རིན་པོ་ཆེ་དབང་གི་རྒྱལ་པོ་བསྣམས་པ།  །གཡས་པ་མཆོག་སྦྱིན་གྱི་ཕྱག་རྒྱས་གདུལ་བྱ་རྣམས་ལ་ཅི་འདོད་སྟེར་བ།  ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ།  རིན་པོ་ཆེའི་དབུ་རྒྱན་ལ་སོགས་པ་རྒྱན་ཐམས་ཅད་ཀྱིས་བརྒྱན་པ།  དར་སྣ་ཚོགས་ཀྱི་ན་བཟའ་ཅན།  སྤྱི་གཙུག་སེམས་ཅན་ཐམས་ཅད་ཀྱིས་བལྟ་བར་མི་མངོན་པ་ལ་སོགས་པ་མཚན་བཟང་པོ་སུམ་ཅུ་རྩ་གཉིས་དང་།  སེན་མོ་ཟངས་ཀྱི་མདོག་ལྟར་དམར་བ་ལ་སོགས་པ་དཔེ་བྱད་བཟང་པོ་བརྒྱད་ཅུའི་སྤྲས་པ།  འོད་ཟེར་བྱེ་བ་འགྱེད་པ།  དེའི་མདུན་ནས་བརྩམ་སྟེ་པད་ཟླའི་གདན་ལ།  །བྱང་ཆུབ་སེམས་དཔའ་ནམ་མཁའ་མཛོད་སྐུ་མདོག་སེར་པོ་རིན་པོ་ཆེའི་རྒྱན་དང་དར་གྱི་ན་བཟའ་ཅན།  ཕྱག་གཉིས་ནམ་མཁའ་མཛོད་ཀྱི་ཕྱག་རྒྱ་མཛད་པ།  རྒྱལ་པོ་ཆེན་པོ་རྣམ་མང་ཐོས་སྲས་སྐུ་མདོག་གསེར་གཙོ་མའི་མདོག་ཅན།  རྒྱལ་མཚན་དང་ནེའུ་ལེ་འཛིན་ཅིང་རིན་པོ་ཆེའི་པྲོག་ཞུ་དང་།  རྒྱན་སྣ་ཚོགས་པས་བརྒྱན་ཅིང་པད་ཟླ་སེང་གེའི་སྟེང་ན་རོལ་པའི་སྟབས་ཀྱིས་བཞུགས་པ།  འཁོར་གནོད་སྦྱིན་རྟ་བདག་བརྒྱད་ཀྱིས་བསྐོར་བ།  ཨཱཪྻ་ཛམ་བྷ་ལ་དཀར་པོ་འབྲུག་ལ་ཞོན་ཞིང་།  གཡས་ཁ་ཊྭཱྃ་རྩེ་གསུམ་དང་།  གཡོན་བེ་ཅོན་འཛིན་པ།  ཛམྦྷ་ལ་སེར་པོ་གཡས་བི་ཛ་པུ་ར་ཀ་དང་།  གཡོན་ནེའུ་ལེ་འཛིན་ཅིང་ཞབས་གཉིས་དུང་དང་པདྨའི་གཏེར་མནན་བ།  སྨུགས་འཛིན་ནག་པོ་མིའུ་ཐུང་གི་གཟུགས་ཅན་གཅེར་བུ་རྣ་བ་མ་ཕུག་པ་ཕྱག་གཡས་ཐོད་ཁྲག  །གཡོན་ནེའུ་ལེ་འཛིན་པ།  ཞབས་གཡས་བཀྱང་གིས་ནོར་བདག་སེར་པོ་མནན་པ།  སྨུགས་འཛིན་དམར་པོ་ཞལ་གསུམ་ཕྱག་དྲུག་པ།  གཡས་དཀར་གཡོན་སྔོ།  དབུས་དམར་བ།  ཕྱག་དང་པོ་གཉིས་ཀྱིས་ནོར་བུ་དང་ཐོད་པ།  བར་པ་གཉིས་ཀྱིས་ལྕགས་ཀྱུ་དང་ཞགས་པ།  ཐ་མ་གཉིས་ཀྱིས་ནེའུ་ལེ་བཙིར་བ།  ཞབས་གཉིས་གནོད་སྦྱིན་ནོར་བུ་སྐྱུགས་པ་གཉིས་མནན་པ།  ཛམ་ལྷ་ལྗང་གུ་གཡས་མཆོག་སྦྱིན་གྱིས་ཤིང་ཏོག་དང་།  གཡོན་ནེའུ་ལེ་འཛིན་པ།  ལྷ་མོ་ནོར་རྒྱུན་མ་ཞལ་གཅིག་ཕྱག་གཉིས་གཡས་མཆོག་སྦྱིན་དང་།  གཡོན་གཏེར་བུམ་འབྲས་ཀྱི་སྙེ་མ་བཅས་བསྣམས་པ།  དར་སྔོན་པོའི་ཤ་འགགས།  དཀར་པོའི་སྟོད་གཡོགས།  ཁ་དོག་སྣ་ཚོགས་པའི་སྨད་གཡོགས་སོགས་རིན་པོ་ཆེའི་རྒྱན་གྱིས་བརྒྱན་ཅིང་ཞབས་རྡོ་རྗེའི་སྐྱིལ་ཀྲུང་གིས་བཞུགས་པ།  ལྷ་མོ་དཔལ་ཆེན་མོ་སྐུ་མདོག་ལྗང་གུ།  གཡས་ནོར་བུས་མཚན་པའི་པདྨ་དང་།  གཡོན་སྐྱབས་སྦྱིན་མཛད་པ།  གཏེར་གྱི་བུམ་པ་དང་།  པད་ཟླ་སེངྒེའི་གདན་ལ་འཁོར་གྲོགས་མོ་བརྒྱད་ཀྱིས་བསྐོར་ནས་བཞུགས་པ།  མགོན་དཀར་ཡིད་བཞིན་ནོར་བུ་སྐུ་མདོག་གངས་རི་ལྟར་དཀར་བ་ཞལ་གཅིག་ཕྱག་དྲུག་པ།  གཡས་གསུམ་གྱིས་གྲི་གུག་དང་ནོར་བུ་ཌཱ་མ་རུ།  གཡོན་གསུམ་ན་ཐོད་པ་ནོར་བུས་གང་བ་དང་།  རྩེ་གསུམ་ཞགས་པ་རྣམས་འཛིན་ཅིང་ཞབས་གཉིས་མཉམ་པའི་སྟབས་ཀྱིས་བགེགས་རྒྱལ་གྱི་སྟེང་དུ་འགྱིང་བ།  ལྷ་ཆེན་ཚོགས་ཀྱི་བདག་པོ་སྐུ་མདོག་དཀར་པོ་གླང་པོ་ཆེའི་གདོང་པ་ཅན།  ཕྱག་བཞིའི་དང་པོ་གཉིས་ཀྱིས་ལ་ཕུག་དང་།  དགྲ་སྟྭ།  གཉིས་པས་ཐོད་པ་ནོར་བུས་གང་བ་དང་།  རྩེ་གསུམ་འཛིན་པ།  གསུས་ཁྱིམ་ཆེ་ཞིང་མིའུ་ཐུང་གི་གཟུགས་ཅན་ཟླ་ཚེས་ཀྱི་ཅོད་པན་དང་།  རིན་པོ་ཆེའི་རྒྱན་གྱིས་བརྒྱན་ཅིང་།  དར་སྣ་ཚོགས་ཀྱི་ན་བཟའ་གསོལ་བ།  བྱི་བ་སྔོན་པོའི་གདན་ལ་ཕྱེད་སྐྱིལ་གྱིས་བཞུགས་པ།  ལྷ་མོ་དབྱུ་གུ་མཆེད་གསུམ་སྐུ་མདོག་མཐིང་དམར་ལྗང་བ་ཞལ་གཅིག་ཕྱག་གཉིས།  གཡས་ནོར་བུ་རིན་པོ་ཆེ་དང་།  གཡོན་གཏེར་གྱི་བུམ་པ་རིན་ཆེན་འབར་བས་མཚན་པ་པད་ཟླའི་གདན་སུམ་བསྒྲིགས་ཀྱི་སྟེང་དུ་ཞབས་གཡས་བསྐུམ་གཡོན་བརྐྱང་གིས་བཞུགས་པ་ཞི་འཛུམ་མཛེས་པའི་ལྷ་མོའི་གཟུགས་ཅན།  དར་གྱི་སྟོད་གཡོགས་དང་།  ལྷབ་ལྷུབ།  རིན་པོ་ཆེ་དང་རུས་པའི་རྒྱན་གྱིས་སྤྲས་པ།  གནོད་སྦྱིན་ཆེན་པོ་ཨ་པ་ར་ཛཱི་ཏ་སྐུ་མདོག་དཀར་པོ་ལྕགས་ཀྱུ་དང་བུམ་པ་འཛིན་པ།  ཨཱཪྻ་རེ་མནྟ་སྐུ་མདོག་སེར་པོ་ཕྱག་ན་གསེར་གྱི་རལ་གྲི་དང་ནེའུ་ལེ་འཛིན་ཅིང་།  རྟ་མཆོག་སྔོན་པོ་ལ་ཆིབས་པ།  ལྷ་སྨན་བཀྲ་ཤིས་ཚེ་རིང་མ་སྐུ་མདོག་དཀར་མོ།  གཡས་རྡོ་རྗེ་དང་།  མདའ་དར།  གཡོན་ཚེ་བུམ་འཛིན་པ།  དར་དང་རིན་པོ་ཆེའི་རྒྱན་གྱིས་བརྒྱན་ཅིང་།  སེང་གེ་དཀར་མོ་རྒྱན་ལྡན་གྱི་སྟེང་དུ་འགྱིངས་ཤིང་།  འཁོར་སྨན་བཙུན་མཆེད་བཞིས་བསྐོར་བ།  ཀླུ་རྒྱལ་ཆེན་པོ་ནོར་རྒྱས་སྐུ་མདོག་དཀར་པོ་སྟོད་ལྷ་ཡི་རྣམ་པ་སྨད་སྦྲུལ་མཇུག་འཁྱིལ་པ་ཕྱག་གཉིས་ཐུགས་ཀར་ཐལ་མོ་སྦྱར་བའི་བར་དུ་གཏེར་བུམ་ནོར་བུས་གང་བ་འཛིན་ཅིང་།  སྦྲུལ་མགོའི་གདེང་ཀ་བདུན་དང་ལྡན་པ།  གཏེར་སྲུང་རྨ་རྒྱལ་སྤོམ་ར་སྐུ་མདོག་དཀར་པོ་དུང་ཁྲབ་དང་འཁོར་གསུམ་གསོལ་བ།  གཡས་མདུང་དར།  གཡོན་ནོར་བུ་དབང་གི་རྒྱལ་པོ་ཐུགས་ཀར་བསྣམས་པ།  ལྷ་རྟ་དཀར་པོ་ལ་ཞོན་པ།  དེ་དག་གི་མཐའ་སྐོར་དང་བར་མཚམས་རྣམས་སུ།  རྩ་བརྒྱུད་ཀྱི་བླ་མ།  ཡི་དམ་དཔའ་བོ་མཁའ་འགྲོ།  ཆོས་སྐྱོང་ནོར་ལྷ་གཏེར་བདག་གི་ཚོགས་དཔག་ཏུ་མེད་པས་བསྐོར་བ་མངོན་སུམ་བཞིན་དུ་བཞུགས་པར་གྱུར།  དེ་ཐམས་ཅད་ཀྱང་སྐུ་མདོག་སེར་པོ་མདངས་དང་འོད་ཟེར་སེར་པོ་དཔག་ཏུ་མེད་པ་འཕྲོ་བའི་སྒོ་ནས་བདག་དང་སེམས་ཅན་ཐམས་ཅད་ཀྱི་ཚེ་དང་བསོད་ནམས།  དཔལ་དང་འབྱོར་པ།  དབང་ཕྱུག་དང་ཤེས་རབ།  སྙན་གྲགས་དང་ཕྲིན་ལས་ལ་སོགས་པ་ལེགས་པའི་ཡོན་ཏན་ཐམས་ཅད་གོང་ནས་གོང་དུ་འཕེལ་ཞིང་རྒྱས་པའི་ལས་མཛད་པའོ།  །ཅེས་བརྗོད་ཅིང་བསམ་མོ།  །གཉིས་པ་ཚོགས་བསགས་པ་ལ་བསྡུས་པ་དང་།  རྒྱས་པའོ།  །དང་པོ་ནི།  གང་གི་དྲིན་གྱིས་བདེ་ཆེན་ཉིད།  །སྐད་ཅིག་ཉིད་ལ་འཆར་བ་གང་།  །བླ་མ་རིན་ཆེན་ལྟ་བུའི་སྐུ།  །རྡོ་རྗེ་ཅན་ཞབས་པད་ལ་འདུད།  །སངས་རྒྱས་ཀུན་གྱི་རང་བཞིན་སྐུ།  །སློབ་དཔོན་ལ་ནི་བདག་སྐྱབས་མཆི།  །དང་པོ་མེ་ཏོག་ཕོག་པ་ཡི།  །དཀྱིལ་འཁོར་ལྷ་ཚོགས་རྣམས་ལ་འདུད།  །རིན་ཆེན་རྡོ་རྗེ་འབར་བའི་མེ།  །མཉམ་ཉིད་ཡེ་ཤེས་ངོ་བོ་ཉིད།  །མཆོག་སྦྱིན་ཆེན་པོའི་ཕྱག་རྒྱ་ཅན།  །ཕྱག་འཚལ་རིན་ཆེན་འབྱུང་ལྡན་ལ།  །ཨོཾ་གུ་རུ་རཏྣ་སཾ་བྷ་ཝ་མཎྜལ་ལ་ས་པ་རི་ཝཱ་ར་ཨརྒྷཾ་སོགས་ནས།  ཤབྡ་ཨཱཿཧཱུྃ།  ཨོཾ་གུ་རུ་རཏྣ་སཾ་བྷ་ཝ་མ་ཧཱ་མཎྜལ་ལ་ས་པ་རི་ཝཱ་ར་སརྦ་ཨ་མྲྀ་ཏ་བོ་དྷི་ཙིཏྟ་ཨ་ཧོ་མ་ཧཱ་སུ་ཁ་ཨཱཿཧཱུྃ་གིས་མཆོད་ལ།  །དཀོན་མཆོག་གསུམ་ལ་བདག་སྐྱབས་མཆི།  །སོགས་ལན་གསུམ་གྱི་མཐར།  མཎྜལ།  ཨོཾ་བཛྲ་བྷཱུ་མི་སོགས་ནས།  མ་ཚང་བ་མེད་པ་དང་རང་གི་ལུས་ལོངས་སྤྱོད་དུས་གསུམ་དུ་བསགས་པའི་དགེ་བའི་རྩ་བ་ཐམས་ཅད་ཀྱང་ལྟོས་མེད་དུ་འབུལ་བར་བགྱིའོ།  །ཁྱད་པར་དུ་རང་གི་འདོད་པའི་ལོངས་སྤྱོད་ཀྱི་དངོས་པོ་དེ་དང་དེ།  རེ་ལྟོས་མེད་པར་ཡང་དང་ཡང་དུ་དབུལ་བར་བགྱིའོ།  །ཐུགས་རྗེས་འགྲོ་བའི་དོན་དུ་བཞེས་སུ་གསོལ།  བཞེས་ནས་བྱིན་གྱིས་བརླབ་ཏུ་གསོལ།  དེ་ལྟ་བུ་ལན་གསུམ་མམ་ལྔ་ལ་སོགས་གྲངས་མང་དུ་འབུལ་ལོ།  །བསྡུ་ན།  མཎྜལ་གླིང་བཞི་རི་རབ་ཉི་ཟླ་ཟུང་གཅིག་ལྷ་མིའི་དཔལ་འབྱོར་ཕུན་སུམ་ཚོགས་པ་མ་ཚང་བ་མེད་པ་སོགས་ནས་གོང་བཞིན་ནོ།  །ཚོགས་བསགས་རྒྱས་པར་སྤྲོ་ན།  པཎ་ཆེན་ནམ་མཁའ་དཔལ་བཟང་གི་ལམ་འབྲས་བླ་མཆོད་དང་།  ལམ་ཟབ་གང་རུང་ལ་སྦྱར་བ་རི་ཐོ་ཡིག་ལྟར་མཆོད་ཕྲེང་རྗེས་ལ་མཎྜལ་གྲངས་བསོགས་དང་།  ཡན་ལག་ཕྱི་མ་རྣམས་བྱའོ།  །གསུམ་པ་གསོལ་གདབ་ནི།  ཕྱོགས་བཅུ་དུས་གསུམ་གྱི་སོགས་ནས།  བྱིན་གྱིས་བརླབ་ཏུ་གསོལ།  ཞེས་སྙིང་ཐག་པ་ནས་གསོལ་བ་གདབ་བོ།  །ཀུན་མཁྱེན་གྱི་མཛད་པའི་བསྟོད་པ་སོགས་འདོན།  །བཞི་པ་ཕྱྭ་གཡང་བསྡུ་བ་ནི།  སྤོས་རོལ་དང་དབྱངས་ཀྱི་འགྱུར་བ་སྙན་པོས།  ཀྱཻ།  དང་པོ་གཡང་ལེན་གར་སྲིད་ན།  །སྔོན་གྱི་བསྐལ་པའི་དང་པོ་ལ།  །ཁ་བ་ཅན་གྱི་རྒྱལ་ཁམས་སུ།  །སྤྱན་རས་གཟིགས་ཀྱི་སྤྲུལ་པ་ལས།  །སྤྲེའུ་བྱང་ཆུབ་སེམས་དཔའ་བྱུང་།  །ཇོ་མོ་སྒྲོལ་མའི་སྤྲུལ་པ་ལས།  །བྲག་སྲིན་ནག་མོ་བྱ་བ་བྱུང་།  །དེ་གཉིས་ཐབས་ཤེས་འཕྲད་པ་ལས།  །གདོང་དམར་མི་རྣམས་ཐམས་ཅད་བྱུང་།  །མི་རྣམས་ཕོངས་པས་མནར་བ་ལས།  །སྤྲེའུའི་རྒྱལ་པོ་ཡར་གཤེགས་ཏེ།  །པོ་ཏ་ལ་ཡི་རྩེ་མོ་ན།  །སྤྱན་རས་གཟིགས་དབང་བཞུགས་པ་ལ།  །སྤྲེའུའི་རྒྱལ་པོས་འདི་སྐད་ཞུས།  ཀྱེ་མ་ལས་ཀྱི་འབྲས་བུ་སྨིན།  །དབོན་སྲས་མང་པོ་འཕེལ་བ་ན།  །དྲན་པ་གསལ་བ་ལྷ་དང་འདྲ།  །གདུག་རྩུབ་ཆེ་བ་ལྷ་མིན་འདྲ།  །གོས་མེད་གཅེར་བུ་དུད་འགྲོ་འདྲ།  །བཀྲེས་སྐོམ་སྡུག་བསྔལ་ཡི་དྭགས་འདྲ།  །ཤིན་ཏུ་སྡུག་བསྔལ་དམྱལ་བ་འདྲ།  །རིགས་དྲུག་སྡུག་བསྔལ་ངད་པ་ཚ།  །འདི་ལ་ལས་ཐབས་ཅི་ཞིག་བྱ།  །དེ་སྐད་ཞུས་པས་བཀའ་སྩལ་པ།  །སྤྲེའུའི་རྒྱལ་པོ་ལེགས་པར་ཉོན།  །ཁྱོད་ཀྱི་བུ་དང་ཚ་བོ་རྣམས།  །གདོང་དམར་སྲིན་པོ་ཡིན་ཟེར་ཏེ།  །ཁ་བ་ཅན་གྱི་ཞིང་ཁམས་སུ།  །བྱིན་གྱིས་བརླབས་པའི་སྤྲུལ་པ་ཡིན།  །ཟས་ལ་འབྲས་བུ་སྣ་ཚོགས་ཟོ།  །སྐོམ་དུ་འབྱུང་བ་ཆུ་ལ་འཐུང་།  །གོས་སུ་ལྷ་ཡི་ན་བཟའ་གཏོད།  །སྐབས་སུ་གཡང་འགུགས་གཡང་ལེན་བྱ།  །སྤྱན་རས་གཟིགས་ཀྱིས་དེ་སྐད་གསུངས།  །དེ་ནས་སྤྲེའུའི་རྒྱལ་པོ་དེས།  །སྔགས་འཆང་རྒྱལ་པོ་སྤྱན་དྲངས་ནས།  །ལྷ་གཞི་དཀར་པོའི་གདན་སྟེང་དུ།  །དཀོན་མཆོག་མཆོད་པ་རྒྱ་ཆེན་བཤམས།  །རྒོད་སྒྲོ་མདའ་དར་དཀར་པོ་ལ།  །དངུལ་དཀར་མེ་ལོང་བཏགས་པས་གཡབ།  །ཁུ་ཡེ་བརྗོད་ཅིང་འོ་དོད་བོས།  །ཐུགས་རྗེ་ཆེན་པོའི་བྱིན་རླབས་དང་།  །སྔགས་འཆང་བདག་གི་སྨྲེ་སྔགས་དང་།  །དབུ་ནག་བོད་ཀྱི་བསོད་ནམས་ལས།  །འོད་ཟེར་སྣ་ལྔ་སྟེང་དུ་འཕྲོས།  །ཚངས་པ་དུང་ཐོད་དཀར་པོར་ཕོག  །ལྷ་ཡི་ལོངས་སྤྱོད་ལྡན་པ་ལས།  །འོད་རླངས་དཀར་པོ་གཅིག་ཏུ་སྤྲུལ།  །ལྷ་ཡི་ལོངས་སྤྱོད་བོད་དུ་འོང་།  །བོད་ལྷ་ཁམས་འདྲ་བ་དེ་ནས་སྲིད།  །འོད་ཟེར་འོག་ཏུ་འཕྲོས་པ་ལས།  །ཀླུ་རྒྱལ་གཙུག་ན་རིན་ཆེན་ཕོག  །ཀླུ་ཡི་ལོངས་སྤྱོད་འཕན་པོ་ལས།  །ཀླུ་ཡི་ལོངས་སྤྱོད་བོད་དུ་འོང་།  །བོད་ཀླུ་ལས་གྲོལ་བ་དེ་ནས་སྲིད།  །འོད་ཟེར་བར་སྣང་ཁམས་སུ་འཕྲོས།  །གཉན་གྱི་རྒྱལ་པོ་ཆེན་པོར་ཕོག  །གཉན་གྱི་ལོངས་སྤྱོད་བོད་དུ་འོང་།  །བོད་འགྲོལ་ཐབས་གཉན་པ་དེ་ནས་སྲིད།  །འོད་ཟེར་ཤར་ཕྱོགས་གླིང་དུ་འཕྲོས།  །ཡུལ་འཁོར་སྲུང་གི་རྒྱལ་པོ་ལ།  །ལོངས་སྤྱོད་ལྡན་ཞིང་སྐྱེ་བ་བཟང་།  །ཤར་ཕྱོགས་གཡང་རྣམས་བོད་དུ་འོང་།  །བོད་སྐྱེ་བ་བཟང་བ་དེ་ནས་སྲིད།  །འོད་ཟེར་ལྷོ་ཕྱོགས་གླིང་༴  །འཕགས་སྐྱེས་པོ་ཡི་རྒྱལ་པོ༴  །ལོངས་སྤྱོད་ལྡན་ཞིང་དཀོར་ནོར་ཕྱུག  །ལྷོ་ཕྱོགས་གཡང་རྣམས་བོད་དུ༴  །བོད་དཀོར་ནོར་ཕྱུག་པ་དེ༴  །འོད་ཟེར་ནུབ་ཕྱོགས༴  །སྤྱན་མི་བཟང་གི༴  །ལོངས་སྤྱོད་ལྡན་ཞིང་མི་འཕེལ་ཆེ།  །ནུབ་ཕྱོགས་གཡང་རྣམས༴  །བོད་མི་འཕེལ་ཆེ་བ་དེ༴  །འོད་ཟེར་བྱང་གི་ཕྱོགས་སུ་འཕྲོས།  །རྣམ་ཐོས་སྲས་ཀྱི་རྒྱལ༴  །ལོངས་སྤྱོད་ལྡན་ཞིང་སྐུ་ཚེ་རིང་།  །བྱང་ཕྱོགས་གཡང་རྣམས༴  །བོད་སྐུ་ཚེ་རིང་བ་དེ༴  །འོད་ཟེར་ཕྱོགས་བཅུ་ཀུན་ཏུ་འཕྲོས།  །དེ་རྣམས་ལོངས་སྤྱོད༴  །བོད་ནོར་གཡང་འཕེལ་བ་དེ་ནས་སྲིད།  །འོད་ཟེར་རྒྱ་གར་ཡུལ་དུ༴  །རྒྱ་གར་ཆོས་རྣམས༴  །བོད་ཆོས་ལ་དགའ་བ་དེ༴  །འོད་ཟེར་ཏ་ཟིག་ཡུལ་དུ་འཕྲོས།  །ཏ་ཟིག་ནོར་རྣམས་བོད༴  །བོད་དཀོར་ནོར་ཕྱུག་པ༴  །འོད་ཟེར་རྒྱ་ནག་ཡུལ་དུ༴  །རྒྱ་ཡི་ཇ་དར༴  །བོད་ཇ་དར་འཕེལ་བ༴  །འོད་ཟེར་ཧོར་གྱི་ཡུལ༴  །ཧོར་གྱི་རྟ་གཡང་༴  །བོད་རྟ་དྲེལ་འཕེལ་བ༴  །འོད་ཟེར་བོད་ཀྱི་ཡུལ་དུ་འཕྲོས།  །མི་དང་གཡང་གཉིས་ཀྱི་ལི་ལི།  །ཕྱྭ་དང་གཡང་གཉིས་སྒ་ར་ར།  །ལོངས་སྤྱོད་སྣ་ཚོགས་དེ་ལས་ཚོགས།  སྔོན་གྱི་བཟང་འཕྲོ་དཔལ་བཞིན་དུ།  །དར་དཀར་གཡབ་ཅིང་འདིར་འབོད་ན།  །དེ་རིང་ཁུ་ཡེ་ཕྱྭ་གཡང་ལེན།  །ཅེས་སྔོན་བྱུང་གི་གླེང་གཞིས་མཚམས་སྦྱར་ནས་གཡང་འགུགས་དངོས་ནི།  བསང་ཤིང་གི་དུད་པ་དང་དཀར་མངར་རིན་ཆེན་འབྲུ་སྨན་ཇ་ཆང་ཟས་སྣའི་ཕུད་སོགས་ཀྱིས་མཆོད་ཅིང་།  ཨོཾ་ཨཱཿཧཱུྃ།  ཕྱོགས་བཅུའི་འཇིག་རྟེན་ཁམས་བཞུགས་པའི།  །དཀོན་མཆོག་རྣམ་གསུམ་ཐུགས་རྗེའི་གཏེར།  རྩ་བརྒྱུད་བླ་མ་བྱིན་རླབས་ཅན།  །ཡི་དམ་ཞི་ཁྲོ་དངོས་གྲུབ་མཛོད།  །མཁའ་འགྲོ་ཆོས་སྐྱོང་ཕྲིན་ལས་བདག  །ཁྱད་པར་མཚན་ཙམ་འཛིན་པས་ཀྱང་།  །རྒུད་ཅིང་ཕོངས་པ་ཀུན་བསལ་ནས།  །འདོད་རྒུའི་ལོངས་སྤྱོད་སྩོལ་མཛད་པའི།  །བྱང་ཆུབ་སེམས་དཔའ་རིན་ཆེན་མང་།  །རྣམ་མང་ཐོས་སྲས་རྟ་བདག་བརྒྱད།  །སྨུགས་འཛིན་དབང་པོ་ནོར་རྒྱུན་མ།  །ཡབ་ཡུམ་འཁོར་དང་བཅས་པ་དང་།  །གཡང་གི་ལྷ་མོ་དཔལ་ཆེན་མོ།  །འཁོར་གྱི་གྲོགས་མོ་བརྒྱད་དང་བཅས།  །ཨ་པ་ར་ཛཱི་ཏ་ཚོགས་ཀྱི་བདག  །རེ་མནྟ་སོགས་གནོད་སྦྱིན་དང་།  །ནོར་ལྷ་གཏེར་བདག་བྱེ་བའི་ཚོགས།  །གཙང་རིས་དཔལ་མགོན་དམ་ཚིག་ཅན།  །ལྷན་ཅིག་སྐྱེས་དང་འགོ་བའི་ལྷ།  །མདོར་ན་དཀར་ཕྱོགས་སྐྱོང་བའི་སྡེ།  །སྤྲུལ་དང་ཡང་སྤྲུལ་བཅས་པ་ལ།  །ཕྱག་འཚལ་བསྟོད་ཅིང་གསོལ་བ་འདེབས།  དངོས་འབྱོར་ཡིད་སྤྲུལ་མཆོད་པ་འབུལ།  །སྨན་ཤིང་སྤོས་ཀྱི་དུད་པས་མཆོད།  །ཟས་མཆོག་ཕྱེ་མར་འབྲུ་སྣས་མཆོད།  རིན་ཆེན་དར་ཟབ་རྒྱན་གྱིས་མཆོད།  །དཀར་གསུམ་གཙང་མའི་ཕུད་ཀྱིས་མཆོད།  །མངར་གསུམ་དང་མའི་བཅུད་ཀྱིས་མཆོད།  །ཇ་ཆང་འདོད་ཡོན་སྐྱེམས་ཀྱིས་མཆོད།  །བདག་ཅག་སྙིགས་མ་ལྔ་ཡི་འགྲོ།  །དབུལ་ཞིང་ཕོངས་པས་ཉམས་ཐག་ཚེ།  །མོས་གུས་གདུང་བས་གསོལ་འདེབས་ན།  །སྔོན་གྱི་དམ་བཅའ་མ་གཡེལ་བར།  །ཐུགས་རྗེ་ཐུགས་དམ་ཤུགས་བསྐྱེད་ལ།  །ཕྱྭ་གཡང་འགུགས་པའི་ཕྲིན་ལས་མཛོད།  །མདའ་དར་གཡབ་ཅིང་།  ཀྱེ།  སྟེང་ཕྱོགས་ལྷ་ཁམས་རྣམས་ཀྱི་གཡང་།  དེ་རིང་ཁུ་ཡེ་ཕྱྭ་གཡང་ཁུག  །བར་སྣང་གཉན་གྱི་རྒྱལ་པོའི་གཡང་།  །དེ་རི་ཁུ་ཡེ༴  །ས་འོག་ཀླུ་ཡི་རྒྱལ་པོའི་གཡང་།  །དེ་རིང་ཁུ་ཡེ༴  །ཤར་ཕྱོགས་ཡུལ་འཁོར་སྲུང་གི་གཡང་།  །དེ་རིང་ཁུ་ཡེ༴  །ལྷོ་ཕྱོགས་འཕགས་སྐྱེས་པོ་ཡི་གཡང་།  དེ་རིང་ཁུ་ཡེ༴  །ནུབ་ཕྱོགས་སྤྱན་མི་བཟང་གི་གཡང་།  །དེ་རིང་ཁུ་ཡེ༴  །བྱང་ཕྱོགས་རྣམ་ཐོས་སྲས་ཀྱི་གཡང་།  །དེ་རིང་ཁུ་ཡེ༴ཕྱོགས་སྐྱོང་ནོར་ལྷ་རྣམས་ཀྱི་གཡང་།  །དེ་རིང་ཁུ་ཡེ༴  །ལྷ་འདྲེ་མཐུ་རྩལ་ཅན་གྱི་གཡང་།  །དེ་རིང་ཁུ་ཡེ༴  །རྒྱ་གར་རྒྱལ་པོའི་ཆོས་གཡང་དེ།  །དེ་རིང་ཁུ་ཡེ༴  །རྒྱ་ནག་རྒྱལ་པོའི་ཇ་དར་གཡང་།  །དེ་རིང་ཁུ་ཡེ༴  །ཏ་ཟིག་རྒྱལ་པོའི་ནོར་གཡང་དེ།  །དེ་རིང་ཁུ་ཡེ༴  །གེ་སར་རྒྱལ་པོའི་དམག་གཡང་དེ།  །དེ་རིང་ཁུ་ཡེ༴  །བལ་པོའི་སྐྱེ་བཞིན་ལེགས་གཡང་དེ།  །དེ་རིང་ཁུ་ཡེ༴  །སོག་པོའི་མདའ་རྩལ་ཆེ་བའི་གཡང་།  །དེ་རི་ཁུ་ཡེ༴  །དགུང་སྔོན་མཐོན་པོའི་ཕ་གཡང་དེ།  །དེ་རིང་ཁུ་ཡེ༴  །དོག་མོ་ས་ཡི་མ་གཡང་དེ།  །དེ་རིང་ཁུ་ཡེ༴  །ཉི་ཟླ་སྐར་གསུམ་བཀྲ་གཡང་དེ།  །དེ་རིང་ཁུ་ཡེ༴  །འཇའ་ཚོན་སྣ་ལྔའི་བཀྲག་གཡང་དེ།  །དེ་རིང་ཁུ་ཡེ༴  །ལྷོ་སྤྲིན་སྨུག་པོའི་ཕྱུར་གཡང་དེ།  །དེ་རིང་ཁུ་ཡེ༴  །རི་རབ་ལྷུན་པོའི་བརྟན་གཡང་དེ།  དེ་རིང་ཁུ་ཡེ༴  །གླིང་ཆེན་བཞི་ཡི་བཀོད་གཡང་དེ།  །དེ་རིང་ཁུ་ཡེ༴  །གླིང་ཕྲན་བརྒྱད་ཀྱི་འཁོར་གཡང་དེ།  དེ་རིང་ཁུ་ཡེ༴  །རི་ཕྲན་རྣམས་ཀྱི་བཙུན་གཡང་དེ།  །དེ་རིང་ཁུ་ཡེ༴  །རྒྱ་མཚོ་ཆེན་པོའི་ཟབ་གཡང་དེ།  །དེ་རིང་ཁུ་ཡེ༴  །དཔག་བསམ་ཤིང་གི་ལོ་གཡང་དེ།  །དེ་རིང་ཁུ་ཡེ༴  །རྩི་ཤིང་ནགས་ཚལ་འཕན་གཡང་དེ།  །དེ་རིང་ཁུ་ཡེ༴  །ཕྱུག་པོ་རྣམས་ཀྱི་ཕྱུག་གཡང་དེ།  །དེ་རིང་ཁུ་ཡེ༴  །འཕན་པོ་རྣམས་ཀྱི་འཕན་གཡང་དེ།  །དེ་རིང་ཁུ་ཡེ༴  །བཙན་པོ་རྣམས་ཀྱི་བཙན་གཡང་དེ།  །དེ་རིང་ཁུ་ཡེ༴  །གཉན་པོ་རྣམས་ཀྱི་གཉན་གཡང་དེ།  །དེ་རིང་ཁུ་ཡེ༴  །འཆི་མེད་རྡོ་རྗེའི་ཚེ་གཡང་དེ།  །དེ་རིང་ཁུ་ཡེ་ཕྱྭ་གཡང་ཁུག  །རྒྱལ་བ་རྣམས་ཀྱི་ཐུགས་རྗེའི་གཡང་།  །དེ་རིང་ཁུ་ཡེ་ཕྱྭ་གཡང་ཁུག  །ཁུ་ཡེ་ཕྱྭ་ཁུག་གཡང་ཁུག་ལ།  །གཡང་ལེན་ཕུད་ཀྱིས་ནོར་ལྷ་མཆོད།  །གཡང་ལེན་ཕུད་ཀྱིས་ཕྱུགས་ལྷ་མཆོད།  །གཡང་ལེན་ཕུད་ཀྱིས་ཁྱིམ་ལྷ་མཆོད།  །གཡང་ལེན་ཕུད་ཀྱིས་ཚེ་ལྷ་མཆོད།  །འཆི་མེད་ཚེ་དང་འཛད་མེད་ནོར།  །དཔལ་འབྱོར་ལོངས་སྤྱོད་ཕྱྭ་གཡང་ཀུན།  །རི་ལྟར་སྤུངས་ཤིང་མཚོ་ལྟར་བསྐྱིལ།  །བདེ་སྐྱིད་བཀྲ་ཤིས་དངོས་གྲུབ་སྩོལ།  །རང་གི་ཐུགས་ཀ་ནས་འོད་ཟེར་འཕྲོས།  །མདུན་བསྐྱེད་ཀྱི་ཐུགས་རྒྱུད་བསྐུལ།  །དེ་རྣམས་ཀྱི་ཐུགས་ཀ་ནས་འོད་ཟེར་ལྕགས་ཀྱུའི་དབྱིབས་ཅན་གྲངས་མེད་པ་འཕྲོས་པས།  སྲིད་ཞིའི་ཚེ་བསོད་དཔལ་འབྱོར་ཕྱྭ་གཡང་ལོངས་སྤྱོད་བརྟན་གཡོའི་དྭངས་བཅུད་ཐམས་ཅད་བཀྲ་ཤིས་རྫས་རྟགས་རྒྱལ་སྲིད་བདུན་དང་འཇའ་ཟེར་ཐིག་ལེའི་རྣམ་པར་སྤྱན་དྲངས།  མདུན་གྱི་རྟེན་རྫས་རྣམས་ལ་ཐིམ་པས་འདོད་རྒུ་ཐམས་ཅད་ཡིད་བཞིན་དུ་སྩོལ་བར་གྱུར།  པར་བསམས་ལ།  །ལྔ་པ་སྔགས་བཟླ་བ་ནི།  གོང་གི་བསྐྱེད་ཆོག་དང་མཐུན་པར་སྔགས་བཟླ་བར་བྱ་སྟེ།  ཨོཾ་ཨཱཿགུ་རུ་རཏྣ་སཾ་བྷ་ཝ་སརྦ་སིདྡྷི་ཧཱུྃ།  བླ་མ་རིན་འབྱུང་གི་སྔགས་དང་།  ཨོཾ་ན་མཿསརྦ་ཏ་ཐཱ་ག་ཏ་བྷྱོཿབི་ཤྭ་མུ་ཁེ་བྷྱཿསརྦ་ཐ་ཁཾ་ཨངྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ།  ཞེས་ནམ་མཁའ་མཛོད་ཀྱི་སྔགས་དང་།  ཨོཾ་བཻ་ཤྲ་ཝ་ཎཱ་ཡེ་སྭཱ་ཧཱ།  ཞེས་རྣམ་སྲས་དང་།  ཨོཾ་པདྨ་ཀྲོ་དྷ་ཨཱརྱ་ཛམ་བྷ་ལ་ཧྲྀ་དཱ་ཡ་ཧཱུྃ་ཕཊ།  ཛམ་དཀར་དང་།  ཨོཾ་ཛམ་བྷ་ལ་ཛ་ལེནྡྲ་ཡ་སྭཱ་ཧཱ།  ཛམ་སེར་ནག་ལྗང་གསུམ་ཐུན་མོང་དང་།  ཨོཾ་ཛམྦྷ་ལ་ཛ་ལེནྡྲ་ཡ་དྷ་ན་མེ་དྷི་ཧྲཱིཿསྭཱ་ཧཱ།  ཛམ་དམར་དང་།  ཨོཾ་བ་སུ་དྷ་རཱི་ཎི་སྭཱ་ཧཱ།  ནོར་རྒྱུན་མ་དང་།  ཨོཾ་ཀ་མ་ལ་བཱ་སི་ནི།  ཀ་མ་ལེ་མ་ཧཱ་ལ་ཀྵྨིར་ཛྱཾ་མེ།  བ་སུ་ནཱ་ནཱ་ཁ་དྷེ་སརྦ་སིདྡྷི་དེ་ཧི་དེ་ཧི་བ་ར་དེ་སྭཱ་ཧཱ།  དཔལ་ཆིན་མ་དང་།  གུ་རུ་མ་ཧཱ་ཀཱ་ལ་ཧ་རི་ནི་ས་སིདྡྷི་ཛཿམགོན་དཀར་དང་།  ཨོཾ་བྷྲཱུྃ་ག་ཎ་པ་ཏི་ཡེ་སྭཱ་ཧཱ།  ཚོགས་བདག་དང་།  ཨོཾ་ཨི་ལི་ཀི་ལི་པི་ལི་ཀི་ཀི་ལི་སྭཱ་ཧཱ།  ཨོཾ་ཨ་ན་ལེ་ཀུཎྜ་ལཱི་གྲྀཧྣ་བིནྜ་པི་ཤཱ་ཙི་ན་ཡེ་སྭཱ་ཧཱ།  ཨོཾ་ན་མཿཤུཀྵ་ཎ་བ་སུ་མུ་ཁྃ་མ་ཧཱ་པི་ཤཱ་ཙི་ན་ཡེ་སྭཱ་ཧཱ།  ཞེས་དབྱུག་གུ་ལྷ་མོ་མཆེད་གསུམ་དང་།  ཨོཾ་ཨ་པ་ར་ཛཱི་ཏ་རཏྣ་སརྦ་སིདྡྷི་བྷྲཱུྃ།  ཞེས་ཨ་པ་ར་ཛཱི་ཏ་དང་།  ཨོཾ་ཨཱཪྻ་ར་མནྟཱ་ཡེ་སྭཱ་ཧཱ།  ཞེས་རེ་མནྟ་དང་།  །བྃ་ཧ་རི་ནི་ས་བཛྲ་པྲ་མོ་ཧ་ཙིཏྟ་ཧྲིཾ་ཧྲིཾ་ཛ་ཛཿཞེས་ཚེ་རིང་མཆེད་ལྔ་དང་།  ཨོཾ་བ་སུ་ཀི་མཾ་སྭཱ་ཧཱ།  ཞེས་ཀླུ་ནོར་རྒྱས་དང་།  ཨོཾ་ཀུ་མ་ར་ཕུ་ཏྲི་སརྦ་སིདྡྷི་སིདྡྷི་ཧཱུྃ་སྭཱ་ཧཱ།  ཞེས་སྤོམ་ར་དང་།  ཏདྱ་ཐཱ།  ཧི་ལི་མ་ཎི་བྷ་དྲ།  ཧི་ལི་ཧི་ལི་མ་ཎི་བྷ་དྲ།  ཀི་ལི་མ་ཎི་བྷ་དྲ།  ཀི་ལི་ཀི་ལི་མ་ཎི་བྷ་དྲ།  ཀུ་རུ་མ་ཎི་བྷ་དྲ།  ཀུ་རུ་ཀུ་རུ་མ་ཎི་བྷ་དྲ།  ཏུ་རུ་མ་ཎི་བྷ་དྲ།  ཏུ་རུ་ཏུ་རུ་མ་ཎི་བྷ་དྲ།  ཙི་ལི་མ་ཎི་བྷ་དྲ།  ཙི་ལི་ཙི་ལི་མ་ཎི་བྷ་དྲ།  སུ་རུ་མ་ཎི་བྷ་དྲ།  སུ་རུ་སུ་རུ་མ་ཎི་བྷ་དྲ།  ཙུ་རུ་མ་ཎི་བྷ་དྲ།  ཙུ་རུ་ཙུ་རུ་མ་ཎི་བྷ་དྲ།  ཨོཾ་ཨེ་ཧྱེ་ཧི་ཏིཥྛ་ཏིཥྛ།  སརྦ་ཨརྠ་མེ་སཱ་དྷ་ཡ།  ཏདྱ་ཐཱ།  སུ་དྷ་ནེ།  སུ་ར་ཎེ།  སུ་མ་ཏི།  སུ་པུ་ཥེ།  ཧི་ལི་མི་ལི་སྭཱ་ཧཱ།  ཞེས་ནོར་ལྷ་སྤྱིའི་སྔགས་རྣམས་ཅི་ནུས་བཟླས།  གྲངས་བསོགས་ན་གཡང་འབོད་གཞུང་ལྟར་དང་།  མཆོད་པ་ཞལ་གསོ།  ཨོཾ་ཨཱཿཧཱུྃ།  ཕྱོགས་བཅུའི་འཇིག་རྟེན་སོགས་ནས།  འདི་ཡན་བསྐྱར་ཞིང་སྔགས་བཟླབ་སྤེལ།  །དྲུག་པ་གཡང་ལེན་ནི།  ཀྱེ།  མཐོ་བ་སྲིད་གསུམ་ཡར་རྩེ་ནས།  རླུང་གི་རྒྱ་གྲམ་ཡན་བར་གྱི།  །ཁམས་ལྔའི་ནུས་བཅུད་ཚེ་དཔལ་གཡང་།  །དེང་འདིར་ཁུ་ཡེ་ཕྱྭ་གཡང་ལེན།  །ཕྱོགས་བཅུ་དག་པའི་ཞིང་ཁམས་དང་།  འཛམ་གླིང་རྔ་ཡབ་གཞན་གསུམ་ནས།  དམ་པ་ཆོས་ཀྱི་ཆབ་སྲིད་དེ།  །དེང་འདིར་ཁུ་ཡེ་ཕྱྭ་གཡང་ལེན།  །ལྷ་གནས་སུམ་ཅུ་རྩ་གསུམ་དང་།  །ལུས་འཕགས་ལུས་དང་འཕགས་པ་ནས།  །མཐོ་རིས་སྙན་གྲགས་རྒྱལ་སྲིད་དེ།  །དེང་འདིར་ཁུ་ཡེ༴  །གནོད་སྦྱིན་གྲོང་ཁྱེར་ཁང་བཟང་དང་།  །བ་ལང་སྤྱོད་གླིང་གཡོ་ལམ་ནས།  །བ་ཕྱུགས་ནོར་མཛོད་རྨ་གཡང་དེ།  །དེང་འདིར་ཁུ་ཡེ༴  །མཐོ་རིས་ནམ་མཁའ་གནས་རྣམས་དང་།  །སྒྲ་མི་སྙན་གཉིས་དེའི་ཟླ་ནས།  །འཆི་མེད་ཚེ་ཡི་སྲོག་གཡང་དེ།  །དེང་འདིར་ཁུ་ཡེ་ཕྱྭ་གཡང་ལེན།  །བསམ་གཏན་བཞི་གནས་མན་ཆད་དང་།  ས་འོག་ལྟོ་འཕྱེའི་གནས་ཡན་གྱི།  །བདེ་སྐྱིད་བཀྲ་ཤིས་ཕུན་ཚོགས་དེ།  །དེང་འདིར་ཁུ་ཡེ་ཕྱྭ་གཡང་ལེན།  །ཀྱེ།  ཕྱོགས་བཅུ་དུས་གསུམ་བྱོན་པ་ཡི།  །དཀོན་མཆོག་རིན་ཆེན་རྣམ་གསུམ་དང་།  །རྩ་བརྒྱུད་བླ་མའི་བྱིན་རླབས་དེ།  །དེང་འདིར་ཁུ་ཡེ་ཕྱ་གཡང་ལེན།  །ཐེག་པ་རིམ་དགུ་རྒྱུད་སྡེ་བཞི།  །ཡི་དམ་དཀྱིལ་འཁོར་ལྷ་ཚོགས་ཀྱི།  །མཆོག་དང་ཐུན་མོང་དངོས་གྲུབ་དེ།  །དེང་འདིར་ཁུ་ཡེ་ཕྱ་གཡང་ལེན།  །གནས་གསུམ་དཔའ་བོ་མཁའ་འགྲོ་དང་།  ཆོས་སྲུང་དམ་ཅན་རྒྱ་མཚོའི་སྡེར།  །གང་བཅོལ་གཡེལ་མེད་ཕྲིན་ལས་དེ།  །དེང་འདིར་ཁུ་ཡེ་ཕྱ་གཡང་ལེན།  །གནོད་སྦྱིན་དབུལ་སེལ་ནོར་སྐྱོང་དང་།  །མི་ཟད་འདོད་དགུ་དབང་རྣམས་ཀྱི།  །དགོས་འབྱུང་ལོངས་སྤྱོད་གཏེར་མཛོད་དེ།  །དེང་འདིར་ཁུ་ཡེ༴  །རིགས་རུས་སྣག་འབྲང་དང་སྐྱེས་ལྷ།  །འགོ་བའི་དགྲ་ལྷ་དཔུང་གཉེན་དུ།  །མི་འབྲལ་ཟུང་དུ་འགྲོགས་པའི་གཡང་།  །དེང་འདིར་ཁུ་ཡེ༴  །དམ་ལྡན་དཀར་པོའི་ཕྱོགས་སྐྱོང་བའི།  །ཡུལ་ལྷ་གཞི་བདག་གནས་སྲུང་རྣམས།  །རྐྱེན་བསལ་མཐུན་འགྲུབ་མི་འབྲལ་གཡང་།  །དེང་འདིར་ཁུ་ཡེ༴  །སྣང་སྲིད་སྣོད་བཅུད་དཀྱིལ་འཁོར་ལྷ།  གདོད་ནས་དག་པ་ལྷུན་གྲུབ་གཤིས།  །གནས་ལུགས་ཕྱག་རྒྱ་ཆེན་པོའི་གཡང་།  །དེང་འདིར་ཁུ་ཡེ་ཕྱྭ་གཡང་ལེན།  ཀྱེ།  ཚེ་སྣང་མཐའ་ཡས་རྣམ་པར་རྒྱལ།  །འཕགས་མ་པད་འབྱུང་གྲུབ་རྒྱལ་སོགས།  །འཆི་མེད་བརྙེས་རྣམས་ཚེ་དངོས་དེ།  །དེང་འདིར་ཁུ་ཡེ་ཕྱྭ་གཡང་ལེན།  །བདེ་གཤེགས་མཆེད་བདུན་སྤྲུལ་པ་ལྔ།  །ནང་པ་ལྷ་མི་དྲང་སྲོང་ཕྱིའི།  །ན་གསོ་འཆི་བསླུ་སྨན་ནུས་དེ།  །དེང་འདིར་ཁུ་ཡེ་ཕྱཱ་གཡང་ལེན།  །འཇམ་མགོན་ངག་དབང་དབྱངས་ཅན་སོགས།  །ཕྱོགས་དུས་རྒྱལ་བ་སྲས་བཅས་ཀྱི།  །མཁྱེན་རབ་བློ་གྲོས་སྤོབས་པ་དེ།  །དེང་འདིར་ཁུ་ཡེ་ཕྱྭ་གཡང་ལེན།  །སྙིང་རྗེའི་སྤྱན་རས་གཟིགས་འགྲོ་མགོན༴ས་དང་ལམ་གནས་བྱང་སེམས་རྣམས།  །ཐུགས་བསྐྱེད་གཞན་དོན་ཕྱོགས་མེད་དེ།  །དེང་འདིར་ཁུ་ཡེ་ཕྱྭ་གཡང་ལེན།  །གསང་བདག་རྡོར་འཛིན་རྟ་མགྲིན་སོགས།  །གསང་སྔགས་རིགས་གཟུངས་གྲུབ་བརྙེས་པས།  །ལོག་འདྲེན་གཞོམ་པའི་མཐུ་སྟོབས་དེ།  །དེང་འདིར་ཁུ་ཡེ་ཕྱྭ་གཡང་ལེན།  །འདུལ་བ་མདོ་སྡེ་མ་མོ་སྔགས།  །གསར་རྙིང་བསྟན་འཛིན་བརྒྱུད་བཅས་ཀྱི།  །སྤངས་རྟོགས་བརྟུལ་ཞུགས་གྲུབ་འབྲས་དེ།  །དེང་འདིར་ཁུ་ཡེ་ཕྱྭ་གཡང་ལེན།  །རྒྱ་བོད་མཁན་སློབ་པཎ་གྲུབ་ལོས།  །འཆད་ཉན་རྩོམ་བསྒྱུར་སྒོམ་སྒྲུབ་རྒྱུན།  །སངས་རྒྱས་བསྟན་པ་དར་བའི་གཡང་།  །དེང་འདིར་ཁུ་ཡེ་ཕྱྭ་གཡང་ལེན།  །མོ་རྩིས་རྫས་སྔགས་སྒོམ་སྒྲུབ་སོགས།  །ཟག་བཅས་ཟག་མེད་མངོན་མཁྱེན་ལྔས།  །དུས་གསུམ་གསལ་སྟོན་པྲ་གཡང་དེ།  །དེང་འདིར་ཁུ་ཡེ་ཕྱྭ་གཡང་ལེན།  །སོ་འབྲང་སོགས་ལྔ་པདྨ་འབྱུང་།  །ནཱ་གཱ་རྫུ་ནའི་དྲང་སྲོང་སོགས།  །སྲི་འདུལ་སྲིད་སྤེལ་སྲུང་སྐྱོབས་གཡང་།  །དེང་འདིར་ཁུ་ཡེ་ཕྱྭ་གཡང་ལེན།  །ལྷ་ཀླུ་གནོད་སྦྱིན་གཏེར་གྱི་བདག  །བརྒྱད་བརྒྱད་བློན་འཁོར་འབངས་བཅས་ཀྱི།  །འཛད་མེད་དབྱིག་གི་བང་མཛོད་དེ།  །དེང་འདིར་ཁུ་ཡེ༴  །ཛཾ་ལྷ་ནོར་བུ་རྣམ་མང་བུ།  །གནོད་སྦྱིན་སྡེ་དཔོན་འབྲོག་གནས་སོགས།  །རྐང་བཞིའི་ཕྱུགས་གཡང་རྨ་གཡང་དེ།  དེང་འདིར་ཁུ་ཡེ༴  །མཁར་ཁྱིམ་ཐབ་མཛོད་འདོད་འཇོའི་ལྷ།  །མ་ཕྱིའི་གྲོགས་རྒྱལ་མཐིང་གེ་སོགས།  །བཟའ་བཏུང་ཟས་བཅུད་སྲིད་གཡང་དེ།  །དེང་འདིར་ཁུ་ཡེ༴  །མ་དྲོས་ཆུ་བཞི་གངས་ཅན་རི།  །འབིགས་བྱེད་ཡུལ་དྲུག་འཛམ་གླིང་སྤྱིའི།  །སྐམ་གཤེར་ཡུལ་གནས་གཞི་བདག་གཡང་།  །དེང་འདིར་ཁུ་ཡེ༴  །ཁྱད་པར་ཏི་སེ་ཐང་ལྷ་རྨ།  །མ་ཕམ་གཡུ་མཚོ་ཁྲི་ཤོད་སོགས།  །བོད་ཁམས་གནས་བདག་རྨ་གཡང་དེ།  །དེང་འདིར་ཁུ་ཡེ༴  །ཆོས་རྒྱལ་རིགས་ལྡན་མང་བཀུར་སོགས།  །མི་དབང་གསེར་དངུལ་ཟངས་ལྕགས་ཀྱི།  །འཁོར་ལོས་སྒྱུར་རྣམས་ཆབ་སྲིད་བརྟན།  དེང་འདིར་ཁུ་ཡེ༴  །གཤིན་རབས་ཕྱྭ་ལྷ་དགུ་ཁྲི་འབུམ།  །གས་ཀར་སུམ་བརྒྱ་དྲུག་ཅུ་སོགས།  །གཡུང་དྲུང་བོན་གྱི་ཕྱྭ་གཡང་དེ།  །དེང་འདིར་ཁུ་ཡེ༴  །འཕགས་བོད་བདེ་འབྱུང་ཨུ་རྒྱན་སོགས།  །རྒྱལ་བསྟན་སྤེལ་སྐྱོང་ཆོས་ཀྱི་ཁྲིམས།  །བསྟན་འགྲོར་དགེ་བའི་ལེགས་མཛད་དེ།  །དེང་འདིར་ཁུ་ཡེ༴  །ཏ་ཟིག་རྒྱ་བོད་ཧོར་ཁྲིམས་སོགས།  །ནོར་སྤེལ་དགྲ་འདུལ་གཉེན་སྐྱོང་བའི།  །ཆེ་བཙུན་བཙན་ཕྱུག་རྒྱལ་སྲིད་གཡང་།  །དེང་འདིར་ཁུ་ཡེ༴  །མཐའ་ཀླུང་དབུས་ལྗོངས་ཙཱི་ན་སོགས།  །མི་རྒྱུད་ལོ་འབྲས་འཕན་དར་འཕེལ།  །རིན་ཆེན་ཇ་དར་གོས་ཟས་གཡང་།  །དེང་འདིར་ཁུ་ཡེ་ཕྱྭ༴  །ཀྱེ།  སྟོང་ཁམས་གསུམ་ན་ཡུལ་བདེ་ཞིང་།  །རྫོང་བཙན་ཁྲིམས་བརྟན་དུས་ཆར་འབེབས།  །ལོ་ལེགས་ཆོས་དར་ཕྱི་ཡི་གཡང་།  །དེང་འདིར་ཁུ་ཡེ༴  །མི་ཆོས་ཕྱུགས་རྒྱུད་འཕེལ་ནང་གཤིན།  །ཕོ་དཔའ་མོ་འཛང་འོག་རྟ་མགྱོགས།  །གོ་བཙན་མཚོན་རྣོ་ནང་གི་གཡང་།  །དེང་འདིར་ཁུ་ཡེ༴  །མཁས་གྲུབ་རྩོད་རྒྱལ་དོན་གཉིས་གྲུབ།  །ནད་མེད་ཚེ་རིང་རྒྱགས་སྐྱིད་བདེ།  །མཐར་ཐུག་འཚང་རྒྱ་དོན་གྱི་གཡང་།  །དེང་འདིར་ཁུ་ཡེ༴  །ཆོས་དབྱིངས་ཆོས་ཅན་བསླུ་མེད་མཐུས།  །བདེན་པའི་ཚིག་ལ་དབང་རྣམས་ཀྱིས།  །ཅི་བཏབ་སྨོན་ལམ་འགྲུབ་པའི་གཡང་།  །དེང་འདིར་ཁུ་ཡེ་ཕྱྭ་གཡང་ལེན།  །ཚོགས་རྫོགས་རྟེན་འབྲེལ་མངའ་ཐང་ལས།  །རྫས་རྟགས་རྒྱལ་སྲིད་ཉེར་བཅས་ཀྱི།  །འཇིག་རྟེན་དགེ་མཛད་བཀྲ་ཤིས་གཡང་།  །དེང་འདིར་ཁུ་ཡེ་ཕྱྭ་གཡང་ལེན།  །ལོངས་སྤྱོད་བཀྲ་ཤིས་ཕུན་ཚོགས་ཀུན།  །གནས་འདིར་བརྟན་པའི་དངོས་གྲུབ་སྩོལ།  །འདོད་རྒུའི་དཔལ་འབྱོར་རྒྱས་པ་དང་།  བསམ་དོན་ཡིད་བཞིན་འགྲུབ་པར་མཛོད།  །ཅེས་གསོལ་བ་གདབ།  །བདུན་པ་བླ་མ་རིན་འབྱུང་རྣལ་འབྱོར་གྱི་བསྒྲུབ་པ་དང་།  ལས་སྦྱོར་ནི།  སླར་ཡང་བླ་མ་གོང་མས་མཛད་པའི་རིན་འབྱུང་གསོལ་འདེབས་དང་།  ཕྱོགས་དུས་མ་སོགས་ཀྱིས་གསོལ་གདབ་བྱས་ལ།  ལམ་ཟབ་དང་སྦྱར་ཚེ་དབང་བཞི་བླང་བའི་མཐར།  ཐལ་མོ་སྦྱར་ཏེ།  བླ་མ་ཡོན་ཏན་རིན་ཆེན་འབྱུང་ལྡན་འཁོར་དང་བཅས་པས་བདག་དང་སེམས་ཅན་ཐམས་ཅད་ཀྱི་ཚེ་དང་བསོད་ནམས་དཔལ་དང་འབྱོར་པ།  དབང་ཕྱུག་དང་ཤེས་རབ།  སྙན་གྲགས་དང་ཕྲིན་ལས་ལ་སོགས་པ་ལེགས་པའི་ཡོན་ཏན་ཐམས་ཅད་གོང་ནས་གོང་དུ་འཕེལ་ཞིང་རྒྱས་པར་བྱིན་གྱིས་བརླབ་ཏུ་གསོལ།  ཞེས་གསོལ་བ་ལན་གསུམ་ལ་སོགས་པ་བཏབ་པས།  བླ་མའི་ཕྱག་གཡས་པ་མཆོག་སྦྱིན་གྱི་མཐིལ་ནས་དགོས་འདོད་ཐམས་ཅད་ཆར་བཞིན་དུ་བབས།  རང་གི་གནས་ཁང་ལུང་པ་ལ་སོགས་པ་མེར་གྱིས་ཁེངས།  བདག་དང་སེམས་ཅན་ཐམས་ཅད་ཀྱི་བསམ་པ་རྫོགས་པར་གྱུར།  ཅེས་བརྗོད་པ་ནི་སྒྲུབ་པའོ།  །ལས་སྦྱོར་དེ་ཁོ་ན་ཉིད་ལ་བློ་བཞག་པ་ནི།  བླ་མ་རིན་ཆེན་འབྱུང་ལྡན་འཁོར་དང་བཅས་པ་ལས་རང་འདྲ་གཉིས་པ་རེ་ཆད་དེ་རང་གི་སྨིན་མཚམས་ནས་ཐིམ་པས་བླ་མ་རིན་ཆེན་འབྱུང་ལྡན་གྱི་སྐུ་གསུང་ཐུགས་ཡོན་ཏན་ཕྲིན་ལས་དང་།  རང་གི་ལུས་ངག་ཡིད་གསུམ་བྱ་བྱེད་ཕྲིན་ལས་དང་བཅས་པ་རྣམས་དབྱེར་མེད་དུ་གྱུར་པ་ལས་སྔར་གྱི་གདན་ལྔ་བརྩེགས་ཀྱི་སྟེང་དུ་རང་ཉིད་བླ་མ་རིན་ཆེན་འབྱུང་ལྡན་སྐུ་མདོག་གསེར་བཙོ་མ་ལྟ་བུ་ཞལ་གཅིག་ཕྱག་གཉིས་པ།  གཡོན་པས་མཉམ་བཞག་དང་།  གཡས་པས་མཆོག་སྦྱིན་གྱི་ཕྱག་རྒྱས་གདུལ་བྱ་རྣམས་ལ་ཅི་འདོད་སྟེར་བ་ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ།  རིན་པོ་ཆེའི་དབུ་རྒྱན་ལ་སོགས་པ་རྒྱན་ཐམས་ཅད་ཀྱིས་བརྒྱན་པ།  །དར་སྣ་ཚོགས་ཀྱི་ན་བཟའ་ཅན།  སྤྱི་གཙུག་སེམས་ཅན་ཐམས་ཅད་ཀྱིས་བལྟ་བར་མི་མངོན་པ་ལ་སོགས་པ་མཚན་བཟང་པོ་སུམ་ཅུ་རྩ་གཉིས་དང་།  སེན་མོ་ཟངས་ཀྱི་མདོག་ལྟར་དམར་བ་ལ་སོགས་པ་དཔེ་བྱད་བཟང་པོ་བརྒྱད་ཅུས་སྤྲས་པ།  འོད་ཟེར་བྱེ་བ་འགྱེད་པས་ནམ་མཁའ་དང་མཉམ་པའི་སེམས་ཅན་ཐམས་ཅད་ལ་གང་ལ་ཅི་འདོད་ཀྱི་རེ་བ་དང་འདོད་དགུ་ཕུན་སུམ་ཚོགས་པར་ཐམས་ཅད་བསྐང་ནས་བླ་ན་མེད་པ་ཡང་དག་པ་རྫོགས་པའི་སངས་རྒྱས་ཀྱི་ས་ལ་བཀོད་པར་གྱུར།  ཞེས་བསམ་མོ།  །དེ་རྣམས་ཀྱང་རང་གི་སེམས་ཉིད་དག་པ་གཅིག་གི་ཆོ་འཕྲུལ་དུ་ཤེས་པར་བྱས་ལ།  གསལ་བ་ལྷུག་པ།  མི་རྟོག་པ་གསུམ་སོར་སོར་བཟུང་ནས་གསལ་བ་སེམས་ཀྱི་མཚན་ཉིད།  སྟོང་པ་སེམས་ཀྱི་རང་བཞིན།  བཅོས་མིན་སེམས་ཀྱི་ངོ་བོ།  ཞེས་དྲན་པར་བྱས་ལ་སེམས་མ་བཅོས་ལྷུག་པའི་ངང་ལ་ཅི་ནུས་མཉམ་པར་བཞག་གོ།  བརྒྱད་པ་གཡང་ཆོག་གི་རྗེས་རིམ་ནི།  མཆོད་པ་ཁ་གསོས་ལ་བྱིན་གྱིས་བརླབས།  ཨོཾ་གུ་རུ་རཏྣ་སཾ་བྷ་ཝ་མཎྜལ་ལ་ས་པ་རི་ཝཱ་ར་ཨརྒྷཾ་སོགས་ནས།  ཤབྡ་ཨཱཿཧཱུྃ་གི་བར་གྱིས་མཆོད།  རིན་ཆེན་རྡོ་རྗེ་འབར་བའི་མེ།  །མཉམ་ཉིད་ཡེ་ཤེས་ངོ་བོ་ཉིད།  །མཆོག་སྦྱིན་ཆེན་པོའི་ཕྱག་རྒྱ་ཅན།  །ཕྱག་འཚལ་རིན་ཆེན་འབྱུང་ལྡན་ལ།  །བསྟོད་པར་འོས་པ་སོགས་ཀྱིས་བསྟོད།  ཐལ་མོ་སྦྱར་ཏེ།  རྩེ་གཅིག་པའི་སེམས་ཀྱིས།  དཔལ་ལྡན་བླ་མ་དམ་པ་རིན་ཆེན་འབྱུང་ལྡན་གྱིས་བདག་གི་རྒྱུད་བྱིན་གྱིས་བརླབ་ཏུ་གསོལ།  ཚེ་འཁོར་བ་ཐོག་མ་མེད་པ་ནས་བསགས་པའི་དབུལ་འཕོངས་བཀྲེས་སྐོམ་གྱི་སྡུག་བསྔལ་ཐམས་ཅད་ཞི་ཞིང་དག་ནས།  ཚེ་དང་བསོད་ནམས་རྒྱས་པར་མཛད་དུ་གསོལ།  འཁོར་དང་ལོངས་སྤྱོད་རྒྱས་པར་མཛད་དུ་གསོལ།  དཔལ་དང་འབྱོར་པ་རྒྱས་པར་མཛད་དུ་གསོལ།  དབང་ཕྱུག་ཕུན་སུམ་ཚོགས་པ་རྒྱས་པར་མཛད་དུ་གསོལ།  སྙན་གྲགས་ཕྱོགས་བཅུར་རྒྱས་པར་མཛད་དུ་གསོལ།  ལུང་རྟོགས་ཡོན་ཏན་རྒྱས་པར་མཛད་དུ་གསོལ།  རྣམ་དཀར་ཕྲིན་ལས་རྒྱས་པར་མཛད་དུ་གསོལ།  ཞེས་ལན་མང་དུ་བརྗོད་ནས་གསོལ་བ་བཏབ།  ཡིག་བརྒྱ་ལན་གསུམ་དང་།  མ་འབྱོར་པ་དང་སོགས་ཀྱིས་ནོངས་པ་བཤགས།  ཨོཾ་འདིར་ནི་རྟེན་དང་སོགས་དང་།  མདུན་དུ་བཞུགས་པའི་བླ་མ་རིན་ཆེན་འབྱུང་ལྡན་རྩ་གསུམ་ནོར་ལྷ་རབ་འབྱམས་ཀྱི་ཚོགས་འཁོར་དང་བཅས་པ་རྣམས་འོད་དུ་ཞུ་སྟེ་རྟེན་རྣམས་ལ་ཐིམ་པས་གཡང་རྟེན་རྣམས་ངོ་བོ་བླ་མ་ནོར་ལྷ་འཁོར་བཅས་དང་གཉིས་སུ་མེད་པ་ལ་རྣམ་པ་འཁོར་འདས་ཀྱི་ཕྱྭ་གཡང་དྭངས་བཅུད་ཐམས་ཅད་གཅིག་ཏུ་འདུས་པ་དགོས་འདོད་ཐམས་ཅད་འབྱུང་བའི་ཡིད་བཞིན་གྱི་ནོར་བུ་རིན་པོ་ཆེ་ལྟ་བུར་གྱུར།  ཅེས་བརྗོད་དེ་ཡེ་ཤེས་པ་རྣམས་རྟེན་ལ་བསྟིམས།  རྟེན་འབྲེལ་སྙིང་པོ་བརྗོད་ཅིང་མེ་ཏོག་འཐོར་བས་བརྟན་པར་བྱ།  དགེ་བ་འདི་ཡིས་མྱུར་དུ་བདག  །བླ་མ་རིན་འབྱུང་འགྲུབ་གྱུར་ནས།  སོགས།  དགེ་བ་འདི་ཡི་སྐྱེ་བོ་ཀུན།  །བསོད་ནམས་ཡེ་ཤེས་ཚོགས་རྫོགས་ཤིང་།  །བསོད་ནམས་ཡེ་ཤེས་ལས་བྱུང་བའི།  །དམ་པ་སྐུ་གཉིས་ཐོབ་པར་ཤོག  །ཐམས་ཅད་ནམ་མཁའ་མཛོད་བཞིན་དུ།  །ལོངས་སྤྱོད་ཟད་པ་མེད་པར་ཤོག  །རྩོད་པ་མེད་ཅིང་འཚེ་མེད་པ།  །རང་དབང་དུ་ནི་སྤྱོད་པར་ཤོག  །འཇིག་རྟེན་བདེ་ཞིང་ལོ་ལེགས་དང་།  །འབྲུ་རྣམས་འཕེལ་ཞིང་ཕྱུགས་འཕེལ་བ།  །དགེ་ལེགས་ཐམས་ཅད་འབྱུང་བ་ཡི།  །ཡིད་ལ་འདོད་པ་ཀུན་འགྲུབ་ཤོག  །ཞེས་སོགས་ཁྱད་པར་གྱི་བསྔོ་སྨོན་དང་།  ཆེ་བའི་ཆེ་མཆོག་སོགས་མདོ་རྒྱུད་ལས་བྱུང་བ་དང་།  འབད་དང་རྩོལ་བས་མ་གོས་ཀྱང་།  །ཡིད་བཞིན་ནོར་བུ་དཔག་བསམ་བཞིན།  །སེམས་ཅན་རེ་བ་སྐོང་མཛད་པ།  །བསམ་པ་འགྲུབ་པའི་བཀྲ་ཤིས་ཤོག  །གནས་འདིར་ཉིན་མོ་བདེ་ལེགས་སོགས་སྐབས་སུ་བབས་པའི་བཀྲ་ཤིས་ཀྱི་ཚིགས་སུ་བཅད་པ་དང་བཅས་ཏེ་མེ་ཏོག་གི་ཆར་སིལ་མར་བསྙིལ་བར་བྱའོ།  །གྲོལ་ཉིན་སྦྱིན་བདག་ལ་གཡང་གཏད་སོགས་བྱེད་ན་བརྟན་བཞུགས་ཚར་བའི་རྗེས་སྟན་བཟང་པོ་ལ་འབྲུ་དཀར་གྱིས་གཡུང་དྲུང་རིས་བྲིས་པར་ཡོན་བདག་གོས་རྒྱན་བཅས་ཏེ་འཁོད།  སྤྲོ་ན་སྦྱོང་བ་གསུམ་གྱིས།  བཀྲ་ཤིས་པའི་ཆོ་ག་སྒྲུབ་པ་ལ་བར་དུ་གཅོད་པའི་བགེགས་བསྐྲད།  གང་ལྟར་ཡང་།  སྦྱིན་པའི་བདག་པོ་ནོར་སྦྱིན་བྱེ་བའི་སྡེ་དཔོན་ཛམྦྷ་ལའི་སྐུར་གྱུར་ལ་ཕྱྭ་གཡང་ལོངས་སྤྱོད་ཀྱི་རྫས་རྣམས་གཏད་པས་འདོད་རྒུའི་འབྱོར་པའི་དངོས་གྲུབ་ཟད་མི་ཤེས་པ་ལ་ལོངས་སྤྱོད་པའི་དགེ་མཚན་རྒྱས་པར་གྱུར།  པའི་མོས་པས་སྔགས་རྣམས་ཀྱི་མཐར་རྟེན་འབྲེལ་སྙིང་པོ་སྦྲེལ་བ་བཟླ་ཞིང་མེ་ཏོག་འཐོར་བ་དང་བཅས་རྟེན་རྫས་རྣམས་ལག་ཏུ་གཏད།  སྤྲོ་ན་གཡང་འགུགས་ཚར་གཅིག་བསྐྱར་གང་ལྟར་ཡང་སྨོན་ལམ་དང་བཀྲ་ཤིས་གོང་དུ་སྨོས་བ་ལྟར་རྒྱས་བསྡུས་ཅི་རིགས་པར་བརྗོད་ཅིང་མེ་ཏོག་གི་ཆར་དབབ་རོལ་མོའི་སྒྲ་སྙན་བར་སྦྱར་བས་དགེ་ལེགས་སུ་བྱའོ།  །འདི་བྱས་དགེ་ཚོགས་ནོར་བུའི་སྤྲིན་ཆེན་ལས།  །བྱུང་བའི་གྲུ་ཆར་འདོད་དགུའི་འབྱོར་པ་ཡིས།  །བསྟན་འགྲོའི་དབུལ་བ་མ་ལུས་ཀུན་སེལ་ནས།  །དགེ་ལེགས་ཡིད་བཞིན་དཔལ་གྱིས་འབྱོར་པར་ཤོག  །ཅེས་པའང་ལྕགས་ར་བསམ་འགྲུབ་རྩེའི་ལྷ་བྲིས་པ་བློ་གྲོས་ཆོས་འཕེལ་ནས་བཟང་གོས་སྟེགས་ཁེབས་བཅས་བསྐུལ་ངོར།  འཇམ་དབྱངས་ཆོས་ཀྱི་བློ་གྲོས་པས་གྲོ་བཞིན་ཟླ་བའི་ཡར་ཚེས་བརྒྱད་བཟང་པོར་འདོན་བདེར་བསྒྲིགས་པའི།  ཡི་གེ་པ་ཆབ་མདོ་སྐྱོ་མདའ་སྤྲུལ་སྐུ་འཇམ་དབྱངས་ཆོས་ཀྱི་ཉིན་བྱེད་ཀྱིས་སྒོ་གསུམ་གུས་པས་བགྱིས་པ་སྟེ་འདིས་ཀྱང་མཐའ་ཡས་པའི་བསྟན་པ་དང་སེམས་ཅན་ལ་ཕན་བདེ་རྒྱ་ཆེན་པོ་འབྱུང་ཞིང་།  འདོད་རྒུའི་འབྱོར་པ་རྫོགས་ལྡན་དཔལ་གྱིས་ཁྱབ་པའི་རྒྱུར་གྱུར་ཅིག  །།།  }}
</onlyinclude>
{{TsagliCall}}
<headertabs/>
== Footnotes ==
<references/>
==Other Information==
{{Footer}}
[[Category:JKCL-KABUM-Volume-07-JA]]
[[Category:JKCL-KABUM-Volume-07-JA]]
[[Category:Khyentse Lineage Project]]