View source for JKCL-KABUM-07-JA-001

{{Text
|classification=Tibetan Publications
|subclass=Tibetan Texts
|fulltitletib=ཐང་རྒྱལ་གསང་སྤྱོད་མཁའ་འགྲོའི་སྙན་བརྒྱུད་ཀྱི་ཚོགས་ལས་ཌཱ་ཀི་དགྱེས་པའི་རོལ་མོ།
|fulltitle=thang rgyal gsang spyod mkha' 'gro'i snyan brgyud kyi tshogs las DA ki dgyes pa'i rol mo
|citation=[['jam dbyangs mkhyen brtse chos kyi blo gros]]. ''thang rgyal gsang spyod mkha' 'gro'i snyan brgyud kyi tshogs las DA ki dgyes pa'i rol mo''. In ''Rdzong sar mkhyen brtse 'jam dbyangs chos kyi blo gros kyi gsung 'bum'', Vol. 7: 1-73. Bir, H.P.: Khyentse Labrang, 2012.
|collectiontitletib=ཆོས་ཀྱི་བློ་གྲོས་བཀའ་འབུམ་
|collectiontitle=chos kyi blo gros bka' 'bum
|author='jam dbyangs mkhyen brtse chos kyi blo gros
|authortib=འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
|sourcerevealer=thang stong rgyal po
|sourcerevealertib=ཐང་སྟོང་རྒྱལ་པོ་
|associatedpeople=ma gcig lab sgron
|associatedpeopletib=མ་གཅིག་ལབ་སྒྲོན་
|tibgenre=Activity Manual - las byang, Activity Practices - las tshogs
|terma=No
|jkcloutline=Six
|cycle=gsang spyod mkha' 'gro'i snyan brgyud
|cycletib=གསང་སྤྱོད་མཁའ་འགྲོའི་སྙན་བརྒྱུད་
|language=Tibetan
|volumenumber=007
|volnumtib=༧
|volyigtib=ཇ་
|totalvolumes=12
|textnuminvol=001
|pagenumbers=1-73
|totalpages=73
|beginfolioline=1a1
|endfolioline=37a4
|totalfolios=37
|multivolumework=No
|colophontib=།ཅེས་པ་གསང་སྤྱོད་མཁའ་འགྲོའི་སྙན་བརྒྱུད་ཀྱི་ཚོགས་ལས་ཌཱ་ཀི་དགྱེས་པའི་རོལ་མོ་ཅེས་བྱ་བ་འདི་ཟབ་ཆོས་འདི་ལ་མོས་པ་བརྟན་པོ་དང་ལྡན་པ་རང་སློབ་དགེ་སློང་ཚེ་རིང་ཕུན་ཚོགས་ནས་རྟེན་དང་བཅས་བསྐུལ་ངོར་སྐྱབས་རྗེ་ཐམས་ཅད་མཁྱེན་པ་སི་ཏུ་ཨོ་རྒྱན་ཆོས་ཀྱི་རྒྱ་མཚོ་དང་།  གྲུབ་རྗེ་འཇམ་དབྱངས་བསྟན་འཕེལ་རྣམ་གཉིས་ལས་འདི་ཉིད་ཀྱི་ཆོས་སྐོར་ཡོངས་རྫོགས་ཐོབ་པའི་སྐལ་བཟང་ཅན་འཇམ་དབྱངས་ཆོས་ཀྱི་བློ་གྲོས་པས་ཆོག་ཁྲིགས་སུ་སྡེབ་པའི་ཡི་གེ་པ་ནི་བཀྲ་ཤིས་དབང་ཕྱུག་དེས་བགྱིས་པ་འདིས་ཀྱང་བསྟན་འགྲོ་ལ་ཕན་པ་མཐའ་ཡས་པའི་རྒྱུར་གྱུར་ཅིག  །སརྦ་དཱ་མངྒ་ལཾ།།
|colophonwylie=/ces pa gsang spyod mkha' 'gro'i snyan brgyud kyi tshogs las DA ki dgyes pa'i rol mo ces bya ba 'di zab chos 'di la mos pa brtan po dang ldan pa rang slob dge slong tshe ring phun tshogs nas rten dang bcas bskul ngor skyabs rje thams cad mkhyen pa si tu o rgyan chos kyi rgya mtsho dang /__grub rje 'jam dbyangs bstan 'phel rnam gnyis las 'di nyid kyi chos skor yongs rdzogs thob pa'i skal bzang can 'jam dbyangs chos kyi blo gros pas chog khrigs su sdeb pa'i yi ge pa ni bkra shis dbang phyug des bgyis pa 'dis kyang bstan 'gro la phan pa mtha' yas pa'i rgyur gyur cig__/sarba dA mang+ga laM//
|pdflink=File:JKCL-KABUM-07-JA-001.pdf
}}
{{Header}}
<h1 style="font-size: 24px !important;">Tibetan Text</h1>
<onlyinclude>
{{TibP|༄༅།  །ཐང་རྒྱལ་གསང་སྤྱོད་མཁའ་འགྲོའི་སྙན་བརྒྱུད་ཀྱི་ཚོགས་ལས་ཌཱ་ཀི་དགྱེས་པའི་རོལ་མོ་ཅེས་བྱ་བ་བཞུགས་སོ།  །
ན་མོ་གུ་རུ་ཌཱ་ཀི་ནཱི་ཡེ།  བདེ་ཆེན་ལྷན་སྐྱེས་གར་གྱིས་རྣམ་རོལ་ཞིང་།  །སྣ་ཚོགས་བདེ་ཆེན་བདག་ཉིད་གཟུགས་ཅན་མ།  །བླ་མ་བདེ་ཆེན་རྡོ་རྗེ་ཕག་མོ་ཡི།  །ཞབས་མཐིལ་ཉི་འོད་དམར་མོར་གུས་པས་བཏུད།  །ཚོགས་གཉིས་ནོར་བུའི་སྤྲིན་ཆེན་རྒྱས་པ་དང་།  །བདག་གཞན་ལམ་གྱི་འགལ་རྐྱེན་ཞི་བའི་ཕྱིར།  །འཁོར་འདས་མགྲོན་རྣམས་ཚོགས་ཀྱི་དཀྱིལ་འཁོར་དུ།  །མཆོད་པའི་ལས་རིམ་མཁའ་འགྲོ་དགྱེས་རོལ་སྤེལ།  །དེ་ལ་འདིར་རྡོ་རྗེ་ཕག་མོའི་དམ་ཚིག་ཟབ་དབང་གིས་རྒྱུད་སྨིན་པའི་གང་ཟག་རྣམས་ཀྱིས་རང་གཞན་གྱི་བར་ཆད་ཞི་བ་དང་།  ཚོགས་གཉིས་སྤེལ་བར་བྱ་བའི་ཕྱིར་ཚོགས་ཀྱི་ལས་རིམ་ལ་འཇུག་པར་འདོད་པ་ལ་དོན་གསུམ་སྟེ།  ཕྱག་དར་དང་སྐྱང་ནུལ་བྱ་ཞིང་རྟེན་དང་ཡོ་བྱད་བཤམས་ནས་སྔོན་འགྲོའི་ལས་རིམ་ལ་འཇུག་པ་དང་།  དངོས་གཞི་ཆོ་གའི་ལས་རྒྱས་པར་སྤྲོས་པ།  རྗེས་ཀྱི་བྱ་བ་དང་གསུམ་ལས།  དང་པོ་ནི་གང་དུ་བྲིས་སྐུ་བཤམས་པའི་མདུན་སྟེགས་བུ་ཁེབས་ལྡན་གྱི་སྟེང་དུ་མཎྜལ་གཡོན་པའི་སྲིན་ལག་གིས་ཆོས་འབྱུང་ཉིས་སྣོལ་དུ་བྲིས་པའི་སྟེང་འབྲུ་ཡི་ཚོམ་བུ་དབུས་དང་མདུན་ཕྱོགས་བཞི་དང་བཅས་ལ་བཀོད།  དེའི་མདུན་ཕག་མོའི་གཏོར་མ་སྟོད་ཟུར་གསུམ་སྨད་ཟླུམ་པོ་པད་འདབ་འཐེབ་རིལ་གྱིས་བརྒྱན་པ་ལ་སྨུག་རྩི་བྱུགས་པ་ཅན།  ཡུམ་ཆེན་མོར་དཀར་ཟླུམ་པད་འདབ་ཅན།  མཁའ་འགྲོ་སྡེ་ལྔར་དཀར་ཟླུམ་ལྔ་ཚོམ།  ཆོས་བདག་ཕག་ཞལ་ཅན་ལ་ཆོས་འབྱུང་སྣོལ་མའི་སྟེང་དམར་གཏོར་ཟུར་གསུམ་ཕག་མགོས་བརྒྱན་པ།  གཞི་བདག་དཀར་གཏོར་དང་།  ཐུན་གཏོར་དམར་པོར་མཐེབ་སྐྱུས་བརྒྱན་པ་རྣམས་བཤམས།  ཉེར་སྤྱོད་གཡོན་བསྐོར་དང་སྦྲེང་ཚར་ཉེ་ལོགས་སུ་བགེགས་གཏོར་དང་ཚོགས་ཀྱི་ཡོ་བྱད་རྣམས་འདུ་བྱ།  རང་གི་མདུན་དུ་ནང་མཆོད་རྡོར་དྲིལ་ཅང་ཏེའུ་རྐང་གླིང་རྣམས་བཤམས་ནས་བདེ་བའི་སྟན་ལ་འདུག་སྟེ།  དུག་གསུམ་རླུང་འབུད་དམིགས་པ་དང་བཅས་བྱ་ཞིང་རང་ལུགས་ཀྱི་དུང་ཆེན་གླིང་བུ་འབུད་ཅང་ཏེའུ་ག་ཏེ་གསུམ་གྱི་བར་རྒྱུན་དཀྲོལ་མཐར་ཕཊཿབརྗོད།  མཁའ་འགྲོ་གདན་བསྐུལ་གྱི་ཌཱ་མ་རུ་དཀྲོལ་དེ་ནས་ལྕགས་ཟམ་ལུགས་སམ་རང་ལུགས་ཀྱི་ཆོས་སྤྱོད་ཅི་རིགས་དང་ཐང་རྒྱལ་སྐུ་བསྟོད།  འདི་ག་རང་གི་བརྒྱུད་འདེབས་ཡབ་ཕ་བརྒྱུད་དཔའ་བོའི་ལྷ་ཚོགས་སོགས་བརྒྱུད་པའི་གསོལ་འདེབས་དང་།  བགེགས་གཏོར་ལ་ཆུ་ཆང་གིས་བྲན་ལ།  རང་ཉིད་སྐད་ཅིག་གི་རྡོ་རྗེ་ཕག་མོ་ཁྲོས་མ་ནག་མོའི་སྐུར་གྱུར།  ཨོཾ་བཛྲ་བྷ་རཱ་ཧི་ཧཱུྃ་ཧཱུྃ་ཕཊཿསྭཱ་ཧཱ།  ཨོཾ་བཛྲ་ཝརྣ་ནཱི་ཡེ་ཧཱུྃ་ཕཊཿཚར་གསུམ་བརྗོད།  ཨོཾ་ཨ་ཀཱ་རོ་ལན་གསུམ་གྱིས་བསྔོས།  ཧཱུྃ།  ཉོན་ཅིག་ལོག་འདྲེན་འབྱུང་པོའི་ཚོགས།  སྒྲུབ་པའི་གནས་འདིར་མ་འདུག་པར།  རང་རང་སྡོད་པའི་ས་དེར་སོང་།  ཅི་སྟེ་བཀའ་ལས་འདའ་བྱེད་ན།  ང་ནི་རྡོ་རྗེ་ཕག་མོ་ནི།  ཁྲོས་མ་ནག་མོ་ཕོ་ཉ་བཅས།  གདོན་བགེགས་འབྱུང་པོའི་སྙིང་ཁྲག་འཐུང་།  དེ་བས་མྱུར་དུ་ཕྱིར་དེངས་ཤིག  །ཅེས་བརྗོད་ཅིང་སུམ་བྷ་ནི་སོགས་དང་གུལ་ཡུངས་བཅས་པས་བགེགས་བསྐྲད་ཅིང་གཏོར་མ་ཕྱིར་དོར།  གནས་ཡོ་བྱིན་རླབས་ནི།  ནང་མཆོད་ལ་དམིགས་ཏེ།  ཕཊཿ།  ཡྃ་ལས་རླུང་དང་རྃ་ལས་མེ།  །ཀྃ་ལས་མི་མགོའི་སྒྱེད་པུའི་སྟེང་།  །ཨ་ལས་ཐོད་པ་དུམ་གཅིག་པ།  །ཕྱི་དཀར་ནང་དམར་རྒྱ་ཆེ་ཡངས།  །དཔྲལ་བར་རང་ལ་བསྟན་པའི་ནང་།  །ཤ་ལྔ་བདུད་རྩི་ལྔ་ཞུ་བས།  །ཡེ་ཤེས་བདུད་རྩིའི་རྒྱ་མཚོར་གྱུར།  ཨོཾ་ཨཱཿཧཱུྃ་ཧ་ཧོ་ཧྲཱིཿལན་གསུམ་གྱི་བྱིན་གྱིས་རླབས།  སུམ་བྷ་ནིས་བསངས།  ཨོཾ་སྭ་བྷཱ་ཝ་ཤུདྡྷ་སརྦ་དྷརྨཱ་སྭ་བྷཱ་ཝ་ཤུདྡྷོ྅་ཧྃ།  ཨོཾ་བཛྲ་ཤུདྡྷཿསརྦ་དྷརྨཱ་བཛྲ་ཤུདྡྷོ྅་ཧཾ།  ཨོཾ་ཡོ་ག་ཤུདྡྷཿསརྦ་དྷརྨཱ་ཡོ་ག་ཤུདྡྷོ྅་ཧཾ།  ཞེས་པས་སྦྱངས།  སྟོང་པའི་ངང་ལས་ཧཱུྃ་ཡིག་ལས་བྱུང་བའི་སྲུང་འཁོར་གྱི་ནང་དུ་ཚུད་པའི་བྷྲཱྃ་ལས་གནས་ཁང་གཞལ་མེད་ཁང་མཚན་ཉིད་ཐམས་ཅད་ཡོངས་སུ་རྫོགས་པའི་ནང་དུ།  བྷྲཱྃ་ལས་རིན་པོ་ཆེ་དང་ཨ་ལས་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ།  མཆོད་རྫས་བསམ་གྱིས་མི་ཁྱབ་པ་ངོ་བོ་བཟང་ཞིང་དགེ་བ་བཀོད་པ་ཕུན་སུམ་ཚོགས་པ།  དུས་ཇི་སྲིད་མཆོད་ཀྱི་བར་དུ་འབྱུང་བའི་མཆོད་པའི་སྤྲིན་ཕུང་རྣམ་པ་ཐམས་ཅད་པར་གྱུར།  ཕྱག་རྒྱ་དང་བཅས།  ཨོཾ་སརྦ་བིད་པཱུ་ར་པཱུ་ར།  སུ་ར་སུ་ར།  ཨ་ཝརྡྷ་ཡ།  ཨ་ཝརྡྷ་ཡ་ཧོཿབཛྲ་སྥ་ར་ཎ་ཁཾ།  ཨོཾ་ཨཱཿབཛྲ་ཨརྒྷཾ་ཧཱུྃ།  ཨོཾ་ཨཱཿབཛྲ་ཨཉྩ་མ་ནཾ་ཧཱུྃ།  ཨོཾ་ཨཱཿབཛྲ་པུཥྤེ་ཧཱུྃ་ནས་ཤབྡ་ཧཱུྃ་གི་བར།  ཨོཾ་བཛྲ་དྷརྨཱ་ར་ཎི་ཏ།  པྲ་ར་ཎི་ཏ།  སཾ་པྲ་ར་ཎི་ཏ།  སརྦ་བུདྡྷ་ཀྵེ་ཊ་པྲ་ཙ་ལི་ནི།  པྲཛྙཱ་པ་ར་མི་ཏ།  ནཱ་ད་སཾ་བྷ་ཝེ།  བཛྲ་དྷརྨ་ཧྲྀ་དཱ་ཡ།  སནྟོ་ཥ་ནི་ཧཱུྃ་ཧཱུྃ་ཧཱུྃ་ཧོ་ཧོ་ཧོཿཨ་ཁཾ་སྭཱ་ཧཱ།  ལན་གསུམ་བརྗོད་ཅིང་རོལ་མོས་བྱིན་དབབ་པར་བྱའོ།  །དངོས་གཞི་མཆོད་པའི་ལས་རིམ་ལ།  སྡོམ་ནི།  བདག་བསྐྱེད་མདུན་བསྐྱེད་ཕྱག་འཚལ་མཆོད།  །བསྟོད་བཤགས་བཟླས་དང་བསྟོད་གསོལ་འདེབས།  །གཏོར་འབུལ་གསོལ་འདེབས་ལུས་མཆོད་སྦྱིན།  །ཚོགས་མཆོད་ལྟག་གཏོར་གཏོང་པའོ།  །དོན་ཚན་བཅུ་ཡོད་པའི་དང་པོར།  བདག་ཉིད་ལྷར་བསྐྱེད་པ་ནི།  བདག་དང་བདག་གི་ཚེ་འདིའི་ཕ་མ་ལ་སོགས་ཏེ་བདག་ལ་བློ་གཏད་ཅིང་འབྲེལ་ཐོབ་པའི་དམིགས་ཡུལ་གཤིན་གསོན་རྣམས་དང་།  ཁྱད་པར་ལུས་གདོན་གནས་གདོན་གྱིས་ཐོག་དྲངས།  མ་ནམ་མཁའ་དང་མཉམ་པའི་སེམས་ཅན་ཐམས་ཅད་བླ་མ་སངས་རྒྱས་རིན་པོ་ཆེ་ལ་སྐྱབས་སུ་འཆིའོ།  །སངས་རྒྱས་ཆོས་དང་དགེ་འདུན་རྣམས་ལ༴བླ་མ་ཡི་དམ་མཁའ་འགྲོའི་ཚོགས་ལ༴རང་སེམས་སྟོང་གསལ་ཆོས་ཀྱི་སྐུ་ལ་སྐྱབས་སུ་འཆིའོ།  །ཅེས་ཉེར་གཅིག་གམ་བདུན་ལས་མི་ཉུང་བ་བརྗོད།  དེ་རྗེས།  རྩ་བའི་བླ་མ་བཀའ་དྲིན་ཅན་ལ་སྐྱབས་སུ་མཆིའོ།  །བརྒྱུད་པའི་བླ་མ་བྱིན་རླབས་ཅན་ལ༴འདྲེན་པའི་བླ་མ་ཐུགས་རྗེ་ཅན་ལ༴རྩ་བརྒྱུད་འདྲེན་གསུམ་གྱི་བླ་མ་རྣམས་ལ༴སྤངས་རྟོགས་ཕུན་ཚོགས་སངས་རྒྱས་རྣམས་ལ༴ཞི་གྱུར་ཆགས་བྲལ་དམ་ཆོས་རྣམས་ལ༴ཡོན་གནས་དམ་པ་དགེ་འདུན་རྣམས་ལ༴ཡི་དམ་རྡོ་རྗེ་ཕག་མོའི་ཞབས་ལ༴ཡུམ་ཆེན་མ་ཅིག་ལབ་སྒྲོན་ཞབས་ལ༴སངས་རྒྱས་རིགས་ཀྱི་མཁའ་འགྲོ་མ་ལ༴རྡོ་རྗེ་རིགས་ཀྱི་མཁའ་འགྲོ་མ་ལ༴རིན་ཆེན་རིགས་ཀྱི་མཁའ་འགྲོ་མ་ལ༴པདྨ་རིགས་ཀྱི་མཁའ་འགྲོ་མ་ལ༴ལས་ཀྱི་རིགས་ཀྱི་མཁའ་འགྲོ་མ་ལ༴ཆོས་སྐུ་ལོངས་སྐུ་སྤྲུལ་སྐུ་གསུམ་ལ༴གཞི་དང་ལམ་དང་འབྲས་བུ་གསུམ་ལ༴ལྟ་བ་སྒོམ་བ་སྤྱོད་པ་གསུམ་ལ༴རྩ་དང་རླུང་དང་ཐིག་ལེ་གསུམ་ལ༴བདེ་དང་གསལ་དང་མི་རྟོགས་གསུམ་ལ༴སྣང་དང་སྟོང་དང་ཟུང་འཇུག་གསུམ་ལ༴སྐྱབས་གནས་མཐར་ཐུག་བླ་མ་རྗེ་ལ༴སྐྱབས་ཀྱི་ངོ་བོ་གནས་ལུགས་རིག་པ་ལ༴ཆོས་བདག་ཡེ་ཤེས་མཁའ་འགྲོ་མ་ལ༴བདག་གི་འགལ་རྐྱེན་ལམ་དུ་ལོངས་པར་བྱིན་གྱིས་བརླབ་ཏུ་གསོལ།  བདེ་སྡུག་རོ་སྙམས་ནུས་པར༴རྐྱེན་ངན་གྲོགས་སུ་འཆར་བར༴ལྷ་འདྲེའི་འགྲོ་དོན་ནུས་པར༴སྤྱོད་ཡུལ་མཐའ་རུ་འབྱོངས་པར༴ཚེ་འདི་ཉིད་ལ་འོད་གསལ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པར་བྱིན་གྱིས་བརླབ་ཏུ་གསོལ།  ཅེས་ཚར་གཅིག་བརྗོད།  སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ།  དེའི་ཆེད་དུ་བདག་གིས་རྗེ་བཙུན་རྡོ་རྗེ་ཕག་མོའི་སྒོམ་བཟླས་ལ་འཇུག་པར་བགྱིའོ།  །ལན་གསུམ།  རང་སྐད་ཅིག་གི་རྗེ་བཙུན་རྡོ་རྗེ་ཕག་མོར་གསལ་བའི་ཐུགས་ཀའི་བྃ་ཡིག་ཧཱུྃ་དང་བཅས་པ་ལས་འོད་ཟེར་འཕྲོས་མདུན་གྱི་ནམ་མཁར་བླ་མ་དང་མ་ཅིག་རྡོ་རྗེ་ཕག་མོ་གཉིས་སུ་མེད་པའི་དཀྱིལ་འཁོར་གྱི་ལྷ་ཚོགས་ཨོཾ་བཛྲ་ས་མཱ་ཛཿན་མོ་གུ་རུ་བྷྱཿན་མོ་མ་ཧཱ་ཌཱ་ཀི་མཎྜལ་ལེ་བྷྱཿབླ་མ་རྡོ་རྗེ་འཛིན་རྣམས་ལ།  །སྒོ་གསུམ་གུས་པས་ཕྱག་འཚལ་ལོ།  །དངོས་བཤམས་ཡིད་ཀྱིས་སྤྲུལ་པ་ཡི།  །མཆོད་པ་སྣ་ཚོགས་འབུལ་བར་བགྱི།  །བདག་གིས་སྡིག་པ་ཅི་བསགས་པ།  །དེ་ཀུན་ཁྱེད་ཀྱི་སྤྱན་སྔར་བཤགས།  །ཁྱེད་ཀྱི་དགེ་བའི་རྩ་བ་ལ།  །ཤིན་ཏུ་དད་པས་ཡི་རང་ངོ་།  །སེམས་ཅན་ཀུན་ལ་ཕན་སླད་དུ།  །ཆོས་ཀྱི་འཁོར་ལོ་བསྐོར་དུ་གསོལ།  ཇི་སྲིད་འཁོར་བ་གནས་བར་དུ།  །དེ་སྲིད་འགྲོ་བའི་དོན་ལ་བཞུགས།  །ཡོངས་སུ་མྱ་ངན་མི་འདའ་བར།  །སེམས་ཅན་དོན་པར་བཞུགས་སུ་གསོལ།  །བདག་གིས་དགེ་བ་ཅི་བསགས་པ།  །དེ་ཀུན་བྱང་ཆུབ་ཆེན་པོར་བསྔོ།  ལན་གསུམ།  ཧཱུྃ།  རྡོ་རྗེ་བཙུན་མོའི་གསང་བ་མཆོག  །སྟོན་མཛད་རྩ་བའི་བླ་མ་ཉིད།  །སངས་རྒྱས་ལས་གཞན་མི་རྟོགས་པའི།  །མོས་གུས་དམ་ཚིག་རྟག་ཏུ་བཟུང་།  ལན་གསུམ།  དེ་ལྟར་ཟབ་མོའི་ལམ་མཆོག་འདི་ཉིད་སྟོན་པར་མཛད་པའི་དྲིན་ཅན་རྩ་བའི་བླ་མ་ལ་བདག་ཉིད་མོས་གུས་ཆེན་པོའི་དམ་ཚིག་དང་ལྡན་པའི་སྟོབས་ཀྱིས་ཚོགས་ཞིང་གི་ལྷ་ཚོགས་རྣམས་ཐུགས་དགྱེས་ཏེ་སྐུ་ལས་འོད་ཟེར་བྱུང་བ་བདག་གི་ལུས་ལ་ཕོག་པས་སྙིགས་མའི་ཕུང་ཁམས་སྐྱེ་མཆེད་ནད་གདོན་སྡིག་སྒྲིབ་ཐམས་ཅད་དག་ནས་ཤེལ་གཙང་མའི་ངོས་ལ་གཟུགས་བརྙན་ཤར་བ་ལྟར་རང་ཉིད་མདུན་གྱི་ལྷ་དང་དབྱེར་མེད་དུ་གྱུར།  ཡང་རང་ཉིད་འཇའ་ཚོན་ལྟ་བུའི་ལྷའི་གསལ་སྣང་དང་ལྡན་པའི་སྐུ་ལས་ཚད་མེད་པའི་འོད་ཟེར་འཕྲོས།  འོད་དེས་སེམས་ཅན་ཐམས་ཅད་ལ་རེག་པས་སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པ་གྱུར་ཅིག  །ཅེས་སོགས་ལན་གསུམ་བརྗོད།  ཨོཾ་སྭ་བྷཱ་ཝ༴སོགས།  ཨོཾ་བཛྲ་ཤུདྡྷཿསརྦ་དྷརྨཱཿབཛྲ་ཤུདྡྷོ྅་ཧྃཿཨོཾ་ཡོ་ག་ཤུདྡྷཿསརྦ་དྷརྨཿཡོ་ག་ཤུདྡྷོ྅་ཧྃཿཆོས་ཐམས་ཅད་རང་བཞིན་རྡོ་རྗེ་རྣལ་འབྱོར་གྱི་དག་པའི་ངང་ལས།  པྃ་ལས་པདྨ།  ཨ་ལས་ཟླ་བ།  རྃ་ལས་ཉི་མའི་དཀྱིལ་འཁོར་གྱི་སྟེང་དུ་རོ་དམར་སེར་མགོ་བོ་གཡོན་དུ་བསྟན་པའི་གདན་ལ་ཆོས་འབྱུང་དཀར་དམར་ཉིས་བསྣོལ་གྱི་དབུས་སུ་མཁའ་འགྲོ་སྡེ་ལྔའི་ངོ་བོ་བྃ་ཧ་རི་ནི་ས་ལས་ཡེ་ཤེས་ལྔའི་རང་མདངས་འོད་ཟེར་ཁ་དོག་སྣ་ལྔ་འཕྲོས།  མཆོད་འོས་རྒྱ་མཚོའི་ཚོགས་རྣམས་མཆོད་སེམས་ཅན་གྱི་དོན་བྱས་འོད་ཟེར་དེ་རྣམས་སྟེང་འོག་ཕྱོགས་མཚམས་སུ་འཁྲིགས་པས་ཡེ་ཤེས་ཀྱི་རང་སྣང་ལས་གྲུབ་པའི་སྲུང་བའི་འཁོར་ལོ་གཞལ་ཡས་ཁང་དང་བཅས་པའི་དབུས་སུ་ཆོས་འབྱུང་ཡིག་འབྲུ་དང་བཅས་པ་རྣམས་འདྲེས་པ་ལས་རྗེ་བཙུན་རྡོ་རྗེ་ཕག་མོ་ཞལ་གཉིས་མ་སྐུ་མདོག་དམར་མོ་གཅེར་བུ་དབུ་སྐྲ་ཅུང་ཟད་བཅིངས་པ་ལྷོད་པར་གྱུར་པས་སིལ་བུར་གྲོལ་བ།  བྷ་ག་དང་ནུ་འབུར་རབ་ཏུ་རྒྱས་པའི་ལང་ཚོས་སྒེག་པ།  རབ་ཏུ་མཛེས་པའི་རྩ་ཞལ་ཡིད་ཙམ་ཁྲོ་ལ་འཛུམ་པའི་མདངས་ཅན།  སྟེང་གི་ཕག་ཞལ་སྔོན་མོ་རབ་ཏུ་ཁྲོ་ཞིང་མཆེ་བ་གཙིགས་པ།  སྤྱན་དབུས་མའི་སྟེང་གི་ནམ་མཁར་དགའ་བ་འཁྱིལ་བ་དམར་པོ་གཡོན་བསྐོར་དུ་འཁོར་བ་ཞལ་གཉིས་ཀའང་སྤྱན་གསུམ་དང་ལྡན་ཞིང་གཟི་མདངས་ཕུན་སུམ་ཚོགས་པ།  ཕྱག་གཡས་གྲི་གུག་ནམ་མཁར་འཕྱར་ཞིང་གཡོན་ཐོད་པ་ཁྲག་གིས་གང་བ་ཐུགས་ཀར་འཛིན་པ།  གཡོན་གྱི་གྲུ་མོའི་ངོས་ཁ་ཊྭཱྃ་བསྟེན་པ།  ཐོད་སྐམ་ལྔས་ཅོད་པན་ཅན།  བརྒྱ་ཕྱེད་མི་མགོའི་ཕྲེང་བའི་དོ་ཤལ་འཕྱང་བ།  འཁོར་ལོ།  རྣ་ཆ།  མགུལ་རྒྱན།  གདུ་བུ།  སྐ་རགས་ཏེ་ཕྱག་རྒྱ་ལྔས་རྣམ་པར་བརྒྱན་པ།  ཞབས་གཡས་ཀྱི་མཐེ་བོང་གཡོན་པའི་བརླ་ལ་གཏད་ཅིང་།  གཡོན་བརྐྱང་པའི་གར་སྟབས་ཀྱི་དབུགས་བྲལ་གསར་པའི་སྙིང་གར་མནན་ཏེ་ཡེ་ཤེས་ཀྱི་མེ་འབར་བའི་ཀློང་དཀྱིལ་ན་བཞུགས་པ།  སྐུ་དེའི་སྤྱི་བོར་བདེ་ཆེན་རླུང་གི་དཀྱིལ་འཁོར་དཀར་པོ་རྩ་འདབ་སོ་གཉིས་པའི་ལྟེར་ཧ་ལས་རྡོ་རྗེ་མཁའ་འགྲོ་སྐུ་མདོག་མཐིང་ག  །ཕྱག་གཡས་རྡོ་རྗེ་དང་གཡོན་དྲིལ་བུ་འཛིན་པ།  མགྲིན་པར་ལོངས་སྤྱོད་མེའི་འཁོར་ལོ་དམར་པོ་རྩ་འདབ་བཅུ་དྲུག་པའི་ལྟེ་བར་རི་ལས་རིན་ཆེན་མཁའ་འགྲོ་སྐུ་མདོག་སེར་མོ་ཕྱག་གཡས་རིན་ཆེན་དང་གཡོན་དྲིལ་བུ་འཛིན་པ།  སྙིང་གར་ཆོས་ཀྱི་ཕོ་བྲང་ཆུའི་འཁོར་ལོ་སྔོན་པོ་རྩ་འདབ་བརྒྱད་པའི་ལྟེ་བར་ནི་ལས་པདྨ་མཁའ་འགྲོ་སྐུ་མདོག་དམར་མོ་ཕྱག་གཡས་པདྨ་དང་གཡོན་དྲིལ་བུ་འཛིན་པ།  ལྟེ་བར་སྤྲུལ་པའི་འཁོར་ལོ་སེར་པོ་རྩ་འདབ་དྲུག་ཅུ་རྩ་བཞི་པའི་ལྟེ་བར་ས་ལས་ལས་ཀྱི་མཁའ་འགྲོ་སྐུ་མདོག་ལྗང་གུ་ཕྱག་གཡས་རལ་གྲི་དང་གཡོན་དྲིལ་བུ་འཛིན་པ་ཌཱ་ཀི་བཞི་ཀའང་སྐུ་གཅེར་བུར།  སྐྲ་གྲོལ་བ་བྷ་ག་དང་ནུ་འབུར་རབ་ཏུ་འཁྲངས་ཤིང་རྒྱས་པ་བདེ་དྲོད་རབ་ཏུ་འབར་བའི་རོལ་གར་གྱི་འདུག་སྟང་ཅན།  དཔའ་བོའི་རང་བཞིན་གྱི་ཁ་ཊྭཱྃ་མཆན་ཁུང་གཡོན་དུ་བསྒྲེངས་ཏེ་འཕྱང་བ།  སྐུ་དེའི་དཔྲལ་བར་ཨོཾ་དཀར་པོ།  མགྲིན་པར་ཨཱཿདམར་པོ།  ཐུགས་ཀར་ཧཱུྃ་སྔོན་པོ།  ཐུགས་ཀའི་ཧཱུྃ་ལས་འོད་ཟེར་འཕྲོས་བླ་མ་ཡི་དམ་སངས་རྒྱས་བྱང་ཆུབ་སེམས་དཔའ།  དཔའ་བོ་རིགས་བཞི།  རྣལ་འབྱོར་མ།  ཆོས་སྐྱོང་སྲུང་མའི་ཚོགས་དང་བཅས་པ་རྡོ་རྗེ་ཕག་མོའི་གཟུགས་སུ་སྟེང་གི་ནམ་མཁར་དབང་ལྷ་རིགས་ལྔ་དང་བཅས་པ་ཕཻཾ།  ཅེས་འབར་བའི་ཕྱག་རྒྱ་སྨིན་མཚམས་སུ་བསྐོར་ཞིང་།  ཨོཾ་ཨཱཿབཛྲ་པུཥྤེ་པྲ་ཏཱིཙྪ་ཧཱུྃ།  དེ་བཞིན་ཤབྡའི་བར་གྱིས་མཆོད།  ཕག་མོ་ལྷ་ལྔའི་ཡེ་ཤེས་པ་དམ་ཚིག་སེམས་དཔའ་ལ་ཛཿཧཱུྃ་བྃ་ཧོཿནམ་མཁའ་གང་བའི་ལྷ་རྣམས་ཀྱིས་བདག་ལ་མངོན་པར་དབང་བསྐུར་དུ་གསོལ།  ཞེས་གསོལ་བ་བཏབ་པས་དབང་གི་ལྷས་ན་མཿསརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུྃ།  ཞེས་གསུང་ཞིང་བདུད་རྩིའི་གང་བའི་བུམ་པའི་ཆུས་དབང་བསྐུར།  ལུས་ཐམས་ཅད་གང་།  དྲི་མ་ཐམས་ཅད་དག  །དབང་ཐམས་ཅད་ཐོབ།  ཆུའི་ལྷག་མ་ཡར་ལུད་པ་ལས་མི་བསྐྱོད་པས་དབུར་བརྒྱན།  ཨོཾ་ཤྲཱི་བཛྲ་བྷ་རཱ་ཧི་པཱུཥྤེ་པུ་ཛ་མེ་གྷ་སཱ་མུ་དྲ་སྥ་ར་ཎ་ས་མ་ཡ་ཧཱུྃ།  དེ་བཞིན།  ཤབྡའི་བར་གྱིས་མཆོད།  ཨོཾ་ཨཱཿཧཱུྃ།  གཡོན་པའི་མཐེ་སྲིན་གྱིས་ནང་མཆོད་ཕུལ་ལ།  དཔལ་ལྡན་རྡོ་རྗེ་མཁའ་འགྲོ་མ།  །མཁའ་འགྲོ་མ་ཡི་འཁོར་ལོ་བསྒྱུར།  །ཡེ་ཤེས་ལྔ་དང་སྐུ་གསུམ་ཉིད།  །འགྲོ་བ་སྐྱབས་ལ་ཕྱག་འཚལ་ལོ།  །ཇི་སྙེད་རྡོ་རྗེ་མཁའ་འགྲོ་མ།  །ཀུན་ཏུ་རྟོག་པའི་འཆིང་གཅོད་ཅིང་།  །འཇིག་རྟེན་བྱ་བ་ལ་འཇུག་པའི།  །དེ་སྙེད་རྣམས་ལ་ཕྱག་འཚལ་ལོ།  །བདེ་གཤེགས་རིགས་ཀྱི་ཌཱ་ཀི་ནཱི།  །ནམ་མཁའ་ལྟ་བུ་འདུས་མ་བྱས།  །ཁྱེད་ལ་ཕྱག་འཚལ་སྐྱབས་སུ་མཆི།  །བདག་ལ་བྱིན་གྱིས་བརླབ་ཏུ་གསོལ།  །རྡོ་རྗེ་རིགས་ཀྱི་ཌཱ༴  །སྐྱེ་འཆི་མེད་པ་རྡོ་རྗེའི་སྐུ།  །ཁྱེད་ལ༴  །བདག་ལ༴  །རིན་ཆེན་རིགས་ཀྱི༴  །མི་ཟད་པ་ཡི་གཏེར་དང་ལྡན།  །ཁྱེད་ལ༴  །བདག་ལ༴  །པདྨ་རིགས་ཀྱི་ཌཱ་ཀཱི་ནི།  །ཆགས་པ་མེད་པས་སྐྱོན་དང་བྲལ།  །ཁྱེད་ལ་ཕྱག་འཚལ་སྐྱབས་སུ་མཆི།  །བདག་ལ་བྱིན་གྱིས་བརླབ་ཏུ་གསོལ།  །ལས་ཀྱི་རིགས་ཀྱི་ཌཱ་ཀི་ནི།  །ཕྲིན་ལས་རྣམ་བཞི་ལྷུན་གྱིས་གྲུབ།  །ཁྱེད་ལ་ཕྱག་འཚལ་སྐྱབས་སུ་མཆི།  །བདག་ལ་བྱིན་གྱིས་བརླབ་ཏུ་གསོལ།  །ཞེས་པས་བསྟོད།  བཟླས་པ་ནི།  ཆོས་ཉིད་རང་བཞིན་ཡོངས་ཤེས་ཀྱི་ངང་ནས།  ཨོཾ་ཨཱཿཧཱུྃ་བྃ་ཧ་རི་ནི་ས་ར་ཙ་ཧྲཱི་ཡ་བཛྲ་སརྦ་བུདྡྷ་ཌཱ་ཀི་ནཱི་སིདྡྷི་ཧཱུྃ།  སྟོང་ཕྲག་སོགས་དང་།  ཧ་རི་ནི་ས་བཞི་ཆ་ཙམ་བཟླ།  ཨོཾ་ཤྲཱི་བཛྲ་བྷ་རཱ་ཧི་པུཥྤེ་པྲ་ཏཱིཙྪ་པཱུ་ཛ་མེ་གྷ་སཱ་མུ་དྲ་སྥ་ར་ཎ་ས་མ་ཡེ་ཧཱུྃ།  དེ་བཞིན་ཤབྡའི་བར་དང་།  ཨོཾ་ཨཱཿཧཱུྃ་གིས་ནང་མཆོད་ཕུལ།  དཔལ་ལྡན་རྡོ་རྗེ་མཁའ་འགྲོ་མ།  སོགས་ཀྱིས་བསྟོད།  རྗེ་བཙུན་རྡོ་རྗེ་ཕག་མོས་བདག་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ།  གཉིས་པ་མདུན་བསྐྱེད་ཚོགས་ཞིང་སྒྲུབ་པ་ནི་རང་ཉིད་གཙོ་མོའི་ང་རྒྱལ་གྱིས་ནང་མཆོད་གཏོར་ཞིང་།  སུམ་བྷ་ནིས་བསངས།  གོང་གི་དག་པ་གསུམ་གྱི་སྔགས་ཀྱིས་སྦྱངས།  ཆོས་ཐམས་ཅད་རང་བཞིན་རྡོ་རྗེའི་རྣལ་འབྱོར་གྱི་དག་པའི་ངང་ལས་ཡྃ་རྃ་ལྃ་ཁྃ་སྃ་རྣམས་ལས་རླུང་མེ་ཆུ་རི་རབ་ས་དང་བཅས་པའི་སྟེང་དུ་པྃ་ལས་པདྨ་འདབ་མ་བཞི་དང་ལྡན་པའི་ལྟེ་བར་ཨ་ལས་ཟླ་བ་རྃ་ལས་ཉི་མའི་དཀྱིལ་འཁོར་གྱི་སྟེང་དུ་རོ་དམར་སེར་མགོ་བོ་གཡོན་དུ་བསྟན་པའི་གདན་ལ་ཨེ་ཨེ་ལས་ཆོས་ཀྱི་འབྱུང་གནས་གྲུ་གསུམ་ཕྱི་དཀར་ནང་དམར་ཉིས་བསྣོལ་གྱི་དབུས་སུ་མཁའ་འགྲོ་སྡེ་ལྔའི་ངོ་བོ་བྃ་ཧ་རི་ནི་ས་ལས་ཡེ་ཤེས་ལྔའི་རང་མདངས་འོད་ཟེར་ཁ་དོག་སྣ་ལྔ་འཕྲོས་མཆོད་འོས་རྒྱ་མཚོའི་ཚོགས་རྣམས་མཆོད།  སེམས་ཅན་གྱི་དོན་བྱས།  འོད་ཟེར་དེ་རྣམས་སྟེང་འོག་ཕྱོགས་མཚམས་སུ་འཁྲིགས་པས་ཡེ་ཤེས་ཀྱི་རང་སྣང་ལས་གྲུབ་པའི་སྲུང་བའི་འཁོར་ལོ།  ཤར་དུ་གཏུམ་དྲག  །བྱང་དུ་འཇིགས་བྱེད།  ནུབ་ཏུ་ཐོད་ཅན།  ལྷོར་འབར་བ།  བྱང་ཤར་དུ་ཧ་ཧ་རྒོད་པ།  ཤར་ལྷོར་དཔལ་ཆེན།  ལྷོ་ནུབ་ཏུ་མུན་ཅན།  ནུབ་བྱང་དུ་ཅ་ཅོ་སྒྲོགས་པ་སྟེ་དུར་ཁྲོད་ཆེན་པོ་བརྒྱད་ཀྱིས་བསྐོར་བའི་གཞལ་ཡས་ཁང་དང་བཅས་པའི་དབུས་སུ་ཆོས་འབྱུང་ཡིག་འབྲུ་དང་བཅས་པ་རྣམས་འདྲེས་པ་ལས་རྗེ་བཙུན་རྡོ་རྗེ་ཕག་མོ་ཞལ་གཉིས་མ་སྐུ་མདོག་དམར་མོ་གཅེར་བུ་དབུ་སྐྲ་ཅུང་ཟད་བཅིང་པ་ལྷོད་པར་གྱུར་པས་སིལ་བུར་གྲོལ་བ།  བྷ་ག་དང་ནུ་འབུར་རབ་ཏུ་རྒྱས་པའི་ལང་ཚོས་སྒེག་པ་རྩ་ཞལ་ཡིད་ཙམ་ཁྲོ་ལ་འཛུམ་པའི་མདངས་ཅན།  སྟེང་གི་ཕག་ཞལ་སྔོན་མོ་རབ་ཏུ་ཁྲོ་ཞིང་མཆེ་བ་གཙིགས་པ་སྤྱན་དབུས་མའི་སྟེང་གི་ནམ་མཁར་དགའ་བ་འཁྱིལ་པ་དམར་པོ་གཡོན་བསྐོར་དུ་འཁོར་བ།  ཞལ་གཉིས་ཀའང་སྤྱན་གསུམ་དང་ལྡན་ཞིང་གཟི་མདངས་ཕུན་སུམ་ཚོགས་པ།  ཕྱག་གཡས་གྲི་གུག་ནམ་མཁར་འཕྱར་ཞིང་།  གཡོན་ཐོད་པ་ཁྲག་གིས་གང་བ་ཐུགས་ཀར་འཛིན་པ།  གཡོན་གྱི་གྲུ་མོའི་ངོས་ལ་ཁ་ཊྭཱྃ་བསྟེན་པ།  ཐོད་སྐམ་ལྔའི་ཅོད་པན་ཅན།  བརྒྱ་ཕྱེད་མི་མགོའི་ཕྲེང་བའི་དོ་ཤལ་འཕྱང་བ།  འཁོར་ལོ།  རྣ་ཆ།  མགུལ་རྒྱན།  གདུ་བུ།  སྐ་རགས་ཏེ་ཕྱག་རྒྱ་ལྔས་རྣམ་པར་བརྒྱན་པ།  ཞབས་གཡས་ཀྱི་མཐེ་བོང་གཡོན་པའི་བརླ་ལ་གཏད་ཅིང་གཡོན་བརྐྱང་པའི་གར་སྟབས་ཀྱིས་དབུགས་བྲལ་གསར་པའི་སྙིང་གར་མནན་པ་ཡེ་ཤེས་ཀྱི་མེ་རབ་ཏུ་འབར་བའི་ཀློང་དཀྱིལ་ན་བཞུགས་པའོ།  །དེའི་མདུན་དུ་གསང་བ་ཡེ་ཤེས་ཀྱི་མཁའ་འགྲོ་མ་ཁྲོས་མ་ནག་མོ་ཤིན་ཏུ་ཁྲོས་མའི་སྐུ་ཅན་ཞལ་གཅིག་ཕྱག་གཉིས་མ་སྐུ་སྐེམ་ཞིང་གཅེར་བུ་ཕྱག་རྒྱ་ལྔས་བརྒྱན་པ།  ཕག་ཞལ་གྱེན་དུ་བལྟ་ཞིང་མཆེ་བ་གཙིགས་པ།  ལྗགས་རྣམ་པར་འགྲིལ་བ།  དམར་ལ་ཟླུམ་པའི་སྤྱན་གསུམ་རྣམ་པར་གཡོ་བ།  སྨིན་མཚམས་སུ་དགའ་བ་འཁྱིལ་པ་དམར་པོ་གཡོན་བསྐོར་དུ་འཁོར་བ།  ཕྱག་གཡས་གྲི་གུག་སྔོ་ནག་ནམ་མཁའ་ལ་འཕྱར་ཞིང་།  གཡོན་ཐོད་ཁྲག་ཐུགས་ཀར་འཛིན་པ།  གྲུ་མོ་ན་ཁ་ཊྭཱྃ་ག་འཆང་བ།  ཞབས་གཡས་སྐུམ་པའི་རྟིང་པ་བྷ་ག་ལ་གཏད་ཅིང་།  གཡོན་བརྐྱང་པས་ཡབ་བདུད་ཕོ་མོ་བརྫིས་པ་མེ་དཔུང་སྔོ་ནག་འབར་བའི་ཀློང་དཀྱིལ་ན་བཞུགས་པ།  གཙོ་མོའི་སྐུའི་སྤྱི་མགྲིན་སྙིང་ག་ལྟེ་བ་ནས་ཧ་རི་ནི་ས་རིམ་པ་བཞིན་སྤྲོས་པ་ལས་ཤར་གྱི་པད་འདབ་ལ་སངས་རྒྱས་རིགས་ཀྱི་ཕག་མོ་སྐུ་མདོག་དཀར་མོ།  ལྷོ་ཡི་པད་འདབ་ལ་རིན་ཆེན་རིགས་ཀྱི་ཕག་མོ་སྐུ་མདོག་སེར་མོ།  ནུབ་ཀྱི་པད་འདབ་ལ་པདྨ་རིགས་ཀྱི་ཕག་མོ་སྐུ་མདོག་དམར་མོ།  བྱང་གི་པད་འདབ་ལ་ལས་ཀྱི་རིགས་ཀྱི་ཕག་མོ་སྐུ་མདོག་ལྗང་གུ་ཕྱག་མཚན་རྒྱན་དང་བཞུགས་སྟབས་གཙོ་མོ་དང་མཚུངས་པའོ།  །རྡོ་རྗེ་ཕག་མོའི་སྤྱི་བོར་འཆི་མེད་གྲུབ་པའི་དབང་ཕྱུག་ཐང་སྟོང་རྒྱལ་པོ་སྐུ་མདོག་སྨུག་ནག་གཟི་བརྗིད་འབར་བ་དབུ་སྐྲ་དང་སྨ་ར་སྨིན་མ་ཨག་ཚོམ་རྣམས་སེ་ཁྱུག་གེ་བ།  ཕྱག་མཉམ་བཞག་གི་སྟེང་ན་ཚེ་བུམ་བསྣམས་པ།  ཞབས་རྡོ་རྗེ་སྐྱིལ་མོ་ཀྲུང་གི་བཞུགས་ཤིང་དར་དཀར་གྱི་སླེ་བེར་གསོལ་བ།  དེའི་སྤྱི་བོར་བླ་མ་དང་ཐ་མི་དད་པའི་མ་གཅིག་ལབ་ཁྱེར་སྒྲོན་མ་སྐུ་མདོག་དཀར་ལ་འོད་ཟེར་འཕྲོ་བ།  ཞལ་གཅིག་ཕྱག་གཉིས་སྤྱན་གསུམ་མ་དབུ་སྐྲ་སིལ་མས་སྐུ་སྐེད་ནོན་པ།  ཕྱག་གཡས་ཌཱ་མ་རུ་དང་།  གཡོན་དྲིལ་བུ་དཀྲོལ་བ།  སྐུ་གཅེར་བུ་ཕྱག་རྒྱ་ལྔས་བརྒྱན་པ།  ཐབས་ཡབ་ཀྱི་ཁ་ཊྭཱྃ་འཆང་བ་ཞབས་རྡོ་རྗེ་སྐྱིལ་མོ་ཀྲུང་གི་བཞུགས་པ།  དེའི་མདུན་དུ་སངས་རྒྱས་མཁའ་འགྲོ་སྐུ་མདོག་དཀར་མོ།  ཤར་དུ་རྡོ་རྗེ་མཁའ་འགྲོ་སྐུ་མདོག་སྔོན་མོ།  ལྷོར་རིན་ཆེན་མཁའ་འགྲོ་སྐུ་མདོག་སེར་མོ།  ནུབ་ཏུ་པདྨ་མཁའ་འགྲོ་སྐུ་མདོག་དམར་མོ།  བྱང་དུ་ལས་ཀྱི་མཁའ་འགྲོ་སྐུ་མདོག་ལྗང་གུ་ཐམས་ཅད་ཀྱང་ཞལ་གཅིག་ཕྱག་གཉིས་མ།  ཕྱག་གཡས་སེང་ལྡེང་གི་ཌཱ་མ་རུ་དྲག་ཏུ་འཁྲོལ་བ།  གཡོན་དངུལ་དཀར་གྱི་དྲིལ་བུ་སྐུ་ལ་བརྟེན་པ།  མཆན་ཁུང་གཡོན་ན་ཁ་ཊྭཱྃ་བསྣམས་པ།  གཅེར་བུ་རུས་པའི་རྒྱན་ཅན།  ཞབས་གཡས་སྐུམ་པའི་རྟིང་པ་བྷ་ག་ལ་གཏད་པ།  གཡོན་བརྐྱང་པས་རོ་ཡི་སྟེང་ན་གར་སྟབས་ཀྱིས་བཞུགས་པ།  དབུ་སྐྲ་སིལ་བུས་སྐུ་རྒྱབ་ནོན་པ།  སྤྱན་དབུས་མ་བར་སྣང་ལ་ཧྲིག་ཧྲིག་གཟིགས་པ།  སྐུ་བཀྲག་མདངས་གཟི་བརྗིད་ཕུན་སུམ་ཚོགས་པ།  བཏེགས་ན་རི་རྒྱལ་ཐེག་པ།  མནན་ན་ས་གཞི་ནོན་པའོ།  །དེའི་སྤྱི་བོར་ཡུམ་ཆེན་ཤེར་ཕྱིན་སྐུ་མདོག་སེར་མོ་ཞལ་གཅིག་ཕྱག་བཞིའི་དང་པོ་གཉིས་ཆོས་འཆད་དང་མཉམ་བཞག  །འོག་མ་གཉིས་ཀྱི་རྡོ་རྗེ་དང་བཅས་པའི་སྐྱབས་སྦྱིན་གྱི་ཕྱག་རྒྱ་དང་ཤེར་ཕྱིན་གྱི་པུསྟི་འཛིན་པ།  དར་གྱི་ན་བཟའ་དང་།  རིན་པོ་ཆེའི་རྒྱན་གྱིས་བརྒྱན་པ་ཞབས་རྡོ་རྗེ་སྐྱིལ་མོ་ཀྲུང་གི་བཞུགས་པ།  དེ་ཐམས་ཅད་གྱི་སྟེང་གི་ཆ་ལ་བཀའ་བརྒྱུད་ཀྱི་བླ་མ།  འཁོར་ཡུག་ཏུ་ཡི་དམ་སངས་རྒྱས་བྱང་ཆུབ་སེམས་དཔའ།  འོག་གི་ཆ་ལ་དཔའ་བོ་མཁའ་འགྲོ་ཆོས་སྐྱོང་སྲུང་མ་དང་བཅས་པས་བསྐོར་བའོ།  །དེ་ཐམས་ཅད་ཀྱི་དཔྲལ་བར་ཨོཾ་དཀར་པོ།  མགྲིན་པར་ཨཱཿདམར་པོ།  ཐུགས་ཀར་ཧཱུྃ་སྔོན་པོ།  ཐུགས་ཀའི་ཧཱུྃ་ལས་འོད་ཟེར་འཕྲོས་པས་རྡོ་རྗེ་ཕག་མོ་ལྷ་ལྔའི་དཀྱིལ་འཁོར་པའི་ལྷ་ཚོགས་ལ་སངས་རྒྱས་དང་བྱང་ཆུབ་སེམས་དཔའ།  དཔའ་བོ་དཔའ་མོ་ཆོས་སྐྱོང་སྲུང་མའི་ཚོགས་ཀྱིས་བསྐོར་བ།  ཕཻཾ།  ཞེས་འབར་བའི་ཕྱག་རྒྱ་སྨིན་མཚམས་སུ་གཡོན་དུ་བསྐོར་ཞིང་།  རྐང་གླིང་འབུད་ཅིང་ཚིལ་ཆེན་དང་གུ་གུལ་སྦྱར་བའི་སྤོས་བསྲེག  །ཌཱ་མ་རུ་སོགས་རོལ་མོ་སྣ་ཚོགས་དཀྲོལ་ཞིང་དབྱངས་དང་བཅས།  མ་མི་མིན་ཡེ་ཤེས་མཁའ་འགྲོ་མ།  །རྣམ་ཐར་གསུམ་གྱི་སྒོ་འབྱེད་མ།  །བདུད་ཀྱི་དཔུང་རྣམས་འཇོམས་མཛད་མ།  །མ་གང་ན་བཞུགས་ཀྱང་ཐུགས་རྗེས་གཟིགས།  །གནས་འདིར་སྤྱན་འདྲེན་གཤེགས་སུ་གསོལ།  །མ་ཤར་ན་བཞུགས་ཀྱང་མཁའ་འགྲོའི་ཚོགས།  །སྐུ་མདོག་དཀར་མོ་མདངས་དང་ལྡན།  །འཁོར་ཡང་དཀར་མོ་འབུམ་གྱིས་བསྐོར།  །མ་གང་ན་བཞུགས་ཀྱང་༴  །གནས་འདིར༴  །མ་ལྷོ་ན་བཞུགས་ཀྱང་༴  །སྐུ་མདོག་སེར་མོ༴  །འཁོར་ཡང་སེར་མོ༴  །མ་གང་ན༴  །གནས་འདིར༴  །མ་ནུབ་ན་བཞུགས༴  །སྐུ་མདོག་དམར་མོ༴  །འཁོར་ཡང་དམར་མོ༴  །མ་གང་ན༴  །གནས་འདིར༴  །མ་བྱང་ན༴  །སྐུ་མདོག་ལྗང་མོ༴  །འཁོར་ཡང་ལྗང་མོ༴  །མ་གང་ན༴  །གནས་འདིར༴  །མ་དབུས་ན་བཞུགས་ཀྱང་མཁའ་འགྲོའི་ཚོགས།  །སྐུ་མདོག་སྨུག་མོ་མདངས་དང་ལྡན།  །འཁོར་ཡང་སྨུག་མོ་འབུམ་གྱིས་བསྐོར།  །མ་གང་ན་བཞུགས་ཀྱང་ཐུགས་རྗེས་གཟིགས།  །གནས་འདིར་སྤྱན་འདྲེན་གཤེགས་སུ་གསོལ།  །མ་བྱིན་རླབས་ཀྱི་ན་བུན་ཐུ་ལུ་ལུ།  །གདམས་ངག་གི་སྦྲང་ཆར་སི་ལི་ལི།  །མི་རྐང་གི་གླིང་བུ་ཀྱུ་རུ་རུ།  །ཤ་ཆེན་གྱི་ན་བུན་ཆི་ལི་ལི།  །ཚིལ་ཆེན་གྱི་ཞུན་མར་ཡ་ལ་ལ།  །གཡས་ན་དཔའ་བོ་ཤ་ར་ར།  །གཡོན་ན་དཔའ་མོ་ཤིགས་སེ་ཤིག  །ཞབས་གཉིས་བྲོ་བརྡུང་ཆེམས་སེ་ཆེམ།  །རུས་པའི་རྒྱན་ཆ་ཁྲོལ་ལོ་ལོ།  །བདག་མོས་པའི་བུ་ལ་བྱིན་གྱིས་རློབས།  །བདག་མོས་པའི་བུ་ལ་དབང་བཞི་བསྐུར།  །ཅེས་བརྗོད་ཅིང་སྤྱན་དྲངས་པས་སྟེང་གི་ནམ་མཁར་ཡེ་ཤེས་པ་བྱོན་པ་ལ།  ཨོཾ་ཨཱཿབཛྲ་པུཥྤེ་པྲ་ཏཱིཙྪ་ཧཱུྃ་སོགས་ཀྱིས་མཆོད།  ཕག་མོ་ལྷ་ལྔའི་ཡེ་ཤེས་པ་རྟེན་དང་བརྟེན་པ་བཅས་པ་མདུན་གྱི་དཀྱིལ་འཁོར་ལ་ཛཿཧཱུྃ་བྃ་ཧོཿསླར་ཡང་ཐུགས་ཀ་ནས་འོད་ཟེར་འཕྲོས་པས་དབང་གི་ལྷ་ཚོགས་ནམ་མཁའ་གང་བ་སྤྱན་དྲངས།  ཨོཾ་བཛྲ་ས་མཱ་ཛཿནམ་མཁའ་གང་བའི་ལྷ་ཚོགས་རྣམས་ཀྱིས་འདི་ལ་མངོན་པར་དབང་བསྐུར་དུ་གསོལ།  ཞེས་གསོལ་བ་བཏབ་པས་དབང་གི་ལྷས།  ཇི་ལྟར་བལྟམས་པ་ཙམ་གྱི་ཚེ་སོགས་དང་།  ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུྃ།  ཞེས་གསུང་ཞིང་བུམ་པའི་ཆུས་སྤྱི་བོ་ནས་དབང་བསྐུར།  སྐུ་ཐམས་ཅད་གང་།  དྲི་མ་ཐམས་ཅད་དག  །དབང་ཐམས་ཅད་ཐོབ།  ཆུ་ལྷག་མ་ཡར་ལུད་པ་ལས་རྡོ་རྗེ་ཕག་མོ་ལ་མི་བསྐྱོད་པ།  སངས་རྒྱས་ཕག་མོ་ལ་རྣམ་པར་སྣང་མཛད།  རིན་ཆེན་ཕག་མོ་ལ་རིན་ཆེན་འབྱུང་ལྡན།  པདྨ་ཕག་མོ་ལ་འོད་དཔག་མེད།  ལས་ཀྱི་ཕག་མོ་ལ་དོན་ཡོད་གྲུབ་པས་དབུར་བརྒྱན།  གསུམ་པ་ཚོགས་བསགས་པ་ལ་དང་པོ་ཕྱི་ནང་གསང་གསུམ་གྱི་མཎྜལ་འབུལ་བ་ནི།  གསེར་གྱི་ས་གཞི་འཁོར་ཡུག་གླིང་བཞི་ཉི་ཟླས་བརྒྱན།  །ཞིང་ཆེན་གཡང་གཞིར་ཤ་རུས་ཁྲག་ཚིལ་འདོད་ཡོན་སྤུངས།  །མོས་སེམས་གཙང་མས་འཕགས་ནོར་བདུན་གྱི་མཆོད་སྤྲིན་སྤྲུལ།  །བླ་མ་ཡི་དམ་མཁའ་འགྲོའི་ཚོགས་ལ་དབུལ་བར་བགྱི།  །གསུམ་པ་བླ་མ་མ་གཅིག་མཁའ་འགྲོ་སྡེ་ལྔ་ལ་ཕྱག་བྱ་བ་ནི།  ཨོཾ་དང་ཧྲཱིཿའི་གདོངས་དང་ལྡན་པའི་རྐང་གླིང་སྒྲ་རྒྱུན་རིང་བ་གཉིས།  ཧ་ཧ་གཉིས་ལ་འཕར་ལིང་གཉིས།  ཧཱུྃ་ཧཱུྃ་གཉིས་ལ་རིང་བ་གཉིས།  ཕཊ་ལ་ཟུང་བ་གཅིག་འབུད།  གང་དྲིན་མ་བྱེད།  འགྱུར་བ་མེད་པ་རྡོ་རྗེའི་སྐུ་སྤྲུལ་མ།  །དགོས་འདོད་འབྱུང་བ་རིན་ཆེན་སྐུ་སྤྲུལ་མ།  །གདོད་ནས་དག་པ་པདྨའི་སྐུ༴ཕྲིན་ལས་གྲུབ་པ་ལས་ཀྱི༴  །ལྷུན་གྱིས་གྲུབ་པ་བདེ་གཤེགས་སྐུ་སྤྲུལ་མ།  །སྐུ་ལྔ་ལྷུན་གྲུབ་མ་ལ་ཕྱག་འཚལ་ལོ།  །ཞེ་སྡང་རྣམ་དག་ཆོས་དབྱིངས་ཡེ་ཤེས་རྡོ་རྗེ་རིགས་ཀྱི་མཁའ་འགྲོ་མ།  །གཏི་མུག་རྣམ་དག་མེ་ལོང་ཡེ་ཤེས་སངས་རྒྱས་རིགས༴སེར་སྣ་རྣམ་དག་མཉམ་ཉིད་ཡེ་ཤེས་རིན་ཆེན༴འདོད་ཆགས་རྣམ་དག་སོར་རྟོགས་ཡེ་ཤེས་པདྨ༴ཕྲག་དོག་རྣམ་དག་བྱ་གྲུབ་ཡེ་ཤེས་ལས་ཀྱི་རིགས་ཀྱི་མཁའ་འགྲོ་མ།  །སྔོ་དཀར་སེར་དམར་ལྗང་བའི་སྐུ་ཅན་ཡབ་ཀྱི་རང་བཞིན་ཁ་ཊྭཱྃ་འཛིན།  ཌཱ་མ་རུ་དང་དྲིལ་བུའི་སྒྲ་སྒྲོགས་རྡོ་རྗེའི་གླུ་གར་རོལ་རྩེད་མཁན།  །དཔའ་བོ་དཔའ་མོ་མཁའ་འགྲོས་ཡོངས་བསྐོར་རྒྱལ་ཡུམ་མཁའ་འགྲོ་སྡེ་ལྔར་བསྟོད།  །བཞི་པ་ཕྱི་ནང་གི་མཆོད་པ་འབུལ་བ་ནི།  མཆོད་རྫས་རྣམས།  སུམ་བྷ་ནིས་བསངས།  དག་པ་གསུམ་གྱིས་སྔགས་ཀྱིས་སྦྱངས་བ་ནས་ཤབྡའི་བར་གྱིས་གོང་བཞིན་མཆོད་ལ།  དེ་ནས་སྔགས་དབྱངས་ཕྱག་རྒྱ་དང་བཅས་ཏེ།  ཨོཾ།  ཆོས་སྐུ་དཔལ་ལྡན་ཧེ་རུ་ཀ་ཡི་དངོས།  །བདེ་ཆེན་ཡེ་ཤེས་དབྱིངས་ལས་མ་གཡོས་ཀྱང་།  །བསྟན་དང་འགྲོ་བའི་རྣམ་པར་དུ་མར་སྣང་།  །ཡན་ལག་བརྒྱད་ལྡན་མཆོད་ཡོན་དྲི་མེད་འདི།  །གར་མཁན་ཚུལ་དུ་འབུལ་གྱི་རོལ་པ་བྱ།  ཨོཾ་ཤྲཱི་བཛྲ་ཝཱ་རཱ་ཧཱི་ཨརྒྷཾ་པྲ་ཏཱིཙྪ་པཱུ་ཙ་མེ་གྷ་སཱ་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ།  ཨོཾ།  ཆོས་སྐུ༴  །བདེ་ཆེན༴  །བསྟན་དང་༴  །དག་ཅིང་དྲི་མེད་གཙང་ལྡན་ཞབས་བསིལ་འདི།  །གར་མཁན༴ཨོཾ༴པཱདྱཾ༴ཨོཾ།  ཆོས་སྐུ༴  །བདེ་ཆེན༴  །བསྟན་དང་༴  །གཙང་ཞིང་གཙང་མའི་ཡིད་འོང་ཞལ་བསིལ་འདི།  གར་མཁན༴ཨཉྩ་མ་ནཾ༴ཨོཾ།  ཆོས་སྐུ༴  །བདེ་ཆེན༴  །བསྟན་དང་༴  །པདྨ་ཨུཏྤལ་ལ་སོགས་མེ་ཏོག་རིགས།  །ལྟ་ན་སྡུག་ཅིང་དྲི་བསུང་ལྡན་པ་རྣམས།  །གར་མཁན༴པུཥྤེ༴ཨོཾ།  ཆོས་སྐུ༴  །བདེ་ཆེན༴  །བསྟན་དང་༴  །ཨ་གར་སི་ལ་དུ་རུ་ཀ་ལ་སོགས།  །ལྷན་སྐྱེས་དྲི་ལྡན་ཡིད་འོང་སྦྱར་བ་རྣམས།  །གར་མཁན༴དྷཱུ་པེ༴ཨོཾ།  ཆོས་སྐུ༴  །བདེ་ཆེན༴  །བསྟན་དང་༴  །རྩི་ཐོག་སྙིང་པོ་འབྲུ་མར་སྒྲོན་ཤིང་སོགས།  །འོད་མདངས་འོད་ཀྱིས་མུན་སེལ་རྣམ་པ་ཀུན།  །གར་མཁན༴ཨཱ་ལོ་ཀེ༴ཨོཾ།  ཆོས་སྐུ༴  །བདེ་ཆེན༴  །བསྟན་དང་༴གི་ཝཾ་ཙནྡན་གུར་གུམ་ལ་སོགས་པ།  །རེག་པས་བསིལ་བསྐྱེད་བྱུག་པ་ཇི་སྙེད་ཀུན།  །གར་མཁན༴  །གནྡྷེ༴ཨོཾ།  ཆོས་སྐུ༴བདེ་ཆེན༴  །བསྟན་དང་༴  །ལྷ་མིའི་ཞལ་ཟས་ལ་སོགས་བཅུད་ལྡན་རིགས།  །ལེགས་སྦྱར་ཡིད་འོང་མདངས་སྟོབས་སྐྱེད་བྱེད་ཀུན།  །གར་མཁན༴  །ནཻ་ཝིདྱ༴ཨོཾ།  ཆོས་སྐུ༴  །བདེ་ཆེན༴  །བསྟན་དང་༴  །རྔ་སིལ་དུང་དང་པི་ཝཾ་ཅང་ཏེའུ་སོགས།  །དབྱངས་སྙན་རོལ་སྒྲ་རྔམ་བརྗིད་ལྡན་པ་ཀུན།  །གར་མཁན༴ཤབྡའི་བར།  ཨོཾ་བཛྲ་དྷརྨ་ར་ཎི༴སོགས་ཀྱིས་རོལ་མོ་བྱ།  དེ་ནས་རིགས་མ་བཅུ་དྲུག་གིས་མཆོད་པ་ནི།  བདེ་ཆེན་དབྱིངས་ལས་ཡེ་ཤེས་སྒྱུ་མའི་གར།  །བཅུ་དྲུག་ཉམས་ལྡན་བདེ་བའི་གླུ་གར་བསྒྱུར།  །མཐོན་མཐིང་ལྷ་མོ་སྙན་པའི་རྒྱུད་མང་སྒྲེངས།  །བདེ་ཆེན་མཆོད་པས་མཉེས་ཕྱིར་བཞེས་སུ་གསོལ།  ཨོཾ་ཤྲཱི་བཛྲ་ཝཱ་རཱ་ཧཱི་ཝི་ཎི་པཱུ་ཙ་མེ་གྷ་ས་མུ་དྲ་སྥ་ར་ཎ་སཱ་མ་ཡེ་ཨཱཿཧཱུྃ།  བདེ་ཆེན༴  །བཅུ་དྲུག༴  །གསེར་མདོག་ལྷ་མོ་གླིང་བུའི་སྒྲ་དབྱངས་བསྒྱུར།  །བདེ་ཆེན༴ཝཾ་སེ༴བདེ་ཆེན༴  །བཅུ་དྲུག༴  །དམར་མོ་ཕྱག་གཉིས་རྔ་ཟླུམ་བརྡུངས་བྱས་ཏེ།  །བདེ་ཆེན༴མྲྀ་ཏྱཾ༴བདེ་ཆེན༴  །བཅུ་དྲུག༴  །ལྗང་གུ་ཕྱག་གཉིས་རྫ་རྔ་བརྡུངས་བྱས་ཏེ།  །བདེ་ཆེན༴  །ཝི་དྱཾ༴བདེ་ཆེན༴  །བཅུ་དྲུག༴  །བཞད་མ་དམར་སྐྱ་འཛུམ་པའི་ལང་ཚོ་ངོམ།  །བདེ་ཆེན༴  །ཧཱ་སྱ༴བདེ་ཆེན༴  །བཅུ་དྲུག༴  །སྒེག་མོ་སྔོ་སྐྱ་བདེ་བའི་རྣམ་པར་འགྱིངས།  །བདེ་ཆེན༴  །ལཱ་སྱེ༴བདེ་ཆེན༴  །བཅུ་དྲུག༴  །གླུ་མ་དམར་མོ་གླུ་དབྱངས་རབ་ཏུ་འགྱུར།  །བདེ་ཆེན༴  །གི་རྟི༴བདེ་ཆེན༴  །བཅུ་དྲུག༴  །གླུ་མ་དམར་མོ་གླུ་དབྱངས་རབ་ཏུ་འགྱུར།  །བདེ་ཆེན༴  །གི་རྟི༴བདེ་ཆེན༴  །བཅུ་དྲུག༴  །གར་མ་ལྗང་གུས་ཕྱག་གཉིས་གར་སྟབས་བསྒྱུར།  །བདེ་ཆེན༴  །ནི་རྟི༴བདེ་ཆེན༴  །བཅུ་དྲུག༴  །པུཥྤེ་དམར་མོས་ཆུ་སྐྱེས་ཕྲེང་བ་ཐོགས།  །བདེ་ཆེན༴  །པུཥྤེ༴  །བདེ་ཆེན༴  །བཅུ་དྲུག༴  །དྷུ་པེ་མཐིང་ག་དྲི་ཞིམ་སྤོས་ཁང་འཛིན།  །བདེ་ཆེན༴  །དྷཱུ་པེ༴བདེ་ཆེན༴  །བཅུ་དྲུག༴  །ལྷ་མོ་དམར་སྐྱས་མར་མེའི་སྡོང་བུ་འཛིན།  །བདེ་ཆེན༴  །ཨཱ་ལོ་ཀེ༴བདེ་ཆེན༴  །བཅུ་དྲུག༴  །དྲི་མ་ལྗང་གུ་དྲི་ཡི་དུད་ཆོས་འཛིན།  །བདེ་ཆེན༴  །གནྡྷེ༴བདེ་ཆེན༴  །བཅུ་དྲུག༴  །གཟུགས་མ་ཀུནྡའི་མདངས་ཅན་མེ་ལོང་ཐོགས།  །བདེ་ཆེན༴  །རཱུ་པ༴བདེ་ཆེན༴  །བཅུ་དྲུག༴  །རོ་མ་མཚམས་སྤྲིན་ལྟར་དམར་ཞལ་ཟས་སྟོབས།  །བདེ་ཆེན༴  །རཱ་ས༴བདེ་ཆེན༴  །བཅུ་དྲུག༴རེག་མ་ལྗང་གུ་ལྷ་རྫས་ན་བཟའ་ཐོགས།  །བདེ་ཆེན༴སྤཪྴེ༴བདེ་ཆེན༴  །བཅུ་དྲུག  །ཆོས་མ་སྔོན་མོ་ཕྱག་གཉིས་ཆོས་འབྱུང་མཛད།  །བདེ་ཆེན༴  །དྷརྨ་དྷཱ་ཏུ༴དེ་ནས་ནང་མཆོད་ཕུལ་བ་ནི།  ཨོཾ་ཨཱཿཧཱུྃ་ཧ་ཧོ་ཧྲཱིཿས་བྱིན་གྱིས་བརླབས།  གཡོན་པའི་མཐེབ་སྲིན་གྱིས་འཐོར་ཏེ།  མཆོད་དོ་རིགས་ཐམས་ཅད་ཀྱི་བདག་པོ།  དཀྱིལ་འཁོར་ཐམས་ཅད་ཀྱི་གཙོ་བོ།  །དུས་གསུམ་སངས་རྒྱས་ཐམས་ཅད་ཀྱི་ངོ་བོ།  སྐུ་བཞི་ཡེ་ཤེས་ལྔ་ཡི་བདག་ཉིད་དྲིན་ཅན་རྩ་བའི་བླ་མའི་མཚན་ནས་བརྗོད་དེ།  ཞལ་དུ་ཨོཾ་ཨཱཿཧཱུྃ།  ཆོས་སྐུ་ཡུམ་ཆེན་ཤེས་རབ་ཕ་རོལ་ཕྱིན་མའི་ཞལ་དུ༴ལོངས་སྐུ་རྡོ་རྗེ་ཕག་མོའི༴སྤྲུལ་སྐུ་ལབ་ཁྱེར་སྒྲོན་མའི༴གྲུབ་ཆེན་ཐང་སྟོང་རྒྱལ་པོའི༴འཇམ་དབྱངས་ནམ་མཁའ་ལེགས་པའི༴མཁས་གྲུབ་ཤཱཀྱའི་མཚན་ཅན༴ཕ་རྒོད་རྒྱལ་མཚན་དཔལ་བཟང་༴མཁས་བཙུན་བསྟན་པའི་རྒྱལ་མཚན༴འཁྲུལ་ཞིག་ཡོན་ཏན་གྲགས་བཟང་༴  །རྗེ་བཙུན་མང་ཐོས་མཚན་ཅན༴བྱ་གཏོང་ནོར་བུའི་མཚན་ཅན༴གྲུབ་དབང་རྡོ་རྗེ་རྣལ་འབྱོར༴དགེ་སློང་རྣམ་རྒྱལ་ཚེ་འཕེལ༴རྗེ་བཙུན་ངག་དབང་དཀོན་མཆོག༴ངག་དབང་འགྲོ་དོན་ཡོངས་གྲགས༴བསྟན་འཛིན་ཡེ་ཤེས་ལྷུན་གྲུབ༴ཀུན་བཟང་པདྨ་ཚེ་དབང་༴དགེ་སློང་བློ་བཟང་བསྟན་འཕེལ༴བསྟན་འཛིན་བློ་བཟང་མཁྱེན་རབ་མཐུ་སྟོབས༴འཇམ་དབྱངས་མཁྱེན་བརྩེའི་དབང་པོའི༴འཇམ་དབྱངས་བློ་གཏེར་དབང་པོའི༴གྲུབ་བརྙེས་ཀུན་བཟང་འགྱུར་མེད༴ཨོ་རྒྱན་ཆོས་ཀྱི་རྒྱ་མཚོ༴འགྱུར་མེད་འཇམ་དབྱངས་བསྟན་འཕེལ༴དྲིན་ཅན་རྩ་བའི་བླ་མའི༴ཡི་དམ་དཀྱིལ་འཁོར་གྱི་ལྷ་ཚོགས་རྣམས་ཀྱི༴མ་གཅིག་གནས་གསུམ་གྱི་མཁའ་འགྲོ་མ་རྣམས་ཀྱི༴དམ་ཅན་ཆོས་སྐྱོང་སྲུང་མ་ཆོས་བདག་གསང་བ་ཡེ་ཤེས་ཀྱི་མཁའ་འགྲོ་མ་དང་བཅས་པའི༴རང་ལུས་ཡི་དམ་དཀྱིལ་འཁོར་གྱི་ལྷ་ཚོགས་རྣམས་ཀྱི་ཞལ་དུ་ཨོཾ་ཨཱཿཧཱུྃ།  ཞེས་བདུད་རྩི་ལྕེ་ཐོག་ཏུ་མྱོང་།  ཨོཾ་གུ་རུ་དེ་ཝ་ཌཱ་ཀི་ནཱི་སརྦ་པཉྩ་ཨ་མྲྀ་ཏ་པྲ་ཏཱིཙྪ་ཡེ་སྭཱ་ཧཱ།  ལག་པ་གཡོན་པའི་མཐེ་བོང་དབུས་སུ་ཨོཾ་བྃ་ཕག་མོ་དམར་མོ།  འཛུབ་མོའི་ངོས་ལ་ཧྃ་ཡྃ་གཤིན་རྗེ་སྔོན་མོ།  གུང་མོ་ལ་ཧྲཱིཾཿམྃ་རྨོངས་བྱེད་མ་དཀར་མོ།  མིང་མེད་ལ་ཧྲཱིཾཿཧྲཱིཾ་སྐྱོང་བྱེད་མ་སེར་མོ།  མཐེའུ་ཆུང་ལ་ཧཱུྃ་ཧཱུྃ་སྐྲག་བྱེད་མ་ལྗང་གུ།  སོར་ཚིག་ལ་ཕཊ་ཕཊ་ཙཎྜི་ཀ་དུད་ཀ།  ལག་པ་གཡས་པའི་མཐེ་བོང་ལ་ཨོཾ་ཧ་རྡོ་རྗེ་སེམས་དཔའ་དཀར་པོ།  འཛུབ་མོ་ལ་ན་མ་ཧི་རྣམ་པར་སྣང་མཛད་སེར་པོ།  གུང་མོ་ལ་སྭཱ་ཧཱ་ཧཱུྃ་རིན་ཆེན་འབྱུང་ལྡན་དམར་པོ།  སྲིན་ལག་ལ་བོ!་ཧེ་ཧེ་རུ་ཀ་ནག་པོ།  མཐེའུ་ཆུང་ལ་ཧཱུྃ་ཧཱུྃ་ཧོ་འོད་དཔག་མེད་མཐིང་ཀ།  སེན་མོའི་ངོས་ལ་ཕཊ་ཕཊ་ཧྃ་དོན་གྲུབ་ལྗང་གུ།  རང་ལས་འོད་ཟེར་འཕྲོས་ཛཿཧཱུྃ་བྃ་ཧོཿདམ་ཚིག་པ་དང་ཡེ་ཤེས་པ་རོ་མཉམ་པར་གྱུར།  ཐལ་མོ་སྦྱར་ཏེ།  ལག་པའི་ལྷ་རྣམས་སྙོམས་པར་ཞུགས་ཏེ་ཟག་མེད་ཀྱི་བདེ་བས་དགྱེས་བཞིན་དུ་བདག་ལ་ཐིམ་པར་གྱུར།  ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧྃཿགནས་ལུགས་ཀྱི་རང་ཞལ་བལྟ་བ་དེ་ཁོ་ན་ཉིད་ཀྱིས་མཆོད་པའོ།  །ལྔ་པ་བསྟོད་ཅིང་བཤགས་པ་བྱ་བ་ནི།  གང་གི་དྲིན་གྱིས་བདེ་ཆེན་ཉིད།  །སྐད་ཅིག་ཉིད་ལ་འཆར་བ་གང་།  །བླ་མ་རིན་ཆེན་ལྟ་བུའི་སྐུ།  །རྡོ་རྗེ་ཅན་ཞབས་པད་ལ་འདུད།  །སངས་རྒྱས་ཀུན་གྱི་རང་བཞིན་སྐུ།  །སློབ་དཔོན་ལ་ནི་སྐྱབས་སུ་མཆི།  །དང་པོ་མེ་ཏོག་ཕོག་པ་ཡི།  །དཀྱིལ་འཁོར་ལྷ་ཚོགས་བཅས་ལ་འདུད།  །སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན།  །མ་སྐྱེས་མི་འགགས་ནམ་མཁའི་ངོ་བོ་ཉིད།  །སོ་སོར་རང་རིག་ཡེ་ཤེས་སྤྱོད་ཡུལ་བ།  །དུས་གསུམ་རྒྱལ་བའི་ཡུམ་ལ་ཕྱག་འཚལ་བསྟོད།  །བལྟ་བས་མི་ངོམས་འགྲོ་བའི་དཔལ་དུ་ཤར།  །ཞལ་གཅིག་ཕྱག་བཞི་གཙོ་མ་གསེར་གྱི་མདོག  །རིན་ཆེན་རྒྱན་སྤྲས་རྡོ་རྗེའི་སྐྱིལ་ཀྲུང་བཞུགས།  །རྒྱལ་བའི་ཡུམ་གྱུར་ཁྱོད་ལ་ཕྱག༴  །ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང་།  །གཟུགས་སྐུ་འཇའ་ཚོན་བཞིན་དུ་སོ་སོར་གསལ།  །ཐབས་དང་ཤེས་རབ་མཆོག་ལ་མངའ་བརྙེས་པའི།  །རིགས་ལྔ་བདེ་བར་གཤེགས་ལ༴  །ཞིང་ཁམས་ཐམས་ཅད་གསེར་གྱི་ས་གཞི་ལ།  །རིན་ཆེན་མེ་ཏོག་མང་པོ་བཅལ་དུ་བཀྲམ།  །མེ་ཏོག་པུཎྜ་རཱི་ཀ་ཆར་ལྟར་འབེབས།  །ཡུམ་གྱུར་སྒྲོལ་མ་ཁྱོད་ལ༴  །མགོན་པོ་ཐུགས་རྗེ་ཆེ་ལྡན་པ།  །ཐམས་ཅད་མཁྱེན་པའི་སྟོན་པ་པོ།  །བསོད་ནམས་ཡོན་ཏན་རྒྱ་མཚོའི་ཞིང་།  །དེ་བཞིན་གཤེགས་ལ༴  །དག་པས་འདོད་ཆགས་བྲལ་བའི་རྒྱུ།  །དགེ་བས་ངན་སོང་ལས་གྲོལ་ཞིང་།  །གཅིག་ཏུ་དོན་དམ་མཆོག་གྱུར་བ།  །ཞིང་གྱུར་ཆོས་ལ༴  །གྲོལ་ནས་གྲོལ་བའི་ལམ་ཡང་སྟོན།  །བསླབ་པ་དག་ལ་རབ་ཏུ་གནས།  །ཞིང་གི་དམ་པ་ཡོན་ཏན་ལྡན།  །དགེ་འདུན་ལ་ཡང་༴  །བྱ་སྤྱོད་རྣལ་འབྱོར་རྒྱུད་སྡེ་བཞི།  །སྟོན་པ་ཉིད་ཀྱིས་གང་གསུངས་པ།  །ཕྱི་དང་ནང་དང་གསང་བ་ཡི།  །ཡི་དམ་རྣམས་ལ༴དཔལ་ལྡན་རྡོ་རྗེ་མཁའ་འགྲོ་མ།  སོགས་ནས།  བདག་ལ་བྱིན་གྱིས་བརླབ་ཏུ་གསོལ།  །སྟོན་པའི་བསྟན་པ་རིན་པོ་ཆེ།  །སྟོན་པའི་ཉིད་ཀྱི་ཞབས་དྲུང་དུ།  །ཇི་བཞིན་སྐྱོང་བར་ཞལ་བཞེས་པའི།  །ཆོས་སྐྱོང་རྣམས་ལ༴  །ཕྱག་བྱར་འོས་པ་ཐམས་ཅད་ལ།  །ཞིང་རྡུལ་ཀུན་གྱི་གྲངས་རྙེད་ཀྱིས།  །ལུས་བཏུད་པ་ཡིས་རྣམ་ཀུན་ཏུ།  །མཆོག་ཏུ་དད་པས་ཕྱག་འཚལ་བསྟོད།  །དེ་ནས་བཤགས་པ་བྱ་བ་ནི།  སྲས་རྒྱལ་བ་དོན་གྲུབ་ཀྱིས་མཛད་པ་འདི་ལྟར་ཏེ།  མ་ཅིག་ཡེ་ཤེས་མཁའ་འགྲོ་མ།  །འཁོར་བཅས་བདག་ལ་དགོངས་སུ་གསོལ།  །དང་པོ་ལུས་སེམས་བསྐྱེད་པའི་མ།  །བར་དུ་ཟང་ཟིང་འབོག་པའི་མ།  །ཐ་མར་ལམ་སྣ་འདྲེན་པའི་མ།  །མ་དྲིན་མོ་ཆེ་ལ་ཕྱག་འཚལ་ལོ།  །གསུམ་ལྡན་བླ་མ་རིན་པོ་ཆེ།  །གཏན་གྱི་སྐྱབས་གནས་ཡིན་པར་མ་ཤེས་པས།  །དད་འདུན་མོས་གུས་ཆུང་བ་དེ།  །མ་སྤྲུལ་པའི་སྐུ་ལ་མཐོལ་ལོ་བཤགས།  ཨོཾ་བཛྲ་སཏྭ་ཨཱཿ།  དགེ་ལེགས་དཔལ་གྱི་ཐུགས་རྗེ་འདི།  །རྩ་བའི་བླ་མར་མ་ཤེས༴  །དངོས་གྲུབ་གཞན་དུ་ཞུས་པ་དེ།  །མ་སྤྲུལ༴ཨོཾ༴  །རྣམ་རྟོག་ཡེ་ཤེས་ཆེན་པོ་འདི།  །ཆོས་སྐུ་ཡིན་པར༴  །དགག་སྒྲུབ་སྤངས་བླང་བགྱིས་པ་དེ།  །མ༴ཨོཾ༴  །རང་སེམས་རྩ་བ་ཆོད་པ་འདི།  །སྐྱེ་མེད་ཡིན་པར༴  །ཆོས་སྐུ་ལོགས་སུ་བཙལ་བ་དེ།  །མ༴ཨོཾ༴  །རང་སེམས་ཡིད་བཞིན་ནོར་བུ་འདིར།  །དགོས་འདོད་འབྱུང་བར༴འབད་རྩོལ་གཞན་དུ་བགྱིས་པ་དེ།  །མ༴ཨོཾ༴  །རྣམ་རྟོག་ང་བདག་ཆེན་པོ་འདི།  །ཉེས་པའི་རྩ་བར༴  །དགྲ་འདྲེ་ལོགས་སུ་བརྟུལ་བ་དེ།  །མ༴ཨོཾ༴  །འགྲོ་དྲུག་སེམས་ཅན་ཐམས་ཅད་ཀུན།  །ཕ་མ་ཡིན་པར༴  །གནོད་འཚེ་གཞན་ལ་བསྐྱལ་བ་དེ།  མ༴ཨོཾ༴  །ཟབ་མོ་བདུད་ཀྱི་སྤྱོད་ཡུལ་འདི།  །ཟབ་དོན་ཡིན་པར༴སྣོད་མིན་གཞན་ལ་སྟོན་པ་དེ།  །མ༴ཨོཾ༴བརྩེ་གདུང་འདྲེས་པའི་མཆེད་གྲོགས་འདི།  །དཔའ་བོ་མཁའ་འགྲོར་མ༴  །རྣམ་རྟོག་དུག་ལྔ་སྐྱེས་པ་དེ།  །མ༴ཨོཾ༴  །ཚུལ་ཁྲིམས་རྣམ་དག་དྲི་མེད་འདིས།  །ཐར་ལམ་བསྒྲོད་པར༴  །འཆལ་བའི་ངོ་ལྐོག་ཤོར་བ་དེ།  །མ༴ཨོཾ༴  །དངོས་འབྱོར་ཡིད་ཀྱིས་སྤྲུལ་མཆོད་འདིས།  །ཚོགས་གཉིས་རྫོགས་པར༴  །རློམས་སེམས་སེར་སྣ་ཤོར་བ་དེ།  །མ༴ཨོཾ༴  །ཟབ་མོ་མཁའ་འགྲོའི་ཚོགས་གྲལ་འདིར།  །གསང་གནས་ཡིན་པར༴  །ཉམས་གྲིབ་ཅན་དང་འགྲོགས་པ་དེ།  །མ༴ཨོཾ༴  །ཞལ་ཟས་ཚོགས་ཀྱི་ལོངས་སྤྱོད་ལ།  །དངོས་གྲུབ་འབྱུང་བར༴  །ལོག་ལྟ་ཅན་ལ་སྤེལ་བ་དེ།  །མ༴ཨོཾ༴  །ཆགས་མེད་སྦྱིན་པ་གཏོང་བ་འདིས།  །སྒྲིབ་གཉིས་སྦྱང་བར༴  །ལུས་ལ་གཅེས་འཛིན་བྱས་པ་དེ།  །མ༴ཨོཾ༴  །དགེ་སྡིག་དངོས་པོར་འཛིན་པ་ཡི།  །སྡིག་སེམས་འདི་ནི་ཆོས་ཉིད་ཀྱི།  །ཡངས་པའི་ཀློང་ཆེན་ངང་དུ་བཤགས།  ཨོཾ༴  །བློ་བུར་བག་ཆགས་བདེ་སྟོང་དབྱིངས་སུ་བཤགས།  ཨོཾ༴  །སྐུ་ཡི་དམ་ཚིག་ཉམས་པ་མཐོལ་ལོ༴ཨོཾ༴  །གསུང་གི་དམ་ཚིག༴ཨོཾ༴  །ཐུགས་ཀྱི་དམ་ཚིག༴ཨོཾ༴རྩ་བའི་དམ་ཚིག༴  །ཡན་ལག་གི་དམ་ཚིག་ཉམས་པ་མཐོལ་ལོ་བཤགས།  །མཐོལ་ལོ་མཐོལ་ལོ་ཡི་དམ་ལྷ་ལ་མཐོལ།  །བཤགས་སོ་བཤགས་སོ་མཁའ་འགྲོའི་ཚོགས་ལ་བཤགས།  །མཐོལ་བཤགས་ཕུལ་བས་ཚངས་པ་སྩལ་དུ་གསོལ།  །ཨོཾ་བཛྲ་སཏྭ་ཨཱཿབླ་མ་བདག་ནི་མི་ཤེས་རྨོངས་པ་སྟེ།  སོགས་བཤགས་པར་བྱེད།  དེ་ནས་བཟླས་པར་བྱ་བ་ནི།  ཡུམ་ཆེན་ཐུགས་ཀར་པདྨ་ཟླ་བའི་སྟེང་།  །ཨཿཡིག་དཀར་པོའི་མཐའ་མར་ག་ཏེའི་སྔགས།  །ཡིག་ངོ་ནང་བསྟན་གཡས་བསྐོར་བཀོད་པ་དེ།  །གཡོན་དུ་འཁོར་བས་སྔགས་ཀྱི་རང་སྒྲ་གྲགས།  །གྲགས་སྟོང་སྒྲ་དེས་སྣོད་བཅུད་འཁོར་འདས་ཀུན།  །སྣང་སྟོང་སྒྱུ་མ་ཆུ་ཟླ་ལྟ་བུར་གྱུར།  །ཨོཾ་ཨཱཿཧྲཱིཿདྷིཿཧཱུྃ་སྭཱ་ཧཱཿདང་།  ག་ཏེ་ཅུང་ཟད་བཟླ།  མ་ཅིག་ཐུགས་ཀར་པདྨ་ཟླ་བའི་སྟེང་།  །ཧཱུྃ་ཡིག་དཀར་པོའི་མཐའ་མར་གཡས་བསྐོར་དུ།  །སྔགས་ཕྲེང་བཀོད་པ་གཡོན་དུ་དྲག་ཏུ་འཁོར།  །དེ་ཡི་འོད་ཀྱིས་ལྷ་ཚོགས་ཐུགས་དམ་བསྐུལ།  དེ་ཡི་འོད་ཟེར་ཡུམ་ཆེན་ལ་ཕོག་པས།  །ཡུམ་ཆེན་ཐུགས་ལས་འོད་ཟེར་ཕྱོགས་བཅུར་འཕྲོས།  །འོག་མིན་གནས་དང་ཕྱོགས་བཅུའི་ཞིང་ཁམས་ནས།  །ཡུམ་ཆེན་རྒྱལ་བ་སྲས་བཅས་ཐམས་ཅད་ཀྱི།  །སྐུ་གསུང་ཐུགས་ཀྱི་བྱིན་རླབས་ནུས་མཐུ་རྣམས།  །འོད་ཟེར་ཚུལ་དུ་མ་ཅིག་ཐུགས་ཀར་བསྡུས།  །བྱིན་རླབས་ངོ་བོ་བདུད་རྩིས་སྐུ་ལུས་གང་།  ཕཊ་ཕཊ་ཕཊ།  ག་ཏེ་བཟླས།  ཕག་མོ་རིགས་ལྔའི་ཐུགས་ཀར་ས་བོན་མཐར།  །སྔགས་ཀྱི་ཕྲེང་བས་བསྐོར་ལས་འོད་ཟེར་འཕྲོས།  །འཕགས་མཆོད་བྱིན་རླབས་བསྡུས་ནས་རང་ལ་བསྟིམས།  །འགྲོ་ཀུན་སྒྲིབ་སྦྱོང་སྣོད་བཅུད་ཐམས་ཅད་ཀུན།  །རྡོ་རྗེ་ཕག་མོའི་ཞིང་དང་སྐུ་རུ་གྱུར།  ཨོཾ་ཨཱཿཧཱུྃ་བྃ་ཧ་རི་ནི་ས་ར་ཙ་ཧྲཱི་ཡ་བཛྲ་སརྦ་བུདྡྷ་ཌཱ་ཀི་ནཱི་སིདྡྷི་ཧཱུྃ།  ཞེས་ཅི་ནུས་བཟླའོ།  །ཁྲོས་མའི་ཐུགས་ཀར་ཉི་དཀྱིལ་སྟེང་།  །ཧྲཱིཿནག་སྔགས་ཀྱི་ཕྲེང་བས་བསྐོར།  །འོད་འཕྲོས་དཔལ་བོ་ཌཱ་ཀི་རྣམས།  །དབང་དུ་བསྡུད་ཅིང་བཀའ་ཉན་གྱུར།  །ཨོཾ་བཛྲ་བྷ་རཱ་ཧི་ཧཱུྃ་ཧཱུྃ་ཕཊ་སྭཱ་ཧཱ།  ཨོཾ་བཛྲ་ཝརྞ་ནཱི་ཡེ་ཧཱུྃ་ཕཊཿཅི་ནུས་བཟླས།  །དྲུག་པ་བསྟོད་ཅིང་གསོལ་བ་འདེབས་པ་ནི།  སྲས་རྒྱལ་བ་དོན་གྲུབ་གྱིས་མཛད་པའི་མ་ངོ་མཚར་མ་དང་།  ཀྱཻ་མ་མི་མིན་ཡེ་ཤེས་མཁའ་འགྲོ་མ།  །མ་སེར་སྣ་མེད་པའི་དོན་རྟོགས་ཤིང་།  །ཀུན་ཁྱབ་སྦྱིན་པ་བློས་ཐོངས་མ།  །བདག་མོས་པའི་བུ་སློབ་ལ།  །བྱིན་གྱིས་བརླབ་པར་མཛད་དུ་གསོལ།  །མ་ཀུན་འབྱུང་ཡེ་ཤེས་དོན༴  །ཉམས་པ་མེད་པའི་ཁྲིམས་བསྲུང་མ།  །བདག་མོས་པའི༴  །བྱིན་གྱིས༴  །མ་སྐྱེ་བ་མེད་པའི༴  །སྐྱེ་མེད་བཟོད་པ་བསྒོམས་མཛད་མ།  །བདག་མོས༴བྱིན་གྱིས༴  །མ་བྱ་རྩོལ་མེད་པའི་དོན༴  །བྱར་མེད་བརྩོན་འགྲུས་རྩོམ་མཛད་མ།  །བདག་མོས༴  །བྱིན་གྱིས༴  །མ་གཡོ་བ་མེད་པའི༴  །ཡེངས་མེད་བསམ་གཏན་བསྒོམས་མཛད་མ།  །བདག་མོས༴བྱིན་གྱིས༴  །མ་ཀུན་གྱི་རང་བཞིན༴  །བདག་མེད་རྟོགས་པའི་རྣལ་འབྱོར་མ།  །མ་ཕྱོགས་མེད་བལྟ་བས་ཞེན་པ་གྲོལ།  །མཉམ་ཉིད་བསྒོམས་པས་དམིགས་པ་གྲོལ།  །སྐྱེ་མེད་རྟོགས་པས་འཁོར་བ་གྲོལ།  །རྟོགས་མེད་སྤྱོད་པས་ཉམ་ང་གྲོལ།  །བདག་མོས་པའི་བུ་སློབ་ལ།  །བྱིན་གྱིས་བརླབས་པར་མཛད་དུ་གསོལ།  །ཕཊཿཕཊཿཀྱཻ།  མ་མི་མིན་ཡེ་ཤེས་ཀྱི་མཁའ་འགྲོ་མ།  །མ་མཉམ་ཉིད་ངང་ལ་གཟིམ་ཙ་ན།  །དོན་ཉོན་མོངས་སངས་ནས་ཡེ་ཤེས་རྒྱས།  །སངས་རྒྱས་མཁའ་འགྲོ་འབུམ་གྱིས་བསྐོར།  །གསུང་ཉམས་དབྱངས་མགུར་མ་འུར་རུ་རུ།  །བྱིན་རླབས་ན་བུན་ཐིབས་སེ་ཐིབ།  །དངོས་གྲུབ་ཆར་རྒྱུན་སིལ་ལི་ལི།  །བདག་མོས་པའི༴  །བྱིན་གྱིས༴  །མ་སྐྱེ་མེད་དབྱིངས་ལ་བཞེངས་ཙ་ན།  །དོན་རྗེས་ཐོབ་རྟོགས་པའི་ཉམས་དང་ལྡན།  །ཡེ་ཤེས་མཁའ་འགྲོ་འབུམ་གྱིས་བསྐོར།  །གསུང་ཉམས་དབྱངས༴སོགས་གོང་དང་འགྲེ།  མ་དགོངས་པ་ཤར་དུ་སྤྱོད་ཙ་ན།  །དོན་འགྱུར་བ་མེད་པའི་ཉམས༴  །རྡོ་རྗེ་མཁའ་འགྲོ་འབུམ༴  །གསུང་ཉམས༴སོགས་མ་དགོངས་པ་ལྷོ་རུ༴  །དོན་ཡོན་ཏན་རྫོགས་པའི༴  །རིན་ཆེན་མཁའ་འགྲོ༴  །གསུང་ཉམས༴སོགས།  མ་དགོངས་པ་ནུབ་ཏུ་བསྐྱོད༴  །དོན་སྐྱེ་བ་མེད་པའི༴  །པདྨ་མཁའ་འགྲོ༴  །གསུང་ཉམས༴སོགས།  མ་དགོངས་པ་བྱང་དུ༴  །དོན་འགགས་པ་མེད་པའི༴  །ལས་ཀྱི་མཁའ་འགྲོ༴  །གསུང་ཉམས༴སོགས།  མ་དགོངས་པ་སྟེང་དུ་བསྐྱོད་ཙ་ན།  །དོན་མཐའ་དབུས་མེད་པའི་ཉམས་དང་ལྡན།  །རིག་པ་དབྱིངས་སུ་པུ་རུ་རུ།  །རིས་མེད་ལྟ་བ་ཕྱ་ལ་ལ།  །མཉམ་ཉིད་དགོངས་པ་ཕྲི་ལི་ལི།  །མཁའ་འགྲོའི་མ་ཚོགས་ཐིབས་སེ་ཐིབ།  །བདག་མོས་པའི་བུ་སློབ་ལ།  །བྱིན་གྱིས་བརླབ་པར་མཛད་དུ་གསོལ།  ཕཊཿཕཊཿཀྱཻ་མ་མི་མིན་ཡེ་ཤེས་མཁའ་འགྲོ་མ།  །མ་གཉན་ས་རི་ཁྲོད་འགྲིམ་ཙ་ན།  །སྙེམས་བྱེད་རྟོགས་པ་མྱ་ལ་ལ།  །བདེ་སྟོང་རྒྱུད་ལ་ཁྲི་ལི་ལི།  །མཁའ་འགྲོ་མ་ཚོགས་ཐིབས་སེ་ཐིབ།  །བདག་དང་༴  །བྱིན་གྱིས༴  །མ་འགྲོ་བའི་དོན་ལ་བསྐྱོད་ཙ་ན།  །གནད་ཀྱི་གདམས་པ་ཤ་ར་ར།  །བདུད་ཀྱི་གཅོད་ཐབས་སི་ལི་ལི།  །མཁའ་འགྲོ་མ་ཚོགས་ཐིབས་སེ་ཐིབ།  །མ་སྐྱེ་མེད་ངང་ལ་གཤེགས་ཙ་ན།  །གཟུང་འཛིན་མདུད་པ་ཁྲོ་ལོ་ལོ།  །སྣང་ཆའི་ན་བུན་ཡ་ལ་ལ།  །མཉམ་ཉིད་དགོངས་པ་ཁྲི་ལི་ལི།  །མཁའ་འགྲོ་མ་ཚོགས་ཐིབས་སེ་ཐིབ།  །བདག་དང་༴བྱིན་གྱིས༴  །མ་དབྱིངས་ལས་སྐྱེ་བ་མི་མངའ་ཡང་།  །དོན་འགགས་པ་མེད་པའི་ཐུགས་རྗེ་ཡིས།  །བདག་མ་རིག་འཁྲུལ་པའི་སེམས་ཅན་རྣམས།  །དོན་ངེས་པར་ཐུགས་རྗེས་བཟུང་དུ་གསོལ།  །དོན་ངེས་པར་བར་ཆད་བསལ་དུ་གསོལ།  །དོན་ངེས་པར་ལམ་སྣ་དྲངས་དུ་གསོལ།  ཕཊཿཕཊཿགདུང་སྒྲམ་ཤར་སྒོ་ནས་བསྟོད་པ།  མ་ཕ་རོལ་ཕྱིན་པའི་གྲུབ་ཐོབ་མ།  །སྐལ་ལྡན་ཡོངས་ཀྱི་རྒྱུད་གྲོལ་མ།  །མ་མདོ་རྒྱུད་དགོངས་པ་ཐུགས་སུ་ཆུད།  །ཡང་དག་དོན་རྟོགས་འགྲོ་བའི་མགོན།  །ལབ་ཀྱི་སྒྲོན་མའི་སྐུ་ལ་ཕྱག་འཚལ་བསྟོད།  །མ་རང་བཞིན་རྣམ་དག་ཐུགས་སུ་ཆུད།  །ཐུགས་ཉིད་དབྱིངས་དང་མཚུངས་པར་ཁྱབ།  །ཐོག་མཐའ་གཉིས་པོ་གཞི་ལ་དག  །བདག་ཏུ་འཛིན་པ་རང་སར་གྲོལ།  །མ་ངོ་བོ་ཉིད་ཀྱི་སྐུ་ལ༴  །མ་ཤེས་རབ་ནམ་མཁའི་དབྱིངས་སུ་ཤར།  །སྤྱོད་ལམ་རྣམ་བཞི་རྟོག་མི་མངའ།  །སྙེམས་བྱེད་ཉམ་ང་གཞི་ལ་དག  །རྣམ་པར་རྟོག་པ་རང་སར་གྲོལ།  །མ་ཆོས་ཀྱི་སྐུ་ལ༴  །མ་མངོན་ཤེས་དྲུག་པོར་ཤེས་བྱ་མཁྱེན།  །ཟག་མེད་བདེ་སྟོང་རྒྱུད་ལ་སྐྱེས།  །སྒོམ་མཚན་མར་འཛིན་པ་གཞི་ལ་དག  །སྣང་སྲིད་ལྷ་འདྲེ་རང་སར་གྲོལ།  །མ་ལོངས་སྤྱོད་རྫོགས་པའི་སྐུ་ལ༴  །མ་སྐྱེ་བ་བུད་མེད་ལུས་སུ་སྤྲུལ།  །བཟང་ངན་མེད་པར་འགྲོ་དོན་མཛད།  །ཆགས་སྡང་གཉིས་པོ་གཞི་ལ་དག  །ཟོལ་ཟོག་གཉིས་པོ་རང་སར་གྲོལ།  །མ་སྤྲུལ་པའི་སྐུ་ལ་ཕྱག་འཚལ་བསྟོད།  །ཡོན་ཏན་བརྒྱད་ཀྱི་གདུང་ཁང་ལྷོ་ནས་བསྟོད་པ།  ཀྱཻ་མ་མི་མིན་ཡེ་ཤེས་མཁའ་འགྲོ་མ།  །སྒྲིབ་པ་བྱང་ནས་སྟོང་ཉིད་རྟོགས།  །མ་ཤེས་རབ་ཅན་ལ་ཕྱག་འཚལ༴  །མ་ལུས་སེམས་བྲལ་བའི་སྟོང་ཉིད་སྟོན།  །མ་གདམས་ངག་ཅན་ལ༴  །མ་དུར་ཁྲོད་འགྲིམས་པས་ཉམ་ང་མེད།  །མ་ཉམས་མྱོང་ཅན་ལ༴  །མ་སྙེམས་ཐག་ཆོད་པས་བདུད་རྣམས་ཞི།  །མ་ནུས་པ་ཅན་ལ༴  །མ་བདུད་རྣམས་ཞི་བས་ཡེ་ཤེས་འཕེལ།  །མ་རྟོགས་པ་ཅན་ལ༴  །མ་སྟོང་ཉིད་རྟོགས་པས་ས་རྣམས་ནོན།  །མ་ཚོགས་གཉིས་རྫོགས་ལ༴  །མ་སྐྱེ་མེད་སྒོམ་པས་མངོན་ཞེན་ལོག  །མ་འཁོར་བ་སྤངས་ལ༴  །མ་གདམས་ངག་བཀའ་དང་བསྟུན་ནས་སྟོན།  །མ་ལུང་དོན་མཁྱེན་ལ༴  །མ་མགུར་ཙམ་བཞེངས་ནས་ཡེ་ཤེས་འཕེལ།  །མ་བྱིན་རླབས་ཅན་ལ༴  །མ་ཞབས་ཏོག་མེད་ཀྱང་གདམས་ངག་སྟོན།  །མ་ཐུགས་རྗེ་ཅན་ལ༴གདུང་སྒྲོམ་ནུབ་སྒོ་ནས་བསྟོད་པ།  ཀྱཻ།  མ་མི་མིན་ཡེ་ཤེས་མཁའ་འགྲོ་མ།  །མ་ངན་སོང་གསུམ་པོར་མི་འཇིགས་པའི།  །མི་དགེ་བཅུ་པོ་སྙེམས་ཐག་ཆོད།  །ངན་འགྲོའི་ཕྱོགས་ཀྱི་བདུད་ལས་རྒྱལ།  །མ་མཐོ་རིས་འདྲེན་ལ༴  །མ་འགྲོ་བའི་དོན་ལ་མི་ཞན་པའི།  །དགེ་བའི་ལས་རྣམས་དབྱིངས་སུ་གྲོལ།  །ལྷ་མི་འཁོར་བའི་བདུད་ལས་ཐར།  །མ་ཐར་ལམ་བསྒྲོད་ལ༴  །མ་སྐྱེ་འཆི་གཉིས་ལ་མི་འཇིགས་པའི།  །སྙེམས་ཐག་ཡུམ་གྱི་ཀློང་དུ་ཆོད།  །སྐྱེ་མེད་ཀློང་ནས་སྐྱེ་འཆི་མེད།  །མ་བཙན་ས་ཟིན་ལ༴  །ལོག་འདྲེན་བགེགས་ལ་མི་འཇིགས་པའི།  །འདྲེ་གདོན་རང་སྣང་སེམས་སུ་ཆོད།  །གདོན་གནོད་ཕོ་མོའི་བདུད་ལས་གྲོལ།  །མ་བར་ཆད་སེལ་ལ༴  །མ་དང་པོ་ལུས་སེམས་བསྐྱེད་པའི་མ།  །བར་དུ་ཟང་ཟིང་འབོགས་པའི་མ།  །ཐ་མར་སྐྱེ་མེད་སྟོན་པའི་མ།  །མ་དྲིན་མོ་ཆེ་ལ༴  །མ་ལུས་སྲོག་ཟན་དུ་བོར་བའི་མ།  །རིག་པ་གཞི་ལ་དག་པའི་མ།  །མ་དབྱིངས་ཀྱི་ཐུགས་ལ་འཁྲུལ་པ་མེད།  །བུས་ད་རུང་སྙེམས་བྱེད་ཐག་མ་ཆོད།  །མ་བཞུགས་པའི་ཚེ་ན་དགའ་མ་ཚོར།  །གཤེགས་པའི་ཚེ་ན་སྙིང་མ་དགའ།  །མ་བཞུགས་ནས་བྱིན་གྱིས་བརླབ་ཏུ་གསོལ།  །བུས་ཀྱང་མ་ལ་གསོལ་བ་འདེབས།  །མས་ཀྱང་བུ་ལ་བྱིན་གྱིས་བརླབ་ཏུ་གསོལ།  །བདག་ཅག་མོས་པའི་རྗེས་འཇུག་ལ།  །བྱིན་གྱིས་བརླབ་པར་མཛད་དུ་གསོལ།  །ལུས་ལ་བདེ་བ་བསྐྱེད་དུ་གསོལ།  །ངག་ལ་ནུས་པ་སྦར་དུ་གསོལ།  །སེམས་ལ་རྟོགས་པ་འཆར་དུ་གསོལ།  །སྐུ་གསུང་ཐུགས་དང་ཡོན་ཏན་ཕྲིན་ལས་དང་།  །མཆོག་དང་ཐུན་མོང་གཉིས་ཀྱི་དངོས་གྲུབ་སྩོལ།  །གདུང་སྒྲམ་བྱང་སྒོ་ནས་བསྟོད་པ།  ཀྱཻ།  མ་མི་མིན་ཡེ་ཤེས་མཁའ་འགྲོ་མ།  མ་རི་ཁྲོད་འགྲིམས་ཞིང་ཉམས་སུ་ལེན།  །མ་གཅིག་སྟོང་པ་ཉིད་ལ་གནས།  །སྟོང་པ་ཉིད་ལ་སེར་སྣ་མེད།  །མ་སྦྱིན་པ་རྫོགས་ལ་ཕྱག་འཚལ་བསྟོད།  །མ་གཅིག་སྟོང་པ༴  །སྟོང་པ་ཉིད་ལ་འཆལ་བ་མེད།  །མ་ཚུལ་ཁྲིམས་རྫོགས་ལ༴  །མ་ཅིག་སྟོང་པ༴  །སྟོང་པ་ཉིད་ལ་ཁོང་ཁྲོ་མེད།  །མ་བཟོད་པ་རྫོགས་ལ༴  །མ་ཅིག༴  །སྟོང་པ་ཉིད་ལ་ལེ་ལོ་མེད།  །མ་བརྩོན་འགྲུས་རྫོགས་ལ༴  །མ་ཅིག༴  །སྟོང་པ་ཉིད་ལ་གཡོ་བ་མེད།  །མ་བསམ་གཏན་རྫོགས་ལ༴  །མ་ཅིག༴  །སྟོང་པ་ཉིད་ལ་གཏི་མུག་མེད།  །མ་ཤེས་རབ་རྫོགས་ལ༴  །མ་ཕ་རོལ་ཕྱིན་དྲུག་ཐུགས་ལ་མངའ།  །ཡོངས་དག་དོན་རྟོགས་གྲོལ་བའི་མགོན།  །མ་ཅིག་ཁྱེད་ལ་ཕྱག་འཚལ་བསྟོད།  །མ་ཅིག་གི་བསྟོད་པ་དེ་ཐམས་ཅད་སྲས་རྒྱལ་བ་དོན་གྲུབ་ཀྱིས་མཛད་པ་ཤིན་ཏུ་བྱིན་རླབས་ཆེའོ།  །བདུན་པ་གཏོར་མ་འབུལ་བ་ནི།  གཏོར་མ་རྣམས་ལ་ཆུ་ཆང་གིས་བྲན་ལ་བྱིན་རླབས་གོང་ལྟར་བྱ།  ཨོཾ་ཨཱཿཧཱུྃ་ཧ་ཧོ་ཧྲཱིཿས་བྱིན་གྱིས་རླབས།  ཨོཾ་ཨཱཿཧཱུྃ་བྃ་ཧ་རི་ནི་ས་ར་ཙ་ཧྲཱི་ཡ།  བཛྲ་ཝཱ་རཱ་ཧཱི་ཧ་ཧ་ཧི་ཕཻཾ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི།  ཅེས་བདུན་གྱིས་གཏོར་མ་དང་།  ཨོཾ་བཛྲ་དྷཱུ་པེ་ཨཱཿཧཱུྃ།  གིས་ཁྱད་པར་གྱི་སྦྱར་སྤོས་ཕུལ་ལ།  དམ་རྫས་རྒྱན་དང་ལྡན་པའི་གཏོར་མ་འདི་ཉིད་བླ་མ་དང་གཉིས་སུ་མེད་པའི་རྗེ་བཙུན་རྡོ་རྗེ་ཕག་མོ་རིགས་བཞིའི་མཁའ་འགྲོ་མ་དཔའ་བོ་སྡེ་བཞི་ཆོས་བདག་གསང་བ་ཡེ་ཤེས་ཀྱི་མཁའ་འགྲོ་མ་ཕག་ཞལ་ཅན་འཁོར་དང་བཅས་པ་ལ་འབུལ་ལོ།  །རྣལ་འབྱོར་པ་བདག་ཅག་དཔོན་སློབ་འཁོར་དང་བཅས་པའི་དམ་པ་ཆོས་སྒྲུབ་པའི་བར་དུ་གཅོད་པ་ཐམས་ཅད་ཉེ་བར་ཞི་བ་དང་།  མཐུན་རྐྱེན་ཚེ་དང་བསོད་ནམས་དཔལ་དང་འབྱོར་པ་དབང་ཕྱུག་སྙན་གྲགས་བཀྲ་ཤིས་དགེ་མཚན་ཐམས་ཅད་གོང་ནས་གོང་དུ་འཕེལ་ཞིང་རྒྱས་པར་མཛད་དུ་གསོལ།  བསྡུས་པའི་སྐབས་དེས་ཆོག  །སྤྲོ་ན་ཡུམ་ཆེན་མོ་མཁའ་འགྲོ་སྡེ་ལྔ་དང་ཆོས་བདག་རྣམས་ལ་སྒོས་སུ་འབུལ་བ་ནི།  ཨོཾ་ཨ་མྲྀ་ཏེ་ཧཱུྃ་ཕཊ།  སྭ་བྷཱ་ཝས་སྟོང་པར་སྦྱངས།  བྷྲཱུྃ་ལས་རིན་པོ་ཆེའི་སྣོད་ཡངས་པར་གཏོར་མ་འདོད་རྒུ་འབྱུང་བར་གྱུར།  ཨོཾ་ཨཱཿཧཱུྃ།  གསུམ་གྱིས་བྱིན་གྱི་བརླབ།  ཨོཾ་པྲ་ཛྙཱ་པ་ར་མི་ཏ་ཨི་དཾ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི།  གསུམ་གྱིས་ཕུལ།  མཆོད་སྦྱིན་གཏོར་མ་རྒྱ་ཆེན་པོ་འདི་ཉིད་ཆོས་སྐུ་ཡུམ་ཆེན་ཤེས་རབ་ཕ་རོལ་ཏུ་ཕྱིན་མ་ལ།  སྲས་ཕྱོགས་བཅུའི་སངས་རྒྱས་ཀྱི་འཁོར་གྱིས་བསྐོར་བ་དང་བཅས་པ་ལ་འབུལ་ལོ།  །རྣལ་འབྱོར་པ་བདག་ཅག་དཔོན་སློབ་འཁོར་དང་བཅས་པ་རྣམས་བྱང་ཆུབ་སྒྲུབ་པའི་གེགས་སུ་གྱུར་པའི་བདུད་ཚོགས་ཐམས་ཅད་ཟིལ་གྱིས་གནོན་ནུས་པ་དང་རང་སྣང་དབང་དུ་འདུས་ཤིང་ཆོས་རབ་རྣམ་འབྱེད་ཀྱི་ཤེས་རབ་ཁྱད་པར་ཅན་རྒྱུད་ལ་སྐྱེས་ཏེ་ཡུམ་ཆེན་མོའི་དགོངས་པ་མངོན་དུ་འགྱུར་བ་བྱིན་གྱིས་བརླབ་ཏུ་གསོལ།  ཨོཾ་ཨཱཿཧཱུྃ་ཧ་ཧོ་ཧྲཱིཿརང་གི་སྙིང་ག་ནས་འོད་ཟེར་འཕྲོས་པས་མ་རིག་མཁའ་འགྲོ་སྡེ་ལྔའི་ལྷ་ཚོགས་འཁོར་དང་བཅས་པ་གཏོར་མགྲོན་དུ་ཨོཾ་བཛྲ་ས་མཱ་ཛཿཨོཾ་བཛྲ་ཌཱ་ཀི་ནཱི་ཧཱུྃ་ཕཊ་སྭཱ་ཧཱ།  ཨོཾ་བུདྡྷ་ཌཱ་ཀི་ནཱི་ཧཱུྃ་ཕཊ་སྭཱ་ཧཱ།  ཨོཾ་རཏྣ་ཌཱ་ཀི་ནི་ཧཱུྃ་ཕཊ་སྭཱ་ཧཱ།  ཨོཾ་པདྨ་ཌཱ་ཀི་ནཱི་ཧཱུྃ་ཕཊ་སྭཱ་ཧཱ།  ཨོཾ་ཀརྨ་ཌཱ་ཀི་ནཱི་ཧཱུྃ་ཕཊ་སྭཱ་ཧཱ།  སོ་སོར་མཐར།  ཨ་ཀཱ་རོ༴བཏགས་པ་གསུམ་གྱིས་འབུལ།  མ་ཅིག་མཁའ་འགྲོ་སྡེ་ལྔའི་ལྷ་ཚོགས་འཁོར་དང་བཅས་པ་རྣམས་མཆོད་སྦྱིན་གཏོར་མ་རྒྱ་ཆེན་པོ་འདི་བཞེས་ལ།  དཔལ་ལྡན་བླ་མ་དམ་པའི་སྐུ་ཚེ་བསྲིངས།  སངས་རྒྱས་ཀྱི་བསྟན་པ་བསྲུང་།  དཀོན་མཆོག་གི་དབུ་འཕང་བསྟོད།  དམ་ཆོས་མི་ནུབ་པའི་རྒྱལ་མཚན་ཚུགས།  སེམས་ཅན་གྱི་བདེ་སྐྱིད་སྤེལ།  རྣལ་འབྱོར་པ་བདག་ཅག་དཔོན་སློབ་འཁོར་དང་བཅས་པའི་འགལ་རྐྱེན་ཉེར་འཚེ་བར་དུ་གཅོད་པ་ཐམས་ཅད་ཉེ་བར་ཞི་བ་དང་མཐུན་རྐྱེན་བསམ་དོན་ཐམས་ཅད་ཆོས་ལྡན་ཡིད་བཞིན་དུ་འགྲུབ་པའི་ཕྲིན་ལས་མཛད་དུ་གསོལ།  ཨོཾ་ཨཱཿཧཱུྃ་ཧ་ཧོ་ཧྲཱིཿརང་གི་སྙིང་ག་ནས་འོད་ཟེར་འཕྲོས་པས་ཆོས་བདག་གསང་བ་ཡེ་ཤེས་ཀྱི་མཁའ་འགྲོ་མ་ཕག་ཞལ་ནག་མོ་གཏོར་མགྲོན་དུ་ཨོཾ་བཛྲ་བྷ་ར་ཧི་བཛྲ་ས་མཱ་ཛཿསྤྲོ་ན་དབྱངས་དང་བཅས།  ཧྲཱིཿའོག་མིན་གནས་དང་ཨོ་རྒྱན་ཞིང་།  །ར་སྨི་ཤྭ་རའི་དུར་ཁྲོད་ནས།  །ཆོས་བདག་ཁྲོས་མ་ཕག་ཞལ་ཅན།  །དེ་ཡི་ལས་བྱེད་མཁའ་འགྲོ་བརྒྱད།  །འཁོར་དང་བཅས་པ་གནས་འདིར་གཤེགས།  །ཤ་ཆེན་ཟན་དང་ཆང་ཕུད་བཅས།  །དམ་རྫས་གཏོར་མ་འདི་བཞེས་ལ།  །བདག་གི་འདོད་དོན་ཕྲིན་ལས་སྒྲུབས།  ཞེས་སྤྱན་དྲངས།  ཨོཾ་བཛྲ་བྷ་ར་ཧི་ས་པཱ་རི་ཝ་ར་དེ་ཝ་ཨཥྚ་ཨི་དཾ་བྷ་ལིངྟ་གྷྲཱྀ་ཧྣནྟུ་ཁ་ཁ་ཁཱ་ཧི་ཁཱ་ཧི།  ཅེས་ལན་གསུམ་གྱིས་གཙོ་འཁོར་ཐུན་མོང་ལ་འབུལ།  དམ་རྫས་རྒྱན་དང་ལྡན་པའི་གཏོར་མ་འདི་ཉིད༴སོགས་གོང་བཞིན་ཕྲིན་ལས་བཅོལ།  སྐབས་འདིར་ཐང་ལུགས་བཀའ་སྲུང་བདུན་རྫོགས་ཀྱི་གཏོར་བསྐང་དམ་རང་རང་གི་ཆོས་སྐྱོང་གང་བྱེད་ཀྱི་གཏོར་ཆོག་བསྐོང་བ་སོགས་ཀྱང་བྱ།  གཞི་བདག་གཏོར་མ་སྤྱི་ལྟར་བསྔོས།  བརྒྱད་པ་གསོལ་འདེབས་དང་ལུས་སྦྱིན་གཏོང་བ་ནི།  གསོལ་འདེབས་དམ་པའི་འཆི་བློ་མ་དང་།  བརྒྱུད་པའི་གསོལ་འདེབས་གནས་སྦྱར་མ་དང་།  རྗེ་གྲུབ་ཐོབ་ཆེན་པོ་ལ་བསྟོད་ཅིད་གསོལ་བ་འདེབས་པ་ནི།  ཕ་གྲུབ་ཐོབ་ཆེན་པོ་གཟི་མདངས་ཅན།  །སྐུ་སྟོད་སེངྒེ་འགྱིངས་པ་འདྲ།  །དེ་བདུད་བཞི་ཟིལ་གྱིས་གནོན་པའི་རྟགས།  །སྐུ་སྨད་ཤིན་ཏུ་རྒྱས་པ་དེ།  །བདེ་ཆེན་ཡེ་ཤེས་བརྙེས་པའི༴  །རྐེད་པ་ཐུང་ཞིང་སྦོམ་ལ་འགྲིལ།  །དེ་འཁྲུལ་གཞི་རྩད་ནས་ཆོད་པའི༴  །ཞབས་གཉིས་སེམས་སྐྱིལ་བཞུགས་པ་དེ།  །བྱང་ཆུབ་རྒྱུད་ལམ་བསྒྲོད་པའི༴  །སྐུ་མདོག་སྨུག་ལ་སྣུམ་པ་དེ།  །ཆོས་ཉིད་དོན་ལ་འགྱུར་བ་མེད་པའི༴  །དབུ་སྐྲ་དཀར་པོ་ཐོར་ཅོག་བྱས་པ་དེ།  །ས་བཅུའི་རྩེ་རྫོགས་སེམས་དཔའི༴ཨག་ཚོམ་དཀར་པོ་བྲང་མདོར་སླེབ་པ་དེ།  །སྐྱེ་རྒུ་ཐར་ལམ་འདྲེན་པའི༴  །སྤྱན་མིག་དམར་ལ་སྤྱན་རྩ་འཁྲུགས་པ་དེ།  །སྣང་སྲིད་ཟིལ་གྱིས་གནོན་པའི༴  །སྐུ་ལ་སླེ་བམ་མནབ་པ་དེ།  །འཇམ་རྩུབ་སྤྲོས་པ་ཆོད༴  །ཕྱི་ནང་གཅིག་ཏུ་སྦྱར་བ་དེ།  །འཁོར་འདས་གཉིས་མེད་རྟོགས༴  །སླ་སྤེད་དཀར་དམར་ཁྲ་བ་འདི།  །ཕྲིན་ལས་རྣམ་བཞི་བརྙེས༴  །ལྕགས་ཀྱུ་གཉིས་ཀྱིས་བརྒྱན་པ་འདི།  །ཐབས་ཤེས་ཟུང་དུ་འབྲེལ་བའི༴  །དུམ་བུ་སྲས་བུས་བསྡུས་པ་འདི།  །ཁམས་གསུམ་དབང་དུ་སྡུད༴  །གང་བ་གསུམ་མཐུད་བྱས་པ་འདི།  །སྐུ་གསུམ་ལྷུན་གྱིས་གྲུབ༴  །སྐུ་ལུས་ཧྲིལ་གྱི་ཁེབས་པ་འདི།  །རང་སྣང་དབང་དུ་འདུས༴  །ཕྱག་གཡས་ལྕགས་ཀོང་བསྣམ་པ་འདི།  །འཁོར་བའི་མཚོ་ལས་སྒྲོལ་བའི༴  །ཕྱག་གཡོན་ཚེ་བུམ་བསྣམས་པ་འདི།  །འཆི་མེད་རིག་འཛིན་བརྙེས༴  །རི་དྭགས་ལྤགས་གདན་གཏིང་པ་འདི།  །དམིགས་མེད་སྙིང་རྗེ་མངའ་བའི༴  །རྗེ་རེས་འགའ་ཉིན་མཚན་འཁོར་ཡུག་གཟིམས།  །བསྒོམ་གཉུག་མ་ལ་རྒྱུན་ཆད་མེད་པའི་བརྡ།  །རྗེ་རེས་འགའ་རྟེན་འབྲེལ་སྣ་ཚོགས་མཛད།  །བཀའ་འཁོར་གཡོག་བྱིན་གྱིས་བརླབས་པའི༴  །རྗེ་རེ་འགའ་སྨྱོན་པའི་བརྟུལ་ཞུགས་མཛད།  །དེ་འཁོར་གྱི་བར་ཆད་སེལ་བའི༴  །རྗེ་དེར་བཞུགས་ཐང་སྟོང་པ་ལ་གསོལ་བ་འདེབས།  །རྗེ་དེར་བཞུགས་ཐང་སྟོང་པས་བྱིན་གྱིས་རློབས།  །རྗེ་དེར་བཞུགས་ཐང་སྟོང་པས་ལམ་སྣ་དྲོངས།  །རྗེ་རྒྱང་ན་བཞུགས་ན་མོས་ཕྱག་འཚལ།  །དྲུང་ན་བཞུགས་ན་གུས་ཕྱག་འཚལ།  །ཡིད་མོས་གུས་ཕྱག་ལ་ཉེ་རིང་མེད།  གསོལ་བ་སྙིང་གི་དཀྱིལ་ནས་འདེབས།  །བྱིན་རླབས་ཐུགས་ཀྱི་ཀློང་ནས་ཞུ།  །རྗེ་སྐུ་ཡི་བྱིན་རླབས་ལུས་ལ་ཞུགས།  །ལུས་ན་ཚའི་སྡུག་བསྔལ་ཞི་བ་དང་།  །ལུས་ལ་བདེ་བ་བསྐྱེད་དུ་གསོལ།  །ལུས་ཀྱི་སྒྲིབ་པ་དག་ནས་ཀྱང་།  །ལུས་སྤྲུལ་སྐུ་ཐོབ་པར་མཛད་དུ་གསོལ།  །རྗེ་གསུང་གི་བྱིན་རླབས་ངག་ལ་ཞུགས།  །ངག་འགག་འཛེར་གྱི་སྡུག་བསྔལ་ཞི་བ་དང་།  །ངག་ལ་ནུས་པ་སྦར་དུ་གསོལ།  །ངག་གི་སྒྲིབ་པ་དག་ནས་ཀྱང་།  །ངག་ལོངས་སྐུར་ཐོབ་པར་མཛད་དུ་གསོལ།  །རྗེ་ཐུགས་ཀྱི་བྱིན་རླབས་སེམས་ལ་ཞུགས།  །སེམས་ཉོན་མོངས་སྡུག་བསྔལ་ཞི་བ་དང་།  །སེམས་ལ་རྟོགས་པ་སྦར་དུ་གསོལ།  །སེམས་ཀྱི་སྒྲིབ་པ་དག་ནས་ཀྱང་།  །སེམས་ཆོས་སྐུར་རྟོགས་པར་མཛད་དུ་གསོལ།  །རྒྱུ་འདོད་ཆགས་ཞེ་སྡང་གཏི་མུག་གསུམ།  །དུག་གསུམ་རང་སར་ཞི་བར་མཛད་དུ་གསོལ།  །གདོན་ཕོ་གདོན་མོ་གདོན་ཀླུ་གདོན་གསུམ།  །གདོན་གསུམ་རང་སར་ཞི༴ནད་རླུང་མཁྲིས་བད་ཀན་འདུས་པ་བཞི།  །བཞི་བརྒྱ་རྩ་བཞི་རང་སར༴  །ཆོས་སྐུ་ལོངས་སྐུ་སྤྲུལ་སྐུ་གསུམ།  །སྐུ་གསུམ་མངོན་དུ་འཆར་བར༴  །གཞན་དོན་དཔག་མེད་འབྱུང་བར་མཛད་དུ་གསོལ།  །ནད་གདོན་སྡིག་སྒྲིབ་དག་པར་བྱིན་གྱིས་རློབས།  ཕཊཿཕཊཿ།  མཁའ་འགྲོས་མཚན་གསོལ་རིག་འཛིན་ཐང་སྟོང་པ།  །གཟུགས་སྐུ་མཁའ་ལྟར་དག་པ་ཆོས་ཀྱི་སྐུ།  །གྲགས་སྟོང་གཞོམ་དུ་མེད་པ་རྡོ་རྗེའི་གསུང་།  །གཟུང་འཛིན་རྟོགས་བྲལ་འདུས་མ་བྱས་པའི་ཐུགས།  །ཡོན་ཏན་བསམ་ཡས་ཡིད་བཞིན་ནོར་བུར་མཚུངས།  །ཕྲིན་ལས་རྣམ་བཞིའི་གདུལ་བྱའི་རེ་བ་བསྐོང་།  །རྩ་གསུམ་ཀུན་འདུས་དཀོན་མཆོག་གསུམ་གྱི་དངོས།  །གསོལ་བ་འདེབས་སོ་གྲུབ་ཆེན་ཐང་སྟོང་པ།  །བྱིན་གྱིས་རློབས་ཤིང་འགྲོ་མགོན་བརྩོན་འགྲུས་བཟང་།  །བར་ཆད་སོལ་ཅིག་དབང་དྲག་ཧེ་རུ་ཀ།  དངོས་གྲུབ་སྩོལ་ཅིག་སྐྱབས་ཀུན་འདུས་པའི་རྗེ།  །རེ་ས་གཞན་ན་མེད་དོ་ཐུགས་རྗེས་ཟུང་།  །ཞེས་པའང་ཨོ་རྒྱན་རིན་པོ་ཆེས་གྲུབ་ཆེན་ཉིད་ལ་ལུང་བསྟན་མངའ་གསོལ་གནང་བའི་རྡོ་རྗེའི་གསུང་གསོལ་འདེབས་སུ་བསྒྱུར་བའི་བྱིན་རླབས་ཅན་ནོ།  །བདུད་དཔུང་འཇོམས་མཛད་སྨུག་ནག་ཁྲོ་བོའི་སྐུ།  །ལྟ་བའི་གདིང་ལྡན་བརྟུལ་ཞུགས་སྤྱོད་པ་སྐྱོང་།  །སྦས་པའི་རྣལ་འབྱོར་འགྲོ་བ་ཡོངས་ཀྱི་མགོན།  །ཨོ་རྒྱན་ལུང་བསྟན་སྐྱེས་མཆོག་སྤྲུལ་པའི་སྐུ།  །ཐང་སྟོང་རྒྱལ་པོའི་ཞབས་ལ་གསོལ་བ་འདེབས།  །བལྟས་པ་ཙམ་གྱིས་འགྲོ་རྣམས་དབང་དུ་སྡུད།  །སྡིགས་པ་ཙམ་གྱིས་སྡེ་བརྒྱད་བྲན་དུ་འཁོལ།  །བསམ་པ་ཙམ་གྱིས་དགོས་འདོད་ཆར་ལྟར་འབེབས།  །ཐང་སྟོང་རྒྱལ་པོའི་ཞབས༴  །ཐུགས་རྗེ་ཆེན་པོས་འགྲོ་ཀུན་རྗེས་སུ་སྐྱོང་།  །དཀའ་སྤྱོད་ཆེན་པོས་ས་ལམ་ཐམས་ཅད་བགྲོད།  །ནུས་མཐུ་ཆེན་པོས་དགྲ་བགེགས་མ་ལུས་འཇོམས།  །ཐང་སྟོང་རྒྱལ་པོའི་ཞབས་ལ་གསོལ་བ་འདེབས།  །དེ་ནས་འཁོར་འདས་བསྲེ་བ་སོགས་ལུས་སྦྱིན་རྒྱས་བསྡུས་ཅི་རིགས་པར་བྱའོ།  །དགུ་པ་ཚོགས་ཀྱི་མཆོད་པ་ལ།  དེ་ནས་བསྲེ་བ་བཞིའི་དམིགས་པ་བྱ་བ་ནི།  ཕཊཿཕཊཿསྲུང་བྱའི་ལུས་དང་བདག་ལུས་དབྱེར་མེད་བསྲེ།  །རང་གི་རྣམ་ཤེས་ཧཱུྃ་དུ་གྱུར་པ་དང་།  །ཧཱུྃ་དེ་ཚངས་བུག་ནས་ཐོན་ནམ་མཁར་ཡལ།  །ནམ་མཁའ་སེམས་ཉིད་དབྱེར་མེད་གཅིག་ཏུ་བསྲེ།  །ལས་བྱེད་མཁའ་འགྲོས་བེམ་པོ་དེ་བླང་ནས།  །ཚོགས་ནང་བཅུག་ནས་གྲི་གུག་གིས་དཀྲུགས་པས།  །ཚོགས་དང་བེམ་པོ་དབྱེར་མེད་གཅིག་ཏུ་བསྲེ།  ཕཊཿཕཊཿཕཊཿཕཊཿཚོགས་ཀྱི་བགེགས་བསལ་བ་ནི།  གསེར་གླིང་བརྡལ་བའི་གནས་འདི་ཉམས་རེ་དགའ།  །གནས་འདི་ཉམས་རེ་མི་དགའ་རྒྱུ།  །བླ་མ་དང་མཁའ་འགྲོ་བཞུགས་གནས་ལགས།  །དེ་ཕྱིར་བླ་མ་དང་མཁའ་འགྲོ་འདུ་རེ་རན།  །ཆོས་སྐྱོང་རྣམས་ཀྱང་མི་འདུ་རྒྱུ།  །རིགས་བཞིའི་མཁའ་འགྲོའི་སྤྱན་སྔ་རུ།  །ཆོས་སྐྱོང་འདུ་བ་ཁས་བླང་པས།  །དེ་ཕྱིར་ཆོས་སྐྱོང་འདུ་རེ་རན།  །རྣལ་འབྱོར་ཕོ་མོ་ཨི་རེ་བདེ།  །རྣལ་འབྱོར་ཕོ་མོ་མི་བདེ་རྒྱུ།  །བདེ་བ་ཆེན་པོའི་སྦྱོར་བ་ལགས།  །སྐལ་ལྡན་རྣམས་ནི་འདིར་འདུས་ལ།  །སྐལ་མེད་རྣམས་ནི་ཕྱི་ལ་དེངས།  །སྐལ་མེད་ཕྱི་ལ་མི་དེངས་རྒྱུ།  །དམ་ལ་གནས་པར་གཟིར་བར་བྱ།  །དེ་ཕྱིར་སྐལ་མེད་ཕྱི་ལ་དེངས།  །ཞེས་དྲག་རོལ་བྱ།  ཨོཾ་བཛྲ་བྷ་རཱ་ཧི་གྷ་གྷ་གྷ་ཊ་ཡ་གྷ་ཊ་ཡ་གནོད་བྱེད་སརྦ་དུཥྚཱན་མཱ་ར་ཡ་ཧཱུྃ་ཕཊ།  ཅེས་བརྗོད།  དེ་ནས་ཚོགས་ཀྱི་ཡོ་བྱད་རྣམས་ཆུ་ཆང་གིས་བྲན།  ནང་མཆོད་ལྟར་བྱིན་རླབས་བྱ།  ཨོཾ་ཨཱཿཧཱུྃ་ཧ་ཧོ་ཧྲཱིཿས་བརླབ།  དེ་ནས་ཚོགས་ཀྱི་མཆོད་ཡུལ་སྤྱན་དྲངས་པ་ནི།  བླ་མ་ཡི་དམ་མཁའ་འགྲོ་དང་།  །དམ་ཅན་སྲུང་མ་མཆེད་ལྕམ་རྣམས།  །དམ་རྫས་ཚོགས་ལ་འབྱོན་ཙམ་ན།  །ནམ་མཁའ་འཇའ་འོད་ཏ་ལ་ལ།  །དྲི་ཞིམ་ངད་པ་ཐུ་ལུ་ལུ།  །ཌཱ་མ་རོལ་སྒྲ་ཁྲོ་ལོ་ལོ།  །དུང་ཆེན་གླིང་བུ་ཀྱུ་རུ་རུ།  །རོལ་མོ་མང་པོ་དི་རི་རི།  །ཕཊཿཀྱི་བརྡ་སྐད་སངས་སེ་སང་།  །གླུ་ལེན་གར་བྱེད་ཤིགས་སེ་ཤིག  །བདེ་བ་ཆེན་པོ་ཁྲི་ལི་ལི།  །བྱིན་རླབས་བག་དྲོ་འུ་རུ་རུ།  །རང་རིག་ངོ་བོ་རྗེན་ནེ་ནེ།  །ཅི་སྣང་འཛིན་མེད་ཐལ་ལ་ལ།  །མཁའ་འགྲོ་འདུ་བའི་གནས་མཆོག་འདིར།  །བྱིན་གྱིས་བརླབ་ཕྱིར་གཤེགས་སུ་གསོལ།  ཀྱཻ།  ཚོགས་ཁང་གཞལ་ཡས་འབར་བ་འདི།  །ཨོ་རྒྱན་གནས་སུ་བྱིན་གྱིས་རློབས།  །འདི་ཚོགས་སྐྱེ་བོ་ཕོ་མོ་རྣམས།  །དཔའ་བོ་དཔའ་མོར༴  །རིན་ཆེན་ལ་སོགས་སྣ་ཚོགས་སྣོད།  །པདྨ་བྷནྡྷར༴  །བཅུད་ཚོགས་ཀྱི་ཞལ་ཟས་ཐམས་ཅད་ཀྱང་།  །ཟག་མེད་བདུད་རྩིར༴  །མཎྜལ་འདི་ལ་རྟེན་ཅིག་ཆོས།  །མར་མེ་འདི་ལ་མདངས་ཤིག་ཕྱུང་།  །སློབ་མ་རྣམས་ལ་དབང་ཞིག་བསྐུར།  །ཚོགས་གཏོར་འདི་ལ་བཅུད་ཅིག་ཕོབ།  །འདིར་ཚོགས་རྣལ་འབྱོར་ཐམས་ཅད་ལ།  །མཆོག་དང་ཐུན་མོང་དངོས་གྲུབ་སྩོལ།  །བུ་སྐྱེ་མེད་དབྱིངས་སུ་ལམ་སྣ་དྲོངས།  །ཕཊཿཅེས་ཅང་ཏེའུ་དང་དུང་ཆེན་གྱི་གླིང་བུ་སོགས་རོལ་མོ་སྣ་ཚོགས་འབུད་དཀྲོལ་བྱེད།  དེ་ནས་འདི་ལྟར་ཏེ།  དཀར་པོ་ཨོཾ་ལ་གསོལ་བ་འདེབས།  །དཀར་པོ་ཨོཾ་གྱི་བྱིན་གྱིས་རློབས།  །དཀར་པོ་ཨོཾ་གྱི་བྱིན་རླབས་ཀྱིས།  །གཞོང་པ་ཉི་ཟླའི་གཏོར་གཞོང་དུ།  །ཚོགས་ཀྱང་འོད་དུ་ལྟེམས་ཀྱིས་ཞུ།  །འོད་ཕུང་འབར་བའི་ཚོགས་མཆོད་འདིས།  །བླ་མ་ཡི་དམ་མཁའ་འགྲོ་མཉེས་གྱུར་ཅིག  །དཀྱིལ་འཁོར་ལྷ་ཚོགས་དགྱེས༴  །དམ་ཅན་སྲུང་མའི་ཐུགས་དམ་བསྐང་༴  །འགྲོ་བ་རིགས་དྲུག་འདོད་པས་ཚིམ༴  །ལན་ཆགས་གདོན་བགེགས་བུ་ལོན་བྱང་གྱུར་ཅིག  །དམར་པོ་ཨཱཿལ༴སོགས་གོང་གི་རིགས་འགྲེས།  སྔོན་པོ་ཧཱུྃ་ལ༴སོགས་ནས།  བྱང་གྱུར་ཅིག  །ཅེས་བརྗོད།  དེ་ནས་ཚོགས་ཕུད་འབུལ་བ་ནི།  རང་བཞིན་ཆོས་སྐུའི་མཁའ་དབྱིངས་ནས།  །རྩ་བའི་བླ་མ་རིན་པོ་ཆེ།  །བརྒྱུད་པའི་བླ་མའི་ཚོགས་དང་བཅས།  །འདོད་ཡོན་ཚོགས་ཀྱི་མཆོད་པ་འབུལ།  །ཚིམ་པའི་ཚུལ་གྱིས་བཞེས་སུ་གསོལ།  །དགྱེས་པའི་ཚུལ་གྱིས་རོལ་པར་མཛོད།  །ཕྱོགས་བཅུ་དུས་གསུམ་ཕོ་བྲང་ནས།  །སྐྱབས་གནས་དཀོན་མཆོག་རིན་པོ་ཆེ།  །སངས་རྒྱས་བྱང་སེམས་ཚོགས་དང་བཅས།  །འདོད་ཡོན༴སོགས་འགྲེས།  དག་པ་སྐུ་བཞིའི་ཕོ་བྲང་ནས།  །ཡི་དམ་ལྷ་ཚོགས་རིན་པོ་ཆེ།  །དཔའ་བོ་མཁའ་འགྲོའི་ཚོགས་དང་བཅས།  །འདོད་ཡོན༴སོགས།  བདེ་ཆེན་ལྷུན་གྲུབ་ཕོ་བྲང་ནས།  །རྡོ་རྗེ་ཕག་མོ་རིན་པོ་ཆེ།  །མཁའ་འགྲོ་རྒྱ་མཚོའི་ཚོགས་དང་བཅས།  །འདོད་ཡོན་སོགས།  དུར་ཁྲོད་ཆེན་པོའི་ཕོ་བྲང་ནས།  །ཆོས་སྐྱོང་སྲུང་མ་རིན་པོ་ཆེ།  །དམ་ཅན་རྒྱ་མཚོའི་ཚོགས་དང་བཅས།  །འདོད་ཡོན་སོགས།  རྒྱལ་བའི་བསྟན་པ་རྒྱས་པར་མཛོད།  །རྣལ་འབྱོར་བདག་ཅག་འཁོར་བཅས་ཀྱི།  །སྡིག་སྒྲིབ་ནད་གདོན་ཞི་བ་དང་།  །ཚེ་དང་དཔལ་འབྱོར་རྒྱས་པ་དང་།  །ཕྲིན་ལས་རྣམ་བཞི་འགྲུབ་པར་མཛོད།  །མཆོག་དང་ཐུན་མོང་དངོས་གྲུབ་སྩོལ།  །འགྲོ་རྣམས་བྱང་ཆུབ་ཐོབ་པར་ཤོག  །ཤར་ཕྱོགས་རྡོ་རྗེ་རིགས་ཀྱི་མཁའ་འགྲོ་མ།  །སྐུ་མདོག་དཀར་ལ་གཟི་བརྗིད་ཆེ།  །ཞལ་གཅིག་ཕྱག་གཉིས་སྤྱན་གསུམ་ལྡན།  །གྲི་གུག་ཐོད་ཁྲག་ཁ་ཊྭཱྃ་འཛིན།  །ཞབས་གཉིས་བརྐྱངས་སྐུམ་གར་སྟབས་བསྒྱུར།  །དབུ་རྒྱན་ཐོར་གཙུག་ལྡེམས་སེ་ལྡེམ།  །དར་གྱི་ཅོད་པན་པུ་རུ་རུ།  །རིན་ཆེན་སྙན་ཆ་ཁྲོ་ལོ་ལོ།  །ཕྱག་རྒྱའི་གར་སྟབས་ཁྱུགས་སེ་ཁྱུག  །ཕྱག་གདུབ་ཞབས་གདུབ་སི་ལི་ལི།  །རུས་པའི་རྒྱན་ཆ་ཁྲ་ལ་ལ།  །རྒྱན་གཞན་མང་པོ་ལྷུབས་སེ་ལྷུབ།  །སྒྲ་སྙན་མང་པོ་ཏི་རི་རི།  །གླུ་ལེན་གར་བྱེད་ཁྱུགས་སེ་ཁྱུག  །རྡོ་རྗེ་མཁའ་འགྲོ་འཁོར་དང་བཅས།  །འདིར་གཤེགས་རྒྱན་གྱི་ཚོགས་མཆོད་བཞེས།  །ཕྱི་ནང་བར་ཆད་ཞི་བ་དང་།  །མཆོག་ཐུན་དངོས་གྲུབ་སྩལ་དུ་གསོལ།  །ལྷོ་ཕྱོགས་རིན་ཆེན་རིགས་ཀྱི༴  །སྐུ་མདོག་སེར་ལ་གཟི་བརྗིད་ཆེ།  །གོང་བཞིན་འགྲེས།  རིན་ཆེན་མཁའ་འགྲོ་འཁོར་སོགསནུབ་ཕྱོགས་པདྨ་རིགས་ཀྱི༴  །སྐུ་མདོག་དམར་ལ༴སོགས་ནས།  པདྨ་མཁའ་འགྲོ་སོགས།  །བྱང་ཕྱོགས་ལས་གྲུབ༴  །སྐུ་མདོག་ལྗང་ལ༴སོགས་ནས།  །ལས་གྲུབ་མཁའ་འགྲོ༴སོགས།  །དབུས་ཕྱོགས་སངས་རྒྱས་རིགས་ཀྱི་མཁའ་འགྲོ་མ།  །སྐུ་མདོག་ནག་ལ་གཟི་བརྗིད་ཆེ།  སོགས་ནས།  སངས་རྒྱས་མཁའ་འགྲོ་འཁོར་དང་བཅས།  སོགས།  སངས་རྒྱས་མཁའ་འགྲོ་རྡོ་རྗེ་མཁའ༴  །རིན་ཆེན་མཁའ་འགྲོ་པདྨ༴  །ལས་གྲུབ་མཁའ་འགྲོ་ཐམས་ཅད་དང་།  །ཨོ་རྒྱན་ཡུལ་གྱི༴  །བལ་བོད་རུ་བཞིའི༴  །མཁའ་ལ་འགྲོ་བའི༴  །ཤུགས་ལ་འགྲོ་བའི་ཤུགས་འགྲོ་དང་།  །བར་སྣང་འགྲོ་བའི་ལས་མཁན་དང་།  །དེ་འོག་མཁའ་འགྲོ་ཞིང་སྐྱོང་དང་།  །བསྟན་པ་སྲུང་བའི་ཆོས་སྐྱོང་དང་།  །གིང་ཆེན་གིང་ཆུང་ལྕམ་དྲལ་རྣམས།  །སྐུ་མདོག་ཕྱག་མཚན་སོ་སོ་ལ།  །ཧབ་སྒྲ་ཕཊ་སྒྲ་ཏི་རི་རི།  །དྲག་པོའི་རྐན་སྒྲ་ཆེམས་སེ་ཆེམ།  །གསང་བའི་བཤུག་གླུ་ཚེ་རེ་རེ།  །མཁའ་འགྲོའི་བརྡ་སྐད་ཏི་རི་རི།  །མཁའ་འགྲོའི་གནས་ནས་སྐུ་བསྐྱོད་འཚལ།  །དབུ་རྒྱན་ཐོར་གཙུག་ལྡེམས་སེ་ལྡེམ།  ༴སོགས།  རྒྱལ་བའི་བསྟན་པ་རྒྱས་པ་དང་།  །རྣལ་འབྱོར་བདག་ཅག་འཁོར་བཅས་ཀྱི།  །སྡིག་སྒྲིབ་ནད་གདོན་ཞི་བ་དང་།  །ཚེ་དང་དཔལ་འབྱོར་རྒྱས་པར་མཛོད།  །ཕྲིན་ལས་རྣམ་བཞི་མྱུར་འགྲུབ་པའི།  །མཆོག་དང་ཐུན་མོང་དངོས་གྲུབ་སྩོལ།  །འགྲོ་རྣམས་བྱང་ཆུབ་ཐོབ་པར་ཤོག  །དེ་ལྟར་བརྗོད་པས་མཆོད་ཡུལ་རྣམས་རབ་ཏུ་དགྱེས་པར་བསམ་མོ།  །ཤིན་ཏུ་རྒྱས་པར་སྤྲོ་ན།  ཧཱུྃ།  ཤར་ཕྱོགས་རྡོ་རྗེ་རིགས་ཀྱི་མཁའ་འགྲོ་མ།  །སྐུ་མདོག་དཀར་ལ་གཟི་བརྗིད་མདངས་དང་ལྡན།  །ཕྱག་གཡས་ཤེལ་གྱི་གྲི་གུག་འཕྱར།  །ཕྱག་གཡོན་མཚན་ལྡན་ཀ་པཱ་ལ།  །མ་གནས་འདིར་བྱོན་ལ་ཚོགས་ལ་རོལ།  །རོལ་ཅིག་རོལ་ཅིག་ཚོགས་ལ་རོལ།  །ལ་ལ་ཕྱི་ཡི་ཚོགས་ལ་རོལ།  །ལ་ལ་ནང་གི་ཚོགས་ལ་རོལ།  །ལ་ལ་གསང་བའི༴  །ལ་ལ་ཡང་གསང་༴  །ལ་ལ་འདི་ཉིད་ཚོགས་ལ་རོལ།  ཧཱུྃ།  ལྷོ་ཕྱོགས་རིན་ཆེན་རིགས་ཀྱི༴  །སྐུ་མདོག་སེར་མོ་གཟི་བརྗིད༴  །ཕྱག་གཡས་གསེར་གྱི་གྲི་གུག་འཕྱར།  སོགས་གོང་བཞིན་སོ་སོར་སྦྱར་རོ།  །ཧཱུྃ།  ནུབ་ཕྱོགས་པདྨ་རིགས༴སྐུ་མདོག་དམར་ལ༴  །ཕྱག་གཡས་ཟངས་ཀྱི༴སོགས།  ཧཱུྃ།  བྱང་ཕྱོགས་ལས་གྲུབ༴  །སྐུ་མདོག་ལྗང་མོ༴  །ཕྱག་གཡས་གཡུ་ཡི༴སོགས།  ཧཱུྃ།  དབུས་ཕྱོགས་སངས་རྒྱས་རིགས་ཀྱི་མཁའ་འགྲོ་མ།  །སྐུ་མདོག་ནག་མོ་གཟི་བརྗིད་མདངས་དང་ལྡན།  །ཕྱག་གཡས་གནམ་ལྕགས་གྲི་གུག་འཕྱར།  །སོགས་ནས།  ལ་ལ་འདི་ཉིད་ཚོགས་ལ་རོལ།  རྡོ་རྗེ་འཆང་ཆེན་མན་ཆད་དང་།  །རྩ་བའི་བླ་མ་ཡན་ཆད་རྣམས།  །འཁོར་བཅས་མ་ལུས་ཚོགས་ལ་རོལ།  །ཡུམ་ཆེན་ཤེར་ཕྱིན་མན༴  །གཅོད་ཀྱི་བརྒྱུད་པ་ཡན༴འཁོར་བཅས༴  །ཤཱཀྱ་ཐུབ་པ༴  །མཁན་པོ་སློབ་དཔོན༴  །འཁོར་བཅས༴  །དཀོན་མཆོག་གསུམ་པོ༴  །ཁམས་གསུམ་སེམས་ཅན༴  །འཁོར་བཅས༴  །ཡི་དམ་ལྷ་ཚོགས༴  །འཇིག་རྟེན་ལྷ་འདྲེ༴  །འཁོར་བཅས༴  །རྡོ་རྗེ་མཁའ་འགྲོ༴  །གནས་གསུམ་མཁའ་འགྲོ༴  །འཁོར་བཅས༴  །ཡེ་ཤེས་མགོན་པོ༴  །འཇིག་རྟེན་སྲུང་མ༴  །འཁོར་བཅས༴  །དཔལ་ལྡན་ལྷ་མོ༴  །འཇིག་རྟེན་སྨན་མོ༴  །འཁོར་བཅས༴  །ཀུན་ཏུ་བཟང་པོ༴  །འཇག་མའི་སྲིན་བུ༴  །འཁོར་བཅས༴  །ལྷ་གནས་སྲིད་རྩེ་མན་ཆད་དང་།  །དམྱལ་ཁམས་བཅོ་བརྒྱད་ཡན་ཆད་རྣམས།  །འཁོར་བཅས་མ་ལུས་ཚོགས་ལ་རོལ།  །རོལ་ཅིག་རོལ་ཅིག༴  །ལ་ལ་ཕྱི༴  །ལ་ལ་ནང་༴  །ལ་ལ་གསང་༴  །ལ་ལ་ཡང་༴  །ལ་ལ་དེ་ཉིད༴  །ཕྱི་ནང་གསང་བ་དེ་ཁོ་ན།  །ཉེ་བར་བཀོད་དང་བློས་སྤྲུལ་པའི།  །ཚོགས་ཀྱི་མཆོད་པ་རྒྱ་ཆེན་འདི།  །ཡུལ་མཆོག་དམ་པ་ཁྱེད་རྣམས་ཀྱིས།  །ཚིམ་པའི་ཚུལ་གྱིས་རོལ་པར་མཛོད།  །དགྱེས་པའི་ཚུལ་གྱིས་བཞེས་སུ་གསོལ།  །རྒྱལ་བའི་བསྟན་པ་རྒྱས་པ་དང་།  །རྣལ་འབྱོར་བདག་ཅག་འཁོར་བཅས་ཀྱི།  །སྡིག་སྒྲིབ་ནད་གདོན་ཞི་བ་དང་།  །ཚེ་དང་དཔལ་འབྱོར་རྒྱས་པ་དང་།  །ཕྲིན་ལས་རྣམ་བཞི་མྱུར་འགྲུབ་པའི།  །མཆོག་དང་ཐུན་མོང་དངོས་གྲུབ་སྩོལ།  །འགྲོ་རྣམས་བྱང་ཆུབ་ཐོབ་པར་ཤོག  །དེ་ནས་ཕྲིན་ལས་རྣམ་པ་བཞི་དང་མཆོག་གི་དངོས་གྲུབ་ཐམས་ཅད་སྩོལ་བར་བསམ།  ཧཱུྃ།  ན་མོ།  །ཕྱི་སྣོད་འཇིག་རྟེན་གཏོར་གཞོང་དུ།  །ནང་བཅུད་སེམས་ཅན་གཏོར་མས་བཀང་།  །སྐྱེ་འཆི་མེད་པར་མཆོད་པ་བཞེས།  །ཕྱི་ནམ་མཁའ་ཡངས་པའི་གཏོར༴  །ནང་འབྱུང་བ་ལྔའི༴  །རང་གསལ་རང་དག་མཆོད༴  །བཀའ་ཕ་རོལ་ཕྱིན་དྲུག་གཏོར༴  །ས་བཅུ་དག་པའི༴  །མྱ་ངན་མི་འདའ༴  །བཀའ་རྫོགས་པ་ཆེན་པོའི༴  །ཐེག་པ་བརྒྱད་ཀྱི༴  །འཁོར་བ་རང་དག་བཅས་ཏེ༴  །ཀུན་གཞི་ཡངས་པའི༴  །རྣམ་ཤེས་ཚོགས་བརྒྱད༴  །འཕེལ་འགྲིབ་མེད་པའི༴  །རང་སེམས་གཉུག་མའི༴  །ལུས་ངག་ཡིད་གསུམ༴  །བརྗོད་དུ་མེད་པའི༴  །སྐྱེ་བ་མེད་པའི༴  །རིག་པ་ཚོགས་མང་༴  །འགྱུ་བ་རང་གྲོལ་བཅས་ཏེ་བཞེས།  ཆོས་སྐུ་དག་པའི༴  །གཟུགས་སྐུ་རྣམ་གཉིས༴  །ཐུགས་རྗེ་འགྲོ་དོན་བཅས་ཏེ༴  །སྟོང་པ་ཉིད་ཀྱི་གཏོར༴  །སྣང་བ་དཀར་དམར༴  །སྣང་མེད་ཆེན་པོའི༴  །རང་རྒྱུད་དག་པའི༴  །གཉིས་མེད་གདམས་ངག༴  །བདེ་བ་ཆེན་པོའི༴  །ཚོགས་གཉིས་དག་པའི༴  །བདེ་གསལ་མི་རྟོག༴  །ཆགས་ཞེན་མེད་པའི༴  །རང་ལུས་རྒྱལ་བའི༴  །སེམས་དད་གུས་གདུང་བའི༴  །རེ་དོགས་མེད་པའི༴  །ཀ་པཱ་ལ་ཡི༴  །ཤ་ཁྲག་དོན་སྙིང་༴  །ཆགས་ཞེན་མེད་པའི༴  །རིན་པོ་ཆེའི་གཏོར་གཞོང་དུ།  །དཀར་གསུམ་མངར་གསུམ་གཏོར་མས་བསྐང་།  །དགོས་འདོད་འབྱུང་བའི་མཆོད་པ་བཞེས།  །རྡོ་རྗེ་འཆང་ཆེན་མན་ཆད་དང་།  །རྩ་བའི་བླ་མ་ཡན་ཆད་ལ།  །བསྔོས་པ་བཞིན་དུ་ཚིམ་གྱུར་ཅིག  །བསམ་པ་བཞིན་དུ་འགྲུབ་གྱུར་ཅིག  །ཡུམ་ཆེན་ཤེར་ཕྱིན་མན༴  །གཅོད་ཀྱི་བརྒྱུད་པ་ཡན༴  །བསྔོས་པ༴བསམ་པ༴  །ཤཱཀྱ་ཐུབ་པ༴  །མཁན་པོ་སློབ་དཔོན༴  །བསྔོས་པ༴  །བསམ་པ༴  །དཀོན་མཆོག་གསུམ་པོ༴རིགས་དྲུག་སེམས་ཅན་ཡན་ཆད༴  །བསྔོས་པ༴བསམ་པ༴  །ཡི་དམ་ལྷ་ཚོགས༴  །འཇིག་རྟེན་ལྷ་འདྲེ༴བསྔོས་པ༴བསམ་པ༴  །རྡོ་རྗེ་ཕག་མོ༴  །གནས་གསུམ་མཁའ་འགྲོ༴བསྔོས་པ།  བསམ་པ༴  །ཡེ་ཤེས་མགོན་པོ༴  །འཇིག་རྟེན་བསྟན་སྲུང་༴བསྔོས་པ༴བསམ་པ༴དཔལ་ལྡན་ལྷ་མོ༴  །འཇིག་རྟེན་སྨན་མོ༴བསྔོས་པ༴བསམ་པ༴  །ཀུན་ཏུ་བཟང་པོ༴  །འཇག་མའི་སྲིན་བུ༴  །བསྔོས་པ༴བསམ༴ལྷ་གནས་སྲིད་རྩེ༴  །དམྱལ་ཁམས་བཅོ་བརྒྱད༴བསྔོས་པ༴བསམ་པ༴གནས་གདོན་ལུས་གདོན༴  །བག་ལ་ཉལ་བ༴བསྔོས་པ༴བསམ་པ༴  །གཏོར་མ་འདི་བསྔོས་བྱིན་རླབས་ཀྱིས།  །བདག་དང་མ་ལུས་སེམས་ཅན་རྣམས།  །ལུས་ལ་བདེ་བ་རྙེད་གྱུར་ཅིག  །ངག་ལ་ནུས་པ་འབར༴སེམས་ལ་རྟོགས་པ་འཆར་གྱུར་ཅིག  །མཆོག་གི་དངོས་གྲུབ་ཐོབ་པར་ཤོག  །སྦྱིན་པ་འདི་དང་དུས་གསུམ་གྱི།  །དགེ་བའི་རྩ་བ་མ་ལུས་པ།  །ཁམས་གསུམ་སེམས་ཅན་དོན་དུ་བསྔོ།  །རྣམ་མཁྱེན་སངས་རྒྱས་ཐོབ་པར་ཤོག  །དེ་ནས་རོལ་མོ་དང་དབྱངས་བྱ་ཞིང་།  ཆོས་དབྱིངས་རྣམ་པར་དག་པའི་ཕོ་བྲང་ནས།  །དངོས་སམ་བརྒྱུད་པའི་དཔལ་ལྡན་བླ་མ་རྣམས།  །ཟག་མེད་ཚོགས་ཀྱི་འཁོར་ལོའི་མཆོད་པ་བཞེས།  །སྐྱོན་མེད་ཡོན་ཏན་ཕུན་ཚོགས་ཕོ་བྲང་ནས།  །འདྲེན་མཆོག་དམ་པ་སྐྱབས་གནས་དཀོན་མཆོག་གསུམ།  །ཟག་མེད༴  །སྣང་སྟོང་ཆུ་ཟླ་ལྟ་བུའི་ཕོ༴  །བདེ་གསལ་མི་རྟོག་ཡི་དམ་ལྷ་ཚོགས་རྣམས།  །ཟག་མེད༴  །ཐུགས་རྗེ་ཕྱོགས་རིས་མེད་པའི༴  །བྱིན་རླབས་རྩ་བ་མ་ཚོགས་མཁའ་འགྲོ་རྣམས།  །ཟག་མེད༴  །བཀའ་དང་དམ་ཚིག་ཆེན་པོའི༴  །བསྟན་པ་སྐྱོང་མཛད་ཆོས་སྐྱོང་སྲུང་མ་རྣམས།  །ཟག་མེད༴  །ཕྱི་སྣོད་དག་པ་ཨོ་རྒྱན་ཕོ་བྲང་ནས།  །ནང་བཅུད་རིགས་དྲུག་མཁའ་འགྲོའི་རང་བཞིན་ལ།  །ཟག་མེད་ཚོགས་ཀྱི་འཁོར་ལོའི་མཆོད་པ་བཞེས།  ན་མོ།  ཐབས་ཤེས་གཉིས་སུ་མེད་པའི་རང་བཞིན་རྣམ་པར་དག་པ་སྐྱེ་བ་མེད་པ།  །ངོ་བོ་རྣམ་པར་དག་པ་ཨཱ་ལི་ཀཱ་ལི།  །མཚན་ཉིད་རྣམ་པར་དག་པ་ཤ་ལྔ་བདུད་རྩི་ལྔ།  །འབུལ་བའི་ཞིང་རྣམ་པར་དག་པ་རྗེ་བཙུན་རྩ་བ་དང་བརྒྱུད་པ་བཅས་པའི་དཔལ་ལྡན་བླ་མ་དམ་པ།  སྐྱབས་གནས་དཀོན་མཆོག་གསུམ་དཔའ་བོ་མཁའ་འགྲོ་ཆོས་སྐྱོང་སྲུང་མ་རྣམས་ལ་འབུལ་ལོ།  །གཞན་ཡང་དཀོན་མཆོག་གསུམ་གྱི་བཀའ་དང་འཁོར་ན་གནས་པའི་སྡེ་བརྒྱད་གཞི་བདག་གནས་བདག་འབྱུང་པོས་གཙོར་བྱས་རིགས་དྲུག་ལན་ཆགས་ཐམས་ཅད།  རིགས་ལྔའི་མཁའ་འགྲོ་ལྷར་གསལ་བ་ལ་འབུལ་ལོ།  །ཐམས་ཅད་དགྱེས་ཤིང་ཚིམ་ནས་རྐྱེན་ཕྱི་ནང་གི་བར་ཆད་ཐམས་ཅད་བསལ་ནས་མཆོག་དང་ཐུན་མོང་གི་དངོས་གྲུབ་སྩལ་དུ་གསོལ།  སྐབས་འདིར་ནད་པ་ཡོད་ན་མདུན་དུ་བསྙལ་ལ།  ཕཊཿརང་ཉིད་སྐད་ཅིག་གི་དུར་ཁྲོད་གྱི་བདག་མོ་ཁྲོས་མ་ནག་མོ་ཞལ་གཅིག་ཕྱག་གཉིས་སྤྱན་གསུམ་མཆེ་བ་བཞི་གཙིགས་པ།  ཕྱག་གཡས་མི་ལྤགས་ཀྱི་གཡང་གཞི་བརྡེབས་པ།  གཡོན་མི་རྐང་གི་གླིང་བུ་འབུད་པ།  མཐུ་སྟོབས་དང་ལྡན་པ།  གཟི་བརྗིད་དང་ལྡན་པ།  ཁམས་གསུམ་དབང་དུ་བསྡུད་པ།  སྲིད་གསུམ་ཟིལ་གྱིས་ནོན་པ།  དེའི་ཐུགས་ཀ་ནས་ལས་བྱེད་ཀྱི་མཁའ་འགྲོ་མ་དཔག་ཏུ་མེད་པ་འཕྲོས་པས།  གནོད་བྱེད་ཐམས་ཅད་རང་དབང་མེད་པ་མདུན་དུ་བཀུག་པར་གྱུར།  ཕཊཿན་མོ་སངས་རྒྱས་ཀྱི་བདེན་པ་དང་།  ཆོས་ཀྱི་བདེན༴དགེ་འདུན་གྱི༴མ་ཅིག་ཡེ་ཤེས་ཀྱི་མཁའ་འགྲོ་མ་ཁྲོས་མ་ནག་མོའི་ལྷ་ཚོགས་འཁོར་དང་བཅས་པའི་བདེན་པ་དང་།  བདེན་པ་ཆེན་པོའི་མཐུས།  བསྲུང་བྱ་འདི་ལ་དང་པོ་ནད་ཀྱི་སྣ་འདྲེན་པ།  བར་དུ་གདོན་གྱི་ཚང་བཅའ་བ།  ཐ་མར་ནད་ལ་མི་ཕན་པ་བྱེད་པ།  ནད་ནད་བདག་དང་བཅས་པ།  གདོན་སྣ་འདྲེན་དང་བཅས་པ་ཐམས་ཅད་སྐད་ཅིག་རང་དབང་མེད་པར་འདིར་ཁུག་ཅིག  །ཧཱུྃ་ཧཱུྃ་ཧཱུྃ།  ཛཿཕཊཿཅེས་དགུག་གཞུག་ལན་གསུམ་བྱས་ལ།  རྐང་དུང་བུས་ནས།  ཀྱཻ།  འདུས་ཤིག་འདུས་ཤིག་ཤ་ལ་འདུས།  །དབུགས་ལེན་ཐམས་ཅད་འདིར་འདུས་ཤིག  །བཤས་བཤའ་རོགས་ལས་སླེབས་པར་གྱིས།  །ཤ་བགོས་རོག་ལ་སླེབས་པར་གྱིས།  །འདྲེ་ཁྱེད་རྣམས་བདག་གི་ཕ་མ་ཡིན།  །བུ་ཡི་ཤ་ཁྲག་རོལ་དུ་ཤོག  །ཁྱོད་ནི་དྲིན་ཅན་ཕ་མ་ཡིན།  །ད་ལན་བཟང་ལེན་ལན་དུ་ཤོག  །སྔོན་ཆད་ལུས་འདི་གཅེས་པར་བཟུང་།  །རྒྱུ་དེས་ད་རུང་འཁོར་བར་འཁྱམས།  །ད་ནི་མི་ཆགས་སྟོན་མོར་འགྱེད།  །མགྲོན་རིགས་སྲིད་རྩེ་མན་ཆད་ནས།  །ན་རག་དམྱལ་ཁམས་ཡན་ཆད་ན།  །གནས་པའི་ལྷ་དང་ལྷ་མ་སྲིན།  །ཕོ་བདུད་ལས་ཀྱི་འགོང་པོ་འདུས།  །མོ་བདུད་ལས་ཀྱི་འདྲེ་མོ་འདུས།  །ཕོ་བདུད་རྒྱལ་འགོང་སྲོག་བདག༴  །མོ་བདུད་འདྲེ་མོ་སྲིན་མོ༴  །སྲིད་པའི་ཡུལ་ནས་འདྲེ་དགུ༴  །གཙུག་ལག་ཁང་གི་གདོན་བཅུ༴  །གཙོ་བོའི་གདོན་ཆེན་བཅོ་བརྒྱད༴  །བགེགས་རིགས་སྟོང་ཕྲག་བརྒྱད་ཅུ༴  །བྱིས་པའི་གདོན་ཆེན་བཅོ་ལྔ༴  །ཡེ་འགྲོག་སུམ་བརྒྱ་དྲུག་ཅུ༴  །གློ་བུར་དགུ་བཅུ་རྩ་གཅིག་འདུས།  །འདིར་ཤོག་འདིར་འདུས་ཤ་ཁྲག་རོལ།  །སྤྱི་བོ་ཚངས་བུག་མན་ཆད་ནས།  །རྐང་མཐིལ་སེན་མོ་ཡན་ཆད་ཀྱི།  །ལུས་འདི་ཕྱི་ནང་ཐམས་ཅད་ལ།  །ཁོ་བོས་ཆགས་ཞེན་མི་བྱེད་དོ།  །ཤ་ཟོས་ཁྲག་འཐུང་རུས་པ་མུར།  །མགོ་བོ་ཡན་ལག་དོན་སྙིང་ཁྱེར།  །ཐམས་ཅད་བག་ཕེབས་ཚིམ་པར་རོལ།  །ཞི་བར་གྱིས་ཤིག་བརླག་པར་གྱིས།  །ཕུང་བར་གྱིས་ཤིག་རྩ་བར་ཆོད།  །ཐུལ་ཅིག་ཆོམས་ཤིག་མཱ་ར་ཡ།  ཕཊཿཕཊཿདེ་ནས་ལག་པ་གཉིས་ཀྱིས་ཕུང་པོ་སྤར་བས་བཅད་ནས་མཆོད་སྦྱིན་བྱེད་ཚུལ་བྱ་ཞིང་།  རང་གི་སོར་མོ་རིགས་ལྔའི་མཁའ་འགྲོ་མ།  །དཀར་སེར་དམར་ལྗང་ཁྲི་ཕྲག་རེ་རེས་བསྐོར།  །ཕུང་པོ་བཅད་ཅིང་མགྲོན་རྣམས་མཆོད་པར་གྱུར།  ཕཊཿཕཊཿཤར་ཕྱོགས་གཏུམ་དྲག་དུར་ཁྲོད་ནས།  །མི་ཕྱེད་རྡོ་རྗེ་མཁའ་འགྲོ་མ།  །དཀར་མོ་འབུམ་གྱི་འཁོར་དང་བཅས།  །དབང་པོ་བརྒྱ་སྦྱིན་ལ་སོགས་པའི།  །ཤར་ཕྱོགས་དྲི་ཟའི་གདོན་ཚོགས་ལ།  །ལུས་ཤ་ཁྲག་མཆོད་སྦྱིན་འདི་བསྔོས་པས།  ཐམས་ཅད་ངོམས་ཤིང་ཚིམ་གྱུར་ནས།  །དགའ་མགུ་ཡི་རང་ལྡན་གྱུར་ཅིག  །ཕཊཿལྷོ་ཕྱོགས་གད་རྒྱངས་དུར་ཁྲོད༴  །རིན་ཆེན་མཁའ་འགྲོ་གཟི་བརྗིད་ཅན།  །སེར་མོ་འབུམ༴  །ཡ་མ་རཱ་ཙ་ལ་སོགས༴  །ལྷོ་ཕྱོགས་གཤིན་རྗེའི༴  །ལུས་ཤ་ཁྲག་སོགས་གོང་བཞིན་འགྲེས།  ཕཊཿནུབ་ཕྱོགས་པདྨ་འཁྱིལ་པའི༴  །པདྨ་མཁའ་འགྲོ་དྲི་མེད་མ།  །དམར་མོ༴  །ཝ་རུ་ཎ་ལ༴  །ནུབ་ཕྱོགས་ཀླུ་ཡི༴  །ལུས་ཤ་ཁྲག་སོགས།  ཕཊཿབྱང་ཕྱོགས་ཀི་ལ་ཡ་ཡི༴  །ལས་ཀྱི་མཁའ་འགྲོ་བདེ་བ་ཅན།  །ལྗང་མོ༴  །ཀུ་བེ་ར་ལ༴  །བྱང་ཕྱོགས་གནོད་སྦྱིན༴  །ལུས་ཤ་ཁྲག་སོགས།  ཕཊཿཤར་ལྷོ་རབ་འཇིགས༴  །དམ་ཚིག་མཁའ་འགྲོ་དམིགས་པ་ཅན།  །དཀར་མོ༴  །ཨགྣེ་ར་ལ༴  །ཤར་ལྷོ་དྲང་སྲོང་༴  །ལུས་ཤ་ཁྲག་སོགས།  ཕཊཿ།  ལྷོ་ནུབ་གཏུམ་པོའི༴  །སྣ་ཚོགས་མཁའ་འགྲོ་མི་ཐུབ་མ།  །དམར་སེར༴  །ནི་རི་ཏི་ལ༴  །ལྷོ་ནུབ་སྲིན་པོའི༴  །ལུས་ཤ་ཁྲག་སོགས།  ཕཊཿནུབ་བྱང་རབ་རྒྱུའི༴  །ཐམས་ཅད་མཁའ་འགྲོ་ཀུན་རྒྱུ་མ།  །དམར་ལྗང་༴  །བྷ་ཡ་བྷེ་ལ༴  །ནུབ་བྱང་རླུང་ལྷའི༴  །ལུས་ཤ་ཁྲག༴སོགས།  ཕཊཿབྱང་ཤར་རྒྱུག་བྱེད༴  །བརྒྱུད་འཛིན་འཇིག་རྟེན་མཁའ་འགྲོ་མ།  །དཀར་ལྗང་༴  །དབང་ཕྱུག་ཆེན་པོ༴  །བྱང་ཤར་བགེགས་ཀྱི༴  །ལུས་ཤ་ཁྲག་སོགས།  ཕཊཿསྟེང་ཕྱོགས་མཁའ་སྤྱོད༴  །དབྱིངས་ཕྱུག་སངས་རྒྱས་མཁའ་འགྲོ་མ།  མཐིང་ག༴  །ཚངས་པ་ཉི་ཟླ་གཟའ་སྐར་སོགས།  །སྟེང་ཕྱོགས་ལྷ་ཡི༴  །ལུས་ཤ་ཁྲག་སོགས།  ཕཊཿའོག་ཕྱོགས་ས་སྤྱོད་དུར་ཁྲོད་ནས།  །ལས་བྱེད་སྤྲུལ་པའི་མཁའ་འགྲོ་མ།  །ནག་མོ་འབུམ་གྱི་འཁོར་དང་བཅས།  །ལྷ་མོ་བརྟན་མ་ལ་སོགས་པའི།  །འོག་ཕྱོགས་ས་བདག་གདོན་ཚོགས་ལ།  །ལུས་ཤ་ཁྲག་སོགས།  ཕཊཿཕཊཿཕུང་པོ་རང་རང་ཡིད་དང་མཐུན་པ་ཡི།  །འདོད་ཡོན་ལོངས་སྤྱོད་དཔག་ཏུ་མེད་པ་རྣམས།  །མགྲོན་རྣམས་སོ་སོའི་ཞལ་དུ་བསྟབས་པ་ཡིས།  །དགའ་མགུ་ཡི་རང་བྱང་ཆུབ་སེམས་ལྡན་གྱུར།  ཕཊཿལྷ་དང་ཀླུ་དང་གནོད་སྦྱིན་དང་།  །ནམ་མཁའ་ལྡིང་དང་དྲི་ཟ་དང་།  །མིའམ་ཅི་དང་ལྟོ་འཕྱེ་ཆེ།  །འཁོར་ཚོགས་བྱེ་བ་ས་ཡ་བཅས།  །བཀའ་ཡི་ལྷ་སྲིན་སྡེ་བརྒྱད་ལ།  །ལུས་ཤ་ཁྲག་སོགས།  །འབྱུང་པོ་ཤ་ཟ་སྲིན་པོ་དང་།  །ཡི་དྭགས་ལན་ཆགས་འདྲེ་གདོན་རིགས།  །བགེགས་རིགས་སྟོང་ཕྲག་བརྒྱད་ཅུ་དང་།  །བྱིས་པའི་གདོན་ཆེན་བཅོ་ལྔ་དང་།  །སྲིད་པའི་འདྲེ་དགུ་གཙུག་ལག་གདོན།  །རྒྱལ་བསེན་གྲི་བོ་གྲི་མོ་དང་།  །ཆུང་སྲི་ཟ་འདྲེ་ཤི་གཤེད་སོགས།  །གནོད་བྱེད་བགེགས་རིགས་ཐམས་ཅད་ལ།  །ལུས་ཤ་ཁྲག་མཆོད་སྦྱིན་འདི་བསྔོས་པས།  །ཐམས་ཅད་ངོམས་ཤིང་ཚིམ་གྱུར་ནས།  །དགའ་མགུ་ཡི་རང་ལྡན་གྱུར་ཅིག  །ཕཊཿདེ་ནས་བསྐང་བ་བྱ་བ་སྤྲོ་ན།  བསྐང་རྫས་རྣམས།  ཨ་མྲྀ་ཏས་བསངས།  སྭ་བྷཱ་ཝས་སྦྱངས།  སྟོང་པའི་ངང་ལས་རང་ལུས་སྣོད་བཅུད་ཐམས་ཅད་ཕྱི་ནང་གསང་བའི་མཆོད་སྐོང་གི་རྫས་ཀྱིས་ས་དང་ནམ་མཁའ་བར་སྣང་ཐམས་ཅད་ཁྱབ་པར་གྱུར་པས་ནམ་མཁའ་མཛོད་ཀྱི་སྔགས་དང་ཕྱག་རྒྱ་ལན་གསུམ་གྱིས་བརླབ་ལ།  ཧཱུྃ།  བེམ་ཤུན་གཏོར་སྣོད་གསེར་གྱི་ས་གཞིའི་སྟེང་།  ཞག་དང་ཆུ་སེར་སྤོས་ཆུའི་ཆག་ཆག་གདབ།  །སེན་འཛུམ་ལྕགས་རི་མུ་ཁྱུད་ཕྲེང་བས་བསྐོར།  །ཡན་ལག་གླིང་བཞི་ཉིང་ལག་གླིང་ཕྲན་བརྒྱད།  །ཟོ་ཁོག་རི་རབ་མགོ་ནི་རྣམ་རྒྱལ་ཁང་།  །མིག་གཉིས་ཉི་ཟླ་རྒྱུ་མ་གསེར་རི་བདུན།  །ཁྲག་ནི་རོལ་མཚོ་སོ་ནི་རྒྱུ་སྐར་ཚོགས།  །རྣ་བ་གཉིས་ནི་གདུགས་དང་རྒྱལ་མཚན་ཏེ།  །ལྕེ་ནི་རྔ་ཡབ་བ་དན་ལྷུན་གྱིས་གྲུབ།  །ཀླད་སྤྲི་བླ་བྲེ་མཆིན་འཁྲི་ཡོལ་བ་དང་།  །ཨོལ་ཁྲང་རང་བྱུང་ཤེལ་གྱི་མཆོད་རྟེན་བརྒྱད།  །སྙིང་ནི་ནོར་བུ་གློ་བ་ཅང་ཤེས་རྟ།  །མིད་ཡུ་སྲོག་རྩ་དཔག་བསམ་ལྗོན་པའི་ཤིང་།  །མཚེར་པ་འདོད་འཇོའི་བ་མོ་ལྷུན་གྱིས་གྲུབ།  །ཕོ་བ་རིན་ཆེན་གཏེར་གྱི་བུམ་པ་དང་།  །ཤ་ཁྲག་འདོད་ཡོན་དཔག་མེད་བསྐང་རྫས་ཀྱིས།  །འཕགས་བཞི་སྐྱེད་ཡུམ་ཆོས་སྐུ་ཡུམ་ཆེན་མོ།  །ཤེས་རབ་ཕ་རོལ་ཕྱིན་མའི་ཐུགས་དམ་བསྐང་།  །སྲས་ནི་ཕྱོགས་བཅུ་དུས་གསུམ་བདེ་གཤེགས་ཚོགས།  །བྱང་སེམས་ཉན་རང་བཅས་པའི༴  །ངེས་པ་ལྔ་ལྡན་ལོངས་སྤྱོད་རྫོགས་པའི་སྐུ།  །ལོངས་སྐུ་གངས་ཅན་མཚོ་རྒྱལ༴  །ཡེ་ཤེས་ལྔ་ལྡན་སྐུ་ལྔ་ལྷུན་གྱིས་གྲུབ།  །བཅོམ་ལྡན་རིགས་ལྔ་ཡབ་ཡུམ༴  །མ་བརྒྱུད་ཀུན་གྱི་སྤྲུལ་གཞི་རྩ་བའི་ལྷ།  །རྗེ་བཙུན་འཕགས་མ་སྒྲོལ་མའི༴  །འཁོར་ལོ་ལྔ་ཡི་དཔའ་བོ་ཌཱ་ཀྐིའི་ཚོགས།  །བླ་མེད་དཀྱིལ་འཁོར་ལྷ་ཡི༴  །དམ་པ་རྒྱ་གར་ཨཱཪྻ་དེ་ཝ་སོགས།  །གཅོད་ཡུལ་བརྒྱུད་པའི་བླ་མའི༴  །གྲུབ་ཆེན་བརྒྱད་ཅུ་བཀའ་བབས་བཅུ་དྲུག་སོགས།  །རིག་འཛིན་གྲུབ་ཐོབ་རྣམས་ཀྱི༴  །ཡུམ་ཆེན་ཐུགས་སྤྲུལ་གངས་ཅན་འགྲོ་བའི་དཔལ།  །མ་ཅིག་ལབ་ཀྱི་སྒྲོན་མའི༴  །སྲས་མོ་ལ་འདུལ་ཐུགས་ཀྱི་སྲས་མོ་བཞི།  །ལབ་འདུལ་རྡོ་རྗེ་སྒྲོན་མའི༴  །ཁྱད་པར་ཨོ་རྒྱན་ཐུགས་ཀྱི་སྤྲུལ་པ་ཆེ།  །བདུད་དཔུང་ཀུན་འཇོམས་འཆི་མེད་ཐང་སྟོང་རྒྱལ།  །སྲས་སློབ་གཅོད་ཡུལ་བརྒྱུད་པར་བཅས་རྣམས་ཀྱི།  །ཐུགས་དམ་ཕྱི་ནང་གསང་བའི་མཆོད་པས་བསྐང་།  །རྩ་བརྒྱུད་བླ་མ་རྒྱལ་བ་སྲས་བཅས་ཀྱི།  །ཐུགས་དམ་གཉན་པོ་བསྐང་བའི་བྱིན་རླབས་ཀྱིས།  །ཉམས་ཆགས་སྡིག་སྒྲིབ་ཐམས་ཅད་བྱང་ནས་ཀྱང་།  །ཉམས་དང་རྟོག་པ་ཡར་ངོའི་ཟླ་བཞིན་འཕེལ།  །བྱིན་རླབས་མཛད་མེད་ཆུ་བོའི་རྒྱུན་བཞིན་སྩོལ།  །ཚེ་གཅིག་སངས་རྒྱས་འགྲུབ་བར་མཛད་དུ་གསོལ།  ཧཱུྃ།  བེམ་ཤུན་བྷནྡྷ་སྟོང་གསུམ་མཉམ་པའི་ནང་།  །ཕུང་པོ་ཤ་ལྔ་ཡེ་ཤེས་བདུད་རྩི་ལྔ།  །ཕུད་རླངས་སྒེག་སོགས་བརྒྱད་དང་མཆོད་ལྷ་ལྔ།  །མཆོད་པའི་ལྷ་མོ་བཅུ་དྲུག་ནམ་མཁར་གང་།  །སྙན་པའི་གླུ་དབྱངས་རྡོ་རྗེའི་གར་དང་བཅས།  །འདོད་ཡོན་མཆོད་སྤྲིན་ཟད་མེད་བསྐང་རྫས་འདིས།  །ཡི་དམ་བདུད་འདུལ་ཁྲོས་མའི༴  །བདེ་ཆེན་དཀར་མོ་སེར་མོ་དོན་གྲུབ་མ།  །དམར་མོ་སྒྲ་སྒྲོགས་སྣ་ཚོགས་མཐར་ཕྱིན་མ།  །ལྷན་ཅིག་སྐྱེས་མ་རྡོ་རྗེ་རྣལ་འབྱོར་མ།  །ཨོ་རྒྱན་གནས་ཀྱི་གཙོ་མོའི༴  །རྡོ་རྗེ་མཁའ་འགྲོ་རིན་ཆེན་མཁའ་འགྲོ་དང་།  །པདྨ་ལས་ཀྱི་མཁའ་འགྲོའི༴  །སྐུ་ལས་སྤྲུལ་པའི་ཌཱ་ཀིིི་དཀར་མོ་འབུམ།  །ཞི་བའི་ལས་མཛད་མ་ཡི༴  །གསུང་ལས་སྤྲུལ་པའི་ཌཱ་ཀིིི་དམར་མོ་འབུམ།  །དབང་གི་ལས་མཛད་མ་ཡི༴  །ཐུགས་ལས་སྤྲུལ་པའི་ཌཱ་ཀིིི་སྔོན་མོ་འབུམ།  །དྲག་པོའི་ལས་མཛད་མ་ཡི༴  །ཡོན་ཏན་སྤྲུལ་པའི་ཌཱཀྐི་སེར་མོ་འབུམ།  །རྒྱས་པའི་ལས་མཛད་མ་ཡི༴  །ཕྲིན་ལས་སྤྲུལ་པའི་ཌཱ་ཀི་ལྗང་མོ་འབུམ།  །སྣ་ཚོགས་ལས་མཛད་མ་ཡི༴  །སྐུ་ལས་སྤྲུལ་པའི་ཌཱ་ཀིི་འབུམ་ཕྲག་བཅུ།  །བྱིན་རླབས་དངོས་གྲུབ་འབེབ་མའི༴  །ཡི་དམ་ཕག་ཁྲོས་ལྷ་ཚོགས་འཁོར་བཅས་ཀྱི།  །ཐུགས་དམ་གཉན་པོ་བསྐང་བའི་བྱིན་རླབས་ཀྱིས།  །དངོས་གྲུབ་མཛད་མེད་ཆུ་བོའི་རྒྱུན་བཞིན་སྩོལ།  །ལུས་ངག་ཡིད་གསུམ་བསྲུང་ཞིང་སྐྱོབ་པ་དང་།  །བསྐྱེད་རྫོགས་བརྟན་ཐོབ་སྣང་སྲིད་དབང་དུ་འདུས།  །འཇའ་ལུས་མཁའ་སྤྱོད་འགྲུབ་པར་མཛད་དུ་གསོལ།  ཧཱུྃ།  བེམ་ཤུན་བྷནྡྷ་ལྕང་ལོར་བཅས་པའི་ནང་།  །ཕུང་པོ་ཤ་ཁྲག་རུས་པ་བདུད་རྩིའི་མཚོ།  །ཕུད་རླངས་ལས་བྱེད་ཌཱ་ཀིི་མཁའ་འགྲོའི་ཚོགས།  །སྨན་རཀ་གཏོར་མ་ཐོགས་པས་བར་སྣང་གང་།  །བསྐང་རྫས་སྒྲུབ་རྫས་རྟེན་རྫས་སྤྲིན་ལྟར་གཏིབ།  །བྱ་ནག་ཁྱི་ནག་གཡག་ནག་རྟ་ནག་འཕྱོ།  །གོ་མཚོན་དར་ནག་ལ་སོགས་བསྐང་རྫས་འདིས།  །རྡོ་རྗེ་ཁྲོས་མ་ནག་མོའི༴  །ཐུགས་རྗེ་ཁྲོས་པས་གདུག་པ་འདུལ་མཛད་པ།  །མྱུར་མཛད་ཡེ་ཤེས་མགོན་པོའི༴  །རྡོ་རྗེ་གུར་གྱི་མགོན་པོའི༴  །འདོད་ཁམས་དབང་ཕྱུག་ས་བརྒྱད་སེམས་མ་ཆེ།  །དཔལ་ལྡན་རེ་མ་ཏི་ཡི༴  །དགྲ་བོའི་སྟོབས་འཕྲོགས་དཔལ་མགོན་གདོང་བཞི་པ།  །བྲམ་ནག་ཤན་པ་དྲུག་གི༴  །ཀྵེ་ཊ་པཱ་ལ་ལ་སོགས་གནོད་སྦྱིན་བཞི།  །གཙང་རིགས་དཔལ་མགོན་བཅས་པའི༴  །ཞི་བྱེད་བརྒྱུད་པའི་སྲུང་མ་ནག་པོ་ཆེ།  །མགོན་པོ་ཨ་གྷོ་ར་ཡི༴  །གནོད་སྦྱིན་ནོར་ལྷ་རྒྱ་མཚོའི་སྡེ་དཔོན་ཆེ།  །རྒྱ་ཆེན་རྣམ་མང་ཐོས་སྲས༴  །ཟློག་བྱེད་མ་དང་ནོར་རྒྱུན་མ་པ་སོགས།  །འཁོར་དང་ཡང་འཁོར་བཅས་པའི༴  །གཅོད་ཡུལ་བཀའ་སྲུང་དུར་ཁྲོད་ཀུན་ན་བཞུགས།  །དུར་ཁྲོད་བདག་པོ་ཡབ་ཡུམ༴  །ལས་མཁན་མཚན་མོ་སྒྲ་སྒྲོགས་གཅེར་བུ་མང་།  །ཤ་ཟ་ཞིང་སྐྱོང་མཁའ་འགྲོའི༴  །བུད་མེད་ནག་མོ་ལྕགས་སྤྱང་མགོ་དགུ་བཅིབས།  །ལྷ་མོ་སྤྱང་ཞོན་མ་ཡི༴  །བུད་མེད་དམར་མོ་མཚལ་སྟག་མགོ་དགུ་བཅིབས།  །ལྷ་མོ་སྟག་ཞོན་མ་ཡི༴  །བུད་མེད་ནག་མོ་ཟངས་འཕར་མགོ་དགུ་བཅིབས།  །ལྷ་མོ་འཕར་ཞོན་མ་ཡི༴  །མགོ་དགུ་མིག་མང་འོད་འཕྲོ་སྦྲུལ་མཇུག་ཅན།  །ཤམ་པོའི་གཟའ་བདུད་མགོ་དགུའི༴  །ཐོག་གི་བུ་ཡུག་གདོང་མོ་མཆེད་སྡེ་བཞི།  །སྤྲུལ་པའི་གཟའ་བརྒྱད་འཁོར་བཅས༴  །བཙན་རྒོད་འབར་བ་མ་རུངས་མཆེད་སྡེ་བདུན།  །ཟངས་རི་འཁྱིལ་པ་འཁོར་བཅས༴གཅོད་ཡུལ་བརྒྱུད་པའི་ཆོས་སྐྱོང་ཐམས་ཅད་ཀྱི།  །ཐུགས་དམ་གཉན་པོ་བསྐང་བའི་བྱིན་རླབས་ཀྱིས།  །གཅོད་ཡུལ་བསྟན་པ་དར་ཞིང་རྒྱས་པ་དང་།  །རྣལ་འབྱོར་བདག་གི་ཕྲིན་ལས་རྣམ་པ་བཞི།  །གང་བཅོལ་ཐོགས་པ་མེད་པར་སྒྲུབ་པ་དང་།  །བསྟན་དགྲ་རྩད་ནས་བརླག་པའི་ཕྲིན་ལས་མཛོད།  ཧཱུྃ།  བེམ་ཤུན་བཻཌཱུར་ས་གཞི་མིག་མང་རིས།  །ཁྲག་རྣམས་འོ་མའི་མཚོ་རྫིང་ནེའུ་སེང་།  །ཤ་རུས་རིན་ཆེན་རི་བོ་གཞལ་ཡས་ཁང་།  །དཀར་གསུམ་མངའ་གསུམ་སྨན་འབྲུ་རིན་པོ་ཆེ།  །དར་ཟབ་ཤིང་ཏོག་ཀླུ་སྨན་བདུད་རྩིའི་མཚོ།  །བྱ་རིགས་རི་དྭགས་གཅན་ཟན་ཆུ་གནས་སོགས།  །བསྐང་རྫས་སྣ་ཚོགས་འཛད་མེད་ལོངས་སྤྱོད་འདིས།  །གནོད་སྦྱིན་ཞང་བློན་རྡོ་རྗེ་བདུད་འདུལ་བ།  །ཡབ་ཡུམ་འཁོར་དང་བཅས་པའི༴  །ནོར་ལྷ་མཆེད་བརྒྱད་གནོད་སྦྱིན་བརྒྱད་ཁྲིའི་ཚོགས།  །འབྲོགས་གནས་མཆེད་ལྔར་བཅས་པའི༴  །ཡུལ་འཁོར་སྲུང་དང་འཕགས་སྐྱེས་སྤྱན་མི་བཟང་།  །རྣམ་ཐོས་སྲས་པོ་འཁོར་བཅས༴  །ཐང་ལྷ་ཡར་བཞུད་འོད་དེ་གུང་རྒྱལ་དང་།  །མཁའ་རི་ཤམ་པོ་རྣམས་ཀྱི༴  །བརྟན་མ་བཅུ་གཉིས་སྨན་ཕྲན་འབུམ་དང་བཅས།  །ཀླུ་རྒྱལ་དྲག་པོ་ཟླ་སྐྱོང་༴  །གཞན་ཡང་མ་ཅིག་ལབ་ཁྱེར་སྒྲོན་མ་དང་།  །གྲུབ་པའི་དབང་ཕྱུག་ཐང་སྟོང་རྒྱལ་པོ་ཡི།  །དམ་བཏགས་སྡེ་བརྒྱད་ཀུན་གྱི༴  །ཡུལ་ཕྱོགས་འདིར་གནས་གཞི་བདག་དཀར་པོའི་ཕྱོགས།  །ཆོས་ལ་དགའ་བ་རྣམས་ཀྱི༴  །དེ་ལྟར་ཐུགས་དམ་བསྐང་བའི་བྱིན་རླབས་ཀྱིས།  །ལོངས་སྤྱོད་འཛད་མེད་ཆུ་བོའི་རྒྱུན་བཞིན་སྩོལ།  །གཞི་བྱེས་ལམ་གསུམ་གར་འགྲོ་གར་འདུག་ཀྱང་།  །བསྐྱེལ་བསུ་རོགས་ལྡན་ཁ་འཛིན་མ་གཡེལ་ཅིག  །ཉིན་གྱི་བྱ་ར་མཚན་གྱི་མེལ་ཚེ་མཛོད།  །བཀྲ་ཤིས་བདེ་ལེགས་འགྲུབ་པར་མཛད་དུ་གསོལ།  །དེ་མཚམས་ལས་ཀྱི་རྡོ་རྗེས་ལག་པ་གཡས་སུ་ཐོད་ཆང་བཟུང་།  གཡོན་པས་དེ་སྟེང་མཐེབ་སྲིན་སྦྱར་བས་ཤ་བཟུང་ལ།  འདི་ནི་ཆོས་རྣམས་བཟང་པོར་ལྟོས།  །འདུས་པ་རྣམས་ལ་ཐེ་ཚོམ་མེད།  །བྲམ་ཟེ་ཁྱི་དང་གདོལ་པ་གསུམ།  །རང་བཞིན་གཅིག་ཏུ་དགོངས་ཏེ་རོལ།  །ཅེས་དམ་རྫས་བསྐོར་ཞིང་།  ལེན་པ་པོས་པད་བསྐོར་སྔོན་དུ་འགྲོ་བས་རྩེ་གསུམ་གྱི་ཕྱག་རྒྱ་སྟོན་ཏོ།  །ཨོཾ་ཨཱཿཧཱུྃཿཨ་ལ་ལ་ཧོ།  བདེ་གཤེགས་ཆོས་ལ་རིན་ཐང་མེད།  །འདོད་ཆགས་ལ་སོགས་དྲི་མ་བྲལ།  །བཟུང་དང་འཛིན་པ་རྣམ་པར་སྤང་།  །དེ་ཁོ་ན་ཉིད་ལ་བདག་གུས་སོ།  །ཨ་ཧོ་མ་ཧཱ་སུ་ཁ།  ཅེས་བླང་ལ།  ཐོག་མར་ཆང་དཔའ་མོས་མ་སྤྱོད་བར་དཔའ་བོས་མི་སྤྱོད།  ཤ་དཔའ་བོས་མ་སྤྱོད་པ་དཔའ་མོས་མི་སྤྱོད་གསུངས།  །བཅུ་པ་ལྷག་མ་བསྔོ་ཞིང་རྡོ་རྗེའི་གླུ་དང་བསྟོད་བསྐུལ་གཏོར་སྟབས་བྱ་བ་ནི།  ལྷག་མ་བསྡུས་ལ།  ཨོཾ་ཨ་ཀཱ་རོ༴སོགས་ལན་གསུམ་བརྗོད།  སློབ་དཔོན་གྱིས་ལྷག་མར་ཁ་ཕྲུ་བཏབ་སྟེ།  ཧཱུྃ།  དབྱིངས་མ་མོ་ཁྲོ་གཟུགས་ཕྱི་འཁོར་སྐྱོང་།  །འཁོར་འདས་དང་ཕོ་ཉ་དམ་ཚིག་པ།  །ཡང་ལས་བྱེད་ཤ་ཟ་ཌཱ་ཀིའི་ཚོགས།  རྫས་ལྷག་གཏོར་འདི་བཞེས་ཕྲིན་ལས་སྒྲུབས།  ཨོཾ་ཨུཥྩིཊ་བྷ་ལིཾ་ཏ་བྷཱཀྵཱ་བྷྱ་སྭཱ་ཧཱ།  ལན་གསུམ།  ལྷག་མ་ལ་དབང་པའི་འབྱུང་པོའི་ཚོགས་ཐམས་ཅད་ཚིམ་པར་གྱུར་ཅིག  །ལྷག་མ་གནས་ཁང་གི་ཕྱི་རོལ་དུ་དོར་ལ་རྡོ་རྗེའི་གླུ་བླང་བ་ན།  ཅང་དྲིལ་གྱིས་སྒྲ་དང་བཅས།  ཀ་མཿཀྲོ་ཏཿམ་ཧཱཿལ་ས།  ཨ་ཀ་ར།  ནིརྨ་ཀཱ་ཡ།  སཾ་བྷོ་ཀཱ་ཡ།  མ་ཧཱ།  དྷརྨཱ་ཀཱ་ཡ།  ཀུ་སུ་དྷི་ན་ཀཱ་ཡ།  གུ་རུ།  གུ་ཡ།  མུ་ཏ་པ་ལ་སུ་མུ་ཀུ་ཀཱ་ཡ་པཉྩ།  ཛྙཱ་ན་མུ་དྲ།  མ་ཧཱ་མུ་དྲ།  ཀརྨ་མུ་དྲ།  མུ་ཏྲ་ཨོཾ་ཏེ་ས་མྨ་རཱ།  ས་ཀ་ཀཾ་ཀར།  བོ་ལ།  ཀཱཀྐོ་དྷ་ར་དུ་ར།  མ་ཧཱ་རྣ་ཙ་ཡ།  ཀཱ་མ་བཛྲ་སུ་ཀུ།  ཙ་ལ་ཏ་ལ།  ཏ་ལ།  བྷ་ཡ་བྷ་ཡ།  ཀརྨ་མུ་ཏྲ།  སུ་ཀུ་མ་ཧཱཿཨ་ཧོཿསུ་ཁ་ཧོཿཕུན་སུམ་ཚོགས་པ༴སོགས་བཀྲ་ཤིས་དང་།  སེམས་ཅན་ཐམས་ཅད་བདེ་གྱུར་ཅིག༴སོགས་དང་།  ལྷ་མོ་ཚད་མ༴སོགས་ཀྱི་སྨོན་ལམ་བཏབ་བོ།  །གསུམ་པ་རྗེས་ཀྱི་རིམ་པ་ལ།  བསྟོད་བསྐུལ་བྱ་བ་ནི།  ཀྱཻ།  མ་མི་མིན་ཡེ་ཤེས་མཁའ་འགྲོ་མ།  །དབུས་ཕྱོགས་སངས་རྒྱས་རིགས་ཀྱི་ཌཱ་ཀི་འབུམ།  །ཡང་དག་བདེ་ཆེན་བསྐྱེད་པའི་ཌཱ་ཀི་ལ།  །དད་མོས་དྲག་པོས་སྟོབས་ཀྱིས་གསོལ་བ་འདེབས།  །ཐུགས་རྗེ་རྒྱུན་ཆད་མེད་པར་དགོངས་མཛད་ལ།  །ལས་ཅན་ཕོ་མོ་རྣམས་ལ་བྱིན་གྱིས་རློབས།  །དད་ལྡན་སྐྱེས་བུ་རྣམས་ལ་བཅུད་དུ་ཕོབ།  ཕཊཿཕཊཿརྒྱས་པ་ལ་འགྲེས་ཡིན་ཀྱང་བསྡུ་ན།  ཀྱཻ།  མ་མི་མིན་ཡེ་ཤེས་མཁའ་འགྲོ་མ།  །ཤར་ཕྱོགས་རྡོ་རྗེ་རིགས་ཀྱི་ཌཱ་ཀི་འབུམ།  །ལྷོ་ཕྱོགས་རིན་ཆེན་རིགས༴  །ནུབ་ཕྱོགས་པདྨ་རིགས༴  །བྱང་ཕྱོགས་ལས་ཀྱི་རིགས་ཀྱི་ཌཱ་ཀི་འབུམ།  །ཡང་དག་བདེ་ཆེན་བསྐྱེད་པའི་ཌཱ་ཀི་ལ།  སོགས།  ཕཊཿཕཊཿགཙོ་མོའི་ཐུགས་ལས་སྤྲུལ་པའི་མཁའ་འགྲོ་བྱེ་བ་ལ་གསོལ་བ་འདེབས་པ་ནི།  ཀྱཻ།  མ་མི་མིན་ཡེ་ཤེས་མཁའ་འགྲོ་མ།  །སྤྱན་གསུམ་བར་སྣང་མཁའ་ལ་གཟིགས་པ་ལ།  །དུས་གསུམ་ཐོག་མེད་གཟིགས་པའི་ཌཱ་ཀི་འབུམ།  །མི་མགོ་སུམ་བརྩེགས་རབ་ཏུ་བརྒྱན་པ་ལ།  །ཁམས་གསུམ་དབང་དུ་སྡུད་པའི་ཌཱ་ཀི༴  །ཐོད་སྐམ་ལྔ་ཡི་དབུ་ལ་བརྒྱན་པ་ལ།  །རིགས་ལྔས་འགྲོ་དོན་མཛད་པའི༴  །ཐོད་རློན་ལྔ་བཅུའི་དོ་ཤལ་བྱས་པ་ལ།  །འཁྲུལ་པ་ལྔ་བཅུ་རྩ་གཅིག་ཟད་པའི༴  །དབུ་སྐྲ་སིལ་མས་སྐུ་རྒྱབ་ཁེངས་པ་ལ།  །སེམས་ཅན་བདེ་བར་བཀོད་པའི༴  །རུས་པའི་རྒྱན་དྲུག་སྐུ་ལ་བརྒྱན་པ་ལ།  །རྟོག་མེད་ཉམས་དང་ལྡན་པའི༴  །ཡང་དག་བདེ་ཆེན་བསྐྱེད་པའི་ཌཱ་ཀི་ལ།  དད་མོས་དྲག་པོའི་སྟོབས་ཀྱིས་གསོལ་བ་འདེབས།  སོགས་གོང་ལྟར་རོ།  །ཕཊཿཕཊཿཀྱཻ།  མ་མི་མིན་ཡེ་ཤེས་མཁའ་འགྲོ་མ།  །ཁ་ཊྭཱྃ་རྩེ་གསུམ་རབ་ཏུ་བརྒྱན་པ་ནི།  །སྲིད་གསུམ་ཟིལ་གྱིས་གནོན་པའི་ཌཱ་ཀི་འབུམ།  །བྃ་ཆེན་གདན་ལ་བརྐྱང་སྐུམ་བཞུགས་པ་ནི།  །འགྲོ་དྲུག་གནས་ནས་འདྲེན་པའི་ཌཱ་ཀི༴  །ཌཱ་རུ་ཅང་ཏེའུ་གསེར་གྱི་རྔེའུ་ཆུང་ནི།  །དོན་དམ་སྙན་བརྒྱུད་འཛིན་པའི༴  །གསེར་གྱི་དྲིལ་བུ་གཡེར་ཀས་གསུང་སྙན་སྒྲོགས་པ་ལ།  །སྟོང་གསུམ་ཆོས་སྒྲ་སྒྲོགས་པའི༴  །དར་གྱི་འཕུར་ལྕེས་རབ་ཏུ་བརྒྱན་པ་ནི།  །སྤྲུལ་པ་ཡང་སྤྲུལ་འགྱེད་པའི༴དུར་ཁྲོད་ཤ་ལ་རོལ་པ་མཛད་པ་ནི།  །ཡེ་ཤེས་རོལ་པར་མཛད་པའི༴  །ཡང་དག་བདེ་ཆེན་བསྐྱེད་པའི་ཌཱ་ཀི་ལ།  གོང་ལྟར་སོགས།  ཕཊཿཕཊཿའབུམ་བསྐུལ་འདི་མ་གཅིག་གིས་མཛད་པ་ཡིན་ནོ།  །ཐུན་གཏོར་འབུལ་བ་ནི།  ཐུན་གཏོར་ལ་ཁྲག་ཆང་གིས་བྲན་ལ།  དབྱིངས་ཡུམ་ཤེས་རབ་ཕ་རོལ་ཕྱིན།  །རྡོ་རྗེ་ཕག་མོ་ལབ་ཁྱེར་སྒྲོན།  །མཁའ་འགྲོ་སྡེ་ལྔ་འབུམ་སྡེའི་ཚོགས།  །གཞན་ཡང་མཁའ་འགྲོ་བསམ་མི་ཁྱབ།  །ཀུན་གྱི་ལས་བྱེད་དབང་མོ་ཆེ།  །གསང་བ་ཡེ་ཤེས་མཁའ་འགྲོ་མ།  །ཞབས་གཉིས་དབང་ཆེན་ས་ལ་བརྟེན།  །སྐུ་སྟོད་རི་རབ་དག་ལ་མཛད།  །ཕག་ཞལ་སྲིད་པའི་རྩེ་ལ་རྔམ།  །དམར་ལ་འཁྲུགས་པའི་སྤྱན་གསུམ་འབར།  །ཞལ་གདངས་མཆེ་བའི་སེར་རྐང་བརྩིགས།  །ལྗགས་ཀྱི་གློག་འཁྱུག་ཧཱུྃ་ཕཊ་བྷྱོའི།  །འབྲུག་སྒྲ་དྲག་པོ་ཆེར་སྒྲོགས་པས།  །དགྲ་བགེགས་ཀླད་པ་འགེམས་པར་བྱེད།  །དབུ་སྐྲ་རལ་པ་བསིགས་པ་ཡིས།  །རྡོ་རྗེའི་ཐོག་སེར་ཆེམ་ཆེམ་འབེབས།  །དགྲ་བགེགས་ཐལ་བ་རྡུལ་དུ་བརླག  །ཤངས་ནས་བསྐལ་པའི་རླུང་ནག་འཚུབ།  །གནོད་བྱེད་རྒྱ་མཚོའི་ཕ་མཐར་སྐྲོད།  །ཕྱག་གཡས་གྲི་གུག་འབར་བ་ཡིས།  །གཟུང་འཛིན་མདུད་པར་དུམ་བུར་གཅོད།  །གཡོན་པར་ཐོད་ཁྲག་ཆེར་བཀང་ནས།  །སྒྲུབ་ལ་དངོས་གྲུབ་བདུད་རྩི་སྩོལ།  །བགེགས་ལ་ཁྲག་གི་ཟོར་དུ་འཕོངས།  །མཆན་ཁུང་ཁ་ཊྭཱྃ་འབར་བ་ཡིས།  །སྲིད་ཞིའི་ཡོན་ཏན་མ་ལུས་རྫོགས།  །མཁའ་འགྲོ་འབུམ་སྡེའི་སྤྲུལ་པར་འགྱེད།  །ཕྲིན་ལས་རྣམ་བཞིའི་ལས་ཀུན་སྒྲུབས།  །ཁྱོད་ཉིད་དགྱེས་པའི་དམ་རྫས་མཆོག  །གཏོར་མ་ཤ་ཆང་རྒྱན་ལྡན་འབུལ།  །བདག་གིས་བཅོལ་པའི་ཕྲིན་ལས་སྒྲུབས།  །མི་མཐུན་རྐྱེན་ངན་བར་ཆད་སོལ།  །མཐུན་པའི་དངོས་གྲུབ་བདག་ལ་སྩོལ།  །ཞེས་གཏོར་མ་ཕུལ་ལོ།  །གསུམ་པ་རྗེས་ཀྱི་རིམ་པ་ལ་གསུམ་ལས།  དང་པོ་མཆོད་བསྟོད་ནོངས་བཤགས་བྱ་བ་ནི།  མཆོད་པ་རྣམས་ཁ་གསོས་ལ་བསང་སྦྱངས་དང་།  སྟོང་པའི་ངང་ལས་བྷྲཱུྃ་ལས་སོགས་ནས་མཆོད་པ་བྱིན་རླབས་ལྟར་གོང་བཞིན་བྱ།  ཨོཾ་ཤྲཱི་བཛྲ་བྷ་རཱ་ཧི་ཨརྒྷཾ་སོགས་ཆུ་གསུམ་སྔོན་འགྲོའི་ཉེར་སྤྱོད་ཕུལ།  དྷརྨ་ར་ཎི་ཏ་བརྗོད།  ནང་མཆོད་ཕུལ་ལ།  བསྟོད་པ།  དཔལ་ལྡན་རྡོ་རྗེ་མཁའ་འགྲོ་མ།  སོགས་ཤྭ་ལོ་ཀ་གཉིས་དང་།  ཞེ་སྡང་རྣམ་དག་ཆོས་དབྱིངས་སོགས་ནས།  མཁའ་འགྲོ་སྡེ་ལྔར་བསྟོད།  ཅེས་པའི་བར་དང་།  བསྟོད་པར་འོས་པ་ཐམས་ཅད་ལ།  སོགས་ཀྱིས་བསྟོད།  འདོད་དོན་གསོལ་བ་ནི།  རྗེ་བཙུན་རྡོ་རྗེ་ཕག་མོས་བདག་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ།  །ཞེས་སོགས་ཇི་ལྟར་རིགས་པས་འདོད་དོན་གསོལ།  རྡོ་རྗེ་སེམས་དཔའི་ཡིག་བརྒྱ་ཚར་གསུམ་དང་།  ཨོཾ་བཛྲ་སཏྭ་ཨཱཿཚར་བདུན་བཟླས་ནས།  ཐལ་མོ་སྦྱར་ལ།  ཧཱུྃ།  བདེ་གཤེགས་རྣམས་ཀྱི་མཆོག་ཏུ་གྱུར་པ་ནི།  རྩ་བའི་བླ་མ་ཡིན་པར་མ་ཤེས་པ།  །འབད་རྩོལ་གཞན་དུ་བཙལ་བ་དེ།  །མ་སྤྲུལ་པའི་སྐུ་ལ་མཐོལ་ལོ་བཤགས།  །རང་སེམས་ཡིད་བཞིན་ནོར་བུ་དེ།  །དགོས་འདོད་འབྱུང་བ་མ་ཤེས་པ།  །དངོས་གྲུབ་གཞན་དུ༴  །མ་སྤྲུལ་པའི་སྐུ༴  །རང་སེམས་རྩ་བ་ཆོད་པ་དེ།  །ཆོས་སྐུ་ཡིན་པར་མ༴  །སངས་རྒྱས་གཞན་དུ༴  །མ་སྤྲུལ་པའི་སྐུ༴  །རྣམ་རྟོག་རང་བཞིན་ཤེས་པ་དེ།  །སྐྱེ་མེད་ཡིན་པར༴  །གཉེན་པོ་གཞན་དུ༴  །མ་སྤྲུལ་པའི༴  །གཞན་རྟོག་རྩ་བ་ཆོད་པ་དེ།  །སྙེམས་ཀྱི་རྩ་བར༴  །ལྷ་འདྲེ་གཞན་དུ༴  །མ་སྤྲུལ་པའི༴  །སྣང་བ་སེམས་ཀྱི་ཆོ་འཕྲུལ་དེ།  །རང་ལས་བྱུང་བ༴  །ཡུལ་སྣང་གཉིས་སུ་འཛིན་པ་དེ།  །མ་སྤྲུལ་པའི་སྐུ༴  །ཁམས་གསུམ་སེམས་ཅན་ཐམས་ཅད་ཀུན།  །ཕ་མ་ཡིན་པར༴  །གཞན་ལ་གནོད་པ་སྐྱལ་བ་དེ།  །མ་སྤྲུལ་པའི་སྐུ་ལ༴  །གདམས་ངག་བདུད་ཀྱི་གཅོད་ཡུལ་དེ།  །སྣོད་ངན་ཡིན་པར༴  །རྒྱལ་ཁམས་ཡོངས་ལ་སྤེལ་བ་དེ།  །མ་སྤྲུལ་པའི་སྐུ་ལ་མཐོལ་ལོ་བཤགས།  །གཉིས་པ་དབང་བླང་ཞིང་གཤེགས་བསྡུ་བྱ་བ་ནི།  ཚོགས་ཞིང་ཐམས་ཅད་འོད་དུ་ཞུ་ནས་སྤྱི་བོའི་བླ་མ་མ་ཅིག་ལ་ཐིམ།  མ་ཅིག་ལབ་ཁྱེར་སྒྲོན་མའི་དཔྲལ་མགྲིན་སྙིང་གའི་ཨོཾ་ཨཱཿཧཱུྃ་གསུམ་ལས་འོད་ཟེར་དཀར་དམར་མཐིང་གསུམ་བྱུང་བ་རང་གི་གནས་གསུམ་དུ་ཐིམ་པས་ལུས་ངག་ཡིད་གསུམ་ཐ་དད་དུ་འཛིན་པའི་སྡིག་སྒྲིབ་བག་ཆག་དང་བཅས་པ་ཐམས་ཅད་བྱང་ཞིང་དག  །དབང་བཞི་ཐོབ།  ལམ་བཞི་བསྒོམ་པ་ལ་དབང་།  འབྲས་བུ་སྐུ་བཞིའི་ས་བོན་རྒྱུད་ལ་བཞག  །དེ་ནས་མ་ཅིག་དེ་སྤྱི་བོ་ནས་རང་ལ་ཐིམ་པས་ཡེ་ཤེས་མཁའ་འགྲོ་མའི་སྐུ་གསུང་ཐུགས་དང་རང་གི་ལུས་ངག་ཡིད་གསུམ་དབྱེར་མེད་ཟུང་འཇུག་ཕྱག་རྒྱ་ཆེན་པོའི་ངང་ལ་མཉམ་པར་བཞག  །མདུན་གྱི་གཏོར་མགྲོན་རྟེན་ཡོད་པ་རྣམས་ལ་རྟེན་བཞུགས་ནི་མེ་ཏོག་དང་བཅས་ཐལ་མོ་སྦྱར་ཏེ།  ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ།  ཇི་སྲིད་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་མི་གནས་པའི་ས་ལ་མ་བཞག་གི་བར་དུ་སངས་རྒྱས་རྣམས་མྱ་ངན་ལས་མི་འདའ་བར་བརྟན་པར་བཞུགས་སུ་གསོལ།  བརྟན་པར་བཞུགས་ནས་བདག་དང་སེམས་ཅན་ཐམས་ཅད་ལ་མགོན་དང་སྐྱབས་དང་དཔུང་གཉེན་དམ་པ་མཛད་དུ་གསོལ།  ཨོཾ་སུ་པྲ་ཏིཥྛ་བཛྲ་ཡེ་སྭཱ་ཧཱ།  རྟེན་མེད་ན།  ཨོཾ་ཁྱེད་ཀྱི་སེམས་ཅན་སོགས་དང་།  བཛྲ་མུཿཡེ་ཤེས་པ་གཤེགས།  འཇིག་རྟེན་པའི་མགྲོན་རྣམས་ལ།  མཆོད་སྦྱིན་གནས་འདིར་སོགས་དང་།  སརྦ་བིགྷྣཱན་གཙྪས་གཤེགས།  དམ་ཚིག་པ་རྣམས་བདག་ལ་ཛཿཧཱུྃ་བྃ་ཧོཿབདག་ཉིད་ཀྱི་དཔྲལ་བར་ཨོཾ་དཀར་པོ།  མགྲིན་པར་ཨཱཿདམར་པོ།  ཐུགས་ཀར་ཧཱུྃ་སྔོན་པོ།  གསུམ་པ་བསྔོ་སྨོན་ཤིས་བརྗོད་ནི།  དགེ་བ་འདི་ཡི་མྱུར་དུ་བདག  །རྡོ་རྗེ་ཕག་མོ་འགྲུབ་གྱུར་སོགས།  བདག་གི་དུས་གསུམ་དགེ་བ་ཅི་བསགས་པ།  སོགས།  སྒྱུ་མ་ལྟ་བུའི་དགེ་བའི་རྩ་བ་འདིས།  །སྒྱུ་མ་ལྟ་བུའི་མཐའ་ཡས་སེམས་ཅན་རྣམས།  །སྒྱུ་མ་ལྟ་བུའི་ས་ལམ་བགྲོད་གྱུར་ཏེ།  །སྒྱུ་མ་ལྟ་བུའི་སངས་རྒྱས་མྱུར་ཐོབ་ཤོག  །ཅེས་དང་།  ལྷ་མོ་ཚད་མ་དམ་ཚིག་ཚད་མ་དང་།  །སོགས་དང་།  ལྷ་འདྲེ་གདོད་ནས་མ་གྲུབ་ཀྱང་།  །འདྲེར་འཛིན་རྟོག་པ་ཤར་བ་ན།  །འཆར་མཁན་གཞི་མེད་རྩ་བྲལ་དུ།  །ཡིད་ཆེས་ཐག་ཆོད་ལྟ་གདིང་གིས།  །གཅོད་ཀྱི་འགྲོ་དོན་མཐར་ཕྱིན་ཤོག  །བདུད་རྣམས་རང་བྱུང་རང་ཞི་ལ།  །ཆེད་དུ་གཅོད་རྒྱུ་གང་ཡང་མེད།  །གདུག་རྩུབ་ཆོ་འཕྲུལ་ཅི་བྱུང་ཡང་།  །རང་ངོ་ཤེས་པའི་ཉམས་ལེན་གྱིས།  །གཅོད་ཀྱི་འགྲོ་དོན་མཐར་ཕྱིན་ཤོག  །གཉན་ས་རི་ཁྲོད་ཕྱོགས་མེད་དུ།  །ལྷ་འདྲེ་བདེ་ལ་འགོད་པ་དང་།  །མཉམ་རྗེས་དབྱེར་མེད་བསྲེ་བ་དང་།  །དུ་མ་རོལ་གཅིག་རྟོགས་ཕྱིར་དུ།  །གསང་སྤྱོད་ཉམས་སུ་ལེན་པར་ཤོག  །ཅེས་བསྔོ་སྨོན་དང་།  ཕུན་སུམ་ཚོགས་པ༴སོགས་ཞལ་ནས་གསུངས་པའི་ཚིག་བཅད་དང་།  ཡིན་ལུགས་དོན་ལ་སོགས་གྲུབ་ཐོབ་ཆེན་པོའི་གསུང་གི་ཤིས་བརྗོད་རྒྱས་པར་བརྗོད་ཅིང་།  རོལ་མོའི་སྒྲ་སྙན་ལ་རིང་བས་དགེ་ལེགས་སུ་བྱའོ།  །སླར་སྨྲས་པ།  ཡུམ་ཆེན་མ་གཅིག་རྡོ་རྗེ་ཕག་མོ་ཡི།  །གྲུབ་པའི་དབང་ཕྱུག་བརྩོན་འགྲུས་བཟང་པོ་ལ།  །སྙན་བརྒྱུད་གདམས་པ་ཌཱ་ཀིའི་ཐུགས་ཁྲག་འདི།  །ཟབ་དོན་བདུད་གཅོད་ཀུན་ལས་ཁྱད་པར་འཕགས།  །རྩ་བའི་གཞུང་བཟང་ངག་གི་བཅུད་བསྡུས་ཏེ།  །གདམས་པ་གྲུབ་ཐོབ་བརྒྱུད་པའི་གསུང་ཕྲེང་ལས།  །རིགས་མཐུན་བཏུས་ཏེ་ལེགས་པར་སྡེབས་པ་ལ།  །ནོངས་པར་གྱུར་ཀུན་ཡེ་ཤེས་མཁའ་འགྲོར་བཤགས།  །འདི་ཡི་ཚོགས་ལས་ཌཱ་ཀི་དགྱེས་རོལ་འདི།  །གང་གཱའི་ཆུ་རྒྱུན་བཞིན་དུ་རབ་འཕེལ་ནས།  །གཟུང་འཛིན་འཁྲུལ་པའི་སྒྲིབ་ཚོགས་དབྱིངས་སུ་ཞི།  །ཤེས་རབ་ཕར་ཕྱིན་རྫོགས་པའི་བཀྲ་ཤིས་ཤོག  །ཅེས་པ་གསང་སྤྱོད་མཁའ་འགྲོའི་སྙན་བརྒྱུད་ཀྱི་ཚོགས་ལས་ཌཱ་ཀི་དགྱེས་པའི་རོལ་མོ་ཅེས་བྱ་བ་འདི་ཟབ་ཆོས་འདི་ལ་མོས་པ་བརྟན་པོ་དང་ལྡན་པ་རང་སློབ་དགེ་སློང་ཚེ་རིང་ཕུན་ཚོགས་ནས་རྟེན་དང་བཅས་བསྐུལ་ངོར་སྐྱབས་རྗེ་ཐམས་ཅད་མཁྱེན་པ་སི་ཏུ་ཨོ་རྒྱན་ཆོས་ཀྱི་རྒྱ་མཚོ་དང་།  གྲུབ་རྗེ་འཇམ་དབྱངས་བསྟན་འཕེལ་རྣམ་གཉིས་ལས་འདི་ཉིད་ཀྱི་ཆོས་སྐོར་ཡོངས་རྫོགས་ཐོབ་པའི་སྐལ་བཟང་ཅན་འཇམ་དབྱངས་ཆོས་ཀྱི་བློ་གྲོས་པས་ཆོག་ཁྲིགས་སུ་སྡེབ་པའི་ཡི་གེ་པ་ནི་བཀྲ་ཤིས་དབང་ཕྱུག་དེས་བགྱིས་པ་འདིས་ཀྱང་བསྟན་འགྲོ་ལ་ཕན་པ་མཐའ་ཡས་པའི་རྒྱུར་གྱུར་ཅིག  །སརྦ་དཱ་མངྒ་ལཾ།།   །།}}
</onlyinclude>
{{TsagliCall}}
<headertabs/>
== Footnotes ==
<references/>
==Other Information==
{{Footer}}
[[Category:JKCL-KABUM-Volume-07-JA]]
[[Category:Khyentse Lineage Project]]