View source for DKR-KABUM-11-DA-027

{{Text
|classification=Tibetan Publications
|subclass=Tibetan Texts
|sectionheading=No
|fulltitletib=རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་རྩ་གསུམ་སྤྱི་དང་བྱེ་བྲག་གི་དབང་བསྐུར་གྱི་ཕྲེང་བ་བཀླག་ཆོག་ཏུ་བཀོད་པ་ཟབ་གསང་བདུད་རྩིའི་སྒོ་འབྱེད་སྐལ་བཟང་ཀུན་དགའི་རོལ་སྟོན།
|fulltitle=rdzogs pa chen po klong chen snying gi thig le'i rtsa gsum spyi dang bye brag gi dbang bskur gyi phreng ba bklag chog tu bkod pa zab gsang bdud rtsi'i sgo 'byed skal bzang kun dga'i rol ston
|citation=[[Khyentse, Dilgo]]. ''Rdzogs pa chen po klong chen snying gi thig le'i rtsa gsum spyi dang bye brag gi dbang bskur gyi phreng ba bklag chog tu bkod pa zab gsang bdud rtsi'i sgo 'byed skal bzang kun dga'i rol ston''. In ''Skyabs rje dil mgo mkhyen brtse rin po che'i bka' 'bum'', Vol. 11: 158-325. Delhi: Shechen Publications, 1994.
|collectiontitletib=དིལ་མགོ་མཁྱེན་བརྩེ་བཀའ་འབུམ།
|collectiontitle=dil mgo mkhyen brtse bka' 'bum
|author=Khyentse, Dilgo
|authortib=དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
|sourcerevealer='jigs med gling pa
|sourcerevealertib=འཇིགས་མེད་གླིང་པ་
|tibgenre=Empowerment Ritual - dbang chog - dbang skur
|terma=Yes
|dkroutline=Four
|cycle=klong chen snying gi thig le
|cycletib=ཀློང་ཆེན་སྙིང་གི་ཐིག་ལེ་
|language=Tibetan
|volumenumber=011
|volnumtib=༡༡
|volyigtib=ད་
|totalvolumes=25
|textnuminvol=027
|pagenumbers=158-325
|totalpages=336
|beginfolioline=1a
|endfolioline=168b3
|totalfolios=168
|multivolumework=No
|rectonotes=dbang khrigs
|versonotes=klong chen snying htig
|colophontib=།དེ་ལྟར་རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་ཆོས་སྐོར་གྱི་དབང་འདི་དག་ལ་དབང་གི་སྤྱི་དོན་སྙིང་པོ་དོན་གསལ་ལས། དེའང་རང་བཞིན་བརྒྱད་ལྡན་གྱི་རྡོ་རྗེ་སློབ་དཔོན་དག་ལ་ནི་ཡི་གེ་འདི་ཙམ་གྱིས་མཚོན་ལ། གཞན་དུ་ལྷོངས་སུ་མ་གྱུར་པའི་གང་ཟག་རྣམས་ལ་ནི་མདོ་སྔགས་ཀྱི་ལམ་སྤྱི་དང་བྱེ་བྲག་དབང་གི་སྒྲོམ་ནས་ཁོང་དུ་ཆུད་པའི་སྐལ་པ་ཅན་ཉུང་བས་རང་དང་སློབ་མའི་དངོས་གྲུབ་ཀྱི་གེགས་སུ་འགྱུར་ཕྱིར་མདོ་སྒྱུ་སེམས་གསུམ་གྱི་རྒྱུད་སྡེའི་གནད་ལ་ངེས་པ་རྙེད་པར་མ་ནུས་ཀྱང༌། ཁོ་བོས་བྱས་པའི་གྲོལ་ཏིག་གི་དབང་ཆོག་མཁྱེན་བརྩེའི་དགོངས་རྒྱན་ལས་སྤྱི་དོན་ཤེས་པར་བྱ་བ་ཁོ་ནའོ། །ཞེས་རྗེས་སུ་བརྩེ་བས་བཀའ་བསྩལ་པ་བཞིན་ལགས་ཀྱང་རང་བཞིན་བརྒྱད་ལྡན་གྱི་དྲི་ཙམ་ཡང་མི་བྲོ་བ་བདག་ལྟ་བུ་ལས་ངན་གྱིས་དབང་བསྐུར་བྱེད་པའི་སློབ་དཔོན་བྱ་བའི་དུས་ཀྱི་མཐར་སླེབས་པའི་ཚེ། ཌཱ་ཀིའི་ཞལ་རླངས་འཐུལ་ཞིང་གསེར་ཞུན་མ་ལྟ་བུའི་ཟབ་ཆོས་འདི་དག་ལ་གཟུ་ལུམ་གྱིས་སྤྱོད་པའི་ཉེས་པས་རང་གཞན་ལ་ཕན་པ་ལས་གནོད་ཚབས་ཆེ་བ་འབྱུང་བར་རིག་ནས་གཏེར་གཞུང་རྡོ་རྗེའི་ཚིག་རྐང་ཧ་ཅང་བསྡུས་དྲགས། ཆོས་ཀྱི་སྤྱན་ལྡན་མཁས་གྲུབ་གོང་མ་རྣམས་ཀྱི་གསུང་ཡིད་རྟོན་འོས་དག་དཔེ་ཐོབ་པའི་སྐལ་བ་མ་བྱུང་བས་འདི་ལྟ་བུ་ཞིག་མི་བྲི་ཀ་མེད་དུ་གྱུར་པ་སྟེ། སྔར་མདོ་ཁམས་སུ་རང་གནས་ལ་འཁོད་པའི་སྐབས་ཀུན་མཁྱེན་འཇམ་པའི་དབྱངས་ཆོས་ཀྱི་བློ་གྲོས་རིན་པོ་ཆེས་ཡང་གསང་བླ་མའི་སྒྲུབ་ཐབས་ཐིག་ལེའི་རྒྱ་ཅན་དང༌། ཡུམ་ཀའི་ནང་སྒྲུབ་བདེ་ཆེན་གཏེར་བུམ་གྱི་དབང༌། ཁྲག་འཐུང་རིགས་བཞིའི་སྒོས་དབང་རྣམས་བཀླག་ཆོག་ཏུ་བྲི་དགོས་པར་རྟེན་དང་བཅས་ཆེད་དུ་བཀའ་བསྩལ་ཞིང༌། ཁྲག་འཐུང་རིགས་བཞིའི་དབང་གི་སྤྱི་ཆིངས་ཐམས་ཅད་མཁྱེན་གཟིགས་མཁྱེན་བརྩེའི་དབང་པོས་མཛད་པ་བཅས་གནང་བ་བཞིན་བྲིས་ཏེ་སྤྱན་བསྟར་ཞུས་པས་དགྱེས་པའི་དབྱུག་དབྱུང་ཐོབ་ནའང་དེ་དག་ཀྱང་དཔེ་བརླག་པས་ཡིད་ཡུལ་དུ་གང་མཆིས་ལ་ཞིབ་དཔྱོད་དང༌། གཙོ་བོ་སྙིང་ཐིག་རང་གཞུང་དང་གྲོལ་ཏིག་དབང་ཆེན་རྣམས་གོ་བསྡུར་གྱིས་དོན་ཚང་འཇུག་བདེའི་ཁུལ་དུ་བྲིས་པ་འདི་ཡང་སྔ་འགྱུར་རྡོ་རྗེ་སྙིང་པོའི་རིང་ལུགས་ལ་རྒྱུ་མཚན་ཤེས་པའི་མཁྱེན་དཔྱོད་ཀྱི་ཆོས་སྤྱན་ཡངས་པ་རྡོ་རྗེའི་མཆེད་པོ་དར་ཐང་སྤྲུལ་པའི་སྐུ་ཀུན་དགའམ། མཚན་གཞན་ཡེ་ཤེས་རྡོ་རྗེར་གྲགས་པས་རིང་མོ་ནས་བསྐུལ་བ་བཞིན་སྙིགས་མའི་སྔགས་བན་ཧྲུལ་པོ་འཁོས་ཆུང་གྱི་ན་བ་འཇིགས་མེད་མཁྱེན་བརྩེའི་འོད་ཟེར་རབ་གསལ་ཟླ་བར་འབོད་པའི་རྒྱལ་ཁམས་པ་དེས་རབ་བྱུང་བཅུ་དྲུག་པའི་བྱེ་བྲག་ཟིལ་གནོན་ཞེས་པ་མེ་རྟ་ལོའི་ས་ཟླའི་དམར་ཕྱོགས་ཀྱི་ཚེས་བཅུ། ཐེག་མཆོག་ཆོས་ཀྱི་རྒྱལ་རྔ་སྒྲོགས་པའི་འཇིགས་བྲལ་གྱི་པཎྜི་ཏ་ཆེན་པོ་མི་ཕམ་འཇམ་དབྱངས་རྣམ་རྒྱལ་རྒྱ་མཚོའི་དུས་ཀྱི་མཆོད་པའི་ཉིན་དབུ་བརྩམས་ཏེ་རིམ་གྱིས་རྫོགས་པར་བྱས་པའི་གནས་རང་བྱུང་པདྨའི་སྒྲུབ་གནས་སྤ་གྲོ་སྟག་ཚང་སེང་གེ་བསམ་གྲུབ་ཀྱི་རྡོ་རྗེའི་ཀེའུ་ཚང་དང་འདབས་འབྱོར་ཞིང༌། ཆོས་རྒྱལ་བྱང་ཆུབ་སེམས་དཔའ་སྲོང་བཙན་སྒམ་པོའི་སྐུའི་རིང་ལ་བཞེངས་པའི་མཐའ་འདུལ་གྱི་གཙུག་ལག་ཁང༌། བོད་ཡུལ་ཕན་བདེའི་བཙས་གྱུར་གྱི་ས་གནད། ལྷོ་ལྗོངས་ཆོས་ཀྱི་རྒྱལ་ཁབ་འབྲུག་སྤ་གྲོ་སྐྱེར་ཆུའི་ལྷ་ཁང་དུ་སངས་རྒྱས་གཉིས་པ་མཁན་སློབ་ཆོས་གསུམ་གྱི་སྣང་བརྙན་གསར་བསྐྲུན་གྱི་ཞབས་ཏོག་བགྱིས་པའི་སྐབས་གསེང་རྣམས་སུ་བྲིས་ཤིང༌། སྙིང་པོའི་བསྟན་དང་བསྟན་འཛིན་ལ་དད་མོས་མཆོག་ཏུ་གྱུར་པ་བླ་མ་ཀུན་བཟང་རིག་འཛིན་རྡོ་རྗེས་ཀྱང་བསྐུལ་བ་བཞིན་སླར་ཡང་ཞིབ་དཔྱོད་དང་བཅས་ཡི་གེ་གཉིས་པར་འདུ་བར་མཛད་པ་པོ་ངེས་དོན་སྙིང་པོའི་རྣལ་འབྱོར་དབྱིངས་རིག་བྱང་ཆུབ་དབང་པོས་མཛད་པ་འདིས་ཀྱང༌། འོད་གསལ་རྡོ་རྗེ་སྙིང་པོའི་བསྟན་པ་གཞིར་བཞེངས་སུ་བསླང་ནས་འབྲེལ་ཚད་ཀུན་བཟང་གདོད་མའི་གྲོལ་གཞིར་དབུགས་དབྱུང་ཞིང་གྲོལ་བ་དྲུག་ལྡན་གྱི་ཕྲིན་ལས་རྟག་ཁྱབ་ལྷུན་གྲུབ་ཏུ་འབྱུང་བའི་རྒྱུ་ཁོ་ནར་གྱུར་ཅིག།
|colophonwylie=/de ltar rdzogs pa chen po klong chen snying gi thig le'i chos skor gyi dbang 'di dag la dbang gi spyi don snying po don gsal las/_de'ang rang bzhin brgyad ldan gyi rdo rje slob dpon dag la ni yi ge 'di tsam gyis mtshon la/_gzhan du lhongs su ma gyur pa'i gang zag rnams la ni mdo sngags kyi lam spyi dang bye brag dbang gi sgrom nas khong du chud pa'i skal pa can nyung bas rang dang slob ma'i dngos grub kyi gegs su 'gyur phyir mdo sgyu sems gsum gyi rgyud sde'i gnad la nges pa rnyed par ma nus kyang*/_kho bos byas pa'i grol tig gi dbang chog mkhyen brtse'i dgongs rgyan las spyi don shes par bya ba kho na'o/_/zhes rjes su brtse bas bka' bstsal pa bzhin lags kyang rang bzhin brgyad ldan gyi dri tsam yang mi bro ba bdag lta bu las ngan gyis dbang bskur byed pa'i slob dpon bya ba'i dus kyi mthar slebs pa'i tshe/_DA ki'i zhal rlangs 'thul zhing gser zhun ma lta bu'i zab chos 'di dag la gzu lum gyis spyod pa'i nyes pas rang gzhan la phan pa las gnod tshabs che ba 'byung bar rig nas gter gzhung rdo rje'i tshig rkang ha cang bsdus drags/_chos kyi spyan ldan mkhas grub gong ma rnams kyi gsung yid rton 'os dag dpe thob pa'i skal ba ma byung bas 'di lta bu zhig mi bri ka med du gyur pa ste/_sngar mdo khams su rang gnas la 'khod pa'i skabs kun mkhyen 'jam pa'i dbyangs chos kyi blo gros rin po ches yang gsang bla ma'i sgrub thabs thig le'i rgya can dang*/_yum ka'i nang sgrub bde chen gter bum gyi dbang*/_khrag 'thung rigs bzhi'i sgos dbang rnams bklag chog tu bri dgos par rten dang bcas ched du bka' bstsal zhing*/_khrag 'thung rigs bzhi'i dbang gi spyi chings thams cad mkhyen gzigs mkhyen brtse'i dbang pos mdzad pa bcas gnang ba bzhin bris te spyan bstar zhus pas dgyes pa'i dbyug dbyung thob na'ang de dag kyang dpe brlag pas yid yul du gang mchis la zhib dpyod dang*/_gtso bo snying thig rang gzhung dang grol tig dbang chen rnams go bsdur gyis don tshang 'jug bde'i khul du bris pa 'di yang snga 'gyur rdo rje snying po'i ring lugs la rgyu mtshan shes pa'i mkhyen dpyod kyi chos spyan yangs pa rdo rje'i mched po dar thang sprul pa'i sku kun dga'am/_mtshan gzhan ye shes rdo rjer grags pas ring mo nas bskul ba bzhin snyigs ma'i sngags ban hrul po 'khos chung gyi na ba 'jigs med mkhyen brtse'i 'od zer rab gsal zla bar 'bod pa'i rgyal khams pa des rab byung bcu drug pa'i bye brag zil gnon zhes pa me rta lo'i sa zla'i dmar phyogs kyi tshes bcu/_theg mchog chos kyi rgyal rnga sgrogs pa'i 'jigs bral gyi paN+Di ta chen po mi pham 'jam dbyangs rnam rgyal rgya mtsho'i dus kyi mchod pa'i nyin dbu brtsams te rim gyis rdzogs par byas pa'i gnas rang byung pad+ma'i sgrub gnas spa gro stag tshang seng ge bsam grub kyi rdo rje'i ke'u tshang dang 'dabs 'byor zhing*/_chos rgyal byang chub sems dpa' srong btsan sgam po'i sku'i ring la bzhengs pa'i mtha' 'dul gyi gtsug lag khang*/_bod yul phan bde'i btsas gyur gyi sa gnad/_lho ljongs chos kyi rgyal khab 'brug spa gro skyer chu'i lha khang du sangs rgyas gnyis pa mkhan slob chos gsum gyi snang brnyan gsar bskrun gyi zhabs tog bgyis pa'i skabs gseng rnams su bris shing*/_snying po'i bstan dang bstan 'dzin la dad mos mchog tu gyur pa bla ma kun bzang rig 'dzin rdo rjes kyang bskul ba bzhin slar yang zhib dpyod dang bcas yi ge gnyis par 'du bar mdzad pa po nges don snying po'i rnal 'byor dbyings rig byang chub dbang pos mdzad pa 'dis kyang*/_'od gsal rdo rje snying po'i bstan pa gzhir bzhengs su bslang nas 'brel tshad kun bzang gdod ma'i grol gzhir dbugs dbyung zhing grol ba drug ldan gyi phrin las rtag khyab lhun grub tu 'byung ba'i rgyu kho nar gyur cig/_
|pdflink=File:DKR-KABUM-11-DA-027.pdf
}}
{{Header}}
<h1 style="font-size: 24px !important;">Tibetan Text</h1>
<onlyinclude>
{{TibP|༄༅།   །རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་རྩ་གསུམ་སྤྱི་དང་བྱེ་བྲག་གི་དབང་བསྐུར་གྱི་ཕྲེང་བ་བཀླག་ཆོག་ཏུ་བཀོད་པ་ཟབ་གསང་བདུད་རྩིའི་སྒོ་འབྱེད་སྐལ་བཟང་ཀུན་དགའི་རོལ་སྟོན་ཞེས་བྱ་བ་བཞུགས་སོ། །།
<br>
༄༅།  །གུ་རུ་ཏྲི་མཱུ་ལ་བྷྱཿན་མ་མི། བྱིན་རླབས་བདུད་རྩིའི་སྤྲིན་གྱིས་རབ་སྒེག་སྐུ་གསུམ་སྟོན་མཆོག་པདྨ་སྐྱེས། །གྲུབ་གཉིས་འདོད་རྒུའི་ཆར་བཟང་རྟག་འཇོ་ཞི་ཁྲོ་རབ་འབྱམས་དཀྱིལ་འཁོར་ལྷ། །བདེ་སྟོང་གློག་གི་རྩེ་གར་དང་བཅས་ཕྲིན་ལས་རབ་མྱུར་མཁའ་འགྲོའི་ཚོགས། །མི་ཕྱེད་དད་བརྒྱའི་མཁའ་ལ་རྟག་བཞུགས་བྱང་ཆུབ་བར་དུ་རྗེས་འཛིན་མཛོད། །གསང་བ་ཟབ་མོའི་དགོངས་དོན་མ་ཉམས་ཤིང༌། །མཁས་གྲུབ་ཚད་མའི་ཕྱག་བཞེས་ཀྱིས་བརྒྱན་པ། །མཆོག་གསང་རྡོ་རྗེ་བཞི་ཡི་འཁོར་ལོ་རུ། །སྨིན་བྱེད་ཐབས་ཚུལ་སྐལ་བཟང་དགའ་སྟོན་སྤེལ། །འོད་གསལ་རྫོགས་པ་ཆེན་པོ་ཀློང་ཆེན་སྙིང་གི་ཐེག་ལེའི་རྩ་གསུམ་བཀའ་སྲུང་དང་བཅས་པའི་དབང་གི་ཕྱག་བཞེས་འདུས་གསལ་དུ་འགོད་པ་ལ། རྩ་དབང་རྒྱལ་ཐབས་སྤྱི་བླུགས་ལས། གསང་ཆེན་རྡོ་རྗེ་ཐེག་པ་ནི༔ འཇུག་སྒོ་དབང་ལ་དམ་ཚིག་སྲོག༔ རང་བཞིན་གནས་ལུགས་བརྗོད་བྲལ་ཏེ༔ ཞེས་གསུངས་པ་ལྟར་སྔགས་ལམ་ལ་ཐོག་མར་འཇུག་པའི་སྒོ་འབྱེད་མེད་དུ་མི་རུང་བ་འཆད་བྱ་དབང་གི་རྣལ་འབྱོར་ཏེ། དབང་སྐུར་བྱེད་པ་པོ་རྡོ་རྗེ་སློབ་དཔོན་མཚན་ཉིད་དང་ལྡན་པ། ལྷ་དང༌། བདག་དང༌། གསང་སྔགས་དང༌། བཟླས་བརྗོད་དང༌། འཕྲོ་འདུའི་དེ་ཁོ་ན་ཉིད་དེ་སྔགས་ཀྱི་ཡན་ལག་ལྔ་ལ་རང་བྱན་ཚུད་པའི་ནུས་པ་རྙེད་པས་སློབ་མའི་རྒྱུད་བྱིན་གྱིས་རློབ་ནུས་པ་བདག་པོའི་རྐྱེན། བྱ་བའི་ལས་བཅུད་བཟང་པོ་བླུག་པ་ལ་སྣོད་གཙང་མ་བྱ་བ་བཞིན་རྒྱུ་ཡི་རྐྱེན་དད་བརྩོན་ཤེས་རབ་ཀྱི་སྣོད་དང་ལྡན་པའི་སློབ་མ་ལ། སའི་ཆོ་ག་སྔོན་དུ་འགྲོ་བས་ལྷ་དང༌། བུམ་པ་དང༌། སློབ་མ་ལྷག་པར་གནས་པ། ཐིག་ཚོན་རྒྱན་བཀོད་དཀྱིལ་འཁོར་སྒྲུབ་ཅིང་མཆོད་དེ་བདག་ཉིད་འཇུག་པའམ། རིག་པའི་མེ་ཏོག་དོར་ཞིང་གནང་བ་ནོད་པ་བཅས་བྱས་ནས་ཕྱི་མཚན་མ་དང༌། ནང་ཡེ་ཤེས་ཀྱི་དཀྱིལ་འཁོར་དུ་འཇུག་པས་རྒྱུད་སྦྱང་བ་ལ། བྱེད་པ་བུམ་པ་བདུད་རྩི་ཕྱག་རྒྱ་བརྡ་ཚིག་སོགས་ལྷན་ཅིག་བྱེད་པ་རྒྱུ་ཡི་རྫས་དང༌། སྔགས་དང་ཏིང་ངེ་འཛིན་གསུམ་ཚོགས་པའི་ཆོ་ག་ཁྱད་པར་ཅན་གྱིས་རབ་ཏུ་གནས་པའམ། རབ་གནས་ཀྱི་བྱ་བ་ཟིན་པའི་བྱིན་རླབས་དང་ནུས་པའི་ཁྱད་པར་དང་ལྡན་པ་དམིགས་པའི་རྐྱེན་གྱིས་དབང་བསྐུར་བས། བྱ་བ་ཤིན་ཏུ་རྟོགས་པར་དཀའ་བ་དག་མཉམ་བདེན་པ་དབྱེར་མེད་གཞི་ཡི་དཀྱིལ་འཁོར་ཡེ་ནས་རང་ལ་གནས་པའི་ཆོས་ཉིད་ཀྱིས་ཁྱབ་པའི་རྩ་རླུང་ཐིག་ལེ་སེམས་དང་བཅས་པ་མཚུངས་ལྡན་དུ་གནས་པའི་རྒྱུ་གདོད་ནས་གདན་གསུམ་ཚང་བའི་ལྷའི་སྐུ་གསུང་ཐུགས་ཡེ་ཤེས་རྡོ་རྗེའི་ངོ་བོར་དག་པ་ཉིད་ངོ་འཕྲོད་པར་བྱས་པ་ལས་རང་སྐལ་གྱི་སྦྱང་བྱ་གློ་བུར་གྱི་དྲི་མ་ཅི་རིགས་དག་པའི་ཉམས་སད་པར་བྱས་ཤིང༌། ཕར་ཕྱིན་དང་རྒྱུད་སྡེ་འོག་མར་མ་གྲགས་པའི་དབང་དང་ཆོ་ག་སྔ་མ་སྔ་མས་གོ་ཕྱེ་ནས་ཕྱི་མ་ཕྱི་མ་འབྱུང་བས་ན་སྔ་མ་སྔ་མ་དེ་མ་ཐག་པའི་རྐྱེན་ཏེ། དེ་ལྟར་རྒྱུ་གཉིས་དང་རྐྱེན་བཞི་སྟེ་དྲུག་ཚོགས་པའི་མཐུ་ལས། ཐོབ་བྱ་རང་གནས་ཀྱི་ཡེ་ཤེས་ཅི་རིགས་གསོས་ཐེབས་པའི་མཐུས་ལམ་རིམ་པ་གཉིས་ཀྱི་ཡེ་ཤེས་མངོན་དུ་སྐྱེས་སམ། ཆུ་ལུད་དྲོད་གཤེར་འཛོམ་པ་ལ་ས་བོན་ཐེབས་པ་ལྟར་ཡེ་ཤེས་བཙན་ཐབས་སུ་སྐྱེ་ངེས་ཀྱི་ནུས་རུང་དུ་སྨིན་པར་བྱས་པས་རྒྱུད་འགྱུར་བའི་ཁྱད་པར་ནི་ཐོབ་པ་སྟེ། དེ་དག་ཀྱང་ཆོས་ཉིད་བདེ་བ་ཆེན་པོ་དང་ཆོས་ཅན་རྟེན་འབྲེལ་བསླུ་མེད་ཀྱི་སྟོབས་བསམ་གྱིས་མི་ཁྱབ་པ་དང༌། དེ་བཞིན་གཤེགས་པའི་བྱིན་གྱིས་བརླབས་པའི་མཐུ་བསམ་གྱིས་མི་ཁྱབ་པ་དང༌། ཐབས་ལ་མཁས་པ་གསང་སྔགས་ཀྱི་སྤྱོད་པ་ཁྱད་པར་ཅན་སྔགས་དང་ཕྱག་རྒྱའི་ནུས་པ་བསམ་གྱིས་མི་ཁྱབ་པ་ལས་བྱུང་བས་ན། རྡོ་རྗེ་བཞིའི་ཡེ་ཤེས་ལ་གོ་མྱོང་རྟོགས་པ་ཅི་རིགས་སྐྱེས་པ་དེ་ཉིད་གོང་ནས་གོང་དུ་སྤེལ་བའི་ལམ་ལ་ཚུལ་བཞིན་འབད་ན་སྙིགས་དུས་ཀྱི་ཚེ་ཐུང་གཅིག་ལ་རྡོ་རྗེ་འཆང་གི་གོ་འཕང་ཐོབ་ནུས་ལ། ཚེ་འདིར་ལམ་ལ་ཆེད་དུ་མ་འབད་ཀྱང་དམ་ཚིག་མ་ཉམས་ན་རིང་པོར་མི་ཐོགས་པར་འཚང་རྒྱ་ནུས་པར་གསུངས་པས། མཐར་འབྲས་བུ་སངས་རྒྱས་སྐུ་བཞིའི་གོ་འཕང་བདེ་མྱུར་དུ་ཐོབ་བྱེད་སྔགས་ལམ་གྱི་རྩ་བ་དབང་ལ་རག་ལས་པས་ཤིན་ཏུ་གནད་ཟབ་པའི་མཐར་ཐུག་རྡོ་རྗེ་ཐེག་པའི་ལམ་གྱི་ཐོག་མའི་འཇུག་སྒོ་གཅིག་པུར་གྱུར་པ་སྟེ། དེ་དག་གི་རྣམ་གཞག་ཤེས་པ་ནི་ཤིན་ཏུ་གལ་ཆེ་བས་ན་དཔལ་སྒྱུ་འཕྲུལ་དྲྭ་བ་རྩ་རྒྱུད་གསང་བ་སྙིང་པོའི་མན་ངག་གི་དགོངས་པ་ལྟར་བཀྲལ་བ་ལེགས་བཤད་ཕྱོགས་བཅུའི་མུན་སེལ། སྤྱི་དོན་རྣམ་པ་གཉིས་དང༌། ཡོན་ཏན་རིན་པོ་ཆེའི་མཛོད་ཀྱི་ལེའུ་བཅུ་པའི་རྩ་འགྲེལ་གྱི་གཞུང་ལ་བརྟེན་ནས་གཏན་ལ་དབབ་པར་བྱ་དགོས་ལ། སྐབས་འདིར་འཆད་བྱའི་གཙོ་བོ་ཀུན་མཁྱེན་ཆོས་ཀྱི་རྒྱལ་པོ་རིག་འཛིན་འཇིགས་མེད་གླིང་པ་ཉིད་ཀྱིས་ཤིང་རྟའི་ལམ་སྲོལ་གསར་དུ་ཕྱེ་བའི་རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེ་ཞེས་རྒྱལ་བའི་བསྟན་པ་རིན་པོ་ཆེ་ཡོངས་རྫོགས་ཉམས་ལེན་གྱི་ལུས་གཅིག་ལ་རྫོགས་ཤིང་མཐར་ཐུག་གཏན་ལ་དབབ་བྱ་སྔ་འགྱུར་འོད་གསལ་རྡོ་རྗེ་སྙིང་པོ་ཐེག་མཆོག་རྫོགས་པ་ཆེན་པོ་ཐུན་མིན་མན་ངག་སྡེའི་ཟབ་དོན་ཐང་མར་བརྡལ་བས་བཀའ་གཏེར་དག་སྣང་གི་ཆོས་ཚུལ་རྒྱ་མཚོའི་སྲོག་སྙིང་གཅིག་པུར་གྲུབ་པ་ལ། རྒྱ་ཆེ་བ་རྒྱུད་སྡེའི་དགོངས་པ་གཙོ་བོར་བཏོན་པ་རྒྱུད་ལུགས་ཕུར་པ་རྒྱལ་པོའི་ལུགས་དང༌། ཟབ་པ་ཀློང་ཆེན་དགོངས་པའི་གསང་མཛོད་ལས་བྱོན་པའི་ཀློང་ཆེན་སྙིང་གི་ཐིག་ལེའི་རྩ་གསུམ་ཆོས་སྲུང་དང་བཅས་པའི་སྨིན་གྲོལ་ཡོངས་རྫོགས་སྒྲུབ་སྡེའི་རིང་ལུགས་ཅན་དུ་བཞུགས་པ་ལས་སྐབས་འདིར་འཆད་བྱ་ཕྱི་མ་ཉིད་ཡིན་ལ། འདི་ཉིད་ཁོ་ན་ལའང་སྒྲུབ་བྱའི་ལྷའི་སྒོ་ནས་དབྱེ་ན། བྱིན་རླབས་ཀྱི་རྩ་བ་བླ་མ་རིག་འཛིན་འདུས་པ། བླ་མ་དྲག་པོ་རྟ་ཁྱུང་འབར་བ། དངོས་གྲུབ་ཀྱི་རྩ་བ་ཡི་དམ་བཀའ་བརྒྱད་དཔལ་ཆེན་འདུས་པ། དེའི་ཡན་ལག་གཤིན་རྗེ་འཆི་བདག་ཟིལ་གནོན། རྟ་མགྲིན་ཁམས་གསུམ་རོལ་པ། ཡང་དག་སངས་རྒྱས་མཉམ་སྦྱོར། ཕུར་པ་བདུད་དཔུང་ཟིལ་གནོན་ཏེ་ཁྲག་འཐུང་རིགས་བཞི། གསང་སྒྲུབ་ཐུགས་རྗེ་ཆེན་པོ་སྡུག་བསྔལ་རང་གྲོལ། ཁྲོ་བོ་རྟ་མགྲིན། ཡང་གསང་བླ་སྒྲུབ་ཐིག་ལེའི་རྒྱ་ཅན། ཞི་ཁྲོ་ཁྲོམ་དཀྲུགས་ངན་སོང་སྦྱོང་བ། ཕྲིན་ལས་ཀྱི་རྩ་བ་མཁའ་འགྲོ་ཡུམ་ཀ་བདེ་ཆེན་རྒྱལ་མོ། དེའི་ནང་སྒྲུབ་སྒྲོལ་མ་ཉེར་གཅིག །གསང་སྒྲུབ་མཁའ་འགྲོ་སེང་གདོང༌། བཀའ་སྲུང་མ་མགོན་ལྕམ་དྲལ། ཚེ་རིང་མ་བཅས་དང༌། སྒྲུབ་བྱེད་ཐབས་ཀྱི་གསེང་ལམ་ནང་རྒྱུད་ཡོ་ག་གསུམ་གྱི་དགོངས་པ་དང་འབྲེལ་བས། སྒྱུ་འཕྲུལ་དྲྭ་བ་མ་ཧཱའི་དགོངས་པ་དང་འབྲེལ་བའི་དཔལ་ཆེན་རྩ་བ་ཡན་ལག །ཨ་ནུའི་མདོ་ལུང་གི་སྙིང་པོ་རིགས་བརྒྱ་དང་རིག་འཛིན། ཨ་ཏིའི་དགོངས་དོན་གྱི་བསྐྱེད་རྫོགས་ཡུམ་ཀ་དང༌། ཡང་གསང་བླ་སྒྲུབ་ཀྱིས་མཚོན་པའི་དབྱེ་བསྡུའི་གོ་རིམ་དང་རྣམ་གཞག་དུ་མ་ཡོད་ཀྱང༌། སྐབས་འདིར་དབང་གི་སྤྱི་དོན་སྙིང་པོ་དོན་གསལ་ལས། འདིར་དང་པོ་སྨིན་བྱེད་གདན་གསུམ་ཚང་བའི་དཀྱིལ་འཁོར་ཞི་ཁྲོ་ལ་བརྟེན་པ་ཡིན་པས། ཅེས་གསུངས་པ་ལྟར་ཐུན་མོང་གི་སློབ་མ་ལ་སྟ་གོན་དང་ཕྱི་ནང་གི་འཇུག་པ་ཕན་ནུས་ཟབ་མོའི་དབང་གི་ཆོ་ག་རྒྱས་པ། རྒྱུ་སྨིན་བྱེད་ཀྱིས་སྒོ་འབྱེད་དགོས་པའི་ཕྱིར་རྒྱུད་སྡེའི་དགོངས་པ་དང་འབྲེལ་ཆེ་བ་ཞི་ཁྲོ་ངན་སོང་སྦྱོང་བའི་དབང་གི་རིམ་པ་ཐོག་མར་འགོད་པ་ལ། གསང་བ་ཡོངས་རྫོགས་འདུས་པའི་རྒྱུད་ལས། མདོར་ན་དབང་གི་སྔོན་འགྲོ་རྗེས། །སྒྲུབ་ཆེན་བསྙེན་སྒྲུབ་ཁོག་དབུབ་ལ། །ལས་ལ་དབང་གིས་སྦྱོར་བ་སྟེ། །ཞེས་པ་ལྟར་སྔོན་འགྲོ། དངོས་གཞི། རྗེས་གསུམ་མོ། །དང་པོ་ལ་གསུམ། ལྷ། བུམ་པ། སློབ་མ་ལྷག་གནས་སོ།  །དང་པོ་ལའང་ས་སློང་བ་དང་ལྷ་སྟ་གོན་དངོས་གཉིས་ལས། དང་པོ་ནི། སྤྱིར་ཀུན་མཁྱེན་འཇིགས་བྲལ་གྱི་སློབ་དཔོན་ཆེན་པོ་ཉིད་ཀྱིས་ཕུར་པ་རྒྱུད་ལུགས་དང༌། གྲོལ་ཐིག་དབང་ཆོག་སོགས་སུ་ཕུན་སུམ་ཚོགས་པ་ལྔས་སྒྲུབ་པའི་གཞི་བཟུང༌། བསྙེན་སྒྲུབ་ཡན་ལག་བཞིས་ཁོག་དབུབ། རྗེས་རང་གཞན་སྨིན་གྲོལ་ལ་སྦྱོར་ཚུལ་གྱི་རྣམ་གཞག་ཞིབ་མོ་ལྟར་གསུངས་ཀྱང༌། སྐབས་འདིར་དེང་དུས་ཀྱི་ཕྱག་བཞེས་དཀྱུས་ལྟར་འཆད་པ་ལ། རང་བཞིན་བརྒྱད་ལྡན་གྱི་རྡོ་རྗེ་སློབ་དཔོན་མཚན་ཉིད་དང་ལྡན་པས་གསང་བའི་དཀྱིལ་འཁོར་འདི་ཉིད་ཀྱི་བསྙེན་སྒྲུབ་མཐར་སོན་པས། སྣོད་ཀྱི་སྐལ་པ་བཟང་པོས་ཟབ་མོའི་བཅུད་འཛིན་ནུས་པའི་སློབ་མ་དཀྱིལ་འཁོར་དུ་འཇུག་ཅིང་སྨིན་པར་བྱ་བའི་ཕྱིར་བཀྲ་ཤིས་བྱིན་ཆགས་པ་མཚན་ཉིད་དང་ལྡན་པའི་གནས་སུ། གཟའ་སྐར་ཚེས་གྲངས་དགེ་ཞིང་ཤིས་པ་ལ་གཞུང་མཐུན་གྱི་རྟེན་དང་རྒྱན་གྱི་ཡོ་བྱད་དུ་མས་སྤྲས་པའི་གུང་དུ་བདག་བསྐྱེད་ཞི་ཁྲོའི་གཏོར་མ་སྨན་རཀ །ཆུ་གཉིས་ཉེར་སྤྱོད་དང༌། དཀྱིལ་འཁོར་གང་དུ་བྱ་བར་སྟེགས་བུ་ཁེབས་ལྡན་གྱི་དབུས་སུ་རིན་པོ་ཆེའི་མཎྜལ་དྲིའི་ཐིག་ལེ་བཀོད་པ་ལ་མེ་ཏོག་གམ་འབྲུ་དཀར་གྱི་ཚོམ་བུ་དབུས་སུ་གཅིག །དེ་རྒྱབ་བཞི། དེ་རྒྱབ་བརྒྱད། དེ་རྒྱབ་བཅུ་དྲུག །དེ་རྒྱབ་སུམ་ཅུ་རྩ་གཉིས། དེ་རྒྱབ་བཞི་བཅུ་རྣམས་རིམ་གྱིས་ཇེ་ཆུང་དུ་བཀོད། ཆུ་གཉིས་ཉེར་སྤྱོད་དང་བཅས་པས་བསྐོར། དེའི་མདུན་དུ་སྟེགས་ཅུང་དམའ་བར་མཎྜལ་ལ་བ་བྱུང་དང་དྲིས་བྱུགས་པར་མེ་ཏོག་གི་ཚོམ་བུ་དང༌། མདུན་དུ་ཆུ་གཅིག་སྔོན་འགྲོའི་མཆོད་པ་ལྔ་ས་ལྷ་དང༌། གཉུག་མར་གནས་པ་ལ་དཀར་གཏོར་གསེར་སྐྱེམས་བཅས་བཤམས། གཞན་ཉེར་མཁོའི་ཡོ་བྱད་ཚོགས་པར་བྱས་ལ། ཞི་ཁྲོ་རང་གཞུང་གི་སྐྱབས་སེམས་ནས་བརྩམས་བདག་བསྐྱེད་ཚང་བར་བཏང༌། རྣམ་སྣང་ཐུགས་ཀྱི་དཀྱིལ་འཁོར་སོགས་ཞི་བ་དང༌། བདག་ཉིད་རྣམ་སྣང་གསལ་བའི་ལྗགས། །རྡོ་རྗེ་རྩེ་གསུམ་དམར་པོ་ཡི་སོགས་ཀྱིས་ཁྲོ་བོ་བཅས་ཅུང་ཟད་བཟླ། ལས་སྦྱོར་རྩ་རིག་སྐབས་འདིར་མ་སྦྱར་ཡང་རུང་སྙམ། ས་ལྷའི་གཏོར་མ་བསང་སྦྱངས། ཨོཾ་ཨཱཿཧཱུྃ་འབྲུ་གསུམ་གྱིས་བྱིན་གྱིས་བརླབས། བསྡུ་རྒྱ་སེ་གོལ་གཏོགས་པ་དང་བཅས། པྲི་ཐཱི་དེ་ཝི་ས་མཱ་ཛཿ ཞེས་བརྗོད་པས། སའི་ལྷ་མོ་སེར་མོ་བུམ་པ་འཛིན་པ་དོ་ཤལ་དང་རྐང་གདུབ་ཀྱི་སྒྲ་སྒྲོགས་པ་ས་བདག་གིས་འཁོར་དང་བཅས་པ་སྤྱན་དྲངས་པར་གྱུར། ཨོཾ་པྲི་ཐཱི་དེ་ཝི་ཨརྒྷཾ་པུཥྤེ་སོགས་ནས། ཤབྡ་པཱུ་ཛ་ཧོཿས་མཆོད། སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་དང༌། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །ཤཱཀྱ་སེང་གེ་སྐྱོབ་པ་ཡིས། །ཇི་ལྟར་བདུད་ཀྱི་སྡེ་བཅོམ་པ། །དེ་བཞིན་བདག་གིས་བདུད་སྡེ་ལས། །རྒྱལ་བར་བྱ་ཕྱིར་དཀྱིལ་འཁོར་བྲི། །བདག་རྡོ་རྗེ་འཛིན་པས་སེམས་ཅན་ཐམས་ཅད་ཀྱི་དོན་དུ་ས་ཕྱོགས་འདིར་དཀྱིལ་འཁོར་ཆེན་པོ་བཞེངས་ཀྱི། སའི་ཕྱོགས་འདི་བདག་ལ་གནང་བར་མཛོད་ཅིག །ཅེས་བརྗོད་པས། དེས་ཀྱང་རིག་པ་འཛིན་པ་ཁྱོད་ཅི་དགའ་བར་བྱོས་ཤིག །ཅེས་གནང་བ་བྱིན་པར་བསམ། གཉུག་མར་གནས་པ་ལ། ཨ་ཀཱ་རོ་མུ་སོགས་ལན་གསུམ་གྱིས་བསྔོས་ལ། གང་དག་འདིར་གནས་ལྷ་དང་ཀླུ། །གནོད་སྦྱིན་སྲིན་པོའམ་གཞན་དག་ལ། །ས་འདི་བདག་གིས་བསླང་བར་བགྱི། །དཀྱིལ་འཁོར་དོན་དུ་བསྩལ་དུ་གསོལ། །ཞེས་དང༌། མཆོད་སྦྱིན་གཏོར་མ་འདི་བཞེས་སོགས་ཀྱང་བརྗོད། བཛྲ་མུས་མགྲོན་རྣམས་རང་གནས་སུ་བཏང༌། ཨོཾ་མེ་དི་ནི་བཛྲ་བྷནྡྷ་བྷནྡྷ་ཧཱུྃ་ཕཊ་ཀྱིས་རྡོ་རྗེའི་གཞིར་གྱུར། ཨོཾ་བཛྲ་རཀྵ་རཀྵ་ཧཱུྃ་ཕཊ་ཀྱིས་བསྲུང་བར་བྱས་པས་སྒྲུབ་ཁང་རྙིང་པ་དང་རས་བྲིས་ལ་བརྟེན་པས་རུང་ཞིང༌། རྡུལ་ཚོན་ལ་སྦྱང་བ་བཅས་དགོས་པར་གསུངས། དེ་དག་གིས་ས་སློང་གི་དོན་ཚང་བའོ།  །དཀྱིལ་འཁོར་རྡུལ་ཚོན་ལ་བརྟེན་པ་ཡིན་ན་སྐབས་འདིར་ཐིག་ལས་འབྱུང་ཡང་དེང་སང་རས་བྲིས་ལ་བརྟེན་པ་མང་བས་མ་སྤྲོས་སོ།  །གཉིས་པ་ལྷ་སྟ་གོན་དངོས་ནི། ཨོཾ་བཛྲ་ཀྲོ་ཏ་ཧྱ་གྲཱྀ་ཝ་ཧུ་ལུ་ཧུ་ལུ་ཧཱུྃ་ཕཊ། ཨརྒྷཾ་པདྱཾ་སོགས། ཤབྡ་ཨཱཿཧཱུྃ། ཡོངས་སུ་གྱུར་པ་ལས་ཕྱི་ནང་གི་མཆོད་པ་རྣམས་དྭངས་ཤིང་ཐོགས་པ་མེད་པ་ས་དང་བར་སྣང་ཀུན་ཏུ་བཟང་པོའི་མཆོད་སྤྲིན་གྱིས་གང་བར་གྱུར། སྨན་གཏོར་རཀྟའི་སྔགས་ཀྱང་བརྗོད་པས་བྱིན་གྱིས་བརླབས་ལ། དབང་གི་སྤྱི་དོན་སྙིང་པོ་དོན་གསལ་ལས། བདག་བསྐྱེད་ལྡན་པས་ལྷ་ཚོགས་རྣམས། །ཆོ་གས་སྒྲུབ་ཅིང་མ་ནུས་ན། །སྔགས་ཀྱིས་བསྐྱེད་ལ་མཆོད་བསྟོད་འབུལ། །བཟླས་པ་ཅི་རིགས་བགྱིས་པའི་རྗེས། །ཞེས་གསུངས་པས། རྒྱས་པར་སྤྲོ་ན། སྟོང་པའི་ངང་ལས་མདུན་གྱི་ཚོམ་བུའི་དཀྱིལ་འཁོར་ཉིད་ཡོངས་སུ་གྱུར་པ་ལས། ཨེ་ཡཾ་བཾ་ལཾ་སུཾ་རཾ་རྣམས་ཆད། །སྥ་ར་ཎ་ཕཊ་སོགས་ནས་དམ་ཚིག་པ་བསྐྱེད། ཡེ་ཤེས་པ་སྤྱན་དྲངས་བསྟིམས། ཕྱག་མཆོད་བསྟོད་པའི་བར་ཞི་ཁྲོའི་ལས་བྱང་ལྟར་མཐར་ཆགས་སུ་བྱ། བསྡུས་པའི་སྐབས། ཧཱུྃ་བཛྲ་སཏྭ། མཱུཾ་དྷ་ཏི་ཤྭ་རི། ཧཱུྃ་བཛྲ་དྷྲྀཀ྄་སོགས་བསྐྱེད་སྔགས་ཚང་བར་བརྗོད་ལ། བདག་ཉིད་ལྷ་ཡི་སྐུར་གསལ་བའི༔ ཐུགས་ནས་འཕྲོས་པའི་འོད་ཟེར་གྱིས༔ ཞི་ཁྲོ་རབ་འབྱམས་དཀྱིལ་འཁོར་ལྷ༔ མདུན་གྱི་ནམ་མཁར་སྤྱན་དྲངས་གྱུར༔ ཞེས་བརྗོད་ཅིང་བསམ་ལ། ཨོཾ། མ་ལུས་སེམས་ཅན་སོགས་སྤྱན་འདྲེན་ནས་བསྟོད་པའི་བར་ཞི་ཁྲོའི་ལས་བྱང་ལྟར་བཏང་རྗེས། བོ་དྷི་ཙིཏྟ་དང་རུ་ལུ་ཡིག་བརྒྱ་བཅས་ཅུང་ཟད་བཟླས་མཐར། རྡོར་དྲིལ་དང་སྤོས་ཐོགས། པུས་བཙུགས་ཐལ་མོ་སྦྱར་ལ། རང་གི་ལྕེ་ཧཱུྃ་ལས་སྐྱེས་པའི་རྡོ་རྗེའི་རང་བཞིན་དུ་གྱུར། རྒྱལ་བ་སྲས་བཅས་དགོངས་སུ་གསོལ། །ཁྱེད་རྣམས་མཆོད་དང་སེམས་ཅན་དོན། །ནངས་པར་དཀྱིལ་འཁོར་འབྲི་འཚལ་བས། །ཐུགས་ཀྱིས་དགོངས་ཏེ་གནང་བ་མཛོད། །ལན་གསུམ། ཞེས་གསོལ་བ་བཏབ་པས་ལྷ་ཚོགས་རྣམས་དགྱེས་པ་ཆེན་པོས། རིག་པ་འཛིན་པ་ཁྱོད་ཀྱིས་དཀྱིལ་འཁོར་གྱི་ལས་ཇི་ལྟར་འོས་པ་གྱིས་ཤིག་ཅེས་བཀའི་གནང་བ་བསྩལ་ནས་ཡེ་ཤེས་ཀྱི་དཀྱིལ་འཁོར་སྟེང་གི་བར་སྣང་འོད་ཀྱི་དྲྭ་བའི་ཀློང་དུ་བཞུགས་པར་བསམ། རྡོ་རྗེ་ཁུ་ཚུར་གཉིས་གཤིབས་པའི་མཛུབ་མོ་བརྐྱང་བ་རྩེ་གཏུགས་ནས་འོག་ཏུ་ཕྱོགས་པ་སྤྱི་བོར་གཏོད་པ་བཅས། ཨོཾ་བཛྲོད་ཏིཥྛ་ལྷན་ཞེས་བརྗོད། དམ་ཚིག་གི་འཁོར་ལོ་རྣམས་རང་ལ་ཐིམ་པར་བསམ་ལ་མཎྜལ་ཚོམ་བུ་དང་བཅས་པ་བསྡུ། ཡིག་བརྒྱ་བརྗོད། གཉིས་པ་བུམ་པ་སྟ་གོན་ནི། རིན་པོ་ཆེའི་བུམ་པ་སུམྦྷ་ནིའི་སྔགས་དང་ཡུངས་ཀར་གྱིས་བྲབ། གུ་གུལ་བདུག །བཀྲ་ཤིས་པའི་ཁྱེའུས་རྒྱུན་འབབ་ཀྱི་ཆུ་ནས་བླང་བའི་ཆུ་གཙང་དང་དྲིའི་ཆབ་དང་སོ་ལྔའི་བཅུད་ལྡན་རྣམ་བུམ་མགུལ་ཆིངས་སྔོན་པོའམ་ཡེ་ཤེས་ལྔ་མཚོན་ཕྱིར་དར་སྣ་ལྔས་བྱ་བར་གྲོལ་ཐིག་དབང་ཆོག་ལས་གསུངས། ལས་བུམ་མགུལ་ཆིངས་ལྗང་གུ། བུམ་མཚན་གཙོ་བུམ་ལ་རིགས་ལྔའི་ཕྱག་མཚན། ལས་བུམ་ལ་རྒྱ་གྲམ་ཅན་གདགས། དུང་ཞལ། གཟུངས་ཐག་བཅས་འདུ་བྱས་ལ། མཆོད་པ་གསར་དུ་བཤམས་པའམ་ཁ་གསོས་ལ་བྱིན་རླབས་ལྷ་སྟ་གོན་སྐབས་ལྟར་བྱ། བུམ་པ་རྣམས། ཨ་མྲྀ་ཏས་བསང༌། སྭ་བྷཱ་ཝས་སྦྱངས། སྟོང་པའི་ངང་ལས་པྃ་ལས་པདྨ་དང༌། ཨ་ལས་ཟླ་བའི་དཀྱིལ་འཁོར་གྱི་སྟེང་དུ་བྷྲཱུྃ་ལས་རིན་པོ་ཆེའི་བུམ་པ་ཡངས་ཤིང་རྒྱ་ཆེ་བ། ཞབས་ཞུམ་པ། ལྟོ་བ་ལྡིར་བ། མགྲིན་པ་ཕྲ་བ། ཁ་གཡེལ་བ། མཆུ་འཕྱང་བ། ལྷ་རྫས་གོས་ཀྱི་མགུལ་ཆིངས་དང་དཔག་བསམ་ཤིང་གིས་ཁ་བརྒྱན་པ། ཕྱི་བུམ་པའི་དབྱིབས་ལ་ནང་གཞལ་ཡས་ཁང་བཅུད་ཀྱིས་ཡོངས་སུ་གང་བའི་དབུས་སུ་པདྨ་འདབ་བཞི། བརྒྱད། བཅུ་དྲུག །སོ་གཉིས། བཞི་བཅུ་རྣམས་ཀྱི་སྟེང་དུ་རིན་ཆེན་སེང་གེ་གླང་ཆེན་རྟ་མཆོག་རྨ་བྱ་ཤང་ཤང་ཉི་ཟླ་པདྨའི་གདན་ལ། ཆོས་སྐུ་ཀུན་བཟང་རྡོ་རྗེ་སེམས་དཔའ་དང་རིགས་ལྔ་ཡབ་ཡུམ་ལ་རང་རང་གི་སེམས་དཔའ་དང་སེམས་མ། ཐུབ་པ་དྲུག །སྒོ་བ་ཡབ་ཡུམ་སྟེ་ཞི་བའི་ལྷ་ཚོགས། དྲེགས་པ་ཅན་དང་བྱོལ་སོང་པད་ཉིའི་གདན་ལ་ཆེ་མཆོག་ཡབ་ཡུམ། ཧེ་རུ་ཀ་རིགས་ལྔ། ཀེའུ་རི་མ་བརྒྱད། སིང་ཧ་མ་བརྒྱད། སྒོ་མ་བཞི། དབང་ཕྱུག་ཉི་ཤུ་རྩ་བརྒྱད་རྣམས་མ་འདྲེས་གསལ་རྫོགས་སུ་བཞུགས་པའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ་དེ་ལས་འོད་ཟེར་འཕྲོས་བསྒོམ་པ་དང་འདྲ་བའི་ཡེ་ཤེས་པ་བཛྲ་ས་མཱ་ཛཿ ཨོཾ། ཡེ་ཤེས་སྐུ་མཆོག་རང་བཞིན་དཀྱིལ་འཁོར་ནི། །ཟླ་རྒྱས་བཞིན་དུ་སྤྲོས་པ་མི་མངའ་ཡང༌། །ཐུགས་རྗེ་ཉི་གསལ་འོད་བཞིན་སྙོམ་མཛད་པ། །འདིར་གཤེགས་བདག་ལ་དགོངས་ཤིང་བཞུགས་སུ་གསོལ། །ཨོཾ་བཛྲ་ས་མ་ཡ་ཛཿ ཛཿཧཱུྃ་བྃ་ཧོཿ ས་མ་ཡ་ཏིཥྛ་ལྷན། ཨ་ཏི་པཱུ་ཧོཿ པྲ་ཏཱིཙྪ་ཧོཿ ཨོཾ་བཛྲ་ཨརྒྷཾ་ནས། ཤབྡ་ཨ་མྲྀ་ཏ་རཀྟ་བ་ལིཾ་ཏ་མ་ཧཱ་སརྦ་པཱུ་ཛ་ས་མ་ཡ་ཁཱ་ཧི་ཁཱ་ཧི། བརྗོད་མེད་ཤེས་རབ་མི་གཡོ་ཆོས་ཀྱི་སྐུ། །བདེ་ཆེན་ལོངས་སྤྱོད་རྫོགས་སྐུ་རིགས་ལྔའི་གཙོ། །ཐུགས་རྗེ་ཐབས་མཁས་རྒྱ་ཆེ་རོལ་པའི་ལྷ། །ཞི་ཁྲོ་སྐུ་གསུམ་ལྷ་ལ་ཕྱག་འཚལ་བསྟོད། །གཟུངས་ཐག་བླངས་ཏེ། རང་གི་ཐུགས་ཀ་ནས་སྔགས་ཀྱི་ཕྲེང་བ་འཕྲོས། གཟུངས་ཐག་ལ་འཁྲིལ་ཏེ་བུམ་པའི་ནང་དུ་སོང་བས་ལྷ་ཚོགས་རྣམས་ཀྱི་ཐུགས་རྒྱུད་བསྐུལ་འོད་ཟེར་སྤྲོ་བསྡུས་དོན་གཉིས་མཛད། སྐུའི་ཆ་ཐམས་ཅད་ནས་བྱང་སེམས་བདུད་རྩིའི་རྒྱུན་བབ་པས་བུམ་པ་གང་བར་བསམ་ལ། ཞི་ཁྲོའི་སྔགས་སུམ་བརྒྱ་ལས་མི་ཉུང་བ་དང༌། ཡིག་བརྒྱ་ཅི་ནུས་བཟླ། ལས་བུམ་བསང་སྦྱངས། ལས་ཀྱི་བུམ་པའི་དབུས་སུ་པད་ཉི་དང༌། །རྒྱ་གྲམ་སྟེང་དུ་ཧཱུྃ་ལས་སྣ་ཚོགས་ཀྱི། །རྡོ་རྗེ་ཧཱུྃ་གིས་མཚན་པ་ཡོངས་གྱུར་ལས། །བདུད་རྩི་འཁྱིལ་བ་ཞལ་གཅིག་ཕྱག་གཉིས་པ། །སྐུ་མདོག་ལྗང་གུ་ཞབས་གཉིས་དོར་སྟབས་ཅན། །ཕྱག་གཡས་སྣ་ཚོགས་རྡོ་རྗེ་བསྡིག་པའི་ཚུལ། །གཡོན་པས་དེ་ཡི་ཡུ་བའི་དྲིལ་བུ་འཛིན། །ཁྲོ་ཚུལ་གར་དགུའི་ཉམས་ལྡན་སྦྲུལ་ལ་སོགས། །མི་སྡུག་རྒྱན་གྱིས་སྤྲས་པའི་སྐུ་རུ་གསལ། །སྐུ་ལས་བྱུང་བའི་ཡེ་ཤེས་བདུད་རྩིའི་སྤྲིན། །བབས་པས་བུམ་པ་ཡོངས་སུ་གང་བར་གྱུར། །ཨོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུྃ་ཕཊ། བརྒྱ་རྩ་བརྒྱད་བཟླ། བུམ་ལྷ་གཉིས་ལ་དམིགས་ནས། ཨརྒྷཾ་སོགས་ཀྱིས་མཆོད། བསྟོད་པར་འོས་པས་བསྟོད། ཨོཾ་ཨཱཿཧཱུྃ་གིས་བདུད་རྩིའི་མཆོད་ཡོན་ཕུལ་བས་ལྷ་ཚོགས་བདེ་སྟོང་ཆེན་པོའི་རྣམ་རོལ་དུ་འོད་དུ་ཞུ་ནས་བུམ་པའི་ཆུ་དང་རོ་གཅིག་ཏུ་འདྲེས་པས་རང་རང་གི་བྱེད་ལས་འགྲུབ་པའི་ནུས་པ་ཅན་དུ་གྱུར། ཞེས་བརྗོད་ཅིང་བསམ། འདིར་དབང་གི་སྤྱི་དོན་ལས། གཉིས་པ་བུམ་པ་བཅུད་ལྡན་ལ། །ཆོ་ག་སྔ་མ་ཇི་བཞིན་ལས། །བུམ་ལྷ་འོད་དུ་ཞུ་བ་ཙམ། །བུམ་པ་སྟ་གོན་ཁྱད་པར་རོ། །ཞེས་གསུངས་པ་ཙམ་ལས་ཞི་ཁྲོ་ལ་བུམ་སྒྲུབ་དམིགས་བསལ་མ་བྱུང་བས་བུམ་པ་སྒྲུབ་ཚུལ་འདི་གསང་བ་སྤྱི་ལྟར་བཀོད་པའོ།  །སྐུ་རྟེན་ཙཀླི་དབུ་རྒྱན་རྡོར་དྲིལ་སོགས་དབང་རྫས་རྣམས་ཚོགས་པར་བྱས་ལ། དབང་རྫས་རྣམས་ངོ་བོ་རྣམ་པར་དག་པ་ཆོས་ཀྱི་དབྱིངས་རང་བཞིན་ཡེ་ཤེས་ཀྱི་སྣང་བ་ཅིར་ཡང་འཆར་བའི་བྱིན་རླབས་དངོས་གྲུབ་འབྱུང་བའི་དབྱིག་ཏུ་གྱུར་པར་མོས། འདི་ནི་རྒྱུད་ལས་དབང་རྫས་རབ་གནས་དང་ལྡན་པ་ཞེས་གསུངས་པའི་དགོངས་དོན་སྔ་འགྱུར་བཀའ་མའི་དབང་གི་སྟ་གོན་སྐབས་དབང་རྫས་རབ་གནས་ཀྱི་ཆོ་ག་རེ་འབྱུང་བ་ལྟར་བྱིན་རླབས་བསྡུས་པ་འདི་ཙམ་བྱ་བ་ཐམས་ཅད་མཁྱེན་པ་མཉྫུ་གྷོ་ཥའི་ཕྱག་བཞེས་ལས་བྱུང་བ་ལྟར་འདིར་ཡང་བཀོད་པའོ།  །གསུམ་པ་སློབ་མ་ལྷག་གནས་ལ་གཉིས་ལས། དང་པོ་སྔོན་དུ་བྱ་བའི་ལས་རིམ་ནི། སོ་ཤིང་སོགས་རྫས་བཞི་དང༌། མཎྜལ་ཚོམ་བུའི་ར་བ། སློབ་མ་མཆོད་པ་བཅས་འདུ་བྱ། དཀྱིལ་འཁོར་གྱི་གཞི་ཡོལ་བས་བསྒྲིབས། སྣོད་དུ་གྱུར་པའི་སློབ་མ་ཟུང་དུ་མ་གྱུར་པའི་གྲངས་ལྡན་རྣམས་སྒོ་དྲུང་དུ་འཁོད་པ་ལ་ཁྲུས་བྱ། གྲལ་དུ་འཁོད་ནས་བགེགས་ལ་གཏོར་མ་བྱིན་ཏེ་བདེན་སྟོབས་ཀྱིས་བསྐྲད། ཡུངས་ཐུན་བྲབ། གུ་གུལ་བདུག །སྲུང་འཁོར་བསྒོམ་ལ་མེ་ཏོག་བཀྱེ་བསྡུ་བྱ། འོ་ཁྱེད་ཅག་རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་ཆོས་སྡེ་ལས་བྱོན་པའི་ཞི་ཁྲོ་ངན་སོང་སྦྱོང་བའི་སྔོན་འགྲོ་སྟ་གོན་གྱི་རིམ་པ་གསན་སྙམ་པའི་ཐུགས་བསྐྱེད་དེ་གསན་འཚལ། དེ་ཡང་ཇི་སྐད་དུ། གསང་སྔགས་དངོས་གྲུབ་དོན་གཉེར་ན། །འཇིག་རྟེན་ཚེ་འདིའི་ཞེན་པ་དོར། །ཕ་རོལ་ལ་ནི་འདུན་པ་བསྐྱེད། །འདི་འབྲས་གཉེར་ན་ཕྱི་མ་འཇིག །ཕྱི་མ་གཉེར་ན་འདི་འབྲས་འགྲུབ། །དེ་བས་རང་གཞན་དོན་བྱའི་ཕྱིར། །སེམས་དཔའ་བཟང་པོ་མཆོག་ལ་སྦྱོར། །ཞེས་གསུངས་པ་ལྟར་གང་ཞིག་མཆོག་གི་དོན་སྒྲུབ་པའི་མི་སློབ་པའི་ཟུང་འཇུག་གི་འབྲས་བུ་དོན་དུ་གཉེར་བ་དག་གིས་འཁོར་བའི་བདེ་སྐྱིད་མངོན་མཐོའི་གོ་འཕང་དང༌། ངེས་འབྱུང་གི་བློ་དང་ལྡན་ཡང་རང་ཉིད་ཞི་བདེ་ཙམ་ལས་སེམས་ཅན་གཞན་དོན་རླབས་པོ་ཆེ་སྒྲུབ་པའི་ནུས་པ་དང་བྲལ་བ་ཉན་རང་གི་འབྲས་བུ་ཙམ་དོན་དུ་གཉེར་བྱ་མ་ཡིན་ཏེ། འདིར་ནམ་མཁས་གར་ཁྱབ་ཀྱི་སེམས་ཅན་ཐམས་ཅད་ཕ་མར་མ་གྱུར་པ་ནི་གཅིག་ཀྱང་མེད་ལ། ཕ་མ་དེ་དག་རང་གི་རང་བཞིན་མ་རིག་པའི་ངོ་བོ་བདག་ཉིད་གཅིག་པས་རྒྱུ་བྱས། ཀུན་ཏུ་བཏགས་པའི་མ་རིག་པས་རྐྱེན་སྦྱར་ཏེ་འཁོར་བ་སྡུག་བསྔལ་གྱི་རྒྱ་མཚོ་ལ་བདེ་འདོད་སྡུག་བསྔལ་སྒྲུབ་པའི་ཞེ་འདོད་ཕྱིན་ཅི་ལོག་ལ་རྣམ་པར་འཕྱན་ཞིང༌། བཟོད་དུ་མེད་པའི་སྡུག་བསྔལ་གྱི་རང་བཞིན་ལ་མཐོང་ཆོས་སུ་སྤྱོད་པས་ཤིན་ཏུ་ཉམ་ཐག་པ་འདི་རྣམས་ལ་སྙིང་རྗེ་དྲག་པོས་ཀུན་ནས་བསླངས་ཏེ་འདི་དག་གི་དོན་བྱ་བའི་ཕྱིར་མཁྱེན་བརྩེ་ནུས་གསུམ་གྱི་ཕྲིན་ལས་ཚད་མེད་ཅིང་དོན་གཉིས་ལྷུན་གྲུབ་ཀྱི་བརྟུལ་ཞུགས་བླ་ན་མེད་པས་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་རྡོ་རྗེ་ཐེག་པའི་མྱུར་ལམ་རྨད་དུ་བྱུང་བའི་དཀྱིལ་འཁོར་ཟབ་མོ་འདིར་འཇུག་ཅིང་སྨིན་པར་བྱ་སྙམ་པའི་སེམས་བསྐྱེད་ཀྱི་འཕེན་པ་སྔོན་དུ་འགྲོ་བས། ཀུན་འབྱུང་སྲིད་པའི་རྒྱུ་འབྲས་ལ་ངེས་འབྱུང་གི་ཀུན་སློང་དྲག་པོས་འཇིག་རྟེན་ཚེ་འདིའི་སྣང་ཞེན་ལ་བློ་ལྡོག་དགོས་ཏེ། དེ་ལ་རང་ཅག་རྣམས་མི་ལུས་ཀྱི་རྟེན་ཁྱད་པར་ཅན་ཐོབ་པ་ནི་ད་རེས་ཙམ་ཡིན་ཏེ། ད་རེས་ཀྱི་རྟེན་སྟོང་ལོག་ཏུ་སོང་ན་སླད་ནས་འདི་འདྲ་བའི་ལུས་རྟེན་རྙེད་པ་མ་ཡིན་པའི་ཚུལ་འདུལ་བ་རྣམ་འབྱེད་ལས། དགེ་སློང་དག་ངན་སོང་བའི་འགྲོ་བར་ལྟོས། ཕྱི་ཕྱིར་མི་ཉིད་ཀྱི་དངོས་པོ་ཐོབ་པ་ཡང་ཤིན་ཏུ་དཀའོ།  །ལོག་པར་ལྟ་བའི་སྟོན་པ་འདི་དག་ལ་ལྟོས། ཡང་དག་པའི་དགེ་བའི་བཤེས་གཉེན་དང་ཤིན་ཏུ་འཕྲད་པར་དཀའོ། །ཞེས་གསུངས་པ་ཡིན་ལ། དེ་ཙམ་དུ་རྙེད་པར་དཀའ་བའི་རྒྱུ་མཚན་གང་ཡིན་ན། སྤྱིར་ངན་སོང་གསུམ་གྱི་འགྲོ་བ་ལ་ལྟོས་ན་མིའི་ལུས་རྟེན་ཐོབ་པ་མི་སྲིད་པའི་ཚོད་ཡིན་པས་མཐོང་ཆོས་སུ་མི་དང་སྲོག་ཆགས་གཞན་གྱི་མང་ཉུང་ཁོ་ནས་ཀྱང་ཤེས་ལ། མི་ཡང་ཆོས་ལྡན་གྱི་བྱ་བ་ལ་ཞུགས་པ་ནི་ཉིན་མོའི་སྐར་མ་ཙམ་ལས་མི་འདུག་ན། གནས་སྐབས་ཀྱི་བདེ་འབྱོར་ནི་རྟག་པ་མ་ཡིན་པར་འགྱུར་བའི་རང་བཞིན་ཅན་དང༌། དེའི་སྟེང་དུ་སྡུག་བསྔལ་གྱི་སྡུག་བསྔལ་དང༌། ཁྱབ་པ་འདུ་བྱེད་ཀྱི་སྡུག་བསྔལ་གྱིས་རྟག་ཏུ་མནར་བས་རི་དྭགས་མཐའ་ལ་གཅུར་པ་ལྟ་བུའི་ངང་ནས་ད་ལྟའི་སྡུག་བསྔལ་ལ་སྤྱོད་ཅིང་ཕྱི་མའི་སྡུག་བསྔལ་གྱི་རྒྱུ་སྒྲུབ་པ་ནི་མཚང་ཤིན་ཏུ་ཆེ། དེ་བས་ན་འཁོར་བའི་རང་བཞིན་ནི་སྡུག་བསྔལ་གྱི་བཙོན་ར། འཕྲལ་ཉམས་དགའ་ཡང་ཕུགས་མཐའ་སྐྱོ་བ། བྱས་ཚད་སྡིག་པ། བསགས་ཚད་གཞན་དབང༌། བྱ་བ་མང་བ། དོན་ཉུང་བ། བསོད་ནམས་མ་ཡིན་པ་ཁོ་ན་དང་འབྲེལ་ཆེ་བས་འདི་ལས་ཐར་པའི་ཐབས་ལ་མ་འབད་ན་ཤི་འཕོས་ནས་ངན་སོང་དུ་འཁྱམས་པ་ལས་འོས་མེད། ངན་སོང་དུ་སྐྱེས་ན་དམྱལ་བ་ནི་ལྕགས་བསྲེགས་ཀྱི་ས་གཞི་མེ་འབར་བའི་ཀློང་དུ་སོག་ལེ་དང་སྤུ་གྲི་ལ་སོགས་པའི་མཚོན་ཆ་རྣོན་པོའི་དབལ་གྱིས་ལུས་གཤགས། རིའི་བར་དུ་བཅིར། མགོ་ལུས་དབྲལ། ཁྲོ་ཆུར་འཚོད། མཚོན་ཆའི་དབལ་ལ་འདྲེད། གློ་སྙིང་ཡན་ཆད་མེ་འབར་བ་ལ་སོགས་པའི་ཚ་དམྱལ་བརྒྱད། ཁ་ཆར་བུ་ཡུག་རླུང་དང་བཅས་པའི་དཀྱིལ་ན་ལུས་སྦྲེབས་ཤིང་གྲང་ངད་ཀྱིས་ཤ་པགས་དུམ་བུར་གས་པའི་གྲང་དམྱལ་བརྒྱད། སྡུག་བསྔལ་གྱི་རྣམ་གྲངས་འདི་མི་འབྱུང་བྱ་བ་མེད་པའི་ཉི་ཚེ་ཉེ་འཁོར་བ་གཉིས་ཏེ་དམྱལ་ཁམས་བཅོ་བརྒྱད། ལོ་ཟླ་མང་པོར་ཡང་ཟས་སྐོམ་གྱི་མིང་ཡང་མི་ཐོས་ཤིང་ཚ་གྲང་ཁོད་མི་སྙོམས་པའི་ཡི་དྭགས་སྡེ་ཚན་གསུམ། དུད་འགྲོ་ནི་མཐུ་ཆེ་བ་གང་ཡིན་པ་དེས་ཉམ་ཆུང་བ་དེ་ཟ་ཞིང༌། གཞན་ཡང་ལས་ཀྱི་དབང་གིས་གཅིག་ལ་གཅིག་གིས་ཟ་བ་དང༌། མིས་བཀོལ་བ་དང༌། ཤ་དང་པགས་པའི་དོན་དུ་གསོད་པ་དང༌། གསོད་ལུགས་མི་འདྲ་བས་སྡུག་བསྔལ་དང་འཇིགས་སྐྲག་དཔག་ཏུ་མེད་པ་དེ་རང་ཐོག་ཏུ་འབབ་ངེས་ཡིན་ན་དེའི་སྡུག་བསྔལ་ཇི་ལྟར་བཟོད་ནུས། གལ་ཏེ་བདེ་འགྲོ་ཐོབ་ཀྱང་མི་ལ་སྐྱེ་རྒ་ན་འཆི། ཡོད་པ་བྲི་ཡི་དོགས་པ་དང༌། མེད་པ་བཙལ་ཡང་མི་རྙེད་པ་དང༌། དགྲ་དང་འཕྲད་པ་དང༌། གཉེན་དང་འབྲལ་བ་དང༌། དཔྱ་ཁྲལ་གྱིས་གདུང་བ་ལ་སོགས་པ་རང་རེས་མཐོང་ཞིང་མྱོང་བ་འདི་ལགས་མོད། དེ་བཞིན་དུ་འདོད་ཁམས་ཀྱི་ལྷ་རྣམས་ནི་རེ་ཞིག་བདེ་བ་ལྟར་སྣང་ཡང༌། ཧ་ཅང་བག་མེད་པས་གཡེངས་ནས་ཕྱི་མའི་དོན་སྒྲུབ་པ་ལ་གཡེལ་བས། རེ་ཞིག་ན་སྔ་མའི་ལས་ཟད་དེ་སྟན་ལ་མི་དགའ་བ་དང༌། མེ་ཏོག་གི་ཕྲེང་བ་རྙིང་པ་དང༌། ལུས་ལ་རྔུལ་འབྱུང་བ་དང༌། ལྷ་ཟླ་བོས་སྤངས་ཤིང་འདུ་ཤེས་འཁྲུལ་པ་དང༌། ཕྱི་མ་སྐྱེ་འགྱུར་གྱི་གནས་རིས་ངན་པ་མཐོང་ནས་འཇིགས་པ་ལ་སོགས་པའི་འཆི་བའི་ལྟས་ཚང་ནས་སྡུག་བསྔལ་ཤིན་ཏུ་མི་བཟོད་པ་ཡོད་ལ། ཁམས་གོང་མ་དག་ཀྱང་བསམ་གཏན་གྱི་བདེ་བས་འཚོ་བའི་ལས་ཟད་དེ་སྲིད་པ་འོག་མར་ལྟུང་བ་མང་བས་འགྱུར་བའི་སྡུག་བསྔལ་གྱིས་གདུངས་ཤིང༌། སྲིད་པ་ཕྱི་མར་འདུ་བྱེད་ཀྱི་སྡུག་བསྔལ་གྱིས་ཉམ་ཐག་ལ། ཁྱད་པར་ལྷ་མ་ཡིན་རྣམས་ནི་ལྷའི་དཔལ་ལ་མི་བཟོད་པའི་ཕྲག་དོག་གིས་སེམས་རྣལ་དུ་མི་གནས་པས་རྟག་ཏུ་འཁྲུག་རྩོད་འབའ་ཞིག་གིས་གདུངས་ཤིང་གཡུལ་ངོར་ཡན་ལག་ཆད་པ་དང༌། མཚོན་ཆས་བསྣད་པ་ལ་སོགས་པས་ཤིན་ཏུ་སྡུག་བསྔལ་བའི་ཕྱིར་ན་འཁོར་བ་གང་དུ་སྐྱེས་ཀྱང་སྡུག་བསྔལ་གྱི་རང་བཞིན་ཡིན་པའི་ཚུལ་དྲན་པ་ཉེར་བཞག་ལས། སེམས་ཅན་དམྱལ་བ་དམྱལ་མེས་ཉམས། །ཡི་དྭགས་བཀྲེས་ཤིང་སྐོམ་པས་ཉམས། །དུད་འགྲོ་གཅིག་ལ་གཅིག་ཟས་ཉམས། །མི་རྣམས་འཚོ་བ་ཐུང་བས་ཉམས། །ལྷ་རྣམས་བག་མེད་པ་ཡིས་ཉམས། །ལྷ་མིན་འཐབ་ཅིང་རྩོད་པས་ཉམས། །འཁོར་བ་ཁབ་ཀྱི་རྩེ་མོ་ལ། །བདེ་བ་ནམ་ཡང་ཡོད་མ་ཡིན། །ཞེས་སོ།  །དེ་ལྟ་བུའི་འཁོར་བ་ལས་ཐར་པའི་ཐབས་ནི་དམ་པའི་ཆོས་ཁོ་ན་ལས་གཞན་གང་ཡང་མེད་ཀྱང་རང་ཅག་རྣམས་ནི་ལས་ངན་ལ་གོམས་པས་མི་རྟག་པ་ལ་རྟག་པར་འཛིན། སྡུག་བསྔལ་ལ་བདེ་བར་འཛིན་པས་དགེ་བའི་ཕྱོགས་སུ་ནི་བློ་འཇུག་པར་ཤིན་ཏུ་དཀའ། སྡིག་པའི་ལས་རྣམས་རྩེད་མོའི་ཞོར་ཙམ་དུའང་འདུ་བྱེད་ཅིང༌། ཁྱད་པར་ཚེ་འདི་དོན་དུ་གཉེར་བའི་ལས་ཐམས་ཅད་ནི་དངོས་སམ་བརྒྱུད་ནས་སྡིག་པའི་གཡོ་བཀོལ་འབའ་ཞིག་ལས་མ་འདས་པར་ཡིན་པའི་ཚུལ། ཁྱིམ་པ་རང་བཞིན་པ་གཅིག་ལ་ལྟོས་ཀྱང་ཤ་ཁྲག་ལ་ཆགས་ནས་སྲོག་གཅོད། ཚོང་དང་གཡོ་སྒྱུ་ལ་བརྟེན་ནས་མ་བྱིན་པ་ལེན་པས་མཚོན་མི་དགེ་བ་བཅུ་ལ་རྟག་ཏུ་སྤྱོད་པ་ཡིན་ན་དེའི་འབྲས་བུ་ངན་སོང་དུ་འགྲོ་བ་ལས་འོས་ཅི་ཡོད། དེ་བས་ན་ད་ལྟ་རང་དབང་ཡོད་དུས་སྡིག་པ་སྤང་ཞིང་དགེ་བའི་ལས་སྒྲུབ་པ་ལ་བརྩོན་དགོས་ཏེ། སློབ་དཔོན་ཆེན་པོས། འདི་ནི་འཇིག་རྟེན་སྐྱོ་བའི་ཡུལ་ཡིན་པས། །སྐྱེ་བོའི་བདེ་སྐྱིད་ཕུན་སུམ་ཚོགས་འདྲ་བ། །དབྱར་གྱི་ཆུ་དང་རྨི་ལམ་ནོར་རྫས་ལྟར། །བདེན་པ་མེད་ཅིང་ཡུན་རིང་མི་རྟག་པས། །སྐྱོ་བའི་འདུ་ཤེས་རྟག་ཏུ་བསྐྱེད་འཚལ་ལོ། །འདི་ཉིད་ལམ་ལོག་བག་ཆགས་ཆགས་པ་དང༌། །སྐྱེས་བུའི་དཔལ་ལ་ངོ་མཚར་ཆེར་བྱེད་པ། །དེ་ནི་བསོད་ནམས་དམན་པའི་རིགས་ཅན་ཏེ། །ཁྱེད་ཀྱི་སྙིང་ནི་ཤིང་སྡོང་ཁོང་རུལ་ལྟར། །ཕྱིས་ནས་ཐར་པའི་ལོ་འབྲས་མི་འབྱུང་ངོ༌།  །ཀྱེ་མ་ཀྱེ་ཧུད་ཚེ་འདིའི་དཔལ་འབྱོར་ལ། །རྟག་ཅིང་ཕུན་སུམ་ཚོགས་ལྟར་ཤེས་པའི་བློ། །བྱིས་པའི་ནང་ནས་ཐ་ཤལ་སྐྱེས་བུ་སྟེ། །འཇིག་རྟེན་འདི་ན་དེ་བས་བླུན་པ་སུ། །སྔར་ཡང་མ་བྱུང་ཕྱིས་ཀྱང་མི་འབྱུང་ངོ༌། །ཞེས་སོ། །དེ་བས་ན་འཆི་བ་ནམ་འོང་མི་ཤེས་ཤིང༌། དེའི་ཚེ་ད་ལྟའི་ནོར་རྫས་དང༌། དབང་ཐང་དང༌། ཉེ་འབྲེལ་དང༌། མཛའ་བཤེས་དང་འགྲོགས་དབང་ནི་མེད། རང་གི་ལུས་འདི་ཡང་དུར་ཁྲོད་འཇིགས་པར་འདོར་ཞིང་འབྲལ་དགོས། ད་ལྟ་གཏན་དུ་སྡོད་དབང་ཡོད་པ་ལྟ་བུའི་སེམས་ཀྱིས་རང་ཕྱོགས་ལ་ཆགས། གཞན་ཕྱོགས་ལ་སྡང༌། ལོངས་སྤྱོད་དང་ཁ་དྲག་ལ་སོགས་པ་སྒྲུབ་ཀྱང་དེ་རིང་ཡོད་པ་སང་ཉིན་ནས་མེད་པའི་གནས་སྐབས་ཉམས་སུ་མྱོང་ནས་སྲིད་པ་བར་དོའི་འཕྲང་ལ་གཤར་དགོས། དེའི་ཚེ་དབང་ཡོད་དང༌། ནོར་རྫས་དང༌། གཉེན་བཤེས་ཀྱིས་ཕན་པ་ཏིལ་འབྲུ་ཙམ་མེད་པས། སྐྱབས་དང་རེ་ལྟོས་སུ་གྱུར་པ་ནི་དམ་པའི་ཆོས་ལས་གཞན་སུ་ཡང་མེད་པའི་ཕྱིར་ད་ལྟ་ནས་བླ་མ་དང་དཀོན་མཆོག་ལ་བློ་གཏད་དེ་བློ་གདེང་ཐུབ་པའི་ཆོས་ལ་འབད་དགོས། དེ་ལས་ཀྱང་ཐར་པ་བླ་ན་མེད་པ་སངས་རྒྱས་ཀྱི་གོ་འཕང་བསྒྲུབ་པ་ལ་ཐེག་པ་ཆེན་པོའི་སྒོར་ཞུགས་དགོས། དེ་ལའང་རྒྱུ་ལམ་དུ་བྱེད་པ་མཚན་ཉིད་ཀྱི་ཐེག་པ་ལས་ཁྱད་པར་དུ་འཕགས་པ་འབྲས་བུ་ལམ་བྱེད་རྡོ་རྗེ་ཐེག་པ་རྣལ་འབྱོར་བླ་མེད་ཀྱི་རྒྱུད་སྡེ་ནི་ཚེ་གཅིག་ལུས་གཅིག་ལ་རྡོ་རྗེ་འཆང་ཆེན་པོའི་གོ་འཕང་ངེས་པར་སྒྲུབ་པར་བྱེད་པ་ཡིན་ཅིང༌། དེ་ལའང་ལྷག་པའི་ལྷ་རབ་འབྱམས་ཀྱི་རྒྱུད་ལུང་མན་ངག་བསམ་གྱིས་མི་ཁྱབ་པ་ཞིག་བཞུགས་པ་ལས་ཁྱད་པར་དུ་འཕགས་པ་སྔ་འགྱུར་འོད་གསལ་རྡོ་རྗེ་སྙིང་པོའི་རྒྱུད་སྡེ་ཀུན་གྱི་རྒྱལ་པོ་ཞི་ཁྲོ་ན་རཀ་དོང་སྤྲུག་རྣལ་འབྱོར་གྱི་སྤྱི་ཁྲུས་ཆེན་པོ་རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་ཆོས་སྡེ་ལས་བྱོན་པ། ཞི་ཁྲོ་ངན་སོང་སྦྱོང་བ་བཀའ་གཏེར་ཟུང་འཇུག་གི་དབང་བསྐུར་སྦྱིན་པའི་སྐབས་སུ་བབས་པ་ཡིན་ཏེ། དེ་ལའང་སྔོན་འགྲོ་སློབ་མ་ལྷག་པར་གནས་པ་དང༌། དངོས་གཞི་དབང་བསྐུར་བ་གཉིས་སུ་ཡོད་པ་ལས་ཐོག་མར་ལྷག་གནས་ཀྱི་ཆོས་རྣམས་ཞུ་བའི་ཡོན་དུ་མཎྜལ་ཕུལ། ཁྱེད་རྣམས་དཀྱིལ་འཁོར་ཆེན་པོར་སྨིན་པའི་སྣོད་དུ་བསྒྲུབ་ཕྱིར་ཐུན་མོང་དང་ཁྱད་པར་གྱི་སྡོམ་པའི་གཞི་རྟེན་དཀོན་མཆོག་རྩ་བ་གསུམ་ལ་སྐྱབས་སུ་འགྲོ་བ་དང༌། སྡོམ་པ་གསུམ་གྱི་བསླབ་པ་དང་དམ་ཚིག་བཟུང་དགོས་པའི་ཕྱིར་དེ་དག་སྦྱིན་པར་གསོལ་བ་གདབ་པ་འདིའི་རྗེས་ཟློས་མཛོད། ཨེ་མ་དུས་གསུམ་རྒྱལ་བ་ཀུན་ཏུ་བཟང༌། །རིགས་ལྔའི་སངས་རྒྱས་དགོངས་སུ་གསོལ། །དཀོན་མཆོག་གསུམ་ལ་སྐྱབས་འགྲོ་དང༌། །སོ་ཐར་བྱང་སེམས་སྔགས་སྡོམ་རྣམས། །མགོན་པོས་བདག་ལ་གནང་དུ་གསོལ། ལན་གསུམ། དེ་ལྟར་ན་དུས་གསུམ་གྱི་རྒྱལ་བ་སྲས་དང་བཅས་པ་ཀུན་ཀྱང་རྡོ་རྗེ་ཐེག་པ་བླ་མེད་ཀྱི་གསེང་ལམ་ལ་བརྟེན་ནས་སོ་བྱང་སྔགས་ཀྱི་བསླབ་པ་ཀུན་རྫོགས་པར་བཞེས་པས་མི་གནས་པའི་བྱང་ཆུབ་མངོན་དུ་མཛད་དེ་དོན་གཉིས་ལྷུན་གྱིས་གྲུབ་པའི་ཕྱིར་སྲས་བཅས་རྒྱལ་བ་དགྱེས་པའི་ལམ་བཟང་པོར་གཞུག་པའི་ཕྱིར་འདི་ལ་གསན་པས་ཁྱབ་པར་གདའ། ཨེ་མ་སྣོད་དང་ལྡན་པའི་བུ། །གསང་སྔགས་ཆོ་ག་ཁྱེད་ལ་བསྟན། །འདས་དང་མ་བྱོན་ད་ལྟ་ཡི། །སངས་རྒྱས་མ་ལུས་ཐམས་ཅད་ཀྱང༌། །གསང་སྔགས་ཆོ་ག་འདི་མཁྱེན་ནས། །རྫོགས་པའི་བྱང་ཆུབ་བརྙེས་པ་ཡིན། །བདུད་ཀྱི་དཔུང་ཡང་འདི་ཡིས་བཅོམ། །དེ་ལྟར་ཁྱེད་ཀྱང་རྗེས་སུ་ཞུགས། ཞེས་གདམས་ཏེ། མདུན་གྱི་ནམ་མཁར་ཐུན་མོང་དང་ཁྱད་པར་གྱི་སྡོམ་པ་བཟུང་བའི་རྟེན་དཀོན་མཆོག་རྩ་གསུམ་སྐྱབས་ཡུལ་རྒྱ་མཚོ་སྤྲིན་གཏིབས་པ་ལྟར་བཞུགས་པའི་སྤྱན་སྔར་ལམ་ལོག་པ་ལས་ཁྱད་པར་དུ་གྱུར་པ་སོ་ཐར་རིགས་བདུན། ལམ་དམན་པ་ལས་ཁྱད་པར་དུ་གྱུར་པ་བྱང་སེམས་ཀྱི་བསླབ་པ་དང༌། ལམ་རྫོགས་པ་ལས་བྱེ་བྲག་ཏུ་འཕགས་པ་སྔགས་ཀྱི་སྡོམ་པ་དང་དམ་ཚིག་རྣམས་ཚུལ་བཞིན་དུ་བཟུང་ཞིང་སློབ་སྙམ་པས་ཐུན་མོང་གི་སྡོམ་པ་བཟུང་བ་འདིའི་རྗེས་ཟློས་མཛོད། སྐྱེས་བུ་གསུམ་གྱི་བློ་རྩལ་རྣམས། །གོང་ནས་གོང་དུ་སྤར་བའི་བློས། །ཀུན་བཟང་རིགས་ལྔའི་ལྷ་ཚོགས་ལ། །འདི་བཟུང་བླ་མེད་བྱང་ཆུབ་བར། །གུས་པ་ཡིས་ནི་སྐྱབས་སུ་མཆི། །བླ་མ་ཀུན་བཟང་སྤྱན་སྔ་རུ། །ལུས་ངག་ཡིད་ཀྱིས་གཞན་རྣམས་ལ། །གནོད་པའི་ལས་ལྡོག་དགེ་བ་སྒྲུབ། །དགེ་ཚུལ་དགེ་སློང་བྱང་ཆུབ་སེམས། །སོ་སོར་ཐར་པའི་སྡོམ་པ་ལ། །བདག་ནི་རྒྱུན་དུ་གནས་ཤིང་བསྲུང༌། །ལན་གསུམ། དེ་ལས་ཀྱང་ཆེས་འཕགས་པ་ཐེག་པ་ཆེན་པོ་རིག་པ་འཛིན་པའི་སྡེ་སྣོད་ཀྱི་སྒོ་གསུམ་ཐ་མལ་གྱི་སྣང་ཞེན་ལས་ལྡོག་པའི་ཉེས་སྤྱོད་སྡོམ་པ། བསྐྱེད་རྫོགས་ཀྱི་ལམ་ཟབ་མོ་ལ་བསླབ་པའི་དགེ་བ་ཆོས་སྡུད། གཞན་དོན་རླབས་པོ་ཆེའི་ཕྲིན་ལས་བཞི་སྒྲུབ་པའི་སེམས་ཅན་དོན་བྱེད་ཀྱི་སྡོམ་པའི་ཚུལ་ཁྲིམས། བྱེ་བྲག་པ་ཁྱད་པར་གྱི་དམ་ཚིག་དང་སྡོམ་པ་བླང་བ་འདིའི་རྗེས་ཟློས་མཛོད། ཧོཿ བླ་མ་ཀུན་བཟང་དགོངས་སུ་གསོལ། །འདི་བཟུང་བྱང་ཆུབ་མ་ཐོབ་བར། །འགྲོ་དྲུག་སེམས་ཅན་ཐམས་ཅད་ལ། །མ་དང་བུ་ཡི་འདུ་ཤེས་ཀྱིས། །མ་བསྒྲལ་བ་རྣམས་བསྒྲལ་བ་དང༌། །མ་གྲོལ་དགྲོལ་དང་དབུགས་དབྱུང་ཕྱིར། །སྨོན་པའི་བྱང་ཆུབ་སེམས་བསྐྱེད་དོ། །སྔོན་གྱི་རྒྱལ་བ་ཐམས་ཅད་ཀྱང༌། །སྡོམ་པ་ལ་ནི་གནས་པ་ལྟར། །འདི་བཟུང་འཁོར་བ་མ་སྟོང་བར། །བླ་མེད་འཇུག་པའི་བྱང་ཆུབ་སེམས། །ཕ་རོལ་ཕྱིན་དྲུག་སློབ་ཅིང་སྒྲུབ། །ཀུན་དོན་ཚུལ་ཁྲིམས་གསུམ་གྱི་དངོས། །ཐ་མལ་སྣང་ཞེན་ཉེས་སྤྱོད་སྡོམ། །བསྐྱེད་རྫོགས་ཟབ་མོའི་དགེ་ཆོས་སྡུད། །རྣམ་བཞིའི་ཕྲིན་ལས་གཞན་ཕན་སྤྱོད། །སྔགས་ཀྱི་ཆོ་གས་སྡོམ་པར་བགྱི། །ལན་གསུམ། དེ་དག་གིས་དབང་གི་གཞི་འཛིན་པའི་སྡོམ་པ་རྒྱ་མཚོ་མཐའ་ཡས་པ་རྒྱུད་ལ་སྐྱེས་པ་ལ་དགའ་སྤྲོ་བསྐྱེད་དེ་སྡོམ་སེམས་བརྟན་པོ་བཟུང་བས་སྔར་སྡོམ་པ་མ་ཐོབ་པ་ལ་གསར་དུ་ཐོབ། ཐོབ་ཟིན་ཉམས་པ་རྣམས་སོར་ཆུད། གནས་པ་རྣམས་གོང་དུ་འཕེལ་ཞིང་དབང་གི་སྡོམ་པའི་རྒྱུན་འཛིན་པ་ཡིན་ནོ།  །གཉིས་པ་སྟ་གོན་དངོས་ལ། དང་པོ་སྐྱེ་མཆེད་བྱིན་གྱིས་བརླབ་པ་ནི། ལས་བུམ་གྱི་ཆུས་བསང་གཏོར་བྱས་ཏེ། དེ་ནས་སྒོ་གསུམ་དཀྱིལ་འཁོར་གྱི་ལྷའི་རྡོ་རྗེ་གསུམ་གྱི་ངོ་བོར་བྱིན་གྱིས་བརླབ་པའི་ཕྱིར་ཁྱེད་རང་རྣམས་སྐད་ཅིག་གིས་བཅོམ་ལྡན་འདས་རྡོ་རྗེ་སེམས་དཔའ་དཀར་པོ་རྡོ་རྗེ་དང་དྲིལ་བུ་འཛིན་ཅིང་དར་དང་རིན་ཆེའི་རྒྱན་གྱིས་བརྒྱན་པ། ཞབས་སྐྱིལ་མོ་ཀྲུང་གིས་པདྨ་དང་ཟླ་བའི་གདན་ལ་བཞུགས་པའི་སྐུར་གསལ་བའི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་མཐིང་གས་མཚན་པར་སངས་རྒྱས་ཐམས་ཅད་ཀྱི་སྐུ་གསུང་ཐུགས་རྡོ་རྗེའི་རང་བཞིན་དུ་བྱིན་གྱིས་བརླབས་ཤིང་བརྟན་པར་བྱས་པའི་མོས་པ་མཛོད། གནས་གསུམ་དུ་དྲི་ཡི་ཐིག་ལེ་བྱས་པ་དང་ལྷན་ཅིག ཨོཾ་ཨཱཿཧཱུྃ། སླར་ཡང་མས་ནས་རིམ་བཞིན། ཧཱུྃ་ཨཱཿཨོཾ། ཞེས་རྒྱས་གདབ། དེང་ནས་བཟུང་སྟེ་མཆོད་པའི་གནས་སུ་གྱུར་ཅིང་འདོད་ཡོན་ལ་སྲེད་པས་སྤྱད་མི་དགོས་པར་དབང་ཡུལ་ལྷ་ཡི་རང་བཞིན་བདེ་སྟོང་ཡེ་ཤེས་འབར་བའི་གྲོགས་སུ་ཉེ་བར་སྤྱོད་པ་མཚོན་ཕྱིར་མཆོད་པའི་ཡོ་བྱད་རྣམས་ཀྱིས་མཆོད་ཅིང་མངའ་དབུལ་བར་མོས་མཛོད། ཨོཾ་བཛྲ་པུཥྤེ་པྲ་ཏཱིཙྪ་ཡེ་སྭཱ་ཧཱ། སོགས་ཉེར་སྤྱོད་ལྔས་མཆོད། འདི་ལྟར་འདོད་པའི་ཡོན་ཏན་ལྔ་ལ་ལོངས་སྤྱོད་པའི་དབང་ཤེས་རྣམས་ཀྱང་རིགས་ལྔའི་རང་བཞིན་དུ་ཤེས་པས་གཟུང་འཛིན་ཐ་མལ་གྱི་ཞེན་རྟོག་དབྱིངས་སུ་དག་པའི་ཕྱིར་དབང་པོའི་སྒོ་ལྔར་དྲི་ཡི་ཐིག་ལེ་བགོས་ཏེ་རིགས་ལྔའི་ས་བོན་གྱིས་རྒྱས་གདབ་པར་མོས་མཛོད། རྣ་བར་ཏྲཱྃ་ལས་རྣ་བའི་དབང་ཤེས་རིན་ཆེན་འབྱུང་ལྡན་དང༌། ལྕེ་ལ་ཧྲཱིཿལས་ལྕེའི་དབང་ཤེས་སྣང་བ་མཐའ་ཡས། སྙིང་ལ་ཧཱུྃ་ལས་ཡིད་ཀྱི་དབང་ཤེས་རྡོ་རྗེ་མི་བསྐྱོད་པ། ཡན་ལག་བཞི་ལ་ཧྲཱིཿལས་ལས་ཀྱི་དབང་པོ་དོན་ཡོད་གྲུབ་པ། སྙིང་གར་ཧཱ་ལས་ གྲོལ་ཐིག་དབང་ཆོག་ཏུ་ཡན་ལག་བཞིར་ཧཱ། སྙིང་གར་ཨོཾ་འབྱུང་བས་དཔྱད་དགོས། མཆན། རྣམ་ཤེས་ཀྱི་དབང་པོ་རྣམ་པར་སྣང་མཛད་དུ་གསལ་བར་མོས་པས་ས་བོན་རྣམས་བརྗོད་ཅིང་དྲིའི་ཐིག་ལེ་བྱས་པས། སྐྱེ་མཆེད་ཐམས་ཅད་དེ་བཞིན་གཤེགས་པ་རིགས་ལྔའི་བདག་ཉིད་དུ་བྱིན་གྱིས་བརླབས་པར་མོས་མཛོད། གཉིས་པ་སོ་ཤིང་སྦྱིན་པ་ནི། འོ་མ་ཅན་གྱི་སོ་ཤིང་སོར་བཅུ་གཉིས་སམ་བརྒྱད་པ་དྲི་བཟང་གིས་བྱུགས་རྩེ་མོར་མེ་ཏོག་གི་ཕྲེང་བ་སྲད་བུ་དམར་པོས་བཅིངས་པ་ལ་སྔགས་དང་ལས་ཆུས་བསང་བ་སློབ་མའི་གྲངས་དང་མཉམ་པ་དང༌། མཎྜལ་གྱི་ར་བ་པདྨ་འདབ་བརྒྱད་མུ་ཁྱུད་ཀྱིས་བསྐོར་བ་རེ་ཁཱ་དཀར་པོས་བྲིས་པར་ཚོམ་བུ་ལྔ་བཀོད་པ་ཉེར་བསྡོགས་བྱས་ཏེ། ལས་སྔགས་བདུན་བརྗོད་པས། ཧཱུྃ་ལས་བྱུང་བའི་སོ་ཤིང་སློབ་མའི་ལག་གཉིས་མཁའ་དབྱིངས་ཀྱི་རྒྱས་བཟུང་ཞིང༌། རྩེ་མོས་ལྗགས་བཞར་རྩ་བས་སོ་དྲུད་པས་ཚེ་རབས་སུ་བསགས་པའི་སྡིག་སྒྲིབ་ཐམས་ཅད་དག་པ་དང་རང་གི་དངོས་གྲུབ་ཇི་ལྟར་ཐོབ་པའི་མཚན་མ་གསལ་བར་བསྟན་དུ་གསོལ་སྙམ་པས་འདིའི་རྗེས་ཟློས་དང་བཅས་ཏེ་མིག་བཙུམས་ལ་དོར་མཛོད། བཛྲ་ཧ་ས་ཧ། དེ་ལྟར་དོར་བས། ཕྱོགས་བཞི་དབུས་དང་ལྔར་བབ་ན། །རིགས་ལྔ་གང་ཡིན་དངོས་གྲུབ་ཐོབ། །མཚམས་སུ་ཕྲན་ཚེགས་སྟེང་མཁའ་སྤྱོད། །འོག་ཏུ་རྩེ་བསྟན་ས་སྤྱོད་དང༌། །རྩ་བ་རང་ལ་བསྟན་པ་ན། །ལན་གསུམ་སླར་ཡང་བསྐྱར་ཞིང་འཕང༌། །གཡས་སུ་ཡོ་ན་ཚེ་ཐར་གཏོང༌། །གཡོན་དུ་ཡོ་ན་སྦྱིན་པ་བཀྱེ། །ཕྲེད་གསགས་མར་མེ་བརྒྱ་རྩ་སྦར། །ཀུན་ངན་སྒྲུབ་ལ་བར་གཅོད་འབྱུང༌། །བསགས་སྦྱང་དགེ་བ་རླབས་ཆེན་བྱ། །ཞེས་གསུངས་སོ།  །གསུམ་པ་ཁྱོར་ཆུ་སྦྱིན་པ་ནི། དུང་ཞལ་གྱི་ཆུ་བྃ་ལས་བདུད་རྩིའི་རྒྱ་མཚོར་བསམ་ལ། ཨོཾ་ཨཱཿཧཱུྃ། ཞེས་འབྲུ་གསུམ་གྱིས་བྱིན་བརླབས་ལ། དྲི་བཟང་དང་སྦྱར་བའི་ཁྱོར་ཆུ་ལག་གཡས་སུ་ལན་གསུམ་བྱིན་ཏེ་འཐུང་དུ་བཅུག་པས་ལུས་ཀྱི་ནང་ཐམས་ཅད་ཡེ་ཤེས་ཀྱི་བདུད་རྩིས་གང༌། ལྷག་མ་དཔུང་པ་གཡས་ཕྱོགས་ནས་རྒྱབ་ཏུ་དོར་བས་སྒོ་གསུམ་འཁྲུལ་པའི་བག་ཆགས་དང་བཅས་པ་དག་པར་མོས། ཨོཾ་ཧྲཱིཿབི་ཤུདྡྷ་སརྦ་དྷརྨ་པཱ་པཾ་བི་ཤུདྡྷ་ནི་ཙ་སྱ་བི་ཤྭ་དྷ་ཡ་སརྦ་བི་ཀལྤནྡ་ཨ་པ་ན་ཡ་ཧཱུྃ། ཞེས་སྔགས་བརྗོད་པས་སྦྱིན། བཞི་པ་སྲུང་སྐུད་བཅིང་བ་ནི། སློབ་བུའི་ལུས་ཚད་དང་མཉམ་པའི་སྲད་བུ་དམར་པོའམ་ཁ་དོག་ལྔ་ལྡན་སུམ་ལྟེབ་ཏུ་བྱས་པ་རྡོ་རྗེའི་མདུད་པ་གསུམ་བོར་བར་ལས་ཆུས་བསང་ཞིང་རྩ་སྔགས་ཀྱིས་བྱིན་གྱིས་བརླབས། ཧཱུྃ་ལས་སྐྱེས་པའི་རྡོ་རྗེའི་མདུད་པ་འདི་ཉིད་སྐྱེས་པའི་དཔུང་པ་གཡོན་དང་བུད་མེད་ཀྱི་གཡས་སུ་ཉིས་རིམ་གྱིས་བཅིངས་པས་སྒོ་གསུམ་ལ་བར་དུ་གཅོད་པའི་ཚོགས་སྤྱི་དང་ཁྱད་པར་ཁམས་འཕོ་བའི་གེགས་ལས་སྲུང་བར་མོས་ཤིག །ཨོཾ་སརྦ་བུདྡྷ་མཻ་ཏྲི་རཀྵ་རཀྵ་སརྦ་སྭཱ་ཧཱ། ཞེས་བཟླས་ལ་བཅིངས་པ་ལ། རྡོ་རྗེ་དང་བཅས་པའི་དྲི་ཆུས་མདུད་པ་ལ་རྒྱ་གྲམ་དུ་རེག་ནས། ཨོཾ་བཛྲ་རཀྵ་རཀྵ་སྭཱ་ཧཱ། ཞེས་བརྗོད་པས་ལུས་རྡོ་རྗེའི་གོ་ཆས་ཞུ་ལུགས་སུ་གཡོགས་པ་ལ་རྡོ་རྗེ་རྒྱ་གྲམ་གྱི་མདོ་འཛིན་རེས་མཚན་པར་སྒོམ་མོ།  །ལྔ་པ་ཀུ་ཤ་སྦྱིན་པ་ནི། ཀུ་ཤའི་ཕོན་པོ་ཆེ་ཆུང་ལ་བསང་ཆུ་འཐོར་ཞིང༌། ཨོཾ་བཛྲ་ཏཱིཀྵྞ་དྷཱི། ཨོཾ་བཛྲ་རཀྵ་ཧཱུྃ། ཀུ་ཤ་མི་དམིགས་པའི་ངང་ལས་ཆེ་བ་ཧཱུྃ་དང་ཆུང་བ་དྷཱི་ལས་བྱུང་བའི་ཀུ་ཤའི་ཆུན་པོ་སྔོ་ལྗང་རྩ་རྩེ་མ་ཉམས་པ་རྨི་ལམ་མི་འཁྲུགས་པའི་ནུས་པ་ཅན་ཆེ་བ་སྟན་གྱི་དོན་དུ་ལག་གཡོན། ཆུང་བ་སྔས་ཀྱི་དོན་དུ་ལག་གཡས་པར་བསྣོལ་ནས་གཏད་པར་མོས། དྷཱི་ཧཱུྃ། ཞེས་ས་བོན་གཉིས་ལན་བདུན་བརྗོད་ལ། ཨོཾ་བཛྲ་ཏཱིཀྵྞ་དྷཱི། ཞེས་གཏད་པས། ཧཱུྃ་བཛྲ་ཏཱིཀྵྞ་སིདྡྷི་ཧཱུྃ། ཞེས་སློབ་མས་བླངས་ཏེ། འོ་དོ་ནུབ་རྨི་ལམ་མི་འཁྲུགས་པའི་ནུས་པ་ཅན་གྱི་ཀུ་ཤ་ཆེ་བ་སྟན་དང་ཆུང་བ་སྔས་སུ་གྱིས་ལ་བླ་མ་དང་དཀྱིལ་འཁོར་གྱི་ལྷ་ཚོགས་ལ་མོས་པ་རྩེ་གཅིག་པས་གློ་གཡས་སར་ཕོབ་ལ་ཉོལ། ནངས་པར་དགེ་མི་དགེའི་རྨི་ལམ་ང་ལ་སྨྲོས་ཤིག །རྗེས་ཕྱིར་མི་ལྡོག་པའི་སླད་དུ་ཟབ་མོའི་ཆོས་བཤད་དེ་སྤྲོ་བ་བསྐྱེད་ཅིང་གདམས་ངག་བརྗོད་པ་ལགས་པས་འདི་ལ་གསན་འཚལ། འཇིག་རྟེན་ན་རྙེད་པར་དཀའ་བ་མེ་ཏོག་ཨུ་དུམ་ཝ་ར། དེ་བས་ཀྱང་སངས་རྒྱས་རྙེད་པར་དཀའ། དེ་བས་ཀྱང་གསང་སྔགས་ཀྱི་ཆོས་རྙེད་པར་དཀའ་སྟེ། རྒྱུའི་ཐེག་པར་བསྐལ་པ་གྲངས་མེད་གསུམ་དུ་ངལ་དུབ་ཀྱི་མཐའ་དང༌། རྨོངས་པའི་སྒྲིབ་པ་ཕྱོགས་གཅིག་པ་ཉིད་གསང་སྔགས་ཐབས་མང་བ་དང༌། དཀའ་བ་མེད་པ་དང༌། བྱིན་རླབས་མྱུར་བ་དང༌། དབང་པོ་རྣོན་པོས་ཡེ་ཤེས་ལ་སྤྱོད་པས་ཚེ་གཅིག་ལ་སོགས་པར་མིག་འཕྲུལ་ལྟར་གྲོལ་བའི་ལམ་ཡིན་ཏེ། འདི་ལྟར་དཀྱིལ་འཁོར་གྱི་ཚོན་རྩི་མཐོང་བས་ཀྱང་སྡིག་པའི་ལས་ཇི་སྙེད་པ་ཟད་པར་འགྱུར་ན་སང་ནངས་པར་དཀྱིལ་འཁོར་ཆེན་པོར་ཞུགས་ནས་སྨིན་ཅིང་གྲོལ་བའི་ནུས་པ་རྒྱུད་ལ་འཇོག་པ་འོག་མིན་དུ་མཐར་ལམ་ལ་ཞུགས་པ་དང་སྐལ་པ་མཉམ་པ་ཡིན་པས་སྤྲོ་བ་ཁྱད་པར་ཅན་སྐྱེད་ཅིག །དེ་དག་གིས་སྔོན་འགྲོ་སྟ་གོན་གྱི་བྱ་བ་རྣམས་གྲུབ་པ་ལགས་པས་དགེ་བ་གཞན་དོན་དུ་བསྔོ་བ་དང༌། དངོས་གཞིའི་དབང་བསྐུར་སང་ཉིན་འབྱུང་བ་ལགས་སོ།  །ཞེས་དགེ་བ་བསྔོས་ལ་སློབ་མ་རྣམས་གྱེས། སློབ་དཔོན་གྱིས། ཛཿཧཱུྃ་བྃ་ཧོཿས་སྟ་གོན་གྱི་ཡེ་ཤེས་པ་ནམ་མཁར་བཞུགས་པ་རྣམས་དལ་ལ་བསྟིམས་པས་བྱིན་གྱིས་བརླབས་པར་བསམ། བདག་བསྐྱེད་བསྡུ་ལྡང་བསྔོ་སྨོན་བྱས་པས་གྲུབ་པོ།  །སྟ་གོན་འདི་ནི་ལྷ་སྔགས་སོགས་ཁ་སྒྱུར་ཅུང་ཟད་བྱས་པས་དཔལ་ཆེན་འདུས་པ་དང༌། ཁྲག་འཐུང་རིགས་བཞིའི་སྒོས་བཀའ་ལ་སྟ་གོན་སྦྱོར་ན་ཚུལ་འདི་དེ་དག་ཐམས་ཅད་ཀྱི་ཁྱབ་བྱེད་དུ་འགྱུར་བའང་ཞར་ལ་འཕྲོས་པའོ།  །གཉིས་པ་དངོས་གཞིའི་ལས་རིམ་ལ། དཀྱིལ་འཁོར་དང་དབང་རྫས་འགོད་པ། དབང་དོན་དུ་སྒྲུབ་ཅིང་མཆོད་པ། བདག་ཉིད་འཇུག་ཅིང་སློབ་མ་གཞུག་པའོ།  །དང་པོ་ནི། སྟེགས་བུའི་སྟེང་རས་བྲིས་ཀྱི་དཀྱིལ་འཁོར་མཚན་ཉིད་དང་ལྡན་པ་བཀྲམ། ཅིས་ཀྱང་མ་འབྱོར་ན་གོང་སྨོས་ལྟར་འབྲུའི་ཚོམ་བུ་ལྷ་གྲངས་ཅན་བཀོད་པའི་དབུས་མཉྫིའི་ཁར་སྟ་གོན་བྱས་པའི་རྣམ་བུམ་བཞག །ཤར་དུ་རྡོར་དྲིལ་ལྷན་ཅིག་པ། ལྷོར་དབུ་རྒྱན། ནུབ་ཏུ་རྡོ་རྗེ། བྱང་དུ་དྲིལ་བུ། དབུས་སུ་ཞི་ཁྲོ་ཡོངས་རྫོགས་ཀྱི་ལྷ་ཙཀ །གཡས་སུ་སྙིང་ཐིག་གི་གླེགས་བམ། གཡོན་དུ་གསང་དབང་གི་རྟེན་ཐོད་པ་རྫས་ལྡན་མ་དཱ་ན་དང་ག་པུར་བདུད་རྩིའི་ཕུར་མ་སོགས་ཀྱིས་གཏམས་པ་དར་དམར་བརྒྱད་ལྟེབ་ཀྱིས་བཀབ་པ། ནུབ་ཏུ་རིག་ཙཀ་མེ་ལོང་ཤེལ་རྡོ་རྣམས་དང༌། ཕྱོགས་གང་བདེར་རྗེས་གནང་གི་ཆས་གདུགས། གླེགས་བམ། དུང་དཀར། དྲིལ་བུ། འཁོར་ལོ་རྣམས་དང༌། གཞུང་མཐུན་སྨན་རཀ་གཏོར་མ། ཆུ་གཉིས་ཉེར་སྤྱོད་བཅས་བསྐོར་བཤམ་བྱ། ལས་བུམ། སྔོན་འགྲོའི་དཀར་བགེགས། ཚོགས་ཀྱི་ཡོ་བྱད། བཀའ་སྲུང་དང་ཆད་བརྟན་གྱི་གཏོར་མ། མིག་དར། མེ་ཏོག །དོར་ར་པདྨ་འདབ་བཞི་དབུས་དང་བཅས་ལ་རིགས་ལྔའི་ཕྱག་མཚན་བྲིས་པ། ཕྱག་ཤིང༌། གུལ་ཡུངས། བྱིན་འབེབས་ཀྱི་བདུག་རྫས་དང༌། རོལ་མོའི་རིགས་བཅས་སྤྱི་ལྟར་ཚོགས་པར་བྱའོ།  །གཉིས་པ་ནི། གསོལ་འདེབས་སྔོན་དུ་འགྲོ་བས་ཞི་ཁྲོ་ངན་སོང་སྦྱོང་བའི་ལས་བྱང་བཞིན་བདག་མདུན་དམ་ཚིག་གི་འཁོར་ལོ་བསྒོམ། ཡེ་ཤེས་པ་སྤྱན་དྲངས་བསྟིམས་ཕྱག་མཆོད་བསྟོད་པ་བཅས་གཞུང་ལྟར་དང༌། ཞི་བ་དང་ཁྲོ་བོའི་བསྙེན་པ་ཅི་མང་དང༌། ལས་སྦྱོར་རྩ་རིག་དེའི་བཅུ་ཆ་བཅས་བཟླ། བུམ་བཟླས་ལ་གྲུབ་ན་ལྷ་གསལ་འདེབས་བུམ་པ་སྟ་གོན་གྱི་སྐབས་བཞིན་དང༌། ཡང་ན་མདུན་བསྐྱེད་ཀྱི་སྣང་ཆ་མེ་ལོང་དུ་གཟུགས་བརྙན་ཤར་བ་བཞིན་བུམ་པར་སྐད་ཅིག་གིས་བསྐྱེད་དེ། བདག་གི་ཐུགས་ཀ་ནས་སྤྲོས་པའི་འོད་ཟེར་གཟུངས་ཐག་ལ་འཁྲིལ་ཏེ་སོང༌། རྣམ་རྒྱལ་བུམ་པ་མཚན་ཉིད་ཚང་བའི་ནང་གཞལ་མེད་ཁང་གི་རྣམ་པར་རྫོགས་པའི་བརྟེན་པའི་ལྷ་ཚོགས་ཐམས་ཅད་ཀྱི་ཐུགས་རྒྱུད་བསྐུལ་སོ་སོའི་ཐུགས་ཀར་ཨ་ཡིག་རེ་རེ་དང༌། གཙོ་བོ་རྣམ་སྣང་གི་ཐུགས་ཀར་ཟླ་གདན་ལ་ཨཱ་ལི་ཀཱ་ལིའི་ཕྲེང་བ་གཡས་སུ་འཁོར་བ་ལས་འཕྲོས་པའི་འོད་ཟེར་གྱིས་ལྷ་ཚོགས་རྣམས་བསྐུལ། བདེ་བའི་སྒྲ་དང་བཅས་སྙོམས་པར་ཞུགས་པའི་སྦྱོར་མཚམས་ནས་བདུད་རྩིའི་རྒྱུན་བབ་བུམ་པའི་ཆུ་དང་འདྲེས་པས་སློབ་མའི་སྡིག་སྒྲིབ་སྦྱོང་བའི་ནུས་ལྡན་དུ་གྱུར་པར་བསམ་ལ། ཨོཾ་ཧཱུྃ་ཏྲཱྃ་ཧྲཱིཿཨཱཿས་འགོ་དྲངས་པའི་དབྱངས་གསལ་མཐར། སརྦ་པཱ་པཾ་ཤིནྟཾ་ཀུ་རུ་སྭཱ་ཧཱ། ཞེས་བཏགས་པ་ཅི་ནུས་དང༌། ལས་བུམ་ལ་དམིགས་པའི་སྔགས་དང༌། ཨ་བྷི་ཥེ་ཀའང་ཅུང་ཟད་བཟླ། མདུན་བསྐྱེད་ལ་ཡིག་བརྒྱའི་བཟླས་པ་བརྒྱ་རྩ་བརྒྱད་ལས་མི་ཉུང་བར་གྲུབ་ནས། ལས་བྱང་ལྟར་མཆོད་བསྟོད་དང༌། ཨོཾ་ཨཱཿཧཱུྃ་གིས་མཆོད་ཡོན་ཕུལ་ཏེ་འོད་ཞུ་བྱ་བ་དབང་གི་སྤྱི་དོན་དང༌། ཞི་ཁྲོའི་ཆོ་ག་གཉིས་ཀ་ལས་གསུངས་པས་གང་འགྲུབ་བྱ། ཚོགས་བསགས། སྐོང་བཤགས། ཚོགས་མཆོད། བསྒྲལ་བསྟབ་བཅས་མཐར་ཆགས་སུ་བཏང་ངོ༌།  །གསུམ་པ་ལ་གཉིས་ལས་དང་པོ་བདག་ཉིད་འཇུག་པ་ནི། བདག་འཇུག་གི་ཆོ་ག་ནི་ཚོགས་གཉིས་སྤེལ་བ་དང༌། དམ་ཚིག་ཉམས་ཆག་གསོ་ཞིང་རྒྱུད་དག་པས། ལམ་འབྲས་ཀྱི་ཐོབ་བྱའི་རྟེན་འབྲེལ་རྣམས་རྒྱུད་ལ་འཇོག་པའི་དགོས་པ་དུ་མ་དང་ལྡན་པས་དབང་གི་ཆོ་ག་ལས་བྱུང་བ་ལྟར་གྲུབ་ན་ཤིན་ཏུ་ལེགས་ཤིང༌། མི་ནུས་ན་ལྷ་བདག་རང་བཞིན་དབྱེར་མེད་དུ་ཤེས་པས་རིག་པའི་མེ་ཏོག་དོར་བས་ཀྱང་རུང་བ་སྔ་འགྱུར་གྱི་རྒྱུད་སྡེ་སྒྱུ་འཕྲུལ་དྲྭ་བ་ནས་བྱུང་བ་ལྟར་རིག་འཛིན་བརྒྱུད་པའི་ཕྱག་བཞེས་སུའང་མཛད་པས་ན། ཨོཾ་བཛྲ་ས་མ་ཡ་ཨོཾ། ཨཱཿབཛྲ་ས་མ་ཡ་ཨཱཿ ཧཱུྃ་བཛྲ་ས་མ་ཡ་ཧཱུྃ། སྭཱ་བཛྲ་ས་མ་ཡ་སྭཱ། ཧཱ་བཛྲ་ས་མ་ཡ་ཧཱ། ཞེས་དང༌། ཨོཾ་བཛྲ་ཀྲོ་དྷ་ས་མ་ཡ་སྟྭཾ། ཞེས་རིག་པའི་མེ་ཏོག་དོར་བས། བདག་དང་དཀྱིལ་འཁོར་པའི་སྐུ་གསུང་ཐུགས་ཡོན་ཏན་ཕྲིན་ལས་རྣམས་གཉིས་སུ་མེད་པར་གྱུར་པར་བསམ་ལ། ཨོཾ། ཡེ་ཤེས་རྒྱལ་པོ་སྐུ་གསུང་ཐུགས། །ཡོན་ཏན་ཕྲིན་ལས་རྨད་པོ་ཆེ། །དེ་ཉིད་དུ་ནི་མཉམ་སྦྱོར་བའི། །ཕྱག་རྒྱ་ཆེན་པོར་བདག་སྦྱོར་ཅིག །ཨོཾ་བཛྲ་ས་མ་ཡ་ཧཱུྃ། ཨོཾ་བཛྲ་ས་མ་ཡ་སྟྭཾ། ཨོཾ་བཛྲ་ས་མ་ཡ་ཧོཿ ཞེས་དང༌། ཨོཾ། ཁྲོ་ལ་ཁྲོས་པས་ཞི་མཛད་པ། །ཐུགས་རྗེ་ཁྲོ་དཔལ་རྔམས་པའི་ཚོགས། །འབར་བའི་བྱིན་རླབས་རྨད་པོ་ཆེ། །ད་ལྟ་ཉིད་དུ་བདག་ལ་སྩོལ། །ཨོཾ་བཛྲ་ཀྲོ་དྷ་ས་མ་ཡ་སྟྭཾ། ཨོཾ་བཛྲ་ཀྲོ་དྷ་ས་མ་ཡ་ཕཊ། ཨོཾ་ཀྲོ་དྷ་ས་མ་ཡ་ཧོཿ ཞེས་དངོས་གྲུབ་བསྐུལ་ཞིང་བསྟིམ་མོ།  །གཞན་རྗེས་སུ་འཛིན་པ་དང་འབྲེལ་ན། དཀྱིལ་འཁོར་གྱི་ལྷ་ལ་ཐལ་མོ་སྦྱར་བས་བཏུད་དེ། ཨོཾ། རྡོ་རྗེའི་ཡེ་ཤེས་ཐོབ་བྱེད་པ། །དེ་བཞིན་གཤེགས་པ་ཐམས་ཅད་ཀྱི། །སྙིང་པོའི་དཀྱིལ་འཁོར་ཆེན་པོ་འདིར། །བདག་གིས་སློབ་མ་འཇུག་པར་འཚལ། །ཞེས་གསོལ་ནས་སློབ་མ་འཇུག་པར་གནང་བ་ཞུ། གཉིས་པ་སློབ་མ་རྗེས་འཛིན་ལ་དཀྱིལ་འཁོར་དུ་འཇུག་པ་དང༌། དབང་གིས་སྨིན་པར་བྱ་བ་གཉིས་ལས། དང་པོ་དཀྱིལ་འཁོར་དུ་འཇུག་པ་ལའང་ཕྱི་ནང་གི་འཇུག་པ་གཉིས་ལས་སྔ་མ་ལ་བདུན་ལས། དང་པོ་སྒོ་སྲུང་ཞུ་བསྐུལ་ནི། དཀྱིལ་འཁོར་ཡོལ་བས་བསྒྲིབས། སྟ་གོན་བྱས་པའི་སློབ་མ་རྣམས་སྒོའི་ཕྱི་རོལ་དུ་ལས་བུམ་གྱི་ཆུས་ཁྲུས་བྱས། སྔོན་ཆད་གཉིས་འཛིན་མ་རིག་པས་ལྡོང་སྟེ་དཀྱིལ་འཁོར་མ་མཇལ་བའི་བརྡར་མིག་དར་འཆིང་མཛོད། ཙཀྵུ་བྷནྡྷ་ཝ་ར་མ་ན་ཡེ་སྭཱ་ཧཱ། སྔགས་དོན་ཡིད་ལ་མཆོག་ཏུ་བྱ་བའི་ཕྱིར་མིག་དར་འཆིང༌། ཞེས་སོ། མཆན། དཀྱིལ་འཁོར་གྱི་ལྷ་དང་ཕྱག་སྟོང་པར་མཇལ་དུ་མི་རུང་བས་ཕྱག་རྟེན་དུ་ཨུ་དུམ་ཝ་རའི་མེ་ཏོག་གི་ཕྲེང་བ་ཁ་དོག་དམར་པོ་རེ་བྱིན་པར་མོས། ཨ་སྣང་མཐའ། ཁཾ་དོན་གྲུབ། ཝི་རྣམ་སྣང༌། ར་རིན་འབྱུང༌། ཧཱུྃ་མི་བསྐྱོད་པ་སྟེ་སྔགས་དོན་ནམ་མཁའི་དཔའ་བོ། མཆན། མེ་ཏོག་ལག་ཏུ་གཏད། དེ་ཡང་ཁྱེད་རང་རྣམས་མཚན་མའི་དཀྱིལ་འཁོར་གྱི་ཁང་པའི་ཕྱི་རོལ་ནས་འཇུག་པ་ཡིན་ཀྱང་འདིར་དཀྱིལ་འཁོར་ཡོལ་བས་ཆོད་པ་རྒྱུ་མཐུན་དུ་བྱ་བ་ཡིན་པས་ཕྱག་ཐལ་མོ་སྦྱར་ཏེ་སྒོ་སྲུང་ཕོ་ཉའི་ཚོགས་ལ་དཀྱིལ་འཁོར་དུ་འཇུག་པར་གསོལ་བ་འདེབས་པ་འདིའི་རྗེས་ཟློས་མཛོད། ཀྱཻ། ཁྲོ་བོ་མི་བཟད་འཇིགས་པའི་སྐུ། །མཚོན་ཆ་སྣ་ཚོགས་ཕྱག་ན་བསྣམས། །བདག་ཅག་འཁོར་བ་ལས་གྲོལ་ཕྱིར། །ཁྱེད་ཀྱིས་གནང་སྟེ་བཏང་དུ་གསོལ། ཞེས་གསོལ་བ་བཏབ་པ་ལ་དཀྱིལ་འཁོར་ཆེན་པོ་འདིར་སྐལ་མེད་རྣམས་ལྟ་བར་མི་རུང་བས། རིགས་དང་སྐལ་པ་འདྲི་བ་འདི་ལ་གསན་པས་ཁྱབ་པར་གདའ། ཁྱེད་རྣམས་སུ་ཡིན་ཅི་ལ་དགའ། །ལས་དང་སྐལ་པ་ལྡན་ནམ་ཅི། །ཞེས་དྲིས་པ་ལ་དེ་ལྟ་བུའི་སྣོད་ཀྱི་སྐྱོན་དང་ལྡན་པ་མ་ལགས་ཤིང་རིགས་དང་སྐལ་པ་ལྡན་པ་ཡིན་པས་ཐུགས་བརྩེ་བས་དགོངས་ནས་འཇུག་པར་གསོལ་བ་འདེབས་པ་འདིའི་རྗེས་ཟློས་མཛོད། བླ་མ་རྡོ་རྗེ་འཛིན་པ་དང༌། །དཀྱིལ་འཁོར་ལྷ་ཚོགས་སྤངས་ནས་ནི། །སྐྱོབ་པ་གཞན་ན་མ་མཆིས་པས། །སྒོ་ཕྱེ་ཐར་པའི་གྲོང་བསྟན་འཚལ། །ལན་གསུམ། ཞེས་གསོལ་བ་ལ། ཁྱེད་ནི་སྣོད་མཆོག་དམ་པ་སྟེ། །ཁྱེད་འདོད་པ་ནི་བདག་གིས་སྦྱིན། །སྤྲོ་བ་བསྐྱེད་ལ་ནང་དུ་ཤོག །དེ་ལྟར་གནང་བ་ནོད་པས་ལྷག་པའི་བསམ་པ་བརྟན་པོས་འཁོད་པའི་མོས་པ་མཛོད། ཅེས་བརྗོད་ཅིང་ནང་དུ་བཏང༌། གཉིས་པ་བགེགས་བསལ་ལོ་རྒྱུས་ཆོས་བཤད་ནི། བགེགས་གཏོར་བཏང་ལ་བཀའ་སྒོ་དྲག་སྔགས་གུལ་ཡུངས་རོལ་མོ་བཅས་པས་བགེགས་བསྐྲད། སྲུང་འཁོར་བསྒོམ། གྲལ་དུ་འཁོད་ནས་མེ་ཏོག་བཀྱེ་བསྡུ་བྱ། ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་སེམས་བསྐྱེད་དེ་གསན་འཚལ། དེ་ལ་རང་ཅག་རྣམས་ཀྱི་མི་ལུས་ཁྱད་པར་ཅན་འདི་ལྟ་བུ་སླན་ཆད་རྙེད་པར་དཀའ་ཞིང༌། ཆོས་སྒྲུབ་པའི་རྟེན་དལ་འབྱོར་ཚང་བ་འབའ་ཞིག་ལ་ལྟོས་དགོས་པའང༌། འཕྲལ་འབྱུང་གི་རྐྱེན་བརྒྱད་དང༌། རིས་ཆད་ཀྱི་བློ་བརྒྱད་ཀྱིས་ཡུད་ཙམ་ཡང་མི་ཁོམ་པར་འགྱུར་ཞིང༌། ལས་མཐའ་ལོག་པའི་རིགས་ལ་ལྟོས་ན་འབྱོར་པ་བཅུ་ཡང་འདུ་འབྲལ་དང་བཅས་པས་ཡོན་ཏན་ཐམས་ཅད་ཚོགས་པའི་མི་ལུས་རིན་པོ་ཆེ་ཡིན་པར་དཀའ་ཞིང༌། སྤྱི་མཐུན་དུ་སྐྱེས་པའི་ནངས་པར་ནས་འཆི་བའི་ཕོ་ཉ་དང་འགྲོགས་པ། འབྱོར་རྒུད་དང་བདེ་སྡུག་སྣ་ཚོགས་པའི་རྟེན་འབྲེལ་ཚོགས་པ་ལས་གཞན་དབང་ཅན་དུ་འགྱུར་བ་དང༌། ཁྱབ་པ་འདུ་བྱེད་ཀྱི་སྡུག་བསྔལ་བལྟར་མི་མངོན་པ་དང་འགྲོགས་པས་མཐོ་རིས་ཀྱི་བདེ་འབྲས་ནི། རྩྭ་རྩེའི་ཟིལ་པ་ལྟ་བུ་ཤིན་ཏུ་ཡིད་བརྟན་མི་རུང་བ་ཡིན་པས། ངེས་འབྱུང་གི་བློ་ཁྱད་པར་ཅན་གྱིས་བསྐུལ་ཏེ་ཐར་པ་དང་ཐམས་ཅད་མཁྱེན་པ་སྒྲུབ་པའི་ཐབས་ལ་འབད་དགོས། དེ་ལ་སངས་རྒྱས་རྣམས་ནི་ཐུགས་རྗེ་ཚད་མེད་པས་སེམས་ཅན་ཡལ་བར་མི་འདོར་ཞིང༌། ཕྲིན་ལས་ཚད་མེད་པས་གདུལ་བྱའི་ཁམས་དང་དབང་པོ་དང་བསམ་པ་ལ་འཚམ་པའི་ཆོས་སྒོ་ཇི་སྙེད་གསུངས་པ་རྣམས་ཀྱི་ནང་ནས་མཆོག་ཏུ་གྱུར་པ་ནི་འབྲས་བུའི་ཐེག་པ་ཡིན་ཏེ། དེའི་ཆོས་འཁོར་གྱི་གྲངས་ངེས་དང་རྣམ་དབྱེ་བསམ་པར་མི་ནུས་ཀྱང༌། གངས་ཅན་པ་རྣམས་ཀྱིས་འགྱུར་གྱི་བྱེ་བྲག་ལས་གསར་རྙིང་དུ་སྒྲོ་བཏགས་པའི་རྡོ་རྗེ་ཐེག་པ་སྔ་འགྱུར་ལ་མདོ་སྒྱུ་སེམས་གསུམ་གྱི་གྲུབ་པའི་མཐའ་ཆེན་པོ་གསུམ་དུ་ཡོད་པ་ལས། འདི་ནི་སེམས་ཕྱོགས་ཀྱི་གྲུབ་མཐའ་གཙོ་བོར་བཏོན་པས་རྫོགས་པ་ཆེན་པོ་ཀློང་ཆེན་སྙིང་ཐིག་ཅེས་གྲགས་པ། ནང་གསེས་ཀྱི་དབང་དུ་ན། སྔགས་འོག་མ་ལྟར་ཁམས་ཀྱི་དྲི་མ་བླང་དོར་དང་བཅས་པའི་ངལ་དུབ་ཀྱིས་སྦྱོང་བ་མ་ཡིན་ཡང་སྣང་གྲགས་རིག་པའི་ཆོ་འཕྲུལ་དུ་མངོན་པར་བྱང་ཆུབ་པ་དཔལ་ལྡན་སྒྱུ་འཕྲུལ་དྲྭ་བའི་སྙིང་པོ་དཔལ་ཆེན་ཞལ་ལུང་དང་ཧེ་རུ་ཀ་འདུས་པའི་བསྐྱེད་རིམ། དག་པའི་སྣོད་བཅུད་ཀྱང་འཕོ་མེད་བདེ་བ་ཆེན་པོའི་ཡེ་ཤེས་གཞན་དུ་མི་འགྱུར་བ་ཨ་ནུའི་མདོ་ལུང་གི་སྙིང་པོ་རིགས་བརྒྱ་རིག་འཛིན་གྱི་བསྐྱེད་རྫོགས་རྒྱུད་ལུང་གབ་བྱང་དང་བཅས་པ། རྒྱུ་རྐྱེན་དང་རྩོལ་སྒྲུབ་ལ་མི་ལྟོས་པ་ཕྱི་སེམས་སྡེ། སྐུ་གསུམ་རང་ཆས་ཀྱི་དབྱིངས་ལས་མི་འགྱུར་བ་ནང་ཀློང་སྡེ། མངོན་སུམ་རང་གནས་སུ་སྟོན་པ་གསང་བ་མན་ངག་གི་སྡེ། གནད་ལས་གནད་དུ་བསྡུས་པ་ཡིད་དཔྱོད་དང་འབྲས་བུ་ཕྱི་དུས་ལ་ལྟོས་མི་འཆའ་བ་ཡང་གསང་བླ་ན་མེད་པའི་སྡེ་སྟེ་སེམས་ཕྱོགས་རྒྱ་མཚོའི་སྙིང་པོ་ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལ་སོགས་པའི་མན་ངག་གི་ཐུས་ཀ་ཚང་ལ་མ་ནོར་བར་སྟོན་པ། དེ་ཉིད་ཀྱང་རྒྱུད་དོན་དང་འབྲེལ་བས་བདེ་བར་གཤེགས་པའི་བཀའ་ཚད་མ། རྡོ་རྗེ་འཛིན་པ་བརྒྱུད་ལྡན་ལས་ཐོས་པས་མན་ངག་ཚད་མ། རྣལ་འབྱོར་དབང་ཕྱུག་གི་ཉམས་མྱོང་ཚད་མ། རྟེན་ཅིང་འབྲེལ་འབྱུང་གི་ལོ་རྒྱུས་ཚད་མ། བཀའ་མ་དང་འབྲེལ་བས་དབང་གི་ཆུ་བོ་མ་ནུབ་པ། བྱིན་རླབས་ཀྱི་བརྒྱུད་པ་མ་ཉམས་པ། མན་ངག་གི་སྣ་ཁ་མ་ལོག་པ་དག་ལ་མ་བརྟེན་ན། ཟབ་མོར་བཏགས་པ་ཙམ་ལས་ཡང་དག་དང་ལྟར་སྣང་གང་ཡིན་མ་འཚལ་བའི་རྨོངས་པ་ལམ་ནོར་བས་ངལ་བ་འབྲས་མེད་དུ་འགྱུར་ལ། དེའི་ཕྱིར་གཏེར་ལུང་ལས། རྒྱལ་བ་དགོངས་པ་ཉིད་ཀྱི་ཚུལ། །དགོངས་པ་བབ་པ་དབང་གི་མཆོག །ཅེས་གདོད་མའི་མགོན་པོ་སྲས་དང་བཅས་པས་ཆོས་ཀྱི་བདག་པོ་ལ་དགོངས་པས་གནས་ལུགས་ཆོས་སྐུར་རྟོགས་པའི་དབང་ཐོབ། བརྡ་དང་བརྡ་མཚོན་གོ་བ་ནི། །དབང་གི་ནང་ནས་དབང་བཀའོ། །ཞེས་པ་ལྟར་ཡེ་ཤེས་ཀྱི་མཁའ་འགྲོ་མས་བརྡ་བསྒྱུར་གྱི་ཤོག་སེར་དབྱིབས་དང་རྣམ་པ་ཐམས་ཅད་པ་བྱིན། རྫོགས་པའི་སངས་རྒྱས་དྲི་མེད་འོད་ཟེར་དངོས་དང་ཞལ་མཇལ་ཏེ་སྙན་བརྒྱུད་ཀྱི་ཕ་ཕོག་བསྩལ་བའི་བརྒྱུད་པ་གསུམ་ལྡན་གྱི་སྟེང༌། གོང་འོག་གི་བདག་པོ་རྣམ་གཉིས་ལ་སོགས་ཏེ། སྔོན་གྱི་དུས་ན་བྱོན་པའི་ལམ་སྟོན་ཆེན་པོ་རྣམས་ཀྱིས་བཞེད་པ་བཞིན་རྒྱུད་སྡེ་བཀའ་མ་དང༌། སྒྲུབ་སྡེ་བཀའ་བརྒྱད་ལ་སོགས་པའི་དབང་གི་ཆུ་བོ་མ་ནུབ་པའང་གསན་ཅིང་བྱིན་རླབས་ཀྱི་བརྒྱུད་པ་འདྲེས་པར་མཛད་ནས། ཇི་སྐད་དུ་སྡུད་པ་ལས། རྒྱལ་བའི་ཉན་ཐོས་པ་དག་ཇི་སྙེད་ཆོས་སྟོན་དང༌། །འཆད་དང་རིག་པ་དག་དང་ལྡན་པར་བརྗོད་པ་དང༌། །མཆོག་འཕགས་བདེ་བ་བྱེད་དང་དེ་ཡི་འབྲས་ཐོབ་པ། །དེ་དག་ཀུན་ཀྱང་དེ་བཞིན་གཤེགས་པའི་སྐྱེས་བུའི་མཐུ། །ཞེས་པ་ལ་སོགས་པ་དང་གཞན་དུ་བྱང་ཆུབ་སེམས་དཔའ་བསམ་པ་རྣམ་པར་དག་པ་ལ་ནི་རང་ཉིད་ཀྱི་སྤྱོད་པ་ཉིད་ལས། མན་ངག་དང་རྗེས་སུ་བསྟན་པ་ཐམས་ཅད་འབྱུང་ངོ༌། ཞེས་པ་ལྟར་རྒྱལ་བའི་ཡེ་ཤེས་རྣམ་པ་ཐམས་ཅད་པས་དགོངས་ཤིང་མཁའ་འགྲོའི་གསང་མཛོད་ལ་མངའ་དབང་བསྒྱུར་བར་བྱིན་གྱིས་བརླབས་པ་དང་རྗེས་སུ་གནང་བས་བཀའ་རྩོད་པ་མེད་ཅིང༌། སངས་རྒྱས་གཉིས་པ་སློབ་དཔོན་ཆེན་པོའི་ཞལ་ནས་གསུངས་པའི་བཀར་བསྙོན་མེད་དུ་གྲུབ་པ་ལ་ཟབ་མོ་གཏེར་གྱི་རིང་ལུགས་མ་ནོར་བ་ཞེས་བྱ་སྟེ། མཆོག་གཟིགས་ཀྱི་བརྒྱུད་པ་མ་ཆད་པ་དང༌། ཉམས་པ་དང་འདྲེས་ཁྱེར་གྱིས་བར་མ་ཆོད་པ་དང༌། ཚིག་ལ་གྲིམ་པའི་སློབ་པ་སོ་སོའི་སྐྱེ་བོས་བསླད་པ་མ་སོང་བས་བྱིན་རླབས་ཆེ་ཞིང་སྒྲུབ་ཐག་ཉེ་བ་ཡིན་ནོ།  །དེ་ལྟ་བུའི་སྔགས་ཀྱི་མྱུར་ལམ་ལའང་དབང༌། བསྐྱེད་རིམ། རྫོགས་རིམ། བཤད་པ་སྟེ་སྔ་འགྱུར་བཀའ་བབ་ཆུ་བོ་བཞིའི་ཞལ་ལུང་དང་ལྡན་པ་ལས་དེང་རིམ་པ་དབང་གི་ཆོ་ག་ལས། སྤྱིར་འདི་ཡན་ཆད་སྙིང་ཐིག་སྤྱིའི་དབང་བཤད་ལ་འཇུག་པས་སྐབས་སུ་གང་བབ་འཕྲུལ་ཤེས་པར་བྱ། དམིགས་བསལ། འདིར་ཞི་ཁྲོའི་དཀྱིལ་འཁོར་ཆེན་པོར་སྨིན་པར་བྱ་བ་སྐབས་སུ་བབ་པ་ཡིན་ལ། འདི་ནི་སྤྱི་སྒོས་སྔགས་ཀྱི་སྒོར་ཞུགས་པའི་རྣལ་འབྱོར་པ་རྣམས་ཀྱི་ཉམས་ཆག་སྐོང་ཞིང་རྟོག་སྒྲིབ་སྦྱོང་བ་དང༌། སེམས་ཅན་ཐམས་ཅད་ངན་སོང་གི་སྡུག་བསྔལ་ལས་དྲངས་ནས་བླ་ན་མེད་པའི་དངོས་གྲུབ་ཀྱི་སྐལ་པ་ཅན་དུ་བྱེད་པའི་ཐབས་མཆོག་རྨད་དུ་བྱུང་བ་རྣལ་འབྱོར་གྱི་སྤྱི་ཁྲུས་ཞི་ཁྲོ་ན་རཀ་དོང་སྤྲུགས་མཚམས་མེད་ལྔ་སྦྱོང་བ་ཞེས་གྲགས་པ་སྟེ། འགྱོད་ཚངས་ཀྱི་རྒྱལ་པོ་འདི་སྔོན་འདོད་ཁམས་ཀྱི་གནས་འདིར་བྲམ་ཟེ་དུང་གི་ཕྲེང་བ་ཅན་ཞེས་བྱ་བ་རིག་པའི་གནས་ལྔ་ལ་བྱང་བ་ཞིག་ལ་སློབ་མ་རྒྱལ་པོའི་བུ་ཞིག་ཡོད་པ་དེས་སློབ་སྦྱོང་རྣམས་མཐར་ཕྱིན་པ་ན། ད་ངའི་གོང་ན་སློབ་དཔོན་འདི་ཙམ་དུ་ཟད་པས་མེད་པར་བྱ་སྙམ་ནས་ཐོ་བརྩམས་པ་སློབ་དཔོན་གྱིས་ཀྱང་ཤེས་ནས་ཞེ་སྡང་གིས་དམོད་བོར་ཏེ། གྲོངས་ནས་གཉིས་ཀ་ངན་སོང་དུ་སྐྱེས་པ་ལ། རྒྱལ་བ་རྣམས་ཀྱིས་ཞི་ཁྲོ་ན་རཀ་དོང་སྤྲུགས་ཀྱི་ལྷ་སྔགས་བསྟན་པས་གྲོལ་ཏེ་རིམ་གྱིས་རིག་འཛིན་གྱི་ས་ལ་བཀོད་པ་ཉིད་ལ་བཀའ་གཏེར་དག་སྣང་གི་བབས་སོ་རྒྱས་བསྡུས་མི་འདྲ་བ་དུ་མ་ཞིག་བཞུགས་པ་ལས་འདི་ནི་ཀུན་མཁྱེན་རིག་འཛིན་འཇིགས་མེད་གླིང་པའི་དགོངས་གཏེར་ནམ་མཁའ་མཛོད་ཀྱི་ཆོས་སྡེ་ལས་བྱོན་པ་སྟེ། གཞུང་རྩ་བ་ལས། བི་མ་ལ་དང་གསང་ཞབས་སོགས༔ པཎ་གྲུབ་རྣམས་ལ་གྲགས་པ་ཡི༔ ཞི་ཁྲོ་ཁྲོམ་དཀྲུག་ཅེས་བྱ་བའི༔ སྔ་འགྱུར་བཀའ་མའི་གཞུང་བཟང་པོ༔ དངོས་ལ་མིང་བཏགས་མཐུ་ཆེ་བ༔ ནུབ་ལ་ཉེ་བ་མ་བཟོད་དེ༔ ན་རཀ་དོང་སྤྲུགས་གང་ཡིན་པའི༔ དངོས་དོན་འཁྲུལ་པ་མེད་པར་བསྡེབས༔ བཀའ་གཏེར་ཟུང་དུ་འཇུག་པ་ལ༔ པདྨའི་རིང་ལུགས་ཞེས་སུ་གྲགས༔ འགྲོ་ཀུན་ཆོས་ཀྱི་མིག་ལྡན་པས༔ ཡང་དག་ལམ་ལ་འཇུག་པར་ཤོག༔ ཅེས་གསུངས་པ་ལྟར་བསྐྱེད་པ་མ་ཧཱ་ཡོ་ག་ལ་རྒྱ་ཆེ་བ་རྒྱུད་སྡེ་དང༌། ཟབ་པ་སྒྲུབ་སྡེ་གཉིས་ལས་སྔ་མ་ལ་སྐུ་གསུང་ཐུགས་ཡོན་ཏན་ཕྲིན་ལས་ལྔའི་རྩ་བར་གྱུར་པའི་རྒྱུད་སྡེ་ལྔ། སྒྲུབ་པ་ལག་ལེན་དུ་སྟོན་པ་རོལ་པའི་རྒྱུད་སྡེ་ལ་སོགས་ལྔ། སྤྱོད་པ་ཡན་ལག་ཏུ་འགྲོ་བའི་རྒྱུད་སྡེ་ལྔ། མ་ཚང་བ་ཁ་སྐོང་བའི་རྒྱུད་སྡེ་གཉིས། དེ་ཐམས་ཅད་ཀྱི་ཁྱབ་བྱེད་རྩ་བའི་སྤྱི་རྒྱུད་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་གསང་བའི་སྙིང་པོ་སྟེ་ཏནྟྲ་ཆེན་པོ་སྡེ་བཅོ་བརྒྱད་དུ་གྲགས་པ་ལས། དཔལ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཞི་ཁྲོ་སོ་སོའི་དབང༌། རྒྱུད་བཤད་སྐུའི་རྒྱུད་སངས་རྒྱས་མཉམ་སྦྱོར་སོགས་རིགས་བསྡུས་པའི་དབང༌། སྤྱོད་པ་ཡན་ལག་ཏུ་འགྲོ་བའི་རྒྱུད་སྡེའི་ནང་ཚན་གླང་ཆེན་རབ་འབོག་གི་དུམ་བུ་དྲི་མེད་བཤགས་པའི་རྒྱུད་ཀྱི་རྗེས་སུ་འབྲང་བའི་ཞི་ཁྲོ་ཁྲོམ་དཀྲུག་དང༌། ཆ་མཐུན་ཡི་གེ་བརྒྱ་པ་དབང་ཆོག་རྒྱལ་པོའི་རྒྱུད་སོགས་ལ་བརྟེན་པའི་ཞི་ཁྲོ་རིགས་འདུས་ཀྱི་དབང་སོགས་བཞུགས་པ་ལས་འདི་ནི་སྔོན་མ་ཡོ་ག་རྣམ་པ་གསུམ་ཀ་ལ་འཇུག་ཅིང་ཨ་ནུ་ཡོ་ག་དང་རྗེས་སུ་འབྲེལ་བ་སྟེ། དབང་གཞུང་ལས། དག་པའི་སྣོད་བཅུད་ཀྱང་འཕོ་མེད་བདེ་བ་ཆེན་པོའི་ཡེ་ཤེས་གཞན་དུ་མི་འགྱུར་བ་ཨ་ནུའི་མདོ་ལུང་གི་སྙིང་པོ་རིགས་བརྒྱ་དང་རིག་འཛིན་གྱི་བསྐྱེད་རྫོགས་རྒྱུད་ལུང་གབ་བྱང་དང་བཅས་པ། ཞེས་གསུངས་པའི་སྔ་མ་ཞི་ཁྲོ་ཁྲོམ་དཀྲུག་ངན་སོང་སྦྱོང་བའི་ཆོ་གའི་དངོས་གཞིའི་དབང་བསྐུར་བ་སྦྱིན་པ་སྟེ། དེ་ལ་བདག་ཉིད་སློབ་དཔོན་གྱི་བགྱི་འོས་རྣམས་གྲུབ། ཁྱེད་རང་སློབ་མའི་ངོ་སྐལ་ལ་དཀྱིལ་འཁོར་དུ་འཇུག་པའི་རིམ་པ་དང༌། ཞུགས་ནས་མངོན་པར་དབང་བསྐུར་བ་གཉིས་ལས་ཐོག་མར་འཇུག་པའི་ཆོས་རྣམས་ཞུ་བའི་ཡོན་དུ་མཎྜལ་ཕུལ། གསུམ་པ་སྐྱབས་སེམས་སྡོམ་པ་བཟུང་བ་ནི། རྡོ་རྗེ་ཐེག་པའི་དཀྱིལ་འཁོར་དུ་འཇུག་ཅིང་དབང་བཞི་རྫོགས་པར་ནོད་པ་ལ་ཐུན་མོང་དང་ཁྱད་པར་གྱི་སྡོམ་པ་སྔོན་དུ་བཟུང་བ་གལ་ཆེ་བས་ཉན་རང་དང་ཐུན་མོང་གི་ལམ་གྱི་རྨང་རྡོ་སྐྱབས་འགྲོ། ཐེག་ཆེན་དང་གསང་སྔགས་ཀྱི་ཁྱད་ཆོས་བྱང་ཆུབ་སེམས་བསྐྱེད་པ་སྟེ། དེ་དག་གི་སྡོམ་པ་ཐུན་མོང་དུ་བཟུང་བའི་ཕྱིར་མདུན་གྱི་ནམ་མཁར་དུས་གསུམ་རྒྱལ་བ་སྲས་བཅས་སྐྱབས་གསུམ་ཀུན་འདུས་སུ་བཞུགས་པ་ལ། འཁོར་བ་ལ་འཇིགས་པ། དཀོན་མཆོག་ལ་དད་པ། སེམས་ཅན་ལ་སྙིང་རྗེའི་ཀུན་སློང་གསུམ་དང་ལྡན་པས་སྐྱབས་ཡུལ་རྣམས་དཔང་པོར་བཅོལ་ཏེ་རྒྱལ་བ་སྲས་བཅས་ཀྱི་མཛད་པའི་རྗེས་སུ་སློབ་སྙམ་པས་རྗེས་ཟློས་ལན་གསུམ་མཛོད། ཨེ་མ་དུས་གསུམ་རྒྱལ་བ་ཀུན་ཏུ་བཟང༌། །རིགས་ལྔའི་སངས་རྒྱས་དགོངས་སུ་གསོལ། །འདི་བཟུང་བྱང་ཆུབ་མ་ཐོབ་བར། །སོགས་ནས། སྔགས་ཀྱི་ཆོ་གས་བསྡམ་པར་བགྱི། །ཞེས་པའི་བར་སྟ་གོན་བཞིན་བྱ། བཞི་པ་རྡོ་རྗེའི་རྣལ་འབྱོར་དུ་སེམས་བསྐྱེད་པ་ནི། གསང་སྔགས་ཀྱི་ཐམས་ཅད་རྣལ་འབྱོར་དུ་སེམས་བསྐྱེད་པ་སྟེ། ཁྱེད་རང་རྣམས་ཀྱི་སྙིང་གར་སེམས་ཅན་ཐམས་ཅད་ཀྱི་དོན་དུ་སངས་རྒྱས་སྒྲུབ་པའི་བློ་བཅོས་མིན་དེ་ཉིད་ཀུན་རྫོབ་བྱང་ཆུབ་སེམས་ཀྱི་ངོ་བོ་ཟླ་བའི་དཀྱིལ་འཁོར་གྱི་སྟེང་དུ། དོན་དམ་བྱང་ཆུབ་སེམས་ཀྱི་རང་བཞིན་རྡོ་རྗེ་དཀར་པོ་རྩེ་ལྔ་པ་འོད་དང་འོད་ཟེར་འབར་བ་རེས་མཚན་པར་མོས་ལ་བདེན་གཉིས་དབྱེར་མེད་དུ་སེམས་བསྐྱེད་པ་འདིའི་རྗེས་ཟློས་ཀྱིས། ཨོཾ་སརྦ་ཡོ་ག་ཙིཏྟ་ཨུ་པ་ད་ཡ་མི། ལན་གསུམ། ལྔ་པ་དམ་ལ་བཞག་པ་ནི། རིགས་ཀྱི་བུ་ཁྱོད་སྔགས་བླ་མེད་ཀྱི་དཀྱིལ་འཁོར་དུ་ཞུགས་ནས་མཆོག་ཏུ་གསང་བའི་རང་བྱུང་གི་ཡེ་ཤེས་བསྐྱེད་པར་བྱ་ལ། དེའི་སྲོག་ཏུ་གྱུར་པ་དམ་ཚིག་སྲུང་དགོས་པས་རྡོ་རྗེ་བདུད་རྩིའི་མནའ་ཆུ་འདི་ཉིད་བྱིན་པས་དམ་ཚིག་ཉམས་ན་དངོས་གྲུབ་ཐོབ་པའི་སྐབས་མེད་ཅིང་སྡིག་པ་མགོ་དགུར་གྱུར་ནས་སྙིང་ཁྲག་འཇིབས་ཏེ། འདི་དང་ཕྱི་མར་སྡུག་བསྔལ་དུ་མས་ཚར་གཅོད་པས་དམྱལ་བའི་ཆུ་ཞེས་བྱ་ཞིང༌། བསྲུངས་ན་ཡེ་ཤེས་སེམས་དཔར་གྱུར་ནས་འདི་ཕྱིའི་ཕན་བདེ་མ་ལུས་པའི་འབྱུང་གནས་སུ་འགྱུར་བས་བདུད་རྩི་སྟེ། དམ་ཚིག་དང་སྡོམ་པ་རྒྱ་མཚོ་སྲུང་བའི་ཕན་ཡོན། འདས་པའི་ཉེས་དམིགས། དེ་ལེན་པའི་ཡུལ་སློབ་དཔོན་དང་བཅས་བཀའ་གཉན་པའི་ཁེ་ཉེན་ཆེན་པོ་གཉིས་སུ་ཡོད་པར་ཤེས་པས་བདུད་རྩི་འདི་ཉིད་ལྕེ་ལ་བཞག་ཀྱང་འབབ་པ་སྙིང་དབུས་སུ་ཐིམ་པར་མོས་ལ། ནང་མཆོད་བྱིན་ལ། འདི་ནི་ཁྱོད་ཀྱི་དམ་ཚིག་ཆུ། །དམ་ཚིག་ཉམས་ན་སྲེག་པར་བྱེད། །བསྲུངས་ན་དངོས་གྲུབ་ཐམས་ཅད་ཐོབ། །དམ་ཚིག་བདུད་རྩིའི་ཆུ་འདི་འཐུངས། །ས་མ་ཡ་ཨི་དན་ན་ར་ཀན། དྲུག་པ་རིགས་ལྔའི་སྡོམ་བཟུང་ནི། དབང་འདི་ཐོབ་པ་དཀྱིལ་འཁོར་གྱི་བྱ་བས་ཐོབ་ཀྱང༌། དབང་སྲོག་འཛིན་པ་དམ་ཚིག་དང་སྡོམ་པས་འཛིན་དགོས་པས་རྡོ་རྗེ་ཐེག་པའི་དམ་ཚིག་དབྱེ་བསྡུ་ཐམས་ཅད་རིགས་ལྔའི་དམ་ཚིག་ལ་འདུ་བས་ན་ཐུན་མིན་སྔགས་ཀྱི་རིགས་ལྔའི་སྡོམ་པ་དང་དམ་ཚིག་རྩ་བ་སྐུ་གསུང་ཐུགས། སྤྱི་དང་ཁྱད་པར་ལྷག་པའི་དམ་ཚིག་རྣམས་སྲོག་ལ་བབ་ཀྱང་མི་གཏོང་སྙམ་པས་འདིའི་རྗེས་ཟློས་མཛོད། སངས་རྒྱས་རིགས་ཀྱི་དམ་ཚིག་ཏུ། །རྒྱལ་སྲས་སངས་རྒྱས་ཐམས་ཅད་དང༌། །དཔའ་བོ་རྣལ་འབྱོར་མ་རྣམས་བསྙེན། །རྡོ་རྗེ་རིགས་ཀྱི་དམ་ཚིག་ཏུ། །རྡོ་རྗེ་དྲིལ་བུའི་ཕྱག་རྒྱ་དང༌། །བྱང་ཆུབ་སེམས་ནི་སྤང་མི་བྱ། །རིན་ཆེན་རིགས་ཀྱི་དམ་ཚིག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། པདྨ་རིགས་ཀྱི་དམ་ཚིག་ཏུ། །ཐེག་པ་གསུམ་དང་ཆོས་རྣམས་བཤད། །ལས་ཀྱི་རིགས་ཀྱི་དམ་ཚིག་ཏུ། །འགྲོ་བའི་དོན་ལ་བརྩོན་པར་བྱ། །ལྷ་ཡི་ཕྱག་རྒྱ་བླ་མའི་སྟན། །བཞོན་པ་ལ་སོགས་མི་སྨད་ཅིང༌། །བསྟན་པ་སྐྱོང་རྣམས་བརྙས་མི་བྱ། །བླ་མ་སངས་རྒྱས་དྲན་བྱེད་ཅིང༌། །བརྟན་གཡོ་ལྷ་དང་མཉམ་པར་སྦྱོར། །མདོར་ན་རྒྱལ་བས་གང་བསྒྲགས་པ། །དེ་དག་ཐམས་ཅད་བདག་གིས་བཟུང༌། །ལན་གསུམ། སྤྱིར་སྟ་གོན་གྱི་སྡོམ་བཟུང་ནས་དམ་ཚིག་སྲུང་བར་དབང་ཞིང༌། དངོས་བསྟན་བསྐྱེད་རྫོགས་ཐུན་མོང་བའི་བྱེ་བྲག་གི་དམ་ཚིག་རྣམས་རིགས་ངེས་པར་ཁས་བླང་བའི་ཆོ་གས་ཐོབ་པ་ཞེས་བརྗོད་ལ། ཁྱད་པར་རིམ་གཉིས་སོ་སོའི་སྔགས་སྡོམ་རྣམས་དབང་བཞི་རང་རང་གི་རྗེས་ཐོག་ཏུ་སོ་སོའི་ས་བོན་རྒྱུད་ལ་ཐེབས་པ་དང༌། ལྷན་ཅིག་ཐོབ་པའི་ཕྱིར་སྔགས་སྡོམ་རྫོགས་པར་ཐོབ་དུས་ནི་དབང་བཞི་པའི་མཐར་ཐུག་ཁོ་ན་ལ་ལྟོས་དགོས་ཤིང༌། མཚུངས་ལྡན་གྱི་སྡོམ་པ་ལ་གནས་དགོས་པའི་ཕྱིར་སྐྱེ་བོ་རང་ག་དང་ནད་གདོན་གྱིས་མནར་བའི་རྐྱེན་སེལ་དང་སྒྲིབ་སྦྱོང་ལ་སྡོམ་པ་ཁྱད་པར་བ་དག་མི་འབོག་ཅིང༌། མཆོག་དབང་གོང་མ་རྣམས་མི་བསྐུར་བ་གསར་རྙིང་གི་རྒྱུད་དང་མཁས་གྲུབ་ཆེན་པོ་རྣམས་ཀྱིས་དགོངས་པ་ཡིན་པས་སོ་མཚམས་འབྱེད་པ་གལ་ཆེ་གསུངས་སོ།  །བདུན་པ་དཀྱིལ་འཁོར་དུ་འཇུག་པ་ནི། དེ་ནས་ལྷ་དང་སྐལ་པ་མཉམ་པའི་ཕྱིར་དཀྱིལ་འཁོར་དུ་འཇུག་པ་ཡིན་པས་འདིའི་རྗེས་ཟློས་མཛོད། ཀྱཻ། རིགས་ལྔ་བདེ་བར་གཤེགས་པ་དང༌། །བླ་མ་ཡི་དམ་མཁའ་འགྲོ་དགོངས། །སྒོ་བ་ཆེན་པོ་ཁྱེད་རྣམས་ཀྱིས། །སྒོ་ཕྱེ་ཐར་པའི་གྲོང་བསྟན་འཚལ། །ལན་གསུམ། ཞེས་གསོལ་བས་དཀྱིལ་འཁོར་གྱི་སྒོ་ཤག་གིས་ཕྱེས་པར་མོས་ཤིག །བླ་མས། ཨ་ཁཾ་ཝི་ར་ཧཱུྃ་དང་དབྱེ་རྒྱ་བཅས་ཡོལ་བ་བསལ། འདུས་པ་དཀྱིལ་འཁོར་ཆེན་པོར་འཇུག་པའི་ཚེ་བླ་མས་བརྗོད་པའི་སྔགས་སུ་གསུངས། མཆན། གཙོ་བོའི་ཐུགས་ཀ་ནས་བྱུང་བའི་ལས་ཀྱི་རྡོ་རྗེའི་ཕྱག་ལ་འཇུས་ཏེ་ཤར་སྒོ་ནས་བཟུང་རིམ་པར་གཡས་བསྐོར་གྱིས་སྒོ་བཞིར་ཞུགས་ཤིང་ལྷ་ཚོགས་རྣམས་ཀྱི་སྐུ་གསུང་ཐུགས་ལ་ཕྱག་འཚལ་བའི་མོས་པས་ཐལ་མོ་གནས་གསུམ་དུ་སྦྱོར་ལ་སྔགས་འདིའི་རྗེས་ཟློས་མཛོད། ཨོཾ་ན་མ་ཏེ་ཧཱུྃ། ཨོཾ་ན་མ་མེ་ཧཱུྃ། ཨོཾ་ན་མོ་ན་མ་ཧཱུྃ། ལན་བཞི་བརྗོད་དོ།  །གཉིས་པ་ནང་འཇུག་ལ་བཞི་ལས། དང་པོ་ཡེ་ཤེས་པ་དབབ་པ་ནི། དེ་ནས་དབང་གི་གཞི་འགོད་ཅིང་ཡེ་ཤེས་ལྷའི་གཟི་བྱིན་དབབ་པའི་སླད་དུ་སློབ་དཔོན་དང་དཀྱིལ་འཁོར་གྱི་བདག་པོ་གཉིས་སུ་མེད་པའི་སྲས་སུ་བྱ་བའི་ཕྱིར། ཁྱེད་རང་རྣམས་ལུས་གནད་དྲང་པོར་བསྲང༌། ངག་གི་རླུང་ཁ་སྦྱོར་དུ་འཆིང༌། ཡིད་རྣམ་པར་མི་རྟོག་པའི་ངང་ནས་དམིགས་པ་འདི་བཞིན་དུ་མཛོད། ཁྱེད་རང་རྣམས་སླར་ཡང་གཙོ་བོའི་མདུན་ཐད་ཤར་སྒོའི་དབང་སྟེགས་ལ་འཁོད་པས་དཀྱིལ་འཁོར་གྱི་བདག་པོའི་ཐུགས་ཀ་ནས་འོད་ཟེར་བྱུང༌། སློབ་མའི་རྣམ་སྨིན་གྱི་ཕུང་པོ་སྦྱངས། རྣམ་པར་ཤེས་པ་ཧཱུྃ་དུ་གྱུར་པ་ཡབ་ཀྱི་ཞལ་དུ་དྲངས། རྗེས་སུ་ཆགས་པའི་ཡེ་ཤེས་ཀྱིས་བསྐུལ་ཏེ་ཡུམ་གྱི་པདྨོར་ལྷུང༌། སྲས་ཀྱི་ཚུལ་དུ་གཙོ་བོའི་རྣམ་པ་གཉིས་པ་ཞིག་བྱུང་བ་སྔར་གྱི་དབང་སྟེགས་སུ་ ལུགས་འདིའི་དབང་ཆོག་ཕལ་ཆེར་དུ་སློབ་མ་ལྷར་བསྐྱེད་རྒྱས་པ་མི་འབྱུང་ཡང་གསང་བ་སྤྱིའི་འགྲོས་ལྟར་ལེགས་སྙམ་བཀོད་པ་མཁྱེན་ལྡན་རྣམས་ཀྱིས་འོས་མིན་དཔྱད་པར་ཞུ། མཆན། སེང་ཁྲི་པད་ཟླའི་གདན་ལ་འཁོད་པ། དབང་བཞིའི་སྣོད་དུ་རུང་ཕྱིར་སྣོད་རྣམ་པར་དག་པ་འོག་མིན་རྡོ་རྗེ་དབྱིངས་ཀྱི་དཀྱིལ་འཁོར་གྱི་འཁོར་ལོར་རྫོགས་པ་ལ། བཅུད་རྣམ་པར་དག་པ་ཁྱེད་རང་གི་ཐ་མལ་གྱི་ཕུང་ཁམས་སྐྱེ་མཆེད་སྐད་ཅིག་གིས་རང་བཞིན་གཞིའི་ཀུན་ཏུ་བཟང་པོ་མཐིང་ག་ཡབ་ཡུམ་མཉམ་སྦྱོར་རྡོ་རྗེའི་སྐྱིལ་ཀྲུང་མཉམ་གཞག་གིས་མཚན་པའི་ཐུགས་ཡེ་ཤེས་ཆེན་པོའི་ཀློང་དུ་ཞི་བ་བཞི་བཅུ་རྩ་གཉིས། དེ་དག་གི་སྐུའི་གསལ་སྣང་ལས་སྤྱི་བོའི་དུང་ཁང་དུ་ཡེ་ཤེས་བསྐལ་པའི་མེ་དཔུང་རབ་ཏུ་འཁྲུགས་པའི་ཀློང་ན་འབར་བ་ཁྲག་འཐུང་ལྔ་བཅུ་རྩ་བརྒྱད་ཀྱི་ཚོམ་བུའི་དཀྱིལ་འཁོར་སྣང་ལ་རང་བཞིན་མེད་པ་མེ་ལོང་གི་གཟུགས་བརྙན་ལྟར་གསལ་བའི་གནས་གསུམ་དུ་ཕྱག་མཚན་གསུམ་དང༌། ཡི་གེ་གསུམ་གྱིས་མཚན་པ་ལས་འོད་ཟེར་འཕྲོས་པས་རྒྱུད་རྣམ་པར་དག་པ་ཡེ་ཤེས་ལྷའི་གཟི་བྱིན་དབབ་པའི་སླད་དུ་ཕྱོགས་བཅུ་དུས་བཞིའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བཅོམ་ལྡན་འདས་ཞི་ཁྲོ་རབ་འབྱམས་ཀྱི་དཀྱིལ་འཁོར་ལྷའི་སྐུ་ཕྱག་རྒྱ་གསུང་ཡིག་འབྲུ་ཐུགས་ཕྱག་མཚན་གྱི་རྣམ་པར་བྱོན་ནས་རང་ཉིད་དམ་ཚིག་སེམས་དཔར་གསལ་བ་ལ་ཡེ་ཤེས་ཀྱི་འཁོར་ལོ་བྱེ་ཚན་ལ་ཁ་བ་བབ་པ་ལྟར་སྙིང་ནང་དུ་སིབ་སིབ་ཐིམ་པར་བསམ་ལ། བདུད་རྩི་ལྔས་སྦགས་པའི་གཞོན་ནུ་མའི་རཀྟ། ཤ་ཆེན། གུ་གུལ། བྱི་ལ་ནག་པོའི་བྲུན། ཀླད་ཆེན། རའི་ཉྭ་བཞིའི་ཤ། རང་གི་སྐྲ་རྣམས་ཐོད་པའི་སྣོད་དུ་སོལ་ཆེན་གྱི་མེ་ལ་བསྲེགས་པའི་འབེབས་རྫས་བདུག །ཐོད་རྔ་དང་དྲིལ་བུ་མྱུར་དལ་སྤེལ་བ་སོགས་རོལ་མོའི་སྒྲ་དང་དབྱངས་ཀྱིས་བསྐུལ་ཏེ། ཧཱུྃ། འཕགས་མཆོག་ཐུགས་རྗེས་དུས་ལ་བབ། །ཁྱད་པར་བསྟན་པའི་དུས་ལ་བབ། །མཐུ་རྩལ་དབྱུང་བའི་དུས་ལ་བབ། །བྱིན་གྱིས་རློབས་པའི་དུས་ལ་བབ། །དབང་མཆོག་བསྐུར་བའི་དུས་ལ་བབ། །དངོས་གྲུབ་སྩོལ་བའི་དུས་ལ་བབ། །མཐུ་ཆེན་བདུད་འདུལ་བཅོམ་ལྡན་འདས། །བྱིན་ཆེན་བྱིན་ཕོབ་བཅོམ་ལྡན་འདས། །དབང་ཆེན་དབང་བསྐུར་བཅོམ་ལྡན་འདས། །དངོས་གྲུབ་མཆོག་སྩོལ་བཅོམ་ལྡན་འདས། །བདག་ཅག་ལས་འབྲས་མཆིས་པར་མཛོད། ཨོཾ་བོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷཱ་ཏུ་ཨཱཿཧཱུྃ། །ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ་ཕཊ། ཛྙཱ་ན་ཨ་བེ་ཤ་ཡ་ཨ་བེ་ཤ་ཡ། སྟྭམྦྷ་ཡ་སྟྭམྦྷ་ཡ། ར་ར་ར་ར། ཙ་ལ་ཡ་ཙ་ལ་ཡ། ཧཱུྃ་ཨ་ཧ་ཛྷཻཾ། ཞེས་དྲག་ཏུ་བཟླས་ལ་དབབ་པས། ལུས་ངག་ཡིད་ལ་ཕེབས་པའི་རྟགས། །འདར་ཞིང་འཕར་གཡོ་སཾ་སྐྲྀ་ཏའི། །བརྡ་སྐད་གླུ་ལེན་ངུ་བ་དང༌། །བདེ་གསལ་མི་རྟོག་ལྷག་པའི་ལྟས། །ཞེས་གསུངས། དེས་མ་ཕེབས་ན་སྤོག་པའི་ཆོ་ག་ནི། ཁྱེད་རང་རྣམས་ལུས་རྡོ་རྗེ་རྩེ་གསུམ་པའི་འདུག་སྟངས་ཀྱིས་རླུང་ལྟེ་བར་བསྐྱིལ་ལ་སླར་ཡང་དམིགས་པ་འདི་ལྟར་བསྒོམ། རང་གི་སྙིང་གར་ཟླ་བའི་དཀྱིལ་འཁོར་ལ་གནས་པའི་གཡུང་དྲུང་དམར་པོའི་ལྟེ་བར་བྃ་དང༌། ཡན་ལག་བཞི་ལ་ཧ་རི་ནི་ས་ལས་མཁའ་འགྲོ་སྡེ་ལྔར་གསལ་བ་ཆི་ལི་ལི་འཁོར་བ་ལ་ཤེས་པ་དྲག་ཏུ་གཏོད་ལ་དབྱིངས་རིག་དབྱེར་མེད་ཀྱི་ངང་དུ་མཉམ་པར་ཞོག་ཅིག །ཧཱུྃ་ཨ་རལླི་ཕཻཾ་གྱི་གླུ་དང་ལྟ་བས་གཅུན། ཕེབས་རྟགས་བྱུང་ན་རྩོལ་མེད་དུ་བསྐྱང་དུ་གཞུག །དེ་ནི་དབང་དོན་རྒྱུད་ལ་འཇོག་པའི་རྟེན་འབྲེལ་གྱི་རྩ་བ་ལྟ་བུ་ཡིན་པས་ནན་ཏན་དུ་གཅེས་པར་གསུངས། བྱིན་དབབ་པའི་ཡེ་ཤེས་པ་རྣམས་རྡོ་རྗེའི་ཆོས་བདུན་གྱི་རྣམ་རོལ་དུ་བརྟན་པར་གྱུར་ཅིག །ཏིཥྛ་བཛྲས་སྤྱི་བོར་རྡོ་རྗེ་རྒྱ་གྲམ་དུ་བཞག །གཉིས་པ་མེ་ཏོག་འདོར་བ་ནི། མེ་ཏོག་འདོར་རའི་དཀྱིལ་འཁོར་འདུ་བྱས་ལ། ཁྱེད་རྣམས་ལ་སྔར་བྱིན་པའི་མེ་ཏོག་དེ་ཉིད་རིགས་ལྔ་ལ་གཙོ་འཁོར་རང་རྒྱུད་པའི་བཟང་ངན་གྱི་དབྱེ་བསལ་མ་མཆིས་ནའང་རང་དང་ལས་ཀྱི་འབྲེལ་པ་གང་ལ་ཡོད་པའི་ལྷག་པའི་ལྷ་མཆོག་དེས་བདག་གི་རིགས་ཀྱི་མེ་ཏོག་འདི་བཞེས་སུ་གསོལ་སྙམ་པས་འདིའི་རྗེས་ཟློས་དང་ལྷན་ཅིག་འདོར་བར་ཞུ། ཀྱཻ། བདེ་གཤེགས་རིགས་ལྔའི་ཕོ་བྲང་འདིར། །འབྲེལ་བའི་མེ་ཏོག་འདི་དོར་བས། །ལས་འཕྲོ་གང་ཡོད་ལྷ་དང་མཇལ་བར་ཤོག །ཨོཾ་པུཥྤེ་སིདྡྷི་ཧཱུྃ། ཞེས་དོར་བས་གང་ལ་བབ་པའི་རིགས་ངོས་བཟུང༌། ཕྱི་རོལ་དུ་ལྷུང་ན་སླར་ཡང་བསྐྱར་ཏེ་བརྟགས་པར་གསུངས། དེ་ལྟར་དོར་བའི་མེ་ཏོག་དབུས་སུ་བབ་ན་བདེ་བར་གཤེགས་པའི་རིགས་ཀྱི་གཙོ་བོ་རྣམ་སྣང༌། ཤར་དུ་རྡོ་རྗེ་མི་བསྐྱོད་པ། ལྷོ་རུ་རིན་ཆེན་འབྱུང་ལྡན། ནུབ་ཏུ་པདྨ་སྣང་མཐའ། བྱང་དུ་ལས་ཀྱི་རིགས་དོན་ཡོད་གྲུབ་པའི་རིགས་ཡིན་པས་གང་ལ་བབ་པ་ཉིད་ལྷག་པའི་ལྷར་ཟུངས་ཤིག །ཐོག་མར་དཔལ་དང༌། ཐ་མར་རྡོ་རྗེ་ཡོད་པའི་རིགས་དང་མཐུན་པའི་གསང་མཚན་སོ་སོའམ། གཙོ་བོའི་མཚན་ལས་བྱུང་བའི་སྤྱི་ལ་གདགས། མེ་ཏོག་གང་ལ་ཕོག་པའི་ལྷ་དེ་སློབ་མ་ལ་གཏད་པའི་དོན་དུ་མེ་ཏོག་གི་ཕྲེང་བ་དབང་རྟགས་ཅོད་པན་གྱི་ཚུལ་དུ་སྤྱི་བོར་བཅིངས་བས་བདེ་སྟོང་གི་ཡེ་ཤེས་ཁྱད་པར་ཅན་རྒྱུད་ལ་སྐྱེས་པར་མོས་མཛོད། པྲ་ཏཱི་གྷྲཱི་ཧ་ན་ཨི་མཾ་སཏྭ་མ་ཧཱ་བ་ལ། གསུམ་པ་མིག་དབྱེ་བ་ནི། རིགས་ཀྱི་བུ་མཚོན་པ་བརྡའི་སྒོ་ནས་མིག་དབྱེ་བས་མ་རིག་པའི་ལིང་ཏོག་བསལ་ཏེ་དག་པ་ཡེ་ཤེས་ཀྱི་སྤྱན་གསར་དུ་ཐོབ་པས་ཡེ་ཤེས་རང་སྣང་གི་ལྷ་དང་དཀྱིལ་འཁོར་མངོན་སུམ་དུ་མཇལ་བའི་མོས་པ་མཛོད། སྟོན་པ་རིགས་ལྔའི་སངས་རྒྱས་ཀྱིས། །ཁྱེད་ཀྱི་མ་རིག་འཁོར་བའི་མིག །ཡེ་ཤེས་སྤྱན་དུ་དབྱེ་བ་ལྟར། །དེ་བཞིན་ཁྱེད་ཀྱིས་འགྲོ་བ་རྣམས། །ཡེ་ཤེས་སྤྱན་དུ་འབྱེད་པར་ཤོག །ཙཀྵུ་པྲ་ཝེ་ཤ་ཡ་ཕཊ། ཞེས་གདོང་གཡོགས་བསལ། བཞི་པ་དཀྱིལ་འཁོར་བསྟན་པ་ནི། ཕྱག་ཤིང་གིས་མཚོན་ལ། དེ་ལྟར་རྣམ་དག་ཡེ་ཤེས་ཀྱི་སྤྱན་གསར་དུ་ཐོབ་པ་ལ་དཀྱིལ་འཁོར་བསྟན་ཅིང་སྤྲོ་བ་བསྐྱེད་པ་ལགས་ཏེ། ཨེ་མ་སྐལ་ལྡན་རིགས་ཀྱི་བུ། །ཁྱེད་ནི་སྡིག་པ་ཀུན་ལས་གྲོལ། །དཀྱིལ་འཁོར་ཆེན་པོ་འདི་ལ་ལྟོས། །ལུས་ངག་ཡིད་ཀྱིས་དད་པ་བསྐྱེད། །དངོས་གྲུབ་མཐའ་དག་ཁྱེད་ཀྱིས་ཐོབ། །དམ་ཚིག་སྔགས་ལ་བརྩོན་པར་གྱིས། །ཀྱེ་རིགས་ཀྱི་བུ་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་ལ་སོགས་པའི་སངས་རྒྱས་ཀྱི་སྐུ་དང་ཡེ་ཤེས། བརྡ་དོན་རྟགས་ཀྱིས་མཚོན་པའི་མཚོན་བྱེད་དཔེ་ཡི་དཀྱིལ་འཁོར་ཕྱི་ལྟར་རྡུལ་ཚོན་ནམ། རས་བྲིས་འདི་ནི་འབྱུང་བ་རིམ་ལྔ་བརྩེགས་པའི་སྟེང་དུ་འོག་མིན་ལྷུན་གྱིས་གྲུབ་པའི་གཞལ་མེད་ཁང་ཤིན་ཏུ་ཉམས་དགའ་བ། ཕྱི་མཆོད་རྟེན་གྱི་རང་བཞིན་རྩེ་ལྔ་པ་ནང་རང་བྱུང་རྡོ་རྗེའི་གཞལ་ཡས་ཁང་ཕྱི་གསལ་ནང་གསལ། རྒྱ་ཁྱོན་དང་བཀོད་པ་བསམ་གྱིས་མི་ཁྱབ་པའི་མཐའ་བསྐོར་དུ་མཆོད་རྟེན་ཤིང་མེ་ཆུ་སྤྲིན་གྲུབ་པའི་རིག་འཛིན་ཞིང་སྐྱོང་གི་མཁའ་འགྲོ་མ་ལ་སོགས་པ་རྣམ་པ་བརྒྱད་ཀྱིས་མཚན་པའི་དུར་ཁྲོད་བརྒྱད། མཐའ་བསྐོར་དུ་རྡོ་རྗེའི་རྭ་བ་ཡེ་ཤེས་ཀྱི་མེ་དཔུང༌། དབུས་སུ་དག་ཆེན་ཡེ་ཤེས་ཀྱི་རོལ་པ་ཐར་པ་ཆེན་པོའི་གཞལ་མེད་ཁང་གྲུ་བཞི་སྒོ་བཞི་གློ་འབུར་དང་བཅས་པ། རྒྱུ་འབྲས་ཀྱི་རྟ་བབ་བརྒྱད་དང་ལྡན་ཞིང༌། གཞལ་ཡས་ཁང་གི་དབུས་སུ་འཁོར་ལོ་རྩིབས་བཞི་པའི་ལྟེ་བར་པདྨ་འདབ་བཞི། འདབ་བརྒྱད། བཅུ་དྲུག །སུམ་ཅུ་རྩ་གཉིས། བཞི་བཅུ་རྣམས་ཀྱི་དབུས་སུ་སེང་གེའི་ཁྲི་དང་པད་ཟླ་ཉི་མའི་གདན་ལ་དཀྱིལ་འཁོར་འཁོར་ལོའི་དབང་ཕྱུག་བཅོམ་ལྡན་འདས་རྡོ་རྗེ་སེམས་དཔའ་སྐུ་མདོག་མཐིང་ག་མཐིང་དཀར་དམར་བའི་ཞལ་གསུམ། ཕྱག་དྲུག་གིས་རྡོ་རྗེ་འཁོར་ལོ། རིན་པོ་ཆེ། དྲིལ་བུ། པདྨ། རལ་གྲི་འཛིན་པ། ཡུམ་དབྱིངས་ཕྱུག་མ་གཡས་དྲིལ་བུ་དང་གཡོན་རྡོ་རྗེ་ཐུགས་ཀར་འཛིན་པ་དང་སྦྱོར་བ། དེའི་ཕྱི་རོལ་གྱི་རྩིབས་བཞི་ལ་མི་བསྐྱོད་པ་དང༌། རྡོ་རྗེ་དབྱིངས་ཀྱི་དབང་ཕྱུག་མ་སྔོན་མོ། ཀུན་ཏུ་བཟང་པོ་དང་བཟང་མོ་མཐིང་ག །དེའི་ཕྱི་རོལ་གྱི་པད་འདབ་བརྒྱད་ལ་རྣམ་སྣང་དང་སྤྱན་མ་དཀར་མོ། རིན་འབྱུང་དང་མཱ་ཀི་སེར་མོ། སྣང་མཐའ་དང་གོས་དཀར་དམར་མོ། དོན་གྲུབ་དང་སྒྲོལ་མ་ལྗང་གུ་རྣམས་རང་རྟགས་ཀྱི་ཁྲི་ལྔ་བརྩེགས་པ་དང་རིགས་ཀྱི་ཕྱག་མཚན་ཅན། དེའི་ཕྱི་རོལ་པད་འདབ་བཅུ་དྲུག་ལ་སེམས་དཔའ་བརྒྱད་དང་སེམས་མ་བརྒྱད། དེའི་ཕྱི་རོལ་འདབ་མ་སོ་གཉིས་ལ་སྒོ་བ་ཁྲོ་བོ་ཡབ་ཡུམ། ཐུབ་པ་དྲུག །ཆེ་མཆོག་རིགས་ལྔ་ཡབ་ཡུམ། གནས་ཀྱི་མ་མོ་བརྒྱད། དེའི་ཕྱི་རོལ་གྱི་པད་འདབ་བཞི་བཅུ་ལ་ཡུལ་གྱི་མ་མོ་བརྒྱད། གདོང་ཅན་བཞི། དབང་ཕྱུག་མ་ཉི་ཤུ་རྩ་བརྒྱད་དེ་ཞི་ཁྲོ་རབ་འབྱམས་རྒྱལ་བའི་དཀྱིལ་འཁོར་རང་རིགས་ཀྱི་སྐུ་མདོག་ཕྱག་མཚན་རྒྱན་ཆ་ལུགས་རྣམ་འགྱུར་མ་འདྲེས་པ་ཡོངས་སུ་རྫོགས་པ། བར་མཚམས་རྣམས་སུ་རྩ་གསུམ་ཆོས་སྲུང་རྒྱ་མཚོའི་ཚོགས་རྣམས་ཉི་མ་དང་འོད་ཟེར་གྱི་ཚུལ་དུ་སྒྱུ་འཕྲུལ་དྲྭ་བའི་ཡེ་ཤེས་ཀྱི་རོལ་པ་ཚད་མེད་པར་བཞུགས་པར་ཡང་མཚོན་བྱ་ཡེ་ཤེས་ཀྱི་དཀྱིལ་འཁོར། ནང་དུ་ཕུང་པོ་ཁམས་དང་སྐྱེ་མཆེད་ལས་དབང་དང་བཅས་པ་གདོད་ནས་དག་པའི་གདན་གསུམ་རྡོ་རྗེའི་གྲོང་ཁྱེར་དུ་ལྷུན་གྱིས་གྲུབ་པར་རང་ལ་ཡེ་ནས་རང་བྱུང་དུ་བཞུགས་པ་མཚོན་ལ། བཞུགས་ཚུལ་དོན་གྱི་དཀྱིལ་འཁོར་རང་གི་སེམས་རྣམ་ཤེས་ཚོགས་བརྒྱད་སེམས་བྱུང་དང་བཅས་པ་དམ་པ་རིགས་བརྒྱའི་ལྷ་ཚོགས་སུ་བཞུགས་པའི་གནས་ལུགས་མཐར་ཐུག་པ་འདི་ངོ་སྤྲད་པས། ཡིན་ཚུལ་གཤིས་ཀྱི་དཀྱིལ་འཁོར་ཕྱི་ནང་གསང་བ་གཉིས་མེད་རང་བྱུང་གདོད་མའི་གནས་ལུགས་དབྱིངས་རིག་ཟུང་འཇུག་ནང་གསལ་ཐིམ་ལ་མ་རྨུགས་པ་དོན་དམ་དཀོར་བདུན་གྱི་བདག་ཉིད་དུ་ལ་ཟླ་དགོས་པས། རྣམ་པ་དབང་བཞིའི་རྫས་ལ་བསྐྱེད་པའི་བདེ་གཤེགས་རྒྱལ་བ་རབ་འབྱམས་ཞི་ཁྲོ་སྤྲུལ་པའི་འཁོར་ལོ་གཅིག་ཏུ་རྫོགས་པའི་རྟེན་བརྟེན་པར་བཅས་པ་མངོན་སུམ་དུ་མཇལ་བར་མོས་ལ་དད་གུས་སྤྲོ་བ་རྒྱ་ཆེན་པོ་སྐྱེད་ཅིག །དེ་དག་གིས་ལྷ་དང་སྐལ་པ་མཉམ་པའི་ཕྱིར་དུ་དཀྱིལ་འཁོར་ཕྱི་ནང་དུ་འཇུག་པའི་ཆོས་རྣམས་ལེགས་པར་གྲུབ་སྟེ་ཡེ་ཤེས་སྨིན་པའི་སྣོད་དུ་གྱུར་པ་ལ། ཞུགས་ནས་མངོན་པར་དབང་བསྐུར་ཞུ་བའི་ཡོན་དུ་མཎྜལ་ཕུལ། སྐབས་འདིར་དཔོན་སློབ་དད་སྤྲོ་བློ་གྲོས་དང་ལྡན་ན་དབང་བཞིའི་རྣམ་དབྱེ། ངོ་བོ། ངེས་ཚིག །དགོས་པ་སོགས་རྒྱས་བསྡུས་སྐབས་ཕྱེད་པར་འཆད་ན་ལེགས་ཤིང༌། འདིར་སྤྱི་ལྟར། དབང་དངོས་ཞུ་བའི་ཕྱིར་གསོལ་བ་འདེབས་པ་འདིའི་རྗེས་ཟློས་མཛོད། ནམ་མཁའི་རྡོ་རྗེས་རྒྱལ་བ་ལྔར། །དགོངས་ཤིང་ཇི་ལྟར་དབང་བསྐུར་ལྟར། །མཆོད་པ་ཆེན་པོ་བརྡ་ཡི་དབང༌། །རིག་པ་འཛིན་པ་བདག་ལ་སྩོལ། །ལན་གསུམ། དེ་ལྟར་གསོལ་བ་བཏབ་པ་ལ་བུམ་གསང་ཤེས་རབ་ཡེ་ཤེས་བཞི་པ་དང་འབྲེལ་བའི་ཕན་ནུས་ཟབ་མོའི་དབང་རྣམས་རིམ་པར་བསྐུར་བའི་དང་པོ་བུམ་པའི་དབང་ལ་ཕྱི་ཕན་པ་དང་ནང་ནུས་པ་འཇུག་པའི་དབང་གཉིས་ལས། དང་པོ་ཕྱི་ཕན་པ་རྡོ་རྗེ་སློབ་མའི་དབང་ལ་རིག་པའི་དབང་ལྔ་རིམ་པར་བསྐུར་བའི་སླད་དུ་དམིགས་པ་འདི་ལྟར་མཛོད། བདག་མདུན་གྱི་ཐུགས་ཀ་ནས་འཕྲོས་པའི་འོད་ཟེར་གྱིས་ཕྱོགས་བཅུའི་རྒྱལ་བ་སྲས་དང་བཅས་པ་ཐམས་ཅད་གདན་གསུམ་ཚང་བའི་དཀྱིལ་འཁོར་གྱི་འཁོར་ལོའི་རྣམ་པར་སྤྱན་དྲངས། བཛྲ་ས་མཱ་ཛཿ ཐུགས་ཀ་ནས་སྤྲུལ་པའི་ལྷ་མོ་རྣམས་ཀྱིས་མཆོད་ཅིང་བསྟོད་པར་གྱུར། ཨོཾ་བཛྲ་ཨརྒྷཾ་པྲ་ཏཱིཙྪ་སྭཱ་ཧཱ། དེས་འགྲེས་ཏེ། པདྱཾ་ནས། ཤབྡའི་བར་བརྗོད། ཕུང་ཁམས་དག་པ་གཤེགས་པ་གཤེགས་མའི་གདན༔ དབང་ཤེས་དག་པ་སེམས་དཔའ་སེམས་མ་སྟེ༔ ལས་ཀྱི་བདག་པོ་ཁྲོ་བོ་ཁྲོ་མོའི་ཚོགས༔ གདན་གསུམ་ཡོངས་རྫོགས་ལྷ་ལ་ཕྱག་འཚལ་བསྟོད༔ གསོལ་བ་གདབ་པ་ནི། རྡོ་རྗེ་ཅན་གྱི་སངས་རྒྱས་ལ། །འགྲོ་བ་སྐྱོབ་པའི་ཆེད་དུ་དབང༌། །ཡོན་ཏན་འབྱུང་གནས་ཇི་ལྟར་བསྩལ། །དེ་ལྟར་འདི་ལའང་བསྩལ་དུ་གསོལ། །ཞེས་གསོལ་བ་བཏབ་པས་དེ་བཞིན་གཤེགས་པ་རྣམས་ཀྱིས་དགོངས་པ་མཛད། གཤེགས་མ་རྣམས་ཀྱིས་དབང་བསྐུར། སེམས་དཔའ་རྣམས་ཀྱིས་ཤིས་པ་བརྗོད། སེམས་མ་རྣམས་ཀྱིས་གླུ་གར་བསྒྱུར། ཁྲོ་བོ་རྣམས་ཀྱིས་བགེགས་བསྐྲད་དེ། ཀུན་ཀྱང་དབང་གི་བྱ་བ་ལ་དགྱེས་པར་གྱུར། སློབ་བུ་སེང་ཁྲི་པད་ཉི་ཟླ་བའི་གདན་ལ་སྐད་ཅིག་གིས་རྡོ་རྗེ་མི་བསྐྱོད་པར་གནས་གྱུར་པ་ལ་རིག་པའི་ལྷ་མོ་རྣམས་དང་སློབ་དཔོན་ལྷན་ཅིག་པས་རྣམ་རྒྱལ་བུམ་པའི་ཆུ་མི་བསྐྱོད་པའི་བདག་ཉིད་ཅན་གྱིས་དབང་བསྐུར་བར་མོས་ཤིག །རྣམ་བུམ་ཐོགས་ལ། ཧཱུྃ། རྣམ་ཤེས་ཕུང་པོ་རྣམ་དག་ཅིང༌། །ཉོན་མོངས་ཞེ་སྡང་སྦྱོང་བྱེད་པའི། །ཆོས་ཀྱི་དབྱིངས་ཀྱི་ཡེ་ཤེས་ཀྱི། །དཔལ་ལྡན་ཐུགས་ཀྱི་དབང་བསྐུར་རོ། །ཨོཾ་བཛྲ་ཨ་བྷི་ཥིཉྩ་ཧཱུྃ། ཞེས་དབང་བསྐུར་ཞིང་བུམ་ཆུ་སྦྱིན། རིགས་ཀྱི་བུ་ཁྱོད་ལ་མི་བསྐྱོད་པ་ཆུ་ཡི་དབང་བསྐུར་བས་ཡིད་ཀྱི་སྒྲིབ་པ་དག །སངས་རྒྱས་ཐམས་ཅད་ཀྱི་ཐུགས་ཀྱི་དབང་ཐོབ། རྣམ་པར་ཤེས་པ་རྡོ་རྗེ་མི་བསྐྱོད་པ་དང་ཆུའི་ཁམས་མཱ་མ་ཀིར་སངས་རྒྱས། ཞེ་སྡང་ཆོས་དབྱིངས་ཡེ་ཤེས་སུ་གྲོལ་ཏེ། སངས་རྒྱས་རྡོ་རྗེའི་རིགས་ཀྱི་ཐུགས་འཁྲུལ་པ་མེད་པས་འགྲོ་བའི་དོན་བྱེད་པར་འགྱུར་རོ། །སློབ་མ་རིན་ཆེན་འབྱུང་ལྡན་དུ་གསལ་བ་ལ་རིག་པའི་ལྷ་མོ་རྣམས་དང་སློབ་དཔོན་ལྷན་ཅིག་པས་རིན་འབྱུང་གི་བདག་ཉིད་ཅན་གྱི་དབུ་རྒྱན་སྤྱི་བོར་བཅིངས་ཏེ་དབང་བསྐུར་བར་མོས་ཤིག །དབུ་རྒྱན་བཅིང་ལ། ཧཱུྃ། ཚོར་བའི་ཕུང་པོ་རྣམ་དག་ཅིང༌། །ཉོན་མོངས་ང་རྒྱལ་སྦྱོང་བྱེད་པའི། །མཉམ་པ་ཉིད་ཀྱི་ཡེ་ཤེས་ཀྱི། །དཔལ་ལྡན་ཡོན་ཏན་དབང་བསྐུར་རོ། །ཨོཾ་རཏྣ་ཨ་བྷི་ཥིཉྩ་ཏྲཱྃ། རིགས་ཀྱི་བུ་ཁྱོད་ལ་རིན་འབྱུང་གི་ངོ་བོ་དབུ་རྒྱན་འདི་བསྐོན་པ་ཙམ་གྱིས་ཤེས་བྱའི་སྒྲིབ་པ་སྦྱངས། སངས་རྒྱས་ཐམས་ཅད་ཀྱི་ཡོན་ཏན་གྱི་དབང་ཐོབ། ཚོར་བའི་ཕུང་པོ་རིན་ཆེན་འབྱུང་ལྡན་དང་སའི་ཁམས་སངས་རྒྱས་སྤྱན་དུ་དག །ང་རྒྱལ་མཉམ་པ་ཉིད་ཀྱི་ཡེ་ཤེས་སུ་གྲོལ་ཏེ། སངས་རྒྱས་རིན་ཆེན་རིགས་ཀྱི་ཡོན་ཏན་ཐམས་ཅད་མཁྱེན་ནས་འགྲོ་བའི་དོན་བྱེད་པར་འགྱུར་རོ། །སློབ་མ་སྣང་བ་མཐའ་ཡས་སུ་གསལ་བ་ལ་རིག་པའི་ལྷ་མོ་རྣམས་དང་སློབ་དཔོན་ལྷན་ཅིག་པས་སྣང་བ་མཐའ་ཡས་ཀྱི་ངོ་བོ་རྡོ་རྗེ་ཕྱག་གཡས་སུ་གཏད་དེ་དབང་བསྐུར་བར་མོས་ཤིག །རྡོ་རྗེས་དབང་བསྐུར་ལ། ཧཱུྃ། འདུ་ཤེས་ཕུང་པོ་རྣམ་དག་ཅིང༌། །ཉོན་མོངས་འདོད་ཆགས་སྦྱོང་བྱེད་པའི། །སོ་སོར་རྟོགས་པའི་ཡེ་ཤེས་ཀྱི། །དཔལ་ལྡན་གསུང་གི་དབང་བསྐུར་རོ། །ཨོཾ་པདྨ་ཨ་བྷི་ཥིཉྩ་ཧྲཱིཿ རིགས་ཀྱི་བུ་ཁྱོད་ལ་རྡོ་རྗེས་དབང་བསྐུར་བས་ངག་གི་སྒྲིབ་པ་ཐམས་ཅད་དག །སངས་རྒྱས་ཐམས་ཅད་ཀྱི་གསུང་གི་དབང་ཐོབ། འདུ་ཤེས་ཀྱི་ཕུང་པོ་སྣང་བ་མཐའ་ཡས་དང་མེའི་ཁམས་གོས་དཀར་མོར་སངས་རྒྱས། འདོད་ཆགས་སོ་སོར་རྟོགས་པའི་ཡེ་ཤེས་སུ་གྲོལ་ཏེ། སངས་རྒྱས་པདྨའི་རིགས་ཀྱི་གསུང་འགག་པ་མེད་པའི་ཆོས་ཀྱི་སྒྲ་དབྱངས་ཀྱིས་འགྲོ་བའི་དོན་བྱེད་པར་འགྱུར་རོ། །སློབ་མ་དོན་ཡོད་གྲུབ་པར་གསལ་བ་ལ་རིག་པའི་ལྷ་མོ་རྣམས་དང་སློབ་དཔོན་ལྷན་ཅིག་པས་དོན་ཡོད་གྲུབ་པའི་ངོ་བོ་དྲིལ་བུ་ཐོགས་ཏེ་དབང་བསྐུར་བར་མོས་ཤིག །དྲིལ་བུ་ལག་གཡོན་དུ་གཏད་ལ། ཧཱུྃ། འདུ་བྱེད་ཕུང་པོ་རྣམ་དག་ཅིང༌། །ཉོན་མོངས་ཕྲག་དོག་སྦྱོང་བྱེད་པའི། །བྱ་བ་གྲུབ་པའི་ཡེ་ཤེས་ཀྱི། །དཔལ་ལྡན་ཕྲིན་ལས་དབང་བསྐུར་རོ། །ཨོཾ་ཀརྨ་ཨ་བྷི་ཥིཉྩ་ཨཱཿ རིགས་ཀྱི་བུ་ཁྱོད་ལ་དྲིལ་བུ་འདི་གཏད་པ་ཙམ་གྱིས་ཀུན་གཞིའི་སྒྲིབ་པ་དག །སངས་རྒྱས་ཐམས་ཅད་ཀྱི་ཕྲིན་ལས་ཀྱི་དབང་ཐོབ། འདུ་བྱེད་ཀྱི་ཕུང་པོ་དོན་ཡོད་གྲུབ་པ་དང་རླུང་གི་ཁམས་དམ་ཚིག་སྒྲོལ་མར་སངས་རྒྱས། ཕྲག་དོག་བྱ་བ་གྲུབ་པའི་ཡེ་ཤེས་སུ་གྲོལ་ཏེ། ལས་ཀྱི་རིགས་ཀྱི་ཕྲིན་ལས་ཐོགས་པ་མེད་པར་གྲུབ་ནས་འགྲོ་བའི་དོན་བྱེད་པར་འགྱུར་རོ། །སློབ་མ་རྣམ་སྣང་དུ་གསལ་བ་ལ་རིག་པའི་ལྷ་མོ་རྣམས་དང་སློབ་དཔོན་ལྷན་ཅིག་པས་རྣམ་སྣང་གི་ངོ་བོ་རྡོ་རྗེའི་མིང་གི་དབང་བསྐུར་བར་མོས་ཤིག །རྡོར་དྲིལ་ལྷན་ཅིག་སྤྱི་བོར་དཀྲོལ་ལ། ཧཱུྃ། གཟུགས་ཀྱི་ཕུང་པོ་རྣམ་དག་ཅིང༌། །ཉོན་མོངས་གཏི་མུག་སྦྱོང་བྱེད་པའི། །མེ་ལོང་ལྟ་བུའི་ཡེ་ཤེས་ཀྱི། །དཔལ་ལྡན་སྐུ་ཡི་དབང་བསྐུར་རོ། །ཨོཾ་བུདྡྷ་ཆེ་གེ་མོ་ཨ་བྷི་ཥིཉྩ་མི། མིང་དབང་དངོས་མེ་ཏོག་དོར་བའི་སྐབས་གདགས་ཟིན་ཡང་སྦྱང་གཞི་སྦྱོང་བྱེད་ངོ་སྤྲོད་བདེ་བ་དང་དཀྱིལ་འཁོར་དུ་ཞུགས་ཟིན་ཡང་དབང་བསྐུར་བའི་ངེས་པ་སྟོན་པའི་དགོས་པས་འདིར་ཡང་འབྱུང་བར་གསུངས། མཆན། རིགས་ཀྱི་བུ་ཁྱོད་ལ་རྣམ་པར་སྣང་མཛད་མིང་གི་དབང་བསྐུར་བས་ལུས་ཀྱི་སྒྲིབ་པ་དག་ནས། སངས་རྒྱས་ཐམས་ཅད་ཀྱི་སྐུའི་དབང་ཐོབ། གཟུགས་ཀྱི་ཕུང་པོ་རྣམ་པར་སྣང་མཛད་དང་ནམ་མཁའི་ཁམས་དབྱིངས་ཕྱུག་མར་སངས་རྒྱས། གཏི་མུག་མེ་ལོང་ཡེ་ཤེས་སུ་གྲོལ་ཏེ། དེ་བཞིན་གཤེགས་པའི་རིགས་ཀྱི་སྐུ་འགྱུར་བ་མེད་པ་ཐོབ་ནས་འགྲོ་བའི་དོན་བྱེད་པར་འགྱུར་རོ།  །དེ་དག་གིས་མ་རིག་པ་ལྔ་སྦྱངས་ནས་རིག་པ་ཡེ་ཤེས་ལྔ་ཐོབ་པར་བྱེད་པ་ཡིན་པས་སམ། རིག་མ་སྤྱན་ལ་སོགས་པའི་ཐབས་རིག་པ་ཡབ་ལྔའི་ལས་ཡིན་པས་དང༌། རྒྱུད་སྡེ་བཞི་ཐུན་མོང་དུ་གྱུར་པའི་དབང་ཡིན་པའི་ཕྱིར་ཐུན་མོང་རིག་པའི་དབང་ལྔ་ཞེས་གྲགས་པ་སྟེ་དབང་རྫས་ལྔ་གནས་རྣམས་སུ་གཏུགས་པ་ནི་དབང་གི་རྒྱུ་ཡིན་ལ། སློབ་དཔོན་གྱི་དམིགས་པ་དང་སློབ་མའི་མོས་པས་དངོས་གྲུབ་སྒྲུབ་པའི་ནུས་པ་རྒྱུད་ལ་བཞག་པ་ནི་དབང་གི་ངོ་བོ་གསང་སྔགས་ལམ་གྱི་ཕྱི་ནང་གི་རྟེན་འབྲེལ་ཐམས་ཅད་དབང་གི་སྒོ་ནས་བསྒྲིགས་པ་སྟེ། ཡེ་ཤེས་ཐིག་ལེ་ལས། ཆུ་ཡི་དབང་བསྐུར་དབུ་རྒྱན་དག །བྱ་བའི་རྒྱུད་ལ་རབ་ཏུ་གྲགས། །རྡོ་རྗེ་དྲིལ་བུ་དེ་བཞིན་མིང༌། །སྤྱོད་པའི་རྒྱུད་ལ་རབ་ཏུ་གསལ། །ཕྱིར་མི་ལྡོག་པ་ཡི་ནི་དབང༌། །རྣལ་འབྱོར་རྒྱུད་ལ་གསལ་བར་བྱས། །ཞེས་པ་ལྟར་གསང་སྔགས་ཕྱི་པའི་དབང་ཡང་བླ་མེད་ཀྱི་སྤྲོས་བཅས་བུམ་དབང་གི་ཞར་བྱུང་དུ་རྫོགས་པས་འདི་ཁོ་ན་ཙམ་གྱིས་ཀྱང་ཕྱི་དཀྱིལ་དུ་དྲང་དོན་གྱི་བསྐྱེད་རིམ་རྣམས་ཉན་དུ་རུང་བའོ།  །གཉིས་པ་ནང་ནུས་པ་འཇུག་པའི་དབང་ལ་སྤྱི་དང་བྱེ་བྲག་ཁྱད་པར་གསུམ་ལས། དང་པོ་ཆོས་ཅན་ཕུང་ཁམས་ལྔའི་སྣང་བ་ཐམས་ཅད་ལྷར་བྱིན་གྱིས་བརླབས་ནས། ཆོས་ཉིད་དྲུག་པ་རྡོ་རྗེ་སེམས་དཔར་ངོ་སྤྲད་དེ་སྐུ་གསུང་ཐུགས་བྱིན་གྱིས་རློབ་པར་བྱེད་པ་བརྟུལ་ཞུགས་ཀྱི་དབང་ངམ་ཕྱིར་མི་ལྡོག་པ་རྡོ་རྗེ་སློབ་དཔོན་བདག་པོ་ཆེན་པོར་དབང་བསྐུར་ཞིང་དབུགས་དབྱུང་བ་ལ་དམིགས་པ་འདི་ལྟར་མཛོད། ཁྱེད་རང་རྣམས་སྐད་ཅིག་གིས་དཀྱིལ་འཁོར་འཁོར་ལོའི་དབང་ཕྱུག་སངས་རྒྱས་ཀུན་གྱི་སྤྱི་མེས་བཅོམ་ལྡན་འདས་དཔལ་ཀུན་ཏུ་བཟང་པོ་ཡབ་ཡུམ་དུ་གསལ་བ་ལ། ཐབས་བདེ་བ་ཆེན་པོ་རྡོ་རྗེ་ཐུགས་ཀྱི་དམ་ཚིག་ལག་གཡས་སུ་གཏད་དེ་གསོར་བ་དང༌། ཤེས་རབ་སྟོང་པ་ཉིད་ཀྱི་དྲིལ་བུ་གསུང་གི་དམ་ཚིག་ལག་གཡོན་དུ་གཏད་དེ་འཁྲོལ་བ་དང༌། བདེ་སྟོང་ཟུང་འཇུག་ཕྱག་རྒྱ་སྐུའི་དམ་ཚིག་འཁྱུད་རྒྱ་བྱས་ལ། ཨོཾ་ཨཱཿཧཱུྃ། ཐབས་དང་ཤེས་རབ་གཉིས་མེད་ཅིང༌། །སྣང་སྟོང་དབྱེར་མེད་འདི་བཟུང་ནས། །སྟོང་ཉིད་སྙིང་རྗེའི་སྙིང་པོ་ཡི། །ཀུན་བཟང་རྡོ་རྗེ་འཛིན་ཁྱོད་ཀྱིས། །འགྲོ་ཀུན་རྗེས་སུ་བཟུང་བར་མཛོད། །རིགས་ཀྱི་བུ་ཁྱོད་ལ་གསང་སྔགས་ཀྱི་ཕྱག་རྒྱའི་དམ་ཚིག་གི་ནང་ནས་མཆོག་ཏུ་གྱུར་པ་རྡོ་རྗེ་དང་དྲིལ་བུ་དཀྱིལ་འཁོར་ཐམས་ཅད་པའི་བདག་ཉིད་འདི་ལག་ཏུ་གཏད་པ་ཙམ་གྱིས། རྣམ་པ་ཐམས་ཅད་མཁྱེན་པའི་ས་བོན་ཐེབས། སངས་རྒྱས་ཐམས་ཅད་ཀྱི་མེས་པོ་གདོད་མའི་མགོན་པོ་ཀུན་ཏུ་བཟང་པོ་དང་གཉིས་སུ་མེད་པར་སངས་རྒྱས་ཏེ་སེམས་ཅན་ཐམས་ཅད་ཀྱི་དོན་དཔག་ཏུ་མེད་པ་བྱེད་ནུས་པར་གྱུར་ཅིག །གཉིས་པ་བྱེ་བྲག་རྗེས་སུ་གནང་བ་ལ། རྒྱལ་ཚབ་ཏུ་འོས་པའི་སློབ་བུ་ཡིན་ན། པུསྟི། དུང་དཀར། ཕྱག་ཤིང༌། འཁོར་ལོ་ལ་སོགས་པ་སྤྲད་ཅིང་ཁྲི་ལ་མངའ་གསོལ་བ་གཞན་དང་མཐུན། དེ་ལྟར་ཐུན་མོང་གི་དབང་དྲུག་གིས་རགས་པ་ཕུང་ཁམས་སྐྱེ་མཆེད་དེ་བཞིན་ཉིད་དང་བཅས་པ་བྱིན་གྱིས་བརླབས་ནས། ཕྲ་བ་དཀྱིལ་འཁོར་བཞིར་སྐུ་བཞིར་བྱིན་གྱིས་རློབ་པར་བྱེད་པ་ཐུན་མོང་མ་ཡིན་པའི་དབང་བཞིའི་དང་པོ་ཕྱིར་མི་ལྡོག་པ་འཁོར་ལོའི་དབང་གི་སླད་དུ། སླར་ཡང་དབང་གི་ལྷ་རྣམས་ཀྱིས་བཀྲ་ཤིས་པའི་རྣམ་པ་དུ་མ་དང་ལྡན་པས་རྣམ་པར་རྒྱལ་བའི་བུམ་པ་བདུད་རྩིའི་ཆུ་རྒྱུན་གྱིས་གང་བས་དབང་བསྐུར་བར་མོས་ཤིག །རྣམ་རྒྱལ་བུམ་པས་དབང་བསྐུར་ལ། ཧཱུྃ། བཀྲ་ཤིས་བུམ་པ་ལྷའི་གཞལ་ཡས། །ལྷ་དང་གཉིས་མེད་བདུད་རྩིའི་ཆུས། །སྐལ་ལྡན་བུ་ལ་དབང་བསྐུར་བས། །སྣང་ཞེན་ལྷ་སྐུའི་ཕྱག་རྒྱར་རྫོགས། །རྣམ་སྨིན་རིག་འཛིན་ཉེར་ཐོབ་ཅིང༌། །ཀུན་ཏུ་འོད་ཀྱི་ས་ནོན་ཤོག །ཞི་ཁྲོའི་རྩ་སྔགས་དང༌། ཀཱ་ཡ་ཨ་བྷི་ཥིཉྩ་ཨོཾ། རིགས་ཀྱི་བུ་ཁྱོད་ལ་ཐམས་ཅད་བརྟན་པར་བྱེད་པ་རྣམ་རྒྱལ་བུམ་པས་དབང་བསྐུར་བས། སྣོད་བཅུད་ལྷ་དང་གཞལ་ཡས། ཕུང་པོ་ཁམས་དང་སྐྱེ་མཆེད་ཀྱང་ལྷ་དང་ལྷ་མོར་གནས་དག་པ་ཡིན་པས། ཕྱི་ནང་ཐམས་ཅད་ལ་བརྙས་པར་བྱས་ན་ལྟུང་བར་འགྱུར་བ་ཡིན་པས་དག་སྣང་དང་མོས་པ་གྱིས་ཤིག །རྗེས་གནང་གི་ཆས་རྣམས་གཏད་ན་འདི་ཡང་བརྗོད་དོ། །དེ་ལྟར་དབང་བསྐུར་བས་བྱེད་ལས་སུ་གཞན་དོན་སྒྲུབ་པར་རྗེས་སུ་གནང་བའི་རྟེན་འབྲེལ་དུ་སྐྱེ་འགྲོ་ཐམས་ཅད་ཆོས་ཀྱི་མངའ་འོག་ཏུ་འདུ་བའི་བརྡར་རྐང་འོག་ཏུ་འཁོར་ལོ། ཆོས་སྒྲ་རྒྱུན་མི་འཆད་པར་སྒྲོགས་པའི་ཕྱིར་ལག་གཡས་སུ་དུང༌། བསྡུ་བ་བཞིའི་ཕྲིན་ལས་མཚོན་པའི་ཆོས་ཀྱི་རྔ་བོ་ཆེ་གཎྜིའམ་ཕྱག་ཤིང༌། དེ་ཉིད་བཅུ་ལ་སོགས་པའི་རྡོ་རྗེ་སློབ་དཔོན་གྱི་ཕྲིན་ལས་རབ་འབྱམས་སྒྲུབ་པར་བཀས་གནང་བའི་རྟགས་སུ་རྡོར་དྲིལ་དང་རྒྱུད་ཀྱི་གླེགས་བམ་རྣམས་གཏད་པར་མོས་ཤིག །རྟེན་སྙིང་བརྗོད་ལ་མེ་ཏོག་འཐོར། ཁྱད་པར་བུམ་དབང་དང་རྗེས་སུ་འབྲེལ་བར་སྐུ་ཕྱག་རྒྱའི་དབང་བསྐུར་བ་སྟེ། མདུན་བསྐྱེད་ལྷ་ཚོགས་གཙོ་འཁོར་རྣམས་ལས་ཡེ་ཤེས་ཀྱི་སྐུ་མར་མེ་གཅིག་ལས་གཉིས་མཆེད་ཀྱི་ཚུལ་དུ་བྱོན་ནས་ཁྱེད་རང་ལ་ཐིམ་པས། ཁྱེད་རང་གི་ཕུང་ཁམས་སྐྱེ་མཆེད་ཐམས་ཅད་གདན་གསུམ་ཡོངས་རྫོགས་དམ་པ་རིགས་བརྒྱའི་ཡེ་ཤེས་ལྷའི་སྐུ་དང་གཉིས་མེད་དུ་བྱིན་གྱིས་བརླབས་པའི་ནུས་པ་རྒྱུད་ལ་འཇོག་པར་མོས་ཤིག །སོ་སོའི་ཙཀླིས་དབང་བསྐུར་ཏེ། ཧཱུྃ། ཆོས་རྣམས་རྣམ་དག་ཡེ་ནས་ལྷུན་གྲུབ་ཅིང༌། །བྱ་བ་བྱེད་དང་ཡིད་ཆོས་རྣམ་པར་དག །ནམ་མཁའི་མཐའ་བཞིན་ཀུན་ལ་སྙོམས་མཛད་པ། །དབང་གི་སྤྱི་དོན་དུ་འདི་མེད། མཆན། ཀུན་བཟང་ཡབ་ཡུམ་གཉིས་ཀྱིས་དབང་བསྐུར་རོ། །ཧཱུྃ་ཧཱུྃ་ཧཱུྃ་བཛྲ་ཙིཏྟ་ཨོཾ། ཨ་ཨ་ཨ་བཛྲི་བྷ་དྲ་ས་མནྟ་ཨ། ཨ་བྷི་ཥིཉྩ་མཾ། ཞེས་སོགས་དམ་པ་རིགས་བརྒྱའི་ལྷ་དབང་ཡོངས་རྫོགས་སྦྱར་མཐར། འདི་ལྟར་ཆོས་ཐམས་ཅད་དམ་པ་རིགས་བརྒྱའི་ངོ་བོར་དག་ཅིང༌། དེ་ཡང་རང་སེམས་ལྷག་པའི་བདེན་གཉིས་དབྱེར་མེད་གསང་ཆེན་རིགས་གཅིག་ཏུ་རྣམ་པར་དག་པ་ཡིན་ནོ།  །ཞེས་རྟོག་པ་བསྐྱེད། དེ་ལྟར་བུམ་པའི་དབང་གིས་ལུས་དང་རྩའི་སྒྲིབ་པ་དག །བསྐྱེད་རིམ་བསྒོམ་པ་ལ་དབང༌། ཕུང་ཁམས་སྐྱེ་མཆེད་ཚོགས་བརྒྱད་དབང་ཡུལ་དང་བཅས་པ་སྐུ་དང་ཡེ་ཤེས་སུ་འགྱུར་བའི་ས་བོན་ཐེབས། སྤྲུལ་པའི་སྐུ་འགྲུབ་པའི་སྐལ་པ་རྒྱུད་ལ་བཞག་གོ །གསུམ་པ་གསང་བ་ཟབ་མོའི་དབང་ལ་སྦྱོར་དངོས་རྗེས་གསུམ་དུ་ཡོད་པའི་དང་པོ་སྦྱོར་བ་རྩ་ཁམས་བྱིན་གྱིས་བརླབ་པ་གསང་དབང་གི་སླད་དུ། བླ་མ་ཡབ་ཡུམ་དང་གཉིས་སུ་མེད་པའི་ནམ་མཁར་བཞུགས་པའི་ལྷ་ཚོགས་རྣམས་བདེ་བ་ཆེན་པོའི་ངང་དུ་སྙོམས་པར་ཞུགས་པའི་བྱང་ཆུབ་སེམས་རྗེས་སུ་ཆགས་པའི་མེས་ཞུ་བ་སོ་སོའི་མཁའ་གསང་ནས་ཐོན་ཐོད་པའི་བདུད་རྩི་དང་རོ་གཅིག་ཏུ་གྱུར་པ་འདི་ཉིད་ཁྱེད་རང་སློབ་མ་རྣམས་ལ་བྱིན་པའི་མོས་པ་མཛོད། གསང་རྫས་མགྲིན་པར་བཞག་སྟེ། ཧཱུྃ། ཡབ་ཡུམ་སྦྱོར་བའི་བྱང་ཆུབ་སེམས༔ དཀར་དམར་བྷཉྫའི་ནང་དུ་བསྐྱིལ༔ སྐལ་ལྡན་བུ་ལ་དབང་བསྐུར་བས༔ རྩ་ཁམས་ཡི་གེའི་རྣམ་པར་སྨིན༔ ཚེ་ལ་དབང་བའི་རིག་འཛིན་ཐོབ༔ པདྨ་ཅན་གྱི་ས་ནོན་ཤོག༔ རྩ་སྔགས་དང༌། ཝཱཀྐ་ཨ་བྷི་ཥིཉྩ་ཨཱཿ བདུད་རྩི་སྦྱིན། དེ་ལྟར་མྱངས་བས་བྱང་སེམས་ཀྱིས་རྩ་ཁམས་ཐམས་ཅད་ལ་ཁྱབ། གསལ་སྟོང་རྣམ་པར་མི་རྟོག་པའི་ཡེ་ཤེས་རྒྱུད་ལ་སྐྱེས་པར་མོས་ཤིག །དེ་དང་རྗེས་སུ་འབྲེལ་བར་གསུང་བཟླས་པའི་ལུང་སྦྱིན་པ་ལ། སློབ་དཔོན་གྱི་ཐུགས་ཀ་ནས་རྩ་བའི་སྔགས་ཕྲེང་ལུ་གུ་རྒྱུད་དུ་བྱུང༌། སློབ་མའི་མགྲིན་པ་ནས་ཞུགས་སྙིང་གར་འཁོར་བ་དང་འགྱུ་བའི་རླུང་ཁམས་མཐའ་དག་གྲགས་སྟོང་སྔགས་ཀྱི་འཁོར་ལོར་རྫོགས་པར་མོས་ལ་ཞི་བར་བསྙེན་པའི་སྔགས་འདིའི་རྗེས་ཟློས་མཛོད། ཨོཾ་བོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷཱ་ཏུ་ཨཱཿ ལན་གསུམ། ཁྲོ་བོར་སྒྲུབ་པའི་སྔགས་འདིའི་རྗེས་ཟློས་མཛོད། ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ་ཕཊ། ལན་གསུམ། ལས་སྦྱོར་རྩ་རིག་དང་ཞི་ཁྲོ་ཆིག་དྲིལ་ཡི་གེ་བརྒྱ་པའི་སྔགས་འདིའི་རྗེས་ཟློས་ལན་གསུམ་མཛོད། ཨོཾ་ན་མོ་བྷ་ག་ཝ་ཏེ་སརྦ་དུརྒ་ཏེ་པཱ་རི་ཤྭ་དྷ་ནི་རཱ་ཛ་ཡ། ཏ་ཐཱ་ག་ཏ་ཡ། ཨརྷ་ཏེ་སཾ་མྱག་སཾ་བུདྡྷ་ཡ། ཏདྱ་ཐཱ། ཨོཾ་ཤྭ་དྷ་ནི་ཤྭ་དྷ་ནི། སརྦ་པཱ་པཾ་བི་ཤྭ་དྷ་ནི་སྭཱ་ཧཱ། ལན་གསུམ། ཨོཾ་བཛྲ་སཏྭ་ས་མ་ཡ་སོགས། ས་མ་ཡ་སཏྭ་ཨཱ་ཧཱུྃ་ཕཊ། ལན་གསུམ། དེ་ལྟར་གསང་བའི་དབང་གིས་ངག་གི་ལས་དང་རླུང་གི་སྒྲིབ་པ་དག །བླ་མེད་ཀྱི་དམ་རྫས་ཁྱད་པར་ཅན་སྤྱོད་ཅིང་བཟླས་བརྗོད་དང་གཏུམ་མོའི་རྣལ་འབྱོར་ལ་དབང༌། རླུང་བཅུ་ལས་སུ་རུང་བའི་ཡོན་ཏན་ཐམས་ཅད་ཐོབ། ལོངས་སྤྱོད་རྫོགས་པའི་སྐུ་འགྲུབ་པའི་སྐལ་པ་རྒྱུད་ལ་བཞག་གོ  །གཉིས་པ་དངོས་གཞི་དཔེའི་ཡེ་ཤེས་མཚོན་པའི་སླད་དུ། གཟུགས་དང་ལང་ཚོ་མཛེས་སྡུག་ཕུལ་དུ་བྱུང་ཞིང་མཚན་ཉིད་མཆོག་དང་ལྡན་པའི་རིག་མ་ལག་གཡོན་དུ་བྱིན་པར་མོས་ཤིག །རིག་ཙཀ་གཏད་ལ། ཧོཿ ཆོས་རྣམས་ཀུན་གྱི་འབྱུང་གནས་ཏེ། །བདེ་བ་ཆེན་པོ་གསང་བའི་ཡུམ། །རིགས་ཀྱི་བུ་ལ་བྱིན་པ་ཡིས། །དགའ་བཞིའི་ཡེ་ཤེས་མངོན་དུ་གྱུར། །ཕྱག་རྒྱ་ཆེན་པོའི་རིག་འཛིན་ཐོབ། །འཁོར་ལོ་ཚོགས་ཆེན་ས་ནོན་ཤོག །རྩ་སྔགས་དང༌། ཙིཏྟ་ཨ་བྷི་ཥིཉྩ་ཧཱུྃ། ཞེས་གཏད་པས། རིག་མ་དེས་པདྨ་བྷཉྫ་མོ་ཀྵ་ཧོཿ ཞེས་པའི་སྒྲས་ཐར་པ་བསྟན་པ་ལ་བསྐུལ། རྗེས་སུ་ཆགས་པའི་རོལ་མོས་དགའ་བཞིའི་ཡེ་ཤེས་ཉམས་སུ་མྱོང༌། རྡོ་རྗེ་ནོར་བུའི་རྩེ་མོར་ལྷན་ཅིག་སྐྱེས་པའི་དཔེ་ཡི་ཡེ་ཤེས་མངོན་དུ་བྱས། སླར་གྱེན་དུ་ལྡོག་པས་མས་བརྟན་འབྲས་བུའི་དགའ་བཞི་དང་ཟུང་དུ་འཇུག་པའི་སྟོང་བཞིའི་འོད་གསལ་མཐར་ཐུག་བརྗོད་བྲལ་ཡེ་ཤེས་མངོན་དུ་མཐོང་བར་མོས་ཤིག །དེས་ཤེས་རབ་ཡེ་ཤེས་ཀྱི་དབང་གིས་ཡིད་དང་ཐིག་ལེའི་སྒྲིབ་པ་དག །རང་བཞིན་བརྒྱད་ཅུའི་རྟོག་ཚོགས་འགགས། ཆོས་སྐུའི་གོ་འཕང་ཐོབ་པའི་སྐལ་པ་རྒྱུད་ལ་བཞག་གོ  །གསུམ་པ་རྗེས་དོན་གྱི་ངོ་སྤྲད་པ་བཞི་པ་ཚིག་གི་དབང་ལ་དངོས་དང་བཀའ་གཏད་རིག་པ་རྩལ་གྱི་དབང་གསུམ་ལས་དང་པོ་ནི། དེའང་བསྐུར་མ་ཐག་པའི་དབང་གསུམ་པའི་ཡེ་ཤེས་ཀྱི་དཔེས་ཆོས་དབྱིངས་སྤང་བླང་ལས་འདས་པའི་བརྡལ་བ་ཆེན་པོའི་ཡེ་ཤེས་ཀྱི་ཉམས་མྱོང་དྲན་པར་བྱས་ཏེ་ཐབས་ལ་བརྟེན་པའི་ཤེས་རབ་ཀྱིས་ངོ་སྤྲད་དེ། དབྱིངས་རིག་གཉིས་མེད་ཤེལ་དང་མེ་ལོང་གི་བརྡས་མཚོན་པར་བྱས་ནས་ཉམས་སུ་མྱོང་བར་མོས་ལ། མེ་ལོང་དང་ཤེལ་རྡོ་བསྟན་ལ། ཧོཿ ཀ་དག་མེ་ལོང་གཙང་མའི་ངོགས། །ལྷུན་གྲུབ་དྭངས་ཤེལ་དྲི་མེད་གསལ། །བརྡ་རྟགས་རྫོགས་པའི་དབང་བསྐུར་བས། །དྲི་མེད་རིག་པའི་གནས་ལུགས་རྟོགས། །ལྷུན་གྲུབ་རིག་འཛིན་ཉེར་ཐོབ་ནས། །བདེ་བ་ཆེན་པོའི་ས་ནོན་ཤོག །རྩ་སྔགས་དང༌། དྷརྨ་དྷཱ་ཏུ་ཨ་བྷི་ཥིཉྩ་ཨཱཿ ཞེས་བརྗོད་དེ་མཉམ་པར་བཞག །དཔེ་ལས་ཐོབ་པའི་གསུམ་པའི་ཉམས་མྱོང༌། མྱོང་ཞེན་ཤེས་བྱའི་སྒྲིབ་པ་སེམས་རིག་ཤན་མ་ཕྱེ་བ་ཞིག་འཆར་ཉེ་བ་ན། ཕཊ། དྲག་པོ་ཞིག་བརྗོད་འཕྲལ། སེམས་གང་ཡིན། ཞེས་རྟབ་རྟབ་ཏུ་དྲིས་པས། སྣང་བ་ཧད་དེ། ཕྱད་དེ། ཅི་ཟེར་ཆ་མེད་པའི་འབྱུང་ཚོར་གྱི་སྤྲོས་པ་ཞི་བའི་རིག་པ་གུ་ཡངས་བསམ་ལས་འདས་པ་ཞིག་མི་འཆར་བའི་དབང་མེད་པས་དེ་ག་སེམས་ལས་འདས་པའི་རིག་པར་ངོ་སྤྲད་པ་ནི་ལྟ་བ་སྤྱི་འབྱམས་ཀྱི་དབང་ཞེས་བྱ་ཞིང༌། དེ་ལྟར་ངོ་སྤྲད་པའི་ལྟ་བ་ལུང་རིག་དང་འབྲེལ་པ་ཞེས་བྱ་བ་ཡིན་པས། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགག་ནམ་མཁའི་ངོ་བོ་ཉིད། །སོ་སོ་རང་རིག་ཡེ་ཤེས་སྤྱོད་ཡུལ་བ། །དུས་གསུམ་རྒྱལ་བའི་ཡུམ་གྱུར་རྫོགས་པ་ཆེ། །ཞེས་གསུངས་པའི་དོན་ལགས་སོ།  །སློབ་དཔོན་ལྟ་དགོངས་དང་ལྡན་པ་ཡིན་ན། ཐུགས་ཀར་ཨ་གཅིག་བསམ་ལ་སློབ་མས་རིག་པ་གཏད་དེ་མཉམ་པར་བཞག་པའི་ངང་ནས་ཨ་ཉི་ཤུ་རྩ་གཅིག་བརྩེགས་མར་བརྗོད། དེ་ནི་སྒོམ་པ་ཉམས་མྱོང་དང་འབྲེལ་བར་དགོས་པས་བྱིན་རླབས་འཕོ་བའི་དབང་ཞེས་བྱའོ།  །དེས་དབང་བཞི་པ་ཐོབ་པས་ཀུན་གཞིའི་ལས་དང་ཤེས་བྱའི་སྒྲིབ་པ་དག །རྫོགས་པ་ཆེན་པོ་བསམ་གྱིས་མི་ཁྱབ་པའི་ཡེ་ཤེས་བསྒོམ་པ་ལ་དབང༌། ངོ་བོ་ཉིད་སྐུ་ཐོབ་པའི་སྐལ་པ་རྒྱུད་ལ་བཞག་པ་ཡིན་ནོ།  །གཉིས་པ་བཀའ་གཏད་ནི། བཀའ་རྫོགས་ལུང་རྫོགས་བྱ་བའི་ཕྱིར་སྙིང་ཐིག་གི་གླེགས་བམ་སྤྱི་བོར་བཀོད་ལ། ཧོཿ ཆོས་སྐུ་ཀུན་ཏུ་བཟང་པོ། ལོངས་སྐུ་རྒྱལ་བ་རིགས་ལྔ། སྤྲུལ་སྐུ་དགའ་རབ་རྡོ་རྗེ། སློབ་དཔོན་འཇམ་དཔལ་བཤེས་གཉེན། རིག་འཛིན་ཤྲཱི་སིངྷ། པཎ་ཆེན་བི་མ་མི་ཏྲ། ཨོ་རྒྱན་པདྨ་ཐོད་ཕྲེང༌། མཁའ་འགྲོ་ཡེ་ཤེས་མཚོ་རྒྱལ། མངའ་བདག་ཁྲི་སྲོང་ལྡེའུ་བཙན། རྒྱལ་སྲས་དྲི་མེད་འོད་ཟེར། ཀློང་ཆེན་ནམ་མཁའི་རྣལ་འབྱོར་ལ་སོགས་པ། རང་བཞིན་རྫོགས་པ་ཆེན་པོའི་རྩ་བ་དང་བརྒྱུད་པར་བཅས་པའི་དཔལ་མགོན་རིག་འཛིན་བླ་མ། ཡི་དམ་མཁའ་འགྲོ་རྒྱ་མཚོ། ཆོས་སྲུང་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱིས་དེང་འདིར་རྡོ་རྗེའི་སློབ་མ་རྣམས་ལ་དབང་བསྐུར་དུ་གསོལ། བྱིན་གྱིས་བརླབ་ཏུ་གསོལ། རྟོགས་པ་སྤར་དུ་གསོལ། བརྟུལ་ཞུགས་བསྐྱེད་དུ་གསོལ། བྱ་རྩོལ་བློ་འདས་རྫོགས་པ་ཆེན་པོའི་ཀློང་དུ་དགོངས་པའི་བཙན་ས་ཟིན་ཏེ། ཚེ་གཅིག་ལུས་གཅིག་ལ་འཇའ་ལུས་འཕོ་བ་ཆེན་པོའི་སྐུ་མཆོག་བརྙེས་ནས་དཔལ་ཀུན་ཏུ་བཟང་པོའི་གོ་འཕང་ལ་འགོད་པར་མཛད་དུ་གསོལ། ཞེས་ལན་གསུམ་བྱ།  གསུམ་པ་རིག་པ་རྩལ་གྱི་དབང་ནི། བཤད་སྒྲུབ་ཀྱི་བརྒྱུད་པ་འཛིན་པ་དག་ལ་ཐོད་རྒལ་རིག་པའི་རྩལ་དབང་བསྐུར་བ་ཡེ་ཤེས་བླ་མ་ལས་ཤེས་སོ། །ཞེས་གསུངས་པས་སྐབས་དང་འབྲེལ་ན་དེར་བལྟའོ།  །འདིར་སྤྲོ་ཞིང་ནུས་ན་དབང་ཐོབ་པའི་ཕན་ཡོན། མ་ཐོབ་པའི་ཉེས་དམིགས། དམ་ཚིག་གི་རྣམ་བཞག་རྒྱས་པར་བཤད། འོ་དེས་ཞི་ཁྲོ་ངན་སོང་སྦྱོང་བའི་དཀྱིལ་འཁོར་ཆེན་པོར་དབང་བཞི་རྫོགས་པར་ཐོབ་པ་ཡིན་པས། གསང་སྔགས་ཀྱི་དངོས་གྲུབ་ཐམས་ཅད་དབང་ལས་འབྱུང་བས་ཡོན་ཏན་བསམ་གྱིས་མི་ཁྱབ། དབང་མ་ཐོབ་ན་ཆོས་འདིའི་དཔེ་ཙམ་བལྟ་བ་ལ་མི་དབང་ཞིང་དབང་མ་ཐོབ་པའི་ཉེས་དམིགས་ཀྱང་ཤིན་ཏུ་ལྕི། ཁེ་ཉེན་གྱི་ནུས་པ་དེ་ལྟ་བུ་བསྐྱེད་པའི་དབང་སྲོག་དམ་ཚིག་དང་སྡོམ་པ་ཁོ་ན་ལ་རག་ལས་པས། དེའི་བསྲུང་བྱའི་རྣམ་གྲངས་ཀྱང་ཐུན་མོང༌། སྤྱི། ཁྱད་པར་དང༌། སྒྲུབ་པ། ལྷག་པ། རྩ་བ། ཡན་ལག་གི་བསྲུང་བྱ་མཐའ་དག་ཚུལ་བཞིན་སྲུང་སྙམ་པས་དམ་ཚིག་ཁས་བླང་བ་འདིའི་རྗེས་ཟློས་མཛོད། རྩ་བ་སྐུ་གསུང་ཐུགས་མཆོག་དང༌། །ཡན་ལག་དམ་ཚིག་ཉི་ཤུ་ལྔ། །མེད་དང་གཅིག་པུ་ཕྱལ་བ་སོགས། །ཆོ་ག་བཞིན་དུ་སྲུང་བར་བགྱི། །ལན་གསུམ། དབང་བཞི་རྫོགས་པར་ཐོབ་པའི་སྐུ་དྲིན་གཏང་རག་གི་ཡོན་དུ་མཎྜལ་ཕུལ། སླར་ཡང་ལུས་དང་ལོངས་སྤྱོད་ཐམས་ཅད་བླ་མའི་ཕྱོགས་སུ་བསྔོ་བ་ནི་དམ་ཚིག་གི་ཐ་ཚིག་ཡིན་པས་འདིའི་རྗེས་ཟློས་ལན་གསུམ་མཛོད། གཙོ་བོས་ཇི་ལྟར་བཀའ་བསྩལ་པ། །དེ་དག་ཐམས་ཅད་བདག་གིས་བགྱི། །ཁྱོད་ལ་བདག་ཀྱང་ཡོངས་སུ་འབུལ། །སློབ་མར་བཟུང་ནས་སྤྱད་དུ་གསོལ། །དེ་ལྟར་རིམ་པ་དབང་གི་ཆོ་ག་གསན་པའི་དགེ་བ་ཡང་རྗེས་ཐོབ་བསོད་ནམས་ཀྱི་ཚོགས་སྤེལ་བའི་ཕྱིར་བསྔོ་སྨོན་ཟུང་འབྲེལ་གྱི་རྒྱས་འདེབས་འདི་ཆབས་ཅིག་གནང་བར་ཞུ། བསོད་ནམས་འདི་ཡིས་སོགས་བརྗོད་ཅིང་སློབ་མ་རྣམས་གྲོལ། གསུམ་པ་རྗེས་ཀྱི་ལས་ཁྲིགས་ནི། ཚོགས་ལ་རོལ། རྡོ་རྗེའི་གླུ་གར་བྱ། གཏོར་མ་བཏང༌། གཏང་རག་དང་དངོས་གྲུབ་བླང་བ་སོགས་གསང་བ་སྤྱིའི་འགྲོས་ལྟར་བྱའོ།  །མཁྱེན་བརྩེའི་ཡེ་ཤེས་དགོངས་བཅུད་ཆེ། །བཀའ་གཏེར་ཟུང་འཇུག་ཞི་ཁྲོ་ཡི། །སྨིན་ལམ་འོད་ཟེར་སྤྲོས་འདིས་ཀྱང༌། །ངེས་གསང་པད་ཚལ་གཉེན་དུ་ངེས། ཅེས་རྒྱུད་སྡེའི་དགོངས་པ་གཙོར་བཏོན་ཞི་ཁྲོ་ངན་སོང་སྦྱོང་བའི་དབང་བསྐུར་གྱི་ལེའུ་ཚན་དང་པོ་སྟེ་འོད་གསལ་ཐུགས་མཆོག་རྡོ་རྗེས་སྦྱར་བའོ།  ༈  རིགས་ཀུན་ཁྱབ་བདག་ཀུན་བཟང་འོད་མཐའ་ཡས། །སྒྱུ་འཕྲུལ་དྲྭ་བའི་དཀྱིལ་འཁོར་གཅིག་བསྡུས་པ། །རིག་འཛིན་བླ་མའི་ཕྱག་རྒྱར་བཞེངས་པ་དེ། །རབ་དྭངས་ཡིད་ཀྱི་ཆུ་མཚོར་རྟག་པར་མཆོད། །དེ་ལ་འདིར་དབང་གི་སྤྱི་དོན་ལས། འདི་ལྟར་ཞི་ཁྲོ་དང་དཔལ་ཆེན་ཅི་རིགས་པའི་དཀྱིལ་འཁོར་གཅིག་ཏུ་འཇུག་པའི་ཆོ་ག་རྫོགས་པ་དག་ལ། རིག་འཛིན་དང༌། ཐུགས་རྗེ་ཆེན་པོ་ལ་སོགས་པའི་སྒོས་དབང་ནི། སོ་སོའི་ལས་གཞུང་གི་བདག་མདུན་བུམ་གསུམ་སྒྲུབ་ཅིང༌། རྩ་དབང་རྒྱལ་ཐབས་སྤྱི་བླུགས་ལྟར་ནང་ནུས་པ་འཇུག་པའི་དབང་གི་ཆོག་པ་ཡིན་ནོ། །ཞེས་རྒྱུད་དང་སྒྲུབ་སྡེའི་རིང་ལུགས་ལ་གདམས་ཕྲན་གྱི་ས་ཆོད་ཆུང་བས་ཁོག་ཆེ་ཤོས་ཞི་ཁྲོ་དང་བཀའ་བརྒྱད་གང་རུང་གིས་འཛིན་དགོས་པར་དགོངས་ནས་དེ་ལྟར་གསུངས་ཀྱང་ཀུན་མཁྱེན་ཉིད་རིག་འཛིན་བླ་མའི་སྒྲུབ་སྐོར་གྱི་བཀའ་བབ་ཡིན་པས་རྩ་གསུམ་ཐམས་ཅད་བླ་མའི་ཕྱི་ནང་གསང་བའི་སྒྲུབ་ཚུལ་དུ་གཙོ་བོར་གསུངས་ཕྱིར་སྙིང་ཐིག་གི་ཆོས་སྡེ་ཆེན་པོ་འདིའི་འཕྲོ་གཞི་ལྟ་བུ་བླ་མ་རིག་འཛིན་འདུས་པ་ཉིད་ཡིན་པའི་དབང་གིས་ཕྱི་ནང་གི་འཇུག་པ་གཉིས་དང༌། སློབ་མའི་དབང་ལྔ་སོགས་དབང་གི་སྤྱི་དོན་སྙིང་པོ་དོན་གསལ་ལྟར་མན་ངག་གི་དགོངས་པས་ཁ་བཀང་སྟེ་བསྐུར་བས་ལམ་ཀུན་གྱི་ཐོག་མའི་སྨིན་བྱེད་དུ་རུང་བར་མཁྱེན་ནས་རྩ་བའི་ཆོས་བདག་རྡོ་གྲུབ་རིན་པོ་ཆེ་འཇིགས་མེད་ཕྲིན་ལས་འོད་ཟེར་གྱིས་མཛད་པ་ཁམས་ཕྱོགས་སུ་དར་སྲོལ་ཤིན་ཏུ་ཆེ་རུང་དེའི་དཔེ་དངོས་མ་རྙེད་པས་དགོངས་དོན་མ་ཉམས་པར་འཆད་ན་དབང་དང་ཕྱག་བཞེས་ཀྱི་རྒྱུན་མི་འཆད་པར་ལེགས་པར་མཐོང་ནས་དོན་གྱི་དགོངས་པ་ནོར་འཁྲུལ་མེད་པར་འཆད་པ་ལ་སྦྱོར་དངོས་རྗེས་གསུམ་ལས། དང་པོ་སྦྱོར་བ་ཡོ་བྱད་ཀྱི་གཤོམ་ནི། འདི་ལ་སྔོན་འགྲོ་སྟ་གོན་མཛད་སྲོལ་མི་འདུག་པས་དངོས་གཞིའི་དབང་བསྐུར་གྱི་རིམ་པ་སྟེ། གང་དུ་བྱ་བའི་གནས་སུ་གཞུང་མཐུན་རས་བྲིས་ཀྱི་དཀྱིལ་འཁོར་དང༌། མ་འབྱོར་ན་མཎྜལ་ལ་ཚོམ་བུ་གཙོ་འཁོར་དགུ་བཀོད་པས་ཀྱང་རུང་ཞིང༌། དལ་དབུས་མཉྫི་ལ་རིན་པོ་ཆེའི་བུམ་པ་བཅུད་ལྡན་ཁ་རྒྱན་མགུལ་ཆིངས་དང་བཅས་པ། གཡས་སུ་འདི་ཉིད་ཀྱི་གཞུང་པོད་གླེགས་བམ། མ་འཛོམས་ན་སྒྲུབ་ཐབས་སོགས་ཆོས་ཚན་དར་གྱིས་དྲིལ་བ། གཡོན་དུ་གསང་དབང་རྟེན་ཐོད་པ་བདུད་རྩིས་བཀང་བའི་ཁར་མེ་ལོང་སིནྡྷུ་རའི་ཐིག་ལེ་ཅན་གྱི་སྟེང་དུ་ཤེལ་རྡོ། ཤར་དུ་རྡོར་དྲིལ་བསྣོལ་མ། ལྷོར་དབུ་རྒྱན། ནུབ་ཏུ་རྡོ་རྗེ། བྱང་དུ་དྲིལ་བུ། དཀྱིལ་འཁོར་པའི་ལྷ་ཙཀ་ཡོངས་རྫོགས། རིག་ཙཀ །མཐའ་རྟེན་ཚེ་དབང་བྱེད་ན་ཚེ་བུམ། ཚེ་རིལ། ཚེ་ཆང༌། མདའ་དར་བཅས་གང་བདེར་བཤམས། །མིག་དར། མེ་ཏོག །རིག་འདུས་རྩ་གཏོར་དར་གདུགས་སྐུ་ཙཀ་གིས་བརྒྱན་པ། སྨན་རཀ །གཏོར་འབུལ། ཚོགས་མཆོད་སོགས་འོག་ཏུ་དགོས་པ་རྣམས་ཚང་བར་འདུ་བྱ།  གཉིས་པ་ལ་ཐོག་མར་དབང་དོན་སྒྲུབ་མཆོད་ནི། སྤྱི་དང་བྱེ་བྲག་གི་བརྒྱུད་འདེབས་ནས་བརྩམས་ལས་བྱང་མཐར་ཆགས་སུ་བཏང་ལ་བདག་མདུན་དབྱེར་མེད་དུ་བསྒོམ། རྟོགས་པ་དམན་ན་ཛབ་ཁང་དབྱེ། བཟླས་པའི་སྐབས་གབ་བྱང་ལྟར་ཏིང་ངེ་འཛིན་གསལ་བཏབ་ལ་བསྙེན་སྒྲུབ་ཀྱི་བཟླས་པ་བྱ། བུམ་པ་རང་བྱུང་གི་གཞལ་ཡས་ཁང་དུ་རིག་འཛིན་འདུས་པའི་དཀྱིལ་འཁོར་དྭངས་པའི་མཚོ་ལ་གཟའ་སྐར་ཤར་བ་བཞིན་སྐད་ཅིག་གིས་གསལ་བར་གྱུར། རང་སྲོག་སྔགས་ཀྱི་འོད་ཟེར་གཟུངས་ཐག་ལ། །འཁྲིལ་ཏེ་བུམ་པའི་ལྷ་ཚོགས་ཐུགས་ཀར་ཞུགས། །དེ་དག་སྐུ་ལས་བྱང་སེམས་བདུད་རྩིའི་རྒྱུན། །བབས་པས་བུམ་ཆུར་དབྱེར་མེད་རོ་གཅིག་གྱུར། །ཞེས་གསལ་བཏབ་ནས་གཟུངས་ཐག་བླང༌། བསྙེན་སྒྲུབ་ཀྱི་བཟླས་པ་བརྒྱ་རྩ་ལས་མི་ཉུང་བར་བྱ། ལས་བུམ་ནང་དུ་པད་ཉིའི་སྟེང༌། །པདྨ་དབང་ཆེན་སྐུ་མདོག་དམར། །པདྨའི་དབྱུག་ཐོ་ཞགས་པ་འཛིན། །དོར་སྟབས་ཡེ་ཤེས་མེ་ཀློང་འགྱིང༌། །སྐུ་ལས་རྡོ་རྗེ་བདུད་རྩིའི་རྒྱུན། བབས་པས་བུམ་པ་གང་བར་གྱུར། །ཨོཾ་བཛྲ་ཀྲོ་དྷ་ཧྱ་གྲཱྀ་ཝ་ཧཱུྃ་ཕཊ། ཞེས་བརྒྱ་རྩ་ཙམ་བཟླ། མཐར་མཆོད་བསྟོད་བྱ། ཡིག་བརྒྱ་བརྗོད། ཨོཾ་ཨཱཿཧཱུྃ་གིས་དུང་ཆུ་ཕུལ། རྣམ་རྒྱལ་བུམ་པའི་ལྷ་རྣམས་བདེ་བ་ཆེན་པོའི་ངོ་བོར་ཞུ་ནས་བུམ་ཆུ་དང་རོ་གཅིག་ཏུ་གྱུར་པར་མོས། བཀའ་སྲུང་གཏོར་འབུལ་བྱ། རིག་པའི་མེ་ཏོག་དོར་ལ་གནང་བ་ནོད་དེ། དབང་དངོས་ལ། དང་པོ་ཕྱི་འཇུག་གི་ཐོག་མ་སློབ་མ་གཞུག་པ་ནི། ཁྲུས་དང་བགེགས་གཏོར་བསྔོ་བ་སྲུང་འཁོར་རྣམས་ལས་བྱང་ལྟར་བྱ། སེམས་བསྐྱེད་གསལ་བཏབ་ལ། ལོ་རྒྱུས་ཀྱི་ཁྱད་པར། དེ་ཡང་མཚོན་བྱ་དོན་གྱི་མན་ངག་རང་བྱུང་གི་གསང་བ་ཆེན་པོ་ལ་མཚོན་བྱེད་བརྡ་དང་ཚིག་ཏུ་ཤར་བའི་རྒྱུད་ལུང་མན་ངག་ཐམས་ཅད་རྒྱལ་བ་རྣམས་ཀྱིས་ཐུགས་ནས་ཐུགས་ཀྱི་གཏེར་དུ་སྦས་པ་དང༌། མཁའ་འགྲོ་མས་དགོངས་པའི་རྩལ་གྱིས་ནམ་མཁའི་གཏེར་དུ་སྦས་པ་དང༌། རིག་འཛིན་རྣམས་ཀྱིས་འབྱུང་བས་མི་ཤིགས་པའི་སྒྲོམ་བུ་ལ་བརྟེན་ནས་སའི་གཏེར་དུ་སྦས་ཤིང༌། གདུལ་བྱ་འདུལ་བའི་དུས་སུ་སོན་པ་ན་ལས་ཅན་རྣམས་ཀྱིས་རྡོ་རྗེའི་རྒྱ་བཀྲོལ་ནས་མངོན་དུ་སྣང་བར་མཛད་པ་ལས། འདི་ནི་བླ་མ་དགོངས་པ་འདུས་པའི་ལུང་བསྟན་བཀའ་རྒྱ་མ་ལས། ལྷོ་ཕྱོགས་འོད་ཟེར་མིང་ཅན་སྤྲུལ་པའི་སྐུ༔ ཟབ་དོན་སྙིང་ཐིག་ཆོས་ཀྱིས་འགྲོ་བ་འདྲེན༔ འབྲེལ་ཚད་རིག་འཛིན་ཞིང་དུ་འཕེན་པར་འབྱུང༔ ཞེས་དང༌། ཨོ་རྒྱན་ཆོས་རྗེ་གླིང་པའི་ལུང་བྱང་ལས། དབུས་གཡོར་གཞུང་དུ་བྱང་སེམས་པདྨའི་མིང༔ བཀའ་རྙིང་བསྟན་སྐྱོང་ཐབས་མཁས་འགྲོ་བ་འདུལ༔ ཞེས་སྙིང་ཐིག་གི་རྫོགས་རིམ་དང༌། རིག་འཛིན་གྱི་བསྐྱེད་རིམ་ལ་བརྟེན་ནས་རིམ་པ་བཞིའི་རྣལ་འབྱོར་ལ་སྦྱོར་བའི་ལམ་སྟོན་དུ་གཏེར་ཁ་གསར་རྙིང་མང་པོ་ནས་རྡོ་རྗེའི་ལུང་གིས་བསྔགས་ཤིང༌། སྐུ་ཚེ་རིལ་པོར་དབེན་པར་སྒྲུབ་པའི་རྒྱལ་མཚན་བཙུགས་པས་འཕགས་ལམ་ཆོས་ཉིད་ཀྱི་བདེན་པ་མངོན་སུམ་གཟིགས་པའི་གྲུབ་པ་ཆེན་པོའི་སར་བཞུགས་པ་ལ་རྩོད་པ་མེད་པའི་ཚུལ་རྟོགས་བརྗོད་ཆུ་ཟླའི་གར་མཁན་ལས། མནལ་ལམ་དུ་ལྷོ་མོན་ཁའི་བྲག་གི་གུ་རུའི་ཞབས་རྗེས་ལས་དབང་བཞི་བླངས་པའི་རྐྱེན་གྱིས་ནང་དབྱིངས་ཁྱད་ཆོས་དྲུག་ལྡན་གྱི་གྲོལ་ས་མཐོང་བ་དང༌། རྔ་ཡབ་གླིང་དུ་གུ་རུ་བདེ་བ་ཆེན་པོ་དང་ཐུགས་ཡིད་འདྲེས་ནས་འོད་གསལ་གཞོན་ནུ་བུམ་སྐུའི་ཞིང་ཁམས་གཟིགས་པ་སོགས་ལ་བརྟེན་ནས་རྩ་ཁམས་ཀྱི་ཡི་གེ་ཡེ་ཤེས་ཀྱི་རླུང་གིས་བསྐུལ་བས་དམ་པའི་ཆོས་སྒོ་འཛད་མེད་ཀྱི་རོལ་མོ་འཁྲོལ་བར་གསུངས་པས། འོད་གསལ་བསམ་གྱིས་མི་ཁྱབ་པའི་དགོངས་པ་ལ་དབང་ཐོབ་པས་དོན་བརྒྱུད་རྫོགས་པར་བརྙེས་པ་དང་ཆབས་ཅིག་དེའི་རང་རྩལ་མཁའ་འགྲོའི་བརྡ་ཡིག་གསང་མཛོད་རང་ཤར་དུ་རྙེད་པས་དཔེ་དང་སྙན་བརྒྱུད་ཞར་བྱུང་དུ་རྫོགས་པས་ཐུན་མོང་མ་ཡིན་པའི་དགོངས་ཀློང་གི་གཏེར་རྒྱ་ནམ་མཁའ་མཛོད་ཀྱི་བརྡ་གྲོལ་བ་སྟེ་རང་གཏེར་གནད་བྱང་ཐུགས་ཀྱི་སྒྲོམ་བུ་ལས། དེ་དུས་ད་ལྟའི་རྗེ་འབངས་གྲོགས༔ བི་མ་རྒྱལ་སྲས་ལྷ་རྗེ་རྣམས༔ སྨོན་ལམ་ཐུགས་རྗེས་སྤྲུལ་པའི་སྲས༔ རང་བྱུང་རྡོ་རྗེ་པདྨ་དབང༔ གསང་མཚན་གར་དབང་འཇིགས་མེད་གླིང༔ རྟོགས་གྲོལ་དུས་མཉམ་ཐུགས་གཏེར་བདག༔ འཕགས་པས་རྗེས་སུ་བཟུང་བའི་རྟགས༔ ལག་གཡས་མཐིལ་ན་པདྨའི་སྤྱན༔ དབང་ཆེན་གསུང་གི་རིག་འཛིན་ཆེར༔ མཐེ་བོང་ཐུགས་སྲོག་ཧྱ་ཡིས་མཚན༔ རྟོགས་པ་ཀློང་དུ་གྱུར་པའི་རྟགས༔ ཚེམས་ལ་སྐྱེ་མེད་ཡི་གེ་ཨཿ སྙིང་རྗེ་ཆེ་ཞིང་རིག་པ་ཧུར༔ ཤེས་རབ་ཆེ་ཞིང་འཛིན་ཆགས་ཆུང༔ ཐུགས་སྒམ་ཚིག་བཙུན་བློ་གྲོས་ཟབ༔ ངེས་མེད་སྤྱོད་པ་ཅིར་ཡང་སྟོན༔ འཇིགས་པ་མེད་པའི་བརྟུལ་ཞུགས་ཅན༔ ཞུམ་མེད་སྣང་བ་ཟིལ་གྱིས་གནོན༔ དེ་ལ་ཐུགས་རྒྱུད་དངོས་གཏེར་རམ༔ ཡང་ན་དགོངས་གཏེར་ཚུལ་དུ་འབེབས༔ དངོས་ཉམས་རྨི་ལམ་མ་ངེས་པར༔ ང་དང་ཞལ་མཇལ་དོན་དབང་བསྐུར༔ ཐུགས་རྒྱུད་དགོངས་པའི་བྱིན་རླབས་འཕོ༔ པད་འབྱུང་ང་དང་རིག་འཛིན་ཉིད༔ དགོངས་པ་གཅིག་དང་དབྱངས་གཅིག་འགྱུར༔ ཐེག་ཀུན་དགོངས་པའི་ཀློང་ནས་ཤར༔ རིག་འཛིན་དཔའ་བོ་མཁའ་འགྲོ་ཡིས༔ བསྐུལ་མ་ཐེང་གསུམ་དག་ཏུ་འོང༔ དེ་ཚེ་མི་བརྗེད་དྲན་པའི་གཟུངས༔ གཟེར་དྲུག་གནད་ཀྱི་ལྡེའུ་མིག་གིས༔ ཀློང་གསལ་དགོངས་པའི་གཏེར་ཁ་འབྱེད༔ ཅེས་རྡོ་རྗེའི་གསུང་གིས་ཇི་ལྟར་བསྔགས་པ་བཞིན་འོད་གསལ་དག་པའི་སྣང་ཆར་བལ་ཡུལ་གྱི་མཆོད་རྟེན་བྱ་རུང་ཁ་ཤོར་གྱི་གམ་དུ། ཆོས་སྐུ་ཡེ་ཤེས་ཀྱི་མཁའ་འགྲོ་མས་ཀློང་བྱང་ཡེ་ཤེས་ཀྱི་བརྡ་རིས་མངོན་སུམ་དུ་སྤྲད་པ་ལས་འོད་གསལ་རྡོ་རྗེ་སྙིང་པོ་ཀློང་ཆེན་སྙིང་གི་ཐིག་ལེ། ཟབ་དོན་མན་ངག་གི་བཅུད་མཛོད་འཛད་མེད་ནམ་མཁའ་མཛོད་ཀྱི་ཐུགས་གཏེར་ཆེན་པོ་གཏན་ལ་ཕབ། ཀུན་མཁྱེན་ཆོས་ཀྱི་རྒྱལ་པོ་རྒྱལ་བ་ཀློང་ཆེན་རབ་འབྱམས་ཀྱི་ཡེ་ཤེས་ཀྱི་སྐུས་ལན་གསུམ་རྗེས་སུ་བཟུང་སྟེ་གསང་བ་གསུམ་གྱི་བྱིན་རླབས་རྫོགས་པར་ཐོབ་པས་རྫོགས་པ་ཆེན་པོ་རང་སྣང་རིས་མེད་ཀྱི་དགོངས་ཀློང་དུ་མངོན་པར་བྱང་ཆུབ་པའི་རིག་འཛིན་ཆེན་པོ་འཇིགས་མེད་མཁྱེན་བརྩེའི་འོད་ཟེར་རམ། པདྨ་དབང་ཆེན་ཡེ་ཤེས་རོལ་པའི་རྡོ་རྗེ་ཞེས་འབྲེལ་ཚད་དོན་ལྡན་གྱི་བདག་ཉིད་ཆེན་པོ་གང་ལ་རིག་འཛིན་གྱིས་བསྐུལ་མ་ཀུན་མཁྱེན་ཆོས་རྗེའི་ཞལ་གཟིགས་བར་པ་ལ་གསུང་གིས་བྱིན་གྱིས་བརླབས་ཏེ་བརྡ་གྲོལ་མཛད་པ་དང༌། དཔའ་བོས་བསྐུལ་མ་དང་མཁའ་འགྲོས་བསྐུལ་མ་མཆིམས་ཕུ་ནགས་ཀྱི་དུར་ཁྲོད་ནས་སྨན་བཙུན་མཆེད་ལྔས་རང་གཟུགས་མངོན་སུམ་དུ་བསྟན་ཏེ་ཆོས་སྒོ་འབྱེད་བར་བསྐུལ་བས་སྤྲེལ་ལོ་སྤྲེལ་ཟླའི་ཚེས་བཅུ་ལ་སློབ་དཔོན་ཆེན་པོས་དགྱེས་ཞལ་བསྟན་ཏེ་བར་ཆད་བསལ་བ་དང༌། སྔགས་ཀྱི་སྲུང་མས་སྙོམས་འཇུག་གི་བདེ་ཆེན་བསྟབས་ནས་སྐུ་ཚེ་དང་ཕྲིན་ལས་ཀྱི་རྟེན་འབྲེལ་གསོས་བཏབ་པ་ལ་བརྟེན་ནས། ཆོས་བདག་ལས་ཅན་གྱི་སྐྱེས་བུ་ནི། ཁྱད་པར་ད་ལྟའི་སྨོན་ལམ་མཐུས༔ ནམ་སྙིང་ཉང་བན་མཆོག་དབྱངས་དང༔ ལྷ་སྲས་སྤྲུལ་པས་ཆོས་སྒོ་འབྱེད༔ ཅེས་གསུངས་པས་ནམ་སྙིང་པྲ་ཏིའི་སྔགས་འཆང༌། ཉང་བན་འཇིགས་མེད་ཀུན་གྲོལ། མཆོག་དབྱངས་ཐེག་ཆེན་གླིང་པ། ལྷ་སྲས་མུ་རུབ་བཙད་པོ་རྡོ་གྲུབ་འཇིགས་མེད་ཕྲིན་ལས་འོད་ཟེར་རྣམས་ལ་རིམ་གྱིས་ཆོས་གཏེར་ཆེན་པོ་འདི་ཉིད་འཆད་སྤེལ་གྱིས་སྒོ་ཕྱེ་ཏེ་རྒྱ་ཆེ་ལ་བྱིན་རླབས་ཆགས་པའི་ཕྲིན་ལས་ཀྱི་སྣང་བས་བོད་ཁམས་མཐའ་དབུས་རྒྱ་དཀར་ནག་སོགས་འཛམ་གླིང་གི་ཐ་གྲུར་བརྡལ་པས་སྔོན་ཆད་མ་གྲོལ་བའི་ལུས་ཅན་གྲངས་ལས་འདས་པ་གདོད་མའི་གྲོལ་གཞིར་དབུགས་དབྱུང་བའི་ཟབ་ཆོས་འདི་ཉིད་ལ་བྱིན་རླབས་ཀྱི་རྩ་བ་དཔལ་འདུས་རྩ་གཞུང་ལས། ཕྱི་ལྟར་བྱང་སེམས་ནང་རིག་འཛིན༔ གསང་བ་ལྟར་དུ་སྒྲུབ་སྡེ་བརྒྱད༔ ཅེས་གསུངས་པའི་ནང་སྒྲུབ་རིག་འཛིན་འདུས་པ་བླ་མ་ཞི་བའི་ཐུགས་ཏིག་སྟེ། དེ་ནི་རྩ་བ་གསུམ་ལས་འཁོར་ལོའི་དབང་ཕྱུག་རིག་འཛིན་བླ་མའི་གསང་གསུམ་རྡོ་རྗེའི་དབྱིངས་སུ་སྣང་གྲགས་རིག་པའི་ཆོས་ཉིད་དག་པ་ཆེན་པོར་ལམ་དུ་ཁྱེར་བའི་རིག་འཛིན་ཡབ་ཀའི་སྒྲུབ་སྡེ་འདི་ལའང་བསྐྱེད་རྫོགས་ལས་སྦྱོར་དང་བཅས་པ་ཟབ་རྒྱས་སུ་བཞུགས་པ་ལ། ཕྱི་སྒྲུབ་བླ་མའི་རྣལ་འབྱོར། ནང་སྒྲུབ་རིག་འཛིན་ཞི་དྲག་གསུམ། །གསང་སྒྲུབ་ཐུགས་རྗེ་ཆེན་པོ། ཡང་གསང་ཀུན་མཁྱེན་བླ་མའི་སྒྲུབ་པ། ཞི་ཁྲོ་ངན་སོང་སྦྱོང་བ་བཅས་བཞུགས་པ་ལས། སྐབས་སུ་བབ་པ་བྱིན་རླབས་ཀྱི་རྩ་བ་བླ་མ་ཞི་བར་སྒྲུབ་པ་རིག་འཛིན་འདུས་པ་སྟེ། དེ་ནི་རྩ་རྒྱུད་ཐོད་པའི་དུམ་བུ་ལས། ཡེ་ཤེས་ལྟར་དུ་ཀློང་དགུའི་རྩལ༔ ཡི་དམ་ལྟར་དུ་སྒྲུབ་སྡེ་བརྒྱད༔ བྱང་སེམས་ལྟར་དུ་ཉེ་བའི་སྲས༔ རིག་འཛིན་ལྟར་དུ་འདི་ལྟར་ཏེ༔ ཨོ་རྒྱན་རང་བྱུང་མཁའ་འགྲོའི་གླིང༔ རོ་གླིང་བསིལ་བའི་ཚལ་ཆེན་དུ༔ གདན་འཛོམས་གདུལ་བྱ་དུས་བབ་ཚེ༔ འོག་མིན་གནས་སུ་ཧེ་རུ་ཀས༔ ལེགས་གསུངས་བདེ་གཤེགས་ཡོངས་རྫོགས་རྒྱུད༔ མཆོད་རྟེན་བདེ་བྱེད་བརྩེགས་པ་རུ༔ བསྩལ་པ་ལས་ཀྱི་དབང་མོ་ཆེས༔ ཕྱུང་སྟེ་རིག་འཛིན་བརྒྱད་ལ་གཏད༔ ཅེས་དང༌། ཀུན་ཀྱང་རང་རྒྱུད་མ་ཡིན་ཏེ༔ ལྷ་དང་བཀའ་བབ་ལྟར་བསྟན་ཡང༔ བསྒྲུབ་བྱ་སྒྲུབ་བྱེད་རོ་གཅིག་སྟེ༔ གདུལ་བྱའི་ངོ་རུ་སྣང་བ་ཙམ༔ དེ་བཞིན་ཡོངས་རྫོགས་རིན་ཆེན་སྒྲོམ༔ དྷ་ན་ཀོ་ཤའི་མཚོ་གླིང་དུ༔ རྫུས་ཏེ་བྱོན་པའི་རིག་འཛིན་ལ༔ ལས་ཀྱི་དབང་མོ་ཆེ་ཡིས་གཏད༔ འདི་ནི་རིག་འཛིན་རྡོ་རྗེ་ཆོས༔ སྟོན་པ་རང་ཉིད་སྡུད་བྱེད་ཀྱི༔ ཚུལ་བཟུང་ཟབ་མོའི་གསང་བ་འཛིན༔ གཙོ་དང་འཁོར་གྱི་ཚོམ་བུའི་ཚུལ༔ ལྟར་དུ་བསྟན་པའི་མན་ངག་བཅུད༔ གསང་སྔགས་ཀུན་གྱི་འབྲས་བུ་སྟེ༔ མངའ་བདག་རྒྱལ་པོའི་ཆོས་སྐལ་ཡིན༔ ཞེས་གསུངས་པ་ལྟར་སྒྲུབ་སྡེ་ཆེན་པོ་བརྒྱད་ཀྱི་བྱེ་བྲག་ནི། སྤྱི་དཔལ་རྣམ་དགུ་རྡོ་རྗེ་སློབ་དཔོན་གྱི་གཟུགས་ཅན་དུ་བྱོན་པ་ལས་སློབ་དཔོན་ཆེན་པོ་སངས་རྒྱས་གཉིས་པ་འདི་ནི་ཆོས་སྐུ་འོད་གསལ་རྡོ་རྗེ་སྙིང་པོའི་ཞིང་དུ་ཐོག་མའི་མགོན་པོ་འོད་མི་འགྱུར་བ། ལོངས་སྐུ་ཚངས་པ་རྔ་སྒྲ་ཡེ་ཤེས་རིགས་ལྔ་གངས་ཆེན་མཚོ་ངེས་པ་ལྔ་ལྡན་གྱི་ཁྱབ་བདག་པདྨ་ཀུན་ཏུ་འཆང༌། འགྲོ་འདུལ་སྤྲུལ་པའི་ཆོ་འཕྲུལ་ཕྱོགས་བཅུའི་ཞིང་ཀུན་ན་ཚད་མེད་པའི་ཚུལ། མི་མཇེད་ཀྱི་ཞིང་གཅིག་ཁོ་ན་ལའང་བླ་མ་སྐུ་གསུམ། ཐོད་ཕྲེང་སྡེ་ལྔ། སྤྲུལ་སྐུ་མཚན་བརྒྱད། འཕྲུལ་མཚན་བཞི་བཅུ། མདོ་སྔགས་ཀྱི་སྟོན་པ་བརྒྱ་རྩ་སོགས་སྤྱི་དང་བྱེ་བྲག་གཙོ་དང་འཁོར་སྣ་ཚོགས་སུ་ཤར་བའི་ཆོ་འཕྲུལ་བཀོད་པ་བསམ་ལས་འདས་པའི་གཙོ་བོ་གདུལ་དཀའི་འགྲོ་བ་སྤྱི་དང་གངས་ཅན་གྱི་བླ་མའི་སྐལ་པ་གུ་རུ་རིན་པོ་ཆེ། རིགས་བདག་ཐེག་མཆོག་རྫོགས་པ་ཆེན་པོའི་སྟོན་པ་རྣམ་གཉིས་དང༌། རྡོ་རྗེའི་རིག་འཛིན་དགུ་སོགས་ཟུང་འཇུག་གི་ལམ་ནས་རྡོ་རྗེ་འཆང་གི་གྲལ་བརྙེས་སོ་ཅོག་གི་འཕགས་བོད་རིག་འཛིན་རྩལ་འཆང་ཐམས་ཅད་ཆིག་དྲིལ་གྱི་ཐུགས་སྒྲུབ་ཟབ་མོའི་མཐར་ཐུག་ཆོས་འདིའི་སྲོག་བཅུད་རྩ་སྒྲུབ་རིག་འཛིན་འདུས་པ་ཞེས་བསམ་ཡས་བར་ཁང་གཡུ་ཞལ་ཅན་དུ་མངའ་བདག་ཆོས་ཀྱི་རྒྱལ་པོ་ཁྲི་སྲོང་ལྡེའུ་བཙན་གྱིས་གཙོས་རྗེ་འབངས་གྲོགས་གསུམ་གྱི་ཆོས་སྐལ་དུ་གདམས་པའི་གནད་ཀྱི་ཞུན་ཐིག །སླར་ཡང་བོད་ཡུལ་ཕྱི་མའི་གདུལ་བྱའི་བགོ་སྐལ་དུ་སྣང་བར་མཛད་པ་སྟེ་འདི་ལའང་རྩ་དབང་རྒྱལ་ཐབས་སྤྱི་བླུགས་དང༌། དེ་ཉིད་མན་ངག་གིས་ཁ་བསྐང་སྟེ་ཆོས་ཀྱི་བདག་པོ་འཇིགས་མེད་ཕྲིན་ལས་འོད་ཟེར་གྱི་ཕྱག་བཞེས་ལྟར་རྒྱས་པར་སྤྲོས་པ་ཕྱི་ནང་གི་འཇུག་པ་དང་ཕན་ནུས་ཟབ་མོའི་དབང་དང་བཅས་པ་གཉིས་སུ་ཡོད་པ་ལས་ཕྱི་མ་ཉིད་སྒྲུབ་པ་ལ་མཎྜལ་ཕུལ། སྔོན་ཆད་དཀྱིལ་འཁོར་འདིར་མ་ཞུགས་པས་དོན་གྱི་ཡེ་ཤེས་མ་མཐོང་བའི་བརྡར་གདོང་གཡོགས་འཆིང་མཛོད། ཨོཾ་ཙཀྵ⁽11e2⁾་བྷནྡྷཝ་ར་མ་ཎ་ཡ་ཧཱུྃ། མིག་དར་འཆིང༌། དཀྱིལ་འཁོར་གྱི་ལྷ་དང་མཇལ་བའི་ཕྱག་རྟེན་དུ་མེ་ཏོག་གི་ཆུན་པོ་ཁ་དོག་ལྔ་པ་ཕྱག་ཏུ་ཐོགས་མཛོད། ཨ་ཁཾ་བི་ར་ཧཱུྃ་གིས་མེ་ཏོག་གཏད། བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་པ་ལ་མི་ཕྱེད་གུས་པའི་ཡིད་ཀྱིས་གསོལ་བ་འདེབས་པ་འདིའི་རྗེས་ཟློས་མཛོད། ཧོཿ བདག་ནི་སྐལ་ལྡན་རིགས་ཀྱི་བུ༔ ཐུགས་རྗེ་ཆེན་པོས་རྗེས་བཟུང་ལ༔ དམ་ཚིག་ཆེན་པོའི་དཀྱིལ་འཁོར་དུ༔ འཇུག་ཅིང་སྨིན་པར་མཛད་དུ་གསོལ༔ ལན་གསུམ། དམ་ཚིག་སྲུང་བར་བཀའ་བསྒོ་ཞིང་སྣོད་ལྡན་དཀྱིལ་འཁོར་དུ་འཇུག་པར་གནང་བ་སྦྱིན་པ་ནི་འདི་ལ་གསན་པས་ཁྱབ་པར་གདའ། ཧོཿ གསང་བ་མཆོག་གི་དཀྱིལ་འཁོར་དུ༔ འཇུག་པར་དཀའ་ལ་ཁེ་ཉེན་ཆེ༔ དམ་ཚིག་ཉམས་ན་བརླག་འགྱུར་བས༔ དམ་སྲུང་དབང་བསྐུར་སྦྱིན་པར་བྱ༔ བླ་མ་རིག་འཛིན་འདུས་པའི་དཀྱིལ་འཁོར་རྩ་གསུམ་དམ་ཅན་སྲུང་མའི་ཚོགས་དང་བཅས་པ་མངོན་སུམ་བཞིན་དུ་བཞུགས་པའི་སྤྱན་སྔར་བདག་གཞན་ནམ་མཁའ་དང་མཉམ་པའི་འགྲོ་བ་ཐམས་ཅད་བྱང་ཆུབ་མ་ཐོབ་ཀྱི་བར་དུ་སྐྱབས་སུ་འགྲོ་སྙམ་པའི་བློས་འདིའི་རྗེས་ཟློས། ན་མོ༔ བདག་དང་མཐའ་ཡས་སོགས་ལན་གསུམ། ཕ་མར་གྱུར་པའི་སེམས་ཅན་ནམ་མཁའི་མཐའ་དང་མཉམ་པའི་འགྲོ་བ་མ་ལུས་སངས་རྒྱས་ཀྱི་ས་ལ་འགོད་པར་འདོད་པའི་སྨོན་སེམས་དང༌། དེའི་ཆེད་དུ་བླ་མ་རིག་འཛིན་འདུས་པའི་དཀྱིལ་འཁོར་དུ་ཞུགས་ནས་རྡོ་རྗེ་རྩེ་མོའི་མྱུར་ལམ་བགྲོད་པར་བགྱིའོ་སྙམ་པའི་འཇུག་པ་སེམས་བསྐྱེད་འདིའི་རྗེས་ཟློས། ཧོ༔ རིག་འཛིན་དཀྱིལ་འཁོར་སོགས་ལན་གསུམ། དེ་ནས་ཐུན་མོང་མ་ཡིན་པའི་ཡན་ལག་བདུན་པས་བསགས་སྦྱང་སྤེལ་གསུམ་བགྱི་བ་ལ། སྐྱེ་བ་མེད་པའི་ངང་ལས་སྐྱེ་བའི་ཆོ་འཕྲུལ་ཆུ་ལས་ཆུ་བུར་རྡོལ་བ་བཞིན་དུ་ཤེས་རབ་རང་བྱུང་གི་སྒྲོན་མ་འོད་གསལ་བསམ་བརྗོད་ལས་འདས་པའི་ཡེ་ཤེས་དབྱིངས་གདོད་ནས་རྣམ་དག་རང་བྱུང་སྐུ་གསུམ་ལྷའི་དཀྱིལ་འཁོར་དུ་བཞུགས་པ་ལས། རྒྱང་ཞགས་ཆུ་ཡི་སྒྲོན་མས་མཚམས་སྦྱར་ཏེ་རྟེན་ཐིག་ལེ་སྟོང་པའི་སྒྲོན་མས་མཚོན་པའི་དག་པ་དབྱིངས་ཀྱི་སྒྲོན་མའི་ཀློང་དུ་བརྟེན་པ་རིག་གདངས་སྤྲུལ་པའི་རྡོ་རྗེ་ལུ་གུ་རྒྱུད་དབང་པོས་མངོན་སུམ་མཐོང་བས་ལྷ་དང་ལྟ་བ་མཇལ་བའི་ཕྱག་འཚལ་ཞིང༌། དེ་ལས་འཇའ་ཚོན་ཟེར་ཐིག་ཉམས་སྣང་གོང་དུ་འཕེལ་པའི་མཆོད་སྤྲིན་རྒྱ་མཚོ་འབུལ་བ་དང༌། སྣང་བ་ཐམས་ཅད་སྐུ་དང་ཡེ་ཤེས་སུ་རང་ཤར་བའི་རིག་པ་ཚད་ཕེབས་ཆེན་པོའི་ངང་དུ་འཁོར་གསུམ་གཟུང་འཛིན་གྱི་སྡིག་ལྟུང་བཤགས་ཤིང༌། ཆོས་ཅན་གྱི་སྣང་བ་ཆོས་ཉིད་ཀྱི་ཀློང་དུ་ཟད་པའི་དག་པ་གཉིས་ལྡན་གྱི་འབྲས་བུ་ཟག་མེད་ཡེ་ཤེས་ཀྱི་ཚོགས་ཆེན་ཡོངས་སུ་རྫོགས་པ་ལ་རྗེས་སུ་ཡི་རང་བ་དང༌། ཕྱིར་གསལ་འཕོ་ཆེན་ཡེ་ཤེས་ཀྱི་སྐུའི་གསུང་རྡོ་རྗེ་རྒྱུན་གྱི་རྟག་པའི་ཀློང་དུ་རྫོགས་པ་ཆེན་པོའི་ཆོས་འཁོར་རྒྱུན་ཆད་མེད་པར་བསྐོར་ཞིང་འཇའ་ལུས་རྡོ་རྗེའི་སྣང་བརྙན་ཆེན་པོ་ཇི་སྲིད་དུ་བཞུགས་པར་གསོལ་བ་འདེབས་པ་དང༌། དེ་ལྟ་བུའི་ཟག་མེད་ཡེ་ཤེས་ཀྱི་དགེ་ཚོགས་སྒྲིབ་གཉིས་རྩད་ནས་དག་པ་གཞོན་ནུ་བུམ་པ་སྐུའི་ཀློང་དུ། ཆོས་ཀྱི་དབྱིངས་ལ་མི་བསྔོ་བར་ཤེས་པའི་ཚུལ་གྱིས་ཡོངས་སུ་བསྔོ་བ་སྟེ་ཁྱད་པར་ཅན་གྱི་ལྟ་སྒོམ་གྱི་གནད་དྲན་པས་འདིའི་རྗེས་ཟློས། ཧོ༔ ཆུ་ལས་ཆུ་བུར་སོགས་ལན་གསུམ། དེ་ཡང་དབང་ཐོབ་པ་དཀྱིལ་འཁོར་གྱི་བྱ་བས་ཐོབ་ཀྱང་དབང་སྲོག་རྒྱུད་ལ་འཛིན་པ་དམ་ཚིག་ལ་རག་ལས་པས་ཚོགས་ཞིང་དཀྱིལ་འཁོར་གྱི་ལྷ་དབྱེར་མེད་པ་དཔང་པོའི་ཚུལ་དུ་བཞུགས་པའི་སྤྱན་སྔར་མཁའ་ཁྱབ་ཀྱི་ཡིད་ཅན་སྲིད་ཞིའི་མཐའ་ལ་མི་གནས་པའི་ཟུང་འཇུག་ཆེན་པོའི་གོ་འཕང་ལ་འགོད་པའི་ལྷག་པའི་ཀུན་སློང་བྱང་ཆུབ་སེམས་དང་མ་བྲལ་བས་དམ་ཚིག་དང་སྡོམ་པའི་བསླབ་པ་རྒྱ་མཚོ་མཐའ་ཡས་བཟུང་ནས་རྒྱལ་བ་སྲས་དང་བཅས་པའི་སྤྱོད་ཡུལ་ལ་བསླབ་པར་དམ་བཅའ་བ་འདིའི་རྗེས་ཟློས། བླ་མ་རིག་འཛིན་སྐྱབས་ཀྱི་མཆོག་ཏུ་འཛིན། །འགྲོ་བའི་དོན་དུ་སྨོན་འཇུག་སེམས་བསྐྱེད་ཅིང༌། །སྐུ་གསུང་ཐུགས་དང་མཉམ་སྦྱོར་གསང་སྔགས་ཀྱི། །དམ་ཚིག་སྡོམ་པ་རྟག་ཏུ་སྲུང་བར་བགྱི། །ལན་གསུམ། དེ་ནས་ལྷ་དང་སྐལ་པ་མཉམ་པའི་ཕྱིར་དཀྱིལ་འཁོར་དུ་འཇུག་པའི་ཐོག་མར་སྒོ་དབྱེ་བར་གསོལ་བ་འདེབས་པ་འདིའི་རྗེས་ཟློས་མཛོད། ཀྱཻ། རིགས་ལྔ་བདེ་བར་གཤེགས་པ་དང༌། །བླ་མ་ཡི་དམ་མཁའ་འགྲོ་དགོངས། །སྒོ་བ་ཆེན་པོ་ཁྱེད་རྣམས་ཀྱིས། །སྒོ་ཕྱེ་ཐར་པའི་གྲོང་བསྟན་འཚལ། ཞེས་གསོལ་བ་བཏབ་པས། སྒོ་བ་གིང་ཆེན་སྡེ་བཞིས་དཀྱིལ་འཁོར་གྱི་སྒོ་བཞི་ཤག་གིས་ཕྱེ་པར་མོས་ཤིག །ས་མ་ཡ་པྲ་ཝེ་ཤ་ཡ་ཧཱུྃ། དབྱེ་རྒྱ་བཅས་བརྗོད། ཡོལ་བ་བསལ། ཁྱེད་རྣམས་ཀྱིས་དཀྱིལ་འཁོར་ཆེན་པོའི་ཤར་སྒོ་ནས་བརྩམས་རིམ་པར་གཡས་བསྐོར་དུ་ཕྱིན་ཏེ་ལྷ་ཚོགས་རྣམས་ཀྱི་སྐུ་གསུང་ཐུགས་ལ་ཕྱག་བྱ་བའི་མོས་པས་ཐལ་མོ་གནས་གསུམ་དུ་སྦྱར་ལ་འདིའི་རྗེས་ཟློས། ཨོཾ་ན་མ་ཏེ་ཧཱུྃ། ཨོཾ་ན་མ་མེ་ཧཱུྃ། ཨོཾ་ན་མོ་ན་མ་ཧཱུྃ། ལན་བཞི་བརྗོད། ཁྱེད་རང་རྣམས་དཀྱིལ་འཁོར་གྱི་ཤར་སྒོར་དབང་སྟེགས་པདྨ་འདབ་བརྒྱད་ལ་འཁོད་པར་མོས་ལ་ནང་འཇུག་གི་ཐོག་མ་དབང་གི་གཞི་འགོད་པ་ཡེ་ཤེས་དབབ་པ་ཡིན་པས་སྒོ་གསུམ་གྱི་གནད་གཅུན་ལ་དམིགས་པ་འདི་བཞིན་དུ་མཛོད། ཆོས་ཐམས་ཅད་རང་བཞིན་གྱིས་སྤྲོས་བྲལ་འོད་གསལ་སྟོང་པ་ཉིད་ཀྱི་རང་མདངས་ལྷུན་གྲུབ་དག་པ་རབ་འབྱམས་ཀྱི་དཀྱིལ་འཁོར་ཆེན་པོའི་དབུས་སུ་པདྨ་ཉི་ཟླ་བརྩེགས་པའི་གདན་གྱི་སྟེང་དུ། ཁྱེད་རང་རྣམས་སྐད་ཅིག་གིས་རིག་འདུས་རྗེ་བཙུན་མ་ཧཱ་གུ་རུ་སྣང་སྲིད་ཟིལ་གནོན་གྱི་ཆ་བྱད་ཅན་དཀར་ལ་དམར་བའི་མདངས་ཅན་ཕྱག་གཡས་སྡིགས་མཛུབ་དང་བཅས་པས་གསེར་གྱི་རྡོ་རྗེ་རྩེ་ལྔ་ནམ་མཁར་འཕྱར་བ། གཡོན་མཉམ་གཞག་གི་ཕྱག་རྒྱས་བྷནྡྷ་དང་ཚེ་བུམ་བཅུད་ལྡན་བསྣམས་པ། དབུ་ལ་པདྨའི་མཉེན་ཞུ་དང་སྐུ་ལ་ཕོད་ཀ་ཆོས་གོས་བེར་ཕྱམ་བརྩེགས་མར་གསོལ་བ། མཆན་ཁུང་གཡོན་དུ་རང་འོད་ཡེ་ཤེས་མཁའ་འགྲོས་འཁྱུད་ཅིང་ཞབས་རྒྱལ་པོ་རོལ་སྟབས་ཀྱིས་འཇའ་འོད་ཟེར་ཐིག་གི་ཀློང་ན་འགྱིང་ཞིང་བཞུགས་པའི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོས་མཚན་པར་གསལ་ཐོབ། བླ་མ་དཀྱིལ་འཁོར་པའི་ཐུགས་ཀ་དང་ཁྱེད་རང་རྣམས་ཀྱི་གནས་གསུམ་ཡིག་འབྲུ་གསུམ་ལས་འོད་ཟེར་མུ་མེད་པ་འཕྲོས། ཕྱོགས་བཅུའི་སངས་རྒྱས་ཀྱི་ཞིང་དང་ཁྱད་པར་བླ་མ་སྐུ་གསུམ་གྱི་ཞིང་ཁམས་ན་བཞུགས་པའི་རྩ་གསུམ་རྒྱལ་བ་སྲས་དང་བཅས་པའི་ཐུགས་རྒྱུད་བསྐུལ། ཐམས་ཅད་ཀྱང་མ་ཧཱ་གུ་རུ་པདྨ་ཐོད་ཕྲེང་རྩལ་གྱི་རྣམ་པར་ནམ་མཁའ་གང་བར་བྱོན་ཏེ་ཁྱེད་རང་རྣམས་ལ་ཐིམ་པས་བྱིན་གྱིས་བརླབས་པའི་མོས་པ་བརྟན་པོ་མཛོད། སྦྱར་བའི་སྤོས་བསྲེགས། ཌཱ་དྲིལ་དང་དབྱངས་ཀྱིས་བསྐུལ་ལ་ལས་བྱང་ལྟར། སྔོན་བསྐལ་མར་ཐོད་ཕྲེང་རྩལ་གྱི་ཛབ་མཐར། ཧཱུྃ་ཧཱུྃ་ཧཱུྃ་ཨཱ་རལླི་ཕེཾ་ཕེཾ་བཏགས་པ་བརྗོད། ཡེ་ཤེས་པའི་བྱིན་རླབས་ཀྱི་རྒྱུན་སྒོ་གསུམ་ལ་བརྟན་པར་གྱུར་ཅིག །ཏིཥྛ་བཛྲ་ཧཱུྃ་དང་རྡོ་རྗེས་རྒྱས་གདབ། སྔར་བྱིན་པའི་མེ་ཏོག་དེ་ཉིད་རིགས་ཀྱི་ལྷ་ལ་འབུལ་བའི་མོས་པས་འདིའི་རྗེས་ཟློས་དང་བཅས་ཏེ་དོར་བར་ཞུ། ཀྱཻ། རིག་འཛིན་འདུས་པའི་དཀྱིལ་འཁོར་དུ། །འབྲེལ་བའི་མེ་ཏོག་འདི་དོར་བས། །ལས་འཕྲོ་གང་ཡོད་ལྷ་ལ་དབབ་པར་ཤོག །ཨོཾ་པུཥྤེ་སིདྡྷི་ཧཱུྃ། ཞེས་དོར་དུ་གཞུག །མེ་ཏོག་གང་ལ་ཕོག་པའི་རིགས་ཀྱི་ལྷས་སླར་ཡང་དབང་རྟགས་ཅོད་པན་དུ་བྱིན་པར་མོས་ཤིག །པྲ་ཏི་གྷྲྀ་ཧ་ན་ཨི་མཾ་སཏྭ་མ་ཧཱ་བཱ་ལ། རིགས་དང་མཐུན་པའི་གསང་མཚན་གདགས། མེ་ཏོག་སྤྱི་བོར་བཅིངས། དག་པ་ཡེ་ཤེས་ཀྱི་སྤྱན་གྱིས་ལྷ་དང་དཀྱིལ་འཁོར་མངོན་སུམ་དུ་མཇལ་བའི་རྟེན་འབྱུང་དུ་མིག་དབྱེ་བར་མོས་མཛོད། མིག་ཐུར་ཐོགས་ལ། སྟོན་པ་རིགས་ལྔའི་སངས་རྒྱས་ཀྱིས། །ཁྱེད་ཀྱི་མ་རིག་འཁོར་བའི་མིག །ཡེ་ཤེས་སྤྱན་དུ་དབྱེ་བ་ལྟར། །དེ་བཞིན་ཁྱེད་ཀྱིས་འགྲོ་བ་རྣམས། །ཡེ་ཤེས་སྤྱན་དུ་འབྱེད་པར་ཤོག །ཙཀྵུ་པྲ་བེ་ཤ་ཡ་ཕཊ། ཅེས་གདོང་གཡོགས་བསལ། ཕྱག་ཤིང་གིས་མཐོང་བ་བསྟན་ཏེ། ཀྱཻ། རིགས་ཀྱི་བུ་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་ལ་སོགས་པའི་སངས་རྒྱས་ཀྱི་ཡེ་ཤེས་བརྡའི་དོན་རྟགས་ཀྱིས་མཚོན་པའི་མཚོན་བྱེད་ལྷག་པ་གཟུགས་བརྙན་གྱི་དཀྱིལ་འཁོར་དངོས་སུ་བཤམས་པ་དང་གཉིས་སུ་མེད་པའི་ལྷག་པའི་ཏིང་ངེ་འཛིན་གྱི་དཀྱིལ་འཁོར་ཡེ་ཤེས་རྡོ་རྗེ་སྲུང་བའི་འཁོར་ལོའི་ནང་དུ་འབྱུང་བ་རིམ་བརྩེགས་རི་རབ་དང་བཅས་པའི་གཞལ་མེད་ཁང་གྲུ་བཞི་སྒོ་བཞི་རྟ་བབ་ཆོས་འཁོར་རི་དྭགས་གདུགས་དང་བཅས་པ་པདྨ་ཉི་མ་སྣ་ཚོགས་རྡོ་རྗེའི་རྭ་བཅུ་གཉིས་པའི་ལྟེ་བར་གནས་པ། རིན་པོ་ཆེའི་རྩིག་པ་ལྔའི་སྟེང་དུ་ཕ་གུ་དྲྭ་བ་དྲྭ་ཕྱེད་ཤར་བུ་མདའ་ཡབ་དང་བཅས་པ། ནང་ཀ་བ་བརྒྱད་ཀྱིས་བཏེགས་ཅིང་རྡོ་རྗེའི་གདུང་གིས་ཕུབ་པའི་ཡ་ཕུབ་ཕྱུར་བུའི་རྩེར་རྡོ་རྗེ་རིན་པོ་ཆེའི་ཏོག་གིས་སྤྲས་པ། ཚད་དང་མཚན་ཉིད་ཐམས་ཅད་རྫོགས་ཤིང་རྒྱན་ཐམས་ཅད་ཀྱིས་བརྒྱན་པ། དེའི་ནང་དུ་སྣ་ཚོགས་པདྨ་ཉི་མ་ཟླ་བའི་སྟེང་དུ་རྩ་གསུམ་རྒྱལ་བ་རབ་འབྱམས་ཀྱི་རིགས་ཀུན་འདུས་པའི་སྤྱི་གཟུགས་དཀྱིལ་འཁོར་རྒྱ་མཚོའི་གཙོ་མཆོག་སྣང་སྲིད་ཟིལ་གནོན་མ་ཧཱ་གུ་རུ་ཞལ་གཅིག་ཕྱག་གཉིས་མཚན་དཔེའི་གཟི་བརྗིད་དཔལ་དུ་འབར་བ། རྡོ་རྗེའི་གསང་གོས་དཀར་པོ། ཆོས་གོས་དམར་པོ། བེར་མདུང་སྔོན་པོ། ཕོད་ཆེན་མཐིང་ག་རྣམས་བརྩེགས་མར་གསོལ་བ། ཕྱག་གཡས་རྡོ་རྗེ་རྩེ་ལྔ་འཕྱར་སྟབས་སུ་སྡིགས་མཛུབ་ཀྱིས་བསྣམས་ཤིང༌། གཡོན་མཉམ་བཞག་གིས་བྷནྡྷ་ཚེ་བུམ་བསྣམས་པ། ཞབས་རྒྱལ་པོ་རོལ་སྟབས་ཀྱིས་ལྷ་ལྕམ་མནྡྷཱ་ར་བ་གཅེར་བུ་གཞོན་མཛེས་ཅན་དང་གཉིས་མེད་དུ་འཁྲིལ་བ། རིགས་ལྔའི་དབང་རྟགས་རྫོགས་པས་དབུ་ལ་པདྨའི་མཉེན་ཞུ་ཅན། དབུ་གཙུག་ཏུ་དཔལ་ལྡན་རྡོ་རྗེ་སེམས་དཔའ་དང་གཉིས་སུ་མེད་པའི་རིག་འཛིན་དགའ་རབ་རྡོ་རྗེ། དེའི་དབུ་གཙུག་ཏུ་ཆོས་སྐུ་ཀུན་ཏུ་བཟང་པོ་བཅས་ཐེག་པ་མཆོག་གི་སྟོན་པ་རྣམ་གཉིས་ཐོ་བརྩེགས་སུ་བཞུགས་པ། ཕྱོགས་མཚམས་ཀྱི་འདབ་མ་བརྒྱད་ལ་བྱང་ཆུབ་སེམས་དཔའ་ཉེ་བའི་སྲས་བརྒྱད་དང་དཔལ་ཆེན་སྒྲུབ་སྡེ་བརྒྱད་ཀྱི་ངོ་བོ་བཀའ་བབ་རིག་འཛིན་ཆེན་པོ་བརྒྱད་བརྟུལ་ཞུགས་གྲུབ་པའི་ཧེ་རུ་ཀའི་ཆས་ཀྱིས་ཌཱ་དྲིལ་དང་བཅས་རྡོ་རྗེའི་གར་སྟབས་བསྒྱུར་བ། སྟེང་ཕྱོགས་སུ་གསང་སྔགས་ཕྱི་ནང་གི་རྒྱུད་སྡེ་དྲུག་གི་ཡི་དམ། སྤྲུལ་པའི་རྗེ་འབངས་ཉི་ཤུ་རྩ་ལྔ་སོགས་རྩ་གསུམ་རྒྱལ་བ་རབ་འབྱམས་ཐམས་ཅད་དང༌། གཞལ་ཡས་ཁང་གི་སྒོ་བཞིར་རིགས་ཀྱི་གིང་ཆེན་བཞི་དང༌། དཀྱིལ་འཁོར་ཕྱིའི་ཁོར་ཡུག་ལ་དཔལ་མགོན་བདུན་ཅུ་རྩ་ལྔ་དབང་ཕྱུག་ཉི་ཤུ་རྩ་བརྒྱད་ལ་སོགས་པས་མཚོན་ཕྱོགས་དུས་སྐྱབས་ཡུལ་རབ་འབྱམས་མཐའ་དག་བླ་མ་རིག་འཛིན་འདུས་པའི་དཀྱིལ་འཁོར་གཅིག་གི་ཡེ་ཤེས་ཀྱི་ཀློང་དུ་རྫོགས་པ་འདིས་མཚོན་བྱེད་དུ་བྱས་ཏེ་དབང་གིས་སྨིན་ཅིང་རིམ་པ་གཉིས་ཀྱི་ལམ་ལ་བརྩོན་པས་མཚོན་བྱ་དོན་གྱི་དཀྱིལ་འཁོར་རྡོ་རྗེའི་ཕུང་ཁམས་སྐྱེ་མཆེད་ཀྱི་རྩ་རླུང་ཐིག་ལེའི་རྣམ་པར་དག་པའི་རང་བཞིན་དུ་རང་ལ་བཞུགས་པར་ཤེས་པས། ཡིན་ཚུལ་གཤིས་ཀྱི་དཀྱིལ་འཁོར་རང་རིག་གདོད་ནས་དག་པའི་བདག་ཉིད་དུ་ངོ་འཕྲོད་དེ་ཟུང་འཇུག་རྡོ་རྗེའི་གོ་འཕང་མྱུར་དུ་ཐོབ་པའི་ཕྱི་ནང་གཞན་གསུམ་གཉིས་མེད་དུ་ངོ་སྤྲད་པ་ཡིན་པས་དད་གུས་སྤྲོ་བ་རྒྱ་ཆེན་པོ་མཛོད་ཅིག །དེ་དག་གིས་ལྷ་དང་སྐལ་པ་མཉམ་པའི་ཕྱིར་དཀྱིལ་འཁོར་ཕྱི་ནང་དུ་འཇུག་པའི་ཆོས་རྣམས་ལེགས་པར་གྲུབ་ནས། ད་དངོས་གཞི་དབང་བསྐུར་ཞུ་བའི་ཕྱིར་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས་མཛོད། །ནམ་མཁའ་རྡོ་རྗེས་རྒྱལ་བ་ལྔར། །སོགས་ནས་བརྩམས་ཐུན་མོང་རིགས་དབང་ལྔ་དང༌། ནང་ནུས་འཇུག་གི་དབང་དམ་ཚིག་གསུམ་སྦྱིན་པ། བུམ་དབང་རྗེས་གནང་དང་བཅས་པ་དང༌། བུམ་དབང་སྐབས་རྩ་སྔགས་མ་ཧཱ་གུ་རུ་སྦྱར་བའི་ཁྱད་པར་ལས་གཞན་ཞི་ཁྲོའི་སྐབས་ལྟར་མཐར་ཆགས་སུ་བཏང༌། དབང་གི་སྐབས་ཀུན་གཟིགས་འཇམ་མགོན་ཆོས་ཀྱི་བློ་གྲོས་རིན་པོ་ཆེས་རྩ་སྔགས་མ་ཧཱ་གུ་རུ་སྦྱར་བར་མཛད་པ་རིག་འཛིན་སྣ་ཚོགས་རང་གྲོལ་ནས་དེ་ལྟར་མཛད་གསུངས་པས་སྒྲུབ་སྔགས་གཙོ་བོར་སྦྱར་ན་ལེགས་དགོངས་པ་དང༌། ཚེ་སྒྲུབ་ཀྱང་སྒྲུབ་སྔགས་ལ་སྦྱར་བའི་དགོངས་པ་ཡིན་ནམ་སྙམ། མཆན། རྗེས་འབྲེལ་སྐུ་ཕྱག་རྒྱའི་དབང་ལ། ཁྱད་པར་དུ་བུམ་དབང་དང་རྗེས་སུ་འབྲེལ་བར་སྐུ་ཕྱག་རྒྱའི་དབང་བསྐུར་བ་ལ། དཀྱིལ་འཁོར་གྱི་ལྷ་ཚོགས་རྣམས་ལས་རང་འདྲའི་སྐུ་གཉིས་པ་སྤྲོས་ནས་ཁྱེད་རང་རྣམས་ཀྱི་སྤྱི་བོར་བཞག་ནས་དབང་བསྐུར་བས་རིག་འཛིན་བླ་མ་རྣམས་ཀྱི་བྱིན་རླབས་དང་གསང་བ་གསུམ་གྱི་ཡོན་ཏན་ཆིག་རྫོགས་སུ་རྒྱུད་ལ་འཕོས་པར་མོས་ཤིག །ལྷ་དབང་པདྨ་རཱ་གའི་ཕྲེང་བ་ལྟར་ཡོངས་རྫོགས་སྦྱར་ཏེ་སོ་སོའི་ཙཀླིས་དབང་བསྐུར་མཐར། དེང་ནས་བཟུང་སྟེ་རང་ལུས་སྣང་སྟོང་ལྷའི་སྐུ་བསྒོམ་པ་དང་མ་བྲལ་བས་སྣང་སྲིད་གཞིར་བཞེངས་རིག་འཛིན་བླ་མ་སྒྱུ་འཕྲུལ་དྲྭ་བའི་དག་ཆེན་ཡེ་ཤེས་ཀྱི་འཁོར་ལོར་ཤེས་པའི་བསྐྱེད་རིམ་དང་མ་བྲལ་བར་མཛོད་ཅིག །དེ་རྣམས་ཀྱིས་བླ་མ་སྐུ་རྡོ་རྗེ་སྤྲུལ་པའི་སྐུའི་ཕྱི་མཚན་མའི་དཀྱིལ་འཁོར་དུ་བུམ་པའི་དབང་ཐོབ། ལུས་ཀྱི་ལས་དང་རྩ་ཡི་སྒྲིབ་པ་དག །སྐུ་རྡོ་རྗེའི་བྱིན་རླབས་ཞུགས། བསྐྱེད་རིམ་གྱི་སྣོད་དུ་གྱུར། རྣམ་སྨིན་རིག་འཛིན་གྱི་ས་བོན་ཐེབས། སྤྲུལ་སྐུའི་གོ་འཕང་གི་སྐལ་པ་རྒྱུད་ལ་བཞག་པ་ཡིན་ནོ།  །གསུམ་པ་གསང་བ་ཟབ་མོའི་དབང་གསུམ་མཐའ་རྟེན་དང་ཡོངས་རྫོགས་གཏོར་མའི་དབང་བཅས་ལྔ་ལས། དང་པོ་གསང་དབང་གི་སླད་དུ་སློབ་དཔོན་རིགས་འདུས་ཐོད་ཕྲེང་རྩལ་རང་འོད་ཡེ་ཤེས་ཀྱི་མཁའ་འགྲོ་དང་སྙོམས་པར་ཞུགས་པའི་དཀར་དམར་བྱང་ཆུབ་ཀྱི་སེམས་སངས་རྒྱས་ཐམས་ཅད་འདུས་པའི་བཅུད་བྷནྡྷའི་བདུད་རྩི་དང་རོ་གཅིག་ཏུ་བྱས་པ་མགྲིན་པར་བཞག་ཅིང་མྱང་བར་མོས་ཤིག །གསང་རྫས་བྱིན་ལ། ཧཱུྃ༔ ཡབ་ཡུམ་སྦྱོར་བའི་བྱང་ཆུབ་སེམས༔ དཀར་དམར་བྷནྡྷའི་ནང་དུ་བསྐྱིལ༔ སྐལ་ལྡན་བུ་ལ་དབང་བསྐུར་བས༔ རྩ་ཁམས་ཡི་གེའི་རྣམ་པར་དག༔ ཚེ་ལ་དབང་བའི་རིག་འཛིན་ཐོབ༔ པདྨ་ཅན་གྱི་ས་ནོན་ཤོག༔ མ་ཧཱ་གུ་རུའི་མཐར། ཝཱཀྐ་ཨ་བྷི་ཥིཉྩ་ཨཱཿ རྗེས་འབྲེལ་དུ་བཟླས་ལུང་སྦྱིན་པ་ལ་དམིགས་པ་འདི་ལྟར་མཛོད། སློབ་དཔོན་གྱི་ཐུགས་ཀ་ནས་རྩ་བའི་སྔགས་ཕྲེང་ལུ་གུ་རྒྱུད་དུ་བྱུང༌། སློབ་མའི་མགྲིན་པ་ནས་ཞུགས་སྙིང་གར་འཁོར་བས་འགྱུ་བའི་རླུང་ཁམས་མཐའ་དག་གྲགས་སྟོང་སྔགས་ཀྱི་འཁོར་ལོར་རྫོགས་པར་མོས་ལ་འདིའི་རྗེས་ཟློས་མཛོད། བསྙེན་སྒྲུབ་ཀྱི་སྔགས་ལན་གསུམ་རྗེས་ཟློས་བྱར་གཞུག །དེ་ལྟར་བླ་མ་གསུང་རྡོ་རྗེ་ལོངས་སྐུའི་ནང་ལུས་ཀྱི་དཀྱིལ་འཁོར་དུ་གསང་བའི་དབང་ཐོབ། ངག་གི་ལས་དང་རླུང་གི་སྒྲིབ་པ་དག །གསུང་རྡོ་རྗེའི་བྱིན་རླབས་ཞུགས། བཟླས་བརྗོད་ཀྱི་སྣོད་དུ་གྱུར། ཚེ་དབང་རིག་འཛིན་གྱི་ས་བོན་ཐེབས། ལོངས་སྤྱོད་རྫོགས་པའི་གོ་འཕང་གི་སྐལ་པ་རྒྱུད་ལ་བཞག་པ་ཡིན་ནོ།  །གཉིས་པ་ཤེས་རབ་ཡེ་ཤེས་ཀྱི་དབང་གི་སླད་དུ་གཟུགས་དང་ལང་ཚོ་མཛེས་པ་ཕུལ་དུ་ཕྱིན་ཞིང་རིགས་དང་སྐལ་པ་མཆོག་དང་ལྡན་པའི་ཤེས་རབ་མ་ལག་ཏུ་བྱིན་པར་མོས་ཤིག །རིག་ཙཀ་གཏད་ལ། ཧཱུྃ༔ ཆོས་རྣམས་ཀུན་གྱི་འབྱུང་གནས་ནི༔ བདེ་བ་ཆེན་པོ་གསང་བའི་ཡུམ༔ རིགས་ཀྱི་བུ་ལ་བྱིན་པ་ཡིས༔ དགའ་བཞིའི་ཡེ་ཤེས་མངོན་དུ་གྱུར༔ ཕྱག་རྒྱ་ཆེན་པོའི་རིག་འཛིན་ཐོབ༔ འཁོར་ལོ་ཚོགས་ཆེན་ས་ནོན་ཤོག༔ སྔགས་མཐར། ཙིཏྟ་ཨ་བྷི་ཥིཉྩ་ཧཱུྃ། དེ་ལྟར་བྱིན་པའི་རིག་མ་དེས། པདྨ་བྷཉྫ་མོ་ཀྵ་ཧོ། ཞེས་ཐར་པ་བསྟན་པར་བསྐུལ་ཏེ་པང་དུ་བྱོན་པ་དང་འདུ་ཤེས་གསུམ་ལྡན་གྱི་རྗེས་སུ་ཆགས་པའི་རོལ་མོས་དགའ་བཞིའི་ཡེ་ཤེས་ཉམས་སུ་མྱོང་བར་མོས་ཤིག །དེ་ལྟར་བླ་མ་ཐུགས་རྡོ་རྗེ་ཆོས་ཀྱི་སྐུའི་གསང་བ་བྷ་གའི་དཀྱིལ་འཁོར་དུ་ཤེས་རབ་ཡེ་ཤེས་ཀྱི་དབང་ཐོབ། ཡིད་ཀྱི་ལས་དང་ཐིག་ལེའི་སྒྲིབ་པ་དག །ཐུགས་རྡོ་རྗེས་བྱིན་རླབས་ཞུགས། བདེ་སྟོང་ཙཎྜ་ལིའི་སྣོད་དུ་གྱུར། ཕྱག་རྒྱའི་རིག་འཛིན་གྱི་ས་བོན་ཐེབས། ཆོས་སྐུའི་གོ་འཕང་ཐོབ་པའི་སྐལ་པ་རྒྱུད་ལ་བཞག་པ་ཡིན་ནོ།  །གསུམ་པ་བརྡ་ཚིག་གི་དབང་ལ། གཞི་ཀ་དག་གི་ལྟ་བ་མཚོན་པའི་མེ་ལོང་དྭངས་གསལ། ལམ་ལྷུན་གྲུབ་ཀྱི་སྒོམ་པ་མཚོན་པའི་འཇའ་ཚོན་ལ་བརྟེན་ནས་དཔེ་དོན་འབྲེལ་བའི་འོད་གསལ་གྱི་རང་ངོ་ལ་མཉམ་པར་ཞོག་ཅིག །ཤེལ་རྡོ་དང་མེ་ལོང་བསྟན་ལ། ཧོ༔ ཀ་དག་མེ་ལོང་གཙང་མའི་ངོགས༔ ལྷུན་གྲུབ་དྭངས་ཤེལ་དྲི་མེད་གསལ༔ བརྡ་རྟགས་རྫོགས་པས་དབང་བསྐུར་བས༔ དྲི་མེད་རིག་པའི་གནས་ལུགས་རྟོགས༔ ལྷུན་གྲུབ་རིག་འཛིན་ཉེར་ཐོབ་ནས༔ བདེ་བ་ཆེན་པོའི་ས་ནོན་ཤོག༔ སྔགས་མཐར། དྷརྨ་དྷཱ་ཏུ་ཨ་བྷི་ཥིཉྩ་ཨཱཿ ཁྱེད་རང་རྣམས་ལུས་གནད་བསྲང་ལ་ཀ་དག་སྤྲོས་མཐའ་བྲལ་བའི་ངང་དུ་མཉམ་པར་འཇོག་འཚལ། ཞེས་རེ་ཞིག་བཞག་དེའི་ངང་ལ། ཕཊ། དྲག་པོ་ཞིག་བརྗོད། སེམས་གང་ཡིན། རྟབ་རྟབ་ཏུ་དྲིས་པས། སྣང་བ་ཧད་དེ་ཕྱད་དེ་ཅི་ཟེར་ཆ་མེད་པ་བྱུང་ཚོར་གྱི་སྤྲོས་པ་འགགས་པ་དེ་ཉིད་རང་གནས་ཀྱི་ཡེ་ཤེས་སུ་ངོ་ཤེས་པར་གྱིས་ཤིག །དེའང་ལྟ་བ་ལུང་རིག་དང་འབྲེལ་བ་ཞེས་བྱ་བ་ཡིན་པས། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགག་ནམ་མཁའི་ངོ་བོ་ཉིད། །སོ་སོ་རང་རིག་ཡེ་ཤེས་སྤྱོད་ཡུལ་བ། །དུས་གསུམ་རྒྱལ་བའི་ཡུམ་གྱུར་རྫོགས་པ་ཆེ། །ཞེས་གསུངས་པའི་དོན་ལགས་སོ།  །དེ་ནས་སློབ་དཔོན་ལྟ་དགོངས་ཅན་ཡིན་ན། ཐུགས་ཀར་ཨ་ཡིག་ཞིག་གསལ་བ་ལ་སློབ་མའི་རིག་པ་གཏད་དུ་གཞུག་ལ་དཔོན་སློབ་གཉིས་ཀ་མཉམ་པར་བཞག །སྒོམ་པ་ཉམས་མྱོང་དང་འབྲེལ་བའི་གཤིས་ནས་ཨ་ཉི་ཤུ་རྩ་གཅིག་བརྩེགས་མར་བརྗོད་དོ།  །དེ་ལྟར་བླ་མ་ཡེ་ཤེས་རྡོ་རྗེ་ངོ་བོ་ཉིད་སྐུའི་དེ་ཁོ་ན་ཉིད་དོན་དམ་བདེ་བ་ཆེན་པོའི་དཀྱིལ་འཁོར་དུ་དབང་བཞི་པ་ཐོབ། ཀུན་གཞིའི་ལས་དང་ཤེས་བྱའི་སྒྲིབ་པ་དག །ཡེ་ཤེས་རྡོ་རྗེའི་བྱིན་རླབས་ཞུགས། ཀ་དག་རྫོགས་པ་ཆེན་པོའི་སྣོད་དུ་གྱུར། ལྷུན་གྲུབ་རིག་འཛིན་གྱི་ས་བོན་ཐེབས། ངོ་བོ་ཉིད་སྐུའི་གོ་འཕང་གི་སྐལ་པ་རྒྱུད་ལ་བཞག་པ་ཡིན་ནོ།  །བཞི་པ་མཐའ་རྟེན་བཀའ་ལུང་ཡོངས་རྫོགས་གཏད་པ་ཡིན་པས། རྩ་བརྒྱུད་ཀྱི་བླ་མ་རྣམས་ལ་མོས་གུས་གདུང་ཤུགས་དྲག་ཏུ་བསྐྱེད་པས་དེ་དག་གི་དགོངས་རྒྱུད་བྱིན་རླབས་མཐའ་དག་ཁྱེད་རང་གི་རྒྱུད་ལ་འཕོས། རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་ཚིག་དང་དོན་གྱི་གསང་བ་མཐའ་དག་གི་དབང་ཆེན་ཐོབ་པར་མོས་ཤིག །གླེགས་བམ་མགོ་བོར་བཞག་ལ། ཧོཿ ཆོས་སྐུ་ཀུན་ཏུ་བཟང་པོ། ལོངས་སྐུ་རྒྱལ་བ་རིགས་ལྔ། སྤྲུལ་སྐུ་དགའ་རབ་རྡོ་རྗེ། སློབ་དཔོན་འཇམ་དཔལ་བཤེས་གཉེན། རིག་འཛིན་ཤྲཱི་སིངྷ། པཎ་ཆེན་བི་མ་མི་ཏྲ། ཨོ་རྒྱན་པདྨ་ཐོད་ཕྲེང༌། མཁའ་འགྲོ་ཡེ་ཤེས་མཚོ་རྒྱལ། མངའ་བདག་ཁྲི་སྲོང་ལྡེའུ་བཙན། རྒྱལ་སྲས་དྲི་མེད་འོད་ཟེར། ཀློང་ཆེན་ནམ་མཁའི་རྣལ་འབྱོར་ལ་སོགས་པ་རང་བཞིན་རྫོགས་པ་ཆེན་པོའི་རྩ་བ་དང་བརྒྱུད་པར་བཅས་པའི་དཔལ་མགོན་རིག་འཛིན་བླ་མ། ཡི་དམ་མཁའ་འགྲོ་རྒྱ་མཚོ། ཆོས་སྲུང་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱིས། དེང་འདིར་རྡོ་རྗེའི་སློབ་མ་རྣམས་ལ་དབང་བསྐུར་དུ་གསོལ། བྱིན་གྱིས་བརླབ་ཏུ་གསོལ། རྟོགས་པ་སྤར་དུ་གསོལ། བརྟུལ་ཞུགས་བསྐྱེད་དུ་གསོལ། བྱ་རྩོལ་བློ་འདས་རྫོགས་པ་ཆེན་པོའི་ཀློང་དུ་དགོངས་པའི་བཙན་ས་ཟིན་ཏེ་ཚེ་གཅིག་ལུས་གཅིག་ལ་འཇའ་ལུས་འཕོ་བ་ཆེན་པོའི་སྐུ་མཆོག་བརྙེས་ནས་དཔལ་ཀུན་ཏུ་བཟང་པོའི་གོ་འཕང་ལ་འགོད་པར་མཛད་དུ་གསོལ། ཞེས་ལན་གསུམ་བརྗོད་ཅིང་རིག་པ་གཏད་མེད་ངང་དུ་བཞག་ལ་དོན་བརྒྱུད་འཕོ།  ལྔ་པ་ཡོངས་རྫོགས་གཏོར་མའི་དབང་བསྐུར་བ་ལ། སྤྱིར་གཏོར་མ་ལ་བསྙེན་སྒྲུབ་ཀྱི་དུས་སུ་དཀྱིལ་འཁོར་དུ་ཤེས་པ་དང༌། མཆོད་པའི་དུས་སུ་འདོད་ཡོན་དུ་ཤེས་པ། དབང་གི་དུས་སུ་ལྷར་ཤེས་པ། རྗེས་དངོས་གྲུབ་ཏུ་ཤེས་པ་རྣམས་སུ་ཡོད་པ་ལས། འདིར་དབང་དུས་ལྷར་ཤེས་པར་བྱ་བ་ཡིན་པས་ཐུགས་དམིགས་འདི་བཞིན་དུ་མཛོད། རིག་འཛིན་བླ་མའི་གཏོར་ཆེན་འདི་ཉིད་ཕྱི་ལྟར་རིན་ཆེན་འབར་བའི་གཞལ་ཡས་ཁང་ཡངས་ཤིང་རྒྱ་ཆེ་བ་ཚད་དང་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ། ནང་ལྟར་ཐེག་མཆོག་རྫོགས་པ་ཆེན་པོའི་བླ་མ་སྐུ་གསུམ་ཐོ་བརྩེགས་སུ་བཞུགས་ཤིང༌། འཁོར་བཀའ་བབ་རིག་འཛིན་བརྒྱད་དང་རྩ་བ་གསུམ་གྱི་ལྷ་ཚོགས་སྤྲིན་ལྟར་གཏིབས་པ། ཆོས་སྐྱོང་སྲུང་མ་རྣམས་ཀྱིས་ལས་མཛད་པའི་བླ་མ་རིག་འཛིན་རྩ་གསུམ་སྒྱུ་འཕྲུལ་དྲྭ་བ་ཆེན་པོའི་རྟེན་དང་བརྟེན་པའི་དཀྱིལ་འཁོར་ཡོངས་རྫོགས་སུ་ཤར་བ་ཁྱེད་རང་རྣམས་ཀྱི་སྤྱི་བོར་སྤྱན་དྲངས་ཤིང་བྱིན་གྱིས་བརླབས་པ་ལ་བརྟེན་ནས། གཙོ་འཁོར་ཐམས་ཅད་ཀྱི་གནས་བཞིར་ཨོཾ་ཨཱཿཧཱུྃ་དང་ཧྲཱིཿཡིག་གིས་མཚན་པ་ལས་འོད་ཟེར་དཀར་དམར་མཐིང་ག་སྣ་ཚོགས་པའི་མདོག་ཅན་དཔག་ཏུ་མེད་པ་བྱུང༌། ཁྱེད་རང་རྣམས་ཀྱི་གནས་བཞིར་ཐིམ་པ་ལ་བརྟེན་ནས་ཕྱི་ནང་གསང་བ་དེ་ཁོ་ན་ཉིད་ཀྱི་དབང་བཞི་སྟན་ཐོག་གཅིག་ཏུ་ཐོབ། ལུས་ངག་ཡིད་གསུམ་ཆ་མཉམ་གྱི་སྒོ་ནས་བསགས་པའི་འགལ་རྐྱེན་སྡིག་སྒྲིབ་བར་དུ་གཅོད་པ་ཐམས་ཅད་ཉེ་བར་ཞི་ཞིང༌། གནས་སྐབས་སུ་དབང་བཞིའི་ལམ་བསྒོམ་པ་དང༌། མཐར་ཐུག་སྐུ་བཞིའི་གོ་འཕང་ཐོབ་པའི་སྐལ་པ་ཅན་དུ་བྱས་པའི་མོས་པ་དུང་དུང་མཛོད་ཅིག །ཅེས་བརྡ་སྦྱར་ལ། ཧཱུྃ། དཀྱིལ་འཁོར་གཙོ་བོ་པད་འབྱུང་ཡབ་ཡུམ་དང༌། འདི་རྡོ་གྲུབ་རིན་པོ་ཆེ་འཇིགས་མེད་ཕྲིན་ལས་འོད་ཟེར་གྱི་རྡོ་རྗེའི་གསུང༌། མཆན། རིགས་བདག་དགའ་རབ་རྡོ་རྗེ་སེམས་དཔའ་ཆེ། །ཀུན་བཟང་ཡབ་ཡུམ་རྒྱ་གར་རིག་འཛིན་བརྒྱད། །རྗེ་རྒྱལ་འབངས་རིགས་ཉེར་ལྔ་ཡི་དམ་ལྷ། །རྒྱུད་སྡེ་བཞི་དྲུག་དཔའ་བོ་མཁའ་འགྲོའི་ཚོགས། །དཔལ་མགོན་བདུན་ཅུ་རྩ་ལྔ་དབང་ཕྱུག་མ། །ཉེར་བརྒྱད་སྒོ་སྐྱོང་གིང་ཆེན་བཞི་བཅས་ཀྱི། །སྐུ་གསུང་ཐུགས་ཡོན་ཕྲིན་ལས་དབང་རྣམས་ཀུན། །སྐལ་ལྡན་ལས་ཅན་རྣམས་ལ་བསྐུར་བ་ཡིས། །ལུས་ངག་ཡིད་གསུམ་སྒོ་གསུམ་ཆ་མཉམ་བཞིའི། །སྒྲིབ་བཞི་ཡོངས་དག་རིག་འཛིན་རྣམ་བཞིའི་ལམ། །སྐུ་བཞིའི་གོ་འཕང་ཐོབ་པའི་རྟེན་འབྲེལ་བསྒྲིགས། །མཐར་ཐུག་གཞོན་ནུ་བུམ་སྐུ་མངོན་གྱུར་ཤོག །ཨོཾ་ཨཱཿཧཱུྃ་བཛྲ་མ་ཧཱ་གུ་རུ་སརྦ་སིདྡྷི་ཧཱུྃ༔ ཀཱ་ཡ་སིདྡྷི་ཨོཾ། ཝཱཀྐ་སིདྡྷི་ཨཱཿ ཙིཏྟ་སིདྡྷི་ཧཱུྃ། གུ་ཎ་སིདྡྷི་ཏྲཱཾ། སརྦ་སིདྡྷི་ཧྲཱིཿ གཏོར་མ་གནས་སོ་སོར་བཞག རྗེས་དངོས་གྲུབ་ཏུ་ཤེས་པའི་ཕྱིར་གཏོར་མའི་ལྷ་འོད་དུ་ཞུ་བའི་གཏོར་ཟན་དངོས་གྲུབ་ཀྱི་རང་བཞིན་བདུད་རྩིའི་དྭངས་བཅུད་དུ་འཁྱིལ་བ་མྱངས་བས་རྩ་ཁམས་ཐམས་ཅད་ལ་ཁྱབ། ཟག་མེད་ཀྱི་བདེ་བས་རྒྱུད་གང༌། མཆོག་དང་ཐུན་མོང་གི་དངོས་གྲུབ་མ་ལུས་པ་ཐོབ་པའི་མོས་པ་མཛོད། ཅེས་བརྡ་སྦྱར་ལ་གཏོར་ཟན་དངོས་སམ། མཐའ་སྐོར་གྱི་མཐེབ་ཀྱུ་ལྟ་བུ་བདུད་རྩི་དང་སྦྱར་ནས་སྦྱིན། དེ་དག་གིས་དབང་བསྐུར་གྱི་རིམ་པ་ཡོངས་སུ་རྫོགས་པས་སྒོ་གསུམ་བྱ་བ་དང་བཅས་པ་དཀྱིལ་འཁོར་གྱི་ལྷ་ཚོགས་རྣམས་ཀྱི་གསང་གསུམ་ཕྲིན་ལས་དང་བཅས་པ་གཉིས་སུ་མེད་པར་གྱུར་ནས་ཁམས་གསུམ་ཆོས་ཀྱི་རྒྱལ་པོ་ཕྱོགས་ལས་རྣམ་པར་རྒྱལ་བའི་གོ་འཕང་ཐོབ་པར་གྱུར་པ་ལ། རྒྱལ་སྲིད་བདུན་གཏད་ལ། ཕྱིའི་རྟེན་འབྲེལ་བསྐལ་པ་རྫོགས་ལྡན་གྱི་དགའ་སྟོན་ལ་སྤྱོད་པའི་འཁོར་ལོས་བསྒྱུར་རྒྱལ་རྣམས་ལ་སྔོན་གྱི་རྣམ་དཀར་གྱི་མཐུ་ལས་སྣང་བའི་རྒྱལ་སྲིད་རིན་པོ་ཆེ་སྣ་བདུན་གྱིས་ས་གསུམ་འཇིག་རྟེན་ཀུན་ཏུ་དབང་བསྒྱུར་བ་དང༌། ནང་དུ་འཕགས་པའི་ནོར་བདུན་གྱི་འབྱོར་པས་ལམ་ལྔའི་ཡོན་ཏན་ལ་དབང་བསྒྱུར་བའི་བརྡར་རྒྱལ་སྲིད་རིན་ཆེན་བདུན་གྱི་འབྱོར་པས་མངའ་གསོལ་བར་མོས་ཤིག །བཀྲ་ཤིས་རྟགས་བརྒྱད་གཏད་ལ། བསོད་ནམས་བརྒྱ་ལས་གྲུབ་པའི་སངས་རྒྱས་རྣམས་ཀྱི་མཚན་དཔེའི་དཔལ་ལས་སྣང་བའི་བཀྲ་ཤིས་པའི་རྟགས་མཆོག་བརྒྱད་ཀྱིས་དབང་བསྐུར་བས་བདུད་དང་མུ་སྟེགས་སོགས་ཕས་རྒོལ་གྱི་གཡུལ་ལས་རྒྱལ་ཞིང་འགྲོ་ཀུན་དེ་བཞིན་གཤེགས་པའི་མཚན་རྟགས་སོགས་སྤྱོད་ཡུལ་རླབས་པོ་ཆེ་ལ་འཇུག་པའི་དབང་ཐོབ་པར་མོས་ཤིག །བཀྲ་ཤིས་རྫས་བརྒྱད་གཏད་ལ། སྟོན་མཆོག་རྫོགས་པའི་སངས་རྒྱས་འཇིག་རྟེན་གྱི་འདྲེན་པར་བྱོན་ནས་འདུལ་བ་བཞི་ཡི་ཕྲིན་ལས་དང༌། མཛད་པ་བཅུ་གཉིས་ཀྱིས་འགྲོ་བའི་འདྲེན་པར་བྱོན་པའི་ཚེ་ལྷ་མིའི་དབང་པོ་དག་གིས་རྟེན་འབྲེལ་གྱི་རྫས་ཕུལ་བ་རྣམས་དུས་ཀུན་ཤིས་པ་སྤེལ་བའི་བཀྲ་ཤིས་གྲུབ་པའི་རྫས་མཆོག་བརྒྱད་དུ་བྱིན་གྱིས་བརླབས་པས་དབང་བསྐུར་བས་ཕྱོགས་དུས་གནས་སྐབས་ཀུན་ཏུ་དགེ་ལེགས་རྟགས་ཀྱི་ཉི་མ་ཁོར་ཡུག་ཏུ་འཆར་བའི་དབང་ཐོབ་པར་མོས་མཛོད། དེ་དག་ནི་སྤྲོས་པ་མཚམས་པའི་དབང་དུ་བྱས་ཀྱི་རྒྱས་པར་གྲུབ་ཆེན་ཕྲིན་ལས་འོད་ཟེར་གྱི་གསུང་ལྟར་སྦྱར་དགོས་སོ།  །ལས་བྱང་ནས་འབྱུང་བ་ལྟར་ཤིས་པ་བརྗོད། དེ་དག་རྣམས་ཀྱིས་རིག་འཛིན་ཆེན་པོ་འཇིགས་མེད་གླིང་པའི་དགོངས་གཏེར་ཀློང་ཆེན་སྙིང་གི་ཐིག་ལེའི་ནང་སྒྲུབ་རིག་འཛིན་འདུས་པའི་དབང་བསྐུར་རྒྱས་པ་གྲུབ་ཆེན་རིན་པོ་འཇིགས་མེད་ཕྲིན་ལས་འོད་ཟེར་གྱི་མན་ངག་ལུགས་ལྟར་ལེགས་པར་གྲུབ་པ་ལགས་པས་རྩ་བ་དང་ཡན་ལག་གི་དམ་ཚིག་མཐའ་དག་ཅི་ནུས་སུ་འབད་པས་བསྲུང་སྙམ་པས་འདིའི་རྗེས་ཟློས། རྩ་བ་སྐུ་གསུང་ཐུགས་མཆོག་དང༔ ཡན་ལག་དམ་ཚིག་ཉི་ཤུ་ལྔ༔ མེད་དང་གཅིག་པུ་ཕྱལ་བ་སོགས༔ ཆོ་ག་བཞིན་དུ་སྲུང་བར་བགྱི༔ ལན་གསུམ། གཏང་རག་གི་མཎྜལ་ཕུལ། སླར་ཡང་ལུས་ལོངས་སྤྱོད་ཐམས་ཅད་ལྟོས་པ་མེད་པར་ཁྱབ་བདག་བླ་མ་ཉིད་ལ་འབུལ་བའི་བློས་འདིའི་རྗེས་ཟློས། གཙོ་བོས་ཇི་ལྟར་བཀའ་བསྩལ་པ། །དེ་དག་ཐམས་ཅད་བདག་གིས་བགྱི། །ཁྱེད་ལ་བདག་ཀྱང་ཡོངས་སུ་འབུལ། །སློབ་མར་བཟུང་ནས་སྤྱད་དུ་གསོལ། །ལན་གསུམ། དགེ་བསྔོ་བྱས་ལ་སློབ་མ་རྣམས་གྲོལ། སློབ་དཔོན་གྱིས་ཚོགས་མཆོད། སྤྲོ་ན་བསྐང་བཤགས་རྡོ་རྗེའི་ཐོལ་གླུ་དང༌། རིག་འདུས་རང་གི་བསྐང་བ་ཀུན་གཟིགས་མཁྱེན་བརྩེ་རིན་པོ་ཆེའི་གསུང་སོགས་སྦྱར་ཞིང་ཚོགས་ལ་རོལ། ལྷག་མ་ནས་ཤིས་བརྗོད་བར་གསང་བ་སྤྱི་ལྟར་མཐར་དབྱུང་བས་གྲུབ་བོ།  །དེ་དག་གིས་འོད་གསལ་སྙིང་ཐིག་གི་རྩ་བའི་ཆོས་བདག་གྲུབ་ཆེན་རིན་པོ་ཆེ་ཀུན་བཟང་གཞན་ཕན་གྱི་གསུང་གི་དགོངས་པ་ལྟར་ཡིད་རྟོན་འོས་པ་ཡིན་ལ། གྲུབ་རྗེས་གསུང་དངོས་རྙེད་ན་དེ་ཉིད་གཙོ་བོར་བྱ་བ་ལས་ཡན་ལག་བརྒྱད་པའི་མཚོ་འགྲམ་དུ་བ་ཚྭའི་ཁྲོན་པ་ལ་ཡིད་གདུང་བར་མི་བྱའོ།  །འདི་ལ་གཏེར་གཞུང་རྩ་བའི་དགོངས་པ་དངོས་བསྟན་རྒྱལ་ཐབས་སྤྱི་བླུགས་ལྟར་འབོག་ན་འཇམ་མགོན་པདྨ་གར་དབང་གི་གསུང་པདྨའི་དོ་ཤལ་ལྟར་ཤེས་པར་བྱའོ། །ཀུན་མཁྱེན་ཡེ་ཤེས་ཀློང་ལྔའི་མཛོད། །བརྩེ་ཆེན་ཐུགས་ཀྱི་ཐིག་ལེའི་བཅུད། །བྱིན་རླབས་རྩ་བ་བླ་མ་ཡི། །ཐུགས་སྒྲུབ་སྨིན་བྱེད་འོད་ཟེར་རྨད། །ཅེས་སྒྲུབ་སྡེའི་ཐོག་མ་བྱིན་རླབས་ཀྱི་རྩ་བ་བླ་མ་རིག་འཛིན་འདུས་པའི་དབང་བསྐུར་རྒྱས་པར་སྤྲོས་པའི་ལེའུ་ཚན་གཉིས་པ་སྟེ་པདྨ་དབང་ཆེན་དགྱེས་པ་རྩལ་གྱིས་སྦྱར་བའོ།  ༈  བླ་མ་དྲག་པོ་དམར་ཆེན་རྟ་ཁྱུང་འབར་བའི་དབང་ལ་གྲུབ་ཆེན་རིན་པོ་ཆེ་ཀུན་བཟང་གཞན་ཕན་གསུང་དང༌། འཇམ་མགོན་ཀོང་སྤྲུལ་རིན་པོ་ཆེའི་གསུང་རྡོ་རྗེའི་དོ་ཤལ། མཁྱེན་བརྩེ་རིན་པོ་ཆེའི་དབང་བསྡུས་གྲངས་བསགས་བཅས་རྡོ་རྗེའི་གསུང་དུ་མ་བཞུགས་བཞིན་པའོ།  ༈  བདེ་ཆེན་སྣང་བ་རྒྱས་པའི་གཟི་འོད་ཀྱིས། །ས་གསུམ་ནང་གི་མུན་པ་སེལ་མ་ཐག །གྲུབ་གཉིས་ཀུན་དགའི་དགའ་སྟོན་རབ་གསལ་གཉེན། །བླ་མ་རྡོ་རྗེ་སེམས་དཔའ་རྒྱལ་གྱུར་ཅིག །རྡོ་རྗེ་སེམས་དཔའ་ལ་བརྟེན་པའི་བླ་མཆོད་བདེ་ཆེན་ལམ་བཟང་གི་ཁྱད་པར་གྱི་ཕྲིན་ལས་བདེ་ཆེན་སྙིང་པོའི་བྱེ་བྲག་རྡོ་རྗེའི་ཚེ་སྒྲུབ་པའི་ཆོ་ག་དང་འབྲེལ་བར་སློབ་མ་རྗེས་སུ་འཛིན་པའི་ཚུལ་ལ། ཁྱད་པར་གྱི་ཕྲིན་ལས་ལྟར་གཞུང་བསྲང༌། ཚེ་རྫས་ལ་ཚེ་འགུགས་བསྟིམ། ལས་བུམ་སྒྲུབ་པ། ཚོགས་བསགས་བཅས་གྲུབ་པ་དང་སློབ་མ་ལ་ཁྲུས་བྱ། བགེགས་བསྐྲད། སྲུང་འཁོར་བསྒོམས་ནས། དེ་ལ་འདིར་ཐེག་མཆོག་རྫོགས་པ་ཆེན་པོ་ཤིན་ཏུ་རྣལ་འབྱོར་གྱི་གསེང་ལམ ལས་སྐུ་ཚེ་གཅིག་ལ་བདེ་ཆེན་རྡོ་རྗེ་སེམས་དཔའི་གསང་གསུམ་ཡེ་ཤེས་ཀྱི་ཕྱག་རྒྱ་ལ་དབང་འབྱོར་བའི་ཀུན་མཁྱེན་གྲུབ་བརྒྱའི་དཔྱིད་རང་བྱུང་རྡོ་རྗེ་འཇིགས་མེད་གླིང་པ་ལ་དབྱིངས་ཀྱི་མཁའ་འགྲོས་ཟབ་རྒྱས་ཆོས་ཀྱི་གསང་མཛོད་གཏད་པའི་རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་ཆོས་སྐོར་ཟབ་རྒྱས་བཞུགས་པའི་ཡང་སྙིང་རྡོར་སེམས་མངོན་དགའི་ཞིང་སྦྱོང་གི་བླ་སྒྲུབ་རྩ་བ་ཙམ་རྒྱལ་བའི་དགོངས་བཅུད་མངོན་དུ་ཕྱུངས་པ། སླར་ཡང་རྗེ་དེ་ཉིད་ཀྱི་སྨོན་ལམ་ཐུགས་རྗེའི་ཆོ་འཕྲུལ་ཟད་མི་ཤེས་པའི་རོལ་རྩེད་གངས་ཅན་མཁས་གྲུབ་ཡོངས་ཀྱི་དད་དཔོན་ཀུན་གཟིགས་འཇམ་དབྱངས་མཁྱེན་བརྩེའི་དབང་པོའི་དག་སྣང་དུ་ཀུན་མཁྱེན་ཉིད་ཀྱི་ཡེ་ཤེས་ཀྱི་སྐུས་རྗེས་སུ་བཟུང་སྟེ་ཉེ་བརྒྱུད་དུ་བསྩལ་ནས་བླ་མ་མཆོད་པའི་གཞུང་རྩ་བ་ཡན་ལག་དང་བཅས་པའི་ཆོས་བཀའ་ཟབ་རྒྱས་ངོ་མཚར་རྨད་བྱུང་གི་ཚུལ་དུ་བཞུགས་པ་ལས་འདིར་ནི་རྡོ་རྗེ་སེམས་དཔའ་སྒྱུ་འཕྲུལ་དྲྭ་བའི་རྒྱུད་རྒྱས་པ་ལས། བུམ་པ་མཆོག་ནི་བཟང་པོ་ཉིད། །ཚེ་བཞག་གནས་ནི་འདི་ཡིན་ཏེ། །ཡང་ནས་ཡང་དུ་འགུགས་བྱ་ཞིང༌། །མངོན་སུམ་སྨིན་པར་གྱུར་པ་དང༌། །དབྱིངས་སུ་ཡང་ནི་སྦ་བར་བྱ། །རྡོ་རྗེའི་གོ་ཆ་སྲུང་བ་ཡིས། །བརྟན་ཅིང་འཁོར་ལོས་དགག་པར་བྱ། །ཞེས་རྡོ་རྗེའི་ཚེ་སྒྲུབ་པའི་རྟེན་དང༌། འགུགས་པ་དང༌། བསྟིམ་པ་དང༌། སྦ་བ་དང༌། སྲུང་བའི་ཚུལ་སོགས་རྒྱུད་ལས་རྒྱ་ཆེར་བྱུང་བ་མན་ངག་གིས་ལུང་དུ་བསྡེབས་ནས་བྱིན་རླབས་ཉེ་བརྒྱུད་ཀྱི་གཟི་བྱིན་འབར་བ་རྡོ་རྗེ་སེམས་དཔའི་ཚེ་དང་ལང་ཚོ་སྒྲུབ་པའི་ཐོག་མར་དབང་གི་ཆོ་ག་ཟབ་མོས་རྒྱུད་སྨིན་དགོས་པའི་ཕྱིར་དེ་ཉིད་གསན་པའི་ཡོན་དུ་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས་མཛོད། རྡོ་རྗེ་སེམས་དཔའ་བདེ་བ་ཆེ། །སྒྱུ་འཕྲུལ་གཙོ་བོ་དགོངས་སུ་གསོལ། །རྡོ་རྗེའི་ཚེ་དང་ཡེ་ཤེས་ཀྱི། །དབང་དང་དངོས་གྲུབ་བསྩལ་དུ་གསོལ། །ལན་གསུམ། ཡན་ལག་བརྒྱད་པས་རྒྱུད་སྦྱང་བ། བླ་མ་རྡོ་རྗེ་སེམས་དཔའ་སོགས། དེ་ནས་ནང་འཇུག་གི་དངོས་གཞི་ཡེ་ཤེས་དབབ་སོགས་ནས། ཏིཥྛ་བཛྲས་བརྟན་པར་བྱས་པའི་མོས་པ་མཛོད། བར་དབང་གཞུང་ལྟར་དང༌། ཚེ་འགུགས་ལ། བདག་མདུན་ལྷར་གསལ་བའི་ཐུགས་སྲོག་ས་བོན་ལས་འོད་ཟེར་ལྕགས་ཀྱུའི་རྣམ་པ་ཅན་ཉི་ཟེར་གྱི་རྡུལ་ལྟར་འཕྲོས་བརྟན་གཡོ་འཁོར་འདས་ཀྱི་ཆོས་ཐམས་ཅད་ལ་ཕོག་པས་རྒྱལ་བ་སྲས་དང་བཅས་པའི་ཐུགས་རྗེ་བྱིན་རླབས་ཀྱི་མཐུ་དང༌། སྟོང་ཁམས་འཇིག་རྟེན་ཐམས་ཅད་ཀྱི་འབྱུང་ལྔའི་དྭངས་མ་རྩི་བཅུད་སྐྱེ་འགྲོ་མཐའ་དག་གི་ཚེ་དཔལ་ནུས་སྟོབས་ལས་དང་བསོད་ནམས། ཁྱད་པར་ལྷ་ཀླུ་གནོད་སྦྱིན་རིག་འཛིན་གྲུབ་པ་སོགས་ཚེ་བསྐལ་པ་དང་མཉམ་པར་གནས་པ་རྣམས་ཀྱི་ཚེ་བཅུད་བཀྲག་དང་གཟི་མདངས། བན་བོན་མཐུ་བོ་ཆེས་རིག་སྔགས་ཀྱི་སྦྱོར་བ་དང༌། སྡེ་བརྒྱད་མ་རུང་པས་བླ་དང་ཚེ་སྲོག་ཁྱེར་བ་ལ་སོགས་པ་ཐམས་ཅད་ཁབ་ལེན་གྱིས་ལྕགས་ཕྱེ་བསྡུས་པ་ལྟར་འུབ་ཀྱིས་བསྡུས་ནས་བསྒྲུབ་བྱའི་སྙིང་གར་ཐིམ་པས་དྭངས་མའི་འོད་ཀྱིས་ལུས་ཀྱི་ནང་ཐམས་ཅད་གང་བས་སྔོན་ལས་འཕྲལ་རྐྱེན་ལས་བྱུང་བའི་ཚེ་ཐུང་བའི་མཚན་མ་ཐམས་ཅད་རབ་ཏུ་ཞི་ནས། ཚེ་མི་ཤིགས་པ་རྡོ་རྗེ། མི་འགྱུར་བ་གཡུང་དྲུང༌། མི་ནུབ་པའི་རྒྱལ་མཚན་དུ་བྱས་ཏེ་འཆི་བ་མེད་པ་ཚེ་ཡི་དངོས་གྲུབ་ཐོབ་པའི་མོས་པ་མཛོད། ཚེ་མདའ་གཡབ་ལ། ཨོཾ། མགོན་པོ་སངས་རྒྱས་ཀུན་གྱི་བདག །སོགས་ཚེ་འགུགས་བྱ། དེ་ལྟར་ཚེ་འགུགས་ཤིང་བཅུད་བསྡུས་ཏེ་ཚེ་ཡི་དབང་བསྐུར་དངོས་སྦྱིན་པ་ལ། ཚེ་འབྲང་བཀྲ་ཤིས་གཞལ་མེད་ཁང་གི་དབུས་སུ་རྡོ་རྗེ་སེམས་དཔའ་ཚེ་དཔག་ཏུ་མེད་པའི་ལྷ་ཚོགས་རྣམས་བཞུགས་པའི་སྐུ་ལས་འོད་ཟེར་འཆི་མེད་བདུད་རྩིའི་ཟིལ་མངར་གྱི་རྒྱུན་ཆར་བབ་པ་ལྟར་བྲུལ། ཁྱེད་རང་རྣམས་ཀྱི་སྤྱི་བོ་ནས་ཞུགས། ལུས་ཀྱི་ནང་ཐམས་ཅད་གང༌། དྭངས་མ་འཕོ་མེད་དུ་རྒྱས་བཏབ་པས། སྐུ་རྡོ་རྗེ་སྐྱེ་འཆི་མེད་པ་ཚེ་ཡི་དབང་ཐོབ་པར་མོས་མཛོད། ཚེ་འབྲང་སྤྱི་བོར་བཞག་ལ། ཨོཾ། དཔལ་ལྡན་རིགས་རྣམས་ཀུན་གྱི་བདག །རྡོ་རྗེ་མི་ཕྱེད་གསུམ་གྱི་སྐུ། །དེང་འདིར་སངས་རྒྱས་ཐམས་ཅད་ཀྱི། །མི་འགྱུར་རྟག་པའི་དབང་བསྐུར་རོ། །རྩ་སྔགས་ལ་ཚེ་ཤམ་སྦྲེལ་མཐར། ཀཱ་ཡ་ཨ་བྷི་ཥིཉྩ་ཨོཾ། བདེ་ཆེན་བྱང་ཆུབ་སེམས་ཀྱི་བདུད་རྩིའི་དྭངས་མ་མྱངས་བས་མགྲིན་པའི་ལམ་བརྒྱུད་རྩ་གནས་ཐམས་ཅད་གང༌། བདེ་བའི་ཟིལ་གྱིས་ལས་རླུང་གི་འགྲོ་འོང་འཕོ་བའི་རྒྱུ་བ་འཛག་མེད་དུ་བཅིངས། གཞོམ་མེད་གསང་བའི་སྲོག་གྲུབ། གསུང་རྡོ་རྗེ་གཞོམ་གཞིག་མེད་པའི་ཚེ་ཡི་དབང་ཐོབ་པར་མོས་མཛོད། བདུད་རྩི་མགྲིན་པར་བཞག་ལ་མྱངས་ཏེ། ཨཱཿ དཔལ་ལྡན་རིགས་རྣམས་ཀུན་གྱི་བདག །རྡོ་རྗེ་མི་ཕྱེད་གསུམ་གྱི་གསུང༌། །དེང་འདིར་སངས་རྒྱས་ཐམས་ཅད་ཀྱི། །འགག་མེད་དབྱངས་ཀྱི་དབང་བསྐུར་རོ། །སྔགས་མཐར། ཝཱཀྐ་ཨ་བྷི་ཥིཉྩ་ཨཱཿ དྭངས་མ་མི་ཤིགས་པའི་རྡོ་རྗེ་ཚེ་ཡི་རིལ་བུ་ལྕེ་རྡོ་རྗེ་རྩེ་གསུམ་པའི་ལམ་བརྒྱུད། སྙིང་གའི་ཉི་ཟླའི་གའུའི་དབུས་རླུང་རིག་སེམས་གསུམ་དབྱེར་མེད་པའི་ཐུགས་སྲོག་ཧཱུྃ་དང་ནྲྀ་ཨ་ཡིག་བཅས་ལ་ཐིམ། དྭངས་མ་གཡོ་རྩོལ་དང་བྲལ་བའི་བདེ་ཆེན་རྡོ་རྗེར་བརྟན། འཕོ་མེད་ཡེ་ཤེས་ཀྱི་སྲོག་གྲུབ། ཐུགས་རྡོ་རྗེ་གཡོ་འཁྲུལ་མེད་པའི་ཚེ་ཡི་དབང་ཐོབ་པར་མོས་མཛོད། རིལ་བུ་སྙིང་གར་བཞག་ཅིང་ཁར་བྱིན་ལ། ཧཱུྃ། དཔལ་ལྡན་རིགས་རྣམས་ཀུན་གྱི་བདག །རྡོ་རྗེ་མི་ཕྱེད་གསུམ་གྱི་ཐུགས། །དེང་འདིར་སངས་རྒྱས་ཐམས་ཅད་ཀྱི། །འཁྲུལ་མེད་ཡེ་ཤེས་དབང་བསྐུར་རོ།  །སྔགས་མཐར། ཙིཏྟ་ཨ་བྷི་ཥིཉྩ་ཧཱུྃ། མཐར། ཚེ་ཡི་དྭངས་བཅུད་ཐམས་ཅད་སྙིང་གའི་ཚེ་རྟེན་ལ་འདུས་སོགས་ནས། ཨ་དྷི་ཏིཥྛ་བཛྲ་ཡེ་སྭཱ་ཧཱ། ཞེས་བརྟན་པར་བྱ་བའི་བར་ཚེ་འགུགས་མཐའ་བཞིན་སྦྱར་ལ་རྒྱས་གདབ། ཤིས་བརྗོད་ནས་དམ་ཚིག་ཁས་བླང༌། གཏང་རག །ཡོན་འབུལ། དགེ་བསྔོ་བཅས་བྱས་པས་གྲུབ་པོ།  །ཀུན་མཁྱེན་དགྱེས་པའི་འཛུམ་འོད་ལས། །ཟབ་གསང་བཀའ་གཏེར་གདམས་པའི་དཔྱིད། །བརྩེ་ཆེན་འོད་ཟེར་མ་སྨད་མཐུས། །འདོད་རྒུའི་དཔལ་དུ་ཅི་དགར་འཇོ། །ཞེས་ཡི་དམ་ཞི་བ་རིགས་ཀུན་ཁྱབ་བདག་རྡོ་རྗེ་སེམས་དཔའི་བླ་མ་མཆོད་པ་ལ་བརྟེན་པའི་ཚེ་དབང་གི་མཛེས་རྒྱན་ལེའུ་ཚན་གསུམ་པ་སྟེ་རྡོ་རྗེ་ཚེ་དབང་གྲུབ་པ་རྩལ་གྱིས་སྦྱར་བའོ།  ༈  ཡེ་ཤེས་བདུད་རྩིའི་ཟེགས་མ་རེག་ཙམ་གྱིས། །འཁྲུལ་རྟོག་སྲིད་པའི་ཟུག་རྔུ་དཔྱིས་འབྱིན་ཏེ། །བདེ་ཆེན་ལང་ཚོའི་བརྟན་པ་རྒྱས་པའི་གཉེན། །རྡོ་རྗེ་སེམས་དངོས་དཔལ་ལྡན་བླ་མ་རྒྱལ། །རྡོར་སེམས་བླ་མཆོད་དེ་ཉིད་ཀྱི་བདུད་རྩི་སྨན་དབང་སྦྱིན་པ་ལ་དངོས་དང་ཞར་བྱུང་ངོ༌། དང་པོ་ནི་ཁྱད་པར་གྱི་ཕྲིན་ལས་ནས་ཇི་ལྟར་འབྱུང་བ་ལྟར་རམ། དབང་རྐྱང་གི་སྐབས་སུ་ཁྲོལ་སྒྲུབ་མ་བྱས་ཀྱང་རུང༌། གང་ལྟར་ཡང་དངོས་གྲུབ་བླང་ཞིང་ཛཔ྄་བཟླ་རིག་པའི་མེ་ཏོག་དོར་བའི་བར་དཀྱུས་ལྟར་གྲུབ་པའི་རྗེས། རྩ་བའི་དབང་གི་མཐའ་རྟེན་ནམ་བདུད་རྩི་སྒྲུབ་པའི་མཇུག་ཏུ་བྱ་བ་སྟེ། དེ་ཡང་རྒྱུད་ལས། བདུད་རྩིའི་མཆོག་ནི་མཉམ་པའི་དབྱིངས། །བདུད་རྩིའི་དོན་ནི་སྐྱེ་འཆི་མེད། །བདུད་རྩིའི་གནས་ནི་བྱང་ཆུབ་སེམས། །བདུད་རྩིའི་ལས་ནི་རྣམ་རྟོག་སྦྱོང༌། །བདག་དཔལ་ཚོགས་ཤིང་འགྲོ་དོན་མཛད། །སྨན་གྱི་བྱིན་རླབས་བསམ་མི་ཁྱབ། །ཅེས་གསུངས་པ་ལྟར་སྔ་འགྱུར་རྡོ་རྗེ་སྙིང་པོའི་རིང་ལུགས་ལ་སྒྲུབ་སྡེ་ཆེན་པོ་བརྒྱད་ཀྱི་གཙོ་བོ་རྡོ་རྗེ་ཉི་མའི་རིགས་ཆེ་མཆོག་བདུད་རྩི་ཡོན་ཏན་གྱི་སྒྲུབ་སྡེའི་མན་ངག་ལ་ངེས་པ་དང་དྲང་བའི་དོན་གྱི་བདུད་རྩི་སྣང་སྲིད་དག་མཉམ་བདེ་ཆེན་ཡེ་ཤེས་ཀྱི་ཕྱག་རྒྱར་གཏད་ལ་བླངས་ཏེ་མཆོག་དང་ཐུན་མོང་གི་དངོས་གྲུབ་སྒྲུབ་པའི་གསེང་ལམ་རྨད་དུ་བྱུང་བ་སྟེ། གཟུང་འཛིན་གཉིས་སྣང་གི་ལས་ཉོན་གྱི་བདུད་ཚོགས་གདོད་ནས་རྣམ་པར་དག་པའི་གནས་ལུགས་ཀྱི་ལྟ་བ་ཆོས་ཀྱི་རྩི་མཆོག་ཏུ་དག་པའི་དབང་གིས། དུག་ལྔའི་གཅོང་ནད་ཡེ་ཤེས་ལྔ་ཡི་བཅུད་ཀྱིས་ལེན་པའི་སྨན་གྱི་མཆོག་ཏུ་བསྒྱུར་བའི་ཕྱིར་ཕུང་ཁམས་རིགས་ལྔ་ཡབ་ཡུམ་གྱི་དཀྱིལ་འཁོར་དུ་ཤར་བའི་རྟགས་ཀྱི་བདུད་ལ་དེ་དང་རྣམ་པ་མཐུན་པའི་ལྷ་སྔགས་ཏིང་འཛིན་གྱི་གཟེར་གདབ་པ་དོན་གྱི་བདུད་རྩིའི་རྣལ་འབྱོར་ཆེན་པོས། རྫས་ཀྱི་བདུད་རྩི་ཤ་ལྔ་བདུད་རྩི་ལྔ་རྩ་བ་བརྒྱད་དང་ཡན་ལག་སྟོང་གི་རྩི་སྨན་གྱི་སྦྱོར་བས་བདེ་བ་ཆེན་པོའི་དངོས་གྲུབ་ཀྱི་དམ་རྫས་ལ་བརྟེན་ནས་དོན་གཉིས་ལྷུན་གྲུབ་ཀྱི་ཕྲིན་ལས་རྨད་དུ་བྱུང་བའི་ཚུལ་བཀའ་གཏེར་དག་སྣང་གི་ཆོས་སྒོ་དུ་མར་བྱོན་པ་ལས། སྐབས་སུ་བབ་པ་ཆེ་མཆོག་བདུད་རྩི་གྲུབ་པའི་སློབ་དཔོན་པཎ་ཆེན་བི་མ་ལ་མི་ཏྲ་དང༌། མངའ་བདག་ཁྲི་ལྡེ་ཁུ་དབོན་ཟུང་གི་ཡེ་ཤེས་སྒྱུ་འཕྲུལ་དྲྭ་བའི་འཁོར་ལོར་རྡོ་རྗེའི་ལུང་གིས་ཡང་ཡང་བསྔགས་ཤིང་ཚད་མས་གྲུབ་པ་འབྲེལ་ཚད་དོན་ལྡན་གྱི་རིག་འཛིན་ཆེན་པོ་ཀུན་མཁྱེན་འཇིགས་མེད་གླིང་པ་དང་འཇམ་དབྱངས་མཁྱེན་བརྩེའི་དབང་པོ་རྣམ་གཉིས་ལ་དབང་དང་སྒྲུབ་ཕྲིན་གྱི་རིམ་པ་ཉེ་བརྒྱུད་བྱིན་རླབས་ཀྱི་བཀའ་བབ་ཆུ་བོ་གཅིག་འདྲེས་རྡོ་རྗེ་སེམས་དཔའི་བླ་མཆོད་བདེ་ཆེན་ལམ་བཟང་ལ་བརྟེན་པའི་མྱོང་གྲོལ་བདུད་རྩི་སྨན་གྱི་དབང་བསྐུར་བགྱི་བ་ལ་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས་མཛོད། ཨོཾ་ཨཱཿཧཱུྃ། བདག་གཞན་བླ་མེད་བསྙེན་སྒྲུབ་འདི་དག་གིས། །སྡིག་སྒྲིབ་ཉམས་ཆག་མ་ལུས་ཀུན་བྱང་ནས། །ཚེ་འདི་ཉིད་ལ་རིག་འཛིན་མཆོག་འགྲུབ་ཅིང༌། །བྱིན་རླབས་རྩལ་དབང་གཟི་བརྗིད་ནུས་མཐུ་ལྡན། །སྐུ་གསུང་ཐུགས་ཀྱི་དངོས་གྲུབ་བསྩལ་དུ་གསོལ། །ལན་གསུམ། བཅུད་ལྡན་སྨན་གྱི་ཕོ་བྲང་འདི་ཉིད་བླ་མ་དཔལ་རྡོ་རྗེ་སེམས་དཔའ་ཡབ་ཡུམ་རིགས་ཀུན་འདུས་པའི་བདག་ཉིད་ཆེན་པོའི་ཡེ་ཤེས་ཀྱི་འཁོར་ལོ་ཡན་ལག་བདུན་དང་ཁ་སྦྱོར་བརྒྱད་ལྡན་ལུས་དཀྱིལ་གྱི་ལྷ་དང་བཅས་པ་དངོས་སུ་གསལ་བ་ཁྱེད་རང་རྣམས་ཀྱི་གནས་གསུམ་དུ་བཞག་ཅིང་གསང་བ་གསུམ་གྱི་རྡོ་རྗེའི་བྱིན་གྱིས་བརླབས་ཤིང་དབང་བསྐུར་བས་ཆོས་ཀྱི་བདུད་རྩིས་སྣང་སྲིད་བདེ་ཆེན་དུ་ཤར། གསུང་རྫས་ཀྱི་བདུད་རྩིས་ཕུང་ཁམས་དྭངས་མར་སྨིན། ཐུགས་རྟགས་ཀྱི་བདུད་རྩིས་དུག་ལྔ་ཡེ་ཤེས་སུ་དག །ཡེ་ཤེས་དོན་གྱི་བདུད་རྩིས་ལྷན་སྐྱེས་རྣམ་པར་མི་རྟོག་རང་བྱུང་རྡོ་རྗེ་སེམས་དཔའི་མཁའ་ཁྱབ་ནམ་མཁའི་རྡོ་རྗེའི་དབྱིངས་སུ་མངོན་པར་བྱང་ཆུབ་པའི་དབང་དང་དངོས་གྲུབ་མ་ལུས་པ་ཐོབ་པར་མོས་ཤིག ཧཱུྃ། རྟོག་འདུལ་དམ་ཚིག་བླ་ན་མེད། །དངོས་གྲུབ་ཀུན་གྱི་དབྱིག་ཆེན་པོ། །རྡོ་རྗེ་སེམས་དཔའི་ཡེ་ཤེས་ཀྱི། །སྐུ་གསུང་ཐུགས་ཀྱི་དབང་བསྐུ་ར་རོ།  །ཞེས་དང༌། སྔགས་མཐར། ཀཱ་ཡ་ཝཱཀྐ་ཙིཏྟ་ཨ་བྷི་ཥིཉྩ་ཧཱུྃ། ཞེས་གནས་གསུམ་དུ་རེག བདུད་རྩི་སྤྲུལ་པའི་དཀྱིལ་འཁོར་འོད་དུ་ཞུ་ནས་ཁྱེད་རང་རྣམས་ལ་ཐིམ་པས་བྱིན་རླབས་ཡོངས་རྫོགས་རྒྱུད་ལ་བརྟན་པར་མོས་ཤིག །འཆི་མེད་ཀྱི་ཚེ་སྟེར་བ། ཉམས་ཆག་སྐོང་བ་སོགས་མཆོག་ཐུན་གྱི་དངོས་གྲུབ་མཐའ་དག་བདུད་རྩིའི་མཐུས་གྲུབ་པ་ལ་ངོ་མཚར་བའི་ཆེ་བ་བརྗོད་པ་འདིའི་རྗེས་ཟློས་མཛོད། ཨ་ཧོ་མ་ཧཱ་སུ་ཁ་ཧོ། ཞེས་རྟོགས་པ་བརྗོད། བདུད་རྩི་བསྡུ་བ་པོ་འཇམ་དཔལ་རྣོན་པོ་ཡིན་པས་དཀྱིལ་འཁོར་བ་རྣམས་ཀྱིས་འཇམ་དཔལ་རྣོན་པོ་ལ་གཏད་ནས་གནང་བ་བྱིན་པར་བསམ་ལ་སློབ་དཔོན་གྱིས། བཛྲ་པྲ་བེ་ཤ་ཡ་ཕཊ། ཞེས་བརྗོད་དེ་སྨན་ཐོད་ལ་དཀྲིས་པའི་སྲད་བུ་བཀྲོལ་ནས་སྨན་ཁ་ཕྱེ་ལ། སརྦ་པཉྩ་ཨ་མྲྀ་ཏ་ཨ་བེ་ཤ་ཡ་ཨཱཿ ཞེས་བརྗོད་པས། བདུད་རྩིའི་དྭངས་མ་དཀར་དམར་མཐིང་གའི་འོད་ཀྱི་རྣམ་པར་བསམ། ནང་མཆོད་དང་སྦྱར་ལ་གཞུང་ལྟར་སྨན་མཆོད་དང༌། བརྒྱུད་པའི་མཚན་དོན་སྦྱར་ན་བརྒྱུད་འདེབས་ལྟར་ལ། ཚིག་རྐང་བཞི་པ། སྨན་མཆོད་འབུལ་ལོ་ཆོས་སྐུའི་ཡེ་ཤེས་སྐྱེད། སོགས་དང༌། ཨོཾ་མ་ཧཱ་སརྦ་པཉྩ་ཨ་མྲྀ་ཏ་ཁཱ་ཧི། ཞེས་སྔགས་བཅས་སྦྱར། རྫོགས་པར་གྲུབ་རྗེས། བདུད་རྩི་སྙིང་པོ་ཅན་གྱི་དབུས། །སངས་རྒྱས་ཀུན་གྱི་སྐུ་གསུང་ཐུགས། །ཡི་གེ་གསུམ་གྱི་རྣམ་པ་ཅན། །དམ་ཚིག་ཕྱག་རྒྱ་གཉན་པོས་བླངས། །སྔགས་མཐར། ཀཱ་ཡ་སིདྡྷི་ཨོཾ། ཝཱཀྐ་སིདྡྷི་ཨཱཿ ཙིཏྟ་སིདྡྷི་ཧཱུྃ། ཞེས་བརྗོད་ཅིང་གནས་གསུམ་དུ་ཐིག་ལེ་བྱས་ལ་མྱང༌། སློབ་མ་ལའང་སྦྱིན། དེ་དག་གིས་བདུད་རྩི་སྨན་གྱི་དབང་བསྐུར་གྲུབ་པ་སྟེ་ཕན་ཡོན་གྱི་རིམ་པའང་རྒྱུད་ལས། འཐུང་ན་ངན་སོང་སྒྲིབ་པ་འབྱང༌། །རྟག་བསྟེན་དངོས་གྲུབ་མཆོག་ཀྱང་འགྲུབ། །བཞི་བརྒྱ་རྩ་བཞིའི་ནད་སེལ་ཞིང༌། །ལྷ་ལ་རྟག་ཏུ་མཆོད་བྱས་ན། །བདག་དང་གཉིས་སུ་མེད་པར་འགྱུར། །མི་མཐུན་ཕྱོགས་ལ་གཏོར་བྱས་ན། །དྲག་པོ་གཏུམ་པོའང་ལྷན་ནེར་འགྱུར། །གཞན་ཡང་དངོས་གྲུབ་ཐམས་ཅད་ནི། །ཇི་ལྟར་དམིགས་པ་བཞིན་དུ་འགྲུབ། །ཅེས་སོགས་རྒྱ་ཆེར་བསྔགས་པའི་ཕན་ཡོན་ལ་སྤྲོ་བས་ཚུལ་བཞིན་སྒྲུབ་པའི་བདུད་རྩིའི་དམ་རྫས་ཀྱི་ཕུད་ཀྱིས་དཀྱིལ་འཁོར་གྱི་ལྷ་ལ་བདུད་རྩི་དང༌། སྲེག་རྫས་སུ་འབུལ། རིན་པོ་ཆེའི་གྭའུ་ལ་སོགས་པར་དངོས་གྲུབ་ཀྱི་རྟེན་སྤྱི་བོའམ་མགུལ་དུ་བཅངས་ནས་ཐུན་བཞིར་ཆག་མེད་དུ་རྣལ་འབྱོར་དང་ལྡན་པས་བསྟེན། མཁའ་འགྲོ་དང་ཆོས་སྐྱོང་ལ་གཏོར་མ་དང་མཉམ་དུ་འབུལ། སྒྲུབ་པ་པོ་དང་དོན་དུ་གཉེར་བ་གཞན་ལའང་ཅི་ནུས་སུ་སྦྱིན། སྒྲུབ་པའི་གནས་སོགས་ས་ཡི་དཔལ་དུ་མི་འཛད་པའི་གཏེར་དུ་སྦ་བ་དང༌། རྒྱ་མཚོ་དང་ཆུ་ཀླུང་དུ་འདོར་བ། བཟང་ཤིང་གི་བསང་སྤྲིན་རླུང་དང་སྦྱར་བས་སྣོད་བཅུད་ཀུན་ལ་ཁྱབ་པར་སྤེལ་བ་སོགས་འབྱུང་ལྔ་དང་སྦྱར་བའི་ཕྲིན་ལས་རྒྱས་པར་སྤེལ་ཞིང་མཐོང་ཐོས་དྲན་རེག་གྲོལ་བ་དྲུག་གི་ཕྲིན་ལས་རྒྱ་ཆེར་སྐྱོང་བའི་གཡར་དམ་བཟུང་དགོས་པའོ།  །གཉིས་པ་ཞར་བྱུང་རིལ་བུའི་དབང་བསྐུར་སྐབས། རྩ་གཞུང་གི་བུམ་དབང་གྲུབ་པའི་རྗེས། རིན་པོ་ཆེའི་བུམ་པ་གཞལ་མེད་ཁང་གི་དབུས་སུ་རིལ་བུ་རྣམས་བླ་མ་དང་གཉིས་སུ་མེད་པའི་དཔལ་རྡོ་རྗེ་སེམས་དཔའ་ཞི་ཁྲོ་རབ་འབྱམས་རྒྱལ་བའི་སྤྱི་གཟུགས་ཆེན་པོར་བཞུགས་པའི་སྐུ་ལས་ཡེ་ཤེས་ཀྱི་འོད་ཟེར་དཔག་ཏུ་མེད་པ་བྱུང༌། སློབ་མའི་སྒོ་གསུམ་ལ་ཐིམ་པས་ལས་དང་ཉོན་མོངས་པའི་སྒྲིབ་པ་སྦྱངས། རྟོག་སྒྲིབ་ཉམས་ཆག་ཐམས་ཅད་དག །བྱིན་རླབས་དང་དངོས་གྲུབ་མཐའ་དག་ཐོབ་པར་མོས་ཤིག །རིལ་བུ་སྤྱི་བོར་བཟུང་སྟེ། དབྱིངས་ཀྱི་བུམ་པར་རིག་པའི་ལྷ་ཚོགས་རྣམས། །ཡེ་ཤེས་ཐུགས་རྗེའི་གཟི་བྱིན་རབ་འབར་བས། །སྒོ་གསུམ་རྡོ་རྗེ་གསུམ་དུ་བྱིན་བརླབས་ནས། །དངོས་གྲུབ་སྩོལ་ཞིང་བརྟན་པར་བཞུགས་སུ་གསོལ། །སྔགས་མཐར། ཀཱ་ཡ་ཝཱཀྐ་ཙིཏྟ་སརྦ་སིདྡྷི་ཕ་ལ་ཧཱུྃ། ཞེས་བརྗོད་ཅིང་གནས་གསུམ་དུ་གཏུག། རིལ་བུ་ལྷར་གསལ་བ་རྡོ་རྗེ་ལྕེ་ཡི་ལམ་ནས་བརྒྱུད་དེ་སྙིང་དབུས་མི་ཤིགས་པའི་ཐིག་ལེ་དང་དབྱེར་མེད་པར་ཡེ་ཤེས་སེམས་དཔའི་ཚུལ་གྱིས་བྱང་ཆུབ་བར་དུ་བཞུགས་ཤིང་དབང་དང་དངོས་གྲུབ་སྩོལ་བར་མོས་ལ་ཡི་གེ་བརྒྱ་པ་བཟླ་བཞིན་དུ་རིལ་བུ་མིད། དེ་ལྟར་ཚུལ་བཞིན་བསྒྲུབས་པའི་དམ་རྫས་དེ་ཉིད་མྱང་བའི་ཕན་ཡོན་ཡང༌། རྡོར་སེམས་ཐུགས་ཀྱི་སྒྲུབ་པའི་གཞུང་ལས། དེ་ལྟ་བུ་ཡི་དམ་རྫས་དེ༔ གང་གིས་ཟོས་པས་ཉམས་ཆག་སྦྱངས༔ དམ་ཚིག་དངོས་གྲུབ་ཀུན་ཐོབ་ནས༔ འཕོ་མེད་བདེ་ཆེན་འགྲུབ་པར་འགྱུར༔ ཞེས་གནས་སྐབས་སུ་དམ་ཚིག་ཉམས་ཆག་གཙོ་བོར་གྱུར་པའི་སྡིག་སྒྲིབ་ཐམས་ཅད་ལྷག་མེད་དུ་བྱང་ཞིང༌། ཕྲིན་ལས་བཞི་དང་གྲུབ་པ་ཆེན་པོ་བརྒྱད་ལ་སོགས་པའི་ཐུན་མོང་གི་དངོས་གྲུབ་ཐམས་ཅད་ཐོབ་པ་དང༌། མཐར་ཐུག་བདེ་བ་ཆེན་པོ་ཁ་སྦྱོར་ཡན་ལག་བདུན་ལྡན་དཔལ་རྡོ་རྗེ་སེམས་དཔའི་གོ་འཕང་དཀའ་བ་མེད་པར་འགྲུབ་པའི་མ་བསྒོམས་སངས་རྒྱས་ཆོས་ཀྱི་གྲོལ་ལམ་ཕན་ཡོན་བསམ་མི་ཁྱབ་པའི་བདག་ཉིད་ཅན་གྱི་དབང་བསྐུར་གྲུབ་པའོ།  །དབང་གཞུང་གི་གསང་དབང་ལ་འཇུག་དགོས་སོ།  །ཐམས་ཅད་མཁྱེན་པའི་ཡེ་ཤེས་ཀྱི། །སྤྱོད་ཡུལ་ཟབ་རྒྱས་ཆོས་ཀྱི་སྙིང༌། །རྗེས་བརྩེའི་འཆར་ཀའི་འོད་ཟེར་གྱིས། །སྣང་འདི་སྐལ་བཟང་ཀུན་དགའི་དཔྱིད། །དཔལ་རྡོ་རྗེ་སེམས་དཔའི་བླ་མཆོད་དང་འབྲེལ་བའི་བདུད་རྩི་སྨན་གྱི་དབང་ཞར་བྱུང་དང་བཅས་པའི་ལེའུ་ཚན་བཞི་པ་སྟེ་ཕྲིན་ལས་རོལ་པའི་རྡོ་རྗེས་སྦྱར་བའོ།


༈  རྒྱུད་དང་སྒྲུབ་སྡེའི་ཆོས་ཚུལ་རྒྱ་མཚོ་ཀུན། །ཀུན་འདུས་སྒྲུབ་ཆེན་སྡེ་བརྒྱད་ཆིག་དྲིལ་ཆོས། །ཆོས་ཀུན་ཉིང་ཁུ་བླ་མ་ཡི་དམ་མཆོག །མཆོག་སྒྲུབ་རིག་འཛིན་ཐུགས་ཀྱི་ཐིག་ལེར་གུས།  །དེ་ལ་འདིར་དངོས་གྲུབ་ཀྱི་རྩ་བ་ཡི་དམ་སྤྱི་དྲིལ། བླ་མ་ཤིན་ཏུ་དྲག་པོ་མཐིང་གའི་ཐུགས་སྒྲུབ། སྒྲུབ་ཆེན་བཀའ་བརྒྱད་དྲག་པོ་དཔལ་ཆེན་འདུས་པ་རྩ་བའི་དཀྱིལ་འཁོར་གྱི་སྨིན་བྱེད་རྒྱས་པར་འགོད་པ་ལ། སྔོན་འགྲོ་སྟ་གོན། དངོས་གཞིའི་དབང་བསྐུར་གཉིས་ཀྱི། དང་པོ་ནི། སྤྱི་ཆིངས་ཞི་ཁྲོའི་དཀྱིལ་འཁོར་གྱི་སྟ་གོན་ལྟར་ལ། ཁྱད་པར་ལྷ་སྟ་གོན་སྐབས་མཎྜལ་སྟེང་ཚོམ་བུ་གཙོ་འཁོར་དགུ །དེ་རྒྱབ་བཞི་བཅས་བཀོད། བདག་བསྐྱེད་དཔལ་ཆེན་ཕྱག་རྒྱ་གཅིག་པ་རྒྱུན་གྱི་རྣལ་འབྱོར་ཀུན་མཁྱེན་བླ་མ་མཁྱེན་བརྩེའི་གསུང་ལྟར་འཐུས། ས་ལྷ་དང་གཉུག་མར་གནས་པ་ལ་དཀར་གཏོར་བཏང༌། མཆོད་པ་བྱིན་བརླབས། ཧཱུྃ༔ དབྱིངས་ནས་ཡི་གེ་འབྲུ་གསུམ་སོགས། སྨན་རཀ་གཏོར་མ་བྱིན་རླབས་བཅས་དཔལ་ཆེན་གཞུང་ལྟར་ལ། ཚོམ་བུ་ལས་སྔགས་ཀྱིས་བསང༌། སྭ་བྷཱས་སྦྱངས། སྟོང་པའི་ངང་ལས་མདུན་གྱི་རྟེན༔ འབྱུང་བ་རིམ་བརྩེགས་རི་རབ་སྟེང༔ ཕྱི་རོལ་རྡོ་རྗེའི་སྲུང་འཁོར་དང༔ དྲག་པོའི་གཞལ་ཡས་མཚན་རྫོགས་དབུས༔ དེ་སྟེང་ཧཱུྃ་བབ་ཡོངས་གྱུར་ལས༔ རྡོ་རྗེ་སྔོན་པོ་རྩེ་ལྔ་པ༔ ཡོངས་གྱུར་འབྲས་བུའི་ཧེ་རུ་ཀ༔ སོགས་ལས་བྱང་རྒྱས་པ་ལྟར་དམ་ཚིག་པ་བསྐྱེད། ཡེ་ཤེས་པ་བསྟིམ། ཕྱག་མཆོད་བསྟོད་པའི་བར་དཀྱུས་ལྟར་རམ། མཆོད་པའི་ལས་རིམ་འཇམ་མགོན་མཁྱེན་བརྩེ་རིན་པོ་ཆེའི་མངོན་རྟོགས་འབྲིང་པོ་ལྟར་བཏང་ཡང་རུང༌། འབྲུ་གསུམ། གུ་རུ་ཤྲཱི། བཛྲ་ཙཎྜ་ཅུང་ཟད་རེ་བཟླས་ལ། རྡོར་དྲིལ་དང་སྤོས་ཐོགས་ཏེ། རང་གི་ལྕེ་ཧཱུྃ་ལས་སྐྱེས་སོགས་ཞི་ཁྲོའི་སྟ་གོན་ལྟར་དང༌། བུམ་པ་སྟ་གོན་ལ་རྣམ་རྒྱལ་བུམ་པ་མགུལ་ཆིངས་སྔོན་པོ་ཁ་རྒྱན་གཟུངས་རྡོར་སོགས་ཆས་ལྡན་ལ་མཆོད་པས་བསྐོར་བ་བཤམས། མཆོད་པ་བྱིན་རླབས་ལས་བྱང་ལྟར་སྔོན་དུ་འགྲོ་བས། ཤཱུ་ནྱ་ཏཱས་བསང་སྦྱངས། སྟོང་པའི་ངང་ལས་བུམ་གདན་པདྨ་འདབ་བརྒྱད་ཀྱི་སྟེང་དུ་བྷྲཱུྃ་ཡིག་ཡོངས་སུ་གྱུར་པ་ལས་འོད་སྣང་རིན་པོ་ཆེ་ལས་གྲུབ་པའི་བཀྲ་ཤིས་རྣམ་རྒྱལ་གྱི་བུམ་པ་ལྟོ་བ་ཟླུམ་ལ་ཞབས་ཞུམ་པ། མགྲིན་པ་རིང་ལ་ཁ་གཡེལ་བའི་མདུན་ངོས་མཆུ་འཕྱང་བ། ལྷ་རྫས་ལས་གྲུབ་པའི་པཉྩ་ལི་ཀའི་མགུལ་ཆིངས་པྲོག་གསུམ་དང་ལྡན་པ། བྱང་ཆུབ་ལྗོན་པའི་ཁ་རྒྱན་ཅན། ནང་ཆོས་སྐུའི་རང་བཞིན་ཡངས་ཤིང་མཐའ་མི་མངོན་པར་གཟུགས་སྐུ་གཉིས་ཀྱི་ཆ་བཅུད་སོ་ལྔས་གཏམས་པ། ཕྱི་བུམ་པའི་རྣམ་པ་ལ་ནང་ཡེ་ཤེས་ཀྱི་གཞལ་མེད་ཁང་རྣམ་པར་ཐར་པའི་སྒོ་གསུམ་གྱི་བདག་ཉིད་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་གྱི་བརྡ་དོན་རྟགས་གསུམ་ཡོངས་སུ་རྫོགས་པའི་ཕོ་བྲང་ཆེན་པོའི་དབུས་སུ་སྤྱི་དཔལ་ཆེན་པོ། ཤར་དུ་ཡང་དག །ལྷོར་གཤིན་རྗེ། ནུབ་ཏུ་རྟ་མགྲིན། བྱང་དུ་ཕུར་པ། ཤར་ལྷོར་མ་མོ། ལྷོ་ནུབ་ཏུ་རིག་འཛིན། ནུབ་བྱང་དུ་དྲག་སྔགས། བྱང་ཤར་དུ་མཆོད་བསྟོད་བདེ་གཤེགས་སྒྲུབ་པ་བཀའ་བརྒྱད་དྲག་པོ་དཔལ་ཆེན་འདུས་པ་བདུན་བརྒྱ་ཉེར་ལྔའི་ལྷ་ཚོགས་གསལ་ལ་མ་འདྲེས་ཤིང༌། སྣང་ལ་རང་བཞིན་མ་གྲུབ་པར་བཞུགས་པའི་གནས་གསུམ་དུ་ཡི་གེ་གསུམ་གྱིས་མཚན་པ་ལས་འོད་ཟེར་འཕྲོས་པས་རང་བཞིན་གྱི་གནས་ནས་སྒོམ་པ་དང་འདྲ་བའི་ཡེ་ཤེས་པ་བཛྲ་ས་མཱ་ཛཿ སྤྱན་འདྲེན་ནི། ཧཱུྃ༔ དམིགས་མེད་མཁའ་ལྟར་དག་ཅིང་ཁྱབ་པའི་སྐུ༔ སྤྱན་འདྲེན་གཤེགས་སུ་གསོལ་བར་མི་དམིགས་ཀྱང༔ ཐུགས་རྗེའི་ངང་ཉིད་ཆོས་སྐུའི་རོལ་པ་ལས༔ ཡེ་ཤེས་སྒྱུ་མར་རོལ་ཞིང་གཤེགས་སུ་གསོལ༔ ཨེ་ཧྱ་ཧི་བྷ་ག་ཝན་མ་ཧཱ་ཀ་རུ་ཎི་ཀ་དྲྀ་ཤྱ་ཧོ༔ ཛཿཧཱུྃ་བྃ་ཧོཿས་བསྟིམ༔ མཆོད་པ་ནི༔ ཧཱུྃ༔ དངོས་སུ་འབྱོར་དང་ཡིད་ཀྱིས་རྣམ་སྤྲུལ་པའི༔ སོགས་མཐར། རཱུ་པ་ནས་སྤརྴེའི་བར་དང༌། སརྦ་པཉྩ་རཀྟ་བ་ལིངྟ་མ་ཧཱ་སུ་ཁ་དྷརྨ་དྷཱ་ཏུ་པཱུ་ཛ་ཧོཿ བསྟོད་པ་ནི༔ ཧཱུྃ༔ རྡོ་རྗེ་གླུ་མ་ལས་ཀྱི་ཕྱག་རྒྱ་ཡིས༔ དབྱངས་ཀྱི་ཡན་ལག་ཆོས་ཀྱི་ཕྱག་རྒྱའི་སྤྲིན༔ རིགས་ལྔའི་དམ་ཚིག་ཕྱག་རྒྱ་ལ་སྦྱར་ནས༔ ལྷར་སྣང་ཕྱག་རྒྱ་ཆེན་པོར་བསྟོད་པར་བགྱི༔ བཟླས་པ་ནི། གཟུངས་ཐག་ལ་འཇུས་ནས། བདག་བསྐྱེད་ཀྱི་ཐུགས་ཀ་ནས་སྔགས་ཀྱི་འོད་ཟེར་གཟུངས་ཐག་འོད་ཀྱི་སྦུ་གུ་ཅན་ལ་འཁྲིལ་ཏེ་སོང་བས་བུམ་ལྷའི་ཐུགས་རྒྱུད་བསྐུལ། བདེ་སྟོང་གི་ཡེ་ཤེས་བདུད་རྩིའི་རང་བཞིན་ཅན་དུ་བབ་པས་བུམ་པ་གང་བར་བསམ་ཞིང༌། རྩ་སྔགས་དབྱངས་གསལ་སྦྲེལ་བ་བཟླ། མཐར་གོང་ལྟར་མཆོད་བསྟོད་ཡིག་བརྒྱ་བཟླ། དུང་ཆོས་ཕུལ་ལ། ཨོཾ་ཨཱཿཧཱུྃ་བུམ་པའི་ལྷ་ཚོགས་རྟེན་དང་བརྟེན་པར་བཅས་པ་འོད་དུ་ཞུ་ནས་བུམ་ཆུ་དང་རོ་གཅིག་ཏུ་གྱུར། ཞེས་བརྗོད། ལས་བུམ་ལ། སྭ་བྷཱ་ཝས་སྦྱངས། སྟོང་པའི་ངང་ལས་རིན་པོ་ཆེའི་བུམ་པ་ཚད་དང་མཚན་ཉིད་རྫོགས་པ་བཅུད་ཀྱིས་གཏམས་པའི་དབུས་སུ་པྃ་ལས་པདྨ་དང་རྃ་ལས་ཉི་མའི་གདན་ལ་ཧཱུྃ་ལས་ཁྲོ་ཆེན་བདུད་རྩི་འཁྱིལ་བ་སྐུ་མདོག་ལྗང་ནག་མི་བཟད་པའི་ཉམས་ཅན། ཕྱག་གཡས་སྣ་ཚོགས་རྡོ་རྗེ་དང་གཡོན་སྡིགས་མཛུབ། ཞབས་གཉིས་དོར་སྟབས་སུ་བཞུགས་པའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ་གིས་མཚན་པ་ལས་འོད་ཟེར་འཕྲོས་པས་རང་འདྲའི་ཡེ་ཤེས་པ་སྤྱན་དྲངས། བཛྲ་ས་མ་ཛཿ ཛཿཧཱུྃ་བྃ་ཧོཿ གཉིས་སུ་མེད་པར་གྱུར། ཨརྒྷཾ་སོགས་ཀྱིས་མཆོད། བསྟོད་པར་འོས་པས་བསྟོད། ཐུགས་ཀར་ཉི་དཀྱིལ་ཧཱུྃ་གི་མཐར་སྔགས་ཕྲེང་འཁོར་བ་ལས་འོད་ཟེར་མེ་སྟག་ལྟ་བུ་འཕྲོས་པས་གདོན་བགེགས་དང་སྡིག་སྒྲིབ་ཐམས་ཅད་བསྲེགས། བདུད་རྩིའི་རྒྱུན་བབ་པས་བུམ་པ་གང་བར་གྱུར། ཨོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུྃ་ཕཊ༔ ཅི་ནུས་བཟླ། མཐར་དུང་ཆོས་ཕུལ་ལ། ཨོཾ་ཨཱཿཧཱུྃ་བུམ་ལྷ་བདེ་སྟོང་གི་ངོ་བོར་ཞུ་བ་ཁྲོ་བོའི་རྡུལ་ཕྲ་རབ་ཏུ་གྱུར་པར་བསམ་མོ།  །སློབ་མ་སྟ་གོན་གྱི་སྔོན་འགྲོའི་ཆོས་བཤད་ཅུང་ཟད་བསྡུ་ན། དེ་ཡང་ངོ་བོ་མི་ཁོམ་པ་བརྒྱད་ཀྱི་ལྡོག་ཆ་བརྒྱད་དང༌། དེའི་ཁྱད་པར་གྱི་ཆོས་འབྱོར་པ་བཅུ་སྟེ་དལ་འབྱོར་གྱི་ཆོས་བཅོ་བརྒྱད་དང་ལྡན་པའི་མི་ལུས་རིན་པོ་ཆེ་རྒྱུ་དང་དཔེ་དང་གྲངས་སོགས་གང་གི་སྒོ་ནས་བསམས་ཀྱང་ཤིན་ཏུ་རྙེད་པར་དཀའ་ཞིང༌། ཕན་འདོགས་བསམ་གྱི་མི་ཁྱབ་པ་དང་ལྡན་པ་འདི་ལྟ་བུ་རྙེད་དུ་ཟིན་ནའང༌། ཕྱི་སྣོད་ཀྱི་འཇིག་རྟེན་སྲ་ཞིང་འཐས་པ་ལྟར་སྣང་བ་རྣམས་ཀྱང་མཐར་མེ་བདུན་ཆུ་གཅིག་གིས་འཇིག་པའི་ཚེ་ཐལ་བ་ཙམ་ཡང་ལུས་པར་མི་འགྱུར། ནང་བཅུད་ཀྱི་སེམས་ཅན་ཐམས་ཅད་ཀྱང་སྐྱེས་ནས་ཚེ་ཐར་དུ་སོང་བ་གཅིག་ཀྱང་མེད་པས། རང་ཉིད་ཀྱང་ངེས་པར་འཆི་བར་མ་ཟད། དོ་ནུབ་ཙམ་ཡང་མི་འཆི་བའི་གདེང་ནི་མེད། འཆི་བའི་ཚེ་ཆོས་རྣམ་པར་དག་པ་ཁོ་ན་མ་གཏོགས་གང་གིས་ཀྱང་མི་ཕན། ཤི་ནས་ཅང་མེད་དུ་མི་འགྲོ་བར་ལས་འབའ་ཞིག་གི་རྗེས་སུ་འབྲང་སྟེ། སྡིག་པའི་ལས་ཀྱིས་ངན་སོང་གསུམ་དུ་སྐྱེས་ན་སྡུག་བསྔལ་གྱི་སྡུག་བསྔལ་བཟོད་པའི་བླག་མེད། ཟག་བཅས་ཀྱི་དགེ་བས་མཐོ་རིས་གསུམ་དུ་སྐྱེས་ཀྱང་འགྱུར་བའི་སྡུག་བསྔལ་དང༌། ཁྱབ་པ་འདུ་བྱེད་ཀྱི་སྡུག་བསྔལ་ཁོ་ན་ལས་མ་འདས་པས། ད་རེས་འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་འདི་ལས་ཅིས་ཀྱང་ཐར་བ་ཞིག་བྱ་དགོས། དེའི་ཆེད་དུ་ཐེག་པ་ཆེན་པོའི་དགེ་བའི་བཤེས་གཉེན་མཚན་ཉིད་དང་ལྡན་པ་མཉེས་པ་གསུམ་གྱིས་བསྟེན་ནས། བླང་དོར་གྱི་གནས་ཇི་ལྟར་གསུངས་པའི་དོན་རྣམས་བྱིས་པ་དང་སྡིག་པའི་གྲོགས་ཀྱི་དབང་དུ་མ་སོང་བར་ལག་ལེན་དུ་ཐེབས་ངེས་པའི་འཆི་ཆོས་གཤའ་མ་ཞིག་མ་བྱས་པའི་ཐབས་མེད་དེ། ཆོས་དེའི་འབྲས་བུ་ཐར་པ་བླ་ན་མེད་པ་སངས་རྒྱས་ཀྱི་གོ་འཕང་སྒྲུབ་དགོས་པས་དེའི་ཕྱིར་ཐེག་པ་ཆེན་པོའི་སྒོར་ཞུགས་དགོས། དེ་ལའང་རྒྱུ་ལམ་དུ་བྱེད་པ་མཚན་ཉིད་ཐེག་པ་ལས་ཁྱད་པར་དུ་འཕགས་པ་འབྲས་བུ་ལམ་བྱེད་རྡོ་རྗེ་ཐེག་པ་རྣལ་འབྱོར་བླ་མེད་ཀྱི་རྒྱུད་སྡེ་ཚེ་གཅིག་ལུས་གཅིག་ལ་རྡོ་རྗེ་འཆང་ཆེན་པོའི་གོ་འཕང་ངེས་པར་འགྲུབ་པར་བྱེད་པ་ཡིན་ཞིང༌། དེ་ལའང་གསང་སྔགས་ཀྱི་རྒྱུད་དང་སྒྲུབ་སྡེའི་ཆོས་སྐོར་དཔག་ཏུ་མེད་པ་བཞུགས་པ་ལས། གསང་སྔགས་མ་ཧཱ་ཡོ་ག་སྒྲུབ་སྡེ་རྒྱ་མཚོའི་ཕྱི་མོ་སངས་རྒྱས་གཉིས་པ་སློབ་དཔོན་ཆེན་པོ་ལ་བཀའ་བབ་པའི་བདེ་གཤེགས་སྒྲུབ་པ་བཀའ་བརྒྱད་དེ། འོག་མིན་གྱི་གནས་སུ་ཀུན་ཏུ་བཟང་པོས་ཞི་ཁྲོའི་དཀྱིལ་འཁོར་རབ་འབྱམས་བཀོད་དེ་བཀའ་བརྒྱད་སྤྱི་རྒྱུད་ལྔ། སྒོས་རྒྱུད་བཅུ་ལ་སོགས་པ་བསྟན། རིག་འཛིན་གཙོ་བོ་རྡོ་རྗེ་ཆོས་ཀྱིས་བསྡུས་ནས་དགོངས་འགྲེལ་ལུང་ལྔ་མཛད་ནས་མཁའ་འགྲོ་ལས་ཀྱི་དབང་མོ་ཆེ་ལ་གཉེར་དུ་གཏད་དེ། བསིལ་བའི་ཚལ་གྱི་མཆོད་རྟེན་བདེ་བྱེད་བརྩེགས་པར་གཏེར་དུ་སྦས་པའི་སྒོས་བཀའ་རིག་འཛིན་བརྒྱད་སོ་སོ་དང༌། སྤྱི་རྒྱུད་སློབ་དཔོན་ཆེན་པོ་ལ་བཀའ་བབ་སྟེ་འཕགས་བོད་གཉིས་སུ་འབྲེལ་ཚད་རྡོ་རྗེའི་རིག་འཛིན་གྱི་ས་ལ་སྦྱར་བར་མཛད་པའི་གདུལ་བྱའི་གཙོ་བོ་བོད་ཡུལ་ཆོས་ཀྱི་རྒྱལ་པོ་མངའ་བདག་ཚངས་པ་ལྷ་ཡི་མེ་ཏོག་ལ་བཀའ་བརྒྱད་བདེ་གཤེགས་འདུས་པའི་རྒྱུད་ལུང་མན་ངག་གི་མཛོད་གཏད་དེ་བོད་ཡུལ་མཐའ་དབུས་ཀུན་ཏུ་གཏེར་དུ་སྦས་པ་ལས་གཏེར་ཁ་གོང་འོག་སོགས་གཏེར་སྟོན་གྲུབ་པའི་སྐྱེས་ཆེན་རྣམས་ཀྱིས་རིམ་པར་སྤྱན་དྲངས་ནས་འགྲོ་དོན་རྒྱ་ཆེར་མཛད་པ་ལས་འདི་ནི། དཔལ་ཆེན་ཞལ་ལུང་ལས། འཇམ་དཔལ་ཆོས་ཀྱི་བཤེས་གཉེན་གྱིས༔ བྱིན་གྱིས་བརླབས་པའི་རིག་པ་འཛིན༔ སྨིན་མཚམས་དཔའ་བོའི་རྒྱ་རྟགས་ཅན༔ དེ་ལ་ལས་ཀྱི་དབང་མོ་ཆེས༔ དགོངས་པའི་བརྡ་རིས་སྤྲད་པའི་ཚེ༔ མཁའ་འགྲོའི་གསང་མཛོད་ཆེན་མོ་ལ༔ དབང་བསྒྱུར་ང་ཡི་དགོངས་པའི་མཐིལ༔ དེ་ཡི་སྙིང་ལ་ཡང་དག་ཞུགས༔ སྣང་བ་ཚིག་དང་དཔེ་ཆར་ཤར༔ གཏེར་གྱི་ནང་ནས་ཡང་བཅུད་ཡིན༔ ཞེས་དང༌། རིག་འཛིན་རྩ་རྒྱུད་ཐོད་པའི་དུམ་བུ་ལས། རང་རྒྱུད་སྦས་ཚུལ་ལྟར་བཞུགས་པའི༔ གསུང་སྤྲུལ་བདུན་གྱི་གཅིག་ཤོས་ལ༔ སྨོན་ལམ་གཏད་རྒྱའི་དབང་བསྐུར་བས༔ ནམ་ཞིག་འགྲོ་དོན་དུས་བབ་ཚེ༔ རིག་འཛིན་ཁྱོད་ཀྱིས་བལྟར་ཡོད་ལ༔ ཕལ་གྱིས་བཟུང་དུ་མེད་པ་ཡི༔ མཁའ་འགྲོའི་ཡི་གེ་རྫུ་འཕྲུལ་ཅན༔ སྐུ་གདུང་འབར་བའི་བརྡ་རིས་འདི༔ དབྱིངས་ཀྱི་མཁའ་འགྲོས་སྤྲད་པའི་མོད༔ སོ་སོ་ཡང་དག་རིག་པ་བཞི༔ དག་པ་ཆེན་པོའི་བརྟུལ་ཞུགས་ལ༔ དབང་བསྒྱུར་ཆོས་ཀྱི་གཏེར་ལ་དབང༔ ཞེས་རྡོ་རྗེའི་ལུང་གིས་ཇི་ལྟར་བསྟན་པའི་བདེན་དོན་མངོན་སུམ་དུ་གྱུར་པ་མངའ་བདག་ཆོས་ཀྱི་རྒྱལ་པོ་དང༌། དེའི་སྐྱེ་བ་དེ་མ་ཐག་པ་རྒྱལ་སྲས་ལྷ་རྗེ་ཁུ་དབོན་ཟུང་གིས་མི་སློབ་འབྲས་བུ་མངོན་གྱུར་གྱི་རང་གཟུགས། གཏེར་སྟོན་རྐྱང་པའི་སྐྱེ་བ་བཞེས་པའི་བཅུ་གསུམ་པ་མཁས་ཤིང་གྲུབ་པའི་གཙུག་རྒྱན་ཀུན་མཁྱེན་ཆོས་ཀྱི་རྒྱལ་པོ་གར་དབང་འཇིགས་མེད་གླིང་པ་ལ་བཀའ་བབ་པའི་རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་ཆོས་སྐོར་ལ་རིག་འཛིན་བླ་མ་ཉིད་ཀྱི་ཕྱི་ནང་གསང་བ་ཡང་གསང་གི་སྒྲུབ་ཚུལ་དུ་མ་ཡོད་པ་ལས་གསང་བ་སྒྲུབ་སྡེ་བརྒྱད་ཀུན་འདུས་ཡི་དམ་སྤྱི་སྒྲུབ་བླ་མ་དྲག་པོ་དཔལ་ཆེན་འདུས་པའི་རྩ་བའི་དཀྱིལ་འཁོར་ཆེན་པོར་སྨིན་པར་བྱེད་པ་ལ་སྔོན་འགྲོ་སློབ་མ་སྟ་གོན་དང༌། དངོས་གཞིའི་དབང་བསྐུར་གཉིས་སུ་ཡོད་པ་ལས་ཐོག་མར་གྱུར་པ་སློབ་མ་ལྷག་པར་གནས་པའི་རིམ་པ་ཞུ་བའི་དོན་དུ་མཎྜལ་ཕུལ། སྦྱར་བ་ལས་གཞན་ཞི་ཁྲོ་ལྟར་ལས་དམིགས་བསལ་མ་མཆིས། དངོས་གཞིའི་དཀྱིལ་འཁོར་བཤམ་བཀོད་ལ་དཔལ་ཆེན་གཞུང་མཐུན་གྱི་དཀྱིལ་འཁོར་བཀྲམ་པའི་སྟེང༌། རིགས་དབང་ལྔ། དཔལ་ཆེན་གཙོ་དགུ་ཁྱུང་དང་བཅས་པའི་ཙཀླི། གསང་ཐོད། རིག་ཙཀ །མེ་ལོང་ཤེལ་རྡོ། རྗེས་གནང་ཆས། མིག་དར། མེ་ཏོག །དོར་ར། མིག་ཐུར་སོགས་གཞུང་ལྟར་ཚོགས་པར་བྱས་ལ། བསྐྱེད་རིམ་གྱི་གོ་དོན་ལྷོངས་སུ་གྱུར་པ་དག་གིས་བདག་མདུན་བུམ་གསུམ་ཆོ་ག་གཅིག་གིས་བསྒྲུབས་ཀྱང་རུང་བ་སྔོན་གྱི་བླ་མ་དངོས་གྲུབ་བརྙེས་པ་དག་གིས་ཕྱག་བཞེས་ཀྱང་ཡིན་ལ། ན་ཚོད་ཡོལ་ཡང་བྱིས་པའི་རྣམ་རིག་ཅན་རྣམས་ནི་ལས་དང་པོ་པ་ཡིན་པས་བདག་མདུན་བུམ་གསུམ་གྱི་རྣམ་དབྱེ་ཕྱེད་པའང་མེད་ན་བསྐྱེད་རིམ་གོམས་བརྟན་གྱི་དངོས་དོན་ལ་ཇི་ལྟར་འབྱེད། དེ་བས་ན་ཆོས་ལ་དབང་ཟ་བ་སྤངས་ཏེ། སྒྲུབ་གཞུང་བཞིན་དུ་བདག་བསྐྱེད་བཟླས་པ་དང་བཅས་པའི་མཐར་མཆོད་བསྟོད་དང༌། དེ་ནས་མདུན་བསྐྱེད་སྒྲུབ་པའི་མཆོད་པ་ཁ་གསོས་ལ། རྡོ་རྗེ་སློབ་དཔོན་སངས་རྒྱས་དཔལ་སོགས་ཀྱི་རྒྱུན་བཤགས་ལན་གསུམ། བྱིན་འབེབས་དང་མཆོད་པ་བྱིན་རླབས་གཞུང་ལྟར་ལ། མདུན་རྟེན། ཤཱུ་ནྱ་ཏཱས་བསང་སྦྱངས། རང་བྱུང་རིག་པ་བདག་མེད་དེ་བཞིན་ཉིད་སོགས་ནས་བཟླས་པ་ཅི་ནུས་བྱའོ།  །ཞེས་བདག་འཇུག་དབང་དོན་རྒྱ་མཚོ་ལས་གསུངས་པས་ན། བརྒྱུད་འདེབས་དང༌། སྐྱབས་སེམས་ནས་མཆོད་པ་བྱིན་རླབས་བར་ལས་བྱང་ལྟར་ལ། བདག་བསྐྱེད། ཧཱུྃ༔ རང་བྱུང་རིག་པ་བདག་མེད་དེ་བཞིན་ཉིད་སོགས་དེ་བཞིན་ཉིད་ཀྱི་ཏིང་ངེ་འཛིན་ནས། ཨོཾ་ཧཱུྃ་སྭཱ་ཧྲཱིཿཨཱཿ ཧཱུྃ༔ འོག་མིན་ཆོས་དབྱིངས་བདེ་ཆེན་སོགས་སྤྱན་འདྲེན། བཞུགས་གསོལ་ཕྱག་འཚལ་རྣམས་རང་གཞུང་ལྟར་དང༌། བླ་མེད་མཆོག་གི་མཆོད་པ་དམ་པ་ནི༔ ཡེ་ཤེས་ལྔ་ཡིས་འོད་ཟེར་རྣམ་པར་འཕྲོ༔ འདོད་པའི་ཡོན་ཏན་ལྔ་ཡི་རབ་བརྒྱན་ཏེ༔ དམ་ཚིག་བཞིན་དུ་ཅི་བདེར་བཞེས་སུ་གསོལ༔ མ་ཧཱ་མུ་དྲ་པཱུ་ཛ་ཧོཿ མ་ཧཱ་ཛྙཱ་ན་ཏེ་ཏེ་ཧཱུྃ༔ ཏེ་ན་ཏེ་ཏེ་ཧཱུྃ༔ ཨོཾ་ཤྲཱི་བཛྲ་ས་པ་རི་ཝཱ་ར་དྷཱུ་པེ་ཧཱུྃ༔ པུཥྤེ་ཏྲཱྃ༔ ཨ་ལོ་ཀེ་ཧྲཱི༔ གནྡྷེ་ཧོ༔ ནཻ་ཝི་ཏེ་ཨཱཿ ཤབྡ་ཧཱུྃ༔ སརྦ་པཱུ་ཛ་ས་མ་ཡ་ཧོཿ ཧ་ལ་པཉྩ་པཱུ་ཛ་ཧོཿ མ་ཧཱ་ཨ་མྲྀ་ཏ་ཁཱ་ཧི༔ མ་ཧཱ་བ་ལིཾ་ཏ་ཁཱ་ཧི༔ མ་ཧཱ་རཀྟ་ཁཱ་ཧི༔ མ་ཧཱ་བཛྲ་ཨ་མྲྀ་ཏ་ཛ་གད་པཱུ་ཛ་ཧོ༔ ཛཿཧཱུྃ་བྃ་ཧོཿ ཏ་ན་ག་ན་པཱུ་ཛ་ཧོཿ ཞེས་མཆོད་པའི་རིམ་པ་བསྡུས་ཏེ་བྱ་བ་དང༌། ཧཱུྃ༔ མི་སྡུག་སྲིན་པོ་སོགས་བསྟོད་པ། བསྙེན་སྒྲུབ་སྒྲུབ་ཆེན་གྱི་བཟླས་པ་ཁྱུག་ཙམ་རྗེས། ཡེ་ཤེས་ལྷ་ཚོགས་སོགས་སྟོང་ཚིག་མཆོད་བསྟོད་ཙམ་སྦྱར་ན་ལེགས་སྙམ། རྡོ་རྗེ་སློབ་དཔོན་སངས་རྒྱས་སོགས་ཡན་ལག་བརྒྱད་པའི་ཚོགས་བསགས་ནས། བྱིན་འབེབས། མཆོད་པ་བྱིན་རླབས་དང༌། མདུན་རྟེན། ཤཱུ་ནྱ་ཏཱས་སྦྱངས། རང་བྱུང་རིག་པ་སོགས་ནས་ལས་བྱང་དཀྱུས་ལྟར་དབང་བསྐུར་རྒྱས་གདབ། སྤྱན་འདྲེན་བསྟིམ་པ། ཕྱག་མཆོད་བསྟོད་པ་བཟླས་པ་བཅས་གཞུང་བཞིན་ལ། གཙོ་བོ་གུ་རུ་ཤྲཱི་དང་སྤྱི་དྲིལ་བཛྲ་ཙཎྜ་གཉིས་མང་ཙམ་དང༌། ཞི་བསྙེན། ཧཱུྃ་བཟླས་དང་ལས་སྦྱོར་ཁྱུག་ཙམ་བཏང་བས་འཐུས། བུམ་སྒྲུབ་སྟ་གོན་སྐབས་ལྟར་བྱས་པས་འབྲེལ་ཆགས་སུ་འགྱུར་ལ། མཐར་མཆོད་ཕྲེང་རྒྱས་བསྡུས་གཉིས་གང་འོས། བསྟོད་པ། ནོངས་བཤགས་བཅས་དང༌། བཀའ་སྲུང་གཏོར་བསྔོས། ཚོགས་བསྐང་བཤགས་རྣམས་གཞུང་ལྟར་གྲུབ་རྗེས། བདག་འཇུག་ལ། གཞི་བདེ་གཤེགས་སྙིང་པོ་གདོད་ནས་དཀྱིལ་འཁོར་གྱི་འཁོར་ལོར་རྫོགས་པ་འཇུག་ཅིང་དབང་བླང་བའི་ཡུལ་དང༌། རྣམ་སྨིན་གྱི་རྟེན་ཕུང་ཁམས་ཚོགས་བརྒྱད་ཀྱིས་བསྡུས་པའི་བག་ཆགས་བློ་བུར་བ་སྦྱང་གཞི་སློབ་བུའི་ཚུལ་དུ་ཤེས་པར་བྱས་ནས། སློབ་མ་ལ་དབང་བསྐུར་བའི་སྐབས་ཀྱི་ཆོ་ག་བཞིན་ཚང་བས་དབང་བླངས་ཏེ་བདག་ཉིད་ནུས་ལྡན་དུ་བྱས་ལ། སློབ་མ་འཇུག་པར་གནང་བ་ཞུ། ཅིས་ཀྱང་མ་གྲུབ་ན་རིག་པའི་མེ་ཏོག་དོར་བ་དང་གནང་ཞུ་བཅས་ངེས་པར་བྱ། སྔར་སྟ་གོན་བྱས་པའི་སློབ་མ་རྣམས་སྒོའི་ཕྱི་རོལ་ནས་ཁྲུས་བྱ། བགེགས་བསྐྲད། སྲུང་འཁོར་བསྒོམ། མཚམས་སྦྱོར་སྤྱི་འགྲོས། ཙཀྵུ་བྷནྡྷ་ཝ་ར་མ་ན་ཡེ་སྭཱ་ཧཱཿས་མིག་དར། ཨ་ཁཾ་ཝི་ར་ཧཱུྃ་གིས་མེ་ཏོག་གཏད། ལོ་རྒྱུས་ཀྱི་ཁྱད་པར། དེ་ཡང་འོ་སྐོལ་གྱི་སྟོན་པ་ཐབས་མཁས་ལ་ཐུགས་རྗེ་ཆེན་པོ་དང་ལྡན་པས་གདུལ་བྱ་སེམས་ཅན་གྱི་ཁམས་དབང་བསམ་པ་མོས་པའི་རིམ་པ་དང་རྗེས་སུ་མཐུན་པའི་ཆོས་འཁོར་བསམ་གྱིས་མི་ཁྱབ་པར་བསྟན་པ་ཐམས་ཅད་བསྡུ་ན་རྒྱུ་འབྲས་ཀྱི་ཐེག་པ་གཉིས་སུ་འདུས་པ་ལས། ཁྱད་པར་དུ་མས་འཕགས་པ་འབྲས་བུ་གསང་སྔགས་རྡོ་རྗེ་ཐེག་པ་སྟེ། དེའང་ཕྱི་ཐུབ་པ་རྒྱུད་ཀྱི་ཐེག་པར་ཀྲི་ཡོག་སྡེ་གསུམ། ནང་ཐབས་རྒྱུད་ཀྱི་ཐེག་པར་བསྐྱེད་རྫོགས་རྫོགས་ཆེན་གསུམ་དུ་ཕྱེ་བ་ལས་ནང་པ་ཐབས་ཀྱི་རྒྱུད། དེ་ལའང་རྒྱུད་སྡེ་དང་སྒྲུབ་སྡེ་གཉིས་ལས་ཕྱི་མ་སྒྲུབ་པའི་སྡེ་སྟེ། དེ་ལའང་རྡོ་རྗེ་སེམས་དཔའ་སྙིང་གི་མེ་ལོང་གི་རྒྱུད་ལས། བསྐྱེད་པ་མ་ཧཱ་ཡོ་ག་ནི་ཆོས་ཐམས་ཅད་ཀྱི་གཞི་ལྟ་བུའོ། །རྫོགས་པ་ཨ་ནུ་ཡོ་ག་ནི་ཆོས་ཐམས་ཅད་ཀྱི་ལམ་ལྟ་བུའོ།  །རྫོགས་པ་ཆེན་པོ་ཨ་ཏི་ཡོ་ག་ནི་ཆོས་ཐམས་ཅད་ཀྱི་འབྲས་བུ་ལྟ་བུའོ།  །ཞེས་གསུངས་པས་མ་ཧཱ་ཡོ་ག་ནི་སྔགས་ཀྱི་ཐེག་པའི་གཞི་ལམ་འབྲས་བུའི་དོན་ཐམས་ཅད་སྟོན་པས་ཐེག་པའི་ཕྱི་མོ་ལྟ་བུ་ཡིན་ལ། ཟབ་ཆོས་དེ་ཉིད་ཀྱི་རྩ་བ་སྒྲུབ་ཆེན་བཀའ་བརྒྱད་ཅེས་བདེ་གཤེགས་རྒྱལ་བ་ཞི་ཁྲོའི་སྤྱི་སྒྲུབ་འདི་ཉིད་འོག་མིན་གྱི་གནས་སུ་ཀུན་བཟང་ཆེ་མཆོག་ཧེ་རུ་ཀ་ཞི་ཁྲོའི་ཚོམ་བུར་སྣང་བས་སྤྱི་རྒྱུད་ལྔ་དང་སྒོས་རྒྱུད་བཅུ། བྱེ་བྲག་སོ་སོའི་སྒོས་རྒྱུད་དཔག་ཏུ་མེད་པ་ཆོས་ཉིད་ཀྱི་རང་སྒྲས་གསུངས། མི་མངོན་རིག་པ་འཛིན་པའི་གནས་སུ་གསང་བདག་རྡོ་རྗེ་ཆོས་ཀྱིས་བསྡུས་ནས་འཁོར་གྱི་རིག་འཛིན་ལ་བསྟན་ཏེ་དགོངས་འགྲེལ་ལུང་ལྔ་མཛད་ནས་མཁའ་འགྲོ་ལས་ཀྱི་དབང་མོ་ཆེ་ལ་གཏད། བསིལ་བའི་ཚལ་གྱི་མཆོད་རྟེན་བདེ་བྱེད་བརྩེགས་པར་མཁའ་འགྲོ་མ་བདེ་བའི་དངོས་གྲུབ་ཀྱིས་རི་རབ་ཀྱི་སྲོག་ཤིང་དཔག་བསམ་ལྗོན་པ་ལ་དཔེ་བྱས་ནས་གཏེར་དུ་སྦས་པ། ཟུག་པ་རྩ་བ་ལྟ་བུའི་ཚུལ་དུ་རྒྱུད་སྒྱུ་འཕྲུལ་སྡེ་བརྒྱད་སོགས་མཆོད་རྟེན་གྱི་སེང་ཁྲི། འདྲིལ་བ་སྡོང་པོའི་ཚུལ་དུ་བདེ་གཤེགས་འདུས་པའི་རྒྱུད་སྐོར་བུམ་པའི་དབུས། གྱེས་པ་ཡལ་གའི་ཚུལ་དུ་སྒོས་རྒྱུད་རྣམས་བུམ་པའི་ཕྱོགས་མཚམས། གསལ་བ་མེ་ཏོག་གི་ཚུལ་དུ་གསང་བ་ཡོངས་རྫོགས་བྲེ། སྨིན་པ་འབྲས་བུའི་ཚུལ་དུ་རང་བྱུང་རང་ཤར་ཆོས་འཁོར། འབྲས་བུའི་བཅུད་ཀྱི་ཚུལ་དུ་སངས་རྒྱས་མཉམ་སྦྱོར་གདུགས་ཀྱི་དབུས། ཡང་གསང་བླ་མེད་ཨ་ཏི་ནག་པོ་སོགས་རྫོགས་ཆེན་སྙིང་པོའི་སྐོར་རྣམས་རྩེ་མོའི་ཏོག་ལ་རྒྱས་བཏབ་ནས་དཔའ་བོ་ཌཱ་ཀིར་གཉེར་དུ་གཏད། དེ་ནས་མི་ཡུལ་གྱི་གདུལ་བྱ་འདུལ་བའི་དུས་ལ་བབ་པ་ན། དཔལ་ཆེན་པོ་དང་གཉིས་སུ་མེད་པའི་རིག་འཛིན་གྱི་རྒྱལ་པོ་ཀུཉྫ་རའི་ཐུགས་ཡེ་ཤེས་ཀློང་དགུའི་རང་རྩལ་བཀའ་བབ་རིག་འཛིན་བརྒྱད་དང༌། རྒྱལ་དབང་པདྨ་ཐོད་ཕྲེང་རྩལ་དང་དགུར་སྣང་སྟེ། སྨུག་ནག་དབང་གི་མཁའ་འགྲོས་སྒྲུབ་ཆེན་བརྒྱད་ཀྱི་གཏེར་སྒྲོམ་སློབ་དཔོན་སོ་སོ་ལ་གཏད་དེ་དུར་ཁྲོད་ཆེན་པོ་བརྒྱད་དུ་བསྒྲུབས་པས་དཔལ་ཧེ་རུ་ཀ་དང་གཉིས་སུ་མེད་པའི་གོ་འཕང་བརྙེས། རྒྱལ་དབང་པདྨཱ་ཀ་རས་སློབ་དཔོན་དེ་དག་ལས་སྒྲུབ་ཐབས་བྱེ་བྲག་པའི་རྒྱུད་ལུང་མན་ངག་གསན་ནས་དེ་རྣམས་ལས་ཀྱང་གོ་འཕང་མཐོན་པོར་གཤེགས་པའི་ཚུལ་བསྟན་ཏེ། མཆོད་རྟེན་བདེ་བྱེད་བརྩེགས་པ་ནས་སྔར་རྒྱ་མ་ཁྲོལ་བའི་སྒྲུབ་སྡེ་སྤྱི་དང༌། རྫོགས་ཆེན་སོགས་ལྷག་མ་མ་ལུས་པར་སྤྱན་དྲངས། དཀྱིལ་འཁོར་གྱི་བདག་པོ་རྣམས་ཀྱིས་གསང་སྔགས་ཀྱི་རྒྱུད་སྡེ་རྣམས་ལ་དབང་བསྒྱུར་བར་མངའ་གསོལ་ཏེ། གསང་སྔགས་ཆུ་བོ་བཞིའི་དབང་གི་བཀའ་བབ་བརྙེས། སྔོན་གྱི་སློབ་དཔོན་བརྒྱད་ལ་ཆོས་ཀྱི་སྐྱེས་ཕུལ་ཏེ་སྐུ་ལྔ་ལྷུན་གྲུབ་རྡོ་རྗེ་འཆང་གི་གོ་འཕང་མངོན་སུམ་དུ་མཛད། འཇམ་དཔལ་སྤྲུལ་པའི་རྒྱལ་པོས་བོད་དུ་སྤྱན་དྲངས་ནས་སངས་རྒྱས་ཀྱི་བསྟན་པ་དཀར་འཇམ་ཡུག་གཅིག་ཏུ་བརྡལ་བ་ལ། སངས་རྒྱས་ལས་ཀྱང་དཀོན་པའི་གསང་ཆེན་འབྲས་བུའི་ཆོས་འཁོར་བསྐོར་བར་གསོལ་བ་བཏབ་པས་བསམ་ཡས་མཆིམས་ཕུའི་བྲག་དམར་ཀེའུ་ཚང་དུ་ལས་ཅན་སྙིང་གི་བུ་དགུ་ལ་བདེ་གཤེགས་འདུས་པའི་དཀྱིལ་འཁོར་དུ་དབང་བསྐུར་ནས། མེ་ཏོག་གང་ལ་ཕོག་པའི་དཀྱིལ་འཁོར་སྤྱི་བྱེ་བྲག་ཏུ་བསྒྲུབས་པས་གྲུབ་རྟགས་མངོན་དུ་གྱུར་ཅིང༌། འབངས་རིགས་ཉེར་ལྔ་ལ་སོགས་པ་དུ་མ་ཡང་རྗེས་སུ་བཟུང་ཞིང་གྲོལ་བར་མཛད། བདེ་གཤེགས་འདུས་པ་ཡོངས་རྫོགས་ཀྱི་བཀའ་མངའ་བདག་ཚངས་པ་ལྷ་ཡི་མེ་ཏོག་ཉིད་ལ་བབས་ཏེ་རྒྱུད་ལུང་མན་ངག་ཐམས་ཅད་ཀྱི་བདག་པོར་གྱུར། གུ་རུ་རིན་པོ་ཆེ་དང༌། རྗེ་འབངས་གྲོགས་གསུམ་སོགས་ཀྱིས་ཕྱི་རབས་ཀྱི་གདུལ་བྱ་ལ། གཏེར་གྱི་རིགས་བྱེད་བཅོ་བརྒྱད་དུ་ཕྱེས་ནས་བོད་ཡུལ་མཐའ་དབུས་ཀུན་ཏུ་སྦས་པའི་ཟབ་ཆོས་ཀྱི་གཙོ་བོ་སངས་རྒྱས་གཉིས་པ་ཨོ་རྒྱན་ཆོས་ཀྱི་རྒྱལ་པོའི་ཐུགས་དམ་མཐར་ཐུག་བདེ་གཤེགས་སྒྲུབ་པ་བཀའ་བརྒྱད་ལ། སྐུ་གསུང་ཐུགས་ཡོན་ཏན་ཕྲིན་ལས་ཀྱི་གཏེར་ཆེན་ལྔའམ་བཀའ་མ་མཁས་པ་མི་བཞིའི་ཐུགས་བཅུད་བཀའ་བརྒྱད་རྫོང་འཕྲང༌། གཏེར་མའི་ཕྱོགས་ལ་སྙིང་དང་འདྲ་བ་ཉང་གཏེར་སྒྲུབ་པ་བཀའ་བརྒྱད། སྙིང་ཁྲག་དང་འདྲ་བ་ཆོས་དབང་གསང་རྫོགས། སྙིང་ཁྲག་དྭངས་མ་དང་འདྲ་བ་བྱང་གཏེར་རང་ཤར་རང་གྲོལ་བཅས་བཀའ་བརྒྱད་རྣམ་གསུམ་དང༌། སྲོག་དང་འདྲ་བ་པད་གླིང་ཐུགས་ཀྱི་མེ་ལོང༌། ལུས་དང་འདྲ་བ་བསམ་གཏན་གླིང་པའི་དྲེགས་འདུལ། རྡོར་གླིང་གསང་བ་ཡོངས་རྫོགས། མངའ་རིས་པཎ་ཆེན་རིན་པོ་ཆེའི་བླ་མ་བཀའ་བརྒྱད་རིག་འཛིན་ཡོངས་འདུས་སོགས་དང༌། འཇའ་ཚོན་པའི་བཀའ་བརྒྱད་དངོས་གྲུབ་སྙིང་པོ། ཀློང་གསལ་བཀའ་བརྒྱད་བདེ་གཤེགས་ཡོངས་འདུས། ཡོངས་དྲིལ་བཀའ་འདུས་ཆོས་ཀྱི་རྒྱ་མཚོ་བཅས་སྔ་ཕྱི་བར་གསུམ་རྣམས་སུ་གྲགས་ཆེ་བས་མཚོན་བརྒྱུད་པ་དྲུག་ལྡན་གྱི་བཀའ་སྲོལ་ལས་བྱུང་བའི་སྒྲུབ་སྡེ་བཀའ་བརྒྱད་རྒྱས་བསྡུས། རྒྱུད། སྒྲུབ་ཐབས། མན་ངག་སོགས་མི་འདྲ་བ་དུ་མ་ཞིག་བྱོན་པ། རྒྱུད་ལས། ཞི་ཁྲོ་བཀའ་བརྒྱད་ལྷ་ཚོགས་ནི༔ ཤེས་པ་ཙམ་གྱིས་ཆོག་པ་ཡིན༔ དྲན་པ་ཙམ་གྱིས་ལམ་སྣ་འདྲེན༔ ཡེ་ཤེས་ནང་ནས་ཁྱད་པར་ཆེ༔ ལྷ་ཡི་ནང་ནས་ལྷ་མཆོག་ཡིན༔ དེ་ལ་བརྟེན་དང་སྒྲུབ་པ་དང༔ མཆོད་དང་བསྟོད་པ་ཐམས་ཅད་ཀུན༔ ཆོས་ཀྱི་དབྱིངས་སུ་མངོན་འཚང་རྒྱ༔ ཞེས་གསུངས་པ་དང༌། བྱེ་བྲག་ཏུ་སྤྱིར་ཐར་པ་དང་ཐམས་ཅད་མཁྱེན་པའི་ལམ་གྱི་ཡོན་ཏན་ཐམས་ཅད་དགེ་བའི་བཤེས་གཉེན་གྱི་བཀའ་དྲིན་ལས་འབྱུང་ཞིང༌། ཁྱད་པར་གསང་སྔགས་རྡོ་རྗེ་ཐེག་པའི་ལམ་གྱི་མཆོག་ཐུན་དངོས་གྲུབ་ཐམས་ཅད་བླ་མའི་རྡོ་རྗེའི་གསུམ་གྱི་བྱིན་རླབས་ཁོ་ནར་རག་ལས་པ་རྒྱུད་ལུང་མན་ངག་ཀུན་ལས་ཆེ་ཐང་དུ་བསྔགས་པའི་རྒྱུ་མཚན་གྱིས་བསྐྱེད་རྫོགས་དབང་བསྐུར་ཐམས་ཅད་བླ་མའི་ཡེ་ཤེས་ཀྱི་རོལ་པར་བལྟ་བའི་ལམ་བྱེད་ནི་བྱིན་རླབས་ཀྱི་ཚན་ཁ་ཆེ་ཞིང་དངོས་གྲུབ་མྱུར་བའི་ཉེ་ལམ་ཁྱད་པར་དུ་འཕགས་ཤིང༌། དེ་ཡང་གདུལ་བྱ་འདུལ་བྱེད་ཀྱི་གནས་དུས་དང་མཐུན་པར། དེང་སང་རྩོད་དུས་སྙིགས་མའི་སེམས་ཅན་དམུ་རྒོད་མི་ཐུབ་པ་ལྔ་བདོ་བས། ནང་དུ་རྒྱུ་ཉོན་མོངས་དུག་ལྔ་ཆེས་རགས་པར་བརྡོལ་བའི་རྒྱུས། ཕྱི་རུ་འབྲས་བུ་ནད་མུག་མཚོན་གྱི་བསྐལ་པ་ངན་པ་བདོ་ཞིང༌། བར་དུ་རྒྱལ་བསེན་དམ་སྲིའི་བར་ཆད་རླུང་ལྟར་འཚུབས་པས་ཆོས་བཞིན་སྤྱོད་པའི་སྐྱེས་བུ་ལ་རྣམ་གྲོལ་གྱི་ལམ་སྒྲུབ་ཏུ་མི་སྟེར་བ་ལ་ཆེད་དུ་དགོངས་པས་ཐུགས་རྗེ་མྱུར་ཞིང་བྱིན་རླབས་ཤུགས་དྲག་པ་སྙིགས་མའི་སྐྱབས་གཅིག་རྡོ་རྗེ་ཐོད་ཕྲེང་རྩལ་ཆེན་པོ་ཉིད་བླ་མ་དྲག་པོ་མཐིང་གའི་སྐུར་བཞེངས་པ་དང༌། གསང་སྔགས་སྒྲུབ་སྡེའི་བདེ་གཤེགས་ཞི་ཁྲོ་ཆིག་དྲིལ་དཔལ་ཆེན་སྒྲུབ་པ་བཀའ་བརྒྱད་ཅེས་མཐུ་སྟོབས་ནུས་པའི་གཟི་བྱིན་ཚན་ཁ་ཆེ་བ་གཉིས་དབྱེར་མེད་དུ་སྒྲུབ་པའི་ཆོས་བཀའ་ཟབ་གཉན་བྱིན་རླབས་ནུས་རྩལ་འགྲན་ཟླ་དང་བྲལ་བ་བླ་མ་བཀའ་བརྒྱད་ཀྱི་བབས་སོ་ཆེ་ཤོས་ཡོངས་སུ་གྲགས་པ་ཆོས་ཀྱི་རྒྱལ་པོ་ཁྲི་སྲོང་ལྡེའུ་བཙན་གྱི་ཐུགས་ཀྱི་སྤྲུལ་པ་མངའ་རིས་པཎ་ཆེན་རིན་པོ་ཆེས་གཏེར་དུ་བཞེས་པ་རིག་འཛིན་ཡོངས་འདུས་དང་ལོ་ཆེན་བཻ་རོའི་རྣམ་འཕྲུལ་ཀུན་མཁྱེན་པྲཛྙཱ་རསྨིའི་ཟབ་གཏེར་གྲོལ་ཐིག་ལམ་རྒྱས་པ་རྣམས་ཀྱི་སྙིང་པོའི་ཡང་ཞུན་གྱི་བཅུད་ཐིག་ཀློང་ཆེན་དགོངས་པའི་གསང་མཛོད་ལས་བྱོན་པའི་ཆོས་སྐོར་གྱི་རྩ་བ་ལྟ་བུར་གྲོལ་ཐིག་དགོངས་པ་རང་གྲོལ་ལས། གསང་བའི་ལུང་བསྟན་མ་གཏོགས་ཞུ་དག་ཕེར༔ གཅིག་ལ་གཅིག་ཡིད་ཆེས་པས་འཁྲུལ་པ་བྲལ༔ ཞེས་གསུངས་པ་ལྟར་ཨོ་རྒྱན་རྗེ་འབངས་དང་བཅས་པ་ཡེ་ཤེས་ཀྱི་དབྱིངས་སུ་གཅིག་པར་མ་ཟད་གསང་སྔགས་བླ་མེད་ཀྱི་རྒྱུད་ཐམས་ཅད་སྟོན་འཁོར་དགོངས་པ་གཅིག་པའི་ཡེ་ཤེས་ཀྱི་ཆོ་འཕྲུལ་དུ་ངེས་པས་ན་རྩ་བཤད་མན་ངག་གི་རྒྱུད་ཀུན་གྱི་ཡང་སྙིང་བཅུད་དྲིལ་ལྟ་བུ་སྟེ། རང་གཞུང་ལས། མ་འོངས་ལྔ་བརྒྱ་ཐ་མའི་ཚེ༔ མཐའ་ཡི་རྒྱ་འདྲེ་འབྱུང་པོ་དང༔ དབུས་ཀྱི་དམ་སྲི་གློ་བུར་བསྡོངས༔ ཆོས་པའི་སྙིང་ཞུགས་མི་དགེ་སྤྱོད༔ སྐྱེ་བོའི་སྙིང་ཞུགས་སྡིག་རྒྱུན་སྤེལ༔ རྨི་ལམ་བཙུན་པ་བྱ་སྤྲེལ་རྨི༔ བག་མི་ཕེབས་ཤིང་སྙིང་རླུང་ལྡང༔ དེ་ཚེ་གཉེན་པོ་སྟོབས་ཀྱི་ལྷ༔ ཕལ་གྱིས་ཐུལ་བར་མི་འགྱུར་བས༔ ཕྱི་ལྟར་བྱང་སེམས་ནང་རིག་འཛིན༔ གསང་བ་དྲག་གཏུམ་འབར་བའི་ལྷ༔ བདེ་གཤེགས་ཡོངས་རྫོགས་སྒྲུབ་སྡེ་བརྒྱད༔ དཔལ་ཆེན་འདུས་པའི་སྒྲུབ་པ་འདིས༔ ལོག་འདྲེན་འདུལ་བར་ཐེ་ཚོམ་མེད༔ ཤིན་ཏུ་གསང་ཞིང་རང་ཉམས་ལོངས༔ བསྟན་འགྲོའི་དོན་དུ་སྙིང་སྟོབས་བསྐྱེད༔ ཅེས་དང༌། འདི་ནི་བླ་མ་ཡི་དམ་གྱི༔ རྣམ་པར་སྒྲུབ་པས་བྱིན་རླབས་མྱུར༔ གལྤོ་ལ་སོགས་ཧེ་རུ་ཀའི༔ ཏནྟྲ་ཀུན་གྱི་བཅུད་ཀྱང་འདྲིལ༔ ལས་ལ་མི་ལྟོས་དཔལ་ཆེན་པོའི༔ སྲོག་ནས་འཕྲོག་པས་རྣོ་ལ་མྱུར༔ དབང་གི་ཆུ་བོ་མ་ཉམས་སྟེང༔ བརྒྱུད་པ་བདུན་ལྡན་སྒྲུབ་ཐག་ཉེ༔ གསང་ཆེན་རྒྱུད་སྡེ་རྒྱ་མཚོ་ཀུན༔ སྒྲུབ་སྡེ་ཆེན་པོ་བརྒྱད་ལ་འདུ༔ རིག་འཛིན་བརྒྱད་དང་མཁས་པ་བཞི༔ གོང་འོག་རྒྱ་མཚོ་ལྟ་བུའི་འཇིང༔ བརྒལ་བར་མི་ནུས་བློ་ཅན་ལ༔ བཅུད་དྲིལ་འདི་ལས་གཞན་མ་གསུངས༔ ཞེས་གསུངས་པ་ལྟར་རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་ཡི་དམ་རྩ་བ་རིག་འཛིན་ཐུགས་སྒྲུབ་དྲག་པོ་དཔལ་ཆེན་འདུས་པ་གང༌། གནད་བྱང་ཐུགས་ཀྱི་སྒྲོམ་བུ་ལས། དེང་དུས་ད་ལྟའི་རྗེ་འབངས་གྲོགས༔ བི་མ་རྒྱལ་སྲས་ལྷ་རྗེ་རྣམས༔ སྨོན་ལམ་ཐུགས་རྗེས་སྤྲུལ་པའི་སྲས༔ རང་བྱུང་རྡོ་རྗེ་པདྨ་དབང༔ གསང་མཚན་གར་དབང་འཇིགས་མེད་གླིང༔ རྟོགས་གྲོལ་དུས་མཉམ་ཐུགས་གཏེར་བདག༔ འཕགས་པས་རྗེས་སུ་བཟུང་བའི་རྟགས༔ ལག་གཡས་མཐིལ་ན་པདྨའི་སྤྱན༔ དབང་ཆེན་གསུང་གི་རིག་འཛིན་ཕྱིར༔ མཐེ་བོང་ཐུགས་སྲོག་ཧྱ་ཡིས་མཚན༔ རྟོགས་པ་ཀློང་དུ་གྱུར་པའི་རྟགས༔ ཚེམས་ལ་སྐྱེ་མེད་ཡི་གེ་ཨ༔ སྙིང་རྗེ་ཆེ་ལ་རིག་པ་ཧུར༔ ཤེས་རབ་ཆེ་ཞིང་འཛིན་ཆགས་ཆུང༔ ཐུགས་སྒམ་ཚིག་བཙན་བློ་གྲོས་ཟབ༔ ངེས་མེད་སྤྱོད་པ་ཅིར་ཡང་སྟོན༔ འཇིགས་པ་མེད་པའི་བརྟུལ་ཞུགས་ཅན༔ ཞུམ་མེད་སྣང་བ་ཟིལ་གྱིས་གནོན༔ དེ་ལ་ཐུགས་རྒྱུད་དངོས་གཏེར་རམ༔ ཡང་ན་དགོངས་གཏེར་ཚུལ་དུ་འབེབས༔ དངོས་ཉམས་རྨི་ལམ་མ་ངེས་པར༔ ང་དང་ཞལ་མཇལ་དོན་དབང་བསྐུར༔ ཐུགས་རྒྱུད་དགོངས་པའི་བྱིན་རླབས་འཕོ༔ པད་འབྱུང་ང་དང་རིག་འཛིན་ཉིད༔ དགོངས་པ་གཅིག་དང་དབྱངས་གཅིག་འགྱུར༔ ཞེས་པ་ལྟར་ཆེ་མཆོག་བདུད་རྩིའི་བཀའ་བབས་པཎ་ཆེན་བི་མ་ལ་མི་ཏྲ་དང༌། བདེ་གཤེགས་འདུས་པའི་བཀའ་བབས་ཆོས་རྒྱལ་ཁྲི་ལྡེ། བཀའ་འདུས་ཆོས་ཀྱི་རྒྱ་མཚོའི་རྒྱུད་ལུང་མན་ངག་གི་མངའ་བདག་རྒྱལ་སྲས་ལྷ་རྗེ་ཁུ་དབོན་རྣམས་ཀྱི་སྨོན་ལམ་དང་ཐུགས་རྗེའི་རང་གཟུགས་གཅིག་ཏུ་བསྡུས་པ། ནང་དུ་མཁྱེན་བརྩེ་ནུས་གསུམ་གྱི་སྤངས་རྟོགས་ཀྱི་ཡེ་ཤེས། ཕྱི་རུ་སྐུ་དང་གསུང་ལ་མི་འགྱུར་བའི་བརྡ་རྟགས་གསུམ་གྱི་གཟེར། གསང་བ་དག་ཆེན་ཡེ་ཤེས་ཀྱི་རང་རྩལ་མཁའ་འགྲོའི་གསང་མཛོད་ལ་དབང་བསྒྱུར་བའི་བརྡ་རྟགས་གསུམ་ཀ་ལ་ནོར་འཁྲུལ་གྱི་དྲི་མ་མེད་པས་རྩོད་བྲལ་ཉི་ཟླ་ལྟ་བུར་འཛམ་གླིང་ཀུན་ལ་གྲགས་ཤིང༌། རྟོགས་པ་དོན་རྒྱུད་ཀྱི་དགོངས་པ་ཕྱག་མཐིལ་དུ་ཟིན་པས་དཔེ་རྒྱུད་འཛད་མེད་ནམ་མཁའ་མཛོད་ལ་དབང་ཐོབ་པའི་སྐྱེས་བུ་ཕྲིན་ལས་ནམ་མཁའི་མུ་ཁྱུད་བརྡོལ་ཏེ་གྲུབ་ཐོབ་ཀྱི་ཚང་བརྡོལ་བར་མཛད་པའི་སྨིན་གྲོལ་རྒྱ་མཚོའི་ཤིང་རྟ་བདག་ཉིད་ཆེན་པོ་ཀུན་མཁྱེན་རིག་འཛིན་འཇིགས་བྲལ་གླིང་པ་པདྨ་དབང་ཆེན་ཡེ་ཤེས་རོལ་པའི་རྡོ་རྗེ་ཉིད་ཀྱིས་རྗེས་འཇུག་གདུལ་བྱའི་སྐལ་བར་སྔ་འགྱུར་བཀའ་གཏེར་རྒྱ་མཚོའི་སྲོག་གི་ཟུངས་ཁྲག་བསྟན་པའི་བཙས་ཆེན་པོ་རུ་བཞག་པ་རྒྱུད་སྡེའི་དབང་དུ་བྱས་ན་སྣང་གྲགས་རིག་པའི་ཆོ་འཕྲུལ་དུ་མངོན་པར་བྱང་ཆུབ་པ་དཔལ་ལྡན་སྒྱུ་འཕྲུལ་དྲྭ་བའི་སྙིང་པོ་དཔལ་ཆེན་ཞལ་ལུང༌། ནང་ཧེ་རུ་ཀ་འདུས་པའི་བསྐྱེད་རིམ་ཞེས་དཔལ་སྒྱུ་འཕྲུལ་དྲྭ་བའི་རྒྱུད་སྡེའི་བཅུད་ཕུར་དུ་གསུངས། སྒྲུབ་སྡེ་བརྒྱད་དེ་དག་ཏུ་སྐུ་གསུང་ཐུགས་ཡོན་ཏན་ཕྲིན་ལས་ཀྱི་སྒྲུབ་བཀའ་ཆེན་པོ་བརྒྱད་ཆིག་དྲིལ་བླ་མ་དྲག་མཐིང་གི་ཐུགས་སྒྲུབ་གསང་བའི་བཅུད་ཕུར་ཏེ། འདི་ལ་རྩ་བ་སྒྲུབ་པ་བཀའ་བརྒྱད་ཆིག་དྲིལ་དུ་སྒྲུབ་པ། ཡན་ལག་ཁྲག་འཐུང་རིགས་བཞིའི་སྒོས་བཀའི་སྒྲུབ་པ་གཉིས་ལས་སྔ་མའི་དབང་བསྐུར་བགྱི་བ་སྐབས་སུ་བབ་པ་སྟེ། དེ་ལའང་སྟ་གོན་གྱི་རིམ་པ་སྔོན་དུ་སོང་ཟིན་ནས་དངོས་གཞིའི་དབང་བསྐུར་བ་ཡིན་ལ། དེ་ལའང་ཐོག་མར་དཀྱིལ་འཁོར་སྒྲུབ་ཅིང་བདག་ཉིད་འཇུག་པ། དངོས་གཞིའི་ཕན་ནུས་ཟབ་མོའི་དབང་རྣམས་བསྐུར་བ། རྗེས་སྨིན་ཟིན་གྲོལ་བར་བྱེད་པ་ཁྲིད་འབོག་པ་དང་གསུམ་ལས། སྔོན་འགྲོ་བདག་མདུན་བུམ་པ་སྒྲུབ་ཅིང་དབང་ལེན་རྣམས་ཁོ་བོས་ལེགས་པར་བགྱིས་ཟིན་ཅིང༌། ད་དབང་དངོས་བསྐུར་བ་ལ་ཡང་སྔོན་འགྲོ་ཕྱི་ནང་གི་འཇུག་པ། དངོས་གཞིའི་དབང་རྣམས་འབོག་པ། རྗེས་དམ་ཚིག་ཁས་བླང་ཡོན་འབུལ་བཅས་གསུམ་གྱི་དང་པོ་དཀྱིལ་འཁོར་གཉན་པོར་ཕྱི་ནང་གི་འཇུག་པའི་ཆོས་རྣམས་ཞུ་བའི་དོན་དུ་མཎྜལ་ཕུལ། བླ་མ་དང་དཀྱིལ་འཁོར་གྱི་གཙོ་བོ་དབྱེར་མ་མཆིས་པའི་སྤྱན་སྔར་ཐལ་མོ་མེ་ཏོག་དང་ལྡན་པས་གསོལ་བ་འདེབས་པ་འདིའི་རྗེས་ཟློས། ཨེ་མ་ཧོ་བདེ་གཤེགས་སྙིང་པོ་ལས༔ གློ་བུར་འཁྲུལ་པས་བཅིངས་པ་དག༔ ཚོགས་བརྒྱད་སྲིད་མཚོ་ལས་བསྒྲལ་ཕྱིར༔ རང་བྱུང་དཀྱིལ་འཁོར་བསྟན་དུ་གསོལ༔ ལན་གསུམ། དམ་ཚིག་གི་གནས་ཁེ་ཉེན་ཆེ་བས་དཀྱིལ་འཁོར་དུ་ཞུགས་ཏེ་དབང་ཐོབ་ནས་ཚུལ་བཞིན་བསྲུང་དགོས་ཕྱིར་བཀའ་གཉན་པའི་ཐ་ཚིག་བསྒྲག་པ་ནི། བླ་ན་མེད་པའི་དཀྱིལ་འཁོར་ནི༔ དམ་ཚིག་རྒྱ་མཚོའི་གནས་ཡིན་ཏེ༔ བསྲུངས་ན་ཚེ་འདིར་དངོས་གྲུབ་ཐོབ༔ ཉམས་ན་རྡོ་རྗེ་དམྱལ་བར་བསྲེག༔ ཅེས་དྲིས་པར་དམ་ཚིག་བསྲུང་བར་ཁས་བླང་བ་འདིའི་རྗེས་ཟློས། ལྷ་དང་བླ་མར་གུས་པས་བདག༔ སྲོག་ལ་བབ་ཀྱང་དམ་ཚིག་བསྲུང༔ སོར་ཐར་བྱང་སེམས་རིག་འཛིན་གྱི༔ སྡོམ་པས་བདག་རྒྱུད་དག་པར་སྩོལ༔ ལན་གསུམ། ཐུན་མོང་གི་ལམ་གྱི་གཞི་རྟེན་སྐྱབས་འགྲོ། ཐེག་ཆེན་ཐུན་མིན་ལམ་གྱི་གཞུང་ཤིང་སེམས་བསྐྱེད། རྒྱུད་དག་པར་བྱ་བའི་སླད་དུ་རྒྱུན་བཤགས་ཡན་ལག་བརྒྱད་པ་ཚུལ་བཞིན་དུ་བྱ་བའི་བློས་དཀྱིལ་འཁོར་ཆེན་པོ་ སྒོས་བཀའ་སོ་སོར་ཁ་བསྒྱུར་དགོས། མཆན། བདུན་བརྒྱ་ཉེར་ལྔའི་ལྷ་ཚོགས་རྣམས་དང་སྐྱབས་གནས་རྩ་གསུམ་དམ་ཅན་རྒྱ་མཚོའི་སྤྱན་སྔར་བསགས་སྦྱང་གི་ཚིག་རྣམས་ཀྱི་སྒོམ་དོན་རེ་རེ་བཞིན་གསལ་ཐོབ་ལ་འདིའི་རྗེས་ཟློས། རྡོ་རྗེ་སློབ་དཔོན་སངས་རྒྱས་དཔལ་སོགས་ལན་གསུམ། རྡོ་རྗེ་ཐེག་པའི་ཐུན་མོང་མ་ཡིན་པའི་སྡོམ་པ་རིགས་ལྔ་སྤྱི་དང་བྱེ་བྲག་ཁྱད་པར་གྱིས་བསྡུས་པའི་དམ་ཚིག་རྣམས་ལེགས་པར་བླངས་ཏེ་སྲུང་སྙམ་པས་འདིའི་རྗེས་ཟློས། དུས་གསུམ་དུས་མེད་སྟོན་པ་ཀུན༔ རྡོ་རྗེའི་ཆོ་ག་འདི་མཁྱེན་ནས༔ གོ་འཕང་མཆོག་ལ་གཞུག་པའི་ཕྱིར༔ སྐྱབས་ཀྱི་མཆོག་ཏུ་དཀོན་མཆོག་འཛིན༔ རང་གི་ཉེས་སྤྱོད་སྡོམ་བྱེད་ཅིང༔ གཞན་གནོད་གཞི་དང་བཅས་པ་སྤོངས༔ སྨོན་དང་འཇུག་པའི་སེམས་གཉིས་བསྐྱེད༔ ཕྱིན་དྲུག་ལ་སྤྱོད་དགེ་ཆོས་སྡུད༔ རྟག་ཏུ་གཞན་ལ་ཕན་པ་སྒྲུབ༔ མ་བསྒྲལ་སྒྲོལ་ཞིང་མ་གྲོལ་དགྲོལ༔ དབུགས་མ་ཕྱིན་པ་དབུགས་དབྱུང་ཞིང༔ སེམས་ཅན་བྱང་གྲོལ་གནས་ལ་འགོད༔ ལྷ་ཡི་ཕྱག་རྒྱ་འགོང་པ་དང༔ བླ་མའི་བཞོན་པ་བརྙས་སོགས་སྤོངས༔ ལྷ་དང་ལྷ་མིན་གསང་བ་པ༔ བསྟན་པ་སྐྱོང་ལ་མཆོད་བྱེད་ཅིང༔ བྱང་ཆུབ་རྡོ་རྗེ་འབྲལ་མི་བྱ༔ མདོར་ན་དེ་ཡིས་གང་བསྒྲགས་པ༔ བྱང་ཆུབ་བར་དུ་གཅེས་པར་གཟུང༔ ལན་གསུམ། དེ་ནས་ཐམས་ཅད་རྡོ་རྗེའི་རྣལ་འབྱོར་དུ་སེམས་བསྐྱེད་པའི་ཕྱིར་བདག་གིས་སེམས་ཅན་ཐམས་ཅད་ཀྱི་དོན་དུ་རྫོགས་པའི་བྱང་ཆུབ་ཐོབ་པར་བྱའོ་སྙམ་པའི་ཀུན་རྫོབ་བྱང་ཆུབ་ཀྱི་སེམས་དེ་ཉིད་སྙིང་གར་ཟླ་བ་ཉ་གང་བར་གྱུར་པའི་སྟེང༌། དོན་དམ་པའི་བྱང་ཆུབ་ཀྱི་སེམས་རྡོ་རྗེ་རྩེ་ལྔ་པའི་རྣམ་པར་ཤར་བ་ལས་འོད་ཟེར་མཁའ་ཁྱབ་ཏུ་འཕྲོས་པར་བསམ་ལ། རྡོ་རྗེ་མེ་ཏོག་དང་བཅས་པ་སྙིང་གར་བཞག་པས་དེ་ཉིད་བརྟན་པར་མོས་མཛོད། ཨོཾ་སརྦ་ཡོ་ག་ཙིཏྟ་ཨུ་པ་ད་ཡ་མི༔ ལན་གསུམ་བརྗོད། དམ་ཚིག་གི་དཔང་པོ་རྡོ་རྗེའི་མནའ་ཆུ་བྱིན་པས་ཁེ་ཉེན་གྱི་གནས་ལ་བླང་དོར་བརྟན་པོར་མཛད་པའི་ངེས་ཤེས་ཀྱིས་ཤིག །ནང་མཆོད་ལྕེ་ཐོག་ཏུ་བཞག་ལ། འདི་ནི་རྡོ་རྗེའི་དམ་ཚིག་ཆུ༔ ཉམས་ན་སྙིང་ཁྲག་སྡིག་པས་འཐུང༔ བདེ་ལེགས་ཡོན་ཏན་ཐམས་ཅད་འགྲིབ༔ བསྲུངས་ན་ཡེ་ཤེས་སེམས་དཔར་འགྱུར༔ ཚེ་འདིར་མཆོག་གི་དངོས་གྲུབ་སྟེར༔ ས་མ་ཡ་ཨི་དན་ན་ར་ཀན༔ ཕྱི་འཇུག་གི་ཐོག་མ་དཀྱིལ་འཁོར་དུ་འཇུག་པར་གསོལ་བ་འདེབས་པ་འདིའི་རྗེས་ཟློས། ཧོ༔ སྲིད་ཞིར་མི་གནས་ཕོ་བྲང་ཆེར༔ འཇུག་པའི་སྒོ་ནི་ཚད་མེད་བཞི༔ རྣམ་པར་ཕྱེ་ལ་ཡེ་ཤེས་ཀྱི༔ དཀྱིལ་འཁོར་བདག་པོར་བདག་འཇུག་འཚལ༔ ལན་གསུམ། ཞེས་གསོལ་བ་བཏབ་པས་བྱང་ཆུབ་རྡོ་རྗེའི་ཐུགས་ཀའི་འོད་ཀྱིས་སྒོ་བ་བཞི་རྣམས་བསྐུལ་ཏེ་གཞལ་ཡས་ཁང་གི་སྒོ་བཞི་ཤག་གིས་ཕྱེ་བར་མོས། སློབ་དཔོན་གྱིས་དབྱེ་རྒྱ་དང་བཅས། ཨ་ཁཾ་བི་ར་ཧཱུྃ༔ དཀྱིལ་འཁོར་གྱི་ཤར་སྒོ་ནས་རིམ་པར་གཡས་བསྐོར་དུ་ལས་ཀྱི་རྡོ་རྗེས་ཁྲིད་ནས་ལྷ་རྣམས་ཀྱི་སྐུ་གསུང་ཐུགས་ལ་ཕྱག་བྱས་པར་མོས་ལ་ཐལ་མོ་གནས་གསུམ་དུ་སྦྱར་བས་འདིའི་རྗེས་ཟློས་མཛོད། ཨོཾ་ན་མ་ཏེ་ཧཱུྃ༔ ཨོཾ་ན་མ་མེ་ཧཱུྃ༔ ཨོཾ་ན་མོ་ན་མ་ཧཱུྃ༔ ལན་བཞི། ནང་འཇུག་གི་དང་པོ་ཡེ་ཤེས་པ་དབབ་པ་ཡིན་པས་སྒོ་གསུམ་གྱི་གནད་གཅུན་ལ་དམིགས་པ་འདི་ལྟར་མཛོད། དཀྱིལ་འཁོར་གྱི་ཤར་སྒོར་དབང་སྟེགས་པདྨ་འདབ་བརྒྱད་ལ་འཁོད་པས། གཙོ་བོའི་ཐུགས་ཀ་ནས་འོད་ཟེར་བྱུང༌། རང་གི་རྣམ་སྨིན་གྱི་ལུས་རྟེན་སྦྱངས། རྣམ་པར་ཤེས་པ་ཧཱུྃ་ཡིག་ཏུ་གྱུར་པ་ཡབ་ཀྱི་ཞལ་ནས་དྲངས། ཡབ་ཡུམ་མཉམ་པར་རོལ་པའི་རྗེས་ཆགས་ཞུ་བདེའི་ཐིག་ལེར་གྱུར་པ་ཡུམ་གྱི་མཁའ་གསང་དུ་བབས་པས་གཙོ་བོའི་རྣམ་པ་གཉིས་པའི་སྲས་སུ་སྨིན་པ་སྔར་གྱི་དབང་སྟེགས་ལ་འཁོད་པ་ཁྱབ་བདག་རྡོ་རྗེ་ཐོད་ཕྲེང་རྩལ་དང་གཉིས་སུ་མེད་པའི་སྤྱི་དཔལ་ཆེན་པོ་ཆེ་མཆོག་ཧེ་རུ་ཀ་མཐིང་དཀར་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་རྡོ་རྗེ་དང་དུང་ཁྲག་ཐུགས་ཀར་སྟེང་འོག་ཏུ་འཛིན་པ། བར་པ་གཉིས་ཁཊྭཱཾ་ག་དང་ཐོང་གཤོལ། ཐ་མ་གཉིས་མེ་དཔུང་དང་ལྕགས་སྡིག་བསྣམས་པ། དཔལ་དང་དུར་ཁྲོད་ཀྱི་ཆས་ཐམས་ཅད་ཀྱིས་བརྒྱན་ཅིང༌། ཞབས་བཞི་གཡས་བརྐྱང་གཡོན་བསྐུམ་པའི་དོར་སྟབས་སུ་བགྲད་པས་རྒྱལ་འགོང་བདུད་བཞི་བསྣོལ་སྟབས་སུ་བརྫིས་པ། པང་དུ་ཡུམ་དབྱིངས་ཕྱུག་མ་སྔོན་མོ་ཁཊྭཱཾ་དང་དུང་དམར་འཛིན་པས་འཁྱུད་པ། གཉིས་ཀའང་གར་གྱི་ཉམས་དགུ་དང་ལྡན་ཞིང་ཡེ་ཤེས་ཀྱི་མེ་ཕུང་འབར་བའི་ཀློང་ན་བཞུགས་པའི་གནས་གསུམ་དུ་ཕྱག་མཚན་གསུམ་ལ་གནས་པའི་ཡི་གེ་གསུམ་ལས་འོད་ཟེར་འཕྲོས་པས་ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་བསྒྲུབ་བྱའི་དཀྱིལ་འཁོར་ལྷ་ཡི་རྣམ་པས་རང་དང་རོ་གཅིག་ཏུ་འདྲེས་པར་བསམ་ལ༔ ཧཱུྃ༔ འཕགས་མཆོག་ཐུགས་རྗེས་དུས་ལ་བབ། །ཁྱད་པར་བསྟན་པའི་དུས་ལ་བབ། །མཐུ་རྩལ་དབྱུང་བའི་དུས་ལ་བབ། །བྱིན་གྱིས་རློབ་པའི་དུས་ལ་བབ། །དབང་མཆོག་བསྐུར་བའི་དུས་ལ་བབ། །དངོས་གྲུབ་སྩོལ་བའི་དུས་ལ་བབ། །མཐུ་ཆེན་བདུད་འདུལ་བཅོམ་ལྡན་འདས། །བྱིན་ཆེན་བྱིན་ཕོབ་བཅོམ་ལྡན་འདས། །དབང་ཆེན་དབང་བསྐུར་བཅོམ་ལྡན་འདས། །དངོས་གྲུབ་མཆོག་སྩོལ་བཅོམ་ལྡན་འདས། བདག་ཅག་ལས་འབྲས་མཆིས་པར་མཛོད། །འབྲུ་གསུམ། གུ་རུ་ཤྲཱི། བཛྲ་ཙཎྜའི་མཐར། ཧཱུྃ་ཧཱུྃ་ཧཱུྃ་ཨ་བེ་ཤ་ཡ་ཨ་བེ་ཤ་ཡ་ཕེཾ་ཕེཾ༔ ཞེས་བྱིན་དབབ་ཚེ་ལུས་འཕར་གཡོ། ངག་བརྡ་སྐད། སེམས་བདེ་གསལ་མི་རྟོག་པ་ཕེབས་པའི་རྟགས་སོ།  །ཏིཥྛ་བཛྲ་བརྟན་པར་བྱ། མེ་ཏོག་དོར་བའི་ཚོམ་བུའི་དཀྱིལ་འཁོར་འདུ་བྱས་ཏེ། ཁྱེད་རང་རྣམས་ལ་སྔར་བྱིན་པའི་མེ་ཏོག་དེ་ཉིད་ཚེ་རབས་ནས་ལས་ཀྱིས་འབྲེལ་བའི་རིགས་ཀྱི་ལྷ་ལ་ཕོག་པར་གྱུར་ཅིག་སྙམ་པས་ཚིག་འདིའི་རྗེས་ཟློས་དང་བཅས་ལྷན་ཅིག་འདོར་བར་ཞུ། ཧོ༔ སྨོན་པའི་ཡིད་ཀྱིས་རབ་བཟུང་བའི༔ འཇུག་པའི་མེ་ཏོག་ཨུ་དུམ་ཝཱར༔ ལྷག་པའི་ལྷ་ལ་དེང་འབུལ་ན༔ བྱང་ཆུབ་བར་དུ་མི་འབྲལ་ཤོག༔ པུཥྤེ་སིདྡྷི་ཧོ༔ ཞེས་ཕུལ་བས་ཚོམ་བུ་དགུ་གང་དུ་བབ་པའི་རིགས་དང་མཐུན་པའི་མིང༌། རྡོ་རྗེ་ཆེ་མཆོག་རྩལ་སོགས་གདགས། མེ་ཏོག་གང་ལ་བབས་པའི་གཙོ་བོ་རིགས་ཀྱི་བདག་པོའི་ཚུལ་དུ་སྤྱི་བོར་བྱོན་པར་བསམ་ལ་མེ་ཏོག་སྤྱི་བོར་བཞག པྲ་ཏི་གྷྲྀ་ཧ་ན་ཨི་མཾ་སཏྭ་མ་ཧཱ་བ་ལ༔ མ་རིག་པའི་སྒྲིབ་གཡོགས་མིག་དར་དང་ལྷན་ཅིག་བསལ་བར་མོས་མཛོད། མིག་ཐུར་ཐོགས་ལ། ཨེ་མ་ཧོ་བདེ་གཤེགས་སྙིང་པོའི་ཁམས༔ སྒྲིབ་བྱེད་གློ་བུར་ལིང་ཏོག་ནི༔ ཡེ་ཤེས་ཐུར་མས་དབྱེ་བགྱིས་ན༔ དཀྱིལ་འཁོར་འདིར་ལྟོས་དད་པ་བསྐྱེད༔ ཛྙཱ་ན་ཙཀྵུ་པྲ་བེ་ཤ་ཡ་ཕཊ༔ མིག་དར་བཀྲོལ། འདི་ལྟར་མཚོན་བྱེད་དཔེ་ཡི་དཀྱིལ་འཁོར་ལས། མཚོན་བྱ་དོན་གྱི་དཀྱིལ་འཁོར་རྡོ་རྗེ་སྲུང་བའི་འཁོར་ལོའི་དབུས་སུ་འབྱུང་བ་རིམ་བརྩེགས་རི་རབ་དང་བཅས་པའི་སྟེང་དུ་རྡོ་རྗེའི་རྡུལ་གྱིས་འཐས་པར་གདལ་བ་ལ་ཕྱི་རོལ་ཏུ་དུར་ཁྲོད་བརྒྱད་པདྨ་ཉི་མ་སྣ་ཚོགས་རྡོ་རྗེ་རྭ་བཅུ་གཉིས་པའི་ལྟེ་བར་ཡེ་ཤེས་རང་སྣང་ལས་གྲུབ་པ་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་གྱི་རང་བཞིན། ཕྱི་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་གྲུ་བཞི་སྒོ་བཞི་པ་རྟ་བབ་དང་བཅས་པ། ནང་ཐོད་པ་སྐམ་རློན་རྙིད་གསུམ་གྱི་རྩིག་པའི་མཁར་དུར་ཁྲོད་དྲག་པོའི་གཞལ་ཡས་ཁང་ཚད་དང་མཚན་ཉིད་ཡོངས་སུ་རྫོགས་པའི་ལྟེ་བར་རབ་ཏུ་འཇིགས་པའི་གནམ་ལྕགས་ཀྱི་ཙཀྲ་རྩིབས་བརྒྱད་པའི་དབུས་ཀྱི་ལྟེ་བ་གྲུ་གསུམ་མཐིང་ནག་ཆོས་དབྱིངས་རྡོ་རྗེ་བཙུན་མོའི་ཨེ་ཀློང་དུ་རྡོ་རྗེའི་བྲག་ཆེན། པད་ཉི་དྲེགས་པ་བྱོལ་སོང་གཙོ་དགུ་རྒྱལ་བསེན་བདུད་བཞིའི་སྟེང་ན་འགྱིང་བའི་བླ་མ་དྲག་པོ་དཔལ་ཆེན་ཆེ་མཆོག་རྡོ་རྗེ་སྲིན་པོ་འཇིགས་མཛད་ཧེ་རུ་ཀ་གཏུམ་རྔམས་ཉི་མ་འབུམ་གྱི་གཟི་བརྗིད་ཅན་རྩ་ཞལ་མཐིང་ག་གཡས་དཀར་གཡོན་དམར་ཕྱག་དྲུག་དང་པོ་གཉིས་ཀྱིས་རྡོ་རྗེ་དང་དུང་ཁྲག་ཐུགས་ཀར་བསྣམས་པས་ཡུམ་ལ་འཁྱུད་པ། གཡས་གཉིས་ཀྱིས་ཁཊྭཱཾ་དང་མེ་དཔུང༌། གཡོན་གཉིས་ཀྱིས་ཐོང་གཤོལ་དང་ལྕགས་སྡིག་བསྣམས་པ། ཞབས་བརྐྱང་བསྐུམ་གྱད་ཀྱི་དོར་སྟབས་སུ་བགྲད་ཅིང་གར་དགུའི་རྣམ་འགྱུར་ཡོངས་སུ་རྫོགས་པའི་སྐུ་ལ་དཔལ་དང་དུར་ཁྲོད་ཀྱི་ཆས་ཐམས་ཅད་གསོལ་བའི་ཡུམ་གནམ་ཞལ་དབྱིངས་ཕྱུག་མ་སྔོན་མོ་གཅེར་བུ་གཟིག་ཤམ་དང་ཕྱག་རྒྱ་ལྔས་བརྒྱན་པ། ཁཊྭཱཾ་དང་དུང་ཁྲག་བསྣམས་ཤིང་ཞབས་གཡོན་བརྐྱང་གཡས་བསྐུམ་གྱིས་ཡབ་དང་གཉིས་མེད་དུ་སྦྱོར་བ་ལ་བདུད་རྩི་ཡོན་ཏན་གྱི་ལྷ་ཚོགས་ཀྱིས་བསྐོར་བ། ཤར་དུ་དཔལ་ཆེན་བཛྲ་ཧེ་རུ་ཀ་མཐིང་ནག་ཡུམ་ཀྲོ་ཏི་ཤྭ་རི་མ་དང་སྦྱོར་བ་ལ་ཡང་དག་ཐུགས་ཀྱི་ལྷ་ཚོགས་ཀྱིས་བསྐོར་བ། ལྷོར་འཇམ་དཔལ་གཤིན་རྗེ་གཤེད་སེར་ནག་ཡུམ་བེ་ཏ་ཟ་བྱེད་མ་དང་སྦྱོར་བ་ལ་འཇམ་དཔལ་སྐུ་ཡི་ལྷ་ཚོགས་ཀྱིས་བསྐོར་བ། ནུབ་ཏུ་དབང་ཆེན་རྟ་མགྲིན་དམར་ནག་ཡུམ་པདྨ་གཟི་ལྡན་མ་དང་སྦྱོར་བ་ལ་པདྨ་གསུང་གི་ལྷ་ཚོགས་ཀྱིས་བསྐོར་བ། བྱང་དུ་དཔལ་ཆེན་རྡོ་རྗེ་གཞོན་ནུ་ལྗང་ནག་ཡུམ་འཁོར་ལོ་རྒྱས་འདེབས་མ་དང་སྦྱོར་བ་ལ་ཕྲིན་ལས་ཕུར་པའི་ལྷ་ཚོགས་ཀྱིས་བསྐོར་བ། ཤར་ལྷོར་མངོན་རྫོགས་རྒྱལ་པོ་མཐིང་ནག་ཡུམ་ཉིད་ཞི་བདེ་མཆོག་མ་དང་སྦྱོར་བ་ལ་རྦོད་གཏོང་མ་མོའི་ལྷ་ཚོགས་ཀྱིས་བསྐོར་བ། ལྷོ་ནུབ་ཏུ་རིག་འཛིན་རྡོ་རྗེ་ཆོས་རབ་དཀར་པོ་ཡུམ་རྡོ་རྗེ་རྣལ་འབྱོར་མ་དང་སྦྱོར་བ་ལ་རིག་འཛིན་སློབ་དཔོན་གྱི་ལྷ་ཚོགས་ཀྱིས་བསྐོར་བ། ནུབ་བྱང་དུ་བཅོམ་ལྡན་དྲེགས་པ་ཀུན་འདུལ་མཐིང་ནག་ཡུམ་ཁམས་གསུམ་སྲིད་པ་སྤྱི་འདུལ་མ་དང་སྦྱོར་བ་ལ་འཇིག་རྟེན་མཆོད་བསྟོད་ཀྱི་ལྷ་ཚོགས་ཀྱིས་བསྐོར་བ། བྱང་ཤར་དུ་དཔལ་ཆེན་སྟོབས་ལྡན་ནག་པོ་ཡུམ་འབྱུང་ལྔའི་བདག་མོ་དང་སྦྱོར་བ་ལ་དམོད་པ་དྲག་སྔགས་ཀྱི་ལྷ་ཚོགས་ཀྱིས་བསྐོར་བ། སྒོ་བཞིར་སྒོ་སྐྱོང་གདོང་མོ་བཞི། ཕྱིའི་ཁོར་ཡུག་ལ་མཁའ་འགྲོ་གིང་ལང་མ་སྲིང་འབར་མ་སོགས་བཀའ་སྡོད་དམ་ཅན་རྒྱ་མཚོའི་ཚོགས་དང་བཅས་པ་བདེ་གཤེགས་སྒྲུབ་པ་བཀའ་བརྒྱད་ཡེ་ཤེས་ཀློང་དགུའི་འཁོར་ལོ་བདུན་བརྒྱ་ཉེར་ལྔའི་ལྷ་ཚོགས་འོག་མིན་གསང་ཆེན་རོལ་པའི་ཕོ་བྲང་མངོན་སུམ་དུ་མཇལ་བ་ལ་དད་སྤྲོ་རྒྱ་ཆེན་པོ་བསྐྱེད་པ་དང༌། ལྷ་དང་དཀྱིལ་འཁོར་དེ་དག་ཀྱང་རང་གི་རྡོ་རྗེ་ཕུང་པོའི་གྲོང་ཁྱེར་ལ་བཞུགས་ཤིང་གཉུག་མའི་རྡོ་རྗེ་གསུམ་དང་འདུ་འབྲལ་མེད་པར་ངོ་སྤྲད་པ་ནི། ཧོ༔ ཕུང་པོ་ཁམས་དང་སྐྱེ་མཆེད་ནི༔ གདན་གསུམ་དཀྱིལ་འཁོར་ཉིད་ཡིན་ཀྱང༔ རྩ་རླུང་ཐིག་ལེའི་སྒྲིབ་པས་བཅིངས༔ དག་བྱེད་ལྷག་པ་གཟུགས་བརྙན་གྱིས༔ མཚོན་པའི་ཏིང་འཛིན་དཀྱིལ་འཁོར་ནི༔ རྣམ་བྱང་ཆེན་པོའི་བརྡ་དོན་རྟགས༔ འདིར་ལྟོས་འདིར་ཞུགས་འདི་བསྒོམས་པས༔ རྩ་དག་བསྐྱེད་རིམ་སྤྲུལ་སྐུར་འབྱོངས༔ རླུང་དག་ཁ་སྦྱོར་ཡན་ལག་བདུན༔ ཁམས་དག་རྣམ་ཀུན་མཆོག་ལྡན་གྱི༔ བདེ་ཆེན་ཡེ་ཤེས་ཁྱོད་ཀྱིས་མཐོང༔ ཞེས་གསུངས་པ་ལྟར་ཕྱི་ནང་གསང་བའི་དབང་གིས་སྨིན་པར་བྱས་ཏེ་ལམ་རིམ་པ་གཉིས་ལ་བསླབ་པས་ཕྱི་ནང་གཞན་གསུམ་གཉིས་མེད་རྡོ་རྗེའི་གྲོང་ཁྱེར་ཟུང་འཇུག་གི་རྒྱལ་ཐབས་ལ་དབང་བསྒྱུར་བར་ངེས་པའོ།  །དེ་དག་གིས་འཇུག་པའི་ཆོས་རྣམས་སོང་ནས་དངོས་གཞི་དབང་བསྐུར་ཞུ་བའི་ཕྱིར་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས་མཛོད། བྱང་ཆུབ་རྡོ་རྗེ་སངས་རྒྱས་ལ༔ ཇི་ལྟར་མཆོད་ཅིང་བསྟེན་པ་ལྟར༔ བདག་ཀྱང་སྐྱོབ་པའི་དོན་གྱི་ཕྱིར༔ ནམ་མཁའི་རྡོ་རྗེ་བདག་ལ་སྩོལ༔ ཞེས་ལན་གསུམ། དབང་དངོས་ལ་ཕྱི་ནང་གསང་བ་དེ་ཁོ་ན་ཉིད་མཐའ་རྟེན་གྱི་དབང་དང་ལྔ་ལས། དང་པོ་ཕྱི་དབང་རྫས་ལ་བརྟེན་ནས་བསྐུར་བ་ལ་ཐུགས་སྨོན་འདི་ལྟར་གནང་འཚལ། བདག་མདུན་གྱི་ཐུགས་ཀའི་འོད་ཟེར་གྱིས་ཕྱོགས་བཅུའི་རྒྱལ་བ་སྲས་དང་བཅས་པ་གདན་གསུམ་ཚང་བའི་དཀྱིལ་འཁོར་གྱི་རྣམ་པར་སྤྱན་དྲངས༔ བཛྲ་ས་མ་ཡ་ཛཿ ཨོཾ་བཛྲ་ཨརྒྷཾ་ནས། ཤབྡ་པྲ་ཏཱིཙྪ་སྭཱ་ཧཱ། ཉེར་སྤྱོད་བཏེགས་ཏེ་མཆོད། ཕུང་ཁམས་དག་པ་གཤེགས་པ་གཤེགས་མའི་གདན༔ དབང་ཤེས་དག་པ་སེམས་དཔའ་སེམས་མ་སྟེ༔ ལས་ཀྱི་བདག་པོ་ཁྲོ་བོ་ཁྲོ་མོའི་ཚོགས༔ གདན་གསུམ་ཡོངས་རྫོགས་ལྷ་ལ་ཕྱག་འཚལ་བསྟོད༔ ཅེས་བསྟོད་ལ། སློབ་དཔོན་གྱིས། ནམ་མཁའི་རྡོ་རྗེས་རྒྱལ་བ་ལྔར༔ དགོངས་ཤིང་ཇི་ལྟར་བསྩལ་བ་ལྟར༔ མཆོད་པ་ཆེན་པོ་བརྡ་ཡི་དབང༔ རིག་པ་འཛིན་པ་བདག་ལ་སྩོལ༔ ལན་གསུམ། ཞེས་གསོལ་བ་བཏབ་པས་དེ་བཞིན་གཤེགས་པ་རྣམས་ཀྱིས་དགོངས་པ་མཛད། གཤེགས་མ་རྣམས་ཀྱིས་དབང་བསྐུར། སེམས་དཔའ་རྣམས་ཀྱིས་བཀྲ་ཤིས་བརྗོད། སེམས་མ་རྣམས་ཀྱིས་གླུ་གར་བསྒྱུར། ཁྲོ་བོ་རྣམས་ཀྱིས་བགེགས་བསྐྲད་དེ་དབང་གི་བྱ་བ་མཛད་པར་གྱུར། བཀྲ་ཤིས་གང་ཞིག་སེམས་ཅན་ཀུན་གྱི་སྙིང་ལ་གནས། །ཀུན་གྱི་བདག་ཉིད་རིགས་ཀུན་གྱི་ནི་བདག་པོ་མཆོག །མ་ལུས་སེམས་ཅན་བསྐྱེད་མཛད་བདེ་བ་ཆེན་པོ་སྟེ། །དེས་ནི་དེང་ཁྱོད་དབང་བསྐུར་མཆོག་ལ་བཀྲ་ཤིས་ཤོག །དེ་ནས་རིགས་ལྔའི་སྐུ་གསུང་ཐུགས་ཡོན་ཏན་ཕྲིན་ལས་ལྔ་མཐའ་རྟེན་དང་བཅས་པའི་དབང་བསྐུར་བ་ལས་དང་པོ་མི་བསྐྱོད་པ་ཐུགས་ཀྱི་དབང་བསྐུར་བ་ལ། སློབ་མ་རྣམས་ཀྱི་རྣམ་ཤེས་ཀྱི་ཕུང་པོ་རྡོ་རྗེ་མི་བསྐྱོད་པ་མཐིང་ག་གཡས་རྡོ་རྗེ་རྩེ་ལྔ་པ་གཏོད་དེ་ཐུགས་ཀར་འཛིན་ཅིང༌། གཡོན་དེས་ཡུ་བ་བྱས་པའི་དྲིལ་བུ་དཀུར་བརྟེན་པའི་སྤྱི་མགྲིན་སྙིང་ག་གསུམ་དུ་ཕྱག་མཚན་ འཁོར་ལོ། པདྨ། རྡོ་རྗེ། མཆན། གསུམ་ལ་གནས་པའི་ཡི་གེ་གསུམ་ ཨོཾ་དཀར། ཨཱཿདམར། ཧཱུྃ་མཐིང༌། པད་ཟླ་ཉི་མ་ལ་གནས་པ། མཆན། གྱིས་མཚན་པ་ལ་བླ་མའི་ཐུགས་ཀ་ནས་འོད་ཟེར་འཕྲོས་པས་བླ་མ་དང་སངས་རྒྱས་བྱང་ཆུབ་སེམས་དཔའ་དཔའ་བོ་མཁའ་འགྲོ་སྤྲིན་གཏིབས་པ་ཙམ་རྡོ་རྗེ་མི་བསྐྱོད་པའི་རང་བཞིན་དུ་བྱོན་ནས་བཀྲ་ཤིས་བརྗོད་ཅིང༌། མི་བསྐྱོད་པའི་རང་བཞིན་ཆུའི་དབང་བསྐུར་བས་བླ་མ་དང་རྡོ་རྗེ་མི་བསྐྱོད་པ་དབྱེར་མེད་པ་སློབ་མའི་སྤྱི་བོར་བཞུགས་པར་སྒོམས་ཤིག །རྣམ་བུམ་ཐོགས་ལ། ཧཱུྃ༔ རྣམ་ཤེས་ཕུང་པོ་ནམ་མཁའི་ཁམས༔ ཞེ་སྡང་འཇོམས་མཛད་བཅོམ་ལྡན་འདས༔ ཆོས་དབྱིངས་ཡེ་ཤེས་མི་བསྐྱོད་པའི༔ བཀྲ་ཤིས་བུམ་པས་དབང་བསྐུར་རོ༔ ཧཱུྃ་བཛྲ་དྷྲྀཀ྄་མཱུཾ་དྷ་ཏུ་ཤྭ་རི་ཨ་བྷི་ཥིཉྩ་ཧཱུྃ༔ བུམ་ཆུ་འཐུང་བ་དང་ཁྲུས་བྱ། རིགས་ཀྱི་བུ་ཁྱོད་ལ་རྡོ་རྗེ་མི་བསྐྱོད་པའི་ངོ་བོ་ཆུའི་དབང་བསྐུར་བས་ཡིད་ཀྱི་སྒྲིབ་པ་དག༔ སངས་རྒྱས་ཐམས་ཅད་ཀྱི་ཐུགས་ཀྱི་དབང་ཐོབ༔ རྣམ་པར་ཤེས་པ་རྡོ་རྗེ་མི་བསྐྱོད་པ་དང་ནམ་མཁའི་ཁམས་དབྱིངས་ཕྱུག་མར་སངས་རྒྱས༔ ཞེ་སྡང་ཆོས་དབྱིངས་ཡེ་ཤེས་སུ་གྲོལ་ཏེ་སངས་རྒྱས་རྡོ་རྗེའི་རིགས་མཆོག་གི་ཐུགས་རྣམ་པར་མི་རྟོག་པས་འགྲོ་བའི་དོན་བྱེད་ནུས་པར་གྱུར་ཅིག༔  གཉིས་པ་རིན་ཆེན་འབྱུང་ལྡན་ཡོན་ཏན་གྱི་དབང་བསྐུར་བ་ལ། སློབ་མ་རྣམས་ཀྱི་ཚོར་བའི་ཕུང་པོ་རིན་ཆེན་འབྱུང་ལྡན་སེར་པོ་ཕྱག་ན་རིན་པོ་ཆེ་དང་དྲིལ་བུ་བསྣམས་པའི་སྤྱི་མགྲིན་སྙིང་ག་གསུམ་དུ་ཕྱག་མཚན་གསུམ་ལ་གནས་པའི་ཡི་གེ་གསུམ་གྱིས་མཚན་པ་ལ་བླ་མའི་ཐུགས་ཀ་ནས་འོད་ཟེར་འཕྲོས་པས་བླ་མ་དང་སངས་རྒྱས་བྱང་ཆུབ་སེམས་དཔའ་དཔའ་བོ་མཁའ་འགྲོ་སྤྲིན་གཏིབས་པ་ཙམ་རིན་ཆེན་འབྱུང་ལྡན་གྱི་རང་བཞིན་དུ་བྱོན་ནས་བཀྲ་ཤིས་བརྗོད་ཅིང༌། རིན་ཆེན་འབྱུང་ལྡན་གྱི་རང་བཞིན་དབུ་རྒྱན་གྱིས་དབང་བསྐུར་བས་བླ་མ་དང་རིན་ཆེན་འབྱུང་ལྡན་དབྱེར་མེད་པ་སློབ་མའི་སྤྱི་བོར་བཞུགས་པར་སྒོམས་ཤིག །དབུ་རྒྱན་སྤྱི་བོར་བཅིངས་ཏེ། ཧཱུྃ༔ ཚོར་བའི་ཕུང་པོ་མཉེན་པའི་དབྱིངས༔ ང་རྒྱལ་འཇོམས་མཛད་བཅོམ་ལྡན་འདས༔ མཉམ་ཉིད་ཡེ་ཤེས་རིན་ཆེན་འབྱུང༔ དབུ་རྒྱན་རིགས་ལྔས་དབང་བསྐུར་རོ༔ སྭཱ་རཏྣ་དྷྲྀཀ྄་མཱཾ་མོ་ཧ་ར་ཏི་ཨ་བྷི་ཥིཉྩ་ཧཱུྃ༔ རྒྱས་པར་སྤྲོ་ན་མཐའ་རྟེན་བུམ་པའི་ཆུ་དབང་འདི་མི་བསྐྱོད་པ་མ་གཏོགས་རིགས་དབང་བཞི་ཀ་ལ་སྦྱར་བར་གསུངས་པས། རྣམ་བུམ་བཏེགས་ཅིང་ཆུ་འཐོར་ཏེ། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡེ་ཤྲཱི་ཧཱུྃ༔ རིགས་ཀྱི་བུ་ཁྱོད་ལ་རིན་འབྱུང་གི་ངོ་བོ་གོ་འཕང་ཆེན་པོའི་དབུ་རྒྱན་འདི་བསྐོན་པ་ཙམ་གྱིས་ཤེས་བྱའི་སྒྲིབ་པ་སྦྱངས༔ སངས་རྒྱས་ཐམས་ཅད་ཀྱི་ཡོན་ཏན་གྱི་དབང་ཐོབ༔ ཚོར་བའི་ཕུང་པོ་རིན་ཆེན་འབྱུང་ལྡན་དང་ཆུའི་ཁམས་མཱ་མ་ཀཱིར་སངས་རྒྱས༔ ང་རྒྱལ་མཉམ་པ་ཉིད་ཀྱི་ཡེ་ཤེས་སུ་གྲོལ་ཏེ་སངས་རྒྱས་རིན་ཆེན་རིགས་ཀྱི་ཡོན་ཏན་བསམ་མི་ཁྱབ་པའི་གོ་འཕང་ཆེན་པོ་ལྔས་འགྲོ་བའི་དོན་བྱེད་ནུས་པར་གྱུར་ཅིག༔  གསུམ་པ་སྣང་བ་མཐའ་ཡས་གསུང་གི་དབང་བསྐུར་བ་ལ། སློབ་མ་རྣམས་ཀྱི་འདུ་ཤེས་ཀྱི་ཕུང་པོ་སྣང་བ་མཐའ་ཡས་དམར་པོ་ཕྱག་ན་པདྨ་དང་དྲིལ་བུ་འཛིན་པའི་སྤྱི་མགྲིན་སྙིང་ག་གསུམ་དུ་ཕྱག་མཚན་གསུམ་ལ་གནས་པའི་ཡི་གེ་གསུམ་གྱིས་མཚན་པ་ལ་བླ་མའི་ཐུགས་ཀ་ནས་འོད་ཟེར་འཕྲོས་པས་བླ་མ་དང་སངས་རྒྱས་བྱང་ཆུབ་སེམས་དཔའ་དཔའ་བོ་མཁའ་འགྲོ་སྤྲིན་གཏིབས་པ་ཙམ་སྣང་བ་མཐའ་ཡས་ཀྱི་རང་བཞིན་དུ་བྱོན་ནས་བཀྲ་ཤིས་བརྗོད་ཅིང༌། སྣང་བ་མཐའ་ཡས་ཀྱི་རང་བཞིན་རྡོ་རྗེས་དབང་བསྐུར་བས་བླ་མ་དང་སྣང་བ་མཐའ་ཡས་དབྱེར་མེད་པ་སློབ་མའི་སྤྱི་བོར་བཞུགས་པར་སྒོམས་ཤིག །རྡོ་རྗེ་ལག་གཡས་སུ་གཏད་ཅིང་མགྲིན་པར་གསོར་ལ། ཧཱུྃ༔ འདུ་ཤེས་ཕུང་པོ་དྲོ་བའི་ཁམས༔ འདོད་ཆགས་འཇོམས་མཛད་བཅོམ་ལྡན་འདས༔ སོར་རྟོག་ཡེ་ཤེས་སྣང་མཐའ་ཡས༔ ཐབས་ཀྱི་རྡོ་རྗེས་དབང་བསྐུར་རོ༔ ཨཱཾ་ཨ་རོ་ལྀཀ་པཱྃ་རཱ་ག་ར་ཏི་སྟྭཾ་ཨ་བྷི་ཥིཉྩ་ཧཱུྃ༔ རྣམ་བུམ་གྱི་ཆུ་འཐོར། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡེ་ཤྲཱི་ཧཱུྃ༔ རིགས་ཀྱི་བུ་ཁྱོད་ལ་སྣང་བ་མཐའ་ཡས་ཀྱི་ངོ་བོ་རྡོ་རྗེས་དབང་བསྐུར་བས་ངག་དང་རླུང་གི་སྒྲིབ་པ་དག༔ སངས་རྒྱས་ཐམས་ཅད་ཀྱི་གསུང་གི་དབང་ཐོབ༔ འདུ་ཤེས་ཀྱི་ཕུང་པོ་སྣང་བ་མཐའ་ཡས་དང་མེ་ཁམས་གོས་དཀར་མོར་སངས་རྒྱས༔ འདོད་ཆགས་སོ་སོར་རྟོག་པའི་ཡེ་ཤེས་སུ་གྲོལ་ཏེ་སངས་རྒྱས་པདྨའི་རིགས་ཀྱི་གསུང་རྣམ་པ་ཐམས་ཅད་པས་འགྲོ་བའི་དོན་བྱེད་ནུས་པར་གྱུར་ཅིག༔  བཞི་པ་དོན་ཡོད་གྲུབ་པ་ཕྲིན་ལས་ཀྱི་དབང་བསྐུར་བ་ལ། སློབ་མ་རྣམས་ཀྱི་འདུ་བྱེད་ཀྱི་ཕུང་པོ་དོན་ཡོད་གྲུབ་པ་ལྗང་གུ་ཕྱག་ན་རལ་གྲི་དང་དྲིལ་བུ་འཛིན་པའི་སྤྱི་མགྲིན་སྙིང་ག་གསུམ་དུ་ཕྱག་མཚན་གསུམ་ལ་གནས་པའི་ཡི་གེ་གསུམ་གྱིས་མཚན་པ་ལ་བླ་མའི་ཐུགས་ཀ་ནས་འོད་ཟེར་འཕྲོས་པས་བླ་མ་དང་སངས་རྒྱས་བྱང་ཆུབ་སེམས་དཔའ་དཔའ་བོ་མཁའ་འགྲོ་སྤྲིན་གཏིབས་པ་ཙམ་དོན་ཡོད་གྲུབ་པའི་རང་བཞིན་དུ་བྱོན་ནས་བཀྲ་ཤིས་བརྗོད་ཅིང༌། དོན་ཡོད་གྲུབ་པའི་རང་བཞིན་དྲིལ་བུ་ལག་གཡོན་དུ་གཏད་པ་དཀྲོལ་ཞིང་དཀུ་ལ་བརྟེན་ཏེ་དབང་བསྐུར་བས་བླ་མ་དང་དོན་ཡོད་གྲུབ་པ་དབྱེར་མེད་པ་སློབ་མའི་སྤྱི་བོར་བཞུགས་པར་སྒོམས་ཤིག །དྲིལ་བུ་ལག་གཡོན་དུ་གཏད་ལ། ཧཱུྃ༔ འདུ་བྱེད་ཕུང་པོ་བསྐྱོད་པའི་ཁམས༔ ཕྲག་དོག་འཇོམས་མཛད་བཅོམ་ལྡན་འདས༔ བྱ་གྲུབ་ཡེ་ཤེས་དོན་ཡོད་གྲུབ༔ ཤེས་རབ་དབྱིངས་ཀྱི་དབང་བསྐུར་རོ༔ ཧཱ་པྲ་ཛྙཱ་དྷྲྀཀ྄་ཏཱྃ་བཛྲ་ར་ཏི་ཨ་བྷི་ཥིཉྩ་ཧཱུྃ༔ རྣམ་བུམ་གྱི་ཆུ་འཐོར་ལ། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡེ་ཤྲཱི་ཧཱུྃ༔ རིགས་ཀྱི་བུ་ཁྱོད་ལ་དོན་གྲུབ་ཀྱི་ངོ་བོ་དྲིལ་བུས་དབང་བསྐུར་བས་ཀུན་གཞིའི་སྒྲིབ་པ་དག༔ སངས་རྒྱས་ཐམས་ཅད་ཀྱི་ཕྲིན་ལས་ཀྱི་དབང་ཐོབ༔ འདུ་བྱེད་ཀྱི་ཕུང་པོ་དོན་ཡོད་གྲུབ་པ་དང་རླུང་གི་ཁམས་དམ་ཚིག་སྒྲོལ་མར་སངས་རྒྱས༔ ཕྲག་དོག་བྱ་བ་གྲུབ་པའི་ཡེ་ཤེས་སུ་གྲོལ་ཏེ་སངས་རྒྱས་ལས་ཀྱི་རིགས་ཀྱི་ཕྲིན་ལས་ཐོགས་པ་མེད་པས་འགྲོ་བའི་དོན་བྱེད་ནུས་པར་གྱུར་ཅིག༔  ལྔ་པ་སྐུ་རྣམ་པར་སྣང་མཛད་མིང་གི་དབང་བསྐུར་བ་ལ། སློབ་མ་རྣམས་ཀྱི་གཟུགས་ཀྱི་ཕུང་པོ་རྣམ་པར་སྣང་མཛད་དཀར་པོ་ཕྱག་ན་འཁོར་ལོ་དང་དྲིལ་བུ་འཛིན་པའི་སྤྱི་མགྲིན་སྙིང་ག་གསུམ་དུ་ཕྱག་མཚན་གསུམ་ལ་གནས་པའི་ཡི་གེ་གསུམ་གྱིས་མཚན་པ་ལ་བླ་མའི་ཐུགས་ཀ་ནས་འོད་ཟེར་འཕྲོས་པས་བླ་མ་དང་སངས་རྒྱས་བྱང་ཆུབ་སེམས་དཔའ་དཔའ་བོ་མཁའ་འགྲོ་སྤྲིན་གཏིབས་པ་ཙམ་རྣམ་པར་སྣང་མཛད་ཀྱི་རང་བཞིན་དུ་བྱོན་ནས་བཀྲ་ཤིས་བརྗོད་ཅིང༌། རྣམ་པར་སྣང་མཛད་ཀྱི་རང་བཞིན་མིང་གི་དབང་བསྐུར་བས་བླ་མ་དང་རྣམ་པར་སྣང་མཛད་དབྱེར་མེད་པ་སློབ་མའི་སྤྱི་བོར་བཞུགས་པར་སྒོམས་ཤིག །རྡོར་དྲིལ་བསྣོལ་མ་བཟུང་སྟེ་མགོ་ཐོག་ཏུ་དཀྲོལ་ལ། ཧཱུྃ༔ མིང་གཟུགས་ཕུང་པོ་སྲ་བའི་ཁམས༔ གཏི་མུག་འཇོམས་མཛད་བཅོམ་ལྡན་འདས༔ མེ་ལོང་ཡེ་ཤེས་དེ་བཞིན་གཤེགས༔ རྡོ་རྗེ་མིང་གི་དབང་བསྐུར་རོ༔ ཨོཾ་ཛཱི་ན་ཛྀཀ྄་ལཱྃ་དེ་ཥ་ར་ཏི་བཛྲ་མ་ཧཱ་ཤྲཱི་ཨ་བྷི་ཥིཉྩ་ཧཱུྃ༔ རྣམ་བུམ་གྱི་ཆུ་འཐོར་ལ། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡེ་ཤྲཱི་ཧཱུྃ༔ རིགས་ཀྱི་བུ་ཁྱོད་ལ་རྣམ་པར་སྣང་མཛད་མིང་གིས་དབང་བསྐུར་བས་གཟུགས་ཀྱི་ཕུང་པོར་འཛིན་པའི་སྒྲིབ་པ་དག༔ སངས་རྒྱས་ཐམས་ཅད་ཀྱི་སྐུའི་དབང་ཐོབ༔ མིང་གཟུགས་ཀྱི་ཕུང་པོ་རྣམ་པར་སྣང་མཛད་དང་སའི་ཁམས་སངས་རྒྱས་སྤྱན་མར་སངས་རྒྱས༔ གཏི་མུག་མེ་ལོང་ལྟ་བུའི་ཡེ་ཤེས་སུ་གྲོལ་ཏེ༔ སངས་རྒྱས་དེ་བཞིན་གཤེགས་པའི་རིགས་ཀྱི་རྡོ་རྗེ་ལྟ་བུའི་སྐུས་འགྲོ་བའི་དོན་བྱེད་ནུས་པར་གྱུར་ཅིག༔  དྲུག་པ་ཁྱབ་བྱ་རིགས་ལྔ་ལ་ཁྱབ་བྱེད་དྲུག་པའི་རིགས་ཀྱི་བདག་ཉིད་མཐའ་རྟེན་རྣམ་པར་རྒྱལ་བའི་བུམ་པ་དཀྱིལ་འཁོར་ཡོངས་རྫོགས་ཀྱི་ངོ་བོས་དབང་བསྐུར་བ་ལ། སློབ་མ་རྣམས་དཀྱིལ་འཁོར་གྱི་གཙོ་བོ་སྤྱི་དཔལ་ཆེན་པོ་ཧེ་རུ་ཀ་ཡུམ་གནམ་ཞལ་དབྱིངས་ཕྱུག་མ་དང་གཉིས་སུ་མེད་པར་སྦྱོར་ཞིང་རང་རྟགས་ཕྱག་མཚན་དང་རྒྱན་ཆ་ལུགས་ཡོངས་སུ་རྫོགས་པ་མཚན་དཔེའི་གཟི་བྱིན་འབར་བའི་སྐུར་གྱུར་པ་ལ་ནམ་མཁའ་གང་བའི་དབང་གི་ལྷ་རྣམས་ཀྱིས་རིན་པོ་ཆེའི་བུམ་པ་བདུད་རྩིའི་ཆུ་རྒྱུན་ཅན་གྱིས་དབང་བསྐུར་བར་མོས་ཤིག །རྣམ་རྒྱལ་བུམ་པ་བཟུང་ལ། ཧཱུྃ༔ བཀྲ་ཤིས་བུམ་པ་ལྷའི་གཞལ་ཡས༔ ལྷ་དང་གཉིས་མེད་བདུད་རྩིའི་ཆུས༔ སྐལ་ལྡན་བུ་ལ་དབང་བསྐུར་བས༔ སྣང་ཞེན་ལྷ་སྐུའི་ཕྱག་རྒྱར་རྫོགས༔ རྣམ་སྨིན་རིག་འཛིན་ཉེར་ཐོབ་ཅིང༔ ཀུན་ཏུ་འོད་ཀྱི་ས་ནོན་ཤོག༔ ཨོཾ་གུ་རུ་ཤྲཱི་བཛྲ་ཡཀྴ་ཀྲོ་ཏ་ཙིཏྟ་ཧཱུྃ༔ བཛྲ་ཀ་ལ་ཤ་ཨ་བྷི་ཥིཉྩ་ཧཱུྃ༔ བུམ་པ་སྤྱི་བོར་བཞག་ཅིང་བུམ་ཆུ་སྦྱིན། དེ་ལྟར་དབང་བསྐུར་བའི་ཆུ་རྒྱུན་གྱིས་ལུས་ཀྱི་ནང་གང་སྒྲིབ་པ་བཞིའི་ས་བོན་དང་བཅས་པ་དག །ཆུ་ཡི་ལྷག་མ་སྤྱི་བོར་འཁྱིལ་བ་ལས་རིགས་ཀྱི་བདག་པོ་གསུང་རྡོ་རྗེ་སྣང་བ་མཐའ་ཡས་ སྒོས་བཀའ་གཞན་ལ་རིགས་བདག་གཤིན་རྗེ་ལ་རྣམ་སྣང༌། རྟ་མགྲིན་ལ་སྣང་མཐའ། ཡང་དག་ལ་མི་བསྐྱོད་པ། ཕུར་པ་ལ་དོན་གྲུབ། མཆན། ཀྱིས་དབུར་བརྒྱན་པས་རྒྱས་གདབ་པར་མོས་ཤིག  །གཉིས་པ་བུམ་དབང་གི་རྗེས་འབྲེལ་ནང་དབང་ལུས་ལ་བརྟེན་ཏེ་ཡེ་ཤེས་ཀློང་དགུའི་དཀྱིལ་འཁོར་གྱི་གཙོ་བོ་རྣམས་ཀྱི་དབང་བསྐུར་བ་ལ། ལྷ་ཚོགས་རྣམས་ལས་རང་འདྲའི་སྐུ་གཉིས་པ་རེ་བྱོན་ནས་ཁྱེད་རང་རྣམས་དཔལ་ཆེན་པོར་གསལ་བའི་སྤྱི་བོ་ལ་སོགས་ལུས་གནས་རྩ་འཁོར་རྣམས་སུ་བཞུགས་པས་ལྷ་དེ་དང་དེའི་ཡོན་ཏན་དང་ནུས་པ་ཐམས་ཅད་ཐོབ་པར་མོས་ཤིག །སྤྱི་བོར། ཆེ་མཆོག་ལྷ་ཚོགས་དབང་བསྐུར་བས། །ཆོས་དབྱིངས་ཡེ་ཤེས་རྟོགས་པར་ཤོག །ཨོཾ་གུ་རུ་ཤྲཱི་བཛྲ་ཡཀྴ་ཀྲོ་ཏ་ཙིཏྟ་ཧཱུྃ་ཨ་བྷི་ཥིཉྩཧཱུྃ། དཔྲལ་བར། འཇམ་དཔལ་སྐུ་ཡི་དབང་བསྐུར་བས། །མཉམ་ཉིད་ཡེ་ཤེས་རྟོགས་པར་ཤོག །ཨོཾ་ཧྲཱིཿཥྚི་ཝི་ཀྲི་ཏཱ་ན་ན་ཨ་བྷི་ཥིཉྩ་ཧཱུྃ། མགྲིན་པར། པདྨ་གསུང་གི་དབང་བསྐུར་བས། །སོར་རྟོག་ཡེ་ཤེས་རྟོགས་པར་ཤོག །ཨོཾ་པདྨཱནྟ་ཀྲྀཏ་ཧྱ་གྲཱྀ་ཝ་ཨ་བྷི་ཥིཉྩ་ཧཱུྃ། སྙིང་གར། ཡང་དག་ཐུགས་ཀྱི་དབང་བསྐུར་བས། །མེ་ལོང་ཡེ་ཤེས་རྟོགས་པར་ཤོག །ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ་ཨ་བྷི་ཥིཉྩ་ཧཱུྃ། ལྟེ་བར། ཕུར་པ་ཕྲིན་ལས་དབང་བསྐུར་བས། །བྱ་གྲུབ་ཡེ་ཤེས་རྟོགས་པར་ཤོག །ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བྃ་ཧཱུྃ་ཕཊ་ཨ་བྷི་ཥིཉྩ་ཧཱུྃ། གསང་གནས། མ་མོ་རྦོད་གཏོང་དབང་བསྐུར་བས། །དབྱིངས་གྲོལ་ཡེ་ཤེས་རྟོགས་པར་ཤོག །ཨོཾ་གུ་ཧྱ་ཛྙཱན་ཤྲཱི་ཧེ་རུ་ཀ་སརྦ་ས་མ་ཡ་ཨ་བྷི་ཥིཉྩ་ཧཱུྃ། བརླ་གཡས། འཇིག་རྟེན་མཆོད་བསྟོད་དབང་བསྐུར་བས། །ཀློང་གྱུར་ཡེ་ཤེས་རྟོགས་པར་ཤོག །ཨོཾ་བཛྲ་ཙཎྜ་སརྦ་དུཥྚཾ་ཨ་བྷི་ཥིཉྩཧཱུྃ། བརླ་གཡོན། དམོད་པ་དྲག་སྔགས་དབང་བསྐུར་བས། །ལྷུན་གྲུབ་ཡེ་ཤེས་རྟོགས་པར་ཤོག །ཨོཾ་བཛྲ་སརྦ་དུཥྚན་ཨ་བྷི་ཥིཉྩ་ཧཱུྃ། སྤྱི་བོར། རིག་འཛིན་སློབ་དཔོན་དབང་བསྐུར་བས། །འདའ་ཀ་ཡེ་ཤེས་རྟོགས་པར་ཤོག །ཨོཾ་བཛྲ་མ་ཧཱ་གུ་རུ་ཨ་བྷི་ཥིཉྩ་ཧཱུྃ། དཔུང་པ་གཉིས། ཚོགས་བརྒྱད་གདུག་པ་ཀླུ་ཡི་གདོན། །ཟ་བྱེད་ཁྱུང་གི་དབང་བསྐུར་རོ། །ཁྲོཾ་ག་རུ་ཌ་ཨ་བྷི་ཥིཉྩ་ཧཱུྃ། དེ་ལྟར་ལྷ་ཚོགས་རྣམས་གནས་སོར་སོར་ཐིམ་པས་སྒྲུབ་སྡེ་དགུའི་སྐུའི་རྣམ་པ་གང་དང་གང་གིས་འདུལ་བ་དེ་དང་དེའི་རྣམ་རོལ་འགག་མེད་སྣང་སྟོང་ཆུ་ཟླའི་གར་བཞིན་སྤྱོད་པའི་མཐུ་ཐོབ་པ་ཡིན་ནོ།  །བུམ་དབང་གི་དག་པ་བརྗོད་པ་ནི། དེས་རྡུལ་ཚོན་སྤྲུལ་པའི་དཀྱིལ་འཁོར་དུ་བུམ་པའི་དབང་ཐོབ་ལུས་ཀྱི་ལས་གསུམ་དག༔ གཟུགས་སུ་རྣམ་པར་རྟོག་པ་དང་རྩའི་ཁམས་སྟོང་ཕྲག་བདུན་ཅུ་རྩ་གཉིས་སྦྱངས༔ དེ་བཞིན་གཤེགས་པ་ཐམས་ཅད་ཀྱི་སྐུ་རྡོ་རྗེའི་བྱིན་རླབས་ཞུགས༔ བསྐྱེད་རིམ་དམ་ཚིག་གི་ཕྱག་རྒྱ་བསྒོམ་པ་ལ་དབང༔ ཞི་བའི་ལས་དང་རྣམ་པར་སྨིན་པའི་རིག་འཛིན་འགྲུབ༔ བཅུ་གཅིག་ཀུན་ཏུ་འོད་ཀྱི་ས་ནོན༔ འབྲས་བུ་སྤྲུལ་པའི་སྐུ་མངོན་དུ་བྱས་པའོ༔  གསུམ་པ་གསང་དབང་ཡུམ་ལ་བརྟེན་ཏེ་བསྐུར་བ་ལ་གཉིས་ཡོད་པ་ལས་དང་པོ་གསང་དབང་དངོས་ཞུ་བའི་དོན་དུ་མཎྜལ་ཕུལ། དེ་ཡང་དག་བྱ་སློབ་མའི་ངག་གི་རྟེན་རླུང་ལ་གསང་རྫས་ཁྱད་པར་ཅན་བསྲེས་པའི་སྒོ་ནས་དག་འབྲས་གསུང་རྡོ་རྗེ་ལོངས་སྐུའི་བདག་ཉིད་ལ་གསོལ་བ་འདེབས་པ་འདིའི་རྗེས་ཟློས་མཛོད། ཧོ༔ སྟངས་དཔྱལ་མཉམ་པར་རོལ་པ་ཡི༔ གདན་གསུམ་སྐུ་ཡི་དཀྱིལ་འཁོར་ནས༔ ཞུ་བདེས་དྲངས་པའི་བྱང་ཆུབ་སེམས༔ སྐལ་པ་ཅན་ལ་བསྩལ་དུ་གསོལ༔ ལན་གསུམ། བླ་མ་ཧེ་རུ་ཀ་ཡབ་ཡུམ་སྙོམས་པར་ཞུགས་པའི་དགའ་བའི་སྒྲ་དང་འོད་ཟེར་གྱིས་དེ་བཞིན་གཤེགས་པ་ཐམས་ཅད་སྤྱན་དྲངས། སྤྱི་བོ་ནས་ཞུགས་པ་འདོད་ཆགས་ཆེན་པོའི་ཆོས་བྱང་ཆུབ་སེམས་སུ་ཞུ་བ་མཁའ་གསང་ནས་ཕྱུང་སྟེ་ཐོད་པའི་ཛ་གད་དང་ལྷན་ཅིག་པ་ལྕེ་ཐོག་ཏུ་བཞག་པའི་མོས་པས་དམིགས་པ་གསུམ་དྲན་པར་བྱས་ལ། ཧཱུྃ༔ ཡབ་ཡུམ་སྦྱོར་བའི་བྱང་ཆུབ་སེམས༔ དཀར་དམར་བྷནྡྷའི་ནང་དུ་བསྐྱིལ༔ སྐལ་ལྡན་བུ་ལ་བྱིན་པ་ཡིས༔ རྩ་ཁམས་ཡི་གེའི་རྣམ་པར་སྨིན༔ ཚེ་ལ་དབང་བའི་རིག་འཛིན་ཐོབ༔ པདྨ་ཅན་གྱི་ས་ནོན་ཤོག༔ ཨོཾ་བོ་དྷི་ཙིཏྟ་ཝཱཀྐ་ཨ་བྷི་ཥིཉྩ་ཨཱཿ ཞེས་བྱིན་པ་དེ་ཉིད་སངས་རྒྱས་ཐམས་ཅད་འདུས་པའི་ཡེ་ཤེས་ཀྱི་ངོ་བོར་མོས་ལ་སྔགས་འདིའི་རྗེས་ཟློས་མཛོད། ཨ་ཧོ་མ་ཧཱ་སུ་ཁ༔ ཞེས་མྱངས་བས་ཡེ་ཤེས་ཀྱི་བདུད་རྩི་ཤེལ་ལྟར་དྭངས་ཤིང་བདེ་བ་དང་མི་ཕྱེད་པས་ལུས་ཐམས་ཅད་གང༌། གསལ་སྟོང་ནམ་མཁའ་དང་མཉམ་པའི་ཏིང་ངེ་འཛིན་རྒྱུད་ལ་སྐྱེས་པར་མོས། རྗེས་འབྲེལ་བཟླས་པའི་ལུང་སྦྱིན་པ་ལ་མདུན་བསྐྱེད་དཔལ་ཆེན་པོའི་ཐུགས་ཀ་ནས་སྔགས་ཕྲེང་ལུ་གུ་རྒྱུད་དུ་བྱུང༌། སློབ་མའི་མགྲིན་པ་བརྒྱུད་སྙིང་གར་འཁོར་བར་མོས་ལ། རྩ་སྔགས་འབྲུ་གསུམ། གུ་རུ་ཤྲཱི། བཛྲ་ཙཎྜ་རྣམས་སོ་སོར་ལན་གསུམ་བཟླ། དེས་གདན་གསུམ་གསུང་གི་དཀྱིལ་འཁོར་དུ་གསང་བའི་དབང་ཐོབ༔ ངག་གི་ལས་རྣམ་པ་བཞི་དག༔ སྒྲ་ཚིག་རང་མཚན་དུ་འཛིན་པ་དང་རླུང་བཅུ་དག་པར་སྦྱངས༔ གསུང་རྡོ་རྗེའི་བྱིན་རླབས་ཞུགས༔ བཟླས་བརྗོད་དང་རྫོགས་རིམ་ཆོས་ཀྱི་ཕྱག་རྒྱ་སྒོམ་པ་ལ་དབང༔ རྒྱས་པའི་ལས་དང་ཚེ་ལ་དབང་བའི་རིག་འཛིན་འགྲུབ༔ མ་ཆགས་པདྨ་ཅན་གྱི་ས་ནོན༔ འབྲས་བུ་ལོངས་སྤྱོད་རྫོགས་པའི་སྐུ་མངོན་དུ་བྱས་པའོ༔ སྲོག་ཐུར་སྦྱར་ལ་སྲོག་རྩོལ་བཅིངས༔ ཉི་ཁྲི་ཆིག་སྟོང་དྲུག་བརྒྱའི་དབུགས༔ ཡི་གེ་གསུམ་དུ་དག་པར་བསམ༔  གཉིས་པ་ཤེས་རབ་ཡེ་ཤེས་ཀྱི་དབང་ཞུ་བའི་དོན་དུ་མཎྜལ་ཕུལ། མཚན་ཉིད་དང་ལྡན་པའི་ལས་རྒྱ་སློབ་མའི་ལག་གཡས་སུ་གཏད་པར་མོས་ཤིག །རིག་ཙཀ་གཏད་ལ། ཧོ༔ ཆོས་རྣམས་ཀུན་གྱི་འབྱུང་གནས་ཆེ༔ བདེ་བ་ཆེན་པོ་གསང་བའི་ཡུམ༔ རིགས་ཀྱི་བུ་ལ་བྱིན་པ་ཡིས༔ དགའ་བཞིའི་ཡེ་ཤེས་མངོན་དུ་གྱུར༔ ཕྱག་རྒྱ་ཆེན་པོའི་རིག་འཛིན་ཐོབ༔ འཁོར་ལོ་ཚོགས་ཆེན་ས་ནོན་ཤོག༔ པྲཛྙཱ་ཛྙཱ་ན་དྷརྨ་དྷཱ་ཏུ་ཧོ༔ དེ་ལྟར་གཏད་པའི་གཟུངས་མ་དེས་ལུས་གཅེར་བུར་ཕྱུང༌། དྲི་བཟང་པོས་བགོས། རྒྱན་གྱིས་བརྒྱན་ཏེ་ལང་ཚོ་ཤིན་ཏུ་བདོ་བའི་རྣམ་འགྱུར་གྱིས་བདེ་བ་ཆེན་པོའི་དཀྱིལ་འཁོར་ངོམས་པ་དང་བཅས་འདི་སྐད་གསུངས་པར་མོས་ཤིག །དུས་སྦྱོར་བཅུ་གཉིས་རླུང་གི་ཁམས༔ ཟ་བྱེད་རྡོ་རྗེའི་ཕོ་ཉ་མོ༔ དགའ་བ་བཞི་ཡི་འབྱུང་གནས་ང༔ ཆོ་ག་བཞིན་དུ་བསྟེན་ནུས་སམ༔ ཞེས་དྲིས་པ་ལ་སློབ་མས་ཕྱག་འཚལ་ཞིང་མེ་ཏོག་འཐོར་བ་དང་བཅས། འདུལ་བ་མདོ་སྡེ་ཆོས་མངོན་ནས༔ རྣམ་བཅས་ལྷ་མོ་དགག་མཛད་པ༔ ཐབས་ལ་རྨོངས་པ་དག་ལ་དགོངས༔ ལྷན་ཅིག་སྐྱེས་པའི་ཡེ་ཤེས་ནི༔ ཁྱོད་ལས་འབྱུང་ཕྱིར་བདག་འཚལ་ལོ༔ ཞེས་གསང་བའི་སྤྱོད་པའི་དམ་ཚིག་རྣམས་ཆོ་ག་བཞིན་དུ་བསྟེན་པར་སྤྲོ་བའི་ལན་བཏབ་པས། རྡོ་རྗེའི་རིགས་ཅན་ཐ་མལ་གྱི་རྟོག་པ་བྲལ་བར་མཐོང་ནས་དགྱེས་ཏེ་དངོས་གྲུབ་ཆེན་པོའི་འབྱུང་གནས་ཡིན་པར་ངོ་སྤྲད་པ་ནི། རྡོ་རྗེ་བཙུན་མོའི་ཆུ་སྐྱེས་ནི༔ རྣམ་ཐར་གསུམ་གྱི་བདག་ཉིད་ཅན༔ འདི་སྤང་མཆོག་གི་དངོས་གྲུབ་མེད༔ ཐར་པ་བསྟེན་ཅིག་དཔའ་བོ་ཆེ༔ ཛཿཧཱུྃ་བྃ་ཧོཿའི་དམ་ཚིག་ལས༔ ཨེ་ཝཾ་མཉམ་པར་རོལ་པ་ཡིས༔ འཁོར་ལོ་བཞིར་བབས་ལྡོག་དང་ཁྱབ༔ དགའ་མཆོག་ཁྱད་པར་ལྷན་སྐྱེས་ལས༔ བཅུ་དྲུག་ཕྱེད་ཕྱེད་ཐིག་ལེའི་ཁམས༔ སྲིད་པ་ཟ་བྱེད་ཆེན་པོར་སྨིན༔ མས་བརྟན་ལུགས་ལྡོག་ལྷན་ཅིག་སྐྱེས༔ བདེ་ཆེན་འཁོར་ལོར་མཉམ་པར་བཞག༔ ཅེས་རང་གི་རྟོགས་པ་བརྗོད་པས་པདྨ་བྷཉྫ་མོ་ཀྵ་ལ་སོགས་པའི་སྒྲས་ཐར་པ་བསྟེན་པར་བསྐུལ་ནས་པང་དུ་བྱོན་ཏེ་ཛཿཧཱུྃ་བྃ་ཧོཿལ་སོགས་པའི་དོན་གྱིས་འཁྱུད་སྡོམ་སྤྲད་ཅིང་སྤྱོད་ནས། སློབ་མ་ཆེ་མཆོག་དང༌། ལས་རྒྱ་གནམ་ཞལ་མ། མཁའ་གསང་ཧཱུྃ་ལས་རྡོ་རྗེ་ཨོཾ་གྱིས་མཚན་པ་དང༌། པྃ་ལས་པདྨ་མཱུྃ་གྱིས་མཚན་པར་བསམ་ནས་འདོད་ཡོན་ལྔ་ཡི་བདེ་བ་དང་རོ་མཉམ་གྱིས་བསྲུབས་པས་བྱང་ཆུབ་ཀྱི་སེམས་གཡོས། འཁོར་ལོ་བཞིའི་གནས་སུ་དགའ་བཞིའི་ཡེ་ཤེས་ཉམས་སུ་མྱོང་བར་མོས་ལ་སྔགས་འདིའི་རྗེས་ཟློས་དང་འཁྱུད་རྒྱ་མཛོད། ཨོཾ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ༔ སླར་ཡང་ཧཱུྃ་གི་སྦྱོར་བས་ཡུམ་གྱི་དྭངས་མ་དང་ལྷན་ཅིག་གྱེན་དུ་དྲངས། ལུགས་ལྡོག་གི་དགའ་བཞི་རིམ་གྱིས་སྤྱི་བོར་བརྟན་པ་ལས་སོ་སོ་རང་རིག་བདེ་སྟོང་སྤྲོས་པ་དང་བྲལ་བའི་ངང་ལ་མཉམ་པར་ཞོག་མཛོད། དེས་རྡོ་རྗེ་བཙུན་མོའི་མཁའ་དབྱིངས་སུ་ཤེས་རབ་ཡེ་ཤེས་ཀྱི་དབང་ཐོབ༔ ཡིད་ཀྱི་ལས་གསུམ་དག༔ ཡིད་དང་ཆོས་སུ་རྟོགས་པ་ལས་བྱུང་བའི་རྣམ་ཤེས་ཚོགས་བདུན་དང༔ རང་བཞིན་བརྒྱད་ཅུའི་རྟོག་པ་སྦྱངས༔ ཐུགས་རྡོ་རྗེའི་བྱིན་རླབས་ཞུགས༔ ཟུང་འཇུག་ལས་ཀྱི་ཕྱག་རྒྱ་བསྟེན་པ་ལ་དབང༔ དབང་གི་ལས་དང་ཕྱག་རྒྱ་ཆེན་པོའི་རིག་འཛིན་འགྲུབ༔ ཡི་གེ་འཁོར་ལོ་ཚོགས་ཆེན་གྱི་ས་ནོན༔ འབྲས་བུ་ཆོས་ཀྱི་སྐུ་མངོན་དུ་བྱས་པའོ༔  བཞི་པ་དེ་ཁོ་ན་ཉིད་ཀྱི་དབང་སེམས་ལ་བརྟེན་ནས་བསྐུར་བ་ཞུ་བའི་དོན་དུ་མཎྜལ་ཕུལ། ཁྱེད་རང་རྣམས་སྔར་ཤེར་དབང་གི་དུས་སུ་དཔེ་ཡི་ལྷན་སྐྱེས་ལ་བརྟེན་ནས་ཉམས་སུ་མྱོང་བའི་བདེ་བ་ཆེན་པོ་བཞི་པའི་ཡེ་ཤེས་ངོ་སྤྲོད་པ་མཚོན་པའི་ཕྱིར་མེ་ལོང་དང་མན་ཤེལ་གྱི་བརྡ་ཡིས་དབྱིངས་ཀ་དག་དང་འོད་གསལ་ལྷུན་གྲུབ་ཀྱི་གནས་ཚུལ་བརྡ་དང་ཚིག་གིས་བསྟན་པའི་དོན་ཤེས་པར་གྱིས་ལ་རང་རིག་སྤྲོས་པ་བྲལ་བའི་ངང་དུ་མཉམ་པར་ཞོག་མཛོད། ཤེལ་རྡོ་དང་མེ་ལོང་བསྟན་ཏེ། ཧཱུྃ༔ ཀ་དག་མེ་ལོང་གཙང་མའི་ངོགས༔ ལྷུན་གྲུབ་དྭངས་ཤེལ་དྲི་མེད་གསལ༔ བརྡ་རྟགས་རྫོགས་པའི་དབང་བསྐུར་བས༔ དྲི་མེད་རིག་པའི་གནས་ལུགས་རྟོགས༔ ལྷུན་གྲུབ་རིག་འཛིན་ཉེར་ཐོབ་ནས༔ བདེ་བ་ཆེན་པོའི་ས་ནོན་ཤོག༔ ཨ་ཨ་ཨ༔ ཞེས་ངོ་སྤྲད་པས་སེམས་ཀྱི་གཤིས་གང་དུའང་མ་གྲུབ་པའི་སྟོང་པ་ཀ་དག་དང༌། མདངས་མ་འགག་པ་ལྷུན་གྲུབ་བདེ་བ་ཆེན་པོའི་སྐུ་དང་ཡེ་ཤེས་ཀྱི་བདག་ཉིད། ཟུང་འཇུག་རང་རིག་གདོད་མའི་གནས་ལུགས་སོ་སོ་རང་རིག་པའི་སྤྱོད་ཡུལ་ནམ་མཁའ་དང་མཉམ་པའི་ཏིང་ངེ་འཛིན་གྱི་ངང་བསྐྱང་བ་ནི་དེ་ཁོ་ན་ཉིད་ཀྱི་དབང་ངོ༌། དེས་རྣམ་ཐར་སྒོ་གསུམ་གྱི་དཀྱིལ་འཁོར་དུ་རང་བཞིན་འོད་གསལ་རྫོགས་པ་ཆེན་པོའི་དབང་ཐོབ༔ དཔེ་དོན་འབྲེལ་བའི་ཆོས་ཉིད་ཉམས་སུ་མྱོང༔ ཀུན་གཞི་དང་ཤེས་བྱའི་སྒྲིབ་པ་དག༔ ལམ་ཕྱག་རྒྱ་ཆེན་པོ་སྒོམ་པ་ལ་དབང༌། དྲག་ཤུལ་གྱི་ལས་དང་ལྷུན་གྱིས་གྲུབ་པའི་རིག་འཛིན་འགྲུབ༔ ཡེ་ཤེས་བླ་མའི་ས་ནོན༔ འབྲས་བུ་ངོ་བོ་ཉིད་སྐུ་མངོན་དུ་བྱས་པའོ༔  ལྔ་པ་མཐའ་རྟེན་རྡོ་རྗེ་སློབ་དཔོན་བདག་པོའི་དབང་སྦྱིན་པ་ནི། རྒྱལ་ཚབ་ཏུ་འོས་པ་ཡིན་ན་ཁྲི་ལ་བཞག །གླེགས་བམ། དུང༌། ཕྱག་ཤིང༌། འཁོར་ལོ་རྣམས་གཏད། སླར་ཡང་ཁྱེད་རང་རྣམས་རིགས་ཀུན་ཁྱབ་བདག་དཀྱིལ་འཁོར་གྱི་གཙོ་བོའི་ང་རྒྱལ་ལ་གནས་པས་དེའི་སྐུ་གསུང་ཐུགས་ཀྱི་ངོ་བོ་རྡོར་དྲིལ་སློབ་མའི་ལག་ཏུ་གཏད་པས་རྡོ་རྗེ་ཐུགས་ཀྱི་དམ་ཚིག་ཕྱག་གཡས་ཀྱིས་ལན་གསུམ་གསོར་ཏེ་ཐུགས་ཀར་གཏོད་མཛོད། རྡོ་རྗེ་ལག་གཡས་སུ་གཏད་དེ། ཧོ༔ སོ་ཐར་བྱང་སེམས་རིག་པ་འཛིན་པ་ཡི༔ དགག་དགོས་ཡོངས་རྫོགས་སྔགས་ཀྱི་དཀྱིལ་འཁོར་དུ༔ ཡོན་ཏན་ཡར་འཕེལ་ཐབས་ལ་མཁས་པ་ཡི༔ རྡོ་རྗེའི་དམ་ཚིག་ཁྱོད་ཀྱིས་གསོར་བར་གྱིས༔ མ་ཧཱ་བཛྲ་ཧཱུྃ༔ ཞེས་སྔགས་ལན་གསུམ། དྲིལ་བུ་གསུང་གི་དམ་ཚིག་ལན་གསུམ་དཀྲོལ་ཏེ་དཀུ་གཡོན་པར་བརྟེན་མཛོད། དྲིལ་བུ་ལག་གཡོན་དུ་གཏད། ཧོ༔ ཆོས་རྣམ་ཐམས་ཅད་བློ་ཡིས་བཏགས་པ་ཙམ༔ རྣམ་ཐར་གསུམ་དང་ལྡན་པའི་ཤེས་རབ་ནི༔ ངོ་བོ་ཉིད་མེད་གྲགས་སྟོང་སྒྲས་མཚོན་ཕྱིར༔ དྲིལ་བུའི་དམ་ཚིག་འཁྲོལ་ཞིང་དཀུ་ལ་བརྟེན༔ མ་ཧཱ་གཎྜེ་ཧཱུྃ༔ ཞེས་སྔགས་ལན་གསུམ། དེ་ལྟར་གཏད་པའི་རྡོར་དྲིལ་ཐབས་ཤེས་གཉིས་སུ་མེད་པ་མཚོན་ཕྱིར་ལག་གཉིས་ཐུགས་ཀར་འཁྱུད་རྒྱ་བྱས་པས་ཕྱག་རྒྱ་སྐུ་ཡི་དམ་ཚིག་མཚོན་པ་སྟེ། མདོར་ན་རྡོ་རྗེའི་སྐུ་གསུང་ཐུགས་དང་གཉིས་སུ་མི་ཕྱེད་པ་རྣམ་པ་ཐམས་ཅད་མཁྱེན་པའི་ཡེ་ཤེས་ངོ་སྤྲད་པར་མོས་ཤིག །ཐབས་དང་ཤེས་རབ་འདུ་འབྲལ་མེད་པ་ཡི༔ སྟོང་ཉིད་སྙིང་རྗེའི་བདག་ཉིད་ཆེན་པོ་ནི༔ གཉིས་མེད་དམ་ཚིག་རྡོ་རྗེ་སློབ་དཔོན་དབང༔ བསྡུ་བ་རྣམ་བཞིས་རྒྱལ་བའི་མཛད་པ་སྒྲུབས༔ ཞེས་ཐུགས་ཀར་འཁྱུད་རྒྱ་བྱ། འོ་རིགས་ཀྱི་བུ་ཁྱོད་ལ་རྡོ་རྗེ་སློབ་དཔོན་གྱི་དབང་དམ་ཚིག་གསུམ་བྱིན་པས་དཀྱིལ་འཁོར་གྱི་ཁྱབ་བདག་དཔལ་རྡོ་རྗེ་སེམས་དཔའ་ཡབ་ཡུམ་གྱི་ང་རྒྱལ་ལ་གནས་པས་འཛག་མེད་བདེ་སྟོང་གི་ཡེ་ཤེས་རྒྱུད་ལ་སྐྱེས་པར་བསམ་ཞིང༌། ཐབས་ལ་བརྟེན་པའི་རྒྱུ་དུས་ཀྱི་ཡན་ལག་བདུན་ལ་གོམས་པས། འབྲས་བུའི་དུས་སུ་སྐུ་གསུམ་ཡན་ལག་བདུན་ལྡན་ཁ་སྦྱོར་ལོངས་སྤྱོད་རྫོགས་སྐུའི་གོ་འཕང་མངོན་དུ་བསྒྲིགས་པ་ནི་རྡོ་རྗེ་སློབ་དཔོན་གྱི་དབང་སྟེ་དབང་དེ་བསྐུར་བས་བྱེད་ལས་སུ་གཞན་དོན་སློབ་མ་བསྡུ་བ་དང༌། ཟབ་མོའི་ཆོས་འཆད་པ་ལ་སོགས་པ་བགྱིད་པར་རྗེས་སུ་གནང་ཞིང་རྟེན་འབྲེལ་འགྲིག་པ་ཡིན་ནོ།  །དེ་ལྟར་ཕྱི་ནང་གསང་བའི་དབང་དེ་དག་ཐོབ་པའི་ཕན་ཡོན་ནི། རྒྱུད་ལས། དེ་ལྟར་དབང་རྣམས་ཡོངས་རྫོགས་པར༔ བསྐུར་བའི་ཡོན་ཏན་བསམ་མི་ཁྱབ༔ གསང་སྔགས་དངོས་གྲུབ་དབང་ལས་འབྱུང༔ ཞེས་དང༌། བླ་མ་རྒྱལ་བ་མ་ལུས་པའི༔ སྐུ་གསུང་ཐུགས་དང་ཡོན་ཏན་དང༔ ཕྲིན་ལས་བདག་ཉིད་ཆེན་པོར་འགྱུར༔ ཞེས་སོགས་མཐའ་ཡས་པ་གསུངས་པ་ལྟར་གནས་སྐབས་མངོན་མཐོ་དང་མཐར་ཐུག་ངེས་ལེགས་ཀྱི་ཡོན་ཏན་ཐམས་ཅད་དབང་གིས་བསྐྱེད་ནུས་པའི་ཕན་ཡོན་བསམ་མི་ཁྱབ་པ་གསུངས་པས་སྤྲོ་དགའ་རྒྱ་ཆེན་པོ་བསྐྱེད་པ་དང༌། ནུས་པ་དེ་ལྡན་གྱི་དབང་སྲོག་རྒྱུད་ལ་འཛིན་པ་དམ་ཚིག་ལ་རག་ལས་པས་ཐུན་མོང་དང་ཐུན་མོང་མ་ཡིན་པའི་དམ་ཚིག་དང་སྡོམ་པ་རྩ་བ་ཡན་ལག་ཁྱད་པར་གྱིས་བསྡུས་པ་རྣམས་ཇི་ལྟར་ཁས་བླངས་པ་བཞིན་བསྲུང་སྙམ་པའི་འདའ་དཀའི་དམ་ཚིག་སྙིང་ལ་བཀོད་པའི་བློས་འདིའི་རྗེས་ཟློས་མཛོད། རྩ་བ་སྐུ་གསུང་ཐུགས་མཆོག་དང༔ ཡན་ལག་དམ་ཚིག་ཉི་ཤུ་ལྔ༔ མེད་དང་གཅིག་པུ་ཕྱལ་བ་ཆེ༔ ལྷུན་གྲུབ་བཞིན་དུ་སྲུང་བར་བགྱི༔ ལན་གསུམ་བྱ། དེ་དག་གིས་སྒྲུབ་ཆེན་བཀའ་བརྒྱད་ཀྱི་དཀྱིལ་འཁོར་དུ་དབང་བསྐུར་ལེགས་པར་ཐོབ་པའི་བཀའ་དྲིན་གཏང་རག་གི་དོན་དུ་མཎྜལ་ཕུལ། དབང་གི་སྐབས་འདིར་ཕྱོགས་བཅུའི་སངས་རྒྱས་ཐམས་ཅད་རྡོ་རྗེ་སློབ་དཔོན་གྱི་སྐུ་ལ་དབང་གི་བྱ་བ་མཛད་ཕྱིར་འདུས་ཤིང་དཔའ་བོ་ཌཱ་ཀི་རྣམས་ཀྱང་དབང་གྲལ་དུ་དམ་ཚིག་དང་ཐུགས་རྗེས་འཁོད་པས་ན་དུས་གཞན་ལས་ཚོགས་གཉིས་ཀྱི་སྒོ་འབུམ་འགྱུར་གྱིས་འཕེལ་ཆེ་བས་བདག་ལུས་ལོངས་སྤྱོད་དང་བཅས་པ་ལྟོས་མེད་དུ་འབུལ་ཞིང་བསྲུང་བྱའི་དམ་ཚིག་རྣམས་ལུས་དང་སྲོག་གི་ཕྱིར་ཡང་མི་གཏོང་སྙམ་པས་འདིའི་རྗེས་ཟློས་མཛོད། བདག་ལུས་ལོངས་སྤྱོད་ཁྱེད་ལ་འབུལ༔ ཇི་ལྟར་བཀའ་བསྩལ་བཞིན་དུ་བགྱིད༔ སྲོག་ལ་བབ་ཀྱང་དེ་བསྒྲུབ་ན༔ དངོས་གྲུབ་མཐོང་བའི་ཆོས་ལ་སྩོལ༔ བླ་མ་མཆོག་དང་ལྷག་པའི་ལྷ༔ བྱང་ཆུབ་བར་དུ་མི་འབྲལ་ན༔ ཆ་ཡིས་ཀྱང་ནི་སྤྱད་དུ་གསོལ༔ ལན་གསུམ། ནམ་མཁར་བཞུགས་པའི་དབང་གི་ལྷ་རྣམས་སློབ་མ་ལ་ཐིམ་པས་དབང་གི་ཡེ་ཤེས་མ་སྐྱེས་པ་སྐྱེས་སྐྱེས་པ་རྣམས་གོང་འཕེལ་དུ་གྱུར་ཏེ་བརྟན་པའི་མོས་པ་གནང་མཛོད། སྤྲོ་ན་ལས་བྱང་གི་ཤིས་བརྗོད་བྱ། ཛཿཧཱུྃ་བྃ་ཧོཿ སུ་པྲ་ཏིཥྛ་བཛྲ་ཡེ་སྭཱ་ཧཱ། ཞེས་མེ་ཏོག་འཐོར་ལ་རབ་ཏུ་གནས་པར་བྱ། དེ་ལྟ་བུའི་དགེ་བ་མ་གྱུར་འགྲོ་བ་སེམས་ཅན་ཐམས་ཅད་ཀྱི་དོན་དུ་བསྔོ་བ་དང་ལམ་འདིས་རང་གཞན་གྱི་དོན་རྒྱ་ཆེར་འགྲུབ་པའི་སྨོན་ལམ་རྣམས་ཚོགས་གཉིས་ཟུང་འབྲེལ་གོང་འཕེལ་གྱི་དོན་དུ་གནང་བར་ཞུ། བསོད་ནམས་འདི་ཡིས་སོགས་བརྗོད་པར་བྱའོ།  །རྗེས་རིམ་ཚོགས་ལ་རོལ་བ། ལྷག་མ་དང་བཀའ་སྲུང་ཆད་བརྟན་གཏོར་མ་བཏང་བ་ནས་སྨོན་ལམ་ཤིས་བརྗོད་ཀྱི་བར་ལས་བྱང་དཀྱུས་ལ་བརྟེན་པས་གྲུབ་པའོ།  །ཀུན་མཁྱེན་ཡེ་ཤེས་མེ་ལོང་ངོགས། །རྣམ་བཀྲའི་ཟབ་རྒྱས་ཆོས་ཀྱི་ཚུལ། །རྗེས་བརྩེའི་འོད་ཟེར་མ་སྨད་པས། །མངོན་སུམ་སྤྱོད་པའི་སྐལ་བཟང་སྙམ། །ཞེས་སྒྲུབ་པ་ལག་ལེན་དུ་འདྲིལ་བའི་ཟབ་པའི་ཆོས་སྡེའི་ཡི་དམ་སྤྱི་སྒྲུབ་དྲག་པོ་དཔལ་ཆེན་འདུས་པའི་དབང་དོན་རྒྱ་མཚོའི་དགོངས་པ་ལེགས་པར་བཀྲལ་ནས་བཀླག་ཆོག་གི་ལེའུ་ཚན་ལྔ་པ་སྟེ་གཟི་བརྗིད་རབ་ཏུ་དགའ་བའི་དཔལ་གྱིས་སྦྱར་བའོ།  ༈  སངས་རྒྱས་ཀུན་གྱི་གཉིས་མེད་ཡེ་ཤེས་སྐུ། །ཤིན་ཏུ་ཞི་བ་གཞོན་ནུའི་མཚན་དཔེ་ཡང༌། །སྣང་སྲིད་ཕྱག་རྒྱས་ཟིལ་གནོན་ཧེ་རུ་ཀ །རྒྱལ་བ་རྟག་པའི་རིགས་གཙོར་བཞེངས་གང་རྒྱལ། །རྩ་བ་ཐུགས་སྒྲུབ་དཔལ་ཆེན་འདུས་པ་ལས་གྱེས་པའི་ཡན་ལག་སྐུ་གསུང་ཐུགས་ཕྲིན་ལས་ཀྱི་རིགས་བཞིའི་ཧེ་རུ་ཀའི་སྒོས་བཀའ་སོ་སོའི་དབང་གི་རིམ་པ་འཆད་པ་སྟེ། གཞུང་ལས། དབང་བསྐུར་མ་རྫོགས་དོན་ལ་གཡེལ༔ རྒྱལ་བུ་རྒྱལ་སར་མ་ཕྱིན་བར༔ དེ་སྲིད་རྒྱལ་པོའི་མིང་མི་ཐོབ༔ དེ་ལ་སྒོས་དབང་ཁྱད་པར་ནི༔ ཞེས་གསུངས་པའི་ཐོག་མ་སྐུ་དེ་བཞིན་གཤེགས་པའི་རིགས་འཇམ་དཔལ་གཤིན་རྗེ་འཆི་བདག་ཟིལ་གནོན་གྱི་དབང་གི་ཆོ་ག་འཆད་པ་ལ། སོ་སོའི་དཀྱིལ་འཁོར་དབང་རྫས་རྣམས༔ འདུ་བྱས་རང་གཞུང་བཞིན་དུ་སྒྲུབ༔ ཅེས་གསུངས་པ་ལྟར་དབང་དོན་སྒྲུབ་མཆོད་དང༌། དབང་སྤྱི་རྩ་སྒྲུབ་དཔལ་ཆེན་གྱི་སྐབས་སུ་བཤད་པ་ལྟར་ཁོག་ཕུབ་ནས། བྱེ་བྲག་གི་སྒོས་ཆོས་སོ་སོ་བ་རྣམས་འཆད་འགྱུར་ལྟར་བྱ་དགོས་པ་གཞིར་བཟུང་ནས། གཤིན་རྗེར་གཞུང་མཐུན་གྱི་དཀྱིལ་འཁོར་རས་བྲིས་བཀྲམ་པའི་དབུས་སུ། ཕྱེ་མར་བུ་རམ་ཤ་ཆེན་དང་ཆོས་སྨན་བསྲེས་པའི་བམ་གྱི་དབྱིབས་ཀྱི་མགོ་བོར་གཏོར་མ། ལག་གཡས་གཡོན་བསྣོལ་བའི་སྟེང་དུ་སྨན་རཀ་གི་སྣོད་ཀ་པཱ་ལ་དང་བཅས་པ་བཀོད། མར་ཐག་དཀར་དམར་བསྒྲིལ་བས་མགོ་དང་ཡན་ལག་བཅིང་ཚུལ་བྱ། དེང་སང་བམ་འདི་ཙཀླི་བྱེད་འདུག་ཀྱང་བཅོས་པའི་བམ་རྫས་ལྡན་འདི་གཤིན་རྗེའི་དབང་དང་སྒྲུབ་པ་ཐམས་ཅད་ཀྱི་སྒོས་ཆོས་སུ་གསུངས་པས་བཅོས་པའི་བམ་རྫས་ལྡན་བྱེད་པ་གལ་ཆེ་བར་ངེས། དེ་སྟེང་ལྡིང་ཁྲི་ལ་རྣམ་བུམ་རྒྱན་ལྡན། ཐུན་མོང་རིགས་དབང་ལྔ་ཀའི་རྫས། རྡོ་རྗེ་སློབ་དཔོན་གྱི་དབང་རྫས། དུར་ཁྲོད་ཆས་བརྒྱད། རྡོ་རྗེ་བེ་ཅོན་འཁོར་ལོ་གཏུན་ཤིང་རལ་གྲི་སྡིག་མཛུབ་སྟེ་ཕྱག་མཚན་དྲུག་གི་ཙཀླི་ཕྱོགས་བསྡུས། ཀ་པཱ་ལར་ཆང་དང་འོ་མ་ཆོས་སྨན་མངར་གསུམ་སྦྱར་བའི་གསང་རྫས། སྨན་སྤོད་སྦྱར་བའི་ཕྱེ་མར་མངར་གསུམ་དང་ལྡན་པས་བཅོས་པའི་ཚེ་འབྲང་པདྨ་འདབ་བརྒྱད་དམར་པོའི་ཚེ་རིལ་གྱིས་བསྐོར་བའི་འོག་ཉི་མ་དང་སྟེང་ཟླ་བ་དཀར་པོ་ཁ་སྦྱོར་རྡོ་རྗེ་རྩེ་ལྔའི་ཏོག་དང་ཁ་ཆོད་ཅན། རིག་ཙཀ །ཤེལ་རྡོ་མེ་ལོང་རྣམས་དང༌། གཤིན་རྗེའི་གཏོར་མ། སྨན་རཀ །ཞི་དྲག་གི་མཆོད་པ་ཚོགས་མཆོད་སོགས་འོག་ཏུ་དགོས་པ་རྣམས་འདུ་བྱས་ལ། དབང་སྒྲུབ་དངོས་ལ། གཞུང་ལས། སྣང་སྲིད་ཐམས་ཅད་འཇམ་དཔལ་གཤིན་རྗེའི་རྟེན་དང་བརྟེན་པར་བསྐྱེད་པ་ལ་བདག་མདུན་གཉིས་རྟོག་མི་དགོས། ཅེས་ཀུན་མཁྱེན་ཉིད་ཀྱིས་གསུངས་ཤིང༌། པད་གནུབས་ཀྱི་གཤིན་རྗེའི་གཞུང་ལས། འདི་ནི་གཞལ་ཡས་ཁང་ལྷུན་གྲུབ། ལྷ་ལྐོག་བཞེངས། སྔགས་ཐུག་ཕྲད་དུ་ཡིན་པས་རང་བཞིན་ལྷུན་གྱིས་གྲུབ་པའི་ལྷའི་འཁོར་ལོ་དྲན་པ་ཙམ་གྱིས་རྫོགས་པར་བྱེད་དོ་ཞེས་གསང་སྐོར་གནམ་ཐིག་ཆེན་པོ་ལས་གསུངས་པ་ལྟར་ངེས་ཀྱང་དེང་སང་ལྟ་དགོངས་དེ་ལྟ་བུའི་གདེང་ཚད་ཅན་དཀོན་པ་དང༌། དཔལ་ཆེན་འདུས་པའི་བདག་འཇུག་དབང་དོན་རྒྱ་མཚོར་བདག་མདུན་སོ་སོར་བསྒྲུབ་པར་གསུངས་པའི་དགོངས་པ་ལྟར་བྱ་བ་གལ་ཆེ་བ་དང༌། དཔལ་འདུས་དང་གཤིན་རྗེའི་ལས་བྱང་གབ་སྤྲད་ཀྱིས་ཛཔ་བཟླས་བར་བཏང༌། ཛཔ་དགོངས་ནི། ཡ་མའི་ཐུགས་ཀར་ཉི་སྟེང་ཧཱུྃ༔ སྐྱེ་བ་མེད་པའི་ཡེ་ཤེས་ཀྱི༔ རྣམ་པའི་གཟུགས་བརྙན་ཡི་གེས་བསྐོར༔ ངོ་བོ་ལྷ་ཡི་སྐུ་རུ་བཤད༔ ཨེ་ཀ་ཡ་མ་ཧེ་དུན་སྙིང་ཁྲག་ར་མ་ཙ་ཡ་ཧཱུྃ་ཕཊ༔ ཞེས་སྔགས་ཕྲེང་གཡོན་བསྐོར་དུ་བཀོད་ལ་སེམས་ཟིན་པ་དང༌། རང་རང་སྔགས་ཀྱི་ཡིག་འབྲུ་ལས༔ སྔགས་ཕྲེང་ལུ་གུ་རྒྱུད་དུ་ཐོན༔ ཡབ་ཡུམ་ཞལ་ནས་ཞལ་དུ་ཞུགས༔ སྐུ་ཡི་དབྱིབས་བརྒྱུད་མཁའ་གསང་ནས༔ རྡོ་རྗེ་ནོར་བུའི་ལམ་ཞུགས་ཏེ༔ བདེ་བ་ཆེན་པོའི་འོད་ཟེར་གྱིས༔ རྒྱལ་བ་མཆོད་ཅིང་ཐུགས་དམ་བསྐུལ༔ དངོས་གྲུབ་གྲུབ་པས་བདག་བྱིན་བརླབས༔ ཡང་འཕྲོས་བརྟན་གཡོ་ཐ་མལ་པའི༔ སྣང་ཞེན་དག་པའི་སྣོད་དང་བཅུད༔ ལྷ་དང་གཞལ་ཡས་རོལ་པར་ཤར༔ ཞེས་སྤྲོ་བསྡུའི་ཏིང་ངེ་འཛིན་བཅས་སྔགས་བཟླས་མཐར། སླར་ཡང་ཡན་ལག་བརྒྱད་པའི་ཚོགས་བསགས་དང་བྱིན་འབེབས་ནས་བརྩམས་ལ། རང་བཞིན་མི་གནས་མཉམ་པའི་ངང་སོགས་གཤིན་རྗེའི་མངོན་རྟོགས་ལས་རིམ་དང་བཅས་པ་བཏང་ལ། ཐུགས་ཀའི་སྔགས་ཕྲེང་ལས་རང་འདྲ་གཉིས་པ་ཆད་དེ་ལུ་གུ་རྒྱུད་དུ་འབྲེལ་བ་བདག་མདུན་གྱི་ཞལ་དང་སྦྱོར་མཚམས་བརྒྱུད་ཡེ་ཤེས་སེམས་དཔའ་ལ་བསྐོར་ནས་འོད་ཟེར་སྤྲོ་བསྡུས་དོན་གཉིས་སྒྲུབ་པའི་དམིགས་པ་གཙོ་བོར་བྱ་གསུངས། བམ་དང་ཚེ་འབྲང་ལའང་དཀྱིལ་འཁོར་ཡོངས་རྫོགས་གསལ་བས་སྤྲོ་བསྡུ་དང་བཟླས་པ་ཡང་ཅུང་ཟད་བྱ། རྣམ་བུམ་ལ་དཔལ་འདུས་སྐབས་ལྟར་རམ་ཅུང་ཟད་བསྡུ་ན། སྟོང་པའི་ངང་ལས་རྣམ་རྒྱལ་བུམ་པ་ནི། །བྷྲཱུཾ་ཡིག་ཡོངས་གྱུར་རིན་ཆེན་སྣ་ཚོགས་ལས། །ཡོངས་གྲུབ་ཕྱི་ནི་བུམ་གཟུགས་ནང་གཞལ་ཡས། །ཚད་དང་མཚན་ཉིད་ཐམས་ཅད་རྫོགས་པ་ཡི། །ཕོ་བྲང་དབུས་སུ་འཇམ་དཔལ་གཤིན་རྗེ་གཤེད། བཅོམ་ལྡན་རྟ་མཆོག་དཔལ། ཡང་དག་ཧེ་རུ་ཀ །བཛྲ་ཀཱི་ལ་ཡ། རིགས་བཞི་སོ་སོར་བསྒྱུར། མཆན། གཙོ་འཁོར་ཡོངས་རྫོགས་མ་འདྲེས་ཆུ་ཟླ་ལྟར། །གསལ་ལ་ཡེ་ཤེས་སྤྱན་དྲངས་དབྱེར་མེད་བསྟིམ། ཧཱུྃ། ཡེ་ཤེས་ལྷ་ཚོགས་སྤྱན་འདྲེན་གཤེགས། །ཕྱི་ནང་གསང་བའི་མཆོད་པ་འབུལ། །སྐུ་གསུང་ཐུགས་ཡོན་ཕྲིན་ལས་བསྟོད། །བག་མེད་འགལ་འཁྲུལ་ཉམས་ཆག་བཤགས། །མཆོག་དང་ཐུན་མོང་དངོས་གྲུབ་སྩོལ། །ཨོཾ་བཛྲ་ཨརྒྷཾ་སོགས་ནས། ཤབྡ་པཉྩ་རཀྟ་བ་ལིཾ་ཏ་པཱུ་ཛ་ཧོ༔ རང་གི་ཐུགས་ཀ་ནས་སྔགས་ཀྱི་འོད་ཟེར་འཕྲོས་བུམ་པའི་ལྷ་རྣམས་ལ་ཕོག །སྐུ་ལས་བྱང་ཆུབ་ཀྱི་སེམས་ཡེ་ཤེས་ཀྱི་བཅུད་དུ་འཁྱིལ། རྩ་སྔགས་བཟླ། ལས་བུམ་ཡང་བདུད་རྩི་འཁྱིལ་བའི་བསྐྱེད་བཟླས་དང་འོད་ཞུ་བཅས་བྱ། བདག་འཇུག་གམ་རིག་པའི་མེ་ཏོག་དོར་ཞིང་སློབ་མ་འཇུག་པར་གནང་བ་ཞུ། སྣོད་རུང་གི་སློབ་མར་ཁྲུས་བྱ། བགེགས་གཏོར་བཏང༌། མཚམས་བཅད་སྲུང་འཁོར་བསྒོམ། སེམས་བསྐྱེད་གསལ་བཏབ་ལ་ཆོས་བཤད་ཀྱི་ཁྱད་པར། དེ་ལ་རྒྱལ་བ་སྲས་དང་བཅས་པ་ཐམས་ཅད་དང་གཉིས་སུ་མེད་པའི་ཡེ་ཤེས་ཀྱི་སྐུ་ཡི་བདག་ཉིད་འཇམ་དཔལ་ཡེ་ཤེས་སེམས་དཔའ་དྲག་པོའི་སྐུར་བཞེངས་པ་དང༌། སྐུ་དེ་བཞིན་གཤེགས་པའི་རིགས་ཀྱི་ཁྱབ་བདག་ཆེན་པོ་བཅོམ་ལྡན་འདས་གཤིན་རྗེ་གཤེད་ལ་རྩ་བཤད་མན་ངག་གི་རྒྱུད་དང༌། གྲུབ་བརྙེས་སློབ་དཔོན་སོ་སོས་བཀྲལ་ཞིང་བཀའ་བབ་པའི་མན་ངག་གི་བཀའ་སྲོལ་མཐའ་ཡས་པ་བཞུགས་ཤིང༌། གངས་ཅན་འདིར་ཡང་སྔ་འགྱུར་རྙིང་མའི་ཕྱོགས་ལ་ངོ་བོའི་དབྱེ་བས་གཤེད་སྐོར་རིགས་ལྔ། རྣམ་པའི་ཚུལ་ལས་ཡེ་ཤེས་ལས་དང་འཇིག་རྟེན་པའི་ཚུལ་བཟུང༌། ཕྲིན་ལས་ཀྱི་བྱེ་བྲག་རྣ་ཆ་བརྒྱད་ཡོངས་སུ་གྲགས་པ་དང༌། ཕྱི་འགྱུར་གསར་མའི་ཕྱོགས་ལ་དམར་ནག་འཇིགས་གསུམ་ནང་གསེས་དང་བཅས་པ་བྱོན་པ་ལས། འདིར་ཡེ་ཤེས་ཀྱི་གཤིན་རྗེ་གཤེད་པོ་ཀུན་ཁྱབ་དེ་བཞིན་གཤེགས་པའི་རིགས་འཁོར་འདས་ཀུན་གྱི་ཕྱག་རྒྱ་ཟིལ་གྱིས་གནོན་པའི་དཀྱིལ་འཁོར་གྱི་སྒྲུབ་པ་གཤེད་སྐོར་རྒྱ་མཚོའི་བཅུད་དང་སྙིང་པོར་གྱུར་པ་སྟེ། སྤྱིར་འཇམ་དཔལ་གྱི་རྒྱུད་རྣམས་སྐུའི་རིག་འཛིན་ཆེན་པོ་འཇམ་དཔལ་བཤེས་གཉེན་ཞབས་ཀྱིས་འཇམ་དཔལ་ཁྲི་དྲུག་སྟོང་དུ་གྲགས་པ་སོགས་རྒྱུད་སྡེ་བསམ་མི་ཁྱབ་པའི་རྩ་རྒྱུད་ཟླ་གསང་ནག་པོ་དང༌། སྡིག་པ་སྙིང་འཛིན་སོགས་ཀྱི་རྒྱུད་དོན་མན་ངག་ཏུ་བསྡེབས་ཏེ་གྲུབ་པའི་རིག་འཛིན་རྣམས་ལ་རིམ་པར་བརྒྱུད། སློབ་དཔོན་ཆེན་པོ་པདྨ་ཀཱ་ར། རྒྱ་གར་ཁྲག་འཐུང་ནག་པོ། ཕུང་བྱེད་ཤིནྟཾ་གརྦྷ་དང༌། གནུབས་ཆེན་སངས་རྒྱས་ཡེ་ཤེས་རིན་པོ་ཆེས་རྒྱ་བལ་བྲུ་ཤའི་སློབ་དཔོན་རྣམས་ལས་གསན་པ་རྣམས་ཀྱི་ལུགས་སྲོལ་ཅི་རིགས་པ་གསལ་བར་མཛད་པ་ལས། འདི་ནི་གསང་བ་ཆེན་པོའི་རྟོགས་བརྗོད་ལས། དེའི་ཐོ་རེངས་ལྡང་བའི་རྣལ་འབྱོར་ཚེ། །གཞི་སྣང་བའི་འོད་གསལ་དྭངས་པའི་ངོར། །རང་གནས་པའི་སྨིན་མཚམས་ནམ་མཁའི་ཐད། །འཇའ་ཚོན་སྣ་ལྔ་པའི་གུར་ཁྱིམ་ནང༌། །སྐྱབས་ཀུན་འདུས་མཚོ་སྐྱེས་རྡོ་རྗེ་མཇལ། །ངོ་བལྟ་བྱ་དང་ལྟ་མཁན་དབྱེར་མེད་པས། །རེ་དོགས་ཀྱི་འཆིང་བ་གང་ཡང་མེད། །དེའི་ངང་ལས་དེ་ཉིད་གནས་གྱུར་ཏེ། །ཡུལ་སིངྒ་ལ་ཡི་ཨཱ་ཙརྻ། །འཇམ་དཔལ་བཤེས་གཉེན་དུ་ལམ་གྱིས་སོང༌། །སྐུ་དམར་སྨུག་མཆོང་ལྟར་དྭངས་པ་ཡི། །ཕྱག་གཡས་ན་བེ་ཅོན་ཁྱད་འཕགས་བསྣམས། །གཡོན་བདག་གི་སྙིང་གར་སྡིགས་མཛུབ་ཀྱི། །ཕྱག་རྒྱས་བརྡ་ཐབས་བསྟན་པའི་མོད། །ཕྱག་མཚན་གྱི་བེ་ཅོན་བདག་ཉིད་ལ། །བྱིན་ཏེ་རང་ལ་དབྱེར་མེད་ཐིམ། །སྐུ་སྒྱུ་མ་ལྟ་བུའི་གསལ་སྣང་དེ། །ཀ་དག་གི་དབྱིངས་སུ་གཏད་མེད་ཡལ། །དུས་འདི་ནས་དགོངས་པའི་གསང་མཛོད་བརྡོལ། །གསུང་རབ་ཀུན་གྱི་དགོངས་པ་ཁྲོལ། །ཀློང་ཆེན་རིག་པའི་རྩལ་ཆེན་རྫོགས། །སྣང་ཡུལ་བརྡ་དང་དཔེ་ཆར་ཤར། །མཆོག་གི་དངོས་གྲུབ་རྒྱུད་ལ་བཞག །ཅེས་དང༌། ཌཱ་ཀིའི་གསང་གཏམ་ཆེན་མོ་ལས། དེ་དང་མཚུངས་པར་གསུངས་པ་བཞིན་ནང་རང་བྱུང་ཆོས་ཉིད་ཀྱི་བདེན་པ་ཇི་ལྟ་བ་བཞིན་མངོན་སུམ་དུ་གཟིགས་ནས་འཕགས་ལམ་གྱིས་མཐོང་བའི་ཆོས་ལ་བརྙེས་པས། །རིག་རྩལ་ཤེས་རབ་རང་བྱུང་གི་དགོངས་པའི་གསང་མཛོད་བརྡོལ་ཏེ་ཤེས་བྱ་ཇི་སྙེད་མཁྱེན་པའི་ཡེ་ཤེས་ལ་དབང་ཐོབ་པས། །སྐུ་ཚེ་འདིའི་སྦྱངས་སྟོབས་ལ་མ་ལྟོས་པར་སྐྱེས་སྟོབས་ཀྱི་མཁྱེན་རབ་ཟབ་མོས་ཆོས་ཀྱི་དགོངས་པ་ཐུགས་སུ་ཆུད་ནས་འཇིགས་མེད་སྤོབས་པའི་གཏེར་མཛོད་ཡོངས་སུ་གྲོལ་བས་ལམ་དེའི་ཤིང་རྟའི་སྲོལ་འབྱེད་ཐམས་ཅད་མཁྱེན་གཉིས་ཀྱི་གཏེར་མཛོད་གྲོལ་བ་ཤ་སྟག་ཏུ་བྱོན་པའི་ངོ་མཚར་རྨད་དུ་བྱུང་བ་ཀུན་མཁྱེན་བླ་མ་རིག་འཛིན་འཇིགས་མེད་གླིང་པ་གང་ལ་བཀའ་བབ་པའི་ཀློང་ཆེན་སྙིང་གི་ཐིག་ལེའི་ཆོས་སྐོར་རྩ་བ་གསུམ་གྱི་སྒྲུབ་ཐབས་ཟབ་རྒྱས་སུ་བཞུགས་པ་ལས། དངོས་གྲུབ་ཀུན་གྱི་རྩ་བ་ཡི་དམ་གྱི་སྒྲུབ་སྐོར་ཏེ། དེ་ལའང་སྤྱི་དང་བྱེ་བྲག་གི་སྒྲུབ་པའི་ཐབས་མང་དུ་བཞུགས་པ་ལས། འདི་ནི་དྲག་པོ་དཔལ་ཆེན་འདུས་པའི་སྒོས་བཀའ། སྐུ་གསུང་ཐུགས་ཡོན་ཏན་ཕྲིན་ལས་ཀྱི་བདག་ཉིད་འཇིག་རྟེན་ལས་འདས་པའི་གྲུབ་ཚུལ་ལྔའི་ཡ་གྱལ། སྐུ་འཇམ་དཔལ་གཤིན་རྗེ་གཤེད་འཆི་བདག་ཟིལ་གནོན་གྱི་སྒོས་བཀའི་དབང་གི་ཆོ་ག་སྟེ། གཏེར་གཞུང་ལས། འདི་ནི་འཇམ་དཔལ་བཤེས་གཉེན་གྱིས༔ ཨོ་རྒྱན་རང་བྱུང་མཆོད་རྟེན་ནས༔ དབྱིངས་ཀྱི་ཌཱ་ཀིའི་གསང་མཛོད་བརྟོལ༔ རྒྱུད་ལས་ལུང་དང་སྒྲུབ་ཐབས་སུ༔ བསྡུས་འདི་པདྨའི་རིང་ལུགས་ཡིན༔ ཞེས་དང༌། རིག་འཛིན་རྩ་རྒྱུད་ཐོད་པའི་དུམ་བུ་ལས། མ་ལ་ཡར་འཁྲུངས་བྲམ་ཟེའི་བུ༔ མི་ཏྲ་མཉྫུ་ཤྲཱི་ལ༔ སྐུ་མཆོག་འཇམ་དཔལ་སྒྲོམ་བུ་གཏད༔ ཅེས་པ་ལྟར་ཨོ་རྒྱན་རང་བྱུང་གི་དུར་ཁྲོད་བསིལ་བ་ཚལ་གྱི་མཆོད་རྟེན་ཆེན་པོ་བདེ་བྱེད་བརྩེགས་པ་ནས་གྲུབ་པ་བརྙེས་པའི་རིག་འཛིན་མཆོག་བརྒྱད་ལ་བཀའ་བརྒྱད་སོ་སོའི་རྒྱུད་ལུང་མན་ངག་གི་སྒྲོམ་བུ་མཁའ་འགྲོ་ལས་ཀྱི་དབང་མོས་གཏད་པ་ལས་སྐུ་འཇམ་དཔལ་གཤིན་རྗེའི་ལྕགས་སྒྲོམ་སློབ་དཔོན་འཇམ་དཔལ་བཤེས་གཉེན་ལ་གཏད་དེ། ཤར་ཕྱོགས་ཁུ་བྱུག་ཚལ་ཀྱི་དུར་ཁྲོད་དུ་བསྒྲུབས་པས་དཀྱིལ་འཁོར་ཁྱབ་བདག་འཇམ་དཔལ་ཕྱག་རྒྱ་ཟིལ་གནོན་དང་གཉིས་སུ་མེད་པའི་གོ་འཕང་བརྙེས་པའི་སློབ་དཔོན་ཆེན་པོ་དེ་ཉིད་ལས་སངས་རྒྱས་གཉིས་པ་པདྨ་འབྱུང་གནས་དང༌། གནུབས་ཆེན་སངས་རྒྱས་ཡེ་ཤེས་སོགས་ཀྱིས་ཀྱང་གཤེད་སྐོར་གྱི་རྒྱུད་དང་མན་ངག་དུ་མ་གསན་པའི་བཀའ་སྲོལ་ཡོངས་སུ་གྲགས་པ་ལས་སྐབས་སུ་བབ་པ་འདི་ནི་སློབ་དཔོན་ཆེན་པོ་འཇམ་དཔལ་བཤེས་གཉེན་དང་གུ་རུ་པདྨའི་བཀའ་སྲོལ་ཟུང་འབྲེལ་མན་ངག་གི་བཅུད་དུ་དྲིལ་བ་སྟེ། སྤྱིར་རྩོད་དུས་སྙིགས་མར་ལྷ་སྔགས་གཞན་གྱི་ནུས་པ་རྡུགས་པའི་ཚེ་འཇམ་དཔལ་དབྱངས་དང་ལྷ་མོ་འོད་ཟེར་ཅན་གཉིས་འགྲུབ་པར་སངས་རྒྱས་ཀྱིས་འཇམ་དཔལ་རྩ་བའི་རྒྱུད་ལས་བསྔགས་པས་མཚོན་བྱིན་རླབས་ཁྱད་པར་དང་ལྡན་པའི་དབང་བསྐུར་སྦྱིན་པ་ཉིད་སྐབས་སུ་བབ་པས་དཀྱིལ་འཁོར་གཉན་པོར་ཕྱི་ནང་གི་འཇུག་པའི་ཆོས་རྣམས་ཞུ་བའི་དོན་དུ་མཎྜལ་ཕུལ། བསགས་སྦྱངས་ཀྱིས་རྒྱུད་སྦྱང་བ་ནས་བརྩམས་ཡེ་ཤེས་དབབ་པའི་བར་དཔལ་ཆེན་ལྟར་ལ་སློབ་མ་ལྷར་བསྐྱེད་ཀྱི་ཁྱད་པར། སྔར་གྱི་དབང་སྟེགས་ལ་འཁོད་པ་ཁྱེད་རང་རྣམས་འཇམ་དཔལ་ཕྱག་རྒྱ་ཟིལ་གནོན་སྐུ་མདོག་མཐིང་ནག་ཞལ་གསུམ་གཡས་དཀར་གཡོན་དམར་བ། དབུས་མཐིང༌། ཕྱག་དྲུག་གཡས་གསུམ་རྡོ་རྗེ་འཁོར་ལོ་རལ་གྲི། གཡོན་གསུམ་བེ་ཅོན་གཏུན་ཤིང་སྡིགས་མཛུབ་མཛད་པ། ཤིན་ཏུ་ཁྲོས་པའི་ཉམས་ཅན་དཔལ་དང་དུར་ཁྲོད་ཀྱི་ཆས་ཀྱིས་བརྒྱན་པ། ཞབས་བཞི་དོར་སྟབས་ཀྱིས་ཀླུ་འབུམ། གཉན་ཁྲི། ས་བདག་སྟོང་དང་ཕྱོགས་སྐྱོང་མ་ཧེ་ཉི་ཟླའི་སྟེང་ན་འགྱིང་བ། སྐུ་ལས་ཡེ་ཤེས་ཀྱི་མེ་དཔུང་འཕྲོ་བ། ཡུམ་བཻ་ཏ་ལི་མཐིང་ནག་སྙིང་དང་གྲི་ཐོད་འཛིན་པ་གཅེར་བུ་ཕྱག་རྒྱ་ལྔ་དང་གཟིག་ཤམ་ཐོད་སྐམ་གྱི་ཕྲེང་བ་ཅན་དང་རོལ་པའི་གནས་གསུམ་དུ་ཕྱག་མཚན་གསུམ་སོགས་དཀྱུས་ལྟར་དང༌། འབེབས་སྔགས་གཤིན་རྗེའི་སྔགས་སྦྱར་དགོས། དཀྱིལ་འཁོར་མཐོང་བ་བསྟན་པའི་སྐབས། ཡོངས་སུ་རྫོགས་པ། གྲུ་གསུམ་མཐིང་ནག་ཟླ་གམ་དམར་པོ་གསུམ་ལྡན་གྱི་ལྟེ་བར་ཨེ་ཀློང་ཆོས་དབྱིངས་རྡོ་རྗེ་བཙུན་མོའི་མཁའ་ལ་ཀླུ་འབུམ་གཉན་ཁྲི་ས་བདག་སྟོང་སྡེ་བརྒྱད་ཕྱོགས་སྐྱོང་རུ་ཏྲ་ཕོ་མོ་མ་ཧེ་གླང་རྒོད་བརྒྱད་དང་པད་ཉིའི་སྟེང་དུ་རྒྱལ་ཀུན་སྤྱི་གཟུགས་སྐུ་རྡོ་རྗེ་འཇམ་དཔལ་དབྱངས་དྲག་པོར་ཁྲོས་པ་ཟིལ་གནོན་ཕྱག་རྒྱ་ཆེན་པོ་གཡས་དཀར་པོས་ཀླུ་འབུམ་མཐོང་བའི་དུག་ཅན་སྦྲུལ་འབུམ། གཡོན་དམར་པོས་གཉན་རྭ་ཡི་དུག་ཅན་ལྕང་མོ་ཁྲི། དབུས་མཐིང་ནག་གིས་ས་བདག་མཆེ་བའི་དུག་ཅན་སྦལ་པ་མགོ་སྟོང་རྣམས་ཟ་བ། གཡས་གསུམ་རྡོ་རྗེ་འཁོར་ལོ་རལ་གྲི། གཡོན་གསུམ་བེ་ཅོན་གཏུན་ཤིང་སྡིགས་མཛུབ། ཞབས་བརྐྱང་བསྐུམ་དུ་བགྲད་པས་དྲེགས་པ་ཅན་ཐམས་ཅད་མནན་པ། དཔལ་དང་དུར་ཁྲོད་ཀྱི་ཆས་ཀྱིས་བརྒྱན་ཞིང༌། ཁྲོ་གཏུམ་གར་དགུའི་ཟི་བྱིན་འབར་བ། ཡུམ་བཻ་ཏ་ལི་སྙིང་དང་གྲི་ཐོད་འཛིན་པར་གཉིས་མེད་དུ་སྦྱོར་བ། གཙོ་བོའི་ཐུགས་ཀར་ཡ་མ་རཱ་ཛ་འཁོར་ལོ་དང་ཙིཏྟ། དེའི་ཐུགས་ཀར་དྲེགས་པ་ཕྱག་ན་རྡོ་རྗེ་རྡོ་རྗེ་དང་སྙིང་ཕྲེང༌། དེའི་ཐུགས་ཀར་རུ་སྦལ་རྔམ་པ་མི་ཟན། སྤྱི་བོར་ཤེལ་གྱི་བྱ་ཁྱུང༌། ཕྲག་གོང་དུ་ཁྱུང་མོ་སྔོ་ནག་གཉིས། དཔུང་པར་སྟག་མོ་མི་ཟན། ནུ་མར་སེང་གེ །སྟ་ཟུར་དུ་དུག་སྦྲུལ་དང་ལྕེ་སྤྱང་སྟེ་རྒྱན་གྱི་ལྷ་བརྒྱད་ཁྲོ་བཅུའི་གོ་ཆ་དང་བཅས་པ། ལྷག་པའི་བདེ་ཆེན་ཡེ་ཤེས་བཞིའི་ཐོད་མཁར་གྱི་གློ་འབུར་བཞི་ལ་ཤར་དུ་ཡ་མ་རཱ་ཛ། ལྷོར་ཡ་བ་ཏི། ནུབ་ཏུ་ཨ་བ་གླང་མགོ །བྱང་དུ་རལ་པ་ཚལ་དགུ་སྟེ་ཡེ་ཤེས་ལྔའི་རང་བཞིན་རྩ་བའི་ལྷ་ལྔ། ཚད་མེད་བཞིའི་བདག་ཉིད་གྲུ་ཆད་བཞི་རུ་ཕྱལ་པ། ཏིལ་པ། འཕྱར་ཀ་གྭ་དམར། མ་རུ་རྩེ་ལྔ་ལ་གཤེད་ཆེན་བཅུ་གཉིས་ཀྱིས་བསྐོར་བ། དེའི་ཕྱིར་སྐྱེ་མཆེད་བཅུ་གཉིས་དག་པའི་ལྕགས་མཁར་དུ་ཟླ་གཤེད་འཆི་བདག་བཅུ་གཉིས། འོབས་ཆེན་བཅུ་དྲུག་ཏུ་ཞག་གཤེད་སོ་གཉིས། ཕྲིན་ལས་བཞིའི་ཁམས་ལ་ཕོ་གཤེད་མོ་གཤེད་བདུན་དང་མོན་པ་ཀིང་ཀང་མ་མོའི་འཁོར་ཚོགས། བདག་ཏུ་ལྟ་བ་དག་པའི་ལྷ་མགོན་བདུད་དང་གནོད་སྦྱིན་གྱི་སྒོ་བ་བཞི་སྟེ་གཙོ་འཁོར་དུ་སྣང་བ་དེ་དག་ཀྱང་རྣམ་འགྱུར་སྲིད་ཞི་དབྱིངས་སུ་ཟ་བའི་དུས་ཀྱི་དགྲ་ཆེན་པོ་ཁམས་གསུམ་སྐྱེ་འཆི་སྲོག་གི་བདག་པོ་འཇིགས་བྱེད་གཤིན་རྗེ་རོལ་པའི་ཆོ་འཕྲུལ་དུ་རྔམས་པར་སྟོན་ཀྱང་དོན་ལ་འཇམ་དཔལ་ཡེ་ཤེས་སེམས་དཔའ་གཅིག་གི་ཡེ་ཤེས་སྒྱུ་མའི་རྣམ་རོལ་གཞི་ལམ་འབྲས་བུའི་ཡོན་ཏན་མ་ལུས་པ་ལྷུན་གྱིས་རྫོགས་པའི་བདག་ཉིད་ཆེན་པོ་གང༌། ཕྱི་རས་བྲིས་ཀྱི་དཀྱིལ་འཁོར་འདི་ནི་དཔེས་མཚོན་པ་ཡིན་གྱི་དོན་རང་གི་ཕུང་ཁམས་སྐྱེ་མཆེད་ཐམས་ཅད་ལྷའི་ངོ་བོར་ལྷུན་གྲུབ་ཏུ་གནས་པ་ཡིན་ཏེ། ཧོ༔ ཕུང་པོ་ཁམས་དང་སྐྱེ་མཆེད་སོགས། དབང་ཆོག་དཀྱུས་ལ་འཇུག་པས་རིགས་དབང་ལྔ་བསྐུར་ལ། མཐའ་རྟེན་རྣམ་རྒྱལ་བུམ་པ་ལ། ཧོ༔ ཡེ་ཤེས་ལྷུན་གྲུབ་བུམ་པ་ཡི༔ བརྟུལ་ཞུགས་དག་པའི་དབང་བསྐུར་བས༔ འཁོར་བ་རྣམ་དག་ཆོས་སྐུར་གསལ༔ རང་བྱུང་ཡེ་ཤེས་དབང་ཐོབ་ཤོག༔ ཨེ་ཀ་ཡ་མ་གུ་ཧྱ་བྷ་ག་བོ་དྷི་ཙིཏྟ་ཧོ༔ དེ་ལྟར་དབང་བསྐུར་བའི་ཆུ་རྒྱུན་སོགས། བུམ་དབང་རྫོགས་པ་དང༌། དེ་ནས་ནང་ནུས་པ་འཇུག་པའི་དབང་རྣམས་རྗེས་འབྲེལ་དུ་སྦྱིན་པ་ལ་གཏེར་གཞུང་ལས། ཁམས་དྲུག་ལྡན་པ་ལུས་ཀྱི་རྟེན༔ རྡོ་རྗེ་བཞི་ཡི་གོ་འཕང་ལ༔ སྦྱོར་བ་རྡོ་རྗེ་ཏནྟྲ་ལས༔ རྒྱུ་འབྲས་དག་གྲོལ་ལམ་གྱིས་མིན༔ ཞེས་པ་ལྟར་ཁྱེད་རང་རྣམས་ཀྱི་ཕུང་ཁམས་སྐྱེ་མཆེད་ཐམས་ཅད་འཇམ་དཔལ་ཡེ་ཤེས་སྐུ་ཅན་གྱི་གདན་གསུམ་ཕྱག་རྒྱའི་རོལ་པར་དག་ཅིང་སད་པར་བྱས་པའི་ནུས་པ་བརྟན་ཕྱིར་གདུག་པ་ཟིལ་གནོན་རབ་འཇིགས་དུར་ཁྲོད་དྲག་པོའི་རྒྱན་ཆས་རྣམས་གནས་སོ་སོར་བགོས་ཏེ་མངའ་གསོལ་བས་འཁོར་འདས་ཟིལ་གྱིས་གནོན་པའི་སྟོབས་དང་གཟི་བརྗིད་ཀྱི་རྩལ་ཆེན་རྫོགས་པར་མོས་ཤིག །དུར་ཁྲོད་ཆས་བརྒྱད་གཏད་ལ། ཧོ༔ གླང་ཆེན་སྟག་ཤམ་ཞིང་ལྤགས་སྦྲུལ༔ ཐོད་པ་སྙིང་ཕྲེང་ཀེང་རུས་རྒྱན༔ མེ་རི་དུར་ཁྲོད་དབང་བསྐུར་བས༔ དྲེགས་པའི་སྟོབས་དང་ལྡན་པར་ཤོག༔ ཨེ་ཀ་ཡ་མ་ཧསྟི་མ་ཧཱ་ནཱ་ཀ་པཱ་ལི་ཙིཏྟ་ཛྭ་ལ་ནི་རི་ཧོ༔ ཐུགས་ཀྱི་ནུས་པ་སྟེར་བ་འབར་བའི་ཕྱག་མཚན་རྣམས་སོ་སོར་བྱིན་པས་འཇིགས་པའི་བདུད་བཞི་དང་གསང་བའི་དགྲ་གསུམ་རྩད་ནས་གཅོད་པའི་མཐུ་སྟོབས་ནུས་པ་ཐོགས་མེད་དུ་ཐོབ་པར་མོས་ཤིག །ཕྱག་མཚན་དྲུག་གཏད་དེ། ཧོ༔ རྡོ་རྗེ་བེ་ཅོན་དུག་ལྔ་ཟིལ་གྱིས་གནོན༔ འཁོར་ལོ་གཏུན་ཤིང་གདུག་པ་གནས་སུ་འཇོམས༔ རལ་གྲི་སྡིགས་མཛུབ་དུག་གསུམ་སྐུ་གསུམ་རྫོགས༔ རིག་པ་སྟོབས་ཀྱི་སྒོ་གསུམ་དབང་ཐོབ་ཤོག༔ ཨེ་ཀ་ཡ་མ་བྷི་ཧ་ཧུ་སྟིབ་པ་ར་ཧོ༔ དངོས་གྲུབ་མྱུར་དུ་ཐོབ་བྱེད་དཔའ་བོའི་རྫས་ཀྱི་དབང་བཞི་སྦྱིན་པ་ལ། རྒྱུད་དྲུག་དབྱིངས་སུ་སྒྲོལ་བ་དམར་ཆེན་རཀྟའི་དབང་བསྐུར་བས་ཁམས་གསུམ་ཐུགས་རྗེས་སྒྲོལ་བའི་མཐུ་ཐོབ་པར་མོས་ཤིག །རཀྟ་ལག་གཡོན་དུ་གཏད་ལ། ཧོ༔ རྡོ་རྗེ་པདྨ་མཉམ་སྦྱོར་ནས༔ པདྨ་རཀྟ་བྱང་ཆུབ་སེམས༔ བམ་ཆེན་དམེ་བའི་དོན་དང་སྦྱར༔ བརྟུལ་ཞུགས་རོལ་པའི་དབང་བསྐུར་བས༔ མི་ཟད་རྒྱན་གྱི་དབང་ཐོབ་ཤོག༔ ཨེ་ཀ་ཡ་མ་གུ་ཧྱེ་རཀྟ་བོ་དྷི་ཙིཏྟ་ཧོ༔ ཅུང་ཟད་མྱང་དུ་གཞུག བམ་ཆེན་ཙིཏྟ་གྲུ་གསུམ་གྱི་གདན་དུ་འཇམ་དཔལ་ཕྱག་རྒྱ་ཟིལ་གནོན་སེམས་བྱུང་དག་པ་རྩ་བའི་ལྷ་དྲུག་རྒྱན་ལྷ་བརྒྱད། རྩ་བ་ཟླུམ་པོའི་ཚུལ་གྱི་ཟླ་གམ་ལ་སྤྲུལ་པ་རྣམ་གསུམ། མདུན་ཡེ་ཤེས་ཀྱི་རྩ་ལ་ཡ་མ་རཱ་ཛ། གཡས་ཆོས་ཉིད་ཀྱི་རྩ་ལ་ཡ་བ་ཏི། རྒྱབ་ཡོན་ཏན་གྱི་རྩ་ལ་ཨ་བ་གླང་མགོ །གཡོན་རང་རྒྱུད་ཀྱི་རྩ་ལ་རལ་པ་ཚལ་དགུ། རྣམ་ཤེས་ཚོགས་བརྒྱད་ཡུལ་དུས་དག་པ་མོན་བདུད་ཡབ་ཡུམ། ལྟེ་བར་འཕོ་བ་བཅུ་གཉིས་ཀྱི་རྩ་ལ་ཁམས་བཅུ་གཉིས་དག་པའི་འཆི་བདག་བཅུ་གཉིས། །ལྟོ་བར་ཁྲག་ཁྱམས་འོབས་སྲུང་ཤ་ཟ་ཀིང་ཀང༌། བམ་གྱི་ཕྱི་རྒྱུད་ཕུང་པོ་ལྔ་ཡ་མཱནྟ་ཀ་དང་གཤེད་ཆེན་བཞི། འབྱུང་བ་ཡུམ་ལྔ། རྣམ་ཤེས་མཐར་བྱེད་བརྒྱད། ཡན་ལག་སྒོ་བ་སྟེ་དཀྱིལ་འཁོར་ཡོངས་རྫོགས་གསལ་བར་བྱིན་གྱིས་བརླབས་པས་ཡོན་ཏན་གྱི་དབང་དང་དངོས་གྲུབ་མ་ལུས་པ་ཐོབ་པར་མོས་ཤིག །བམ་ཆེན་སྤྱི་བོར་བཞག་ལ། དཔའ་བརྟུལ་སྔགས་ཀྱིས་གཟི་བྱིན་བསྐྱེད༔ མ་ཕྱིར་འདི་བཞིན་འདུག་ཀྱང་འདི་དབང་ཚིག་ཡིན་འདྲ། མཆན། ཧོ༔ བམ་ཆེན་རོ་ལ་མཉམ་པར་རོལ༔ རྡོ་རྗེ་བརྗིད་པའི་དབང་ཐོབ་ནས༔ བདེ་ཆེན་མཉམ་ཉིད་ཐོབ་པར་ཤོག༔ ཨེ་ཀ་ཡ་མ་ཨ་ཏི་པ་ཏི་སིདྡྷི་ཧོ༔ བམ་གྱི་ཕྱི་རྒྱུད་ཀྱི་ལྷ་ཐམས་ཅད་ཙིཏྟའི་དཀྱིལ་འཁོར་ལ་འདུས། དེ་ཡང་དྭངས་མ་ལྔ་ཡི་ཐིག་ལེར་འདུས། དེ་སློབ་མའི་སྙིང་གར་ཐིམ་པར་མོས། བམ་ཡེ་ཤེས་ལྔའི་ངོ་བོ་བྱིན་རླབས་དང་དངོས་གྲུབ་དཔག་ཏུ་མེད་པར་བསམ་ལ། གདོང༌། ཁ། མིག མགོ་བོ། ལུས་ཀྱི་ཆ་ཤས་ཏེ་དམེ་བ་ལྔ་བསལ་བ་གསང་རྫས་དང་བསྲེ། བམ་སིལ་བུར་བསིལ་ཏེ་ཡུལ་དང་དབང་པོ་རོ་གཅིག་པས་ཚོགས་དྲུག་གི་དངོས་པོ་ཐམས་ཅད་ལ་གཙང་དམེ་མེད་པ་དེ་ཁོ་ན་ཉིད་མཉམ་པའི་རྣལ་འབྱོར་གྱིས་རོལ་པས་བདག་མེད་པའི་དོན་ཁོང་དུ་ཆུད་དེ་ཕྲིན་ལས་བཞི་དང་གྲུབ་པ་བརྒྱད་ཕྱག་རྒྱ་ཆེན་པོ་མཆོག་གི་དངོས་གྲུབ་མངོན་དུ་གྱུར་ནས་འགྲོ་ཀུན་ཕན་བདེའི་དཔལ་ལ་སྦྱོར་ནུས་པར་གྱུར་ཅིག །སྣོད་བཅུད་བདེ་ཆེན་དུ་དག་པར་སྦྱངས་པའི་བདུད་རྩི་ར་ས་ཡཱ་ནས་དབང་བསྐུར་བས་བདེ་ཆེན་འཕོ་འགྱུར་མེད་པའི་ཡེ་ཤེས་རྟག་པ་དམ་པའི་བཅུད་ལ་ལོངས་སྤྱོད་པར་མོས་ཤིག ཧཱུྃ༔ འཆི་མེད་རང་བྱུང་ར་ས་ཡན༔ བཀྲ་ཤིས་མཚན་ལྡན་ལྷག་པའི་རྫས༔ འཕེལ་འགྲིབ་མེད་པའི་དབང་བསྐུར་བས༔ རིགས་ལྔ་ཡེ་ཤེས་ལྔ་ཐོབ་ཤོག༔ ཨེ་ཀ་ཡ་མ་སརྦ་པཉྩ་ཨ་མྲྀ་ཏ་ཛྙཱ་ན་བུདྡྷ་ཧོ༔ ཚེ་འབྲང་རྒྱ་གྲམ་གྱི་ལྟེ་བར་བུམ་པ་གཞལ་ཡས་ཁང་དུ་ཚེ་དཔག་མེད་ཡབ་ཡུམ་བཞིས་བསྐོར་བའི་དབང་བསྐུར་བས་རྡོ་རྗེ་ཚེ་ཡི་དབང་ཐོབ་པར་མོས་ཤིག །ཚེ་འབྲང་སྤྱི་བོར་བཞག་སྟེ། ཧོཿ བཀྲ་ཤིས་དངོས་གྲུབ་གྭའུ་རུ༔ མི་འགྱུར་བརྟན་པའི་ཚེ་བསྐྱིལ་ནས༔ རང་རྟགས་ཚེ་ཡི་དབང་བསྐུར་བས༔ འཆི་མེད་བརྟན་པའི་དབང་ཐོབ་ཤོག༔ ཨེ་ཀ་ཡ་མ་ཨཱ་ཡུརྫྙཱ་ན་སིདྡྷི་ཧོ༔ དཔལ་གྱི་གཏོར་མ་འདི་ཉིད་དཀྱིལ་འཁོར་གྱི་ལྷ་ཚོགས་སུ་གསལ་བ་དེ་དག་གི་སྐུ་ཡི་འོད་ཟེར་གྱིས་སྐུ་གསུང་ཐུགས་ཡོན་ཏན་ཕྲིན་ལས་ཀྱི་དངོས་གྲུབ་རབ་འབྱམས་ཐོབ་པར་མོས་ཤིག །སྒྲུབ་གཏོར་སྤྱི་བོར་བཀོད་ལ། ཧོ༔ སྣོད་ཀྱི་འཇིག་རྟེན་གཏོར་གཞོང་དུ༔ བཅུད་ཀྱི་སེམས་ཅན་གཏོར་མར་གསལ༔ འབྱུང་བ་རྣམ་ལྔ་གཏོར་མའི་རྒྱུ༔ ལྷུན་གྲུབ་ཀུན་འབྱུང་གཏོར་མའི་རྒྱན༔ འཛིན་ཆགས་མེད་པའི་སྟོབས་ཀྱིས་རོལ༔ ཨེ་ཀ་ཡ་མ་མ་ཧཱ་བ་ལིཾ་ཏ་པཱུ་ཛ་ཧོ༔ དེས་རྡུལ་ཚོན་སྤྲུལ་པའི་དཀྱིལ་འཁོར་དུ་སོགས་བུམ་དབང་གི་དག་པ་བརྗོད་ནས། ཟབ་དབང་གསུམ་ཡོངས་རྫོགས་མཐར་དམ་ཚིག་ཁས་བླང་བ་དཔལ་ཆེན་སྐབས་ལྟར་ལ། ནུས་པ་དེ་ལྡན་དབང་སྲོག་རྒྱུད་ལ་འཛིན་པ་དམ་ཚིག་ལ་རག་ལས་པས་དམ་ཚིག་བརྟན་པའི་ཐོག་མར་མན་ངག་སྣོད་མེད་ལ་མི་སྤེལ་ཞིང་སློབ་དཔོན་གྱི་བཀའ་ལས་མི་འགལ་བར་གདམས་པ་འདི་ལ་གསན་པས་ཁྱབ་པར་གདའ། ཧོ༔ སྣོད་མེད་བརྟུལ་ཞུགས་ཞན་པ་ལ༔ སྤེལ་ཞིང་བསྒྲགས་ན་རྡོ་རྗེ་ཁྲོ་བོ་དང༔ གཏུམ་པོ་གནོད་སྦྱིན་མཁའ་འགྲོ་དབང་ཆེན་གྱིས༔ ལུས་འདྲལ་མགོ་གཤགས་ཙིཏྟ་ཁྲག་ཏུ་འཐུང༔ ཁྱོད་ཀྱི་རྡོ་རྗེ་འཆང་ཆེན་ང་ཡིན་པས༔ བཀའ་ཡི་ཟུར་ཡང་བཅག་པར་བྱ་བ་མིན༔ བསྒོ་བ་བྱོས་ལ་དམ་ཚིག་སྲོག་ལྟར་སྲུངས༔ གལ་ཏེ་འདས་ན་རྡོ་རྗེ་དམྱལ་བར་ལྟུང༔ ཨེ་ཀ་ཡ་མ་དུ་ན་རཀྟཾ་ཧོ༔ དམ་ཆུ་བདུད་རྩི་སྦྱིན་ལ། འདི་ནི་རྡོ་རྗེ་དམྱལ་བའི་ཆུ༔ ཚུལ་འདི་བསྲུངས་ན་དངོས་གྲུབ་ཐོབ༔ ཉམས་ན་ཙིཏྟ་གཤགས་ཏེ་འཕོ༔ རྡོ་རྗེའི་ཆུ་འདི་ཁྱོད་ཀྱིས་ལོངས༔ བཛྲོད་ཀ་ཨ་ཨི་དཾ་ཧོ༔ དེ་སྐད་ཇི་ལྟར་བསྒོས་པའི་དོན་བཞིན་ཐུན་མོང་དང་ཐུན་མོང་མ་ཡིན་པ་སོགས་དཀྱུས་ལྟར་དབང་དང་ཆོ་གའི་རྗེས་རིམ་མཐའ་རྒྱས་སུ་བྱས་པས་གྲུབ་པའོ།  །མཁྱེན་གཉིས་ཡེ་ཤེས་གཏེར་མཛོད་ཆེ། །བརྩེ་ཆེན་བདུད་རྩིས་གྲོལ་བའི་བཅུད། །བམ་ཆེན་གསང་བའི་དབང་བསྐུར་གྱི། །འོད་ཟེར་མཛེས་འཕྲོ་འདི་རྨད་བྱུང༌། །ཐུགས་སྒྲུབ་དཔལ་ཆེན་འདུས་པའི་སྒོས་བཀའ་ཁྲག་འཐུང་རིགས་བཞི་ལས། སྐུ་རྡོ་རྗེ་འཇམ་དཔལ་གཤིན་རྗེ་འཆི་བདག་ཟིལ་གནོན་གྱི་བམ་ཆེན་གསང་བའི་དབང་བསྐུར་བའི་ལེའུ་ཚན་དྲུག་པ་སྟེ་འཇམ་དཔལ་དགའ་བའི་བཤེས་གཉེན་གྱིས་སྦྱར་བའོ།  ༈  ཐུན་མཚམས་སྤྲིན་གྱི་སྟངས་འཛིན་བདེ་ཆེན་གཟིས། །རྒྱལ་ཀུན་གསུང་གི་དཔྱིད་དུ་སྒེག་པའི་དཔལ། །དབང་ཆེན་རྟ་ཡི་རྒྱལ་པོའི་དཀྱིལ་འཁོར་གྱི། །བདག་ཉིད་པདྨ་གར་གྱི་དབང་ཕྱུག་འདུད། །གསུང་པདྨའི་རིགས་ཀྱི་ཧེ་རུ་ཀ་རྟ་མགྲིན་ཁམས་གསུམ་རོལ་པའི་དབང་ལ། གཞུང་མཐུན་དཀྱིལ་འཁོར་དབུས་སུ་རྣམ་བུམ་མགུལ་ཆིངས་དམར་པོ་སོགས་རིགས་དབང་ལྔ། རྡོ་རྗེ་སློབ་དཔོན་དབང་རྫས་རྡོར་དྲིལ། རྗེས་གནང་ཆས། རྟ་མགྲིན་གཙོ་འཁོར་ཡོངས་རྫོགས་ཀྱི་སྐུ་ཙཀ །རྟ་མགོ་ལྔའི་ཙཀླི། རྡོ་རྗེ་རིན་ཆེན་གྱི་ཁྱུང་གཤོག །དུར་ཁྲོད་ཆས་བརྒྱད། དཔལ་གྱི་ཆས་བརྒྱད། ཕྱག་མཚན་ཕྱོགས་སྡོམ། ཡེ་ཤེས་སེམས་དཔའ་པདྨ་གཟི་ལྡན་གྱི་སྐུ། རིགས་ལྔའི་ས་བོན་ཨོཾ་ཨཱཿཧཱུྃ་སྭཱ་ཧཱ། སྒྲོལ་དབང་ཆས་ལྕགས་ཧོམ་དུ་ལིངྒ། གདབ་ཕུར། གཡབ་དར། རིག་ཙཀ ཤེལ་རྡོ། མེ་ལོང་སོགས་སྔ་མ་ལྟར་འདུ་བྱས་ལ། དབང་སྒྲུབ་བདག་མདུན་གཉིས་སུ་དབྱེ་ཚུལ་སོགས་གཤིན་རྗེ་ལྟར་ལ། བཟླས་དམིགས། ཐུགས་ཀར་རྒྱལ་བ་ཀུན་གྱི་ཡུམ༔ པདྨ་གཟི་ལྡན་ཞི་མ་ཁྲོ༔ ཕྱག་མཚན་མེད་དེ་འཛིན་འཛིན་འདྲའི༔ སྙིང་གར་རིན་ཆེན་ཟུར་བརྒྱད་སྟེང༔ ཉི་མའི་གདན་ལ་ཧྲཱིཿཡིག་མཐར༔ རྣམ་པའི་གཟུགས་བརྙན་ཡི་གེས་བསྐོར༔ ངོ་བོ་ལྷ་ཡི་སྐུ་རུ་བཤད༔ ཡབ་ཡུམ་ཞལ་དང་མཁའ་གསང་བརྒྱུད༔ བདེ་བ་ཆེན་པོའི་འོད་ཟེར་གྱིས༔ རྒྱལ་བ་མཆོད་ཅིང་ཐུགས་དམ་བསྐུལ༔ མ་མོ་མཁའ་འགྲོ་ལས་ལ་འགྱེད༔ དངོས་གྲུབ་གྲུབ་པས་བདག་བྱིན་བརླབས༔ ཡང་འཕྲོས་བརྟན་གཡོ་ཐ་མལ་པའི༔ སྣང་ཞེན་དག་པའི་སྣོད་དང་བཅུད༔ ལྷ་དང་གཞལ་ཡས་རོལ་པར་ཤར༔ ཨོཾ་ཧུ་ལུ་ཧུ་ལུ་ཕཊ༔ ཨེ་ཨ་རལླི་ཧཱུྃ་ཧྲཱིཿཛཿ ཞེས་བཟླ་ལ་སྤྲོ་བསྡུ་སོགས་གཤིན་རྗེ་ལྟར་བྱ་བར་གསུངས། བུམ་སྒྲུབ་ནས་བདག་འཇུག་དང་མེ་ཏོག་དོར་བ་གང་རུང་གིས་གནང་བ་ཞུས་ཏེ། སློབ་མར་ཁྲུས་བྱ། བགེགས་བསྐྲད། སྲུང་འཁོར་སེམས་བསྐྱེད་གསལ་བཏབ་ལ། དེ་ལ་འདིར་མཁའ་ཀློང་རྣམ་པར་དག་པ་འོག་མིན་ཆོས་དབྱིངས་འོད་ཀྱིས་ཁེངས་པར་གདོད་མའི་མགོན་པོ་འོད་སྣང་མཐའ་ཡས་རྟག་ཏུ་འོད་གསལ་གྱི་དགོངས་པར་བཞུགས་པ་ལས། རང་བྱུང་བརྩེ་བའི་ཐུགས་རྗེ་གར་གྱི་དབང་ཕྱུག་བདེ་ཆེན་དགྱེས་པའི་མཚན་དཔེར་བཞེངས་ཏེ་སྐུ་དང་ཡེ་ཤེས་འདུ་འབྲལ་མེད་པ་ཁ་སྦྱོར་ཡན་ལག་བདུན་རྫོགས་འཇིག་རྟེན་དབང་ཕྱུག་པདྨའི་སྣང་བ་རབ་ཏུ་རྒྱས་པ་གང༌། གདུལ་བྱ་མི་སྲུན་པ་རྣམས་འདུལ་བའི་གཉེན་པོར་པདྨ་ཧེ་རུ་ཀ་རྟ་མཆོག་རོལ་པའི་རྣམ་པར་སྣང་བས་རྔོག་མ་ལེ་བརྒན་གྱི་རྒྱུད། དབང་ཆེན་འདུས་པའི་རྒྱུད་སོགས་ཤིན་ཏུ་མང་པོ་དག་གསུངས་པ་རྡོ་རྗེ་ཆོས་ཀྱིས་བསྡུས་ཏེ་གླེགས་བམ་དུ་བྱས་ནས་ཟངས་ཀྱི་སྒྲོམ་བུར་རྒྱས་བཏབ་ནས་སྨུག་ནག་དབང་གི་མཁའ་འགྲོས་མཆོད་རྟེན་བདེ་བྱེད་བརྩེགས་པར་སྦས་པ། བཀའ་བབ་གྲུབ་པའི་རིག་འཛིན་མཆོག་བརྒྱད་ཀྱི་ཡ་གྱལ་སློབ་དཔོན་སངས་རྒྱས་གཉིས་པ་འཕགས་པ་ཀླུ་སྒྲུབ་ལ་གཏད་དེ་འཛམ་བུའི་གླིང་དུ་སྣང་བར་མཛད་པ་དང༌། གཞན་ཡང་གསུང་རྡོ་རྗེ་རིག་འཛིན་གྲུབ་པའི་དབང་ཕྱུག་གི་ཚུལ་བསྟན་པ་སློབ་དཔོན་ཆེན་པོ་པདྨ་འབྱུང་གནས་ལ་དབང་ཆེན་འདུས་པ་སྐུའི་རྒྱུད། རྟ་མཆོག་རོལ་པ་གསུང་གི་རྒྱུད། རྡོ་རྗེ་པད་དྲ་ཐུགས་ཀྱི་རྒྱུད་སོགས་སྐུ་གསུང་ཐུགས་ཡོན་ཏན་ཕྲིན་ལས། ཕྱི་མ། ཕྱི་མའི་ཕྱི་མ། མན་ངག་གི་རྒྱུད་ལ་སོག་པ་ཨོ་རྒྱན་ཧེ་རུ་ཀའི་འདུ་ཁང་དུ་རྡོ་རྗེ་རྣལ་འབྱོར་མས་གཏད་པ་དང༌། གྲུབ་ཆེན་མི་ཏྲ་ཛོ་ཀི་ལ་སོགས་པ་ནས་བརྒྱུད་པའི་ཐུགས་རྗེ་ཆེན་པོ་ཞི་ཁྲོའི་ལམ་སྐོར་གསར་རྙིང་ཀུན་ལ་རྒྱ་ཆེར་བཞུགས་པ་ལས། སྐབས་སུ་བབ་པ་འདི་ནི་དུས་གསུམ་རྒྱལ་བའི་ཞིང་དུ་མཚན་ཙམ་འབྱོན་པར་དཀའ་བ། སངས་རྒྱས་ལས་ཀྱང་དཀོན་པ་རྒྱལ་བ་རྡོ་རྗེ་འཆང་ཉིད་ཀྱིས་བསྔགས་པའི་གསང་སྔགས་བླ་མེད་ནང་རྒྱུད་ཡོ་ག་གསུམ་གྱི་དབང་རྒྱུད་མན་ངག་གི་བཀའ་སྲོལ་ལ་འགྲན་ཟླ་དང་བྲལ་བ་གསང་སྔགས་རྡོ་རྗེ་ཐེག་པའི་ཤིང་རྟ་ཆེན་པོ་སྔ་འགྱུར་རྙིང་མའི་ཕྱོགས་སུ་བཀའ་གཏེར་གྱི་རིང་ལུགས་གཉིས་ལས་ཕྱི་མ་སྟེ། དེ་ལའང་ཟབ་གཏེར་སྔ་ཕྱིའི་སྲོལ་འབྱེད་རིག་འཛིན་གྲུབ་པའི་སྐྱེས་བུའི་ཆོས་སྐལ་ཟབ་རྒྱས་དུ་མ་ཞིག་བཞུགས་པ་ལས་སྐབས་སུ་བབ་པ་འདི་ནི་གཏེར་ཆེན་ཆོས་རྗེ་གླིང་པའི་གཏེར་ལུང་ལས། དབུས་གཡོར་གཞུང་དུ་བྱང་སེམས་པདྨའི་མིང༔ བཀའ་རྙིང་བསྟན་སྐྱོང་ཐབས་མཁས་འགྲོ་བ་འདུལ༔ ཞེས་བསྔགས་པ་ལྟར་གནད་བྱང་ཐུགས་ཀྱི་སྒྲོམ་བུ་ལས། རང་བྱུང་རྡོ་རྗེ་པདྨ་དབང༔ གསང་མཚན་གར་དབང་འཇིགས་མེད་གླིང༔ རྟོགས་གྲོལ་དུས་མཉམ་ཐུགས་གཏེར་བདག༔ འཕགས་པས་རྗེས་སུ་བཟུང་བའི་རྟགས༔ ལག་མཐིལ་གཡས་ན་པདྨའི་སྤྱན༔ དབང་ཆེན་གསུང་གི་རིག་འཛིན་ཕྱིར༔ མཐེ་བོང་ཐུགས་སྲོག་ཧྱཱརྵྞིས་མཚན༔ ཞེས་གསུངས་པ་ལྟར་དགོངས་པ་ཕྱོགས་ཡན་དུ་གྲོལ་ནས་སྣང་སྲིད་དཔེ་ཆར་ཤར་བའི་རང་འབྲས་བླ་མ་དགོངས་འདུས་ཀྱི་རྣམ་བཤད་མཁྱེན་བརྩེའི་མེ་ལོང་རྩོམ་པའི་སྒང་ཡོལ་ཐོ་རེངས་ཀྱི་ཆར་ཤེས་རིག་སྤྲོས་བྲལ་གྱི་ངང་དུ་ལ་ཟློ་བའི་ཚེ་སྨིན་མཚམས་ཀྱི་ནམ་མཁའ་ནས་རྟ་སྐད་མངོན་སུམ་དུ་འཚེར་བ་དང༌། ཨེ་མ། འདི་ཡི་བསྟན་པ་འཛིན་པར་ལུང་བསྟན་པའི། ཁོང་པདྨའི་ལྗགས་ལྡན་མཆེད་དྲུག་ལས། །རྗེ་མ་ཧཱ་གུ་རུས་མིང་གི་དབང༌། །པདྨ་དབང་ཆེན་དུ་བྱིན་གྱིས་བརླབས། །དབྱིངས་ལྷན་ཅིག་སྐྱེས་པའི་ཌཱ་ཀི་མས། །ལྷ་པདྨ་དབང་ཆེན་སྲོག་གི་སྙིང༌། །མངོན་སུམ་དུ་ལག་པའི་རི་མོ་ལ། །རྩོད་པ་མེད་པར་བཞུགས་ཅེས་བཤད། །ཅེས་སོགས་གསུངས་པ་བཞིན་ཐུགས་རྗེ་ཆེན་པོ་ཞི་ཁྲོ་དང༌། ནཱ་གརྫུ་ན་པདྨ་འབྱུང་གནས་རྣམས་ཀྱིས་རྗེས་སུ་བཟུང་ཞིང་མཁའ་ཁྱབ་ཐུགས་རྗེས་སྣང་བས་རྩོད་དུས་གདུལ་དཀའ་འདུལ་བ་ལ་འབྲེལ་ཚད་དོན་ལྡན་ཆེན་པོ་རྒྱལ་བའི་མྱུ་གུ་མཁྱེན་བརྩེའི་ལྷ་ཞེས་འཕགས་མཆོག་སེམས་ཉིད་ངལ་གསོ་དངོས་སུ་བྱོན་པས་ན། ཟབ་གསང་ཕྲིན་ལས་ཀྱི་མུ་ཁྱུད་ཀྱང་ཤར་ནུབ་རྒྱ་མཚོའི་མཐའ་ཚུན་ཆད་ཁྱབ་པའི་རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་བཀའ་འདུས་ཆོས་ཀྱི་རྒྱ་མཚོ་དཔལ་ཆེན་འདུས་པའི་སྒོས་བཀའ། གསུང་པདྨའི་རིགས་རྟ་མགྲིན་ཁམས་གསུམ་རོལ་པ་སྟེ་སྤྱིར་དུས་གསུམ་གྱི་རྒྱལ་བ་ཐམས་ཅད་བླ་མ་ཡི་དམ་དབྱེར་མེད་ལ་འདུ། ཡི་དམ་དཀྱིལ་འཁོར་གྱི་ལྷ་ཐམས་ཅད་པདྨ་དབང་ཆེན་ལ་འདུས་པས་དོན་ལ་སློབ་དཔོན་ཆེན་པོ་ཉིད་གསུང་རྡོ་རྗེ་པདྨ་ཧེ་རུ་ཀའི་ཚུལ་དུ་སྒྲུབ་པའི་དབང་བསྐུར་བ་སྐབས་སུ་བབ་པ་སྟེ་དེ་ཉིད་ཞུ་བའི་དོན་དུ་མཎྜལ་ཕུལ། སོགས་ནས་ཡེ་ཤེས་དབབ་པའི་སྐབས། སྔར་གྱི་དབང་སྟེགས་ལ་འཁོད་པ་སྣོད་རྣམ་པར་དག་པ་ཟླ་གམ་དབང་ཆེན་རོལ་པའི་གཞལ་ཡས་ཁང་དུ་པདྨ་ཉི་མ་ཀླུ་སྲིན་ཕོ་མོ་བསྣོལ་བའི་གདན་ལ། བཅུད་རྣམ་པར་དག་པ་ཁྱེད་རང་རྣམས་རེ་རེ་ནས་དབང་ཆེན་རྟ་མཆོག་རོལ་པ་སྐུ་མདོག་དམར་ནག་སྒེག་ཅིང་དཔའ་བ་ལ་འཇིགས་སུ་རུང་བའི་ཞལ་ལྔ་གཡས་སྔོ་གཡོན་སེར་ལྷག་མ་རྣམ་གཉིས་རྩ་ཞལ་དང་མཚུངས་པ། སྤྱི་གཙུག་རལ་པའི་གསེབ་ཏུ་རྟ་ཞལ་ལྔ་འཚེར་བ། ཕྱག་བཅུ་དྲུག་གི་གཡས་བརྒྱད་ཀྱིས་རྡོ་རྗེ། ཁཊྭཱཾ། དྲིལ་བུ། ལྕགས་ཀྱུ། སྦྲུལ་ཞགས། འཁོར་ལོ། རལ་གྲི། རྡོ་རྗེའི་ཕྲེང་བ། གཡོན་བརྒྱད་ཀྱིས་ཐོད་ཁྲག པདྨ། སྙིང༌། དབྱུག་པ། རྒྱ་གྲམ། བེ་ཅོན། མེ་དཔུང༌། ཏྲི་ཤུ་ལ། ཁྱུང་ཁྲ་རྣམས་བསྣམས་པ། དཔལ་གྱི་ཆས་བཅུ་དང་དུར་ཁྲོད་ཀྱི་ཆས་བརྒྱད་ཀྱིས་བརྗིད་པའི་པང་དུ་པདྨ་གཟི་ལྡན་སྔོ་ནག་གཡས་རིན་པོ་ཆེ་དང་གཡོན་རིན་པོ་ཆེའི་ཟ་མ་ཏོག་འཛིན་པས་འཁྱུད་པ། ཞབས་བརྒྱད་བརྐྱང་བསྐུམ་དོར་སྟབས་ཀྱིས་ཀླུ་བརྒྱད་རྒྱལ་བསེན་བརྫིས་པས་བདེ་བ་ཆེན་པོའི་ཡེ་ཤེས་མེ་དཔུང་དམར་ནག་ཏུ་འབར་བའི་ཀློང་ན་འགྱིང་བའི་གནས་གསུམ་དུ་ཕྱག་མཚན་གསུམ་སོགས་དང་འབེབས་སྔགས་ལ་རྟ་སྔགས་སྦྱར། དཀྱིལ་འཁོར་མཐོང་བ་བསྟན་པའི་སྐབས། ཡོངས་སུ་རྫོགས་པའི་ལྟེ་བར་འཁོར་ལོ་རྩིབས་བཅུ་དྲུག །པད་འདབ་སོ་གཉིས་ཀྱིས་བསྐོར་བའི་ལྟེ་བར་དབང་གི་ཕོ་བྲང་ཟླ་གམ་སྒོ་གཅིག་པའི་དབུས་སུ་པདྨ་ཉི་མ་ཀླུ་བསེན་རྒྱལ་བསེན་བསྣོལ་བའི་སྟེང་དུ་དབང་ཆེན་རྟ་མཆོག་རོལ་པ་སྐུ་མདོག་དམར་ནག་དུས་མཐའི་མེ་དཔུང་ལྟར་འབར་བའི་མཐིང་སེར་དམར་བའི་ཞལ་ལྔ། དབུ་གཙུག་ཏུ་རྟ་གདོང་ལྔ་དང་བཅས་པ། ཕྱག་བཅུ་དྲུག་གིས་རྡོ་རྗེ་ཁཊྭཱཾ་དྲིལ་བུ་ལྕགས་ཀྱུ་སྦྲུལ་ཞགས་འཁོར་ལོ་རལ་གྲི་རྡོ་རྗེའི་ཕྲེང་བ། ཐོད་ཁྲག་པདྨ་སྙིང་དབྱུག་པ་རྒྱ་གྲམ་བེ་ཅོན་མེ་དཔུང་ཏྲི་ཤུལ་ཁྱུང་ཁྲ་རྣམས་དང༌། ཞབས་བརྒྱད་དོར་སྟབས་ཀྱིས་འགྱིང་ཞིང་ཡུམ་པདྨ་གཟི་ལྡན་སྔོན་མོ་དང་སྦྱོར་བ། སྐུ་ལ་དཔལ་དང་དུར་ཁྲོད་ཀྱི་ཆས་ཡོངས་སུ་རྫོགས་ཤིང༌། རྡོ་རྗེའི་ཁྱུང་གཤོག་གདེངས་པའི་རྩེ་མོར་ཉི་ཟླ་དང་བྱ་ཁྱུང་གིས་བརྒྱན་པ། འཁོར་ལོའི་རྩིབས་བཅུ་དྲུག་ལ་གོ་ལ་མ་དྲུག །གསང་བའི་ཡུམ་བཞི། ཁམས་རྒྱ་མོ་དྲུག་དང༌། པད་འདབ་སོ་གཉིས་ལ་མཁའ་འགྲོ་སོ་གཉིས་ཀྱི་སྤྲུལ་པ་ལོང་བ་རྒྱབ་འབྲེལ་སོ་གཉིས། གྲུ་ཆད་ཕྱི་ནང་གཉིས་ལ་དཔལ་གྱི་ཕོ་ཉ་ཁྱི་བརྒྱད་སྤྱང་བརྒྱད། བར་ཁྱམས་སུ་ཕོ་ཉ་སུམ་བརྒྱ་དྲུག་ཅུ། སྒོ་བཞིར་མཁའ་འགྲོ་བཞི་དང་བཅས་པ་བདེ་ཆེན་སྒྱུ་མའི་ཆོ་འཕྲུལ་མ་འགག་ཅིར་སྣང་ཡང་དོན་ལ་ཡེ་ཤེས་ཉག་གཅིག་གི་བདག་ཉིད་དུ་རྣམ་པར་དག་པ་དང་ལྷག་པ་གཟུགས་བརྙན་གྱི་དཀྱིལ་འཁོར་འདིས་མཚོན་བྱེད་དུ་བྱས་ཏེ་དབང་བསྐུར་ཞིང་ངོ་སྤྲད་ནས་ལམ་སྦྱང་བས་གཉུག་མའི་རྡོ་རྗེ་གསུམ་གྱི་ཆོ་འཕྲུལ་གདན་གསུམ་རྡོ་རྗེ་བཀོད་པའི་གྲོང་ཁྱེར་རང་ལ་ལྷུན་གྲུབ་ཏུ་བཞུགས་པ་ཡང༌། ཧོ༔ ཕུང་པོ་ཁམས་དང་སོགས། དབང་ཆོག་དཀྱུས་ལ་འཇུག་པས་རིགས་དབང་ལྔ་བསྐུར་ལ། གཉིས་པ་བུམ་དབང་གི་རྗེས་འབྲེལ་ནུས་འཇུག་གི་དབང་སྦྱིན་པ་ལ། མདུན་བསྐྱེད་གཙོ་བོའི་སྐུ་ལས་ཡེ་ཤེས་ཀྱི་སྐུ་མར་མེ་གཅིག་ལས་གཉིས་མཆེད་ཀྱི་ཚུལ་དུ་འཕྲོས། ཁྱེད་རང་གི་སྤྱི་བོ་ནས་ཞུགས་ཏེ་ཐིམ་པས་ཕུང་ཁམས་སྐྱེ་མཆེད་ལྷ་སྐུ་ཕྱག་རྒྱ་ཆེན་པོར་གནས་གྱུར་པའི་མོས་པ་མཛོད། གཙོ་བོའི་སྐུ་སྤྱི་བོར་བཞག་ལ། ཨེ་མ་གསང་མཆོག་གསང་བའི་བདག༔ རིག་པ་བདེ་ཆེན་རྒྱལ་བའི་ཡབ༔ སངས་རྒྱས་ཀུན་འདུས་རྒྱལ་པོ་ཡི༔ སྐུ་གསུང་ཐུགས་ཀྱི་དབང་བསྐུར་བས༔ རིགས་ཀྱི་དབང་མཆོག་ཐོབ་པར་ཤོག༔ ཀྲོ་དྷ་དེ་བ་ཨ་ཨཱཿ ཨ་བྷི་ཥིཉྩ་ཧཱུྃ༔ དཔལ་གྱི་རྟ་སྐད་ཐེང་གསུམ་གྱིས་དྲང་དོན་དུ་སྣང་སྲིད་དབང་གི་དཀྱིལ་འཁོར་དུ་སད་ནས་མ་མོ་མཁའ་འགྲོ་དབང་དུ་སྡུད་ཅིང་དགྱེས་པ་དང༌། ངེས་དོན་དུ་གཞི་ལམ་འབྲས་བུའི་བདེ་ཆེན་ཡེ་ཤེས་ལྔ་ཡི་ཆོ་འཕྲུལ་དུ་ངོ་སྤྲད་པའི་ཕྱིར་རྟ་ཞལ་གྱིས་དབང་བསྐུར་བར་མོས་ཤིག རྟ་མགོ་ལྔ་སྤྱི་གཙུག་ཏུ་བཀོད་ལ། ཧཱུྃ༔ དཔའ་བོ་ཡེ་ཤེས་སྒོ་སྲུང་ནི༔ ཟླ་གམ་འོད་ཀྱི་ཐིག་ལེ་ཆེ༔ འབར་བའི་ཡེ་ཤེས་རྟ་མགོ་ལྔས༔ རྟ་མགྲིན་དབང་གི་སྐུ་ཐོབ་ཤོག༔ ཧྱ་གྲཱྀ་ཝ་ཛྙཱ་ན་ཧྲཱིཿཧྲཱིཿཧྲཱིཿཧྲཱིཿཧྲཱིཿ ཨ་བྷི་ཥིཉྩ་ཧཱུྃ༔ ཐུགས་སྟོང་དང་སྙིང་རྗེ་ཐབས་ཤེས་གཉིས་མེད་རྡོ་རྗེ་རིན་ཆེན་གྱི་གཤོག་པས་སྲིད་ཞིའི་གཡང་ས་གཅོད་ཅིང་གཏི་མུག་ཀླུ་གདོན་འདུལ་བ་རྡོ་རྗེ་ཁྱུང་གི་དབང་ཐོབ་པར་མོས་ཤིག ཁྱུང་གཤོག་དཔུང་པ་གཡས་གཡོན་དུ་བཞག་སྟེ། ཧཱུྃ༔ གཡས་པ་རྡོ་རྗེའི་གཤོག་པ་བརྒྱད་དུ་གདེངས༔ གཡོན་པ་རིན་ཆེན་གཤོག་པ་བརྒྱད་དུ་གདེངས༔ སྟེང་དང་འོག་དང་བར་བར་ན༔ རྡོ་རྗེའི་ཐེའུ་གཤོག་རེ་རེས་བརྒྱན༔ གཤོག་པའི་དང་རུ་རྩེ་མཆན་ལ༔ དབང་གི་སྤྲུལ་པ་ཆེན་པོ་ནི༔ བྱ་ཁྱུང་འབར་བའི་སྐུར་བསྟན་འདིས༔ དེ་རིང་ཁྱོད་ལ་དབང་བསྐུར་བས༔ ཀླུ་གཉན་འདུལ་བའི་དབང་ཐོབ་ཤོག༔ ཙིཏྟ་བཛྲ་ག་རུ་ཌ་ཨ་བྷི་ཥིཉྩ་ཧཱུྃ༔ སྣང་སྲིད་མ་མོ་མཁའ་འགྲོའི་ཚོགས་རྗེ་རྡོ་རྗེ་གསང་བའི་སྤྱོད་པས་ནང་གི་ས་ལམ་གྱི་ཡོན་ཏན་རྫོགས་པ་ལྷ་དང་སྐལ་པ་མཉམ་པར་བྱིན་གྱིས་བརླབ་པའི་ཕྱིར་དུར་ཁྲོད་ཆས་བརྒྱད་ཀྱིས་དབང་བསྐུར་བར་མོས་ཤིག དུར་ཁྲོད་ཆས་བརྒྱད་གཏད་ལ། ཧཱུྃ༔ དཔལ་གྱི་སྐུ་མཆོག་གཉིས་མེད་རོལ་པའི་སྟབས༔ དུར་ཁྲོད་ཆས་བརྒྱད་གསང་བའི་ངང་དུ་རོལ༔ དུར་ཁྲོད་ཆེན་པོའི་དབང་མཆོག་འདི་བསྐུར་བས༔ ཏན་གན་རོལ་པ་རྟགས་ཆེན་དབང་ཐོབ་ཤོག༔ ཧཱུྃ་ཀྲོ་དྷ་ཧུ་ལུ་ཧཱུྃ་ཕཊ༔ ཨ་བྷི་ཥིཉྩ་ཧཱུྃ༔ ཐུགས་རྗེ་ཐབས་ཀྱིས་རྔམས་པས་རུ་ཏྲ་སྡེ་གསུམ་སྒྲོལ་ཕྱིར་དཔལ་གྱི་ཆས་བརྒྱད་ཀྱིས་དབང་བསྐུར་བས་དྲེགས་ཚོགས་ཟིལ་གནོན་སྒྲོལ་བའི་ལས་ལ་མངའ་བརྙེས་པར་མོས་ཤིག །དཔལ་གྱི་ཆས་བརྒྱད་གཏད་ལ། ཧཱུྃ༔ དཔའ་བོ་ཏིང་འཛིན་རྣོན་པོ་སྟག་གི་ཆས༔ རྣོ་གདུག་ཟློག་བྱེད་རྒྱ་གྲམ་ལྕགས་ཀྱི་ཆས༔ ཤེས་རབ་ཏིང་འཛིན་རྡོ་རྗེ་འཆོལ་བའི་ཆས༔ དབང་གི་བསེ་ཁྲབ་དམར་པོ་གཟི་བརྗིད་ཆས༔ དཔའ་བརྗིད་མཉེན་ལྕུག་སྦྲུལ་ནག་རྒྱན་གྱི་ཆས༔ དབང་ཕྱུག་ཟ་བྱེད་ཏིང་འཛིན་མཆེ་བའི་ཆས༔ རྡོ་རྗེའི་སློག་པ་མཐིང་ག་ལེ་བརྒན་ཆས༔ སྡུད་བྱེད་གཅན་གཟན་གཏུམ་པ་གཟིག་གི་ཆས༔ བསྐུར་བས་རྣམ་ཐར་བརྒྱད་དང་ལྡན་པར་ཤོག༔ རྩ་སྔགས་མཐར། ཀརྨ་ཨ་བྷི་ཥིཉྩ་ཧཱུྃ༔ རྡོ་རྗེའི་ཕྱག་མཚན་རྣམས་གཏད་པས་སྟོང་ཉིད་བཅུ་དྲུག་གི་དགོངས་པས་སྲིད་རྩ་དབྱིངས་སུ་སྒྲོལ་བའི་དབང་ཐོབ་པར་མོས་ཤིག །ཕྱག་མཚན་རྣམས་གཏད་དེ། ཧཱུྃ༔ རྡོ་རྗེ་ཁཊྭཱཾ་དྲིལ་བུ་ལྕགས་ཀྱུ་དང༔ སྦྲུལ་ཞགས་འཁོར་ལོ་མཚོན་ཆ་རལ་གྲི་འབར༔ རྡོ་རྗེའི་ཕྲེང་བ་ཐོད་ཁྲག་པདྨ་སྙིང༔ དབྱུག་པ་རྒྱ་གྲམ་བེ་ཅོན་མེ་དཔུང་འབར༔ ཏྲི་ཤུ་ལ་དང་ཁྱུང་ཁྲ་འབར་བ་ཡིས༔ རྒྱུད་དྲུག་རྩད་ནས་འབྱིན་པའི་དབང་ཐོབ་ཤོག༔ རྩ་སྔགས་མཐར། མ་ཧཱ་མུ་དྲ་ཨ་བྷི་ཥིཉྩ་ཧཱུྃ༔ ཡེ་ཤེས་སེམས་དཔའ་དབྱིངས་ཡུམ་པདྨ་གཟི་ལྡན་སྙིང་གར་བསྟིམ་པས་རྣམ་ཀུན་མཆོག་ལྡན་ཤེས་རབ་སྟོང་ཉིད་ཀྱི་དོན་རྟོགས་པར་མོས་མཛོད། ཡུམ་པདྨ་གཟི་ལྡན་གྱི་སྐུ་སྙིང་གར་བཞག་སྟེ། ཧཱུྃ༔ ཐུགས་ཀར་སྦས་པ་གསང་བའི་ཡུམ༔ རྒྱལ་བས་བསྔགས་པའི་གཟི་ལྡན་པདྨ་ཅན༔ གསང་མཛོད་ཡུམ་གྱིས་དབང་བསྐུར་བས༔ ཤེས་རབ་ཕ་རོལ་ཕྱིན་པའི་དབང་ཐོབ་ཤོག༔ པདྨ་རཱ་ག་ཀྲོ་དྷ་མ་ཨ་བྷི་ཥིཉྩ་ཧཱུྃ༔ དཔལ་གྱི་འཁོར་ཚོགས་གོ་ལ་མ་དྲུག་དང་ཡུམ་བཞིས་དབང་བསྐུར་བས་ཚོགས་དྲུག་གནས་སུ་དག་སྟེ་བདེ་སྟོང་དགའ་བ་བཞི་ལ་ལོངས་སྤྱོད་པར་མོས་ཤིག །གོ་ལ་མ་དྲུག་དང་ཡུམ་བཞིའི་སྐུ་གཏད་ལ། ཧཱུྃ༔ སྲིད་གསུམ་སྒྲོལ་ཞིང་ལས་མཛད་དམ་སྲུང་མ༔ གདུལ་བྱ་དྲག་པོ་འདུལ་བའི་དབང་མོ་ཆེ༔ གོ་ལ་མ་དང་ཡུམ་བཞིར་སྟོན་པ་སྟེ༔ གསང་བའི་ལས་མཛད་མ་སྲིང་དབང་ཐོབ་ཤོག༔ མ་མ་རུ་ཙ་ཨ་བྷི་ཥིཉྩ་ཧཱུྃ༔ མཁའ་འགྲོ་སོ་གཉིས་ཀྱི་སྤྲུལ་པ་དམུས་ལོང་རྒྱབ་འབྲེལ་སོ་གཉིས་ཀྱིས་དབང་བསྐུར་བས་ཁམས་སོ་གཉིས་གནས་སུ་དག་པར་མོས་ཤིག །ལོང་བ་རྒྱབ་འབྲེལ་གཏད་ལ། ཧཱུྃ༔ ཉོན་མོངས་དུག་གསུམ་ནད་ཀྱིས་གདུང་བ་ཡི༔ བདུད་དང་སྲིན་པོ་མ་ལུས་འདུལ་བ་དང༔ ལས་ཀྱི་མཐའ་རྣམས་གྲུབ་པར་བྱ་བའི་ཕྱིར༔ མཁའ་འགྲོ་དམུས་ལོང་ཚོགས་ཀྱིས་དབང་བསྐུར་བས༔ རྒྱབ་འབྲེལ་སུམ་ཅུ་རྩ་གཉིས་ལས་འཁོལ་ཤོག༔ དཔལ་གྱི་ཕོ་ཉ་ལྕེ་སྤྱང་རྣམས་ཀྱིས་དབང་བསྐུར་བས་ཉོན་མོངས་བཅུ་དྲུག་དབྱིངས་སུ་དག་པར་མོས་ཤིག །ཁྱི་སྤྱང་རྣམས་གཏད་ལ། ཧཱུྃ༔ ཡུལ་བརྒྱད་གནས་སུ་དག་པའི་ཁྱི་སྤྱང་ཚུལ༔ འགུགས་འདྲེན་ལས་ཀྱིས་དཔལ་གྱི་ཐུགས་དམ་སྐོང༔ ཐོགས་མེད་སྒྲོལ་བའི་མཐུ་ལྡན་དབང་ཐོབ་ཤོག༔ ཀུ་ཛཿ ཀུ་ཛཿ ཀུ་ཛཿ ཀུ་ཛཿ ཀུ་ཛཿ ཀུ་ཛཿ ཀུ་ཛཿ ཀུ་ཛཿ ཨ་བྷི་ཥིཉྩ་ཧཱུྃཿ སྒོ་མ་བཞི་ཡི་དབང་བསྐུར་བས་མཐའ་བཞིའི་ལྟ་བ་དག་པའི་ཡེ་ཤེས་མངོན་དུ་གྱུར་པར་མོས་ཤིག །སྒོ་མ་བཞི་གཏད་དེ། ཧཱུྃ༔ ཡེ་ཤེས་དགུ་ཡི་དོན་ལྡན་ཞིང༔ ཐེག་པ་དགུ་ཡི་བྱེ་བྲག་ཚུལ༔ མགོ་དགུ་ལ་སོགས་རྐང་གཅིག་ལྡན༔ སྒོ་བ་བཞི་ཡི་དབང་ཐོབ་ཤོག༔ ཛཿཧཱུྃ་བྃ་ཧོ༔ ཨ་བྷི་ཥིཉྩ་ཧཱུྃ༔ རིགས་ཀྱི་སྙིང་པོ་ལྔ་གནས་ལྔར་བསྟིམ་པས་སྤྱན་དང་མངོན་ཤེས་སོགས་འཕགས་པའི་སྤང་རྟོགས་ལ་དབང་ཐོབ་པར་མོས་ཤིག །ཡིག་འབྲུ་ལྔ་གནས་ལྔར་བཞག་སྟེ། ཧཱུྃ༔ ལྷ་ཡི་སྙན་དང་ལྷ་ཡི་སྤྱན༔ དེ་བཞིན་སྔོན་གནས་རྗེས་དྲན་སོགས༔ མངོན་ཤེས་ལྔ་ཡི་དབང་ཐོབ་ཤོག༔ ཨོཾ་ཨཱཿཧཱུྃ་སྭཱ་ཧཱ༔ ཨ་བྷི་ཥིཉྩ་ཧཱུྃ༔ དེ་ནས་དྲག་པོ་སྒྲོལ་བའི་དབང༔ རཱུ་པར་དགྲ་བགེགས་དགུག་ཅིང་གཞུག༔ ཅེས་གསུངས་པས་དེ་དག་གིས་ལྷ་དང་སྐལ་བ་མཉམ་པའི་ཕྱིར་བུམ་དབང་མཐའ་རྟེན་དང་བཅས་པ་བསྐུར་བས་ཏིང་འཛིན་ལྷ་ཡི་གཟེར་གྱིས་གཟུགས་སྣང་ལྷར་དག །སྙིང་པོ་སྔགས་ཀྱི་གཟེར་གྱིས་ནུས་པའི་རྩལ་བྱིན། འཕྲོ་འདུ་ཕྲིན་ལས་ཀྱི་གཟེར་གྱིས་ལས་བཞི་ཐོགས་མེད་དུ་འགྲུབ་པའི་མཐུ་ཐོབ་ཕྱིར་སྒོ་གསུམ་ལྷ་སྔགས་ཡེ་ཤེས་ཀྱི་ཏིང་ངེ་འཛིན་གྱི་རྫོང་ལས་མི་འདའ་བས་སྣང་སྤྱོད་ཡེ་ཤེས་ཀྱི་རོལ་པར་ཤར་ནས་ཆགས་སྡང་རང་མཚན་གྱི་འཕྲང་ལས་བརྒལ་ཏེ་དགོངས་པ་མི་འགྱུར་བའི་གཟེར་ཆོས་ཉིད་ཀྱི་ལྟ་བས་འཁོར་འདས་ཀྱི་སྲོག་འཕྲོག་པ་རྟོགས་པས་བདག་བསྒྲལ་ནས། ཞི་བའི་ཕྲིན་ལས་ཀྱི་སྤྱོད་ཡུལ་དུ་མ་གྱུར་པའི་གདུལ་དཀའ་དྲག་པོས་ཚར་གཅོད་པའི་ཐུགས་རྗེས་གཞན་སྒྲོལ་བའི་རྗེས་སུ་གནང་བ་སྦྱིན་པ་ལ་ཐུགས་དམིགས་འདི་བཞིན་གནང་མཛོད། སྣོད་བཅུད་དཔལ་ཆེན་ཁྲག་འཐུང་རོལ་པའི་དུར་ཁྲོད་ཆེན་པོར་རྫོགས་པའི་དབུས་སུ་ཕྱིར་མི་ལྡོག་པའི་ཕྱིར་སློབ་མ་རྣམས་རང་རང་དབང་ཆེན་རྟ་མཆོག་རོལ་པར་དངོས་སུ་གསལ་བས། མི་རྡུགས་པའི་ཕྱིར་སྒྲོལ་ཕུར་སྲས་མཆོག་ཡཀྴ་ཀྲོ་དྷ་དང༌། མི་འབྱམས་པའི་ཕྱིར་ལིངྒ་དགྲ་བགེགས་དངོས་སུ་གསལ་བ་སྟེ་གསལ་བ་གསུམ་ལྡན་གྱི་ཏིང་ངེ་འཛིན་དང་མ་བྲལ་བས་ཐུགས་རྗེ་ཐབས་ཀྱིས་སྒྲོལ་བའི་ཏིང་འཛིན་ལ་འཇུག་པར་ཞུ། ཐུགས་དམ་བསྐུལ་བ་ནི། ཧཱུྃ༔ མི་གནས་ཡེ་ཤེས་ཆོས་སྐུའི་ཕོ་བྲང་ནས༔ ལོངས་སྤྱོད་རྫོགས་པ་ཞི་དང་ཁྲོ་བོའི་ལྷ༔ ཐུགས་དམ་བསྐུལ་ལོ་འགྲོ་བའི་དོན་ལ་དགོངས༔ རིག་པའི་རང་བཞིན་བདེ་གཤེགས་སྙིང་པོ་ཡང༔ མ་རིག་འཛིན་པའི་ཀུན་གཞི་ལུང་མ་བསྟན༔ སྒོ་ལྔའི་ཡུལ་དང་རྟེན་ཅིང་འབྲེལ་པ་ལས༔ རིགས་དྲུག་རྒྱུད་ལྔའི་གནས་སུ་འཁྱམས་པ་རྣམས༔ ལས་དང་ཉོན་མོངས་མཐུ་ཡིས་གཟིར་བའི་མཐུས༔ ཕྱི་རོལ་ཡུལ་ལ་སྨིན་པའི་སྡུག་བསྔལ་དང༔ ནད་མཚོན་མུ་གེ་དགྲ་བགེགས་འབྱུང་པོའི་གདོན༔ འཇིགས་པ་ཆེན་པོ་བརྒྱད་དང་བཅུ་དྲུག་ཀུན༔ མངོན་སྤྱོད་དྲག་པོའི་རོལ་པས་ཚར་བཅད་ནས༔ ལོག་རྟོག་དངོས་པོར་ཞེན་པའི་སེམས་ཅན་རྣམས༔ རྒྱུ་འབྲས་ཐེག་པ་གཞན་གྱིས་གདུལ་དཀའ་བས༔ རང་བྱུང་ཡེ་ཤེས་རྟོགས་པའི་ཕྲིན་ལས་མཛོད༔ གསེར་སྐྱེམས་གཟུ་དཔང་དང་བཅས་པ་ནི། རྃ་ཡྃ་ཁྃ། ཨོཾ་ཨཱཿཧཱུྃ། གསེར་སྐྱེམས་ཟག་པ་མེད་པ་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཧཱུྃ༔ ཁྱབ་བདག་གདོད་མའི་མགོན་པོ་མན་ཆད་ནས༔ མངོན་པར་བྱང་ཆུབ་དཔལ་མགོན་བླ་མའི་བར༔ དགོངས་བརྡ་སྙན་བརྒྱུད་རྡོ་རྗེ་སློབ་དཔོན་དང༔ དབང་ཆེན་རྟ་མཆོག་ལྷ་ཚོགས་གཟུ་དང་དཔང༔ འགྲོ་ཀུན་བདེ་གཤེགས་སྙིང་པོའི་རང་བཞིན་ལ༔ དགྲ་གཉེན་ཕྱོགས་ཆའི་སྡང་ཞེན་མ་དམིགས་ཀྱང༔ གཟུང་འཛིན་གདོན་གྱིས་བརླམས་པའི་ཉམས་པ་བདུན༔ བྱང་ཆུབ་སེམས་གཉིས་སྒོམ་པའི་དགྲ་རུ་ལངས༔ དམ་ལས་ཉམས་པས་སློབ་དཔོན་མཆེད་ལ་བརྙས༔ བཀའ་ལས་ཉམས་པས་ལས་འབྲས་ཁྱད་དུ་བསད༔ དོན་ལས་ཉམས་པས་བདེན་གཉིས་ཆད་པར་བལྟ༔ ལས་ཀྱིས་ཉམས་པས་ཉེས་མེད་རྣམས་ལ་འཛུགས༔ མཚན་མས་ཉམས་པས་ཆོས་ལ་ཕྱོགས་རིས་བཟུང༔ འདོད་པས་ཉམས་པས་ཁྲེལ་མེད་འཕྲོག་བཅོམ་བྱེད༔ ལོག་པས་ཉམས་པས་སེམས་ཅན་སྡུག་ལ་སྦྱོར༔ འདི་ལ་མངོན་སྤྱོད་ཕྲིན་ལས་མི་མཛད་ན༔ མཐར་གྱིས་འཆི་བ་སེམས་ཅན་ཀུན་ལ་ཡོད༔ དུས་ལ་བབ་ན་དཔག་བསམ་ཤིང་ཡང་འགྱེལ༔ བསམ་སྦྱོར་ངན་པའི་འབྲས་བུ་མཐར་ཕྱིན་ན༔ ཚར་གཅོད་རྗེས་འཛིན་མཐུ་སྟོབས་རྫུན་དུ་ཟད༔ ཆོས་ཉིད་བདེན་པ་བསླུ་བ་མེད་པ་དང༔ སྔགས་ཀྱིས་སྒྲོལ་བ་སངས་རྒྱས་རྣམས་ཀྱི་མཐུས༔ ཨ་བྷི་ཙརྻའི་དུས་ལ་ད་བབ་ན༔ བརྣག་པའི་ལས་ལ་བཏང་སྙོམས་མ་མཛད་ཅིག༔ དུས་གསུམ་སངས་རྒྱས་རྣམས་ཀྱིས་དབྱིངས་ནས་གཟིགས༔ བདེན་གཉིས་རྒྱུ་འབྲས་བསླུ་མེད་གཟུ་དང་དཔང༔ དཔལ་མགོན་ཆོས་སྐྱོང་རྣམས་ནི་མཐུ་རྩལ་བསྐྱེད༔ ཉེས་ཆེན་འདི་ལ་མངོན་སྤྱོད་ཕྲིན་ལས་མཛོད༔ ཅེས་བརྗོད་ཅིང་གསེར་སྐྱེམས་ཕྱོགས་བཅུར་འཐོར། དམིགས་བྱ་བསྐྱེད་པ་ནི། སྟོང་པའི་ངང་ལས་མདུན་དུ་བྲུབ་ཁུང་ཁ་དོག་ཅིང་གཏིང་ཟབ་པ་སྒོ་མེད་ཟུར་གསུམ་པ༔ ལས་བྱེད་གཤེད་མ་དང་གཅན་གཟན་མང་པོས་གསོད་གཅོད་ཀྱི་ལས་ལ་བརྩོན་པ༔ མུན་ནག་འཐིབས་པ༔ མེ་འབར་ཞིང་རླུང་འཚུབ་པ༔ འཇིགས་ཤིང་སྐྱི་གཡའ་བ༔ དེའི་ནང་དུ་ནྲྀ་ལས་ཡིད་ལ་བརྣག་པའི་དགྲ་བགེགས་གང་ཡིན་པ༔ རིད་ཅིང་ཉམ་ང་བའི་ཚུལ་ཅན༔ མགོན་སྐྱབས་དང་བྲལ་བར་བསམ་མོ༔ རྣམ་ཤེས་འགུགས་པ་ནི། གཡབ་དྲིལ་བཅས་ཧཱུྃ་མཛད་ཀྱི་རྒྱ་བཅིངས་ལ། ན་མོ། རིག་འཛིན་རྩ་བརྒྱུད་ཀྱི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང༌། སངས་རྒྱས་ཀྱི་བཀའ་བདེན་པ་དང༌། ཆོས་ཀྱི་བཀའ་བདེན་པ་དང༌། དགེ་འདུན་གྱི་བཀའ་བདེན་པ་དང༌། གསང་སྔགས་དང་རིག་སྔགས་དང་གཟུངས་སྔགས་དང་སྙིང་པོ་དང་ཕྱག་རྒྱ་དང་ཏིང་ངེ་འཛིན་གྱི་བདེན་པ་དང༌། ཆོས་ཉིད་གདོད་ནས་སྟོང་ཀྱང་ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང༌། ཁྱད་པར་དབང་ཆེན་རྟ་མཆོག་རོལ་པའི་དཀྱིལ་འཁོར་གྱི་ལྷ་ཚོགས་བཀའ་སྡོད་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱི་བཀའ་བདེན་པ་དང༌། བདེན་པ་ཆེན་པོའི་མཐུ་ལ་བརྟེན་ནས་བསྟན་དང་འགྲོ་བའི་སྤྱི་དགྲ། ཁྱད་པར་རིག་པ་འཛིན་པ་བདག་ཅག་ཡོན་མཆོད་འཁོར་དང་བཅས་པ་རྣམས་ལ་སྔ་དགྲ་ལག་གིས་བདར་བ། ཕྱི་དགྲ་ཡིད་ལ་སེམས་པ། ད་དགྲ་ཐད་དུ་འཛུགས་པའི་གཟུགས་ཅན་སྡང་བའི་དགྲ་དང་གཟུགས་མེད་གནོད་བྱེད་བགེགས་ཀྱི་ཚོགས་དང་བཅས་པ་ཐམས་ཅད་སྲིད་པ་གསུམ་གྱི་ཁོང་གར་གནས་གར་བྲོས་ཀྱང་སྐད་ཅིག་ཡུད་ཙམ་ལ་དམིགས་པའི་རྟེན་འདི་ལ་ཁུག་ཅིག །ཨོཾ་ཧུ་ལུ་ཧུ་ལུ་ཕཊ༔ ཨེ་ཨ་ར་ལི་ཧཱུྃ་ཧྲཱིཿཛཿ སརྦ་བིགྷྣཱན་ཤ་ཏྲཱུཾ་ཨ་ཀརྵ་ཡ་ཛཿ ནྲྀ་ཡཾ་ཛཿ ཏྲི་ཡཾ་ཛཿ ཛཿཧཱུྃ་བྃ་ཧོ༔ བཛྲ་ཨ་བེ་ཤ་ཡ་ཨ༔ པྲ་བེ་ཤ་ཡ་ཕཊ༔ ཞེས་ལན་གསུམ་གྱིས་དགུག་གཞུག་བཅིང་བསྟིམ་དབབ་དབྱེ་བསྒྲལ་བས་སྐལ་ལྡན་དུ་བྱ། ཁྱེད་རང་རྣམས་དབང་ཆེན་རྟ་མཆོག་རོལ་པར་གསལ་བའི་ལག་གཉིས་རིགས་ལྔ་ཡབ་ཡུམ་གྱི་སྦྱོར་མཚམས་སུ་ཧཱུྃ་ལས་སྐྱེས་པའི་སྒྲོལ་བྱེད་ཡཀྴ་ཀྲོ་དྷ་སྐུ་སྟོད་ཁྲོ་བོ་སྐུ་སྨད་རྣོ་དབལ་ཕུར་པའི་མཚོན་ལྡན་འདྲིལ་ཞིང་དགྲ་བགེགས་ཀྱི་སྙིང་གར་བཏབ་པས་ཕུར་རྩེའི་འོད་ལས་དཔའ་བོ་འབྲུ་ལྔ་རླུང་རྟའི་ཟེར་ལས་འཕྲོས་པས་བསྒྲལ་བྱའི་རིགས་དྲུག་གི་ས་བོན་བག་ཆགས་དང་བཅས་པ་བསྲེགས་ནས་རྣམ་ཤེས་ནྲྀ་དུད་ཁའི་རྣམ་པ་ནག་ཀེམ་གྱིས་བསད། སླར་ཡང་རྡོ་རྗེས་བརྡུངས་ནས་བཏབ་ཅིང་ཕུར་རྩེ་རང་ལ་བསྟན་པས་གཟས་པོའི་ཚེ་བསོད་ཀྱི་དྭངས་མ་ཁབ་ལེན་གྱིས་ལྕགས་བསྡུས་པ་བཞིན་བསྡུས་ཏེ་རང་ལ་ཐིམ་པས་གཟི་བྱིན་ལྷག་པར་འབར། དགྲ་བགེགས་ཀྱི་རྣམ་ཤེས་ཨ་དཀར་པོའི་རྣམ་པར་ཕུར་པས་རྩེན་གྱིས་བླངས་ནས་ཕུར་རྩེ་གྱེན་ལ་བསྟན་པས་སྐར་མདའ་འཕང་བ་བཞིན་འོག་མིན་གྱི་གནས་སུ་དཔལ་ཆེན་པོའི་སྦྱོར་མཚམས་སུ་ཐིམ་པར་བསམ་ལ་བདག་ཕུར་འབེན་གསུམ་དབྱེར་མེད་ཆོས་ཉིད་ཀྱི་དགོངས་པ་ལས་མི་འདའ་བས་སྒྲོལ་བའི་ལས་རིམ་ལ་འཇུག་པར་མཛོད། སྒྲོལ་ཕུར་གཏད་ལ། ཧཱུྃ༔ དབྱིངས་དང་ཡེ་ཤེས་དོན་གྱི་ཕོ་ཉ་དང༔ ཐབས་དང་ཤེས་རབ་རྟགས་ཀྱི་ཕོ་ཉ་མོ༔ རྡོ་རྗེ་དབང་གི་ཕུར་པ་འདི་བྱིན་པས༔ ཡེ་ཤེས་དབྱིངས་ལ་ཕུར་པ་འདེབས་པར་ཤོག༔ ཨོཾ་ཧུ་ལུ་ཧུ་ལུ་ཕཊ༔ ཨེ་ཨ་རལླི་ཧྲཱིཿཧཱུྃ་ཛཿ ནྲྀ་ཏྲི་ཤ་ཏྲཱུན་མཱ་ར་ཡ་ཕཊ༔ ཞེས་ཚེ་ཁྲུས་གནས་ལུང་གི་དགོངས་པ་དང་ལྡན་པས་ཕུར་པ་བཏབ་ཅིང་སྒྲོལ་གྲིས་བཏུབ། ལིང་རོ་སྨན་གྱིས་བྲན་ལ། མཱཾ་ས་རཀྟ་ཙིཏྟ་གོ་རོ་ཙ་ན་བ་སུ་ཏ་ཀེཾ་ནི་རི་ཏི་ཏ་ན་ཙཀྲ་པཱུ་ཛ་ཁཱ་ཧི་ཁཱ་ཧི༔ ཞེས་ཞལ་དུ་བསྟབ་ལ་གཏོར་མར་འབུལ། དེས་དྲག་པོ་སྒྲོལ་བའི་ཕྲིན་ལས་ཀྱི་དབང་ཐོབ་པས་དེང་ཕྱིན་ཆད་བར་ཆད་བདུད་སྡེའི་གཡུལ་ལས་རྣམ་པར་རྒྱལ་ཞིང་ཞིང་བཅུའི་དགྲ་བགེགས་སྒྲོལ་བ་ལ་ཐོགས་པ་མེད་པས་འཇིགས་པའི་བདུད་བཞི་བཅོམ། བར་ཆད་ཀྱི་འཕྲང་གསུམ་བསལ། གསང་བའི་དགྲ་གསུམ་བསད་ནས་ཕྱོགས་ལས་རྣམ་རྒྱལ་ཧེ་རུ་ཀའི་གོ་འཕང་མངོན་དུ་བྱེད་ནུས་པ་ཡིན་ནོ།  །དེས་རྡུལ་ཚོན་སྤྲུལ་པའི་དཀྱིལ་འཁོར་དུ་སོགས་བུམ་དབང་གི་དག་བརྗོད་དང༌། གསང་དབང༌། ཤེར་ཡེ། ཚིག་དབང་གིས་མཚོན་དམ་ཚིག་ཁས་བླངས། གཏང་རག་ཡོན་འབུལ། དགེ་བསྔོ། ལས་བྱང་གི་རྗེས་རིམ་བཅས་མཐར་ཆགས་སུ་བཏང་བས་གྲུབ་པའོ།  །མཁྱེྃན་བཟང་སྣང་བའི་ཁྱིམ་གྱི་དཔལ། །བརྩེྃ་ཆེན་འོདྃ་བརྒྱའི་འཛུམ་ཕྲེང་དཔྱིད། །ཀུན་ཏུ་གདུལ་བྱའི་ཁམས་ཁྱབ་པའི། །ཟེརྃ་ལས་ཟབ་གསང་དྲོད་བཅུད་འབེབས། །ཐུགས་སྒྲུབ་དཔལ་ཆེན་འདུས་པའི་སྒོས་བཀའ་ཁྲག་འཐུང་རིགས་བཞི་ལས། གསུང་རྡོ་རྗེ་དབང་ཆེན་རྟ་མགྲིན་ཁམས་གསུམ་རོལ་པའི་སྨིན་བྱེད་ཀྱི་ལེའུ་ཚན་བདུན་པ་སྟེ་པདྨ་དྲི་མེད་ཤིན་ཏུ་དགའ་བའི་རྡོ་རྗེས་སྦྱར་བའོ།  ༈  ཡང་དག་གྲུབ་པ་གཅིག་པུའི་ཆོ་འཕྲུལ་ལས། །སྲིད་ཞིའི་སྒྱུ་མའི་ཉམས་འགྱུར་འབུམ་འཆར་ཡང༌། །བདེ་ཆེན་མཁའ་འགྲོའི་དབང་ཕྱུག་ཧེ་རུ་ཀའི། །རྣམ་གྲོལ་གསང་མཆོག་དགྱེས་པར་རོལ་ལ་གུས། །ཐུགས་རྡོ་རྗེའི་རིགས་ཀྱི་ཧེ་རུ་ཀ་ཡང་དག་སངས་རྒྱས་མཉམ་སྦྱོར་གྱི་དབང་གི་ལས་རིམ་ལ། གཞུང་མཐུན་དཀྱིལ་འཁོར་སྟེང་ལྡིང་ཁྲི་བཀོད་པར་རྣམ་བུམ་སོགས་རིགས་དབང་ལྔ། བྷནྡྷ་དུམ་བུ་གཅིག་པར་ཐོད་སྐུ། ཕྱག་མཚན་རྡོར་དྲིལ། ཁཊྭཱཾ་དང་གསང་བའི་རྔེའུ་ཆུང༌། ཐོད་པའི་ནང་དུ་ཞུན་གྱི་མར་མེ་སྡོང་བུ་དགུ་ཅན། གསང་རྫས། རིག་ཙཀ ཤེལ་རྡོ། མེ་ལོང༌། མཆོད་པ། སྨན་རཀ་གཏོར་མ། ཚོགས་མཆོད། ལས་བུམ་སོགས་སྔ་མ་ལྟར་འདུ་བྱས་ལ། བདག་མདུན་སྒྲུབ་ཚུལ་སྔར་བཞིན་ལ། བསྙེན་དམིགས་གཙོ་བོ་དུང་ཁང་དུ་ཟླ་གདན་ལ་ཨོཾ་དཀར་པོའི་མཐར་རུ་ལུ་གསེར་གྱི་ཕྲེང་བ་ལྟ་བུ། མགྲིན་པར་པདྨ་འདབ་བརྒྱད་སྟེང་དུ་ཨཱཿདམར་པོའི་མཐར་རུ་ལུ་དམར་སེར་མགལ་མེ་ཀླད་བསྐོར་ལྟ་བུ། སྙིང་གར་ཉི་གདན་ལ་ཧཱུྃ་སྔོན་མཐར་རུ་ལུ་སྔོ་ནག་ལྕགས་ཞུན་ལྟ་བུ། ལྷ་མོ་བརྒྱད་ཀྱི་ཐུགས་ཀར་རིན་པོ་ཆེ་ཟུར་བརྒྱད་ལ་རུ་ལུའི་ཡི་གེ་མདུན་ནས་བརྩམས་ཏེ་འབྲུ་རེ། དབུས་སུ་སོ་སོའི་མིང་ཡིག་ཐིག་ལེས་མཚན་པ་རྣམས་ལ་སེམས་འཛིན་དང་འོད་ཟེར་སྤྲོ་བསྡུ་བྱ་བར་གསུངས། བུམ་བཟླས། བདག་འཇུག །དབང་གི་སྔོན་འགྲོ་ཁྲུས་དང་བགེགས་གཏོར་བཏང༌། སྲུང་འཁོར་བཅིངས་ལ། དེ་ལ་འདིར་དེ་བཞིན་གཤེགས་པ་ཀུན་གྱི་ཐུགས་གཉིས་སུ་མེད་པའི་ཡེ་ཤེས་ཀྱི་རྡོ་རྗེ་དཔལ་ཧེ་རུ་ཀའི་དཀྱིལ་འཁོར་གྱི་ཁྱབ་བདག་ཏུ་བཞེངས་པ་ནི་ཡང་དག་ཐུགས་ཀྱི་སྒྲུབ་པ་ཞེས་བྱ་སྟེ། དེ་ལའང་གསང་སྔགས་རྡོ་རྗེ་ཐེག་པ་སྔ་འགྱུར་གྱི་རིང་ལུགས་ལ་ཐེག་པ་རིམ་དགུར་གྲགས་པ་ལས། མཐར་ཐུག་བླ་མེད་ནང་རྒྱུད་སྡེ་གསུམ་ཞེས་རྒྱུད་ལུང་མན་ངག་གི་སྙིང་པོ་བསྟན་པའི་ཡ་གྱལ་རྒྱུད་མ་ཧཱ་ཡོ་ག་ལ་རྒྱུད་སྡེ་དང་སྒྲུབ་སྡེ་གཉིས་སུ་ཡོད་པ་ལས། འདིར་རྒྱུད་ལྟར་ན་ཏནྟྲ་སྡེ་བཅོ་བརྒྱད་ཀྱི་ནང་ཚན་སྒྲུབ་པ་ལག་ལེན་དུ་སྟོན་པ་རོལ་པའི་རྒྱུད་སྡེ་ལྔ་ལས་ཐུགས་ཀྱི་ཏནྟྲ་ཧེ་རུ་ཀ་རོལ་པའི་རྒྱུད་གལྤོ་ཆེ་ཆུང་སོགས་ལ་བརྟེན་ཅིང༌། སྒྲུབ་སྡེ་ལྟར་ན་ཡང་དག་ཐུགས་ཀྱི་སྒྲུབ་ལུགས་ཧེ་རུ་ཀའི་སྤྱི་རྒྱུད་སོགས་ལས་འབྱུང་བ་དང༌། གཞན་ཡང་འཇིག་རྟེན་ལས་འདས་པའི་མདོ་སོགས་ཨ་ནུ་ལུང་གི་དགོངས་རྒྱུད་ཀྱང་འདྲིལ་བས་རྒྱུད་ལུང་གཉིས་ཀའི་བཅུད་འདུས་པ་སྟེ། སྔགས་གསར་མ་ལ་ཡོངས་སུ་གྲགས་པའི་མ་རྒྱུད་རིགས་དྲུག་གི་ནང་ཚན་དཔལ་ཧེ་རུ་ཀའི་རིགས་འཁོར་ལོ་སྡོམ་པ་དང་དགྱེས་མཛད་རྡོ་རྗེ་དུས་ཀྱི་འཁོར་ལོ་སོགས་དང་ངོ་བོ་གཅིག་པ་སྟེ་མཁའ་འགྲོ་སྒྱུ་མ་བདེ་མཆོག་དང༌། སངས་རྒྱས་མཉམ་སྦྱོར་ལ་སོགས་པ་མཚན་གྱི་རྣམ་གྲངས་དུ་མས་བསྟན་པ་སྟེ། འདི་ཉིད་སློབ་དཔོན་རྡོ་རྗེ་ཧཱུྃ་མཛད་དང༌། ཨོ་རྒྱན་གྱི་སློབ་དཔོན་པདྨ་སོགས་ལ་བཀའ་བབ་སྟེ་ཟུང་འཇུག་ཕྱག་རྒྱ་ཆེན་པོ་མཆོག་གི་དངོས་གྲུབ་བརྙེས་པའི་གྲུབ་པ་ཆེན་པོ་ས་ཡི་རྡུལ་ཙམ་བྱོན་ཅིང༌། སྒྲུབ་པ་བཀའ་བརྒྱད་སོགས་ཞི་ཁྲོ་རབ་འབྱམས་ཀྱི་དཀྱིལ་འཁོར་ཐམས་ཅད་ཐུགས་རྡོ་རྗེའི་རིགས་སུ་འདུས་ཤིང་སྐྱེས་བུའི་ལུས་ལ་རྣམ་ཤེས་བཞིན་སངས་རྒྱས་ཐམས་ཅད་ཀྱང་གཉིས་མེད་རྡོ་རྗེ་སེམས་དཔའ་གཅིག་གི་བདག་ཉིད་ལས་གཞན་དུ་མ་གྱུར་པས། བཀའ་བརྒྱད་སྙིང་པོ་ཡང་དག་ཐུགས་སྒྲུབ་བསྡུས༔ ཞེས་སོགས་གསུངས་ཤིང༌། ཁྱད་པར་སངས་རྒྱས་གཉིས་པ་སློབ་དཔོན་ཆེན་པོས་འཕགས་བོད་གཉིས་སུ་སྨིན་གྲོལ་གྱི་བདུད་རྩིས་སྐལ་བཟང་བྱེ་སྙེད་ཞིག་རིག་འཛིན་གྱི་ས་ལ་བསྐྱལ་ཞིང༌། གུ་རུའི་ཐུགས་དམ་ལྷ་མཆོག་རྣམ་གསུམ་གྱི་ཡ་གྱལ་དུ་གྱུར་པ་དང༌། བོད་ཡུལ་ཕྱི་མའི་གདུལ་བྱ་ལ་དགོངས་པའི་གཏེར་ཁ་མི་འདྲ་བ་དུ་མ་སྦས་ནས་དུས་སྐབས་དང་འཚམས་པར་བྱོན་པ་ལས། འདི་ནི་ཇི་སྐད་དུ། དུས་རེ་ཞིག་བསྙེན་བསྒྲུབ་དམ་པོའི་ཚེ། །རང་གཉུག་མའི་བསྟི་གནས་ཡིན་སྙམ་པའི། །ཁང་པ་བཀོད་མཛེས་ཞིག་གི་ནང༌། །རྗེ་རིག་འཛིན་ཧཱུྃ་ཆེན་ཀཱ་ར་དེ། །ཞལ་ཁྱིམ་ཟླ་བ་ལྟ་བུ་ལ། །སྐུ་ཤ་ཡང་རྒྱགས་པ་ལྟར་སྣང་བའི། །གཟི་བྱིན་མཚུངས་པ་མེད་པ་ཞིག །སྒྱུ་མ་ལྟ་བུའི་སྣང་ཆར་མཇལ། །ཉམས་རྟོགས་ཀྱི་གླེང་མོ་མང་ཞུས་མཐར། །ད་ངེད་ཀྱི་སྒྲུབ་ཁང་འདི་ཉིད་དུ། །བློས་བསླངས་ཀྱི་དཀྱིལ་འཁོར་ཞིག་བཞེངས་ཞུས་པར། །ད་བློས་བསླངས་གསར་དུ་བཞེངས་པ་ལས། །ཆུང་ངུ་ཞིག་གསོ་དགོས་པ་ཞིག །གནས་གཞན་དུ་འདུག་པ་ངས་བླངས་ཏེ། །བུ་ཁྱོད་ལ་སྤྲད་ཀྱི་ཞིག་གསོ་གྱིས། ཞེས་གསུངས་ཏེ་མི་སྣང་གཞན་དུ་ཐལ། །ཞེས་གསུངས་པས་མཚོན་རིག་འཛིན་ཧཱུྃ་ཆེན་ཀཱ་ར་དང་སྐུ་ལྔ་ལྷུན་གྲུབ་རིག་འཛིན་པདྨ་སམ་བྷ་ཝ་ཆེན་པོ་དང་དོན་གྱི་སྤང་རྟོགས་ལ་རྣམ་དབྱེར་མེད་པ་ཐེག་མཆོག་རྫོགས་པ་ཆེན་པོའི་རྟོགས་པ་དོན་བརྒྱུད་ལ་དབང་ཐོབ་པས་རང་བྱུང་གདོད་མའི་གཞི་དབྱིངས་སུ་མཉམ་རྗེས་རིས་མེད་ཆེན་པོར་བཙན་ས་ཟིན་ཏེ་གཞི་སྣང་ཡེ་ཤེས་ཀྱི་རོལ་པས་འགྲོ་ཀུན་གདོད་མའི་དབྱིངས་སུ་འཁྲིད་པའི་རིག་རྩལ་ཐུགས་རྗེ་མཁའ་ཁྱབ་ཏུ་ཤར་ཞིང་སྨིན་གྲོལ་གྱི་གསང་མཛོད་ཐང་མར་བརྡལ་ནས་སྙིགས་དུས་ཐེག་མཆོག་བསྟན་པའི་ཤིང་རྟ་གཅིག་པུར་བྱོན་པའི་བཀའ་དྲིན་གྱིས་དགོངས་པ་གཞི་གྲོལ་གྱི་གྲོལ་ཚད་ཅན་ད་ལྟའི་བར་ཟམ་མ་ཆད་པས་མཆོག་གི་དངོས་གྲུབ་བརྙེས་པའི་གསེང་ལམ་གྱི་སྟོན་པ་གྲུབ་བརྒྱའི་དེད་དཔོན་ཀུན་མཁྱེན་བླ་མ་འཇིགས་བྲལ་གླིང་པ་ལ་ཀློང་གསལ་དགོངས་པའི་གསང་མཛོད་ལས་བྱོན་པའི་བླ་མ་རྩ་བ་གསུམ་གྱི་སྒྲུབ་སྐོར་ལས་ཡི་དམ། དེ་ལའང་སྤྱི་དང་བྱེ་བྲག་གི་སྒྲུབ་ཚུལ་གཉིས་ལས་བྱེ་བྲག །སྐུ་གསུང་ཐུགས་ཕྲིན་ལས་རྡོ་རྗེ་བཞི་ཡི་སྒྲུབ་ཐབས་ལས་ཐུགས་རྡོ་རྗེ་ཡང་དག་ཧེ་རུ་ཀ་སངས་རྒྱས་ཐམས་ཅད་མཉམ་པར་སྦྱོར་བའི་གསེང་ལམ་རྨད་དུ་བྱུང་བ་སྟེ། འདི་ལའང་ནང་གསེས་ཟླ་གམ་དྲུག་ཅུ་རྩ་བརྒྱད་པ། ལྔ་བཅུ་ང་བརྒྱད་པ། བཅོ་བརྒྱད། དགུ་མ། གཅིག་མ་སོགས་བཀའ་སྲོལ་མང་དུ་མཆིས་ཀྱང་རང་གཞུང་ལས། ཡིད་ཀྱི་ཡེ་ཤེས་ལ་སྦྱོར་བ༔ ཡང་དག་ཐུགས་ཀྱི་སྒོས་སྒྲུབ་ནི༔ ཁྲག་འཐུང་གལྤོའི་ཏནྟྲའོ༔ ཞེས་དང༌། འདི་ནི་ཐུགས་ཀྱི་སྒྲུབ་པ་སྟེ༔ དག་པ་ཐམས་ཅད་ཆོས་སྐུ་ལ༔ སྦྱོར་བས་མཆོག་གི་དངོས་གྲུབ་མྱུར༔ ཁྲག་འཐུང་གལྤོའི་བཅུད་དུམ་ཡིན༔ ཞེས་དང༌། དབང་གཞུང་ལས། ཆོས་དབྱིངས་ཡང་དག་ཐུགས་རྡོ་རྗེ༔ ཟླ་གམ་དགུ་པའི་སྒོས་དབང་ནི༔ ཞེས་སོགས་ཀྱིས་མཚོན་མདོར་ན་རྒྱུད་ཧེ་རུ་ཀ་གལྤོའི་དགོངས་པ་ཟླ་གམ་དགུ་མ་ཡང་དག་སངས་རྒྱས་མཉམ་སྦྱོར་གྱི་རིམ་པ་དབང་གི་ཆོ་ག་སོགས། སློབ་མ་ལྷར་བསྐྱེད་སྐབས། སྔར་གྱི་དབང་སྟེགས་ལ་འཁོད་པ་ཁྱེད་རང་རྣམས་དཔལ་ཆེན་བཛྲ་ཧེ་རུ་ཀ་མཐིང་ནག་ཞལ་གསུམ་གཡས་དཀར་འཛུམ་པ། གཡོན་དམར་གཤེ་བ། དབུས་མཐིང་རྔམས་པ་ལ་ཉི་ཟླ་འབར་བའི་སྤྱན་གསུམ་མཆེ་བ་གཙིགས་ཤིང་ལྗགས་འདྲིལ་བ། ཉི་མ་བྱེ་བའི་གཟི་བྱིན་འབར་བའི་གར་དགུས་བརྗིད་པ། རྩ་ཕྱག་གཉིས་ཀྱིས་རྡོ་རྗེ་དང་དུང་ཁྲག་བསྣམས་ནས་ཐུགས་ཀར་དཀྲུག་པ། བར་པས་ཁཊྭཱཾ་དང་རྒྱུ་ཞགས། ཐ་མས་གསང་བའི་རྔེའུ་ཆུང་དང་ཁྱུང་གི་ཕྲ་ཐབས་འགྱེད་པ། ཞབས་བཞིས་ལྷ་ཆེན་ཁྱོ་ཤུག་པད་ཟླ་ཉི་མ་ལ་འགྱིང་བ། ཁྲག་ཞག་ཐལ་བས་མཚན་མ་སོགས་དཔལ་དང་དུར་ཁྲོད་ཆས་ཀྱིས་བརྒྱན་པ། ཡུམ་ཀྲོ་དྷི་ཤྭ་རི་གཡས་ཡབ་ལ་འཁྱུད་ཅིང་གཡོན་དུང་ཁྲག་སྟོབ་པ། གཅེར་བུ་ལང་ཚོ་རྒྱས་པ་དང་གཉིས་མེད་དུ་སྦྱོར་བའི་གནས་གསུམ་དུ་ཕྱག་མཚན་གསུམ་སོགས་དང༌། འབེབས་སྔགས་ལ་རུ་ལུ་སྦྱར། དཀྱིལ་འཁོར་མཐོང་བ་བསྟན་པའི་སྐབས། ཡོངས་སུ་རྫོགས་པའི་ནང་དུ་ཟླ་གམ་དབང་གི་ཕོ་བྲང་སྒོ་གཅིག་པའི་ལྟེ་བར་གསེར་འཁོར་རྩིབས་བརྒྱད་པ་སོ་སོའི་ལྟེ་བར་ཟླ་གམ་སྒོ་གཅིག་པ་ནང་བསྟན་གྱིས་བསྐོར་བའི་དབུས་སུ་པདྨ་ཉི་མ་དྲེགས་པ་ཁྱོ་ཤུག་བསྣོལ་བའི་སྟེང་དུ་དཔལ་ཆེན་བཛྲ་ཧེ་རུ་ཀ་སྐུ་མདོག་མཐིང་ནག་འབར་བ་ཆེན་པོའི་འོད་ཟེར་ཅན་ཞལ་གསུམ་ཕྱག་དྲུག་ཞབས་བཞི། གཡས་དཀར་གཡོན་དམར་དབུས་མཐིང་གར་གྱི་ཉམས་དགུས་བརྗིད་པ། ཕྱག་དྲུག་གིས་རྡོ་རྗེ་ཐོད་ཁྲག་ཁཊྭཱཾ་རྒྱུ་ཞགས་གསང་བའི་རྔེའུ་ཆུང་ཁྱུང་ཕྲ་བསྣམས་པ། ཞབས་བཞི་གཡོན་བརྐྱང་པས་ལྷ་ཆེན་ཕོ་མོ་ཉི་ཟླའི་གདན་ལ་རོལ་ཞིང༌། དཔལ་དང་དུར་ཁྲོད་ཀྱི་ཆས་རྣམས་རྫོགས་པས་ཡུམ་ཀྲོ་དྷི་ཤྭ་རི་མ་དང་སྦྱོར་བ། ཕྱོགས་མཚམས་ཀྱི་ཟླ་གམ་བརྒྱད་ཀྱི་དབུས་སུ། ཀཽ་རི་སྔོན་མོ་ཞིང་དབྱུག་དང་ཐོད་པ། ཙཽ་རི་སེར་མོ་མདའ་གཞུ། པྲ་མོ་དམར་མོ་རྡོ་རྗེ་དང་དུང་ཁྲག །བཻ་ཏ་ལི་ནག་མོ་རྡོ་རྗེ་དང་བ་དན། པུཀྐ་སི་དམར་སེར་ཞིང་གི་རྒྱུ་མ་འདྲེན་པ། གྷསྨ་རི་སེར་ནག་རྡོ་རྗེས་ཐོད་ཁྲག་དཀྲུག་པ། སྨེ་ཤ་ནི་མཐིང་ནག་བམ་གྱི་སྙིང་ཕྱུང་ནས་ཟ་བ། ཙཎྜ་ལི་སེར་སྐྱ་རྩེ་གསུམ་དང་བམ་ཆེན་བསྣམས་པ། ཐམས་ཅད་ཀྱང་ཞལ་གཅིག་ཕྱག་གཉིས་སྤྱན་གསུམ་དབུ་སྐྲ་དམར་སེར་འབར་བ། དུར་ཁྲོད་རོལ་པའི་ཆས་ཅན་གཡོན་བརྐྱང་བའི་སྟབས་ཀྱིས་མེ་དཔུང་འབར་བའི་དབུས་ན་ཞིང་གི་གདན་ལ་རོལ་པ། ཕྱི་ལྟར་ན་གཟུགས་བརྙན་གྱི་དཀྱིལ་འཁོར་གྱི་མཚོན་བྱེད་བྱས་ནས་གཞལ་ཡས་ཁང་ཡེ་ཤེས་ཀྱི་ལྷ་དང་བཅས་པ། བརྟེན་པ་ཡང་ནང་ལྟར་ན་རང་ལུས་ཁོག་པ་དུར་ཁྲོད་ཀྱི་གཞལ་ཡས་ཁང༌། གསང་བ་ཙིཏྟ་རིན་ཆེན་ཟུར་བརྒྱད་པ། དེ་ཁོ་ན་ཉིད་ཚོགས་བརྒྱད་ཡེ་ཤེས་སུ་དག་པའི་དབྱིངས་ཡེ་གཉིས་མེད་དོན་དམ་པའི་བདེན་པ་མཐོང་བའི་རྟགས་ཐབས་ཤེས་ཧེ་རུ་ཀ་ཡབ་ཡུམ་དུ་ཤེས་པས་ཏིང་ངེ་འཛིན་གྱི་དཀྱིལ་འཁོར་བསྒོམས་པས་འབྲས་བུ་ཡེ་ཤེས་ཤིན་ཏུ་རྣམ་པར་དག་པའི་དཀྱིལ་འཁོར་ལ་སྦྱོར་བར་བྱེད་ནུས་པའི་ཚུལ། ཧོ༔ ཕུང་པོ་ཁམས་དང་སོགས། དབང་ཆོག་དཀྱུས་ལ་འཇུག་པས་རིགས་དབང་ལྔ་བསྐུར་ལ། མཐའ་རྟེན་རྣམ་རྒྱལ་བུམ་དབང་ལ། ཧཱུྃ༔ སངས་རྒྱས་རྣམས་ནི་ཐམས་ཅད་ཀྱི༔ ཆོས་དབྱིངས་ཡུམ་གྱི་བུམ་པ་ནས༔ འདི་ཉིད་ལ་ནི་དབང་བསྐུར་བས༔ བག་ཆགས་མ་ལུས་དག་གྱུར་ཅིག༔ ཨོཾ་བཛྲ་ཨ་བྷི་ཥིཉྩ་ཧཱུྃ༔ དེ་ལྟར་དབང་བསྐུར་བའི་ཆུ་རྒྱུན་སོགས། བུམ་དབང་མཐར། རྗེས་འབྲེལ་ནང་ནུས་པ་འཇུག་པ་གསང་བ་མི་ཟད་རྒྱན་གྱི་འཁོར་ལོའི་དབང་ལ། བྷནྡྷ་དཔལ་ཆེན་པོའི་སྐུར་གསལ་བ་སྤྱི་བོར་བཞག་པས་ཡེ་ཤེས་ཀྱི་སྐུ་གཉིས་པ་འཕྲོས་ཏེ་ཁྱེད་རང་གི་ལུས་ལ་ཐིམ་པས་ཡེ་ཤེས་སྒྱུ་མའི་སྐུ་སྣང་ལ་རང་བཞིན་མེད་པ་མངོན་དུ་གྱུར་པའི་མོས་པ་མཛོད། ཐོད་སྐུ་སྤྱི་བོར་བཞག་ལ། ཧཱུྃ༔ སངས་རྒྱས་ཀུན་གྱི་སྐུ་ཡི་དབང༔ ཕྱག་མཚན་རྡོ་རྗེ་ཀ་པཱ་ལ༔ སྐུ་ཡི་དངོས་གྲུབ་ཐོབ་བྱེད་པ༔ ཁྲག་འཐུང་ཡབ་ཡུམ་དབང་བསྐུར་རོ༔ ཨོཾ་ཀ་པཱ་ལ་སིདྡྷི་ཧེ་རུ་ཀ་ཀ་པཱ་ལ་ཨདྷིཥྛ་ཧཱུྃ༔ གསུང་གསང་བ་སྔགས་ཀྱི་དབང་བསྐུར་བ་ལ། གྲགས་སྟོང་སྐྱེ་འགག་གནས་བྲལ་གཞོམ་མེད་ནཱ་དའི་དེ་ཉིད་མཚོན་པའི་ཤེས་རབ་དབྱིངས་ཕྱུག་གི་ཕྱག་རྒྱ་དྲིལ་བུ་འཁྲོལ་ཞིང་གཏད་པས་བརྗོད་མེད་ཀྱི་དོན་ཤེས་པར་གྱིས་ཤིག །དྲིལ་བུ་དཀྲོལ་ཞིང་གཏད་ལ། ཧཱུྃ༔ སངས་རྒྱས་ཀུན་གྱི་གསུང་གི་དབང༔ ཤེས་རབ་དབྱངས་ཀྱི་རྗེས་འགྲོ་བ༔ མཁའ་འགྲོ་སྒྱུ་མའི་སྙིང་པོ་འདིས༔ གྲགས་སྟོང་གསུང་གི་དངོས་གྲུབ་ཐོབ༔ ཝཱཀྐ་ཨ་བྷི་ཥིཉྩཱཨཱཿ ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཐུགས་ཡེ་ཤེས་ཀྱི་དགོངས་པ་དོན་དམ་བྱང་ཆུབ་ཀྱི་སེམས་ངོ་སྤྲད་པ་ལ། སྐྱེ་མེད་དབྱིངས་ཀྱི་ཀློང་དུ་འགག་མེད་རིག་པའི་རང་བཞིན་སྟོང་གསལ་སྒྲིབ་གཡོགས་དང་བྲལ་བའི་ངོ་བོར་སངས་རྒྱས་ཐམས་ཅད་གཉིས་སུ་མེད་པའི་ཐིག་ལེར་མཉམ་པར་སྦྱོར་བའི་གནས་ལུགས་རྡོ་རྗེ་མི་ཕྱེད་པའི་ཆོས་བདུན་གྱི་ཕྱག་རྒྱས་ངོ་སྤྲད་པར་མོས་ཤིག །རྡོ་རྗེ་སྙིང་གར་བཞག་ལ། ཧཱུྃ༔ སངས་རྒྱས་ཀུན་གྱི་ཐུགས་ཀྱི་དབང༔ གཉིས་མེད་ཡེ་ཤེས་སྐྱེད་པ་པོ༔ རྡོ་རྗེ་ལྟ་བུའི་ཏིང་འཛིན་ནི༔ ཆོས་ཀྱི་རྒྱལ་པོར་དབང་བསྐུར་རོ༔ ཙིཏྟ་སིདྡྷི་བཛྲ་ཨ་བྷི་ཥིཉྩ་ཧཱུྃ༔ གཉིས་པ་བདེ་བ་ཆེན་པོ་ནི་ཟག་མེད་སྐུ་དང་ཡེ་ཤེས་ཀྱི་ཆོས་ཁམས་རྒྱ་མཚོ་དང་འབྲལ་མི་ཤེས་པ་མཚོན་པའི་ཕྱིར་རྡོར་དྲིལ་ལག་གཉིས་སུ་གཏད་དེ་བསྣོལ་ཞིང་བཟུང་བས་དཔལ་ཆེན་པོའི་ཡོན་ཏན་དང་ཕྲིན་ལས་ལ་དབང་བསྒྱུར་བར་མོས་ཤིག །རྡོར་དྲིལ་གཏད་ནས་འཁྱུད་རྒྱ་བྱར་གཞུག ཧཱུྃ༔ ཐབས་དང་ཤེས་རབ་གཉིས་མེད་པའི༔ དམ་ཚིག་རྡོ་རྗེ་དྲིལ་བུ་འདི༔ ཡོན་ཏན་ཕྲིན་ལས་བསྒྲུབ་པའི་ཕྱིར༔ ཕྲིན་ལས་རྫོགས་བྱེད་དབང་བསྐུར་རོ༔ ཨོཾ་བཛྲ་གཎྜེ་ཨ་བྷི་ཥིཉྩ་མཾ༔ བདེ་སྟོང་རྡོ་རྗེ་མཉམ་པའི་བརྟུལ་ཞུགས་ཀྱིས་དུར་ཁྲོད་ལ་གནས་པའི་མ་སྲིང་མཁའ་འགྲོ་དགྱེས་དགུར་རོལ་ཞིང་དབང་དུ་བསྡུས། གདུག་པ་ཅན་ཚར་གཅོད་པའི་བརྡ་རྟགས་སུ་དཔལ་གྱི་ཕྱག་མཚན་གཉིས་གཏད་པར་མོས་ཤིག ཁཊྭཱཾ་དང་གསང་བའི་རྔེའུ་ཆུང་གཏད་ལ། ཧཱུྃ༔ ཧེ་རུ་ཀ་དཔལ་ཁཊྭཱཾ་ག༔ མཁའ་འགྲོ་འབོད་པའི་རྔེའུ་ཆུང༔ དཔའ་བོ་ཆེན་པོས་བླང་བར་བགྱི༔ ཁྱོད་ཀྱིས་ཀྱང་ནི་རྟག་ཏུ་ཟུངས༔ སྣང་སྟོང་གཉིས་མེད་སེམས་ཀྱི་གཤིས་ལུགས་རིག་པ་ཡུལ་མེད་རང་གསལ་རང་རྩལ་རང་གྲོལ་གྱི་ཡེ་ཤེས་འབར་བ་ཀློང་དགུའི་ཚོགས་བརྒྱད་འཁྲུལ་སྣང་གི་མུན་པ་བསལ་ནས་འོད་གསལ་ལྟ་སྒོམ་སྤྱོད་པའི་འབྲས་བུ་བློ་བྲལ་དུ་དབུགས་དབྱུང་བར་མོས་ཤིག །བྷནྡྷའི་ཞུན་གྱི་མར་མེ་སྦར་ཏེ་གཏད་ལ། ཧཱུྃ༔ སྐྱེ་མེད་དབྱིངས་ལས་ཡེ་ཤེས་ཆེ༔ སེམས་ཅན་མ་རིག་མུན་པ་སེལ༔ སེམས་ཉིད་འོད་གསལ་ཆོས་ཀྱི་དབྱིངས༔ གསལ་བྱེད་མར་མེས་དབང་བསྐུར་རོ༔ ཨོཾ་བཛྲ་ཨཱ་ལོ་ཀེ་ཛྙཱ་ན་ཨ་བྷི་ཥིཉྩ་མཾ༔ དེ་ལྟར་དབང་དྲུག་གིས་བྱིན་རླབས་ལས་དབང་པོ་དྲུག་དང་སྐྱེ་མཆེད་བྱེད་པའི་རྣམ་པར་ཤེས་པ་ཚོགས་དྲུག་འགགས་ནས་ཡེ་ཤེས་དྲུག་མངོན་དུ་གསལ་བ་ཡིན་ནོ༔ ཞེས་རྟོགས་པ་བསྐྱེད། དེ་ལྟར་གཞི་ལམ་འབྲས་བུའི་དཀྱིལ་འཁོར་བསམ་ཡས་ཀྱི་རོལ་པ་གང་ལྟར་བཀོད་ཀྱང་དོན་དམ་ལ་འཇིགས་མེད་ཀུན་ཏུ་བཟང་པོ་ཆེ་མཆོག་ཧེ་རུ་ཀ་གཅིག་གི་ཡེ་ཤེས་ལས་གཞན་དུ་མ་གྱུར་པས་མཐར་ཕྱིན་འབྲས་བུའི་ཚུལ་ནི། གལྤོ་ལས༔ གཞལ་ཡས་ཁང་ཆེན་ཡེ་ཤེས་ཏེ༔ འཁོར་འདས་མཉམ་པ་གྲུ་བཞི་ལ༔ སྒོ་བཞི་དྲན་པ་ཉེར་བཞག་བཞི༔ རྣམ་ཐར་བརྒྱད་ལྡན་རྟ་བབས་སོ༔ རིན་ཆེན་སྒོ་སྟེ་ཐུགས་རྗེའི་ངང་༔ ཡང་དག་སྤོང་བཞི་ཏྭ་ར་ཎ༔ དྲན་པ་ཉེར་བཞག་སྒོ་ཁྱུད་དང༔ རྫུ་འཕྲུལ་རྐང་བཞི་སྒོ་ཡི་ཁྱམས༔ ཕྲེང་བ་བྱང་ཆུབ་ཡན་ལག་བདུན༔ འཕགས་ལམ་བརྒྱད་ཀྱི་ཀ་བ་མཛེས༔ ལམ་གྱི་ཡེ་ཤེས་རྔ་ཡབ་དང༔ ཉོན་མོངས་ཚོགས་འཇོམས་མུ་ཏིག་ཕྲེང༔ དྲིལ་བུ་བ་དན་རླུང་བསྐྱོད་པ༔ ཤེས་རབ་ཆོས་ཀྱི་སྒྲ་སྒྲོགས་དང༔ ཆེ་བའི་ཡོན་ཏན་འདུས་པའི་རྟགས༔ བདུད་བཞི་འཇོམས་པའི་རྒྱལ་མཚན་དང༔ ཐོད་ཕྲེང་སྐུ་གསུམ་ཐོབ་པའི་རྟགས༔ གཞལ་ཡས་ཁང་མཆོག་དམ་པའོ༔ བཅུ་ལྡན་ཡེ་ཤེས་དཔལ་ཡང་དག༔ གཉིས་ལྡན་ཟག་མེད་ཡུམ་གྱི་སྐུ༔ རྣམ་ཤེས་གནས་དག་མཁའ་འགྲོ་བརྒྱད༔ སྣོད་བཅུད་ལྷ་དང་གཞལ་ཡས་ཁང༔ ཕུང་པོ་ལྔ་ལ་སོགས་པའི་ཆོས༔ དེ་ནི་སྤང་བར་བྱ་བ་མིན༔ ཐེག་པ་གསུམ་ནི་སྤང་བ་མིན༔ ཀ་ཏི་ལི་བཞིན་ཡོངས་སུ་བཟུང༔ ཞེས་གསུངས་པ་ལྟར་ཤེས་པར་བྱ་བ་ནི་གནད་ཀྱི་བཅུད་ཕུར་དམ་པའོ།  །དེ་ལྟར་རྡུལ་ཚོན་སྤྲུལ་པའི་དཀྱིལ་འཁོར་སོགས་བུམ་དབང་གི་དག་བརྗོད་ནས་བཟུང་དབང་གོང་མ་གསུམ་ནས་དམ་ཚིག་བསྒྲགས་བཟུང་ཡོན་འབུལ་དགེ་བསྔོ་རྣམས་དང༌། ལས་བྱང་གི་རྗེས་རིམ་བཅས་མཐར་དབྱུང་བའོ།  །མཁྱེྃན་གཉིས་ཡེ་ཤེས་སྙིང་པོའི་སྲོག །བརྩེྃ་བའི་མཛེས་སྤྲིན་བརྡལ་བ་ལས། །བདེ་ཆེན་འོདྃ་ཟེརྃ་འབུམ་འཕྲོ་བའི། །དཔལ་འདི་བདག་གི་སྐལ་པར་ཐོབ། །ཐུགས་སྒྲུབ་དཔལ་ཆེན་འདུས་པའི་སྒོས་བཀའ་ཁྲག་འཐུང་རིགས་བཞི་ལས། ཐུགས་རྡོ་རྗེ་ཡང་དག་ཧེ་རུ་ཀ་སངས་རྒྱས་མཉམ་སྦྱོར་ཟླ་གམ་དགུ་པའི་དབང་བསྐུར་བའི་ལེའུ་ཚན་བརྒྱད་པ་སྟེ་རྡོ་རྗེ་ཐུགས་མཆོག་རྩལ་གྱིས་སྦྱར་བའོ།  ༈  རྡོ་རྗེ་ཁྲོས་པའི་དབྱིངས་རིག་མཚོན་ཆེན་པོས། །གཟུང་འཛིན་ལྷ་མིན་ཕྱེ་མར་འཐག་པའི་དབལ། །སྙིང་རྗེ་རྔམས་ལ་སངས་རྒྱས་ཐམས་ཅད་ཀྱི། །ཕྲིན་ལས་དབང་བསྐུར་རྫོགས་པའི་དཀྱིལ་འཁོར་རྒྱལ། །ཕྲིན་ལས་རིགས་ཀྱི་ཁྲག་འཐུང་གི་རྗེ་བཙན་རྡོ་རྗེ་ཕུར་པ་བདུད་དཔུང་ཟིལ་གནོན་གྱི་དབང་གི་ཆོ་གས་སྨིན་པར་བྱེད་ན་གང་དུ་བྱ་བའི་གནས་སུ་གཞུང་མཐུན་བཅོས་མའི་དཀྱིལ་འཁོར་གཉིས་གང་རུང་དང༌། ཐུན་མོང་རིགས་དབང་ལྔ། རྗེས་གནང་ཆས། ཐོད་པའི་བདུད་རྩི། རིག་ཙཀ ཤེལ་རྡོ། མེ་ལོང༌། གཙོ་བོའི་སྐུ། དར་དམར་ལ་བྲིས་པའི་སྔགས་བྱང༌། ཕུར་པ། ཡེ་ཤེས་སེམས་དཔའ་རྡོར་སེམས་ཙཀླི། དུར་ཁྲོད་དཔལ་ཆས། རྡོར་དྲིལ། སྒྲོལ་དབང་གི་ཆས་ལྕགས་ཧོམ་དུ་ལིངྒ། སྒྲོལ་ཕུར། རལ་གྲི། ཐུན་རྫས་བཅས་འདུ་བྱ། དངོས་གཞི་བདག་མདུན་གྱི་སྒྲུབ་ཚུལ་སྔ་མ་ལྟར་ལས། བཟླས་པ་ལ། ཧཱུྃ༔ ཐུགས་ཀ་དཔལ་གྱི་བེའུའི་དཀྱིལ་འཁོར་ནས༔ སྒོ་གཅིག་རིན་ཆེན་གཞལ་ཡས་ཁང༔ བདེ་སྟོང་དབྱེར་མེད་ངང་ཉིད་ལས༔ ཆོས་ཀྱི་སྐུ་ལས་ལོངས་སྐུར་ཤར༔ པདྨ་ཟླ་བའི་གདན་ལ་བཞུགས༔ སྐྱོན་གྱི་མ་གོས་གཏི་མུག་སེལ༔ ཡབ་ཡུམ་གཉིས་མེད་ཟག་མེད་སྐུ༔ སྐུ་མདོག་དཀར་གསལ་རྣམ་དག་དབྱིངས༔ རྡོ་རྗེ་དྲིལ་བུ་ཕྱག་ན་བསྣམས༔ ཤེས་རབ་བྱང་ཆུབ་སེམས་དང་ལྡན༔ རྟོག་མེད་མི་འགྱུར་སྐྱིལ་ཀྲུང་བཞུགས༔ མཁའ་དབྱིངས་བདེ་ཆེན་སྐུ་ལ་བསྟོད༔ བདེ་བ་ཆེན་པོའི་འོད་ཟེར་གྱིས༔ རྒྱལ་བ་མཆོད་ཅིང་ཐུགས་དམ་བསྐུལ༔ དངོས་གྲུབ་གྲུབ་པས་བདག་བྱིན་བརླབས༔ ཡང་འཕྲོས་བརྟན་གཡོ་ཐ་མལ་པའི༔ སྣང་ཞེན་དག་པས་སྣོད་དང་བཅུད༔ ལྷ་དང་གཞལ་ཡས་རོལ་པར་ཤར༔ ཞེས་སེམས་དཔའ་སུམ་བརྩེགས་ལ་སེམས་འཛིན་དང་སྤྲོ་བསྡུའི་དམིགས་པའང་བྱ། དོ་ལིའི་ཁྱད་པར་སྔགས་ཕྲེང་དབུས་རྭ་ནས་ཐོན་དམ་ཚིག་སེམས་དཔའི་ཤངས་བུག་གཡས་པ་བརྒྱུད། མདུན་བསྐྱེད་ཀྱི་ཤངས་བུག་གཡོན་པ་ནས་ཐུགས་ཀར་ཐིམ། སླར་བྱུང་བ་ཤངས་གཡས་ནས་རང་གི་སྣ་བུག་གཡོན་ནས་ཞུགས། སྙིང་དབུས་སུ་ཐིམ་པར་བསམ་གསུངས། བུམ་སྒྲུབ། བདག་འཇུག་སོགས་ཚང་བར་གྲུབ་རྗེས། སློབ་མ་རྣམས་ལ་ཁྲུས་བྱ། གྲལ་དུ་འཁོད་ནས་བགེགས་གཏོར་བཏང༌། སྲུང་འཁོར་བསྒོམ་ལ། ཆོས་བཤད་ནི། སྤྱིར་བདག་ཅག་གི་སྟོན་པ་ཐབས་ལ་མཁས་ཤིང་ཐུགས་རྗེ་ཆེན་པོ་དང་ལྡན་པ་ཉིད་ཀྱིས་གདུལ་བྱ་སེམས་ཅན་གྱི་ཁམས་དང་བསམ་པའི་རྗེས་སུ་འགྲོ་བའི་ཆོས་སྒོ་དཔག་ཏུ་མེད་པ་ཞིག་དབྱེ་གནང་བར་མཛད་པ་ཐམས་ཅད་སྤང་གཉེན་གྱི་སྒོ་ནས་བསྡུ་ན་ཉོན་མོངས་དུག་གསུམ་ཆ་མཉམ་དང་བཅས་པའི་གཉེན་པོར་སྡེ་སྣོད་གསུམ་མམ་བཞི། དེ་ལའང་གཞུང་དང་མན་ངག་ཙམ་གྱིས་བསྡུ་ན་གཞུང་མཚན་ཉིད་ཕར་ཕྱིན་ཐེག་པ། མན་ངག་གསང་ཆེན་རྡོ་རྗེ་ཐེག་པ་གཉིས་སུ་འདུ་བ་ལས་སྐབས་སུ་བབ་པ་སྔ་མ་ལས་ཁྱད་པར་བཞིས་འཕགས་པ་རྡོ་རྗེ་ཐེག་པ། དེ་ལའང་ཤེས་བྱེད་རྒྱུད་སྡེའི་རྣམ་གྲངས་བསམ་པའི་སྤྱོད་ཡུལ་ལས་འདས་ཀྱང་ལྟ་སྤྱོད་ཙམ་གྱིས་བསྡུ་ན། སྤྱོད་པ་གཙོ་བོར་སྟོན་པ་བྱ་རྒྱུད། ལྟ་བ་གཙོ་བོར་སྟོན་པ་རྣལ་འབྱོར་རྒྱུད་གཉིས་སུ་འདུ་བ་ལས་འདིར་ཕྱི་མ། དེ་ལའང་རྣལ་འབྱོར་གྱི་རྒྱུད་ཙམ་དང་བླ་མེད་གཉིས་ལས། འདི་ནི་རྣལ་འབྱོར་བླ་ན་མེད་པའི་རྒྱུད་ཡིན་ལ། ནང་གསེས་སུ་བསྐྱེད་རྫོགས་རྫོགས་ཆེན་གསུམ་དུ་སྟོན་པའི་གཞུང་རྒྱུད་ལུང་མན་ངག་གི་ཤིང་རྟ་ཆེན་པོ་གསུམ་ལས་རྒྱུད་མ་ཧཱ་ཡོ་ག །དེ་ལའང་རྒྱུད་སྡེ་དང་སྒྲུབ་སྡེ་གཉིས་ལས་འདིར་སྒྲུབ་སྡེ། དེ་ལའང་ཡེ་ཤེས་ལྷའི་སྒྲུབ་པ་ལྔ། འཇིག་རྟེན་པའི་གསུམ་སྟེ་བརྒྱད་ལས། འདིར་ནི་གདུག་པ་ཅན་འདུལ་བའི་ཐབས་གཙོ་བོར་སྟོན་ཅིང་ཡེ་ཤེས་ལྷ་རིགས་ལྔ་ལས་ཕྲིན་ལས་ཀྱི་རིགས་རྡོ་རྗེ་ཕུར་པའི་སྒྲུབ་སྡེ་སྟེ། བསྒྲུབ་པར་བྱ་བའི་ལྷ་ནི་སྤྱིར་རིགས་ལྔ་ཁྲག་འཐུང་འདུས་པའི་སྤྱི་དཔལ་ཡིན་ཀྱང༌། ཁྱད་པར་དུ་ཀརྨ་ཧེ་རུ་ཀ་ནི། ཞི་བའི་དུས་ན་རིགས་འདུས་རྡོ་རྗེ་སེམས་དཔའ། ཕྱི་ཀྲི་ཡོག་གི་དུས་སུ་རྡོ་རྗེ་རྣམ་པར་འཇོམས་པ། བྱང་ཆུབ་སེམས་དཔའི་ཚུལ་དུ་གསང་བའི་བདག་པོ། ཁྲོ་བོའི་སྐུར་བསྟན་པ་རྡོ་རྗེ་གཙུག་ཏོར། ཡང་དག་ཧེ་རུ་ཀ་བདུད་རྩི་འཁྱིལ་བ་ལ་སོགས་པ་དུ་མའི་ཚུལ་སྟོན་ཅིང༌། སྒྲུབ་བྱེད་རྒྱུད་སྡེས་དབྱེ་ན་ལྷ་དེ་དག་རྒྱུད་སྡེ་ཆེན་པོ་བཞི་ཀ་ལ་འཇུག་པ་དང༌། བྱེ་བྲག་ཕུར་པ་ཁོ་ནའི་རྒྱུད་ལའང་དཔག་བསམ་ཤིང་ལ་དཔེ་བྱས་ནས་རྩ་བ་ལྟ་བུ་སྐུའི་རྒྱུད་སྡེ་བཞི། སྡོང་པོ་ལྟ་བུ་བརྒྱད། ཡལ་ག་ལྟ་བུའི་རྒྱུད་བཅུ། ལོ་མ་ལྟ་བུ་གསུམ། མཛེས་བྱེད་མེ་ཏོག་ལྟ་བུ་བཞི། སྨིན་པ་འབྲས་བུ་ལྟ་བུ་བཞི། མ་ཚང་བ་ཁ་སྐོང་བའི་རྒྱུད་གསུམ་སྟེ་རྒྱུད་སྡེ་སུམ་ཅུ་རྩ་དྲུག་དང༌། མན་ངག་གི་དོན་རྒྱས་པར་སྟོན་པ་རྩ་རྒྱུད་རྡོ་རྗེ་ཁྲོས་པ་དང་རྒྱུད་བཅུ་བདུན་སོགས་གྲུབ་པ་དང་མཁའ་འགྲོས་དབྱེ་བསྡུ་མཐའ་ཡས་པ་ཐམས་ཅད་མཁའ་འགྲོ་ལས་ཀྱི་དབང་མོས་རིག་འཛིན་པྲ་བྷ་ཧསྟི་ལ་གཏད། ཕྱིས་སངས་རྒྱས་ཀུན་གྱི་ཕྲིན་ལས་ཀྱི་སྤྱི་གཟུགས་སློབ་དཔོན་ཆེན་པོ་པདྨས་བལ་ཡུལ་ཡང་ལེ་ཤོད་ཀྱི་བྲག་ཕུག་ཏུ་ཡང་དག་ཧེ་རུ་ཀ་ཕྱག་རྒྱ་ཆེན་པོའི་མཆོག་གི་དངོས་གྲུབ་བསྒྲུབ་པའི་ཚེ་མི་སྲུན་ནག་པོའི་ཕྱོགས་ཀྱིས་བར་ཆད་བརྩམས་པ་ན་སློབ་དཔོན་ཆེན་པོ་པྲ་བྷ་ཧསྟིས་བི་ཏོ་ཏ་མ་འབུམ་སྡེ་ལས་ཕུར་པའི་རྒྱུད་མི་ཁུར་གཉིས་སྐྱེས་སུ་ཕུལ་བའི་གླེགས་བམ་ཕེབས་པ་ཙམ་གྱིས་བར་ཆད་ཞི་ནས་དངོས་གྲུབ་འབད་མེད་དུ་བརྙེས་པའི་ལྷ་མཆོག་འདི་ཉིད་ལ་བཀའ་མ་རྒྱལ་པོ་ལུགས་དང༌། ཇོ་མོ་ལུགས། ལྕམ་ལུགས། འཁོན་ལུགས། སོ་ཟུར་གནུབས་གསུམ། རམ་འགོས་ཁྱུང་གསུམ། དམ་པ་རྒྱ་གར་དང༌། པཎ་ཆེན་ཤཱཀྱ་ཤྲཱིའི་ཕུར་པ་དཔའ་བོ་གཅིག་པ་སོགས་དང༌། གཏེར་མ་སྤུ་གྲི་རྣམ་གསུམ་གཙོ་བོར་གྱུར་པའི་བཀའ་སྲོལ་རྒྱས་བསྡུས་མཐའ་ཀླས་པ་གསར་རྙིང་མཁས་གྲུབ་ཀུན་གྱི་ཐུགས་དམ་གསང་བའི་ལྷ་མཆོག་ཏུ་གྱུར་པས་ད་ལྟའི་བར་མཚན་རྟགས་མངོན་གྱུར་གྱི་ངོ་མཚར་ཅན་དུ་མ་བཞུགས་པ་ལས། ད་ལམ་སྐབས་སུ་བབས་པ་འདི་ནི་རྭ་སྟོན་སྟོབས་ལྡན་རྡོ་རྗེས་འོན་ཕུ་སྟག་ཚང་ནས་སྤྱན་དྲངས་པའི་ཕུར་པའི་ལུང་བསྟན་ལས། བི་མའི་སྤྲུལ་པ་པདྨའི་མིང་འཛིན་ལ༔ ཡེ་ཤེས་རྩལ་བརྡོལ་དག་སྣང་གནས་སྒོ་འབྱེད༔ ཅེས་གསུངས་པ་ལྟར་ཀུན་མཁྱེན་རིག་འཛིན་ཆེན་པོ་དཔལ་པདྨ་དབང་ཆེན་ཡེ་ཤེས་རོལ་པ་རྩལ་ལ་སློབ་དཔོན་ཆེན་པོ་དང་བི་མ་བཻ་རོ་གསུམ་གཙོ་འཁོར་དུ་བཞུགས་པས་ཞལ་གཟིགས་ཏེ་རིག་རྩལ་གྱི་དབང་བསྐུར་བའི་རྗེས་ཐོག་ཏུ། དེ་སད་པའི་ཤེས་པ་སྐད་ཅིག་མར། །གསུང་མཆོག་བདེ་བ་ཆེན་པོ་ནི། །ཡུམ་ཡེ་ཤེས་ཌཱ་ཀི་མཚོ་རྒྱལ་མ། །བུ་མོ་མཛེས་པའི་ཆ་བྱད་ཅན། །དེས་མཚན་ལྡན་གྱི་བྷནྡྷ་སྲུབ་མེད་ཅིག །བདག་ཉིད་ཀྱི་ལག་ཏུ་སྤྲད་པ་དང༌། །འདི་ཆོས་རྒྱལ་ཁྲི་སྲོང་ལྡེའུ་བཙན་གྱི། །དབུ་ཐོད་ངོ་མ་ཡིན་ནོ་གསུངས། །ཡང་ཅུང་ཞིག་དགོངས་ནས་ཐོད་པ་དེ། །རེ་ཞིག་ཕར་ལ་བླངས་པའི་མོད། །མིག་འཕྲུལ་ལྟ་བུའི་སྣང་ཆ་ལ། །སྔ་མ་དང་དབྱེ་བར་མི་བཟོད་པའི། །ཐོད་པ་ཞིག་དེ་ཡི་ཟླ་ལ་སྦྱར། །གཉིས་ཀ་ལྷན་ཅིག་སྩོལ་བ་དང༌། །ད་འདི་གཉིས་དབྱེ་བ་ཨི་ཕྱེད་གསུངས། །དེ་དཔྱད་དུ་མ་བཟོད་ནེམ་ནུར་ངང༌། །གསལ་སྣང་དེ་ནམ་མཁའི་འཇའ་ལྟར་ཡལ། །རྗེ་ཡབ་ཡུམ་དེ་སྙིང་ལ་དྲན་དྲགས་ནས། །སྐྱོ་ཤས་ཀྱི་གདུང་བ་བཟོད་ཐབས་བྲལ། །རིག་པ་འདུན་པའི་ཏནྟྲ་ལས། བརྡ་དང་བརྡ་མཚོན་གོ་བ་ནི། །དབང་གི་ནང་ནས་དབང་བཀའོ། །ཞེས་པའི་དོན་ལ་ངེས་ཤེས་རྙེད། །ཅེས་དང༌། དེ་ཚེ་རླངས་ཆེན་དཔལ་སེང་གི །ཡང་སྲིད་པདྨ་ཚེ་དབང་རྩལ། །མཇལ་ཏེ་རང་གཏེར་སྟག་ཚང་གི །རྡོ་རྗེ་ཕུར་པའི་དབང་བསྐུར་རྨིས། །ཅེས་མོན་སྤ་གྲོ་སྟག་ཚང་གི་གུ་རུ་ཡབ་ཡུམ་གྱི་སྒྲུབ་ཕུག་ཏུ་རླངས་ཆེན་དཔལ་གྱི་སེང་གེ་དངོས་ལས་རྡོ་རྗེ་ཕུར་པ་རྒྱལ་པོ་ལུགས་ཀྱི་དབང་བསྐུར་གསན་ནས་ཕུར་པའི་རྒྱུད་ལས་བཀའ་བསྡུ་གནང་ཞིང་དངོས་གྲུབ་བརྙེས་པས་གངས་ཅན་བསྟན་འགྲོའི་གཤེད་མ་དབྱིངས་སུ་བསྒྲལ་བ་སོགས་ཕྲིན་ལས་ཐོགས་མེད་ཀྱི་སྟོབས་རྩལ་མངོན་དུ་མཛད་པ་ཀུན་མཁྱེན་འཇིགས་མེད་གླིང་པ་ལ་བཀའ་བབ་ཉེ་བརྒྱུད་དུ་གྱུར་པ་ཀློང་ཆེན་སྙིང་གི་ཐིག་ལེའི་ཆོས་སྡེ་དྲག་པོ་དཔལ་ཆེན་འདུས་པའི་ཕྲིན་ལས་ཀྱི་རིགས་ཀྱི་སྒོས་བཀའ་རྡོ་རྗེ་ཕུར་པ་བདུད་དཔུང་ཟིལ་གནོན་གྱི་དབང་བསྐུར་བ་སྟེ། སྤྱིར་སློབ་དཔོན་སངས་རྒྱས་གཉིས་པས་འདི་ཉིད་ཐུགས་དམ་གྱི་ལྷར་མཛད་པའི་རྟེན་འབྱུང་གིས་བོད་ཡུལ་གསར་རྙིང་མཁས་གྲུབ་ཕལ་ཆེར་ལྷག་པའི་ལྷ་འདི་གྲུབ་པའི་མཚན་མ་མངོན་དུ་གྱུར་པ་དང༌། རྣལ་འབྱོར་པས་བྱང་ཆུབ་སྒྲུབ་པའི་བར་ཆད་སེལ་བ་ལ་ཆེས་ཟབ་པས་ལྷ་གཞན་བསྒྲུབས་ཀྱང་རྡོ་རྗེ་གཞོན་ནུ་སྲུང་མའི་ཚུལ་དུ་བསྟེན་དགོས་པར་གསུངས་ཤིང༌། ཕུར་པ་མཁན་པོ་དཔལ་གྱི་ཡོན་ཏན་བརྒྱད་དང་ལྡན་པར་གྲགས་པ་སོགས་ཕྲིན་ལས་ཀྱི་རྣོ་མྱུར་བྱིན་རླབས་དང་ལྡན་པ་ཐུན་མོང་མ་ཡིན་པར་ངེས་པས་དབང་བསྐུར་ཐོབ་པ་ཙམ་ལའང་དགོས་པ་དུ་མ་དང་ལྡན་པ་ལགས་ཏེ། དེ་ལའང་ཐོག་མར་ཕྱི་ནང་གི་འཇུག་པའི་ཆོས་རྣམས་ཞུ་བའི་དོན་དུ་སོགས་ནས་བྱིན་འབེབས་ཀྱི་སློབ་མ་ལྷར་བསྐྱེད་པ་དཔལ་ཆེན་དབང་སྐབས་བཞིན་ལ། སྔར་གྱི་དབང་སྟེགས་ལ་འཁོད་པ་དཔལ་ཆེན་རྡོ་རྗེ་གཞོན་ནུའི་སྐུར་གྱུར་པ་ནི། སྐུ་མདོག་མཐིང་ནག་གཡས་དཀར་གཡོན་དམར་བའི་དབུ་གསུམ་ཕྱག་དྲུག་ཞབས་བཞི་པ། ཕྱག་དང་པོ་གཉིས་ཀྱིས་རྡོ་རྗེ་རྩེ་དགུ་དང་མེ་དཔུང༌། བར་པ་གཉིས་ཀྱིས་རྩེ་ལྔ་དང་ཁཊྭཱཾ་ག །ཐ་མ་གཉིས་ཀྱིས་རི་རབ་ཀྱི་ཕུར་བུ་འདྲིལ་བ། ཞབས་བཞི་གཡས་བསྐུམ་གཡོན་བརྐྱང་བའི་སྟབས་ཅན། ཡུམ་འཁོར་ལོ་རྒྱས་འདེབས་མ་དྲིལ་བུ་དང་ཐོད་ཁྲག་འཛིན་པ་དང་མཉམ་པར་སྦྱོར་བ། དུར་ཁྲོད་རོལ་པའི་ཆས་བརྒྱད་དང་དཔལ་གྱི་ཆས་བཅུ་ཡོངས་སུ་རྫོགས་པའི་བདག་ཉིད་ཅན་པད་ཟླ་ཉི་མ་ལྷ་ཆེན་ཕོ་མོ་བསྣོལ་བའི་གདན་ལ་བཞུགས་པའི་གནས་གསུམ་དུ་ཕྱག་མཚན་གསུམ་སོགས་དང་འབེབས་སྔགས་ལ་ཀཱི་ལ་ཡ་སྦྱར། དཀྱིལ་འཁོར་མཐོང་བ་བསྟན་པའི་སྐབས། ཡོངས་སུ་རྫོགས་པའི་ལྟེ་བར་གནམ་ལྕགས་ཀྱི་འཁོར་ལོ་རྩིབས་བཅུ་པ་མུ་ཁྱུད་དང་བཅས་པའི་ལྟེ་བའི་དབུས་སུ་གྲུ་གསུམ་མཐིང་ནག་འབར་བ་རྡོ་རྗེའི་བྲག་ཆེན་པདྨ་ཉི་ཟླ་རུ་ཏྲ་ཕོ་མོ་བྱི་ཆིངས་སུ་བསྣོལ་བའི་སྟེང་དུ་སངས་རྒྱས་ཀུན་གྱི་ཕྲིན་ལས་ཀྱི་སྤྱི་དཔལ་འཇིགས་མཛད་ཀརྨ་ཀཱི་ལ་ཡ་དཔལ་ཆེན་རྡོ་རྗེ་གཞོན་ནུ་སྐུ་མདོག་མཐིང་ནག་ཞལ་གསུམ་ཕྱག་དྲུག་པ། གཡས་དཀར་གཡོན་དམར་དབུས་མཐིང་ནག །ཕྱག་དྲུག་གིས་རྡོ་རྗེ་རྩེ་དགུ་རྩེ་ལྔ། མེ་དཔུང་ཁཊྭཱཾ། ཐ་མ་གཉིས་ཕུར་བུ་འདྲིལ་བ། དཔལ་དང་དུར་ཁྲོད་རོལ་པའི་ཆས་ཅན། ཡུམ་འཁོར་ལོ་རྒྱས་འདེབས་དྲིལ་བུ་དང་དུང་དམར་འཛིན་པ། ཡེ་ཤེས་ཀྱི་མེ་དཔུང་འབར་བའི་ཀློང་ན་འགྱིང་བའི་གཡོན་ཕྱོགས་སུ་སྒྲོལ་ཡུམ་ཨེ་ཀ་ཙ་ཏི་གྲི་གུག་དང་ཐོད་ཁྲག་བསྣམས་པ། ཕྱི་རོལ་གྱི་རྩིབས་བཅུ་ལ་སྟེང་དུ་ཧཱུྃ་ཀཱ་ར། ཤར་དུ་རྣམ་རྒྱལ། ཤར་ལྷོར་དབྱུག་སྔོན། ལྷོ་རུ་གཤིན་རྗེ། ལྷོ་ནུབ་ཏུ་མི་གཡོ་བ། ནུབ་ཏུ་རྟ་མགྲིན། ནུབ་བྱང་དུ་འདོད་རྒྱལ། བྱང་དུ་བདུད་རྩི་འཁྱིལ་བ། བྱང་ཤར་དུ་ཁམས་གསུམ་རྣམ་རྒྱལ། འོག་ཏུ་སྟོབས་པོ་ཆེ་སྟེ་ཁྲོ་བོ་བཅུ་ཡབ་ཡུམ་ཕྲ་ཕྱག་དང་བཅས་པ། སྒོ་བཞིར་སྒོ་མ་བཞི། མུ་རན་ལ་ཕུར་སྲུང་དམ་ཅན་བཅུ་གཉིས་དང་བཅས་དཀྱིལ་འཁོར་གསུམ་གྱི་ལྷ་ཚོགས་རྣམ་འགྱུར་མ་འདྲེས་ཅིར་ཡང་སྟོན་པ་ཐམས་ཅད་ངོ་བོ་དཔལ་ཆེན་པོ་གཅིག་གི་བདེ་སྟོང་ཡེ་ཤེས་སྒྱུ་འཕྲུལ་དྲྭ་བའི་ཐིག་ལེར་གཉིས་སུ་མེད་པར་ལྷུན་གྱིས་གྲུབ་པའི་དོན། བརྡ་རྟགས་བཅོས་མའི་དཀྱིལ་འཁོར་འདིས་མཚོན་ཏེ་ངོ་འཕྲོད་པ་ཉིད་རང་བྱུང་རྡོ་རྗེའི་ལུས་ལ་གདོད་ནས་བཞུགས་པའི་ཚུལ། ཧོ༔ ཕུང་པོ་ཁམས་དང་སྐྱེ་མཆེད་སོགས། དབང་ཆོག་དཀྱུས་ལ་འཇུག་པས་རིགས་དབང་ལྔ་བསྐུར་ལ། མཐའ་རྟེན་རྣམ་རྒྱལ་བུམ་པའི་དབང་ལ། ཧཱུྃ༔ དཔལ་ཆེན་རྡོ་རྗེ་གཞོན་ནུ་དང༔ ཡུམ་ཆེན་འཁོར་ལོ་རྒྱས་འདེབས་གཉིས༔ གཡོན་ནས་ཡུམ་གྱིས་ཡབ་ལ་འཁྱུད༔ ཕྱག་གིས་བུམ་པ་རབ་ཏུ་བླང༔ ཡེ་ཤེས་དབང་གི་ཆུ་བོ་འདི༔ ཉོན་མོངས་མ་གོས་དཀར་ལ་འཚེར༔ སྐལ་ལྡན་རིགས་ཀྱི་བུ་ཁྱོད་ལ༔ སྤྱི་བོར་བུམ་པས་དབང་བསྐུར་བས༔ ཉོན་མོངས་གསུམ་དང་དུག་གསུམ་སྦྱངས༔ དབང་གི་ཆུ་བོ་རྒྱུན་བཞིན་བབ༔ ཨོཾ་བཛྲ་ཀཱི་ལི་ཀཱི་ལ་ཡ་དིཔྟ་ཙཀྲ་རུ་ལུ་རུ་ལུ་ཧཱུྃ་བྷྱོ་ཧཱུྃ་ཀ་ལ་ཤ་ཨ་བྷི་ཥིཉྩ་ཧཱུྃ༔ དེ་ལྟར་དབང་བསྐུར་བའི་ཆུ་རྒྱུན་སོགས། དེ་ནས་ནང་ནུས་པ་འཇུག་པའི་དབང་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་རྒྱན་གྱི་འཁོར་ལོར་བྱིན་གྱིས་བརླབས་ཏེ་དབང་བསྐུར་བའི་ཕྱིར། དཀྱིལ་འཁོར་གྱི་ལྷ་ཡི་ཐུགས་རྗེའི་དབྱིངས་ལས་ཡེ་ཤེས་ཕྱག་རྒྱའི་རོལ་པ་གཉིས་པ་སྤྲོས་ཏེ་ཁྱེད་རང་རྣམས་ལ་ཐིམ་པས་ལུས་ཡེ་ཤེས་སྒྱུ་མའི་སྐུ་མངོན་དུ་བྱས་པས་ལྷ་དབང་ལུས་ལ་ཐོབ་པར་མོས་ཤིག །གཙོ་བོའི་སྐུ་སྤྱི་བོར་བཞག་ལ། ཧཱུྃ༔ ཀུན་ཏུ་བཟང་པོའི་རོལ་པ་ལས༔ ཐུགས་རྗེས་ཁམས་གསུམ་གདུག་པ་འདུལ༔ གཉན་པོས་ལས་སུ་རུང་མཛད་པའི༔ འཇིགས་བྱེད་གཉན་པོས་དབང་བསྐུར་རོ༔ ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ༔ ཀཱ་ཡ་ཨ་བྷི་ཥིཉྩ་ཧཱུྃ༔ གསུང་རིག་པ་རྡོ་རྗེའི་སྔགས་བྱང་དར་དམར་ལ་བྲིས་པ་མགྲིན་པར་བཞག་པས་ནུས་པ་སྔགས་ཀྱི་དབང་ངག་ལ་ཐོབ་པར་མོས་ཤིག །དར་དམར་ལ་བྲིས་པའི་སྔགས་བྱང་མགྲིན་པར་གཏད་ལ། ཧཱུྃ༔ གསུང་གི་རང་བཞིན་མཚོན་བྱེད་པ༔ ལེ་བརྒན་འབར་བའི་ཁ་དོག་ལ༔ སྙིང་པོ་ནུས་པའི་དོན་དང་ལྡན༔ ནུས་པ་ཅན་གྱི་དབང་ཐོབ་ཤོག༔ ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ༔ ཝཱཀྐ་ཨ་བྷི་ཥིཉྩཧཱུྃ༔ ཐུགས་དབྱིངས་རིག་དབྱེར་མེད་ཀྱི་ཕུར་བུས་སྲིད་ཞིའི་སྲོག་ནས་ཐལ་མར་འབྱིན་པས་འཁོར་བ་དབྱིངས་སུ་སྒྲོལ། ཡེ་ཤེས་རྒྱུན་དུ་འཆར་བའི་ཐུགས་ཀྱི་དབང་སེམས་ལ་ཐོབ་པར་མོས་ཤིག །ཕུར་པ་སྙིང་གར་བཞག་ལ། ཧཱུྃ༔ ཙིཏྟ་དམར་པོའི་གཞལ་ཡས་ན༔ ཁམས་གསུམ་དབང་གི་བདག་པོ་སྟེ༔ བརྐྱང་བསྐུམ་རབ་ཏུ་གདེངས་པ་ཡིས༔ གདུག་པ་འཇོམས་པའི་དབང་ཐོབ་ཤོག༔ ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ༔ ཙིཏྟ་ཨ་བྷི་ཥིཉྩ་ཧཱུྃ༔ སྐུ་འབར་ཁྲོ་རྔམས་པའི་ཚུལ་དུ་བཞུགས་ཀྱང་ཐུགས་ཞི་བ་ཆེན་པོ་གཉིས་མེད་ཡེ་ཤེས་ཀྱི་སྲོག་དང་ལྡན་པ་མཚོན་ཕྱིར་ཡེ་ཤེས་སེམས་དཔའ་རྡོར་སེམས་ཀྱི་དབང་བསྐུར་བས་ཟག་མེད་འབྲས་བུའི་ཡོན་ཏན་ཐམས་ཅད་སྐུ་གསུང་ཐུགས་ལ་རྫོགས་པས་རྩོལ་མེད་ཕྲིན་ལས་ཀྱི་སྣང་བས་དོན་གཉིས་འབད་མེད་དུ་སྩོལ་བར་མོས་ཤིག །རྡོར་སེམས་ཀྱི་སྐུ་སྙིང་གར་བཞག་ལ། ཧཱུྃ༔ ཐུགས་ཀ་རིན་ཆེན་ཟུར་བརྒྱད་ལ༔ ཕྲིན་ལས་སྣ་ཚོགས་ལྷུན་གྱིས་གྲུབ༔ ཐམས་ཅད་ཀུན་ལ་རང་བཞིན་གནས༔ ཡེ་ཤེས་སེམས་དཔའི་དབང་ཐོབ་ཤོག༔ ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ༔ གུ་ཎ་ཤ་ཡ་ཨ་བྷི་ཥིཉྩཧཱུྃ༔ དེ་དག་གིས་དྲེགས་པ་ཅན་བདུད་དང་རུ་ཏྲ་བསྒྲལ་བའི་ཁྲག་འཐུང་རྒྱ་མཚོའི་རྗེ་བཙན་དུ་ཆེ་ཞིང༌། མ་མོ་མཁའ་འགྲོའི་ཚོགས་རྗེ་རུ་བརྗིད་པའི་རྟགས་སུ་གོས་རྒྱན་བྱུག་པའི་རྩི་སོགས་དཔལ་གྱི་ཆས་དང་དུར་ཁྲོད་ཀྱི་རྫས་ཀྱིས་མངའ་གསོལ་བར་མོས་ཤིག །དུར་ཁྲོད་རྒྱན་རྣམས་གཏད་དེ། ཧཱུྃ༔ གླང་ཆེན་སྟག་ཤམ་ཞིང་ལྤགས་སྦྲུལ༔ ཐོད་པ་ཚར་གསུམ་བྱུགས་རྫས་གསུམ༔ རྡོ་རྗེའི་ཁྱུང་གཤོག་ལ་སོགས་པ༔ དུར་ཁྲོད་དཔལ་ཆས་དབང་ཐོབ་ཤོག༔ དེ་ལྟར་དབང་བསྐུར་བའི་ནུས་པས་ཐ་མལ་གྱི་བསམ་བརྗོད་བཏུལ་ནས་ཅིར་སྣང་ཡེ་ཤེས་ཀྱི་རོལ་པར་འཆར་བའི་གསེང་ལམ་ལ་ཞུགས་ཏེ་སངས་རྒྱས་ཐམས་ཅད་དང་གཉིས་སུ་མེད་པ་རྡོ་རྗེ་སེམས་དཔའི་བརྟུལ་ཞུགས་དམ་ཚིག་གསུམ་བྱིན་པར་མོས་ལ་རྡོ་རྗེ་གསོར་ཞིང་དྲིལ་བུ་འཁྲོལ་ཏེ་ཐུགས་ཀར་བསྣོལ་མར་ཟུངས་ཤིག །རྡོར་དྲིལ་གཏད་དེ། ཧཱུྃ༔ ཐབས་ཀྱི་སྤྱོད་པས་གཞན་དོན་དུ༔ བྱམས་དང་སྙིང་རྗེས་གང་འདུལ་བ༔ སངས་རྒྱས་ཕྲིན་ལས་རྫོགས་མཛད་པའི༔ དབང་དང་བྱིན་རླབས་འདིར་སྩོལ་ཅིག༔ ཨོཾ་བོ་དྷི་ཙིཏྟ་ས་མ་ཡ་སྟྭཾ་ཨ་བྷི་ཥིཉྩ་མཾ༔ ཞེས་རྟོགས་པ་བསྐྱེད། དེས་རྡུལ་ཚོན་སྤྲུལ་པའི་དཀྱིལ་འཁོར་སོགས་ནས། མཆོག་དབང་གོང་མ་གསུམ་བསྐུར། མཐའ་རྟེན་རྡོ་རྗེ་སློབ་དཔོན་གྱི་དབང་མི་དགོས། དེ་དག་གིས་སྟོད་ལས་བྱང་ཆུབ་སྒྲུབ་པའི་དབང་གིས་རྒྱུད་སྨིན་པར་བྱས་ནས། ད་སྨད་ལས་དགྲ་བགེགས་སྒྲོལ་བའི་རྗེས་སུ་གནང་བ་སྦྱིན་པ་ལ། མངོན་སྤྱོད་རྩོམ་པ་པོ་རིག་པ་ཡེ་ཤེས་ཀྱི་ཕུར་བུའི་དགོངས་པ་མངོན་དུ་གྱུར་པའི་ལྟ་བ་ཆོས་ཉིད་ཀྱི་རྫོང་ལ་ཞུགས་ཤིང༌། བསྐྱེད་རིམ་སྲིད་པ་ཕུར་བུ་དང་རྫོགས་རིམ་བྱང་ཆུབ་སེམས་ཀྱི་ཕུར་བུས་སྒོམ་པ་ཏིང་ངེ་འཛིན་གྱི་འཕྲང་ལ་འགྲིམས་ཏེ། སྤྱོད་པ་སྙིང་རྗེའི་སྲོག་དང་ལྡན་པས་མཚན་མ་རྫས་ཀྱི་ཕུར་བུས་དགྲ་བགེགས་བསྒྲལ་བ་མངོན་སྤྱོད་ཀྱི་ལས་རྩོམ་པར་བྱ་སྟེ། ཇི་སྐད་དུ། ཕུར་པ་གྲུབ་ནས་གདབ་ལས་བྱ། །ཞེས་གསུངས་པས་ཕྲིན་ལས་རྩོམ་པའི་ཡུལ་ཉམས་པ་བདུན་ལྡན་གྱི་དགྲ་བགེགས་ལ། ཇི་ལྟར་རྩོམ་པའི་ཕྲིན་ལས་དམིགས་པའི་རིམ་པ་གསལ་འདེབས་གནང་བར་ཞུ། ཕྱི་སྣོད་ཀྱི་འཇིག་རྟེན་ཐམས་ཅད་ཨེ་ཁྲོམ་འབར་བའི་རང་བཞིན། ནང་བཅུད་རྣམས་རྡོ་རྗེ་ཕུར་པ་རིག་འཛིན་དང་བཅས་པའི་ལྷ་ཚོགས་ཐམས་ཅད་འབར་བའི་སྐུར་བཞེངས་ཏེ་རྔམས་པའི་ཧཱུྃ་སྒྲ་སྒྲོགས་ཤིང་ལས་ལ་ཆས་པར་གྱུར། ཨེ་ཡཾ་ཛྭ་ལ་རཾ། མདུན་དུ་བྲུབ་ཁུང་ཡངས་ཤིང་གཏིང་ཟབ་པའི་ནང་དུ་དགྲ་བགེགས་དམ་སྲི་ཕོ་མོ་རྣམས་རིད་ཅིང་ཉམ་ཐག་པའི་ལུས་ཅན་དུ་གྱུར། གཡབ་དྲིལ་འགུགས་རྒྱ་བཅས། ན་མོ། དཀོན་མཆོག་གསུམ་ལ་ཕྱག་འཚལ་ལོ། དཀོན་མཆོག་གསུམ་གྱི་བཀའ་བདེན་པ་དང༌། ཆོས་ཉིད་རྣམ་པར་དག་པའི་བདེན་པ་དང༌། ཆོས་ཅད་རྒྱུ་འབྲས་བསླུ་བ་མེད་པའི་བདེན་པ་དང༌། ཕྲིན་ལས་ཕུར་པ་རོལ་པའི་ལྷ་ཚོགས་རྣམས་ཀྱི་བདེན་དང༌། སྤྲུལ་པ་ཡང་སྤྲུལ་ཕྱག་བརྙན་དང་བཅས་པ་རྣམས་ཀྱི་བདེན་པ་དང༌། བདེན་པ་ཆེན་པོའི་མཐུ་ལ་བརྟེན་ནས་མ་རུང་པའི་སེམས་ཅན་བསྒྲལ་བའི་ཞིང་དུ་གྱུར་པ་ཐམས་ཅད་མཚན་མ་རྫས་ཀྱི་རྟེན་འདི་ལ་མཆིས་པར་གྱུར་ཅིག །ཨོཾ་བཛྲ་ཀཱི་ལི་ཀཱི་ལ་ཡ་ཤྲཱི་གྷྲཾ་ཨཱ་ན་ཡ་ཛཿཧཱུྃ་བྃ་ཧོཿ ལན་གསུམ། དེ་ནས་གདབ་པའི་སྔགས་དྲུག་སྤུ་གྲིའི་དགོངས་པས་བསྒྲལ་བ་ལ་རིག་པ་མཆོག་གི་རྒྱུད་ལས། ལྷ་དབྲལ་གཟུགས་ལ་དབབ་པ་དང༌། །བྱད་དུ་གཞུག་དང་སྨྱོ་རུ་གཞུག །རྡུལ་དུ་བརླག་དང་ཞལ་དུ་བསྟབ། །དེ་ལའང་ཕོ་ཉ་འཕྱོང་སྔགས་རྫས། །ཏིང་འཛིན་དམོད་པས་ལས་རྫོགས་བྱ། །ཞེས་པ་ལྟར་གདབ་ཁ་རྒྱས་པ་ལ་ལས་དྲུག་སོ་སོར་བྱ་དགོས་ཀྱང་འདིར་གྲུབ་པའི་མན་ངག་གི་དགོངས་པས་དྲག་པོའི་ཕྲིན་ལས་དུས་གཅིག་ལ་རྫོགས་པ་སྔགས་དྲུག་སུར་ཕུག་ ཐོལ་བྱུང་དུ་བསྟན་པའི་དོན། མཆན། ཏུ་བསྟན་པ་ལ་དང་པོ་ཐུགས་དམ་བསྐུལ་བ་ནི། ཧཱུྃ། དམ་ཚིག་ཆེན་པོའི་དུས་ལ་བབ། །སྤྲུལ་པ་ཆེན་པོའི་དུས་ལ་བབ། །ཕྱག་བརྙན་ཆེན་པོའི་དུས་ལ་བབ། །ཤྭ་ན་མུ་ཁའི་དུས་ལ་བབ། །ས་བདག་ཆེན་མོའི་དུས་ལ་བབ། །བདག་ཉིད་ཆེན་མོའི་དུས་ལ་བབ། །ཁྱེད་ཀྱི་དམ་ཚིག་དུས་ལ་བབ། །མཐུ་རྩལ་དབྱུང་བའི་དུས་ལ་བབ། །གདབ་ཕུར་སོགས་མདུན་དུ་བཀོད་ལ། བདག་ཉིད་དཔལ་ཆེན་པོ། ཕུར་པ་སྲས་མཆོག །ལིངྒ་དགྲ་བགེགས་ཀྱི་སྙིང་གར་ཚེ་སྲོག་གི་རྟེན་ཨ་ནྲྀ་ཏྲི་དང་བཅས་པ་དངོས་སུ་གསལ་བ། ཕུར་བུའི་དབལ་རྩེ་ལས་ཨ་ཡིག་དཀར་པོའི་འོད་ཀྱིས་སྒྲིབ་གཉིས་སྦྱངས། སྲོག་རྟེན་ལ་རེག་པ་ཙམ་གྱིས་སྒོ་ལྔའི་རྣམ་ཤེས་དབལ་རྩེར་བསྡུས། ཉོན་ཡིད་ཀྱི་རྩད་བཅད། ལྔ་འདུས་དྭངས་མ་ཚེ་བསོད་ཐམས་ཅད་འོད་དཀར་པོའི་རྣམ་པར་བསྡུས་ནས་རང་ལ་ཐིམ། ཀུན་གཞིའི་རྣམ་ཤེས་ཨ་ཡིག་དཀར་པོར་གྱུར་པ་ཕུར་རྩེས་ལིང་གིས་བཏེགས་ཏེ་དཔལ་ཆེན་པོའི་ཐུགས་ཀར་ཐིམ། ཕུར་བུའི་དབལ་ལས་འཕྲོས་པའི་མཚོན་ཆའི་ཆར་པས་བག་ཆགས་ཀྱི་གཟུགས་བརྙན་དུམ་བུར་གཏུབས་པར་གྱུར། མཚོན་ཆ་རྣམས་ཀྱིས་བསྒྲལ་ཏེ། ཨོཾ་བཛྲ་ཀཱི་ལི་ཀཱི་ལ་ཡ་ཛཿཧཱུྃ་བྃ་ཧོཿ ཆེ་གེ་མོ། ཧ་ས་ཡར་ཧྲཱི་ཏ་ན། ཨ་བེ་ཤ་ཡ་ཨ་བེ་ཤ་ཡ། ཡུངས་ཀར་གྱིས་བྲབ། ཤི་ཀྲི་ཨ་ན་ཡ་ཤི་ཀྲི་ཨ་ན་ཡ། བྱད་ཐག་གིས་བཅིང༌། ཛྭ་ལ་པ་ཡ་ཛྭ་ལ་པ་ཡ། དུག་ཁྲག་གིས་གཏིགས། ཏ་ཐ་ཡ་ཏ་ཐ་ཡ། ཐོ་བས་བརྡུང༌། བྷནྡྷ་ཡ་བྷནྡྷ་ཡ་སརྦ་བིགྷྣཱན་བཾ་ཧཱུྃ་ཕཊ། སྒྲོལ་ཕུར་གདབ་ལ། ཧཱུྃ། སྙིང་རྗེས་བསྒྲལ་བའི་དམ་ཚིག་ནི། །བསད་ཅིང་མནན་པ་མ་ཡིན་ཏེ། །ཕུང་པོ་རྡོ་རྗེས་གཏམས་བྱས་ནས། །རྣམ་པར་ཤེས་པ་རྡོ་རྗེར་བསྒོམ། །ཨོཾ་ལཾ་ཧཱུྃ་ལཾ་སྟྭཾ་བྷ་ཡ་ནན། མོ་ཧ་གྷ་ཡ་བྷ་ག་ཝན། ཤི་གྲི་དི་ཀྲི་ཤྲཱི་བཛྲ་ཧཱུྃ་ཀ་ར་ཧཱུྃ་ཕཊ། ཞེས་ཚེ་ཁྲུས་གནས་གསུམ་གྱི་དགོངས་པ་དང་ལྡན་པས་ལག་ལེན་ལྟར་བརྡེག །ཐུན་གྱིས་བྲབ་ཅིང་སྒྲོལ་གྲིས་གཏུབས་ལ། ལིང་རོ་རཀྟས་བྲན་པ་གཏོར་མར་བསྟབ་སྟེ། ཧཱུྃ༔ དངོས་གྲུབ་བར་ཆད་བྱེད་པའི་བགེགས༔ སོགས་ལས་བྱང་ལྟར་རཀྟ་ཚར་གསུམ་ཕུལ་བས་ཞལ་དུ་བསྟབ། དེ་རྣམས་ཀྱིས་མངོན་སྤྱོད་དྲག་པོའི་རྗེས་གནང་གྲུབ་པ་ལགས་པས། དེང་ནས་བརྩམས་ཏེ་སྣང་སྲིད་ཐལ་འབྱིན་གྱི་དགོངས་པས་ཕུར་བུ་རྣམ་བཞི་ཡུལ་སོ་སོར་འདེབས་པའི་ལས་ལ་བརྩོན་པར་མཛོད་ཅིག །ཤིས་བརྗོད་བཅས་དམ་ཚིག་ཁས་བླང་ནས་དབང་དང་ཆོ་གའི་ལས་རིམ་མཐའ་རྒྱས་སུ་བྱའོ།  །མཁྱེྃན་གཉིས་མཁའ་དབྱིངས་བརྩེྃ་ཆེན་གྱི། །འོདྃ་ཟེརྃ་འབུམ་ཕྲག་གིས་འཁྱུད་པའི། །མཐུ་ལས་ཟབ་གསང་ནོར་བུའི་དབྱིག །ཐང་མར་བརྡལ་འདི་ཨེ་མ་རྨད། །ཐུགས་སྒྲུབ་དཔལ་ཆེན་འདུས་པའི་སྒོས་བཀའ་ཁྲག་འཐུང་རིགས་བཞི་ལས། ཕྲིན་ལས་རྡོ་རྗེ་ཕུར་པ་བདུད་དཔུང་ཟིལ་གནོན་གྱི་དབང་བསྐུར་རྩ་དུམ་རྒྱུད་ཀྱི་དགོངས་པའི་ལེའུ་ཚན་དགུ་པ་སྟེ་བདུད་འདུལ་ཕྲིན་ལས་དྲག་པོ་རྩལ་གྱིས་སྦྱར་བའོ།  ༈  ན་མོ་མ་ཧཱ་གུ་རུ་བྷྱ། ཁྲག་འཐུང་རིགས་བཞིའི་སྒོས་དབང་གི་གཏེར་གཞུང་ལས། དེ་ནི་སོ་སོའི་སྒོས་དབང་གིས༔ སྨིན་པར་བྱེད་པའི་ལུགས་ཡིན་ཏེ༔ དོན་ཚང་འཇུག་པ་བདེ་བའི་ཕྱིར༔ རྒྱལ་ཐབས་སྤྱི་བླུགས་ལྟར་བསྐུར་ན༔ ས་ཆོག་སྟ་གོན་ནས་བཟུང་སྟེ༔ དཀྱིལ་འཁོར་ཆེན་པོར་འཇུག་པ་དང༔ རིགས་པའི་དབང་ལྔས་སྨིན་པའི་བར༔ གདན་གསུམ་ཚང་བའི་དཀྱིལ་འཁོར་ནི༔ ཞི་ཁྲོའམ་དཔལ་ཆེན་འདུས་པ་ལ༔ བརྟེན་རྗེས་སོ་སོའི་དབང་སྒྲུབ་དང༔ འབྲེལ་བར་བུམ་དབང་རྗེས་འབྲང་དང༔ ཁོལ་བུར་བཏོན་ནས་བསྐུར་བའི་མཐར༔ སྤྱོད་པ་དང་ནི་རིག་པ་དང༔ མཉམ་པའི་བརྟུལ་ཞུགས་ཅན་གསུམ་ལ༔ མཆོག་དབང་གོང་མ་གསུམ་པོའི་དོན༔ བློ་དང་འཚམས་པར་བཀྲལ་ནས་སྟེར༔ ཞེས་གསུངས་པ་ལྟར་གོང་གི་སོ་སོའི་སྒོས་དབང་དང་དཔལ་ཆེན་དབང་གཞུང་གུང་བསྡེབས་ཀྱིས་བསྐུར་ཚུལ་ཉིད་ཁོ་བོས་འཁོར་ལོའི་མགོན་པོ་མཆོག་གཉིས་ལས་བཀའ་དྲིན་ཇི་ལྟར་ཐོབ་ཚུལ་ལྟར་བཀོད་པ་ཡིན་ལ། སྒོས་བཀའ་རེ་རེ་བཞིན་སྟ་གོན་སྦྱར་ཡང་རུང་བར་དབང་གཞུང་དུ་གསལ་ཡང་རྩ་བར་སྟ་གོན་སྦྱར་བས་ཡན་ལག་རིགས་བཞི་དེའི་རྗེས་འབྲེལ་དུ་བསྐུར་ན་སོ་སོར་སྟ་གོན་མ་བྱས་ཀྱང་ཆད་སྐྱོན་དུ་མི་འགྱུར་ཞིང༌། ཕྱག་ལེན་བསྡུས་པའི་ཕྱོགས་ལ་མོས་ན་ཐོག་མར་དཔལ་ཆེན་ལ་སྟ་གོན་སྔོན་དུ་འགྲོ་བས་དབང་གི་སྤྱི་དོན་དང་བདག་འཇུག་དབང་དོན་རྒྱ་མཚོ་གཉིས་དགོངས་འདྲིལ་གྱིས་བསྐུར་ཞིང༌། དེའི་ཚེ་དཀྱིལ་འཁོར་ཕྱི་ནང་གི་འཇུག་པ་བུམ་དབང་གི་བྱེ་བྲག་ཐུན་མོང་རིགས་དབང་ལྔ། ནང་ནུས་པ་འཇུག་བྱེད་སྐུ་ཕྱག་རྒྱའི་དབང༌། ཟབ་དབང་གསུམ། མཐའ་རྟེན་རྡོ་རྗེ་སློབ་དཔོན་གྱི་དབང་དང་རྗེས་གནང་བཅས་ལེགས་པར་བསྐུར། གཤིན་རྗེ་སོགས་རིགས་བཞི་གཞན་རྣམས་རྩ་དབང་རྒྱལ་ཐབས་སྤྱི་བླུགས་དངོས་བསྟན་གྱིས་ཁོག་ཕུབ་ནས་སོ་སོའི་བུམ་དབང་དང་སྐུ་ཕྱག་མཚན་སོགས་སྒོས་ཆོས་རྣམས་རང་རང་གི་གཞུང་ལྟར་དང༌། རྟ་མགྲིན་ལ་བུམ་དབང་རྗེས་སུ་སྒྲོལ་དབང༌། ཕུར་པ་ལ་དབང་བཞིའི་རྗེས་འབྲེལ་དུ་སྒྲོལ་དབང་སྦྱར། ཐམས་ཅད་ལ་གསང་དབང༌། ཤེར་དབང༌། ཚིག་དབང་རྣམས་རྩ་དབང་རྒྱལ་ཐབས་སྤྱི་བླུགས་ལྟར་དང༌། རིགས་བཞི་ཀར་བཀའ་ལུང་ཡོངས་རྫོགས་གཏད་རྒྱའི་དབང་མི་དགོས་ཀྱང་བྱས་ནའང་རུང་བར་གཏེར་གཞུང་རྡོ་རྗེའི་ཚིག་གིས་དངོས་བསྟན་ལྟར་དབྱེ་བསྡུ་ཆོག་པར་མངོན་ཞིང༌། སྐབས་འགའ་ཞིག་ཏུ་གཤིན་རྗེ་ལྟ་བུ་གཅིག་ལས་རིགས་གཞན་གྱི་དབང་མི་བསྐུར་བ་དང༌། རྩ་བའི་ཡི་དམ་བྱེད་པ་ལྟ་བུའི་དགོས་པ་དང་འབྲེལ་ན་དེ་ལ་ནི་སྟ་གོན་ཡང་ངེས་པར་དགོས་ཤིང༌། དབང་དངོས་ཀྱང་དཔལ་ཆེན་ལྟར་རྒྱས་པར་བསྐུར་བ་ལེགས་པ་བཅས་ཞིབ་ཏུ་དཔྱད་པས་གཞུང་གི་དངོས་བསྟན་དང༌། རིག་འཛིན་བརྒྱུད་པའི་ཕྱག་བཞེས་གུང་བསྟུན་གྱིས་ཡིད་རྟོན་རུང་བ་ཞིག་གནང་བ་གལ་ཆེ་བའི་ཚུལ་གཞུང་ལས། དབང་ལ་རྡོ་རྗེ་ཐེག་པ་ཡི༔ གཞི་ལམ་འབྲས་གསུམ་རྫོགས་པའི་ཕྱིར༔ རྒྱུད་ཀྱི་དངོས་པོ་བཅུ་ཤེས་ཤིང༔ བསྙེན་རྫོགས་རྟོགས་པས་རྒྱུད་གྲོལ་བའི༔ རྡོ་རྗེ་སློབ་དཔོན་ཁོ་ན་ལས༔ གཟུ་ལུམ་རང་གར་སྤྱད་པ་ན༔ སློབ་མ་སྨིན་པ་ལྟ་ཅི་སྨོས༔ རང་གི་སྲོག་ལའང་ཧུར་ཐུམ་བྱེད༔ དེ་ཕྱིར་མཁས་པས་འཚོ་ཤེས་སྤྱོད༔ ཅེས་གསུངས་པས་ན་ཞར་ལ་འཕྲོས་དོན་དུ་བརྗོད་པའོ།


༈  ཡི་དམ་གྱི་སྐོར་གསང་སྒྲུབ་ཐུགས་རྗེ་ཆེན་པོ་སྡུག་བསྔལ་རང་གྲོལ་གྱི་དབང་ཆོག་འོད་དཀར་མཐའ་ཡས་རྡོ་གྲུབ་རིན་པོ་ཆེ་འཇིགས་མེད་ཕྲིན་ལས་འོད་ཟེར་གྱི་རྡོ་རྗེའི་གསུང་དངོས་དཔེ་རྒྱུན་བཞུགས་བཞིན་པ་ལྟར་ཤེས་པར་བྱ་ཞིང༌། དེ་ལ་དབང་རྒྱས་པའི་སྐབས་གཏེར་ཁ་གཞན་ལས་འབྱུང་བའི་སངས་རྒྱས་སྟོང་དབང་སྦྱར་ན་རཏ་གླིང་ཐུགས་རྗེ་གསང་འདུས་ཀྱི་སངས་རྒྱས་སྟོང་དབང་གཏེར་མཛོད་དུ་བཞུགས་པ་ཉིད་ཀྱིས་དོན་གྲུབ་པའོ།  ༈  ཐུགས་རྗེ་ཆེན་པོ་སྡུག་བསྔལ་རང་གྲོལ་གྱི་དབང་དང་འབྲེལ་བར་མྱོང་གྲོལ་རིལ་བུའི་དབང་བསྐུར་བར་འདོད་ན། དབང་དངོས་གཞིའི་བུམ་དབང་རྫོགས་པའི་རྗེས་སུ། དེ་ལྟར་བུམ་དབང་གི་ཁྲུས་ཀྱིས་གདུལ་བྱ་སྐལ་ལྡན་རྣམས་ཀྱི་རྒྱུད་སྣོད་གསེར་གྱི་གཞོང་པ་ལྟ་བུར་ཡོངས་སུ་དག་པར་བྱས་པ་དེར། བཅུད་སེང་གེའི་འོ་མ་ལྟ་བུ་མྱོང་གྲོལ་བདུད་རྩིའི་དྭངས་མས་དབང་བསྐུར་བ་སྟེ། བུམ་པ་རང་བྱུང་གི་ཕོ་བྲང་ཡེ་ཤེས་ཀྱི་གཞལ་ཡས་ཁང་དུ་གསལ་བ་ལ་བུམ་བཅུད་འཁོར་བ་དོང་སྤྲུགས་འཇིག་རྟེན་དབང་ཕྱུག་འཕགས་པ་ཐུགས་རྗེ་ཆེན་པོའི་ལྷ་ཚོགས་སུ་ཤར་བའི་དབང་བསྐུར་བས་རྒྱུད་སྨིན་ཅིང་གྲོལ་བའི་མོས་པ་མཛོད། རིལ་བུམ་སྤྱི་བོར་བཞག་ལ། ཧྲཱིཿ ཕྱི་ནི་རང་བྱུང་བདེ་ཆེན་གཞལ་ཡས་ཁང༔ ནང་ན་ཐུགས་རྗེ་ཆེན་པོའི་ལྷ་ཚོགས་བཞུགས༔ སྒྲིབ་གསུམ་དག་ནས་སྐུ་གསུམ་མངོན་གྱུར་དབང༔ དེང་འདིར་སྦྱིན་ནོ་འགྲོ་ཀུན་ཡོངས་གྲོལ་ཤོག༔ ཨོཾ་མ་ཎི་པདྨེ་ཧཱུྃ་ཧྲཱིཿ སརྦ་ཏ་ཐཱ་ག་ཏ་ཨ་བྷི་ཥིཉྩ་ཨ༔ ཞེས་དབང་བསྐུར། དེ་ནས། ཁྱེད་རང་རྣམས་ཀྱིས་རིལ་བུ་ཐུགས་རྗེ་ཆེན་པོར་གསལ་བ་ལྕེ་ཐོག་ཏུ་མྱངས་བས་ལུས་གཞལ་ཡས་ཁང་དུ་གསལ་བའི་སྙིང་པདྨ་འདབ་མ་དྲུག་པའི་ལྟེ་བར་ཟླ་བའི་སྟེང་དུ་མགྲིན་པའི་ལམ་བརྒྱུད་ཧྲིལ་གྱིས་བྱོན་ནས་བྱང་ཆུབ་སྙིང་པོ་མ་ཐོབ་བར་དུ་མི་འབྲལ་བར་ཡུན་གྱི་ལྷར་བཞུགས་པའི་མོས་པ་མཛོད། ཨོཾ་མ་ཎི་པདྨེ་ཧཱུྃ་ཧྲཱིཿ སརྦ་སིདྡྷི་ཨ༔ ཞེས་བཟླ་བཞིན་བཀྱེས་པའི་རིལ་བུ་གསུམ་རེ་མིད་དུ་གཞུག་གོ །དེ་ལྟར་དབང་རྫོགས་པའི་རིལ་བུ་ལྟོར་སོང་ཕན་ཆད་མི་ཞེས་བྱ་བ་ཐུགས་རྗེ་ཆེན་པོ་སྤྱན་རས་གཟིགས་སུ་གནས་གྱུར་པ་ཡིན་པས་རྒྱལ་བུ་རྒྱལ་སར་ཕྱུང་པ་དང་འདྲ་ཞིང༌། བསླབ་པའི་དམ་ཚིག་ཀྱང་བདག་ལས་གཞན་གཅེས་འཛིན་གྱི་སེམས་བསྐྱེད་དང་ལྡན་པས་འགྲོ་བའི་དོན་ལ་ཅི་ནུས་འབད་པ་དང༌། དུས་རྟག་ཏུ་ཐུགས་རྗེ་ཆེན་པོའི་བཟླས་སྒོམ་ལ་བརྩོན་པར་གྱིས་ཤིག །དེ་ལྟར་ཐོབ་པའི་ཕན་ཡོན་ཀྱང་རྒྱུད་ལས། རིལ་བུ་སུ་ཡི་ལྟོར་སོང་བ༔ ཚེ་རབས་གང་དང་གར་སྐྱེས་ཀྱང༔ སྤྱན་རས་གཟིགས་དང་འབྲལ་མི་སྲིད༔ རྫས་མཆོག་རེག་ཆོག་ངོ་མཚར་ཆེ༔ ཞེས་དང༌། གཞན་ཡང༌། བོད་ཁམས་ཀུན་ལ་ཁྱབ་པར་དགྲམ༔ དེ་ཡིས་ཐུགས་རྗེས་བསྟན་པ་རྒྱས༔ སྙིགས་དུས་སེམས་ཅན་བདེ་ལ་བཀོད༔ ངན་སོང་འཁོར་བ་དོང་ནས་སྤྲུགས༔ ཐུགས་རྗེའི་ཕྲིན་ལས་ངོ་མཚར་ཆེ༔ ཞེས་གསུངས་པ་ལྟར་དད་པ་དང་ངེས་ཤེས་ཁྱད་པར་ཅན་སྐྱེད་འཚལ། དེ་ནས་སླར་ཡང་མདུན་བསྐྱེད་ཀྱི་སོགས་ལྷ་དབང་མན་གཞུང་ལྟར་རོ། །ཞེས་གུ་རུ་ཆོས་ཀྱི་དབང་ཕྱུག་གི་ཟབ་གཏེར་ཐུགས་རྗེ་ཆེན་པོ་ཡང་སྙིང་འདུས་པའི་དབང་ཆོག་ལས་ཁོལ་དུ་ཕྱུང་བ་དགེ །ཞེས་འཇམ་མགོན་མཁྱེན་བརྩེའི་རྡོ་རྗེའི་གསུང་སྙིང་ཐིག་ཁ་སྐོང་ལས་བྱུང་བ་ལྟར་རྒྱུན་མི་ཉམས་པའི་ཕྱིར་དབང་ཟིན་དཀྱུས་སུ་བཅུག་པའོ།  ༈  དངོས་ཀུན་དེ་ཉིད་གཟིགས་པའི་ཡེ་ཤེས་སྤྱན། །མཐའ་ཀླས་འགྲོ་ཁམས་བརྡལ་བའི་ཕྲིན་ལས་དབྱིག །དྲི་མེད་ཆོས་ཀྱི་བཤེས་གཉེན་དགྱེས་པའི་འོད། །དད་བརྒྱའི་འཆར་ཀའི་འཛུམ་ཟེར་སོར་མོས་ལེན། །ཡང་གསང་བླ་མའི་སྒྲུབ་པ་ཐིག་ལེའི་རྒྱ་ཅན་གྱི་སྨིན་བྱེད་འབོག་པ་ལ། ཐོག་མར་སྦྱོར་བ་ཡོ་བྱད་ཀྱི་གཤོམ་ནི། གཞུང་ལས། མཎྜལ་ཚོམ་བུ་ལྔ་པའི་སྟེང༔ ཞེས་གསུངས་པ་འདིའི་བསྙེན་ཡིག་ཀུན་གཟིགས་རྡོ་རྗེ་གཟི་བརྗིད་ཀྱིས་གསུང་ལས། སྟེགས་ཀྱི་ཁར་འོད་ལྔའི་ཐིག་ལེའི་དཀྱིལ་འཁོར་རྡུལ་ཚོན་ནམ་རས་བྲིས་སྐབས་དང་སྦྱར། ཞེས་གསུངས་པ་ལྟར་ཕྱི་མ་ཉིད་ཕྱག་ལེན་དུ་མཛད་པས་འོད་ལྔའི་ཐིག་ལེའི་དཀྱིལ་འཁོར་དབུས་སུ་བྷནྡྷ་དུམ་དུ་གསུམ་པར་སྨན་འབྲུ་རིན་ཆེན་དང༌། ཁྱད་པར་སེལ་མེད་ཀྱི་ཨ་མྲྀ་ཏས་བཀང་བའི་ཁར་རིག་འཛིན་སྲོག་འཁོར་དཔལ་གྱི་གདུ་བུའི་ཙཀྲ་རབ་གནས་ཅན། དར་དམར་གྱི་ལྡིང་གུར་ཕུབ་པ་དང༌། རིལ་བུའི་དབང་བསྐུར་སྦྱར་ན་བྷནྡྷ་རིལ་བུས་བཀང་བ་དར་དམར་གྱིས་གཡོགས་པའང་བཞག །བཏགས་གྲོལ་གྱི་དབང་བྱེད་ན་རིག་འཛིན་སྲོག་འཁོར་བཅའ་སྒྲུབ་ཚད་ལྡན་བྱས་པའང་འདུ་བྱ། གཡས་སུ་རྣམ་བུམ་མགུལ་ཆིངས་དཀར། མདུན་དུ་ཀུན་མཁྱེན་བླ་མའི་སྐུ། རྒྱབ་ཏུ་གསང་ཐོད། གཡོན་དུ་རིག་ཙཀ ཌཱ་མ་རུ། ཁཊྭཱཾ། རུས་རྒྱན། བྷནྡྷ། ཚངས་སྐུད་སོགས་ཧེ་རུ་ཀའི་ཆས་ཀྱི་ཙཀླི། ཤེལ་རྡོ་རྣམས་བཀོད་མཛེས་སུ་བཤམས། མཆོད་པ་དང་སྨན་རཀ་གཏོར་གསུམ། བཀའ་སྲུང་དང་ཆད་བརྟན་གྱི་གཏོར་མ། དཀར་བགེགས། ལས་བུམ་བཅས་འདུ་བྱ།  གཉིས་པ་ཀུན་བཟང་དོན་གྱི་ཕྲིན་ལས་དང་འབྲེལ་བའི་དབང་བསྐུར་ལ། བརྒྱུད་པའི་གསོལ་འདེབས་སྔོན་དུ་འགྲོ་བས་ལས་བྱང་མཐར་ཆགས་སུ་བཏང༌། སྣང་སྲིད་ཁྱབ་བརྡལ་ཡེ་ཤེས་སུ་ཤེས་པའི་རྟོགས་དགོངས་མེད་ན་བདག་མདུན་ཛཔ་ཁང་སོ་སོར་དབྱེ་ཞིང་སྤྲོ་བསྡུའི་དམིགས་གནད་དང༌། རིལ་སྒྲུབ་སྦྱོར་ན། བདག་གི་ཐུགས་སྲོག་སྔགས་ཕྲེང་སོགས་བཟླས་དམིགས་སྦྱར་ཞིང་ཛཔ་བཟླས་བྱ། བཏགས་གྲོལ་གྱི་སྔགས་རྣམས་ཀྱང་བཀླག །བུམ་པ་རང་བྱུང་གི་གཞལ་ཡས་ཁང་དུ་དཔལ་མགོན་རིག་འཛིན་བླ་མའི་དཀྱིལ་འཁོར་དྭངས་པའི་མཚོ་ལ་གཟའ་སྐར་ཤར་བ་བཞིན་སྐད་ཅིག་གིས་གསལ་བའི་སྐུ་ལས་བྱིན་རླབས་ཡེ་ཤེས་ཀྱི་ཆུ་རྒྱུན་བབས་པས་བུམ་ཆུ་བདེ་སྟོང་བདུད་རྩིའི་རང་བཞིན་དུ་གྱུར་པར་བསམ་ལ། བསྙེན་བཟླས་དང་དབྱངས་གསལ་རྟེན་སྙིང་བཟླ། ལས་བུམ་དུ་སྐད་ཅིག་གིས་ཁྲོ་བོ་རྟ་མགྲིན་དམར་པོ་གཡས་པདྨའི་དབྱུག་ཐོ་དང༌། གཡོན་མེའི་ཞགས་པ་ཐོགས་པར་གསལ་བའི་སྐུ་ལས་རྡོ་རྗེ་བདུད་རྩིའི་རྡུལ་ཕྲ་རབ་བབས་པས་བུམ་པ་གང་བར་བསམ་ལ། ཨོཾ་ཧྱ་གྲཱྀ་བ་ཧཱུྃ་ཕཊ། ཞེས་བཟླས་ལ་ཐུན་མཐར་དབྱངས་གསལ་རྟེན་སྙིང་དང༌། མཆོད་ཕྲེང་རྡོ་རྗེ་སྒྲ་མའི་མཆོད་སྤྲིན་དང་ལས་བྱང་གི་བསྟོད་པ་དང་ཡིག་བརྒྱ་བཟླས་མཐར། ཨོཾ་ཨཱཿཧཱུྃ་བུམ་པའི་ལྷ་ཚོགས་བདེ་བ་ཆེན་པོར་རྗེས་སུ་ཆགས་པས་རྡོ་རྗེ་བདུད་རྩིའི་རང་བཞིན་དུ་ལྟེམས་ཀྱིས་ཞུ་བར་གྱུར། ཞེས་དང༌། བཀའ་སྲུང་གཏོར་འབུལ། སྐོང་བཤགས། ཚོགས་མཆོད། བསྐང་བ། གྲུབ་ན་ལམ་དབང་གི་ཚུལ་དུ་བདག་འཇུག་རྒྱས་པ་དང༌། བསྡུ་ན་རིག་པའི་མེ་ཏོག་དོར་བས་ཡེ་ཤེས་ཀྱི་དཀྱིལ་འཁོར་དུ་འཇུག་པའི་རྗེས། དད་ལྡན་དམ་ཚིག་སྲུང་ནུས་པའི་སློབ་མ་སྒོ་དྲུང་དུ་ཁྲུས་བྱས། གྲལ་ལ་འཁོད་ནས་བགེགས་གཏོར་བཏང༌། སྲུང་འཁོར་བསྒོམ། ལས་རྡོར་གྱིས་མེ་ཏོག་བཀྱེ་བསྡུ་བྱ། སེམས་བསྐྱེད་གསལ་གདབ་དང་བཅས། དེ་ཡང་འོ་སྐོལ་རྣམས་དལ་འབྱོར་གྱི་རྟེན་འདི་ཉིད་རྙེད་དཀའ་ཞིང་ནམ་འཆི་བའི་ཆ་མེད་པ་དང༌། འཆི་བའི་འོག་ཏུ་ལས་འབའ་ཞིག་གིས་རྗེས་སུ་འབྲང་སྟེ་ཁམས་གསུམ་གང་དུ་སྐྱེས་ཀྱང་སྡུག་བསྔལ་གྱི་རང་བཞིན་ལས་མ་འདས་པས། ད་རེས་སྡུག་བསྔལ་ཅན་གྱི་འཁོར་བ་འདི་ལས་བདག་གཞན་སེམས་ཅན་ཐམས་ཅད་ཐར་པ་ཞིག་ཅི་ནས་ཀྱང་བགྱིའོ་སྙམ་པའི་སྐྱེས་བུ་ཆེན་པོའི་བློས་ཡང་དག་པའི་ལམ་དུ་ཞུགས་ནས་འབྲས་བུའི་མཐར་ཐུག་གི་རྟོགས་བྱ་རིག་སྟོང་འོད་གསལ་རྡོ་རྗེ་སྙིང་པོའི་གནས་ལུགས་ཀྱི་དོན་མངོན་དུ་བྱེད་པའི་ཐབས་ཀྱི་གསེང་ལམ་རྨད་དུ་བྱུང་བ་ནི་ཟབ་ལམ་བླ་མ་སྒྲུབ་པ་ཁོ་ནར་བྱ་བ། གསར་རྙིང་གི་མདོ་རྒྱུད་བསྟན་བཅོས་ཀུན་ལས་དབྱངས་གཅིག་མགྲིན་གཅིག་གིས་ཡང་ཡང་བསྔགས་པ་ལྟར་ལ། དེའི་ཚུལ་ལའང་མཁས་ཤིང་དངོས་གྲུབ་བརྙེས་པའི་བདག་ཉིད་ཆེན་པོ་རྣམས་ཀྱིས་བཀྲལ་བའི་ཚུལ་མཐའ་ཀླས་པ་ལས། སྐབས་སུ་བབ་པ་འདི་ནི་ཀློང་ཆེན་སྙིང་གི་ཐིག་ལེའི་ཡང་གསང་བླ་མའི་སྒྲུབ་པའི་རིམ་པ་དབང་གི་ཆོ་ག་སྟེ། དེ་ནི་འོད་གསལ་གསང་བ་ཆེན་པོའི་ལམ་ནས་འཕོ་ཆེན་རྡོ་རྗེའི་འོད་སྐུ་མངོན་དུ་མཛད་དེ་འཕགས་བོད་གཉིས་སུ་རྩོལ་མེད་ཐེག་མཆོག་རྒྱལ་པོའི་ཟབ་གསང་གི་བདུད་རྩིས་སྐལ་ལྡན་ཇི་སྙེད་གདོད་མའི་གྲོལ་གཞིར་དབུགས་དབྱུང་སྟེ་ད་ལྟའི་བར་སྤྲུལ་པའི་རྣམ་རོལ་རྒྱུད་མ་ཆད་པས་ཕྱི་མའི་གདུལ་བྱ་རྗེས་སུ་འཛིན་པའི་ཐུགས་བསྐྱེད་དང་ཕྲིན་ལས་མཚུངས་པ་མེད་པ་པཎ་ཆེན་ལྔ་བརྒྱའི་གཙུག་རྒྱན་འོད་གསལ་འཕོ་བ་ཆེན་པོའི་སྐུ་བརྙེས་པ་བི་མ་ལ་མི་ཏྲ་དང་དེའི་སྤྲུལ་པ་ཀུན་གྱི་མཆོག་གྱུར་ཀུན་མཁྱེན་ཆོས་ཀྱི་རྒྱལ་པོ་རྒྱལ་བ་གཉིས་པ་ཀློང་ཆེན་རབ་འབྱམས་དབྱེར་མེད་པའི་བླ་སྒྲུབ་སྟེ། ཀུན་མཁྱེན་བླ་མ་འདི་དང་མཉམ་པའི་སྡེ་གསུམ་རྫོགས་པ་ཆེན་པོའི་སེང་གེའི་སྒྲ་བསྒྲགས་པ་ནི་གངས་ཅན་བོད་དུ་མ་བྱུང་ཞིང༌། སྔ་འགྱུར་རྡོ་རྗེ་སྙིང་པོའི་བསྟན་པའི་མིག་དང་སྙིང་ལྟ་བུའི་ལེགས་བཤད་ཆོས་སྐུའི་མཆོད་སྡོང་ཆེན་པོ་ཕྱི་རབས་གདུལ་བྱའི་སྐལ་པར་སྨོན་ལམ་གཏད་རྒྱ་དང་བཅས་པས་བཞག་པར་མཛད་པ་དང༌། ཕྱི་མའི་དུས་འདིར་ཡང་མཆོག་གི་གཏེར་ཆེན་རཏྣ་གླིང་པ། ལྷ་བཙུན་ནམ་མཁའི་རྣལ་འབྱོར། རྩེ་ལེ་མཁས་མཆོག་པདྨ་ལེགས་གྲུབ། ཆོས་ཀྱི་རྒྱལ་པོ་གཏེར་བདག་གླིང་པ་སོགས་མཁས་གྲུབ་དུ་མ་ཡེ་ཤེས་ཀྱི་སྐུས་རྗེས་སུ་བཟུང་ཞིང༌། རྫོགས་པ་ཆེན་པོའི་བསྟན་པའི་བདག་པོར་བྱིན་གྱིས་བརླབས་པ་ལས། འདིར་ཡང་ཀུན་མཁྱེན་རིག་འཛིན་ཆེན་པོ་འཇིགས་མེད་གླིང་པ་གང་གིས་རྟོགས་བརྗོད་ཌཱ་ཀིའི་གསང་གཏམ་ཆེན་མོ་ལས། གཏེར་ཁ་གོང་འོག་གི་བཀའ་ཡི་ཆུ་བོ་གཅིག་ཏུ་འདྲེས་པའི་གསང་བདག་དཔའ་བོ་དྲང་སྲོང་དྲི་མེད་ཞི་ཁྲོའི་བསྙེན་སྒྲུབ་ལ་གཞོལ་བའི་དུས་ཀྱི་ཐོ་རེངས་ཤིག་གི་ཆར། སྐྱོ་ཤས་དང་ངེས་འབྱུང་དྲག་པོས་རྐྱེན་བྱས་ཏེ། མདུན་གྱི་ནམ་མཁར་ཨོ་རྒྱན་ཆོས་ཀྱི་རྒྱལ་པོ། རིག་འཛིན་འཇམ་དཔལ་བཤེས་གཉེན་སོགས་འོད་གསལ་གྱི་ངང་དུ་མཇལ་ཏེ་བརྡ་དོན་སྤྲོས་པ་མེད་པའི་དབང་མང་པོ་བསྐུར་བའི་མཐར་རང་ལ་ཐིམ་པ་ཞིག་པ་བྱུང་བས་རང་བྱུང་གི་རྟོགས་པ་བྱུང་རྒྱལ་དུ་སྐྱེས། ཉམས་ཀྱི་འཛིན་སྟངས་བུད། ལས་རླུང་དབང་དུ་འདུས། སྣང་བའི་རྫུན་ཕུག་རྡིབ། ཤེས་པ་ལ་བརྟུལ་ཞུགས་ཀྱི་ངར་ཐོན་ཏེ་ཚེ་འདིའི་སྣང་བ་ཕལ་ཆེར་བརྗེད་ནས་སྐྱེ་བ་འཕོས་པ་ལྟ་བུ་བྱུང༌། ཞེས་སོགས་གསུངས་པ་ལྟར་དང་པོར་མནལ་ལམ་དུ་གུ་རུའི་ཞབས་རྗེས་ལས་དབང་བཞི་བླངས་བའི་རྐྱེན་གྱིས་ནང་དབྱིངས་ཁྱད་ཆོས་དྲུག་ལྡན་གྱི་གྲོལ་ས་མཐོང་ཞིང་དེའི་རྗེས་སུ་འཇམ་དཔལ་བཤེས་གཉེན་གྱིས་བྱིན་གྱིས་བརླབས་པའི་རྐྱེན་ལས་དགོངས་པའི་གསང་མཛོད་བརྡོལ་ཞིང༌། རྔ་ཡབ་གླིང་དུ་གུ་རུ་བདེ་བ་ཆེན་པོ་དང་ཐུགས་ཡིད་འདྲེས་ནས་འོད་གསལ་གཞོན་ནུ་བུམ་སྐུའི་ཞིང་ཁམས་གཟིགས་པར་གསུངས་པས་མཚོན། སྐུ་ཚེ་འདི་ཉིད་ལ་གདོད་མའི་གཞི་ཀློང་དུ་ཁྱད་པར་དྲུག་གི་བཙན་ས་ཟིན་པས་དཔལ་ཀུན་ཏུ་བཟང་པོ་དངོས་དང་དབྱེར་མེད་པ་ཉིད་འོད་གསལ་འགྲོ་འོང་མེད་པའི་ངང་དུ་མནལ་བ་ན། ལྷག་མཐོང་གསལ་བའི་ཡེ་ཤེས་ཀྱི་སྣང་བའི་འོད་གསལ་ཤིན་ཏུ་དྭངས་པར་ཀུན་མཁྱེན་ཀློང་ཆེན་རབ་འབྱམས་བཟང་པོ་སྐུ་གཟུགས་བཟང་ལ་ན་བཟའ་ཆོས་གོས་རྣམ་གསུམ་གྱིས་མཛེས་ཤིང༌། སྐུ་ན་ཅུང་ཟད་སྨིན་པ། དེ་བཞིན་གཤེགས་པ་ལྟར་མཐོང་ན་མི་མཐུན་པ་མེད་པ་ཞིག་དང་མིག་འཕྲུལ་ལྟར་མཇལ་ཞིང༌། བརྗོད་བྱ་དོན་གྱི་ཐུགས་རྒྱུད་འཕོ་བར་གྱུར་ཅིག །འཕོ་བར་གྱུར་ཅིག །རྗོད་བྱེད་ཚིག་གི་བརྒྱུད་པ་རྫོགས་པར་གྱུར་ཅིག །རྫོགས་པར་གྱུར་ཅིག །ཅེས་གསུང་སྒྲ་ལྷང་ལྷང་ཞལ་འདོན་མཛད་པ་ཐོས། དེར་དྲན་པ་འཐོར་འགྲོ་བ་ལྟ་བུའི་དད་པ་དང་མོས་གུས་བཟོད་བླག་མེད་པ་ཞིག་སྐྱེས། ཕྱག་འཚལ་ལོང་མེད་པར་ཀུན་མཁྱེན་བླ་མའི་ཕྱག་གཉིས་ནས་འུབ་ཀྱིས་འཇུས། སྤྱི་བོར་བཀོད་ནས་ཀུན་མཁྱེན་ཆོས་ཀྱི་རྒྱལ་པོ་མཁྱེན་ཞེས་ལན་གསུམ་དུ་མོས་གུས་ཀྱིས་བརྒྱལ་བ་ཙམ་དུ་གསོལ་བ་བཏབ་པས་སྤྱན་ཧུར་གྱིས་གཟིགས། རིགས་ཀྱི་བུ་ཁྱོད་ལ་ད་ཅི་སྨོན་ལམ་གཏད་རྒྱའི་སྒོ་ནས་དོན་བརྒྱུད་ཀྱི་དགོངས་པ་འཕོས་པ་ཡིན་པས། སྒྲུབ་པའི་སྲོག་མཁར་ཚུགས་ལ་སྐལ་ལྡན་ལ་རྒྱ་ཆེར་སྟོན་ཅིག །ཅེས་སྐུ་ཡིས་བྱིན་གྱིས་བརླབས་པ་དང༌། ཞལ་གཟིགས་བར་པ་ལ་དཔེ་ཆ་བམ་པོ་ཞིག་གནང་ནས་གསང་མཛོད་ཆེན་པོ་བརྡ་འགྲོལ་མཛད་པ་སོགས་གསུང་གིས་བྱིན་གྱིས་བརླབས་པ་དང༌། ཞལ་གཟིགས་ཕྱི་མ་ལ་རྡོ་རྗེའི་ལྟ་སྟངས་ཀྱིས་འོད་གསལ་དག་པ་རབ་འབྱམས་ཀྱི་དབང་བསྐུར་ཏེ་ཐུགས་ཀྱིས་བྱིན་གྱིས་བརླབས་ནས་མཉམ་རྗེས་རིས་མེད་དུ་དག་པའི་ཚུལ་གསུངས་ལས་ཀྱང༌། ཕྱི་ལྟར་ཧཱུྃ་ཆེན་འགྲོ་འདུལ་དྲི་མེད་རྗེ། །ནང་ལྟར་སིང་གའི་སློབ་དཔོན་མཉྫུ་ཤྲཱི། །གསང་བ་ཡེ་ཤེས་སྐུ་ཅན་ཀློང་ཆེན་པས། །བརྡ་ཐབས་རྟེན་འབྲེལ་དུ་མས་དོན་བརྒྱུད་བྱིན། །ཞེས་སོགས་གསུངས་པ་ལྟར་འོད་གསལ་བསམ་མི་ཁྱབ་པའི་དགོངས་པ་ལ་དབང་ཐོབ་ནས། དེའི་རང་རྩལ་རྩ་ཁམས་ཀྱི་ཡི་གེ་ཡེ་ཤེས་ཀྱི་རླུང་གིས་བསྐུལ་བས་མཁའ་འགྲོའི་བརྡ་མཛོད་རང་ཤར་དུ་རྙེད་ནས་དམ་པའི་ཆོས་ཀྱི་རོལ་མོ་ཟད་མེད་དུ་འཁྲོལ་བའི་སྙིང་བཅུད་རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་རིག་འཛིན་བླ་མ་ཕྱི་ནང་གསང་བ་ཡང་གསང་དུ་སྒྲུབ་ཚུལ་བཞི་ལས་སྐབས་སུ་བབ་པ་ཡང་གསང་ཀུན་མཁྱེན་ཆེན་པོའི་ཐུགས་སྒྲུབ་འོད་གསལ་ཐིག་ལེའི་རྒྱ་ཅན་ཏེ། འཇམ་དཔལ་རྩ་རྒྱུད་ལས། གང་ཕྱིར་སངས་རྒྱས་ཐམས་ཅད་ནི། །འདས་དང་མ་བྱོན་ད་ལྟར་གྱི། །ཐམས་ཅད་མི་ཡི་འཇིག་རྟེན་དུ། །མི་ཡི་ལུས་སུ་ཡང་དག་འབྱུང༌། །ཞེས་དང༌། གུར་ལས། གང་ཞིག་རྡོ་རྗེ་སེམས་དཔའ་ཞེས། །རྡོ་རྗེ་སློབ་དཔོན་གཟུགས་སུ་གནས། །སེམས་ཅན་ཕན་གདགས་དམིགས་ནས་ནི། ཐ་མལ་པ་ཡི་གཟུགས་སུ་སྤྲུལ། །ཞེས་གསུངས་པ་ལྟར་ཐེག་མཆོག་རྫོགས་པ་ཆེན་པོའི་ཤིང་རྟ་ཀུན་མཁྱེན་བླ་མ་ཆོས་ཀྱི་རྒྱལ་པོ་ཉིད་ཀྱི་བླ་མའི་སྒྲུབ་པ་ཟབ་པའི་མཐར་ཐུག་ཏུ་གྱུར་པ་སྟེ། གཞུང་ལས། ཨེ་མ་ཤིན་ཏུ་ཡང་ཟབ་དགོངས་པའི་གཏེར༔ ཡང་གསང་ཐིག་ལེའི་རྒྱ་རྟགས་ཅན༔ གདོད་མའི་མགོན་པོ་ཀློང་ཆེན་པས༔ དཔལ་གྱི་བསམ་ཡས་མཆིམས་ཕུ་རུ༔ ཁོ་བོའི་སྙིང་གི་དཀྱིལ་དུ་སྦས༔ ལོ་ལྔའི་བར་དུ་གསང་རྒྱ་བྱས༔ ད་ལྟ་དུས་ངན་སྙིགས་མའི་ཚེ༔ ཟབ་རྒྱ་སྤེལ་བའི་སྣོད་དཀོན་ཡང༔ གདུག་པ་ཞེ་སྡང་སྦྲུལ་གྱི་ལོར༔ ལྭ་བ་དཀར་པོའི་ལྡིང་གུར་ནང༔ ཡེ་ཤེས་དབྱིངས་ཀྱི་མཁའ་འགྲོ་མས༔ འདི་ནས་ལོ་གསུམ་འདས་པ་ན༔ ཐུགས་ཀྱི་སྲས་མཆོག་གསུམ་ཡང་འབྱུང༔ བཛྲ་མིང་ཅན་སྙིང་སྟོབས་ཆེ༔ ཛྙཱ་ནའི་མིང་ཅན་གྲུབ་པའི་གཙོ༔ རིགས་ལྔའི་མིང་འཛིན་སྙན་ངག་མཁན༔ དེ་དག་རྣམས་ལ་ཆོས་སྒོ་འབྱེད༔ ཅེས་པའི་ལུང་བསྟན་ཇི་བཞིན་དུ༔ བརྒྱུད་འཛིན་སྙིང་གི་བུ་རྣམས་དང༔ ཀོང་སྨྱོན་སྦས་པའི་རྣལ་འབྱོར་གྱིས༔ བསྐུལ་ངོར་ཟབ་དོན་གཏད་རྒྱ་བཀྲོལ༔ སྨན་བཙུན་ཚེ་རིང་མཆེད་ལྔ་དང༔ གཟའ་རྒོད་སྲོག་གི་སྤུ་གྲི་ཡིས༔ ཐུབ་པར་སྲུངས་ཤིག་དམ་ཚིག་རྒྱ༔ ལས་ཅན་རྣམས་ཀྱི་དཔལ་དུ་ཤོག༔ ཅེས་གསུངས་པ་ལྟར་ཡང་གསང་བླ་མེད་རྫོགས་པ་ཆེན་པོའི་མན་ངག་གི་སྡེའི་ལྟ་སྒོམ་སྤྱོད་པའི་གནད་སྟོན་པ་ཀུན་བཟང་ཡེ་ཤེས་ཀློང་གི་རྒྱུད། དེའི་རྒྱུད་ཕྱི་མ་གཉིས། ལུང་ཀུན་བཟང་དགོངས་མཉམ། མན་ངག་གནད་གསུམ་ཤན་འབྱེད། གནས་ལུགས་རྡོ་རྗེ་ཚིག་རྐང་རྩ་འགྲེལ། ཁྲིད་ཡིག་ཡེ་ཤེས་བླ་མ་རྩ་བ་རྒྱབ་ཆོས་དང་བཅས་པས་མཚོན་པད་འབྱུང་བི་མའི་དགོངས་ཉམས་ཀྱི་ཤིང་རྟ་ཆེན་པོ་གཉིས་ཀྱི་བྱིན་རླབས་མན་ངག་སྨིན་གྲོལ་ཆུ་རྒྱུན་གཅིག་ཏུ་བསྡུས་པའི་གནད་ཀྱི་ཞུན་ཐིག་ཏུ་གྱུར་པའི་ཀློང་ཆེན་སྙིང་གི་ཐིག་ལེ་ཟབ་གསང་རྫོགས་པ་ཆེན་པོའི་བྱིན་རླབས་ཀྱི་སྒོ་འབྱེད་པཎ་ཆེན་བི་མ་ལ་དང་ཀུན་མཁྱེན་ཆེན་པོ་གཉིས་སུ་མེད་པའི་ཟབ་ལམ་བླ་མའི་སྒྲུབ་པ་འདི་ཀུན་མཁྱེན་འཇིགས་མེད་གླིང་པ་ཉིད་ཀྱིས་བླ་སྒྲུབ་རྩ་བ་ཙམ་གཏན་ལ་ཕབ་ནས། གསང་བའི་ལུང་ཟིན་ཆོས་ཀྱི་བདག་པོ་རྣམ་གསུམ་གྱི་གཙོས་ལས་ཅན་རྡོ་རྗེའི་སློབ་ཚོགས་ལ་བསྩལ་བ་ལས། སངས་རྒྱས་ཀྱི་ཕྲིན་ལས་སྨོན་ལམ་གྱི་རང་འབྲས་ནམ་ཡང་དུས་ལས་ཡོལ་བ་མེད་པས་ཀུན་མཁྱེན་བླ་མ་ཉིད་སླར་ཡང་གངས་ཅན་བསྟན་པ་ཡོངས་རྫོགས་ཀྱི་ཤིང་རྟར་བྱོན་པ་འཇམ་དབྱངས་མཁྱེན་བརྩེའི་དབང་པོའམ། འཇིགས་མེད་མཁྱེན་བརྩེའི་ཟློས་གར་དུ་གྲགས་པ་ཉིད་དགུང་གྲངས་ཉེར་དྲུག་ཏུ་ཕེབས་པ་ན་དབུས་གཙང་ལོངས་སྤྱོད་རྫོགས་པའི་རྡོ་རྗེའི་གནས་ཆེན་རྣམས་སུ་དཔའ་བོ་དང་རྣལ་འབྱོར་མའི་ཚོགས་ཀྱི་འདུ་བ་ལ་དགྱེས་དགུར་སྤྱོད་པས། རྡོ་རྗེའི་ནང་གི་ས་ལམ་ལ་བོགས་འབྱིན་པ་དང༌། བོད་ཁམས་བསྟན་འགྲོའི་ཕན་བདེའི་བཙས་སུ་ཕྱི་ནང་གསང་བའི་རྟེན་འབྲེལ་ལེགས་ཚོགས་དུ་མ་བདག་གིར་མཛད་པ་ལས། གངས་རི་ཐོད་དཀར་འོད་ཟེར་སྤྲིན་གྱི་སྐྱེད་མོས་ཚལ་དུ་ཕེབས་པ་ན། ཀུན་མཁྱེན་ངག་གི་དབང་པོའི་ཡེ་ཤེས་ཀྱི་སྐུས་རྗེས་སུ་བཟུང་སྟེ་བུ་ཞེས་དགྱེས་པས་དབུགས་དབྱུང་མཛད་པ་ལས། བླ་སྒྲུབ་འདི་ཉིད་ཀྱི་སྨིན་བྱེད་ཡེ་ཤེས་མཆོག་སྦྱིན་དང༌། རྗེས་རིམ་ཚོགས་མཆོད་སྐོང་བཤགས། རིལ་སྒྲུབ་དང་བཅས་པ་གཏན་ལ་ཕབ་ཅིང༌། པདྨ་དང་བི་མ་ལའི་བཀའ་སྲོལ་གཙོ་བོར་གྱུར་པའི་རྫོགས་ཆེན་སྡེ་གསུམ། བཀའ་གཏེར་ཡོངས་རྫོགས་ཀྱི་དོན་གྱི་བསྟན་པའི་བདག་པོར་གྱུར་ནས་ཀུན་བཟང་ཐུགས་ཀྱི་བསྟན་པས་ནམ་མཁའི་དབྱིངས་ཀུན་ཏུ་ཁྱབ་པར་བརྡལ་བར་མཛད་པས་ཞལ་གཟིགས་བྱིན་རླབས་ཀྱི་ཉེ་བརྒྱུད་ཟམ་མ་ཆད་པའི་སྨིན་གྲོལ་ཆིག་རྫོགས་སུ་སྒྲུབ་པ་ལ་མཎྜལ་ཕུལ། རྒྱལ་བ་སྲས་དང་བཅས་པའི་ཡེ་ཤེས་ཀྱི་སྐུ་གཅིག་པུ་ཀུན་མཁྱེན་བླ་མ་དང་གཉིས་སུ་མེད་པའི་བདག་ཉིད་ལ་ཡིད་ཆེས་དད་པས་གསོལ་བ་འདེབས་པ་འདིའི་རྗེས་ཟློས་མཛོད། སངས་རྒྱས་ཀུན་གྱི་ཡེ་ཤེས་སྐུ། །རྡོ་རྗེ་སློབ་དཔོན་བདག་ལ་དགོངས། །རིག་འཛིན་བླ་མའི་དཀྱིལ་འཁོར་དུ། །འཇུག་ཅིང་སྨིན་པའི་བཀའ་དྲིན་སྩོལ། །ལན་གསུམ། མདུན་གྱི་ནམ་མཁར་སྐྱབས་གནས་ཀུན་འདུས་རྩ་བའི་བླ་མ་དང་དབྱེར་མེད་པའི་ཀུན་མཁྱེན་ཆོས་ཀྱི་རྒྱལ་པོ་ཕྱོགས་དུས་རྩ་གསུམ་རྒྱལ་བ་སྲས་དང་བཅས་པའི་ཡེ་ཤེས་ཀྱི་ཕུང་པོ་གཅིག་ཏུ་བསྡུས་པའི་བདག་ཉིད་ཆེན་པོ་ལ། བདག་གཞན་སེམས་ཅན་ཐམས་ཅད་སྒོ་གསུམ་འཇུག་པ་གཅིག་པས་སྐྱབས་སུ་འགྲོ་བ་ཀུན་རྫོབ་རྒྱུའི་སྐྱབས་འགྲོ་དང༌། སྐྱབས་ཡུལ་དང་རང་སེམས་དབྱེར་མེད་པའི་ཆོས་ཉིད་ངོ་བོ་རང་བཞིན་ཐུགས་རྗེའི་བདག་ཉིད་སྐུ་གསུམ་རང་ཆས་སུ་བཞུགས་པ་དོན་དམ་འབྲས་བུའི་སྐྱབས་འགྲོ་ལ་དྲན་པ་ཉེ་བར་བཞག་པས་འདིའི་རྗེས་ཟློས་མཛོད། ཧཱུྃ༔ ངོ་བོ་རང་བཞིན་སོགས་ལན་གསུམ། རང་གཞན་སེམས་ཅན་ཐམས་ཅད་འཁོར་བ་ལས་བསྒྲལ་འདོད་ཀུན་རྫོབ་བྱང་ཆུབ་ཀྱི་སེམས་དེ་ཉིད། དོན་དམ་པར་ཅི་ཡང་མ་གྲུབ་ཅིང་ཀུན་རྫོབ་ཏུ་ཅིར་ཡང་འཆར་བའི་སྟོང་དང་རྟེན་འབྱུང་དབྱེར་མེད་པའི་ངང་དུ་མཉམ་པར་འཇོག་པ་དོན་དམ་གྱི་སེམས་བསྐྱེད་ལ་བློ་གཞོལ་བས་འདིའི་རྗེས་ཟློས་མཛོད། ཧོ༔ སངས་རྒྱས་མེད་ལ་སེམས་ཅན་སོགས་ལན་གསུམ། སླར་ཡང་རྒྱལ་བ་སྲས་དང་བཅས་པའི་བགྲོད་པ་གཅིག་པའི་ལམ་སྡོམ་པ་གསུམ་གྱི་གནང་བཀག་རྣམས་ཚུལ་བཞིན་དུ་བཟུང་ཞིང་བསྲུངས་ནས་དེ་བཞིན་གཤེགས་པའི་སྤྱོད་ཡུལ་རླབས་པོ་ཆེ་ལ་འཇུག་པར་བགྱིའོ་སྙམ་པས་དམ་བཅའ་བ་འདིའི་རྗེས་ཟློས་མཛོད། བདེ་བར་གཤེགས་པ་ཁྱེད་ཅི་འདྲ། །དེ་འདྲ་ཁོ་ནར་བདག་གྱུར་ཅིག །སྤྱོད་པ་རྨད་བྱུང་བསམ་ཡས་པ། །འགྲོ་ལ་ཕན་ཕྱིར་བདག་གིས་སྤྱད། །བྱང་ཆུབ་སེམས་མཆོག་དམ་པ་དང༌། །སྐུ་གསུང་ཐུགས་ཀྱི་ཕྱག་རྒྱ་ནི། །སྲོག་གི་ཕྱིར་ཡང་མི་གཏོང་ན། །རྡོ་རྗེ་རྒྱལ་པོས་བྱིན་རླབས་མཛོད། །ལན་གསུམ། དེ་དག་གིས་དབང་གི་སྔོན་དུ་འགྲོ་བ་རྣམས་གྲུབ་ནས། དབང་དངོས་ལ་བུམ་གསང་ཤེར་ཡེ་བཞི་དང་གཏད་རྒྱའི་དབང་དང་བཅས་རྣམ་པ་ལྔར་ཡོད་པ་ལས། དང་པོ་བུམ་དབང་གི་གཞི་འགོད་པ་ལ་ཡེ་ཤེས་པ་དབབ་པ་ཡིན་པས་སྒོ་གསུམ་གྱི་གནད་གཅུན་ལ་དམིགས་པ་འདི་ལྟར་དུ་སྒོམས་ཤིག །འདི་ལྟར་རང་ངོར་ཉམས་སུ་མྱོང་ཡང་བསམ་བརྗོད་ཀྱི་སྤྲོས་པ་ལས་འདས་པའི་རིག་སྟོང་རྗེན་པ་སྐད་ཅིག་མའི་རང་རྩལ་འོད་གསལ་སྒྲོན་མ་དྲུག་ལྡན་གྱི་སྣང་བའི་ཉམས་ཀྱི་འཕེལ་ཁ་ཡོངས་སུ་རྫོགས་པས། ནང་དབྱིངས་ཀྱི་རང་གདངས་རིག་པ་འོད་སྐུའི་ཕྱག་རྒྱ་དཀྱིལ་འཁོར་རྒྱ་མཚོའི་ཁྱབ་བདག་ཏུ་སྨིན་ནས་འཁྲུལ་སྣང་སྡུག་ཀུན་གྱི་ཆོས་ཀུན་རྫོབ་ཀྱི་ཆ་ཀུན་ཆོས་ཉིད་ཀྱི་ནང་དབྱིངས་སུ་རང་ཟད་དེ་སྐུ་གསུམ་ལམ་སྣང་དུ་རྫོགས་པའི་འཕོ་ཆེན་ཡེ་ཤེས་རྡོ་རྗེའི་སྐུ་ཅན་དྲི་མེད་ཆོས་ཀྱི་བཤེས་གཉེན་དང་གཉིས་སུ་མེད་པའི་རྒྱལ་བའི་དབང་པོ་ཀློང་ཆེན་རབ་འབྱམས་བཅུ་ཕྲག་རིག་པའི་གནས་ཀུན་མཐར་སོན་པའི་པཎྜི་ཏ་ཡི་ཆ་བྱད་ཅན་ཞི་འཛུམ་མཚན་དཔེའི་ཉམས་འགྱུར་ཡོངས་སུ་རྫོགས་པ། གསང་གསུམ་མི་ཟད་རྒྱན་གྱི་འཁོར་ལོར་རྒྱལ་བ་ཀུན་དང་གཉིས་སུ་མེད་པའི་བདག་ཉིད་ཆེན་པོར་གསལ་བའི་གནས་གསུམ་དུ་རྡོ་རྗེ་གསུམ་གྱི་ངོ་བོར་ཡི་གེ་འབྲུ་གསུམ་གྱིས་མཚན་པ་དང༌། སློབ་དཔོན་གྱི་ཐུགས་ཀ་ནས་ཀྱང་འོད་ཟེར་བསམ་གྱིས་མི་ཁྱབ་པ་འཕྲོས། དག་པའི་ཞིང་རབ་འབྱམས་ཐམས་ཅད་དུ་ཁྱབ། དེ་དག་ན་བཞུགས་པའི་དུས་གསུམ་གྱི་བདེ་བར་གཤེགས་པ་སྲས་དང་བཅས་པ་དང༌། རབ་འབྱམས་རྩ་བ་གསུམ་གྱི་ལྷ་ཚོགས། ཁྱད་པར་འོད་གསལ་རྫོགས་པ་ཆེན་པོའི་བརྒྱུད་གསུམ་རིག་འཛིན་མཁའ་འགྲོ་རྒྱ་མཚོའི་ཐུགས་རྒྱུད་རང་དབང་མེད་པར་བསྐུལ་ནས། རྡོ་རྗེའི་གསང་བ་གསུམ་གྱི་བྱིན་རླབས་ཐམས་ཅད་སྐུ་དང་ཡིག་འབྲུ་ཕྱག་མཚན་གྱི་རྣམ་པ་ཆར་དྲག་ཏུ་བབ་པ་ཙམ་སྤྱན་དྲངས་ནས་ཁྱེད་རང་རྣམས་ཀྱི་སྒོ་གསུམ་ལ་ཐིམ་པས་གཉིས་སུ་མེད་པར་བྱིན་གྱིས་བརླབ་པར་མོས་ཤིག །སྤོས་རོལ་ཌཱ་དྲིལ་གདུང་དབྱངས་དང་བཅས། ཧཱུྃ༔ རྣམ་རྟོག་བྲལ་བའི་ཕོ་བྲང་སོགས་ལས་བྱང་གི་སྤྱན་འདྲེན་དང་སྔགས་མཐར། ཛྙཱ་ན་ཨ་བེ་ཤ་ཡ་ཨ་ཨཿ ཞེས་སྔགས་བཟླ་ཞིང་བྱིན་དབབ། དེ་ལྟར་དབང་གི་ཡེ་ཤེས་པའི་བྱིན་རླབས་ཀྱི་རྒྱུན་གཉུག་མའི་རྡོ་རྗེ་གསུམ་དང་དབྱེར་མེད་དུ་བརྟན་པར་བྱས་པའི་མོས་པ་མཛོད། ཏིཥྛ་བཛྲ་ཞེས་རྡོ་རྗེ་མགོ་བོར་བཞག །སླར་ཡང་སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། དབང་གི་ལྷ་ནམ་མཁའ་གང་བར་སྤྱན་དྲངས་པ་རྣམས་དང་སློབ་དཔོན་ལྷན་ཅིག་པས་བཀྲ་ཤིས་པའི་རྣམ་པ་དུ་མ་ལྡན་པས་རིན་པོ་ཆེའི་བུམ་པ་ཡེ་ཤེས་བདུད་རྩིའི་ཆུ་རྒྱུན་གྱིས་གང་བས་སྤྱི་བོ་ནས་མངོན་པར་དབང་བསྐུར་བའི་ཆོ་ག་སྩོལ་བར་མོས་ཤིག །རྣམ་བུམ་སྤྱི་བོར་བཞག་ལ། ཧྲཱིཿ ཀ་དག་གཞོན་ནུ་བུམ་སྐུའི་གྲོང་ཁྱེར་དུ། །ལྷུན་གྲུབ་སྣང་སྟོང་བླ་མའི་དཀྱིལ་འཁོར་ཤར། །ཟུང་འཇུག་བདུད་རྩིའི་རྒྱུན་གྱིས་དབང་བསྐུར་བས། །ཕུང་ཁམས་སྐྱེ་མཆེད་ལྷ་སྐུར་དག་པར་ཤོག །ཨོཾ་ཨཱཿཧཱུྃ་མ་ཧཱ་གུ་རུ་ཛྙཱ་ན་སིདྡྷི་ཧཱུྃ༔ ནིརྨ་ཀཱ་ཡ་ཨ་བྷི་ཥིཉྩ་ཨོཾ། གཞུང་ལས། རྗེས་འབྲེལ་བསྐྱེད་པའི་རིམ་པ་དང༌། །བཞུགས་སྟངས་རྣམ་པ་གསུམ་ལ་བསླབ། །ཅེས་གསུངས་པ་ལྟར། འདི་ལྟར་བུམ་པའི་དབང་དང་སྐུའི་བྱིན་རླབས་ཐོབ་ཕྱིན་ཆད་སྣོད་བཅུད་ཐ་མལ་དུ་ལྟ་བའི་འཛིན་ཞེན་སྤངས་ཏེ་ཅིར་སྣང་ལྷའི་འཁོར་ལོར་ཤེས་པས་སྣང་སྟོང་འོད་གསལ་སྒྱུ་མ་བསྐྱེད་པའི་ལམ་ཁྱེར་ལ་བརྩོན་དགོས། དེའང་སྐབས་འདིར་ནི་དབང་རབ་ཨ་ཏི་ཡོ་ག་དང་མཐུན་པའི་བསྐྱེད་ཚུལ་གསུངས་པས་འདི་ལྟར་ཉམས་སུ་བླང་བར་བྱ་སྟེ། ཆོས་ཅན་སྤྲོས་པའི་མཚན་མ་མཐའ་དག་ཀ་དག་སྤྲོས་བྲལ་གྱི་ནང་དབྱིངས་སུ་ཐིམ། དེའི་ངང་ལས་ལྷུན་གྲུབ་འོད་གསལ་གྱི་རིག་གདངས་ཅིར་སྣང་དག་ཆེན་ཡེ་ཤེས་རོལ་པའི་སྒྲོན་མེའི་སྤྲིན་ཕུང་འབྱམས་ཀླས་པར་བཀོད་དེ་སྣང་སྲིད་སྣོད་བཅུད་ཐམས་ཅད་དཔལ་མགོན་རིག་འཛིན་བླ་མའི་རྡོ་རྗེ་གསུམ་གྱི་དཀྱིལ་འཁོར་དུ་སྐུ་དང་ཐིག་ལེ་ལུ་གུ་རྒྱུད་འཇའ་འོད་ཟེར་སྤྲིན་འཁྲིགས་པའི་དབུས་སུ་རིག་སྟོང་སྐད་ཅིག་མ་དྲན་རིག་འཛིན་མེད་ཁྱབ་བརྡལ་དུ་གྲོལ་ཏེ་འཕོ་ཆེན་རྡོ་རྗེའི་བཙན་ས་ཟིན་པས་འོད་གསལ་སྣང་བ་བཞིའི་ཕ་མཐར་སོན་པའི་རྟེན་འབྱུང་གི་སྣང་ཆ་མ་འགག་རང་ཤར་ཡོངས་གྲུབ་དག་མཉམ་ཆེན་པོའི་བསྐྱེད་རིམ་རང་གི་གཉུག་མའི་ཕུང་ཁམས་སྐྱེ་མཆེད་ཐམས་ཅད་དཔལ་མགོན་རིག་འཛིན་བླ་མ་ཀུན་མཁྱེན་རྒྱལ་བ་ཀློང་ཆེན་པ་ཆེན་པོ་འཕོ་མེད་རྡོ་རྗེའི་ལང་ཚོ་གྲུབ་པས་སྐུ་མདོག་དཀར་དམར་གཞོན་མཛེས་ཀྱི་མཚན་དཔེ་ཅན། ཐེག་པ་རིམ་དགུའི་ས་ལམ་གྱི་ཡོན་ཏན་ཡོངས་སུ་རྫོགས་པས་པཎྜི་ཏའི་ཆ་བྱད། མདོ་སྔགས་ཀྱི་སྡེ་སྣོད་རབ་འབྱམས་འཛིན་པས་དབུ་ལ་པཎ་ཞུ་གསོལ་བ། རང་ངོར་འཁོར་འདས་ཀྱི་མཚན་འཛིན་དབྱིངས་སུ་དག་པས་ཞབས་རྡོ་རྗེའི་སྐྱིལ་ཀྲུང༌། སྟོང་དང་སྙིང་རྗེ་དབྱེར་མེད་ཀྱི་དགོངས་པ་མངོན་དུ་གྱུར་པས་པད་ཟླའི་སྟེང་དུ་བཞུགས་པ། འགྲོ་ཀུན་གདོད་མའི་འབྲས་བུའི་སར་སྦྱོར་བས་ཕྱག་གཉིས་སེམས་ཉིད་ངལ་གསོའི་ཕྱག་རྒྱ་ཅན། རྡོ་རྗེ་ནམ་མཁའི་ཡེ་ཤེས་ཀྱིས་ཞིང་ཁམས་རབ་འབྱམས་སུ་ཁྱབ་པ་ཅན་དུ་གསལ་ཐོབ་ལ་སེམས་འཛིན་གནང་མཛོད། ཅེས་དར་ཅིག་སེམས་གཟུང་དུ་གཞུག དེ་ལྟ་བུའི་བསྐྱེད་རིམ་གསལ་བརྟན་དག་གསུམ་དང་ལྡན་པས་རིམ་པ་དང་པོའི་ཏིང་ངེ་འཛིན་མཐར་ཕྱིན་པར་བྱ་དགོས་ཤིང༌། སྦྱང་གཞི་སྒྱུ་འཕྲུལ་དྲྭ་བ་སྣང་སྟོང་སྐུ་རྡོ་རྗེའི་དཀྱིལ་འཁོར་ཉིད། སྦྱོང་བྱེད་ཐུན་མོང་ཡོངས་གྲུབ་ཆེན་པོའི་བསྐྱེད་རིམ་དང༌། ཁྱད་པར་ལུས་བཞུགས་སྟངས་གསུམ་གྱི་གནད་ཀྱིས་གཅུན་པས་རྩ་དང་དེར་རྒྱུ་བའི་རླུང་རིག་གནད་དུ་ཆུན་ནས། སྦྱངས་འབྲས་འོད་གསལ་ཐིག་ལེ་ཆེན་པོའི་སྐུ་དང་ཞིང་ཁམས་མངོན་དུ་འཆར་ནུབ་བྲལ་བར་སྣང་བའི་ཕྱིར་ཆོས་སྐུའི་བཞུགས་སྟངས་སེང་གེ་ལྟ་བུ་མཛོད་ཅིག །ལོངས་སྐུའི་བཞུགས་སྟངས་གླང་ཆེན་ཉལ་བ་ལྟ་བུ་མཛོད་ཅིག །སྤྲུལ་སྐུའི་བཞུགས་སྟངས་དྲང་སྲོང་ཙོག་པུ་ལྟ་བུ་མཛོད་ཅིག །ལུས་གནད་གཅུན་བཞུགས་སྟངས་སོ་སོར་བྱར་བཅུག དེ་དག་གི་ཕན་ཡོན་ཀྱང་གསང་བ་སྤྱོད་པ་ས་བོན་གྱི་རྒྱུད་ལས། ལུས་ནི་སེང་གེ་ལྟ་བུ་དང༌། །དྲང་སྲོང་དང་ནི་གླང་ཆེན་ཚུལ། །འདི་ལས་གཡོ་བར་མ་བྱས་ན། །སངས་རྒྱས་སུམ་སྟོང་ཉིད་དང་ཡང༌། །སྐལ་པ་དག་ནི་མཉམ་པའོ། །ཞེས་སོ། དེའི་རྗེས་སུ་འབྲེལ་བ་སྐུའི་བྱིན་རླབས་བྱ་བའི་སླད་དུ། མདུན་གྱི་ཀུན་མཁྱེན་བླ་མའི་སྐུ་ལས་སྐུ་གཉིས་པ་ཞིག་ཡེར་གྱིས་བྱོན། ཁྱེད་རང་རྣམས་ཀྱི་དཔྲལ་བ་ནས་ཞུགས་ཏེ་ལུས་ལ་ཐིམ་པས་འཕོ་ཆེན་ཡེ་ཤེས་རྡོ་རྗེའི་སྐུ་དང་དབྱེར་མེད་དུ་གྱུར་པར་མོས་མཛོད། སྐུ་བརྙན་སྤྱི་བོར་བཀོད་དེ། ཨོཾ། རིག་གདངས་ཆོས་ཉིད་མངོན་སུམ་གཞལ་ཡས་སུ། །ཉམས་སྣང་གོང་འཕེལ་འཇའ་ཟེར་ཐིག་ལེའི་ཀློང༌། །རིག་པ་ཚད་ཕེབས་དོན་གྱི་བླ་མའི་སྐུས། །ཆོས་ཟད་བློ་འདས་ཆེན་པོར་དབང་བསྐུར་རོ། །བཛྲ་ཀཱ་ཡ་ཨ་བྷི་ཥིཉྩ་མི། དེས་སྤྲོས་བཅས་བུམ་པའི་དབང་བསྐུར་མཐའ་རྟེན་དང་བཅས་པས་ལུས་ངག་ཡིད་གསུམ་གྱི་གཟུང་འཛིན་བག་ཆགས་དང་བཅས་པ་སྦྱངས་ཤིང་ཤེས་བྱ་ལ་རྨོངས་པའི་སྒྲིབ་པ་དག་ནས་སྣང་སྲིད་གཞིར་བཞེངས་རང་བྱུང་ལྷའི་འཁོར་ལོ་མངོན་སུམ་མཐོང་བའི་རྟེན་འབྲེལ་འགྲིགས་པ་ཡིན་ནོ།  །གཉིས་པ་གསང་བའི་དབང་གི་སླད་དུ་བླ་མ་ཧེ་རུ་ཀ་དཔལ་དུ་གནས་གྱུར་པའི་རང་འོད་དབྱིངས་ཀྱི་ཕྱག་རྒྱ་དང་མཉམ་པར་སྦྱོར་བའི་བྱང་སེམས་སངས་རྒྱས་ཐམས་ཅད་འདུས་པའི་ངོ་བོ་ཐོད་པའི་བདུད་རྩི་དང་རོ་གཅིག་ཏུ་འདྲེས་པ་མྱོང་བ་ཙམ་གྱིས་རང་བཞིན་བརྒྱད་ཅུའི་རྟོག་ཚོགས་དབྱིངས་སུ་ཐིམ། གསལ་སྟོང་གི་ཡེ་ཤེས་ཉམས་སུ་མྱོང་བར་མོས་ཤིག བྷནྡྷའི་བདུད་རྩི་མྱང་དུ་གཞུག་ལ། ཧྲཱིཿ ཕྱི་སྣོད་རྩ་གསུམ་འཁོར་ལོའི་བྷནྡྷ་རུ། །ནང་བཅུད་བདེ་ཆེན་བྱང་སེམས་བདུད་རྩིར་བསྐྱིལ། །དེང་འདིར་སྐལ་ལྡན་ཁྱོད་ལ་སྦྱིན་པ་ཡིས། །སྲོག་རྩོལ་དབུ་མའི་དབྱིངས་སུ་རྫོགས་པར་ཤོག །ཨོཾ་ཨཱཿཧཱུྃ་མ་ཧཱ་གུ་རུ་ཛྙཱ་ན་སིདྡྷི་ཧཱུྃ༔ སཾ་བྷོ་ཀཱ་ཡ་ཨ་བྷི་ཥིཉྩ་ཨཱཿ རྗེས་འབྲེལ་གཟིགས་སྟངས་རྣམ་གསུམ་དང༌། །རླུང་རིག་གནད་ལ་བསླབ་པའི་རྗེས། །ཞེས་གསུངས་པས། འདི་ལྟར་གསང་བའི་དབང་དང་གསུང་གི་བྱིན་རླབས་ཐོབ་ཕྱིན་ཆད་རླུང་གནད་དུ་གཅུན་པའི་རྡོ་རྗེའི་རྣལ་འབྱོར་ལ་བསླབ་དགོས། སྦྱང་གཞི་བདེ་སྟོང་དྲྭ་བ་སྡོམ་པའི་གསུང་རྡོ་རྗེའི་དཀྱིལ་འཁོར་ཉིད། སྦྱོང་བྱེད་ཐུན་མོང་དང་ཁྱད་པར་བླ་མེད་ཀྱི་ཐབས་ཟབ་མོས་གཅུན་པས། སྦྱངས་འབྲས་རྩ་ཁམས་ཀྱི་ཡི་གེ་ཡེ་ཤེས་རླུང་གིས་བསྐུལ་བས་ཆོས་ཕུང་བརྒྱད་ཁྲིའི་རོལ་མོ་འདོད་རྒུར་འཁྲོལ་བའི་ཕྱིར་སྲོག་རྩོལ་རྡོ་རྗེའི་བཟླས་པ་ལ་འབད་དགོས་ཏེ། སྣོད་བཅུད་ཀྱི་འཇིག་རྟེན་ཐམས་ཅད་ཆགས་འཇིག་གནས་སྟོང་མཐའ་དག་རླུང་གིས་བྱེད་པ་གཙོ་ཆེ་ཞིང༌། སྒོ་ལྔའི་རྣམ་ཤེས་ཡུལ་ལ་ཤར་ནས་ལས་ཉོན་གྱི་བྱེད་ལས་ཀྱང་སེམས་ཉིད་ཀྱི་རང་བཞིན་ཆོས་ཉིད་ཀྱི་གདངས་རླུང་ལ་ཞོན་ནས་གཡོ་བར་བྱེད་ཅིང༌། ཡེ་ཤེས་ཀྱི་རླུང་ལས་སྒྲོན་མ་བཞིར་སྨིན་ནས་སྣང་བཞི་རྩལ་རྫོགས་ཏེ། རིག་པ་གཞི་ཀློང་དུ་དག་པ་ཡང་ལས་རླུང་གི་གཡོ་སྡུད་ཟད་ནས་འཕོ་མེད་དུ་བཙན་ས་ཟིན་དགོས་པའི་ཕྱིར་རླུང་ལ་བསླབ་དགོས། དེ་ལའང་ཁྱད་པར། ཐུན་མིན། ཐུན་མོང་གི་བསླབ་ཚུལ་གསུམ་ལས་དང་པོ་རྡོ་རྗེའི་གསང་ལམ་གྱི་ཐབས་ཀུན་གྱི་རྩེ་མོ་རྩོལ་བ་དང་བཅས་པའི་བསྐྱེད་རྫོགས་ལས་ཁྱད་པར་དུ་འཕགས་པ་བྱར་མེད་ཀྱི་ངང་ནས་འབྱུང་བ་རང་མལ་དུ་དག་པའི་ཐབས་ཐེག་མཆོག་རྫོགས་པ་ཆེན་པོ་ལ་བརྟེན་པ་སྒོ་ཡི་གནད་ལ་བརྟེན་ནས་འབྲས་བུ་ལམ་སྣང་དུ་བྱེད་པའི་གནད་ཟབ་མོ་སྟེ་ཆོས་སྐུ་ལ་ཆོས་ཉིད་ཀྱི་སྤྱན་ཡོད་པས་མིག་གཉིས་གཟིགས་སྟངས་གྱེན་ལ་ལྡོག་པས་གཙུག་ཏོར་རྣམ་པར་བལྟ་བའི་ཚུལ་གྱིས་ལྟོས་ཤིག །ལོངས་སྐུ་ལ་ཡེ་ཤེས་ཀྱི་སྤྱན་ཡོད་པས་གཟིགས་སྟངས་ཟུར་ལ་གཏད་པས་མདའ་མཁན་གྱིས་སྙུག་མ་བསྲངས་བ་བཞིན་དུ་ལྟོས་ཤིག །སྤྲུལ་སྐུ་ལ་ཤེས་རབ་ཀྱི་སྤྱན་ཡོད་པས་གཟིགས་སྟངས་ཐུར་ལ་ཕབ་ནས་དྲང་སྲོང་བསམ་གཏན་སྒོམ་པ་བཞིན་དུ་ལྟོས་ཤིག །ཅེས་ལྟ་སྟངས་བྱར་གཞུག  གཉིས་པ་ཐུན་མོང་མ་ཡིན་པ་རྡོ་རྗེའི་བཟླས་པ་ལ། རང་ཉིད་ཀུན་མཁྱེན་བླ་མ་འོད་གསལ་དྭངས་མའི་སྐུ་འཇའ་ཚོན་སྒྲིབ་གཡོགས་དང་བྲལ་བ་ལྟ་བུའི་ཐུགས་ཀར་ཡེ་ཤེས་སེམས་དཔའ་ཀུན་བཟང་ཡབ་ཡུམ་གསལ་བའི་ཐུགས་ཙིཏྟ་རིན་པོ་ཆེའི་སྦུབས་སུ་པདྨ་ཉི་ཟླའི་སྟེང་དུ་རྡོ་རྗེ་གསུམ་གྱི་ས་བོན་ཡི་གེ་གསུམ་གསལ་ལ་རིག་པ་གཡོ་མེད་དུ་གཏད་དེ་རླུང་རོ་སུམ་ཕྲུག་ཏུ་བསལ་བའི་རྗེས་འབྲུ་གསུམ་རྡོ་རྗེའི་བཟླས་པ་མཛོད་ཅིག །འབྱུང་འཇུག་གནས་གསུམ་དང་སྦྱར་བ་བུམ་ཅན་དང་སྦྲགས་པའམ། གང་ཤེས་ལན་བདུན་ནམ། གསུམ་བྱར་གཞུག  གསུམ་པ་ཐུན་མོང་གི་བཟླས་ལུང་སྦྱིན་པ་ལ། དང་པོ་སློབ་དཔོན་དང་ཁྱེད་རང་གཉིས་ཀའི་སྙིང་དབུས་སུ་འོད་ལྔའི་ཐིག་ལེ་ཟླུམ་འཁྱིལ་མཐིང་ག་ཁྱབ་པ་ཆེན་པོའི་འོད་ཀློང་དུ་ཡེ་ཤེས་སེམས་དཔའ་ཀུན་བཟང་ཡབ་ཡུམ་གྱི་ཐུགས་དབུས་པདྨ་ཉི་ཟླའི་གདན་ལ་གཉུག་མའི་སེམས་ཉིད་ཧཱུྃ་མཐིང་གསལ་མཐར་རིག་པ་རྡོ་རྗེ་ལུ་གུ་རྒྱུད་ཡི་གེའི་གཟུགས་སུ་ཤར་བའི་སྔགས་ཕྲེང་མཐིང་གསལ་འོད་ཁ་དོག་ལྔ་ལྡན་གཡས་བསྐོར་དུ་གནས་པར་གསལ། སློབ་དཔོན་གྱི་ཐུགས་ཀའི་སྔགས་ཕྲེང་ལས་སྔགས་ཕྲེང་གཉིས་པ་རེ་འཕྲོས། ཞལ་ནས་ཐོན། ཁྱེད་རང་རྣམས་ཀྱི་ཞལ་ནས་རིམ་པར་བརྒྱུད་དེ་ཐུགས་ཀའི་ཧཱུྃ་གི་མཐར་འཁོད་པ་ལ་ཐིམ་པས་འོད་ཟེར་བུན་བུན་གིས་འཕྲོས། རྒྱལ་བ་སྲས་བཅས་དང་འོད་གསལ་སྙིང་ཐིག་གི་བརྒྱུད་པའི་བླ་མ་རྣམས་མཆོད། འོད་ཟེར་མར་འཕྲོས་སེམས་ཅན་ཐམས་ཅད་ལ་ཕོག་པས་སྡིག་སྒྲིབ་བག་ཆགས་དང་བཅས་པ་སྦྱངས་ཏེ་ཕྱི་སྣོད་འོག་མིན། ནང་བཅུད་རིག་འཛིན་བླ་མའི་སྐུར་སད། འོད་ཟེར་ཚུར་འདུས་པས་སྒོ་གསུམ་རྡོ་རྗེ་གསུམ་གྱི་ངོ་བོར་བྱིན་གྱིས་བརླབས་པས་དངོས་གྲུབ་གཉིས་ཐོབ་ཅིང་འོད་གསལ་འགྲོ་འོང་བྲལ་བའི་གཤིས་ལ་མཉམ་པར་འཇོག་པ་བསྙེན་སྒྲུབ་ཡན་ལག་བཞི་ལྡན་གྱི་དགོངས་པས་རྩ་བའི་སྔགས་འདིའི་རྗེས་ཟློས་ལན་གསུམ་མཛོད། ཨོཾ་ཨཱཿཧཱུྃ་མ་ཧཱ་གུ་རུ་ཛྙཱ་ན་སིདྡྷི་ཧཱུྃ༔ དེ་དང་རྗེས་སུ་འབྲེལ་བ་གསུང་གི་བྱིན་རླབས་བྱ་བའི་སླད་དུ། རྒྱལ་བ་རིག་འཛིན་སྲོག་འཁོར་དཔལ་གྱི་གདུ་བུའི་བྱིན་རླབས་འབོག་པ་ལ། ཐོག་མར་ཆོས་ཉིད་རྡོ་རྗེའི་རང་སྒྲ་སྔགས་འདི་དག་ལེགས་པར་གསན་འཚལ། རིག་འཛིན་སྲོག་འཁོར་དཔལ་གྱི་གདུ་བུ་ཚར་གཅིག་བཀླག དེ་ལྟར་སྡེ་གསུམ་རྒྱུད་ལུང་མན་ངག་གི་རྒྱལ་བ་ཡོངས་སུ་རྫོགས་པའི་ཐུགས་ཡེ་ཤེས་ཆེན་པོ་ཡི་གེའི་གཟུགས་སུ་ཤར་བ་གསུང་ཙཀྲའི་ཚུལ་དུ་ཆོས་སྐུའི་རིང་བསྲེལ་གྱི་དབང་བསྐུར་བར་མོས་མཛོད། རིག་འཛིན་སྲོག་འཁོར་སྤྱི་བོར་བཀོད་དེ། ཨཱཿ སྲས་བཅས་རྒྱལ་བ་ཀུན་གྱི་རྡོ་རྗེའི་གསུང༌། །ཡི་གེའི་འཁོར་ལོར་ཤར་བས་དབང་བསྐུར་བས། །ལས་རླུང་ཡེ་ཤེས་ཁམས་སུ་རྣམ་དག་པའི། །ཆོས་ཀྱི་རྒྱལ་སྲིད་མཆོག་ལ་དབང་བསྒྱུར་ཤོག །བཛྲ་ཝཱཀ་ཨ་བྷི་ཥིཉྩ་མི། དེས་སྤྲོས་མེད་གསང་བའི་དབང་མཐའ་རྟེན་དང་བཅས་པས་སྐུ་གསུང་ཐུགས་ཡེ་ཤེས་ཆེན་པོའི་བྱིན་རླབས་དང་རང་བྱུང་ཟག་མེད་བདེ་ཆེན་གྱི་ནུས་པ་རྒྱུད་ལ་ཞུགས་ཏེ་མཚན་མའི་རྟོག་པ་མཐའ་དག་འོད་གསལ་གྱི་དབྱིངས་སུ་ཟད་པའི་རྟེན་འབྲེལ་འགྲིགས་པ་ཡིན་ནོ།  །གསུམ་པ་ཤེས་རབ་ཡེ་ཤེས་ཀྱི་དབང་གི་སླད་དུ། མཚན་ལྡན་རིགས་ཀྱི་ཕྱག་རྒྱ་རྡོ་རྗེ་སྙེམས་མའི་ངོ་བོར་སྤྲོས་ཏེ་གསང་བའི་བརྟུལ་ཞུགས་ཀྱི་དོན་དུ་བྱིན་པར་མོས་ཤིག །རིག་ཙཀ་གཏད་ལ། ཧྲཱིཿ བཅུ་དྲུག་དགའ་བ་སྟེར་བའི་ཕོ་ཉ་མོ། །ཡིད་འོང་སྣ་ཚོགས་གཟུགས་ཅན་འདི་གཏད་ཅིང༌། །ལྷན་སྐྱེས་ཐར་པ་བསྟེན་པའི་དབང་བསྐུར་བས། །རྟོག་ཚོགས་བདེ་སྟོང་ཆེན་པོར་སྨིན་པར་ཤོག །ཨོཾ་ཨཱཿཧཱུྃ་མ་ཧཱ་གུ་རུ་ཛྙཱ་ན་སིདྡྷི་ཧཱུྃ༔ དྷརྨ་ཀཱ་ཡ་ཨ་བྷི་ཥིཉྩ་ཧཱུྃ། ཤེས་རབ་ཡེ་ཤེས་ཀྱི་དབང་དང་ཐུགས་ཀྱི་བྱིན་རླབས་ཐོབ་ཕྱིན་ཆད་སྣང་སྤྱོད་བདེ་སྟོང་གི་རོལ་པར་འཆར་ཕྱིར་བོགས་འབྱིན་ལས་ཀྱི་ཕྱག་རྒྱའི་ལམ་ལ་བསླབ་དགོས་པས་ཁྱེད་རང་རྣམས་རྡོ་རྗེ་སེམས་དཔའ་དང་རིག་མ་རྡོ་རྗེ་སྙེམས་མར་གསལ། མཁའ་གསང་བྱིན་གྱིས་བརླབས་ཏེ་འདུ་ཤེས་གསུམ་ལྡན་གྱིས་སྙོམས་པར་ཞུགས་པས་འདོད་ཆགས་ཆེན་པོའི་འགྲོས་ལས་སྐྱེས་པའི་ཡས་བབ་རྒྱུ་དང་མས་བརྟན་འབྲས་བུ་སྟེ་ལུགས་འབྱུང་ལྡོག་གི་དགའ་བ་བཅུ་དྲུག་ཉམས་སུ་མྱོང༌། ལྷན་ཅིག་སྐྱེས་པ་འཕོ་མེད་དོན་གྱི་ཡེ་ཤེས་མངོན་དུ་གྱུར་པར་མོས་ཤིག །ཅེས་བདེ་སྟོང་གི་དོན་ལ་མཉམ་པར་བཞག །དེ་ལྟར་ཤེས་རབ་ཡེ་ཤེས་ཀྱི་དབང་གི་ནུས་པས་སྦྱང་གཞི་དྲ་བ་བདེ་སྟོང་ཐུགས་རྡོ་རྗེའི་དཀྱིལ་འཁོར་ཉིད། སྦྱོང་བྱེད་ཕོ་ཉའི་མྱུར་ལམ་གྱི་སྤྱོད་པ་རྨད་དུ་བྱུང་བ་སྤྱད་པས། སྦྱངས་འབྲས་བདེ་སྟོང་འཕོ་འགྱུར་མེད་པའི་མཁའ་འགྲོའི་ཚོགས་རྗེ་དཔལ་ཧེ་རུ་ཀའི་བརྟུལ་ཞུགས་རྣལ་འབྱོར་སྤྱོད་པས་རྩ་རླུང་ཐིག་ལེའི་འགྲོ་འོང་ཐམས་ཅད་ཨ་ཝ་དྷུ་ཏིའི་སྲོག་ཏུ་ངལ་འཚོས་པ་ལ་ཕྱི་རྡོ་རྗེའི་གནས་ཡུལ་དུ་དཔའ་བོ་ཌཱ་ཀིའི་ཚོགས་ཀྱི་འདུ་བ་ལ་སྤྱོད་པ་གསུམ་གྱི་རྟེན་འབྲེལ་གྱིས་ནང་ས་བཅུའི་སྤངས་རྟོགས་རྫོགས་པའི་བདེན་དོན་དག་པའི་འདུ་བ་གསུམ་དང༌། འབར་བ་གསུམ་གྱི་ཡེ་ཤེས་ཀྱིས་བོགས་འབྱིན་པ་སྤྱོད་པའི་བརྟུལ་ཞུགས་ཀྱི་དབང་རྗེས་འབྲེལ་དུ་སྦྱིན་པའི་ཕྱིར། ཌཱ་ཀི་དབང་སྡུད་ཕེཾ་ཧཱུྃ་གི་སྒྲ་སྒྲོགས་པའི་ཌཱ་མ་རུ། བདེ་སྟོང་ཀ་པཱ་ལ། སྐུ་གསུམ་མཚོན་པའི་ཁཊྭཱཾ་ག །ཕ་རོལ་ཕྱིན་དྲུག་མཚོན་པའི་རུས་པའི་ཕྱག་རྒྱ་རྣམས་གཏད་དེ་ཐུགས་ཡེ་ཤེས་ཀྱི་དགོངས་པས་བྱིན་གྱིས་བརླབས་པར་མོས་ཤིག །རྣལ་འབྱོར་བརྟུལ་ཞུགས་སྤྱོད་པའི་ཡོ་བྱད་རྣམས་གཏད་ལ། ཧཱུྃ། ཕྱི་དང་ནང་གི་གནས་ཡུལ་དུར་ཁྲོད་ཀུན། །རྡོ་རྗེའི་བརྟུལ་ཞུགས་གཅིག་གིས་བགྲོད་པའི་སླད། །དཔའ་བོ་ཌཱ་ཀིའི་ཕྱག་རྒྱས་དབང་བསྐུར་བས། །ཉེ་རྒྱུའི་སྤྱོད་པའི་འབྲས་བུ་མཐར་ཕྱིན་ཤོག །བཛྲ་ཙིཏྟ་ཨ་བྷི་ཥིཉྩ་ཧཱུྃ། དེས་དབང་གསུམ་པ་ལས་སྐྱེས་པའི་དཔེ་ཡི་ཡེ་ཤེས་ཀྱིས་དོན་གྱི་ཡེ་ཤེས་སེམས་ཉིད་གཞི་མེད་རྩ་བྲལ་དུ་ངོ་སྤྲད་ཅིང་བསྒོམས་པས་ཀ་དག་དབྱིངས་ཀྱི་ཡེ་ཤེས་མངོན་སུམ་དུ་རྟོགས་ཏེ་ཆོས་ཉིད་ཟད་སར་འཁྱོལ་བའི་རྟེན་འབྲེལ་འགྲིགས་པ་ཡིན་ནོ།  །བཞི་པ་ཚིག་དབང་རིན་པོ་ཆེའི་སླད་དུ། དབྱིངས་ཀ་དག་ཤེལ་ལྟ་བུ་ལ་འོད་གསལ་ལྷུན་གྲུབ་ཀྱི་རང་གདངས་འཇའ་ཟེར་གྱིས་མཚོན་པའི་བརྡ་རྡོ་རྗེ་སེམས་དཔའི་མེ་ལོང་དང་རྡོ་རྗེའི་ཚིག་གིས་ཆོས་ཉིད་གཤིས་ཀྱི་བཞུགས་ཚུལ་ངོ་སྤྲད་པར་མོས་ཤིག །ཤེལ་རྡོ་བསྟན་ལ། ཧྲཱིཿ གཞི་དབྱིངས་ཀ་དག་གཉུག་མའི་དྭངས་ཤེལ་ལས། །གཞི་སྣང་ལྷུན་གྲུབ་རིག་པའི་འཇའ་ཟེར་ཤར། །ཟུང་འཇུག་དཔེ་དོན་འབྲེལ་བའི་དབང་བསྐུར་བས། །སྐུ་དང་ཡེ་ཤེས་དབྱེར་མེད་མངོན་གྱུར་ཤོག །ཨོཾ་ཨཱཿཧཱུྃ་མ་ཧཱ་གུ་རུ་ཛྙཱ་ན་སིདྡྷི་ཧཱུྃ༔ ཛྙཱ་ན་ཀཱ་ཡ་ཨ་བྷི་ཥིཉྩ་ཧྲཱིཿ དེ་ལྟར་བཞི་པ་ཚིག་དབང་རིན་པོ་ཆེ་ཡེ་ཤེས་རྡོ་རྗེའི་བྱིན་རླབས་ཐོབ་ཕྱིན་ཆད་གནས་ལུགས་ཁྱབ་བརྡལ་ཆེན་པོའི་དོན་ལ་མཉམ་པར་བཞག་དགོས་པས། ཁྱེད་རང་རྣམས་ལུས་གནད་སྐྱིལ་ཀྲུང་དྲང་པོར་བསྲང༌། ངག་གནད་མ་བཅོས་རང་བབ་ཏུ་བཞག །སེམས་གནད་རིག་པ་སྐད་ཅིག་མ་རང་ངོ་ཤེས་ཙམ་བཅོས་བསྒྱུར་གྱིས་མ་བསླད་པར། གདོད་མ་ཉིད་ནས་ཆོས་སྐུ་ཁྱབ་བརྡལ་ཆེན་པོ་རང་ལ་ལྷུན་རྫོགས་སུ་བཞུགས་པ་མངོན་སུམ་དུ་མཐོང་བ་ལ་ངེས་ཤེས་སྐྱེད་ལ་མཉམ་པར་ཞོག་ཅིག །རྗེས་འབྲེལ་གཉིས་ཀས་མཉམ་པར་བཞག་ངང་ཨ་ཞེས་དགོངས་པའི་དྲོད་གཏད་ཅིང༌། །ཕཊ་ཀྱིས་རིག་པ་གོང་དུ་སྤར། །ཞེས་གསུངས་པ་ལྟར་བྱ། དེའང་དབང་རྣོན་ངོ་སྤྲད་པ་སྒོམ་པས་ཉམས་སུ་བླངས་ཏེ་སྦྱང་གཞི་འོད་གསལ་དྲྭ་བ་བླ་མ་ཡེ་ཤེས་རྡོ་རྗེའི་དཀྱིལ་འཁོར་ཉིད། སྦྱོང་བྱེད་ཀ་དག་ཁྲེགས་ཆོད་དང་ལྷུན་གྲུབ་ཐོད་རྒལ་ཟུང་འཇུག་གི་གསེང་ལམ་ཆེན་པོ་གནད་དུ་བསྣུན་པས། སྦྱངས་འབྲས་སྐུ་གསུམ་ལྷུན་རྫོགས་གདོད་མའི་གཞི་ཀློང་དུ་སྐད་ཅིག་གིས་བྱེ་བྲག་ཕྱེད་དེ་སངས་རྒྱས་པའི་ཕྱིར། དེ་ཡང་ཇི་སྐད་དུ། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགག་ནམ་མཁའི་ངོ་བོ་ཉིད། །སོ་སོ་རང་རིག་ཡེ་ཤེས་སྤྱོད་ཡུལ་བ། །དུས་གསུམ་རྒྱལ་བའི་ཡུམ་གྱུར་རྫོགས་པ་ཆེ། །ཞེས་གསུངས་པ་ལྟར་རྟོག་གེ་དང་སོ་སྐྱེའི་བློས་ཡིད་དཔྱོད་ཀྱི་ཡུལ་ལས་འདས་པའི་ཆོས་ཀུན་གྱི་གཤིས་ལུགས་དབྱིངས་རིག་ཟུང་འཇུག་གི་ལྟ་བ་ལུང་རིགས་དང་འབྲེལ་བས་གཏན་ལ་ཕབ་སྟེ་རང་ཐོག་ཏུ་ངོ་སྤྲད་པའི་དོན་སྒོམ་པ་མ་བཅོས་ཅོག་བཞག་བཞིས་ངང་བསྐྱངས་ནས་བཟོ་བཅོས་བྲལ་བ་ཆོས་ཉིད་འོད་གསལ་ཆེན་པོའི་ལྷུམས་སུ་ཞུགས་ཏེ་གྲོགས་སྤྱོད་པས་བོགས་འབྱིན་ཚོགས་དྲུག་གང་ཤར་འཛིན་མེད་རང་གྲོལ་ལམ་དུ་ཁྱེར་བས། འབྲས་བུ་སྐུ་དང་ཡེ་ཤེས་ལྷུན་འབྱམས་ཆེན་པོར་མངོན་པར་བྱང་ཆུབ་པའི་ཕྱིར་ལུས་བཞུགས་སྟངས་གསུམ། མིག་གཟིག་སྟངས་གསུམ་ལས་མི་གཡོ་བ་སྒོ་ཡུལ་རླུང་རིག་གི་གནད་ཀྱིས་གཅུན་ཏེ་སྒྲོན་མ་དྲུག་ལྡན་འོད་གསལ་ཡེ་ཤེས་རིན་པོ་ཆེའི་གསང་མཛོད་ལ་སྤྱོད་པས་ཆོས་ཉིད་མངོན་སུམ་མཐོང༌། ཉམས་གོང་དུ་འཕེལ། རིག་པ་ཚད་ལ་ཕེབས། ཆོས་ཉིད་ཟད་སར་ཕྱིན་ནས་སྐུ་གསུམ་ལམ་སྣང་དུ་རྫོགས་ཏེ་ཕྱི་ནང་གསང་བའི་ཟག་པ་དབྱིངས་སུ་ཟད། འབྱུང་བཞི་འོད་དུ་དེངས། དྲན་རིག་གཞི་གྲོལ་ཁྱད་པར་དྲུག་ལྡན་སྣང་བཞི་མཐར་ཕྱིན་འཕོ་ཆེན་འཇའ་ལུས་རྡོ་རྗེའི་སྲོག་གྲུབ་པར་མཛོད་ཅིག །དེས་ལྷུན་གྲུབ་མངོན་སུམ་གྱི་དོན་ཉམས་སུ་ལེན་པ་ལ་དབང་ཞིང༌། སྣང་བཞི་མཐར་ཕྱིན་ནས་འཇའ་ལུས་འཕོ་ཆེན་གཞོན་ནུ་བུམ་པ་སྐུར་བྱང་ཆུབ་པའི་རྟེན་འབྲེལ་འགྲིགས་པ་ཡིན་ནོ།  །ལྔ་པ་དབང་བཞི་ཡོངས་སུ་རྫོགས་པའི་མཐའ་རྟེན་དུ་བཀའ་ལུང་ཡོངས་རྫོགས་གཏད་རྒྱའི་དབང་བསྐུར་བ་སྟེ། སློབ་དཔོན་ཀུན་མཁྱེན་ཆོས་ཀྱི་རྒྱལ་པོ་དངོས་སུ་གསལ་བས་སྙིང་ཐིག་གི་གླེགས་བམ་སྤྱི་བོར་བཀོད་ཅིང་དགོངས་བརྒྱུད་བྱིན་རླབས་འཕོ་བའི་དབང་བསྐུར་བས། མདུན་གྱི་ནམ་མཁར་ཕྱོགས་དུས་རྩ་བརྒྱུད་བླ་མ་ཡི་དམ་རྒྱལ་བ་ཞི་ཁྲོ་མཁའ་འགྲོ་ཆོས་སྐྱོང་སྲུང་མ་རྒྱ་མཚོ་རྣམས་མངོན་སུམ་དུ་བཞུགས་པའི་གནས་གསུམ་ནས་སྐུ་དང་སྔགས་ཕྲེང་ཕྱག་མཚན་འོད་ཟེར་ཐིག་ལེ་ཡིག་འབྲུ་དཀར་དམར་མཐིང་གསུམ་ཆར་བབས་པ་ལྟར་བྱོན་ནས་ཁྱེད་རང་རྣམས་ཀྱི་གནས་གསུམ་དུ་ཐིམ་པས་བརྒྱུད་གསུམ་རིག་འཛིན་ཌཱ་ཀིའི་སྐུ་གསུང་ཐུགས་ཡེ་ཤེས་རྡོ་རྗེའི་གསང་བ་མི་ཟད་རྒྱན་གྱི་འཁོར་ལོ་དང་གཉིས་སུ་མེད་པའི་དབང་དང་བྱིན་རླབས་དངོས་གྲུབ་མ་ལུས་པ་ཐོབ་པར་མོས་ཤིག །སྙིང་ཐིག་གི་གླེགས་བམ་སྤྱི་བོར་བཀོད་ལ། ཨོཾ་ཨཱཿཧཱུྃ། ཀུན་བཟང་རྡོ་རྗེ་སེམས་དཔའ་དགའ་རབ་རྗེ། །འཇམ་དཔལ་བཤེས་གཉེན་ཤྲཱི་སིང་ཧ་དང༌། །ཛྙཱ་ན་སཱུ་ཏྲ་འཆི་མེད་པདྨ་འབྱུང༌། །འོད་གསལ་སྙིང་པོའི་ཤིང་རྟ་བི་མ་ལ། །དབྱེར་མེད་ཀུན་མཁྱེན་ཆོས་ཀྱི་རྒྱལ་པོ་ཡི། །སྐུ་གསུང་ཐུགས་དང་ཡོན་ཏན་ཕྲིན་ལས་ཀྱི། དེང་འདིར་སྐལ་ལྡན་ཁྱོད་ལ་བྱིན་བརླབས་པས། །ཅིར་སྣང་སྒྱུ་འཕྲུལ་དྲྭ་བའི་འཁོར་ལོར་ཤར། །སྒྲ་གྲགས་མི་ཤིགས་རྡོ་རྗེའི་དབྱིངས་སུ་སྨིན། །ཀ་དག་རིག་པ་གདོད་མའི་ལྷུམས་སུ་ཞུགས། །ལྷུན་གྲུབ་སྣང་བ་རྣམ་བཞིའི་རྩལ་རྫོགས་ནས། །ཚེ་གཅིག་འཇའ་ལུས་རྡོ་རྗེའི་སྲོག་འགྲུབ་ཤོག །ཨོཾ་ཨཱཿཧཱུྃ་མ་ཧཱ་གུ་རུ་ཛྙཱ་ན་སིདྡྷི་ཧཱུྃ༔ བཛྲ་ཀཱ་ཡ་ཝཱཀ་ཙིཏྟ་གུ་ཎ་ཀརྨ་སིདྡྷི་ཨ་བྷི་ཥིཉྩ་མི། དེ་ལྟར་དབང་གི་ཡེ་ཤེས་སྐྱེད་བརྟན་གོང་འཕེལ་དུ་བྱ་བའི་ཕྱིར་མཁའ་དབྱིངས་གང་བའི་རྒྱལ་བ་སྲས་དང་བཅས་པས་ལྷའི་མེ་ཏོག་གི་ཆར་དང་ཤིས་པའི་ཚིག་གི་གླུ་དབྱངས་དི་རི་རི་སྒྲོགས་པས་ཕྱོགས་དུས་གནས་སྐབས་ཀུན་ཏུ་དགེ་ལེགས་ཀྱི་སྣང་བས་ཁྱབ་པར་མོས་ཤིག །ལས་བྱང་གི་ཤིས་བརྗོད་སོགས་བརྗོད་ལ། མེ་ཏོག་འཐོར་ཞིང་རོལ་མོའི་སྒྲ་རྒྱུན་རིང་དུ་བྱའོ།  ༈  ཞར་བྱུང་མྱོང་གྲོལ་རིལ་བུའི་དབང་སྦྱིན་པར་འདོད་ན་གཞུང་ལས། དེ་སོགས་སྒྲུབ་པའི་རྟགས་ཐོན་ནས། །རིལ་བུ་རིགས་འདུས་བླ་མར་བསྐྱེད། །བདག་འཇུག་ཚུལ་གྱིས་དངོས་གྲུབ་བླང༌། །གཞན་ལ་སྨིན་བྱེད་ཆོ་གས་སྦྱིན། །ཞེས་གསུངས་པས་བུམ་དབང་བསྐུར་ཟིན་པ་དང༌། མཐའ་རྟེན་མྱོང་གྲོལ་དམ་རྫས་རིལ་བུའི་དབང་སྦྱིན་པ་ལ། བུམ་པ་རང་བྱུང་གི་གཞལ་མེད་ཁང་ལྷུན་གྱིས་རྫོགས་པའི་ནང་དུ་རིག་འཛིན་དཔལ་མགོན་བླ་མའི་ལྷ་ཚོགས་རྣམས་བཞུགས་པའི་སྐུ་ལས་རྡོ་རྗེའི་གསང་བ་གསུམ་གྱི་བྱིན་རླབས་ཐམས་ཅད་འོད་ཟེར་བདུད་རྩིའི་རྒྱུན་གྱི་རྣམ་པས་དབང་བསྐུར་བར་མོས་ཤིག །རིལ་བུའི་བུམ་པ་སྤྱི་བོར་བཀོད་དེ། དབྱིངས་ཀྱི་བུམ་པར་རིག་པའི་ལྷ་ཚོགས་རྣམས། །ཡེ་ཤེས་ཐུགས་རྗེའི་གཟི་བྱིན་རབ་འབར་བས། །སྒོ་གསུམ་རྡོ་རྗེ་གསུམ་དུ་བྱིན་བརླབས་ནས། །དངོས་གྲུབ་སྩོལ་ཞིང་བརྟན་པར་མཛད་དུ་གསོལ། ཨོཾ་ཨཱཿཧཱུྃ་མ་ཧཱ་གུ་རུ་ཛྙཱ་ན་སིདྡྷི་ཧཱུྃ། ཀཱ་ཡ་ཝཱཀ་ཙིཏྟ་སརྦ་སིདྡྷི་ཕ་ལ་ཧཱུྃ། ཞེས་བརྗོད་ཅིང་གནས་གསུམ་དུ་གཏུག །རིལ་བུ་ལྷར་གསལ་བ་རྡོ་རྗེ་ལྕེའི་ལམ་ནས་བརྒྱུད་དེ་སྙིང་དབུས་མི་ཤིགས་པའི་ཐིག་ལེ་དང་དབྱེར་མེད་པ་ཡེ་ཤེས་སེམས་དཔའི་ཚུལ་གྱིས་བྱང་ཆུབ་བར་དུ་བཞུགས་ཤིང་དངོས་གྲུབ་སྩོལ་བར་གྱུར་པའི་མོས་པས་མྱོང་དུ་གཞུག  ༈  རིག་འཛིན་སྲོག་འཁོར་དཔལ་གྱི་གདུ་བུའི་དབང་བསྐུར་ན། གཞུང་ལས། དབང་བསྐུར་བྱེད་ན་སྡོམ་པ་གསུམ། །ཆོ་ག་བཞིན་དུ་བཟུང་བྱས་ལ། །བསྟན་བུར་བརྒྱ་ཕྱག་མཎྜལ་ཕུལ། །ཚར་གཅིག་བཀླག་ལ་སྤྱི་བོར་བཞག །ཅེས་གསུངས་པ་ལྟར་བླ་སྒྲུབ་འདི་དང་རྗེས་འབྲེལ་དུ་བསྐུར་ན་ལེགས་པས་དབང་བཞི་པ་གྲུབ་པ་དང༌། ན་རཀ་སྐོང་བཤགས་སམ་བརྗོད་མེད་དོན་བཤགས་གང་རུང་སྔོན་དུ་འགྲོ་བས་ཡིག་བརྒྱ་བཟླ་བ་དང་བཅས་ཕྱག་བརྒྱ་ཕྲག་འཚལ་ལ། དེ་ཡང་སངས་རྒྱས་ཐམས་ཅད་ཐབས་མཁས་ཐུགས་རྗེའི་རྣམ་རོལ་ཚད་མེད་པས་སེམས་ཅན་རྣམས་རང་བཞིན་གྱིས་གྲོལ་བར་མཛད་པའི་ཕྲིན་ལས་ཀྱི་བྱེ་བྲག །གདུལ་དཀའ་ཤིན་ཏུ་རྨོངས་ཤིང་དམུ་རྒོད་སེམས་ཅན་རྣམས་རྒྱུ་འབྲས་རྩོལ་བཅས་ཀྱི་ཐེག་པས་འདུལ་བའི་ཞིང་དུ་མ་གྱུར་པ་ལ་ཕྲིན་ལས་ཀྱི་འཇུག་ཚུལ་བསམ་གྱིས་མི་ཁྱབ་པས་གྲོལ་བའི་ཚུལ་སོ་སོར་འབྲང་མའི་འཁོར་ལོ་གདགས་པས་སྦྱོར་ལམ་ཟིན་པ་དང༌། སྐྱེ་བདུན་གྱི་ཤས་མཁའ་སྤྱོད་གྲུབ་པ་དང༌། པདྨ་གཙུག་ཏོར་གྱི་རིག་སྔགས་བཏབ་པའི་བདུག་སྤོས་ཀྱི་དྲི་ཚོར་བས་ངན་སོང་གི་སྒོ་གཅོད་པ་སོགས་གསར་རྙིང་གི་མདོ་རྒྱུད་དུ་མ་དང༌། ཁྱད་པར་རྙིང་མ་བཀའ་གཏེར་གྱི་རྒྱུད་དང་མན་ངག་ནས་གསུངས་པའི་གྲོལ་བ་དྲུག་ལྡན་མ་བསྒོམས་སངས་རྒྱས་ཆོས་ལྔའི་གསེང་ལམ་དུ་གྲགས། ཐུགས་རྗེ་ཕྱོགས་སུ་མ་ཆད་པས་དུད་འགྲོ་ཡན་ཆད་ཀྱི་རྒྱུད་ལ་ཐར་པའི་ས་བོན་འདེབས་པའི་ངོ་མཚར་རྨད་དུ་བྱུང་བའི་ཕྲིན་ལས་ཀྱི་ཡ་གྱལ་འོད་གསལ་རྫོགས་པ་ཆེན་པོའི་རྒྱུད་དང་མན་ངག་དུ་མ་ནས་ཡང་ཡང་བསྟན་པའི་བཏགས་གྲོལ་ཙཀྲའི་དབང་སྦྱིན་པ་སྟེ། དེ་ལའང་བཀའ་གཏེར་མན་ངག་གི་དགོངས་པས་རྣམ་གྲངས་མི་འདྲ་བ་དུ་མ་ལས་སྐབས་འདིར་ཀློང་ཆེན་སྙིང་གི་ཐིག་ལེའི་ཆོས་སྡེ་ལས་བྱོན་པའི་རྒྱལ་བ་རིག་འཛིན་སྲོག་འཁོར་དཔལ་གྱི་གདུ་བུའི་དབང་བསྐུར་ཞུ་བའི་དོན་དུ་མཎྜལ་ཕུལ། འདི་ཉིད་ཁོ་ན་སྒེར་དུ་བྱེད་ན། སྐྱབས་སེམས། སློབ་མ་ལྷར་བསྐྱེད། བྱིན་འབེབས་བཅས་དགོས་པས་རིགས་མཐུན་གྱི་ཆོ་ག་ཞི་ཁྲོ་སོགས་གང་རུང་ལྟར་བྱས་ཀྱང་རུང་བར་མངོན་མོད། འདིར་བླ་སྒྲུབ་ཐིག་ལེའི་རྒྱ་ཅན་གྱི་གཞུང་དང་འབྲེལ་བའི་དབང་བསྐུར་སྔོན་དུ་གྲུབ་པའི་དབང་དུ་བྱས་ཏེ། བཏགས་གྲོལ་གྱི་འཁོར་ལོ་འདི་ཉིད་སངས་རྒྱས་ཀུན་གྱི་སྤྱི་མེས་ཀུན་མཁྱེན་ཆོས་ཀྱི་རྒྱལ་པོའི་འོད་གསལ་ཡེ་ཤེས་ཀྱི་སྐུ་ཡི་ཐུགས་ཆོས་དབྱིངས་ཁྱབ་བརྡལ་ཆེན་པོའི་ཀློང་དུ་བདེ་གཤེགས་ཞི་བ་བཞི་བཅུ་རྩ་གཉིས་དང༌། དེའི་རང་རྩལ་སྤྱི་བོ་བདེ་ཆེན་གྱི་འཁོར་ལོའི་དབུས་སུ་ཁྲག་འཐུང་ལྔ་ཅུ་རྩ་བརྒྱད་ཀྱི་ཚོམ་བུ་དང༌། གཞན་ཡང་ཕུང་ཁམས་སྐྱེ་མཆེད་ཐམས་ཅད་གདོད་ནས་རྣམ་པར་དག་པ་ཞི་ཁྲོ་རབ་འབྱམས་རྒྱལ་བའི་སྤྱི་གཟུགས་ཆེན་པོར་ལམ་གྱིས་གསལ་བའི་འཁོར་དུ་བླ་མ་ཡི་དམ་མཁའ་འགྲོ། སངས་རྒྱས་བྱང་སེམས་སོགས་ཕྱོགས་དུས་སྐྱབས་ཡུལ་རྒྱ་མཚོས་བསྐོར་བ་གཙོ་འཁོར་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་དབང་དང་བྱིན་རླབས་དངོས་གྲུབ་ཐམས་ཅད་སྐུ་སྔགས་ཕྱག་མཚན་འོད་ཟེར་སྣ་ལྔའི་རྣམ་པར་བྱུང་བ་ཁྱེད་རྣམས་ཀྱི་གནས་ལྔར་རིམ་དང་ཅིག་ཅར་དུ་ཐིམ་པས་ཉོན་མོངས་པ་དུག་ལྔའི་འཁྲུལ་རྟོག་སངས་ཀྱིས་དག །འོད་གསལ་ཁྱབ་བརྡལ་ཆེན་པོ་རང་རིག་སྐུ་བཞི་ཡེ་ཤེས་ལྔ་ལྡན་གྱི་གོ་འཕང་མངོན་དུ་གྱུར་ཏེ་བཅོམ་ལྡན་འདས་ཞི་ཁྲོ་རབ་འབྱམས་རྒྱལ་བའི་སྤྱི་གཟུགས་ཆོས་སྐུ་ཀུན་ཏུ་བཟང་པོ་དང་སྐལ་པ་མཉམ་པས་མཐོང་ཐོས་དྲན་རེག་གི་སེམས་ཅན་ཐམས་ཅད་ཆོས་ཉིད་གདོད་མའི་ཀློང་དུ་སྐད་ཅིག་གིས་སྒྲོལ་ནུས་པའི་མཁྱེན་བརྩེ་ནུས་པའི་ཡེ་ཤེས་བསམ་མི་ཁྱབ་པའི་དབང་ཐམས་ཅད་སྐད་ཅིག་གིས་ཐོབ་པར་མོས་ཤིག །འཁོར་ལོའི་གཏེར་གཞུང་ཉིད་ཚར་གཅིག་དག་པར་བཀླག་ལ། ཧོ༔ རྒྱལ་བ་རིག་འཛིན་ཞི་ཁྲོའི་ལྷ༔ བཏགས་གྲོལ་སྲོག་གི་འཁོར་ལོ་འདིས༔ སྐལ་ལྡན་སློབ་མ་འདི་རྣམས་ཀྱི༔ སྒོ་གསུམ་སྨིན་པར་མཛད་དུ་གསོལ༔ གྲོལ་ཞིང་གང་བར་མཛད་དུ་གསོལ༔ རྒྱས་དང་འཕེལ་བར་མཛད་དུ་གསོལ༔ ཀཱ་ཡ་ཝཱཀ་ཙིཏྟ་རཏྣ་ཀརྨ་ཨ་བྷི་ཥིཉྩ་སྭཱ་ཧཱ༔ ཞེས་བརྗོད་དེ་གནས་ལྔར་གཏུགས། སྤོས་བསྲེགས། རོལ་མོ་བསྒྲགས་མཐར། དཔོན་སློབ་ཀུན་གྱིས་སམ་སློབ་དཔོན་གྱིས་བརྗོད་དེ་འདུན་པ་རྩེ་གཅིག་པས། ཨོཾ་ཧཱུྃ་ཏྲཱྃ་ཧྲཱིཿཨཱཿ སངས་རྒྱས་ཐམས་ཅད་ཀྱི་སྲས་གཅིག་པོ༔ གསེར་གྱི་ཉི་མ་རབ་ཏུ་སྣང་བྱེད༔ གསང་བ་སྤྱོད་པ་ས་བོན་གྱི་དགོངས་པ་ཆེན་པོ་ཡོངས་རྫོགས་ཀྱིས༔ སྐལ་ལྡན་སྐྱེས་བུ་འདུས་ཤིང་ཚོགས་པ་རྣམས་ཀྱི་ལུས་ངག་ཡིད་གསུམ༔ ཕུང་པོ་ཁམས་དང་སྐྱེ་མཆེད་ཐམས་ཅད་བྱིན་གྱིས་བརླབ་ཏུ་གསོལ༔ ལུས་ངག་ཡིད་གསུམ་ཕུང་པོ་ཁམས་དང་སྐྱེ་མཆེད་རང་སར་གྲོལ་ནས༔ ཡོངས་སུ་སྨིན་པར་མཛད་དུ་གསོལ༔ རྒྱལ་བའི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་ཀློང་དུ་གྲོལ་བར་མཛད་དུ་གསོལ༔ ཉོན་མོངས་པ་ཐམས་ཅད་རང་སར་གྲོལ་ཞིང༔ རྒྱུད་ཡེ་ཤེས་ཀྱི་གང་བར་མཛད་དུ་གསོལ༔ འཁྲུལ་པའི་བག་ཆགས་རང་སར་དག་ནས༔ སྐུ་དང་ཡེ་ཤེས་ཀྱི་ཐིག་ལེ་ཆེར་འཕེལ་བར་མཛད་དུ་གསོལ༔ རྒྱལ་བའི་དཀྱིལ་འཁོར་ཞིང་རབ་འབྱམས་མཐའ་ཡས་པར་མྱུར་དུ་སངས་རྒྱས་པར་མཛད་དུ་གསོལ༔ སངས་རྒྱས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པས་བྱིན་གྱིས་བརླབ་ཏུ་གསོལ༔ ཨོཾ་ཨཱཿཧཱུྃ་ཀཱ་ཡ་ཝཱཀ་ཙིཏྟ་བུདྡྷབཛྲ་རཏྣ་པདྨ་ཀརྨ་སརྦ་དྷརྨ་སྭ་བྷ་ཝ་ཨ་བྷི་ཥིཉྩ་སྭཱ་ཧཱ༔ དེ་ལྟར་ཇི་སྐད་བརྗོད་པ་ཐམས་ཅད་ངེས་པར་འགྲུབ་པར་གདོན་མི་ཟ་སྟེ་གཏེར་གཞུང་རྡོ་རྗེའི་ཚིག་རྐང་དངོས་ལས། འདི་ནི་ཆོས་སྐུའི་རིང་བསྲེལ་དངོས༔ སྡེ་སྣོད་རྒྱུད་ལུང་མན་ངག་དང༔ རྒྱལ་བ་ཡོངས་རྫོགས་སྲོག་འཁོར་ཡིན༔ སྤྱི་བོ་མགྲིན་པ་མཆན་ཁུང་དུ༔ སུས་བཅང་སྡིག་པ་ཀུན་ལས་གྲོལ༔ དུས་གསུམ་རྒྱལ་བ་བསྙེན་དང་མཚུངས༔ འདས་དུས་གདུང་དང་རིང་བསྲེལ་དང༔ ས་གཡོ་སྒྲ་འོད་འཇའ་ཚོན་འབྱུང༔ ཞེས་གསུངས་པའི་དོན་ལ་ངེས་ཤེས་སྐྱེད་དེ་མཉམ་པར་ཞོག་ཅིག །དེ་ལྟར་དབང་ཐོབ་ཕྱིན་ཆད་རྡོ་རྗེ་འཆང་གི་དུས་གནད་ངེས་པ་ལས་ཇི་ལྟར་གསུངས་པ་ལྟར་འཁོར་ལོ་དྲོད་དང་མ་བྲལ་བར་བཅངས་ཤིང་རིག་སྟོང་འོད་གསལ་ཆེན་པོའི་ལྟ་དགོངས་ཀྱི་ཏིང་ངེ་འཛིན་དང་མ་བྲལ་བས་བཀླག་པ་སོགས་མཛོད་ཅིག །ཤིས་བརྗོད་སོགས་སྤྱི་ལྟར་བྱའོ། །དེ་དག་ནི་བརྒྱུད་པ་མི་འཆད་པའི་ཕྱིར་བཀོད་པ་ཡིན་གྱི་བླ་སྒྲུབ་དཀྱུས་ཀྱི་དབང་ལ་རིལ་བུ་དང༌། བཏགས་གྲོལ་མ་བསྐུར་ཡང་ཆད་སྐྱོན་དུ་མི་འགྱུར་རོ། །དེ་དག་གིས་ཀློང་ཆེན་སྙིང་གི་ཐིག་ལེའི་ཟབ་ཆོས་མཐར་ཐུག་ཡང་གསང་བླ་མའི་སྒྲུབ་པ་འོད་གསལ་ཐིག་ལེའི་རྒྱ་ཅན་གྱི་ཐུན་མོང་མ་ཡིན་པའི་དབང་བསྐུར་ཚང་སྤྲུགས་སུ་ཕུལ་གྲུབ་པ་ལགས་པས་སྣང་གྲགས་རིག་པ་བླ་མའི་རྡོ་རྗེ་གསུམ་གྱི་དཀྱིལ་འཁོར་དུ་གདོད་ནས་ལྷུན་རྫོགས་ཆེན་པོར་བཞུགས་པའི་གནས་ལུགས་དང་མཐུན་པར་ལམ་དུ་བྱེད་པས་ཡེ་སྲུང་ཐིག་ལེ་ཆེན་པོའི་དམ་ཚིག་རྡོ་རྗེ་བཞི་རུ་ལ་བཟླ་བའི་འདུན་པས་འདིའི་རྗེས་ཟློས་མཛོད། གཙོ་བོས་ཇི་ལྟར་སོགས་དམ་ཚིག་ཁས་བླང༌། གཏང་རག་ཡོན་འབུལ་གྱི་རྗེས་དཔོན་སློབ་ཐམས་ཅད་དགའ་སྟོན་ཚོགས་འཁོར་དང༌། རྡོ་རྗེའི་གླུ་གར་ཡང་བྱས་རྗེས་སྨོན་ལམ་དང་བཅས་ཏེ་གྲོལ། སློབ་དཔོན་གྱིས་ལྷག་མ་ནས་བརྩམས་ཆོ་གའི་ལས་རིམ་མཐར་དབྱུང་དགོས་སོ། །ཀུན་མཁྱེྃན་དགོངས་བཅུད་ཟབ་གསང་ཆོས། །བྃརྩེ་བས་འགྲོ་ལ་སྣང་མཛད་ལམ། །སྨིན་གྲོལ་འོདྃ་ཟེརྃ་འབུམ་ཕྲག་དཔལ། །དུས་མཐར་གསལ་ཞིང་རྒྱས་ལ་ལྟོས། །པཎ་ཆེན་བི་མ་ལ་དང་ཀུན་མཁྱེན་ཆེན་པོ་དབྱེར་མེད་པའི་ཡང་གསང་བླ་མའི་སྒྲུབ་པ་འོད་གསལ་ཐིག་ལེའི་རྒྱ་ཅན་གྱི་སྨིན་བྱེད་རྒྱས་པར་སྤྲོས་པ་འཕྲོས་དོན་དང་བཅས་པའི་ལེའུ་ཚན་བཅུ་པ་སྟེ་འོད་གསལ་སྣ་ཚོགས་རང་གྲོལ་གྱིས་སྦྱར་བའོ།  ༈  ཕྲིན་ལས་ཀྱི་རྩ་བ་རིག་འཛིན་ཡུམ་ཀ་བདེ་ཆེན་རྒྱལ་མོ་ལའང་ཕྱི་ནང་གསང་བའི་སྒྲུབ་ཚུལ་གསུམ་ལས་ཀུན་གྱི་རྩ་བ་ཕྱི་སྒྲུབ་བདེ་ཆེན་དཔལ་ཕྲེང་གི་བྱིན་རླབས་དབང་གི་ཆོ་ག་ནི་འཇམ་མགོན་པདྨ་གར་དབང་གི་གསུང་བདེ་ཆེན་བཅུད་འབེབས་དང༌། རྡོ་གྲུབ་ཐམས་ཅད་མཁྱེན་པ་བསྟན་པའི་ཉི་མའི་གསུང་དབང་གི་མཚམས་སྦྱོར་མུ་ཏིག་ཆུན་པོ་བཞུགས་བཞིན་དང༌། ནང་སྒྲུབ་སྒྲོལ་མ་ཉེར་གཅིག་གི་རྗེས་གནང་ཀུན་མཁྱེན་གཉིས་པ་མཁྱེན་བརྩེའི་དབང་པོས་སྔོན་གནས་རྗེས་དྲན་གྱིས་གཏན་ལ་ཕབ་པ་ཁྱབ་བདག་དཔལ་མགོན་བླ་མ་པདྨ་ཡེ་ཤེས་རྡོ་རྗེའམ་ཀུན་མཁྱེན་ཆོས་ཀྱི་བློ་གྲོས་རིན་པོ་ཆེའི་བཀའ་དྲིན་གྱིས་དཔྱིད་ལས་སྙིང་གི་བུམ་པར་སིམ་པའི་སྐལ་བཟང་མངོན་དུ་གྱུར་པའི་དཔེ་རྒྱུན་ཐོབ་ན་འདིར་བཞུགས་སུ་གསོལ་དགོས་ལ། ནང་སྒྲུབ་ལས་ཚོགས་བཞི་བ་ཚེ་དབང་དང༌། བཅོ་བརྒྱད་པ་སྒྲོལ་མ་རྣལ་འབྱོར་མའི་དུག་དབྱུང་བྱབ་ཁྲུས་རྣམས་ཀུན་མཁྱེན་ཉིད་དང༌། རིགས་བདག་འོད་དཔག་མེད་པའི་དབང་ཆོག་རྡོ་གྲུབ་འཇིགས་མེད་ཕྲིན་ལས་འོད་ཟེར་དང༌། ཚེ་དབང་ཁོལ་བྱུང་མཁྱེན་བརྩེ་རིན་པོ་ཆེའི་གསུངས་རྣམས་དཔེ་རྒྱུན་བཞུགས་བཞིན་པའོ།  ༈  སྟོང་ཆེན་དབྱིངས་ཀྱི་སྲོག་ཏུ་ཡེ་ཤེས་རྩལ། །སྟོབས་བཅུའི་དབང་པོའི་མཚོན་གྱིས་བདུད་སྡེའི་གྲོང༌། །འཇོམས་མཛད་དྲག་མོ་བདུད་འདུལ་སེང་གེའི་ཞལ། །རང་རིག་གཉུག་མའི་ཐིག་ལེར་དགྱེས་རྩེན་མཛོད། །རིག་འཛིན་ཡུམ་ཀའི་གསང་སྒྲུབ་སེང་གེའི་གདོང་ཅན་གྱི་དབང་ཆོག་བྱིན་རླབས་ཆུན་པོ་ལ། གཞུང་མཐུན་གྱི་དཀྱིལ་འཁོར་དབུས་སུ་ཆོས་འབྱུང་བསྣོལ་མའི་སྟེང་མཁའ་འགྲོའི་དཔལ་གཏོར། ཆོས་འབྱུང་གི་ཟུར་དྲུག་ལ་འཁོར་རང་འདྲ་དྲུག །རྩ་བར་མཐེབ་ཀྱུ་སུམ་ཅུ་རྩ་གཉིས་ཀྱིས་བསྐོར་བ་རྒྱན་སྤྲོས་སྐུ་ཙཀ་དར་གདུགས་ཀྱིས་སྤྲས་པ་དང༌། རཀྴའི་ཕྲེང་བ། ཕྱག་མཚན་ཁཊྭཱཾ་ག །གྲི་ཐོད་བཅས་དངོས་སམ་ཙཀླི་དང༌། ཕྱི་ནང་གི་མཆོད་པ་དང་ལས་བུམ་སོགས་སྤྱི་ལྟར་ཚོགས་པར་བྱས་ལ། བརྒྱུད་འདེབས་ནས་བརྩམས་ལས་བྱང་བསྙེན་པའི་བར་གཞུང་བསྲང༌། བདག་མདུན་དབྱེར་མེད་དུ་གསུངས་ཀྱང་རྟོགས་དགོངས་དམན་ན་ཛཔ་ཁང་དབྱེ་ལ་བསྙེན་སྒྲུབ་ཀྱི་བཟླས་པ་བྱ། ལས་བུམ་སྒྲུབ་པ་དང་ཚོགས་སྐོང་སོགས་དང་རིག་པའི་མེ་ཏོག་དོར་ཏེ་གནང་བ་ཞུས་རྗེས། སློབ་མ་རྣམས་ཁྲུས་ནས་དབྱུང༌། བགེགས་བསལ། སྲུང་འཁོར་བསྒོམ་རྗེས་ལོ་རྒྱུས་དངོས་ལ། དེའང་ཆོས་ཀྱི་དབྱིངས་ལས་གདོད་ནས་རྣམ་པར་དག་པའི་རང་རྩལ་བདེ་ཆེན་བྱང་ཆུབ་ཀྱི་སེམས་ཀྱི་རོལ་པ་ཤིན་ཏུ་ཕྲ་བའི་རྩ་རླུང་ཐིག་ལེ་ནས་རགས་པར་ཁམས་གསུམ་གྱི་སྣོད་དང་བཅུད་དུ་སྣང་བ་ཐམས་ཅད་ཀུན་བཟང་མུ་ཁ་ལེའི་མཁའ་ཀློང་དབྱིངས་གསུམ་གྱི་རང་བཞིན་དུ་ཡེ་ནས་ཤར་བ་རང་བྱུང་རིག་པ་རང་ས་ཟིན་ནས་ཡེ་ཤེས་ཆེན་པོའི་རྩལ་རྫོགས་པ་བླ་ན་མེད་པའི་ཧེ་རུ་ཀ་མངོན་རྫོགས་རྒྱལ་པོས་ཡེ་ཤེས་ཀྱི་མ་མོ་རྣམས་སྐུ་ལས་སྤྲུལ། ལས་ཀྱི་མ་མོ་རྣམས་དམ་ལ་བཞག་སྟེ་སྣང་སྲིད་འཁོར་འདས་ཀྱི་བདེ་སྡུག་ཐམས་ཅད་མ་མོའི་ཆོ་འཕྲུལ་ལས་བྱུང་ཞིང༌། ལེགས་ཉེས་ཀྱི་སྟངས་འཛིན་པའི་མཐུ་སྟོབས་དང་རྩལ་ཆེ་བ་ལ་དགོངས་ནས་མ་མོའི་རྒྱུད་སྡེ་མཐའ་ཡས་པ་གསུངས་པ་ལས། དུར་ཁྲོད་ཆེན་པོ་བསིལ་བའི་ཚལ་དུ་མུ་སྟེགས་ཕྲ་མེན་གྱི་མཁའ་འགྲོ་མ་འཇིག་རྟེན་ཀུན་ཏུ་མི་བདེ་ཞིང་སྡུག་བསྔལ་བར་བྱེད་པ་ཞིག་བྱུང་བ་འདུལ་བའི་དོན་དུ་དབྱིངས་ཀྱི་ཡུམ་ཆེན་རྡོ་རྗེ་ཕག་མོས་རྣམ་པ་དེ་དང་མཚུངས་པའི་མཁའ་འགྲོ་མ་སེང་གེའི་གདོང་པ་ཅན་ཞེས་བྱ་བར་སྤྲུལ་པས་མུ་སྟེགས་ཀྱི་ཕྲ་མེན་མ་བསྒྲལ། དེ་ཡི་སྲོག་སྔགས་ཀྱང་ཡེ་ཤེས་ཀྱི་སྔགས་སུ་བྱིན་གྱིས་བརླབས་ཏེ། ཡེ་ཤེས་ལས་དང་འཇིག་རྟེན་པའི་རིག་སྔགས་ཐམས་ཅད་ཀྱི་ནུས་སྟོབས་གཅིག་ཏུ་དྲིལ་བ། ཕྱི་ནང་གི་བྱད་དགྲ་བདུད་བགེགས་མུ་སྟེགས་གདུག་པ་ཅན་ཐམས་ཅད་རིག་སྔགས་བཟླས་པ་ཙམ་གྱིས་འཇོམས་པའི་གཤེད་མ། འཇིག་རྟེན་པ་དང་འཇིག་རྟེན་ལས་འདས་པ་སུས་ཀྱང་བཟློག་མེད་བསྐལ་པའི་མེ་ཆེན་བདུད་འདུལ་དྲག་མོ་སེང་གེའི་གདོང་པ་ཅན་ཞེས་གྲགས་པ་འདི་ལ་གསར་རྙིང་གི་བཀའ་སྲོལ་མི་འདྲ་བ་དུ་མ་ཞིག་བཞུགས་པ་ལས་ད་ལམ་སྐབས་སུ་བབ་པ་འདི་ནི་རིག་པ་འཛིན་ཐམས་ཅད་ཀྱི་རྒྱལ་པོ་སློབ་དཔོན་ཆེན་པོ་པདྨ་འབྱུང་གནས་རྒྱལ་པོའི་ཁབ་དང་ཉེ་བའི་རི་མ་ལ་ཡ་གནམ་ལྕགས་འབར་བ་སེང་གེའི་ཟ་འགྲམ་ལྟ་བུར་མཁའ་འགྲོའི་ཚོགས་དཔོན་མཛད་ཅིང་བཞུགས་པའི་ཚེ་མུ་སྟེགས་ཀྱི་སྟོན་པ་བྷ་ན་བ་ཏི་ལ་སོགས་པ་ལྔ་བརྒྱས་སློབ་དཔོན་ལ་རྩོད་པ་བྱས་པས་མ་ཐུབ་སྟེ། སླར་ཁྲོས་ནས་རི་སུལ་ཞིག་ཏུ་མུ་སྟེགས་ཀྱི་ངན་སྔགས་བཅས་ཆོག་ནག་པོ་ཞེས་བྱ་བ་བསྒྲུབས་པས་མཐུ་རྟགས་ཆེན་པོ་བྱུང་བས་སློབ་དཔོན་ཉིད་ལག་ན་རྡོ་རྗེ་སེང་གེའི་ང་རོ་ཅན་ཞེས་བྱ་བར་སྐུར་བཞེངས་ཏེ། རིག་སྔགས་ཀྱི་སྦྱོར་བ་བཤིག་པའི་ཏིང་ངེ་འཛིན་ལ་སྙོམས་པར་ཞུགས་པའི་ཚེ། མཁའ་འགྲོ་བདུད་འདུལ་སེང་གེའི་གདོང་ཅན་གྱི་ཞལ་བསྟན་ནས་རིག་སྔགས་ཀྱི་དངོས་གྲུབ་བྱིན་པས་དེ་ཉིད་དུ་མུ་སྟེགས་ཀྱི་སྟོན་པ་ངན་སྔགས་མཁན་གནམ་ལྕགས་ཐོག་གིས་བསྒྲལ། ཕྱི་རབས་ཀྱི་འགྲོ་བའི་དོན་དུ་གདམས་པ་ཟབ་མོ་འདི་མཁའ་ལྡིང་འབར་བའི་བརྡ་རིས་ལ་བྲིས་ཏེ་ཀློང་ལྔ་འདུས་པའི་གཏེར་སྒྲོམ་དུ་རྒྱས་བཏབ་པས་སྙིགས་མའི་དུས་དམག་འཁྲུག་དང་བྱད་ཕུར་དར་བའི་ཚེ་ཆོས་འདིས་སྐྱོབ་པའི་དུས་སུ་བབ་པ་ན་ཀུན་མཁྱེན་རིག་འཛིན་འཇིགས་མེད་གླིང་པ་ལ་དུས་གསུམ་མཁྱེན་པ་ཨོ་རྒྱན་ཆེན་པོས་མངོན་སུམ་དུ་དགོངས་པ་གཏད་ཅིང༌། བརྡ་རྒྱུད་ཤོག་སེར་བྱ་ཁྲའི་གཟུགས་ཀྱི་ལྟོ་བ་ལ་སྙན་བརྒྱུད་མཁའ་འགྲོའི་བརྡ་ཡིག་ཏུ་ཤར་བ་ལས་བསྒྱུར་བ་རིག་འཛིན་ཡུམ་ཀའི་གསང་སྒྲུབ་མཁའ་འགྲོ་སེང་གེའི་གདོང་ཅན་གྱི་སྒྲུབ་ཐབས་ཏེ། གཏེར་གཞུང་ལས། ཚོགས་བརྒྱད་བསྒྲལ་བའི་དུར་ཁྲོད་དུ༔ ཆོས་ཉིད་རང་སྒྲ་ཆོས་ཉིད་ཟེར༔ ཆོས་ཉིད་འོད་ཀྱི་ཀློང་དཀྱིལ་ནས༔ དབྱིངས་ཀྱི་མཁའ་འགྲོའི་ཆོས་འདི་གཏད༔ ཅེས་དང༌། གསང་སྒྲུབ་སེང་གེའི་གདོང་ཅན་འདི༔ ཤིན་ཏུ་ཟབ་ཕྱིར་གུད་དུ་སྦས༔ རྣམ་བཅས་འཕུར་འགྲོའི་བརྡ་རིས་ལས༔ རྒྱལ་རིགས་གང་ཟག་བརྒྱུད་པ་རྫོགས༔ ཞེས་དང༌། ལྔ་བརྒྱ་ཕྲག་བཅུའི་མཐར་གནས་ཚེ༔ དམ་ཆོས་རྣམ་གཉིས་མི་ཤེས་པར༔ དམ་པར་ཁས་འཆེ་སྟོབས་འབྱོར་འགྲན༔ རྟགས་ཙམ་འཛིན་ལ་དགེ་འདུན་རེ༔ ཁྱིམ་རྐུན་བྱེད་ཅིང་ཁྱིམ་སུན་འབྱིན༔ བསྐྱེད་རྫོགས་གདེང་མེད་སྔགས་པར་རློམས༔ དཀོན་མཆོག་ལས་ཀྱང་འབྱུང་པོར་དད༔ དེ་ཚེ་མུ་སྟེགས་ཧིན་དུ་ཡིས༔ ཀླ་ཀློ་གཡོབ་ཅིང་བསྟན་ཞབས་སྡུད༔ ང་སྤྲུལ་བྱང་ཆུབ་སེམས་ལྡན་རྣམས༔ མཐའ་དམག་བྱད་ཕུར་བཟློག་ལ་བརྩོན༔ ཞེས་སོགས་སྨོན་ལམ་གཏད་རྒྱས་ཕྱི་མའི་གདུལ་བྱ་ལ་ཆེད་དུ་དགོངས་ཤིང་བསྔགས་པ་འདི་ཉིད་ཀྱི་དབང་བསྐུར་ཞུ་བའི་དོན་དུ་མཎྜལ་ཕུལ། བླ་མ་ཡེ་ཤེས་ཀྱི་མཁའ་འགྲོ་མ་དངོས་སུ་གསལ་བ་ལ་མི་ཕྱེད་དད་པས་གསོལ་བ་འདེབས་པ་འདིའི་རྗེས་ཟློས་མཛོད། ཀུན་མཁྱེན་ཡེ་ཤེས་ཕུང་པོ་ཅན༔ སྲིད་པའི་འཁོར་ལོ་རྣམ་སྦྱངས་པ༔ དེ་རིང་བཤད་པའི་རིན་ཆེན་གཏེར༔ གཙོ་བོས་བདག་ལ་བཀའ་དྲིན་སྩོལ༔ ལན་གསུམ། རྒྱལ་བ་ཐམས་ཅད་བསྐྱེད་པའི་ཡུམ་ཀུན་བཟང་ཤེས་རབ་ཀྱི་ཕ་རོལ་ཏུ་ཕྱིན་མ་ཡེ་ཤེས་མཁའ་འགྲོ་སེང་གེའི་གདོང་པ་ཅན་ལ་རྩ་གསུམ་ཆོས་སྲུང་རྒྱ་མཚོས་བསྐོར་ཏེ་བཞུགས་པ་ལ་འདི་ནས་བྱང་ཆུབ་བར་ཡིད་ཆེས་དད་པས་སྐྱབས་སུ་འགྲོ་བ་དང༌། གདུལ་དཀའ་དམུ་རྒོད་མ་རུང་པའི་གདུལ་བྱ་གཙོ་བོར་གྱུར་པའི་ཡིད་ཅན་ཐམས་ཅད་དཔལ་ཧེ་རུ་ཀའི་གོ་འཕང་ལ་སྦྱོར་བའི་ཕྱིར་བྱང་ཆུབ་སེམས་དཔའི་གཡར་དམ་ལྷུར་ལེན་པར་བགྱིའོ་སྙམ་པས་འདིའི་རྗེས་ཟློས་མཛོད། ཧོ༔ ཡིད་ཆོས་རྣམ་དག་ཀུན་བཟང་ཡབ་ཡུམ་ལ༔ སྣང་སྟོང་གཉིས་སུ་མེད་པར་སྐྱབས་སུ་མཆི༔ འགྲོ་ལ་དམིགས་པའི་སྙིང་རྗེ་ཆེན་པོ་དང༔ ཆོས་ཉིད་དེ་བཞིན་ཉིད་དུ་སེམས་བསྐྱེད་དོ༔ ལན་གསུམ། ཚོགས་ཞིང་དེ་དག་གི་སྤྱན་སྔར་རྒྱུན་བཤགས་ཡན་ལག་བརྒྱད་པ་ཚུལ་བཞིན་བྱ་བའི་མོས་པས་སོ་སོའི་སྒོམ་དོན་གསལ་ཐོབ་ལ་འདིའི་རྗེས་ཟློས་མཛོད། རྡོ་རྗེ་སློབ་དཔོན་སངས་རྒྱས་དཔལ། སོགས་ལན་གསུམ། རྒྱུད་སྡོམ་པ་དང་མི་ལྡན་ན་དབང་གི་སྣོད་དུ་མི་རུང་བས། བདེ་བར་གཤེགས་པ་སྲས་དང་བཅས་པའི་བསླབ་གཞི་མཐའ་དག་ལ་རྗེས་སུ་སློབ་ཅིང་བྱང་ཆུབ་སྤྱོད་པ་རྒྱ་མཚོ་ཅི་ནུས་སུ་སྤྱད་པར་བགྱིའོ་སྙམ་དུ་དམ་བཅའ་རྣམ་གསུམ་བརྟན་པོར་བཟུང་བའི་འདུན་པ་དྲག་པོ་དང་ལྡན་པས་འདིའི་རྗེས་ཟློས་མཛོད། བདེ་བར་གཤེགས་པ་ཁྱེད་ཅི་འདྲ། །དེ་འདྲ་ཁོ་ནར་བདག་གྱུར་ཅིག །སྤྱོད་པ་རྨད་བྱུང་བསམ་ཡས་པ། །འགྲོ་ལ་ཕན་ཕྱིར་བདག་གིས་སྤྱད། །བྱང་ཆུབ་སེམས་མཆོག་དམ་པ་དང༌། །སྐུ་གསུང་ཐུགས་ཀྱི་ཕྱག་རྒྱ་ནི། །སྲོག་གི་ཕྱིར་ཡང་མི་གཏོང་ན། །རྡོ་རྗེ་རྒྱལ་པོས་བྱིན་བརླབ་མཛོད། །ལན་གསུམ། དེ་ནས་ཡེ་ཤེས་པ་དབབ་པའི་སླད་དུ་དམིགས་འདུན་འདི་ལྟར་མཛོད། ཁྱེད་རང་གཞི་ལུས་ཐ་མལ་དུ་གནས་པའི་མིག་གཉིས་ལ་ལཾ་ལཾ༔ རྣ་བ་གཉིས་ལ་ཀཾ་ཀཾ༔ སྣ་བུག་གཉིས་ལ་རཾ་རཾ༔ ལྕེ་ལ་མཾ༔ ལྟེ་བར་སཾ༔ སྙིང་གར་གཾ༔ ཡིག་འབྲུ་དེ་རྣམས་ལས་འབར་བའི་འོད་ཟེར་གྱིས་རྣམ་སྨིན་གྱི་ལུས་རྟེན་དབང་ཡུལ་ཚོགས་བརྒྱད་རྣམས་བསྲེགས་ཤིང་སྦྱངས༔ སྟོང་པའི་ངང་ལས་པད་ཉི་བདུད་བཞིའི་གདན་ལ་ཡེ་ཤེས་ཀྱི་མཁའ་འགྲོ་མ་སེང་གེའི་གདོང་ཅན་སྐུ་མདོག་མཐིང་ནག །ཕྱག་གཡས་གྲི་གུག་འཕྱར་ཞིང་གཡོན་ཐོད་ཁྲག་ཐུགས་ཀར་བཟུང་བ། །མཆན་གཡོན་དུ་རྡོ་རྗེའི་ཁཊྭཱཾ་ག་འཆང་ཞིང་ཞབས་གཡས་བསྐུམ་གཡོན་བརྐྱང་དུ་བཞུགས་པ། དབུ་ལ་ཐོད་སྐམ་ལྔའི་དབུ་རྒྱན་དང་སྐུ་ལ་རུས་པའི་ཕྱག་རྒྱ་ལྔ་དང་མི་མགོའི་ཕྲེང་བའི་དོ་ཤལ་དང་སེང་གེའི་གཡང་གཞི་གསོལ་བར་གསལ་བའི་གནས་གསུམ་དུ་ཨོཾ་ཨཱཿཧཱུྃ་གིས་མཚན་པ་ལས་འོད་ཟེར་འཕྲོས་པས་རང་བཞིན་ཆོས་ཀྱི་གནས་ནས་ཡེ་ཤེས་སེམས་དཔའ་སྤྱན་དྲངས་ནས་སློབ་མ་དམ་ཚིག་སེམས་དཔར་གསལ་བ་དང་གཉིས་སུ་མེད་པར་གྱུར། ཞེས་དམིགས་ལ་སྤྲོ་ན་ལས་བྱང་གི་སྤྱན་འདྲེན་མཐར། ཨོཾ་བཛྲ་སིང་ཧ་མུ་ཁ་ཧཱུྃ་ཧ་ཧེ་ཕཊ༔ ཛྙཱ་ན་ཨ་བེ་ཤ་ཡ་ཨ་ཨཱཿ ཞེས་བཏགས་པ་བརྗོད་ཅིང་རོལ་མོ་དང་བཅས་པས་བྱིན་དབབ། ཏིཥྛ་བཛྲས་བརྟན་པར་བྱ། དེ་ནས་དབང་དངོས་ལ་གཏོར་མ་འདི་ཉིད་མཁའ་འགྲོ་སེང་གེའི་གདོང་པ་ཅན་དངོས་སུ་གསལ་བ་ཁྱེད་རང་གི་སྤྱི་བོར་བྱོན་ནས་འོད་དུ་ཞུ་སྟེ་ཐིམ་པས་ཕུང་ཁམས་སྐྱེ་མཆེད་གདན་གསུམ་ཚང་བའི་ངོ་བོར་སྨིན། སེང་གེའི་གདོང་ཅན་དངོས་སུ་གྱུར་པའི་མོས་པ་མཛོད། གཏོར་མ་སྤྱི་བོར་བཞག་ལ། ཧོ༔ སྐྱེ་བ་མེད་ལས་གཟུགས་སུ་སྐྱེས༔ སྣང་སྟོང་དབྱེར་མེད་ལྷ་ཡི་སྐུ༔ བུམ་པའི་དབང་གི་ངོ་བོ་ཉིད༔ སྐུ་ལྔ་ཡེ་ཤེས་ལྔ་རྫོགས་ཤོག༔ ཨོཾ་བཛྲ་སིང་ཧ་མུ་ཁ་ཧཱུྃ་ཧ་ཧེ་ཕཊ༔ ཀ་ལ་ཤ་ཨ་བྷི་ཥིཉྩཧཱུྃ༔ དེས་སྐུ་ཡི་བྱིན་རླབས་ལུས་ལ་ཞུགས། ལུས་ཀྱི་སྡིག་སྒྲིབ་ནད་གདོན་བར་ཆད་བྱད་ཕུར་ཐམས་ཅད་ཞི་བར་བྱས། སྣང་སྟོང་བུམ་པའི་དབང་ཐོབ། སྐུ་གཟི་བརྗིད་སྟོབས་ཀྱི་དངོས་གྲུབ་ཐོབ་པར་མོས་ཤིག །གསུང་རྡོ་རྗེ་ཕྲེང་བའི་རྣམ་པར་ཤར་བ་མགྲིན་པར་བཞག་པས་རྡོ་རྗེ་སྔགས་ཀྱི་ནུས་པ་ཡོངས་སུ་རྫོགས་པར་མོས་ཤིག །བགྲང་ཕྲེང་མགྲིན་པར་བཞག་ལ། ཨཱ་ལི་ཐབས་ཀྱི་ངོ་བོ་ཉིད༔ ཀཱ་ལི་ཤེས་རབ་རང་བཞིན་ལས༔ ཟུང་འཇུག་ཡིག་འབྲུ་བཅུ་གཉིས་བྱུང༔ རྟེན་འབྲེལ་དུས་སྦྱོར་ལས་སྐྱེས་པའི༔ ལས་རླུང་སྔགས་སུ་སྨིན་པར་ཤོག༔ ཨོཾ་བཛྲ་སིང་ཧ་མུ་ཁ་ཧཱུྃ་ཧ་ཧེ་ཕཊ༔ ཝཱཀ་ཨ་བྷི་ཥིཉྩ་ཨཱཿ དེ་དང་རྗེས་སུ་འབྲེལ་བ་བཟླས་ལུང་སྦྱིན་པ་ལ། མདུན་བསྐྱེད་བདུད་འདུལ་དྲག་མོའི་ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་མཐིང་ནག་གི་མཐར་སྔགས་ཀྱིས་བསྐོར་བ་ལས་མར་མེ་གཅིག་ལས་གཉིས་མཆེད་ཀྱི་ཚུལ་དུ་བྱུང༌། རིག་སྔགས་ཀྱི་ཕྲེང་བར་གྱུར་པ་མགལ་མེ་བཞིན་དུ་ཐོན་ཏེ་ཞལ་ནས་བརྒྱུད། ཁྱེད་རང་ལྷར་གསལ་བའི་ཞལ་དུ་ཞུགས། ཐུགས་ཀར་ཉི་དཀྱིལ་ལ་ཧཱུྃ་གི་མཐར་འཁོད་པར་མོས་ལ་བསྙེན་སྒྲུབ་ཀྱི་སྔགས་འདིའི་རྗེས་ཟློས་ལན་གསུམ་མཛོད། ཨོཾ་བཛྲ་སིང་ཧ་མུ་ཁ་ཧཱུྃ་ཧ་ཧེ་ཕཊ༔ ལན་གསུམ། ཨཿཀཿསཿམཿརཿཙཿཤཿདཿརཿསཿམཿརཿཡཿཕཊཿ ལན་གསུམ་མཐར། དབྱངས་གསལ་རྟེན་སྙིང་བརྗོད་ཅིང༌། བཅོམ་ལྡན་འདས་བདུད་འདུལ་དྲག་མོ་སེང་གེའི་གདོང་པ་ཅན་གྱི་རིག་སྔགས་ཀྱི་ནུས་པ་ཐམས་ཅད་སློབ་མ་འདི་རྣམས་ཀྱི་རྒྱུད་ལ་འཇུག་ཅིང་བརྟན་པར་གྱུར་ཅིག །ཅེས་བརྗོད་ལ་མེ་ཏོག་འཐོར། དེས་གསུང་གི་བྱིན་རླབས་ངག་ལ་ཞུགས། ངག་གི་སྡིག་སྒྲིབ་ནད་གདོན་བར་ཆད་བྱད་ཕུར་ཐམས་ཅད་ཞི་བར་བྱས། གསལ་སྟོང་གསང་བའི་དབང་ཐོབ། གསུང་དྲག་སྔགས་ནུས་པའི་དངོས་གྲུབ་ཐོབ་པར་མོས་ཤིག །ཐུགས་ཕྱག་མཚན་ཁཊྭཱཾ་ག་ཡབ་ཧེ་རུ་ཀའི་ངོ་བོ་སྙིང་གར་གཏད་ཅིང་བཞག་པས་ཁྱེད་རང་ཡུམ་གནམ་ཞལ་སིང་ཧ་མུ་ཁ་དང་གཉིས་མེད་མཉམ་པར་སྦྱོར་བའི་བདེ་སྟོང་དགའ་བཞིའི་ཡེ་ཤེས་རྒྱུད་ལ་སྐྱེས་པར་མོས་ཤིག ཁཊྭཱཾ་ག་སྙིང་གར་གཏད་དེ། ཧཱུྃ༔ ཕྱག་མཚན་ཐབས་མཆོག་བདེ་བ་ཆེ༔ གསུམ་པའི་དབང་གི་ངོ་བོ་ཉིད༔ དགའ་བཞིས་སྦྱངས་པའི་དཔེའི་ཡེ་ཤེས༔ རྣམ་ཐར་གསུམ་ལྡན་ལ་གནས་ཤོག༔ ཨོཾ་བཛྲ་སིང་ཧ་མུ་ཁ་ཧཱུྃ་ཧ་ཧེ་ཕཊ༔ ཛཿཧཱུྃ་བྃ་ཧོཿ དྷརྨ་དྷཱ་ཏུ་ཨ༔ ཙིཏྟ་ཨ་བྷི་ཥིཉྩ་ཧཱུྃ༔ དེས་ཐུགས་ཀྱི་བྱིན་རླབས་ཡིད་ལ་ཞུགས། ཡིད་ཀྱི་སྡིག་སྒྲིབ་ནད་གདོན་བར་ཆད་བྱད་ཕུར་ཐམས་ཅད་ཞི་བར་བྱས། བདེ་སྟོང་གསུམ་པའི་དབང་ཐོབ། ཐུགས་བདེ་ཆེན་ཕྱག་རྒྱ་ཆེན་པོའི་དངོས་གྲུབ་ཐོབ་པར་མོས་ཤིག །ཡོན་ཏན་གྱི་ནུས་པ་དང་ཕྲིན་ལས་ཀྱི་རྩལ་གྱིས་དོན་གཉིས་ལྷུན་གྲུབ་ཡེ་ཤེས་རྡོ་རྗེའི་བྱིན་རླབས་ཡོངས་སུ་རྫོགས་ཏེ་ཚར་གཅོད་རྗེས་འཛིན་གྱི་ནུས་པ་མཐར་ཕྱིན་པའི་རྟགས་སུ་གྲི་གུག་དང་ཐོད་ཁྲག་གིས་དབང་བསྐུར་བར་མོས་ཤིག །གྲི་ཐོད་ལག་གཡས་གཡོན་དུ་གཏད་ལ། ཧཱུྃ༔ གྲི་གུག་གཟུང་འཛིན་རྩ་བ་གཅོད༔ ཐོད་ཁྲག་ཞི་རྒྱས་ཆགས་པའི་ཉམས༔ ལས་བཞི་ལྷུན་གྲུབ་ཕྱག་མཚན་འདིས༔ ཕྲིན་ལས་རྣམ་བཞི་འགྲུབ་པར་ཤོག༔ ཨོཾ་བཛྲ་སིང་ཧ་མུ་ཁ་ཧཱུྃ་ཧ་ཧེ་ཕཊ༔ ཤཱིནྟཾ་པུཥྚིཾ་ཝཱ་ཤཾ་མཱ་ར་ཡ་ཕཊ༔ དེས་ཡེ་ཤེས་ཀྱི་བྱིན་རླབས་རྒྱུད་ལ་ཞུགས། སྒོ་གསུམ་ཆར་ལ་བརྟེན་པའི་སྡིག་སྒྲིབ་ནད་གདོན་བར་ཆད་བྱད་ཕུར་ཐམས་ཅད་ཞི་བར་བྱས། སྣང་གསུམ་འཕོ་བའི་སྒྲིབ་པ་དག །བཞི་པ་ཚིག་དབང་རིན་པོ་ཆེ་ཐོབ། ཡེ་ཤེས་རྡོ་རྗེ་མཆོག་ཏུ་མི་འགྱུར་བདེ་བ་ཆེན་པོའི་གོ་འཕང་མངོན་དུ་བྱས་པར་མོས་ཤིག །དེ་དག་གིས་རིག་སྔགས་སྟོང་གི་ནུས་པ་དང་བྱད་མ་འབུམ་གྱི་མཐུ་སྟོབས་ཀྱང་དྲན་པ་ཙམ་གྱིས་འཇོམས་པའི་བདུད་འདུལ་དྲག་མོ་སེང་གེའི་གདོང་ཅན་གྱི་དབང་བཞི་ལེགས་པར་ཐོབ་པ་ཡིན་པས་དམ་ཚིག་ཁས་བླང་བ་འདིའི་རྗེས་ཟློས་མཛོད། གཙོ་བོས་ཇི་ལྟར་སོགས་དམ་ཚིག་ཁས་བླང༌། མཎྜལ་ཡོན་འབུལ་དགེ་བསྔོ་སོགས་ཆོ་གའི་རྗེས་རིམ་བཅས་སྤྱི་ལྟར་བྱའོ། །མཁྱེྃན་གཉིས་རྗེས་བྃརྩེའི་འཛུམ་པ་ལས། །ཟབ་གསང་འོདྃ་བརྒྱའི་ཟེརྃ་ཕྲེང་ཅན། །གྲུབ་གཉིས་པདྨོའི་ནགས་ཀློང་གི །ལང་ཚོ་ཅིར་ཡང་རྒྱས་དེ་རྨད། །ཡུམ་ཀ་བདེ་ཆེན་རྒྱལ་མོའི་གསང་སྒྲུབ་སེང་གེའི་གདོང་ཅན་གྱི་དབང་ཆོག་བྱིན་རླབས་ཆུན་པོ་བཀླག་ཆོག་ཏུ་བཀོད་པའི་ལེའུ་ཚན་བཅུ་གཅིག་པ་སྟེ་ལྷན་སྐྱེས་དགའ་བའི་རྡོ་རྗེས་སྦྱར་བའོ།  ༈  རིག་སྟོང་ཧེ་རུ་ཀ་དཔལ་ཡབ་ཡུམ་གྱིས། །ཡིད་ཆོས་འཁྲུལ་རྟོག་གཟུང་འཛིན་རུ་ཏྲའི་སྡེ། །བསྒྲལ་ལས་འཁོར་འདས་རྗེ་བཙན་བཀའ་སྲུང་ཚུལ། །ལྕམ་དྲལ་སྡེ་ལྔའི་ཚུལ་དུ་བཞེངས་ལ་འདུད། །ཆོས་བཀའ་འདི་ཉིད་ཀྱི་བླ་རྫོགས་ཐུགས་གསུམ་ཡོངས་རྫོགས་ཀྱི་ཐུན་མོང་མ་ཡིན་པའི་བཀའ་སྲུང་མ་མགོན་ལྕམ་དྲལ་གྱི་སྲོག་དབང་ཐུན་མོང་མ་ཡིན་པའི་ཆིག་བརྒྱུད་བཀའ་རྒྱ་མ་བྱ་བ་ལ། གནས་ཁང་རྒྱན་གྱིས་སྤྲས་པའི་གུང་དུ་གཞུང་མཐུན་གྱི་སྐུ་རྟེན་བཀྲམ་པའི་སྤྱན་སྔར་སྟེགས་བུར་ཁྲག་ཆང་གིས་སྦགས་པའི་སྟེང༌། རྡོར་རྭ་མེ་རིའི་དབུས་སུ་ཁྲག་མཚོའི་ནང་དུ་ཐོད་མཁར་གྲུ་གསུམ་གྱི་ལྟེ་བར་ཉི་གདན་ལ་ཏྲག་མཐིང་ག །མདུན་དུ་བྷྱོ་དམར་པོ། གཡས་སུ་ཧཱུྃ་མཐིང་ག །རྒྱབ་ཏུ་ཀྵ་དུད་ཁ། གཡོན་དུ་ཏྲིཿདམར་ནག་གིས་མཚན་པའི་དབུས་སུ་མཉྫིའི་སྟེང་གོང་གནོན་དཔལ་ཆེན་འདུས་པའི་གཏོར་མ། མདུན་དུ་དེ་ལས་ཅུང་དམའ་བར་མ་མགོན་ལྕམ་དྲལ་གྱི་གཏོར་མ་དར་གདུགས་སྐུ་ཙཀ་ཅན་བཤམས། མཐའ་བསྐོར་དུ་སྐུའི་རྟེན་སྦ་ལྕགས་ཚིགས་གསུམ་པ། མེ་ལོང་ལ་དངུལ་ལམ་སིནྡྷུ་རས། ཏྲག་རཀྴ་མུ་ཏྲ་མུ༔ རུ་ལུ་རུ་ལུ་ཧཱུྃ་བྷྱོ་ཧཱུྃ༔ རགྨོ་ཏེ་ཀེཾ་ཙ་ཙ༔ རུ་ལུ་རུ་ལུ་མ་ཧིཾ་བྷྱོ༔ མ་ཧཱ་ཀཱ་ལ་ཤཱ་ས་ན་ཧཱུྃ༔ བཛྲ་སཱ་དྷུ་ཏྲི༔བྲིས་པ། མ་མོའི་སྐུ་ཙཀ །སྙིང་དང་ལྕགས་སྤྱང༌། ནལ་བུའི་ཐོད་པར་ཐུན་རྫས་དུག་ཁྲག་གིས་བཀང་བ། གསང་ཐོད། གཡས་སུ་མགོན་པོའི་ཕྱག་མཚན་ཙནྡན་གྱི་བིང་དངོས་སམ་ཙཀླི། རུ་མཚོན་ནག་པོ་དང་སྙིང་ཞགས། གཡོན་དུ་ཕ་ཝཾ་ལོང་བུ་ལ་གསེར་གྱིས་སྲོག་སྔགས་བཛྲ་སཱ་དྷུ་ཏྲི༔བྲིས་པ་རྣམས་དང༌། མཐའ་བསྐོར་དུ་དྲག་པོའི་ཉེར་སྤྱོད། སྨན་རཀ །འབུལ་གཏོར། ཤ་ཁྲག །ཟས་སྣ། ཇ་ཆང་གི་སྐྱེམས་སོགས་དང༌། ཚོགས་མཆོད། ཆད་བརྟན་བཅས་གཙང་ལ་དག་པར་འདུ་བྱས་ལ། བདག་བསྐྱེད་དཔལ་ཆེན་འདུས་པའི་ལས་བྱང་རྒྱས་འབྲིང་བསྡུས་པ་གང་རུང་གི་བསྐྱེད་བཟླས་བསྡུ་ལྡང་བཅས་སྔོན་དུ་འགྲོ་བས་མ་མགོན་ལྕམ་དྲལ་གྱི་བསྟོད་པའི་རྗེས། བཟླས་པ་བྱ་བ་ནི། མདུན་བསྐྱེད་ཀྱི་ཐུགས་ཀར་ཉི་མ་ལ་གནས་པའི་ཏྲག་ཡིག་གི་མཐར་སྔགས་ཀྱི་ཕྲེང་བ་མཐིང་ནག་གཡོན་བསྐོར་དུ་འཁོར་བར་བདག་ཉིད་དཔལ་ཆེན་པོར་གསལ་བའི་ཐུགས་ཀའི་ས་བོན་ལས་བྱུང་བའི་འོད་ཟེར་ཕོག་པས་ཐུགས་རྒྱུད་རབ་ཏུ་བསྐུལ་ནས་ཅི་འདོད་པའི་ཕྲིན་ལས་རབ་འབྱམས་ཐོགས་མེད་དུ་སྒྲུབ་པར་གྱུར། ཞེས་བརྗོད་ལ་ཧེ་རུ་ཀའི་ཡིག་བརྒྱ་ཉེར་གཅིག་དང༌། གོང་གནོན་གྱི་བཟླས་པ་སྔོན་དུ་འགྲོ་བས། ཏྲག་རཀྴ་མུ་ཏྲ་མུ༔ རུ་ལུ་རུ་ལུ་ཧཱུྃ་བྷྱོ་ཧཱུྃ༔ རགྨོ་ཏེ་ཀེཾ་ཙ་ཙ༔ རུ་ལུ་རུ་ལུ་མ་ཧིཾ་བྷྱོ༔ མ་ཧཱ་ཀཱ་ལ་ཤཱ་ས་ན་ཧཱུྃ༔ བཛྲ་སཱ་དྷུ་ཏྲི༔ ཞེས་ཅི་ནུས་བཟླས་མཐར། ཧཱུྃ། དངོས་སུ་འབྱོར་པའི་མཆོད་པ་སྣ་ཚོགས་དང༌། །ཡིད་སྤྲུལ་ཟག་མེད་ཀུན་ཏུ་བཟང་པོའི་སྤྲིན། །བདེ་སྟོང་ཟུང་འཇུག་ཆེན་པོར་མཉམ་སྦྱོར་བས། །ལྕམ་དྲལ་བཀའ་སྡོད་འཁོར་བཅས་མཉེས་གྱུར་ཅིག །ཤྲཱི་བཛྲ་དྷརྨ་པཱ་ལ་ས་པ་རི་ཝཱ་ར་ཨརྒྷཾ་སོགས་ཀྱིས་མཆོད། ཧཱུྃ། དྲག་ཤུལ་རྡོ་རྗེའི་ལང་ཚོར་འབར་བའི་སྐུ། །མི་ཤིགས་བརྗོད་བྲལ་ནཱ་དའི་རང་བཞིན་ཅན། །འགྱུར་མེད་རྣམ་པ་ཀུན་གྱི་མཆོག་ལྡན་ཐུགས། །ལྕམ་དྲལ་བཀའ་སྡོད་འཁོར་དང་བཅས་ལ་བསྟོད། །ཅེས་བསྟོད། སྲོག་གཏད་དངོས་ལ། དམ་ཚིག་ཐུབ་ངེས་པ་དང་བརྒྱུད་པ་ཟིན་ངེས་ཀྱི་སློབ་མ་བོས་ལ། ཁྲུས་བྱ། བགེགས་གཏོར་བསྔོས་ཤིང་བསྐྲད། སྲུང་འཁོར་བསྒོམ་ལ་མཚམས་སྦྱོར་གྱི་ཁྱད་པར།  འོ་སྐོལ་རྣམས་རྟེན་ཁྱད་པར་ཅན་རྙེད་པ་དོན་ཡོད་པར་བྱ་བའི་ཕྱིར་སངས་རྒྱས་ཀྱི་བསྟན་པའི་སྒོར་ཞུགས་ཤིང༌། བྱང་ཆུབ་ཀྱི་ལམ་སྒྲུབ་པའི་བར་ཆད་ཀྱི་རྐྱེན་ལས་སྐྱོབ་བྱེད་ཐེག་པ་ཆེན་པོའི་དགེ་འདུན་གྱི་བྱེ་བྲག་སྲུང་མ་མཐུ་དང་ལྡན་པ་ཞིག་བསྟེན་པ་གལ་ཆེ། སྲུང་མ་དེ་ལའང་འཇིག་རྟེན་པ་བསྟེན་ན་རང་ཉིད་འཁོར་བ་ལས་མ་ཐར་བས་གཞན་སྐྱོབ་མི་ནུས་པ་མ་ཟད། གནས་སྐབས་ཕན་པ་ཆུང་ངུ་ཙམ་འགྲུབ་ཏུ་སྲིད་ཀྱང་མཐར་ལོག་པའི་ལམ་ལ་སྦྱོར་བ་དང༌། འཁུ་ལྡོག་ཕྲ་མོ་ཙམ་གྱིས་ཀྱང་ལུས་སྲོག་ལ་བར་དུ་གཅོད་པ་སོགས་ཉེས་དམིགས་ཆེ་ཞིང་ཕན་ཡོན་ཆུང་བས་ན། འཇིག་རྟེན་ལས་འདས་པའི་སྲུང་མ་ཁྱད་པར་ཅན་བསྟེན་དགོས། དེ་ཡང་རྒྱུད་སྡེ་རིན་པོ་ཆེ་རྣམས་ལས་རིགས་བསམ་གྱིས་མི་ཁྱབ་ཞིག་གསུངས་པ་ལས། འཁོར་འདས་ཀྱི་སྟོང་སྲོག་རྣམ་ཐར་སྒོ་གསུམ་གྱི་རང་བཞིན་རྡོ་རྗེ་བཙུན་མོ་སྟེ། དོན་དམ་ལྷག་པའི་བདེན་པ་དབྱེར་མེད་ཆོས་སྐུ་ཡུམ་ཆེན་མོ་ཉིད། རྣམ་པ་བསྟན་སྲུང་དབྱིངས་ཀྱི་རྒྱལ་མོའི་ཚུལ་བསྟན་པ་འདི་གཙོ་བོ་ཁྲོས་མ་གསང་བའི་རྒྱུད་དང༌། ཨ་ཏི་དང་མ་ཧཱ་ཡོ་གའི་རྒྱུད་དུ་མ་ནས་བསྟན་ཅིང༌། རྡོ་རྗེ་ཐེག་པའི་གསང་སྔགས་སྤྱི་དང་ཁྱད་པར་རྫོགས་པ་ཆེན་པོའི་རྒྱུད་དང་སྒྲུབ་ཐབས་མན་ངག་ཐམས་ཅད་ཀྱི་བཀའ་སྲུང་གི་གཙོ་བོ་སྟེ། ངོ་བོ་ཆོས་དབྱིངས་བདེ་བ་ཆེན་པོའི་ཀློང་ན་འཁོར་འདས་ཐམས་ཅད་བསྐྱེད་བསྡུའི་བདག་ཉིད་དཔལ་ཀུན་ཏུ་བཟང་མོ། རང་བཞིན་སྤྲུལ་པའི་ཞིང་དུར་ཁྲོད་མེ་རི་འབར་བ་ན་ཡེ་ཤེས་ཀྱི་མཁའ་འགྲོ་མ་ཨེ་ཀ་ཙ་ཊི་སྤུན་དྲུག །བྲན་མོ་བཅུ་བཞི། གཡོག་མོ་ལྔ་ཅུ་རྩ་བརྒྱད། ཡང་གཡོག་འབུམ་ཁྲི་འབུམ་སྟོང་ལ་སོགས་པ་དང༌། ཉི་ཤུ་རྩ་བཞི་སྤྲུལ་པའི་ཡུལ་ན་མ་མོ་མཁའ་འགྲོ་ཀུན་གྱི་རྗེ་མོ་སོགས་སྤྱི་དང་བྱེ་བྲག་གི་མཚན་དང་སྐུ་ཡི་བཀོད་པའི་ཆོ་འཕྲུལ། སྔོན་བསྐལ་པ་མང་པོའི་གོང་རོལ་ཏུ་བྱང་ཆུབ་མཆོག་ཏུ་ཐུགས་བསྐྱེད་ནས་རིམ་བཞིན་ལས་དང་སྨོན་ལམ་གྱི་རྣམ་པར་སྨིན་པའི་འབྲས་བུ་དུས་སུ་སད་པ་ལས། དེང་འདིར་འདོད་པ་ཁམས་ཀྱི་དབང་ཕྱུག་མ་གཙོ་འཁོར་ཅན་དུ་གྱུར་ཅིང་སྟོན་པ་ཐུབ་པའི་དབང་པོའི་བསྟན་སྲུང་ཡོངས་ཀྱི་གཙོ་བོར་དབང་བསྐུར་བ་འདི་ཉིད་ཀྱི་སྔོན་གྱི་རབས་དང་སྐྱེ་རྒྱུད། ད་ལྟ་གང་ལ་བསྟན་པའི་ཕྲིན་ལས་ཀྱི་མཛད་ཚུལ། མ་འོངས་པ་ན་ཞིང་གང་དུ་འཚང་རྒྱ་བར་འགྱུར་བ་སོགས་འཕགས་པ་ལྷ་མོ་དཔལ་ཆེན་མོ་ལུང་བསྟན་པའི་མདོ་དང་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་དང༌། གསེར་འོད་མཆོག་ཏུ་རྒྱས་པ་རྣམ་པར་རྒྱལ་བ་གཉིས་ཀྱི་ལེའུ་བཅུ་དྲུག་པ་དང་བཅུ་བདུན་པ་གཉིས་དང་བསྡུས་པའི་ལེའུ་ཉེར་གཅིག་པ་དང༌། ཁྱད་པར་ལྷ་མོ་འདི་ཉིད་ཀྱི་སྒོས་རྒྱུད་མཁའ་འགྲོ་མ་མེ་ལྕེ་འབར་བའི་རྒྱུད་སོགས་དུ་མ་ནས་གསལ་བར་བསྟན་པ་ཁུངས་དང་ཟིན་སོ་ཆེ་ཞིང༌། སློབ་དཔོན་པདྨས་མཛད་པའི་མ་མོའི་སྲོག་སྒྲུབ་རྩ་བ་དང༌། ལས་མཛད་སྐོར་གྱི་སྒྲུབ་པ། ཡང་སྙིང་གནུབས་ཀྱི་མན་ངག་སོགས་གཏེར་མ་དང༌། ཕུར་སྲུང་བདག་ཉིད་རེ་མ་ཏིའི་སྒྲུབ་ཐབས་ལང་ལབ་མ་སོགས་བཀའ་མ་ནས་བྱུང་ཞིང༌། རྒྱུད་ལས། ལྷ་མོ་ཀླུ་མོ་གནོད་སྦྱིན་མོ། །དྲི་ཟ་གྲུལ་བུམ་འབྱུང་པོ་དང༌། །ཅིར་ཡང་སྤྲུལ་པའི་རྫུ་འཕྲུལ་ཅན། །མིང་བརྒྱ་མ་ལ་མཚན་སྟོང་མ། །ཞེས་གསུངས་པས་ནམ་གྲུ་རེ་མ་ཏི་ཞེས་ཡེ་ཤེས་ཀྱི་མ་མོ་ཐམས་ཅད་ཀྱི་ཁྱབ་བདག་ཏུ་གྱུར་པ་སྟེ། སྐབས་འདིར་ཡེ་ཤེས་ཀྱི་མ་མོ་ཨེ་ཀ་ཙ་ཏི་ལྟར་སྒྲུབ་པ་འདི་ལ་ཡི་དམ་ལྟར་སྒྲུབ་པ་དང༌། ཆོས་སྐྱོང་ལྟར་སྒྲུབ་ཚུལ་ཇི་སྙེད་ཅིག་ཡོད་པ་ལས། འདིར་ཆོས་སྐྱོང་ལྟར་སྒྲུབ་པ་ཡིན། དེ་ལ་ཡང་མ་མོ་རང་རྐྱང་དུ་སྒྲུབ་པ་དང༌། དྲེགས་པ་གཞན་གྱི་འཁོར་ཅན་སྒྲུབ་པ་གཉིས་ལས། ཕྱི་མ་ལྟར་སྒྲུབ་པ་སྟེ། དེ་ཡང་འཁོར་གྱི་གིང་ཆེན་གསུམ་ཕོ་ཉ་དང་བཅས་པ་རྣམས་ཀྱང་དྲེགས་པ་རང་རྒྱུད་པ་མ་ཡིན་ཏེ། ཐབས་མཆོག་སྦྱོར་བའི་གིང་ཆེན་དཔལ་མགོན་མ་ནིང་ནག་པོ་བཅོམ་ལྡན་འདས་ཀུན་བཟང་ཆེ་མཆོག་ཧེ་རུ་ཀ་ཉིད་གདུལ་བྱ་གདུག་པ་ཅན་འདུལ་བའི་ཆེད་དུ་དཔལ་ཡེ་ཤེས་ཀྱི་མགོན་པོའི་སྐུར་བཞེངས་ནས། འཇིག་རྟེན་དང་འཇིག་རྟེན་ལས་འདས་པའི་དྲེགས་པ་ཕོ་རྒྱུད་ཐམས་ཅད་ཀྱི་རྗེ་བཙན། མཐུ་སྟོབས་ནུས་པའི་བྱིན་རླབས་འགྲན་དུ་མེད་པའི་བསྟན་སྲུང་ཐམས་ཅད་ཀྱི་གཙོ་བོ་དང༌། ཤེས་རབ་སྦྱོར་བའི་གིང་ཆེན་དམ་ཅན་རྡོ་རྗེ་ལེགས་པ་འདི་ནི། རྣམ་རོལ་ཡེ་ཤེས་དང་ལས་དང་འཇིག་རྟེན་གྱི་རྡོ་རྗེ་ལེགས་པ་སོགས་སྐུ་དང་མཚན་གྱི་རྣམ་འགྱུར་དུ་མ་བསྟན་ཀྱང་དོན་དུ་ཡེ་ཤེས་ཀྱི་དབྱིངས་སུ་འཕགས་པ་འཇིག་རྟེན་དབང་ཕྱུག་དང་གཉིས་སུ་མེད་ཀྱང༌། རྣམ་པ་ནུབ་ཕྱོགས་ཕ་ཝཾ་ལོང་བུའི་སྐུ་མཁར་དུ་དཔལ་རྟ་མགྲིན་གྱི་སྤྲུལ་པ། སངས་རྒྱས་ཀྱི་བསྟན་པ་སྲུང་ཕྱིར་དྲེགས་པ་རང་རྒྱུད་པ་ལྟར་བསྟན་ནས་དཔལ་གསང་བའི་བདག་པོས་དབང་བསྐུར་བསྟན་པ་སྲུང་བར་བཀའ་བསྒོས་པ་བཞིན་ཁས་བླང་དམ་ལ་གནས་པས་བཀྲ་ཤིས་ལ་བྱིན་ཆགས། རྒྱུད་འཇམ་ལ་སྙིང་བརྩེ། དཔའ་ཞིང་བརྟུལ་ཕོད་མཐུ་རྩལ་ཆེ་ཞིང༌། ཁྱད་པར་རྫོགས་པ་ཆེན་པོའི་བཀའ་སྲུང་ཐུན་མོང་མ་ཡིན་པ་དང༌། གསང་བའི་སྒྲོལ་གིང་གཟའ་བདུད་ཆེན་པོ་ནི་ཀླུ་སྲིན་བཤོས་པའི་སྲས་མཆོག་མཐུ་ནུས་ལྷག་པར་ཆེ་ཞིང་དྲག་རྩལ་མྱུར་མགྱོགས་ཀྱི་ཕྲིན་ལས་དང་ལྡན་པས་འཇིག་རྟེན་དྲེགས་པ་སྡེ་བརྒྱད་ཐམས་ཅད་ཀྱི་རྗེ་བོ། རིག་འཛིན་ཤྲཱི་སིང་ཧ་དང་སློབ་དཔོན་ཆེན་པོ་པདྨའི་བཀའ་སྲུང་མཆོག་ཏུ་བསྔགས་པ་དང༌། སྦས་པའི་དཀོར་སྲུང་དུར་ཁྲོད་ལྷ་མོ་ནི་རྣལ་འབྱོར་གསང་མཐའི་རྒྱུད་ལས་གསུངས་པའི་ཡུལ་ཉེར་བཞིའི་ནང་ཚན་དེ་ཝི་ཀོ་ཊའི་ཞིང་སྐྱོང་ལངྐའི་དབང་ཕྱུག་ཉིད་དཀོར་ནོར་སྲུང་བའི་མ་མོ་དུར་ཁྲོད་ཀྱི་འདྲེ་མོའི་ཚུལ་དུ་བསྟན་པ་རྡོ་རྗེ་རྣལ་འབྱོར་མས་སྐྱེ་བརྒྱུད་སྒྲུབ་ཐབས་དང་བཅས་པ་བསྟན་ནས་མིང་སྲིང་བརྒྱད་ཀྱི་མཚན་དང་སྤྲུལ་པས་ཕྱི་རུ་རྣོ་མྱུར་ཆེ། ནང་དུ་སྙིང་ཉེ་བ་སོགས་ཏེ་རྣམ་པ་ཐབས་ཤེས་དང་གཙོ་འཁོར་གྱི་རོལ་པས་ཕྲིན་ལས་གང་འདུལ་རྣམ་འགྱུར་ཅན་དུ་སྟོན་ཡང་ངོ་བོ་གདོད་མའི་མགོན་པོའི་ཡེ་ཤེས་ལས་གཉིས་སུ་མེད་པས་ན། མདོར་ན་ཐེག་མཆོག་རྫོགས་པ་ཆེན་པོའི་ཐུན་མོང་མ་ཡིན་པའི་བཀའ་སྲུང༌། ཀུན་མཁྱེན་ཆོས་ཀྱི་རྒྱལ་པོ་ཡབ་སྲས་ཀྱི་ཕྲིན་ལས་ཀྱི་ཕོ་ཉ་བ་ཐམས་ཅད་གཅིག་དྲིལ་དུ་སྒྲུབ་པ་རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་བླ་རྫོགས་ཐུགས་གསུམ་གྱི་བཀའ་སྲུང་ཐུན་མོང་མ་ཡིན་པ་དཔལ་ལྡན་མ་མགོན་ལྕམ་དྲལ་གྱི་སྲོག་དབང་ཆིག་བརྒྱུད་མ་སྦྱིན་པ་ལ་སློབ་མའི་བྱ་བ་མཎྜལ་ཕུལ། བླ་མ་དཔལ་ཆེན་ཧེ་རུ་ཀ་དངོས་སུ་གསལ་བ་ལ་གསོལ་བ་འདེབས་པ་འདིའི་རྗེས་ཟློས་མཛོད། དོན་དམ་དབྱིངས་ལས་མ་གཡོས་ཀྱང༔ འགྲོ་བ་འདུལ་ཕྱིར་སྤྲུལ་པའི་སྐུ༔ བཀའ་སྲུང་མ་མགོན་ལྕམ་དྲལ་གྱི༔ སྲོག་དབང་བདག་ལ་བསྩལ་དུ་གསོལ༔ ལན་གསུམ། འོ་རིགས་ཀྱི་བུ་ཁྱོད་དེ་ལྟར་འདོད་ན་གསང་བའི་བཀའ་སྲུང་ཆེས་གཉན་ལ་བསྟན་དུ་འཕང་པའི་བཀའ་གཏད་ཡིན་པས་བདག་གི་གཅེས་ནོར་ཐེག་མཆོག་རྫོགས་པ་ཆེན་པོའི་བསྟན་པའི་སྲོག་འཛིན་ཞིང་གཅིག་ཏུ་གཞན་དོན་བྱེད་ནུས་ན་སྦྱིན་གྱི་རང་བཞིན་ཐོད་རྒལ་དུ་བསྟན་བྱ་མ་ཡིན་ཞིང༌། དབང་བྱིན་ནས་རྡོ་རྗེའི་དམ་ཚིག་ལས་ནམ་ཡང་འདའ་རུང་བ་མ་ཡིན་པས་ཁེ་ཉེན་ཤེས་པར་གྱིས་ལ་དཔལ་ཆེན་ཧེ་རུ་ཀའི་འདའ་དཀའ་སྲོག་གི་མནའ་ཆུ་འདི་འཐུངས་ལ་བག་ཡོད་པར་གྱིས་ཤིག །ཐེག་མཆོག་རྫོགས་པ་ཆེན་པོ་ཡི༔ ལམ་ནས་རང་གཞན་དོན་ནུས་ན༔ དབང་བསྐུར་སྦྱིན་གྱི་གཞན་དུ་མིན༔ མནའ་ཆུ་འདི་འཐུངས་དམ་ཚིག་སྲུངས༔ འགལ་ན་སྲོག་ལ་ཧུར་ཐུམ་བྱེད༔ ས་མ་ཡ་ཨི་དན་ན་ར་ཀན༔ ཞེས་ནང་མཆོད་སྦྱིན། བླ་མ་དཔལ་ཆེན་པོ་སྐྱབས་ཡུལ་རྒྱ་མཚོ་མངོན་སུམ་བཞུགས་པའི་སྤྱན་སྔར་བསགས་སྦྱང་གི་སྙིང་པོ་ཡན་ལག་བརྒྱད་པའི་རྒྱུན་བཤགས་འདིའི་རྗེས་ཟློས་མཛོད། རྡོ་རྗེ་སློབ་དཔོན་སངས་རྒྱས་དཔལ་སོགས་ལན་གསུམ། དེ་ནས་སྲོག་དབང་གི་གཞི་འགོད་པའི་སླད་དུ་ཡེ་ཤེས་པ་དབབ་པ་ལ། ཁྱེད་རང་གང་དུ་གནས་པའི་ཁང་པ་འདི་ཉིད་རང་བཞིན་སྤྲུལ་པའི་སྐུའི་ཞིང་ཁམས་དབུས་ཕྱོགས་མེ་རི་འབར་བ་དྲག་པོའི་ཞིང་གི་བཀོད་པ་ཚད་མེད་པས་བརྒྱན་པ་འཇིགས་སུ་རུང་ཞིང་སྐྱི་གཡའ་བའི་དབུས་སུ་ཁྱེད་རང་སློབ་མ་རྣམས་པད་ཉིའི་སྟེང་དུ་ཨེ་ལས་སྔགས་ཀྱི་བདག་མོ་ཀུན་ཏུ་བཟང་མོ་མཐིང་ནག་མཆེ་བ་གཙིགས་ཤིང་བརྐྱང་བསྐུམ་དུ་བཞུགས་པའི་ཕྱག་ན་དམ་ཚིག་གི་གཎྜེ་འཕྲེད་ལ་འཛིན་ཅིང༌། མི་ལྤགས་ཀྱི་གཡང་གཞི་གསོལ་བའི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། སྙིང་གའི་སྟོད་དུ་ཧཱུྃ་སྔོན་པོ། སྨད་དུ་ཉི་གདན་ལ་ཏྲག་ཡིག་སྨུག་ནག་གིས་མཚན་པ་ལ་སློབ་དཔོན་དཔལ་ཆེན་པོར་གསལ་བའི་གསང་བ་གསུམ་གྱི་ཟིལ་དང༌། ཐུགས་སྲོག་ཧཱུྃ་གི་འོད་ཟེར་གྱིས་ཕོག་པས་དེ་ལས་འོད་ཟེར་དཔག་ཏུ་མེད་པ་འཕྲོས། རང་བཞིན་གྱི་གནས་ཆོས་དབྱིངས་ཡུམ་གྱི་མཁའ། དུར་ཁྲོད་མེ་རི་འབར་བ་ནས་དཔལ་ལྡན་མ་མགོན་ལྕམ་དྲལ་ཡེ་ཤེས་ལས་དང་འཇིག་རྟེན་གྱི་འཁོར་དང་བཅས་པ་བྱོན་ནས་ཡེ་ཤེས་པ་རྣམས་སློབ་མ་ལ་ཐིམ་པས་རྡོ་རྗེའི་གཟི་བྱིན་མཆོག་ཏུ་འབར། འཇིག་རྟེན་པ་རྣམས་མཐའ་བསྐོར་དུ་བཀའ་སྡོད་ཀྱི་ཚུལ་དུ་འཁོད་པར་བསམ། གུ་གུལ་དང་ཚིལ་ཆེན་ལ་ཁྱད་པར་གྱི་སྤོས་སྦྱར་བ་བསྲེགས། ཐོད་རྔ་དང་རོལ་མོ། ཞིང་དང་རོ་རས་དར་ནག་གི་གཡབ་མོས་བསྐུལ་ཏེ། ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཏྲག་རཀྴ་མུ་ཏྲ་མུ༔ རུ་ལུ་རུ་ལུ་ཧཱུྃ་བྷྱོ་ཧཱུྃ༔ རགྨོ་ཏེ་ཀེཾ་ཙ་ཙ༔ རུ་ལུ་རུ་ལུ་མ་ཧིཾ་བྷྱོ༔ མ་ཧཱ་ཀཱ་ལ་ཤཱ་ས་ན་ཧཱུྃ༔ བཛྲ་སཱ་དྷུ་ཏྲི༔ ཨ་བེ་ཤ་ཡ་ཨ་ཨ་ཨ༔ ཞེས་བརྗོད་པས་དབབ། ཏིཥྛ་བཛྲ་ས་བརྟན་པར་བྱ། དེ་ནས་སྲོག་དབང་དངོས་ལ་གསུམ་ལས། དང་པོ་གཙོ་མོ་དབྱིངས་ཀྱི་རྒྱལ་མོའི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་བཀའ་གཏད་ནས་སྲོག་སྙིང་གཅིག་ཏུ་བསྲེ་བ་ལ། མ་མོའི་སྐུ་ཡི་རྟེན་སྦ་འཁར་ཚིགས་གསུམ་པ་འདི་སྙིང་གར་གཏད་པས་ཚོགས་བརྒྱད་སྐྱེ་འགག་གནས་གསུམ་དང་བྲལ་བའི་མཁའ་ཀློང་དབྱིངས་གསུམ་གྱི་དགོངས་པས་སྐུ་ཡི་སྲོག་ལ་དབང་ཐོབ་པར་མོས་ཤིག །སྦ་འཁར་གཏད་ལ། ཧཱུྃ༔ རྣམ་པ་ཀུན་གྱི་མཆོག་ལྡན་ནི༔ ཚོགས་བརྒྱད་དག་པའི་མ་མོའི་ཚུལ༔ ཀུན་ཏུ་བཟང་མོའི་དམ་ཤིང་འདི༔ སྐུ་ཡི་རྟེན་དུ་ཁྱོད་ལ་གཏད༔ ཏྲག་རཀྴ་མུ་ཏྲ་མུ༔ རུ་ལུ་རུ་ལུ་ཧཱུྃ་བྷྱོ་ཧཱུྃ༔ རགྨོ་ཏེ་ཀེཾ་ཙ་ཙ༔ རུ་ལུ་རུ་ལུ་མ་ཧིཾ་བྷྱོ༔ ཀཱ་ཡ་ཨ་བྷི་ཥིཉྩཨོཾ༔ གསུང་གི་རྟེན་སྔགས་བྱང་མགྲིན་པར་བཞག་ཅིང་གཏད་པས་གྲགས་སྟོང་སྐྱེ་འགག་གནས་བྲལ་གཞོམ་མེད་རྡོ་རྗེའི་གསུང་གི་ནུས་པས་ཕྲིན་ལས་རྣམ་བཞི་ཐོགས་མེད་དུ་འགྲུབ་ནུས་པའི་གདིང་ཐོབ་པར་མོས་ཤིག །མེ་ལོང་སྔགས་བྱང་ཅན་གཏད་ལ། སྲོག་གི་སྙིང་པོ་རླུང་ཡིན་ཏེ༔ སྒྲ་ནི་ཡི་གེ་འཁོར་ལོའི་སྤྲིན༔ གྲགས་སྟོང་གསུང་གི་དབང་བསྐུར་བས༔ ཕྲིན་ལས་རྣམ་བཞི་འགྲུབ་པར་ཤོག༔ རྩ་སྔགས་མཐར། ཝཱཀ་ཨ་བྷི་ཥིཉྩ་ཨཱཿ རྗེས་འབྲེལ་དུ་བཟླས་པའི་ལུང་སྦྱིན་པ་ལ། སློབ་དཔོན་ལ་མོས་གུས་དྲག་ཏུ་བྱས་པས་དེ་ཡི་ཐུགས་ཀ་ནས་འོད་ཟེར་ཚ་ཞིང་རྩུབ་པ་སྤྲོས། མདུན་གྱི་མ་མོའི་ཐུགས་ཀར་ཕོག་པས་སྔོན་གྱི་དམ་བཅའ་དྲན་ཏེ་སྒྲུབ་པ་པོ་ལ་རྗེས་སུ་བརྩེ་བས་ཐུགས་ཀར་ཉི་མ་ལ་སྲོག་ཡིག་སྔགས་ཕྲེང་གིས་བསྐོར་བ་ལས་སྔགས་ཀྱི་ཕྲེང་བ་བྱུང༌། ཞལ་ནས་ཐོན། ཁྱེད་རང་སྔགས་ཀྱི་མ་མོར་གསལ་བའི་སྙིང་གར་ཐིམ་པས་སྲོག་སྙིང་གཅིག་ཏུ་འདྲེས་པར་བསམ་ལ་སྔགས་འདིའི་རྗེས་ཟློས་མཛོད། ཏྲག་རཀྴ་མུ་ཏྲ་མུ༔ རུ་ལུ་རུ་ལུ་ཧཱུྃ་བྷྱོ་ཧཱུྃ༔ རགྨོ་ཏེ་ཀེཾ་ཙ་ཙ༔ རུ་ལུ་རུ་ལུ་མ་ཧིཾ་བྷྱོ༔ ཏྲག་རཀྴ་ཨེ་ཀ་ཙ་ཊི་སརྦ་ཤཱིནྟཾཀུ་རུ་སྭཱ་ཧཱ༔ ཏྲག་རཀྴ་ཨེ་ཀ་ཙ་ཊི་སརྦ་པུཥྚིཾ་ཀུ་རུ་སྭཱ་ཧཱ༔ ཏྲག་རཀྴ་ཨེ་ཀ་ཙ་ཊི་སརྦ་ཝཱ་ཤཾ་ཀུ་རུ་སྭཱ་ཧཱ༔ ཏྲག་རཀྴ་ཨེ་ཀ་ཙ་ཊི་དགྲ་བགེགས་འབྱུང་པོ་མཱ་ར་ཡ་ཕཊ༔ ལས་བཞིའི་སྔགས་ཤམ་བཏགས་པ་ལན་གསུམ་བཟླ་བཞིན་མེ་ལོང་གི་སྔགས་བྱང་བཀྲུས་ལ་སློབ་མར་སྦྱིན། ཐུགས་ཡེ་ཤེས་ཀྱི་དགོངས་པ་རིག་སྟོང་ཟུང་འཇུག་མཚོན་པའི་ཕྱིར་མེ་ལོང་དུ་མ་མོའི་སྐུ་འཆར་བ་བསྟན་ཏེ་ངོ་སྤྲད་པས་ཐུགས་ཀྱི་བཀའ་གཏད་པར་མོས་ཤིག །མེ་ལོང་དུ་མ་མོའི་སྐུ་འཆར་བ་བསྟན་ཏེ། ཨ༔ སྣང་ཞིང་སྲིད་པའི་ཆོས་སོ་ཅོག༔ ཐམས་ཅད་མ་མོ་མཁའ་འགྲོའི་དལ༔ དྲན་པ་རང་བྱུང་ཡེ་ཤེས་ཀྱི༔ ཡུལ་དང་དབང་པོ་གཉིས་མེད་སྦྱོར༔ མ་མོ་འབུམ་སྡེའི་སྟོང་སྲོག་ཡིན༔ ཞེས་བརྗོད་ལ་དགོངས་པ་གཏད། བདེ་སྟོང་ཡེ་ཤེས་ཆེན་པོར་གདོད་ནས་བྲལ་སྨིན་གྱི་ཡོན་ཏན་མངོན་པར་རྫོགས་པའི་དགོངས་པ་ལ་དབང་ཐོབ་པས་སྲིད་པའི་གཡུལ་ལས་རྒྱལ་བའི་བརྡར་བདག་འཛིན་རུ་ཏྲའི་དོན་སྙིང་དང༌། ཚོགས་བརྒྱད་དག་པའི་དུར་ཁྲོད་ཉུལ་བའི་ལྕགས་སྤྱང་གི་ཕྲ་ཐབས་གཏད་པས་ཡོན་ཏན་གྱི་བཀའ་གཏད་པར་མོས་ཤིག །ཕྱག་མཚན་གཉིས་གཏད་ལ། ཕུང་པོ་ལྔ་ལ་བདག་འཛིན་གྱི༔ རུ་ཏྲའི་དོན་སྙིང་ཟ་བ་དང༔ ལྷན་ཅིག་ཚོགས་བརྒྱད་ཚར་གཅོད་པའི༔ ལྕགས་སྤྱང་ཕྲ་ཐབས་ཁྱོད་ཀྱིས་ཟུངས༔ རྩ་སྔགས་མཐར། གུ་ཎ་ཨ་བྷི་ཥིཉྩ་ཧཱུྃ༔ དབྱིངས་རིག་གཉིས་མེད་རང་བྱུང་ཐུགས་རྗེ་ཀུན་ཏུ་ཁྱབ་པས་ཚར་གཅོད་རྗེས་འཛིན་གྱི་ཕྲིན་ལས་བཞི་མཐར་ཕྱིན་པས་བྱང་ཆུབ་ཀྱི་སྤྱོད་པ་ཡོངས་སུ་རྫོགས་པས་ཞི་བའི་མཐའ་ལས་འདས་པའི་ཕྲིན་ལས་ཀྱི་བཀའ་གཏད་པར་མོས་ཤིག །ནལ་བུའི་ཐོད་པར་དུག་ཁྲག་གིས་སྦགས་པའི་ཐུན་རྫས་གཏད་ལ། ཧཱུྃ༔ མ་ནི་སྙིང་པོ་བྱང་ཆུབ་སེམས༔ མོ་ནི་རང་བྱུང་ཡེ་ཤེས་དཔལ༔ གང་ནས་བོས་ཀྱང་ཁྱོད་ཀྱི་མཚན༔ འདོད་ཁམས་བདག་མོས་ཕྲིན་ལས་ཀུན༔ ཐོགས་པ་མེད་པར་སྒྲུབ་པར་ཤོག༔ ཏྲག་རཀྴ་ཨེ་ཀ་ཙ་ཊི་སརྦ་ཤཱིནྟཾཀུ་རུ་སྭཱ་ཧཱ༔ ཏྲག་རཀྴ་ཨེ་ཀ་ཙ་ཊི་སརྦ་པུཥྚིཾ་ཀུ་རུ་སྭཱ་ཧཱ༔ ཏྲག་རཀྴ་ཨེ་ཀ་ཙ་ཊི་སརྦ་ཝཱ་ཤཾ་ཀུ་རུ་སྭཱ་ཧཱ༔ ཏྲག་རཀྴ་ཨེ་ཀ་ཙ་ཊི་དགྲ་བགེགས་འབྱུང་པོ་མཱ་ར་ཡ་ཕཊ༔ ཞེས་ལས་བཞིའི་ཤམ་ཅན་བཟླ། དཔལ་ཡེ་ཤེས་ཀྱི་མ་མོ་སྔགས་སྲུང་རྡོ་རྗེ་རག་གདོང་མ་འཁོར་དང་བཅས་པས་བརྒྱུད་གསུམ་རིག་འཛིན་བླ་མས་རྡོ་རྗེའི་ཐ་ཚིག་ཇི་ལྟར་བསྒོས་པ་བཞིན་རྡོ་རྗེའི་སློབ་མ་འདིའི་ཕྲིན་ལས་རྣམ་པ་བཞི་ཇི་ལྟར་འདོད་པ་བཞིན་མཛོད་ཅིག །ཅེས་དམ་ཚིག་གི་དམོད་པ་བརྡར། དེ་ལྟར་ན་ཁྱེད་རང་གི་སྒོ་གསུམ་བྱ་བྱེད་དང་བཅས་པ་ཡེ་ཤེས་དབྱིངས་ཀྱི་རྒྱལ་མོའི་སྐུ་གསུང་ཐུགས་ཡོན་ཏན་ཕྲིན་ལས་དང་དབྱེར་མེད་དུ་བྱིན་གྱིས་བརླབས་པས་ཡེ་ཤེས་ཀྱི་མ་མོ་དང་ཐབས་མཆོག་རྡོ་རྗེ་སྲིན་པོ་དཔལ་ཆེན་ཧེ་རུ་ཀ་རྗེས་སུ་ཆགས་པའི་སྦྱོར་བས་སྙོམ་པར་ཞུགས་པའི་བྱང་ཆུབ་ཀྱི་སེམས་བདུད་རྩི་ལྕེ་ལ་བྱིན་པ་རོལ་པས་ལུས་གནས་ཐམས་ཅད་ལ་ཁྱབ། འཁྲུལ་རྟོག་དབྱིངས་སུ་ནུབ་པས་བདེ་སྟོང་མི་ཤིགས་པའི་དགོངས་ཀློང་མངོན་སུམ་དུ་སད་ནས་ཡིད་ཆོས་འཁྲུལ་པའི་རྟོག་པ་ཀ་དག་སྟོང་དབྱིངས་ཉིད་དུ་ཐིམ་པའི་མོས་པ་མཛོད། གསང་རྫས་བདུད་རྩི་བྱིན་ལ། ཧཱུྃ༔ བྱ་བྱེད་ཡིད་ཆོས་རྣམ་དག་པའི༔ ཡབ་ཡུམ་མཉམ་པར་རོལ་པའི་སྤྲིན༔ རྒྱུ་དྲུག་རྐྱེན་བཞི་ལས་བྱུང་བའི༔ བྱང་ཆུབ་སེམས་ལ་རྟག་ཏུ་རོལ༔ ཨ་ཧོ་མ་ཧཱ་སུ་ཁ་དྷརྨ་དྷཱ་ཏུ་ཧོ༔ དེ་ནས་ངེས་དོན་སྲིད་ཞིའི་སྤྱི་དཔལ་ཆེན་པོ་ཐབས་མཆོག་རྡོ་རྗེ་སྲིན་པོ་དཔལ་ལྡན་ཡེ་ཤེས་ཀྱི་མགོན་པོ་མ་ནིང་ནག་པོའི་རྗེས་སུ་གནང་བ་སྦྱིན་པ་ལ། ཐོག་མར་སྐུ་ཡི་རྗེས་གནང་གི་སླད་དུ་རྣམ་པ་དཀར་ཕྱོགས་དགྲ་ལྷའི་དམག་དཔོན་གྱི་ཚུལ་བསྟན་པའི་ཕྱག་མཚན་ཙནྡན་གྱི་བིང་ཆེན་སྤྲུལ་པའི་དམག་དཔུང་འབུམ་གྱི་རྫོང་ཆེན་གཏད་པས་སྡེ་གསུམ་རུ་ཏྲའི་གཡུལ་ལས་རྣམ་པར་རྒྱལ་བའི་ཧེ་རུ་ཀ་དཔལ་ཆེན་པོའི་སྐུ་ཡི་རྗེས་གནང་ཐོབ་པར་མོས་ཤིག །ཙནྡན་གྱི་བིང་ཆེན་གཡས་སུ་གཏད་ལ། ཧཱུྃ༔ ལྷ་ཆེན་དཔལ་འབར་ཆེན་པོ་ཡི༔ སྤྲུལ་པའི་དམག་དཔུང་འབུམ་སྡེའི་མཛོད༔ གཡུལ་ལས་རྣམ་རྒྱལ་བིང་ཆེན་འདི༔ སྐུ་དང་གཉིས་སུ་མེད་པར་ཟུངས༔ མ་ཧཱ་ཀཱ་ལ་ཤཱ་ས་ན་ཀཱ་ཡ་བཛྲ་ཨོཾ༔ གསུང་གི་རྗེས་གནང་གི་སླད་དུ་སློབ་དཔོན་ཧེ་རུ་ཀའི་ཐུགས་སྲོག་གི་འོད་ཟེར་གྱིས་བསྐུལ་བས་དཔལ་མགོན་གྱི་ཐུགས་སྲོག་ཧཱུྃ་ལས་སྔགས་ཕྲེང་བྱུང་ཞལ་ནས་ཐོན། སློབ་མའི་ཁར་བརྒྱུད་སྙིང་གའི་ཧཱུྃ་ལ་ཐིམ་པས་གསུང་གི་རྗེས་གནང་ཐོབ་པར་མོས་ལ་སྔགས་འདིའི་རྗེས་ཟློས་མཛོད། མ་ཧཱ་ཀཱ་ལ་ཤཱ་ས་ན་ཧཱུྃ༔ ལན་གསུམ་བཟླ། ཐུགས་ཀྱི་རྗེས་གནང་གི་སླད་དུ་དཔལ་ལྡན་ཡེ་ཤེས་ཀྱི་མགོན་པོའི་ཐུགས་སྲོག་ཡེ་ཤེས་ཀྱི་ངོ་བོ་མཚོན་པའི་རུ་མཚོན་དང་སྲིད་ཞིའི་སྟོང་སྲོག་ལ་དབང་བསྒྱུར་བའི་སྙིང་ཞགས་ཕྱག་གཡས་གཡོན་དུ་གཏད་པས་འཁོར་འདས་ཐམས་ཅད་ཀྱི་སྟོང་སྲོག་ལ་དབང་ཐོབ་པར་མོས་ཤིག །རུ་མཚོན་དང་སྙིང་ཞགས་གཏད་ལ། ཧཱུྃ༔ ཀུན་ཏུ་བཟང་པོའི་རོལ་པ་ལས༔ བྱང་ཆུབ་སེམས་ཀྱི་རུ་མཚོན་ནི༔ བདག་འཛིན་རུ་ཏྲའི་གཤེད་པོ་སྟེ༔ ཐུགས་ཀྱི་རྟེན་དུ་གཅེས་པར་ཟུངས༔ རྩ་སྔགས་མཐར། ཙིཏྟ་བཛྲ་ཧཱུྃ༔ དེ་ནས་སྒྲོལ་གིང་བཀའ་ཡི་ལས་བྱེད་སྡེ་བརྒྱད་དྲེགས་པའི་ཚོགས་རྗེ་སྐྱེས་མཆོག་བཛྲ་སཱ་དྷུའི་སྐུ་རྟེན་ཕ་ཝཾ་ལོང་བུ། གསུང་རྟེན་གསེར་གྱི་སྔགས་བྱང༌། ཐུགས་རྟེན་རྡོ་རྗེ་དང་ཙིཏྟ་གཏད་པས་ལས་ཀྱི་ཤན་པ་ཆེན་པོའི་སྐུ་གསུང་ཐུགས་ཀྱི་བཀའ་གཏད་ཐོབ་པར་མོས་ཤིག །ཕ་ཝཾ་ལོང་བུ། གསེར་གྱི་སྔགས་བྱང༌། རྡོ་རྗེ་དང་ཙིཏྟ་གཏད་དེ། ཧཱུྃ༔ ཕ་ཝཾ་ལོང་བུ་སྐུ་ཡི་རྟེན༔ སྔགས་བྱང་གསུང་ལ་རྡོ་རྗེ་ཐུགས༔ དམ་ཉམས་བསྒྲལ་བའི་དཔའ་རྟགས་སྙིང༔ གཏད་པས་དམ་ཅན་འཁོར་དང་བཅས༔ ལུས་དང་གྲིབ་བཞིན་འགྲོགས་གྱུར་ཅིག༔ བཛྲ་སཱ་དྷུ་ཏྲི་ཛཿ ས་མ་ཡ་ཧཱུྃ༔ དེ་ནས་གཙོ་འཁོར་ཡོངས་རྫོགས་ཀྱི་བཀའ་གཏད་པ་ལ། གཏོར་མ་འདི་དག་དཔལ་ཡེ་ཤེས་ཀྱི་མ་མོ་སྔགས་ཀྱི་སྲུང་མ། འཁོར་སྐུ་གསུང་ཐུགས་ལས་སྤྲུལ་པའི་མ་མོ་གསུམ། ཡེ་ཤེས་ཀྱི་མ་མོ་ལྔ། རྗེ་མོ་བཅུ་བཞི། དམན་མོ་ལྔ་ཅུ་རྩ་བརྒྱད་སོགས་སྣང་སྲིད་མ་མོའི་འཁོར་ཚོགས་བསམ་གྱིས་མི་ཁྱབ་པས་བསྐོར་བ། གཡས་སུ་སྦྱོར་གིང་དཔལ་མགོན་མ་ནིང་ནག་པོ་སྤྲུལ་པའི་མགོན་ཆེན་སྡེ་ལྔ། དཔལ་མགོན་བདུན་ཅུའི་དམག་ཚོགས་དང་བཅས་པ། གཡོན་དུ་སྒྲོལ་བའི་གིང་ཆེན་སྐྱེས་མཆོག་རྡོ་རྗེ་ལེགས་པ་ཐེའུ་རང་སྟོང་སྡེ་དང་བཅས་པ། རྒྱབ་ཏུ་གསང་བའི་སྒྲོལ་གིང་གཟའ་བདུད་སྲོག་གི་སྤུ་གྲི་གཟའ་བརྒྱད་གདོང་མོ་བཞི་དང་བཅས་པ། མདུན་དུ་སྦས་པའི་དཀོར་སྲུང་དུར་ཁྲོད་ལྷ་མོ་མིང་སྲིང་བརྒྱད་དང་བཅས་པ་མདོར་ན་སྲིད་པ་མ་མོའི་དཀྱིལ་འཁོར་དུ་དམ་ཚིག་དང་ཐུགས་རྗེས་འཁོད་པའི་སྔགས་སྲུང་དྲེགས་པའི་ཚོགས་དང་བཅས་པར་གསལ་བའི་སྟེང་གི་ཆ་ལ་རྩ་བརྒྱུད་ཀྱི་བླ་མ་སངས་རྒྱས་བྱང་སེམས་ཡི་དམ་དཀྱིལ་འཁོར་གྱི་ལྷ་ཚོགས་དང་བཅས་པ་སྤྲིན་བཞིན་དུ་གཏིབས་པ་ལ་སློབ་དཔོན་སྤྱི་དཔལ་ཆེན་པོའི་ང་རྒྱལ་གྱིས་བཀའ་བསྒོས་ཏེ་ཕྲིན་ལས་བཅོལ་བར་མོས་ཤིག བྷྱོ༔ སུམ་ཅུ་རྩ་གསུམ་ལྷ་ཡུལ་ན་ཞེས་སོགས་མཐར། དཔལ་ཡེ་ཤེས་ཀྱི་མ་མོ་སྔགས་སྲུང་ཁྲོས་པའི་རྒྱལ་མོ། དཔལ་མགོན་མ་ནིང་ནག་པོ། དམ་ཅན་རྡོ་རྗེ་ལེགས་པ། དྲང་སྲོང་གཟའ་བདུད་ཆེན་པོ། དཀོར་སྲུང་དུར་ཁྲོད་ཀྱི་ལྷ་མོ་རྣམས་སོ་སོའི་འཁོར་གཡོག་ཕོ་ཉ་ལས་མཁན་དང་བཅས་པ་རྣམས་ཀྱིས་ཆོས་སྐུ་ཀུན་ཏུ་བཟང་པོ། ལོངས་སྐུ་རྡོ་རྗེ་སེམས་དཔའ། སྤྲུལ་སྐུ་དགའ་རབ་རྡོ་རྗེ། སློབ་དཔོན་འཇམ་དཔལ་བཤེས་གཉེན། རིག་འཛིན་ཤྲཱི་སིང་ཧ། མཁས་པ་ཛྙཱ་ན་སཱུ་ཏྲ། པཎ་ཆེན་བི་མ་མི་ཏྲ། སློབ་དཔོན་པདྨ་ཐོད་ཕྲེང༌། མཁའ་འགྲོ་ཡེ་ཤེས་མཚོ་རྒྱལ། ལོ་ཆེན་བཻ་རོ་ཙཱ་ན། མངའ་བདག་ཁྲི་སྲོང་ལྡེའུ་བཙན། ཀུན་མཁྱེན་ཀློང་ཆེན་རབ་འབྱམས། རིག་འཛིན་འཇིགས་མེད་གླིང་པ། འཇིགས་མེད་ཕྲིན་ལས་འོད་ཟེར། འཇིགས་མེད་རྒྱལ་བའི་མྱུ་གུ། འཇམ་མགོན་རྡོ་རྗེ་གཟི་བརྗིད། མཁན་ཆེན་དཀོན་མཆོག་གྲགས་པ། འགྲོ་འདུལ་དཔའ་བོ་རྡོ་རྗེ། ཁྱབ་བདག་པདྨ་ཡེ་ཤེས་རྡོ་རྗེའི་བར་དུ་བྱོན་པའི་བརྒྱུད་གསུམ་རིག་འཛིན་བླ་མ་རྣམས་ཀྱི་བཀའ་དང་དམ་ལས་མ་འདའ་བར་རྡོ་རྗེའི་སློབ་མ་འདི་རྣམས་ལ་སྐུ་གསུང་ཐུགས་ཡོན་ཏན་ཕྲིན་ལས་ཀྱི་སྒོ་ནས་དབང་དང་དངོས་གྲུབ་སྩོལ་བ་དང༌། སངས་རྒྱས་ཀྱི་བསྟན་པ་སྲུང་བ་ལ་ནུས་མཐུ་དང་ལྡན་པར་མཛད་དུ་གསོལ། སློབ་མ་རྣམས་ཀྱི་སྲུང་མ་ཆེན་པོ་མཛད་ནས། ལུས་དང་གྲིབ་མ་བཞིན་དུ་འགྲོགས་ཏེ། འགལ་རྐྱེན་སོལ། མཐུན་རྐྱེན་སྒྲུབས། མཐུ་དང་དཔུང་བསྐྱེད། བསམ་པ་སྒྲུབས། རེ་བ་སྐོངས། ཡིད་ལ་བསམ་པའི་དོན་ཐམས་ཅད་བདེ་བླག་ཏུ་སྒྲུབས། མཐར་ཐུག་ཕྱག་རྒྱ་ཆེན་པོ་མཆོག་གི་དངོས་གྲུབ་ལ་ཡང་དག་པར་སྦྱོར་ཅིག །ཅེས་གསོལ་བས་གཏོར་མའི་ལྷ་ཚོགས་ལས་ལྕམ་དྲལ་གཉིས་འོད་དུ་ཞུ་ནས་སློབ་མ་ལ་ཐིམ། རང་རྒྱུད་ཅན་དུ་སྟོན་པ་རྣམས་ལུས་དང་གྲིབ་མ་བཞིན་དུ་འགྲོགས་པའི་དམ་ཚིག་ནོས་པར་བསམ་ལ། གཏོར་མའི་ཕུད་ཅུང་ཟད་དངོས་གྲུབ་ཀྱི་ཚུལ་དུ་བྱིན། ནང་མཆོད་ཀྱི་བདུད་རྩི་བྱིན་ནས་དམ་ཚིག་གཅིག་ཏུ་འདྲེས་པར་བསམ་ལ། གདོད་མའི་མགོན་པོ་ཡབ་ཡུམ་ཀྱང༔ ཁྱོད་ལས་གཞན་དུ་མེད་པའི་ཕྱིར༔ རྟག་ཏུ་རྫོགས་པ་ཆེན་པོ་སྒོམ༔ གཏོར་ཚོགས་མཆོད་པ་རྒྱུན་མི་གཅོད༔ ལྕམ་དྲལ་སྒྲུབ་པའི་དམ་ཚིག་ཀུན༔ དེང་ནས་ཚུལ་བཞིན་གཟུང་བར་གྱིས༔ ལན་གསུམ་རྗེས་ཟློས་བྱ། དེ་ལྟ་བུའི་ཐུན་མོང་མ་ཡིན་པའི་བཀའ་གཏད་ཆིག་བརྒྱུད་ཅན་ལེགས་པར་ཐོབ་པས་སྲུང་མ་རྣམས་རྟག་ཏུ་མི་འབྲལ་བར་འགྲོགས་པ་ཆོས་ཉིད་ཡིན་པས། ཁྱེད་རྣམས་ཀྱིས་ཀྱང་དམ་ཚིག་རྣམ་པར་དག་པར་བསྲུང་དགོས་ཏེ། སྤྱིར་མཆོད་གཏོར་གསོལ་བསྐང་མ་ཆག་པར་བརྩོན་པ་དང༌། ལྕམ་དྲལ་རྒྱུ་བའི་དུས་གཉན་ལ་ཕུད་སྐོང་དང་བཤགས་ཕྲིན་ནན་ཏན་དུ་བྱ་བ་དང༌། སྣོད་དུ་མ་གྱུར་པ་རྣམས་ལ་ལྷ་སྔགས་དམ་རྫས་རྣམས་སྦ་བ་དང༌། བྱ་ནག་དང་ཁྱི་ནག་བོང་དྲེལ་ལ་མི་རྡེག་པ་དང༌། མགར་ཡུགས་ཀྱི་གྲིབ་ལ་འཛེམ་བག་བྱ། ཤ་རྐྱང་ལ་རྔོན་དང་ཀུ་ཅོ་བྱ་བ་དང༌། བྱ་ནག་རྨ་བྱ་བསྐྲད་པ་དང་ཁྱོ་ཤུག་དབྲལ་བ་དང༌། བྱི་ནལ་ལ་ཁྲོས་པ། ཐབ་གཞོབ་ཤོར་བ་དང༌། རྡོ་རྗེ་ཐེག་པ་སྤྱི་དང་ཁྱད་པར་གྱི་དམ་ཚིག་རྣམས་སྲུང་སྙམ་པས་དམ་ཚིག་ཁས་བླང་བ་འདིའི་རྗེས་ཟློས་མཛོད། གཙོ་བོས་ཇི་ལྟར་བཀའ་བསྩལ་སོགས་དང༌། གཏང་རག་ལུས་འབུལ་དགེ་བསྔོ་བྱས་ལ་སློབ་མ་རྣམས་གྲོལ། སློབ་དཔོན་གྱིས་ཕུད་སྐོང་ཚོགས་དང་མངའ་གསོལ་སོགས་རྒྱས་པར་བྱས་ལ་ཕྲིན་ལས་ཀྱི་གཉེར་གཏད་པ་རྣམས་བྱའོ།  །ཡང་ཐུན་མོང་གི་སློབ་མ་ལ་གཏོར་མའི་བཀའ་གཏད་ཙམ་བྱེད་ན། ལོ་རྒྱུས་ནས་བརྩམས་ཡེ་ཤེས་དབབ་པ་ཡན་སོང་ནས། གཙོ་འཁོར་ཡོངས་རྫོགས་གཏོར་མའི་བཀའ་གཏད་ཙམ་བྱས་ནས། དཔལ་ལྡན་མ་མགོན་ལྕམ་དྲལ་འཁོར་དང་བཅས་པ་རྣམས་ཀྱིས་སྒྲུབ་པ་པོའི་སྡོང་གྲོགས་མཛད་པར་ཞལ་གྱིས་བཞེས་པར་མོས་ཤིག །ཅེས་བརྗོད་ལ་བདུད་རྩི་མི་སྦྱིན་པར་དམ་ཚིག་ཁས་བླང་ནས་མཐར་དབྱུང་བས་གསང་བ་གཞན་དང་སྒོ་བསྟུན་ན་རུང་ངམ་སྙམ་པ་ནི་ཁོ་བོའི་རྣམ་རྟོག་གོ །ཕྲིན་ལས་རྩ་བ་བཀའ་གཉན་སྲུང་མའི་ཟིལ། །འཇིགས་ཀྱང་སྣང་བ་ཧོལ་རྒྱུག་སློབ་དཔོན་གྱི། །འགལ་འཁྲུལ་ནོངས་པ་བསལ་ཕྱིར་མངྒ་ལ། །བདུད་འདུལ་དྲག་པོ་རྩལ་གྱིས་སུག་ལས་སོ། །སྙིང་ཐིག་གཉན་པོའི་བཀའ་སྲུང་ལྕམ་དྲལ་གྱི་བཀའ་གཏད་ཆིག་བརྒྱུད་ཀྱི་ལེའུ་ཚན་བཅུ་གཉིས་པ་སྟེ་སྔགས་བན་རྒན་པོས་སྦྱར་བའོ།  ༈  བདེ་སྟོང་སྒྱུ་མ་ཆེན་པོའི་ལང་ཚོའི་དཔྱིད། །སྲིད་ཞིའི་མཚར་སྡུག་རྫོགས་པའི་རི་དྭགས་འཛིན། །འདོད་དགུའི་ཕྲིན་ལས་བདུད་རྩིའི་ཟེར་འཛག་པས། །སྒྲུབ་མཆོག་རྗེས་སྐྱོང་དཔའ་མོ་དེས་སྐྱོངས་ཤིག །རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་ཐུན་མོང་མ་ཡིན་པའི་བཀའ་སྲུང་སྨན་བཙུན་ཆེན་མོ་ཚེ་རིང་མཆེད་ལྔའི་སྲོག་དབང་སྦྱིན་པར་འདོད་པས། གྲོང་ཡུལ་མ་ཡིན་པ་གཙང་མ་དགེ་བའི་གནས་ཁང་བྱི་དོར་རྒྱན་གྱིས་སྤྲས་པའི་གུང་དུ་གཞུང་མཐུན་སྐུ་ཡི་མདུན་སྟེགས་མཐོ་བར་རྡུལ་ཚོན་ནམ་རས་བྲིས་ཀྱི་པདྨ་འདབ་བཞིའམ། དར་རས་ཀྱིས་གཡོགས་པའི་དབུས་སུ་འབྲུ་དཀར་གྱི་ཚོམ་བུ་གཙོ་འཁོར་ལྔ་བཀོད་པའི་དབུས་སུ་མཉྫིའི་སྟེང་རིགས་འདུས་ཀྱི་གཏོར་མ་དར་གདུགས་ཙཀླིས་བརྒྱན་པའི་མདུན་དུ་སྨན་བཙུན་མའི་གཏོར་མ་བུམ་པས་བཏེགས་པའི་འབྲང་རྒྱས་གཙོ་འཁོར་ལྔ་ལ་ཚེ་རིང་མཆེད་ལྔའི་སྐུ་ཙཀ་སོ་སོ་དང༌། རྨ་བྱའི་སྒྲོ་མདོངས་དང༌། རང་མདོག་གི་དར་སྣས་བརྒྱན་པའི་སྡེར་ཁ་སོ་སོར་དབུས་དང་ཕྱོགས་བཞིར་བཀོད། མདའ་དར་ཁ་དོག་ལྔ་དུང་དཀར་མེ་ལོང་གིས་བརྒྱན་པ་དང༌། འབྱོར་ན་བླ་རྡོ། མུ་ཏིག མུ་མེན། གསེར་ཐིག པད་རཱག །གཡུ་གོང་སྐྱོན་མེད་ཀྱི་བླ་རྡོའང་མདའ་དར་སོ་སོར་གདགས། མཆོད་གཏོར་བཟང་པོ་ཁ་ཟས་སྣ་ཚོགས་དང་ཤིང་ཏོག་གིས་བསྐོར་བ་དང༌། གཡས་གཡོན་དུ་སྨན་རཀ །མཐའ་སྐོར་དུ་ཉེར་སྤྱོད། གཞན་ཡང་ཕྱེ་མར། རྒྱ་ཕོར་དང་དངུལ་ཕོར་དུ་གསེར་སྐྱེམས་དང་གཡུ་སྐྱེམས། དཀར་གསུམ། འོ་ཆོལ། སྨན་སྣ་སྤྱན་གཟིགས་དཀོར་ཆ་མཐུན་རྫས་རྒྱས་པར་འདུ་བྱས་ན་སློབ་བུའི་ལོངས་སྤྱོད་ཀྱི་རྟེན་འབྲེལ་ཡིན་པར་གསུངས། ཆོ་ག་དངོས་ལ་བདག་བསྐྱེད་རིག་འཛིན་འདུས་པའི་ལས་གཞུང་བསྲང་ལ་བཟླས་པ་བསྡུ་ལྡང་བཅས་བྱ། རྃ་ཡྃ་ཁྃ། སྟོང་པའི་ངང་ལས་གནས་ཁང་ཐར་པ་ཆེན་པོའི་གཞལ་མེད་ཕུན་སུམ་ཚོགས་པར་ཨ་ལས་བྷཉྫ་འབར་བའི་སྣོད་བཟང་ཞིང་རྒྱ་ཆེ་བ་རྣམས་སུ་ཧཱུྃ་ཡིག་ལས་བྱུང་བའི་མཆོད་ཡོན། ཞབས་བསིལ། མེ་ཏོག བདུག་སྤོས། མར་མེ། དྲི་ཆབ། ཞལ་ཟས། རོལ་མོ་ལ་སོགས་པ་མཆོད་པའི་དངོས་པོ་རྣམས་འདོད་ཡོན་གྱི་རྣམ་པ་མ་ཚང་བ་མེད་པ་འཕགས་པ་ཀུན་ཏུ་བཟང་པོའི་མཆོད་པའི་སྤྲིན་གྱི་ཕུང་པོ་ལྟ་བུས་ནམ་མཁའི་མཐའ་ཀླས་པ་གང་བར་གྱུར། ཨོཾ་བཛྲ་ཨརྒྷཾ་ཨཱཿཧཱུྃ་ནས། ཤབྡའི་བར་གྱིས་བྱིན་གྱིས་བརླབ། ཨོཾ་ཨཱཿཧཱུྃ། ན་མཿསརྦ་ཏ་ཐཱ་ག་ཏ་སོགས་ནམ་མཁའ་མཛོད་སྔགས་ལན་གསུམ་དང༌། རྃ་ཡྃ་ཁྃ། སྟོང་པའི་ངང་ལས་ཡྃ་ལས་རླུང༌། རྃ་ལས་མེ། ཀཾ་ལས་མི་མགོའི་སྒྱེད་པུ་གསུམ་ལ་བརྟེན་པའི་ཨ་ཡིག་ལས་བྱུང་བའི་ཐོད་པའི་སྣོད་དུ་བཅུད་ཐམས་ཅད་ཧཱུྃ་ཨོཾ་སྭཱ་ཨཱཾ་ཧཱ་མཱུཾ་ལཱཾ་མཱཾ་པཱཾ་ཏཱཾ་ལས་བདུད་རྩི་ལྔ་དང་སྒྲོན་མ་ལྔར་གྱུར་པ་སོ་སོའི་ས་བོན་གྱིས་མཚན་པ་དང་བཅས་པའི་འོག་གི་རླུང་གཡོས་མེ་སྦར་རྫས་ཐམས་ཅད་ཞུ་ཞིང་འདྲེས་པའི་སྟེང་གི་ནམ་མཁའ་ལ་ཨོཾ་ཨཱཿཧཱུྃ་གི་ཡི་གེ་གསུམ་གནས་པ་ལས་འཕྲོས་པའི་འོད་ཟེར་གྱིས་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་ཡེ་ཤེས་ཀྱི་བདུད་རྩི་བཀུག་ཡི་གེ་གསུམ་ལ་ཐིམ་སྟེ་རིམ་པར་ཞུ་བ་ལས་དམ་ཚིག་གི་རྫས་དང་རོ་གཅིག་ཏུ་གྱུར། ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཋ། ཨོཾ་ཨཱཿཧཱུྃ་མ་ཧཱ་རཀྟ་ཛྭ་ལ་མཎྜལ་ཧཱུྃ་ཧྲཱིཿཋ། ཨོཾ་ཨཱཿཧཱུྃ་མ་ཧཱ་བ་ལིཾ་ཏ་ཏེ་ཛོ་བ་ལིཾ་ཏ་བ་ལ་བ་ཏེ་གུ་ཧྲ་ས་མ་ཡ་ཧཱུྃ་ཧྲཱིཿཋ། སྨན་གཏོར་རཀྟའི་སྔགས་སོ་སོར་ལན་གསུམ་རེ་བརྗོད་ནས། ཀྱཻ༔ རང་སྣང་འོད་གསལ་སྤྲུལ་སོགས་ནས། བདག་བསྟོད་དོ༔ བཟླས་པ་ནི། མདུན་བསྐྱེད་ཐུགས་ཀར་ཟླ་བའི་སྟེང༔ བཾ་ཡིག་སྲོག་གི་སྔགས་ཀྱིས་མཚན༔ བདག་ཉིད་རྡོ་རྗེ་ཁྲག་འཐུང་གི༔ ཐུགས་སྲོག་འབར་བའི་འོད་ཟེར་གྱིས༔ རབ་ཏུ་བསྐུལ་ཞིང་དྲྭ་བས་བཅིངས༔ ཆགས་དང་སྡང་བའི་སྟོབས་བསྐྱེད་པས༔ མ་མོ་འཁོར་བཅས་དམ་ལ་གཟིར༔ གང་འདོད་ལས་ཀུན་སྒྲུབ་པར་བསམ༔ གོང་ནོན་རུ་ལུ་ཅུང་ཟད་བཟླ་བ་སྔོན་དུ་འགྲོ་བས། བཾ་ཧ་རི་ནི་ས་བཛྲ་པྲ་མོ་ཧ་ཙིཏྟ་ཧྲཱིཾ་ཧྲཱིཾ་ཛཿཛཿ ཞེས་ཇི་ལྟར་འོས་པ་བཟླས་མཐར། ཚོགས་མཆོད་ཕན་བདེའི་རྣ་ཆ་བཞིན་བསྐང་བཤགས་ཀྱི་བར་རྒྱས་པར་བྱས་ལ། སྣོད་ལྡན་གྱི་སློབ་མ་ཁྲུས་ནས་དབྱུང༌། བགེགས་བསྐྲད་སྲུང་འཁོར་བཅས་གྲུབ་རྗེས། ལོ་རྒྱུས་མཚམས་སྦྱོར། འདིར་སངས་རྒྱས་ཀྱི་བསྟན་པ་གཉན་པོ་སྲུང་ཞིང༌། དེ་འཛིན་གྱི་སྡོང་གྲོགས་མཛད་པའི་ཕྱིར། འོག་མིན་གསང་བ་ཆེན་པོ་ན་དབྱིངས་ཀྱི་ཡུམ་ཆེན་མོ། རང་བཞིན་སྤྲུལ་པའི་ཞིང་ཁམས་ན་གཙོ་དང་འཁོར་གྱི་རྣམ་པར་བསྟན་པ་མཁའ་འགྲོ་མ་ཨེ་ཀ་ཙ་ཊི་སྤུན་དྲུག་དང༌། དེའི་བྲན་མོ་བཅུ་བཞི། གཡོག་མོ་ལྔ་བཅུ་རྩ་བརྒྱད། ཡང་གཡོག་འབུམ་ཁྲི་བདུན་སྟོང་ལ་སོགས་པ། འཇིག་རྟེན་གྱི་ཁམས་སུ་རྟེན་འབྲེལ་བཅུ་གཉིས་གནས་སུ་དག་པའི་བརྡ་ལས་དམ་ཅན་བརྟན་མ་བཅུ་གཉིས་སུ་བཞེངས་པ་ནི། སྔོན་གྱི་ཚེ་དུར་ཁྲོད་ཆེན་པོ་བསིལ་བའི་ཚལ་དུ་མཁའ་འགྲོ་མ་སེང་གེའི་གདོང་ཅན་གྱི་སྤྱན་སྔར་དབང་ནོད་དེ་བསྟན་པ་སྲུང་བར་བསྒོས། བོད་དུ་བསྟན་པ་སྔ་དར་གྱི་ཚེ་སློབ་དཔོན་ཆེན་པོ་པདྨའི་ཞབས་ལ་བལ་བོད་ཀྱི་མཚམས་ཁ་ལ་རོང་སྒོར་མཐོ་བརྩམས་པས་ཕྱག་རྒྱ་གཉན་པོའི་ཟིལ་འོག་ཏུ་སྤ་བཀོང་པར་མཛད་ནས་གངས་ཅན་བོད་ཀྱི་ཡུལ་ལྷར་མངའ་གསོལ། གསང་ཆེན་རྒྱ་མཚོའི་བསྟན་པ་སྐྱོང་བར་རྩིས་སུ་ཕབ་པའི་ནང་ཚན་ལས། འདིར་ཞིང་སྐྱོང་མཁའ་འགྲོའི་དབང་མོ་ཚེ་རིང་མཆེད་ལྔར་གྲགས་པ་ནི། ནང་དུ་རྣལ་འབྱོར་སྒྲུབ་པ་པོ་ལ་སྙིང་ཉེ་ལ་བཀྲ་ཤིས། འཆི་མེད་ཀྱི་བཅུད་ལེན་སྟེར་བས་ཚེ་རིང༌། རྣམ་བཞིའི་ཕྲིན་ལས་ལ་མངའ་མཛད་པས་ཅི་བཅོལ་གྱི་ལས་རྣོ་ལ་མྱུར། ཕྱི་ལྟར་དུ་སྣོད་བཅུད་ཀུན་ལ་དབང་བསྒྱུར་བས་ཚན་ཆེ། མདོར་ན་བསམ་དོན་གྱི་རེ་བ་སྐོང་བ་ལ་ཡིད་བཞིན་གྱི་ནོར་བུ་གཅིག་ཏུ་ལྷུན་གྱིས་གྲུབ་པའི་སྲུང་མ་ཁྱད་པར་ཅན་འདི་ནི་རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་ཆོས་སྡེ་ལས་ཕེབས་པ་ཡིན་ལ། དེ་ཡང་འདི་ཉིད་ཤིན་ཏུ་བཀའ་གཉན་ཞིང་ཁྱབ་གདལ་དུ་སྟེར་བྱ་མ་ཡིན་པས་ཆོས་སྡེ་བྱིངས་གཏན་ལ་ཕེབས་ནས་ཀྱང་བགྲང་བྱའི་འཁོར་ལོ་བཅུ་ཕྲག་ཙམ་དུ་བཀའ་རྒྱ་མ་ཁྲོལ། ཁྲིད་ཡིག་ཆེན་མོ་གཏན་ལ་ཕེབས་པ་ཙམ་ན་འོད་གསལ་གྱི་དབྱིངས་ནས་སྒྱུ་མ་སྤྲུལ་པའི་སྐྱེད་མོའི་ཚལ་མཆོག་ཏུ་ཉམས་དགའ་བར། ཟངས་གཞོང་གི་རྣམ་པར་བརྟེན་པའི་རྫིང་བུ་དྭངས་གསལ་གྱི་ཆུས་མེར་གྱིས་ཁེངས་པའི་ནང་ན། ལྷ་མོའི་སྲོག་གི་ཁམས་བྱང་སེམས་དཀར་དམར་གྱི་གོང་བུ་འདར་བ་དང་འཕྲིགས་པའི་རྣམ་འགྱུར་ཅན་གཉིས་ཀུན་ཏུ་རྒྱུ་བ་ཞིག་རྨ་བྱ་གཞོན་ནུ་སྐྱེས་བུའི་ལུས་ཚད་ཙམ་པ་ལྔར་གྱུར་ནས་གཙུག་ཕུད་ནམ་མཁའ་ལ་གཡེངས་པའི་ཟློས་གར་རྩེས། སླར་ཡང་དེ་ཡོངས་སུ་གྱུར་པ་ལས་སྨན་བཙུན་མཆེད་ལྔའི་སྣང་ཆར་བསྟན་ནས་ཧི་ཧིའི་བཞད་སྒྲ་ཆེན་པོ་དང་བཅས་ལྐོག་གྱུར་གྱི་རྣམ་པ་རྡོ་རྗེའི་གླུ་བླངས། དངོས་སུ་གཟུགས་མེད་པའི་སྒྲ་སྒྲོག་པ་དང་ཕྱི་ནང་གསང་གསུམ་གྱི་བླ་རྡོའི་རྣམ་པར་རང་དབང་དུ་གྱུར་པའི་རྟེན་འབྲེལ་ཟབ་མོས་གོ་ཕྱེ་ནས་ལྷ་མོའི་སྟོང་སྲོག་མཁའ་འགྲོ་སྙི་ལ་ཟིན་པ་ལྟ་བུ་སྦྱིན་པ་སྐབས་སུ་བབ་པ་ཡིན་པས། སློབ་དཔོན་གྱི་བྱ་བ་སྔོན་དུ་སོང༌། སློབ་མའི་བྱ་བ་མཎྜལ་ཕུལ། བླ་མ་སྣང་སྲིད་ཟིལ་གནོན་མ་ཧཱ་གུ་རུ་དངོས་སུ་གསལ་བར་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། བདེ་གཤེགས་དཔལ་གྱི་བཀའ་སྡོད་ཆེ༔ མཐུ་ལྡན་ཞིང་སྐྱོང་མཁའ་འགྲོ་མའི༔ སྲོག་དབང་བདག་ལ་བསྩལ་དུ་གསོལ༔ སློབ་དཔོན་གྱི་བཀའ་གཉན་པའི་ཐ་ཚིག་བསྒྲགས་པ་ནི། འདི་ནི་ཤིན་ཏུ་བཀའ་གཉན་པས༔ སྲོག་དང་དམ་ཚིག་བསྲེ་ནུས་སམ༔ རྟག་ཏུ་གསོལ་ཀར་བརྩོན་ནུས་སམ༔ སློབ་མས་དམ་ལས་མི་འདའ་བར་ཁས་ལེན་པ་འདིའི་རྗེས་ཟློས་མཛོད། དམ་ཚིག་གཉན་པོ་གང་ཡིན་པ༔ ནམ་ཡང་བཏང་བར་མི་བགྱིད་དོ༔ དེ་ལྟར་ན་མཐུ་ལྡན་སྲུང་མའི་དབང་པོ་དང་སྲོག་སྙིང་གཅིག་ཏུ་བསྲེ་བའི་ཕྱིར། སྲུང་མའི་ཕུད་སྐྱེམས་ནས་སློབ་མའི་ཁར་བྱིན་ལ། མ་མོ་ཁྱོད་ལ་གཏད་པར་བྱ༔ ད་ལྟ་རྗེ་མོའི་ཚུལ་དུ་སྒྲུབ༔ རྟག་ཏུ་གྲོགས་ཀྱི་དམ་ཚིག་སྲུངས༔ ནམ་ཞིག་བྲན་དུ་ཁོལ་གྱུར་ཅིག༔ ས་མ་ཡ༔ བཛྲརཀྵནྟུ༔ ཞེས་དམ་ཚིག་གཅིག་ཏུ་བསྲེ། ཞིང་མཆོག་ཁྱད་པར་ཅན་མཆོག་གསུམ་རྩ་གསུམ་རྒྱ་མཚོ་སྤྲིན་གཏིབས་པ་ལྟར་བཞུགས་པའི་སྤྱན་སྔར་སྐྱབས་སེམས་ཚོགས་བསགས་སྡོམ་པ་བཟུང་བ་འདིའི་རྗེས་ཟློས་ལན་གསུམ་མཛོད། དཀོན་མཆོག་གསུམ་སོགས་ལན་གསུམ། དེ་ནས་སློབ་མ་རྣམས་གཉེན་པོ་སྟོབས་ཀྱི་ལྷའི་ཡེ་ཤེས་པ་དབབ་པས་དབང་གི་གཞི་འགོད་ཅིང་ཡེ་ཤེས་པ་དབབ་པ་ལ་དམིགས་པ་འདི་ལྟར་མཛོད། དེ་ཡང་གནས་ཁང་རང་བཞིན་ལྷུན་གྱིས་གྲུབ་པའི་ཞིང་ཁམས་པདྨ་འོད་ཀྱི་གཞལ་ཡས་ཁང་ཆེན་པོ་ཟག་པ་མེད་པ་ཡེ་ཤེས་ཀྱི་འབྱོར་པས་ཁྱད་པར་དུ་བྱས་པའི་སློབ་དཔོན་གུ་རུ་རིན་པོ་ཆེ་པདྨ་འབྱུང་གནས་སྐུ་མདོག་དཀར་གསལ་ཁྲོ་འཛུམ་ཆགས་པའི་ཉམས་ཅན། རྡོ་རྗེ་གདེངས་ཤིང་ཐོད་བུམ་བསྣམས་པ་སྙན་ཞུ་ཆོས་གོས་གསང་ཕོད་སོགས་རྒྱན་དང་ཆ་ལུགས་རྫོགས་པ། གཟི་བརྗིད་ཉི་མ་འབུམ་གྱི་རང་བཞིན་ལྟར་འབར་བ་ལ་མོས་གུས་དུང་དུང་བྱས་པའི་རྐྱེན་གྱིས་ཐུགས་ཀ་ནས་འོད་ཟེར་མེ་འོད་ལྟ་བུ་བྱུང༌། སློབ་མ་ལ་ཕོག །ཐ་མལ་གྱི་སྒོ་གསུམ་སྦྱངས། འོད་ཀྱི་རྣམ་པར་གྱུར། དེ་ཡོངས་སུ་གྱུར་པ་ལས་སློབ་མ་དཔལ་ཆེན་པོ་བདེ་གཤེགས་འདུས་པ་ཁྲག་འཐུང་ཡོངས་ཀྱི་རྗེ་བཙན་ཆེན་པོ་སྐུ་མདོག་སྟོན་ཀའི་ནམ་མཁའ་ལྟར་དག་པ། ཞལ་གསུམ་གཡས་དཀར་གཡོན་དམར། ཕྱག་དྲུག་གིས་གཡས་གསུམ་རྡོ་རྗེ་ཁཊྭཱཾ་མེ་དཔུང༌། གཡོན་གསུམ་ཐོད་ཁྲག་ཐོང་གཤོལ་ལྕགས་ཀྱི་སྡིག་པ་བསྣམས་པ། དཔལ་དང་དུར་ཁྲོད་རོལ་པའི་ཆས་ཀྱིས་བརྗིད་ཅིང༌། པད་ཉི་རྒྱལ་བསེན་ཕོ་མོའི་སྟེང་ན་འགྱིང་ཞིང་བསྐལ་པའི་མེ་དཔུང་འབར་བའི་ཀློང་ན་བཞུགས་པ། གནམ་ཞལ་དབྱིངས་ཀྱི་དབང་ཕྱུག་ཁཊྭཱཾ་དུང་ཁྲག་འཛིན་པ་དང་གཉིས་མེད་དུ་སྦྱོར་བའི་གཟི་བྱིན་བཟོད་པར་དཀའ་བ། རུ་ལུའི་གད་རྒྱངས་སྒྲོགས་པའི་རྣམ་པར་གྱུར་པའི་གནས་གསུམ་གྱི་འོད་ཀྱིས་བསྒོམས་པ་ལྟ་བུའི་ཡེ་ཤེས་སེམས་དཔའ་སྲིད་ཞིའི་སྤྱི་དཔལ་ཧེ་རུ་ཀའི་རྣམ་པ་ཆར་དྲག་ཏུ་བབ་པ་བཞིན་བྱོན་ནས་སྒོ་གསུམ་ལ་གཉིས་མེད་དུ་ཐིམ་པར་བསམ་ལ། སྤོས་རོལ་ཌཱ་དྲིལ་དང་བཅས་ཏེ་རུ་ལུའི་ཛཔ་ལ་ཛྙཱ་ན་ཨ་བེ་ཤ་ཡ་ཨ་ཨཿ བཏགས་པས་བྱིན་དབབ་སྟེ། ཏིཥྛ་བཛྲས་བརྟན་པར་བྱས་ལ་རབ་ཏུ་གནས། དེ་ནས་གཉན་པོ་སྟོབས་ཀྱི་ལྷའི་སྐུ་གསུང་ཐུགས་ཀྱི་བྱིན་རླབས་ཀྱི་ནུས་པའི་སྟོབས་བསྐྱེད་པ་ལ། དཔལ་གྱི་གཏོར་མ་འདི་ཉིད་ཁྲོ་བོ་ཡོངས་ཀྱི་རྗེ་བཙན་སྲིད་ཞིའི་སྤྱི་དཔལ་ཆེན་པོར་དངོས་སུ་གསལ་བ་སྤྱི་བོར་བཞག་པས་སྐུ་ཡི་གནས་ཐམས་ཅད་ནས་འོད་ཟེར་གྱི་ཕྲེང་བ་དཔག་ཏུ་མེད་པ་སྤྲོས་ཏེ་སློབ་མའི་སྒོ་གསུམ་ལ་ཐིམ་པས་སྐུ་གསུང་ཐུགས་ཡེ་ཤེས་རྡོ་རྗེའི་བྱིན་རླབས་ཞུགས་ཏེ་ཁྲག་འཐུང་ཧེ་རུ་ཀ་དང་གཉིས་སུ་མེད་པར་བྱིན་གྱིས་བརླབ་པར་མོས་ཤིག །གོང་གནོན་གྱི་དཔལ་གཏོར་སློབ་མའི་སྤྱི་བོར་བཞག་ལ། རིགས་འདུས་ཁྲག་འཐུང་དཔལ་ཆེན་པོ༔ གཉེན་པོ་སྟོབས་ཀྱི་དབང་བསྐུར་རོ༔ ཅི་བཅོལ་བཀའ་བཞིན་ཉན་པར་ཤོག༔ ལྟ་བ་གྱད་ཀྱི་དབང་བསྐུར་རོ༔ སྟོང་པའི་སྲོག་ལ་དབང་ཐོབ་ཤོག༔ རུ་ལུའི་རྩ་སྔགས་མཐར། དྷརྨ་དྷཱ་ཏུ་ཨ་བྷི་ཥིཉྩ་ཧཱུྃ༔ ཞེས་དབང་བསྐུར་བས་གཏོར་མ་ལྷར་གསལ་བ་སློབ་མར་ཐིམ་པས་འཁོར་འདས་ཀུན་གྱི་དབང་ཕྱུག་ཆེ་བཙན་འགྲན་ཟླ་མེད་པའི་དཔལ་ཧེ་རུ་ཀའི་དབང་ཐོབ་པར་མོས་ཤིག །དེ་ནས་བཀའ་སྲུང་སྨན་བཙུན་གྱི་བཀའ་གཏད་དངོས་ལ། སློབ་དཔོན་གྱི་ཐུགས་ཀའི་ཧཱུྃ་ཡིག་ལས་འོད་ཟེར་འཕྲོས། མཁའ་འགྲོ་ལྔའི་སྙིང་གར་བཾ་དང་ཧ་རི་ནི་ས་གནས་པ་ལ་རེག་པས་རྒྱུད་བསྐུལ། སློབ་མའི་བྱ་བ་སྒྲུབ་པ་ལ་མ་བུའི་འདུ་ཤེས་ཀྱིས་གདུང་བ་དྲག་པོ་སྐྱེས་པའི་མོས་པ་མཛོད། གཙོ་མོའི་གཏོར་མ་དང་ཕྱག་མཚན་མདའ་དར་ལག་ཏུ་གཏད་ལ། སྨན་བཙུན་བཀྲ་ཤིས་ཚེ་རིང་མ༔ རྡོ་རྗེ་ཀུན་ཏུ་བཟང་མོ་ནི༔ དཀར་དམར་མཛེས་པའི་ལང་ཚོ་ཅན༔ ཕྱག་གཡས་ཡིད་བཞིན་ནོར་བུ་དབང༔ གཡོན་པ་མདའ་དར་དུང་ཤོ་ཅན༔ སྲིད་གསུམ་གསལ་བའི་མེ་ལོང་འཛིན༔ དར་དཀར་ན་བཟའ་གསར་པའི་སྟེང༔ རྨ་བྱའི་སྒྲོ་ཐུལ་གཡང་ལུགས་གསོལ༔ རཏྣའི་སྲོག་ཞུ་དར་ཐོད་ཅན༔ མཛེས་སྡུག་མཉམ་པའི་སྟབས་ཀྱིས་བཞེངས༔ སྐལ་ལྡན་བུ་ལ་དབང་བསྐུར་རོ༔ ཨོཾ་བཛྲ་ར་སི་ཧཱུྃ༔ པྲ་མོ་ཧ༔ ཏིང་ཏིང་ཤག༔ ཙིཏྟ་ཨ་བྷི་ཥིཉྩཧཱུྃ༔ མདུན་གྱི་འབྲང་རྒྱས་དང་མེ་ལོང་གཏད་ལ། དཔའ་བོ་ཡོངས་ཀྱི་སྲིང་གཅིག་མ༔ རིག་འཛིན་ཡོངས་ཀྱི་སྒྲུབ་སྡེ་མོ༔ མཐིང་གི་ཞལ་བཟང་པྲའི་ལྷ་མོས༔ བུ་ལ་ཉེ་བར་མཛད་དུ་གསོལ༔ ཨོཾ་བཛྲ་ར་སི་ཧཱུྃ༔ པྲ་མོ་ཧཿ ཏིང་ཏིང་ཤག༔ ཙིཏྟ་ཨ་བྷི་ཥིཉྩཧཱུྃ༔ གཡས་ཀྱི་འབྲང་རྒྱས་དང་གཏེར་བུམ་གཏད་ལ། དཔའ་བོ་ཡོངས་ཀྱི་སྲིང་གཅིག་མ༔ རིག་འཛིན་ཡོངས་ཀྱི་སྒྲུབ་སྡེ་མོ༔ ཅོད་པཎ་མགྲིན་བཟང་ནོར་གྱི་ལྷས༔ བུ་ལ་ཉེ་བར་མཛད་དུ་གསོལ༔ ཨོཾ་བཛྲ་ར་སི་ཧཱུྃ༔ པྲ་མོ་ཧ༔ ཏིང་ཏིང་ཤག༔ ཙིཏྟ་ཨ་བྷི་ཥིཉྩཧཱུྃ༔ རྒྱབ་ཀྱི་འབྲང་རྒྱས་དང་ནོར་གཞོང་གཏད་ལ། དཔའ་བོ་ཡོངས་ཀྱི་སྲིང་གཅིག་མ༔ རིག་འཛིན་ཡོངས་ཀྱི་སྒྲུབ་སྡེ་མོ༔ མི་གཡོ་གླང་བཟང་ཟས་ཀྱི་ལྷས༔ བུ་ལ་ཉེ་བར་མཛད་དུ་གསོལ༔ ཨོཾ་བཛྲ་ར་སི་ཧཱུྃ༔ པྲ་མོ་ཧ༔ ཏིང་ཏིང་ཤག༔ ཙིཏྟ་ཨ་བྷི་ཥིཉྩཧཱུྃ༔ གཡོན་གྱི་འབྲང་རྒྱས་དང་དངུལ་ཕོར་འོ་མས་གང་བ་གཏད་ལ། དཔའ་བོ་ཡོངས་ཀྱི་སྲིང་གཅིག་མ༔ རིག་འཛིན་ཡོངས་ཀྱི་སྒྲུབ་སྡེ་མོ༔ གཏད་དཀར་འགྲོ་བཟང་ཕྱུགས་ཀྱི་ལྷས༔ བུ་ལ་ཉེ་བར་མཛད་དུ་གསོལ༔ ཨོཾ་བཛྲ་ར་སི་ཧཱུྃ༔ པྲ་མོ་ཧ༔ ཏིང་ཏིང་ཤག༔ ཙིཏྟ་ཨ་བྷི་ཥིཉྩཧཱུྃ༔ དེ་ནས་སྲོག་སྙིང་སྦྱིན་པ་ནི། སློབ་དཔོན་ལ་མོས་གུས་དུང་བ་དང་དམ་ཚིག་ལ་སྲོག་ཏུ་ལྟ་བའི་འདུ་ཤེས་ཀྱིས་རྐྱེན་བྱས་སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། མཁའ་འགྲོ་ལྔའི་སྙིང་གར་བཾ་དང་ཧ་རི་ནི་ས་གནས་པ་ལྕགས་ཀྱུས་དྲངས་པ་བཞིན་འུབ་ཀྱིས་བསྡུས་པས་བརྟན་པ་བྲལ་ཏེ་སྲོག་སྙིང་དམར་ནར་གྱིས་སྐྱུགས་པ་སློབ་མའི་ཞལ་དུ་ཞུགས། སྙིང་གར་ཐིམ་པས་ཅི་བཅོལ་གྱི་ལས་ཐོགས་མེད་དུ་སྒྲུབ་པར་མོས་ལ། ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ གོང་ནོན་གྱི་སྙིང་པོས་སྣ་དྲངས་པའི། ཨོཾ་བཛྲ་ར་སི་ཧཱུྃ༔ པྲ་མོ་ཧ༔ ཏིང་ཏིང་ཤག༔ སྦྲེལ་བ་རྗེས་ཟློས་ལན་གསུམ་བྱར་གཞུག གཏེར་གཞུང་རྡོ་རྗེའི་ཚིག་རྐང་ལས། འདི་ནི་ཤིན་ཏུ་བཀའ་གཉན་པས༔ བརྒྱུད་འཛིན་སློབ་བུ་དམ་ཚིག་ཅན༔ གཅིག་ལ་ཆིག་བརྒྱུད་ལས་མ་སྤེལ༔ ས་མ་ཡ༔ ཞེས་གསུངས་པ་ཉིད་གྲུབ་པ་ལགས། དེ་ནས་གཙོ་འཁོར་ཡོངས་རྫོགས་ཀྱི་བཀའ་གཏད་པ་ལ། གཏོར་མ་ཕྱག་མཚན་དང་བཅས་པ་སྣོད་གཅིག་ཏུ་བསྡུས་པ་སློབ་མའི་ལག་ཏུ་གཏད་ལ། ཧཱུྃ༔ བཞེངས་ཤིག་ཆོས་སྐུའི་ཀློང་ཡང་ལས༔ སྐྱོད་ཅིག་ལོངས་སྤྱོད་རྫོགས་པའི་མ༔ དགོངས་ཤིང་སྤྲུལ་པའི་གནས་མཆོག་འདིར༔ དམ་ཚིག་གཉན་པོ་གཅིག་ཏུ་བསྲེ༔ འདའ་དཀའི་ཆད་ཐོ་གཉེར་དུ་ལོངས༔ རྒྱལ་དབང་པདྨ་ཐོད་ཕྲེང་དང༔ ལྷ་སྲས་ཁྲི་སྲོང་ལྡེའུ་བཙན་གྱི༔ ཆོས་བརྒྱུད་ཆགས་པའི་རྣལ་འབྱོར་ལ༔ གྲོགས་པོར་གཏད་དོ་གཞུང་མ་ངན༔ གཏོར་མ་ལག་ཏུ་གཏད། མཛའ་མོར་གཏད་དོ་ཁྲེལ་མ་ཆུང༔ ཞེས་རྐང་པའི་ཐད་དུ་བཞག བྲན་དུ་གཏད་དོ་རྐང་མ་ངན༔ སྲུང་མར་གཏད་དོ་མཐུ་མ་ཆུང༔ ཅི་ལྟར་བཅོལ་བའི་ལས་རྣམས་སྒྲུབས༔ བཛྲ་ས་མ་ཡ་རཀྵནྟུ་ཧཱུྃ་ཛཿ ཞེས་བརྗོད་པས་སྨན་བཙུན་འཁོར་དང་བཅས་པས་ཇི་ལྟར་བསྒོས་པ་བཞིན་བགྱིའོ་ཞེས་ཞལ་གྱིས་བཞེས་པར་བསམ་ལ། གཏོར་མ་དང་ནང་མཆོད་བསྲེས་པའི་ཆ་ཤས་སློབ་མར་བྱིན། སྲུང་མ་དང་དམ་ཚིག་གཅིག་ཏུ་འདྲེས་པའི་ངེས་ཤེས་དང་བཅས་རྡོ་རྗེའི་ཐ་ཚིག་འདིའི་རྗེས་ཟློས་མཛོད། མཁའ་འགྲོ་སྲོག་ཏུ་བཙའ་བར་བགྱི༔ འབར་བ་གསུམ་གྱི་དངོས་གྲུབ་སྩོལ༔ སྨན་མོ་གྲོགས་སུ་སྒྲུབ་པར་བགྱི༔ འདུ་བ་གསུམ་གྱི་དངོས་གྲུབ་སྩོལ༔ རྟག་ཏུ་གསོལ་ཀར་བརྩོན་པར་བགྱི༔ གཡེལ་དང་ཞུད་དང་ཆད་པའི་ལས༔ ནམ་ཡང་བདག་གིས་མི་བགྱིད་དོ༔ ཞེས་བརྗོད་པས་སྨན་བཙུན་མཆེད་ལྔ་ཡང་དགྱེས་ཤིང་ཆགས་པས་འོད་དུ་ཞུ་སྟེ་སློབ་མར་ཐིམ་པས་བདག་དང་བཀའ་སྲུང་ཆོས་ཉིད་ཀྱི་ཀློང་ན་གཉིས་སུ་མེད་པར་ཤེས་པས་ཆོས་ཉིད་ཀྱི་ལྟ་བའི་ངང་བསྐྱང༌། དེ་ལྟར་ན་གཞུང་ལས། གངས་ཅན་བོད་ཀྱི་ཡུལ་ལྷ་ཡིན༔ སུས་བསྟེན་དངོས་གྲུབ་སྣ་རེ་ཐོབ༔ རྡོ་རྗེ་ཐེག་པའི་བཀའ་སྲུང་ཡིན༔ རྣལ་འབྱོར་ཡོངས་ལ་སྙིང་ཡང་ཉེ༔ སྙིང་ཏིག་གཉན་པོའི་སྲུང་མ་སྟེ༔ ཚར་གཅོད་རྗེས་འཛིན་རྣོ་ལ་མྱུར༔ པདྨ་ང་ཡི་བཀའ་སྲུང་འདི༔ ཆོས་བརྒྱུད་འཛིན་པའི་སློབ་བུ་ལས༔ གཞན་དུ་སྤེལ་ན་མགོ་བོ་ཁོས༔ ཞེས་གསུངས་པ་ལྟར་གཏེར་ཁ་གོང་འོག་གི་བརྟན་མའི་སྲོག་དབང་དང༌། རྣལ་འབྱོར་དབང་ཕྱུག་རྗེ་བཙུན་བཞད་པ་རྡོ་རྗེ་ལས་བརྒྱུད་པའི་སྲོག་དབང་རྣམས་ཆུ་བོ་གཅིག་འདྲེས་ཟབ་གཉན་བྱིན་རླབས་ཀྱི་ཚན་ཀ་དང་ལྡན་པ་ལེགས་པར་ཕུལ་གྲུབ་པས་དམ་ཚིག་ཁས་བླང་བ་འདིའི་རྗེས་ཟློས་མཛོད། གཙོ་བོས་ཇི་ལྟར་སོགས་དང༌། མཎྜལ། ལུས་འབུལ་དགེ་བསྔོ་བཅས་བྱས་ལ་སློབ་མ་གྲོལ། སློབ་དཔོན་གྱིས་བསྐང་བ་བྱིན་བརླབ་ནས་བརྩམས། ཧཱུྃ༔ བདེ་ཆེན་ཆོས་སྐུའི་སོགས་ཀྱིས་བསྐང་བཤགས་བསྐྱར་ཞིང་ཚོགས་ལ་རོལ། ལྷག་མ་ནས་བརྩམས་རྗེས་ཀྱི་ལས་རིམ་མཐར་དབྱུང་བས་གྲུབ་པའོ། །འགྱུརྃ་མེདྃ་ཐེགྃ་མཆོྃག་ཨ་ཏིའི་ཐུན་མིན་གྱི། །བཀའ་སྲུང་བཀྲ་ཤིས་ཚེ་རིང་མཆེད་སྡེ་ལྔའི། །སྲོག་དབང་ཟབ་གཉན་ལྷུག་པར་བཀྲོལ་འདིས་ཀྱང༌། །བཤད་སྒྲུབ་བསྟནྃ་པའི་རྒྱལྃ་མཚྃན་ཛ་ཡནྟུ། །བཀའ་སྲུང་བཀྲ་ཤིས་ཚེ་རིང་མའི་སྲོག་དབང་གི་ལེའུ་ཚན་བཅུ་གསུམ་པ་སྟེ་བཀྲ་ཤིས་དཔལ་འབྱོར་དོན་ཐམས་ཅད་གྲུབ་པའི་སྡེས་སྦྱར་བ་ལེགས་པར་རྫོགས་སོ། །ལམ་སྟེགས་སྐྱེས་བུ་གསུམ་གྱིས་གཞུང་བསྲངས་ནས། །སྦས་དོན་རྡོ་རྗེ་ཐེག་པའི་སྨིན་གྲོལ་རྫོགས། །གསང་ལམ་ཐེག་མཆོག་རྒྱལ་པོའི་ཁྱད་ཆོས་ཅན། །བསྟན་པ་ཡོངས་རྫོགས་འདི་མིན་གཞན་སུ་ཞིག །དེ་ཕྱིར་གང་ལ་གུས་དང་ཉེར་ལེན་གྱིས། །ཟབ་གསང་ཡོངས་རྫོགས་སྙིང་གི་ཟེའུ་འབྲུ་རུ། །རིང་ནས་སིམ་ལས་དབྱིག་མཆོག་ཀུན་གྱི་རྒྱལ། །རིན་ཆེན་ཕ་ལམ་བཞིན་དུ་གཅེས་པར་བཟུང༌། །རྨད་བྱུང་ཆོས་འདིས་དོན་མཐུན་རྡོ་རྗེའི་མཆེད། །སྐལ་མཉམ་ཀུན་ལ་གཅིག་ཏུ་སྨན་པའི་བློས། །ཇི་ལྟར་དཔོག་བཞིན་སྨིན་ལམ་དབང་གི་ཕྲེང༌། །ལྷག་བསམ་གུས་དང་འབད་པས་ལེགས་པར་བསྟར། །བདག་བློ་ཤིན་ཏུ་མ་སྦྱངས་མུ་ཅོར་སྨྲ། །གསང་བ་ཟབ་མོའི་དོན་བཞིན་མ་རྟོགས་པས། །ཉེས་པར་གྱུར་ཀུན་ལྷ་དང་མཁའ་འགྲོར་བཤགས། །གཟུར་གནས་མཁས་པར་ཉེས་བཤད་བསལ་བར་བསྐུལ། །གསང་ཆེན་ལམ་ཀུན་དབང་ལ་རྫོགས་པ་ཡི། །དཔལ་དེ་སྣང་བའི་འཆར་ཀའི་བྱ་མ་རྟས། །ཀུན་བཟང་ཐུགས་ཀྱི་བསྟན་པ་ཉིན་མོར་བྱེད། །སྙིགས་མའི་མུན་སེལ་གཉེན་དུ་འདི་གྱུར་ཅིག །བཀའ་གཏེར་ཟུང་འཇུག་བསྟན་པའི་ཆུ་གཏེར་གསེར་གྱི་ས་གཞིར་གཡས་སུ་འཁྱིལ། །བཤད་སྒྲུབ་ལས་ཀྱི་རི་གླིང་བཀོད་པ་ལུང་རྟོགས་དཔལ་འབྱོར་རྒྱས་ཤིང་དར། །མཁས་གྲུབ་སྐྱེས་བུ་ལྷ་དང་ཀླུ་དབང་མི་ཡི་ཁྱུ་མཆོག་གིས་རྩེན་པས། །གྲོལ་བ་དྲུག་གི་ཕྲིན་ལས་རྨད་བྱུང་རྟག་ཁྱབ་ལྷུན་གྲུབ་འཕེལ་གྱུར་ཅིག །དེ་ལྟར་རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་ཆོས་སྐོར་གྱི་དབང་འདི་དག་ལ་དབང་གི་སྤྱི་དོན་སྙིང་པོ་དོན་གསལ་ལས། དེའང་རང་བཞིན་བརྒྱད་ལྡན་གྱི་རྡོ་རྗེ་སློབ་དཔོན་དག་ལ་ནི་ཡི་གེ་འདི་ཙམ་གྱིས་མཚོན་ལ། གཞན་དུ་ལྷོངས་སུ་མ་གྱུར་པའི་གང་ཟག་རྣམས་ལ་ནི་མདོ་སྔགས་ཀྱི་ལམ་སྤྱི་དང་བྱེ་བྲག་དབང་གི་སྒྲོམ་ནས་ཁོང་དུ་ཆུད་པའི་སྐལ་པ་ཅན་ཉུང་བས་རང་དང་སློབ་མའི་དངོས་གྲུབ་ཀྱི་གེགས་སུ་འགྱུར་ཕྱིར་མདོ་སྒྱུ་སེམས་གསུམ་གྱི་རྒྱུད་སྡེའི་གནད་ལ་ངེས་པ་རྙེད་པར་མ་ནུས་ཀྱང༌། ཁོ་བོས་བྱས་པའི་གྲོལ་ཏིག་གི་དབང་ཆོག་མཁྱེན་བརྩེའི་དགོངས་རྒྱན་ལས་སྤྱི་དོན་ཤེས་པར་བྱ་བ་ཁོ་ནའོ། །ཞེས་རྗེས་སུ་བརྩེ་བས་བཀའ་བསྩལ་པ་བཞིན་ལགས་ཀྱང་རང་བཞིན་བརྒྱད་ལྡན་གྱི་དྲི་ཙམ་ཡང་མི་བྲོ་བ་བདག་ལྟ་བུ་ལས་ངན་གྱིས་དབང་བསྐུར་བྱེད་པའི་སློབ་དཔོན་བྱ་བའི་དུས་ཀྱི་མཐར་སླེབས་པའི་ཚེ། ཌཱ་ཀིའི་ཞལ་རླངས་འཐུལ་ཞིང་གསེར་ཞུན་མ་ལྟ་བུའི་ཟབ་ཆོས་འདི་དག་ལ་གཟུ་ལུམ་གྱིས་སྤྱོད་པའི་ཉེས་པས་རང་གཞན་ལ་ཕན་པ་ལས་གནོད་ཚབས་ཆེ་བ་འབྱུང་བར་རིག་ནས་གཏེར་གཞུང་རྡོ་རྗེའི་ཚིག་རྐང་ཧ་ཅང་བསྡུས་དྲགས། ཆོས་ཀྱི་སྤྱན་ལྡན་མཁས་གྲུབ་གོང་མ་རྣམས་ཀྱི་གསུང་ཡིད་རྟོན་འོས་དག་དཔེ་ཐོབ་པའི་སྐལ་བ་མ་བྱུང་བས་འདི་ལྟ་བུ་ཞིག་མི་བྲི་ཀ་མེད་དུ་གྱུར་པ་སྟེ། སྔར་མདོ་ཁམས་སུ་རང་གནས་ལ་འཁོད་པའི་སྐབས་ཀུན་མཁྱེན་འཇམ་པའི་དབྱངས་ཆོས་ཀྱི་བློ་གྲོས་རིན་པོ་ཆེས་ཡང་གསང་བླ་མའི་སྒྲུབ་ཐབས་ཐིག་ལེའི་རྒྱ་ཅན་དང༌། ཡུམ་ཀའི་ནང་སྒྲུབ་བདེ་ཆེན་གཏེར་བུམ་གྱི་དབང༌། ཁྲག་འཐུང་རིགས་བཞིའི་སྒོས་དབང་རྣམས་བཀླག་ཆོག་ཏུ་བྲི་དགོས་པར་རྟེན་དང་བཅས་ཆེད་དུ་བཀའ་བསྩལ་ཞིང༌། ཁྲག་འཐུང་རིགས་བཞིའི་དབང་གི་སྤྱི་ཆིངས་ཐམས་ཅད་མཁྱེན་གཟིགས་མཁྱེན་བརྩེའི་དབང་པོས་མཛད་པ་བཅས་གནང་བ་བཞིན་བྲིས་ཏེ་སྤྱན་བསྟར་ཞུས་པས་དགྱེས་པའི་དབྱུག་དབྱུང་ཐོབ་ནའང་དེ་དག་ཀྱང་དཔེ་བརླག་པས་ཡིད་ཡུལ་དུ་གང་མཆིས་ལ་ཞིབ་དཔྱོད་དང༌། གཙོ་བོ་སྙིང་ཐིག་རང་གཞུང་དང་གྲོལ་ཏིག་དབང་ཆེན་རྣམས་གོ་བསྡུར་གྱིས་དོན་ཚང་འཇུག་བདེའི་ཁུལ་དུ་བྲིས་པ་འདི་ཡང་སྔ་འགྱུར་རྡོ་རྗེ་སྙིང་པོའི་རིང་ལུགས་ལ་རྒྱུ་མཚན་ཤེས་པའི་མཁྱེན་དཔྱོད་ཀྱི་ཆོས་སྤྱན་ཡངས་པ་རྡོ་རྗེའི་མཆེད་པོ་དར་ཐང་སྤྲུལ་པའི་སྐུ་ཀུན་དགའམ། མཚན་གཞན་ཡེ་ཤེས་རྡོ་རྗེར་གྲགས་པས་རིང་མོ་ནས་བསྐུལ་བ་བཞིན་སྙིགས་མའི་སྔགས་བན་ཧྲུལ་པོ་འཁོས་ཆུང་གྱི་ན་བ་འཇིགས་མེད་མཁྱེན་བརྩེའི་འོད་ཟེར་རབ་གསལ་ཟླ་བར་འབོད་པའི་རྒྱལ་ཁམས་པ་དེས་རབ་བྱུང་བཅུ་དྲུག་པའི་བྱེ་བྲག་ཟིལ་གནོན་ཞེས་པ་མེ་རྟ་ལོའི་ས་ཟླའི་དམར་ཕྱོགས་ཀྱི་ཚེས་བཅུ། ཐེག་མཆོག་ཆོས་ཀྱི་རྒྱལ་རྔ་སྒྲོགས་པའི་འཇིགས་བྲལ་གྱི་པཎྜི་ཏ་ཆེན་པོ་མི་ཕམ་འཇམ་དབྱངས་རྣམ་རྒྱལ་རྒྱ་མཚོའི་དུས་ཀྱི་མཆོད་པའི་ཉིན་དབུ་བརྩམས་ཏེ་རིམ་གྱིས་རྫོགས་པར་བྱས་པའི་གནས་རང་བྱུང་པདྨའི་སྒྲུབ་གནས་སྤ་གྲོ་སྟག་ཚང་སེང་གེ་བསམ་གྲུབ་ཀྱི་རྡོ་རྗེའི་ཀེའུ་ཚང་དང་འདབས་འབྱོར་ཞིང༌། ཆོས་རྒྱལ་བྱང་ཆུབ་སེམས་དཔའ་སྲོང་བཙན་སྒམ་པོའི་སྐུའི་རིང་ལ་བཞེངས་པའི་མཐའ་འདུལ་གྱི་གཙུག་ལག་ཁང༌། བོད་ཡུལ་ཕན་བདེའི་བཙས་གྱུར་གྱི་ས་གནད། ལྷོ་ལྗོངས་ཆོས་ཀྱི་རྒྱལ་ཁབ་འབྲུག་སྤ་གྲོ་སྐྱེར་ཆུའི་ལྷ་ཁང་དུ་སངས་རྒྱས་གཉིས་པ་མཁན་སློབ་ཆོས་གསུམ་གྱི་སྣང་བརྙན་གསར་བསྐྲུན་གྱི་ཞབས་ཏོག་བགྱིས་པའི་སྐབས་གསེང་རྣམས་སུ་བྲིས་ཤིང༌། སྙིང་པོའི་བསྟན་དང་བསྟན་འཛིན་ལ་དད་མོས་མཆོག་ཏུ་གྱུར་པ་བླ་མ་ཀུན་བཟང་རིག་འཛིན་རྡོ་རྗེས་ཀྱང་བསྐུལ་བ་བཞིན་སླར་ཡང་ཞིབ་དཔྱོད་དང་བཅས་ཡི་གེ་གཉིས་པར་འདུ་བར་མཛད་པ་པོ་ངེས་དོན་སྙིང་པོའི་རྣལ་འབྱོར་དབྱིངས་རིག་བྱང་ཆུབ་དབང་པོས་མཛད་པ་འདིས་ཀྱང༌། འོད་གསལ་རྡོ་རྗེ་སྙིང་པོའི་བསྟན་པ་གཞིར་བཞེངས་སུ་བསླང་ནས་འབྲེལ་ཚད་ཀུན་བཟང་གདོད་མའི་གྲོལ་གཞིར་དབུགས་དབྱུང་ཞིང་གྲོལ་བ་དྲུག་ལྡན་གྱི་ཕྲིན་ལས་རྟག་ཁྱབ་ལྷུན་གྲུབ་ཏུ་འབྱུང་བའི་རྒྱུ་ཁོ་ནར་གྱུར་ཅིག།  །།}}
</onlyinclude>
{{TsagliCall}}
<headertabs/>
== Footnotes ==
<references/>
==Other Information==
{{Footer}}
[[Category:DKR-KABUM-Volume-11-DA]]
[[Category:Khyentse Lineage Project]]