View source for JKCL-KABUM-06-CHA-004

{{Khyentse Metadata
|classification=Tibetan Publications
|subclass=Tibetan Texts
|fulltitletib=བླ་མའི་ཐུགས་སྒྲུབ་བར་ཆད་ཀུན་སེལ་གྱི་སྒོས་སྒྲུབ་བླ་མ་སྨྲ་སེང་གི་བསྙེན་ཡིག་ཡེ་ཤེས་མཆོག་སྦྱིན།
|fulltitle=bla ma'i thugs sgrub bar chad kun sel gyi sgos sgrub bla ma smra seng gi bsnyen yig ye shes mchog sbyin
|citation=[['jam dbyangs mkhyen brtse chos kyi blo gros]]. ''bla ma'i thugs sgrub bar chad kun sel gyi sgos sgrub bla ma smra seng gi bsnyen yig ye shes mchog sbyin''. In ''Rdzong sar mkhyen brtse 'jam dbyangs chos kyi blo gros kyi gsung 'bum'', Vol. 6: 13-18. Bir, H.P.: Khyentse Labrang, 2012.
|collectiontitletib=ཆོས་ཀྱི་བློ་གྲོས་བཀའ་འབུམ་
|collectiontitle=chos kyi blo gros bka' 'bum
|author='jam dbyangs mkhyen brtse chos kyi blo gros
|authortib=འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
|sourcerevealer=mchog gyur gling pa
|sourcerevealertib=མཆོག་གྱུར་གླིང་པ་
|tibgenre=Recitation Manual - bsnyen yig
|terma=Yes
|jkcloutline=Six
|deity=bla ma smra ba'i seng ge
|cycle=bla ma'i thugs sgrub bar chad kun sel
|cycletib=བླ་མའི་ཐུགས་སྒྲུབ་བར་ཆད་ཀུན་སེལ་
|language=Tibetan
|volumenumber=006
|volnumtib=༦
|volyigtib=ཆ་
|totalvolumes=12
|textnuminvol=004
|pagenumbers=13-18
|totalpages=6
|beginfolioline=1a1
|endfolioline=3b1
|totalfolios=3
|multivolumework=No
|colophontib=།ཅེས་པའང་གདོང་སྣ་མཆོག་སྤྲུལ་རིན་པོ་ཆེའི་གསུང་བསྐུལ་ངོར་༧ཆོས་ཀྱི་བློ་གྲོས་པས་ཟིན་བྲིས་སུ་བགྱིས་པ་དགེ་ལེགས་འཕེལ།  མངྒ་ལཾ།།
|colophonwylie=/ces pa'ang gdong sna mchog sprul rin po che'i gsung bskul ngor 7chos kyi blo gros pas zin bris su bgyis pa dge legs 'phel/__mang+ga laM//
|pdflink=File:JKCL-KABUM-06-CHA-004.pdf
}}
{{Header}}
<h1 style="font-size: 24px !important;">Tibetan Text</h1>
<onlyinclude>
{{TibP|བླ་མའི་ཐུགས་སྒྲུབ་བར་ཆད་ཀུན་སེལ་གྱི་སྒོས་སྒྲུབ་བླ་མ་སྨྲ་སེང་གི་བསྙེན་ཡིག་ཡེ་ཤེས་མཆོག་སྦྱིན་ཅེས་བྱ་བ་བཞུགས་སོ།  །ན་མོ་གུ་རུ་མཉྫུ་ཤྲཱི་ཡེ།  ཡེ་ཤེས་རྒྱ་མཚོའི་ཁྱབ་བདག་མཆོག  །གུ་རུ་སྨྲ་བའི་སེང་གེ་ཡི།  །ཞབས་ལ་སྤྱི་བོས་བཏུད་བྱས་ཏེ།  །བསྙེན་སྒྲུབ་ཟིན་བྲིས་ཉུང་ངུར་སྤེལ།  །དེ་ལ་མཁྱེན་གཉིས་ཡེ་ཤེས་ཀྱི་སྣང་བ་མཆོག་ཏུ་རྒྱས་ཤིང་བློ་གྲོས་ཀྱི་པདྨོ་ཁ་འབྱེད་པར་བྱེད་པའི་ཐབས་ཚུལ་ཐུན་མོང་མིན་པ་མ་ཧཱ་གུ་རུ་བློ་ལྡན་མཆོག་སྲིད་ཕྱི་བཀའ་བབ་ལས་ཅན་སྙིང་གི་བུ་དགུ་ལ་གདམས་པའི་བླ་མའི་ཐུགས་སྒྲུབ་བར་ཆད་ཀུན་སེལ་གྱི་སྒོས་སྒྲུབ་བླ་མ་རིག་འཛིན་སྨྲ་བའི་སེང་གེའི་རྣལ་འབྱོར་ཟབ་མོ་ལ་བརྩོན་པར་འདོད་པ་དག་གི་སྔོན་དུ་བརྒྱུད་ལྡན་གྱི་བླ་མ་ལས་འདི་ཡི་སྨིན་བྱེད་ལེགས་པར་ནོས་ཏེ་དད་པ་དང་དམ་ཚིག་མ་ཉམས་པ་སྲོག་ཏུ་བཟུང་སྟེ་ས་ཕྱོགས་ཡིད་དུ་འོང་ཞིང་སྒྲུབ་པའི་གནས་ཁྱད་དུ་འཕགས་པར་ར་བ་བཞིའི་ཡར་ཚེས་རྒྱལ་ཕུར་འགྲུབ་སྦྱོར་སོགས་གཟའ་སྐར་སྦྱོར་བྱེད་དགེ་བར་གནས་ཁང་ཕྱག་དར་ལེགས་པར་བྱ།  སྔ་དྲོའི་ཆར་དམ་ཚིག་གི་བྲིས་སྐུ་ཡོད་ན་བཀྲམ་པའི་སྟེགས་བུའི་ཁར།  གཏོར་མ་དཀར་ཟླུམ།  ཚེ་རིང་མཆེད་ལྔ།  གཏེར་སྲུང་ཁྱུང་བཙུན་མའི་གཏོར་མ་དང་།  བདུད་རྩི།  ཆུ་གཉིས་ཉེར་སྤྱོད་ཕྲེང་ཚར་དུ་བཤམས།  སྔོན་གཏོར་དཀར་དམར།  །གསེར་སྐྱེམས་དང་།  རྒྱལ་ཆེན་ཐོ་ལ་དཀར་གཏོར།  མཆོད་པ་བཅས་འདུ་བྱས་ཏེ།  ཐོག་མར་སྡེ་བརྒྱད་གསེར་སྐྱེམས་དང་།  ལྷ་ཀླུ་གཞི་བདག་ལ་གཏོར་མ་བྱིན་བརླབ།  བྷཱུ་མི་པ་ཏི་ས་པ་རི་ཝཱ་ར་ཨོཾ་ཨ་ཀཱ་རོ་བཏགས་པ་ལན་གསུམ།  གང་དག་འདིར་གནས་སོགས་ཀྱི་གཏོར་མ་གསེར་སྐྱེམས་ཕུལ།  བྷཱུ་མི་པ་ཏི་ས་པ་རི་ཝ་ར་གཙྪས་གཤེགས་སུ་གསོལ།  ཕྱི་མཆོད་སྒོ་དྲུང་དུ་ཐོ་རྒྱལ་ཆེན་བཞི་ལ་མཆོད་གཏོར་ཕུལ་ནང་དུ་ལོག་ནས།  རང་ཉིད་སྐད་ཅིག་གི་འཇམ་དཔལ་གཤིན་རྗེ་གཤེད་མཐིང་ནག་བེ་ཅོན་དང་བསྡིག་མཛུབ་མཛད་པ་ཁྲོ་བོའི་ཆས་ཐམས་ཅད་ཀྱིས་བརྒྱན་པའི་སྐུར་གྱུར།  ཨོཾ་ཡ་མཱནྟ་ཀ་ཧཱུྃ་ཕཊ༔  རྃ་ཡྃ་ཁྃ།  ཨོཾ་ཨཱཿ ཧཱུྃ་ཧ་ཧོཿཧྲཱིཿལན་གསུམ་གྱིས་བགེགས་གཏོར་བརླབ།  ཧཱུྃ་ཧྲཱི༔  གཉིས་སྣང་འཁྲུལ་པའི་སོགས་ཚིག་རྐང་གཉིས་མཐར་བགེགས་གཏོར་ཕྱིར་དོར།  ཧཱུྃ་ཧཱུྃ་ཧཱུྃ།  ཨོཾ་སུམྦྷ་ནི་སོགས་དྲག་སྔགས་དང་།  གུ་གུལ་བདུག  །ཡུངས་ཐུན་གྱིས་བྲབ།  མཚམས་འོག་འཇུག་དགོས་རྣམས་དམིགས་པས་ཁྱབ་པར་བྱས་ལ།  གཉིས་མེད་ཡེ་ཤེས་སོགས་བརྗོད་པ་དང་།  ཕྱོགས་མཚམས་ཐམས་ཅད་རྡོ་རྗེའི་སྲུང་གུར་མེ་རི་འབར་བ་དང་བཅས་པའི་ནང་དུ་བདག་དང་བསྲུང་བྱ་ཐམས་ཅད་ཚུད་པར་བསམ།  རཀྵའི་སྔགས་ལན་གསུམ་དུ།  ཡེ་དྷར།  སུ་པྲ་ཏིཥྛ་བརྗོད་པས་བརྟན་པར་བྱས།  བདེ་བའི་མལ་དུ་ཞུགས་ནས་ཚིག་བདུན་གསོལ་འདེབས་དང་།  ཐུགས་སྒྲུབ་བརྒྱུད་འདེབས་དང་།  སྐྱབས་སེམས།  མཆོད་བརླབ་ནས་བརྩམས་བསྟོད་པའི་བར་དང་།  བཟླས་པའི་མགོར་ཕྲེང་བ་བྱིན་རླབས་སྤྱི་འགྲེ་ལྟར་སྔགས་བརྒྱ་རྩ་བརྗོད་ནས།  བཟླས་དམིགས་གསལ་བཏབ་སྟེ་རྩ་སྔགས་ཅི་འགྲོ་དང་།  བསྙེན་པའི་སྐབས་འདིར་འཁོར་སྔགས་རྣམས་མ་བཟླས་ཀྱང་རུང་ཐུན་མཐར་ཐལ་མོ་སྦྱར་ཏེ་གསོལ་གདབ།  ཨོཾ༔  དུས་གསུམ་རྒྱལ་བ་སོགས་ཀྱི་དངོས་གྲུབ་ཞུ།  དབྱངས་གསལ་ཡིག་བརྒྱ་ཡེ་དྷར་རྣམས་ལན་གསུམ་རེ་བརྗོད་པས་ལྷག་ཆད་ཁ་སྐོངས།  ཡེ་ཤེས་ལྷ་ཚོགས་སོགས་སྟོད་ཚིག་གི་མཆོད་བསྟོད།  ནོངས་བཤགས་ཡིག་བརྒྱ་ལན་གསུམ།  བསྡུ་ལྡངས་ཤིས་བརྗོད་བྱས་ནས་ཉིན་གུང་མ་ཟིན་ཙམ་ལ་གྲོལ།  ཕྱི་ཐུན་ལ་སྐྱབས་སེམས་དང་།  སྲུང་འཁོར་གསལ་འདེབས་དང་།  གཏོར་མ་འདི་ལོངས།  ཞེས་པར།  གནས་འདིར་མ་འདུག་རང་རང་གནས་སུ་དེངས༔  ཞེས་བསྒྱུར།  བཟླས་པ་བསྡུ་ལྡང་།  ཚེ་རིང་མ་གཏེར་སྲུང་གསོལ་ཀ་བཏང་།  བསྔོ་སྨོན་ཤིས་བརྗོད་བར་སྔ་ཐུན་བཞིན་དང་།  སྲོད་ཐུན།  ཐོར་ཐུན་ལའང་དེ་བཞིན།  ཕྲེང་བ་བྱིན་བརླབ་བསྡུས་ཙམ་རེས་ཆོག  །དེ་ལྟ་བུས་བསྙེན་པ་འབུམ་ཕྲག་བཞིའམ་རབ་འབྲུ་འབུམ་བཟླས་མཐར།  སྒྲུབ་པའི་སྐབས།  རས་བྲིས་ཀྱི་དཀྱིལ་འཁོར་ཚད་ལྡན་ཡོད་ན་དང་།  མེད་ན་མཎྜ་ལར་ཚོམ་བུ་དགུ་བཀོད།  མཆོད་གཏོར་རྣམས་གསོས།  འདོན་བྱ་སྔར་ལྟར་ལ།  བཟླས་པའི་མགོར་རྩ་སྔགས་མཐར།  ཧྲཱིཿཕཊ་ཛཿབཏགས་པས་མདུན་དཀྱིལ་གྱི་གོ་སར་རང་གི་སྒོམ་པ་དང་འདྲ་བའི་ཡེ་ཤེས་ཀྱི་དཀྱིལ་འཁོར་གཉིས་པ་དབྱེ།  ཧཱུྃ་ཧྲཱིཿསྙིང་པོ་བྱང་ཆུབ་སེམས་ཀྱི་སོགས་ཀྱིས་ཛབi་བསྐུལ་དང་།  བདག་མདུན་གཉིས་ཀའི་ཐུགས་ཀར་ཛབ྄་དགོངས་གསལ་བཏབ་ལ་དོ་ལིའི་བཟླས་པ་འོད་ཟེར་སྤྲོ་བསྡུ་བྱས་ལ་རྩ་སྔགས་རབ་འབུམ་བཞི།  ཉུང་མཐའ་འབུམ་ཕྲག་གཅིག་བཟླས་ལ།  འཁོར་སྔགས་རྣམས་འབུམ་ཕྲག་གསུམ་རེའམ་འབུམ་རེ་བཟླ།  སྒྲུབ་པའི་སྐབས་ཚོགས་མཆོད་རེ་གྲུབ་ན་ལེགས་པས་ཐུགས་སྒྲུབ་ཕྲིན་ལས་སྙིང་པོའི་ཚོགས་མཆོད་སྦྱར།  ལྷག་མ་སྒྲུབ་པ་གྲོལ་བར་བཙོན་འཛིན་བྱ།  །དེ་ལྟར་བསྙེན་སྒྲུབ་ལ་འབད་པའི་ཐུན་བར་དུ།  མཎྜལ་རྒྱས་བསྡུས།  ཕྱག་དང་།  མཚན་བརྗོད་སོགས་བཀླགས་ན་ངེས་པར་ལེགས།  དེ་ལྟར་བསྙེན་སྒྲུབ་ལ་བརྩོན་པས་སྐུ་གསུང་ཐུགས་ཀྱི་དངོས་གྲུབ་ཀྱི་ལྟས་མཚན་དངོས་ཉམས་རྨི་ལམ་དུ་ཅི་རིགས་པ་བྱུང་བ་ན།  གཟའ་སྐར་སྦྱོར་བྱེད་ལེགས་པར་དངོས་གྲུབ་བླངས་རན་པའི་སྔ་དགོངས་སྟེགས་བུ་ཁེབས་སེར་པོའི་སྟེང་འབྲུ་དཀར་གྱི་གཡུང་དྲུང་རིས་ཁར་དངོས་གྲུབ་ཀྱི་རྫས་དཀར་མངར་ལས་སྦྲུས་པའི་རྒྱས་པའི་འབྲང་རྒྱས་ནོར་བུ་འབར་བ་རྩི་སེར་པོ་ཅན་དར་གདུགས་སེར་པོས་བརྒྱན།  བདུད་རྩི།  མཾ་ས།  ཟླ་རྒྱས།  ཟླ་ཕྲོམ།  འཁུར་བ།  །འཇམ་དེས་སོགས་ཅི་འབྱོར་བཤམས།  ཚོགས་དང་གཏོར་མ་རྣམས་ཁ་གསོ།  ཐོ་རངས་སྔ་བར་བསྐྱེད་བཟླས་སྟོང་ཚིག་མཆོད་བསྟོད་གྲུབ་ནས།  ཡེ་ཤེས་སྐུ་མཆོག་གི་ནོངས་བཤགས་དང་།  བྱིན་འབེབས་ཐུགས་སྒྲུབ་ལས་བྱང་འབྲིང་པོ་ལྟར་བྱ།  དཀྱིལ་འཁོར་གྱི་ལྷ་ཚོགས་རྣམས་ལས་བདེ་བའི་སྒྲ་དང་འོད་ཟེར་གྱི་ཚོགས་བསམ་གྱིས་མི་ཁྱབ་པ་འཕྲོས་པས་རྩ་གསུམ་རྒྱལ་བ་ཞི་ཁྲོ་རབ་འབྱམས་ཀྱི་ཐུགས་རྗེ་བྱིན་རླབས་དང་།  འཁོར་འདས་བརྟན་གཡོའི་དྭངས་བཅུད་ཐམས་ཅད་འོད་དང་འོད་ཟེར་གྱི་རྣམ་པས་བསྡུས་ཏེ་རང་དང་དངོས་གྲུབ་ཀྱི་རྫས་ལ་ཐིམ་པར་བསམ་ལ་རྩ་སྔགས་མཐར།  ཀཱ་ཡ་ཝཱ་ཀ་ཙིཏྟ་སརྦ་སིདྡྷི་ཕ་ལ་ཧོཿབཏགས་པ་སྟོང་རྩ་བཟླས་ལ་མཆོད་བསྟོད་བྱ།  སྲུང་མའི་གཏོར་འབུལ།  ཚོགས་མཆོད།  ལྷག་མ་བསྔོ་ཞིང་བརྩོན་འཛིན་བྱས་པ་རྣམས་ཕྱི་རོལ་གཙང་སར་ཕུལ།  སྲུང་མའི་གཏོར་མ་ཕྱིར་འབུལ།  མཆོད་བསྟོད་རྗེས་ཕྲིན་ལས་འབྲིང་པོའི་དངོས་གྲུབ་བསྐུལ་ཚིག་བརྗོད་ནས་དངོས་གྲུབ་བླངས་ཤིང་རྫས་ལ་རོལ།  ཕྱི་རོལ་དུ་མི་སྦྱིན།  སླར་ཡང་མཆོད་བསྟོད་ནོངས་བཤགས་དང་།  རྟེན་ཡོད་ན་བརྟན་བཞུགས།  མེད་ན།  ཨོཾ་ཁྱེད་ཀྱི་སེམས་ཅན་སོགས་ཀྱིས་གཤེགས་གསོལ།  བསྡུ་ལྡང་།  བསྔོ་སྨོན་ཤིས་བརྗོད་བྱས་ལ་རྒྱལ་ཐོར་མཆོད་གཏོར་ཕུལ་ལ་ཐོ་བླངས་ནས་མཚམས་ཁད་ཀྱིས་གྲོལ་བའམ་བསྙེན་སྒྲུབ་ཀྱི་རྗེས་དེ་ཉིད་དུ་འཇམ་དཔལ་རིལ་བུ་སྒྲུབ་པ་སོགས་ལས་ཚོགས་སྦྱར་ན་མཆོག་ཏུ་ལེགས་ཤིང་དེ་ལྟར་ན་དངོས་གྲུབ་བླངས་བ་ལས་སྦྱོར་གྱི་རྗེས་ཐོགས་སུ་བྱ་ཞིང་།  སྦྱིན་སྲེག་སྤྲོ་ན་ལྷ་སྔགས་ཁ་བསྒྱུར་ཏེ་ཐུགས་སྒྲུབ་སྦྱིན་སྲེག་ལྟ་བུར་ཁོག་དབུབ་པའམ།  ཡང་ན་རྙིང་མའི་སྦྱིན་སྲེག་སྤྱི་གཞུང་ཞིག་ལ་གཞི་བླང་བར་བྱའོ།  །དེ་ལྟར་བསྙེན་སྒྲུབ་ལེགས་པར་ཐེམས་ནས་སྐུ་བྲིས་སྐུ་ལ་བརྟེན་ནས་ཞལ་བལྟ་བ།  གསུང་ཙཀྲ་ལ་བརྟེན་ནས་དབྱེར་མེད་དུ་བྱ་བ།  ཐུགས་ཤེས་རབ་རིལ་བུ་སྒྲུབ་པ།  ཡོན་ཏན་བཅུད་ལེན་གྱི་སྦྱོར་བ།  ཕྲིན་ལས་སྲན་མ་མ་ཥའི་སྦྱོར་བ་རྣམས་རྩ་བའི་ལས་སྦྱོར་དང་།  ཡན་ལག་འཁོར་གྱི་ལས་ཚོགས་དགུ་རྣམས་ལ་གཏེར་གཞུང་རྩ་བ་དང་།  འཇམ་མགོན་ཐམས་ཅད་མཁྱེན་པའི་གསལ་བྱེད་རྣམས་ལས་འབྱུང་བ་ལྟར་ཅི་ནུས་སུ་འབད་པས་གཟུངས་དང་།  བློ་གྲོས་དང་།  ཏིང་ངེ་འཛིན་གྱི་སྒོ་མཐའ་ཡས་པར་དབང་འབྱོར་ཞིང་།  གནས་སྐབས་འཛིན་བློ་སོགས་གོང་འཕེལ་དུ་འགྱུར།  མཐར་ཐུག་བླ་མ་རིག་འཛིན་སྨྲ་བའི་སེང་གེའི་གོ་འཕང་ཐོབ་པར་འགྱུར་བ་ནི་ངེས་པར་ཡང་དག་པའོ།  །བླ་མའི་སྒྲུབ་པ་དང་འབྲེལ་བའི།  །བློ་མཆོག་སྤོབས་པའི་གཏེར་སྒྲུབ་ཐབས།  །ཌཱ་ཀིའི་ཁ་རླངས་ཐོ་ལེ་བ།  །འདི་འདྲ་ཐོབ་པས་སྐལ་བ་བཟང་།  །དེ་ཕྱིར་སྙིང་གི་མུན་པ་བརྒྱ།  །ཅིག་ཆར་སེལ་བའི་སྒྲོན་མེ་འདི།  །དད་བརྩོན་ཅན་གྱིས་ཉམས་བླངས་ན།  །མཁྱེན་གཉིས་ཡེ་ཤེས་རྒྱས་པར་འགྱུར།  །འདི་ལྟར་བསྙེན་སྒྲུབ་ཟིན་ཐུན་འདི།  །བྲིས་པའི་དགེ་བ་འདི་ཡིས་ཀྱང་།  །བློ་དམན་རྣམས་ལ་གསོས་གྱུར་ཏེ།  །ཡེ་ཤེས་སྣང་བ་སྦྱིན་གྱུར་ཅིག  །ཅེས་པའང་གདོང་སྣ་མཆོག་སྤྲུལ་རིན་པོ་ཆེའི་གསུང་བསྐུལ་ངོར་༧ཆོས་ཀྱི་བློ་གྲོས་པས་ཟིན་བྲིས་སུ་བགྱིས་པ་དགེ་ལེགས་འཕེལ།  མངྒ་ལཾ།།   །།}}
</onlyinclude>
{{TsagliCall}}
<headertabs/>
== Footnotes ==
<references/>
==Other Information==
{{Footer}}
[[Category:JKCL-KABUM-Volume-06-CHA]]
[[Category:Khyentse Lineage Project]]