View source for JKW-KABUM-22-ZA-012-035

{{Khyentse Metadata
|classification=Tibetan Publications
|subclass=Tibetan Texts
|fulltitletib=ཡོན་ཏན་བདུད་རྩིའི་དཀྱིལ་འཁོར་དུ་རྟོགས་པ་བརྗོད་པའི་རྡོ་རྗེའི་ཐོལ་གླུ་བདེ་ཆེན་གྲུབ་པའི་ཞལ་ལུང་།
|fulltitle=yon tan bdud rtsi'i dkyil 'khor du rtogs pa brjod pa'i rdo rje'i thol glu bde chen grub pa'i zhal lung
|citation=[['jam dbyangs mkhyen brtse'i dbang po]]. ''yon tan bdud rtsi'i dkyil 'khor du rtogs pa brjod pa'i rdo rje'i thol glu bde chen grub pa'i zhal lung''. In '''jam dbyangs mkhyen brtse'i dbang po'i bka' 'bum'', Vol. 22: 455-458. Khams sde dge rdzong sar dgon: Rdzong sar blo gros phun tshogs, 2020.
|collectiontitletib=མཁྱེན་བརྩེའི་བཀའ་འབུམ་
|collectiontitle=mkhyen brtse'i bka' 'bum
|author='jam dbyangs mkhyen brtse'i dbang po
|authortib=འཇམ་དབྱངས་མཁྱེན་བརྩེའི་དབང་པོ་
|editor=
|editortib=རྫོང་སར་བློ་གྲོས་ཕུན་ཚོགས་
|tibgenre=Autobiographies - Expressions of Realization - rtogs brjod, Vajra Songs - rdo rje'i glu
|terma=No
|sabcadcategory=Nine
|language=Tibetan
|volumenumber=022
|volnumtib=༢༢
|volyigtib=ཟ་
|totalvolumes=25
|textnuminvol=012
|textsubnumber=035
|pagenumbers=455-458
|totalpages=4
|beginfolioline=56a2
|endfolioline=57b5
|totalfolios=2
|multivolumework=No
|rectonotes=sde tshan 12
|versonotes=mkhyen brtse'i bka' 'bum
|colophontib=།ཞེས་པའང་ཡོན་ཏན་དབེན་གནས་བསམ་འགྲུབ་ཤེལ་གྱི་བྲག་ཕུག་ཏུ་ཆུ་སྟོད་ཟླ་བའི་དཀར་ཕྱོགས་ཀྱི་ཚེས་བཅུར་ཆེ་མཆོག་བདུད་རྩིའི་དཀྱིལ་འཁོར་ཆེན་པོར་འཇུག་པའི་སྐབས་གང་ཤར་རྡོ་རྗེའི་གླུར་བླངས་པའི་རྟོགས་པའོ།།
|colophonwylie=zhes pa'ang yon tan dben gnas bsam 'grub shel gyi brag phug tu chu stod zla ba'i dkar phyogs kyi tshes bcur che mchog bdud rtsi'i dkyil 'khor chen por 'jug pa'i skabs gang shar rdo rje'i glur blangs pa'i rtogs pa'o
|pdflink=File:JKW-KABUM-22-ZA-012.pdf
}}
{{Header}}
<h1 style="font-size: 24px !important;">Tibetan Text</h1>
<onlyinclude>
{{TibP|ཡོན་ཏན་བདུད་རྩིའི་དཀྱིལ་འཁོར་དུ་རྟོགས་པ་བརྗོད་པའི་རྡོ་རྗེའི་ཐོལ་གླུ་བདེ་ཆེན་གྲུབ་པའི་ཞལ་ལུང་ཅེས་བྱ་བ།  ཨ་ཧོ།  མི་འགྱུར་མཁའ་ལྟར་དག་པའི་འོད་གསལ་གྱི་རང་མདངས།  །འགགས་མེད་སྐུ་དང་ཡེ་ཤེས་ཕྲིན་ལས་སུ་ཤར་བས།  །ཐམས་ཅད་ལྷན་སྐྱེས་གྲུབ་པའི་ཐིག་ལེ་རུ་སྦྱོར་བའི།  །ཡོན་ཏན་བདུད་རྩིའི་དཀྱིལ་འཁོར་འཁོར་ལོ་ལ་བཏུད་ནས།  །རྒྱུ་ལམ་འབྲས་བུའི་རྣལ་འབྱོར་གླུ་དབྱངས་སུ་ལེན་ནོ།  །བདུད་རྩི་མཆོག་གི་ལུང་བམ་པོ་བརྒྱད་པར།  །སྒྲུབ་དང་བསྒྲུབ་པར་བྱ་བ་དང་།  །འབྲས་བུ་ཐོབ་པར་བྱ་བའི་ཕྱིར།  །གསང་སྔགས་གསང་བའི་མན་ངག་འདི།  །བདུད་རྩི་དམ་པ་མཆོག་གི་ལུང་།  ཞེས་དང་།  ལྟ་བ་དང་ནི་སྤྱོད་པ་དང་།  །དམ་ཚིག་སྒྲུབ་པ་ཕྲིན་ལས་དང་།  །ངེས་བར་སྒྲུབ་པ་བསྒྲུབ་བྱའི་ཕྱིར།  །ཟབ་མོ་བསྡུས་པའི་ལུང་འདི་གསུངས།  །ཞེས་པ་དང་འབྲེལ་ལོ།  །སྐྱེ་མེད་སྤྲོས་པ་ཀུན་བྲལ་ཆོས་ཉིད་ཀྱི་བདུད་རྩི།  སྔ་མར།  ཆོས་བདུད་རྩི་ཆེན་པོའི་དོན་འདི་ཡང་།  །མ་སྐྱེས་མ་འགགས་མི་རྟོག་པས།  མཚན་མ་དང་།  མཚན་མ་མེད་པ་དང་།  མི་གནས་པ་ཐམས་ཅད་ལ་ཁྱབ་སྟེ་གནས་སོ།  །ཞེས་དང་།  བདུད་རྩི་ཆེན་པོའི་རང་བཞིན་ནི།  །ཁ་དོག་དབྱིབས་དང་མཚན་མ་མེད།  །འགོགས་པ་མེད་ཅིང་དབྱེ་བའང་མེད།  །རྩ་བ་མེད་ཅིང་བསྟན་པའང་མེད།  །བདུད་རྩི་ཆེ་ལ་བརྗོད་པའང་མེད།  །ཉོན་མོང་དུག་དང་བདུད་བཞི་བཅོམ།  །དྲི་མེད་དག་པའི་བྱང་ཆུབ་སེམས།  །ངེས་དོན་དེ་ལ་འདུད་པར་བྱོས།  །ཞེས་དང་།  སྣང་སྲིད་ཡེ་ནས་བདུད་རྩི་ལྔ།  །མ་བཅོས་མ་བསླད་དེ་བཞིན་གཤེགས།  །ཞེས་སོགས་གསུངས་ཤིང་།  གཞན་ཡང་ཆོས་དོན་རྟགས་ཀྱི་བདུད་རྩི་ལ་སྦྱར་ཚུལ་སོགས་ཞིབ་པར་དབྱེ་རུ་ཡོད་དོ།  །འཁོར་འདས་ཡོངས་སུ་ཁྱབ་པའི་རང་བཞིན་ལ་བལྟས་པས།  །སྣང་སྲིད་གདོད་ནས་བྱང་ཆུབ་འཕོ་མེད་ཀྱི་དྲྭ་བར།  །གློ་བུར་འཁྲུལ་པའི་བདུད་བཞི་འཆིང་བ་འདི་ཨ་ཧོ།  །ལྷུན་གྲུབ་རྡོ་རྗེ་ཕུང་པོའི་རང་བྱུང་གི་བདུད་རྩི།  །ཡེ་ནས་རིགས་མཆོག་རྣམ་ལྔའི་དམ་རྫས་སུ་རྫོགས་ཤིང་།  སྔ་བམ་ལས།  བྱང་ཆུབ་སེམས་ནི་དཀར་བས་ན།  །དྲི་མེད་དག་པ་ཡེ་ཤེས་སྐུ།  །ཞེས་སོགས་ནས།  སྐུ་ལྔ་ལྷུན་གྲུབ་བདུད་རྩི་འདི།  །སོ་སོའི་ལུས་ལ་གནས་པ་ཡིན།  །ཅེས་པའི་བར་གྱིས་བསྟན།  རྩ་བ་ཡན་ལག་སྟོང་དེ་ཉིད་ལས།  རྩ་བ་སྡོང་བུ་ཡལ་ག་དང་།  །ལོ་མ་འདབ་མ་མེ་ཏོག་དང་།  །ཤུན་ལྤགས་འབྲས་བུ་སྙིང་པོར་བཅས།  །རོ་དང་མཐུ་དང་ཁ་དོག་ལས།  །རྩ་བ་གཅིག་ལ་ཡན་ལག་བརྒྱད།  །ཡན་ལག་བརྒྱད་ལས་ཡོན་ཏན་སྟོང་།  །ཞེས་སོ།  །སྦྱར་སྨན་མཆོག་དང་སྦྱར་བས།  །སྐལ་བཟང་སྨིན་ཅིང་སྦྱོང་བའི་ཉེ་རྒྱུ་འདི་ཨ་ཧོ།  །ཐ་མལ་མཚན་མའི་རྟོག་ཚོགས་བདུད་རྩི་རུ་སྦར་བའི།  དེ་ལས།  རྒྱུ་དང་དམ་རྫས་ཐམས་ཅད་ནི། །སངས་རྒྱས་སྒྲུབ་པའི་རྒྱུ་དང་གཞི།  །དམ་ཚིག་དམ་པར་སྲུང་བའི་རྫས།  །བྱིན་གྱིས་བརླབ་པར་བྱ་བའོ།  །བསྙེན་སྒྲུབ་ཡན་ལག་བཞི་ཡི་གྲོང་ཁྱེར་གྱི་དབུས་ན།  །རྨད་བྱུང་ཏ་ན་ག་ནའི་བརྟུལ་ཞུགས་ལ་སྤྱོད་པའི།  །གསང་སྔགས་ཐབས་ཀྱི་སྔ་མར།  རི་ནི་ཉམས་དགའ་མདངས་བཟང་བ།  །ཡིད་འོང་གནས་སུ་འདུག་ནས་ནི།  །བྱིན་རླབས་མཚམས་བཅད་བརྟག་བྱས་ལ།  །དཀྱིལ་འཁོར་འདོམ་གང་གྲུ་བཞི་པ།  །དྲི་སྣ་ལྔ་ཡི་མཎྜལ་བྱ།  སོགས་ཀྱིས་རྒྱས་པར་བསྟན།  ལམ་མཆོག་ཟབ་མོ་འདི་ཨ་ཧོ།  །གནས་སྐབས་རྣམ་པར་གྱུར་པའི་གདུང་བ་ཀུན་ཞི་ཞིང་།  །བདེ་སྟོང་ཁམས་ཀྱི་འདུ་བ་དབུ་མ་རུ་རྒྱས་ཏེ།  སྒྱུ་འཕྲུལ་དྲྭ་བ་ལས།  འཐུང་ན་ངན་སོང་སྒྲིབ་པ་བྱང་།  །རྟག་བརྟན་དངོས་གྲུབ་མཆོག་ཀྱང་འགྲུབ།  །བཞི་བརྒྱ་རྩ་བཞིའི་ནད་སེལ་ཞིང་།  །ལྷ་ལ་རྟག་ཏུ་མཆོད་བྱས་ན།  །བདག་དང་གཉིས་སུ་མེད་པར་འགྱུར།  །མི་མཐུན་ཕྱོགས་ལ་གཏོར་བྱས་ན།  །དྲག་པོ་གཏུམ་པོའང་ལྷན་ནེར་འགྱུར།  །གཞན་ཡང་དངོས་གྲུབ་ཐམས་ཅད་ནི།  །ཇི་ལྟར་དམིགས་པ་བཞིན་དུ་འགྲུབ།  ཅེས་སོ།  །སྙིང་པོ་བདེ་བམ་བརྒྱད་ལས།  སྐྱེ་མེད་ཡེ་ཤེས་ཡུམ་གྱི་དབྱིངས།  །གཉིས་མེད་བདུད་རྩི་ཆེན་པོ་སྟེ།  །ཡབ་ཡུམ་བདེ་བའི་ངང་དུ་གསལ།  །འདི་ནི་སྙིང་པོ་བྱང་ཆུབ་སེམས།  །བདེ་གཤེགས་ཀུན་གྱིས་བཀའ་སྩལ་ཏོ།  །ཞེས་སོ།  །བ་ཆེན་པོའི་ཕྱག་རྒྱ་ལ་སྦྱར་བས།  །གཟུང་འཛིན་དབྱིངས་སུ་སྒྲོལ་བའི་དངོས་གྲུབ་འདི་ཨ་ཧོ།  སྔ་མར།  ཡེ་ནས་རྒྱུ་ཉིད་དག་པ་ལ།  །ང་དང་བདག་ཏུ་འཛིན་པ་ཡིས།  །ཁམས་གསུམ་འཁོར་བའི་རྒྱུ་རུ་འགྱུར།  །ཁམས་གསུམ་དེ་དག་བསྒྲལ་བའི་ཞིང་།  ཞེས་སོགས་རྒྱས་པར་བསྟན་ཏོ།  །མཐར་ཐུག་ཕུང་པོའི་ཟག་ཟད་འཆི་མེད་ཀྱི་ལང་ཚོས།  །མཁའ་སྤྱོད་རིག་པ་འཛིན་བའི་གོ་འཕང་ལ་བརྟེན་ནས།  དེ་ཉིད་ལས།  ཟག་པ་ཟད་པས་ནམ་མཁར་འཕུར།  །རྡོ་རྗེའི་འགྲོས་ཀྱི་ནམ་མཁར་འགྲོ།  །མཁའ་སྤྱོད་གོ་འཕང་འདིས་ཐོབ་བོ།  །ཞེས་སོ།  །སྐུ་གསུམ་དབྱེར་མི་ཕྱེད་པའི་ཡེ་ཤེས་ཀྱི་དབྱིངས་སུ།  །སྒྲིབ་གཉིས་རྒྱུ་བཅས་དག་པའི་འབྲས་བུ་འདི་ཨ་ཧོ།  །དེ་སྐད་རང་བྱུང་ཡེ་ཤེས་སྔ་མར།  ནམ་མཁའི་མཚན་ཉིད་སངས་རྒྱས་ཏེ།  །མཚན་ཉིད་མེད་པས་ནམ་མཁའ་འདྲ།  །བྱ་བ་མེད་པས་གྲོལ་བ་སྟེ།  །བདུད་རྩི་མཆོག་ལ་ཕྱག་འཚལ་ལོ།  །ཞེས་སོགས་ཀྱིས་བསྟན།  ཨ་མྲྀ་ཏའི་ཕུང་པོ།  །དཀྱིལ་འཁོར་དྲུག་དང་སྦྱོར་བ་བརྒྱད་ལྡན་དུ་ཤར་བའི།  །རྟོགས་པ་བརྗོད་པའི་རྡོ་རྗེའི་ཐོལ་གླུ་འདི་བླངས་པས།  །གཉིས་སྣང་རང་སར་གྲོལ་བའི་སྨོན་ལམ་ཞིག་ཞུའོ།  །ཞེས་པའང་ཡོན་ཏན་དབེན་གནས་བསམ་འགྲུབ་ཤེལ་གྱི་བྲག་ཕུག་ཏུ་ཆུ་སྟོད་ཟླ་བའི་དཀར་ཕྱོགས་ཀྱི་ཚེས་བཅུར་ཆེ་མཆོག་བདུད་རྩིའི་དཀྱིལ་འཁོར་ཆེན་པོར་འཇུག་པའི་སྐབས་གང་ཤར་རྡོ་རྗེའི་གླུར་བླངས་པའི་རྟོགས་པའོ།།  །།   ༈ }}
</onlyinclude>
{{TsagliCall}}
<headertabs/>
== Footnotes ==
<references/>
==Other Information==
{{Footer}}
[[Category:JKW-KABUM-22-ZA-012]]
[[Category:Khyentse Lineage Project]]
[[Category:JKW-KABUM-Volume-22-ZA]]