View source for JKW-KABUM-20-WA-001-001

{{Khyentse Metadata
|classification=Tibetan Publications
|subclass=Tibetan Texts
|fulltitletib=དཔལ་ཨེ་ཝྃ་ཆོས་ལྡན་དུ་མཁན་ཆེན་ཐམས་ཅད་མཁྱེན་པ་བྱམས་པ་ཀུན་དགའ་བསྟན་འཛིན་གྱི་སྤྱན་སྔར་ཕུལ་བ།
|fulltitle=dpal e wa~M chos ldan du mkhan chen thams cad mkhyen pa byams pa kun dga' bstan 'dzin gyi spyan sngar phul ba
|fulltitlekar=thams cad mkhyen pa byams pa kun dga' bstan 'dzin gyi spyan sngar phul ba
|fulltitlekartib=ཐམས་ཅད་མཁྱེན་པ་བྱམས་པ་ཀུན་དགའ་བསྟན་འཛིན་གྱི་སྤྱན་སྔར་ཕུལ་བ།
|citation=[['jam dbyangs mkhyen brtse'i dbang po]]. ''dpal e waM chos ldan du mkhan chen thams cad mkhyen pa byams pa kun dga' bstan 'dzin gyi spyan sngar phul ba''. In '''jam dbyangs mkhyen brtse'i dbang po'i bka' 'bum'', Vol. 20: 1-6. Khams sde dge rdzong sar dgon: Rdzong sar blo gros phun tshogs, 2020.
|collectiontitle=mkhyen brtse'i bka' 'bum
|collectiontitletib=མཁྱེན་བརྩེའི་བཀའ་འབུམ་
|author='jam dbyangs mkhyen brtse'i dbang po
|editor=
|authortib=འཇམ་དབྱངས་མཁྱེན་བརྩེའི་དབང་པོ་
|editortib=རྫོང་སར་བློ་གྲོས་ཕུན་ཚོགས་
|tibgenre=Official Letters - chab shog
|terma=No
|sabcadcategory=Seven
|language=Tibetan
|volumenumber=020
|volnumtib=༢༠
|volyigtib=ཝ་
|totalvolumes=25
|textnuminvol=001
|textsubnumber=001
|pagenumbers=1-6
|totalpages=6
|beginfolioline=1a1
|endfolioline=3b2
|totalfolios=3
|multivolumework=No
|rectonotes=sde tshan 1
|versonotes=mkhyen brtse'i bka' 'bum
|pdflink=File:JKW-KABUM-20-WA-001.pdf
}}
{{Header}}
<h1 style="font-size: 24px !important;">Tibetan Text</h1>
<onlyinclude>
{{TibP|༄༅། །དཔལ་ཨེ་ཝྃ་ཆོས་ལྡན་དུ་མཁན་ཆེན་ཐམས་ཅད་མཁྱེན་པ་བྱམས་པ་ཀུན་དགའ་བསྟན་འཛིན་གྱི་སྤྱན་སྔར་ཕུལ་བའོ། །
༈ ཡོན་ཏན་ནོར་བུའི་ཚོགས་ཞེས་བྱ་བའི་པྲ་སྟཱ་རའོ།།

༄།།སཧཛསུཁཔྲྀཐུབྲྀཏམྲྀཏཏིལཀཾཤམབྷབཔརགཏནམིཏསུབིདམཱྃ།ནིརུདྷཙཔགུཎསུབྷགགཎམིམེ།ཏྲིབྷུབནསུཀྲྀཏཙབྷགམབྷིརུཙིརཛཡེཏ།།

༅།   །ལྷན་ཅིག་སྐྱེས་པའི་བདེ་བ་ཆེན་པོར་འཆི་མེད་གྲུབ་པའི་ཐིག་ལེ་ནི།   །སྲིད་དང་ཞི་བའི་ཕ་རོལ་སོན་པ་བསམ་མི་ཁྱབ་པའི་ཡེ་ཤེས་ཅན།   །འདི་ན་བྲལ་དང་སྨིན་པའི་ཡོན་ཏན་སྐལ་བ་བཟང་པོའི་ཚོགས་རྣམས་ཀྱི།   །ལེགས་བྱས་དཔལ་དུ་མངོན་པར་སྣང་བ་འཇིག་རྟེན་གསུམ་ན་རྒྱལ་གྱུར་ཅིག  ༡  །ཚངས་སོགས་ཆེ་དགུའི་ནོར་བུའི་ཅོད་པན་གྱིས།   །ཡང་ཡང་མཆོད་པའི་དགེ་མཚན་རྨད་བྱུང་བས།   །ཕན་བདེའི་སྣང་བ་མཐའ་དག་རྫོགས་མཛད་པའི།   །ཞབས་པད་རྡུལ་དང་བྲལ་བའི་ཉེ་དྲུང་དུ།   ༢  །རིང་ན་གནས་ཀྱང་མི་ཕྱེད་དད་པའི་ཡིད།   །གང་གི་ཐུགས་རྗེའི་འཛུམ་འོད་ལ་ཆགས་པས།   །རབ་གུས་པུཎྜ་རཱི་ཀའི་མཆུ་སྒྲོས་ལས།   །ཞུ་གསོལ་སྦྲང་རྩིའི་བསུང་ཞིམ་ཅུང་ཟད་འཐུལ།   ༣  །གཟོད་ནས་རྟག་པ་དམ་པའི་ཆུ་གཏེར་ནི།   །གཞན་ཕན་སྙིང་རྗེའི་གར་དུ་ཟློས་པའི་དཔྱིད།   །ཟླ་བ་ཟླ་ཤེལ་བདུད་རྩིའི་ངོ་མཚར་གྱིས།   །མཚོན་མིན་ཞི་བསིལ་ཉམས་བརྒྱས་རབ་ཏུ་སྒེག  ༤  །སློབ་དང་མི་སློབ་ལམ་གྱི་ཡོན་ཏན་ཀུན།   །མཚན་བཟང་ཟ་མ་ཏོག་ཏུ་རྒྱས་བཏབ་པ།   །བསོད་ནམས་བྱེ་བས་བསྐྲུན་པའི་གཟུགས་སྐུའི་དཔལ།   །བསྟན་འཛིན་རྒྱ་མཚོའི་གཙུག་ན་ལྷམ་མེར་གསལ།   ༥  །རྒྱལ་ཀུན་གསུང་གི་རྡོ་རྗེའི་དེ་ཁོ་ན།   །ཡན་ལག་དྲུག་ཅུའི་རོལ་མོ་ལ་སྦྱར་བའི།   །ཟབ་རྒྱས་ཆོས་ཚུལ་སྨྲ་བའི་དབྱངས་སྙན་པོ།   །ཐར་འདོད་རྣ་བའི་དགའ་སྟོན་གཅིག་ཏུ་གྱུར།   ༦  ། གང་ན་གཟུང་འཛིན་རྟོག་པའི་འཇུག་ལྡང་ཀུན།   །རྡུལ་བྲལ་འོད་གསལ་ཆེན་པོར་སིམ་གྱུར་པས། །མཁའ་ཁྱབ་མཁའ་ཡི་རྡོ་རྗེར་སྙོམས་འཇུག་བཞིན།   །ཇི་སྙེད་མཁྱེན་དང་བརྩེ་བའི་རོལ་རྩེད་བཟུ། ༧ །མཐའ་ཀླས་ཡོན་ཏན་དམ་པའི་གསེར་སྤྲིན་ལས།   །གཞན་ཕྱིར་ཕན་བདེའི་གྲུ་ཆར་འབེབས་མཁས་ཕྱིར།   །དོན་གཉིས་ནོར་བུའི་སྙེ་མ་ཡིད་འོང་བ།   །ལུས་ཅན་ཀུན་གྱི་ངལ་འཚོའི་གནས་སུ་མཛེས།  ༨ །གང་འདུལ་ཕྲིན་ལས་འཇུག་པའི་ཨུཏྤལ།   །སྣ་ཚོགས་གདུལ་བྱའི་ཆུ་གཏེར་ལ་ཆགས་པས།   །སྲིད་ཞིའི་དགེ་མཚན་གྲུབ་པའི་མཚར་སྡུག་གིས།   །རྒྱལ་དང་རྒྱལ་སྲས་ཡོངས་ཀྱི་རྣམ་ཐར་བཟུང་།   ༩ །དེ་སོགས་བསྔགས་འོས་ཕ་མཐའ་གཞལ་དཀའ་འཆི་མེད་ལམ་གྱི་རྗེས་སོང་བར།   །ཕྱོགས་བཅུའི་རྣམ་འདྲེན་སློབ་མར་བཅས་པས་ལེགས་སོའི་རྒྱུད་མང་བརྡུང་བའི་སྒྲས།   །ལྷ་དང་བཅས་པའི་འདྲེན་པར་གྱུར་པ་ཁྱོད་གཅིག་ཁོ་ན་ཉིད་དོ་ཞེས།   །རྨད་བྱུང་སྤྲིང་ཡིག་སྙིང་གར་བཀོད་པས་ཕྱོགས་ཀྱི་ཁོར་ཡུག་དོག་པོར་བྱས།  ༡༠ །འདི་ན་གནས་པའི་མེ་ཁྱེར་བདག  །སྐྱེས་སྦྱངས་ལང་ཚོ་དམན་གྱུར་ཀྱང་།   །ལྷག་བསམ་ཕྲག་པར་གང་གི་བཀའ།   །ལྷུན་པོའི་ཁུར་ཡང་ཅི་དགར་བཟུང་།   ༡༡ །དེ་ཚེ་ཐུགས་རྗེའི་སྤྲིན་དཀར་གྱིས།   །གསོས་པའི་སྒོ་གསུམ་མྱུ་གུ་ནི།   །ཉེར་འཚེའི་ཚ་གདུང་བྲལ་བཞིན་དུ།   །ཐོས་བསམ་པདྨོ་འཛིན་ལ་རིངས།   ༡༢  །སླར་ཡང་འཇིག་རྟེན་དགེ་བའི་ཕུལ།   །གསང་གསུམ་རྡོ་རྗེའི་ཆོས་བདུན་དུ།   །འཚོ་གཞེས་སྒྲུབ་པའི་ཤིས་བརྗོད་ཀྱི།   །ཚིག་གི་མེ་ཏོག་ཅུང་ཟད་འཐོར།   ༡༣  །ཨོཾ་སྭསྟི་ཛཱི་བནྟུ།   སྤྲོས་པའི་ཕ་མཐའ་ལས་བརྒལ་སྟོང་ཉིད་དང་།   །འགྱུར་མེད་བདེ་བ་ཆེན་པོ་ཟུང་འཇུག་པའི།   །རྣམ་ཀུན་མཆོག་ལྡན་རྡོ་རྗེ་སེམས་དཔའི་དངོས།   །གདན་གསུམ་ཡོངས་རྫོགས་ངོ་བོར་འཚོ་གཞེས་གསོལ།   ༡༤  །འགྲོ་འོང་སྲོག་རྩོལ་རྒྱུ་བ་ཇི་སྙེད་པ།   །ཁ་སྦྱོར་དྷཱུ་ཏིའི་ལམ་དུ་འཆིང་བ་ལས།   །རྡོ་རྗེ་ནཱ་དའི་ཆོས་ཕུང་སྤྲོ་མཛད་པ།   །འཕོ་མེད་རྟག་པ་དམ་པར་འཚོ་གཞེས་གསོལ།  ༡༥ །ལྷན་སྐྱེས་འབར་འཛག་ཞུ་བདེས་དགྱེས་པའི་ཐུགས།   །གཟུང་འཛིན་ཡུལ་དང་ལྷན་ཅིག་མི་གནས་པ།   །གཟོད་ནས་འཆི་མེད་གྲུབ་པའི་དཔྱིད་ཆེན་པོར།   །སྐྱེ་འགགས་མཚན་མ་བྲལ་བར་འཚོ་གཞེས་གསོལ།  ༡༦ །མདོར་ན་བདག་སོགས་མོས་པའི་ཡིད་ཅན་ཀུན།   །བྱང་ཆུབ་སྙིང་པོར་སྨིན་པ་དེ་སྲིད་དུ།   །གསང་གསུམ་འཚོ་གཞེས་བརྟན་པའི་སྐྱབས་འོག་ཏུ།   །བརྩེ་ཆེན་ཕྱག་རྒྱས་རྟག་ཏུ་དབུགས་དབྱུངས་ཤིག  ༡༧  །དེ་སྐད་ཞུ་མཆིད་མལླི་ཀ  །བརྗོད་པ་སྙན་པར་སྒྲོགས་བཞིན་དུ།   །རབ་དྭངས་བློ་ཡི་པད་རྫིང་ནས།   །ཁྱོད་ཞབས་ཆུ་གཏེར་བསྙེན་ཕྱིར་སོང་།  ༡༨  །  སརྦ་དཱ་ཀ་ལྱཱ་ཎཾ་བྷ་བ་ཏུ།།   །།  ༈}}
</onlyinclude>
{{TsagliCall}}
<headertabs/>
== Footnotes ==
<references/>
==Other Information==
{{Footer}}
[[Category:JKW-KABUM-20-WA-001]]
[[Category:Khyentse Lineage Project]]
[[Category:JKW-KABUM-Volume-20-WA]]