དཔལ་ཨེ་ཝྃ་ཆོས་ལྡན་དུ་མཁན་ཆེན་ཐམས་ཅད་མཁྱེན་པ་བྱམས་པ་ཀུན་དགའ་བསྟན་འཛིན་གྱི་སྤྱན་སྔར་ཕུལ་བ།

🚧 This website is under continued development. We appreciate your patience!

First text in section. Back to Volume PageNext Text

Wylie title	dpal e wa~M chos ldan du mkhan chen thams cad mkhyen pa byams pa kun dga' bstan 'dzin gyi spyan sngar phul ba
Location	mkhyen brtse'i bka' 'bum Volume 20, sde tshan 1, Text 1, Pages 1-6 (Folios 1a1 to 3b2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. dpal e waM chos ldan du mkhan chen thams cad mkhyen pa byams pa kun dga' bstan 'dzin gyi spyan sngar phul ba. In 'jam dbyangs mkhyen brtse'i dbang po'i bka' 'bum, Vol. 20: 1-6. Khams sde dge rdzong sar dgon: Rdzong sar blo gros phun tshogs, 2020.
Genre	Official Letters - chab shog

1 Texts in this Section (sde tshan or chos tshan)

1 1-6	དཔལ་ཨེ་ཝྃ་ཆོས་ལྡན་དུ་མཁན་ཆེན་ཐམས་ཅད་མཁྱེན་པ་བྱམས་པ་ཀུན་དགའ་བསྟན་འཛིན་གྱི་སྤྱན་སྔར་ཕུལ་བ། dpal e wa~M chos ldan du mkhan chen thams cad mkhyen pa byams pa kun dga' bstan 'dzin gyi spyan sngar phul ba Official Letters - chab shog	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །དཔལ་ཨེ་ཝྃ་ཆོས་ལྡན་དུ་མཁན་ཆེན་ཐམས་ཅད་མཁྱེན་པ་བྱམས་པ་ཀུན་དགའ་བསྟན་འཛིན་གྱི་སྤྱན་སྔར་ཕུལ་བའོ། །

༈ ཡོན་ཏན་ནོར་བུའི་ཚོགས་ཞེས་བྱ་བའི་པྲ་སྟཱ་རའོ།།

༄།།སཧཛསུཁཔྲྀཐུབྲྀཏམྲྀཏཏིལཀཾཤམབྷབཔརགཏནམིཏསུབིདམཱྃ།ནིརུདྷཙཔགུཎསུབྷགགཎམིམེ།ཏྲིབྷུབནསུཀྲྀཏཙབྷགམབྷིརུཙིརཛཡེཏ།།

༅། །ལྷན་ཅིག་སྐྱེས་པའི་བདེ་བ་ཆེན་པོར་འཆི་མེད་གྲུབ་པའི་ཐིག་ལེ་ནི། །སྲིད་དང་ཞི་བའི་ཕ་རོལ་སོན་པ་བསམ་མི་ཁྱབ་པའི་ཡེ་ཤེས་ཅན། །འདི་ན་བྲལ་དང་སྨིན་པའི་ཡོན་ཏན་སྐལ་བ་བཟང་པོའི་ཚོགས་རྣམས་ཀྱི། །ལེགས་བྱས་དཔལ་དུ་མངོན་པར་སྣང་བ་འཇིག་རྟེན་གསུམ་ན་རྒྱལ་གྱུར་ཅིག ༡ །ཚངས་སོགས་ཆེ་དགུའི་ནོར་བུའི་ཅོད་པན་གྱིས། །ཡང་ཡང་མཆོད་པའི་དགེ་མཚན་རྨད་བྱུང་བས། །ཕན་བདེའི་སྣང་བ་མཐའ་དག་རྫོགས་མཛད་པའི། །ཞབས་པད་རྡུལ་དང་བྲལ་བའི་ཉེ་དྲུང་དུ། ༢ །རིང་ན་གནས་ཀྱང་མི་ཕྱེད་དད་པའི་ཡིད། །གང་གི་ཐུགས་རྗེའི་འཛུམ་འོད་ལ་ཆགས་པས། །རབ་གུས་པུཎྜ་རཱི་ཀའི་མཆུ་སྒྲོས་ལས། །ཞུ་གསོལ་སྦྲང་རྩིའི་བསུང་ཞིམ་ཅུང་ཟད་འཐུལ། ༣ །གཟོད་ནས་རྟག་པ་དམ་པའི་ཆུ་གཏེར་ནི། །གཞན་ཕན་སྙིང་རྗེའི་གར་དུ་ཟློས་པའི་དཔྱིད། །ཟླ་བ་ཟླ་ཤེལ་བདུད་རྩིའི་ངོ་མཚར་གྱིས། །མཚོན་མིན་ཞི་བསིལ་ཉམས་བརྒྱས་རབ་ཏུ་སྒེག ༤ །སློབ་དང་མི་སློབ་ལམ་གྱི་ཡོན་ཏན་ཀུན། །མཚན་བཟང་ཟ་མ་ཏོག་ཏུ་རྒྱས་བཏབ་པ། །བསོད་ནམས་བྱེ་བས་བསྐྲུན་པའི་གཟུགས་སྐུའི་དཔལ། །བསྟན་འཛིན་རྒྱ་མཚོའི་གཙུག་ན་ལྷམ་མེར་གསལ། ༥ །རྒྱལ་ཀུན་གསུང་གི་རྡོ་རྗེའི་དེ་ཁོ་ན། །ཡན་ལག་དྲུག་ཅུའི་རོལ་མོ་ལ་སྦྱར་བའི། །ཟབ་རྒྱས་ཆོས་ཚུལ་སྨྲ་བའི་དབྱངས་སྙན་པོ། །ཐར་འདོད་རྣ་བའི་དགའ་སྟོན་གཅིག་ཏུ་གྱུར། ༦ ། གང་ན་གཟུང་འཛིན་རྟོག་པའི་འཇུག་ལྡང་ཀུན། །རྡུལ་བྲལ་འོད་གསལ་ཆེན་པོར་སིམ་གྱུར་པས། །མཁའ་ཁྱབ་མཁའ་ཡི་རྡོ་རྗེར་སྙོམས་འཇུག་བཞིན། །ཇི་སྙེད་མཁྱེན་དང་བརྩེ་བའི་རོལ་རྩེད་བཟུ། ༧ །མཐའ་ཀླས་ཡོན་ཏན་དམ་པའི་གསེར་སྤྲིན་ལས། །གཞན་ཕྱིར་ཕན་བདེའི་གྲུ་ཆར་འབེབས་མཁས་ཕྱིར། །དོན་གཉིས་ནོར་བུའི་སྙེ་མ་ཡིད་འོང་བ། །ལུས་ཅན་ཀུན་གྱི་ངལ་འཚོའི་གནས་སུ་མཛེས། ༨ །གང་འདུལ་ཕྲིན་ལས་འཇུག་པའི་ཨུཏྤལ། །སྣ་ཚོགས་གདུལ་བྱའི་ཆུ་གཏེར་ལ་ཆགས་པས། །སྲིད་ཞིའི་དགེ་མཚན་གྲུབ་པའི་མཚར་སྡུག་གིས། །རྒྱལ་དང་རྒྱལ་སྲས་ཡོངས་ཀྱི་རྣམ་ཐར་བཟུང་། ༩ །དེ་སོགས་བསྔགས་འོས་ཕ་མཐའ་གཞལ་དཀའ་འཆི་མེད་ལམ་གྱི་རྗེས་སོང་བར། །ཕྱོགས་བཅུའི་རྣམ་འདྲེན་སློབ་མར་བཅས་པས་ལེགས་སོའི་རྒྱུད་མང་བརྡུང་བའི་སྒྲས། །ལྷ་དང་བཅས་པའི་འདྲེན་པར་གྱུར་པ་ཁྱོད་གཅིག་ཁོ་ན་ཉིད་དོ་ཞེས། །རྨད་བྱུང་སྤྲིང་ཡིག་སྙིང་གར་བཀོད་པས་ཕྱོགས་ཀྱི་ཁོར་ཡུག་དོག་པོར་བྱས། ༡༠ །འདི་ན་གནས་པའི་མེ་ཁྱེར་བདག །སྐྱེས་སྦྱངས་ལང་ཚོ་དམན་གྱུར་ཀྱང་། །ལྷག་བསམ་ཕྲག་པར་གང་གི་བཀའ། །ལྷུན་པོའི་ཁུར་ཡང་ཅི་དགར་བཟུང་། ༡༡ །དེ་ཚེ་ཐུགས་རྗེའི་སྤྲིན་དཀར་གྱིས། །གསོས་པའི་སྒོ་གསུམ་མྱུ་གུ་ནི། །ཉེར་འཚེའི་ཚ་གདུང་བྲལ་བཞིན་དུ། །ཐོས་བསམ་པདྨོ་འཛིན་ལ་རིངས། ༡༢ །སླར་ཡང་འཇིག་རྟེན་དགེ་བའི་ཕུལ། །གསང་གསུམ་རྡོ་རྗེའི་ཆོས་བདུན་དུ། །འཚོ་གཞེས་སྒྲུབ་པའི་ཤིས་བརྗོད་ཀྱི། །ཚིག་གི་མེ་ཏོག་ཅུང་ཟད་འཐོར། ༡༣ །ཨོཾ་སྭསྟི་ཛཱི་བནྟུ། སྤྲོས་པའི་ཕ་མཐའ་ལས་བརྒལ་སྟོང་ཉིད་དང་། །འགྱུར་མེད་བདེ་བ་ཆེན་པོ་ཟུང་འཇུག་པའི། །རྣམ་ཀུན་མཆོག་ལྡན་རྡོ་རྗེ་སེམས་དཔའི་དངོས། །གདན་གསུམ་ཡོངས་རྫོགས་ངོ་བོར་འཚོ་གཞེས་གསོལ། ༡༤ །འགྲོ་འོང་སྲོག་རྩོལ་རྒྱུ་བ་ཇི་སྙེད་པ། །ཁ་སྦྱོར་དྷཱུ་ཏིའི་ལམ་དུ་འཆིང་བ་ལས། །རྡོ་རྗེ་ནཱ་དའི་ཆོས་ཕུང་སྤྲོ་མཛད་པ། །འཕོ་མེད་རྟག་པ་དམ་པར་འཚོ་གཞེས་གསོལ། ༡༥ །ལྷན་སྐྱེས་འབར་འཛག་ཞུ་བདེས་དགྱེས་པའི་ཐུགས། །གཟུང་འཛིན་ཡུལ་དང་ལྷན་ཅིག་མི་གནས་པ། །གཟོད་ནས་འཆི་མེད་གྲུབ་པའི་དཔྱིད་ཆེན་པོར། །སྐྱེ་འགགས་མཚན་མ་བྲལ་བར་འཚོ་གཞེས་གསོལ། ༡༦ །མདོར་ན་བདག་སོགས་མོས་པའི་ཡིད་ཅན་ཀུན། །བྱང་ཆུབ་སྙིང་པོར་སྨིན་པ་དེ་སྲིད་དུ། །གསང་གསུམ་འཚོ་གཞེས་བརྟན་པའི་སྐྱབས་འོག་ཏུ། །བརྩེ་ཆེན་ཕྱག་རྒྱས་རྟག་ཏུ་དབུགས་དབྱུངས་ཤིག ༡༧ །དེ་སྐད་ཞུ་མཆིད་མལླི་ཀ །བརྗོད་པ་སྙན་པར་སྒྲོགས་བཞིན་དུ། །རབ་དྭངས་བློ་ཡི་པད་རྫིང་ནས། །ཁྱོད་ཞབས་ཆུ་གཏེར་བསྙེན་ཕྱིར་སོང་། ༡༨ ། སརྦ་དཱ་ཀ་ལྱཱ་ཎཾ་བྷ་བ་ཏུ།། །། ༈

[edit]

legs 'bul dang chab shog thor bu sna tshogs kyi skor las/_thams cad mkhyen pa byams pa kun dga' bstan 'dzin gyi spyan sngar phul ba/ @#/_/dpal e wa~M chos ldan du mkhan chen thams cad mkhyen pa byams pa kun dga' bstan 'dzin gyi spyan sngar phul ba'o/_/ !_yon tan nor bu'i tshogs zhes bya ba'i pra stA ra'o// @//sahadzasukhapr-ithubr-itamr-itatilakaMshamab+habaparagatanamitasubidamA~M/nirud+hatsapaguNasub+hagagaNamime/trib+hubanasukr-itatsab+hagamab+hirutsiradzayeta//

1. /___/lhan cig skyes pa'i bde ba chen por 'chi med grub pa'i thig le ni/___/srid dang zhi ba'i pha rol son pa bsam mi khyab pa'i ye shes can/___/'di na bral dang smin pa'i yon tan skal ba bzang po'i tshogs rnams kyi/___/legs byas dpal du mngon par snang ba 'jig rten gsum na rgyal gyur cig__1__/tshangs sogs che dgu'i nor bu'i cod pan gyis/___/yang yang mchod pa'i dge mtshan rmad byung bas/___/phan bde'i snang ba mtha' dag rdzogs mdzad pa'i/___/zhabs pad rdul dang bral ba'i nye drung du/___2__/ring na gnas kyang mi phyed dad pa'i yid/___/gang gi thugs rje'i 'dzum 'od la chags pas/___/rab gus puN+Da rI ka'i mchu sgros las/___/zhu gsol sbrang rtsi'i bsung zhim cung zad 'thul/___3__/gzod nas rtag pa dam pa'i chu gter ni/___/gzhan phan snying rje'i gar du zlos pa'i dpyid/___/zla ba zla shel bdud rtsi'i ngo mtshar gyis/___/mtshon min zhi bsil nyams brgyas rab tu sgeg__4__/slob dang mi slob lam gyi yon tan kun/___/mtshan bzang za ma tog tu rgyas btab pa/___/bsod nams bye bas bskrun pa'i gzugs sku'i dpal/___/bstan 'dzin rgya mtsho'i gtsug na lham mer gsal/___5__/rgyal kun gsung gi rdo rje'i de kho na/___/yan lag drug cu'i rol mo la sbyar ba'i/___/zab rgyas chos tshul smra ba'i dbyangs snyan po/___/thar 'dod rna ba'i dga' ston gcig tu gyur/___6__/_gang na gzung 'dzin rtog pa'i 'jug ldang kun/___/rdul bral 'od gsal chen por sim gyur pas/_/mkha' khyab mkha' yi rdo rjer snyoms 'jug bzhin/___/ji snyed mkhyen dang brtse ba'i rol rtsed bzu/_7_/mtha' klas yon tan dam pa'i gser sprin las/___/gzhan phyir phan bde'i gru char 'bebs mkhas phyir/___/don gnyis nor bu'i snye ma yid 'ong ba/___/lus can kun gyi ngal 'tsho'i gnas su mdzes/__8_/gang 'dul phrin las 'jug pa'i ut+pal/___/sna tshogs gdul bya'i chu gter la chags pas/___/srid zhi'i dge mtshan grub pa'i mtshar sdug gis/___/rgyal dang rgyal sras yongs kyi rnam thar bzung /___9_/de sogs bsngags 'os pha mtha' gzhal dka' 'chi med lam gyi rjes song bar/___/phyogs bcu'i rnam 'dren slob mar bcas pas legs so'i rgyud mang brdung ba'i sgras/___/lha dang bcas pa'i 'dren par gyur pa khyod gcig kho na nyid do zhes/___/rmad byung spring yig snying gar bkod pas phyogs kyi khor yug dog por byas/__10_/'di na gnas pa'i me khyer bdag__/skyes sbyangs lang tsho dman gyur kyang /___/lhag bsam phrag par gang gi bka'/___/lhun po'i khur yang ci dgar bzung /___11_/de tshe thugs rje'i sprin dkar gyis/___/gsos pa'i sgo gsum myu gu ni/___/nyer 'tshe'i tsha gdung bral bzhin du/___/thos bsam pad+mo 'dzin la rings/___12__/slar yang 'jig rten dge ba'i phul/___/gsang gsum rdo rje'i chos bdun du/___/'tsho gzhes sgrub pa'i shis brjod kyi/___/tshig gi me tog cung zad 'thor/___13__/oM swasti dzI ban+tu/___spros pa'i pha mtha' las brgal stong nyid dang /___/'gyur med bde ba chen po zung 'jug pa'i/___/rnam kun mchog ldan rdo rje sems dpa'i dngos/___/gdan gsum yongs rdzogs ngo bor 'tsho gzhes gsol/___14__/'gro 'ong srog rtsol rgyu ba ji snyed pa/___/kha sbyor d+hU ti'i lam du 'ching ba las/___/rdo rje nA da'i chos phung spro mdzad pa/___/'pho med rtag pa dam par 'tsho gzhes gsol/__15_/lhan skyes 'bar 'dzag zhu bdes dgyes pa'i thugs/___/gzung 'dzin yul dang lhan cig mi gnas pa/___/gzod nas 'chi med grub pa'i dpyid chen por/___/skye 'gags mtshan ma bral bar 'tsho gzhes gsol/__16_/mdor na bdag sogs mos pa'i yid can kun/___/byang chub snying por smin pa de srid du/___/gsang gsum 'tsho gzhes brtan pa'i skyabs 'og tu/___/brtse chen phyag rgyas rtag tu dbugs dbyungs shig__17__/de skad zhu mchid mal+li ka__/brjod pa snyan par sgrogs bzhin du/___/rab dwangs blo yi pad rdzing nas/___/khyod zhabs chu gter bsnyen phyir song /__18__/__sarba dA ka l+yA NaM b+ha ba tu//___//__!