View source for JKW-KABUM-08-NYA-017-001

{{Khyentse Metadata
|classification=Tibetan Publications
|subclass=Tibetan Texts
|fulltitletib=རིགས་གསུམ་སྤྱི་ཡི་དཀྱིལ་འཁོར་གྱི་ཆོ་ག་ཕྲིན་ལས་ལྷུན་གྲུབ།
|fulltitle=rigs gsum spyi yi dkyil 'khor gyi cho ga phrin las lhun grub
|citation=[['jam dbyangs mkhyen brtse'i dbang po]]. ''rigs gsum spyi yi dkyil 'khor gyi cho ga phrin las lhun grub''. In '''jam dbyangs mkhyen brtse'i dbang po'i bka' 'bum'', Vol. 8: 417-495. Khams sde dge rdzong sar dgon: Rdzong sar blo gros phun tshogs, 2020.
|collectiontitle=mkhyen brtse'i bka' 'bum
|collectiontitletib=མཁྱེན་བརྩེའི་བཀའ་འབུམ་
|author='jam dbyangs mkhyen brtse'i dbang po
|editor=
|authortib=འཇམ་དབྱངས་མཁྱེན་བརྩེའི་དབང་པོ་
|editortib=
|tibgenre=Ritual and Liturgical Texts - cho ga phyag len, Offering Rituals - mchod sbyin
|terma=No
|sabcadcategory=Five
|deity=rigs gsum mgon po
|language=Tibetan
|volumenumber=008
|volnumtib=༨
|volyigtib=ཉ་
|totalvolumes=25
|textnuminvol=017
|textsubnumber=001
|pagenumbers=417-495
|totalpages=79
|beginfolioline=1a
|endfolioline=40a2
|totalfolios=40
|multivolumework=No
|rectonotes=sde tshan 17
|versonotes=mkhyen brtse'i bka' 'bum
|colophontib=དེ་ལྟར་རིགས་གསུམ་སྤྱིའི་དཀྱིལ་འཁོར་གྱི་ཆོ་ག་ཕྲིན་ལས་ལྷུན་གྲུབ་ཅེས་བྱ་བ་འདི་ནི།  རྗེ་བཙུན་བླ་མ་དམ་པ་རྣམས་ཀྱི་བཀའ་དྲིན་གྱིས་འཚོ་བ།  དགེ་སློང་ག་ག་ན་ཤྲཱི་བྷ་དྲས་བྱ་སྤྱོད་ཀྱི་སྲོལ་འཛིན་ཆེན་པོ་ཁ་ཆེ་ཡེ་ཤེས་རྡོ་རྗེ་ལ་སོགས་པ་རྣམས་ཀྱི་གཞུང་ལ་གཏུགས་ཤིང་།  བླ་མ་མཁས་པའི་ཕྱག་ལེན་གྱིས་ཀྱང་བརྒྱན་ཏེ།  ཤིང་མོ་ལུག་ལོ་དབྱར་ཟླ་ར་བའི་ཚེས་ལྔའི་ཉིན་དཔལ་ཨེ་ཝཾ་ཆོས་ལྡན་གྱི་དབེན་གནས་ཐར་པ་རྩེར་སྦྱར་ཞེས་ཐར་རྩེ་པཎ་ཆེན་ནམ་མཁའ་དཔལ་བཟང་གིས་མཛད་པའི་རིགས་གསུམ་སྤྱིའི་དཀྱིལ་འཁོར་གྱི་ཆོ་ག་འདི་ཉིད།  །ལས་དང་པོ་པ་རྣམས་ལ་ཕན་པའི་ཕྱིར་སོགས་ཁོངས་རྣམས་དཀྱུས་སུ་བཅུག  །ཞར་བྱུང་རྡུལ་ཚོན་གྱི་ཁྱད་ཆོས་སོགས་གསལ་བྱེད་ཕྲན་བུའི་ཞལ་སྐོང་དང་བཅས་མཁན་ཆེན་རྡོ་རྗེ་འཆང་བྱམས་པ་ཀུན་དགའ་བསྟན་འཛིན་ལས་ཚུལ་འདིའི་བཀའ་དྲིན་ཐོབ་པའི་བྱ་བྲལ་ཆོས་རྗེ་འཇམ་དབྱངས་མཁྱེན་བརྩེའི་དབང་པོ་ཀུན་དགའ་བསྟན་པའི་རྒྱལ་མཚན་གྱིས་དཔལ་སྡེ་དགེ་ལྷུན་གྲུབ་སྟེང་གི་ཆོས་གྲྭ་ཆེན་པོར་བྲིས་པ་དགེ་ལེགས་མཆོག་ཏུ་གྱུར་ཅིག།  །།སརྦ་དཱ་ཤྲེ་ཡོ་བྷ་བ་ཏུ།།
|colophonwylie=de ltar rigs gsum spyi'i dkyil 'khor gyi cho ga phrin las lhun grub ces bya ba 'di ni/__rje btsun bla ma dam pa rnams kyi bka' drin gyis 'tsho ba/__dge slong ga ga na shrI b+ha dras bya spyod kyi srol 'dzin chen po kha che ye shes rdo rje la sogs pa rnams kyi gzhung la gtugs shing /__bla ma mkhas pa'i phyag len gyis kyang brgyan te/__shing mo lug lo dbyar zla ra ba'i tshes lnga'i nyin dpal e waM chos ldan gyi dben gnas thar pa rtser sbyar zhes thar rtse paN chen nam mkha' dpal bzang gis mdzad pa'i rigs gsum spyi'i dkyil 'khor gyi cho ga 'di nyid/__/las dang po pa rnams la phan pa'i phyir sogs khongs rnams dkyus su bcug__/zhar byung rdul tshon gyi khyad chos sogs gsal byed phran bu'i zhal skong dang bcas mkhan chen rdo rje 'chang byams pa kun dga' bstan 'dzin las tshul 'di'i bka' drin thob pa'i bya bral chos rje 'jam dbyangs mkhyen brtse'i dbang po kun dga' bstan pa'i rgyal mtshan gyis dpal sde dge lhun grub steng gi chos grwa chen por bris pa dge legs mchog tu gyur cig/__//sarba dA shre yo b+ha ba tu/
|pdflink=File:JKW-KABUM-08-NYA-017.pdf
}}
{{Header}}
<h1 style="font-size: 24px !important;">Tibetan Text</h1>
<onlyinclude>
{{TibP|༅།  །ཀ རྨ ནི རཱ བྷོ ག ནཱ མ ཏྲི ཀུ ལ ས མུ དཱ ཡ སྱ མ ཎྜ ལ བི དྷི བི ཧ ར ཏི སྨ།
༄༅།  །རིགས་གསུམ་སྤྱིའི་དཀྱིལ་འཁོར་གྱི་ཆོ་ག་ཕྲིན་ལས་ལྷུན་གྲུབ་ཅེས་བྱ་བ་བཞུགས་སོ།

ཨོཾ་སྭ་སྟི།  འཁོར་ལོའི་དབང་ཕྱུག་རྗེ་བཙུན་བླ་མ་དང་།  །རིགས་གསུམ་རྒྱལ་བའི་མཆོག་ལ་གུས་བཏུད་དེ།  །དེ་ཉིད་སྒྲུབ་དང་དཀྱིལ་འཁོར་ལས་རིམ་སོགས།  །ཡེ་ཤེས་རྡོ་རྗེའི་གཞུང་བཞིན་བཤད་ཀྱིས་ཉོན།  །མཚན་ཉིད་ལྡན་པའི་སློབ་དཔོན་གྱིས།  །སྣོད་དང་ལྡན་པའི་སློབ་མ་ལ།  །རིགས་གསུམ་སྤྱི་ཡི་དཀྱིལ་འཁོར་དུ།  །མངོན་པར་དབང་བསྐུར་བསྒྲུབ་འདོད་པས།  །གཙང་ཞིང་དབེན་པའི་ས་ཕྱོགས་སུ།  །སྟེགས་བུ་རས་བཟང་གིས་བཀབ་པའི།  །སྟེང་དུ་མཎྜལ་གཙང་མའི་དབུས།  །དྲི་ཡི་ཐིག་ལེ་གྲུ་བཞི་དང་།  །ཕྱོགས་བཞི་རྣམས་སུ་ཟླུམ་པོའི་སྟེང་།  །མེ་ཏོག་ཚོམ་བུ་རེ་བཀོད་དེ།  །མཉྫི་ལ་སོགས་སྟེང་དུ་གཞག  །དེ་ཡི་འོག་གམ་ཉེ་ལོགས་སུ།  །ས་ལྷའི་མཎྜལ་ཚོམ་བུ་བཀོད།  དེ་ཡི་ཕྱི་རོལ་བྱང་ཤར་གྱི།  །མཚམས་སུ་མཚམས་འཛིན་མེ་ཏོག་དང་།  །ཆུ་གཉིས་སྔོན་འགྲོའི་ཉེར་སྤྱོད་རྣམས།  །ཤར་ནས་བརྩམས་ཏེ་གྲུ་བཞིར་བཤམ།  །དེ་ཡི་ཕྱི་རོལ་ཕྱོགས་བཞི་རུ།  །བདུག་སྤོས་མར་མེ་ཞལ་ཟས་རེ།  །གཡས་སྐོར་དག་ཏུ་སྒོས་མཆོད་བཤམ།  །ས་ལྷའི་མཎྜལ་ཉེ་ལོགས་སུ།  །གཏོར་མ་གཅིག་བཤམ་འབྱོར་གྱུར་ན།  །སྒོས་མཆོད་ཀྱང་བཤམ་དཀྱིལ་འཁོར་གྱི།  །བྱང་ཤར་ནས་བརྩམས་ཤར་ལྷོའི་བར།  །གཟུངས་གཏོར་དང་ནི་ཆོས་སྐྱོང་དང་།  །མེ་ནས་ལྷོ་ནུབ་བར་དུ་ནི།  །ཆ་གསུམ་གཏོར་མ་ལེགས་པར་བཤམ། །ལོགས་སུ་སྔོན་འགྲོའི་གཏོར་མའང་བཤམ།  །སློབ་དཔོན་མདུན་དུ་རྡོར་དྲིལ་སོགས།  །མཚན་ཉིད་ལྡན་པའི་བུམ་པ་ལྔ།  །ལེགས་བཀྲུས་ཁ་ཚར་མ་ཉམས་པའི།  །རས་བཟང་མགུལ་ཆིངས་ཕྲོག་ལྔ་པའམ།  །བདུན་པ་ལེགས་བཅིངས་མཚན་མ་གདགས།  །དྲག་སྔགས་བཟླ་ཞིང་གུ་གུལ་གྱིས།  །ལེགས་བདུག་ཡུངས་ཀར་དག་གིས་བྲབ།  །གཙང་མའི་ཆུ་ཡིས་སུམ་གཉིས་དགང་།  །འབྲུ་ལྔ་སྨན་ལྔ་རིན་ཆེན་ལྔ།  །སྙིང་པོ་ལྔ་དང་དྲི་ལྔ་གཞུག །ཀུ་ཤས་ཁ་བརྒྱན་དེ་སྟེང་དུ།  །དུང་ཆོས་དྲི་བཟང་ཆུ་བཅས་དང་།  །རྡོ་རྗེ་གཟུངས་ཐག་ཀྱང་བཤམས་ཤིང་།  །ལོགས་སུ་སློབ་མ་སྟ་གོན་ཆས།  །ཉེར་སྤྱོད་སོ་ཤིང་ཁྱོར་ཆུ་དང་།  །དཔུང་སྐུད་ཀུ་ཤ་སོགས་བཤམ་མོ།  །ཆོ་ག་དངོས་ལ།  སྟ་གོན་དང་།  དངོས་གཞི་གཉིས་ཀྱི་དང་པོ་ལ།  བདག་བསྐྱེད་བསྒོམ་པ།  དཀྱིལ་འཁོར་གྱི་བྱ་བ།  རྗེས་ཀྱི་ཆོ་གའོ།  །དང་པོ་ནི།  བདག་ཉིད་གྲོགས་དང་བཅས་པས་ཁྲུས་བྱ།  གྲུབ་ན་ཐེག་པ་ཆེན་པོའི་གསོ་སྦྱོང་བླངས་ལ།  དཀྱིལ་འཁོར་གྱི་ཤར་ཕྱོགས་སུ་འཁོད་དེ།  སྔོན་འགྲོའི་གཏོར་མ་ཆུ་གཙང་གིས་བྲན་ལ།  ཨོཾ་ཨ་མྲྀ་ཏེ་ཧཱུྃ་ཕཊ་ཀྱིས་བསང་།  སྭ་བྷཱ་ཝས་སྦྱང་།  རྡོ་རྗེ་བསྡམས་པ་བསྐྱོད་པའི་ཕྱག་རྒྱ་དང་།  ཨོཾ་ཨ་ཀཱ་རོ་མུ་ཁཾ་སོགས་ལན་གསུམ་གྱིས་བྱིན་གྱིས་བརླབ།  ལྕགས་ཀྱུའི་ཕྱག་རྒྱ་དང་བཅས་པས།  རང་གི་སྙིང་ག་ནས་འོད་ཟེར་འཕྲོས་པས་ཕྱོགས་སྐྱོང་བ་བཅུ་འཁོར་དང་བཅས་པ་ཨོཾ་ཨཱ་ཀཪྵཱ་ཡ་ཛ།  ཞེས་པས་སྤྱན་དྲང་ནམ་མཁའི་མཛོད་ཀྱི་ཕྱག་རྒྱ་དང་།  ཨོཾ་ད་ཤ་དིཀ་ལོ་ཀ་པཱ་ལ་ས་པ་རི་ཝཱ་ར་ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་སོགས་ལན་གསུམ་གྱིས་ཕུལ།  ཨོཾ་བཛྲ་ཨརྒྷཾ་སྭཱ་ཧཱ།  ཨོཾ་བཛྲ་པཱ་དྱཾ་ཞེས་སོགས་ཀྱིས་མཆོད།  རྡོ་རྗེ་དྲིལ་བུ་འཛིན་པས།  ཕྱོགས་སྐྱོང་བཅུ་པོ་འཁོར་བཅས་རྣམས།  །མཆོད་སྦྱིན་གཏོར་མ་འདི་སྣོམས་ལ།  །རྣལ་འབྱོར་བདག་ཅག་འཁོར་བཅས་ལ།  །ནད་མེད་ཚེ་དང་དབང་ཕྱུག་དང་།  །དཔལ་དང་གྲགས་དང་སྐལ་པ་བཟང་།  །ལོངས་སྤྱོད་རྒྱ་ཆེན་ཀུན་ཐོབ་ཅིང་།  །ཞི་དང་རྒྱས་ལ་སོགས་པ་ཡི།  །ལས་ཀྱི་དངོས་གྲུབ་བདག་ལ་སྩོལ།  །དམ་ཚིག་ཅན་གྱིས་བདག་ལ་སྲུངས།  །དངོས་གྲུབ་ཀུན་གྱི་སྟོང་གྲོགས་མཛོད།  དུས་མིན་འཆི་དང་ནད་རྣམས་དང་།  །གདོན་དང་བགེགས་རྣམས་མེད་པར་མཛོད།  །རྨི་ལམ་ངན་དང་མཚན་མ་ངན།  །བྱ་བྱེད་ངན་པ་མེད་པར་མཛོད།  །འཇིག་རྟེན་བདེ་ཞིང་ལོ་ལེགས་དང་།  །འབྲུ་རྣམས་འཕེལ་ཞིང་ཆོས་འཕེལ་དང་།  །དགེ་ལེགས་ཐམས་ཅད་འབྱུང་བ་དང་།  །ཡིད་ལ་འདོད་པ་ཀུན་འགྲུབ་ཤོག   །  ༈ 
དཔལ་ལྡན་བླ་མ་དམ་པ་རྣམས་ཀྱི་ཐུགས་དགོངས་རྫོགས་པ་དང་།  སེམས་ཅན་ཐམས་ཅད་ཀྱི་དོན་དུ་ཕྱག་རྒྱ་ཆེན་པོ་མཆོག་གི་དངོས་གྲུབ་རིགས་གསུམ་གྱི་གོ་འཕང་ཐོབ་པར་བྱ་བའི་ཆེད་དུ་སའི་ཕྱོགས་འདིར་རིགས་གསུམ་གྱི་དཀྱིལ་འཁོར་ཆེན་པོ་བཞེངས་ཏེ་སྒྲུབ་ཅིང་མཆོད་པ་དང་།  །བདག་ཉིད་འཇུག་ཅིང་དབང་བླང་བ་དང་།  སློབ་མ་གཞུག་ཅིང་དབང་བསྐུར་བར་འཚལ་ན།  སྲུང་མའི་དབང་པོ་ཁྱེད་རྣམས་ཀྱིས་དཀྱིལ་འཁོར་ཆེན་པོའི་བྱ་བ་མཐར་མ་ཕྱིན་གྱི་བར་དུ་བར་དུ་གཅོད་པ་ཐམས་ཅད་བསྲུང་བ་དང་།  དེ་ནས་ཀྱང་བྱང་ཆུབ་མ་ཐོབ་ཀྱི་བར་གྱི་བར་ཆད་ཐམས་ཅད་བསྲུང་བ་དང་སྟོང་གྲོགས་མཛོད་ཅིག  །མུཿཞེས་བརྗོད་དེ་ལག་པ་ས་ལ་རེག་པས་མགྲོན་ཕྱི་རོལ་གྱི་ཕྱོགས་མཚམས་སུ་གཤེགས་པར་བསམ།  གང་དག་ནག་པོའི་ཕྱོགས་ལ་མངོན་པར་དགའ་བའི་འབྱུང་པོ་གདུག་པ་ཅན་གསང་སྤྱོད་ལྟ་བར་མི་དབང་བ་དེ་དག་སའི་ཕྱོགས་འདིར་མ་གནས་པར་གཞན་དུ་སོང་ཞིག་ཅེས་དང་།  ཨོཾ་ཨ་ར་པ་ཙ་ན་དྷཱིཿབཟླ་ཞིང་རྡོ་རྗེ་གསོར།  དྲིལ་བུ་དྲག་ཏུ་དཀྲོལ་ཞིང་གཏོར་མགྲོན་གྱི་ཕྱི་འབྲང་གི་བགེགས་རྣམས་རིང་དུ་བསྐྲད་དེ་གཏོར་མ་ས་གཙང་སར་བསྐྱལ་ལོ།།  །།
མཆོད་པ་རྣམས་བསང་སྦྱང་།  སྟོང་པའི་ངང་ལས་ཨོཾ་ལས་བྱུང་བའི་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨོཾ་འོད་དུ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མཆོད་ཡོན།  ཞབས་བསིལ།  མེ་ཏོག  །བདུག་སྤོས།  མར་མེ།  དྲི་མཆོག  །ཞལ་ཟས།  རོལ་མོ་རྣམས་དངས་ཤིང་ཐོགས་པ་མེད་པ་ནམ་མཁའི་མཐའ་ཀླས་པར་གྱུར་ཅེས་དང་།  སོ་སོའི་ཕྱག་རྒྱ་དང་བཅས་པས།  ཨོཾ་བཛྲ་ཨརྒྷཾ་སྭཱ་ཧཱ།  ཨོཾ་བཛྲ་པདྱཾ་སྭཱ་ཧཱ་སོགས་ནས།  ཨོཾ་བཛྲ་ཤབྡ་སྭཱ་ཧཱ།  ཞེས་པའི་མཐར་ཨོཾ་བཛྲ་དྷ་རྨཱ་ར་ཎི་ཏ།  པྲ་ར་ཎི་ཏ།  སཾ་པྲ་ར་ཎི་ཏ།  སརྦ་བུདྡྷ་ཀྵེ་ཏྲ་པྲ་ཙ་ལི་ནི།  པྲ་ཛྙཱ་པཱ་ར་མི་ཏ་ནཱ་ད།  སཾ་བྷ་ཝེ།  བཛྲ་ས་ཏྭ་ཧྲྀ་ད་ཡ་སནྟོ་ཥ་ཎི་ཧཱུྃ་ཧཱུྃ་ཧཱུྃ།  ཧོ་ཧོ་ཧོ།  ཨཱ་ཁཾ་སྭཱ་ཧཱ།  ཞེས་ལན་གསུམ་རོལ་མོ་དང་བཅས་པས་བྱིན་དབབ།  བདག་དང་འགྲོ་བ་ནམ་མཁའ་དང་མཉམ་པའི་སེམས་ཅན་ཐམས་ཅད་དུས་འདི་ནས་བཟུང་སྟེ།  ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ།  །རྫོགས་པའི་སངས་རྒྱས་བཅོམ་ལྡན་འདས་རྣམས་ལ༔  དམ་པའི་ཆོས་རྣམས་ལ༴  འཕགས་པའི་དགེ་འདུན༴  ཞེས་སྐྱབས་འགྲོ་ཅི་ནུས་དང་།  ཐལ་མོ་སྙིང་གར་སྦྱར་ལ།  བླ་མ་དང་དཀོན་མཆོག་རིན་པོ་ཆེ་རྣམ་པ་གསུམ་ལ་བདག་ཕྱག་འཚལ་ཞིང་སྐྱབས་སུ་མཆིའོ།  །ཁྱེད་རྣམས་ཀྱིས་བདག་གི་རྒྱུད་བྱིན་གྱིས་བརླབ་ཏུ་གསོལ།  །ཞེས་གསོལ་བ་གདབ།  སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ།  དེའི་ཆེད་དུ་བཅོམ་ལྡན་འདས་རིགས་གསུམ་མགོན་པོའི་སྒོམ་བཟླས་ཉམས་སུ་བླང་བར་བགྱིའོ།  །ཞེས་ལན་གསུམ་གྱིས་སེམས་བསྐྱེད།  རང་སྐད་ཅིག་གིས་རྗེ་བཙུན་འཇམ་པའི་དབྱངས་སུ་གསལ་བའི་ཐུགས་ཀར་པདྨ་དང་ཟླ་བའི་དཀྱིལ་འཁོར་གྱི་སྟེང་དུ་དྷཱིཿསེར་པོ་ལས་འོད་ཟེར་འཕྲོས་པས་བླ་མ་དང་བཅོམ་ལྡན་འདས་རིགས་གསུམ་གྱི་དཀྱིལ་འཁོར་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་མདུན་གྱི་ནམ་མཁར་ཨོཾ་བཛྲ་ས་མཱ་ཛཿཞེས་དང་རྡོ་རྗེ་བསྡུ་བའི་ཕྱག་རྒྱས་སྤྱན་དྲང་།  ཐལ་མོ་སྦྱར་ཏེ།  ན་མོ་གུ་རུ་བྷྱཿ  ན་མཿསརྦ་ཏ་ཐཱ་ག་ཏ་ཏྲི་ཀུ་ལ་ནཱ་ཐ་མཎྜལ་ས་པ་རི་ཝ་རེ་བྷྱཿཞེས་པས་ཕྱག་བྱ།  ཨོཾ་སརྦ་ཏ་ཐཱ་ག་ཏ་ཏྲི་ཀུ་ལ་ནཱ་ཐཱ་མཎྜལ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱ་ཧཱ།  ཞེས་སོགས་ནས་ཤབྡ་པྲ་ཏཱིཙྪ་སྭཱ་ཧཱ།  །ཞེས་པས་མཆོད།  དཀོན་མཆོག་གསུམ་ལ་བདག་སྐྱབས་མཆི།  །སྡིག་པ་ཐམས་ཅད་སོ་སོར་བཤགས།  །འགྲོ་བའི་དགེ་ལ་རྗེས་ཡི་རང་།  །སངས་རྒྱས་བྱང་ཆུབ་ཡིད་ཀྱིས་གཟུང་།  །སངས་རྒྱས་ཆོས་དང་ཚོགས་མཆོག་ལ།  །བྱང་ཆུབ་བར་དུ་སྐྱབས་སུ་མཆི།  །རང་གཞན་དོན་ནི་རབ་བསྒྲུབ་ཕྱིར།  །བྱང་ཆུབ་སེམས་ནི་བསྐྱེད་པར་བགྱི།  །བྱང་ཆུབ་མཆོག་གི་སེམས་ནི་བསྐྱེད་བགྱིས་ནས།  །སེམས་ཅན་ཐམས་ཅད་བདག་གིས་མགྲོན་དུ་གཉེར།  །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི།  །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག  །ཅེས་ལན་གསུམ་གྱིས་རྒྱུན་བཤགས་བྱ།  སེམས་ཅན་ཐམས་ཅད་བདེ་བ་དང་སོགས་ནས།  གནས་པར་གྱུར་ཅིག  །ཅེས་ཚད་མེད་པ་བཞི་བསྒོམ།  སྭ་བྷཱ་ཝས་ཆོས་ཐམས་ཅད་རང་བཞིན་གྱིས་མ་དམིགས་པའི་སྟོང་པར་བསམ།  སྟོང་པའི་ངང་ལས་པྃ་ལས་པདྨ་དང་རྃ་ལས་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་ཡིག་ལས་བྱུང་བའི་འོག་རྡོ་རྗེའི་ས་གཞི།  ཁོར་ཡུག་རྡོ་རྗེའི་ར་བ་དང་དྲྭ་བ།  །སྟེང་རྡོ་རྗེའི་གུར་དང་བླ་བྲེ།  ཕྱི་རོལ་ཐམས་ཅད་ཡེ་ཤེས་ཀྱི་མེ་འབར་བའི་སྲུང་པའི་འཁོར་ལོ་ཡངས་ཤིང་རྒྱ་ཆེ་བའི་ནང་དུ་པྃ་ལས་སྣ་ཚོགས་པདྨ་འདབ་མ་སུམ་ཅུ་རྩ་གཉིས་པའི་ལྟེ་བར་རྃ་ལས་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་ཡིག་ལས་བྱུང་བའི་སྣ་ཚོགས་རྡོ་རྗེ་ཤར་དཀར།  ལྷོ་སྔོ།  ནུབ་དམར།  བྱང་ལྗང་།  དབུས་སེར་བའི་ལྟེ་བར་བྷྲཱུྃཿལས་རིན་པོ་ཆེ་སྣ་ཚོགས་ལས་གྲུབ་པའི་ཐར་པ་ཆེན་པོའི་གཞལ་ཡས་ཁང་པ་གྲུ་བཞི་པ།  སྒོ་བཞི་པ།  ནང་ནས་རིམ་པ་བཞིན་དུ་སེར་དཀར་སྔོ་བའི་རྩིགས་པ་རིམ་པ་གསུམ་དང་ལྡན་པ།  དེའི་སྟེང་དུ་རིན་པོ་ཆེའི་ཕ་གུ་སེར་པོས་བསྐོར་བ།  དེའི་སྟེང་དུ་རིན་པོ་ཆེའི་བྲེ་ཕུལ་གྱི་སྟེང་དུ་གསེར་གྱི་སྐ་རགས་བཞིའི་ཕྱི་ངོས་སུ་ཆུ་སྲིན་གྱི་ཁ་ནས་བྱུང་པའི་དྲྭ་བ་དང་།  དྲྭ་བ་ཕྱེད་པ་དང་།  དྲིལ་བུ་དང་།  ཟླ་བ་རླུང་གིས་བསྐྱོད་པ་དང་།  མེ་ཏོག་གི་ཕྲེང་བ་དང་།  རྔ་ཡབ་ནོར་བུའི་ཡུ་བ་ཅན་འཕྱངས་པ།  དེའི་སྟེང་དུ་བྱ་འདབ་ལས་ཐུར་དུ་འཕྱངས་བའི་མདའ་ཡབ་དང་།  སྟེང་དུ་ལངས་པའི་རིན་པོ་ཆེའི་དྲྭ་མིག་སེང་མའི་པུ་ཤུས་བསྐོར་བ།  རྩིག་པའི་ཕྱི་རོལ་དུ་འདོད་ཡོན་གྱི་སྣམ་བུ་དམར་པོ་ལ་གནས་པའི་མཆོད་པའི་ལྷ་མོ་བཅུ་དྲུག་གིས་མཆོད་པ་བྱེད་པ།  སྒོ་དང་སྒོ་ཁྱུད་ཀྱི་མཚམས་དང་།  གྲྭ་བཞིར་ཟླ་བ་ཕྱེད་པ་ལ་གནས་པའི་རྡོ་རྗེས་མཚན་པ།  ནང་ཀ་བ་བརྒྱད་དང་ལྡན་པའི་སྟེང་རྡོ་རྗེའི་གདུང་ཟླུམ་པོ་དང་།  དེའི་སྟེང་རྡོ་རྗེའི་གདུང་བཞིས་མིག་མངས་རིས་སུ་བྲིས་ཤིང་མཛེས་པར་ཕུབ་པ།  དབུས་ཕྱུར་བུར་གྱུར་པའི་རྩེ་མོར་རྡོ་རྗེ་ཕྱེད་པ་དང་།  ནོར་བུ་རིན་པོ་ཆེའི་ཏོག་གིས་སྤྲས་པ།  སྒོ་བཞིའི་སྟེང་གི་ཐད་སོར་ཀ་བ་བཞི་བཞིས་བཏེག་པའི་རྟ་བབས་བང་རིམ་བཞི་དང་ལྡན་པའི་རྩེ་མོར་པདྨ་ལ་གནས་པའི་ཆོས་ཀྱི་འཁོར་ལོ་དང་།  གདུགས་དང་།  གཡས་གཡོན་དུ་རི་དྭགས་ཕོ་མོ་དང་བཅས་ཤིང་།  སྣམ་བུ་སོ་སོ་ལ་རྒྱལ་མཚན་དང་།  བ་དན་ལ་སོགས་པའི་རྒྱན་ཐམས་ཅད་ཀྱིས་བརྒྱན་པའི་གཞལ་ཡས་ཁང་གི་ལྷ་སྣམ་ཤར་དཀར།  ལྷོ་སྔོ།  ནུབ་དམར།  བྱང་ལྗང་།  དབུས་སེར་བ།  དེའི་དབུས་དང་ཕྱོགས་བཞིར་ཟླུམ་པོ་རེ་རེ།  དབུས་སུ་ཨ་ལས་ཟླ་བའི་དཀྱིལ་འཁོར།  བྱང་དུ་རྃ་ལས་ཉི་མའི་དཀྱིལ་འཁོར།  ཕྱོགས་གཞན་རྣམས་སུ་ཨ་ལས་ཟླ་བའི་དཀྱིལ་འཁོར་རེ་རེ།    ། ༈ དབུས་ཀྱི་གདན་གྱི་སྟེང་དུ་རང་གི་སེམས་ཀྱི་ངོ་བོ་དྷཱིཿལས་རལ་གྲི་དྷཱིཿས་མཚན་པ་ལས་འོད་ཟེར་འཕྲོས།  འཕགས་པ་མཆོད།  སེམས་ཅན་གྱི་དོན་བྱས་ཚུར་འདུས་ཡོངས་སུ་གྱུར་པ་ལས་བདག་ཉིད་བཅོམ་ལྡན་འདས་རྗེ་བཙུན་འཇམ་པའི་དབྱངས་སྐུ་མདོག་དམར་སེར་ཞལ་གཅིག་ཕྱག་གཉིས་པ།  གཡས་པས་ཤེས་རབ་ཀྱི་རལ་གྲི་ནམ་མཁའ་ལ་འཕྱར་ཞིང་།  གཡོན་པས་ཨུཏྤ་ལའི་ཡུ་བ་ཐུགས་ཀར་བཟུང་ཞིང་འདབ་མ་སྙན་གྱི་ཐད་ཀར་ཁ་བྱེ་བའི་སྟེང་དུ་ཤེས་རབ་ཀྱི་ཕ་རོལ་ཏུ་ཕྱིན་པའི་པུསྟི་འཛིན་པ།  གཞོན་ནུ་ལོ་བཅུ་དྲུག་ལོན་པའི་རྣམ་པ་ཅན་ཤིན་ཏུ་མཛེས་ཤིང་ཞལ་འཛུམ་བག་དང་བཅས་པ།  རལ་པའི་ཟུར་ཕུད་ལྔ་གཡོན་དུ་འཕྱང་བ།  རིན་པོ་ཆེའི་རྒྱན་བརྒྱད་ཀྱིས་སྤྲས་ཤིང་།  དར་སྣ་ཚོགས་ཀྱི་སྟོད་གཡོགས་དང་ཤམ་ཐབས་གསོལ་བ།  མཚན་དང་དཔེ་བྱད་ཀྱིས་བརྒྱན་པ།  ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ་ལྷོར་ཧྲཱིཿལས་པདྨ་ཧྲཱིཿས་མཚན་པ་ལས་འཕགས་པ་སྤྱན་རས་གཟིགས་སྐུ་མདོག་དཀར་པོ་ཞལ་གཅིག་ཕྱག་གཉིས་པ་གཡས་པས་མཆོག་སྦྱིན་དང་།  གཡོན་པས་པདྨ་དཀར་པོའི་ཡུ་བ་ཐུགས་ཀར་འཛིན་ཅིང་སྙན་གྱི་ཐད་ཀར་ཁ་བྱེ་བ།  ཞབས་གཡས་ཅུང་ཟད་བརྐྱངས་ཤིང་གཡོན་བསྐུམས་པའི་སྟབས་ཀྱིས་བཞུགས་པ།  བྱང་དུ་ཧཱུྃ་ལས་རྡོ་རྗེ་ཧཱུྃ་གིས་མཚན་པ་ལས་ཕྱག་ན་རྡོ་རྗེ་སྐུ་མདོག་སྔོན་པོ་ཞལ་གཅིག་ཕྱག་གཉིས་པ།  གཡས་པས་རྡོ་རྗེ་ཐུགས་ཀ་དང་།  གཡོན་པས་དྲིལ་བུ་དཀུར་བརྟེན་པ།  ཞབས་གཉིས་སེམས་དཔའི་སྐྱིལ་ཀྲུང་གིས་བཞུགས་པ།  གཉིས་ཀའང་རིན་པོ་ཆེའི་རྒྱན་དང་།  དར་སྣ་ཚོགས་ཀྱི་ན་བཟའ་ཅན།  །ཤར་ནུབ་ཏུ་རིན་པོ་ཆེའི་ཁྲིའི་སྟེང་དུ་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་རེ་བཞུགས་པར་བསམ་མོ།  །དེ་ནས་ཐལ་མོ་གཉིས་སྦྱར་བ་ལ་མཛུབ་མོ་གཉིས་ཅུང་ཟད་བཀུག་པ་མགོ་བོར་རེག་ཅིང་།  ཨོཾ་སརྦ་ཏ་ཐཱ་ག་ཏོཏྦྷ་ཝཱ་ཡ་སྭཱ་ཧཱ།  ཐལ་མོ་སྦྱར་བ་པདྨ་ཁ་བྱེ་བའི་ཚུལ་དུ་སྙིང་གར་རེག་ཅིང་།  ཨོཾ་པདྨོཏྦྷ་ཝཱ་ཡ་སྭཱ་ཧཱ།  ཐལ་མོ་གཉིས་རྒྱབ་སྦྱར་ལ་མཐེ་བོང་མཐེའུ་ཆུང་གཉིས་སྦྱར་ནས་ལྟེ་བར་རེག་ཅིང་།  ཨོཾ་བཛྲོཏྦྷ་ཝཱ་ཡ་སྭཱ་ཧཱ།  ཞེས་རིགས་གསུམ་གྱི་དམ་ཚིག་གི་སྔགས་རྒྱས་བྱིན་གྱིས་བརླབ་བོ།  །དེ་ནས་ལྷ་གསུམ་ལ་རིམ་བཞིན་དུ་རྣམ་སྣང་།  འོད་དཔག་མེད།  མི་བསྐྱོད་པ་རྣམས་ཀྱི་དབུ་རྒྱན་རང་ཆས་སུ་བཞུགས་པར་བསམ་མོ།  །རང་གི་སྙིང་ག་ནས་འོད་ཟེར་འཕྲོས་པས་རང་བཞིན་གྱི་གནས་ནས་རིགས་གསུམ་གྱི་རྟེན་དང་བརྟེན་པའི་དཀྱིལ་འཁོར་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་མདུན་གྱི་ནམ་མཁར་ཨོཾ་བཛྲ་ས་མཱ་ཛཿཞེས་དང་ཕྱག་རྒྱས་སྤྱན་དྲངས་པ་ལ།  ཨོཾ་པདྨ་ཀ་མ་ལཱ་ཡ་སྟྭཾ་གྱིས་གདན་དབུལ།  མཆོད་པ་གོང་ལྟར་བྱིན་གྱིས་བརླབ།  མཚན་སྔགས་རེ་རེ་སྦྱར་བའི་ཨརྒྷཾ་ནས་ཤབྡ་སྭཱ་ཧཱས་མཆོད།  །སྐུ་གསུང་ཐུགས་འཇམ་འགྲོ་བ་ཡོངས་ཀྱི་དཔལ།  །གཞོན་ནུའི་ཚུལ་འཛིན་ཡོན་ཏན་རྒྱས་པའི་སྐུ།  །དེ་ཕྱིར་འཇམ་དཔལ་གཞོན་ནུར་མཚན་གསོལ་པ།  །བློ་གྲོས་བསམ་མི་ཁྱབ་ལ་ཕྱག་འཚལ་ལོ།  །དུས་གསུམ་བདེ་བར་གཤེགས་པའི་ཡེ་ཤེས་སྐུ།  །འགྲོ་དྲུག་སེམས་ཅན་རྣམས་ལ་སྤྱན་རས་གཟིགས།  །ནམ་མཁའ་ལྟ་བུར་ཁྱབ་པའི་བཅུ་གཅིག་ཞལ།  །གཟི་བརྗིད་འོད་དཔག་མེད་ལ་ཕྱག་འཚལ་ལོ།  །ལྕང་ལོ་ཅན་གྱི་གནས་མཆོག་དམ་པ་ན།  །གསང་སྔགས་རིག་སྔགས་ཀུན་གྱི་བདག་པོ་སྟེ།  །ལོག་འདྲེན་བགེགས་ཀྱི་ཚོགས་རྣམས་འཇོམས་མཛད་པ།  །བཅོམ་ལྡན་རྡོ་རྗེ་བསྣམས་ལ་ཕྱག་འཚལ་ལོ།  །ཞེས་པས་བསྟོད།   བདག་མདུན་གཉིས་ཀའི་ཐུགས་ཀར་རང་རང་གི་གདན་གྱི་སྟེང་དུ་དྷཱིཿཧྲཱིཿཧཱུྃ་རྣམས་ལ་རང་རང་གི་སྔགས་ཀྱི་ཕྲེང་བས་བསྐོར་བར་གྱུར་པར་བསམ།  མདུན་གྱི་ལྷའི་ཐུགས་ཀ་ནས་སྔགས་ཕྲེང་འོད་ཟེར་དང་བཅས་པ་དཔག་ཏུ་མེད་པ་འཕྲོས།  འཕགས་པ་མཆོད།  སེམས་ཅན་གྱི་དོན་བྱས་སླར་འདུས་ཏེ་རང་གི་སྙིང་གའི་སྔགས་ཕྲེང་ལ་ཐིམ་པས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ།  འཕགས་པ་ཉན་ཐོས་དང་རང་སངས་རྒྱས།  དངོས་གྲུབ་བརྙེས་པའི་ལྷ་དང་ཀླུ་དང་དྲང་སྲོང་དང་།  གྲུབ་པ་དང་རིག་པ་འཛིན་པ་རྣམས་ཀྱི་མཁྱེན་བརྩེ་ནུས་མཐུའི་དངོས་གྲུབ་ཐམས་ཅད་སྩལ་ཞིང་རྒྱུད་བྱིན་གྱིས་བརླབས་པར་གྱུར་པར་བསམས་ཤིང་།  ཨོཾ་ཨ་ར་པ་ཙ་ན་དྷཱིཿ  ཨོཾ་མ་ཎི་པདྨེ་ཧཱུྃ།  ཨོཾ་བཛྲ་པཱ་ཎི་ཧཱུྃ།  ཞེས་གཙོ་བོ་ལ་འབྲུ་འབུམ་དང་།  འཁོར་ལ་དེའི་བཅུ་ཆ་བཟླ་བ་ནི་བསྙེན་པའོ།  །གཞན་ཐུན་རེ་རེའི་མཇུག་ཏུའང་མཆོད་བསྟོད་གོང་ལྟར་བྱས་ལ།  བཅོམ་ལྡན་འདས་བདག་དང་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ་ཞེས་གསོལ་བ་བཏབ།  ཨོཾ་བཛྲ་ས་ཏྭ་ས་མ་ཡ་ཞེས་སོགས་རྡོ་རྗེ་སེམས་དཔའི་ཡི་གེ་བརྒྱ་པ་ལན་གསུམ་གྱི་མཐར།  མ་འབྱོར་པ་དང་ཉམས་པ་དང་ཞེས་སོགས་ཀྱིས་ནོངས་པ་བཟོད་པར་གསོལ།  །ཨོཾ་བཛྲ་མུཿས་རྟེན་དང་བརྟེན་པར་བཅས་པའི་ཡེ་ཤེས་པ་རང་བཞིན་གྱི་གནས་སུ་གཤེགས་པར་བསམ།  རང་གི་སྙིང་གའི་ས་བོན་ལས་འོད་ཟེར་འཕྲོས་པས་འཁོར་དང་གདན་རང་ལ་ཐིམ་པས་རང་དམ་ཚིག་པའི་ང་རྒྱལ་གྱིས་འཁོད་པར་བསམས་ལ་དཀྱིལ་འཁོར་གྱི་ལས་རྣམས་བྱའོ།  །གཉིས་པ་ལ་བཞི་ལས།  སའི་ལྷ་མོ་སྟ་གོན་ནི།  མཆོད་པ་བྱིན་རླབས་བྱས་ནས།  ཚོམ་བུ་བསང་སྦྱང་།  སྟོང་པའི་ངང་ལས་པྃ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་པྃ་ལས་སའི་ལྷ་མོ་སྐུ་མདོག་སེར་མོ་ཞི་བའི་ཉམས་ཅན།  རིན་པོ་ཆེའི་རྒྱན་དང་དར་གྱི་ན་བཟའ་ཅན།  ཕྱག་གཉིས་ཀྱིས་རིན་པོ་ཆེའི་བུམ་པ་ཐུགས་ཀར་འཛིན་པ།  དེའི་དཔྲལ་བར་ཨོཾ་དཀར་པོ།  མགྲིན་པར་ཨཱཿདམར་པོ།  ཐུགས་ཀར་ཧཱུྃ་སྔོན་པོ།  རང་གི་ཐུགས་ཀའི་ས་བོན་ལས་འོད་ཟེར་འཕྲོས་པས་ས་འོག་ནས་སའི་ལྷ་མོ་འཁོར་དང་བཅས་པ་ཨོཾ་བཛྲ་ས་མཱ་ཛཿཞེས་པས་སྤྱན་དྲང་།  ཛཿཧཱུྃ་བྃ་ཧོཿས་གཉིས་སུ་མེད་པར་བསྟིམ།  དེ་ལ་ཨོཾ་པྲྀ་ཐི་ཝཱི་དེ་ཝཱི་རེ་རེ་སྔོན་དུ་སྦྱར་བའི་ཨརྒྷཾ་ཞེས་སོགས་ནས་རོལ་མོ་དང་བཅས་པས་མཆོད།  གཏོར་མ་ཆུ་གཙང་གིས་བྲན་ལ།  ཨོཾ་ཨ་ཀཱ་རོ་སོགས་ཀྱིས་བྱིན་གྱིས་བརླབས་ལ།  ཨོཾ་པྲྀ་ཐི་ཝཱི་དེ་ཝཱི་རེ་རེ་སྔོན་དུ་འགྲོ་བའི་ཨ་ཀཱ་རོ་བཏགས་པ་ལན་གསུམ་དང་།  མཆོག་སྦྱིན་གྱི་ཕྱག་རྒྱས་ཕུལ་ལ།  སྤོས་དང་བཅས་པའི་རྡོ་རྗེ་དྲིལ་བུ་འཛིན་པས།  སྐྱོབ་པ་སངས་རྒྱས་ཐམས་ཅད་ཀྱི།  །སྤྱོད་པའི་ཚུལ་དང་ཁྱད་པར་དང་།  །ས་དང་ཕ་རོལ་ཕྱིན་པ་ལ།  །ལྷ་མོ་ཁྱོད་ནི་དབང་དུ་གྱུར།  །ཤཱ་ཀྱ་སེང་གེ་སྐྱོབ་པ་ཡིས།  །ཇི་ལྟར་བདུད་ཀྱི་སྡེ་བཅོམ་པ།  །དེ་བཞིན་བདག་གིས་བདུད་སྡེ་ལས།  །རྒྱལ་བར་བྱས་ཏེ་དཀྱིལ་འཁོར་འབྲི།  །ཞེས་ལན་གསུམ་བརྗོད་པའི་མཐར།  དཔལ་ལྡན་བླ་མ་དམ་པ་རྣམས་ཀྱི་ཐུགས་དགོངས་རྫོགས་པ་སོགས་ནས་འཚལ་ན་སའི་ཕྱོགས་འདི་བདག་ལ་གནང་ཞིང་ལས་ཀྱི་དངོས་གྲུབ་སྩལ་དུ་གསོལ་ཞེས་མཁྱེན་པར་གསོལ་བས།  རིག་པ་འཛིན་པ་ཁྱོད་དཀྱིལ་འཁོར་གྱི་ལས་ཅི་བདེ་བར་གྱིས་ཤིག་ཅེས་གནང་བ་བྱིན་པར་བསམས་ལ།  ལག་པ་གཡས་ས་ལ་རེག་སྟེ།  ཨོཾ་བཛྲ་མུཿསའི་ལྷ་མོ་ས་དེ་ཉིད་ལ་ཐིམ་པར་བསམ་མོ།  །ལྷ་སྟ་གོན་ནི།  ཚོམ་བུ་བསང་སྦྱང་།  སྟོང་པའི་ངང་ལས་པྃ་ལས་པདྨ་དང་རྃ་ལས་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་ཡིག་ཅེས་སོགས་ནས་ཨ་ལས་ཟླ་བའི་དཀྱིལ་འཁོར་རེ་རེ་ཞེས་པའི་བར་གོང་ལྟར་བསྐྱེད།  ཨོཾ་དྷཱིཿམཉྫུ་གྷོ་ཥ་ནཱ་མ།  དབུས་ཀྱི་གདན་གྱི་སྟེང་དུ་བཅོམ་ལྡན་འདས་རྗེ་བཙུན་འཇམ་པའི་དབྱངས་སྐུ་མདོག་དམར་སེར་སོགས་དང་།  ཨོཾ་ཧྲཱིཿལོ་ཀི་ཤྭ་ར་ནཱ་མ།  ལྷོར་འཕགས་པ་སྤྱན་རས་གཟིགས་སྐུ་མདོག་དཀར་པོ་སོགས་དང་།  ཨོཾ་ཧཱུྃ་བཛྲ་པཱ་ཎི་ནཱ་མ།  བྱང་དུ་ཕྱག་ན་རྡོ་རྗེ་སྐུ་མདོག་སྔོན་པོ་སོགས་ནས་དར་སྣ་ཚོགས་ཀྱི་ན་བཟའ་ཅན།  ཤར་ནུབ་ཏུ་རིན་པོ་ཆེའི་ཁྲིའི་སྟེང་དུ་ཤེས་རབ་ཅེས་སོགས་ནས།  དམ་ཚིག་གི་སྔགས་རྒྱས་བྱིན་གྱིས་བརླབ་པའི་བར་བདག་བསྐྱེད་ལྟར་བསྐྱེད།  རང་གི་སྙིང་གའི་ས་བོན་ལས་འོད་ཟེར་འཕྲོས་པས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བཅོམ་ལྡན་འདས་རིགས་གསུམ་གྱི་དཀྱིལ་འཁོར་གྱི་ལྷ་ཚོགས་ཀྱི་རྣམ་པར་ཨོཾ་བཛྲ་ས་མ་ཛཿཞེས་དང་།  མ་ལུས་སེམས་ཅན་ཀུན་གྱི་མགོན་གྱུར་ཅིང་།  །བདུད་སྡེ་དཔུང་བཅས་མི་བཟད་འཇོམས་མཛད་ལྷ།  །དངོས་རྣམས་མ་ལུས་ཇི་བཞིན་མཁྱེན་གྱུར་པའི།  །བཅོམ་ལྡན་འཁོར་བཅས་འདིར་ནི་གཤེགས་སུ་གསོལ།  །བཅོམ་ལྡན་བསྐལ་པ་གྲངས་མེད་དུ་མ་རུ།  །འགྲོ་ལ་བརྩེ་ཕྱིར་ཐུགས་རྗེས་རྣམ་སྦྱངས་ཤིང་།  །སྨོན་ལམ་རྒྱ་ཆེན་དགོངས་པ་ཡོངས་རྫོགས་པའི།  །ཁྱེད་བཞེད་འགྲོ་དོན་མཛད་དུས་འདིར་ལགས་ན།  །དེ་ཕྱིར་ཆོས་དབྱིངས་ཕོ་བྲང་ལྷུན་གྲུབ་ནས།  །རྫུ་འཕྲུལ་བྱིན་རླབས་སྣ་ཚོགས་སྟོན་མཛད་ཅིང་།  །མཐའ་ཡས་སེམས་ཅན་ཚོགས་རྣམས་བསྒྲལ་བའི་ཕྱིར།  །ཡང་དག་འཁོར་དང་བཅས་རྣམས་གཤེགས་སུ་གསོལ།  །ཞེས་པ་ཙམ་མམ་སྤྲོ་ན། ཆོས་རྣམས་ཀུན་གྱི་དབང་ཕྱུག་སོགས་ཚིགས་བཅད་ལྷག་མ་རྣམས་དང་བཅས་པའི་མཐར།  ཨོཾ་སརྦ་ཏ་ཐཱ་ག་ཏ་ཏྲི་ཀུ་ལ་ནཱ་ཐ་མཎྜལ་ས་པ་རི་ཝཱ་ར་ཨེཧྱེ་ཧི་ཞེས་པས་ཡེ་ཤེས་པ་མདུན་གྱི་ནམ་མཁར་བྱོན་པར་བསམ།  བཅོམ་ལྡན་འདིར་ནི་བྱོན་པ་ལེགས།  །བདག་ཅག་བསོད་ནམས་སྐལ་པར་ལྡན།  བདག་གི་མཆོད་ཡོན་བཞེས་ནས་ཀྱང་།  །ཐུགས་ལ་དགོང་ཤིང་གནང་བར་མཛོད།  །ཨོཾ་སརྦ་ཏ་ཐཱ་ག་ཏ་པྲ་ཝ་ར་སཏྐ་ར་ཨརྒྷཾ་པྲ་ཏཱིཙྪ་སྭཱ་ཧཱ།  ཞེས་པས་མཆོད་ཡོན་ཕུལ།  ཇི་ལྟར་བལྟམས་པ་ཙམ་གྱིས་ནི།  །ལྷ་རྣམས་ཀྱིས་ནི་ཁྲུས་གསོལ་ལྟར།  །ལྷ་ཡི་ཆུ་ནི་དག་པ་ཡིས།  །དེ་བཞིན་བདག་གིས་སྐུ་ཁྲུས་གསོལ།  ཨོཾ་སརྦ་ཏ་ཐཱ་ག་ཏ་ཨབྷི་ཥེ་ཀ་ཏེ་ས་མ་ཡ་ཤྲི་ཡེ་ཧཱུྃ་ཞེས་པས་སྐུ་ཁྲུས་གསོལ།  བདག་དང་འགྲོ་ལ་ཐུགས་བརྩེའི་ཕྱིར།  །ཉིད་ཀྱི་རྫུ་འཕྲུལ་མཐུ་ཡིས་ནི།  །ཇི་སྲིད་མཆོད་པ་བདག་འབུལ་ན།  །དེ་སྲིད་བཅོམ་ལྡན་བཞུགས་སུ་གསོལ།  །ཨོཾ་པདྨ་ཀ་མ་ལཱ་ཡ་སྟྭཾ་གྱིས་གདན་ཕུལ།  ཨོཾ་སརྦ་ཏ་ཐཱ་ག་ཏ་ཏྲི་ཀུ་ལ་ནཱ་ཐཱ་མཎྜལ་ས་པ་རི་ཝཱ་ར་ཨརྒྷཾ་ནས་ཤཔྡའི་བར་གྱིས་མཆོད།  ཛཿཧཱུྃ་བྃ་ཧོཿས་དམ་ཚིག་པ་ལ་གཉིས་སུ་མེད་པར་བསྟིམ།  རྣམ་སྣང་།  འོད་དཔག་མེད།  མི་བསྐྱོད་པ་རྣམས་ཀྱི་དབུ་རྒྱན་རང་ཆས་སུ་བཞུགས་པར་བསམས་ལ།  རང་རང་གི་སྔགས་བདུན་བདུན་བཟླས་པས་བརྟན་པར་བྱ།  མཆོད་པ་བསང་སྦྱང་བྱིན་གྱིས་བརླབས་ལ་ཐལ་མོ་སྦྱར་ཏེ།  འཇིག་རྟེན་ཁམས་འདི་དཔག་མེད་ན།  །མཆོད་ཡོན་ཇི་སྙེད་ཡོད་པ་རྣམས།  །སངས་རྒྱས་སྲས་དང་བཅས་ལ་འབུལ།  །བཞེས་ནས་འགྲོ་བའི་དོན་ཀུན་མཛོད།  །ཨོཾ་སརྦ་ཏ་ཐཱ་ག་ཏ་ཏྲི་ཀུ་ལ་ནཱ་ཐ་མཎྜལ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱ་ཧཱ།  དེ་བཞིན་དུ་ཞབས་བསིལ་ནས་རོལ་མོའི་བར་དུ་འདོན་པ་བསྒྱུར་བ་ལ་སོ་སོའི་ཚིགས་བཅད་དང་སྔགས་དང་ཕྱག་རྒྱའི་མཐར་དྷརྨཱ་ར་ཎི་རོལ་ཆེན་དང་བཅས་པ་བྱ།  ༼ཀ༽  གོས་ཟུང་བསང་སྦྱང་བྱིན་གྱིས་བརླབས་ལ།  སྲབ་འཇམ་ཡང་པ་ལྷ་ཡི་གོས།  ཞེས་སོགས་ཀྱིས་ཕུལ།  རིན་ཆེན་སྣ་བདུན་འདོད་ཡོན་ལྔ་རྣམས་མཚན་སྔགས་འདོན་པ་བསྒྱུར་བས་མཆོད།  རྡོར་དྲིལ་འཛིན༼ཁ༽།   གོས་ཟུང་བསང་སྦྱང་།  སྟོང་པའི་ངང་ལས་ཧཱུྃ་ལས་བྱུང་བའི་ལྷ་རྫས་ལས་གྲུབ་པའི་གོས་སྲབ་པ།  འཇམ་པ།  ཡང་བ།  དྭངས་ཤིང་ཐོགས་པ་མེད་པ་ཟུང་དུ་སྦྱར་བ་དང་ལྡན་པར་གྱུར་ཅེས་དང་།  སྲབ་འཇམ་ཡང་བ་ལྷ་ཡི་གོས།  །མི་ཕྱེད་རྡོ་རྗེའི་སྐུ་ལ་གསོལ།  །མི་ཕྱེད་དད་པས་བདག་འབུལ་ན།  །བདག་ཀྱང་རྡོ་རྗེའི་སྐུ་ཐོབ་ཤོག  །ཨོཾ་སརྦ་ཏ་ཐཱ་ག་ཏ་ཏྲི་ཀུ་ལ་ནཱ་ཐ་མཎྜལ་ས་པ་རི་ཝཱ་ར་ཨོཾ་བཛྲ་ཝ་སྟྲ་ཡ་ཨཱཿཧཱུྃ།  ཞེས་པས་འབུལ་བའི་ཚུལ་བྱའོ།  །རྒྱལ་སྲིད་སྣ་བདུན་འབུལ་བ་ནི།  ཨོཾ་སརྦ་བིཏ་པཱུ་ར་པཱུ་ར།  སུ་ར་སུ་ར།  ཨཱ་བརྟ་ཡ་ཨཱ་བརྟ་ཡ་ཧོཿ  ཞེས་བརྗོད་ཅིང་།  བདེ་བར་གཤེགས་པ་ཐམས་ཅད་ལ།  །འཁོར་ལོ་རིན་ཆེན་འདི་ཕུལ་བས།  །སྲིད་པའི་འཁོར་ལོ་རྒྱུན་བཅད་དེ།  །ཆོས་ཀྱི་འཁོར་ལོ་བསྐོར་བར་ཤོག  །ཨོཾ་སརྦ་ཏ་ཐཱ་ག་ཏ་ཏྲི་ཀུ་ལ་ནཱ་ཐཱ་མཎྜལ་ས་པ་རི་ཝཱ་ར་ཙཀྲ་རཏྣ་པཱུ་ཛི་ཏེ་ཧཱུྃ།  རྒྱལ་བ་སྲས་དང་བཅས་རྣམས་ལ།  །ནོར་བུ་རིན་ཆེན་འདི་ཕུལ་བས།  །བཀྲེན་ཅིང་ཕོངས་པ་རྒྱུན་བཅད་དེ།  །འབྱོར་པ་ཕུན་སུམ་ཚོགས་པར་ཤོག  །མ་ཎི་རཏྣ།  བཙུན་མོ་རིན་ཆེན་འདི་ཕུལ་བས།  །མ་རིག་མུན་པ་རྒྱུན་བཅད་དེ།  །ཤེས་རབ་དབྱིངས་ཀྱི་དོན་རྟོགས་ནས།  །ཐབས་དང་ཤེས་རབ་འབྲེལ་བར་ཤོག  །ཝསྟི་རཏྣ༴  བློན་པོ་རིན་ཆེན༴  ཕྱི་ནང་གསང་གསུམ་ཐེག་གསུམ་ལྡན།  །བསམ་ཡས་བསྟན་པ་རབ་འཛིན་ཅིང་།  །ཡོན་ཏན་ཐམས་ཅད་ལྡན་པར་ཤོག  །མ་ཧཱ་ཏ་རཏྣ༴  གླང་པོ་རིན་ཆེན༴  ལྟ་ངན་རྣམས་ནི་རབ་བསལ་ནས།  །བླ་མེད་ཐེག་པར་རབ་ཞོན་ཏེ།  །ཐམས་ཅད་མཁྱེན་གྲོང་བགྲོད་པར་ཤོག  །ཧསྟི་རཏྣ༴  རྟ་མཆོག་རིན་ཆེན༴  སྲིད་པའི་གཟེབ་ལས་ངེས་གྲོལ་ཏེ།  །རྫུ་འཕྲུལ་མཆོག་གི་ཤུགས་ཐོབ་ནས།  །སངས་རྒྱས་ཞིང་དུ་འགྲོ་བར་ཤོག  །ཏུ་རཾ་ག  །དམག་དཔོན་རིན་ཆེན༴  ཉོན་མོངས་དགྲ་ལས་རྒྱལ་གྱུར་ནས།  །ཕས་ཀྱི་རྒོལ་བ་ཚར་བཅད་དེ།  །སྙེམས་བྲལ་མཆོག་ནི་ཐོབ་པར་ཤོག  །ཁངྒ་རཏྣ༴  ཞེས་བརྗོད་ཅིང་དབུལ༴  འདོད་ཡོན་ལྔ་འབུལ་བ་ནི།  ཁ་དོག་དབྱིབས་ལེགས་ཡིད་འོད་རྒྱན་ཕྲེང་ལྡན།  །ཕྱོགས་དུས་ཀུན་ན་གཟུགས་མཆོག་ཅི་མཆིས་པ།  །མོས་བློས་དཀྱིལ་འཁོར་ལྷ་ལ་བདག་འབུལ་གྱིས།  །བཞེས་ཤིག་བླ་མེད་གྲུབ་མཆོག་སྩལ་དུ་གསོལ།  །ཨོཾ་སརྦ་ཏ་ཐཱ་ག་ཏ་ཏྲི་ཀུ་ལ་ནཱ་ཐ་མཎྜལ་ས་པ་རི་ཝཱ་ར་རཱུ་པ་ཀཱ་མ་གུ་ཎ་པཱུ་ཛི་ཏེ་ཧཱུྃ།  དེ་བཞིན་དུ།  ཕྱོགས་དུས་ཀུན་ན་ཟིན་དང་མ་ཟིན་པའི།  །ཡོན་ཏན་ཚིག་མཆོག་སྒྲ་སྙན་ཅི་མཆིས་རྣམས།  །མོས་བློས་དཀྱིལ་འཁོར་ལྷ་ལ་བདག་འབུལ་གྱིས།  །བཞེས་ཤིག་བླ་མེད་གྲུབ་མཆོག་སྩལ་དུ་གསོལ།  ཤཔྡ༴  ཕྱོགས་དུས་ཀུན་ན་ཙནྡན་སྦྲུལ་སྙིང་དང་།  །ཨ་གར་ནག་སོགས་དབང་པོ་ཚིམ་བྱེད་རྣམས།  མོས་བློས་དཀྱིལ་འཁོར་ལྷ་ལ་བདག་འབུལ་གྱིས།  །བཞེས་ཤིག་བླ་མེད་གྲུབ་མཆོག་སྩལ་དུ་གསོལ།  གནྡྷེ༴  ཕྱོགས་དུས་ཀུན་ན་རོ་དང་བཅུད་ལྡན་པའི།  །ལུས་སེམས་རྟས་བྱེད་རོ་མཆོག་ཅི་མཆིས་རྣམས།  །མོས་བློས་དཀྱིལ་འཁོར་ལྷ་ལ་བདག་འབུལ་གྱིས།  །བཞེས་ཤིག་བླ་མེད་གྲུབ་མཆོག་སྩལ་དུ་གསོལ།  རཱ་ས༴  ཕྱོགས་དུས་ཀུན་ན་འཇམ་མཉེན་འཁྲིལ་ཆགས་པའི།  །རེག་བྱའི་ཁྱད་པར་ལུས་སེམས་ཚིམ་བྱེད་རྣམས།  །མོས་བློས་དཀྱིལ་འཁོར་ལྷ་ལ་བདག་འབུལ་གྱིས།  །བཞེས་ཤིག་བླ་མེད་གྲུབ་མཆོག་སྩལ་དུ་གསོལ།  །ཨོཾ་སརྦ་ཏ་ཐཱ་ག་ཏ་ཏྲི་ཀུ་ལ་ནཱ་ཐ་མཎྜ་ལ་ས་པ་རི་ཝཱ་ར་སྤཪྴེ་ཀཱ་མ་གུ་ཎ་པཱུ་ཛི་ཏེ་ཧཱུྃ།  ཞེས་པས་མཆོད་དོ།  །པས།  མགོན་པོ་ཐུགས་རྗེ་ཆེ་ལྡན་པ།  །ཐམས་ཅད་མཁྱེན་པ་སྟོན་པ་པོ།  །བསོད་ནམས་ཡོན་ཏན་རྒྱ་མཚོའི་ཞིང་།  །དེ་བཞིན་གཤེགས་ལ་ཕྱག་འཚལ་ལོ།  །དག་པ་འདོད་ཆགས་བྲལ་བའི་རྒྱུ།  །དགེ་བས་ངན་སོང་ལས་གྲོལ་ཞིང་།  །གཅིག་ཏུ་དོན་དམ་མཆོག་གྱུར་པའི།  །ཞི་གྱུར་ཆོས་ལ༴  གྲོལ་ནས་གྲོལ་བའི་ལམ་ཡང་སྟོན།  །བསླབ་པ་དག་ལ་རབ་ཏུ་གུས།  །ཞིང་གི་དམ་པ་ཡོན་ཏན་ཞིང་།  །དགེ་འདུན་ལ་ཡང་ཕྱག་འཚལ་ལོ།  །ཞེས་དང་།  སྐུ་གསུང་ཐུགས་འཇམ་འགྲོ་བ་ཡོངས་ཀྱི་དཔལ་སོགས་ཀྱིས་བསྟོད།  སྤོས་དང་རྡོར་དྲིལ་འཛིན་པས།  བཅོམ་ལྡན་འཇམ་པའི་རྡོ་རྗེ་མཆོག  བཅོམ་ལྡན་སྤྱན་རས་གཟིགས་དབང་རྒྱལ།  །བཅོམ་ལྡན་ཕྱག་ན་རྡོ་རྗེ་མགོན།  །རིག་སྔགས་རྒྱལ་ལ་ཕྱག་འཚལ་བསྟོད།  །དཀྱིལ་འཁོར་ཐུགས་རྗེའི་བདག་ཉིད་ཅན།  །མགོན་པོ་བདག་ནི་བྲི་བར་འཚལ།  །སློབ་མ་རྣམས་ལ་བརྩེ་བ་དང་།  །ཁྱེད་ལ་མཆོད་པར་བྱ་བའི་ཕྱིར།  །བཅོམ་ལྡན་བདག་ནི་གུས་པ་ལགས།  །དེ་བས་བཀའ་དྲིན་མཛད་པར་འོས།  །འགྲོ་བ་འཁོར་ལོའི་དོན་མཛད་པའི།  །སངས་རྒྱས་བདག་ལ་དགོངས་སུ་གསོལ།  །འབྲས་གནས་བྱང་ཆུབ་སེམས་དཔའ་དང་།  །སྔགས་ཀྱི་ལྷ་གཞན་གང་ལགས་དང་།  །འཇིག་རྟེན་སྐྱོང་བའི་ལྷ་རྣམས་དང་།  །གང་ཡང་འབྱུང་པོ་མཐུ་ཆེན་དང་།  །སངས་རྒྱས་བསྟན་ལ་དགའ་བ་དང་།  །གང་སུ་རྡོ་རྗེའི་སྤྱན་ལྡན་རྣམས།  །བདག་ལ་དགོངས་པར་མཛད་དུ་གསོལ།  །རིག་པ་འཛིན་པ་བདག་གིས་ནི།  །རིགས་གསུམ་ཞེས་བྱའི་དཀྱིལ་འཁོར་འདི།  །འགྲོ་བ་དག་ཕྱིར་བདག་འདྲི་བས།  བདག་དང་སློབ་མར་བཅས་པ་ལ།  །ཐུགས་རྗེས་ཐུགས་དཔག་མཛད་ནས་ཀྱང་།  །དཀྱིལ་འཁོར་པར་བཅས་ཐམས་ཅད་ཀྱི།  །ཐུགས་རྗེས་དགོངས་ཏེ་ཉེ་བར་མཛོད།  །ཅེས་ལན་གསུམ་གྱིས་སྙན་གསན་དབབ།  །རིག་པ་འཛིན་པ་ཁྱོད་གཞན་དོན་རྒྱ་ཆེ་བར་གྱིས་ཤིག  །ཅེས་གནང་བ་བྱིན་པར་བསམ་མོ།།  །།
བུམ་པ་སྟ་གོན་ནི།  བསང་སྦྱང་།  སྟོང་པའི་ངང་ལས་པྃ་ལས་པདྨ་དང་ཨ་ལས་ཟླ་བའི་དཀྱིལ་འཁོར་ལྔའི་སྟེང་དུ་པྃ་ལས་རིན་པོ་ཆེའི་བུམ་པ་ལྔ་ཡངས་ཤིང་རྒྱ་ཆེ་བ།  ལྟོ་བ་ལྡིར་བ།  ཞབས་ཞུམ་པ།  མགྲིན་པ་ཕྲ་བ།  ཁ་གཡེལ་བ།  མཆུ་འཕྱང་བ།  ལྷ་རྫས་ཀྱི་གོས་ཀྱིས་མགུལ་པ་བཅིངས་པ།  དཔག་བསམ་གྱི་ཤིང་གིས་ཁ་བརྒྱན་པ།  ནང་ཆུ་དང་བཅུད་སྣ་ཚོགས་ཀྱིས་ཡོངས་སུ་གང་བའི་རྣམ་རྒྱལ་བུམ་པ་དང་པོ་དང་གཉིས་པར་པདྨ་དང་ཟླ་བའི་གདན་རེ་རེ།  གསུམ་པ་དང་ལས་ཐམས་ཅད་པའི་བུམ་པར་པདྨ་དང་ཉི་མའི་གདན་རེ་རེ།  གདན་རྣམས་ཀྱི་སྟེང་དུ་རིམ་པ་བཞིན་དུ་སྐད་ཅིག་གིས་བཅོམ་ལྡན་འདས་རྗེ་བཙུན་འཇམ་པའི་དབྱངས་སྐུ་མདོག་དམར་སེར་སོགས་དང་།  གཉིས་པར་འཕགས་པ་སྤྱན་རས་གཟིགས་སྐུ་མདོག་སོགས་དང་།  གསུམ་པར་ཕྱག་ན་རྡོ་རྗེ་སྐུ་མདོག་སྔོན་པོ་ནས།  དར་སྣ་ཚོགས་ཀྱི་ན་བཟའ་ཅན་ཞེས་པའི་བར་གྱིས་བསྐྱེད།  ལས་ཐམས་ཅད་པའི་བུམ་པར་ཁྲོ་བོ་བདུད་རྩི་འཁྱིལ་པ་སྐུ་མདོག་སྔོན་པོ་ཞལ་གཅིག་ཕྱག་གཉིས་པ།  གཡས་པས་སྣ་ཚོགས་རྡོ་རྗེ་དང་།  གཡོན་དེས་ཡུ་བ་བྱས་པའི་དྲིལ་བུ་དཀུར་བརྟེན་པ།  ཅུང་ཟད་ཁྲོ་བ།  དར་དང་རིན་པོ་ཆེའི་རྒྱན་གྱིས་བརྒྱན་པ།  ཞབས་སེམས་དཔའི་སྐྱིལ་ཀྲུང་གིས་བཞུགས་པ།  དེ་དག་ཐམས་ཅད་ཀྱི་དཔྲལ་བར་ཨོཾ་དཀར་པོ།  མགྲིན་པར་ཨཱཿདམར་པོ།  ཐུགས་ཀར་ཧཱུྃ་སྔོན་པོ་རྣམས་ཀྱིས་མཚན་པར་བསམས་ལ་བྱིན་གྱིས་བརླབ།  རང་གི་སྙིང་ག་ནས་སྔགས་ཀྱི་ཕྲེང་བ་གཟུངས་ཐག་ལ་བརྟེན་ཏེ་སོང་བས་བུམ་ནང་གི་ལྷ་རྣམས་ལ་ཕོག་པས།  དེ་ཐམས་ཅད་ཀྱི་ཐུགས་ཀར་གདན་གྱི་སྟེང་དུ་སྔགས་ཀྱི་ཕྲེང་བས་མཚན་པ་ལས་འོད་ཟེར་འཕྲོས།  དེ་བཞིན་གཤེགས་པ་ཐམས་ཅད་ཀྱི་བདུད་རྩི་སྤྱན་དྲངས།  སྔགས་ཕྲེང་ལ་ཐིམ།  དེ་ལས་བདུད་རྩིའི་ཆུ་རྒྱུན་བྱུང་བས་བུམ་པ་གང་བར་བསམས་ལ།  གཟུངས་ཐག་ནས་བཟུང་སྟེ།  ལྷ་གསུམ་གྱི་སྔགས་བརྒྱ་རྩ་རེ་དང་།  ལས་བུམ་དུ།  ཨོཾ་ཨ་མྲྀ་ཏེ་ཧཱུྃ་ཕཊ་བརྒྱ་རྩ་དང་།  ཨ་བྷི་ཥེ་ཀ་ཏ་ཅི་ནུས་བཟླ།  འཇུག་སྒོའི་བུམ་པ་ལ་ལྷ་བསྐྱེད་པ་མ་བཤད་པས་ལྷ་གསུམ་གྱི་སྔགས་བརྒྱ་རྩ་རེ་བཟླས་པས་ཆུ་ནུས་ལྡན་དུ་བསམ་མོ།  །ཐུན་མོང་དུ་མཚན་སྔགས་རེ་རེ་སྦྱར་བའི་ཨརྒྷཾ་ནས་ཤབྡ་རོལ་མོ་དང་བཅས་པས་མཆོད།  ལྷ་གསུམ་གྱི་བསྟོད་པ་སྔར་བཞིན་དང་།  བདུད་རྩི་འཁྱིལ་པ་ལ།  འཇིགས་པའི་ཧཱུྃ་སྒྲ་ངེས་སྒྲོགས་ཤིང་།  །བགེགས་རྣམས་མ་ལུས་འཇོམས་མཛད་པ།  །དངོས་གྲུབ་མ་ལུས་སྩོལ་བའི་ལྷ།  །བགེགས་ཀྱི་དགྲ་ལ་ཕྱག་འཚལ་བསྟོད།  །ཅེས་པས་བསྟོད།  བཅོམ་ལྡན་འདས་བདག་དང་སོགས་ཀྱིས་འདོད་དོན་ཞུས་ཏེ་རྡོ་རྗེ་སེམས་དཔའི་ཡི་གེ་བརྒྱ་པའི་མཐར།  མ་འབྱོར་པ་དང་ཞེས་སོགས་ཀྱིས་བཟོད་པར་གསོལ།  དུང་ཆོས་ཀྱི་ཆུ་གོང་བུམ་མ་གཏོགས་པ་གཞན་མ་རྣམས་སུ་བླུགས་ཏེ།  ཨོཾ་ཨཱཿཧཱུྃ་མཆོད་ཡོན་ཕུལ་བའི་རྐྱེན་གྱིས་ལྷ་རྣམས་འོད་དུ་ཞུ་བ་ལས་བྱུང་བའི་བུམ་པའི་ཆུ་ནུས་པ་དང་ལྡན་པར་བསམ།  གཏོར་མ་རྣམས་ཆུ་གཙང་གིས་བྲན་ལ།  ཨོཾ་ཨཱ་མྲྀ་ཏས་བསང་།  སྭ་བྷཱ་ཝས་སྦྱང་།  རྡོ་རྗེ་བསྡམས་པ་བསྐྱོད་པའི་ཕྱག་རྒྱ་དང་བཅས་ཨ་ཀཱ་རོ་ལན་གསུམ་གྱིས་བརླབ།  སྟ་གོན་གྱི་ལྷ་ལ།  ཨོཾ་ཨ་ར་པ་ཙ་ན་སོགས་ལྷ་སྔགས་གསུམ་སྦྲེལ་བའི་མཐར་ཨ་ཀཱ་རོ་བཏགས་པ་ལན་གསུམ་གྱིས་ཕུལ།  ཨོཾ་སརྦ་ཏ་ཐཱ་ག་ཏ་ཏྲི་ཀུ་ལ་ནཱ་ཐ་མཎྜ་ལ་ས་པ་རི་ཝཱ་ར་ཨརྒྷཾ་ནས།  ཤབྡ་པྲ་ཏཱིཙྪ་སྭཱ་ཧཱའི་བར་གྱིས་མཆོད།  སྐུ་གསུང་ཐུགས་འཇམ་སོགས་ཀྱིས་བསྟོད།  བཅོམ་ལྡན་འདས་བདག་དང་སེམས་ཅན་ཐམས་ཅད་སོགས་ཀྱིས་གསོལ་བ་གདབ་བོ།  །སྒོས་ཀྱི་སྲུང་མ་ལ་ཨོཾ་ཨ་ཀཱ་རོ་སོགས་ཀྱིས་བྱིན་རླབས་དྲན་པར་བྱས་ནས།  རང་གི་སྙིང་ག་ནས་འོད་ཟེར་འཕྲོས་པས་དཔལ་རྡོ་རྗེ་ནག་པོ་ཆེན་པོ་འཁོར་དང་བཅས་པ་ཨོཾ་ཨེ་ཧྱེ་ཧི་མ་ཧཱ་ཀཱ་ལ་ས་པ་རི་ཝཱ་ར་ཨོཾ་བཛྲ་ས་མཱ་ཛཿ  ཞེས་པས་སྤྱན་དྲངས་པ་དཀྱིལ་འཁོར་གྱི་མཐར་བཞུགས་ནས་གཏོར་མ་གསོལ་བར་བསམས་ལ།  ཨོཾ་ཤྲཱི་མ་ཧཱ་ཀཱ་ལ་ས་པ་རི་ཝཱ་ར་ན་མཿསརྦ་ཏ་ཐཱ་ག་ཏེ་བྷྱོཿཞེས་སོགས་ནམ་མཁའ་མཛོད་ཀྱི་སྔགས་རྒྱ་ལན་གསུམ་གྱིས་ཕུལ།  ཨོཾ་ཤྲཱི་མ་ཧཱ་ཀཱ་ལ་ས་པ་རི་ཝཱ་ར་ཨརྒྷཾ་སོགས་ཀྱིས་མཆོད།  དཔལ་ལྡན་མཁའ་འགྲོའི་དབང་ཕྱུག་རྡོ་རྗེ་གུར།  །ཁྱབ་བདག་སྟོན་པ་ཀྱེ་ཡི་རྡོ་རྗེ་ཡི།  །སྐུ་གསུང་ཐུགས་ལས་སྤྲུལ་པའི་སྲུང་མ་མཆོག  །ནག་པོ་ཆེན་པོ་ཁྱོད་ལ་ཕྱག་འཚལ་ལོ།  །ཞེས་པས་བསྟོད།  ནག་པོ་ཆེན་པོ་འཁོར་བཅས་རྣམས།  །མཆོད་སྦྱིན་གཏོར་མ་འདི་བཞེས་ལ།  ཞེས་སོགས་ཀྱིས་ཕྲིན་ལས་བཅོལ།  དེ་ནས་ཆ་གསུམ་གཏོར་མ་ལ་ཆབ་ཀྱིས་བྲན་ཏེ།  བསང་སྦྱང་།  སྟོང་པའི་ངང་ལས་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨོཾ་ཞུ་བ་ལས་བྱུང་བའི་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པ་བདུད་རྩིའི་རྒྱ་མཚོ་ཆེན་པོར་གྱུར།  ཨོཾ་ཨཱཿཧཱུྃ་ལན་གསུམ་གྱིས་བརླབ།  རང་གི་སྙིང་ག་ནས་སོགས་ཆ་གསུམ་གྱི་ཆོ་ག་སྤྱི་ལྟར་ལ།  འབྱུང་པོའི་མགོར་ཨོཾ་ཨཱཿཧཱུྃ་གསུམ་དང་།  བདེན་བདར་གྱི་མགོར་ཨ་མྲྀ་ཏེ་བཟླའོ།  །སློབ་མར་སྟ་གོན་ནི།  དེ་ནས་དཀྱིལ་འཁོར་ཡོལ་བས་བཅད་ནས་མཚན་ཉིད་དང་ལྡན་པའི་སློབ་མ་གཅིག་ནས་ཉི་ཤུ་རྩ་ལྔའི་བར་ཁ་ཡར་བ་རྣམས་ཁྲུས་བྱས་གྲལ་ལ་འཁོད་པ་ལ།  མེ་ཏོག་བཀྱེ་བསྡུ་གྲུབ་ནས།  སེམས་བསྐྱེད་གསལ་བཏབ།  དེ་ལ་འདིར་རང་རེ་རྣམས་ཀྱི་སྟོན་པ་ཚད་མེད་པའི་སྙིང་རྗེ་ཆེན་པོ་དང་ལྡན་པ་ཐུབ་པའི་དབང་པོ་དེ་ཉིད་ཀྱིས་གདུལ་བྱ་རྣམས་ཀྱི་བསམ་པ་དང་མཐུན་པར་ཆོས་ཀྱི་རྣམ་གྲངས་བསམ་གྱིས་མི་ཁྱབ་པ་ཞིག་གསུངས་པ་རྣམས་ཕྱོགས་རིས་སུ་བསྡུ་ན་ཐེག་པ་ཆུང་ངུ་དང་ཆེན་པོ་གཉིས་སུ་འདུ་ལ།  ཐེག་པ་ཆེན་པོ་ལའང་ཕ་རོལ་ཏུ་ཕྱིན་པའི་སྡེ་སྣོད་དང་།  རིག་པ་འཛིན་པ་སྔགས་ཀྱི་སྡེ་སྣོད་གཉིས་ལས།  འདིར་རིག་སྔགས་འཆང་བའི་སྡེ་སྣོད་ཐམས་ཅད་ཀྱི་རྩ་བར་གྱུར་པ་བྱ་བའི་རྒྱུད་ཡིན།  དེ་ལ་བྱ་བ་སྤྱིའི་རྒྱུད་དང་།  སོ་སོའི་རྒྱུད་གཉིས་ལས།  བྱ་བ་སྤྱིའི་རྒྱུད་ཡིན།  དེ་ལ་སྤྱོད་པ་བཞི་པའི་དོན་འདུས་ཤིང་མ་ཚང་བ་མེད་པར་སྟོན་པ་དཔུང་པ་བཟང་པོའི་རྒྱུད།  འཇུག་པའི་སྤྱོད་པ་སྨིན་བྱེད་གཙོ་བོར་སྟོན་པ་གསང་བ་སྤྱིའི་རྒྱུད།  སྦྱོར་པའི་སྤྱོད་པ་ལྷའི་རྣལ་འབྱོར་གཙོ་བོར་སྟོན་པ་ལེགས་པར་གྲུབ་པའི་རྒྱུད།  སྒྲུབ་པའི་སྤྱོད་པ་མཚན་མེད་ཀྱི་རྣལ་འབྱོར་གཙོ་བོར་སྟོན་པ་བསམ་གཏན་ཕྱི་མའི་རྒྱུད་དེ་བཞི་ཡོད་པའི་དཀྱིལ་འཁོར་ཆེན་པོ་བཀོད་པའི་རྒྱུད་དམ།  གསང་བ་སྤྱི་རྒྱུད་ཀྱི་རྗེས་སུ་འབྲངས་ནས་གྲུབ་པའི་དབང་ཕྱུག་ཆེན་པོ་ཁ་ཆེ་ཡེ་ཤེས་རྡོ་རྗེས་ཆོ་གའི་ཡན་ལག་འགའ་ཞིག་སྤྱོད་རྒྱུད་དང་མཐུན་པར་བཀྲལ་བའི་བཅོམ་ལྡན་འདས་རིགས་གསུམ་སྤྱིའི་དཀྱིལ་འཁོར་དུ་མངོན་པར་དབང་བསྐུར་བ་བསྒྲུབ་པ་ལ།  སྟ་གོན་དུ་གནས་པ་དང་།  དངོས་གཞིའི་དབང་བསྐུར་བ་གཉིས་ཀྱི་དང་པོ་ལ་བཞི་ཡོད་པ་ལས།  དང་པོ་གསུམ་པོ་སྔོན་དུ་སློབ་དཔོན་གྱིས་གྲུབ་པར་བྱས་ཟིན་ནས།  ད་ཁྱེད་རང་གི་ངོ་སྐལ་དུ་གྱུར་པ་སློབ་མ་སྟ་གོན་གྱི་སྐབས་སུ་བབས་པ་ཡིན།  དེ་ལ་ཆོས་བཅུ་གསུམ་ཡོད་པ་ལས།  དང་པོ་ལུས་ཀྱི་བྱ་བ་ཁྲུས་བྱས།  ཕྱག་དང་འཇུག་པའི་ཡོན་ཕུལ་ནས།  རང་རང་གི་གྲལ་ལ་སྙིམ་པ་མེ་ཏོག་དང་བཅས་པས་འཁོད་དེ།  སློབ་དཔོན་ལ་རྗེ་བཙུན་འཇམ་པའི་དབྱངས་དངོས་ཡིན་སྙམ་པའི་མོས་གུས་དང་ལྡན་པས་སྟ་གོན་གྱི་ཆོས་རྣམས་ཞུ་བའི་ཡོན་དུ་མཎྜལ་ཕུལ་མཛོད།  གཉིས་པ་མྱ་ངན་ལས་འདའ་བའི་བསམ་པ་བརྟན་པོ་བསྐྱེད་དུ་གཞུག་པ་ནི།  སྔགས་ཀྱི་དངོས་གྲུབ་དོན་གཉེར་གང་།  །དཀྱིལ་འཁོར་འདིར་ནི་གཞུག་པར་བྱ།  །བསོད་ནམས་འདོད་པས་དེ་ལས་གཞན།  །བདག་གཞན་འཇིག་རྟེན་ཕ་རོལ་གཉེར།  །དད་པ་ཆེན་པོས་ལྡན་པ་དག །འཇིག་རྟེན་ཕ་རོལ་ལ་དམིགས་ནས།  །བློ་ལྡན་དཀྱིལ་འཁོར་གཞུག་བྱ་སྟེ།  །འདི་ཡི་འབྲས་བུ་གཉེར་མི་བྱ།  །གལ་ཏེ་འདི་འབྲས་དོན་གཉེར་ན།  །འཇིག་རྟེན་ཕ་རོལ་འགྲུབ་མི་འགྱུར།  །འཇིག་རྟེན་ཕ་རོལ་ལ་དམིགས་ན།  །འབད་པ་མེད་པར་འདི་འབྲས་འགྲུབ།  །ཅེས་གསུངས་ཏེ།  དེའི་དོན་ནི།  དཀྱིལ་འཁོར་དུ་ཞུགས་པའི་སྐབས་ཀྱི་དོན་ནི་ཚེ་འདིར་ཚེ་རིང་བ་དང་།  ཕྱི་མར་ལྷ་མིའི་གོ་འཕང་ཙམ་དང་།  འཁོར་བ་སྤངས་པའི་ཉན་རང་ཙམ་དོན་དུ་གཉེར་བའི་སྒོ་ནས་མ་ཡིན་པར་གཞན་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ་བའི་སླད་དུ་དཀྱིལ་འཁོར་འདིར་ཞུགས་ལ་དབང་བླངས་ཏེ་དམ་ཚིག་ལ་སྲུང་སྡོམ་བགྱི་སྙམ་པ་མཛོད།  བསམ་པ་དེ་ལྟ་བུ་ཞིག་སྐྱེས་ན་ཚེ་འདིའི་ནད་གདོན་ཞི་བ་དང་ཕྱི་མར་ལྷ་མིའི་གོ་འཕང་ཡང་ཞར་བྱུང་དུ་འབྱུང་བ་ཡིན་ནོ།  །གསུམ་པ་ཁྱད་པར་ཅན་གྱི་དོན་ཞུ་བའི་སླད་དུ་བླ་མ་དང་རྗེ་བཙུན་འཇམ་པའི་དབྱངས་གཉིས་སུ་མེད་པར་བཞུགས་པ་ལ་སྐྱབས་སུ་འགྲོ་བ་དང་།  སེམས་བསྐྱེད་པ་དང་།  རིག་འཛིན་སྔགས་ཀྱི་དམ་ཚིག་རྣམས་ཀྱང་སྩལ་དུ་གསོལ་སྙམ་པས་སྙིམ་པ་མེ་ཏོག་དང་བཅས་པས་ཐལ་མོ་སྦྱར་ཏེ་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད།  དགའ་ཆེན་ཁྱོད་བདག་སྟོན་པ་སྟེ།  །སློབ་དཔོན་ཁྱོད་ནི་དགོངས་སུ་གསོལ།  །བྱང་ཆུབ་ཆེན་པོའི་ཚུལ་བསྟན་པ།  །མགོན་པོ་ཆེན་པོ་བདག་འཚལ་ལོ།  །དམ་ཚིག་དེ་ཉིད་བདག་ལ་སྩོལ།  །བྱང་ཆུབ་སེམས་ཀྱང་བདག་ལ་སྩོལ།  །སངས་རྒྱས་ཆོས་དང་དགེ་འདུན་ཏེ།  །སྐྱབས་གསུམ་དག་ཀྱང་བདག་ལ་སྩོལ།  །ཐར་པ་ཆེན་པོའི་གྲོང་མཆོག་ཏུ།  །མགོན་པོས་བདག་ནི་གཞུག་ཏུ་གསོལ།  །ཞེས་གསོལ་བ་བཏབ་ནས།  བཞི་པ་རྡོ་རྗེ་ཐེག་པའི་ལམ་ལ་སྤྲོ་བ་བསྐྱེད་པ་འདི་ལ་གསན་པས་ཁྱབ་པར་གདའ་སྟེ།  བུ་ཚུར་ཐེག་པ་ཆེན་པོ་ཡི།  །ཁྱོད་ནི་ཚུལ་ཆེན་སྣོད་ཡིན་ཏེ།  །གསང་སྔགས་སྤྱོད་ཚུལ་ཆོ་ག་ནི།  །ཁྱོད་ལ་ཡང་དག་བསྟན་པར་བྱ།  །རྫོགས་པའི་སངས་རྒྱས་གང་འདས་དང་།  །དེ་བཞིན་གང་དག་མ་བྱོན་དང་།  །ད་ལྟར་བྱུང་བའི་རྫོགས་སངས་རྒྱས།  །འགྲོ་ལ་ཕན་ཕྱིར་བཞུགས་པ་ཀུན།  །དེ་དག་ཀུན་གྱིས་གསང་སྔགས་ཀྱི།  །ཆོ་ག་བཟང་པོ་འདི་མཁྱེན་ནས།  །དཔའ་བོས་བྱང་ཆུབ་ཤིང་དྲུང་དུ།  །ཐམས་ཅད་མཁྱེན་པ་ཚད་མེད་བརྙེས།  །གསང་སྔགས་སྦྱོར་བ་མཉམ་མེད་དེ།  །ཤཱཀྱ་སེང་གེ་སྐྱོབ་པ་ཡིས།  །དྲག་པོ་ཆེན་པོ་བདུད་ཀྱི་སྡེ།  །སྟོབས་ཆེན་དག་ཀྱང་དེས་བཅོམ་སྟེ།  །འཇིག་རྟེན་མཐུན་པར་གཤེགས་ནས་ནི།  །འཁོར་ལོ་བསྐོར་ནས་མྱ་ངན་འདས།  །དེ་བས་ཀུན་མཁྱེན་ཐོབ་བྱའི་ཕྱིར།  །བུ་ཡི་བློ་གྲོས་འདི་གྱིས་ཤིག  །ཅེས་གསུངས་ཏེ།  དེའི་དོན་ནི།  དེ་ལ་བུ་ཞེས་ཉེ་ཚིག་གིས་བོས་ཏེ།  ཁྱེད་རྣམས་ཆེན་པོ་བདུན་དང་ལྡན་པའི་ཐེག་ཆེན་གྱི་ཆོས་ཀྱི་སྣོད་ཡིན་ལ།  ཐེག་ཆེན་ལའང་རྒྱུ་འབྲས་གཉིས་ལས།  མཆོག་ཏུ་གྱུར་པ་རྡོ་རྗེ་ཐེག་པ་ཁོ་བོས་ཁྱོད་ལ་བསྟན་པར་བྱ་སྟེ།  རྡོ་རྗེ་ཐེག་པ་འདི་ནི་སྤྱིར་དུས་གསུམ་གྱི་སངས་རྒྱས་ཐམས་ཅད་ཀྱི་བགྲོད་པ་གཅིག་པའི་ལམ་ཡིན་ཞིང་།  ཁྱད་པར་དུའང་འོ་སྐོལ་རྣམས་ཀྱི་སྟོན་པ་ཤཱཀྱའི་རྒྱལ་པོ་འདི་བསྐལ་པ་དཔག་ཏུ་མེད་པའི་སྔོན་རོལ་དུ་སྔགས་ཀྱི་ལམ་ལ་བརྟེན་ནས་བདུད་བཏུལ་ཞིང་འོག་མིན་ཏུ་སངས་རྒྱས་སུ་ཟིན་ཀྱང་།  འཇིག་རྟེན་པ་རྣམས་དྲང་བའི་ཕྱིར་དུ་སངས་རྒྱ་བའི་ཚུལ་བསྟན་པ་ཡིན་པས།  ཆོས་ཀྱི་བུར་གྱུར་པ་ཁྱེད་སྔགས་ཀྱི་ཐེག་པ་ལས་བློ་གྲོས་གཞན་དུ་མི་འགྱུར་བར་གྱིས་ཤིག་ཅེས་པའི་དོན་ཡིན།  ལྔ་པ་རྒྱུན་བཤགས་སྔོན་དུ་འགྲོ་བའི་སེམས་བསྐྱེད་པའི་སླད་དུ་དམིགས་པ་འདི་བཞིན་མཛོད།  མདུན་གྱི་ནམ་མཁར་བླ་མ་དང་གཉིས་སུ་མེད་པའི་རིགས་གསུམ་སྤྱིའི་དཀྱིལ་འཁོར་ལ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བསྐོར་བ་མངོན་སུམ་བཞིན་དུ་བཞུགས་པར་མོས་པ་བྱས།  དེ་དག་གི་སྤྱན་སྔར་ཡན་ལག་བདུན་པ་བྱ་བའི་སླད་དུ་བདག་དང་མཐའ་ཡས་པའི་སེམས་ཅན་ཐམས་ཅད་ཀྱིས་ཚེ་ཐོག་མ་མེད་པ་ནས་བསགས་པའི་སྡིག་པ་ཐམས་ཅད་སྟོབས་བཞི་ཚང་བའི་སྒོ་ནས་བཤགས་པར་བགྱིའོ་སྙམ་པས་འདིའི་རྗེས་ཟློས་ལན་གསུམ་མཛོད།  ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་།  སློབ་དཔོན་བདག་ལ་དགོངས་སུ་གསོལ།  བདག་མིང་འདི་ཞེས་བགྱི་བས་ཐོག་མ་མེད་པ་ནས་ད་ལྟའི་བར་དུ།  འདོད་ཆགས་དང་།  ཞེ་སྡང་དང་།  གཏི་མུག་གི་དབང་གིས་ལུས་ངག་ཡིད་གསུམ་གྱི་སྒོ་ནས།  སྡིག་པ་མི་དགེ་བའི་ལས་བགྱིས་པ་དང་།  བགྱིད་དུ་སྩལ་བ་དང་།  བགྱིས་པ་ལ་རྗེས་སུ་ཡི་རང་བར་བགྱིས་པ་དེ་དག་ཐམས་ཅད་སོ་སོར་བཤགས་ཤིང་ཡང་མི་བགྱིད་དོ་ཞེས་ལན་གསུམ།  འཁོར་འདས་ཀུན་གྱིས་དུས་གསུམ་དུ་བསགས་པའི་དགེ་རྩ་ལ་དགའ་ཞིང་ཕྲག་དོག་མེད་པར་རྗེས་སུ་ཡི་རང་བར་བགྱིའོ་སྙམ་པས་འདིའི་རྗེས་ཟློས་མཛོད།  ཕྱོགས་བཅུ་ན་བཞུགས་པའི་ནས་དགོངས་སུ་གསོལ།  བདག་མིང་འདི་ཞེས་བགྱི་བས་སོ་སོའི་སྐྱེ་བོ་དང་།  །འཕགས་པ་ཉན་ཐོས་དང་།  རང་སངས་རྒྱས་དང་།  བྱང་ཆུབ་སེམས་དཔའ་དང་།  བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་དགེ་བ་དེ་དག་ལ་དགའ་ཞིང་རྗེས་སུ་ཡི་རང་བར་བགྱིའོ་ལན་གསུམ།  ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་སངས་རྒྱས་ལ་སོགས་པ་ཆོས་ཀྱི་འཁོར་ལོ་བསྐོར་བར་མི་མཛད་པ་དེ་དག་ལ།  སེམས་ཅན་གྱི་དོན་དུ་ཆོས་ཀྱི་འཁོར་ལོ་བསྐོར་བར་གསོལ་བ་གདབ་པར་བགྱིའོ་སྙམ་པས་འདིའི་རྗེས་ཟློས་མཛོད།  ཕྱོགས་བཅུ་ན་བཞུགས་པའི་ནས་དགོངས་སུ་གསོལ།  བདག་མིང་འདི་ཞེས་བགྱི་བས།  གང་དག་ཕྱོགས་བཅུའི་འཇིག་རྟེན་གྱི་ཁམས་ན་སངས་རྒྱས་བཅོམ་ལྡན་འདས་ལྷ་དང་མི་རྣམས་ཀྱི་སྟོན་པ་སྲས་དང་བཅས་པ་ཆོས་ཀྱི་འཁོར་ལོ་བསྐོར་བར་མི་མཛད་པ་དེ་དག་ལ།  སེམས་ཅན་ཐམས་ཅད་ཀྱི་དོན་དུ་ཆོས་ཀྱི་འཁོར་ལོ་བསྐོར་བར་གསོལ་བ་འདེབས་སོ་གསུམ།  ཕྱོགས་བཅུའི་འཇིག་རྟེན་གྱི་ཁམས་ན་སངས་རྒྱས་ཡོངས་སུ་མྱ་ངན་ལས་འདའ་བར་བཞེད་པ་དེ་དག་མྱ་ངན་ལས་མི་འདའ་བར་གསོལ་བ་འདེབས་སོ་སྙམ་པས་འདིའི་རྗེས་ཟློས་མཛོད།  དགོངས་གསོལ་དང་།  བདག་མིང་འདི་ཞེས་བགྱི་བས།  གང་དག་ཕྱོགས་བཅུའི་འཇིག་རྟེན་གྱི་ཁམས་ན་ཡང་དག་པར་རྫོགས་པའི་སངས་རྒྱས་ཡོངས་སུ་མྱ་ངན་ལས་འདའ་བར་བཞེད་པ་དེ་དག་ཡོངས་སུ་མྱ་ངན་ལས་མི་འདའ་བར་གསོལ་བ་འདེབས་སོ་གསུམ།  རྡོ་རྗེ་ཐེག་པའི་དཀོན་མཆོག་གསུམ་ལ་དུས་ད་ནས་བཟུང་སྟེ་བྱང་ཆུབ་མ་ཐོབ་ཀྱི་བར་དུ་སྐྱབས་སུ་འགྲོ་ཞིང་།  དེའི་བསླབ་བྱ་ལ་བསླབ་སྙམ་པས་འདིའི༴  དགོངས་གསོལ་དང་།  བདག་མིང་འདི་ཞེས་བགྱི་བས།  དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ།  རྐང་གཉིས་རྣམས་ཀྱི་མཆོག  །སངས་རྒྱས་ལ་སྐྱབས་སུ་མཆིའོ།  །འདོད་ཆགས་དང་བྲལ་བ་རྣམས་ཀྱི་མཆོག  །ཆོས་ལ་སྐྱབས་སུ་མཆིའོ།  །ཚོགས་རྣམས་ཀྱི་མཆོག  །དགེ་འདུན་ལ་སྐྱབས་སུ་མཆིའོ།  །གསང་སྔགས་དང་།  རིག་སྔགས་དང་།ཡི་དམ་གྱི་ལྷ་དང་།  །བླ་མ་དམ་པ་རྣམས་ལ་སྐྱབས་སུ་མཆིའོ་གསུམ།  བདག་གཞན་སེམས་ཅན་ཐམས་ཅད་ཀྱི་དོན་དུ་སངས་རྒྱས་ཀྱི་གོ་འཕང་ཐོབ་པར་བྱའོ་སྙམ་པས་འདིའི་རྗེས།  དགོངས་གསོལ་དང་།  བདག་མིང་འདི་ཞེས་བགྱི་བས།  སེམས་ཅན་མ་བསྒྲལ་བ་རྣམས་བསྒྲལ་བ་དང་།  མ་གྲོལ་བ་རྣམས་དགྲོལ་བར་བགྱི་བ་དང་།  དབུགས་མ་ཕྱིན་པ་རྣམས་དབུགས་དབྱུང་བ་དང་།  ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་བཟླ་བར་བྱ་བའི་ཕྱིར།  དུས་གསུམ་གྱི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་ཇི་ལྟར་བྱང་ཆུབ་ཆེན་པོར་སྨོན་པའི་སེམས་བསྐྱེད་པ་དེ་བཞིན་དུ།  བདག་གིས་ཀྱང་སེམས་བསྐྱེད་པར་བགྱིའོ་གསུམ།  དེའི་ཆེད་དུ་སེམས་ཅན་གྱི་དོན་རྒྱ་ཆེན་པོ་སྒྲུབ་ཅིང་རྡོ་རྗེ་ཐེག་པའི་ཐབས་ཚུལ་རྣམས་ལ་རིམ་པ་བཞིན་དུ་བསླབ་པར་བགྱིའོ་སྙམ་པས་འདིའི༴  དགོངས་གསོལ་དང་།  བདག་མིང་འདི་ཞེས་བགྱི་བས་འདས་པའི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་བྱང་ཆུབ་ཀྱི་སྤྱོད་པ་ལ་ཇི་ལྟར་བསླབས་པ་དང་།  མ་བྱོན་པའི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་ཇི་ལྟར་བསླབ་པར་འགྱུར་བ་དང་།  ད་ལྟར་བཞུགས་པའི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་ཇི་ལྟར་སློབ་པ་དེ་བཞིན་དུ་བདག་གིས་ཀྱང་།  བྱང་ཆུབ་སེམས་དཔའ་རྣམས་ཀྱི་བསླབ་པར་བྱ་བ་ལ་བསླབ་པར་བགྱིའོ་གསུམ།  སྨོན་འཇུག་བརྟན་པའི་ཕྱིར་དུ་འདིའི༴  ཇི་ལྟར་དུས་གསུམ་མགོན་པོ་རྣམས།  །བྱང་ཆུབ་ཏུ་ནི་ངེས་མཛད་པའི།  །བྱང་ཆུབ་སེམས་ནི་བླ་ན་མེད།  །དམ་པ་བདག་གིས་བསྐྱེད་པར་བགྱི།  །ཚུལ་ཁྲིམས་ཀྱི་ནི་བསླབ་པ་དང་།  །དགེ་བའི་ཆོས་ནི་སྡུད་པ་དང་།  །སེམས་ཅན་དོན་བྱེད་ཚུལ་ཁྲིམས་གསུམ།  །སོ་སོར་བརྟན་པོར་གཟུང་པར་བགྱི།  །ལན་གསུམ།  དེ་ལྟར་བགྱིས་པའི་དགེ་བའི་རྩ་བ་དེས་བདག་དང་སེམས་ཅན་ཐམས་ཅད་ཀྱིས་རྣམ་པ་ཐམས་ཅད་མཁྱེན་པའི་སངས་རྒྱས་ཐོབ་པར་གྱུར་ཅིག་སྙམ་པས་འདིའི༴  འཇམ་དཔལ་དཔའ་བོས་ཇི་ལྟར་མཁྱེན་པ་དང་།  །ཀུན་ཏུ་བཟང་པོ་དེ་ཡང་དེ་བཞིན་ཏེ།  །དེ་དག་ཀུན་གྱི་རྗེས་སུ་བདག་སློབ་ཅིང་།  །དགེ་བ་འདི་དག་ཐམས་ཅད་རབ་ཏུ་བསྔོ།  །ཞེས་རྒྱུད་དག་པར་བྱས་ནས།  དྲུག་པ་སེམས་བསྐྱེད་པའི་སློབ་མ་ལ་བར་ཆད་བསྲུང་བའི་སླད་དུ་ལས་བུམ་གྱི་ཆུ་གཏོར་ཏེ།  ཨོཾ་ཨ་མྲྀ་ཏེ་ཧཱུྃ་ཕཊ།  ཅེས་བརྗོད་པས་བར་དུ་གཅོད་པ་དང་འབགས་བཙོག་རྣམས་སྦྱངས་པར་མོས་ནས།  བྱིན་གྱིས་བརླབ་པའི་སླད་དུ་ཁྱེད་རང་རྣམས་སྐད་ཅིག་གིས་རྗེ་བཙུན་འཇམ་པའི་དབྱངས་ཀྱི་ང་རྒྱལ་དུ་གནས་པ་ལ་སློབ་དཔོན་གྱིས་དྲིའི་ཆུ་རྡོ་རྗེ་དང་བཅས་པས་གནས་གསུམ་དུ་རེག་སྟེ།  ཨོཾ་ཨཱཿཧཱུྃ་ཞེས་བརྗོད་པས་ཁྱེད་རང་རྣམས་ཀྱི་དཔྲལ་བར་ཨོཾ་ལས་འཁོར་ལོ་དཀར་པོ་ཨོཾ་གྱིས་མཚན་པ།  མགྲིན་པར་ཨཱཿ ལས་པདྨ་དམར་པོ་ཨཱཿས་མཚན་པ།  སྙིང་གར་ཧཱུྃ་ལས་རྡོ་རྗེ་སྔོན་པོ་ཧཱུྃ་གིས་མཚན་པ་རྣམས་གསལ་ལམ་གྱིས་བྱུང་བར་མོས་པ་མཛོད།  །བདུན་པ་ད་ལྟར་ལུས་ངག་ཡིད་གསུམ་ལྷའི་སྐུ་གསུང་ཐུགས་ཀྱི་ངོ་བོར་བྱིན་གྱིས་བརླབས་པ་དེ་མཆོད་ཡུལ་དུ་བཟུང་བ་ཡིན་པས་སློབ་དཔོན་གྱིས་མེ་ཏོག་དབུ་ལ་ཕུལ་ནས་མཆོད་པར་མོས་པ་མཛོད།  ཨོཾ་བཛྲ་པུཥྤེ་ཨཱཿཧཱུྃ།  བདུག་སྤོས་ཤངས་ལ༴  དྷཱུ་པེ༴  མར་མེ་སྤྱན་ལམ་དུ༴  ཨཱ་ལོ་ཀེ༴  ཐུགས་ཀར་དྲིའི་བྱུག་པ་ཕུལ༴  གནྡྷེ་ཞེས་པས་མཆོད་ནས།  བརྒྱད་པ་དངོས་གྲུབ་ཀྱི་མཚན་ལྟས་བརྟག་པའི་སླད་དུ་སོ་ཤིང་སྦྱིན་པ་ནི།  བུམ་ཆུ་གཏོར་ཞིང་བསང་སྦྱང་།  སྟོང་པའི་ངང་ལས་ཧཱུྃ་ལས་བྱུང་བའི་སོ་ཤིང་སོར་བཅུ་གཉིས་པ་རྩེ་མོ་མེ་ཏོག་གི་ཅོད་པན་དང་བཅས་པ་རྡོ་རྗེ་སློབ་མ་རྣམས་ཀྱི་དངོས་གྲུབ་ཀྱི་མཚན་ལྟས་བརྟག་པའི་ནུས་པ་དང་ལྡན་པར་གྱུར་ཅེས་དང་།  ཨོཾ་ཨཱཿཛི་ཧཱ་བཛྲ་སཾ་བརྡྷ་ནི་སྭཱ་ཧཱ།  ཞེས་པས་བསྔགས་པ་དེ་ཉིད་ཁྱེད་རྣམས་ཀྱི་ཕྱག་ཐལ་མོ་སྦྱར་བའི་བར་དུ་དངོས་གྲུབ་ཀྱི་མཚན་མ་བརྟག་པའི་སླད་དུ།  ལྕེ་ལ་རྡོ་རྗེ་བདེ་མཆོག་སྟེར།  །ཞེས་པའི་དོན་ཅན་གྱི་སྔགས་དེ་ཉིད་ཀྱིས་བྱིན་ཏེ།  སོ་བྲུད་པ་བཞིན་བྱས་པས་སྡིག་སྒྲིབ་ཐམས་ཅད་སྐྱུགས་པར་མོས་ལ།  སོ་ཤིང་གི་ར་བ་ཚོམ་བུ་དགུ་བཀོད་པའི་དབུས་སུ་ཨོཾ་བཛྲ་ཧ་ས་ཧཾ་ཞེས་གསུངས་ཤིང་ཐལ་མོ་ཁ་ཕྱེ་སྟེ་ལྟོས་པ་མེད་པར་དོར་ཅིག  །ཅེས་དང་།  ཨོཾ་ཨཱཿབཛྲ་ཛི་ཧྭ་བཛྭ་སྃ་བརྡྷ་ནི་སྭཱ་ཧཱ།  ཞེས་བརྗོད་ལ་རེ་རེ་ནས་སྦྱིན་ཅིང་དོར་ཚར་བའི་རྗེས་སུ།  །དེའང་རྩེ་མོ་རང་ངམ་སྟེང་དུ་ཕྱོགས་ན་མཆོག་གི་དངོས་གྲུབ།  ཤར་དུ་ཕྱོགས་ན་ཞི་བ།  ལྷོར་མངོན་སྤྱོད།  ནུབ་ཏུ་དབང་།  བྱང་དུ་རྒྱས་པ།  མཚམས་རྣམས་སུ་ཕྱོགས་ན་བུམ་པ་བཟང་པོ་སོགས་དངོས་གྲུབ་ཕྲན་ཚེགས།  འོག་ཏུ་ཕྱོགས་ནས་འོག་གི་དངོས་གྲུབ་འགྲུབ་པར་འགྱུར་རོ།  །ཞེས་བརྗོད།  དགུ་པ་སྒོ་གསུམ་གྱི་དྲི་མ་སྦྱང་བའི་སླད་དུ་ཁྱོར་ཆུ་བླུད་པ་ནི།  ཨོཾ་ཧྲཱིཿབི་ཤུདྡྷཿསརྦ་དྷརྨཱཿསརྦ་པཱ་པཾ་ནི་ཙཱ་སྱ་སཾ་ཤོ་དྷ་ཡ་སརྦ་པཾ་ཀལྤན་ཨཱ་པ་ན་ཡ་ཧཱུྃ།  ཞེས་བཟླས་པའི་ཆུ་ཨོཾ་ཧྲཱིཿབི་ཤུདྡྷའི་སྔགས་ཀྱིས་ལན་གསུམ་སྦྱིན་ནོ།  །བཅུ་པ་བར་ཆད་བསྲུང་བའི་སླད་དུ་སྲུང་སྐུད་སྦྱིན་པ་ནི།  བུམ་ཆུ་གཏོར་ཞིང་།  བསང་སྦྱང་།  སྟོང་པའི་ངང་ལས་ཧཱུྃ་ལས་བྱུང་བའི་སྲད་བུ་དམར་པོ་རྡོ་རྗེ་སློབ་མ་རྣམས་ཀྱི་ལུས་ཚད་དང་མཉམ་པ་སུམ་སྒྲིལ་དུ་བྱས་པ་རྡོ་རྗེའི་མདུད་པ་གསུམ་གྱིས་བཏབ་པ།  རྡོ་རྗེ་སློབ་མའི་བར་ཆད་སྲུང་བའི་ནུས་པ་དང་ལྡན་པར་གྱུར།  སློབ་དཔོན་གྱི་སྙིང་གའི་ཧཱུྃ་ལས་འོད་ཟེར་འཕྲོས་པས།  སྟ་གོན་གྱི་ལྷའི་ཐུགས་ཀ་ནས་ཡེ་ཤེས་ཀྱི་སྲད་བུའི་ཚོགས་སྤྱན་དྲངས་ཏེ་དམ་ཚིག་གི་སྲད་བུ་ལ་ཐིམ་ཞེས་དང་།  ཨོཾ་ཨ་ར་པ་ཙ་ན་དྷཱིཿསོགས་ཀྱིས་བྱིན་གྱིས་བརླབས་ཏེ་སྐྱེས་པའི་དཔུང་པ་གཡོན་དང་བུད་མེད་ཀྱི་གཡས་པར་གཙོ་བོའི་སྔགས་བཟླ་ཞིང་བཅིང་།  བུམ་ཆུ་གཏོར།  སརྦ་བུདྡྷ་མི་ཏྲི་རཀྵ་རཀྵ་སརྦནྟུ་སྭཱ་ཧཱ།  སརྦ་བུདྡྷ་ཨདྷིཥྛ་ན་ཨ་དྷིཥྛི་ཏེ་སྭཱ་ཧཱ།  དྷ་ར་ཀ་སྱ་རཀྵ་རཀྵ་ཀུ་རུ་ཀུ་རུ་སྭཱ་ཧཱ།  བྱང་ཆུབ་མ་ཐོབ་ཀྱི་བར་དུ་བར་དུ་གཅོད་པ་ཐམས་ཅད་བསྲུང་དུ་གསོལ་ཞེས་བརྗོད་དོ།  །བཅུ་གཅིག་པ་རྩྭ་ཀུ་ཤའི་སྔས་སྟན་སྦྱིན་པ་ནི།  ཀུ་ཤའི་ཕོན་པོ་ཆེ་ཆུང་གཉིས་བསང་སྦྱང་།  སྟོང་པའི་ངང་ལས་དྷཱིཿལས་བྱུང་བའི་ཀུ་ཤ་ཆེ་ཆུང་གཉིས་རྩ་བ་དང་རྩེ་མོ་མ་ཉམས་པ་རྡོ་རྗེ་སློབ་མ་རྣམས་ཀྱི་རྨི་ལམ་མི་འཁྲུགས་པའི་ནུས་པ་དང་ལྡན་པར་གྱུར་ཅེས་དང་།  དྷཱིཿཧ་བཟླས་པས་བྱིན་གྱིས་བརླབས་ནས་ཀུ་ཤ་ཆེ་བ་གཡས་སུ་དྷཱིཿདང་ཆུང་བ་གཡོན་དུ་ཧ་བཟླས་པས་བྱིན་ནོ།  །བཅུ་གཉིས་པ་ཆོས་ཟབ་མོ་བཤད་པའི་སྒོ་ནས་སྤྲོ་བ་བསྐྱེད་པ་ནི།  འཇིག་རྟེན་དུ་ནི་ཀུན་མཁྱེན་དག  །ཨུ་དུམ་ཝ་རའི་མེ་ཏོག་བཞིན།  །བརྒྱ་ལམ་ན་ནི་རེས་འགའ་ཞིག  །འབྱུང་འགྱུར་ཡང་ནི་མི་འབྱུང་ངོ་།  །གསང་སྔགས་སྤྱོད་པའི་ཚུལ་འབྱུང་བ།  །དེ་བས་ཀྱང་ནི་དཀོན་པ་སྟེ།  གང་གིས་སེམས་ཅན་མཉམ་མེད་དོན།  །བླ་མེད་བྱེད་པར་ནུས་པ་ཡིན།  །བསྐལ་པ་བྱེ་བ་དུ་མ་རུ།  །སྔོན་ཆད་སྡིག་པ་བྱས་པ་གང་།  །དཀྱིལ་འཁོར་འདི་འདྲ་མཐོང་མ་ཐག  །དེ་དག་ཟད་པར་འགྱུར་ཡིན་ན།  གྲགས་པ་མཐའ་ཡས་སྔགས་སྤྱོད་པའི།  །ཚུལ་ལ་གནས་ན་སྨོས་ཅི་དགོས།  །སྐྱོབ་པའི་གསང་སྔགས་བཟླས་ན་ནི།  །གོ་འཕང་བླ་ན་མེད་པར་འགྱུར།  །གང་གིས་སྤྱོད་པ་མཆོག་འདི་ལ།  །བློ་གྲོས་ཤིན་ཏུ་མི་གཡོ་ན།  །སྡུག་བསྔལ་ཐམས་ཅད་འབྱུང་བ་ཡི།  །ངན་འགྲོ་དེ་ཡིས་གཅོད་པར་འགྱུར།  །བདག་ཉིད་ཆེན་པོ་ཁྱེད་རྣམས་ཀྱིས།  །རྙེད་པ་མཉམ་མེད་དེ་རིང་རྙེད།  །གང་ཕྱིར་རྒྱལ་བ་སྲས་བཅས་ལ།  །བདག་ཉིད་ཆེན་པོ་ཀུན་གྱིས་ནི།  །བསྟན་པ་འདི་ལ་ཁྱེད་རྣམས་ཀུན།  །ཡོངས་སུ་བཟུང་སྟེ་སྐྱེ་བཞིན་པ།  །དེ་ཕྱིར་ཁྱེད་རྣམས་ཐེག་ཆེན་དུ།  །སང་ནི་རབ་ཏུ་སྐྱེ་བར་འགྱུར།  །ཐེག་པ་ཆེན་པོ་ཆེར་འབྱུང་བའི།  །ལམ་མཆོག་འདི་ནི་དཔལ་དང་ལྡན།  །ཁྱེད་རྣམས་དེར་ནི་དོང་བས་ན།  །རང་བྱུང་སྐལ་བ་ཆེན་པོ་པ།  །འཇིག་རྟེན་ཐམས་ཅད་མཁྱེན་པ་ཡི།  །དེ་བཞིན་གཤེགས་པ་ཉིད་དུ་འགྱུར།  །ཞེས་གསུངས་ཏེ།  དེའི་དོན་ནི་འཇིག་རྟེན་ན་ཨུ་དུམ་ཝཱ་རའི་མེ་ཏོག་དཀོན་པ་ལྟར་སངས་རྒྱས་འབྱོན་པ།  བྱོན་ནས་ཆོས་གསུང་པ།  གསུངས་པའི་བསྟན་པ་གནས་པ།  བསྟན་པའི་རྗེས་སུ་བདག་གཞན་འཇུག་པ་ཡོད་པ་རྣམས་དཀོན།  དེའི་ནང་ནས་ཀྱང་གསང་སྔགས་ཀྱི་ཐེག་པ་དང་མཇལ་བ་ནི་ཤིན་ཏུ་དཀོན་ཞིང་།  དཀོན་པ་དེའང་ཕན་ཡོན་ཆེན་པོ་དང་ལྡན་པ་ཡིན་ཏེ།  དཀྱིལ་འཁོར་དུ་ཞུགས་ཏེ་དབང་བླངས་ནས་དམ་ཚིག་ལ་སྲུང་སྡོམ་དང་ལམ་ལ་འབད་པར་བྱས་ན་བརྩོན་འགྲུས་དང་རྟུན་པའི་བྱེ་བྲག་གིས་ཚེ་འདིའམ་བར་དོའམ།  སྐྱེ་བ་བདུན་ནམ།  བཅུ་དྲུག་ཚུན་ཆད་ན་འབྲས་བུ་འགྲུབ་པར་གསུངས་པས་མཐར་ཐུག་གི་འབྲས་བུ་ལ་ཉེ་ཞིང་གནས་སྐབས་ཀྱི་འབྲས་བུ་ཚེ་འདིར་ཚེ་རིང་བ་དང་ནད་དང་སྡུག་བསྔལ་ཞི་བ་ལ་སོགས་པའང་རྩོལ་སྒྲུབ་ལོགས་ནས་མི་དགོས་པར་ཞར་ལ་འབྱུང་བའི་ཚུལ་གྱིས་འགྲུབ་པ་ཡིན་པས་རྙེད་དཀའ་ལ་ཕན་ཡོན་ཆེ་བའི་གསང་སྔགས་ཀྱི་ཐེག་པ་དང་མཇལ་བ་འདི་སྐལ་པ་བཟང་བ་ཡིན་སྙམ་དུ་ཤེས་པའི་སྒོ་ནས་ལམ་ལ་འབད་པ་དང་།  དམ་ཚིག་ལ་སྲུང་སྡོམ་ཚུལ་བཞིན་དུ་བགྱིད་སྙམ་པར་གྱིས།  བཅུ་གསུམ་པ་རྨི་ལམ་བརྟག་ཅིང་ངན་ན་བསྲུང་བ་ནི།  དོ་ནུབ་ཉལ་བའི་ཚེ་སྔར་གྱི་ཀུ་ཤ་ཆུང་བ་སྔས་དང་།  ཆེ་བ་སྟན་དུ་གྱིས་ལ་ལྷ་དང་བླ་མ་ཡིད་ལ་དྲན་པའི་སྒོ་ནས་མགོ་ཤར་རམ་བྱང་དུ་སྟོན་ལ་ཉོལ་ཞིག  །ལུང་སྟོན་པའི་རྨི་ལམ་འབྱུང་བར་འགྱུར་རོ།  །དེའང་རྨི་ལམ་བཟང་བའི་ལྟས་ནི།  དེ་བཞིན་གཤེགས་པའི་སྐུ་གཟུགས་དང་མཆོད་རྟེན་མཐོང་བ།  དམ་པའི་ཆོས་ཀྱི་གླེགས་བམ་ལག་ཏུ་ཐོགས་པ།  འཕགས་པའི་དགེ་འདུན་གྱི་སྡེའི་དབུས་སུ་ཞུགས་པ།  རང་གི་བླ་མ་དང་མཇལ་བ།  དེ་ལ་ཆོས་མཉན་པ།  ཉི་ཟླ་ཤར་བ།  རྒྱལ་པོར་དབང་བསྐུར་བ།  རྟ་དང་གླང་པོར་ཞོན་པ་ལ་སོགས་པ་བྱུང་ན་བཟང་བ་ཡིན་པས་ཞེན་པ་མེད་པའི་དགའ་བ་བསྒོམ་ཞིང་དགའ་སྟོན་བྱ།  གལ་ཏེ་ངན་པའང་འབྱུང་སྲིད་དེ།  དེའི་ལྟས་ནི།  རྒྱ་སྐྱེགས་ཀྱི་རི་ལ་འཛེག་པ་དང་།  ཀ་ར་ཝཱི་རའི་མེ་ཏོག་འཐུ་བ་དང་།  མཆོད་སྡོང་དང་བྱེ་མ་དང་ཐལ་ཕུང་ལ་འཛེག་པ།  སྤྲེའུ་དང་བོང་བུ་ཞོན་ནས་ཁ་ཕྱིར་ཕྱོགས་ཏེ་འགྲོ་བ།  ཆུས་ཁྱེར་བ།  སྐྲ་བྲེག་པ།  ལུས་ཏིལ་མར་གྱིས་བྱུག་པ་ལ་སོགས་པ་བྱུང་ན་ཅུང་ཟད་ངན་པ་ཡིན་པས་གཉིད་སད་མ་ཐག་ཏུ་ཆོས་ཐམས་ཅད་རྨི་ལམ་གྱི་སྣང་བ་དང་ཁྱད་པར་མེད་དེ།  དོན་ལ་གྲུབ་པ་ཅིའང་མེད་ཅེས་བདེན་མེད་ཀྱི་སྤྱོད་པས་རྒྱས་འདེབས་པ་དང་།  ཞི་བའི་སྦྱིན་སྲེག་བླུགས་པ་ལ་སོགས་པའི་སྒོ་ནས་རྨི་ལམ་ངན་པ་ཟློག་པའི་ཐབས་ལ་འབད་པར་བྱ་དགོས་པ་ཡིན་ནོ།  །དེ་རྣམས་ཀྱིས་སློབ་མ་སྟ་གོན་གྱི་ཆོས་རྣམས་སོང་ནས།  འདིའི་དངོས་གཞི་སང་ཉིན་འབྱུང་བ་ཡིན་ནོ།  །ཞེས་བརྗོད་ལ་སློབ་མ་རང་གནས་སུ་བཏང་ངོ་།  གསུམ་པ་རྗེས་ནི།  མཆོད་པ་རྣམས་ཁ་གསོས་ལ་བྱིན་གྱིས་བརླབ།  བུམ་བསྐྱེད་ཀྱི་སྐབས་ལྟར།  མཆོད་བསྟོད་འདོད་དོན་ཞུས་ལ།  ལྷག་ཆད་ཁ་བསྐང་།  ནོངས་པ་བཟོད་པར་གསོལ།  ཨོཾ།  ཁྱོད་ཀྱིས་སེམས་ཅན་དོན་ཀུན་མཛད།  །རྗེས་སུ་མཐུན་པའི་དངོས་གྲུབ་སྩོལ།  །སངས་རྒྱས་ཡུལ་དུ་གཤེགས་ནས་ཀྱང་།  །སླར་ཡང་འབྱོན་པར་མཛད་དུ་གསོལ།  །ཞེས་པའི་མཐར་མཐེབ་སྲིན་གྱི་སེ་གོལ་དང་།  །ཨོཾ་བཛྲ་མུཿ  སྟ་གོན་གྱི་ལྷ་རྣམས་སང་ནངས་པར་འབྱོན་པར་བཞེད་བཞིན་པས་རང་བཞིན་གྱི་གནས་སུ་གཤེགས་ཞེས་བརྗོད་ཅིང་བསམས་ལ།  སྟ་གོན་གྱི་ཡོ་བྱད་དམན་མ་རྣམས་བསྡུས་ཏེ།  དེའི་ནུབ་མོ་དགེ་བའི་གཉིད་ཀྱིས་ལོག་གོ  །གཉིས་པ་དངོས་གཞི་ལ།  སྦྱོར་དངོས་རྗེས་ཀྱི་དང་པོ་ནི།  སྟ་གོན་བྱས་པའི་གཞི་དེར་འདིའི་དཀྱིལ་ཐང་རབ་གནས་ཅན་ཞལ་ཤར་དུ་ཕྱོགས་པར་དགྲམ།  སྤྱི་མཆོད་སྒོས་མཆོད།  གཏོར་མ་རྣམས་སྔར་བཞིན་དུ་བཤམ།  །སྲོག་ཆགས་དང་མ་འདྲེས་པའི་བདུག་སྤོས་རྒྱུན་མི་ཆད་པར་བཏུལ།  གཞན་རྡོར་དྲིལ་བུམ་པ་ལ་སོགས་པ་སྔར་བཞིན་དང་།  མིག་རས།  མེ་ཏོག  །གུ་གུལ་དཀར་པོ།  རྩེ་བྲན་དར་དཔྱངས་དང་བཅས་པ།  ཤོག་བུ་ལ་མཚལ་གྱིས་པར་བཏབ་པའམ་བྲིས་པའི་རྡོར་དྲིལ།  ཉེར་སྤྱོད་ལྔ་ཚན་པ་ལྔ།  གདུགས་སོགས་བཤམ་མོ།  །གཉིས་པ་ནི།  རང་ཉིད་སྒྲུབ་གྲོགས་དང་བཅས་པས་ཁྲུས་བྱ།  གྲུབ་ན་ཐེག་པ་ཆེན་པོའི་གསོ་སྦྱོང་བླང་།  སྔོན་འགྲོ་གཏོར་མ་ནས་བརྩམས་ཏེ་བདག་བསྐྱེད་ཀྱི་དཀྱིལ་འཁོར་བསྡུས་ལ་དམ་ཚིག་པའི་ང་རྒྱལ་དུ་གནས་པའི་བར་སྟ་གོན་བཞིན་བྱས་ལ།  མདུན་བསྐྱེད་ཀྱི་དཀྱིལ་འཁོར་བསང་སྦྱང་།  སྟོང་པའི་ངང་ལས་པྃ་ལས་པདྨ་ཞེས་སོགས་ནས་ཟླ་བའི་དཀྱིལ་འཁོར་རེ་རེ་ཞེས་པའི་བར་སྟ་གོན་བཞིན་བསྐྱེད།  དབུས་ཀྱི་གདན་གྱི་སྟེང་དུ་དྷཱིཿལས་རལ་གྲི་དྷཱིཿས་མཚན་པ་ལས་བཅོམ་ལྡན་འདས་རྗེ་བཙུན་འཇམ་པའི་དབྱངས་སོགས་དང་།  གཡས་སུ་ཧྲཱིཿལས་པདྨ་ཧྲཱིཿས་མཚན་པ་ལས་འཕགས་པ་སྤྱན་རས་གཟིགས་སོགས་དང་།  གཡོན་དུ་ཧཱུྃ་ལས་རྡོ་རྗེ་ཧཱུྃ་གིས་མཚན་པ་ལས་ཕྱག་ན་རྡོ་རྗེ་སྐུ་མདོག་སོགས་ནས་བཛྲ་ས་མཱ་ཛཿ  ཞེས་པས་སྔར་སྟ་གོན་གྱི་ལྷ་རང་བཞིན་དུ་གཤེགས་པ་དེ་སྤྱན་འདྲེན་པ་ཡིན་པས།  སྤོས་རྡོར་དྲིལ་འཛིན་པས།  མ་ལུས་སེམས་ཅན་ཀུན་གྱི་མགོན་གྱུར་ཅིང་ཞེས་སོགས་ཀྱིས་སྤྱན་དྲངས་པ་ནས་བརྩམས་ཏེ་དབུ་རྒྱན་རང་ཆས་སུ་བསམ་པའི་བར་རྣམས་སྟ་གོན་བཞིན་བྱ།  ལྷ་རྣམས་ལ་དམིགས་ཏེ།  ཨོཾ་ཨ་ར་པ་ཙ་ན་དྷིཿསོགས་པ་རྒྱ་རྩ་རེ་བཟླས་པས་མདུན་བསྐྱེད་རིགས་གསུམ་གྱི་ལྷ་ཚོགས་རྣམས་ཀྱིས་མཁྱེན་བརྩེ་ནུས་པའི་དངོས་གྲུབ་མ་ལུས་པ་སྩལ་བར་བསམས་ལ་མཐར་ཐལ་མོ་སྦྱར་ཏེ།  རྟེན་དང་བརྟེན་པར་བཅས་པའི་དཀྱིལ་འཁོར་པ་ཐམས་ཅད་བརྟན་པར་བཞུགས་སུ་གསོལ།  བརྟན་པར་བཞུགས་ནས་བདག་དང་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ་ཞེས་གསོལ་བ་གདབ།  མཆོད་པ་བྱིན་རླབས་ནས་བསྟོད་པའི་བར་སྟ་གོན་བཞིན་བྱ།  སྤོས་དཀར་དང་སྤང་སྤོས་ཀྱི་དུ་བ་རྒྱུན་མི་འཆད་པར་ཕུལ་ལ།  གྲོགས་གཞན་དཀྱིལ་འཁོར་བསྲུང་དུ་བཅུག་ནས་ཕྱི་རོལ་དུ་ཆ་གསུམ་གཏོར་མ་བཏང་།  འཇིག་རྟེན་པའི་གྲིབ་བསལ་བའི་ཕྱིར་གུ་གུལ་གྱིས་བདུག་ཅིང་ཉེ་རེག་བྱས་ནང་དུ་འོངས་ཏེ་རོལ་མོ་འཁྲོལ་བཞིན་དུ་དཀྱིལ་འཁོར་ལ་བསྐོར་བ་དང་བཅས་ཡིག་བརྒྱ་བརྗོད།  ཕྱག་གསུམ་བྱས་ལ་མ་འབྱོར་པ་དང་ཉམས་པ་དང་སོགས་ཀྱིས་བཟོད་པར་གསོལ།  སྒྲུབ་མཆོད་ཞག་མང་དུ་བྱེད་ན་དངོས་གཞི་གཉིས་པ་མན་འདིར་བུམ་པ་གོང་བཞིན་བསྒྲུབ།    ། ༈ 
དེ་ནས་བདག་འཇུག་ལ།  ཆོ་ག་དཔོད་པ་རྣམས་བླ་མ་དང་དཀྱིལ་འཁོར་གྱི་གཙོ་བོ་གཉིས་སུ་མེད་པས་མཛད་ཅིང་།  དབང་རྫས་རྣམས་དེའི་ཐུགས་ཀ་ནས་བྱེ་བའི་རྗེ་བཙུན་འཇམ་པའི་དབྱངས་ཞིག་གིས་གཏོད་པར་བསམས་ལ།  སློབ་མ་ལ་ཇི་ཙམ་བསྐུར་བའི་དབང་བདག་འཇུག་གི་ཚུལ་དུ་བླངས་ནས་སློབ་མ་གཞུག་པའི་ཕྱིར་རྡོར་དྲིལ་འཛིན་པས།  དཀྱིལ་འཁོར་གྱི་འཁོར་ལོ་གཟུགས་བརྙན་གྱི་ཚུལ་དུ་སྣང་བའང་ཆོས་སྐུ་སྟོང་པ་དང་སྙིང་རྗེ་དབྱེར་མེད་པ་ལས་བྱུང་བའི་བྱིན་རླབས་དང་།  སློབ་དཔོན་གྱིས་ཀྱང་དེ་ལྟར་རྟོགས་པའི་བྱིན་རླབས་ཀྱིས།  སློབ་མ་རྣམས་ཀྱིས་ཀྱང་མཚན་མ་ཙམ་མ་ཡིན་པར་སྣང་ལ་རང་བཞིན་མེད་པའི་གཟུགས་ཀྱི་སྐུ་མཐོང་བར་གྱུར་ཅིག་སྙམ་པས།  ཤེས་རབ་ཐབས་བདག་དཀྱིལ་འཁོར་གྱི།  །བདེན་པའི་བྱིན་རླབས་གང་ཡིན་པ།  །བདེན་པ་དེ་ཡིས་མགོན་བདག་ལ།  །ཁྱོད་ཀྱིས་འདོད་པ་རབ་རྫོགས་མཛོད།  །ཆོས་རྣམས་གཟུགས་བརྙན་ལྟ་བུ་སྟེ།  །གསལ་ཞིང་དག་ལ་རྙོག་པ་མེད།  །གཟུང་དུ་མེད་ཅིང་བརྗོད་དུ་མེད།  །རྒྱུ་དང་ལས་ལས་ཀུན་ཏུ་འབྱུང་།  །དེ་བཞིན་དེ་ཉིད་ངེས་པར་འབྱུང་།  །བདེན་པ་དེ་ཡིས་དཀྱིལ་འཁོར་ནི།  །གཟུགས་བརྙན་གསལ་པར་སློབ་མ་རྣམས།  །ཀུན་གྱིས་དྲི་མེད་མཐོང་བར་ཤོག  །ཅེས་ལན་གསུམ་གྱིས་བདེན་སྟོབས་བརྗོད།  །གཏོར་མ་འཇིག་རྟེན་དང་འདས་པའི་གཏོར་མ་འདིར་ཕུལ།  དཀྱིལ་འཁོར་ཡོལ་བས་བསྒྲིབས་ནས།  སློབ་མ་རྣམས་ཁྲུས་བྱས།  ཕྱག་དང་ཡོན་ཕུལ་ནས་མེ་ཏོག་དང་བཅས་ཏེ་འཁོད་པ་ལ།  སེམས་བསྐྱེད་གསལ་བཏབ་ནས།  འདིར་དཀྱིལ་འཁོར་ཆེན་པོ་བཀོད་པའི་རྒྱུད་དམ།  གསང་བ་སྤྱི་རྒྱུད་ཀྱི་རྗེས་སུ་འབྲངས་ནས་གྲུབ་པའི་དབང་ཕྱུག་ཆེན་པོ་ཁ་ཆེ་ཡེ་ཤེས་རྡོ་རྗེས་བཀྲལ་བའི་བཅོམ་ལྡན་འདས་རིགས་གསུམ་སྤྱིའི་དཀྱིལ་འཁོར་དུ་དབང་བསྐུར་བ་ལ་སྟ་གོན་དང་དངོས་གཞི་གཉིས་ཀྱི་དང་པོ་གྲུབ་ཟིན།  ཕྱི་མ་ལ་སྔོན་འགྲོ་སློབ་དཔོན་གྱིས་བགྱི་པར་འོས་པ་ཐམས་ཅད་གྲུབ་པར་བྱས་ནས།  ཁྱེད་རང་རྣམས་ཀྱི་ངོ་སྐལ་དུ་གྱུར་པ་སློབ་མ་ལ་བྱ་བའི་ཆོ་ག་ལ་འཇུག་པ་དང་དངོས་གཞི་གཉིས་ལས།  དང་པོ་ཞུ་བའི་ཡོན་དུ་མཎྜལ་ཕུལ།  གསོལ་བ་འདེབས་པ་སྟ་གོན་བཞིན་བྱ།  དམིགས་པ་འདི་བཞིན་མཛོད།  སློབ་དཔོན་གྱི་ཐུགས་ཀ་ནས་བདུད་རྩི་འཁྱིལ་པ་བསམ་གྱིས་མི་ཁྱབ་པ་བྱོན་ནས།  དབང་ལེན་པ་ལ་བར་དུ་གཅོད་བའི་བགེགས་དང་ལོག་འདྲེན་ཐམས་ཅད་རྒྱང་རིང་དུ་བསྐྲད་པར་མོས་པ་མཛོད།  ན་མཿཙཎྜ་བཛྲ་ཀྲོ་དྷཱ་ཡ།  ཧུ་ལུ་ཧུ་ལུ།  ཏིཥྛ་ཏིཥྛ།  བནྡྷ་བནྡྷ།  ཧ་ན་ཧ་ན།  ཨ་མྲྀ་ཏེ་ཧཱུྃ་ཕཊ།  ཅེས་བརྗོད་ཅིང་བུམ་ཆུ་གཏོར།  བདུག་སྤོས་ཀྱིས་ཀྱང་བདུག་སྟེ་སྦྱོང་བར་མོས་པ་མཛོད།  ཧཱུྃ་ཧཱུྃ་ཞེས་བརྗོད་ཅིང་གུ་གུལ་དཀར་པོས་བདུག་གོ།  །སྔོན་ཆད་རྗེ་བཙུན་འཇམ་པའི་དབྱངས་ཀྱི་དཀྱིལ་འཁོར་དུ་མ་ཞུགས་པའམ།  ཞུགས་ཀྱང་བསྐྱར་ནས་འཇུག་པའི་མཚོན་བྱེད་དུ་རས་ཡུག་དམར་པོ་རེས་གདོང་བཅིངས་པར་མོས་པ་མཛོད།  ཨོཾ་ཙཀྵུ་རྦྷནྡྷུ་ཝ་ར་མ་ནཱ་ཡ་ཧཱུྃ་ཞེས་པས་བྱིན།  དཀྱིལ་འཁོར་གྱི་ལྷ་དང་མཇལ་བའི་ཚེ་ཕྱག་རྟེན་གྱི་སླད་དུ་མེ་ཏོག་གི་ཕྲེང་བ་རེ་བྱིན་པར་མོས་པ་མཛོད།  ཨཱ་ཁཾ་ཝཱི་ར་ཧཱུྃ།  ཞེས་པས་གཏད།  རྒྱུན་བཤགས་སྔོན་དུ་འགྲོ་བའི་ཞེས་སོགས་ཀྱིས་སེམས་བསྐྱེད་པ་སྟ་གོན་ལྟར་བྱ།  ཡང་ན་དཀོན་མཆོག་གསུམ་ལ་བདག་སྐྱབས་མཆི་སོགས་ཀྱིས་རུང་བར་རྗེ་བཙུན་གྱིས་བཤད་དོ།  །འཇུག་སྒོའི་བུམ་པས་དབང་བསྐུར་བའི་སླད་དུ་མདུན་བསྐྱེད་ཀྱི་དཀྱིལ་འཁོར་གྱི་ལྷ་ཚོགས་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་དབང་བསྐུར་བར་མོས་པ་མཛོད།  གང་བུམ་ཐོགས་ནས་ཀུ་ཤས་ཆུ་སྤྱི་བོར་གཏོར་ཏེ།  ཨོཾ་ཨ་ར་པ་ཙ་ན་དྷཱིཿབཛྲ་ཨབྷི་ཥིཉྩ།  ཨོཾ་མ་ཎི་པདྨེ་ཧཱུྃ་བཛྲ་ཨབྷི་ཥིཉྩ།  ཨོཾ་བཛྲ་པཱ་ཎི་ཧཱུྃ་བཛྲ་ཨ་བྷི་ཥིཉྩ།  ཞེས་གསུང་ཞིང་དབང་བསྐུར་བས་ལུས་ངག་ཡིད་གསུམ་གྱི་དྲི་མ་བག་ཆགས་དང་བཅས་པ་དག  །དབང་ཐམས་ཅད་ཐོབ།  རིགས་གསུམ་གྱི་མཁྱེན་བརྩེ་ནུས་མཐུའི་དངོས་གྲུབ་དང་ཡེ་ཤེས་ཐམས་ཅད་ཐོབ་པར་མོས་པ་མཛོད།  གཞན་ཡང་འོག་ནས་འབྱུང་བའི་གསང་སྔགས་ཀྱི་ཀུན་སྤྱོད་རྣམས་སྣོད་དང་མི་ལྡན་པའི་མདུན་དུ་མ་སྨྲ་ཞིག་ཅེས་གསང་བར་གདམས་པ་ནི།  སྤྱི་བོར་རྡོ་རྗེ་བཞག་སྟེ།  དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་རབ་ཏུ་ཞུགས་ཀྱིས་དེ་བཞིན་གཤེགས་པ་ཐམས་ཅད་ཀྱི་གསང་ཆེན་དམ་པ་འདི།  དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་དུ་མ་ཞུགས་པ་རྣམས་ཀྱི་མདུན་དུ་སྨ་བར་མི་བྱ་སྟེ་མ་དད་པ་རྣམས་ལ་ཡང་མ་ཡིན་ནོ།  །ཞེས་གསང་བར་གདམ་པ་དང་།  སློབ་དཔོན་གྱི་ལག་གི་རྡོ་རྗེ་ལ་འཇུས་ཏེ་དཀྱིལ་འཁོར་གྱི་དྲུང་དུ་འཁྲིད་པར་མོས་ལ།  དཀྱིལ་འཁོར་གྱི་ཕྱོགས་སུ་མགོ་དུད་ཙམ་དང་བཅས་པས་འདིའི་རྗེས་ཟློས་མཛོད།  ཧཱུྃ་ཛཿཧཱུྃ།  ཞེས་པས་དཀྱིལ་འཁོར་གྱི་ཤར་སྒོར་བཞག་པར་མོས་པ་མཛོད།  ཅེས་དང་ཡོལ་བ་བསལ།  ནང་འཇུག་གི་དངོས་གཞི་ཡེ་ཤེས་དབབ་པ་ཞུ་བའི་ཡོན་དུ་མཎྜལ་འབུལ་བ་ཁ་བསྐངས་ནས།  གསོལ་བ་འདེབས་པ་འདིའི་རྗེས་ཟློས་མཛོད།  དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབས་ཤིག  །རྗེ་བཙུན་འཇམ་པའི་དབྱངས་བདག་ལ་དབབ་ཏུ་གསོལ།  ཞེས་ལན་གསུམ་གྱིས་གསོལ་བ་བཏབ་ནས་དམིགས་པ་འདི་བཞིན་མཛོད།  ཁྱེད་རང་རྣམས་སྐད་ཅིག་གིས་རྗེ་བཙུན་འཇམ་པའི་དབྱངས་སྐུ་མདོག་དམར་སེར་ཞལ་གཅིག་ཕྱག་གཉིས་པ།  གཡས་པས་ཤེས་རབ་ཀྱི་རལ་གྲི་ནམ་མཁའ་ལ་འཕྱར་ཞིང་།  གཡོན་པས་ཨུཏྤ་ལའི་ཡུ་བ་ཐུགས་ཀར་བཟུང་ཞིང་འདབ་མ་སྙན་གྱི་ཐད་ཀར་ཁ་བྱེ་བའི་སྟེང་དུ་ཤེས་རབ་ཀྱི་ཕ་རོལ་ཏུ་ཕྱིན་པའི་པུསྟི་འཛིན་པ།  གཞོན་ནུ་ལོ་བཅུ་དྲུག་ལོན་པའི་རྣམ་པ་ཅན་ཤིན་ཏུ་མཛེས་ཤིང་ཞལ་འཛུམ་བག་དང་བཅས་པ།  རལ་པའི་ཟུར་ཕུད་ལྔ་གཡོན་དུ་འཕྱང་བ།  རིན་པོ་ཆེའི་རྒྱན་བརྒྱད་ཀྱིས་སྤྲས་ཤིང་།  དར་སྣ་ཚོགས་ཀྱི་སྟོད་གཡོགས་དང་ཤམ་ཐབས་གསོལ་བ།  མཚན་དང་དཔེ་བྱད་ཀྱིས་བརྒྱན་པ།  ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པའི་སྐུ་ཅན་དུ་གསལ་བའི་སྤྱི་བོར་ཟླ་བའི་དཀྱིལ་འཁོར་གྱི་སྟེང་དུ་རྃ་ཡིག་དཀར་པོ་ཞིག་གསལ་བཏབ་ནས།  དེ་ལས་འོད་ཟེར་བསམ་གྱིས་མི་ཁྱབ་པ་འཕྲོས།  སྤྱི་བོ་ནས་ཞུགས་པས་ལུས་ཀྱི་ནང་ཐམས་ཅད་གང་།  ཚེ་ཐོག་མ་མེད་པ་ནས་བསགས་པའི་སྡིག་སྒྲིབ་ཐམས་ཅད་དག  །ལུས་འོད་ཀྱི་རང་བཞིན་དུ་གྱུར་པར་མོས་པ་མཛོད།  སླར་ཡང་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་དྷཱིཿཡིག་དམར་སེར་ཞིག་གསལ་བཏབ་ནས།  སློབ་དཔོན་ལ་གུས་འདུད་མཛད་པས་སློབ་དཔོན་གྱི་ཐུགས་ཀ་ནས་འོད་ཟེར་དཔག་ཏུ་མེད་པ་འཕྲོས།  མདུན་བསྐྱེད་ཀྱི་དཀྱིལ་འཁོར་གྱི་ལྷ་ཚོགས་རྣམས་ཀྱི་ཐུགས་ཀར་ཕོག་པས་ཐུགས་རྒྱུད་བསྐུལ་ཏེ།  ཐུགས་ཀ་ནས་འོད་ཟེར་ཕོ་ཉ་ལྟ་བུ་བསམ་གྱིས་མི་ཁྱབ་པ་འཕྲོས།  ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་འཕགས་པ་ཉན་ཐོས་དང་རང་སངས་རྒྱས།  གྲུབ་པ་བརྙེས་པའི་ལྷ་དང་ཀླུ་དང་དྲང་སྲོང་དང་རིག་འཛིན་ལ་སོགས་པ་རྣམས་ཀྱི་ཐུགས་ཀར་ཕོག  །དེ་རྣམས་ཀྱི་ཐུགས་རྒྱུད་བསྐུལ་ཏེ་ཐུགས་ཀ་ནས་ཐུགས་གཉིས་སུ་མེད་པའི་མཁྱེན་བརྩེ་ནུས་མཐུ་ཐམས་ཅད་ཀྱི་ངོ་བོ་དྷཱིཿཡིག་བསམ་གྱིས་མི་ཁྱབ་པ་བྱུང་སྟེ།  ཁྱེད་རང་གི་ཐུགས་ཀའི་དྷཱིཿཡིག་ལ་གཉིས་སུ་མེད་པར་ཐིམ།  དེ་བཞིན་དུ་མདུན་བསྐྱེད་སློབ་དཔོན་དང་བཅས་པའི་ཐུགས་ཀ་ནས་ཀྱང་དེ་འདྲ་བ་བསམ་གྱིས་མི་ཁྱབ་པ་བྱུང་སྟེ་ཁྱེད་རང་གི་ཐུགས་ཀར་ཐིམ་པས་རྒྱུད་བྱིན་གྱིས་བརླབས་པར་མོས་པ་མཛོད།  གཙོ་བོའི་དམ་ཚིག་གི་ཕྱག་རྒྱ་སྤྱི་བོར་གཏུགས་ཏེ།  ཨོཾ་ཨ་ར་པ་ཙ་ན་དྷཱིཿཡང་ཡང་བརྗོད་པ་ནི་ཡེ་ཤེས་དབབ་པའི་དོད་ཡིན།  ཡེ་ཤེས་ཕབ་པ་སྤྱི་བོར་རྡོ་རྗེ་བཞག་པས་བརྟན་པར་བྱས་པའི་མོས་པ་མཛོད།  ཏིཥྛ་བཛྲ་ཞེས་པས་བརྟན་པར་བྱས་ནས།  དཀྱིལ་འཁོར་གྱི་ལྷ་ལ་གསོལ་བ་གདབ་པ་ནི།  སློབ་དཔོན་གྱིས་རྡོར་དྲིལ་འཛིན་པས་དཀྱིལ་འཁོར་གྱི་ཤར་སྒོར་ལངས་ཏེ།  ཡང་དག་དཀྱིལ་འཁོར་འདི་རུ་ནི།  །བདག་གི་སློབ་མ་གཞུག་པར་བགྱི།  །ལྷ་ཡི་རིགས་ཀྱི་རིམ་པ་དང་།  །བསོད་ནམས་ཇི་ལྟར་དེ་ལྟར་ཤོག  །འདི་ཡི་དངོས་གྲུབ་ཅི་འདྲར་འགྱུར།  །རིགས་ནི་གང་གི་སྣོད་དུ་འགྱུར།  །བསོད་ནམས་མཐུ་ཡང་ཅི་འདྲ་བར།  །དེ་འདྲ་དཀྱིལ་འཁོར་དུ་གྱུར་ཅིག  །ཅེས་ལན་གསུམ་གྱིས་གསོལ་བ་བཏབ་ནས་དཀྱིལ་འཁོར་གྱི་ལྷ་ལ་མེ་ཏོག་དབུལ་བ་ནི།  འདི་ན་རིགས་གསུམ་སྤྱིའི་དཀྱིལ་འཁོར་བཞུགས་པ་ཡིན་ཏེ།  སངས་རྒྱས་ཀྱི་ཡེ་ཤེས་གཅིག་ཉིད་གདུལ་བྱ་འདུལ་བའི་ཆེད་དུ་གཙོ་འཁོར་གྱི་རྣམ་པར་བསྟན་པ་ཙམ་མ་གཏོགས་ངོ་བོ་ལ་བཟང་ངན་མེད་མོད།  འོན་ཀྱང་ལས་བསགས་པའི་ལྷ་ཞིག་ལ་འབབ་པར་ཤོག་ཅིག་སྙམ་པས།  ཨོཾ་པྲ་ཏཱི་ཙྪ་བཛྲ་ཧོཿཞེས་གསུངས་ཤིང་དཀྱིལ་འཁོར་ལ་མེ་ཏོག་ཕུལ་ཞིག་ཅེས་བརྗོད།  དེས་ཀྱང་ཕུལ་ལ་མེ་ཏོག་དེ་སློབ་དཔོན་གྱིས་བླངས་ནས་སློབ་མའི་སྤྱི་བོར་བཞག་སྟེ།  ཨོཾ་པྲ་ཏི་གྲྀཧྞ་སྟྭཾ་ཨི་མཾ་ས་ཏྭ་མ་ཧཱ་བཱ་ལ་ཞེས་པས་ལྷ་དང་ངོ་སྤྲད།  རྗེ་བཙུན་འཇམ་དཔལ་དེང་ཁྱོད་ཀྱི།  །མིག་འབྱེད་པར་ནི་བརྩོན་པར་མཛད།  །ཕྱེ་བས་ཐམས་ཅད་མཐོང་འགྱུར་བའི།  །རྡོ་རྗེའི་མིག་ནི་བླ་ན་མེད།  །ཧེ་བཛྲ་པཱ་ཤྱ་ཞེས་པས་མིག་རས་བསལ་ཏེ་དཀྱིལ་འཁོར་བལྟར་གཞུག  །དཀྱིལ་འཁོར་བཟང་པོ་འདི་ལ་ལྟོས།  །ད་ནི་དད་པ་རབ་ཏུ་བསྐྱེད།  །ཁྱོད་ཀྱང་སངས་རྒྱས་རིགས་སུ་སྐྱེས།  །དམ་ཚིག་ཐམས་ཅད་བསྐྱང་བ་དང་།  །སྔགས་རྣམས་ལ་ཡང་བརྩོན་པར་གྱིས།  །དེའང་འདི་ན་རིགས་གསུམ་སྤྱིའི་དཀྱིལ་འཁོར་བཞུགས་པ་ཡིན་ཏེ།  ཕྱི་རོལ་དུ་མེ་རི་རབ་ཏུ་འབར་བས་བསྐོར་བའི་སྲུང་བའི་འཁོར་ལོའི་ནང་དུ་སྣ་ཚོགས་པདྨ་འདབ་མ་སོ་གཉིས་པའི་ལྟེ་བར་ཉི་མའི་སྟེང་དུ་སྣ་ཚོགས་རྡོ་རྗེའི་སྟེགས་བུ་ལ་གནས་པའི་ཐར་པ་ཆེན་པོའི་གཞལ་ཡས་ཁང་གྲུ་བཞི་པ།  སྒོ་བཞི་པ་ཞེས་སོགས་ནས།  ཟླུམ་པོ་རེ་རེ་ཞེས་པའི་བར་མངོན་རྟོགས་ལྟར་དང་།  དབུས་སུ་ཟླ་བའི་དཀྱིལ་འཁོར་དང་།  བྱང་དུ་ཉི་མའི་དཀྱིལ་འཁོར།  ཕྱོགས་གཞན་རྣམས་སུ་ཟླ་བའི་དཀྱིལ་འཁོར་རེ་རེ་དང་བཅས་པ་ནི་རྟེན་གཞལ་ཡས་ཁང་ཡིན་ལ།  བརྟེན་པ་ལྷ་ནི་དབུས་སུ་རྗེ་བཙུན་འཇམ་པའི་དབྱངས་སོགས་ནས་བཞུགས་པ།  གཡས་སུ་འཕགས་པ་སྤྱན་རས་གཟིགས་སོགས་དང་།  །གཡོན་དུ་ཕྱག་ན་རྡོ་རྗེ་སོགས་ནས།  གླེགས་བམ་རེ་བཞུགས་པ་སྟེ།  ཞེས་ལྷ་ངོ་བསྟན་ལ།  མདོར་ན་རྗེ་བཙུན་འཇམ་པའི་དབྱངས་གཙོ་བོར་གྱུར་པའི་རིགས་གསུམ་སྤྱིའི་དཀྱིལ་འཁོར་པ་དང་མངོན་སུམ་ལྟ་བུར་མཇལ་སྙམས་པའི་མོས་པ་མཛོད།  །ཅེས་བརྗོད།  དེས་དཀྱིལ་འཁོར་དུ་འཇུག་པའི་ཆོས་རྣམས་གྲུབ་ནས།  ཞུགས་ནས་མངོན་པར་དབང་བསྐུར་བ་ལ་རྡོ་རྗེ་སློབ་མའི་དབང་དང་།  རྡོ་རྗེ་སློབ་དཔོན་གྱི་དབང་གཉིས་ལས།  དང་པོ་ཞུ་བའི་ཡོན་དུ་མཎྜལ་ཕུལ་ནས་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད།  བྱང་ཆུབ་རྡོ་རྗེས་སངས་རྒྱས་ལ།  །མཆོད་ཆེན་ཇི་ལྟར་སྩལ་བ་ལྟར།  །བདག་ཀྱང་བསྐྱབ་པའི་དོན་གྱི་ཕྱིར།  །ནམ་མཁའི་རྡོ་རྗེ་དེང་བདག་སྩོལ།  ཞེས་གསོལ་བ་གདབ།  དབང་སྟེགས་ཡོད་ན་དེར་སློབ་མ་བཞག་ལ།  དམིགས་པ་འདི་བཞིན་མཛོད།  དཀྱིལ་འཁོར་གྱི་ཤར་ཕྱོགས་སུ་ཁྲུ་དོ་ཙམ་སྤངས་པའི་སར་དབང་སྟེགས་ཀྱི་དཀྱིལ་འཁོར་གྲུ་བཞི་སྒོ་བཞི་རྟ་བབས་དང་བྲལ་བ།  དཀར་དམར་ནག་པའི་ར་བ་རིམ་པ་གསུམ་དང་ལྡན་པའི་ནང་དུ།  ལྷ་སྣམ་གྱི་དབུས་སུ་པདྨ་དཀར་པོ་འདབ་མ་བརྒྱད་དང་བཅས་པའི་ལྷ་སྣམ་ལ་བུམ་པ་དང་མཆོད་རྫས་ལ་སོགས་པས་བརྒྱན་པ།  འདབ་མ་བརྒྱད་ལ་བཀྲ་ཤིས་རྟགས་བརྒྱད་ཀྱིས་སྤྲས་པའི་དབུས་སུ་ཤིང་སྟན་ཟླ་བའི་དཀྱིལ་འཁོར་དང་བཅས་པའི་སྟེང་དུ་ཁྱེད་རང་རྣམས་རྗེ་བཙུན་འཇམ་པའི་དབྱངས་སྐུ་མདོག་དམར་སེར་སོགས་ནས།  །སྐྱིལ་མོ་ཀྲུང་གིས་བཞུགས་པ།  དེའི་སྟེང་དུ་བླ་བྲེ།  གཡས་སུ་གདུགས།  གཡོན་དུ་རྒྱལ་མཚན།  མཐའ་སྐོར་ཀུན་ཏུ་དུང་ལ་སོགས་པའི་མཆོད་པའི་ཡོ་བྱད་བསམ་གྱིས་མི་ཁྱབ་པས་བསྐོར་བར་བསམས་ལ།  སློབ་དཔོན་གྱི་ཐུགས་ཀའི་ས་བོན་ལས་འོད་ཟེར་འཕྲོས་པས་དབང་གི་ལྷ་རིགས་གསུམ་སྤྱིའི་དཀྱིལ་འཁོར་ལ་སངས་རྒྱས་དང་བྱང་ཆུབ་སེམས་དཔའ་ལྷ་དང་དྲང་སྲོང་གི་ཚོགས་བསམ་གྱིས་མི་ཁྱབ་པས་བསྐོར་བ་མདུན་གྱི་ནམ་མཁར་ཨོཾ་བཛྲ་ས་མཱ་ཛཿ  ཞེས་པས་སྤྱན་དྲང་།  མདུན་གྱི་ནམ་མཁར་རིགས་གསུམ་གྱི་དཀྱིལ་འཁོར་ལ་སངས་རྒྱས་དང་བྱང་ཆུབ་སེམས་དཔའ་ལྷ་དང་དྲང་སྲོང་རིག་པ་འཛིན་པ་ལ་སོགས་པ་དཔག་ཏུ་མེད་པས་བསྐོར་བ་ལ་མཆོད་པའི་རྣམ་གྲངས་བསམ་གྱིས་མི་ཁྱབ་པས་མཆོད་ཅིང་ལྷ་ཚོགས་རྣམས་ཀྱིས་ཀྱང་རྒྱལ་བར་གྱུར་ཅིག་ཅེས་བརྗོད་པར་མོས་ནས།  སློབ་དཔོན་དཀྱིལ་འཁོར་གྱི་ལྷ་ཚོགས་དང་བཅས་པས་བུམ་པ་བཏེག་སྟེ།  མེ་ཏོག་གི་ཆར་འབེབས་ཤིང་བཀྲ་ཤིས་ཀྱིས་མངའ་གསོལ་བར་མོས་པ་མཛོད།  མེ་ཏོག་གཏོར་ཞིང་རྡོར་དྲིལ་འཛིན་པས།  ཕུན་སུམ་ཚོགས་པ་མངའ་བ་སོགས་དང་།  བཅོམ་ལྡན་གསེར་མདོག་རི་ཡི་རྒྱལ་པོ་འདྲ།  །འཇིག་རྟེན་གསུམ་ན་འཇམ་དབྱངས་གཞོན་ནུའི་སྐུ།  །བཅོམ་ལྡན་སྐུ་ཡི་བཀྲ་ཤིས་གང་ལགས་པ།  །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག  །བཅོམ་ལྡན་དུང་མདོག༴  འཇིག་རྟེན་གསུམ་ན་སྤྱན་རས་གཟིགས་དབང་གསུང་།  །བཅོམ་ལྡན་གསུང་གི་སོགས་གོང་བཞིན།  བཅོམ་ལྡན་མཐིང་མདོག༴  འཇིག་རྟེན་གསུམ་ན་ཕྱག་ན་རྡོ་རྗེའི་ཐུགས།  །བཅོམ་ལྡན་ཐུགས་ཀྱི་སོགས་འདྲ།  མཐར་བདག་ཅག་འཁོར་དང་བཅས་པ་ཐམས་ཅད་མི་མཐུན་པའི་ཕྱོགས་ལས་རྣམ་པར་རྒྱལ་ཞིང་བཀྲ་ཤིས་པར་གྱུར་ཅིག་ཅེས་བརྗོད་པ་སྔོན་འགྲོ་ཡིན།  དངོས་གཞི་ལ་ཐོག་མར་སློབ་མའི་དབང་ལ།  ཆུའི་དབང་བསྐུར་བའི་སླད་དུ་ནམ་མཁར་བཞུགས་པའི་དབང་གི་ལྷ་ལ་གསོལ་བ་གདབས་པ་འདིའི་རྗེས་ཟློས་མཛོད།  བཅོམ་ལྡན་དེ་བཞིན་གཤེགས་པ་ཀུན།  །བཅོམ་ལྡན་བདག་ཉིད་ཆེན་པོ་རྣམས།  །ཐུགས་རྗེའི་རང་བཞིན་ཅན་རྣམས་ཀྱི།  །ཁྱེད་ཀྱིས་བདག་ལ་དབང་བསྐུར་སྩོལ།  །ཞེས་གསོལ་བ་བཏབ་ནས།  སྐུར་བྱེད་ནམ་མཁའི་དཀྱིལ་འཁོར་གྱི་གཙོ་བོ་དང་སློབ་དཔོན་ལྷན་ཅིག་པས་བུམ་པ་བདུད་རྩིས་གང་བ་རེ་ཐོགས་ཏེ་ཁྱེད་རང་རྣམས་ཀྱི་སྤྱི་བོ་ནས་དབང་བསྐུར་བར་མོས་པ་མཛོད།  ཇི་ལྟར་བལྟམས་པ་སོགས་ནས་ས་མ་ཡ་ཤྲི་ཡེ་ཧཱུྃ།  ཞེས་བརྗོད་ཅིང་བུམ་པ་མགོར་བཞག་ཅིང་འཐུང་དུའང་གཞུག  །སླར་ཡང་རིགས་གསུམ་གྱི་མཁྱེན་བརྩེ་ནུས་མཐུའི་སྒོ་ནས་བུམ་པ་ཐོགས་ཏེ་ཁྱེད་རྣམས་ཀྱི་སྤྱི་བོ་ནས་དབང་བསྐུར་བར་མོས་པ་མཛོད།  ཨོཾ་ཨ་ར་པ་ཙ་ན་དྷཱིཿཨབྷི་ཥིཉྩ།  ཨོཾ་མ་ཎི་པདྨེ་ཧཱུྃ་ཨབྷི་ཥིཉྩ།  ཨོཾ་བཛྲ་པཱ་ཎྀ་ཧཱུྃ་ཨབྷི་ཥིཉྩ།  ཞེས་རེ་རེ་ནས་མགོར་བཞག་ལ་འཐུང་དུའང་གཞུག  །ཞེས་གསུང་ཞིང་དབང་བསྐུར་བས་ཚེ་རབས་ཐོག་མ་མེད་པ་ནས་བསགས་པའི་སྡིག་སྒྲིབ་བག་ཆགས་དང་བཅས་པ་ཐམས་ཅད་དག  །བཅོམ་ལྡན་འདས་རིགས་གསུམ་མགོན་པོའི་མཁྱེན་བརྩེ་ནུས་པའི་དངོས་གྲུབ་ཐམས་ཅད་ཐོབ།  བདག་ཉིད་རྗེ་བཙུན་འཇམ་པའི་དབྱངས་ཀྱི་སྐུར་གྱུར་པ་བརྟན་པར་བྱས་པར་མོས་པ་མཛོད།  དེ་ལ་ཨོཾ་བཛྲ་པུཥྤེ་སོགས་ལྔས་མཆོད།  དེ་ནི་ཆུའི་དབང་ཡིན།  དེ་ནས་ཅོད་པན་གྱི་དབང་བསྐུར་བའི་སླད་དུ་ནམ་མཁར་བཞུགས་པའི་དབང་གི་ལྷ་ལ་གསོལ་བ་འདེབས་པ་འདིའི་རྗེས་ཟློས་མཛོད།  དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་བ་སྩལ་དུ་གསོལ།  ཞེས་གསོལ་བ་བཏབ་ནས།  སྐུར་བྱེད་ནམ་མཁའི་དཀྱིལ་འཁོར་གྱི་གཙོ་བོ་དང་སློབ་དཔོན་ལྷན་ཅིག་པས་རིན་པོ་ཆེ་ལས་གྲུབ་པའི་རྩེ་ཕྲན་རེ་ཐོགས་ཏེ་ཁྱེད་རང་རྣམས་ཀྱི་སྤྱི་བོར་བཅིངས་ནས་དབང་བསྐུར་བར་མོས་པ་མཛོད།  །ཐོར་ཅོག་གཙུག་ཏོར་གྱིས་བརྒྱན་པའི།  །རིན་ཆེན་རྩེ་ཕྲན་དམ་པ་དང་།  །སངས་རྒྱས་ཀུན་གྱིས་རབ་བརྒྱན་པའི།  །དར་དཔྱངས་དབང་བསྐུར་སྦྱིན་པར་བྱ།  །ཨོཾ་སརྦ་ཏ་ཐཱ་ག་ཏ་རཏྣ་མུ་ཀུ་ཊ་ཨ་བྷི་ཥིཉྩ་ཧཱུྃ་ཞེས་པས་ཅོད་པན་བཅིང་།  མེ་ཏོག་ཕྲེང་བ་དང་དར་དཔྱངས་ཀྱང་སྦྱིན་ཏེ་དབང་བསྐུར་བར་མོས་པ་མཛོད།  །ཨོཾ་སརྦ་ཏ་ཐཱ་ག་ཏ་པུཥྤཾ་མཱ་ལཱ་པ་ཊ་ལཾ་པ་ཨ་བྷི་ཥིཉྩ་ཧཱུྃ།  ཞེས་མེ་ཏོག་གི་ཕྲེང་བ་དར་དཔྱངས་དང་བཅས་པ་བཅིང་།  དེ་ལ་ཨོཾ་བཛྲ་པུཥྤེ་སོགས་ཉེར་སྤྱོད་ལྔས་མཆོད།  འདིར་རིགས་ལྔའི་སྐུ་གཟུགས་བྲིས་པའི་དབུ་རྒྱན་ནི་མི་དགོས་ཏེ།  སྤྱོད་པའི་རྒྱུད་ལ་རིགས་ལྔ་ཡི།  །དོན་གྲུབ་ན་ཡང་ཐ་སྙད་མེད།  །ཅེས་པས་སོ།  །དེ་ལྟར་ན་ཡེ་ཤེས་ཐིག་ལེའི་རྒྱུད་ལས།  ཆུ་ཡི་དབང་བསྐུར་ཅོད་པན་དག  །བྱ་བའི་རྒྱུད་ལ་རབ་ཏུ་གྲགས།  །ཞེས་གསུངས་པ་ལྟར་འདི་བའི་ལུགས་ཀྱི་ཆུ་དང་ཅོད་པན་གྱི་དབང་སོང་ནས།  །རྡོ་རྗེ་དྲིལ་བུ་མིང་གི་དབང་།  །སྤྱོད་པའི་རྒྱུད་ལ་བཞུགས་པ་ཡིན།  ཞེས་པའི་དོན།  རྡོ་རྗེ་དང་དྲིལ་བུའི་དབང་གི་སླད་དུ་ནམ་མཁར་བཞུགས་པའི་དབང་གི་ལྷ་ལ་གསོལ་བ་འདེབས་པ་འདིའི་རྗེས་ཟློས་མཛོད།  དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་བ་སྩལ་དུ་གསོལ།  ཞེས་གསོལ་བ་བཏབ་པས།  སྐུར་བྱེད་ནམ་མཁའི་དཀྱིལ་འཁོར་གྱི་གཙོ་བོ་དང་སློབ་དཔོན་ལྷན་ཅིག་པས་དཀྱིལ་འཁོར་གྱི་གཙོ་བོའི་ཐུགས་ཀ་ནས་ཡེ་ཤེས་ཀྱི་རང་བཞིན་གྱི་རྡོ་རྗེ་དང་དྲིལ་བུ་ནས་འབྲས་ཙམ་ཕྱུང་སྟེ།  ཁྱེད་རྣམས་ཀྱི་ཕྱག་གཡས་ཀྱི་སྲིན་ལག་གི་རྩ་བར་ཤོག་བུ་ལ་མཚལ་གྱིས་པར་བཏབ་པའི་རྡོ་རྗེ་ནས་འབྲས་ཙམ་རེ་གཏད་པར་མོས་པ་མཛོད།  ཨོཾ་མ་ཧཱ་བཛྲ་ཧཱུྃ་བཛྲ་ཨབྷི་ཥིཉྩ་ཞེས་བརྗོད་ཅིང་སྦྱིན།  དྲིལ་བུ་ནས་འབྲས་ཙམ་རེ་གཡོན་དུ་བྱིན་ཏེ།  ཨོཾ་བཛྲ་གཎྜི་ཨཱཿབཛྲ་ཨབྷི་ཥིཉྩ་ཞེས་པས་བྱིན་ནས།  རྡོ་རྗེ་དྲིལ་བུ་ནས་འབྲས་ཙམ་པ་ནི་གསང་བའི་དབང་སྟེ་ཁྱེད་རྣམས་ཀྱི་རྒྱུད་ལ་སྙིང་རྗེ་དང་སྟོང་པ་ཟུང་དུ་འཇུག་པའི་ཡེ་ཤེས་ཀྱི་རྟོགས་པ་རྒྱུད་ལ་སྐྱེས་པར་མོས་པ་མཛོད།  དེ་ལ་ཨོཾ་བཛྲ་པུཥྤེ་སོགས་ཀྱིས་མཆོད་ལ།  དེས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་དང་དྲིལ་བུའི་དབང་ཐོབ་པ་ཡིན་ནོ།  །མིང་གི་དབང་གི་སླད་དུ་ནམ་མཁར་བཞུགས་པའི་དབང་གི་ལྷ་ལ་གསོལ་བ་འདེབས་པ་འདིའི་རྗེས་ཟློས་མཛོད།  དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་བ་སྩལ་དུ་གསོལ།  ཞེས་གསོལ་བ་བཏབ་པས།  སྐུར་བྱེད་ནམ་མཁའི་དཀྱིལ་འཁོར་གྱི་གཙོ་བོ་དང་སློབ་དཔོན་ལྷན་ཅིག་པས་རྡོར་དྲིལ་སྤྱི་བོར་བཟུང་སྟེ་མིང་གི་དབང་བསྐུར་བར་མོས་པ་མཛོད།  ཨོཾ་ཨཱཪྻ་མཉྫུ་ཤྲི་ན་མ་ཞེས་སློབ་མ་རེ་རེ་ནས་བརྗོད་དོ།  །དེ་ལ་ཨོཾ་བཛྲ་པུཥྤེ་སོགས་ལྔས་མཆོད།  ཞེས་མིང་གི་དབང་བསྐུར་བ་ཡིན་ཏེ་དེས་རྡོ་རྗེ་སློབ་མའི་དབང་བསྐུར་བ་ཡིན་ནོ།  །གཉིས་པ་རྡོ་རྗེ་སློབ་དཔོན་གྱི་དབང་ཞུ་བའི་ཡོན་དུ་མཎྜལ་ཕུལ་ལ།  གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད།  གང་གི་བདག་ཉིད་ཁྱོད་དྲིན་ལས།  །རང་དང་གཞན་དོན་ནུས་གྱུར་པ།  །རྡོ་རྗེ་སློབ་དཔོན་གྱི་ནི་དབང་།  །སྙིང་རྗེའི་གཏེར་གྱིས་བདག་ལ་སྩོལ།  །ཞེས་གསོལ་བ་བཏབ་ནས་དམིགས་པ་འདི་བཞིན་མཛོད།  །དབང་སྟེགས་ཀྱི་སྟེང་དུ་ཁྱེད་རང་རྣམས་སྐད་ཅིག་གིས་ཐུབ་པ་རྣམ་པར་སྣང་མཛད་སྐུ་མདོག་དཀར་པོ་ཞལ་གཅིག་ཕྱག་གཉིས་པ་བྱང་ཆུབ་མཆོག་གི་ཕྱག་རྒྱ་ཅན།  རྒྱན་ཐམས་ཅད་ཀྱིས་བརྒྱན་པ།  དར་སྣ་ཚོགས་ཀྱི་ན་བཟའ་ཅན།  མཚན་དང་དཔེ་བྱད་ཀྱིས་སྤྲས་པའི་སྐུ་ཅན་དུ་གསལ་བའི་སྟེང་དུ་བླ་བྲེ་ལ་སོགས་པ་མཆོད་པའི་རྣམ་གྲངས་བསམ་གྱིས་མི་ཁྱབ་པས་བསྐོར་ནས་བཞུགས་པ་ལ་སྤྱོད་རྒྱུད་ཀྱི་རྡོ་རྗེ་སློབ་དཔོན་དུ་བསྒྲུབ་པའི་ཕྱིར་འཁོར་ལོས་སྒྱུར་བའི་རྒྱལ་ཚབ་ཆེན་པོར་དབང་བསྐུར་བའི་སླད་དུ་ནམ་མཁར་བཞུགས་པའི་དབང་ལྷ་རྣམས་དང་སློབ་དཔོན་ལྷན་ཅིག་པས་བུམ་པ་ཡེ་ཤེས་ཀྱི་བདུད་རྩིས་གང་བ་རེ་ཐོགས་ནས་དབང་བསྐུར་བར་མོས་པ་མཛོད།  ཇི་ལྟར་བལྟམས་པ་སོགས་བརྗོད་ཅིང་ལྷ་བུམ་སྤྱི་བོར་བཞག་ཅིང་འཐུང་དུ་བཅུག  །ལྷ་གསུམ་གྱི་སྔགས་ཀྱི་མཐར་བཛྲ་ཨབྷི་ཥིཉྩ་རེ་བཏགས་པས་བུམ་ཆུ་འཐོར་བ་དང་བཅས་ཏེ་དབང་བསྐུར་ནས།  ཅོད་པན་གྱི་དབང་བསྐུར་བའི་སླད་དུ་ལག་པ་ཐལ་མོ་ཕྱིར་བསྡམས་ལ་གུང་མོ་གཉིས་བརྐྱངས་པ་སློབ་མའི་སྤྱི་བོར་གཏུགས་ཏེ།  ཨོཾ་སརྦ་ཏ་ཐཱ་ག་ཏོདྦྷ་ཝ་བཛྲ་ཨབྷི་ཥིཉྩ་ཞེས་དང་།  པདྨའི་ཕྱག་རྒྱས།  ཨོཾ་པདྨོདྦྷ་ཝ་བཛྲ་ཨབྷི་ཥིཉྩ་ཞེས་དང་།  རྡོ་རྗེ་རྩེ་ལྔ་པའི་ཕྱག་རྒྱ་མགོ་བོར་རེག་སྟེ།  ཨོཾ་བཛྲོདྦྷ་ཝ་བཛྲ་ཨབྷི་ཥིཉྩ་ཞེས་དབང་བསྐུར་ནས།  སླར་ཡང་ལྷ་མོ་རྣམས་ཀྱིས་མཆོད་པར་མོས་པ་མཛོད།  ཨོཾ་བཛྲ་པུཥྤེ་སོགས་ལྔས་མཆོད།  དབང་གི་ལྷ་རྣམས་དང་སློབ་དཔོན་ལྷན་ཅིག་པས་རབ་ཏུ་གནས་པར་བྱས་པར་མོས་པ་མཛོད།  མེ་ཏོག་སྤྱི་བོར་བཞག་སྟེ།  ཨོཾ་སུ་པྲ་ཏིཥྛ་བཛྲ་ཡ་སྭཱ་ཧཱ་ཞེས་བརྗོད་ཅིང་བརྟན་པར་བྱས་ནས།  དེ་རིང་རྡོ་རྗེ་སློབ་དཔོན་གྱུར།  །སྔགས་དང་རྒྱུད་རྣམས་འཛིན་འགྱུར་བར།  །སངས་རྒྱས་བྱང་ཆུབ་སེམས་དཔའ་དང་།  །ལྷ་རྣམས་ཀུན་གྱིས་བཞེད་པ་ཡིན།  །ཞེས་གསུངས་ཏེ་དེའི་དོན་ནི་ཁྱེད་རྣམས་སྔགས་རྒྱུད་མན་ངག་འཛིན་པའི་རྡོ་རྗེ་སློབ་དཔོན་ཆེན་པོར་སངས་རྒྱས་དང་བྱང་ཆུབ་སེམས་དཔའ་དཀྱིལ་འཁོར་གྱི་ལྷ་ཚོགས་རྣམས་ཀྱིས་མཐུན་པར་བཞེད་པ་ཡིན་ཞིང་།  བུ་སྡུག་པ་ལྟར་ཡོངས་སུ་དགོངས་པའི་ཕྱིར་དེ་རིང་ཕྱིན་ཆད་སེམས་ཅན་རྣམས་ལ་སྙིང་བརྩེ་བའི་སྒོ་ནས།  རྡོ་རྗེ་སློབ་དཔོན་གྱི་ལས་སུ་བྱ་བ་རྣམས་ཚུལ་བཞིན་དུ་བསྒྲུབས་ཏེ།  སེམས་ཅན་གྱི་དོན་རྒྱ་ཆེན་པོ་གྱིས་ཤིག་པའི་དོན་ཡིན་ནོ།  །སྔགས་དབང་ཞུ་བའི་ཡོན་དུ་མཎྜལ་ཕུལ།  གསོལ་བ་འདེབས་པ་འདིའི་རྗེས་ཟློས་མཛོད།  སྔགས་ཀྱི་དབང་བསྐུར་ཡེ་ཤེས་མཆོག  །དངོས་གྲུབ་སྟེར་བ་བདག་ལ་སྩོལ།  །ཞེས་ལན་གསུམ་གྱིས་གསོལ་བ་བཏབ་ནས།  དཔོན་སློབ་གཉིས་ཀའི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་དྷཱིཿཧྲཱིཿཧཱུྃ་ཡིག་རྣམས་གསལ་བཏབ།  སློབ་དཔོན་གྱི་ཐུགས་ཀའི་ས་བོན་སྔགས་ཕྲེང་དང་བཅས་པ་བྱུང་བ་ཞལ་ནས་འཐོན།  ཁྱེད་རང་གི་ཞལ་དུ་ཞུགས།  སྙིང་གའི་ས་བོན་གྱི་མཐར་གཡས་སྐོར་དུ་འཁོད་པར་མོས་པ་བྱས།  མེ་ཏོག་དང་བཅས་ཐལ་མོ་སྦྱར་ཏེ་སྔགས་རྣམས་ཀྱི་རྗེས་ཟློས་ལན་བདུན་བདུན་གནང་བར་ཞུ།  དེ་ལྟར་བཟླས་པས་དང་པོས་རྒྱུད་བྱིན་གྱིས་བརླབས།  གཉིས་པས་དབྱེར་མེད་དུ་བྱས།  གསུམ་པ་མན་གྱིས་བརྟན་པར་བྱས་པར་མོས་ཏེ།  སློབ་དཔོན་ལ་དྲིན་ལན་གྱི་ཚུལ་གྱིས་མེ་ཏོག་གཏོར་ནས་འདིའི་རྗེས་ཟློས་མཛོད།  བཅོམ་ལྡན་བདག་ལ་སྩལ་ལགས་ཀྱི།  །བཅོམ་ལྡན་བདག་ལ་བྱིན་གྱིས་རློབས།  །ཞེས་ལན་གསུམ་དང་།  སློབ་དཔོན་གྱིས་ཀྱང་མེ་ཏོག་གི་ཕྲེང་བ་སྤྱི་བོར་བཞག་སྟེ་བྱིན་གྱིས་བརླབ་པར་མོས་པ་མཛོད།  བཅོམ་ལྡན་འདི་ལ་སྩལ་ལགས་ཀྱི།  །བཅོམ་ལྡན་འདི་ལ་བྱིན་གྱིས་རློབས།  །ཞེས་ལན་གསུམ་དང་།  རྡོ་རྗེའི་སློབ་མ་འདི་རྣམས་ཀྱི་རྒྱུད་ལ་རིགས་གསུམ་སྤྱིའི་གསང་སྔགས་ཀྱི་བྱིན་རླབས་མ་ལུས་པ་འཇུག་པར་གྱུར་ཅིག་ཅེས་བརྗོད་ཅིང་མེ་ཏོག་འཐོར།  དེ་ནས་ཁྱེད་རང་རྣམས་རྗེ་བཙུན་འཇམ་པའི་དབྱངས་ཀྱི་ང་རྒྱལ་གྱིས་གདུགས་དཀར་པོ་གསེར་གྱི་ཡུ་བ་ཅན་རེ་ཐོགས་ཏེ་དཀྱིལ་འཁོར་ལ་བསྐོར་བ་ལན་གསུམ་བྱས་པའི་རྗེས་སུ་གདུགས་ལོགས་སུ་བཞག་སྟེ།  །དཀྱིལ་འཁོར་གྱི་ཤར་སྒོ་ནས་ལུས་ཐམས་ཅད་ས་ལ་ཕབ་པའི་ཕྱག་བྱས་པའི་མཐར།  ཁྱེད་རྣམས་སློབ་དཔོན་གྱིས་དཀྱིལ་འཁོར་པ་རྣམས་ལ་ཕུལ་བར་མོས་ཏེ་དཀྱིལ་འཁོར་གྱི་ཕྱོགས་ལ་དབུ་དུད་ཙམ་རེ་མཛོད།  སྔགས་དང་རྒྱུད་རྣམས་འཛིན་གྱུར་པའི།  །སློབ་མ་འདི་ནི་འབུལ་བ་ལགས།  །ཞེས་ཕུལ་བས་དཀྱིལ་འཁོར་པ་ཐམས་ཅད་ཀྱིས་ཀྱང་མགྲིན་གཅིག་ཏུ་དབུགས་དབྱུང་བར་མོས་པ་མཛོད།  ད་ནི་དཀྱིལ་འཁོར་སློབ་དཔོན་གྱུར།  །སྔགས་དང་རྒྱུད་རྣམས་འཛིན་འགྱུར་པ།  །སངས་རྒྱས་བྱང་ཆུབ་སེམས་དཔའ་དང་།  །ལྷ་རྣམས་ཀུན་གྱིས་མཐུན་པར་གསུངས།  སེམས་ཅན་རྣམས་ལ་སྙིང་བརྩེའི་ཕྱིར།  །ཁྱོད་ཀྱིས་དཀྱིལ་འཁོར་ཆོ་ག་བཞིན།  །ནན་ཏན་བསྐྱེད་དེ་འབྲི་བར་བྱ།  །སྒྲུབ་པ་པོ་རྣམས་རྒྱུད་ལ་སྦྱོར།  །ཞེས་གསུངས་ཏེ་དེའི་དོན་ནི་སྔགས་རྒྱུད་མན་ངག་འཛིན་པ་རྡོ་རྗེ་སློབ་དཔོན་ཆེན་པོ་ཡིན་པས།  དེའི་ལས་སུ་བྱ་བ་སེམས་ཅན་གྱི་དོན་རྒྱ་ཆེན་པོར་བགྱིས་ཤིག་པའི་དོན་ནི་རྗེས་སུ་གནང་བ་ཡིན་ལ།  དེ་ནས་དཔུང་བཟང་ལ་སོགས་པའི་རྒྱུད་གང་རུང་ཞིག་འདོན་པའམ།  མ་གྲུབ་ན་གཙོ་བོའི་སྔགས་ཚར་ཁ་ཡར་བ་ཞིག་འདོན།  དེ་ལྟར་དབང་ཐོབ་ནས་བསྲུང་རྒྱུའི་དམ་ཚིག་འདི་རྣམས་ཡིན་ནོ་ཞེས་ངོ་ཤེས་པར་བྱ་བའི་ཕྱིར་དུ་བསྲུང་བར་གདམས་པ་ནི།  ཤེས་རབ་ཕ་རོལ་ཕྱིན་བཀླགས་ཏེ།  །དམ་ཚིག་འདི་དག་བསྒོ་བར་བྱ།  །དེ་རིང་ཕྱིན་ཆད་ཁྱེད་རྣམས་ཀྱིས།  །སངས་རྒྱས་ཆོས་དང་དགེ་འདུན་དང་།  །བྱང་ཆུབ་སེམས་དཔའ་རྣམས་དང་ནི།  །གསང་སྔགས་རིག་སྔགས་ཚོགས་རྣམས་ལ།  །དད་པ་རབ་ཏུ་བརྟན་པར་བྱ།  །༡རྟག་པར་ཕྱག་རྒྱ་ཆེན་པོ་ལ།  །ཁྱད་པར་དུ་ཡང་མོས་པར་བྱ།  །༢དམ་ཚིག་ཅན་དང་མཛའ་བོ་དང་།  །བླ་མ་༤ལ་ཡང་གུས་པར་བྱ།  །༥ལྷ་རྣམས་ཀུན་ལ་སྡང་མི་བྱ།  །༦དུས་མཚམས་དག་ཏུ་མཆོད་པར་བྱ།  །སྟོན་༧པ་གཞན་གྱི་གཞུང་མི་མཆོད།  །༨རྟག་ཏུ་གློ་བུར་མགྲོན་མཆོད་བྱ།  །སྲོག་ཆགས་༩རྣམས་ལ་བྱམས་པའི་སེམས།  །རབ་ཏུ་བརྟན་པ་ཉེ་བར་གཞག  །ཐེག་༡༠པ་ཆེ་ལ་དགའ་རྣམས་ཀྱི།  །བསོད་ནམས་དག་ལ་ནན་ཏན་བསྐྱེད།  །བཟླས་༡༡བརྗོད་བྱེད་ལ་འབད་པ་ཡིས།  །གསང་སྔགས་སྤྱོད་ལ་བརྩོན་པར་བྱ།  །གསང་༡༢སྔགས་རྒྱུད་ལས་བསྟན་པ་ཡི།  །དམ་ཚིག་རྣམས་ཀྱང་བསྲུང་བར་བྱ།  །དམ་ཚིག་༡༣མེད་པ་རྣམས་ལ་ནི།  །སྔགས་དང་ཕྱག་རྒྱ་མི་སྦྱིན་ནོ།  །གསང་སྔགས་རྒྱུད་ནི་ལེགས་བསྲུངས་ཤིང་།  །དེ་ཡང་བདག་གིས་རྟོགས་པར་བྱ།  །ཞེས་གསུངས་པའི་དོན་ལ་གཉིས་ཀྱི།  དང་པོ་སྤྱིའི་དམ་ཚིག་བསྲུང་བ་ལ་གསུམ་གྱི་དང་པོ་ཆོས་འདི་བའི་དམ་ཚིག་བསྲུང་བ་ནི།  དབང་བསྐུར་ཐོབ་པའི་ཉི་མ་དེ་རིང་ཕྱིན་ཆད་ནས་ཁྱེད་རྣམས་ཀྱིས་དམ་ཚིག་འདི་དག་སྲུངས་ཤིག  །གང་བསྲུང་ན་སངས་རྒྱས་ཆོས་དང་དགེ་འདུན་ཏེ་ཐེག་ཆེན་གྱི་དཀོན་མཆོག་གསུམ་པོ་འདི་དུས་ཐམས་ཅད་དུ་མི་བཏང་ཞིང་།  དེ་དག་ལ་སྐྱབས་སུ་སོང་བའི་བསླབ་བྱ་རྣམས་གཟུང་བར་བྱའོ།  །གཉིས་པ་བྱང་ཆུབ་སེམས་དཔའི་སྡོམ་པ་བསྲུང་བ་ནི།  བྱང་ཆུབ་སེམས་དཔའ་རྣམས་དང་།  དེའི་སྡེ་སྣོད་དུ་གསུངས་པའི་ཚུལ་ཁྲིམས་གསུམ་ལ་སོགས་པའི་བསླབ་པ་ལ་ཡང་དག་པར་བསླབ་པར་བྱའོ།  །གསུམ་པ་འདས་པའི་ལྷ་རྣམས་ལ་དད་པར་བྱ་བ་ནི།  གསང་སྔགས་ཏེ་ལྷ་ཕོ་དང་།  རིག་སྔགས་ཏེ་ལྷ་མོ་སྟེ་དེ་གཉིས་ཀྱིས་བསྡུས་པའི་བྱ་རྒྱུད་ཀྱི་ལྷ་ཚོགས་ལ་བཟང་ངན་དང་མཆོག་དམན་དུ་འཛིན་པའི་མ་དད་པ་སྤངས་ནས་དད་པ་དང་གུས་པ་རབ་ཏུ་བརྟན་པར་བྱའོ།  །འདི་གསུམ་པ་སྤྱིའི་དམ་ཚིག་ཏུ་འཇོག་པའི་རྒྱུ་མཚན་ནི།  དབང་ཐོབ་པའི་གང་ཟག་དང་།  མ་ཐོབ་པའི་གང་ཟག་བྱ་རྒྱུད་ལ་འཇུག་པའི་སྔོན་དུ་ལམ་ཐུན་མོང་བ་ལ་སྦྱོང་བ་བྱེད་པས་ཀྱང་དམ་ཚིག་འདི་གསུམ་བསྲུང་དགོས་པའི་ཕྱིར་རོ།  །གཉིས་པ་དབང་གི་དམ་ཚིག་ལ་བཅུ་གསུམ་གྱི་དང་པོ་ནི།  དུས་རྟག་པར་ཕྱག་རྒྱ་ཆེན་པོ་སྟེ་རང་གི་འདོད་པའི་ལྷ་ལ་ལྷ་གཞན་ལས་ཁྱད་པར་དུ་གུས་པའི་མོས་པ་བྱ་ཞིང་ལྷ་བསྒྲུབས་པས་མ་གྲུབ་ན།  དེ་ལ་ཁྲོས་པས་རིག་སྔགས་བཅིང་པ་ལ་སོགས་པ་སྤོགས་ཆོག་ལྷ་ལ་མ་གུས་པ་ཡིན་པས་མི་བྱའོ།  །གཉིས་པ་ནི།  དམ་ཚིག་ཅན་བྱ་རྒྱུད་ཀྱི་སྒོར་ཞུགས་པའི་གང་ཟག་དབང་ཐོབ་ཅིང་དམ་ཚིག་དང་སྡོམ་པར་ལྡན་པ་ལ་གུས་པར་བྱས་ལ་དེའི་སྐྱོན་བརྗོད་པ་དང་།  ལུས་སྲོག་ལ་ཐོ་འཚམས་པའི་བར་གྱི།  གནོད་པར་འགྱུར་བའི་ལས་མི་བྱེད་པའོ།  །གསུམ་པ་ནི།  སངས་རྒྱས་ཀྱི་བསྟན་པ་ལ་ཞུགས་པའི་གང་ཟག་ལས་འབྲས་དང་བྱང་ཆུབ་ཀྱི་སེམས་ལ་ནན་ཏན་དུ་བྱེད་པ་པོ་ནི་རང་གི་མཛའ་བོ་ཡིན་ལ་དེ་རྣམས་ལ་གུས་པར་བྱ་བའོ།  །བཞི་པ་ནི།  རང་ལ་དབང་དང་རྒྱུད་དང་ཐུན་མོང་དང་མཆོག་གི་དངོས་གྲུབ་སྒྲུབ་པའི་མན་ངག་སྟེར་བའི་བླ་མ་ལ་གུས་པར་བྱ་ཞིང་།  རིགས་དང་ཚུལ་ཁྲིམས་དང་ཡོན་ཏན་ལ་སོགས་པའི་སྒོ་ནས་བརྙས་པ་དང་སྨད་པར་མི་བྱའོ།  །ལྔ་པ་ནི།  དབང་དང་ནོར་རྒྱས་པ་ལ་སོགས་པའི་ཕྱིར་གནོད་གནས་ལ་སོགས་པའི་ལྷ་བསྒྲུབས་པས་ཆོ་ག་ཚུལ་བཞིན་མ་གྲུབ་པ་ལ་བརྟེན་ནས་དེ་རྣམས་མ་བྱུང་ན་ལྷ་ལ་ཁྲོས་ཤིང་ཞེ་སྡང་བའི་སེམས་མི་བྱའོ།  །དྲུག་པ་ནི།  ཚེས་བརྒྱད་ལ་སོགས་པའི་དུས་མཚམས་བཟང་པོ་དག་ལ་འདོད་པའི་ལྷ་དང་དཀོན་མཆོག་ལ་མཆོད་པ་རྒྱ་ཆེན་པོས་མཆོད་པར་བྱའོ།  །བདུན་པ་ནི།  དབང་ཕྱུག་དང་ཁྱབ་འཇུག་ལ་སོགས་པའི་སྟོན་པ་གཞན་རྣམས་ཀྱི་གཞུང་ནས་འབྱུང་བ་ལྟར་མི་མཆོད་ཅིང་།  དེའི་མན་ངག་དང་རྣལ་འབྱོར་ལ་ཉམས་ལེན་མི་བྱེད་པའོ།  །བརྒྱད་པ་ནི།  དུས་རྟག་ཏུ་གློ་བུར་དུ་འོངས་པའི་མགྲོན་ལ་ཁ་ཟས་དང་གནས་མལ་སོགས་ཀྱི་མཆོད་པ་ཅི་འགྲུབ་བྱ་སྟེ།  དོན་བསོད་ནམས་ལྷག་པར་ཆེ་བའི་ཕྱིར་རོ།  །དགུ་པ་ནི།  སྲོག་ཆགས་ཕྲ་མོ་གྲོག་སྦུར་གྱི་བར་རྣམས་ལ་བྱམས་པའི་སེམས་བསྐྱེད་ནས་ཕན་པ་ཁོ་ན་བྱའི་གནོད་པའི་ལས་རྣམ་པ་ཐམས་ཅད་དུ་མི་བྱེད་པའི་སྡོམ་སེམས་རབ་ཏུ་བརྟན་པ་ཉེ་བར་གཞག་གོ།  །བཅུ་པ་ནི།  ཐེག་པ་ཆེན་པོ་གསང་སྔགས་ལ་ཞུགས་པའི་གང་ཟག་བྱང་ཆུབ་ཀྱི་སྤྱོད་པ་ལ་དགའ་བ་རྣམས་ཀྱི་བསོད་ནམས་འཕེལ་བར་བྱེད་པའི་ཐབས་བཟླས་བརྗོད་དང་སྡོམ་པ་བཟུང་བ་སོགས་ལ་ནན་ཏན་བསྐྱེད་པའོ།  །བཅུ་གཅིག་པ་ནི།  བཟླས་བརྗོད་བྱེད་པ་ལ་འབད་པའི་རྣལ་འབྱོར་པས་གསང་སྔགས་ཟློས་པའི་སྤྱོད་ལམ་དང་ལྡན་པས་བཟླ་དགོས་ལ།  དེའི་སྤྱོད་ལམ་ཡང་།  ཟློས་པས་ཆོ་ག་ལ་གནས་ནས།  །གླུ་གར་རྩེད་མོ་མི་བྱ་སྟེ།  །ཞེས་སོགས་གསུངས་པ་རྣམས་སོ།  །དེ་ལྟ་བུའི་སྤྱོད་ལམ་གྱིས་བཟླས་བརྗོད་ལ་བརྩོན་པར་བྱའོ།  །བཅུ་གཉིས་པ་ནི།  གསང་སྔགས་སོ་སོའི་རྒྱུད་དམ་ཚིག་གསུམ་བཀོད་ལ་སོགས་པ་ནས་བསྟན་པའི་དམ་ཚིག་སྟེ།  དམ་པའི་ཆོས་ཀྱང་སྤང་མི་བྱ་ཞེས་སོགས་རྣམས་ཀྱང་འབད་པས་བསྲུང་བར་བྱའོ།  །བཅུ་གསུམ་པ་ནི།  དབང་བསྐུར་མ་ཐོབ་པ་དང་།  ཐོབ་ཀྱང་ཉམས་པས་དམ་ཚིག་མེད་པའི་གང་ཟག་རྣམས་ལ་ནི་གསང་སྔགས་ཀྱི་ཆོ་ག་ཞིབ་མོ་དང་།  རྒྱུད་དང་མན་ངག་རྣམས་ལེགས་པར་བསྲུང་ཞིང་སྦ་བར་བྱའོ།  །དེ་ལྟ་བུའི་སྤྱིའི་དམ་ཚིག་དང་།  ཁྱད་པར་གྱི་དམ་ཚིག་བཅུ་གསུམ་པོ་དེའང་བདག་གིས་ཉམས་སུ་བླང་རྒྱུའི་དམ་ཚིག་ཏུ་རྟོགས་པར་བྱའོ། །ཞེས་དེ་དག་ངོ་ཤེས་པར་བྱས་ནས་སྤང་བླང་ཚུལ་བཞིན་དུ་གྱིས་ཤིག་ཅེས་པའི་དོན་ཡིན་ནོ་ཞེས་བརྗོད།  །མདོར་ན་དབང་གི་གནས་སྐབས་སུ་ཐོབ་ཅིང་ཁས་བླངས་པའི་དམ་ཚིག་ལ་སྲུང་སྡོམ་བགྱིད་སྙམ་པས་འདིའི་རྗེས་ཟློས་ལན་གསུམ་མཛོད།  གཙོ་བོས་ཇི་ལྟར་སོགས།  །ཞེས་དམ་ཚིག་བསྡུས་ཏེ་འཛིན་པར་ཁས་བླངས་ནས།  དབང་རྫོགས་པར་ཐོབ་པའི་གཏང་རག་ཏུ་མཎྜལ་ཕུལ།  སླར་ཡང་ལུས་དང་ལོངས་སྤྱོད་ཐམས་ཅད་སློབ་དཔོན་ལ་འབུལ།  ཆ་ཤས་ནས་བཞེས་ལ་ལོངས་སྤྱོད་དུ་གསོལ་སྙམ་པས་འདིའི་རྗེས་ཟློས་ལན་གསུམ་མཛོད།  དེང་ནས་བརྩམས་ཏེ་བདག་བྲན་དུ།  །ཁྱེད་ལ་བདག་ནི་འབུལ་ལགས་སོགས།  །དེ་རྣམས་ཀྱི་སྒོ་ནས་རིགས་གསུམ་སྤྱིའི་དཀྱིལ་འཁོར་དུ་དབང་ལེགས་པར་གསན་པ་ཡིན་པས་རང་གཞན་གྱི་དོན་རྒྱ་ཆེན་པོ་མཛད་པར་ཞུ།  བསོད་ནམས་འདི་ཡིས་སོགས་ཀྱིས་དགེ་བ་བསྔོས་ལ་སློབ་མ་རང་གནས་སུ་བཏང་།  གསུམ་པ་རྗེས་ཆོག་ནི།  མཆོད་པ་ཁ་གསོས་ལ་བསང་སྦྱང་བྱིན་གྱིས་བརླབ།  མཚན་སྔགས་རེ་རེ་བཞིན་སྦྱར་བའི་ཆུ་གཉིས་ཉེར་སྤྱོད་རོལ་མོ་དང་བཅས་པས་མཆོད།  བསྟོད་པ་གང་རིགས་ཀྱིས་བསྟོད།  འདོད་དོན་ཞུས་ལ་ཡིག་བརྒྱས་ལྷག་ཆད་ཁ་བསྐང་།  མ་འབྱོར་པ་དང་ཉམས་པ་དང་།  །གང་ཡང་བདག་རྨོངས་བློ་ཡིས་ནི།  །བགྱིས་པ་དང་ནི་བགྱིད་སྩལ་བ།  །དེ་ཀུན་མགོན་པོས་བཟོད་པར་མཛོད།  །ཅེས་ནོངས་པ་བཟོད་པར་གསོལ།  རས་བྲིས་ལ་དམིགས་ཏེ།  ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ།  ཇི་སྲིད་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་མི་གནས་པའི་མྱ་ངན་ལས་འདས་པའི་ས་ལ་མ་བཞག་གི་བར་དུ་རྒྱལ་བ་རྣམས་མྱ་ངན་ལས་མི་འདའ་བར་བརྟན་པར་བཞུགས་སུ་གསོལ།  བྱེ་བྲག་ཏུའང་རས་བྲིས་ཀྱི་དཀྱིལ་འཁོར་འདི་ཉིད་ལ་བསྐྱེད་ཅིང་སྤྱན་དྲངས་པའི་ལྷ་ཚོགས་ཐམས་ཅད་ཇི་སྲིད་འབྱུང་བ་བཞིའི་གནོད་པས་མ་ཞིག་གི་བར་དུ་བརྟན་པར་བཞུགས་སུ་གསོལ།  བརྟན་པར་བཞུགས་ནས་བདག་དང་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ།  ཨོཾ་སུ་པྲ་ཏིཥྛ་བཛྲཱ་ཡ་སྭཱ་ཧཱ།  ཞེས་བརྗོད་ཅིང་མེ་ཏོག་གཏོར་ལ་ལས་ཀྱི་རྗེས་བསྡུ།  དགེ་བ་འདི་ཡིས་མྱུར་དུ་བདག  །རིགས་གསུམ་མགོན་པོ་འགྲུབ་གྱུར་ནས།  །འགྲོ་བ་གཅིག་ཀྱང་མ་ལུས་པ།  །དེ་ཡི་ས་ལ་འགོད་པར་ཤོག  །ཅེས་སོགས་བསྔོ་སྨོན་གང་ཤེས་དང་།  ཆེ་བའི་ཆེ་མཆོག་གམ།  སྟོན་མཆོག་དམ་པ་ལྟ་བུའི་མདོ་རྒྱུད་ལས་བྱུང་བའི་བཀྲ་ཤིས་པའི་ཚིགས་སུ་བཅད་པ་རྒྱ་ཆེར་བརྗོད་ཅིང་མེ་ཏོག་གི་ཆར་དབབ།  དཀར་གསུམ་གྱི་དགའ་སྟོན་ལ་ལོངས་སྤྱོད་པར་བྱའོ།    ། ༈ 
ཞར་བྱུང་རྡུལ་ཚོན་ལ་བརྟེན་པའི་མི་འདྲ་བའི་ཁྱད་ཆོས།  ཉིན་དང་པོ་ས་ཆོག་གི་སྐབས།  སྔར་ས་ཆོག་མ་བྱས་པའི་ཕྱོགས་སུ་ནི།  ས་བརྟག་པ་དང་།  བསླང་བ་དང་།  སྦྱང་བ་དང་།  གཟུང་བ་སོགས་རྒྱས་པར་བྱ་དགོས་མོད།  མདོར་བསྡུ་ན་གང་དུ་བྱ་བའི་གནས་དེར་ཕྱག་དར་དང་།  སྦྱང་ནུལ་བྱ།  རྒྱན་དགྲམ།  གཏོར་མ་ཆ་གསུམ་བཤམ།  སྐྱབས་འགྲོ་ནས་བཟུང་དཀྱིལ་འཁོར་བསྡུ་བའི་བར་གྱི་བདག་བསྐྱེད་དང་།  གཏོར་མ་བྲན་ལ་བྱིན་གྱིས་བརླབས་པ་ནས་བརྩམས་གོང་དང་འདྲ་བ་ལས།  ཕྱོགས་སྐྱོང་ལ་འབུལ་བའི་མཐར།  སའི་ཕྱོགས་འདིར་རིགས་གསུམ་གྱི་དཀྱིལ་འཁོར་ཆེན་པོ་བཞེངས་ཏེ་བསྒྲུབ་ཅིང་མཆོད་པ་དང་།  བདག་ཉིད་འཇུག་ཅིང་དབང་བླང་བ་དང་།  ཞེས་སམ་སློབ་མ་གཞུག་ཅིང་དབང་བསྐུར་བར་འཚལ་ན།  ཕྱོགས་སྐྱོང་བ་འཁོར་དང་བཅས་པ་རྣམས་ཀྱིས་སའི་ཕྱོགས་འདི་བདག་ལ་སྩལ་ཞིང་དཀྱིལ་འཁོར་གྱི་ཆོ་ག་མཐར་ཕྱིན་པའི་སྟོང་གྲོགས་མཛད་དུ་གསོལ།  ཞེས་བརྗོད་ཅིང་གཤེགས་གསོལ་བྱ་བ་ནི།  ཕྱོགས་སྐྱོང་ལས་བསླང་བའོ།  །གཏོར་མ་གཉིས་པ་བྱིན་གྱིས་བརླབས་ནས་འབྱུང་པོ་སྤྱི་ལ་ཕུལ་བའི་མཐར།  སའི་ཕྱོགས་འདིར་སོགས་ནས།  འབྱུང་པོའི་ཚོགས་འཁོར་དང་བཅས་པ་རྣམས་ཀྱིས་སའི་ཕྱོགས་འདི་བདག་ལ་སྩལ་ཞིང་སོགས་བརྗོད་པས་བསླངས་ཏེ།  འདི་གཉིས་ནི་ཞི་བས་བསླང་བའོ།།  །།
དེ་ནས་ཁྲོ་བོའི་ང་རྒྱལ་གྱིས་བགེགས་གཏོར་བསྔོས་ལ།  གདོན་རྣམས་རང་གི་གནས་སུ་སོང་ཞེས་པའི་མཇུག་ཏུ་ས་ཕྱོགས་འདི་ཉིད་ན་གནས་པའི་འབྱུང་པོ་གསང་སྤྱོད་ལ་ལྟ་བར་མི་དབང་བ་རྣམས་དང་།  དཀྱིལ་འཁོར་གྱི་ཆོ་ག་བྱེད་པ་ལ་བར་ཆད་བྱེད་པའི་བགེགས་དང་།  ལོག་འདྲེན་གྱི་རིགས་གང་ཡོད་པ་ཐམས་ཅད་གཏོར་མ་འདིས་ཚིམ་པར་གྱིས་ལ་སའི་ཕྱོགས་འདིར་མ་གནས་པར་གཞན་དུ་སོང་ཞིག  །ཅེས་བརྗོད་ལ་གཏོར་མ་སྒོ་དྲུང་དུ་དོར།  བདུད་རྩི་འཁྱིལ་བ་སོགས་ཁྲོ་བོའི་སྔགས་བརྗོད་ཅིང་རོལ་མོ་དྲག་ཏུ་བྱ།  ས་ཕྱོགས་གུ་གུལ་གྱིས་བདུག  །ཡུངས་ཀར་གྱིས་བྲབ་པས་བགེགས་རྣམས་བྱེར་བར་བསམ་པ་ནི་དྲག་པོས་བསླང་བ་སྟེ་ས་སློང་བའི་ཆོ་གའོ།  །རང་འཇམ་དབྱངས་ཀྱི་ང་རྒྱལ་གྱིས་ས་དེའི་དབུས་སུ་ལག་པ་གཉིས་བཞག་ལ།  ཨོཾ་ཧ་ན་ཧ་ན་ཀྲོ་དྷ་ཧཱུྃ་ཕཊ།  ཅེས་ལན་གསུམ་བརྗོད་པས་ས་རྡོ་རྗེའི་རང་བཞིན་དུ་བསམ།  ཨོཾ་བྷུ་ཁཾ་ལན་གསུམ་བརྗོད་པས་ས་ནམ་མཁའི་རང་བཞིན་དུ་བསམ་པ་ནི་ས་སྦྱང་བའོ།  །དེ་ནས་སྙིང་ག་ནས་སྤྲོས་པའི་ཏིང་ངེ་འཛིན་གྱི་ཕུར་བུ་བགེགས་ལ་བཏབ་པར་བསམ་ཞིང་།  ཨོཾ་བཛྲ་མུངྒ་ར་ཀཱི་ལ་ཡ་ཨཱ་ཀོཊྚ་ཡ་ཧཱུྃ་ཕཊ།  ཅེས་བརྗོད།  ཨོཾ་བཛྲ་རཀྵ་རཀྵ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ།  ཞེས་བཟླས་ཤིང་གནས་ཁང་རྡོ་རྗེའི་ས་གཞི་ར་བ་དྲྭ་བ་གུར་བླ་རེ་ཕྱི་རོལ་དུ་ཡེ་ཤེས་ཀྱི་མེ་རབ་ཏུ་འབར་བས་བསྐོར་བའི་སྲུང་བའི་འཁོར་ལོར་གྱུར་ཅེས་བརྗོད་ཅིང་བསམ་པ་ནི་བསྲུང་བའོ།  གནས་འདིར་རིགས་གསུམ་གྱི་དཀྱིལ་འཁོར་ཆེན་པོ་བཞེངས་ཏེ་སེམས་ཅན་གྱི་དོན་རྒྱ་ཆེན་པོ་བསྒྲུབ་པར་བགྱིའོ།  །ཞེས་བརྗོད་ཅིང་བསམ་པ་ནི་གཟུང་བའོ།  །དེ་ནས་ས་གཞི་ལ་དྲི་བཟང་གིས་བྱུག  །ཐིག་ཆེན་བརྒྱད་ཙམ་མམ།  ཡང་ན་སྐྱ་ཐིག་རྫོགས་པར་གདབ་སྟེ།  ས་སྟེགས་གྲུ་བཞིར་སྙོམས་པའི་སྟེང་།  །ཤར་ནུབ་ཚངས་ཐིག་ལེགས་པར་བཏབ།  །དབུས་ཀྱི་མཚན་མའི་གཡས་གཡོན་དུ།  །རྟགས་བྱས་དེ་བར་སྲད་བུ་ཡིས།  །ལྷོ་བྱང་རྟགས་བྱས་ཚངས་གཉིས་གདབ།  །ཤར་ནུབ་ཚང་བཞིན་ལྷོ་བྱང་ལའང་།  །མཚན་མ་བྱས་པ་དབུས་བར་གྱི།  །སྲད་བུས་མཚམས་སུ་བྱ་རྗེས་བྱ།  །དེ་ལ་ཟུར་ཐིག་གཉིས་པོ་གདབ།  །དཀྱིལ་འཁོར་ཚད་ཀྱིས་ཟླུམ་པོར་བསྐོར།  །དེ་རྒྱབ་པདྨ་རྡོ་མེ་འོད།  །ཆ་ཕྲན་གཉིས་གཅིག་དྲུག་ཏུ་བསྐོར།  །ཚངས་རྩེ་ནས་ནི་ཚངས་རྩེའི་བར།  །ལོགས་གཏུབ་གྲུ་བཞིར་ལོགས་ཟུར་ཐིག  །ཕྲད་མཚམས་རྩ་ཐིག་གྲུ་བཞིར་གདབ།  །ཚངས་རྩེ་ནས་ནི་རྩ་རྩེའི་བར།  །ལོགས་ཐིག་ཆ་བཞིར་བགོས་པ་ཡི།  །ཚངས་ཐིག་གཡས་གཡོན་བྱ་རྗེས་ནི།  །གཉིས་ཕྱིན་སྟེང་དང་ཟུར་ཟླུམ་དག  །ཕྲད་མཚམས་སུ་ཐིག་གྲུ་བཞིར་གདབ།  །པུཤུ་རྩ་ཐིག་བར་གྱི་ཆ།  །དང་པོ་དབུས་དོར་མཐའ་གཉིས་གདབ།  །རྩིག་པ་འདོད་སྣམ་ཕ་གུ་འབྱུང་།  །ཕྱི་མ་ཕྱེད་གདབ་ཕྱི་ཕྱེད་གདབ།  །དྲྭ་ཕྱེད་མདའ་ཡབ་པུ་ཤུ་འབྱུང་།  །ཚངས་ཐིག་རྒྱུད་ཀྱི་ནང་ཐིག་དང་།  །ལོག་ཐིག་ཕྲད་པའི་བྱ་རྗེས་སྟེང་།  །ཤར་ནུབ་ལྷོ་བྱང་རིང་བཏབ་པས།  །སྒོ་ཡི་ཚད་དང་རྟ་བབས་འབྱུང་།  །ཚངས་ཐིག་གཡས་གཡོན་སྒོའི་ཆ་ཆེན།  །དང་པོ་ཕྱེད་གདབ་ཕྱི་ཕྱེད་གདབ།  །གཉིས་པ་ཆ་བཞིར་བགོས་པ་དེའི།  །རྩ་ཐིག་ཚངས་ཐིག་འཛོམས་པ་ཡི།  །གཡས་གཡོན་ཆ་ཕྲན་གཉིས་རེ་ནས།  །གྱེན་དུ་ཕ་གུའི་ཕྱི་མཐའི་བར།  །ཐིག་འཐེན་སྒོ་ཁྱུད་གཡས་གཡོན་དུ།  །ཆ་ཕྲན་གཉིས་རེ་སྒོ་འགྲམ་ཡིན།  །དེ་ནས་མདའ་ཡབ་ནང་ཐིག་བར།  །སྒོ་ལོགས་འཕྲེད་དུ་ཡ་ཕུབས་ཡིན།  །སྒོ་ཁྱུད་ཕྱི་རུ་ཆ་ཕྲན་གཅིག  །དོར་བའི་ཐིག་གི་ཡས་མར་རྩེ།  །རྩིག་ཕྱི་ཕ་གུའི་ནང་ཐིག་རེག  །དེ་ནས་ནང་དུ་ཆ་ཕྲན་གཉིས།  །དེ་ནས་གྱེན་དུ་མདའ་ཡབ་ཀྱི།  །ཕྱི་ཐིག་ལ་རེག་གྲུ་བཞིར་སྦྲེལ།  །དེ་ཕྱིར་ཆ་ཕྲན་གཅིག་དོར་བའི།  །མུན་འཁོར་ཕ་གུའི་ནང་ཐིག་རེག  །མུན་པའི་ལོགས་སུ་ཀ་བ་དང་།  །ཀ་རྒྱན་ཆ་ཕྲན་རེ་རེ་སྟེ།  །ཡས་མར་འདོད་བུའི་ཐིག་ལ་གཏུགས།  །རྟ་བབས་ཆ་བཞིར་དང་པོ་ནི།  །ཀ་རྒྱན་དང་མཉམ་ཕྱི་མ་གསུམ།  །ཆ་ཕྲན་རེས་ཐུང་ཚངས་རྩེ་ཡི།  །གྲུ་གསུམ་པད་ཆོས་གདུགས་ཀྱི་ས།  །དབུས་དོར་མཐའ་གཉིས་གདབ་པ་ལ།  །པད་རྒྱ་ཆོས་འཁོར་ཆ་གཉིས་གཉིས།  །དེ་སྟེང་གདུགས་ལ་ཆ་ཕྲན་གཅིག  །པདྨའི་གཡས་གཡོན་ཆ་ཕྲན་རེ།  །དོར་བ་རི་དྭགས་རེ་རེ་བྲི།  །གླང་རྒྱབ་སྣམ་གཉིས་ཕྱི་ཐིག་དང་།  །ཚངས་ཐིག་འཛོམས་སྟེང་ནས་བཟུང་སྟེ།  །ཆ་གཉིས་དབུས་བསྐོར་སྣམ་དང་པོའི།  །ཕྱི་ཐིག་ཚངས་འཛོམས་གཡས་གཡོན་དུ།  །ཆ་ཕྲན་གཉིས་བརྒལ་ཆ་གཅིག་གིས།  །བསྐོར་ལ་གཡས་གཡོན་རྭའི་བབ་ཚུལ།  །ཚངས་ཕྱིར་གསུམ་དང་པུ་ཕྱིར་གཅིག  །ཕྱིན་ཏེ་ཀ་རྒྱན་རྩེ་ནས་བསྐོར།  །དེ་ནས་འཕྲེང་གཉིས་ཕྱི་རུ་གཅིག   །ཕྱིན་ཏེ་སྔ་མའི་ཚད་དེས་བསྐོར།  །པད་ཆོས་འོག་ཏུ་དབུས་ཀྱི་རྭ།  །རྩ་རྒྱ་ཆ་ཆེན་རྩེ་མོ་ཕྱེད།  །རྩ་ཐིག་ནང་དུ་ཆ་ཆེན་གཅིག  །དོར་བར་ལྷ་སྣམ་གྲུ་བཞིར་གདབ།  །དེ་དབུས་ཆ་ཆེན་གསུམ་པོ་ཡི།  །དབུས་དང་ཕྱོགས་བཞིར་ཆ་ཆེན་དེའི།  །ཟླུམ་པོར་བསྐོར་བ་ལྷའི་སྟེགས་བུ།  །ཞེས་སོ།  །དེ་ལྟ་བུའི་ལྷ་གནས་ཀྱི་དབུས་སུ་དྲིའི་ཐིག་ལེ་གྲུ་བཞི་དང་།  ཕྱོགས་བཞིར་ཟླུམ་པོའི་སྟེང་དུ་མེ་ཏོག་གི་ཚོམ་བུ་ལྔ་བཀོད།  དེ་རྣམས་སྟེང་དུ་མཉྫིའི་ཁར་ས་ལྷའི་མཎྜལ་ཚོམ་བུ་བཅས་དང་།  གཞན་མཆོད་པ་དང་གཏོར་མ་ལ་སོགས་རས་བྲིས་ཀྱི་སྐབས་བཞིན་བཤམ།  ནུབ་གསུམ་དུ་བྱེད་ན་འདི་ཡན་ཆད་ནུབ་དང་པོ་ས་ཆོག་སྟེ་སྤྱི་རྒྱུད་ཀྱི་དགོངས་པའོ།  །གལ་ཏེ་ས་ཆོག་བྱས་མ་ཐག་སྟ་གོན་བྱེད་དགོས་པ་བྱུང་ན་གོང་ལྟར་བདག་བསྐྱེད་སྔོན་དུ་འགྲོ་བས་གཏོར་མ་དང་མཆོད་པ་བྱིན་རླབས་བྱ།  ལས་ཐིག་ཚར་ནས་ལྷའི་ང་རྒྱལ་དྲན་ཙམ་བྱས་ནས་སྟ་གོན་ལ་འཇུག་ཀྱང་རུང་།  །ཉིན་གཉིས་པ་སྟ་གོན་ལ་གཞན་ཐམས་ཅད་རས་བྲིས་ཀྱི་སྐབས་དང་འདྲ་བ་ལས།  དབང་བསྐུར་དང་འབྲེལ་ན་སློབ་མ་སྟ་གོན་ཚར་བའི་རྗེས་དང་།  སྒྲུབ་མཆོད་དཀྱུས་མ་གཏོར་མ་བཏང་ཚར་བའི་རྗེས་སུ།  སློབ་དཔོན་གྱི་མདུན་དུ་གཞི་གཙང་མའི་སྟེང་དུ་རྡོ་རྗེའི་རྩེས་དབུས་སུ་ཚོན་དཀར་པོ་ལ་ར།  ཤར་དུ་དམར་པོ་ལ་ཨཾ།  ལྷོར་སེར་པོ་ལ་ཀཾ  །ནུབ་ཏུ་ལྗང་གུ་ལ་ཝ།  བྱང་དུ་ནག་པོ་ལ་ཧ་བྲི།  སོ་སོའི་ཁ་དོག་དང་མཐུན་པའི་ཐིག་སྐུད་རྣམས་ཀྱང་བཞག  །མཆོད་པ་ལྔ་བཤམ།  ཐིག་ཚོན་བསང་སྦྱང་བྱས་ལ།  སྟོང་པའི་ངང་ལས་ཐིག་ཚོན་སོ་སོ་ལ་བྲིས་པ་ལྟར་གྱི་ཡིག་འབྲུ་རྣམས་སུ་གྱུར།  དེ་ལས་འོད་ཟེར་འཕྲོས་པས་ཕྱོགས་བཅུའི་དེ་བཞིན་གཤེགས་པ་ཐམས་ཅད་སྤྱན་དྲངས་ཏེ་ཡིག་འབྲུ་རྣམས་ལ་ཐིམ་པས།  ཐིག་ཚོན་དཀར་པོར་ལས་ཆོས་དབྱིངས་ཡེ་ཤེས་དཀར་པོ།  དམར་པོ་ཨཾ་ལས་རྒྱལ་བ་ཐུབ་དཀའ་དམར་པོ།  སེར་པོ་ཀཾ་ལས་ཐུབ་པ་གསེར་འོད་སེར་པོ།  ལྗང་གུ་ཝ་ལས་ཐུབ་པ་བྱང་ཆུབ་སྙིང་པོ་ལྗང་གུ།  ནག་པོ་ཧ་ལས་ཕྱག་ན་རྡོ་རྗེ་ནག་པོ་རྣམས་ངོ་བོ་ཡེ་ཤེས་ལྔའི་རང་བཞིན་ལ་རྣམ་པ་ལྷ་སྐུ་སྣང་ལ་རང་བཞིན་མེད་པ་ཕྱག་རྒྱ་སྣ་ཚོགས་ཀྱིས་བཞུགས་པར་བསམས་ཏེ།  ཚོན་ལ།  འདི་ནི་ཆོས་དབྱིངས་དག་པ་སྟེ།  སེམས་ཅན་ཁམས་ནི་རྣམ་སྦྱོང་བ།  །འདི་ནི་བདག་ཉིད་དེ་བཞིན་གཤེགས།  །ཉེས་པ་ཐམས་ཅད་རྣམ་པར་སྤངས།  །ཞེས་དང་།  ན་མཿསརྦ་ཏ་ཐཱ་ག་ཏེ་བྷྱཿ  སརྦ་མུ་ཁེ་བྷྱཿ  ཨ་ས་མེ།  པ་ར་མེ།  ཨ་ཙ་ལེ།  ག་ག་ནེ།  སྥ་ར་ཎེ།  སརྦ་ཏྲ་ག་ཏེ་སྭཱ་ཧཱ།  ཞེས་དང་།  ཨོཾ་ཙི་ཏྲས་མ་ཡ་མཱ་ཏི་ཀྲ་མ་ཧཱུྃ་ཞེས་པས་ཚོན་དང་།  ལས་སྔགས་བརྒྱ་རྩ་བརྒྱད་བཟླས་པས་ཐིག་བྱིན་གྱིས་བརླབ།  ཨོཾ་བཛྲ་པུཥྤེ་སོགས་ནས་ནཻ་ཝི་དྱཱ་ཨཱཿཧཱུྃ།  ལྷ་རྣམས་ཞུ་བ་ལས་བྱུང་བའི་ཡེ་ཤེས་ལྔའི་རང་བཞིན་གྱི་ཐིག་དང་ཚོན་དུ་གྱུར་པར་བསམས་ལ།  གཡོན་པའི་མཐེབ་སྲིན་གྱིས་ཡི་གེ་རྣམས་བསུབ།  ལས་སྔགས་བརྗོད་ཅིང་ཐིག་སྐུད་རྣམས་སོར་མོ་ལྔའི་སྟེང་དུ་རེ་རེ་ནས་བཞག་པ།  དང་པོ་སོ་སོ་དང་དེ་ནས་ལྷན་ཅིག་བསྒྲིལ་ལ་རྡོ་རྗེ་ལ་དཀྲིས་ཏེ་དྲི་བཟང་གི་ཆུས་གཏོར།  འདི་དག་ནི་རྡོ་རྗེ་འཆང་གི་བྱ་རྒྱུད་སྤྱི་རྣམ་དང་།  འཇམ་དབྱངས་དཀོན་ལྷུན་གྱི་བྱ་སྤྱོད་སྤྱིའི་ཐིག་ཚོན་བྱིན་རླབས་ནས་བཤད་པ་བཞིན་བྲིས་པ་ཡིན་ཅིང་།  པཎ་ཆེན་གུ་གེ་པའི་འཇམ་དབྱངས་དཀར་པོ་ལྷ་ལྔའི་དཀྱིལ་ཆོག་ལས།  བསང་སྦྱང་།  སྟ་གོན་གྱི་ལྷའི་ཐུགས་ཀ་ནས་ཡེ་ཤེས་ཀྱི་ཐིག་དང་།  ཚོན་སྤྱན་དྲངས་ཤིང་ཐིམ་པས་ཡེ་ཤེས་ཀྱི་རང་བཞིན་གྱི་ཐིག་ཚོན་དུ་གྱུར་པར་བསམས་ལ།  གཙོ་བོའི་སྔགས་ཉེར་གཅིག་བརྗོད་ཅིང་མིག་གིས་བལྟས་པས།  མང་པོར་སྤར་བར་བསྒོམ་མོ།  །ཞེས་གསུངས་པས་དེ་ཙམ་གྱིས་ཀྱང་ཆོག་པར་མངོན།  གང་ལྟར་ཡང་སྔར་རྗེས་ཆོ་ག་མ་ཚར་ན་སྐབས་འདིར་བྱའོ།  །དེ་ནས་སློབ་དཔོན་རྡོ་རྗེ་དྲིལ་བུ་འཛིན་པས་ལངས་ཏེ།  ནམ་མཁར་རིགས་གསུམ་གྱི་དཀྱིལ་འཁོར་མངོན་སུམ་བཞིན་དུ་བཞུགས་པར་བསམས་ལ།  ཨོཾ་སརྦ་ཏ་ཐཱ་ག་ཏ་ཏྲི་ཀུ་ལ་ནཱ་ཐ་མཎྜལ་ས་པ་རི་ཝཱ་ར་ཨརྒྷཾ་སོགས་ཀྱིས་མཆོད།  སྐུ་གསུང་ཐུགས་འཇམ་སོགས་ཀྱིས་བསྟོད།  རང་གཙོ་བོ་དང་།  སློབ་མ་བདུད་རྩི་འཁྱིལ་པར་གྱུར་པའི་མོས་པས།  སློབ་དཔོན་དཀྱིལ་འཁོར་གྱི་ཤར་ནས་ནུབ་ཏུ་ཕྱོགས་པས།  ཛཿཛཿཛཿ  བརྗོད་ཅིང་སློབ་མ་ནུབ་ནས་ཤར་དུ་ཕྱོགས་པ་ལ་ཐིག་སྐུད་གཏད།  དེས་ཀྱང་ཛཿཛཿཛཿབརྗོད་ཅིང་བླང་གཉིས་ཀས་ཐིག་སྐུད་ལྟེ་བའི་ཐད་དུ་བཟུང་སྟེ།  སློབ་དཔོན་གྱིས།  ནམ་མཁའ་གང་བའི་དེ་བཞིན་གཤེགས།  །འགྲོ་དོན་མཛད་དུས་འདིར་ལགས་ན།  །ཁྱེད་རྣམས་འདིར་ནི་གཤེགས་གསོལ་བར།  །ཐིག་སྐུད་སྒྲས་ནི་སྐུལ་མ་འདེབས།  ཞེས་བརྗོད་ཅིང་།  ཐིག་སྐུད་ཀྱི་སྒྲ་ལས་ཀྱང་དེ་ལྟ་བུ་ཞིག་བྱུང་བར་བསམས་ལ།  ཨོཾ་སཱུ་ཏྲཾ་ས་མ་ཡ་མཱ་ཏི་ཀྲ་མ་ཧཱུྃ་ཞེས་བརྗོད་ཅིང་ཐོག་མར་སྟེང་ནས་འོག་ཏུ་བཅུས་ཏེ་ནམ་མཁའ་ལ་གྱེན་དུ་གདབ།  དེ་ནས་ལུས་སྨད་དེ་ས་གཞི་ལ་གདབ་བོ།  །དེ་ནས་སློབ་དཔོན་གཡས་སྐོར་གྱིས་རྒྱབ་ནས་ཕྱིན་ཏེ་ལྷོར་འདུག  །དེ་བཞིན་དུ་སློབ་མའང་སོང་ནས་བྱང་དུ་འདུག་པས་ཚངས་ཐིག་གཉིས་པ་གདབ།  ཡང་སློབ་དཔོན་གཡས་སྐོར་གྱིས་སོང་ནས་ཤར་ལྷོ་དང་།  དེ་བཞིན་དུ་སློབ་མ་བྱང་ཤར་དུ་སོང་ལ་ཤར་གྱི་ལོགས་ཐིག་གདབ།  ཡང་སློབ་དཔོན་དེ་ཉིད་དུ་གནས་པ་དང་སློབ་མ་ལྷོ་ནུབ་ཏུ་སོང་ལ་ལྷོའི་ལོགས་ཐིག་གདབ།  ཡང་སློབ་དཔོན་གཡས་སྐོར་གྱིས་ནུབ་བྱང་དུ་འདུག  །སློབ་མ་སྔར་གྱི་དེར་གནས་པས་ནུབ་ཀྱི་ལོགས་ཐིག་གདབ།  སློབ་དཔོན་དེ་ཉིད་དུ་འདུག་ལ་སློབ་མ་བྱང་ཤར་དུ་སོང་ལ་བྱང་གི་ལོགས་ཐིག་གདབ།  སློབ་དཔོན་ཤར་ལྷོ་དང་སློབ་མ་ནུབ་བྱང་དུ་སོང་ལ་མཚམས་ཐིག་དང་པོ་གདབ།  སློབ་དཔོན་ལྷོ་ནུབ་དང་སློབ་མ་བྱང་ཤར་དུ་རྒྱབ་འགྲོས་སྤངས་ཏེ་སོང་ལ་མཚམས་ཐིག་གཉིས་པ་གདབ།  དེ་ཡང་།  ཤར་ནུབ་ལྷོ་བྱང་མེ་དབང་ལྡན།  །མེ་སྲིན་རླུང་སྲིན་རླུང་དབང་ལྡན།  །མེ་རླུང་སྲིན་དབང་ཉིས་སྡེབས་ཀྱི།  །སྔ་མ་སློབ་དཔོན་འདུག་ས་ཡིན།  །འགྲོ་ཚེ་རྒྱབ་ནས་གཡས་སྐོར་དུ།  །ཕྱིན་པས་ཐིག་རྗེས་གཡས་སྐོར་འབྱུང་།  ཞེས་པ་ལྟར་བཏབ་པས་དཀྱིལ་འཁོར་དུ་ལམ་གྱིས་བྱུང་བར་བསམས་ལ།  སློབ་དཔོན་ཤར་དང་སློབ་མ་ནུབ་ཏུ་གནས་པས་ཐིག་སྐུད་བསྡུ།  བཏབ་ཟིན་པ་ནས་སློབ་དཔོན་དཀྱིལ་འཁོར་གྱི་ནུབ་ཏུ་སོང་ལ།  གཙུག་ཏོར་གྱི་ཕྱག་རྒྱ་སྤྱི་བོར་བཟློག་སྟེ།  ཨོཾ་བཛྲ་བེ་གཱ་ཀྲ་མ་ཧོཿཞེས་པས་ཡེ་ཐིག་ནམ་མཁའ་ལ་བཏེགས་པའི་འོག་ནས་འཛུལ་བར་བསམས་ལ།  དཀྱིལ་འཁོར་གྱི་ནང་དུ་ཞུགས་ཏེ།  འདི་ནི་ཆོས་དབྱིངས་དག་པ་སྟེ།  །ཞེས་སོགས་ཀྱི་ཚིགས་བཅད་དང་།  ཙི་ཏྲ་ས་མ་ཡ་སོགས་བརྗོད་ཅིང་།  གཡོན་པའི་ཁུ་ཚུར་གྱིས་དང་པོར་དབང་ལྡན་གྱི་རྩིག་པ་ནང་ནས་རིམ་པས་བྲི།  དེ་ནས་དབུས་ནས་ཅི་བདེ་བར་བྲི་སྟེ།  ཚོན་ཐོབ་ནི།  ལྷ་སྣམ་དང་ནང་གི་ལྷའི་སྟེགས་བུ་ཤར་དཀར།  ལྷོ་སྔོ།  ནུབ་དམར།  བྱང་ལྗང་།  དབུས་སེར།  དེའི་དབུས་དང་ཕྱོགས་གཞན་དུ་ཟླ་གདན།  བྱང་དུ་ཉི་གདན།  དེ་རྣམས་ཀྱི་སྟེང་དུ་ལྷ་སོ་སོའི་སྐུ་མདོག་དང་མཐུན་པའི་ཚོན་སྤུངས་སམ།  ཕྱག་མཚན་སོ་སོའི་མདོག་ཅན།  གླེགས་བམ་དངོས་སམ་ཚོན་ཕུང་སེར་པོ་རེ་དགོད།  རྩིག་པ་ནང་ནས་རིམ་བཞིན་སེར།  དཀར།  སྔོ།  འདོད་སྣམ་དམར།  ཕ་གུ་སེར།  དྲྭ་བའི་གཞི་སྔོ།  དྲྭ་བ་དཀར།  མདའ་ཡབ་ཁྲ་བོ།  པུ་ཤུ་དཀར།  དེའི་ཕྱི་ཐིག་སྔོ་སྐྱ།  མུན་པ་དང་གླང་རྒྱབ་ནག  །ཀ་བ་དང་ཀ་རྒྱན་ཤར་དཀར།  ལྷོ་སྔོ།  ནུབ་དམར།  བྱང་ལྗང་།  རྟ་བབས་བཞི་དམར།  སྔོ།  ལྗང་།  སེར།  དེ་སྟེང་པདྨ།  ཆོས་འཁོར་གདུགས་སོགས་ཅི་མཛེས།  ཉི་དཀྱིལ་ལྗང་།  པདྨ་སྣ་ཚོགས་ཀྱི་ཕྱི་དམར་སྐྱ།  རྡོ་རྭའི་གཞི་ནག  །རྡོ་རྗེ་དཀར།  མེ་རི་སྣ་ཚོགས་སོ།  བྲིས་ཚར་ནས་རྡོ་རྗེ་བསྡུ་བའི་ཕྱག་རྒྱ་དང་།  ཨོཾ་བཛྲ་ས་མཱ་ཛཿས་ཡེ་ཤེས་ཀྱི་ཐིག་ཕབ་ནས།  ཛཿཧཱུྃ་བྃ་ཧོཿས་ལས་ཐིག་དཀྱིལ་འཁོར་དང་བཅས་པ་ལ་བསྲེ།  ཚོན་ལྷག་དང་ཐིག་ལ་ཉེར་སྤྱོད་ལྔས་མཆོད་དེ།  ཨོཾ་ཨཱཿཧཱུྃ་བཛྲ་མུཿ  ཞེས་པས་གཤེགས་སུ་གསོལ།  དཀྱིལ་འཁོར་གྱི་མཐའ་མར་དྲི་བཟང་པོའི་ལྡེ་གུས་ལེགས་པར་བྱུག  །མཆོད་གཏོར་སོགས་སྟ་གོན་བཞིན་བཤམ།  རྒྱན་དགྲམ།  སློབ་དཔོན་གྱིས་རྣམ་རྒྱལ་དང་།  སློབ་མས་ལས་བུམ་ཐོགས་ལ་སོ་སོའི་སྔགས་བརྗོད་ཅིང་རོལ་མོ་དང་བཅས་པས་བསྐོར་བ་ལན་གསུམ་བྱས་ལ།  ཤར་ནས་ལྷ་གསུམ་ཕྱི་སྔགས་ཀྱི་མཐར།  ཁྱེད་རྣམས་ཀྱིས་བདག་དང་རྡོ་རྗེ་སློབ་མ་རྣམས་ལ་དབང་བསྐུར་དུ་གསོལ།  ཞེས་སམ།  སྒྲུབ་མཆོད་དཀྱུས་མ་ལ།  བདག་ཅག་རྣམས་ལ་ཞེས་པ་སྒྱུར་བ་བརྗོད་ཅིང་ལྷ་གནས་རྣམས་སུ་འབུལ་ཚུལ་བྱས་ལ་དེ་རྣམས་དང་།  འཇུག་སྒོའི་བུམ་པ་བཅས་ཤར་དུ་བཞག  །ལས་བུམ་ལ་ཨ་མྲྀ་ཏེའི་མཐར།  བདག་དང་རྡོ་རྗེ་སློབ་མ་རྣམས་ཀྱི་བར་ཆད་ཐམས་ཅད་བསྲུང་དུ་གསོལ།  ཞེས་སམ།  བདག་ཅག་རྣམས་ཀྱི་ཞེས་བསྒྱུར་བ་བརྗོད་ཅིང་དབང་ལྡན་དུ་བཞག་པ་ནི་ནུབ་གཉིས་པ་སྟ་གོན་ནོ།  །གསུམ་པ་དངོས་གཞི་ལ་ཆོ་ག་ཐམས་ཅད་རས་བྲིས་དང་འདྲ་ཞིང་ཞག་མང་པོ་སྦྲེལ་ཏེ་བྱེད་ན།  ཉིད་སྔ་མ་རྣམས་ལ་རྗེས་ཆོག་གི་རྡུལ་ཚོན་གྱི་ལྷ་ལ་བརྟན་བཞུགས་དང་།  གཤེགས་གསོལ་གྱི་ཉིན་བརྟན་བཞུགས་ཀྱི་ཚབ་ཏུ་ཁྱེད་ཀྱིས་སེམས་ཅན་དོན་ཀུན་མཛད་ཅེས་སོགས་དང་།  བཛྲ་མུཿཞེས་པས་ཡེ་ཤེས་པ་གཤེགས་སུ་གསོལ།  དམ་ཚིག་པ་རང་ལ་ཐིམ་པར་བསམས་ལ།  གནས་གསུམ་བསྲུངས་ཏེ།  ཆོས་ཐམས་ཅད་ཀྱི་རང་བཞིན་སྟོང་པ་ཉིད་དུ་དྲན་པའི་སྒོ་ནས།  ཨ་ཀཱ་རོའི་སྔགས་བརྗོད་ཅིང་རྡོ་རྗེའི་རྩེས་དབང་ལྡན་གྱི་རྩིག་པ་ནས་རིམ་པར་བསུབས་ལ།  རྡུལ་ཚོན་མཐའ་ནས་དབུས་སུ་བསྡུས་ཏེ་ཟ་མ་ཏོག་ལ་སོགས་པར་སྤྱན་དྲང་།  དྲི་བཟང་གི་ཆུས་ཐིག་རྗེས་མི་མངོན་པར་བྱ།  ཏིང་ངེ་འཛིན་གྱི་ཕུར་བུ་བཏབ་པ།  །ཨོཾ་རུ་རུ་སྤུ་རུ་ཛྭ་ལ་ཏིཥྛ་སིདྡྷི་ལོ་ཙ་ན་སརྦ་ཨརྠ་སཱ་དྷ་ན་སྭཱ་ཧཱ།  ཞེས་པའི་སྔགས་བརྗོད་ཅིང་བཏོན་པར་བསམ།  བཀྲ་ཤིས་དང་རོལ་མོའི་སྒྲ་སྣ་ཚོགས་བྱ་ཞིང་ཕྱོགས་ཀུན་ཏུ་མེ་ཏོག་སིལ་མས་གཏོར་ཏེ་དཀར་གསུམ་གྱི་དགའ་སྟོན་རྒྱ་ཆེན་པོ་དང་བསྔོ་བ་སྨོན་ལམ་ལ་སོགས་པ་བྱའོ།  །ས་ཆོག་དང་ཐིག་ཚོན་གྱི་བྱ་བ་འདི་རྣམས་རང་རང་གི་སྒོས་ཆོས་ཕྲ་མོ་བསྒྱུར་བ་ཙམ་མ་གཏོགས་བྱ་སྤྱོད་ཀྱི་དཀྱིལ་འཁོར་གང་ལའང་སྦྱར་དུ་རུང་ངོ་།  །དེ་རྣམས་ཀྱིས་རྡུལ་ཚོན་ལ་བརྟེན་པའི་ཁྱད་ཆོས་རྣམས་བཤད་ཟིན་ཏོ།།  །།
དེ་ལྟར་རིགས་གསུམ་སྤྱིའི་དཀྱིལ་འཁོར་གྱི་ཆོ་ག་ཕྲིན་ལས་ལྷུན་གྲུབ་ཅེས་བྱ་བ་འདི་ནི།  རྗེ་བཙུན་བླ་མ་དམ་པ་རྣམས་ཀྱི་བཀའ་དྲིན་གྱིས་འཚོ་བ།  དགེ་སློང་ག་ག་ན་ཤྲཱི་བྷ་དྲས་བྱ་སྤྱོད་ཀྱི་སྲོལ་འཛིན་ཆེན་པོ་ཁ་ཆེ་ཡེ་ཤེས་རྡོ་རྗེ་ལ་སོགས་པ་རྣམས་ཀྱི་གཞུང་ལ་གཏུགས་ཤིང་།  བླ་མ་མཁས་པའི་ཕྱག་ལེན་གྱིས་ཀྱང་བརྒྱན་ཏེ།  ཤིང་མོ་ལུག་ལོ་དབྱར་ཟླ་ར་བའི་ཚེས་ལྔའི་ཉིན་དཔལ་ཨེ་ཝཾ་ཆོས་ལྡན་གྱི་དབེན་གནས་ཐར་པ་རྩེར་སྦྱར་ཞེས་ཐར་རྩེ་པཎ་ཆེན་ནམ་མཁའ་དཔལ་བཟང་གིས་མཛད་པའི་རིགས་གསུམ་སྤྱིའི་དཀྱིལ་འཁོར་གྱི་ཆོ་ག་འདི་ཉིད།  །ལས་དང་པོ་པ་རྣམས་ལ་ཕན་པའི་ཕྱིར་སོགས་ཁོངས་རྣམས་དཀྱུས་སུ་བཅུག  །ཞར་བྱུང་རྡུལ་ཚོན་གྱི་ཁྱད་ཆོས་སོགས་གསལ་བྱེད་ཕྲན་བུའི་ཞལ་སྐོང་དང་བཅས་མཁན་ཆེན་རྡོ་རྗེ་འཆང་བྱམས་པ་ཀུན་དགའ་བསྟན་འཛིན་ལས་ཚུལ་འདིའི་བཀའ་དྲིན་ཐོབ་པའི་བྱ་བྲལ་ཆོས་རྗེ་འཇམ་དབྱངས་མཁྱེན་བརྩེའི་དབང་པོ་ཀུན་དགའ་བསྟན་པའི་རྒྱལ་མཚན་གྱིས་དཔལ་སྡེ་དགེ་ལྷུན་གྲུབ་སྟེང་གི་ཆོས་གྲྭ་ཆེན་པོར་བྲིས་པ་དགེ་ལེགས་མཆོག་ཏུ་གྱུར་ཅིག།  །།སརྦ་དཱ་ཤྲེ་ཡོ་བྷ་བ་ཏུ།།    །།  ༈ }}
</onlyinclude>
{{TsagliCall}}
<headertabs/>
== Footnotes ==
<references/>
==Other Information==
{{Footer}}
[[Category:JKW-KABUM-08-NYA-017]]
[[Category:Khyentse Lineage Project]]
[[Category:JKW-KABUM-Volume-08-NYA]]