View source for JKCL-KABUM-04-NGA-032

{{Khyentse Metadata
|classification=Tibetan Publications
|subclass=Tibetan Texts
|fulltitletib=ཀུན་མཁྱེན་རིན་པོ་ཆེ་བསོད་ནམས་སེང་གེའི་བླ་མའི་རྣལ་འབྱོར་ཡེ་ཤེས་སྣང་སྟེར།
|fulltitle=kun mkhyen rin po che bsod nams seng ge'i bla ma'i rnal 'byor ye shes snang ster
|citation=[['jam dbyangs mkhyen brtse chos kyi blo gros]]. ''kun mkhyen rin po che bsod nams seng ge'i bla ma'i rnal 'byor ye shes snang ster''. In ''Rdzong sar mkhyen brtse 'jam dbyangs chos kyi blo gros kyi gsung 'bum'', Vol. 4: 235-260. Bir, H.P.: Khyentse Labrang, 2012.
|collectiontitletib=ཆོས་ཀྱི་བློ་གྲོས་བཀའ་འབུམ་
|collectiontitle=chos kyi blo gros bka' 'bum
|author='jam dbyangs mkhyen brtse chos kyi blo gros
|authortib=འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
|associatedpeople=go rams pa bsod nams seng ge
|associatedpeopletib=གོ་རམས་པ་བསོད་ནམས་སེངྒེ་
|tibgenre=Guru Yoga Texts - bla ma'i rnal 'byor
|terma=No
|jkcloutline=Four
|language=Tibetan
|volumenumber=004
|volnumtib=༤
|volyigtib=ང་
|totalvolumes=12
|textnuminvol=032
|pagenumbers=235-260
|totalpages=26
|beginfolioline=1a1
|endfolioline=13b6
|totalfolios=13
|multivolumework=No
|colophontib=།ཅེས་པའང་ཡེ་ན་དགེ་སློང་ཤེས་རབ་ཕུན་ཚོགས་ནས་ཤེས་བྱ་མ་འབུམ་ཐེར་གཅིག་གསུང་བའི་ཞལ་བཞེས་དང་རྟེན་བཅས་སྔ་ཕྱིར་བསྐུལ་བ་དང་།  ཀུན་མཁྱེན་བླ་མ་འདི་ཉིད་རྗེ་བཙུན་གོང་མ་ལྔ་དང་།  རྗེ་རྡོ་རྗེ་འཆང་བཅས་ཀྱི་མདོ་སྔགས་ཀྱི་དགོངས་བཞེད་འཁྲུལ་མེད་དུ་སྟོན་པའི་མཁས་གྲུབ་ཀུན་གྱི་གཙུག་གི་རྒྱན་ཅིག་འདི་ལྟ་བུ་ལ་གསོལ་བ་བཏབ་ན་ཕ་རྗེས་བུས་ཟིན་ངེས་པར་འབྱུང་སྙམས་ཤིང་།  དེང་དུས་ཀྱི་དཔེ་ཆ་བ་རྣམས་ཁ་སུ་མང་གི་ཁ་ཟེགས་བསྡུས་པའི་བཤད་ཡམ་བོར་ནས་གཞན་ལ་ཁྱད་གསོད་སྤངས་ཏེ་རང་གི་ཆོས་ཀྱི་ཟབ་གནད་ཀུན་མཁྱེན་བླ་མའི་ལེགས་བཤད་ལྟར་བཟུང་ནས་བསྟན་པ་འཛིན་ན་དོན་ཆེ་བར་མཐོང་ཞིང་བླ་མའི་རྣལ་འབྱོར་ཡང་རང་ལུགས་ཀྱེ་རྡོར་ལམ་ཟབ་ལས་ལྷག་པ་མི་དགོས་ཀྱང་།  ཀུན་མཁྱེན་ཆོས་ཀྱི་རྒྱལ་པོའི་སྐུ་ཡི་རྣམ་པ་དྲན་པའི་གསོས་འདེབས་སུ་རང་ཉིད་ཀྱང་སྤྲོ་བར་གྱུར་ཅིང་གཞན་ཨ་གསར་ཅན་རྣམས་ལའང་ཕན་པ་ཅུང་ཟད་རེ་འགྱུར་སྙམས་ནས་ལམ་ཟབ་ཀྱི་གཞུང་བླ་མ་གོང་མའི་གསུང་བྱིན་ཅན་རྣམས་བསྒྲིགས།  རྨོངས་ཚིག་གསར་བསྣན་ཁ་ཤས་ཀྱང་བགྱིས་ཏེ་འཇམ་དབྱངས་ཆོས་ཀྱི་བློ་གྲོས་པས་ཐུན་བར་གཅིག་ལ་ཤར་མར་བྲིས་པ་འདིས་ཀྱང་རང་གཞན་རྣམས་ཀྱི་རྒྱུད་ལ་བླ་མའི་བྱིན་བརླབ་མྱུར་དུ་འཇུག་པར་གྱུར་ཅིག  །སརྦ་མང་ག་ལཾ།།
|colophonwylie=/ces pa'ang ye na dge slong shes rab phun tshogs nas shes bya ma 'bum ther gcig gsung ba'i zhal bzhes dang rten bcas snga phyir bskul ba dang /__kun mkhyen bla ma 'di nyid rje btsun gong ma lnga dang /__rje rdo rje 'chang bcas kyi mdo sngags kyi dgongs bzhed 'khrul med du ston pa'i mkhas grub kun gyi gtsug gi rgyan cig 'di lta bu la gsol ba btab na pha rjes bus zin nges par 'byung snyams shing /__deng dus kyi dpe cha ba rnams kha su mang gi kha zegs bsdus pa'i bshad yam bor nas gzhan la khyad gsod spangs te rang gi chos kyi zab gnad kun mkhyen bla ma'i legs bshad ltar bzung nas bstan pa 'dzin na don che bar mthong zhing bla ma'i rnal 'byor yang rang lugs kye rdor lam zab las lhag pa mi dgos kyang /__kun mkhyen chos kyi rgyal po'i sku yi rnam pa dran pa'i gsos 'debs su rang nyid kyang spro bar gyur cing gzhan a gsar can rnams la'ang phan pa cung zad re 'gyur snyams nas lam zab kyi gzhung bla ma gong ma'i gsung byin can rnams bsgrigs/__rmongs tshig gsar bsnan kha shas kyang bgyis te 'jam dbyangs chos kyi blo gros pas thun bar gcig la shar mar bris pa 'dis kyang rang gzhan rnams kyi rgyud la bla ma'i byin brlab myur du 'jug par gyur cig__/sarba mang ga laM//
|pdflink=File:JKCL-KABUM-04-NGA-032.pdf
}}
{{Header}}
<h1 style="font-size: 24px !important;">Tibetan Text</h1>
<onlyinclude>
{{TibP|༄༅།  །ཀུན་མཁྱེན་རིན་པོ་ཆེ་བསོད་ནམས་སེང་གེའི་བླ་མའི་རྣལ་འབྱོར་ཡེ་ཤེས་སྣང་སྟེར་ཞེས་བྱ་བ་བཞུགས་སོ།  །
ན་མོ་གུ་རུ་པུཎྱཻ་སེང་ཧ་ཛྙཱ་ན་ཀཱ་ལ་ཡེ།  ཤེས་བྱའི་ཆོས་རྣམས་མ་འདྲེས་གཟིགས།  །མཁྱེན་ནུས་བརྩེ་བའི་ཡེ་ཤེས་སྐུ།  །བླ་མའི་ཞབས་ལ་གུས་བཏུད་ནས།  །ཟབ་ལམ་བླ་མའི་རྣལ་འབྱོར་སྤེལ།  །དེ་ལ་མཆོག་ཐུན་དངོས་གྲུབ་ཐམས་ཅད་ཀྱི་རྩ་བ་ལམ་ཟབ་མོའི་རྣལ་འབྱོར་ལ་གཞོལ་བར་འདོད་པས་དང་པོ་ཁོ་ནར་ངེས་འབྱུང་དང་བྱང་ཆུབ་ཀྱི་སེམས་ལ་ཡང་ཡང་བློ་སྦྱངས་ཏེ་འདིའི་ཉམས་ལེན་ལ་འཇུག་པར་བྱའོ།  །དེ་ལ་ཡང་ཐོག་མར་མདུན་གྱི་ནམ་མཁར་བླ་མ་རྒྱལ་བ་སྲས་བཅས་མངོན་སུམ་བཞིན་དུ་བཞུགས་པར་མོས་ལ།  བདག་དང་འགྲོ་བ་ཁམས་གསུམ་ནམ་མཁའ་ཡི།  །མཐའ་དང་མཉམ་པའི་སེམས་ཅན་མ་ལུས་པ།  །དུས་འདི་ནས་ནི་བྱང་ཆུབ་མ་ཐོབ་བར།  །ཕྱོགས་བཅུ་དུས་གསུམ་བདེ་གཤེགས་ཐམས་ཅད་ཀྱི།  །སྐུ་གསུང་ཐུགས་དང་ཡོན་ཏན་ཕྲིན་ལས་རྣམས།  །གཅིག་ཏུ་བསྡུས་པ་སངས་རྒྱས་ཀུན་གྱི་དངོས།  །ཆོས་ཕུང་བརྒྱད་ཁྲི་བཞི་སྟོང་འབྱུང་བའི་གནས།  །འཕགས་པའི་དགེ་འདུན་ཀུན་གྱི་མངའ་བདག་ཆེ།  །ཞེས་པའི་མཐར།  དཔལ་ལྡན་རྩ་བརྒྱུད་བླ་མའི་ཚོགས་རྣམས་ལ།  སྒོ་གསུམ་གུས་པ་ཆེན་པོས་སྐྱབས་སུ་མཆི།  །སྤངས་རྟོགས་མཐར་ཕྱིན་སྟོན་པ་སངས་རྒྱས་ལ།  །སྒོ་གསུམ་གུས་པ་ཆེན་པོས་སྐྱབས་སུ་མཆི།  །ལུང་རྟོགས་བདག་ཉིད་བསྟན་པ་དམ་ཆོས་ལ།  །སྒོ་གསུམ་གུས་པ་ཆེན་པོས་སྐྱབས་སུ་མཆི།  །རྒྱལ་སྲས་བསྟན་འཛིན་འཕགས་པའི་དགེ་འདུན་ལ།  །སྒོ་གསུམ་གུས་པ་ཆེན་པོས་སྐྱབས་སུ་མཆི།  །ཞེས་ཅི་མང་བརྗོད་པའི་མཐར།  བླ་མ་མཆོག་དང་དཀོན་མཆོག་རིན་པོ་ཆེ།  །རྣམ་པ་གསུམ་ལ་ཕྱག་འཚལ་གསོལ་བ་འདེབས།  །ཁྱེད་ཀྱིས་བདག་དང་སེམས་ཅན་ཐམས་ཅད་ཀྱི།  །ལུས་ངག་ཡིད་གསུམ་བྱིན་གྱིས་བརླབ་ཏུ་གསོལ།  །བདག་བློ་ཆོས་སུ་འགྲོ་བར་བྱིན་གྱིས་རློབས།  །དམ་ཆོས་ལམ་དུ་ལོངས་པར་བྱིན༴  །ལམ་གྱི་འཁྲུལ་པ་ཞི་བར༴  །འཁྲུལ་སྣང་དབྱིངས་སུ་འཆར་བར༴  །ཆོས་མིན་རྣམ་རྟོག་འགག་པར༴  །བྱམས་དང་སྙིང་རྗེ་སྐྱེ་བར༴  །བྱང་ཆུབ་སེམས་གཉིས་འབྱོངས་པར༴  །མྱུར་དུ་སངས་རྒྱས་ཐོབ་པར་བྱིན་གྱིས་རློབས།  །སེམས་བསྐྱེད་པ་ནི།  མར་གྱུར་འགྲོ་རྣམས་སྲིད་ལས་བསྒྲལ་བའི་ཕྱིར།  །དོན་དུ་བླ་མེད་བྱང་ཆུབ་ཐོབ་པར་བྱ།  །དེ་ཡི་ཆེད་དུ་སངས་རྒྱས་ཀུན་གྱི་ལམ།  །ཟབ་མོའི་རྣལ་འབྱོར་ཉམས་སུ་བླངས་བར་བགྱི།  །ལན་གསུམ་བརྗོད།  ཚོགས་རྟེན་གསལ་གདབ་པ་ནི།  གཟུང་འཛིན་སྣང་བ་སྣོད་བཅུད་དབྱིངས་སུ་ཐིམ།  །ཡེ་ཤེས་རང་སྣང་འོད་གསལ་འབྱམས་ཀླས་པའི།  །བདེ་ཆེན་ཞིང་གི་བཀོད་པ་མཐའ་ཡས་དབུས།  །རང་མདུན་སྨིན་མཚམས་ཐད་ཀྱི་མཁའ་དབྱིངས་ངོགས།  །མཆོད་པའི་སྤྲིན་ཆེན་རྒྱ་མཚོ་བྲིས་པའི་ཀློངས།  །ལྔ་ལྡན་འཇའ་སྤྲིན་འཐིབས་པའི་གུར་ཁང་ན།  །འཕྲོག་བྱེད་བརྒྱད་ཀྱིས་བཏེག་པའི་རིན་ཆེན་ཁྲི།  །སྣ་ཚོགས་ནོར་བུའི་རྒྱན་གྱིས་རབ་མཛེས་ཤིང་།  །དྲི་མེད་པད་དཀར་ཟླ་བ་རྒྱས་པའི་སྟེང་།  །བདག་གི་སྐྱབས་མཆོག་སྲིད་ཞིའི་གདུང་བ་སེལ།  །དྲན་པ་ཙམ་གྱིས་དངོས་གྲུབ་མཆོག་སྟེར་བ།  །རྩ་བའི་བླ་མ་ཀུན་མཁྱེན་ཆོས་ཀྱི་རྗེ།  །བགྲང་ཡས་བསོད་ནམས་རྒྱ་མཚོའི་གཟུགས་ཀྱི་སྐུ།  །མཚན་དཔེའི་དཔལ་འབར་གསུང་དབྱངས་སེང་གེའི་སྒྲ།  །མཉམ་པར་མ་བཞག་མེད་པའི་ཐུགས་མངའ་བ།  །ཡོན་ཏན་དཔག་ཡས་སྐྱབས་ཀུན་འདུས་པའི་རྗེ།  །ཕྲིན་ལས་ཉི་མ་སྟོང་གི་གཟི་བརྗིད་དང་།  །ཟླ་བ་རྒྱུ་སྐར་བྱེ་བའི་འོད་ཀྱིས་མཛེས།  །བསོད་ནམས་སྐུ་མཆོག་ནོར་བུ་ཆུ་ཤེལ་ལ།  །པདྨ་ར་གའི་ཉིང་ཁུས་བྱུག་པ་བཞིན།  །དཀར་དམར་མདངས་ལྡན་སྐུ་ཡི་དཀྱིལ་འཁོར་རྒྱས།  །ཡེ་ཤེས་སྤྱན་གཉིས་ལྟ་སྟངས་ཐད་ཀར་གཟིགས།  །ཕྱག་གཡས་མི་འཇིགས་སྤོབས་པ་རབ་སྦྱིན་མཚོན།  །སྐྱབས་སྦྱིན་ཕྱག་རྒྱ་པུས་མོའི་སྟེང་དུ་བརྐྱངས།  །གཡོན་པས་ཟབ་རྒྱས་ཆོས་ཀྱི་ཆར་འབེབས་ཕྱིར།  །མཉམ་བཞག་སྟེང་ན་གསུངས་རབ་གླེགས་བམ་འཛིན།  །གཡས་ཀྱི་ཕྱག་གི་ཨུཏྤལ་སྡོང་བུའི་སྟེང་།  །འཇམ་དཔལ་རྡོ་རྗེ་ཤེས་རབ་རལ་གྲིས་མཚན།  །གཡོན་གྱི་ཕྱག་གི་པདྨའི་འཁྲི་ཤིང་རྩེར།  །གསུང་ངག་དགོས་འདོད་ཀུན་འབྱུང་ནོར་བུས་བརྒྱན།  །འགྲོ་བའི་དོན་ལ་རྒྱུན་ཆད་མེད་པའི་བརྡར།  །ཞབས་ཟུང་སེམས་དཔའི་སྐྱིལ་མོ་ཀྲུང་གིས་བཞུགས།  །སྐུ་ལ་དྲི་མེད་ཆོས་གོས་རྣམ་གསུམ་བཀླུབས།  །དབུ་ཡི་དཀྱིལ་འཁོར་མཆོག་ཏུ་རྒྱས་པ་ལ།  །སྡེ་སྣོད་གསུམ་མཚོན་དབང་མདོག་ཅོད་པཎ་ནི།  །ཀུན་ནས་ཟླུམ་ཞིང་དྲི་མེད་མཛེས་པར་གསོལ།  །ཕྱོགས་ལས་རྣམ་པར་རྒྱལ་བའི་བསྙེམས་འཆང་བས།  །ཅུང་ཟད་འགྱིང་པའི་ཉམས་དང་ལྡན་པའི་སྐུ།  །ཚུལ་ཁྲིམས་ཏིང་འཛིན་ཤེས་རབ་རྣམ་པར་གྲོལ།  །ཡེ་ཤེས་ཕུང་པོ་ཟད་མི་ཤེས་པ་ཡི།  །སྒྱུ་འཕྲུལ་རྡོ་རྗེ་གདན་གསུམ་ཚངས་བའི་མགོན།  །གཟུགས་ཕུང་རྣམ་སྣང་ཚོར་ཕུང་རིན་ཆེན་འབྱུང་།  །འདུ་ཤེས་སྣང་མཐའ་འདུ་བྱེད་དོན་ཡོད་གྲུབ།  །རྣམ་ཤེས་མི་བསྐྱོད་ཀུན་འདུས་རྡོ་རྗེ་འཆང་།  །ས་ཁམས་སྤྱན་མ་ཆུ་ཁམས་མཱ་མ་ཀཱི།  །མེ་ཁམས་གོས་དཀར་རླུང་ཁམས་སྒྲོལ་མ་ཆེ།  །ནམ་མཁའ་རྡོ་རྗེ་དབྱིངས་ཀྱི་དབང་ཕྱུག་མ།  །འདྲེན་བྱེད་ས་སྙིང་སྒྲ་འཛིན་གསང་བའི་བདག  །དྲི་འཛིན་ནམ་སྙིང་རོ་འཛིན་སྤྱན་རས་གཟིགས།  །སྐུ་ལུས་སྒྲིབ་སེལ་ཡིད་དབང་འཇམ་པའི་དབྱངས།  །ཚིགས་མཚམས་ཀུན་བཟང་རྩ་རྒྱུས་བྱམས་པ་མགོན།  །ཕྱག་གཡས་དུས་དགྲ་གཡོན་པ་གཞན་མི་ཐུབ།  །ཞལ་སྒོ་རྟ་མགྲིན་རྡོ་རྗེ་བདུད་རྩི་འཁྱིལ།  །དཔུང་གཡས་མི་གཡོ་གཡོན་པ་འདོད་པའི་རྒྱལ།  །པུས་གཡས་དབྱུག་སྔོན་ཅན་དང་གཡོན་སྟོབས་ཆེ།  །སྤྱི་གཙུག་འཁོར་བསྒྱུར་ཞབས་མཐིལ་གནོད་མཛེས་རྒྱལ།  །ཟག་མེད་ཡུལ་རྣམས་གཟུགས་སྒྲ་དྲི་རོ་དང་།  །རེག་དང་ཆོས་ཁམས་རྡོ་རྗེ་ལྷ་མོ་ཡི།  །ངོ་བོར་བཞུགས་ཤིང་དཀྱིལ་འཁོར་རབ་འབྱམས་གཙོ།  །སྤྲོ་བསྡུའི་བྱེད་པོ་དཔལ་ལྡན་རྡོ་རྗེ་སེམས།  །ཐ་དད་མ་དམིགས་རིགས་ཀུན་འདུས་ཞལ་གྱི།  །དཔྲལ་མགྲིན་ཐུགས་ཀར་པད་ཟླའི་གདན་གྱི་སྟེང་།  །རྡོ་རྗེ་གསུམ་གྱི་ངོ་བོར་མཚོན་པ་ཡི།  །ཨོཾ་དཀར་ཨཱཿདམར་ཧཱུྃ་མཐིང་གཟི་འོད་འབར།  །དེ་ལས་འོད་ཟེར་སྤྲོ་བསྡུས་རོལ་རྩེད་ཀྱིས།  །མཁའ་ཁྱབ་ཞིང་ནས་སྐྱབས་ཡུལ་རྒྱ་མཚོའི་ཚོགས།  །སྤྱན་དྲངས་ཀུན་ཀྱང་བླ་མ་ཉིད་ལ་ཐིམ།  །གཟི་བརྗིད་འོད་ཟེར་ལྷག་པར་འབར་བ་ཡི།  །བ་སྤུ་རེར་ཡང་སྐྱབས་གནས་རྒྱ་མཚོར་བཞུགས།  །རབ་འབྱམས་རྒྱལ་ཀུན་འདུས་པའི་ངོ་བོར་གསལ།  །ཅེས་པས་གསལ་བཏབ་ནས།  གདན་གསུམ་ཚང་བའི་ངོ་བོར་ཤེས་པས་བསྟོད་པ་ནི།  གང་གི་དྲིན་གྱིས་བདེ་ཆེན་ཉིད།  །སྐད་གཅིག་ཉིད་ལ་འཆར་བ་གང་།  །བླ་མ་རིན་ཆེན་ལྟ་བུའི་སྐུ།  །རྡོ་རྗེ་ཅན་ཞབས་པད་ལ་འདུད།  །ཁྱོད་ནི་རྒྱལ་དང་རྒྱལ་བའི་སྲས།  །རབ་བྱུང་དགེ་བསྙེན་ཁྱིམ་པ་སོགས།  །འགྲོ་བ་ཀུན་གྱི་གཟུགས་མཛད་ནས།  །གདུལ་བྱ་ཐམས་ཅད་སྨིན་པར་མཛད།  །ཉི་མའི་འོད་ཟེར་རབ་ཚ་ཡང་།  །མེ་ཤེལ་མེད་པར་མེ་མི་འབྱུང་།  །དེ་བཞིན་སངས་རྒྱས་བྱིན་བརླབ་ཀྱང་།  །བླ་མ་མེད་པར་འབྱུང་མི་འགྱུར།  །དེས་ན་ཁྱོད་ཉིད་མཉེས་པ་ཡིས།  །སངས་རྒྱས་ཐམས་ཅད་མཉེས་པར་འགྱུར།  །དཀོན་མཆོག་གསུམ་པོ་གཅིག་བསྡུས་པའི།  །བླ་མ་ཁྱོད་ལ་བདག་སྐྱབས་མཆི།  །སངས་རྒྱས་ཀུན་གྱི་ངོ་བོ་ཉིད།  །ཆོས་རྣམས་ཀུན་གྱི་རིན་ཆེན་གཏེར།  །དགེ་འདུན་ཐམས་ཅད་འདུས་པའི་སྐུ།  །དཔལ་ལྡན་བླ་མ་དེ་ལ་འདུད།  །ཁྱོད་ནི་གདུལ་བྱ་སྨིན་པའི་ཕྱིར།  །དེ་བཞིན་གཤེགས་པ་རྣམ་པ་ལྔ།  །ཁྱོད་ཀྱི་ཕུང་པོ་རྣམ་ལྔར་སྟོན།  །སྤྱན་སོགས་ཁྱོད་ཀྱི་འབྱུང་བ་བཞི།  །ས་ཡི་སྙིང་པོ་རྡོ་རྗེ་འཆང་།  །ནམ་མཁའི་སྙིང་པོ་སྤྱན་རས་གཟིགས།  །འཇམ་དབྱངས་སྒྲིབ་པ་རྣམ་པར་སེལ།  །བྱམས་པ་ཀུན་ཏུ་བཟང་པོ་རྣམས།  །མགོན་པོ་ཁྱོད་ཀྱི་དབང་པོ་སོགས།  །གཤིན་རྗེའི་གཤེད་སོགས་ཁྲོ་བོ་བཅུ།  །དཔལ་ལྡན་ཁྱོད་ཀྱི་སྐུ་ཡི་ཆ།  །གཟུགས་སོགས་རྡོ་རྗེ་ལྷ་མོར་སྟོན།  །ཉོན་མོངས་ཡེ་ཤེས་གནས་གྱུར་པ།  །བདག་ཉིད་ཆེན་པོ་ཁྱོད་ཀྱིས་མཁྱེན།  །ཐམས་ཅད་སྤྲོ་བའི་ཕྲིན་ལས་ཀྱིས།  །རྫོགས་པའི་སངས་རྒྱས་ཐམས་ཅད་སྤྲུལ།  །གཅིག་ཏུ་བསྡུས་པའི་སྦྱོར་བ་ནི།  །སངས་རྒྱས་ཀུན་བདག་རྡོ་རྗེ་འཆང་།  །བག་ཆགས་བཅས་པའི་སྒྲིབ་ཀུན་སྤངས།  །ཡོན་ཏན་ཐམས་ཅད་རབ་རྫོགས་པ།  །ཁྱོད་ཀྱི་ཕྲིན་ལས་ངོ་མཚར་རྨད།  །གང་གིས་གཡོ་མེད་ཁྱོད་བསྟེན་པ།  །དེ་ལ་དེ་མ་ཐག་བྱིན་རློབས།  །སྐད་ཅིག་གཅིག་གིས་རྫོགས་འཚང་རྒྱ།  །ཡང་ན་ཕུན་ཚོགས་ཐམས་ཅད་འགྲུབ།  །དེས་ན་རྡོ་རྗེ་སློབ་དཔོན་མཆོག  །དངོས་པོ་ཀུན་གྱིས་དེ་ལ་འདུད།  །རྣམ་པ་ཀུན་ཏུ་བདག་སྐྱབས་མཆི།  །ཕྱི་ནང་གསང་བ་དེ་ཁོ་ན།  །ལུས་དང་ལོངས་སྤྱོད་འབྲེལ་པ་ཀུན།  །སྲོག་གི་བར་གྱིས་ཁྱོད་མཉེས་བགྱི།  །ཇི་སྲིད་རྣམ་པར་གྲོལ་བའི་ས།  །བདག་གཞན་ཀུན་གྱིས་མ་ཐོབ་པར།  །དེ་སྲིད་མཆོད་པ་མཆོག་གི་སྤྲིན།  །ཀུན་ཏུ་བཟང་པོའི་རྣམ་ཐར་ལས།  །ཆེས་ལྷག་གྱུར་པས་ཁྱོད་མཆོད་དོ།  །ཁྱོད་ནི་གང་ལ་མཉེས་གྱུར་པའི།  །ཕྲིན་ལས་དེ་ཉིད་སྒྲུབ་པར་ཤོག  །མི་མཉེས་བྱེད་པ་རྣམས་སྤངས་ཏེ།  །རྣམ་པ་ཀུན་ཏུ་ཁྱོད་བསྟེན་ནོ།  །ཁྱོད་ཀྱི་ཕྲིན་ལས་སྒྲུབ་སླད་དུ།  །མགོན་པོ་གང་ལ་མཉེས་གྱུར་ན།  །གལ་ཏེ་བླ་ན་མེད་པ་ཡི།  །བྱང་ཆུབ་ཐོབ་ཀྱང་དེ་དོར་ཏེ།  །སྐྱེ་ཞིང་སྐྱེ་བ་ཐམས་ཅད་དུ།  །ཁྱོད་ཀྱི་ཕྲིན་ལས་བསྒྲུབ་པར་བགྱི།  །དགེ་བ་འདི་ཡིས་བདག་གཞན་ཀུན།  །ཁྱོད་མཉེས་བགྱིད་པའང་ཐོབ་པར་ཤོག  །སྐུ་ཡི་སྤྱོད་པ་རྣམ་དག་པ།  །སངས་རྒྱས་དགེས་པའི་ཚུལ་ཁྲིམས་ལྡན།  །གསུང་གི་ཕྲིན་ལས་ཕུན་སུམ་ཚོགས།  །ཤེས་བྱའི་དཀྱིལ་འཁོར་མ་ལུས་ཁྱབ།  །ཐུགས་ཀྱི་དགོངས་པ་རབ་ཟབ་པ།  །ཆོས་རྣམས་ཀུན་གྱི་དེ་ཉིད་མཁྱེན།  །མཁས་པ་ཐམས་ཅད་དགའ་མཛད་པའི།  །ཡོན་ཏན་རྒྱ་མཚོ་ཁྱོད་ལ་མངའ།  །སེམས་ཅན་ཐམས་ཅད་སྨིན་མཛད་པའི།  །ཕྲིན་ལས་མངའ་བ་ཆོས་ཀྱི་རྗེ།  །ཁྱོད་ལ་བསུ་བས་དཔལ་དུ་བྱེད།  །བསྟན་པས་བློ་གྲོས་མཆོག་ཏུ་འགྱུར།  །བསྟན་ན་འཇིགས་པ་མེད་པར་མཛད།  །བསྙེན་བཀུར་བགྱིས་པས་བདེ་བ་འབྱུང་།  །དེ་འདྲའི་དཔལ་ལྡན་ཆོས་ཀྱི་རྗེ།  །བླ་མ་མཆོག་ལ་བདག་གསོལ་འདེབས།  །མཆོད་པ་ཐམས་ཅད་སྤངས་ནས་ནི།  །བླ་མ་མཆོད་པར་བྱའོ་ཞེས།  །སངས་རྒྱས་ཀུན་གྱིས་མཐུན་པར་གསུངས།  །དེ་བས་དངོས་པོ་ཐམས་ཅད་ཀྱིས།  །བླ་མ་མཉེས་པར་བྱེད་པར་ཤོག  །སྐྱེ་བ་འདི་དང་སྐྱེ་བ་གཞན།  །ཇི་སྲིད་སངས་རྒྱས་མ་ཐོབ་བར།  །དེ་སྲིད་བླ་མའི་ཞབས་དྲུང་དུ།  །འབྲལ་བ་མེད་པར་གནས་གྱུར་ཅིག  །མཆོད་པ་ཀུན་གྱིས་མཆོད་བྱེད་ཅིང་།  །དམ་ཆོས་རྟག་ཏུ་ཉན་པ་དང་།  །བཀའ་བཞིན་སྒྲུབ་པའང་བྱེད་པར་ཤོག  །དེ་ནས་ཚོགས་བསག་པའི་སླད་དུ་ཡན་ལག་བདུན་པ་འབུལ་བ་ནི།  སངས་རྒྱས་ཀུན་གྱི་ངོ་བོ་ཉིད།  །དངོས་གྲུབ་ཀུན་གྱི་རིན་ཆེན་གཏེར།  །ཉེས་པ་ཀུན་ལས་རྣམ་གྲོལ་བ།  །བླ་མའི་ཞབས་ལ་ཕྱག་འཚལ་ལོ།  །ཁྱོད་ཀྱིས་བསོད་ནམས་ཡེ་ཤེས་ཚོགས།  །བསྐལ་པ་དུ་མར་རབ་བསྒྲུབས་པས།  །བཞེད་པའི་དོན་རྣམས་ཡོངས་རྫོགས་པའི།  །ཀུན་མཁྱེན་བླ་མ་ལ་ཕྱག་འཚལ།  །འཁྲུལ་པ་མི་མངའ་ཉེས་མི་མངའ།  །ཚུལ་ཁྲིམས་ཕུང་པོས་བརྒྱན་པའི་སྐུ།  །མཐོང་བ་ཙམ་གྱིས་རབ་དད་པར།  །མཛད་པ་ཁྱོད་ལ་ཕྱག་འཚལ་ལོ།  །ཅ་ཅོ་མི་མངའ་རྣམ་དག་གསུང་།  །ཐ་དད་སྐད་ཀྱིས་མཐའ་ཡས་པའི།  །གདུལ་བྱའི་དབང་པོ་ཚིམ་མཛད་པའི།  །གསུང་མཆོག་ཁྱོད་ལ་ཕྱག་འཚལ་ལོ།  །མཉམ་པར་བཞག་ཅིང་རྟོག་མི་མངའ།  །འགྲོ་བའི་ཡིད་ལ་མཉམ་པར་འཇུག  །ཏིང་ངེ་འཛིན་དང་གཟུངས་ཀྱི་གཏེར།  །རྣམ་གྲོལ་ཐུགས་ལ་ཕྱག་འཚལ་ལོ།  །ཁྱོད་ཀྱིས་ཤེས་བྱའི་དཀྱིལ་འཁོར་འདི།  །མ་ལུས་ཐུགས་སུ་ཆུད་གྱུར་པས།  །འཆད་རྩོད་རྩོམ་པའི་བྱ་བ་ལ།  །མངའ་བརྙེས་ཁྱོད་ལ༴  །དམིགས་པ་ཀུན་ལས་རྣམ་གྲོལ་ཞིང་།  །ཐུགས་རྗེ་ཆེན་པོ་དང་ལྡན་པས།  །གཞན་དོན་དུས་ལས་མི་འདའ་བའི།  །བརྩེ་ཆེན་ཁྱོད་ལ༴  །མཁྱེན་བརྩེ་བརྩོན་པའི་སྟོབས་ཆེན་གྱིས།  །བདུད་ཀྱི་སྟོབས་རྣམས་འཇོམས་མཛད་ཅིང་།  །ཉོན་མོངས་བྱང་ཆུབ་ལམ་བསྒྱུར་བའི།  །མཐུ་ཆེན་ཁྱོད་ལ༴  །འཁོར་བ་ཇི་སྲིད་གནས་ཀྱི་བར།  །རྣམ་པར་འཕྲུལ་པ་སྣ་ཚོགས་ཀྱིས།  །དེ་སྲིད་དེ་ཡི་དོན་མཛད་པའི།  །ཕྲིན་ལས་དབང་ཕྱུག་ལ་ཕྱག་འཚལ།  །སངས་རྒྱས་ཀུན་གྱི་ཡེ་ཤེས་སྐུ།  །གཅིག་ཏུ་བསྡུས་པ་གཞན་དོན་ཕྱིར།  །སོ་སོ་སྐྱེ་བོའི་སྐུར་སྟོན་པ།  །མཚུངས་བྲལ་ཁྱོད་ལ་ཕྱག་འཚལ་ལོ།  །དཀོན་མཆོག་གསུམ་པོ་ཁྱོད་ཉིད་དེ།  །ཁྱོད་ཉིད་དཀོན་མཆོག་གསུམ་ཡང་ལགས།  །དེ་བས་རྣམ་པ་ཐམས་ཅད་དུ།  །ཁྱོད་ལ་གུས་པས་ཕྱག༴  །སྟོན་མཆོག་ཁྱོད་ལ༴  །སྐྱབས་མཆོག་ཁྱོད་ལ༴  །འདྲེན་པ་མཆོག་ལ༴  །བླ་མ་མཆོག་ལ༴  །གང་ལ་ཁྱོད་ཀྱི་སྐུས་རེག་ཅིང་།  །ཁྱོད་གསུང་ཐོས་ཤིང་འཛིན་པ་དང་།  །ཁྱོད་ཀྱི་ཐུགས་རྗེས་རྗེས་བཟུང་བ།  །དེ་དག་ཀུན་ལའང་ཕྱག་འཚལ་ལོ།  །མཆོད་ཡོན་མེ་ཏོག་བདུག་སྤོས་དང་།  །སྣང་གསལ་དྲི་མཆོག་ཞལ་ཟས་དང་།  །གདུགས་དང་རྒྱལ་མཚན་རོལ་མོའི་སྒྲས།  །བླ་མའི་ཚོགས་དང་དཀོན་མཆོག་མཆོད།  །འཇིག་རྟེན་ཁམས་ནི་མཐའ་ཡས་པ།  །བདག་པོས་ཡོངས་སུ་མ་བཟུང་བའི།  །མཆོད་པའི་ཡོ་བྱད་ཅི་མཆིས་པ།  །བློ་ཡིས་བླངས་ནས་འབུལ་བར་བགྱི།  །རབ་དང་ཡིད་ལས་བྱུང་གྱུར་པའི།  །མཆོད་པའི་སྤྲིན་གྱི་ཕུང་པོ་ནི།  །མཁའ་དང་མཉམ་པ་དུ་མ་ཡིས།  །ཡོན་ཏན་རྒྱ་མཚོ་སྲས་བཅས་མཆོད།  །དམན་པའི་ཡུལ་ལས་རབ་འདས་ཤིང་།  །རྒྱལ་བ་ཀུན་གྱི་དམ་ཚིག་མཆོག  །དངོས་གྲུབ་ཀུན་གྱི་གཞིར་གྱུར་པ།  །བདུད་རྩི་མཆོག་གིས་མཆོད་པར་བགྱི།  །སྒྲིབ་པའི་དྲི་མ་ཀུན་བསལ་ནས།  །རྟོག་པ་ཀུན་ལས་རྣམ་གྲོལ་བའི།  །བླ་ན་མེད་པའི་བྱང་ཆུབ་སེམས།  །བདེ་བ་ཆེན་པོ་བརྙེས་གྱུར་ཅིག  །མཎྜལ་དབུལ་བར་སྤྲོ་ན་ཚོམ་བུ་སོ་བདུན་མ་སོགས་རྒྱས་བསྡུས་ཅི་རིགས་དང་།  བསྡུ་ན་ཆོས་ཀྱི་རྗེས་མཛད་པའི།  ཞིང་ཁམས་རྣམ་པར་དག་པ་འདིར།  །དབུས་ཀྱི་རི་རྒྱལ་རི་རབ་ལ།  །གླིང་བཞི་འདོད་ཡོན་ལྔ་ཡིས་བརྒྱན།  །ཉི་མ་ཟླ་བས་སྐོར་བར་བྱེད།  །ལྷ་མིའི་ལོངས་སྤྱོད་ཕུན་སུམ་ཚོགས།  །རྒྱལ་སྲིད་རིན་ཆེན་རྣམ་པ་བདུན།  །འདོད་འཇོའི་བ་དང་དཔག་བསམ་ཤིང་།  །མ་རྨོས་ལོ་ཏོག་གསེར་དང་དངུལ།  །འབྲུ་བཟང་ལོངས་སྤྱོད་བསམ་མི་ཁྱབ།  །དངོས་པོ་བཟང་ལ་གྱ་ནོམ་པ།  །བླ་མ་སངས་རྒྱས་རྣམས་ལ་འབུལ།  །རྫོགས་པའི་སངས་རྒྱས་ཐོབ་པར་ཤོག  །ཨོཾ་གུ་རུ་བུདྡྷ་བོ་དྷི་སཏྭ་མཎྜ་ལ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡ་ཧཱུྃ།  ཅེས་པས་གྲངས་ཅི་ནུས་དབུལ།  ཡན་ལག་ལྷག་མ་རྣམས་ནི།  བདག་ནི་ཐོག་མ་མེད་དུས་ནས།  །ལས་དང་ཉོན་མོངས་དབང་གྱུར་པའི།  །ལུས་དང་ངག་དང་ཡིད་སྒོ་ནས།  །རང་བཞིན་སྡིག་པ་ཅི་བགྱིས་དང་།  །སྡོམ་པ་གསུམ་དང་འགལ་གྱུར་པའི།  །ཉེས་པའི་ཚོགས་ཀུན་རབ་འགྱོད་པས།  །མཆོད་འོས་རྣམས་ཀྱི་སྤྱན་སྔ་རུ།  །སླན་ཆད་སྡོམ་པའི་སེམས་ཀྱིས་བཤགས།  །བླ་མའི་ཕྲིན་ལས་རྨད་བྱུང་དང་།  །རྒྱལ་དང་རྒྱལ་སྲས་རང་རྒྱལ་དང་།  །དགྲ་བཅོམ་སོ་སོར་སྐྱེ་བོ་ཡི།  །དགེ་བ་ཀུན་ལ་རྗེས་ཡི་རངས།  །འགྲོ་ཀུན་སྨིན་ཅིང་གྲོལ་བྱའི་ཕྱིར།  །བླ་མ་རྣམས་དང་སངས་རྒྱས་ལ།  །ཟབ་པ་དང་ནི་རྒྱ་ཆེ་བའི།  །ཆོས་ཀྱི་འཁོར་ལོ་བསྐོར་བར་བསྐུལ།  །སེམས་ཅན་ཇི་སྲིད་གནས་ཀྱི་བར།  །མྱ་ངན་མི་འདའ་རྟག་བཞུགས་ནས།  །འགྲོ་བ་ཀུན་གྱི་དོན་མཛད་པར།  །ཐལ་མོ་སྦྱར་ནས་གསོལ་བ་འདེབས།  །བྱང་ཆུབ་སྙིང་པོ་མཆིས་ཀྱི་བར།  །བླ་མ་མཆོག་དང་སངས་རྒྱས་དང་།  །ཆོས་དང་འཕགས་པའི་དགེ་འདུན་ལ།  །རྟག་ཏུ་གུས་པས་བདག་སྐྱབས་མཆི།  །སེམས་ཅན་ཀུན་གྱི་དོན་སླད་དུ།  །རྫོགས་པའི་བྱང་ཆུབ་ཐོབ་བྱའི་ཕྱིར།  །བྱང་ཆུབ་སེམས་ནི་བསྐྱེད་བགྱི་ཞིང་།  །བྱང་ཆུབ་སྤྱོད་པའང་སྤྱོད་པར་བགྱི།  །ཡེ་ཤེས་གསལ་བའི་སྤྱན་ལྡན་པའི།  །བརྩེ་ལྡན་བླ་མའི་ཚོགས་རྣམས་དང་།  །རྒྱལ་བ་སྲས་དང་བཅས་པ་ཀུན།  །ཡུད་ཙམ་བདག་ལ་དགོངས་སུ་གསོལ།  །མ་རིག་པ་ཡིས་ལྡོངས་གྱུར་ཅིང་།  །ལས་ཀྱི་ཆུ་ཀླུང་གིས་འཕངས་པས།  །སྲིད་པའི་རྒྱ་མཚོར་ལྷུང་གྱུར་ཏེ།  །ཉོན་མོངས་ཆུ་སྲིན་དབང་གྱུར་པའི།  །མི་བཟད་སྡུག་བསྔལ་གྱིས་གཟིར་བའི།  །ཉམ་ཆུང་བློ་གྲོས་རབ་དམན་པ།  །བདག་དང་སེམས་ཅན་ཐམས་ཅད་ཀྱི།  །སྐྱོབ་པ་མཛད་པར་གསོལ་བ་འདེབས།  །བདག་ཅག་རྣམས་ཀྱིས་རབ་འབད་ཀྱང་།  །ཐར་པའི་གོ་སྐབས་རྙེད་པར་དཀའ།  །ཁྱེད་ཀྱིས་ཐུགས་རྗེའི་ཕྱག་བརྐྱངས་ནས།  །སྲིད་པའི་མཚོ་ལས་བསྒྲལ་དུ་གསོལ།  །མངོན་པར་འདུ་བྱེད་ཀུན་གྱི་གཞི།  །ཚུལ་མིན་ཡིད་ལ་བྱེད་པའི་རྒྱུ།  །མ་རིག་མུན་པ་ཐིབས་པོ་ཆེ།  །ཡེ་ཤེས་ཟེར་གྱིས་བསལ་དུ་གསོལ།  །སྲིད་པའི་ཉེས་ཀུན་འབྱུང་བའི་གཞི།  །རྟོག་པ་ཐམས་ཅད་སྐྱེད་བྱེད་པ།  །བདག་ཏུ་འཛིན་པའི་འཁྲི་ཤིང་ནི།  །ཤེས་རབ་རལ་གྲིས་གཅོད་དུ་གསོལ།  །ཀུན་རྨོངས་ཀུན་འཁྲུགས་ཀུན་ནས་དཀྲིས།  །ང་རྒྱལ་དང་ནི་ཕྲག་དོག་ཀུན།  །མགོན་པོ་ཁྱོད་ཀྱི་མཐུ་ཆེན་གྱིས།  །ཡེ་ཤེས་ཆེན་པོར་བསྒྱུར་དུ་གསོལ།  །སྲིད་པ་ཐོག་མེད་དུས་ནས་སུ།  །སེམས་ནི་ཉོན་མོངས་དབང་གྱུར་པས།  །བག་ཆགས་དྲི་མ་གང་བསགས་པ།  །ཡེ་ཤེས་ཆུ་ཡིས་སྦྱོང་དུ་གསོལ།  །རང་གིས་མངོན་པར་སྦྱང་བའི་མཐུས།  །རང་ལ་རང་དབང་མེད་པར་ནི།  །སྡུག་བསྔལ་རྒྱ་མཚོར་འཕེན་བྱེད་པའི།  །ལས་ཀྱི་རླུང་ཤུགས་བཟློག་ཏུ་གསོལ།  །ལས་དང་ཉོན་མོངས་ཀྱིས་སྤྲུལ་པའི།  །སྐྱེ་རྒ་ན་དང་འཆི་ལ་སོགས།  །སྡུག་བསྔལ་འདུ་བྱེད་འགྱུར་བ་ཡི།  །སྡུག་བསྔལ་ཞི་བར་མཛད་དུ་གསོལ།  །ཐབས་དང་སྐྱབས་དང་དག་པ་དང་།  །ཐེག་ཆེན་ངེས་པར་འབྱུང་བ་ལས།  །སེམས་ཅན་རྣམས་ནི་རབ་བསླུ་བའི།  །བདུད་ཀྱི་ལས་རྣམས་བཟློག་ཏུ་གསོལ།  །འཇིག་རྟེན་པ་ཡི་དོན་གཉེར་པའི།  །རྙེད་དང་བཀུར་སྟི་ལ་སོགས་པ།  །སྙིང་པོ་མེད་པའི་བྱ་བ་ལས།  །ཡིད་ནི་རབ་ཏུ་བཟློག་ཏུ་གསོལ།  །ཀུན་གཞིའི་ལྟེ་བ་རབ་བརྟན་ཅིང་།  །རྟེན་འབྲེལ་ཡན་ལག་རྩིབས་བཅུ་གཉིས།  །སྡུག་བསྔལ་མུ་ཁྱུད་ཀྱིས་བསྐོར་བའི།  །སྲིད་པའི་འཁོར་ལོ་གཞིག་ཏུ་གསོལ།  །གཞན་དོན་ལ་སྐྱོ་བདག་ཆགས་པས།  །རང་ཉིད་ཞི་བ་དོན་གཉེར་བ།  །ཉན་ཐོས་ཐེག་པ་དམན་པའི་སེམས།  །རྣམ་པ་ཀུན་ཏུ་དགག་ཏུ་གསོལ།  །བདག་གི་ལུས་དང་ངག་དང་ནི།  །དེ་བཞིན་ཡིད་ཀྱི་སྒོ་ནས་ཀྱང་།  །སེམས་ཅན་ཀུན་ལ་རྣམ་ཀུན་ཏུ།  །ཕན་པ་རྒྱ་ཆེན་འབྱུང་བར་མཛོད།  །རྫོགས་པའི་བྱང་ཆུབ་སྒྲུབ་པ་ལ།  །ཕྱི་དང་ནང་གི་འཚེ་བ་ཡི།  །བར་དུ་གཅོད་པ་ཐམས་ཅད་ཀུན།  །ཉེ་བར་ཞི་བར་མཛད་དུ་གསོལ།  །བཤེས་གཉེན་གྲོགས་མཆོག་དམ་པ་དང་།  །གནས་བཟང་བ་དང་ཡོ་བྱད་སོགས།  །རྟག་ཏུ་མཐུན་པའི་རྐྱེན་རྣམས་ཀུན།  །ལྷུན་གྱིས་གྲུབ་པར་མཛད་དུ་གསོལ།  །ཚེ་རིང་ནད་མེད་འབྱོར་ལྡན་ཞིང་།  །འགྲོ་ཀུན་རྟག་ཏུ་འདུན་པ་དང་།  །ཇི་ལྟར་བསམ་པའི་དོན་རྣམས་ཀུན།  །ཆོས་བཞིན་འགྲུབ་པར་མཛད་དུ་གསོལ།  །ཚེ་ཡི་འདུ་བྱེད་གཏོང་བའི་ཚེ།  །བླ་མ་མཆོག་དང་ཧེ་རུ་ཀཿ།  མཁའ་འགྲོའི་དབང་པོ་དང་བཅས་ཀྱིས།  །མཁའ་སྤྱོད་གནས་སུ་དཀྲི་བར་མཛོད།  །མང་དུ་སྨོས་ཀྱང་ཅི་འཚལ་ཏེ།  །དབང་བཅུ་ལྡན་པ་ཁྱེད་རྣམས་ཀྱིས།  །ཇི་ལྟར་གོ་འཕང་མཆོག་བརྙེས་པ།  །དེ་ལྟར་བདག་གིས་ཐོབ་པར་མཛོད།  །བདག་གཞན་སྲིད་པའི་སྡུག་བསྔལ་གྱིས།  །རྣམ་པ་ཀུན་ཏུ་ཉམ་ཐག་པས།  །མི་ཤེས་བཞིན་དུ་གསོལ་བ་ལ།  །ཉེས་པ་སྣང་གང་བཟོད་པར་གསོལ།  །དགེ་བ་འདི་དང་དགེ་བ་གཞན།  །མ་ལུས་གཅིག་ཏུ་བསྡོམས་བྱས་ནས།  །སེམས་ཅན་ཀུན་གྱི་དོན་གྱི་ཕྱིར།  །རྫོགས་པའི་སངས་རྒྱས་མྱུར་ཐོབ་ཤོག  །བདག་ནི་ཚེ་རབས་ཐམས་ཅད་དུ།  །རིགས་གཟུགས་འབྱོར་ལྡན་ཤེས་རབ་དང་།  །དབང་ཕྱུག་ཕུན་སུམ་ཚོགས་གྱུར་ཅིང་།  །ནད་མེད་ཚེ་དང་ལྡན་གྱུར་ཅིག  །སངས་རྒྱས་འབྱུང་བ་མཉེས་བྱེད་ཅིང་།  །དམ་ཆོས་རྟག་ཏུ་སྤྱོད་པ་དང་།  །འཕགས་པའི་དགེ་འདུན་རྒྱ་མཚོའི་ཚོགས།  །རྣམ་པ་ཀུན་ཏུ་མཆོད་པར་ཤོག  །ཀུན་དགའི་གསུང་རབ་རྟག་ཉན་ཅིང་།  །སྐུ་ཡི་རྒྱལ་མཚན་བལྟ་བ་དང་།  །དེ་ཡི་དཔལ་འབྱོར་བཟང་པོ་ཡིས།  །རྟག་ཏུ་བདག་ནི་སྐྱོང་བར་ཤོག  །དད་དང་བརྩེ་དང་བརྩོན་པའི་མཐུས།  །བྱང་ཆུབ་ལམ་རྣམས་རྫོགས་བྱེད་ཅིང་།  །སངས་རྒྱས་ཞིང་ཀུན་སྦྱོང་བ་དང་།  །སེམས་ཅན་སྨིན་པར་བྱེད་པར་ཤོག  །ཡིད་བཞིན་ནོར་བུ་ཆེན་པོ་ལྟར།  །བདག་ལས་སེམས་ཅན་ཐམས་ཅད་ཀྱི།  །ཡིད་ལ་འདོད་དགུ་འབྱུང་འགྱུར་ཞིང་།  །འགྲོ་ཀུན་ཚིམ་པར་བྱེད་པར་ཤོག  །བདག་ལ་བརྟེན་ནས་འགྲོ་བ་ཀུན།  །ཟབ་མོའི་ལམ་ལ་རབ་ཞུགས་ནས།  །སྲིད་དང་ཞི་ལ་མི་གནས་པའི།  །བྱང་ཆུབ་ཆེན་པོ་ཐོབ་གྱུར་ཤོག  །བློ་གྲོས་སྒྲིབ་གཉིས་རྣམ་དག་པས།  །ཤིན་ཏུ་ཟབ་པའི་བློ་གྲོས་དང་།  །རྒྱ་ཆེའི་བློ་གྲོས་དང་ལྡན་པའི།  །བློ་གྲོས་ཆེན་པོར་བདག་གྱུར་ཅིག  །ཚུལ་ཁྲིམས་རྒྱལ་མཚན་དང་ལྡན་ཞིང་།  །ཆོས་ཀྱི་རྒྱལ་མཚན་ལེགས་བཟུང་བས།  །བསྟན་པའི་རྒྱལ་མཚན་བརྟན་བྱས་ནས།  །ཐར་པའི་རྒྱལ་མཚན་སློང་བར་ཤོག  །ཚོགས་གཉིས་དཔལ་རབ་རྫོགས་གྱུར་ནས།  །འགྲོ་བའི་དཔལ་མགོན་འབྱུང་བའི་གཞི།  །སྐུ་གསུམ་དཔལ་འབྱོར་ལྷུན་གྲུབ་སྟེ།  །སྲིད་ཞིའི་དཔལ་དུ་བདག་གྱུར་ཅིག  །སྨོན་ལམ་བཟང་པོ་ལས་བྱུང་བའི།  །ཕྲིན་ལས་བཟང་པོས་འགྲོ་བ་ཀུན།  །སྐལ་པ་བཟང་པོར་ལེགས་བསྒྲུབས་པའི།  །བརྟུལ་ཞུགས་བཟང་པོར་བདག་གྱུར་ཅིག  །རྒྱལ་དང་རྒྱལ་བའི་སྲས་རྣམས་ཀྱི།  །རྗེས་སུ་བདག་ཀྱང་རབ་ཞུགས་ནས།  །དགེ་བ་འདི་དང་དགེ་བ་གཞན།  །ཐམས་ཅད་ཡོངས་སུ་བསྔོ་བར་བགྱི།  །གཞན་ཡང་སྐྱེ་བ་འདི་ཉིད་དུ།  །མི་མཐུན་ཕྱོགས་ཀུན་ཞི་བ་དང་།  །ཚེ་རིང་ནད་མེད་ཕུན་སུམ་ཚོགས།  །རྟག་ཏུ་བདེ་དང་ལྡན་གྱུར་ཅིག  །བླ་མེད་བླ་མའི་ཐུགས་རྗེ་དང་།  །རྒྱལ་དང་རྒྱལ་སྲས་རང་རྒྱལ་དང་།  །དགྲ་བཅོམ་བདེན་པའི་བྱིན་བརླབས་ཀྱིས།  །ཇི་ལྟར་བསྔོས་བཞིན་འགྲུབ་གྱུར་ཅིག  །ཅེས་བརྗོད།  དེ་ནས་གསོལ་བ་བཏབ་པ་ནི།  ཀུན་མཁྱེན་ཆོས་ཀྱི་རྒྱལ་པོའི་གསང་གསུམ་ཡོན་ཏན་རྗེས་སུ་དྲན་པས་སྐུ་བསྟོད་རྒྱས་པ་ཅི་འགྲུབ་དང་།  བསྡུ་ན།  བདེ་གཤེགས་བསྟན་པའི་གསུང་རབ་སེང་གེའི་ཆོས་རྗེའི་གསུངས་བྱིན་བརླབ་ཆེ་བས་ཚིགས་ཐ་མ་ཞལ་བསྒྱུར་བའོ།  །སྒྲ།  །ལྟ་ངན་རི་དྭགས་མཐའ་དག་སྐྲག་པར་མཛད།  །སངས་རྒྱས་དགོངས་པ་ཇི་བཞིན་ལེགས་སྒྲུབ་པ།  །མཚུངས་མེད་ཀུན་མཁྱེན་བླ་མར་གསོལ་བ་འདེབས།  ཅེས་པ་དང་།  སྐྱབས་གནས་ཀུན་འདུས་བླ་མ་རིན་པོ་ཆེ།  །དྲིན་ཅན་ཆོས་ཀྱི་རྗེ་ལ་གསོལ་བ་འདེབས།  །མཉམ་མེད་བཀའ་དྲིན་ཅན་གྱི་ཐུགས་རྗེས་ཟུང་།  །འདི་ཕྱི་བར་དོ་ཀུན་ཏུ་བྱིན་གྱིས་རློབས།  །ཅེས་པ་རྣམས་བརྒྱ་སྟོང་སོགས་དད་མོས་དྲག་པོས་རྩེ་གཅིག་ཏུ་གསོལ་བ་བཏབ།  གསོལ་འདེབས་རྒྱུད་བསྐུལ་གྱི་བཟླས་པ་བྱ་ན།  ཨོཾ་ཨཱཿགུ་རུ་མ་ཧཱ་ཛྙཱ་ན་སརྦ་སིདྡྷི་ཧཱུྃ།  ཞེས་ཅི་ནུས་བཟླ།  དེ་ནས་སླར་ཡང་གསོལ་བ་བཏབ་ཅིང་དབང་བླངས་པ་ནི།  ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱི་ངོ་བོར་གྱུར་པ།  ཆོས་ཀྱི་རྗེ།  ཆོས་ཀྱི་རྒྱལ་པོ།  ཆོས་ཀྱི་དབང་ཕྱུག  །ཆོས་དམ་པའི་འབྱོར་པ་ཐམས་ཅད་ཀྱིས་ཕུན་སུམ་ཚོགས་ཤིང་།  འཁོར་བ་དང་མྱ་ངན་ལས་འདས་པའི་དཔལ་དམ་པར་གྱུར་པ་བླ་མ་དམ་པའི་ཞབས་ཀྱི་པདྨོ་དྲི་མ་མེད་པ་ལ་གུས་པས་ཕྱག་འཚལ་ཞིང་སྐྱབས་སུ་མཆིའོ།  །སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱིས་བདག་དང་སེམས་ཅན་ཐམས་ཅད་ལ་བྱིན་གྱིས་བརླབ་དུ་གསོལ།  བདག་གི་སྔོན་གྱི་ལས་ལས་གྱུར་པ་དང་།  གནས་སྐབས་ཀྱི་རྐྱེན་ལས་གྱུར་པའི་མི་དང་མི་མ་ཡིན་པ་དང་།  འབྱུང་པོའི་གནོད་པ་དང་།  ཉེ་བར་འཚེ་བ་དང་།  བྱུར་དང་སྐལ་བ་ངན་པ་དང་།  ཕྱི་དང་ནང་གི་བར་དུ་གཅོད་པ་ཐམས་ཅད་ཉེ་བར་ཞི་བར་བྱིན་གྱིས་བརླབ་ཏུ་གསོལ།  ཚེ་དང་དཔལ་དང་འབྱོར་པ་དང་དབང་ཕྱུག་ཕུན་སུམ་ཚོགས་པར་བྱིན་གྱིས་བརླབ་ཏུ་གསོལ།  འཇིག་རྟེན་གྱི་ཆོས་བརྒྱད་དང་མཚན་མའི་རྣམ་པར་གཡེང་བ་ལ་སོགས་པ་སྲིད་པར་འཁོར་བར་འགྱུར་བའི་རྣམ་པར་རྟོག་པ་དང་།  གཞན་གྱི་དོན་ལ་སྐྱོ་བ་དང་།  རང་ཉིད་ཞི་བར་འདུན་པ་ལ་སོགས་པ་མྱ་ངན་ལས་འདའ་བར་གྱུར་པའི་རྣམ་པར་རྟོག་པ་གང་ལགས་པ་ཐམས་ཅད་མི་འབྱུང་བར་བྱིན་གྱིས་བརླབ་ཏུ་གསོལ།  བདག་གི་སེམས་ལས་སུ་རུང་བ་དང་།  བག་ཡོད་པ་དང་།  དྲན་པ་དང་།  ཤེས་བཞིན་ཡང་དག་པ་དང་ལྡན་པར་བྱིན་གྱིས་བརླབ་ཏུ་གསོལ།  བདག་གི་ཚུལ་ཁྲིམས་གྱི་ཕུང་པོ་དང་དམ་ཚིག་དང་སྡོམ་པའི་ཚོགས་རྣམ་པར་དག་ཅིང་།  སྡིག་པ་དང་།  སྒྲིབ་པ་དང་།  ལྟུང་བ་དང་།  ཉེས་པའི་དྲི་མས་མ་གོས་པར་བྱིན་གྱིས་བརླབ་ཏུ་གསོལ།  དད་པ་དང་སྙིང་རྗེ་དང་ཤེས་རབ་ཕུན་སུམ་ཚོགས་པ་དང་ལྡན་ཞིང་།  བྱང་ཆུབ་ཀྱི་སེམས་གཉིས་ཟུང་དུ་ཆུད་ནས།  ལུང་དང་མངོན་པར་རྟོགས་པས་བསྡུས་པའི་ཆོས་ཀྱི་སྣང་བ་དམ་པ་དང་རྟོགས་པ་དགེ་བ་ཁྱད་པར་ཅན་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ།  གང་གི་ཚེ་བདག་འཆི་བར་གྱུར་པ་དེའི་ཚེ་ཚེ་འདི་དང་འཇིག་རྟེན་འདི་ལ་མངོན་པར་ཞེན་པ་དང་བྲལ་ཞིང་ལུས་དང་སེམས་ལ་ཟུག་རྔུ་དང་སྡུག་བསྔལ་ཅུང་ཟད་ཙམ་ཡང་མི་འབྱུང་བར་དགའ་བ་དང་སྤྲོ་བ་དང་ཡིད་གསལ་བ་མཆོག་ཏུ་ལྡན་ཞིང་།  ཏིང་ངེ་འཛིན་དམ་པ་རྒྱུད་ལ་སྐྱེས་ནས།  བླ་མ་དང་དཀྱིལ་འཁོར་གྱི་ལྷ་ཚོགས་རྣམས་དང་།  དཔའ་བོ་དང་རྣལ་འབྱོར་མའི་ཚོགས་ཡང་དག་པ་མཐོང་ཞིང་།  དེ་དག་གི་རྣམ་པར་འཕྲུལ་པ་བསམ་གྱིས་མི་ཁྱབ་པ་དང་བཅས་པས་བསུས་ཏེ།  བར་དོའི་འཇིགས་པ་ཐམས་ཅད་དང་བྲལ་ཞིང་།  བདུད་དང་གཤིན་རྗེའི་སྤྱོད་ཡུལ་ཐམས་ཅད་ལས་ཤིན་ཏུ་འདས་ནས་རིག་པ་འཛིན་པ་དང་མཁའ་ལ་སྤྱོད་པ་ལ་སོགས་པའི་གོ་འཕང་མཆོག་ཏུ་སྐྱེ་བར་བྱིན་གྱིས་བརླབ་ཏུ་གསོལ།  སྐྱེ་བ་དང་སྲིད་པ་ཐམས་ཅད་དུ་འཇིག་རྟེན་དང་འཇིག་རྟེན་ལས་འདས་པའི་རྒུད་པ་ཐམས་ཅད་དང་བྲལ་ཞིང་སྲིད་པ་དང་ཞི་བའི་འབྱོར་པ་ཕུན་སུམ་ཚོགས་པ་ཐོབ་སྟེ།  ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་གསུང་རབ་རྒྱ་མཚོའི་ཚོགས་ཡང་དག་པར་བཟུང་ནས།  ཆོས་ཀྱིས་ཕོངས་པའི་སེམས་ཅན་ཐམས་ཅད་ལ་ཆོས་ཀྱི་སྦྱིན་པ་རྒྱ་ཆེན་པོ་བཏོང་ཞིང་།  སངས་རྒྱས་ཀྱི་ཞིང་ཡོངས་སུ་དག་པ་དང་སེམས་ཅན་རྣམས་ཡོངས་སུ་དག་པ་དང་བྲལ་བ་ཅན་རྣམས་ཡོངས་སུ་སྨིན་པར་བྱས་ནས་དངོས་པོ་ཐམས་ཅད་ཀྱིས་བླ་མ་དམ་པ་མཉེས་པར་བྱས་ཏེ་ས་དང་ལམ་ཐམས་ཅད་བདེ་བླག་ཏུ་བགྲོད་ནས།  སྐུ་བཞི་ཡེ་ཤེས་ལྔ་དང་ལྡན་པའི་རྡོ་རྗེ་འཆང་ཆེན་པོའི་གོ་འཕང་མྱུར་དུ་ཐོབ་པར་བྱིན་གྱིས་བརླབ་ཏུ་གསོལ།  བླ་མའི་དཔྲལ་བའི་ཨོཾ་ལས་འོད་དཀར་པོ།  །ཨོཾ་གྱི་གཟུགས་བྱུང་རང་གི་དཔྲལ་བར་ཐིམ།  བུམ་པའི་དབང་ཐོབ་ལུས་ཀྱི་དྲི་མ་དག  །སྐུ་ཡི་བྱིན་བརླབ་སྤྲུལ་སྐུའི་ས་བོན་བཞག  །བླ་མའི་མགྲིན་པའི་ཨཱཿལས་འོད་དམར་པོ།  ཨཱཿཡི་གཟུགས་བྱུང་རང་གི་མགྲིན་པར་ཐིམ།  གསང་བའི་དབང་ཐོབ་ངག་གི་དྲི་མ་དག  །གསུང་གི་བྱིན་བརླབ་ལོངས་སྐུའི་ས་བོན་བཞག  །བླ་མའི་ཐུགས་ཀའི་ཧཱུྃ་ལས་འོད་སྔོན་པོ།  །ཧཱུྃ་གི་གཟུགས་བྱུང་རང་གི་སྙིང་གར་ཐིམ།  །གསུམ་པའི་དབང་ཐོབ་སེམས་ཀྱི་དྲི་མ་དག  །ཐུགས་ཀྱི་བྱིན་བརླབ་ཆོས་སྐུའི་ས་བོན་བཞག  །བླ་མའི་ཡི་གེ་གསུམ་ལས་འོད་སྣ་ཚོགས།  འབྲུ་གསུམ་གཟུགས་བྱུང་རང་གི་གནས་གསུམ་ཐིམ།  །བཞི་པའི་དབང་ཐོབ་སྒྲིབ་པའི་བག་ཆགས་དག  །ཀུན་གྱི་བྱིན་བརླབ་ངོ་བོ་ཉིད་སྐུར་གྱུར།  །ཅེས་བརྗོད་ལ་དབང་དོན་གྱི་ཡེ་ཤེས་བསྐྱངས་ཤིང་དེ་ཁོ་ན་ཉིད་ལ་བློ་བཞག  །མཐར་ནི་བླ་མ་དགྱེས་པ་ཆེན་པོ་ཡིས།  །མཚན་དཔེའི་ཞལ་འཛུམས་གསུང་གི་སྒྲ་བསྒྲགས་ཤིང་།  ཐུགས་ཀྱིས་བདག་ལ་བརྩེ་བས་དགོངས་བཞིན་དུ།  །རང་གི་སྤྱི་བོ་ཚངས་པའི་སྒོ་ནས་བྱོན།  །སྙིང་དབུས་པད་དཀར་འོད་ཀྱི་གུར་ཁང་དུ།  །འབྲལ་བ་མེད་པར་རྟག་ཏུ་བཞུགས་པར་གྱུར།  །བླ་མའི་ཐུགས་ཀའི་ཧཱུྃ་ལ་ཤེས་པ་ཐིམ་པ་ལྟར་གཏད་ཅིང་ཐུགས་ཡིད་བསྲེ་ལ་ལྟ་བའི་ངང་བསྐྱངས།  དེ་ལས་ལྡངས་བ་ན་སྨོན་ལམ་ནི།  སངས་རྒྱས་ཀུན་འདུས་ཕྱི་ཡི་བླ་མ་དང་།  །སེམས་ཉིད་འོད་གསལ་ནང་གི་བླ་མ་དང་།  །རང་བཞིན་སྤྲོས་བྲལ་དོན་གྱི་བླ་མ་གསུམ།  །དབྱེར་མེད་སྙིང་པོའི་བླ་མ་རྟོགས་པར་ཤོག  །དགེ་བ་འདི་ཡི་བདག་སོགས་སེམས་ཅན་རྣམས།  །དངོས་གྲུབ་འབྱུང་གནས་དཔལ་ལྡན་བླ་མ་ལ།  །ལྷག་པའི་ལྷ་རུ་ཤེས་པའི་མོས་གུས་ཀྱིས།  །དབང་དང་དངོས་གྲུབ་རྟག་ཏུ་ལེན་པར་ཤོག  །ལུས་ངག་ཡིད་གསུམ་ལོངས་སྤྱོད་དང་བཅས་པས།  །དོན་ཡོད་རྣམ་བཞིས་བླ་མ་མཉེས་བྱས་ནས།  །ཅི་མཛད་རྒྱལ་བའི་མཛད་པར་ལེགས་རྟོགས་ཏེ།  །རྨད་བྱུང་ཕྲིན་ལས་སྒྲུབ་ལ་བརྩོན་པར་ཤོག  །མགོན་པོ་ཁྱོད་ཀྱི་ཐུགས་དང་བདག་གི་སེམས།  །དབྱེ་བ་མེད་པར་གཅིག་ཏུ་འདྲེས་གྱུར་ནས།  །ཕྱོགས་ལས་རྣམ་པར་རྒྱལ་བ་ཁྱེད་ཅི་འདྲ།  །བདག་ཀྱང་དེ་འདྲར་འགྱུར་བར་བྱིན་གྱིས་རློབས།  །དཔལ་ལྡན་རྩ་བའི་བླ་མ་རིན་པོ་ཆེ།  །བདག་གི་སྙིང་གར་པདྨའི་གདན་བཞུགས་ནས།  །བཀའ་དྲིན་ཆེན་པོའི་སྒོ་ནས་རྗེས་བཟུང་ནས།  །སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ།  །ཐོས་པ་རྒྱ་མཚོའི་མཆོད་ཡོན་ཀུན་ནས་འཁྱིལ།  །ཡོན་ཏན་མེ་ཏོག་ཚུལ་ཁྲིམས་བདུག་སྤོས་སྤྲིན།  །ཤེས་རབ་སྒྲོན་མེ་དད་པ་སྤོས་ཆུའི་མཚོ།  །ཏིང་འཛིན་བདུད་རྩིའི་ཞལ་ཟས་དམ་པ་དང་།  །བསྟོད་དབྱངས་སྙན་པའི་སིལ་སྙན་སྒྲ་འབྱིན་ཅིང་།  །ཀུན་ནས་སྙིང་བརྩེ་རྣམ་དཔྱོད་སྤོབས་པ་ཡི།  །གདུགས་དང་རྒྱལ་མཚན་བ་དན་བསྒྲེངས་པ་ཡིས།  །བདག་ལུས་གཞལ་མེད་ཁང་བརྩེགས་རབ་བརྒྱན་ནས།  །སྙིང་གི་ཆུ་སྐྱེས་ཐིག་ལེ་ཟླ་རྒྱས་ལ།  །བརྟན་པར་བཞུགས་པའི་ཆོས་རྗེ་མཆོད་བགྱིད་ཅིང་།  །ངེས་པར་འདུན་པའི་ཡིད་ཀྱིས་གསོལ་བཏབ་པས།  །འགྲོ་བའི་བླ་མ་རྟག་ཏུ་མཉེས་གྱུར་ཅིག  །སྐྱེ་བ་ཀུན་ཏུ་ཡང་དག་བླ་མ་དང་།  །འབྲལ་མེད་ཆོས་ཀྱི་དཔལ་ལ་ལོངས་སྤྱོད་དེ།  །ས་དང་ལམ་གྱི་ཡོན་ཏན་རབ་རྫོགས་ནས།  །རྡོ་རྗེ་འཆང་གི་གོ་འཕང་མྱུར་ཐོབ་ཤོག  །སྐྱེ་ཞིང་སྐྱེ་བ་དག་ནི་ཐམས་ཅད་དུ།  །རིགས་བཟང་བློ་གསལ་ང་རྒྱལ་མེད་པ་དང་།  །སྙིང་རྗེ་ཆེ་ཞིང་བླ་མ་ལ་གུས་ནས།  །དཔལ་ལྡན་བླ་མའི་དམ་ཚིག་ལ་གནས་ཤོག  །བདག་སོགས་གདུལ་བྱར་གྱུར་པ་ཐམས་ཅད་ཀྱང་།  །ལས་འབྲས་ལྷུར་ལེན་གསུང་རབ་དོན་ལ་མཁས།  །ཚུལ་ཁྲིམས་དག་ཅིང་ཐོས་ལ་མངོན་བརྩོན་ཏེ།  །ཐུབ་བསྟན་ཕྱོགས་བཅུར་རྒྱས་པར་མཛད་དུ་གསོལ།  །རྒྱལ་མཚན་རྩེ་མོ་དབང་གི་རྒྱལ་པོ་ལྟར།  །ལྷག་པའི་ལྷ་ཡི་གཙུག་གི་རྒྱན་གཅིག་པུ།  །སྒྲུབ་པ་པོ་ལ་དངོས་གྲུབ་མཆོག་སྩོལ་མཛད།  །མཉམ་མེད་བླ་མ་མཆོག་གི་བཀྲ་ཤིས་ཤོག  །བསྔོ་སྨོན་ཤིས་བརྗོད་ཅི་རིགས་པས་དགེ་ལེགས་སུ་བྱའོ།  །བླ་མའི་ལམ་ཁྱེར་དང་།  དགོས་པ།  ཕན་ཡོན།  དམ་ཚིག་སོགས་རྒྱས་པར་གཞན་ལས་ཤེས་པར་བྱའོ།  །འདི་ནི་ཉམས་ལེན་འབྲིང་དུ་བྱ་བའི་ཚུལ་ཡིན་ལ་རྒྱས་པར་སྤྲོ་ན།  སྐྱབས་སེམས་ཀྱི་དབུར་ལམ་འབྲས་བླ་མཆོད་ལྟར་མཆོད་པ་བྱིན་བརླབ་དང་།  མཆོད་པའི་ཡན་ལག་སྐབས་སྤྱིར་མཆོད་གྲུབ་ནས་བྱེ་བྲག་གི་མཆོད་ཕྲེང་ཉེར་སྤྱོད།  རིན་བདུན་འདོད་ཡོན་ལྔ་རྣམས་དབུལ།  འདིའི་ཚིག་ཕྲད་མོས་བློས་བླ་མ་མཆོག་ལ་བདག་འབུལ་གྱི།  ཞེས་བསྒྱུར།  མཎྜལ་རྒྱས་བསྡུས་བརྒྱ་རྩ་འབུལ།  དེ་ནས་སྡིག་བཤགས་སོགས་ཡན་ལག་ལྷག་མ་རྣམས་བྱ་བ་ནི་རྒྱས་པའོ།  །ཤིན་ཏུ་བསྡུ་ན།  ཚོགས་ཞིང་གསལ་གདབ་གང་དྲིན་མའི་བསྟོད་པ།  ཁྱོད་མཉེས་བགྱིད་པའང་གྲུབ་པར་ཤོག  །ཅེས་པའི་བར་ཡན་ལག་བདུན་པ།  དཀོན་མཆོག་གསུམ་ལ་བདག་སྐྱབས་མཆི།  སོགས་ཀྱི་རྒྱུན་བཤགས་ལན་གསུམ་བྱས་ནས་གསོལ་འདེབས་བསྡུས་པ་དང་།  བཟླས་པ་བྱ།  སླར་ཡང་།  སྐྱབས་གནས་ཀུན་འདུས་བླ་མ་རིན་པོ་ཆེ།  སོགས་ཤྭ་ལོ་ཀ་གཅིག་པུས་ལན་གསུམ་དུ་གསོལ་བ་བཏབ།  བླ་མའི་དཔྲལ་བའི་སོགས་དབང་བླངས་བ་མན་ཆོད་གཞུང་ལྟར་རོ།  །འདི་སྦྱར་དགེ་བ་གང་ཡོད་དེས།  །བསོད་ནམས་དཔག་མེད་ལྡན་གྱུར་ཏེ།  །ཀུན་མཁྱེན་ཆོས་ཀྱི་སེདྒེ་ཡི།  །གོ་འཕང་དམ་པ་བརྙེས་གྱུར་ཅིག  །ཅེས་པའང་ཡེ་ན་དགེ་སློང་ཤེས་རབ་ཕུན་ཚོགས་ནས་ཤེས་བྱ་མ་འབུམ་ཐེར་གཅིག་གསུང་བའི་ཞལ་བཞེས་དང་རྟེན་བཅས་སྔ་ཕྱིར་བསྐུལ་བ་དང་།  ཀུན་མཁྱེན་བླ་མ་འདི་ཉིད་རྗེ་བཙུན་གོང་མ་ལྔ་དང་།  རྗེ་རྡོ་རྗེ་འཆང་བཅས་ཀྱི་མདོ་སྔགས་ཀྱི་དགོངས་བཞེད་འཁྲུལ་མེད་དུ་སྟོན་པའི་མཁས་གྲུབ་ཀུན་གྱི་གཙུག་གི་རྒྱན་ཅིག་འདི་ལྟ་བུ་ལ་གསོལ་བ་བཏབ་ན་ཕ་རྗེས་བུས་ཟིན་ངེས་པར་འབྱུང་སྙམས་ཤིང་།  དེང་དུས་ཀྱི་དཔེ་ཆ་བ་རྣམས་ཁ་སུ་མང་གི་ཁ་ཟེགས་བསྡུས་པའི་བཤད་ཡམ་བོར་ནས་གཞན་ལ་ཁྱད་གསོད་སྤངས་ཏེ་རང་གི་ཆོས་ཀྱི་ཟབ་གནད་ཀུན་མཁྱེན་བླ་མའི་ལེགས་བཤད་ལྟར་བཟུང་ནས་བསྟན་པ་འཛིན་ན་དོན་ཆེ་བར་མཐོང་ཞིང་བླ་མའི་རྣལ་འབྱོར་ཡང་རང་ལུགས་ཀྱེ་རྡོར་ལམ་ཟབ་ལས་ལྷག་པ་མི་དགོས་ཀྱང་།  ཀུན་མཁྱེན་ཆོས་ཀྱི་རྒྱལ་པོའི་སྐུ་ཡི་རྣམ་པ་དྲན་པའི་གསོས་འདེབས་སུ་རང་ཉིད་ཀྱང་སྤྲོ་བར་གྱུར་ཅིང་གཞན་ཨ་གསར་ཅན་རྣམས་ལའང་ཕན་པ་ཅུང་ཟད་རེ་འགྱུར་སྙམས་ནས་ལམ་ཟབ་ཀྱི་གཞུང་བླ་མ་གོང་མའི་གསུང་བྱིན་ཅན་རྣམས་བསྒྲིགས།  རྨོངས་ཚིག་གསར་བསྣན་ཁ་ཤས་ཀྱང་བགྱིས་ཏེ་འཇམ་དབྱངས་ཆོས་ཀྱི་བློ་གྲོས་པས་ཐུན་བར་གཅིག་ལ་ཤར་མར་བྲིས་པ་འདིས་ཀྱང་རང་གཞན་རྣམས་ཀྱི་རྒྱུད་ལ་བླ་མའི་བྱིན་བརླབ་མྱུར་དུ་འཇུག་པར་གྱུར་ཅིག  །སརྦ་མང་ག་ལཾ།།    །།}}
</onlyinclude>
{{TsagliCall}}
<headertabs/>
== Footnotes ==
<references/>
==Other Information==
{{Footer}}
[[Category:JKCL-KABUM-Volume-04-NGA]]
[[Category:Khyentse Lineage Project]]