View source for JKCL-KABUM-04-NGA-028

{{Khyentse Metadata
|classification=Tibetan Publications
|subclass=Tibetan Texts
|fulltitletib=དཔལ་ས་སྐྱ་པ་ཆེན་པོ་ཀུན་དགའ་སྙིང་པོ་ལ་བརྟེན་པའི་བླ་མའི་རྣལ་འབྱོར་གྲུབ་གཉིས་མཆོག་སྩོལ།
|fulltitle=dpal sa skya pa chen po kun dga' snying po la brten pa'i bla ma'i rnal 'byor grub gnyis mchog stsol
|citation=[['jam dbyangs mkhyen brtse chos kyi blo gros]]. ''dpal sa skya pa chen po kun dga' snying po la brten pa'i bla ma'i rnal 'byor grub gnyis mchog stsol''. In ''Rdzong sar mkhyen brtse 'jam dbyangs chos kyi blo gros kyi gsung 'bum'', Vol. 4: 157-164. Bir, H.P.: Khyentse Labrang, 2012.
|collectiontitletib=ཆོས་ཀྱི་བློ་གྲོས་བཀའ་འབུམ་
|collectiontitle=chos kyi blo gros bka' 'bum
|author='jam dbyangs mkhyen brtse chos kyi blo gros
|authortib=འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
|associatedpeople=Sa chen kun dga' snying po
|associatedpeopletib=ས་ཆེན་ཀུན་དགའ་སྙིང་པོ་
|tibgenre=Guru Yoga Texts - bla ma'i rnal 'byor
|terma=No
|jkcloutline=Four
|language=Tibetan
|volumenumber=004
|volnumtib=༤
|volyigtib=ང་
|totalvolumes=12
|textnuminvol=028
|pagenumbers=157-164
|totalpages=8
|beginfolioline=1a1
|endfolioline=4b4
|totalfolios=4
|multivolumework=No
|colophontib=།ཅེས་པའང་ལམ་ཟབ་ཕྱི་ནང་ལས་ལྷག་པའི་ཉམས་ལེན་མི་དགོས་ཀྱང་།  གོང་མ་ཀུན་བློ།  འཇམ་མགོན་མཁྱེན་བརྩེ།  ངག་དབང་ལེགས་གྲུབ་སོགས་ཀྱིས་རྗེ་བཙུན་རིན་པོ་ཆེ་དང་།  ཚར་ཆེན་སོགས་ལ་བླ་མའི་རྣམ་ཐར་མཛད་པ་ལ་དཔག་ནས་འཇམ་དབྱངས་ཆོས་ཀྱི་བློ་གྲོས་པས་ལྕགས་སྦྲུལ་ཟླ་གཉིས་ཚེས་ཉེར་དྲུག་ལ་རང་གི་མོས་པ་གཙོ་བོར་བྱས་ཏེ་བྲིས་པ་འདིས་ཀྱང་སེམས་ཅན་ལ་ཕན་པ་རྒྱ་ཆེན་པོ་འབྱུང་བར་བྱིན་གྱིས་བརླབ་ཏུ་གསོལ།  སརྦ་ཛ་ག་ཏཾ་ཤུ་བྷཾ།།
|colophonwylie=/ces pa'ang lam zab phyi nang las lhag pa'i nyams len mi dgos kyang /__gong ma kun blo/__'jam mgon mkhyen brtse/__ngag dbang legs grub sogs kyis rje btsun rin po che dang /__tshar chen sogs la bla ma'i rnam thar mdzad pa la dpag nas 'jam dbyangs chos kyi blo gros pas lcags sbrul zla gnyis tshes nyer drug la rang gi mos pa gtso bor byas te bris pa 'dis kyang sems can la phan pa rgya chen po 'byung bar byin gyis brlab tu gsol/__sarba dza ga taM shu b+haM//
|pdflink=File:JKCL-KABUM-04-NGA-028.pdf
}}
{{Header}}
<h1 style="font-size: 24px !important;">Tibetan Text</h1>
<onlyinclude>
{{TibP|༄༅།  །དཔལ་ས་སྐྱ་པ་ཆེན་པོ་ཀུན་དགའ་སྙིང་པོ་ལ་བརྟེན་པའི་བླ་མའི་རྣལ་འབྱོར་གྲུབ་གཉིས་མཆོག་སྩོལ་བཞུགས་སོ།  །
{{TibChung|རྗེ་བཙུན་བརྩེ་བ་ཆེན་པོའི་ཞབས་ལ་ཕྱག་འཚལ་ཞིང་སྐྱབས་སུ་མཆིའོ།  །དཔལ་ལྡན་རྡོ་རྗེ་འཆང་དབང་གི།  ཐུགས་ཀྱི་གསང་མཛོད་སྒོ་དབྱེ་བ།  །རྣལ་འབྱོར་དབང་ཕྱུག་བརྩེ་བ་ཆེས།  །རྟག་ཏུ་བྱིན་རློབས་ཤིས་པ་སྩོལ།  །དེ་ལ་རྟེན་གྱི་གང་ཟག་དབང་གིས་རྒྱུད་སྨིན་པས་ལམ་གྱི་སྙིང་པོ་འདི་ལ་བརྩོན་པར་བྱ་སྟེ།  དད་པ་དང་ངེས་འབྱུང་བྱང་སེམས་ལམ་གྱིས་གཞི་བཅའ་བ་སྔོན་དུ་འགྲོ་བས་འདིར་འཇུག་པ་ལ་སྦྱོར་དངོས་རྗེས་གསུམ་ལས།  །དང་པོ་སྦྱོར་བ་སྐྱབས་སེམས་ནི།}}  མདུན་མཁར་མཆོད་སྤྲིན་རྒྱ་མཚོའི་དབུས།  །སྐྱབས་ཡུལ་མངོན་སུམ་བཞིན་དུ་གསལ།  །བདག་གཞན་མཁའ་ཁྱབ་འགྲོ་བ་མ་ལུས་ཀུན།  །དེང་ནས་བཟུང་སྟེ་བྱང་ཆུབ་སྙིང་པོའི་བར།  །སྐྱབས་ཀྱི་མཆོག་གྱུར་བླ་མ་མཆོག་གསུམ་ལ།  །མི་ཕྱེད་རྩེ་གཅིག་གུས་པས་སྐྱབས་སུ་མཆི།  །{{TibChung|ལན་གསུམ་སོགས་ཅི་ནུས་མཐར།}}  སྐྱབས་ཡུལ་འོད་ཞུ་རང་ལ་ཐིམ།  །སྒྲིབ་དག་ཚོགས་གཉིས་རྫོགས་པར་གྱུར།  །{{TibChung|གཉིས་པ་སེམས་བསྐྱེད་པ་ནི།}}  མ་གྱུར་རིགས་དྲུག་མཁའ་ཁྱབ་སེམས་ཅན་རྣམས།  །རྫོགས་པའི་བྱང་ཆུབ་ཆེན་པོར་འགོད་པར་བྱ།  །དེ་ཡི་ཆེད་དུ་ཟབ་མོའི་ཉེ་ལམ་ནི།  །བླ་མའི་རྣལ་འབྱོར་ཉམས་སུ་བླང་བར་བགྱི།  །{{TibChung|ལན་གསུམ་བརྗོད།  །གཉིས་པ་དངོས་གཞི་ལ་ཚོགས་རྟེན་གསལ་བཏབ་བ་ནི།}}  རང་མདུན་ནམ་མཁར་འཇའ་སྤྲིན་འཁྲིགས་པའི་ཀློང་།  །སེང་ཁྲི་པད་དཀར་ཟླ་བ་རྒྱས་པའི་སྟེང་།  །རྩ་བའི་བླ་མ་བརྩེ་ཆེན་ཀུན་དགའ་སྙིང་།  །དཀར་གསལ་ཞི་འཛུམ་ཕྱག་གཡས་མཆོག་སྦྱིན་དང་།  །གཡོན་པས་སྐྱབས་སྦྱིན་པད་དཀར་སྡོང་བུ་བསྣམས།  །དགེ་བསྙེན་ཆས་གསོལ་ཞབས་གཉིས་རོལ་སྟབས་བཞུགས།  །ཐུགས་དབུས་པད་ཟླའི་སྟེང་དུ་བིཪྺ་པ།  །དམར་སྨུག་རྣལ་འབྱོར་སྤྱོད་པའི་ཆ་བྱད་ཅན།  །ཕྱག་གཉིས་ཆོས་ཀྱི་འཁོར་ལོའི་ཕྱག་རྒྱ་མཛད།  །དེ་དག་གནས་གསུམ་ཨོཾ་ཨཱཿཧཱུྃ་གིས་མཚན།  །ཐུགས་ལས་འོད་འཕྲོས་བདེ་བ་ཅན་སོགས་ནས།  །རྗེ་བཙུན་བླ་མ་སྤྱན་དྲངས་གཉིས་མེད་ཐིམ།  །{{TibChung|གཉིས་པ་ཡན་ལག་བདུན་པ་བྱ་བ་ནི།  རྒྱས་པར་གཞན་དུ་ཤེས།  བསྡུ་ན།}}  སྐུ་བཞིའི་དབང་ཕྱུག་དཔལ་ལྡན་བླ་མ་ལ།  །མི་ཕྱེད་རྩེ་གཅིག་གུས་པས་ཕྱག་འཚལ་ལོ།  །དངོས་སུ་འབྱོར་དང་ཡིད་ལས་བྱུང་བ་ཡི།  །ཕྱི་ནང་གསང་བའི་མཆོད་སྤྲིན་རྒྱ་མཚོས་མཆོད།  །ཚེ་རབས་འཁོར་བ་ཐོག་མེད་ནས་བསགས་པའི།  །སྡིག་སྒྲིབ་ཉེས་ལྟུང་གནོང་འགྱོད་དྲག་པོས་བཤགས།  །འཕགས་དང་སོ་སོའི་སྐྱེ་བོས་བསགས་པ་ཡི།  །ཟག་བཅས་ཟག་མེད་དགེ་ལ་རྗེས་ཡི་རང་།  །ཟབ་དང་རྒྱ་ཆེའི་ཆོས་འཁོར་བླ་ན་མེད།  །འཁོར་བ་མ་སྟོང་བར་དུ་བསྐོར་བར་བསྐུལ།  །མྱ་ངན་མི་འདའ་འཇིག་རྟེན་མགོན་སླད་དུ།  །བསྐལ་པ་རྒྱ་མཚོར་བཞུགས་པར་གསོལ་བ་འདེབས།  །དེ་ལྟར་བསགས་པའི་དགེ་བ་འདིས་མཚོན་ཏེ།  །དུས་གསུམ་དགེ་ཚོགས་བྱང་ཆུབ་ཆེན་པོར་བསྔོ།  །{{TibChung|ཞེས་ལན་གསུམ།  །གསུམ་པ་གསོལ་བ་བཏབ་པ་ལ།  རྒྱས་པར་ཚངས་དབང་གཙུག་ནོར་མ་སོགས་བླ་མ་གོང་མས་མཛད་པ་བྱིན་རླབས་ཅན་དང་།  བསྡུ་ན།}}  ཐོབ་བྱའི་ཡོན་ཏན་ཀུན་བརྙེས་ཤིང་།  །རང་དང་གཞན་གྱི་དོན་མཛད་པའི།  །རྣལ་འབྱོར་དབང་ཕྱུག་ས་སྐྱ་པ།  །ཀུན་དགའ་སྙིང་པོ་ལ་ཕྱག་འཚལ།  །རྡོ་རྗེ་འཆང་དབང་བསམ་བཞིན་བྱོན་པའི་སྐུ།  །མཐུ་སྟོབས་དབང་ཕྱུག་དག་དང་དབྱེར་མེད་པ།  །གསང་སྔགས་བསྟན་པ་རྒྱ་མཚོའི་ཤིང་རྟ་ཆེ།  །རྗེ་བཙུན་ས་སྐྱ་པ་ལ་གསོལ་བ་འདེབས།  །རྟག་ཏུ་བདག་ལ་བྱིན་གྱིས་བརླབ་ཏུ་གསོལ།  །{{TibChung|ཞེས་ཅི་ནུས་དང་།}}  མཁྱེན་ནོ་མཁྱེན་ནོ་རྣལ་འབྱོར་དབང་ཕྱུག་བརྩེ་ཆེན་ཀུན་དགའ་སྙིང་པོ་མཁྱེན་ནོ།  །ཐུགས་རྗེའི་སྤྱན་གྱིས་བདག་ལ་གཟིགས་མཛོད།  །འཁོར་བ་ངན་སོང་གནས་སུ་མ་གཏོང་།  །འཇིགས་དང་རྐྱེན་ངན་བར་ཆད་ཀུན་ཞི།  །ལས་ངན་སྡིག་སྒྲིབ་དག་པར་མཛོད་ཅིག  །རྗེ་བཙུན་ས་སྐྱ་པ་ཆེན་པོ་ཁྱེད་མཁྱེན་ནོ།  །ཟབ་མོ་དབང་བཞི་རྟེན་བཞིར་བསྐུར་ནས།  །ལམ་བཞི་བསྒོམ་པས་རྟོགས་པ་མངོན་གྱུར།  །སྐུ་བཞིའི་གོ་འཕང་ཐོབ་པར་བྱིན་གྱིས་རློབས་ཤིག  །ད་ལྟ་ཉིད་དུ་བྱིན༴  །མྱུར་བ་ཉིད་དུ་བྱིན༴  །འདུག་ས་འདི་ཉིད་དུ་བྱིན༴  །ཐུན་འདི་ཉིད་དུ་བྱིན་གྱིས་རློབས་ཤིག  །མཁྱེན་ནོ་མཁྱེན་ནོ།  །{{TibChung|ཅེས་པའང་ཅི་ནུས་བྱ་ཞིང་།}}  དེ་ལྟར་དཔལ་ལྡན་བླ་མར་གསོལ་བཏབ་མཐུས།  །མ་དག་སྣང་བར་ངེས་འབྱུང་སྐྱེ་བ་དང་།  །ལམ་གྱི་རྩ་བ་བྱང་ཆུབ་སེམས་འབྱོངས་ཤིང་།  །དག་སྣང་སྤྲོ་དགའ་ཐོབ་པར་བྱིན་གྱིས་རློབས།  །དབང་གིས་རྒྱུད་སྨིན་དམ་ཚིག་རྣམ་པར་དག  །རྒྱུ་རྒྱུད་ལྟ་བར་སྒྲོ་འདོགས་ལེགས་ཆོད་ནས།  །འཁོར་འདས་ཆོས་ཀུན་སེམས་སུ་རྟོགས་པ་དང་།  །དེ་ཉིད་བརྗོད་བྲལ་རྟོགས་པར་བྱིན༴  །གཞི་དུས་གསལ་སྟོང་ཟུང་འཇུག་རྡོ་རྗེའི་ལུས།  །ལམ་དུས་དབང་བཞིའི་བསྐྱེད་རྫོགས་རིམ་གཉིས་ཀྱི།  །གསོས་བཏབ་འབྲས་དུས་སྐུ་དང་ཡེ་ཤེས་སྨིན།  །དཀྱིལ་འཁོར་རྣམ་བཞི་འགྲུབ་པར་བྱིན༴  །ཉམས་དང་ཏིང་འཛིན་སྒོམ་པའི་འཕྲང་ལས་གྲོལ།  །རྩ་ཡིག་ཐིག་རླུང་ཤིན་ཏུ་སྦྱངས་པ་ཡིས།  །འཇའ་ལུས་རྡོ་རྗེའི་སྐུ་མཆོག་བརྙེས་གྱུར་ནས།  །དོན་གཉིས་རླབས་ཆེན་འགྲུབ་པར་བྱིན་གྱིས་རློབས།  །མཚན་སྔགས་བཟླ་ན།  ཨོཾ་ཨཱཿགུ་རུ་ནནྡ་གརྦྷ་སརྦ་སིདྡྷི་ཧཱུྃ་སྭཱ་ཧཱ།  {{TibChung|ཞེས་མཚན་སྔགས་དེ་ཉིད་ལྔ་སྦྲེལ་འདི་ཅི་ནུས་བཟླ།  །གསུམ་པ་རྗེས་ལ།  །དང་པོ་དབང་བླང་བ་ནི།}}  སྐྱབས་གནས་ཀུན་འདུས་བླ་མ་རྡོ་རྗེ་འཆང་།  །བརྩེ་བ་ཆེན་པོས་བདག་ལ་ཉེར་དགོངས་ནས།  །བུམ་གསང་ཤེས་རབ་ཡེ་ཤེས་དེ་ཁོ་ནའི།  །ཡེ་ཤེས་ཆེན་པོས་བདག་རྒྱུད་སྨིན་པར་མཛོད།  །བླ་མའི་དཔྲལ་བའི་ཨོཾ་ལས་འོད་དཀར་པོ།  །ཨོཾ་གྱི་གཟུགས་བྱུང་རང་གི་དཔྲལ་བར་ཐིམ།  །བུམ་པའི་དབང་ཐོབ་རྩ་ཡི་སྒྲིབ་དག་ནས།  །སྤྲུལ་སྐུའི་གོ་འཕང་ཐོབ་པའི་སྐལ་བ་བཞག  །བླ་མའི་མགྲིན་པའི་ཨཱཿལས་འོད་ཟེར་དམར།  །ཨཱཿཡི་གཟུགས་བྱུང་རང་གི་མགྲིན་པར་ཐིམ།  །གསང་བའི་དབང་ཐོབ་ཡི་གེའི་སྒྲིབ་དག་ནས།  །ལོངས་སྐུའི་གོ་འཕང་ཐོབ་པའི་སྐལ་བ་བཞག  །བླ་མའི་ཐུགས་ཀའི་ཧཱུྃ་ལས་འོད་སྔོན་པོ།  །ཧཱུྃ་ཡིག་གཟུགས་བྱུང་རང་གི་སྙིང་གར་ཐིམ།  །གསུམ་པའི་དབང་ཐོབ་ཐིག་ལེའི་སྒྲིབ་དག་ནས།  །ཆོས་སྐུའི་གོ་འཕང་ཐོབ་པའི་སྐལ་བ་བཞག  །བླ་མའི་གནས་གསུམ་རྡོ་རྗེའི་འབྲུ་གསུམ་ལས།  །འོད་ཟེར་སྣ་ཚོགས་འབྲུ་གསུམ་གཟུགས་བྱུང་བ།  །གནས་གསུམ་ཞུགས་པས་རླུང་གི་སྒྲིབ་དག་ནས།  །ངོ་བོ་ཉིད་སྐུ་ཐོབ་པའི་སྐལ་བ་བཞག  །{{TibChung|གཉིས་པ་ཚོགས་རྟེན་རང་ལ་བསྡུ་བ་ནི།}}  མཐར་ནི་བླ་མ་དགྱེས་པས་འོད་དུ་ཞུ།  །རང་ལ་ཐིམ་པས་བདག་གི་སྒོ་གསུམ་དང་།  །བླ་མའི་གསང་གསུམ་དབྱེར་མེད་འདྲེས་གྱུར་ནས།  །བློ་འདས་འོད་གསལ་ཆོས་སྐུའི་རང་ཞལ་བལྟ།  །{{TibChung|ཞེས་ཅི་གནས་སུ་ཐུགས་ཡིད་བསྲེ་བའི་ངང་དུ་མཉམ་པར་བཞག  །གསུམ་པ་ཐུན་ལས་ལྡང་བ་ན།}}  སངས་རྒྱས་ཀུན་འདུས་ཕྱི་ཡི་བླ་མ་དང་།  །སེམས་ཉིད་འོད་གསལ་ནང་གི་བླ་མ་དང་།  །རང་བཞིན་སྤྲོས་བྲལ་གསང་བའི་བླ་མ་གསུམ།  །དབྱེར་མེད་སྙིང་པོ་བླ་མའི་དོན་རྟོགས་ཤོག  །སྐྱེ་བ་ཀུན་ཏུ་རྗེ་བཙུན་ས་སྐྱ་པའི།  །ཚད་མ་བཞི་ལྡན་སྙན་བརྒྱུད་ཟབ་མོའི་ཆོས།  །མ་ནོར་ཇི་བཞིན་སྟོན་མཁས་བླ་མ་དང་།  །འབྲལ་བ་མེད་ཅིང་རྟག་ཏུ་རྗེས་འཛིན་ཤོག  །རྣལ་འབྱོར་དབང་ཕྱུག་ཀུན་དགའ་སྙིང་པོ་ཡིས།  །ཐུགས་བསྐྱེད་མཛད་པ་སྨོན་ལམ་བཏབ་པ་རྣམས།  །བདག་སོགས་འགྲོ་བས་མྱུར་དུ་འགྲུབ་གྱུར་ནས།  །རྗེ་བཙུན་ཁྱེད་དང་མཉམ་པར་བྱིན་གྱིས་རློབས།  །{{TibChung|གཞན་ཡང་།}}  དགེ་བ་འདི་ཡིས་ནམ་མཁའི་མཐའ་ཀླས་པའི།  {{TibChung|སོགས་སྨོན་ལམ་གང་ཤེས་བཏབ་ལ།  ཐུན་གྱི་རྗེས་ཤེས་ཐམས་ཅད་དུ་བླ་མའི་ལམ་ཁྱེར་དང་མི་འབྲལ་བར་བྱའོ།  །འདི་བགྱིས་བདག་གཞན་སེམས་ཅན་ཀུན།  །བླ་མའི་ལམ་གྱིས་གྲོལ་བ་དང་།  །མི་གནས་མྱ་ངན་འདས་པའི་སར།  །མཁའ་ཁྱབ་ཡིད་ཅན་དྲང་བར་ཤོག  །ཅེས་པའང་ལམ་ཟབ་ཕྱི་ནང་ལས་ལྷག་པའི་ཉམས་ལེན་མི་དགོས་ཀྱང་།  གོང་མ་ཀུན་བློ།  འཇམ་མགོན་མཁྱེན་བརྩེ།  ངག་དབང་ལེགས་གྲུབ་སོགས་ཀྱིས་རྗེ་བཙུན་རིན་པོ་ཆེ་དང་།  ཚར་ཆེན་སོགས་ལ་བླ་མའི་རྣམ་ཐར་མཛད་པ་ལ་དཔག་ནས་འཇམ་དབྱངས་ཆོས་ཀྱི་བློ་གྲོས་པས་ལྕགས་སྦྲུལ་ཟླ་གཉིས་ཚེས་ཉེར་དྲུག་ལ་རང་གི་མོས་པ་གཙོ་བོར་བྱས་ཏེ་བྲིས་པ་འདིས་ཀྱང་སེམས་ཅན་ལ་ཕན་པ་རྒྱ་ཆེན་པོ་འབྱུང་བར་བྱིན་གྱིས་བརླབ་ཏུ་གསོལ།  སརྦ་ཛ་ག་ཏཾ་ཤུ་བྷཾ།།    །།}} }}
</onlyinclude>
{{TsagliCall}}
<headertabs/>
== Footnotes ==
<references/>
==Other Information==
{{Footer}}
[[Category:JKCL-KABUM-Volume-04-NGA]]
[[Category:JKCL-KABUM-Volume-04-NGA]]
[[Category:Khyentse Lineage Project]]