View source for JKW-KABAB-02-KHA-057

{{Khyentse Metadata
|classification=Tibetan Publications
|subclass=Tibetan Texts
|fulltitletib=བླ་མའི་ཐུགས་སྒྲུབ་བར་ཆད་ཀུན་སེལ་གྱི་དོན་དབང་འབྲིང་པོ་དང་བསྡུས་པའི་ཆོ་ག་སྙིང་པོའི་སྣང་བ།
|fulltitle=bla ma'i thugs sgrub bar chad kun sel gyi don dbang 'bring po dang bsdus pa'i cho ga snying po'i snang ba
|citation=[['jam dbyangs mkhyen brtse'i dbang po]]. ''bla ma'i thugs sgrub bar chad kun sel gyi don dbang 'bring po dang bsdus pa'i cho ga snying po'i snang ba''. In ''Rdzong sar 'jam dbyangs mkhyen brtse'i dbang po'i bka' babs'', Vol. 2: 445-488. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
|collectiontitle=mkhyen brtse'i bka' babs
|collectiontitletib=མཁྱེན་བརྩེའི་བཀའ་བབས་
|author='jam dbyangs mkhyen brtse'i dbang po
|sourcerevealer=mchog gyur gling pa

|authortib=འཇམ་དབྱངས་མཁྱེན་བརྩེའི་དབང་པོ་
|sourcerevealertib=མཆོག་གྱུར་གླིང་པ་

|tibgenre=Revelations - gter ma, Empowerment Ritual - dbang chog - dbang skur
|terma=Yes
|transmissiontype=sa gter - Earth Treasure
|cycle=Bla ma'i thugs sgrub bar chad kun sel
|cycletib=བླ་མའི་ཐུགས་སྒྲུབ་བར་ཆད་ཀུན་སེལ་
|language=Tibetan
|rtzlink=Terdzo-THA-025
|volumenumber=002
|volnumtib=༢
|volyigtib=ཁ་
|totalvolumes=22
|textnuminvol=057
|pagenumbers=445-488
|totalpages=44
|beginfolioline=1a
|endfolioline=22b2
|totalfolios=22
|multivolumework=No
|versonotes=mkhyen brtse'i bka' babs
|colophontib=།ཅེས་པའང་རྩོད་བྲལ་དུས་བབ་ཀྱི་སྤྲུལ་པའི་གཏེར་སྟོན་ཆེན་པོ་ཨོ་རྒྱན་མཆོག་གྱུར་བདེ་ཆེན་གླིང་པའི་ཞལ་སྔ་ནས་ཟབ་ཆོས་འདི་ཉིད་ཀྱི་གཏེར་ཤོག་ཐོག་མར་འབེབས་རིམ་བཞིན་ཏུ་སྨིན་གྲོལ་གྱི་གདམས་པ་ཡོངས་སུ་རྫོགས་པར་ཐོབ་པའི་སྐལ་བཟང་ཅན་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོ་རྡོ་རྗེ་གཟི་བརྗིད་རྩལ་གྱིས།  དོན་དུ་གཉེར་བའི་སྐྱེས་ཆེན་དམ་པ་དུ་མས་ཡང་དང་ཡང་དུ་གསུང་གིས་བསྐུལ་བའི་བཞེད་པ་བསྐང་ཕྱིར་ཉེར་མཁོ་མདོར་བསྡུས་སྙིང་པོར་དྲིལ་ཏེ་སྦྱར་བའི་དགེ་བས་བསྟན་འཛིན་གྱི་སྐྱེས་བུ་རྣམས་ཞབས་པད་བསྐལ་བརྒྱར་བརྟན་ཅིང༌།  ཟབ་ཆོས་འདི་ཉིད་ཀྱི་ཕྲིན་ལས་འཇིག་རྟེན་གསུམ་དུ་ཁྱབ་ཅིང་རྟག་པའི་རྒྱུར་གྱུར་ཅིག།  །སརྦ་དཱ་ཀ་ལྱཱ་ཎཾ་བྷ་བ་ཏུ།  འདི་ནི་དབང་འབྲིང་བསྡུས་ཀྱི་མཚམས་སྦྱོར་ཉེར་འཁོ་ཙམ་སྟེ།  དབང་རྒྱས་པར་བསྐུར་བའི་ཚུལ་སོགས་ནི་འཇམ་མགོན་རྡོ་རྗེ་འཆང་བླཽ་གྲོས་མཐའ་ཡས་ཀྱི་གསུང་རབ་ལས་རྟོགས་པར་བྱ་བ་ཁོ་ནའོ།།
|colophonwylie=ces pa'ang rtsod bral dus bab kyi sprul pa'i gter ston chen po o rgyan mchog gyur bde chen gling pa'i zhal snga nas zab chos 'di nyid kyi gter shog thog mar 'bebs rim bzhin tu smin grol gyi gdams pa yongs su rdzogs par thob pa'i skal bzang can mtsho skyes bla ma dgyes pa'i 'bangs mkhyen brtse'i dbang po rdo rje gzi brjid rtsal gyis/__don du gnyer ba'i skyes chen dam pa du mas yang dang yang du gsung gis bskul ba'i bzhed pa bskang phyir nyer mkho mdor bsdus snying por dril te sbyar ba'i dge bas bstan 'dzin gyi skyes bu rnams zhabs pad bskal brgyar brtan cing*/__zab chos 'di nyid kyi phrin las 'jig rten gsum du khyab cing rtag pa'i rgyur gyur cig/__/sarba dA ka l+yA NaM b+ha ba tu/__'di ni dbang 'bring bsdus kyi mtshams sbyor nyer 'kho tsam ste/__dbang rgyas par bskur ba'i tshul sogs ni 'jam mgon rdo rje 'chang blau gros mtha' yas kyi gsung rab las rtogs par bya ba kho na'o
|pdflink=File:JKW-KABAB-02-KHA-057.pdf
}}
{{Header}}
<h1 style="font-size: 24px !important;">Tibetan Text</h1>
<onlyinclude>
{{TibP|༄༅།  །བླ་མའི་ཐུགས་སྒྲུབ་བར་ཆད་ཀུན་སེལ་གྱི་དོན་དབང་འབྲིང་པོ་དང་བསྡུས་པའི་ཆོ་ག་སྙིང་པོའི་སྣང་བ་ཞེས་བྱ་བ་བཞུགས་སོ།།ཨོཾ་སྭ་སྟི་སིདྡྷཾ།  བྱིན་རླབས་ཆར་འབེབས་དངོས་གྲུབ་མཛོད།  །བར་ཆད་ཀུན་སེལ་ལ་མ་ལྷར།  །བཏུད་ནས་དེ་ཡི་སྨིན་བྱེད་དབང༌།  །འབྲིང་བསྡུས་སྙིང་པོའི་སྣང་བ་དབྱེ།  །འདི་ལ་གསུམ།  སྦྱོར་བ་ལྷག་པ་གཟུགས་ཀྱི་རྟེན་འདུ་བྱ་བ།  དངོས་གཞི་ལྷག་པ་ཏིང་ངེ་འཛིན་གྱི་དཀྱིལ་འཁོར་བསྙེན་ཅིང་སྒྲུབ་པ།  གཞན་དོན་སློབ་མ་རྗེས་སུ་བཟུང་བའི་ཆོ་ག་མཐའ་རྒྱས་དང་བཅས་པའོ།  །དང་པོ་ནི།  གནས་གཙང་ཞིང་བཀོད་པས་མཛེས་པར་སྟེགས་བུའི་དབུས་སུ་རས་བྲིས་ཀྱི་དཀྱིལ་འཁོར་རབ་གནས་དང་ལྡན་པའམ།  མཎྜ་ལར་དྲི་བཟང་གི་ཐིག་ལེ་བཀོད་པར་མེ་ཏོག་གི་ཚོམ་བུ་ལྷ་གྲངས་དང་མཉམ་པ།  དེའི་སྟེང་དུ་མཉྫའི་ཁར་རྣམ་བུམ་བཅུད་ལྡན།  ཐོད་པ་མཚན་ལྡན་བདུད་རྩིའི་བཅུད་ཀྱིས་གང་བ་མེ་ལོང་ལ་སིནྡྷུ་རའི་ཐིག་ལེ་ཧྲཱིཿཡིག་གིས་མཚན་པ་བཀོད་པས་ཁ་བཅད་པ་རྣམས་བརྩེགས་མར་བཤམ།  གཡས་སུ་དབང་གཏོར་རི་རབ་བང་རིམ་བཞི་པའི་ཁར་རིན་ཆེན་ཟུར་བརྒྱད།  དེའི་སྟེང་དུ་པད་འདབ་བཞིའི་དབུས་སུ་དཔལ་གཏོར་བརྗིད་ལྡན་དམར་པོ་རྒྱན་སྤྲོས་གང་མཛེས་དར་གདུགས་བཅས།  གཡོན་དུ་གུ་རུའི་སྐུ་འབག  །དཀྱིལ་འཁོར་གྱི་དབུས་སམ་གང་བདེར་ལྷ་ཙཀ  །སྔགས་ཕྲེང༌།  མེ་ལོང༌།  མཐའ་རྟེན་འགྲོ་འདུལ་ཚེའི་དབང་བསྐུར་ན་ཚེ་བུམ།  ཚེ་རིལ།  ཚེ་ཆང༌།  ཚེ་མདའ།  གཞན་ཡང་མཆོད་པའི་ཡོ་བྱད་ཉེར་སྤྱོད་སྨན་གཏོར་རཀྟ་ཚོགས་ཀྱི་མཆོད་པ།  བཀའ་གཏེར་སྲུང་མའི་གཏོར་མ།  སྔོན་གཏོར།  སློབ་དཔོན་གྱི་མདུན་དུ་ལས་བུམ།  རྡོར་དྲིལ་ཌ་མ་རུ་སོགས་དགོས་པའི་ཡོ་བྱད་ཐམས་ཅད་མ་ཚང་བར་མེད་པར་འདུ་བྱའོ།  །གཉིས་པ་ནི།  གསོལ་འདེབས་ཆོས་སྐུ་ཀུན་བཟང་དང་བརྒྱུད་པའི་གསོལ་འདེབས་སོགས་སྔོན་ཏུ་འགྲོ་བས།  གཞི་མ་དུལ་བ་ཡིན་ན་གཞི་བདག་ལ་དཀར་གཏོར་སྤྱི་ལྟར་བཏང༌།  རང་གི་སྙིང་གའི་ས་བོན་ལས་འོད་ཟེར་འཕྲོས་པས་བླ་མ་རིག་འཛིན་སྒྱུ་འཕྲུལ་དྲྭ་བ་ཆེན་པོའི་དཀྱིལ་འཁོར་གྱི་ལྷ་ཚོགས་མདུན་གྱི་ནམ་མཁར་བཛྲ་ས་མཱ་ཛཿ  ཞེས་པས་སྐྱབས་ཡུལ་མཁའ་ཁྱབ་ཏུ་སད་པའི་སྤྱན་སྔར།  ལས་བྱང་རྒྱས་འབྲིང་གང་རུང་གི་སྐྱབས་སེམས་ནས་འཇུག་དགོས་པས།  འདིར་རེ་ཞིག་འཇུག་པ་བདེ་བའི་དབང་དུ་བྱས་ཏེ་ཕྲིན་ལས་སྙིང་པོའི་རྣལ་འབྱོར་དང་སྦྱར་ཏེ་བརྗོད་ན།  ན་མོ༔  བདག་དང་མཁའ་མཉམ་སོགས་ལན་གསུམ་གྱིས་སྐྱབས་སེམས་བྱ།  སྐྱབས་ཡུལ་རྣམས་རང་ལ་ཐིམ།  རང་ཉིད་སྐད་ཅིག་གིས་རྟ་མཆོག་ཧེ་རུ་ཀ་ཁྲོ་གཏུམ་བཟོད་པར་དཀའ་བ་གཟི་བརྗིད་བསྐལ་པའི་མེ་ལྟར་འབར་བར་གྱུར།  བགེགས་གཏོར།  ཨོཾ་ཧ་ཡ་གྲཱི་ཝ་ཧཱུྃ་ཕཊ་ཀྱིས་བསང༌།  སྭ་བྷཱ་ཝས་སྦྱང༌།  སྟོང་པའི་ངང་ལས་བྷྲཱུྃ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེའི་ནང་དུ་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པར་གྱུར།  ལག་གཉིས་མཁའ་ལྡིང་གི་རྒྱ་སྟོན་བཞིན་པར།  ཨོཾ་ཨཱཿཧཱུྃ་ལན་གསུམ་གྱི་མཐར།  ཧ་ཧོ་ཧྲཱིཿཞེས་པས་བྱིན་གྱིས་བརླབ།  ལྕགས་ཀྱུའི་ཕྱག་རྒྱས།  ཨོཾ་སརྦ་བྷཱུ་ཏ་ཨཱ་ཀརྵ་ཡ་ཛཿ  ཞེས་མགྲོན་དགུག  །ཨོཾ་སརྦ་བིགྷྣཱན་ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཐ་ཁཾ་ཨུདྒ་ཏེ་སྥ་ར་ཎ་ཨི་མཾ་ག་ག་ན་ཁཾ་གྲྀཧྞེ་དཾ་བ་ལིནྟ་སྭཱ་ཧཱ།  ལན་གསུམ་གྱིས་བསྔོའོ།  ཧཱུྃ༔  གཉིས་སྣང་འཁྲུལ་པའི་གདོན་བགེགས་འབྱུང་པོའི་ཚོགས༔  གཏོར་མ་འདི་ལོངས་རང་རང་གནས་སུ་དེངས༔  ཧཱུྃ་ཧཱུྃ་ཧཱུྃ༔  སུམྦྷ་སོགས་དྲག་སྔགས་བཟླ་ཞིང༌།  གུ་གུལ་བདུག  །རོལ་མོའི་ཚམ་རྔམས་བཅས་བགེགས་བསྐྲད།  གཉིས་མེད་ཡེ་ཤེས་ལྷ་སྔགས་ཆོས་སྐུའི་ངང་༔  མཚམས་ཀྱི་དཀྱིལ་འཁོར་རང་བཞིན་ལྷུན་གྱིས་གྲུབ༔  བཛྲ་རཀྵ་རཀྵ་བྷྲཱུྃ༔  ཞེས་སྲུང་འཁོར་བརྟན་པོར་བསྒོམ།  བྱིན་འབེབས་ནས་བརྩམས་བསྟོད་པའི་བར་གཞུང་ལྟར་མཐར་ཆགས་སུ་བཏང་རྗེས།  བྷྲཱུྃ་བི་ཤྭ་བི་ཤུདྡྷེ་ཧྲཱིཿཧཱུྃ་ཕཊ་ཛཿ  བདག་ཉིད་རྩ་བའི་དཀྱིལ་འཁོར་ལས༔  ཡེ་ཤེས་དཀྱིལ་འཁོར་གཉིས་པ་བྱེ༔  མདུན་གྱི་ནམ་མཁར་བཞུགས་པ་ཡི༔  གཉིས་ཀའི་ཐུགས་སྲོག་ཡི་གེའི་མཐར༔  སྔགས་ཕྲེང་སྒྲར་བཅས་འཁོར་བ་ལས༔  འོད་ཟེར་དཔག་ཡས་འཕྲོ་བར་གྱུར༔  ཅེས་ཛབ྄་ཁང་དབྱེ།  ཧཱུྃ་ཧྲཱི༔  སྙིང་པོ་བྱང་ཆུབ་སེམས་ཀྱི་སོགས་ཀྱིས་ཛབ྄་བསྐུལ།  སྤྱི་བོའི་རིགས་བདག་སོགས་བཟླས་དམིགས་དང་བཅས།  སྐུ་གསུམ་དང༌།  སྤྱི་དྲིལ།  ལས་སྦྱོར་རྣམས་རིམ་པར་ཇེ་ཉུང་བཏང་བའི་བཟླས་པ་གྲངས་ཅི་རིགས་པའི་རྗེས།  རྣམ་བུམ་ལ་དམིགས་ཏེ།  བུམ་པ་བྷྲཱུྃ་ལས་གཞལ་ཡས་ཁང་༔  མཚན་ཉིད་ཐམས་ཅད་ཡོངས་རྫོགས་དབུས༔  རིག་འཛིན་བླ་མའི་ལྷ་ཚོགས་རྣམས༔  སྣང་སྟོང་ཆུ་ཟླ་ལྟ་བུར་གསལ༔  རང་གི་ཐུགས་སྲོག་སྔགས་ཕྲེང་ལས༔  འོད་ཟེར་མཆོད་པའི་ཚུལ་དུ་སྤྲོས༔  སྙོམས་འཇུག་བྱང་སེམས་བདུད་རྩི་ཡིས༔  བུམ་པ་ཡོངས་སུ་གང་བར་གྱུར༔  ཅེས་བརྗོད་ཅིང་བསམས་ལ་གཟུངས་ཐག་ནས་བཟུང་སྟེ་གོང་གི་བཟླས་པ་ཇི་ལྟར་ནུས་པ་དང༌།  ལས་བུམ་དུ་སྐད་ཅིག་གིས་ཁྲོ་བོ་རྟ་མགྲིན་དམར་པོ་གཡས་པདྨའི་དབྱུག་ཏོ་དང༌།  གཡོན་མེ་ཡི་ཞགས་པ་ཐོགས་པར་གསལ་བའི་སྐུ་ལས་རྡོ་རྗེ་བདུད་རྩིའི་རྡུལ་ཕྲ་རབ་བབས་པས་བུམ་པ་གང་བར་བསམས་ལ།  ཨོཾ་ཧ་ཡ་གྲཱི་བ་ཧཱུྃ་ཕཊ༔  ཅེས་བཟླས་མཐར་དབྱངས་གསལ་རྟེན་སྙིང་ལན་གསུམ།  ཚེ་དབང་དང་འབྲེལ་ན།  བདག་མདུན་ལྷ་ཚོགས་རྣམས་ཀྱི་གནས་ལྔར་རིགས་ལྔ་ཚེ་དཔག་མེད་སྐད་ཅིག་གིས་གསལ་བའི་སྐུ་ལས་ལྷ་མོ་མགྱོགས་མའི་ཚོགས་ཉི་ཟེར་གྱི་རྡུལ་ལྟར་འཕྲོས།  འཁོར་འདས་ལམ་གསུམ་གྱི་བཅུད་དང་དགེ་མཚན་ཐམས་ཅད་འཆྀ་མེད་ཚེའི་བདུད་རྩིའི་རྣམ་པར་སྤྱན་དྲངས།  བདག་དང་སྒྲུབ་པའི་རྫས་ལ་ཐིམ་པས་འཆི་མེད་ཚེའི་དངོས་ཐོབ་ཅིང་ནུས་ལྡན་དུ་གྱུར་པར་བསམས་ལ།  ཚེ་མདའ་གཡབ་ཅིང༌།  ཧཱུྃ་ཧྲཱི༔  རྣམ་སྣང་ཡབ་ཡུམ་སོགས་ཞལ་གདམས་སྙིང་བྱང་ལས་བྱུང་བའི་ཚེ་འགུགས་བཏང༌།  ཨོཾ་ཨཱཿཧཱུྃ༔  ཕྱི་མཆོད་འདོད་ཡོན་སོགས་ཀྱིས་མཆོད།  ཧཱུྃ་ཧྲཱི༔  ངོ་བོ་འོད་གསལ་སོགས་ཀྱིས་བསྟོད།  བར་ཆད་ལམ་སེལ་གྱི་གསོལ་འདེབས་བྱ།  ཡི་གེ་བརྒྱ་པ་ལན་གསུམ་གྱི་མཐར།  ཨོཾ་ཨཱཿཧཱུྃ།  མཆོད་ཡོན་ཕུལ་རྐྱེན་གྱིས་བུམ་པའི་ལྷ་བདེ་སྟོང་ཆེན་པོའི་ངོ་བོར་འོད་དུ་ཞུ་ནས་བུམ་ཆུ་དང་དབྱེར་མེད་དུ་གྱུར་པར་བསམ།  ཨོཾ་ཨཱཿཧཱུྃ་སྭཱ་ཧཱ༔  བཛྲ་ས་མ་ཡ་ཀཱ་ཡ་ཝཱཀ྄་ཙིཏྟ་གུ་ཎ་ཀརྨ་སྭ་བྷཱ་ཝ་ཨཱཏྨ་ཀོ྅ཧཾ༔  ཨོཾ༔  ཤིན་ཏུ་རྣམ་པར་དག་པ་ཡི༔  ཡེ་ཤེས་རིག་རྩལ་འཆང་བའི་ལྷ༔  གདོད་ནས་རང་དང་ལྷན་ཅིག་སྐྱེས༔  རྡོ་རྗེ་བཞི་ཡི་དབྱིངས་སུ་རྫོགས༔  དམ་ཚིག་ཡེ་ཤེས་དབྱེར་མེད་པར༔  བྱང་ཆུབ་སེམས་སུ་རོ་གཅིག་པའི༔  དབང་བསྐུར་བྱིན་རླབས་རྨད་པོ་ཆེ༔  སྐུ་བཞིའི་ངོ་བོར་ལྷུན་གྱིས་བྲུབ༔  ཨོཾ་བཛྲ་ས་མ་ཡ་ཧཱུྃ་སྟྭཾ་ཧོ༔  ཀཱ་ཡ་ཝཱ་ཀ་ཙིཏྟ་ཛྙཱ་ན་བཛྲ་ཛཿཧཱུྃ་བྃ་ཧོཿ  ཞེས་རིག་པའི་མེ་ཏོག་དོར་བས་བདག་ཉིད་འཇུག་ཅིང་དམ་ཡེ་དབྱེར་མེད་དུ་བྱ།  དམ་ཅན་སྤྱི་གཏོར།  བཀའ་སྲུང་ཚེ་རིང་མཆེད་ལྔ་དང༌།  གཏེར་སྲུང་ཁྱུང་བཙུན་མའི་གཏོར་འབུལ་སྐོང་བཤགས་རྒྱས་བསྡུས་གང་རིགས།  གཏེར་སྲུང་སྤྱི་གཏོར།  གཞི་བདག་གཏོར་མ།  ཚོགས་བྱིན་རླགས་བསྒྲལ་བསྟབ་ཡན་ཕྱག་ལེན་ལྟར་གྲུབ་པར་བྱའོ།  །གསུམ་པ་ནི།  སློབ་མ་རྣམས་ཕྱི་རོལ་ཏུ།  ཇི་ལྟར་བལྟམས་པ་སོགས་ཀྱིས་ཁྲུས་བྱ།  ནང་དུ་འཇུག་པ་ན།  ཨོཾ་ཧ་ཡ་གྲཱི་བ་སོགས་བགེགས་གཏོར་བསང་སྦྱང་ནས་བརྩམས་ཏེ་བསྐྲད་པའི་བར་གོང་ལྟར་དང༌།  གཉིས་མེད་ཡེ་ཤེས་སོགས་ནས་རཀྵ་བྷྲཱུྃ༔  ཞེས་བརྗོད་པས་རྡོ་རྗེའི་ས་གཞི་རྭ་བ་དྲྭ་བ་གུར་བླ་བྲེ་ཡེ་ཤེས་ཀྱི་མེ་འབར་བ་དང་བཅས་པའི་སྲུང་བའི་འཁོར་ལོ་ཡངས་ཤིང་རྒྱ་ཆེ་བ་གསལ་ཞིང་བརྟན་པར་གྱུར་པའི་མོས་པ་མཛོད།  ཅེས་བརྡ་སྤྲད།  མེ་ཏོག་བཀྱེ་བསྡུ་གྲུབ་རྗེས།  འོ་ན་ནམ་མཁའི་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་བྱ།  དེའི་ཆེད་དུ་སྨིན་བྱེད་དབང་བསྐུར་གྱི་རིམ་པ་ཟབ་མོ་གསན་ལ་དོན་ཚུལ་བཞིན་ཏུ་ཉམས་སུ་བླང་བར་བགྱིའོ་སྙམ་པ་ཀུན་སློང་བྱང་ཆུབ་ཀྱི་མཆོག་ཏུ་སེམས་བསྐྱེད་པ་དང༌།  ཆོས་གསན་པའི་ཀུན་ཏུ་སྤྱོད་པ་རྣམས་ཀྱང་ལེགས་པར་གསལ་བཏབ་སྟེ་གསན་འཚལ།  དེ་ལ་འདིར་གང་གསན་པར་བྱ་བའི་ཆོས་ནི།  ཡང་དག་པར་རྫོགས་པའི་སངས་རྒྱས་རྒྱལ་བ་ཐབས་མཁས་ལ་ཐུགས་རྗེ་ཚད་མེད་པ་མངའ་བ་དེ་ཉིད་ཀྱིས་གདུལ་བྱའི་བསམ་པ་དང་རྗེས་སུ་མཐུན་པར་ཟབ་པ་དང་རྒྱ་ཆེ་བའི་ཆོས་ཀྱི་བདུད་རྩི་བསམ་གྱིས་མི་ཁྱབ་པ་ཞིག་གསུངས་པ་ཐམས་ཅད་ཀྱང་བསྡུ་ན་ཀུན་བྱེད་རྒྱལ་པོའི་རྒྱུད་ལས།  ཐེག་པ་རྣམ་པ་གཉིས་ཡིན་ཏེ།  མཚན་ཉིད་རྒྱུ་ཡི་ཐེག་པ་དང༌།  འབྲས་བུ་རྡོ་རྗེ་ཐེག་པའོ།  །ཞེས་གསུངས་པ་ལྟར་རྒྱུ་འབྲས་ཀྱི་ཐེག་པ་གཉིས་སུ་འདུས་པ་ལས།  འདིར་རྒྱུའི་ཆོས་ལས་ཁྱད་པར་དུ་མའི་སྒོ་ནས་འཕགས་པ་འབྲས་བུ་གསང་སྔགས་རྡོ་རྗེ་ཐེག་པ་ཡིན།  དེ་ལའང་རྒྱ་གར་འཕགས་པའི་ཡུལ་དུ་གསར་རྙིང་ཞེས་གྲགས་པ་མེད་ཀྱང༌།  གངས་ཅན་གྱི་ལྗོངས་འདིར་ལོ་ཙཱ་བའི་འགྱུར་སྔ་ཕྱིའི་ཕྱེ་བྲག་ལས་རྡོ་རྗེ་ཐེག་པ་སྔ་འགྱུར་རྙིང་མ་དང༌།  ཕྱི་འགྱུར་གསར་མ་ཞེས་ཡོངས་སུ་གྲགས་པའི་ནང་གསེས།  སྔ་འགྱུར་རྡོ་རྗེ་ཐེག་པ་རྙིང་མ་ལ་བཀའ་གཏེར་དག་སྣང་གི་བབས་སོ་གསུམ་དུ་བཞུགས་པ་ལས།  འདིར་ཉེ་བརྒྱུད་གཏེར་མའི་ཕྱོགས་སུ་གཏོགས་པ་ཡིན།  དེ་ལའང་གཏེར་ཁ་གོང་འོག་གིས་མཚོན་པའི་བཀའ་སྲོལ་མི་འདྲ་བ་མཐའ་ཡས་ཤིང་བསམ་གྱིས་མི་ཁྱབ་པ་ཞིག་བྱོན་པ་ལས།  ད་ལམ་འདིར་སྐབས་སུ་བབ་པ་ནི།  འཇམ་པའི་དབྱངས་དངོས་མངའ་བདག་ཁྲི་སྲོང་ལྡེའུ་བཙན་གྱི་ལྷ་སྲས་བར་པ་ས་བཅུའི་དབང་ཕྱུག་མུ་རུབ་བཙད་པོ་ཡེ་ཤེས་རོལ་པ་རྩལ་གྱི་རྣམ་འཕྲུལ།  ཚད་མ་གསུམ་གྱིས་གྲུབ་ཅིང༌།  སྐྱེས་བུ་དམ་པ་རྣམས་ཀྱིས་ཀྱང་མགྲིན་གཅིག་ཏུ་བསྔགས་པས་རྩོད་པ་ཐམས་ཅད་དང་བྲལ་བའི་གཏེར་ཆེན་ཆོས་ཀྱི་རྒྱལ་པོ་ཨོ་རྒྱན་མཆོག་གྱུར་བདེ་ཆེན་གླིང་པས་རྒྱུད་ཀྱི་ལུང་དང་འབྲེལ་པ།  དངོས་སྟོབས་ཀྱི་རིག་པས་གྲུབ་པ།  མན་ངག་གི་མྱོང་བས་བརྒྱན་པ།  ངོ་མཚར་བྱིན་རླབས་ཀྱི་ཚན་ཁ་མཆོག་དང་ལྡན་པའི་ཟབ་གཏེར་རྒྱ་མཚོ་ལྟ་བུ་ཞིག་སྤྱན་དྲངས་པ་ལས།  རྗེ་ཉིད་དགུང་གྲངངས་ཉི་ཤུར་སོན་པ་ས་ཕོ་སྤྲེའུ་ལོའི་དབྱུག་པ་ཟླ་བའི་དཀར་ཕྱོགས་ཀྱི་ཚེས་བཅུར།  སྐུ་ཡི་ཡོན་ཏན་གྱི་གནས་མཆོག་ཟླ་ཉིན་ཁ་ལ་རོང་སྒོའི་དཔལ་ཆེན་པོའི་རྡོ་རྗེའི་ཞབས་འོག་ནས་བར་ཆད་མེད་པར་སྤྱན་དྲངས།  ལོ་བརྒྱད་ཤིན་ཏུ་གསང་ཞིང་ཐུགས་ཉམས་སུ་བཞེས།  སླར་གནས་དུས་ཀྱི་རྟེན་འབྲེལ་ཕུན་སུམ་ཚོགས་པས་མཚམས་སྦྱར་ཏེ།  དཔལ་ཨོ་རྒྱན་ཀྱི་རྒྱལ་པོ་ཡབ་ཡུམ་གྱི་ཡེ་ཤེས་ཀྱི་སྐུས་རྗེས་སུ་བཟུང་ཞིང༌།  དབང་བསྐུར།  གདམས་པ་གནང༌།  ལུང་བསྟན་དབུགས་དབྱུང་གི་ལྟས་ཁྱད་པར་ཅན་གྱིས་སྐབས་ཕྱེ་སྟེ་རིམ་བཞིན་ཏུ་སྤེལ་བར་མཛད་པའི་དུས་གསུམ་མཁྱེན་པ་པདྨ་འབྱུང་གནས་ཀྱི་ཐུགས་བཅུད།  བོད་ཡུལ་ས་འོག་ཀུན་གྱི་གཏེར་གཅིག  །མཆོག་དང་ཐུན་མོང་གི་དངོས་གྲུབ་སྒྲུབ་པའི་ཐབས་ཐམས་ཅད་ཚང་ལ་མ་ནོར་བ་འཁོར་ལོས་སྒྱུར་བའི་རྒྱལ་པོའི་བང་མཛོད་ཆེན་པོ་ལྟ་བུ་བླ་མའི་ཐུགས་སྒྲུབ་བར་ཆད་ཀུན་སེལ་གྱི་སྐོར་ཡིན།  དེ་ལ་ཟབ་ལམ་འདི་ཉིད་རྒྱུད་སྡེའི་དབང་དུ་བྱས་ན།  སྒྱུ་འཕྲུལ་སྡེ་བརྒྱད་ཀྱི་ནང་ཚན།  བྱིན་རླབས་ཀྱི་རྩ་བ་བླ་མ་རིག་འཛིན་སྒྱུ་འཕྲུལ་དྲྭ་བ་ཞི་ཁྲོ་རྣམ་པར་རོལ་པའི་རྒྱུད་ཀྱི་རྒྱལ་པོ་ཆེན་པོ་ལ་བརྟེན་ཅིང༌།  མན་ངག་གི་ངེས་པས་སྒྲུབ་སྡེ་བཀའ་བརྒྱད་ཀྱི་བྱེ་བྲག་པདྨ་གསུང་གི་ཕྱོགས་སུ་བསྡུས་ཀྱང་མི་འགལ་ལ།  མདོར་ན་རྒྱུད་དང་སྒྲུབ་སྡེའི་བསྐྱེད་རྫོགས་ལས་ཚོགས་དང་བཅས་པ་མཐའ་དག་གི་དོན་གྱི་སྙིང་པོའི་བཅུད་ཕྱུང་བ་ལའང་རྩ་བ་བུམ་པ་བཅུད་བཀང་ལྟ་བུ།  རྒྱས་བཤད་མཛེས་པའི་ཁ་རྒྱན་ལྟ་བུ།  ཟུར་བཀོལ་རྒྱབ་ཆོས་རིན་པོ་ཆེའི་ཕྲ་བཏབ་པ་ལྟ་བུ།  ཁྱད་པར་ཅན་གྱི་དྲྭ་ཕྱེད་མཛེས་པ་ལྟ་བུ་སྟེ་སྐོར་ཚོ་ཆེན་པོ་བཞིར་བཞུགས་པ་ལས།  འདིར་རྩ་བ་བུམ་པ་བཅུད་བཀང་ལྟ་བུའི་ཆོས་སྡེ་ལ།  ཐོག་མར་སྨིན་བྱེད་དབང་གི་རིམ་པ་ཟབ་མོ་བསྒྲུབ་པའི་སྐབས་སུ་བབས་པ་སྟེ།  དེ་ལའང་རྒྱས་འབྲིང་བསྡུས་གསུམ་ལས།  འདིར་འབྲིང་པོ་རྣམ་པ་ཉི་ཤུས་བྱང་ཆུབ་པའི་དབང་དང༌།  བསྡུས་པ་བྱིན་རླབས་གཏོར་མའི་དབང༌།  མཐའ་རྟེན་བཀྲ་ཤིས་ཚེའི་དབང་རྣམས་རིམ་པ་བཞིན་ཏུ་བསྒྲུབ་པ་ལ།  སློབ་དཔོན་གྱི་བྱ་བ་རྣམས་གྲུབ་ནས།  ཁྱེད་རང་རྣམས་ཀྱི་ངོ་སྐལ་དུ་གྱུར་པ།  ཐོག་མར་བླ་མ་ལ་སྐུ་གསུམ་དབྱེར་མེད་སྣང་སྲིད་ཟིལ་གནོན་པདྨ་འབྱུང་གནས་དངོས་ཡིན་སྙམ་པའི་མོས་གུས་དང་ལྡན་པས་བྱིན་རླབས་དབང་བསྐུར་གྱི་རིམ་པ་ཟབ་མོ་ཞུ་བའི་ཡོན་ཏུ་མཎྜལ་ཞིག་འབུལ་བར་ཞུ།  དེ་ལྟར་མཎྜལ་ཕུལ་ནས་མེ་ཏོག་དང་བཅས་པས་ཐལ་མོ་སྦྱར་ཏེ་མི་ཕྱེད་དད་པའི་གདུང་ཤུགས་དྲག་པོས་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད།  ཨེ་མ་ཧོ༔  ཆོས་སྐུ་སྣང་བ་མཐའ་ཡས་ལ་གསོལ་བ་འདེབས༔  ལོངས་སྐུ་ཐུགས་རྗེ་ཆེན་པོ་ལ་གསོལ་བ་འདེབས༔  སྤྲུལ་སྐུ་པདྨ་འབྱུང་གནས་ལ་གསོལ་བ་འདེབས༔  བདག་ལ་དབང་བསྐུར་བྱིན་གྱིས་བརླབ་ཏུ་གསོལ༔  ཅེས་གསོལ་བ་བཏབ་པ་ལ།  བླ་མ་ཨོ་རྒྱན་རིན་པོ་ཆེས་མཁྱེན་བརྩེའི་སྒོ་ཕྱེས་ནས་བཀའི་གནང་བ་སྦྱིན་པ་ནི་འདི་ལ་གསན་པས་ཁྱབ་སྟེ།  བདག་གི་བླ་མ་ངོ་མཚར་སྤྲུལ་པའི་སྐུ༔  རྒྱ་གར་ཡུལ་དུ་སྐུ་འཁྲུངས་ཐོས་བསམ་མཛད༔  བོད་ཡུལ་དབུས་སུ་ཞལ་བྱོན་དྲེགས་པ་བཏུལ༔  ཨོ་རྒྱན་ཡུལ་དུ་སྐུ་བཞུགས་འགྲོ་དོན་མཛད༔  སྐུ་གསུམ་དབྱེར་མེད་པདྨ་ཐོད་ཕྲེང་གི༔  དབང་བསྐུར་དམ་པ་ཁྱོད་ལ་སྦྱིན་པར་བྱ༔  དེ་ནས་ཚོགས་བསགས་པའི་སླད་དུ།  མདུན་གྱི་ནམ་མཁར་བླ་མ་དང་གཉིས་སུ་མེད་པའི་འཆི་མེད་པདྨ་ཐོད་ཕྲེང་ལ་སྐུ་གསུམ་རྒྱ་མཚོའི་སྤྲིན་ཕུང་འཕྲོ་ཞིང་རྩ་གསུམ་ཆོས་སྲུང་རབ་འབྱམས་ཀྱིས་བསྐོར་བ་བྱིན་ཐིབས་སེ་མངོན་སུམ་བཞིན་ཏུ་བཞུགས་པའི་སྤྱན་སྔར་སྐྱབས་སུ་འགྲོ་ཞིང་སེམས་བསྐྱེད་པ་དང༌།  ཡན་ལག་བདུན་གྱི་སྒོ་ནས་ཚོགས་གཉིས་བསག་པར་བགྱིའོ་སྙམ་པའི་ཡིད་ཀྱིས་འདིའི་རྗེས་ཟློས་ལན་གསུམ་མཛོད།  ན་མོ༔  བདག་དང་མཁའ་མཉམ་སེམས་ཅན་མ་ལུས་ཀུན༔  སྐྱབས་ཀྱི་མཆོག་གྱུར་རྣམས་ལ་སྐྱབས་སུ་མཆི༔  སྨོན་དང་འཇུག་པའི་བྱང་ཆུབ་སེམས་བསྐྱེད་ནས༔  སྐུ་གསུམ་བླ་མའི་གོ་འཕང་བསྒྲུབ་པར་བགྱི༔  ལན་གསུམ།  ཨོཾ་ཨཱཿཧཱུྃ་ཧྲཱིཿ  རིག་འཛིན་པདྨ་འབྱུང་གནས་ལ་སོགས་པའི༔  ཕྱོགས་བཅུའི་སྐྱབས་ཡུལ་རྣམས་ལ་ཕྱག་འཚལ་ལོ༔  དངོས་སུ་འབྱོར་དང་ཡིད་ལས་བྱུང་བ་ཡི༔  ཀུན་བཟང་མཆོད་སྤྲིན་ནམ་མཁའ་གང་བས་མཆོད༔  སོ་ཐར་བྱང་ཆུབ་སེམས་དཔའི་བསླབ་པ་དང་༔  རིག་འཛིན་སྔགས་ཀྱི་དམ་ཚིག་ཉམས་ཆགས་བཤགས༔  འཕགས་དང་སོ་སོ་སྐྱེ་བོའི་ཚོགས་རྣམས་ཀྱིས༔  རྒྱལ་སྲས་སྤྱོད་པ་སྤྱད་ལ་རྗཻས་ཡི་རང་༔  མཐའ་ཡས་འགྲོ་བ་སྡུག་བསྔལ་གྱུར་པ་ལ༔  ཕན་པ་ཇི་ལྟར་འཚམས་པའི་ཆོས་འཁོར་བསྐོར༔  བསྐལ་པ་བྱེ་བ་བསམ་ཡས་ཇི་སྙེད་དུ༔  འགྲོ་བའི་དོན་ཕྱིར་མྱ་ངན་མི་འདའ་བཞུགས༔  བདག་གིས་དུས་གསུམ་བསགས་པའི་དགེ་བ་རྣམས༔  འགྲོ་ཀུན་བྱང་ཆུབ་སྙིང་པོ་ཐོབ་ཕྱིར་བསྔཽ༔  ལན་གསུམ།  རྒྱུད་སྡོམ་པ་དང་ལྡན་པར་བྱ་བའི་སླད་དུ།  སྔར་གསལ་བཏབ་བཞིན་པའི་ཚོགས་ཞིང་དེ་རྣམས་ཀྱི་སྤྱན་སྔར་སོ་བྱང་སྔགས་གསུམ་གྱིས་བསྡུས་པའི་དམ་ཚིག་དང་སྡོམ་པ་རྣམས་ངོ་བོ་གནས་འགྱུར་བའི་ཚུལ་གྱིས་བཟུང་ཞིང་ཡོན་ཏན་ཡར་ལྡན་གྱི་ཚུལ་དུ་བསྲུང་བར་བགྱིའོ་སྙམ་པས་འདིའི་རྗེས་ཟློས་ལན་གསུམ་མཛོད།  ཨོ་རྒྱན་གདུང་འཛིན་རྒྱལ་བའི་སྲས༔  རྡོ་རྗེ་སློབ་དཔོན་དགོངས་སུ་གསོལ༔  བདག་གིས་དེང་བཟུང་བྱང་ཆུབ་བར༔  སོ་སོར་ཐར་དང་བྱང་ཆུབ་སེམས༔  རིག་འཛིན་ནང་གི་དམ་ཚིག་རྣམས༔  ཡང་དག་ཉིད་དུ་བཟུང་བྱས་ཏེ༔  སྲོག་གི་ཕྱིར་ཡང་མི་བཏང་ན༔  བདག་ལ་བྱིན་གྱིས་བརླབ་ཏུ་གསོལ༔  ཅེས་པས་རྒྱུད་སྡོམ་པ་དང་ལྡན་པར་བྱས་ནས་དབང་གི་གཞི་དགོད་པ་ཡེ་ཤེས་པ་དབབ་པའི་སླད་དུ་ཁྱེད་རང་རྣམས་ལུས་གནད་སྐྱིལ་ཀྲུང་དྲང་པོར་བསྲང༌།  ངག་གནད་རླུང་རྒྱུ་བ་ཁ་སྦྱོར་དུ་འཆིང༌།  སེམས་ཀྱི་གནད་གཞན་དུ་མ་ཡེངས་པས་དམིགས་པ་འདི་བཞིན་ཏུ་མཛོད།  ཨོཾ་ཧ་ཡ་གྲཱི་བ་ཧཱུྃ་ཕཊ༔  ཨོཾ་སྭ་བྷཱ་བ་སོགས།  སློབ་མ་མི་དམིགས་སྟོང་པའི་ངང་༔  དབང་ཆེན་རྟ་མགྲིན་སྐུ་མདོག་དམར༔  གྲི་ཐོད་འཛིན་ཅིང་གར་བསྒྱུར་བ༔  ཐུགས་ཀར་གཡུང་དྲུང་གཡོན་དུ་འཁོར༔  སྟེང་དུ་ཕག་མོ་གར་བྱེད་པ༔  བསྒོམ་ཞིང་སློབ་དཔོན་ཐོད་ཕྲེང་རྩལ༔  དངོས་ཡིན་སྙམ་དུ་མོས་གུས་ཀྱི༔  གདུང་ཤུགས་དྲག་པོ་བསྐྱེད་པའི་མཐུས༔  ཐུགས་ཀའི་ཧཱུྃ་ལས་འོད་ཟེར་དམར༔  ཕྱོགས་བཅུའི་སངས་རྒྱས་ཞིང་ཀུན་འཕྲོས༔  ཁྱད་པར་རྔ་ཡབ་དཔལ་རི་ནས༔  ཨོ་རྒྱན་བཞུགས་པའི་ཐུགས་ཀར་ཕོག༔  ཐམས་ཅད་ཐུགས་དམ་བསྐུལ་བྱས་ཏེ༔  སྐུ་གསུང་ཐུགས་ཀྱི་ཕྱག་རྒྱ་རྣམས༔  ཆར་ལྟར་བབས་ཏེ་སློབ་མ་ཡི༔  བ་སྤུའི་ཁུང་བུ་ནས་ཞུགས་ཏེ༔  ལུས་གང་སྙིང་གའི་ཕག་མོ་ལ༔  སིབ་སིབ་ཐིམ་པས་ཡེ་ཤེས་བསྐྱེད༔  བཟོད་མེད་བདེ་བ་འབར་བར་གྱུར༔  ཅེས་བརྗོད་ཅིང་བསམ་ལ་སྤོས་རོལ་དང་བཅས་གདངས་ཀྱི་འགྱུར་བ་སྙན་པོས།  ཧཱུྃ་ཧྲཱི༔  ཡུལ་གྱི་མིང་ནི་ལྷོ་ནུབ་རྔ་ཡབ་གླིང་༔  སྤྲུལ་པའི་ཞིང་མཆོག་པདྨ་དྲྭ་བ་ནས༔  སྐུ་གསུམ་དབྱེར་མེད་ཨོ་རྒྱན་ཐོད་ཕྲེང་རྩལ༔  རབ་འབྱམས་རྩ་གསུམ་རྒྱ་མཚོའི་འཁོར་དང་བཅས༔  མོས་པའི་གནས་འདིར་གདུང་བས་སྤྱན་འདྲེན་ན༔  ཐུགས་རྗེ་ཐུགས་དམ་དབང་གིས་གཤེགས་ནས་ཀྱང་༔  བར་ཆད་ཀུན་སོལ་མཆོག་ཐུན་དངོས་གྲུབ་སྩོལ༔  ཨོཾ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛཿསིདྡྷི་ཕ་ལ་ཧཱུྃ་ཨཱཿ  ཛྙཱ་ན་ཨཱ་བེ་ཤ་ཡ་ཨ་ཨཱཿ  ཞེས་ཡང་ཡང་བརྗོད་པས་བྱིན་དབབ༔  ཧཱུྃ་ཧཱུྃ་ཧཱུྃ་ཞེས་པས་བྱིན་བསྡུ།  ཛཿཧཱུྃ་བྃ་ཧོཿས་དབྱེར་མེད་དུ་བསྟིམ།  རྡོ་རྗེ་སྤྱི་བོར་རྒྱ་གྲམ་དུ་བཞག་པའམ།  མེ་ཏོག་འཐོར་བ་དང་བཅས།  ཏིཥྛ་བཛྲ།  ཞེས་བརྗོད་པས་བརྟན་པར་བྱས་པའི་མོས་པ་མཛོད།  དེ་ལྟར་ཡེ་ཤེས་དབབ་ཅིང་བརྟན་པར་བྱ་བ་སྔོན་དུ་སོང་ནས།  དངོས་གཞིའི་དབང་བསྐུར་བ་ལ།  རིག་འཛིན་འདུས་པ་རྩ་བའི་རྒྱུད་ལས།  རྡུལ་ཚོན་མེ་ལོང་བུམ་པ་དང༌།  །གཏོར་མ་ལ་སོགས་རྫས་དག་ལ།  །བརྟེན་ནས་མཚན་ཉིད་ཀུན་ལྡན་པའི།  །བླ་མའི་བྱིན་རླབས་དབང་བསྐུར་ན།  །དཀྱིལ་འཁོར་ཀུན་གྱི་སྙིང་པོ་མཆོག  །བཞི་པའི་དེ་ཉིད་དབང་བཞི་ཐོབ།  །ཞེས་གསུངས་པ་ལྟར་དབང་བཞི་བྱིན་རླབས་ཀྱི་ཚུལ་དུ་བསྐུར་བ་དབང་ཐམས་ཅད་ཀྱི་སྙིང་པོར་གྱུར་པ་དེ་ཉིད་སྒྲུབ་པར་བྱེད་པ་སྟེ།  འདི་ལྟར་བུམ་པ་ལ་སོགས་པའི་དབང་རྫས་ལྔ་པོ་རེ་རེ་བཞིན་གནས་གསུམ་དུ་བཞག་ནས་མཐར་ཚིག་དོན་ངོ་སྤྲད་དེ་རིམ་པ་བཞིན་དབང་བཞིའི་བདག་ཉིད་ཅན་དུ་བསྐུར་བ་ལ་རྣམ་པ་ཉི་ཤུས་བྱང་ཆུབ་པ་ཞེས་བྱ་བ་ཡིན་པས།  ཐོག་མར་བུམ་དབང་གི་སླད་དུ་སློབ་དཔོན་གྱི་ཐུགས་ཀ་ནས་འོད་ཟེར་འཕྲོས།  དབང་གི་ལྷ་ནམ་མཁའ་གང་བར་སྤྱན་དྲངས་པ་དང་ལྷན་ཅིག་ཏུ་བཀྲ་ཤིས་པའི་རྣམ་པ་དུ་མ་དང་ལྡན་པས་རིན་པོ་ཆེའི་བུམ་པ་བདུད་རྩིའི་ཆུ་རྒྱུན་གྱིས་གང་བ་གནས་གསུམ་དུ་བཞག་ཅིང་ཚིག་དོན་ངོ་སྤྲད་དེ་དབང་བསྐུར་བའི་མོས་པ་མཛོད།  ཧཱུྃ༔  བུམ་པ་ཟླུམ་པོ་ཆོས་སྐུའི་གཞལ་ཡས་ཁང་༔  བུམ་རྫས་སྣང་བ་ལོངས་སྤྱོད་རྫོགས་པས་བརྒྱན༔  རང་རིག་བྱང་ཆུབ་སེམས་ཀྱི་ཆུས་བཀང་བས༔  རིག་རྩལ་དབང་བཞི་ཆིག་རྫོགས་དབང་བསྐུར་རོ༔  ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔  ཀ་ལཱ་ཤ་ཨ་བྷི་ཥིཉྩ་ཨོཾ༔  ཅེས་སྔགས་ལན་གསུམ་བརྗོད་པས་བུམ་པ་སྤྱི་བོར་བཞག་ཅིང་ཁྲུས་བྱ།  མགྲིན་པར་བཞག་ཅིང་བུམ་ཆུ་སྦྱིན།  སྙིང་གར་བཞག་ཅིང་ཚིག་དོན་ངོ་སྤྲད་དེ་ཉམས་བསྐྱང་དུ་བཞུག  །དེ་ལྟར་བུམ་པ་སྤྱི་བོར་བཞག་ཅིང་ཁྲུས་བྱས་པས་བུམ་དབང༌།  མགྲིན་པར་བཞག་ཅིང་བུམ་ཆུ་སྦྱིན་པས་གསང་དབང༌།  སྙིང་གར་གཏད་ཅིང་ཚིག་དོན་ངོ་སྤྲད་པ་ནི།  སེམས་ཉིད་སྤྲོས་པ་ཐམས་ཅད་དང་བྲལ་བ་མཚོན་པའི་བུམ་པ་ཟླུམ་པོ་སྐྱེ་མེད་རྟོགས་པ་དོན་དམ་མཚོན་བྱེད་ཆུས་བཀང་སྟེ་དབང་བསྐུར་བས།  དུག་གསུམ་བག་ཆགས་དང་བཅས་པ་དག་པར་ཤེས་པ་ནི་ཤེས་རབ་ཡེ་ཤེས་ཀྱི་དབང༌།  དེས་བདེ་གསལ་མི་རྟོག་པའི་ཉམས་སྐྱེས་པ་ནི་དབང་བཞི་པ་སྟེ།  ལུས་ལྷར་སྨིན་པར་བྱེད་པ་སྐུ་བུམ་པ་ལ་བརྟེན་པའི་དབང་བཞི་རྫོགས་པ་ཡིན་ནོ།  །བདུད་རྩིས་དབང་བསྐུར་བའི་སླད་དུ།  བླ་མ་འཆི་མེད་ཐོད་ཕྲེང་རྩལ་ཡབ་ཡུམ་སྙོམས་པར་ཞུགས་པའི་མཁའ་གསང་ནས་བྱུང་བའི་ཀུནྡ་བྱང་ཆུབ་ཀྱི་སེམས་ལྷན་ཅིག་སྐྱེས་པའི་ཡེ་ཤེས་ཀྱི་རྟེན་དུ་གྱུར་པ་ཐོད་པའི་བདུད་རྩི་དང་རོ་གཅིག་ཏུ་སྦྱར་ཏེ་གནས་གསུམ་དུ་བཞག་ཅིང་ཚིག་དོན་ངོ་སྤྲད་དེ་དབང་བསྐུར་བའི་མོས་པ་མཛོད།  ཧཱུྃ༔  བྷནྡྷ་ཟླུམ་པོ་ཡུམ་གྱི་མཁའ་དབྱིངས་སུ༔  ཤ་ལྔ་བདུད་རྩི་ཐབས་མཆོག་ཡབ་ཀྱི་རྫས༔  བདེ་སྟོང་ཟུང་འཇུག་བདུད་རྩིས་བཀང་བ་འདིས༔  རིག་རྩལ་དབང་བཞི་ཆིག་རྫོགས་དབང་བསྐུར་རོ༔  ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔  བོ་དྷིཙིཏྟ་ཨ་བྷི་ཥིཉྩ་ཨཱཿ  ལན་གསུམ།  དེ་ལྟར་ཐོད་པ་སྤྱི་བོར་བཞག་པས་བུམ་དབང༌།  མགྲིན་པར་བཞག་ནས་བདུད་རྩི་བླུད་པས་གསང་དབང༌།  སྙིང་གར་གཏད་ནས་ཚིག་དོན་ངོ་སྤྲད་པ་ནི།  སེམས་ཆོས་དབྱིངས་ཐིག་ལེ་ཉག་གཅིག་མཚོན་པའི་ཐོད་པ་ཟླུམ་པོའི་ནང་དུ།  གཞི་ཉོན་མོངས་ལྔ་ངོ་བོ་ཤ་ལྔ་ཡེ་ཤེས་ལྔར་རང་རིག་པ་སྐུ་ལྔའི་བདག་ཉིད་འཆི་མེད་ཀྱི་གོ་འཕང་བརྙེས་པས་མཚོན་པ་བདུད་རྩིས་བཀང་སྟེ་དབང་བསྐུར་བས་རྣམ་རྟོག་དག་པར་ཤེས་པ་ནི་ཤེས་རབ་ཡེ་ཤེས་ཀྱི་དབང༌།  དེས་བདེ་གསལ་མི་རྟོག་པའི་ཉམས་སྐྱེས་པ་ནི་དབང་བཞི་པ་སྟེ།  ངག་སྔགས་སུ་སྨིན་པར་བྱེད་པ་གསུང་གསང་བ་ལ་བརྟེན་པའི་དབང་བཞི་རྫོགས་པ་ཡིན་ནོ།  །མེ་ལོང་གིས་དབང་བསྐུར་བའི་སླད་དུ།  སྣང་སྟོང་དབྱེར་མེད་ཆོས་དབྱིངས་ཡུམ་གྱི་ཆུ་སྐྱེས་མཚོན་པའི་མེ་ལོང་སིནྡྷུ་རའི་ཐིག་ལེ་དང་བཅས་པ་གནས་གསུམ་དུ་བཞག་ཅིང་ཚིག་དོན་ངོ་སྤྲད་དེ་དབང་བསྐུར་བའི་མོས་པ་མཛོད།  ཧཱུྃ༔  མེ་ལོང་ཟླུམ་པོ་སྟོང་ཉིད་རྫོགས་པ་ཆེ༔  སྣང་སྟོང་གཟུགས་སུ་ཤར་བ་བསྐྱེད་པའི་རིམ༔  ཟུང་འཇུག་མཉམ་པར་སྦྱོར་བའི་སིནྡྷུ་རས༔  རིག་རྩལ་དབང་བཞི་ཆིག་རྫོགས་དབང་བསྐུར་རོ༔  ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔  མ་ཧཱ་མུ་དྲ་ཨ་བྷི་ཥིཉྩ་ཧཱུྃ༔  ལན་གསུམ།  དེ་ལྟར་མེ་ལོང་སྤྱི་བོར་བཞག་ཅིང་དཔྲལ་བར་ཐིག་ལེ་བཀོད་པས་བུམ་དབང༌།  མགྲིན་པར་བཞག་ཅིང་ཐིག་ལེ་བྱས་པས་གསང་དབང༌།  སྙིང་གར་བཞག་ཅིང་ཐིག་ལེ་བྱས་ཏེ་རིག་པ་གསལ་ལ་མ་འགགས་པར་ངོ་སྤྲད་པ་ནི་སེམས་ཉིད་ཆོས་སྐུ་དྲི་མེད་མཚོན་བྱེད་མེ་ལོང་གཡའ་དག་ཟླུམ་པོ་ལ།  ཀུན་རྫོབ་སྒྱུ་མ་ལྟ་བུ་དང༌།  རྣམ་ཀུན་མཆོག་ལྡན་གྱི་སྟོང་ཉིད་གཟུགས་བརྙན་ཅིར་ཡང་ཤར་བར་མཚོན་པའི་ཚོམ་བུ་སྔགས་བཅས་ཀྱིས་བརྒྱན་པས་དབང་བསྐུར་བས་བསལ་བ་ལ་སྟོང་པས་རྒྱས་ཐེབས་པར་ཤེས་པ་ཤེས་རབ་ཡེ་ཤེས་ཀྱི་དབང༌།  སེམས་བདེ་གསལ་མི་རྟོག་པའི་ཉམས་སྐྱེས་པ་ནི་དབང་བཞི་པ་སྟེ།  ཡིད་ཐུགས་སུ་སྨིན་པར་བྱེད་པ་ཤེས་རབ་ཡེ་ཤེས་ལ་བརྟེན་པའི་དབང་བཞི་རྫོགས་པ་ཡིན་ནོ།  །གཏོར་མས་དབང་བསྐུར་བའི་སླད་དུ།  གཏོར་སྣོད་དབྱིངས་ཀྱི་བྷཉྫ་ཡངས་པར།  གཏོར་མའི་ངོ་བོ་རིག་པ་ཡེ་ཤེས་ལྔ་ལས་གུ་རུ་རྩ་བ་གསུམ་གྱི་ལྷ་ཚོགས་རང་ཤར་བའི་རྟེན་དང་བརྟེན་པར་བཅས་པ་གནས་གསུམ་དུ་བཞག་ཅིང་ཚིག་དོན་ངོ་སྤྲད་དེ་དབང་བསྐུར་བའི་མོས་པ་མཛོད།  ཧཱུྃ༔  གཏོར་སྣོད་ཟླུམ་པོ་ཆོས་ཀྱི་དབྱིངས་དང་མཉམ༔  གཏོར་མའི་ངོ་བོ་རིག་པ་ཡེ་ཤེས་ལྔ༔  དབྱིངས་ཡེ་ཟུང་འཇུག་མཁའ་འགྲོ་དབང་སྡུད་ཕྱིར༔  དམ་རྫས་གཏོར་མ་ཆེན་པོའི་དབང་བསྐུར་རོ༔  ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔  བ་ལིནྟ་ཨཱ་བྷི་ཥིཉྩ་ཧྲཱི༔  ལན་གསུམ།  དེ་ལྟར་གཏོར་མ་སྤྱི་བོར་བཞག་པས་བུམ་དབང༌།  མགྲིན་པར་གཏད་ནས་གཏོར་ཟན་མྱོང་བས་གསང་དབང༌།  སྙིང་གར་གཏད་དེ་ཚིག་དོན་ངོ་སྤྲད་པ་ནི་དབྱིངས་སྟོང་པ་ཉིད་མཚོན་པའི་གཏོར་སྣོད་དུ།  རིག་པ་ཡེ་ཤེས་ལྔ་མཚོན་པའི་གཏོར་ཆེན་རྩ་བ་གསུམ་གྱི་རྣམ་པ།  དམ་རྫས་ལྷན་སྐྱེས་ཀྱི་ཡེ་ཤེས་མཚོན་པར་ཤེས་པས་ཤེས་རབ་ཡེ་ཤེས་ཀྱི་དབང༌།  དེས་བདེ་གསལ་མི་རྟོག་པའི་ཉམས་སྐྱེས་པ་ནི་དབང་བཞི་པ་སྟེ།  སྤངས་རྟོགས་ཡོངས་རྫོགས་སུ་བྱེད་པ་ཡོན་ཏན་གཏོར་མ་ལ་བརྟེན་པའི་དབང་བཞི་རྫོགས་པ་ཡིན་ནོ།  །གུ་རུའི་སྐུ་འབག་གིས་དབང་བསྐུར་བའི་སླད་དུ།  སྐུ་གཟུགས་འདི་ཉིད་ཆོས་དབྱིངས་སྐྱེ་བ་མེད་པ་ལས་རང་ཤར་བའི་ལོངས་སྤྱོད་རྫོགས་སྐུ་རྩ་གསུམ་ཀུན་འདུས་ཨོ་རྒྱན་སྣང་སྲིད་ཟིལ་གནོན་རྩལ་གང་འདུལ་སྤྲུལ་པའི་སྤྲིན་ཕུང་མཁའ་ཁྱབ་ཏུ་འཕྲོ་བའི་ཡེ་ཤེས་ཀྱི་སྐུ་དངོས་སུ་གསལ་བ་ཁྱེད་རང་རྣམས་ཀྱི་གནས་གསུམ་དུ་བཞག་ཅིང་གདུང་བའི་གླུས་ཐུགས་དམ་བསྐུལ་ཏེ་ཚིག་དོན་ངོ་སྤྲད་ནས་དབང་བསྐུར་བའི་མོས་པ་མཛོད།  ཧཱུྃ༔  ཆོས་སྐུ་སྐྱེ་མེད་དབྱིངས་ལས་མ་གཡོས་ཀྱང་༔  ལོངས་སྐུ་གསལ་ལ་མ་འདྲེས་གུ་རུའི་སྐུ༔  སྤྲུལ་སྐུ་སྣ་ཚོགས་ཐབས་ཀྱིས་འགྲོ་བ་འདུལ༔  སྐུ་གསུམ་ངང་དུ་མ་འདྲེས་ཡོངས་རྫོགས་གསལ༔  སྔོན་ཚེ་པད་འབྱུང་ཁྱེད་དང་སྨོན་ལམ་གཅིག༔  ད་ལྟ་བདག་ཉིད་སློབ་མའི་སྟངས་བཟུང་སྟེ༔  སྲོག་གི་ཕྱིར་ཡང་མི་བཏང་བསྒྲུབ་ལགས་ན༔  ཡེ་ཤེས་རབ་འབྱམས་དབང་ཆེན་བསྐུར་དུ་གསོལ༔  ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔  ཀཱ་ཡ་ཝཱ་ཀ་ཙིཏྟ་སརྦ་ཨ་བྷི་ཥིཉྩ་ཨོཾ་ཨཱཿཧཱུྃ་ཧྲཱི༔  ལན་གསུམ།  དེ་ལྟར་སྐུ་འབག་ཡེ་ཤེས་ཀྱི་སྐུ་དངོས་སུ་གསལ་བ་སྤྱི་བོར་བཞག་པ་བུམ་དབང༌།  མགྲིན་པར་བཞག་པ་གསང་དབང༌།  སྙིང་གར་བཞག་སྟེ་བླ་མ་དང་རང་སེམས་དབྱེར་མེད་དུ་ངོ་སྤྲད་པ་ནི།  སེམས་ཉིད་བསམ་གྱིས་མི་ཁྱབ་པའི་ཡེ་ཤེས་སྟོང་གསལ་རང་རིག་འདུས་མ་བྱས་པ་གདོད་མ་ནས་བླ་མ་སྐུ་བཞིའི་ངོ་བོར་བཞུགས་པ་མཚོན་པར་བྱེད་པ་གུ་རུའི་སྐུ་འབག་གིས་དབང་བསྐུར་བས།  རང་རིག་གི་ངོ་བོ་སྒྲིབ་གཉིས་ཀྱི་འཆིང་བས་ཡེ་ནས་གོས་མ་མྱོང་བ་མཚོན་བྱ་དོན་གྱི་ཀུན་བཟང་པདྨ་འབྱུང་གནས་དང་རོ་གཅིག་ཏུ་བཞུགས་ཀྱང༌།  རྣམ་འགྱུར་གློ་བུར་བའི་དྲི་མ་སྦྱོང་བའི་ཕྱིར་མཚོན་བྱེད་བརྡ་ཡི་བླ་མས་བདག་དང་སློབ་མའི་རྒྱུད་བྱིན་གྱིས་བརླབས་པར་ཤེས་པ་ཤེས་རབ་ཡེ་ཤེས་ཀྱི་དབང༌།  དེས་བདེ་གསལ་མི་རྟོག་པའི་ཉམས་སྐྱེས་པ་ནྀ་དབང་བཞི་པ་སྟེ།  འགྲོ་འདུལ་ལས་རབ་འབྱམས་འགྲུབ་པ་ཕྲིན་ལས་སྐུ་འབག་ལ་བརྟེན་པའི་དབང་བཞི་རྫོགས་པ་ཡིན་ནོ།  །དེ་རྣམས་ཀྱི་སྒོ་ནས་རྩ་བའི་དབང་རྣམ་པ་ལྔ་ལ་ནང་གསེས་ཀྱི་ལྡོག་ཆ་དབང་བཞིའི་ངེས་པས་ཕྱེ་བའི་རྣམ་པ་ཉི་ཤུས་བྱང་ཆུབ་པ་ཞེས་བྱ་སྟེ།  སྤྱི་དབང་འབྲིང་པོའི་ཚུལ་དུ་བླ་མའི་དབང་ཆེན་རབ་འབྱམས་ཆིག་རྫོགས་སུ་བསྐུར་བས་དབང་བཞིའི་མངོན་པར་རྟོགས་པའི་བྱིན་རླབས་ཐོད་རྒལ་དུ་ཐོབ་པར་འགྱུར་བ་ཡིན་ནོ།  །རྗེས་འབྲེལ་དུ་སྐུ་གསུང་ཐུགས་ཀྱི་དབང་བསྐུར་བ་ལ།  ཐོག་མར་ལྷ་སྐུ་ཕྱག་རྒྱའི་དབང་བསྐུར་བའི་སླད་དུ།  སློབ་དཔོན་དང་དཀྱིལ་འཁོར་པ་ཐ་མི་དད་པའི་སོ་སོའི་ཐུགས་ཀ་ནས་རང་འདྲ་བའི་ཡེ་ཤེས་ཀྱི་སྐུ་གཉིས་པ་མར་མེ་གཅིག་ལས་གཉིས་ཆད་ཀྱི་ཚུལ་དུ་བྱོན།  ཁྱེད་རང་རྣམས་ལ་ཐིམ་པས་ལྷ་སོ་སོའི་ཡེ་ཤེས་ཀྱི་སྐུ་དང་དབྱེར་མེད་པར་བྱིན་གྱིས་བརླབས་པའི་མོས་པ་མཛོད།  ཅེས་བརྡ་སྦྱར་ལ།  ཧྲཱི༔  ངོ་མཚར་ཕུན་ཚོགས་བདེ་ཆེན་ཞིང་༔  བཀོད་པ་ཚད་མེད་ཕོ་བྲང་ནས༔  དུས་གསུམ་སངས་རྒྱས་ཐམས་ཅད་ཀྱི༔  ཆོས་ཀྱི་སྐུ་ཡི་ངོ་བོ་ཉིད༔  ཡེ་ཤེས་སྣང་བ་ལམ་མེ་བ༔  ཚེ་དཔག་མེད་མགོན་བཅོམ་ལྡན་འདས༔  ཡབ་ཡུམ་སྲས་དང་བཙུན་མོ་དང་༔  འདུས་པའི་འཁོར་དང་བཅས་རྣམས་ཀྱི༔  ཐུགས་རྗེས་འདི་ལ་བྱིན་གྱིས་རློབས༔  བརྩེ་བས་འདི་ཡི་ལམ་སྣ་དྲོངས༔  དགོངས་པས་འདི་ལ་དངོས་གྲུབ་སྩོལ༔  ནུས་པས་འདི་ཡི་བར་ཆད་སོལ༔  ཕྱི་ཡི་བར་ཆད་ཕྱི་རུ་སོལ༔  ནང་གི་བར་ཆད་ནང་དུ་སོལ༔  གསང་བའི་བར་ཆད་དབྱིངས་སུ་སོལ༔  མོས་པའི་བུ་ལ་བྱིན་གྱིས་རློབས༔  ཨོཾ་ཨ་མཱ་ར་ཎི་ཛཱི་བནྟི་ཡེ་སྭཱ་ཧཱ༔  ཀཱ་ཡ་ཨ་བྷི་ཥིཉྩ་ཨོཾ༔  ཤར་ཕྱོགས་རི་པོ་ཏ་ལའི་ཞིང་༔  བྱང་ཆུབ་ཆེན་པོའི་ཕོ་བྲང་ནས༔  དུས་གསུམ་སངས་རྒྱས་ཐམས་ཅད་ཀྱི༔  ལོངས་སྤྱོད་རྫོགས་སྐུའི་ངོ་བོ་ཉིད༔  དཔལ་ལྡན་པདྨ་གར་གྱི་བདག༔  སྤྱན་རས་གཟིགས་དབང་འགྲོ་བའི་མགོན༔  བསྐལ་བཟང་སེམས་དཔའ་སེམས་མ་དང་༔  རིག་པ་འཛིན་པའི་འཁོར་རྣམས་ཀྱིས༔  ཐུགས་རྗེས་འདི་ལ༴  བརྩེ་བས་འདི་ཡི༴  དགོངས་པས་འདི་ལ༴  ནུས་པས་འདི་ཡི༴  ཕྱི་ཡི་བར་ཆད༴  ནང་གི་བར་ཆད༴  གསང་བའི་བར་ཆད༴  མོས་པའི་བུ་ལ་བྱིན་གྱིས་རློབས༔  ཨོཾ་མ་ཎི་པདྨེ་ཧཱུྃ་ཧྲཱི༔  ཀཱ་ཡ་ཨ་བྷི་ཥིཉྩ་ཨོཾ༔  ལྷོ་ནུབ་རྔ་ཡབ་དཔལ་རིའི་ཞིང་༔  པདྨ་འོད་ཀྱི་ཕོ་བྲང་ནས༔  དུས་གསུམ་སངས་རྒྱས་ཐམས་ཅད་ཀྱི༔  སྤྲུལ་པའི་སྐུ་ཡི་ངོ་བོ་ཉིད༔  དཔལ་ལྡན་སངས་རྒྱས་པདྨ་སྐྱེས༔  སྣང་སྲིད་ཟིལ་གནོན་ཐོད་ཕྲེང་རྩལ༔  ཡི་དམ་དཔའ་བོ་མཁའ་འགྲོ་དང་༔  ཆོས་སྲུང་རྒྱ་མཚོའི་འཁོར་བཅས་ཀྱི༔  ཐུགས་རྗེས་འདི་ལ༴  བརྩེ་བས་འདི་ཡི༴  དགོངས་པས་འདི་ལ༴  ནུས་པས་འདི་ཡི༴  ཕྱི་ཡི་བར་ཆད༴  ནང་གི་བར་ཆད༴  གསང་བའི་བར་ཆད༴  མོས་པའི་བུ་ལ་བྱིན་གྱིས་རློབས༔  ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔  ཀཱ་ཡ་ཨ་བྷི༴  སྐུ་ཡི་ངོ་མཚར་མཐོང་བའི་ཚེ༔  གཡས་པས་རལ་གྲིའི་ཕྱག་རྒྱ་མཛད༔  གཡོན་པས་འགུགས་པའི་ཕྱག་རྒྱ་མཛད༔  ཞལ་བགྲད་མཆེ་གཙིགས་གྱེན་ལ་གཟིགས༔  རྒྱལ་བའི་གདུང་འཛིན་འགྲོ་བའི་མགོན༔  ཐུགས་རྗེས་འདི་ལ༴  བརྩེ་བས་འདི་ཡི༴  དགོངས་པས་འདི་ལ༴  ནུས་པས་འདི་ཡི༴  ཕྱི་ཡི་བར་ཆད༴  ནང་གི་བར་ཆད༴  གསང་བའི་བར་ཆད༴  མོས་པའི་བུ་ལ་བྱིན་གྱིས་རློབས༔  ཨོཾ་ཨཱཿཧཱུྃ་བཛྲ་གུ་རུ་པདྨ་རཱ་ཛ་ཨ་ནྲྀ་ཏྲི་ཛ་ཛ་སརྦ་སིདྡྷི་ཕ་ལ་ཧཱུྃ༔  ཀཱ་ཡ༴  དམ་ཆོས་རིན་ཆེན་གསན་པའི་ཚེ༔  སྐུ་གསལ་འོད་ཟེར་མདངས་དང་ལྡན༔  ཕྱག་གཡས་སྡེ་སྣོད་གླེགས་བམ་བསྣམས༔  གཡོན་པས་ཕུར་པའི་པུསྟི་བསྣམས༔  ཟབ་མོའི་ཆོས་རྣམས་ཐུགས་སུ་ཆུད༔  ཡང་ལེ་ཤོད་ཀྱི་པཎྜི་ཏ༔  ཐུགས་རྗེས་འདི་ལ༴  བརྩེ་བས་འདི་ཡི༴  དགོངས་པས་འདི་ལ༴  ནུས་པས་འདི་ཡི༴  ཕྱི་ཡི་བར་ཆད༴  ནང་གི་བར་ཆད༴  གསང་བའི་བར་ཆད༴  མོས་པའི་བུ་ལ་བྱིན་གྱིས་རློབས༔  ཨོཾ་ཨཱཿཧཱུྃ་བཛྲ་གུ་རུ་པདྨ་པྲ་ཛྙཱ་ཛྙཱ་ན་སརྦ་སིདྡྷི་ཧཱུྃ༔  ཀཱ་ཡ༴  དམ་ཅན་དམ་ལ་བཏགས་པའི་ཚེ༔  དྲི་མེད་གནས་མཆོག་ཉམས་རེ་དགའ༔  རྒྱ་གར་བོད་ཡུལ་ས་མཚམས་སུ༔  བྱིན་གྱིས་བརླབས་ནས་བྱོན་པའི་ཚེ༔  དྲི་བསུང་སྤོས་ངད་ལྡན་པའི་རི༔  མེ་ཏོག་པདྨ་དགུན་ཡང་སྐྱེས༔  ཆུ་མིག་བྱང་ཆུབ་བདུད་རྩིའི་ཆུ༔  བདེ་ལྡན་དེ་ཡི་གནས་མཆོག་ཏུ༔  སྐྱེས་མཆོག་ཚུལ་བཟང་ཆོས་གོས་གསོལ༔  ཕྱག་གཡས་རྡོ་རྗེ་རྩེ་དགུ་བསྣམས༔  གཡོན་པས་རིན་ཆེན་ཟ་མ་ཏོག༔  རཀྟ་བདུད་རྩིས་ནང་དུ་གཏམས༔  མཁའ་འགྲོ་དམ་ཅན་དམ་ལ་བཏགས༔  ཡི་དམ་ཞལ་གཟིགས་དངོས་གྲུབ་བརྙེས༔  ཐུགས་རྗེས་འདི་ལ༴  བརྩེ་བས་འདི་ཡི༴  དགོངས་པས་འདི་ལ༴  ནུས་པས་འདི་ཡི༴  ཕྱི་ཡི་བར་ཆད༴  ནང་གི་བར་ཆད༴  གསང་བའི་བར་ཆད༴  མོས་པའི་བུ་ལ་བྱིན་གྱིས་རློབས༔  ཨོཾ་ཨཱཿཧཱུྃ་བཛྲ་གུ་རུ་པདྨ་སཾ་བྷ་ཝ་སརྦ་སིདྡྷི་ཧཱུྃ༔  ཀཱ་ཡ་ཨ་བྷི༴  རྒྱལ་བའི་བསྟན་པ་བཙུགས་པའི་ཚེ༔  གཡའ་རིའི་ནགས་ལ་སྒྲུབ་པ་མཛད༔  བསྙེན་ཕུར་ནམ་མཁའི་དབྱིངས་སུ་འཕར༔  རྡོ་རྗེའི་ཕྱག་རྒྱས་བླངས་ཤིང་བསྒྲིལ༔  བསྒྲིལ་ཤིང་ཙནྡན་ནགས་སུ་འཕང་༔  མེ་འབར་འཁྲུགས་ཅིང་མཚོ་ཡང་སྐེམས༔  སྲིབ་ཀྱི་མུ་སྟེགས་ས་གང་བསྲེག༔  ཡཀྴ་ནག་པོ་རྡུལ་དུ་བརླག༔  འགྲན་གྱི་དོ་མེད་བདུད་ཀྱི་བཤེད༔  ཐུགས་རྗེས་འདི་ལ༴  བརྩེ་བས་འདི་ཡི༴  དགོངས་པས་འདི་ལ༴  ནུས་པས་འདི་ཡི༴  ཕྱི་ཡི་བར་ཆད༴  ནང་གི་བར་ཆད༴  གསང་བའི་བར་ཆད༴  མོས་པའི་བུ་ལ་བྱིན་གྱིས་རློབས༔  ཨོཾ་ཨཱཿཧཱུྃ་བཛྲ་གུ་རུ་པདྨ་ཀཱི་ལི་ཀཱི་ལ་ཡ་སརྦ་བིགྷྣཱན་བྃ་ཧཱུྃ་ཕཊ༔  ཀཱ་ཡ༴  སྲིན་པོའི་ཁ་གནོན་མཛད་པའི་ཚེ༔  ཁྱེའུ་ཆུང་སྤྲུལ་པའི་ཆ་ལུགས་ཅན༔  ཡ་མཚན་གཟུགས་བཟང་ཁ་དོག་ལེགས༔  ཚེམས་འགྲིགས་དབུ་སྐྲ་སེར་ལ་མཛེས༔  དགུང་ལོ་བཅུ་དྲུག་ལོན་པའི་ཚུལ༔  རིན་ཆེན་རྒྱན་ཆ་སྣ་ཚོགས་གསོལ༔  ཕྱག་གཡས་འཁར་བའི་ཕུར་པ་བསྣམས༔  བདུད་དང་སྲིན་པོའི་ཁ་གནོན་མཛད༔  གཡོན་པས་སེང་ལྡེང་ཕུར་པ་བསྣམས༔  མོས་པའི་བུ་ལ་སྲུང་སྐྱོབ་མཛད༔  མགུལ་ན་ལྕགས་ཀྱི་ཕུར་པ་བསྣམས༔  ཡི་དམ་ལྷ་དང་གཉིས་སུ་མེད༔  གཉིས་མེད་སྤྲུལ་སྐུ་འཛམ་གླིང་རྒྱན༔  ཐུགས་རྗེས་འདི་ལ༴  བརྩེ་བས་འདི་ཡི༴  དགོངས་པས་འདི་ལ༴  ནུས་པས་འདི་ཡི༴  ཕྱི་ཡི་བར་ཆད༴  ནང་གི་བར་ཆད༴  གསང་བའི་བར་ཆད༴  མོས་པའི་བུ་ལ་བྱིན་གྱིས་རློབས༔  ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔  ཀཱ་ཡ༴  འདྲེ་ཡི་ཡུལ་དུ་དགོངས་པའི་ཚེ༔  མེ་དཔུང་ཤོད་ཀྱི་ས་གཞི་ལ༔  མདའ་རྒྱང་གང་གི་མཚོ་ནང་དུ༔  པདྨའི་སྟེང་དུ་བསིལ་བསིལ་འདྲ༔  པདྨའི་ནང་ན་དགོངས་པ་མཛད༔  མཚན་ཡང་པདྨ་འབྱུང་གནས་ཞེས༔  རྫོགས་པའི་སངས་རྒྱས་དངོས་སུ་བྱོན༔  དེ་འདྲའི་སྤྲུལ་སྐུ་ཡ་མཚན་ཅན༔  ཐུགས་རྗེས་འདི་ལ༴  བརྩེ་བས་འདི་ཡི༴  དགོངས་པས་འདི་ལ༴  ནུས་པས་འདི་ཡི༴  ཕྱི་ཡི་བར་ཆད༴  ནང་གི་བར་ཆད༴  གསང་བའི་བར་ཆད༴  མོས་པའི་བུ་ལ་བྱིན་གྱིས་རློབས༔  ཨོཾ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛཿསིདྡྷི་ཕ་ལ་ཧཱུྃ༔  ཀཱ་ཡ༴  བོད་ཀྱི་ཉི་མ་མཛད་པའི་ཚེ༔  དད་ལྡན་འགྲོ་བ་འདྲེན་པའི་དཔལ༔  གང་ལ་གང་འདུལ་སྐུར་བསྟན་ནས༔  གཙང་ཁ་ལ་ཡི་ལ་ཐོག་ཏུ༔  དགྲ་བླའི་དགེ་བསྙེན་དམ་ལ་བཏགས༔  ཡུལ་ནི་ཚ་བའི་ཚ་ཤོད་དུ༔  ལྷ་ཡི་དགེ་བསྙེན་དྲེགས་པ་ཅན༔  ཉི་ཤུ་རྩ་གཅིག་དམ་ལ་བཏགས༔  མང་ཡུལ་དེ་ཡི་བྱམས་སྤྲིན་དུ༔  དགེ་སློང་བཞི་ལ་དངོས་གྲུབ་གནང་༔  ཁྱད་པར་འཕགས་པའི་རིག་འཛིན་མཆོག༔  ཐུགས་རྗེས་འདི་ལ༴  བརྩེ་བས་འདི་ཡི༴  དགོངས་པས་འདི་ལ༴  ནུས་པས་འདི་ཡི༴  ཕྱི་ཡི་བར་ཆད༴  ནང་གི་བར་ཆད༴  གསང་བའི་བར་ཆད༴  མོས་པའི་བུ་ལ་བྱིན་གྱིས་རློབས༔  ཨོཾ་ཨཱཿཧཱུྃ་བཛྲ་མ་ཧཱ་གུ་རུ་སརྦ་སིདྡྷི་ཧཱུྃ༔  ཀཱ་ཡ༴  དཔལ་མོ་ཐང་གི་དཔལ་ཐང་དུ༔  བརྟན་མ་བཅུ་གཉིས་དམ་ལ་བཏགས༔  བོད་ཡུལ་ཁ་ལའི་ལ་ཐོག་ཏུ༔  གངས་དཀར་ཤ་མེད་དམ་ལ་བཏགས༔  འདམ་ཤོད་ལྷ་བུའི་སྙིང་དྲུང་དུ༔  ཐང་ལྷ་ཡར་བཞུད་དམ་ལ་བཏགས༔  ཧས་པོ་རི་ཡི་ཡང་གོང་དུ༔  ལྷ་སྲིན་ཐམས་ཅད་དམ་ལ་བཏགས༔  ཆེ་བའི་ལྷ་འདྲེ་ཐམས་ཅད་ཀྱིས༔  ལ་ལས་སྲོག་གི་སྙིང་པོ་ཕུལ༔  ལ་ལས་བསྟན་པ་བསྲུང་བར་བྱས༔  ལ་ལས་བྲན་དུ་ཁས་བླངས་བྱས༔  མཐུ་དང་རྫུ་འཕྲུལ་སྟོབས་པོ་ཆེ༔  ཐུགས་རྗེས་འདི་ལ༴  བརྩེ་བས་འདི་ཡི༴  དགོངས་པས་འདི་ལ༴  ནུས་པས་འདི་ཡི༴  ཕྱི་ཡི་བར་ཆད༴  ནང་གི་བར་ཆད༴  གསང་བའི་བར་ཆད༴  མོས་པའི་བུ་ལ་བྱིན་གྱིས་རློབས༔  ཨོཾ་ཨཱཿཧཱུྃ་བཛྲ་གུ་རུ་རྡོ་རྗེ་གྲོ་བོ་ལོད་ལོ་ཀ་སརྦ་སིདྡྷི་ཧཱུྃ༔  ཀཱ་ཡ༴  དམ་པ་ཆོས་ཀྱི་བསྟན་པ་ནི༔  རྒྱལ་མཚན་ལྟ་བུར་བཙུགས་པའི་ཚེ༔  བསམ་ཡས་མ་བཞེངས་ལྷུན་གྱིས་གྲུབ༔  རྒྱལ་པོའི་དགོངས་པ་མཐར་ཕྱིན་མཛད༔  སྐྱེས་མཆོག་གསུམ་གྱི་མཚན་ཡང་གསོལ༔  གཅིག་ནི་པདྨ་འབྱུང་གནས་ཞེས༔  གཅིག་ནི་པདྨ་སམྦྷ་ཝ༔  གཅིག་ནི་མཚོ་སྐྱེས་རྡོ་རྗེ་ཞེས༔  གསང་མཚན་རྡོ་རྗེ་དྲག་པོ་རྩལ༔  ཐུགས་རྗེས་འདི་ལ༴  བརྩེ་བས་འདི་ཡི༴  དགོངས་པས་འདི་ལ༴  ནུས་པས་འདི་ཡི༴  ཕྱི་ཡི་བར་ཆད༴  ནང་གི་བར་ཆད༴  གསང་བའི་བར་ཆད༴  མོས་པའི་བུ་ལ་བྱིན་གྱིས་རློབས༔  ཨོཾ་ཨཱཿཧཱུྃ་ཨརྩིག་ནིརྩིག་ན་མོ་བྷ་ག་ཝ་ཏེ་ཧཱུྃ་ཧཱུྃ་ཕཊ་ཨཱཿཧཱུྃ་ཧཱུྃ་ཕཊ༔  ཀཱ་ཡ༴  བསམ་ཡས་མཆིམས་ཕུར་སྒྲུབ་པ་མཛད༔  རྐྱེན་ངན་བཟློག་ཅིང་དངོས་གྲུབ་གནང་༔  རྗེ་བློན་ཐར་པའི་ལམ་ལ་བཀོད༔  གདོན་གཟུགས་བོན་གྱི་བསྟན་པ་བསྣུབས༔  ཆོས་སྐུ་དྲི་མེད་རིན་ཆེན་བསྟན༔  སྐལ་ལྡན་སངས་རྒྱས་ས་ལ་བཀོད༔  ཐུགས་རྗེས་འདི་ལ༴  བརྩེ་བས་འདི་ཡི༴  དགོངས་པས་འདི་ལ༴  ནུས་པས་འདི་ཡི༴  ཕྱི་ཡི་བར་ཆད༴  ནང་གི་བར་ཆད༴  གསང་བའི་བར་ཆད༴  མོས་པའི་བུ་ལ་བྱིན་གྱིས་རློབས༔  ཨོཾ་བཛྲ་ཀྲོ་དྷ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊ༔  ཀཱ་ཡ༴  དེ་ནས་ཨོ་རྒྱན་ཡུལ་དུ་བྱོན༔  ད་ལྟ་སྲིན་པོའི་ཁ་གནོན་མཛད༔  མི་ལས་ལྷག་གྱུར་ཡ་མཚན་མཆོག༔  སྤྱོད་པ་རྨད་བྱུང་ངོ་མཚར་ཆེ༔  མཐུ་དང་རྫུ་འཕྲུལ་སྟོབས་པོ་ཆེ༔  ཐུགས་རྗེས་འདི་ལ༴  བརྩེ་བས་འདི་ཡི༴  དགོངས་པས་འདི་ལ༴  ནུས་པས་འདི་ཡི༴  ཕྱི་ཡི་བར་ཆད༴  ནང་གི་བར་ཆད༴  གསང་བའི་བར་ཆད༴  མོས་པའི་བུ་ལ་བྱིན་གྱིས་རློབས༔  ཨོཾ་བཛྲ་སརྦ་དུཥྟན་ཧཱུྃ་ཕཊ༔  ཀཱ་ཡ༴  སྐུ་གསུང་ཐུགས་ལྡན་འགྲོ་བ་འདྲེན་པའི་དཔལ༔  སྒྲིབ་པ་ཀུན་སྤངས་ཁམས་གསུམ་ས་ལེར་མཁྱེན༔  དངོས་གྲུབ་མཆོག་བརྙེས་བདེ་ཆེན་མཆོག་གི་སྐུ༔  བྱང་ཆུབ་སྒྲུབ་པའི་བར་ཆད་ངེས་པར་སེལ༔  ཐུགས་རྗེས་འདི་ལ༴  བརྩེ་བས་འདི་ཡི༴  དགོངས་པས་འདི་ལ༴  ནུས་པས་འདི་ཡི༴  ཕྱི་ཡི་བར་ཆད༴  ནང་གི་བར་ཆད༴  གསང་བའི་བར་ཆད༴  མོས་པའི་བུ་ལ་བྱིན་གྱིས་རློབས༔  ཨོཾ་ཨཱཿཧཱུྃ་མ་ཧཱ་གུ་རུ་པདྨ་བཛྲ་དྷཱུ་མ་གྷ་ཡེ་ན་མཿསྭཱ་ཧཱ༔  ཀཱ་ཡ༴  དཀྱིལ་འཁོར་ཆེན་པོའི་ཤར་སྒོ་ནས༔  ཞེ་སྡང་ཡུལ་འཛིན་རྣམ་དག་པ༔  མེ་ལོང་ལྟ་བུའི་ཡེ་ཤེས་དང་༔  བྱམས་པ་ཚད་མེད་ངོ་བོ་ཉིད༔  ཞི་བའི་ལས་ཀུན་སྒྲུབ་མཛད་པའི༔  བཛྲ་གིང་ཆེན་ཡབ་དང་ཡུམ༔  རྡོ་རྗེ་རིགས་ཀྱི་དཔའ་བོ་དང་༔  མཁའ་འགྲོ་རྒྱ་མཚོའི་འཁོར་བཅས་ཀྱི༔  ཐུགས་རྗེས་འདི་ལ༴  བརྩེ་བས་འདི་ཡི༴  དགོངས་པས་འདི་ལ༴  ནུས་པས་འདི་ཡི༴  ཕྱི་ཡི་བར་ཆད༴  ནང་གི་བར་ཆད༴  གསང་བའི་བར་ཆད༴  མོས་པའི་བུ་ལ་བྱིན་གྱིས་རློབས༔  ཧ་བཛྲ་དྷཱ་ཀི་ནཱི་ར་བཛྲ་གིངྐ་ར་ཀཱ་ཡ་ཨ་བྷི་ཥིཉྩ་ཨོཾ༔  དཀྱིལ་འཁོར་ཆེན་པོའི་ལྷོ་སྒོ་ནས༔  སེར་སྣའི་ཡུལ་འཛིན་རྣམ་དག་པ༔  མཉམ་པ་ཉིད་ཀྱི་ཡེ་ཤེས་དང་༔  སྙིང་རྗེ་ཚད་མེད་ངོ་བོ་ཉིད༔  རྒྱས་པའི་ལས་ཀུན་སྒྲུབ་མཛད་པའི༔  རཏྣ་གིང་ཆེན་ཡབ་ཡུམ་དང་༔  རིན་ཆེན་རིགས་ཀྱི་དཔའ་བོ་དང་༔  མཁའ་འགྲོ་རྒྱ་མཚོའི་འཁོར་བཅས་ཀྱི༔  ཐུགས་རྗེས་འདི་ལ༴  བརྩེ་བས་འདི་ཡི༴  དགོངས་པས་འདི་ལ༴  ནུས་པས་འདི་ཡི༴  ཕྱི་ཡི་བར་ཆད༴  ནང་གི་བར་ཆད༴  གསང་བའི་བར་ཆད༴  མོས་པའི་བུ་ལ་བྱིན་གྱིས་རློབས༔  རི་རཏྣ་དྷཱ་ཀི་ནཱི་ཙ་རཏྣ་གིངྐ་ར་ཀཱ་ཡ་ཨ་བྷི་ཥིཉྩ་ཨོཾ༔  དཀྱིལ་འཁོར་ཆེན་པོའི་ནུབ་སྒོ་ནས༔  འདོད་ཆགས་ཡུལ་འཛིན་རྣམ་དག་པ༔  སོ་སོར་རྟོག་པའི་ཡེ་ཤེས་དང་༔  དགའ་བ་ཚད་མེད་ངོ་བོ་ཉིད༔  དབང་གི་ལས་ཀུན་སྒྲུབ་མཛད་པའི༔  པདྨ་གིང་ཆེན་ཡབ་དང་ཡུམ༔  པདྨ་རིགས་ཀྱི་དཔའ་བོ་དང་༔  མཁའ་འགྲོ་རྒྱ་མཚོའི་འཁོར་བཅས་ཀྱི༔  ཐུགས་རྗེས་འདི་ལ༴  བརྩེ་བས་འདི་ཡི༴  དགོངས་པས་འདི་ལ༴  ནུས་པས་འདི་ཡི༴  ཕྱི་ཡི་བར་ཆད༴  ནང་གི་བར་ཆད༴  གསང་བའི་བར་ཆད༴  མོས་པའི་བུ་ལ་བྱིན་གྱིས་རློབས༔  ནི་པདྨ་དྷཱ་ཀི་ནཱི་ཧྲཱིཿཔདྨ་གིངྐ་ར་ཀཱ་ཡ་ཨ་བྷི་ཥིཉྩ་ཨོཾ༔  དཀྱིལ་འཁོར་ཆེན་པོའི་བྱང་སྒོ་ནས༔  ཕྲག་དོག་ཡུལ་འཛིན་རྣམ་དག་པ༔  བྱ་བ་གྲུབ་པའི་ཡེ་ཤེས་དང་༔  བཏང་སྙོམས་ཚད་མེད་ངོ་བོ་ཉིད༔  དྲག་པོའི་ལས་ཀུན་སྒྲུབ་མཛད་པའི༔  ཀརྨ་གིང་ཆེན་ཡབ་དང་ཡུམ༔  ལས་ཀྱི་རིགས་ཀྱི་དཔའ་བོ་དང་༔  མཁའ་འགྲོ་རྒྱ་མཚོའི་འཁོར་བཅས་ཀྱི༔  ཐུགས་རྗེས་འདི་ལ༴  བརྩེ་བས་འདི་ཡི༴  དགོངས་པས་འདི་ལ༴  ནུས་པས་འདི་ཡི༴  ཕྱི་ཡི་བར་ཆད༴  ནང་གི་བར་ཆད༴  གསང་བའི་བར་ཆད༴  མོས་པའི་བུ་ལ་བྱིན་གྱིས་རློབས༔  ས་ཀརྨ་དྷཱ་ཀི་ནཱི་ཡ་ཀརྨ་གིངྐ་ར་ཀཱ་ཡ་ཨ་བྷི་ཥིཉྩ་ཨོཾ༔  དེང་ཕྱིན་ཆད་འདི་ལྟར་སྣང་བའི་ཆོས་ཐམས་ཅད་བླ་མ་རིག་འཛིན་སྒྱུ་འཕྲུལ་དྲྭ་བ་ཆེན་པོའི་སྐུ་རྡོ་རྗེ་སྣང་སྟོང་ལྷའི་འཁོར་ལོར་རྣམ་པར་དག་པ་ཡིན་ནོ།  །ཞེས་རྟོགས་པ་བསྐྱེད།  གསུང་བཟླས་པ་སྔགས་ཀྱི་ལུང་སྦྱིན་པའི་སླད་དུ་སློབ་དཔོན་དང་དཀྱིལ་འཁོར་པ་རྣམས་ཀྱི་ཐུགས་ཀའི་ས་བོན་སྔགས་ཕྲེང་དང་བཅས་པ་ལས་སྔགས་ཕྲེང་གཉིས་པ་བྱུང༌།  ཞལ་ནས་ཐོན།  ཁྱེད་རང་རྣམས་ཀྱི་ཞལ་དུ་ཞུགས།  ཐུགས་ཀའི་ས་བོན་ཧྲཱིཿཡིག་གི་མཐར་འཁོད་པས་གསུང་བཟླས་པ་སྔགས་ཀྱི་བྱིན་རླབས་མ་ལུས་པ་རྒྱུད་ལ་ཞུགས་པའི་མོས་པ་དང་བཅས་ཏེ་སྔགས་འདི་རྣམས་ཀྱི་རྗེས་ཟློས་ལན་གསུམ་རེ་མཛོད།  ཨོཾ་ཨ་མཱ་ར་ཎི་ཛཱི་བནྟི་ཡེ་སྭཱ་ཧཱ༔  ལན་གསུམ།  ཨོཾ་མ་ཎི་པདྨེ་ཧཱུྃ་ཧྲཱི༔  ལན་གསུམ།  ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔  ལན་གསུམ།  ཨོཾ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛཿསིདྡྷི་ཕ་ལ་ཧཱུྃ་ཨཱཿ  ལན་གསུམ།  ཧ་རི་ནི་ས་ར་ཙ་ཧྲི་ཡ་ཙིཏྟ་ཧྲཱིཾ་ཧྲཱིཾ་ཛཿ  སརྦ་སིདྡྷི་ཕ་ལ་ཧཱུྃ༔  ལན་གསུམ།  དེ་བརྟན་པར་བྱ་བའི་སླད་དུ་སྔགས་ཀྱི་ཕྲེང་བ་མགྲིན་པར་བཞག་སྟེ་དབང་བསྐུར་བའི་མོས་པ་མཛོད།  ཨཱཿ  ཇི་སྙེད་བརྗོད་པ་ཀུན་གྱི་རྒྱུར་གྱུར་པའི༔  ངག་ལ་རྡོ་རྗེའི་སྔགས་ཀྱི་དབང་བསྐུར་བས༔  བརྟན་དང་གཡོ་བའི་སྒྲ་སྐད་ཐམས་ཅད་ཀུན༔  གྲགས་སྟོང་རྒྱལ་བའི་གསུང་དུ་རྟོགས་པར་ཤོག༔  ཨོཾ་སརྦ་ཏ་ཐཱ་ག་ཏ་ཝཱ་ཀ་ཨ་བྷི་ཥིཉྩ་ཨཱཿ  ཅེས་སྔགས་ཕྲེང་མགྲིན་པར་བཞག  །དེང་ཕྱིན་ཆད་བརྟན་གཡོའི་སྒྲ་སྐད་ཐམས་ཅད་གྲགས་སྟོང་གཞོམ་མེད་གསུང་རྡོ་རྗེའི་ངོ་བོར་རྣམ་པར་དག་པ་ཡིན་ནོ༔  ཞེས་རྟོགས་པ་བསྐྱེད།  ཐུགས་འོད་གསལ་དེ་ཁོ་ན་ཉིད་ཀྱི་དགོངས་པ་ངོ་སྤྲད་པའི་སླད་དུ།  ལྷ་སྔགས་ཀྱིས་མཚོན་པའི་སྤྲོས་པ་ཐམས་ཅད་རང་རིག་སྐད་ཅིག་མའི་རང་རྩལ་དུ་ངོ་ཤེས་པར་བྱས་ནས།  སེམས་ཀྱི་གཤིས་སྟོང་ཉིད་དུ་རྗེན་ནེ།  གདངས་རིག་རྩལ་དུ་ལམ་མེ།  དེ་གཉིས་དབྱེར་མེད་པར་ཉམས་སུ་མྱོང་བཞིན་ཏུ་བརྗོད་པའི་མཐའ་ཐམས་ཅད་ལས་འདས་པའི་བདེན་གཉིས་ཟུང་འཇུག་ལྷག་པའི་ཆོས་སྐུ་ཆེན་པོའི་དབྱིངས་སུ་འཛིན་མེད་དུ་མཉམ་པར་འཇོག་མཛོད།  ཅེས་གདམས་ལ་དཔོན་སློབ་གཉིས་ཀས་ཅུང་ཟད་མཉམ་པར་བཞག  །དེ་མཚོན་པར་བྱ་བའི་ཕྱིར་མེ་ལོང་དྭངས་པ་བསྟན་ཏེ་ཚིག་གི་སྒོ་ནས་ངོ་སྤྲད་པ་ནི།  ཧཱུྃ༔  མེ་ལོང་ནང་དུ་གཟུགས་བརྙན་ཤར་བ་བཞིན༔  དམིགས་སུ་མེད་ཀྱང་མངོན་སུམ་ས་ལེ་བ༔  ཡིད་ལ་རྒྱལ་བའི་ཐུགས་ཀྱི་དབང་བསྐུར་བས༔  དྲན་རྟོག་ཐམས་ཅད་རང་ཤར་རང་གྲོལ་ཤོག༔  ཨོཾ་སརྦ་ཏ་ཐཱ་ག་ཏ་ཙིཏྟ་ཨ་བྷི་ཥིཉྩ་ཧཱུྃ༔  དེང་ཕྱིན་ཆད་ཁམས་གསུམ་གྱི་རྣམ་པར་རྟོག་པའི་འཇུག་ལྡང་ཐམས་ཅད་རིག་སྟོང་དབྱེར་མེད་བསམ་གྱིས་མི་ཁྱབ་པ་ཐུགས་རྡོ་རྗེའི་ངོ་བོར་རྣམ་པར་དག་པ་ཡིན་ནོ།  ཞེས་རྟོགས་པ་བསྐྱེད།  དེ་ལྟར་ན་དེ་རྣམས་ཀྱི་སྒོ་ནས་བླ་མ་རིག་འཛིན་སྒྱུ་འཕྲུལ་དྲྭ་བའི་ལྷ་ཚོགས་རྣམས་ཀྱི་གསང་བ་གསུམ་གྱི་བྱིན་རླབས་རྒྱུད་ལ་ཞུགས།  ཁྱེད་རང་རྣམས་ཀྱི་ལུས་ངག་ཡིད་གསུམ་གྱྀ་འགལ་རྐྱེན་སྡིག་སྒྲིབ་ཕྱི་ནང་གསང་བའི་བར་དུ་གཅོད་པ་ཐམས་ཅད་ཉེ་བར་ཞི་བ་དང༌།  གནས་སྐབས་ལྷ་སྔགས་ཆོས་སྐུའི་རྣལ་འབྱོར་ཟབ་མོ་བསྒོམ་པ་ལ་དབང་ཞིང༌།  མཐར་ཐུག་རྡོ་རྗེ་གསུམ་གྱི་གོ་འཕང་མངོན་དུ་བྱེད་པའི་སྐལ་བ་དང་ལྡན་པར་བྱས་པ་ཡིན་ནོ།  །དེས་རྣམ་པ་ཉི་ཤུས་བྱང་ཆུབ་པའི་བསྙེན་སྒྲུབ་རྣམ་གསུམ་གྱི་རྩ་བའི་དབང་བསྐུར་བ་གྲུབ་ནས།  སླར་ཡང་དོན་དབང་མདོར་བསྡུས་པ་གཏོར་མ་ལ་བརྟེན་ནས་དབང་བསྐུར་བ་ལ།  སྤྱིར་གཏོར་མ་བསྙེན་སྒྲུབ་ཀྱི་དུས་སུ་དཀྱིལ་འཁོར་དུ་ཤེས་པ།  མཆོད་པའི་དུས་སུ་འདོད་ཡོན་ཏུ་ཤེས་པ།  དབང་གི་དུས་སུ་ལྷར་ཤེས་པ།  རྗེས་དངོས་གྲུབ་ཏུ་ཤེས་པ་རྣམས་སུ་ཡོད་པ་ལས།  འདིར་དབང་དུས་ལྷར་ཤེས་པ་བྱ་བ་ཡིན་པས་དམིགས་པ་འདི་བཞིན་ཏུ་མཛོད།  གཏོར་མ་རིན་ཆེན་འབར་བ་འདི་ཉིད་ཕྱི་ལྟར་རིན་པོ་ཆེ་འབར་བའི་གཞལ་མེད་ཁང་ཡངས་ཤིང་རྒྱ་ཆེ་བ་ཚད་དང་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ་ནང་ལྟར་བླ་མ་སྐུ་གསུམ་ཐོ་བརྩེགས་སུ་བཞུགས་ཤིང༌།  རྩ་བ་གསུམ་གྱི་ལྷ་ཚོགས་སྤྲིན་ལྟར་གཏིབས་པ།  ཆོས་སྐྱོང་སྲུང་མ་རྣམས་ཀྱིས་ལས་མཛད་པའི་རིག་འཛིན་སྒྱུ་འཕྲུལ་དྲྭ་བ་ཆེན་པོའི་རྟེན་དང་བརྟེན་པའི་དཀྱིལ་འཁོར་ཡོངས་རྫོགས་སུ་ཤར་བ་ཁྱེད་རང་རྣམས་ཀྱི་སྤྱི་བོར་སྤྱན་དྲངས་ཤིང་བྱིན་གྱིས་བརླབས་པ་ལ་བརྟེན་ནས།  གཙོ་འཁོར་ཐམས་ཅད་ཀྱི་གནས་བཞིར་ཨོཾ་ཨཱཿཧཱུྃ་དང་ཧྲཱིཿཡིག་གིས་མཚན་པ་ལས་འོད་ཟེར་དཀར་དམར་མཐིང་ག་སྣ་ཚོགས་པའི་མདོག་ཅན་དཔག་ཏུ་མེད་པ་བྱུང༌།  ཁྱེད་རང་རྣམས་ཀྱི་གནས་བཞིར་ཐིམ་པ་ལ་བརྟེན་ནས་ཕྱི་ནང་གསང་བ་དེ་ཁོ་ན་ཉིད་ཀྱི་དབང་བཞི་སྟན་ཐོག་གཅིག་ཏུ་ཐོབ།  ལུས་ངག་ཡིད་གསུམ་ཆ་མཉམ་གྱྀ་སྒོ་ནས་བསགས་པའི་འགལ་རྐྱེན་སྡིག་སྒྲིབ་བར་དུ་གཅོད་པ་ཐམས་ཅད་ཉེ་བར་ཞི་ཞིང༌།  གནས་སྐབས་སུ་དབང་བཞིའི་ལམ་བསྒོམ་པ་དང༌།  མཐར་ཐུག་སྐུ་བཞིའི་གོ་འཕང་ཐོབ་པའི་སྐལ་བ་ཅན་དུ་བྱས་པའི་མོས་པ་དུང་དུང་མཛོད་ཅིག  །ཅེས་བརྡ་སྦྱར་ལ་གདངས་ཀྱི་འགྱུར་བ་སྙན་པོས་ཐུགས་དམ་བསྐུལ་བའི་ཕྱྀར།  ཧཱུྃ༔  རྒྱལ་བའི་རྣམ་འཕྲུལ་པདྨ་འབྱུང་གནས་ཀྱིས༔  བོད་འབངས་རྣམས་ལ་ཐུགས་རྗེས་བརྩེར་དགོངས་ཏེ༔  སྐུ་ཚབ་ལུང་བསྟན་གསུང་ཚབ་གཏེར་དུ་སྦས༔  ཐུགས་ཀྱི་དགོངས་པ་ལས་ཅན་བུ་ལ་གཏད༔  སྡུག་བསྔལ་སྐྱོབ་ཕྱིར་གུ་རུའི་དབང་བསྐུར་ན༔  སྐལ་ལྡན་རྣམས་ལ་བྱིན་གྱིས་བརླབ་ཏུ་གསོལ༔  གུ་རུའི་ཐུགས་རྗེས་འདི་ལ་བྱིན་གྱིས་རློབས༔  གུ་རུའི་བརྩེ་བས་འདི་ཡི་ལམ་སྣ་དྲོངས༔  གུ་རུའི་དགོངས་པས་འདི་ལ་དངོས་གྲུབ་སྩོལ༔  གུ་རུའི་ནུས་པས་འདི་ཡི་བར་ཆད་སོལ༔  འབྱུང་བཞི་ཕྱི་ཡི་བར་ཆད་ཕྱི་རུ་སོལ༔  རྩ་རླུང་ནང་གི་བར་ཆད་ནང་དུ་སོལ༔  གཟུང་འཛིན་གསང་བའི་བར་ཆད་དབྱིངས་སུ་སོལ༔  སྐལ་ལྡན་སློབ་མ་རྣམས་ལ་བསྐྱབ་ཏུ་གསོལ༔  བྱིན་རླབས་དབང་དང་དངོས་གྲུབ་དེང་འདིར་སྩོལ༔  ཨོཾ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛཿསིདྡྷི་ཕ་ལ་ཧཱུྃ་ཨཱཿ  ཀཱ་ཡ་ཝཱ་ཀ་ཙིཏྟ་སརྦ་སིདྡྷི་ཨ་བྷི་ཥིཉྩ་ཨོཾ་ཨཱཿཧཱུྃ་ཧྲཱི༔  ཞེས་བརྗོད་ཅིང་གཏོར་མ་གནས་གསུམ་དུ་བཞག  །རྗེས་དངོས་གྲུབ་ཏུ་ཤེས་པའི་ཕྱིར།  གཏོར་མའི་ལྷ་འོད་དུ་ཞུ་བའི་གཏོར་ཟན་དངོས་གྲུབ་ཀྱི་རང་བཞིན་བདུད་རྩིའི་དྭངས་བཅུད་དུ་འཁྱིལ་བ་མྱོང་བས་རྩ་ཁམས་ཐམས་ཅད་ལ་ཁྱབ།  ཟག་མེད་ཀྱི་བདེ་བས་རྒྱུད་གང༌།  མཆོག་དང་ཐུན་མོང་གི་དངོས་གྲུབ་མ་ལུས་པ་ཐོབ་པའི་མོས་པ་མཛོད།  ཅེས་བརྡ་སྤྲད་ལ།  གཏོར་ཟན་དངོས་སམ།  མཐའ་བསྐོར་གྱི་ཐེབ་ཀྱུ་ལྟ་བུ་བདུད་རྩི་དང་སྦྱར་ནས་སྦྱིན།  མཐའ་རྟེན་འགྲོ་འདུལ་ཚེའི་དབང་བསྐུར་བའི་སླད་དུ་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད།  འགྲོ་བའི་མགོན་པོ་པདྨ་ཚེ་དཔག་མེད༔  དུས་གསུམ་སངས་རྒྱས་ཚེ་བདག་ཡབ་ཡུམ་ལ༔  གསོལ་བ་འའདེབས་སོ་ཚེ་ཡི་བར་ཆད་སོལ༔  འཆི་མེད་རྡོ་རྗེའི་ཚེ་དབང་སྩལ་དུ་གསོལ༔  ཅེས་གསོལ་བ་བཏབ་ནས་ཚེ་འགུགས་ཤིང་བཅུད་བསྡུ་བའི་སླད་དུ།  ཁྱེད་རང་རྣམས་ཀྱི་སྙིང་གར་སྣ་ཚོགས་རྡོ་རྗེའི་ལྟེ་བར་ཉི་ཟླའི་གའུ་ཁ་སྦྱོར་གྱི་དབུས་སུ་ཚེ་རྟེན་ཧཱུྃ་གི་ཁོག་པར་ནྲྀ་ཡིག་ཨས་མཚན་པ་གསལ་བཏབ་ནས།  སློབ་དཔོན་ལ་གུས་འདུད་མཛད་པས་སློབ་དཔོན་གྱི་ཐུགས་ཀ་ནས་འོད་ཟེར་འཕྲོས།  དཀྱིལ་འཁོར་པ་རྣམས་ཀྱི་ཐུགས་རྒྱུད་བསྐུལ།  དེ་རྣམས་ཀྱི་གནས་ལྔར་རིགས་ལྔ་ཚེ་དཔག་མེད་ཡབ་ཡུམ་གསལ་བའི་ཐུགས་ཀ་ནས་འོད་ཟེར་དམར་པོ་ལྕགས་ཀྱུ་ལྟ་བུ་དང༌།  ལྷ་མོ་མགྱོགས་མའི་ཚོགས་ཉི་ཟེར་གྱི་རྡུལ་ལྟར་སྤྲོས་པས་ཁྱེད་རང་རྣམས་ཀྱི་སྔ་ཚེ་ཆད་ཉམས་ཡར་བ་ཐམས་ཅད་དང༌།  འཁོར་འདས་སྣོད་བཅུད་ཀྱི་ཚེ་བསོད་དཔལ་འབྱོར་ཡེ་ཤེས་ཡོན་ཏན་གྱི་དྭངས་བཅུད་མ་ལུས་པ་བསྡུས་ཏེ་ཁྱེད་རང་རྣམས་ལ་སིབ་སིབ་ཐིམ་པས་འཆི་མེད་ཚེའི་དངོས་གྲུབ་ཐོབ།  མདུན་གྱི་ཚེ་རྫས་རྣམས་ལ་ཐིམ་པས་འཆི་མེད་བདུད་རྩིའི་བཅུད་ལེན་ཏུ་གྱུར་པའི་མོས་པ་མཛོད།  ཅེས་བརྡ་སྤྲད་ལ་མདའ་དར་གཡབ་ཅིང༌།  ཧཱུྃ་ཧྲཱི༔  རྣམ་སྣང་ཡབ་ཡུམ་ཐུག་དམ་དབྱིངས་ནས་བསྐུལ༔  ཕོ་ཉ་མགྱོགས་མའི་ཚོགས་རྣམས་མཐུ་རྩལ་སྐྱེད༔  སངས་རྒྱས་བྱང་སེམས་དྲང་སྲོང་རིག་པ་འཛིན༔  འཇིག་རྟེན་བསོད་ནམས་ཅན་གྱི་ཚེ་དཔལ་དང་༔  སྟེང་འོག་མཚམས་ཀྱི་འབྱུང་པོས་འཕྲོག་པའི་ཚེ༔  ནམ་མཁའི་བཅུད་དང་བུདྡྷའི་ཚེ་མཆོག་ཀུན༔  བཀྲ་ཤིས་ཚེ་ཡི་བུམ་པའི་ནང་དུ་བསྐྱིལ༔  བདག་ཅག་ཚེ་སྲོག་བརྟན་པའི་ལས་མཛོད་ཅིག༔  འགྱུར་མེད་བདེ་གཤེགས་ཚེ་ཡི་དངོས་གྲུབ་སྩོལ༔  ཨོཾ་ཨ་མཱ་ར་ཎི་ཛཱི་བནྟི་ཡེ་སྭཱ་ཧཱ༔  ཨོཾ་བུདྡྷ་ཨཱ་ཡུརྫྙཱ་ན་ཚེ་བྷྲཱུྃ་ཨོཾ༔  ཧཱུྃ་ཧྲཱི༔  སྣང་མཐའ་ཡབ་ཡུམ་ཐུགས་དམ་དབྱིངས་ནས་སྐུལ༔  ཕོ་ཉ་མགྱོགས་མའི་ཚོགས་རྣམས་མཐུ་རྩལ་སྐྱེད༔  སངས་རྒྱས་བྱང་སེམས་དྲང་སྲོང་རིག་པ་འཛིན༔  འཇིག་རྟེན་བསོད་ནམས་ཅན་གྱི་ཚེ་དཔལ་དང་༔  ནུབ་ཕྱོགས་ཀླུ་དབང་ལག་ནས་བླ་ཚེ་ཁུག༔  མེ་ཡི་བཅུད་དང་པདྨའི་ཚེ་མཆོག་ཀུན༔  བཀྲ་ཤིས་ཚེ་ཡི་བུམ་པའི་ནང་དུ་བསྐྱིལ༔  བདག་ཅག་ཚེ་སྲོག་བརྟན་པའི་ལས་མཛོད་ཅིག༔  འགགས་མེད་པདྨ་ཚེ་ཡི་དངོས་གྲུབ་སྩོལ༔  ཨོཾ་ཨ་མཱ་ར་ཎི་ཛཱི་བནྟི་ཡེ་སྭཱ་ཧཱ༔  ཨོཾ་པདྨ་ཨཱ་ཡུརྫྙཱ་ན་ཚེ་བྷྲཱུྃ་ཧྲཱིཿ  ཧཱུྃ་ཧྲཱི༔  མི་བསྐྱོད་ཡབ་ཡུམ་ཐུགས་དམ་དབྱིངས་ནས་སྐུལ༔  ཕོ་ཉ་མགྱོགས་མའི་ཚོགས་རྣམས་མཐུ་རྩལ་སྐྱེད༔  སངས་རྒྱས་བྱང་སེམས་དྲང་སྲོང་རིག་པ་འཛིན༔  འཇིག་རྟེན་བསོད་ནམས་ཅན་གྱི་ཚེ་དཔལ་དང་༔  ཤར་ཕྱོགས་དྲི་ཟའི་ལག་ནས་བླ་ཚེ་ཁུག༔  ཆུ་ཡི་བཅུད་དང་རྡོ་རྗེའི་ཚེ་མཆོག་ཀུན༔  བཀྲ་ཤིས་ཚེ་ཡི་བུམ་པའི་ནང་དུ་བསྐྱིལ༔  བདག་ཅག་ཚེ་སྲོག་བརྟན་པའི་ལས་མཛོད་ཅིག༔  འཕོ་མེད་རྡོ་རྗེ་ཚེ་ཡི་དངོས་གྲུབ་སྩོལ༔  ཨོཾ་ཨ་མཱ་ར་ཎི་ཛཱི་བནྟི་ཡེ་སྭཱ་ཧཱ༔  ཨོཾ་བཛྲ་ཨཱ་ཡུརྫྙཱ་ན་ཚེ་བྷྲཱུྃ་ཧཱུྃ༔  ཧཱུྃ་ཧྲཱི༔  རིན་འབྱུང་ཡབ་ཡུམ་ཐུགས་དམ་དབྱིངས་ནས་སྐུལ༔  ཕོ་ཉ་མགྱོགས་མའི་ཚོགས་རྣམས་མཐུ་རྩལ་སྐྱེད༔  སངས་རྒྱས་བྱང་སེམས་དྲང་སྲོང་རིག་པ་འཛིན༔  འཇིག་རྟེན་བསོད་ནམས་ཅན་གྱི་ཚེ་དཔལ་དང་༔  ལྷོ་ཕྱོགས་གཤིན་རྗེའི་ལག་ནས་བླ་ཚེ་ཁུག༔  ས་ཡི་བཅུད་དང་རཏྣའི་ཚེ་མཆོག་ཀུན༔  བཀྲ་ཤིས་ཚེ་ཡི་བུམ་པའི་ནང་དུ་བསྐྱིལ༔  བདག་ཅག་ཚེ་སྲོག་བརྟན་པའི་ལས་མཛོད་ཅིག༔  རྩོལ་མེད་རིན་ཆེན་ཚེ་ཡི་དངོས་གྲུབ་སྩོལ༔   ཨོཾ་ཨ་མཱ་ར་ཎི་ཛཱི་བནྟི་ཡེ་སྭཱ་ཧཱ༔  ཨོཾ་རཏྣ་ཨཱ་ཡུརྫྙཱ་ན་ཚེ་བྷྲཱུྃ་ཏྲཱྃ༔  ཧཱུྃ་ཧྲཱི༔  དོན་གྲུབ་ཡབ་ཡུམ་ཐུགས་དམ་དབྱིངས་ནས་སྐུལ༔  ཕོ་ཉ་མགྱོགས་མའི་ཚོགས་རྣམས་མཐུ་རྩལ་སྐྱེད༔  སངས་རྒྱས་བྱང་སེམས་དྲང་སྲོང་རིག་པ་འཛིན༔  འཇིག་རྟེན་བསོད་ནམས་ཅན་གྱི་ཚེ་དཔལ་དང་༔  བྱང་ཕྱོགས་གནོད་སྦྱིན་ལག་ནས་བླ་ཚེ་ཁུག༔  རླུང་གི་བཅུད་དང་ལས་ཀྱི་ཚེ་མཆོག་ཀུན༔  བཀྲ་ཤིས་ཚེ་ཡི་བུམ་པའི་ནང་དུ་བསྐྱིལ༔  བདག་ཅག་ཚེ་སྲོག་བརྟན་པའི་ལས་མཛོད་ཅིག༔  ཐོགས་མེད་ཕྲིན་ལས་ཚེ་ཡི་དངོས་གྲུབ་སྩོལ༔   ཨོཾ་ཨ་མཱ་ར་ཎི་ཛཱི་བནྟི་ཡེ་སྭཱ་ཧཱ༔  ཨོཾ་ཀརྨ་ཨཱ་ཡུརྫྙཱ་ན་ཚེ་བྷྲཱུྃ་ཨཱཿ  དེ་ལྟར་བཅུད་བསྡུས་ནས་དངོས་གཞིའི་དབང་བསྐུར་བ་ལ།  ཚེའི་འབྲང་རྒྱས་འདི་ཉིད་རྩ་གསུམ་ཚེའི་ལྷ་ཚོགས་རྣམས་མགོན་པོ་ཚེ་དཔག་ཏུ་མེད་པའི་རྣམ་པས་ཐོ་བརྩེགས་སུ་བཞུགས་པར་གསལ་བའི་ཐུགས་ཀ་ནས་འོད་ཟེར་འཕྲོས།  ཁྱེད་རང་རྣམས་ཀྱི་བླ་ཚེ་ཆད་ཉམས་ཡར་བ་དང༌།  འཁོར་འདས་ཀྱི་ཚེ་བཅུད་དྭངས་མ་ཐམས་ཅད་བསྡུས་ཏེ་ཕྱག་གི་བུམ་པའི་ནང་དུ་ཞུགས།  ཁོལ་ཞིང་ལུད་པའི་འཆི་མེད་ཚེའི་བདུད་རྩི་འོད་ཟེར་དང་བཅས་པ་སྤྱི་བོ་ནས་ཞུགས།  ལུས་ཀྱི་ནང་གང༌།  དུས་མ་ཡིན་པར་འཆི་བའི་འཇིགས་པ་བག་ཆགས་དང་བཅས་པ་བྱང་ཞིང་དག  །འཆི་མེད་ཚེ་དང་ཡེ་ཤེས་ཀྱི་དངོས་གྲུབ་མ་ལུས་པ་ཐོབ་པའི་མོས་པ་མཛོད།  ཚེ་བུམ་སྤྱི་བོར་བཞག་ལ།  ཧྲཱིཿཧྲཱིཿཧྲཱིཿ  སྐྱེ་འཆི་གཉིས་སྤངས་མགོན་པོ་ཚེ་དཔག་མེད༔  སྐུ་ལྔའི་ཚེ་ཡི་བདག་པོ་ཡབ་ཡུམ་དང་༔  ཡེ་ཤེས་དབྱིངས་ཀྱི་ལྷ་མོ་ཙཎྜ་ལཱི༔  འཆི་མེད་སྐུ་བརྙེས་རིག་འཛིན་པདྨ་འབྱུང་༔  མི་འགྱུར་ཚེ་ལ་མངའ་བརྙེས་བི་མ་ལ༔  ཚེ་ལམ་གྲུབ་པའི་ཕྱག་རྒྱ་མནྡཱ་ར༔  འདི་ནས་ཚིག་རྐང་གསུམ་སྤྲུལ་པའི་གཏེར་སྟོན་ཆེན་པོའི་གསུང༌།་་་་་བདེ་ཆེན་ཚེ་ལ་དབང་ཐོབ་མཚོ་རྒྱལ་ཡུམ༔  ཚེ་ཡི་བཀའ་བབ་ལྷ་སྲས་རོལ་པ་རྩལ༔  སྐྱབས་གསུམ་ཀུན་འདུས་རྩ་བའི་བླ་མ་སོགས༔  རིག་འཛིན་ཚེ་ཡི་རྩ་བརྒྱུད་བླ་མ་རྣམས༔  མི་མངོན་དབྱིངས་ནས་གནས་འདིར་བརྩེར་དགོངས་ལ༔  འཆི་མེད་ཚེ་དང་ཡེ་ཤེས་དངོས་གྲུབ་སྩོལ༔  ཨོཾ་ཨ་མཱ་ར་ཎི་ཛཱི་བནྟི་ཡེ་སྭཱ་ཧཱ༔  བཛྲ་ཛྙཱ་ན་ཨཱ་ཡུ་ཥེ་ཧཱུྃ་བྷྲཱུྃ་ནྲྀ་ཛ་སརྦ་སིདྡྷི་ཕ་ལ་ཧཱུྃ༔  ཕྱག་གཡས་སུ་ཐབས་ཀྱི་རྫས་ཚེའི་རིལ་བུ་བྱིན་པས་ཐབས་བདེ་བ་ཆེན་པོ་མཆོག་ཏུ་མི་འགྱུར་བ་རྡོ་རྗེའི་དངོས་གྲུབ་ཐོབ་པའི་མོས་པ་མཛོད།  ཧྲཱིཿ  མི་འགྱུར་སྙིང་པོའི་བཅུད་རྣམས་བསྡུས་པ་ཡི༔  འཆི་མེད་ཡེ་ཤེས་ཚེ་ཡི་ལོངས་སྤྱོད་འདིས༔  ཡིད་ལ་ཟག་མེད་བདེ་བ་རབ་འཕེལ་ནས༔  རྟག་ཏུ་ཚེ་ཡི་དཔལ་ལ་ལོངས་སྤྱོད་ཤོག༔  ཨོཾ་བཛྲ་ཛྙཱ་ན་ཨཱ་ཡུ་ཥེ་ཧཱུྃ་བྷྲཱུྂ་ནྲྀ་ཛ་སརྦ་སིདྡྷི་ཕ་ལ་ཧཱུྃ༔  ཕྱག་གཡོན་ཏུ་ཤེས་རབ་ཀྱི་རྫས་ཚེའི་བདུད་རྩི་བྱིན་པས་ཤེས་རབ་སྟོང་པ་ཉིད་མཆོག་ཏུ་མི་འགྱུར་བ་རྡོ་རྗེ་ཚེ་ཡི་དངོས་གྲུབ་ཐོབ་པའི་མོས་པ་མཛོད།  ཧྲཱིཿ  སྔོན་བྱོན་འཆི་མེད་རིག་འཛིན་ཐམས་ཅད་ཀྱང་༔  ཚེ་ཆང་བདུད་རྩིའི་བཅུད་ཀྱིས་དངོས་གྲུབ་བརྙེས༔  དེང་འདིར་སྐལ་ལྡན་ཁྱོད་ལ་སྦྱིན་པ་ཡིས༔  རྒྱུན་མི་འཆད་པའི་ཚེ་ཡི་དབང་ཐོབ་ཤོག༔  ཨོཾ་བཛྲ་ཛྙཱ་ན་ཨཱ་ཡུཿཥེ་ཧཱུྃ་བྷྲཱུྃ་ནྲྀ་ཛཿསརྦ་སིདྡྷི་ཕ་ལ་ཧཱུྃ༔  དེ་ལྟར་དབང་བསྐུར་བས་འཆི་མེད་ཚེའི་བདུད་རྩིས་ལུས་ཀྱི་ནང་ཐམས་ཅད་གང་༔  དྭངས་བཅུད་ཐམས་ཅད་སྙིང་གའི་ནྲྀ་ཡིག་ལ་སིབ་སིབ་ཐིམ་པས་འོད་ཟེར་ཁ་དོག་ལྔ་ལྡན་དུ་འབར་བས་ཉི་ཟླའི་གའུ་སྲུབ་མེད་པར་གྱུར་པའི་ཕྱི་རོལ་ཏུ་སྣ་ཚོགས་རྡོ་རྗེའི་རྭ་རྣམས་སྟེང་དུ་མདུད་པ་ལ་གཟུངས་སྔགས་དམར་པོའི་ཐག་པས་ལན་གསུམ་དུ་བསྡོམས་པས་རྡོ་རྗེའི་སྲོག་ལ་དབང་འབྱོར་ཞིང༌།  རྡོ་རྗེའི་རྭ་རྩེར་ཧྲཱིཿདམར་པོ་ལས་སྐྱེས་པའི་དབང་ཆེན་རྟ་མགྲིན་གྲི་ཐོད་འཛིན་པས་ཚེའི་གེགས་དང་བར་དུ་གཅོད་པ་ཐམས་ཅད་སྲུང་བར་གྱུར་པའི་མོས་པ་དང་བཅས་ཆོས་ཉིད་གཉུག་མའི་ངང་དུ་མཉམ་པར་འཇོག་མཛོད༔  ཧཱུྃ་ཧྲཱིཿ  འཁོར་འདས་ཚེ་རྣམས་འབྱུང་བ་ལྔ་ལ་ཐིམ༔  ཤ་ཁྲག་དྲོད་དབུགས་སེམས་ཀྱི་སྟོབས་འཕེལ་ཏེ༔  མི་འགྱུར་དྭངས་མ་ནྲྀ་ལ་རྒྱས་ཐེབས་པས༔  འཆི་མེད་རྡོ་རྗེའི་ཚེ་དང་ལྡན་པར་ཤོག༔  ཨོཾ་བྷྲཱུྃ་ཧྲཱིཿབྷྲཱུྃ་ཧཱུྃ་བྷྲཱུྃ་ཏྲཱཾ་བྷྲཱུྃ་ཨཱཿབྷྲཱུྃ་བཛྲ་ཀྲོ་དྷ་ཧ་ཡ་གྲཱི་བ་རཀྵ་བྷྲཱུྃ༔  ཞེས་དང༌།  མེ་ཏོག་འཐོར་ཞིང་ཚེ་གཟུངས་དང་རྟེན་འབྲེལ་སྙིང་པོ་བརྗོད་པས་བརྟན་པར་བྱ།  ཤིས་པར་བྱ་བའི་སླད་དུ།  བླ་མ་རྩ་གསུམ་འཆི་མེད་ཚེའི་ལྷ་ཚོགས་རྣམས་ཀྱིས་ཤིས་པ་བརྗོད་པའི་ཚིགས་སུ་བཅད་པའི་རྡོ་རྗེའི་གླུ་ལེན་ཅིང༌།  མེ་ཏོག་གི་ཆར་ཕབ་པས་དགེ་ལེགས་ཀྱི་སྣང་བས་ཕྱོགས་དུས་གནས་སྐབས་ཐམས་ཅད་དུ་ཁྱབ་ཅིང་རྟག་པར་བྱས་པའི་མོས་པ་མཛོད།  ཨོཾ༔  གྲུབ་པར་གྱུར་ཅིག་རྡོ་རྗེའི་ཡེ་ཤེས་ཚེ༔  མི་འགྱུར་མི་ཤིགས་མཁའ་ལྟར་ཀུན་ལ་ཁྱབ༔  ཡོ་ཏན་དཔག་ཡས་ཕྲིན་ལས་བསམ་མི་ཁྱབ༔  པདྨ་ཚེ་དཔག་མེད་མགོན་མྱུར་ཐོབ་ཤོག༔  ཅེས་དང༌།  གཞན་ཡང་ལས་བྱང་རྒྱས་འབྲིང་གང་རུང་གི་བཀྲ་ཤིས་སོགས་ཇི་ལྟར་རིགས་པ་བརྗོད་ཅིང༌།  མེ་ཏོག་གི་ཆར་དབབ།  རོལ་མོའི་སྒྲ་སྙན་ཅིང་རྒྱུན་རིང་བར་བྱའོ།  །དེ་ལྟར་ན་དེ་རྣམས་ཀྱི་སྒོ་ནས་དཔལ་ཨོ་རྒྱན་ཆོས་ཀྱི་རྒྱལ་པོའི་ཐུགས་བཅུད།  བོད་ཡུལ་ས་འོག་ཀུན་གྱི་གཏེར་གཅིག  །བླ་མའི་ཐུགས་སྒྲུབ་བར་ཆད་ཀུན་སེལ་གྱི་གྱི་དཀྱིལ་འཁོར་དུ་མངོན་པར་དབང་བསྐུར་བའི་བྱ་བ་མདོར་བསྡུས་ཏེ་གྲུབ་པ་ལགས་པས།  གནས་སྐབས་དེ་དག་ཏུ་ཐོབ་ཅིང་ཁས་བླངས་པའི་དམ་ཚིག་དང་སྡོམ་པ་ལ་སྲུང་སྡོམ་གྱི་འདུན་པ་དྲག་པོས་འདིའི་རྗེས་ཟློས་ལན་གསུམ་མཛོད།  གཙོ་བོས་ཇི་ལྟར་སོགས།  དབང་བསྐུར་ཟབ་མོ་ལེགས་པར་ཐོབ་པའི་བཀའ་དྲིན་གཏང་རག་གི་ཡོན་ཏུ་མཎྜལ་ཕུལ།  སླར་ཡང་ལུས་ལོངས་སྤྱོད་དགེ་ཚོགས་རྒྱ་མཚོ་དང་བཅས་པ་འཁོར་ལོས་སྒྱུར་བའི་རྒྱལ་སྲིད་ཀྱི་འབྱོར་པ་ལྟར་སྤྲུལ་ཏེ་ཕུལ་ན་ཆ་ཤས་ནས་ལོངས་སྤྱད་དུ་གསོལ་སྙམས་པས་འདིའི་རྗེས་ཟློས་ལན་གསུམ་མཛོད།  དེང་ནས་བརྩམས་ཏེ་སོགས།  དེ་ལྟར་དབང་ཐོབ་པའི་དགེ་བའི་རྩ་བ་རྣམས་བྱང་ཆུབ་སྙིང་པོར་ཡོངས་སུ་བསྔོ་བ་འདི་ལྷན་ཅིག་ཏུ་གནང་བར་ཞུ།  བསོད་ནམས་འདི་ཡིས་སོགས་དགེ་བའི་རྩ་བ་བྱ་ཆུབ་སྙིང་པོར་ཡོངས་སུ་བསྔོ་བའི་རྒྱས་གདབ།  ཆོ་གའི་མཐའ་རྒྱས་ཚོགས་ཀྱི་དགའ་སྟོན་ལ་ལོངས་སྤྱོད་ཅིང་ལྷག་མ་བསྔོ།  དམ་ཅན་སྤྱི་གཏོར་ལྟར་སྲུང་མའི་གཏོར་འབུལ་དང༌།  དཀྱིལ་འཁོར་པ་ལ།  ཨོཾ་ཨཱཿཧཱུྃ༔  ཕྱི་མཆོད་འདོད་ཡོན་སོགས་ཀྱིས་མཆོད།  ཧཱུྃ་ཧྲཱིཿ  ངོ་བོ་འོད་གསལ་སོགས་ཀྱིས་བསྟོད།  ཧཱུྃ་ཧྲཱི༔  སྙིང་པོ་བྱང་ཆུབ་སེམས་ཀྱི་སོགས་ཀྱི་མཐར།  ཐོད་ཕྲེང་རྩལ་གྱི་ཛབ྄་དང༌།  ཀཱ་ཡ་ཝཱ་ཀ་ཙིཏྟ་ཛྙཱ་ན་ཀརྨ་སརྦ་སིདྡྷི་ཕ་ལ་ཧཱུྃ༔  ཞེས་པས་དངོས་གྲུབ་བླང༌།  ཨོཾ༔  རིག་འཛིན་དཀྱིལ་འཁོར་ལྷ་ཚོགས་རྣམས༔  བདག་ལ་གསན་ཅིང་དགོངས་སུ་གསོལ༔  བདག་ཅག་མ་རིག་འཁྲུལ་པ་ཡིས༔  ཕྱག་རྒྱ་མ་གསལ་ཛབ྄་བཟླས་གཡེལ༔  ཏིང་འཛིན་དགོངས་པའི་རྩལ་མ་རྫོགས༔  བྱིངས་རྒོད་འཆལ་བར་གྱུར་པ་སོགས༔  ནོངས་པར་གྱུར་པ་ཅི་མཆིས་ཀུན༔  སྙིང་ནས་འགྱོད་པས་མཐོལ་བཤགས་ན༔  སྒྲིབ་མེད་ཚངས་པའི་དངོས་གྲུབ་སྩོལ༔  ཅེས་དང༌།  ཡིག་བརྒྱ་ལན་གསུམ་གྱི་མཐར།  ཨ་ཨ་ཨཿ  ཞེས་བརྗོད་པས་ནོངས་པ་བཤགས།  མདུན་བསྐྱེད་ཀྱི་རྟེན་ལ།  ཨོཾ།  འདིར་ནི་རྟེན་དང་སོགས་བརྟན་བཞུགས་བྱ།  བདག་ཉིད་དཀྱིལ་འཁོར་གྱི་འཁོར་ལོར་གསལ་བ།  ཧཱུྃ་ཧཱུྃ་ཧཱུྃ༔  ཞེས་བརྗོད་པས།  སྣང་ཆ་ལྷའི་འཁོར་ལོ་འོད་གསལ་གྱི་དབྱིངས་སུ་ཐིམ།  ཕཊ་ཕཊ་ཕཊ།  ཅེས་བརྗོད་པས།  སླར་ཡང་རང་དང་སྣང་བ་ཐམས་ཅད་དཀྱིལ་འཁོར་གྱི་འཁོར་ལོའི་སྐུ་གསུང་ཐུགས་ཀྱི་ཡེ་ཤེས་རྣམ་པ་ཐམས་ཅད་པའི་རང་བཞིན་ཏུ་གྱུར་པར་བསམ་ལ།  ཧོ༔  རིག་འཛིན་སྔ་མའི་དཀྱིལ་འཁོར་སོགས་བསྔོ་སྨོན་ཤིས་བརྗོད་ཀྱིས་མཐའ་བརྒྱན་པས་དགེ་ལེགས་ཀྱི་སྣང་བ་མཆོག་ཏུ་རྒྱས་པར་བྱའོ།  །ཞར་བྱུང་འཕྲོས་དོན་ཅུང་ཟད་བཤད་ན།  དེ་ལྟ་བུའི་དབང་འབྲིང་པོའི་ཚུལ་འདི་གཞུང་གཞན་ཏུ་བསྙེན་སྒྲུབ་རྣམ་གསུམ་གྱི་རྩ་བའི་དབང་ཞེས་ཀྱང་གསུངས་པ་འདི་ཙམ་ཐོབ་པས་བསྙེན་སྒྲུབ་ལས་སྦྱོར་ལ་དབང་བ་ཡིན་མོད།  འགའ་ཞིག་འདི་རིགས་ཀྱི་དབང་འབྲིང་པོ་ཙམ་བསྐུར་བས་རྒྱས་པའི་གོ་ཆོད་མཛད་པ་སོགས་ནི།  ཆོས་ལ་དབང་ཟ་བའི་སྙིང་ཁམ་ཆེན་པོ་ཡིད་སྲུབ་ཀྱི་ཕྲིན་ལས་པར་ངེས་པའི་ཕྱིར།  ལག་ལེན་ཞིབ་མོས་འགགས་བསྡོམས་པ་ལས་དེས་ཆོག་དང་སླ་ཆོས་དང་དབང་ཡོད་ཀྱིས་བསྟན་པའི་སྙིང་པོ་ཆུད་མི་གསན་པ་གལ་ཆེ་བས་རྣམ་པ་ཀུན་ཏུ་ཐུགས་ཀྱིས་དགོངས་འཚལ་ལོ།  དུས་བཟང་ཚེས་བཅུའི་མཆོད་པ་ལྟ་བུར་དངོས་གྲུབ་བླང་བའི་ཆོ་ག་དང་རྗེས་སུ་འབྲེལ་བས་མཚོན།  སྐབས་འགའ་ཞིག་ཏུ་གཏོར་དབང་རྐྱང་པ་ཁོ་ན་བསྐུར་ན།  སྦྱོར་བའི་སྐབས་སུ་དབང་འབྲིང་པོའི་བཅས་བཤམས་དང༌།  དངོས་གཞིར་རྣམ་བུམ་སྒྲུབ་པ་སོགས་མི་དགོས་ཤིང༌།  མཚམས་སྦྱོར་གྱི་སྐབས།  དེ་ལའང་རྒྱས་འབྲིང་བསྡུས་གསུམ་ལས།  འདིར་དོན་དབང་མདོར་བསྡུས་པ་གཏོར་མ་ལ་བརྟེན་ནས་དབང་བཞི་ཆིག་རྫོགས་སུ་བསྒྲུབ་པ་ལ།  སློབ་དཔོན་གྱི་བྱ་བ་སོགས་སྦྲེལ།  ཡེ་ཤེས་དབབ་པ་བརྟན་པའི་རྗེས།  དེ་ལྟར་ཡེ་ཤེས་དབབ་ཅིང་བརྟན་པར་བྱ་བ་སྔོན་ཏུ་སོང་ནས།  དངོས་གཞི་བྱིན་རླབས་གཏོར་མའི་དབང་བསྐུར་བ་ལ།  སྤྱིར་གཏོར་མ་སྒྲུབ་པའི་དུས་སུ་སོགས་སྦྲེལ་ནས།  དངོས་གྲུབ་མ་ལུས་པ་ཐོབ་པའི་མོས་པ་མཛོད།  ཅེས་པའི་བར་གོང་ལྟར་དང༌།  གཏེར་གཞུང་རྩ་བར་མ་གསུངས་པས་མ་བྱས་ཀྱང་ཆད་སྐྱོན་དུ་མི་འགྱུར་མོད།  སྤྲུལ་པའི་གཏེར་སྟོན་ཆེན་པོས་དབང་འབྲིང་བསྡུས་གང་ལའང་སྐུ་གསུང་ཐུགས་དབང་བསྐུར་བ་ཕྱག་བཞེས་སུ་མཛད་པས།  དེ་ལྟར་ན།  དེ་ནས་དབང་དོན་གྱི་ཡེ་ཤེས་བརྟན་ཅིང་ནུས་ལྡན་ཏུ་བྱ་བའི་སླད་དུ་སྐུ་གསུངས་ཐུགས་ཀྱི་དབང་བསྐུར་བ་ལ།  སོགས་ནས་སྐལ་བ་དང་ལྡན་པར་བྱས་པ་ཡིན་ནོ།  །ཞེས་པའི་བར་གོང་ལྟར་མཐར།  ཤིས་པར་བྱ་བའི་སླད་དུ་སོགས་སྦྲེལ་ནས་དགེ་བ་བསྔོ་བའི་བར་བྱས་པས་གྲུབ་བོ།  །གཏོར་དབང་གི་མཐར་ཚེ་དབང་སྦྲེལ་ནའང་རུང་བས།  དེ་ལྟར་ན་སྐུ་གསུངས་ཐུགས་ཀྱི་དབང་གི་མཐར་ཚེ་དབང་གོང་བཞིན་བྱ།   ཚེ་དབང་གྲངས་བསོག་ལྟ་བུ་དགོས་ན།  ཚེ་ཆང་སྦྱིན་པ་ཡན་དཀྱུས་ལྟར་ཚར་གཅིག་གི་མཚམས།  ཨོཾ་གྲུབ་པར་གྱུར་ཅིག་ལྟ་བུས་མཚོན་ཤིས་བརྗོད་གང་རིགས་ཤ་ལོ་ཀ་རེ་བྱ།  སླར་ཡང་ཚེའི་འབྲང་རྒྱས་འདི་ཉིད་སོགས་བརྡ་སྤྲད་ལ་བསྐྱར།  རྗེས་མར་ཚེ་ཆང་སྦྱིན་པའི་རྗེས་སུ།  དེ་ལྟར་དབང་བསྐུར་བ་སོགས་གོང་དུ་སྨོས་པ་བཞིན་སྦྲེལ་ལོ།  །བླ་མའི་ཐུགས་སྒྲུབ་བྱེ་བའི་ཕུལ།  །བར་ཆད་ཀུན་སེལ་སྨིན་བྱེད་ཀྱི།  །ཆོ་ག་སྙིང་པོའི་སྣང་བ་འདིས།  །ཕན་བདེའི་པདྨོ་རྒྱས་གྱུར་ཅིག  །ཅེས་པའང་རྩོད་བྲལ་དུས་བབ་ཀྱི་སྤྲུལ་པའི་གཏེར་སྟོན་ཆེན་པོ་ཨོ་རྒྱན་མཆོག་གྱུར་བདེ་ཆེན་གླིང་པའི་ཞལ་སྔ་ནས་ཟབ་ཆོས་འདི་ཉིད་ཀྱི་གཏེར་ཤོག་ཐོག་མར་འབེབས་རིམ་བཞིན་ཏུ་སྨིན་གྲོལ་གྱི་གདམས་པ་ཡོངས་སུ་རྫོགས་པར་ཐོབ་པའི་སྐལ་བཟང་ཅན་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོ་རྡོ་རྗེ་གཟི་བརྗིད་རྩལ་གྱིས།  དོན་དུ་གཉེར་བའི་སྐྱེས་ཆེན་དམ་པ་དུ་མས་ཡང་དང་ཡང་དུ་གསུང་གིས་བསྐུལ་བའི་བཞེད་པ་བསྐང་ཕྱིར་ཉེར་མཁོ་མདོར་བསྡུས་སྙིང་པོར་དྲིལ་ཏེ་སྦྱར་བའི་དགེ་བས་བསྟན་འཛིན་གྱི་སྐྱེས་བུ་རྣམས་ཞབས་པད་བསྐལ་བརྒྱར་བརྟན་ཅིང༌།  ཟབ་ཆོས་འདི་ཉིད་ཀྱི་ཕྲིན་ལས་འཇིག་རྟེན་གསུམ་དུ་ཁྱབ་ཅིང་རྟག་པའི་རྒྱུར་གྱུར་ཅིག།  །སརྦ་དཱ་ཀ་ལྱཱ་ཎཾ་བྷ་བ་ཏུ།  འདི་ནི་དབང་འབྲིང་བསྡུས་ཀྱི་མཚམས་སྦྱོར་ཉེར་འཁོ་ཙམ་སྟེ།  དབང་རྒྱས་པར་བསྐུར་བའི་ཚུལ་སོགས་ནི་འཇམ་མགོན་རྡོ་རྗེ་འཆང་བླཽ་གྲོས་མཐའ་ཡས་ཀྱི་གསུང་རབ་ལས་རྟོགས་པར་བྱ་བ་ཁོ་ནའོ།།  །།

}}
</onlyinclude>
{{TsagliCall}}
<headertabs/>
== Footnotes ==
<references/>
==Other Information==
{{Footer}}
[[Category:JKW-KABAB-Volume-02-KHA]]
[[Category:Khyentse Lineage Project]]