View source for JKW-KABAB-02-KHA-018

{{Khyentse Metadata
|classification=Tibetan Publications
|subclass=Tibetan Texts
|fulltitletib=སྤྲོས་བྲལ་ཤེས་ཀྱི་ཕ་རོལ་ཏུ་ཕྱིན་པའི་རྡོ་རྗེའི་ཐོལ་གླུ་འོད་གསལ་དབུ་མའི་སྒྲ་དབྱངས།
|fulltitle=spros bral shes kyi pha rol tu phyin pa'i rdo rje'i thol glu 'od gsal dbu ma'i sgra dbyangs
|citation=[['jam dbyangs mkhyen brtse'i dbang po]]. ''spros bral shes kyi pha rol tu phyin pa'i rdo rje'i thol glu 'od gsal dbu ma'i sgra dbyangs''. In ''Rdzong sar 'jam dbyangs mkhyen brtse'i dbang po'i bka' babs'', Vol. 2: 109-111. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
|collectiontitle=mkhyen brtse'i bka' babs
|collectiontitletib=མཁྱེན་བརྩེའི་བཀའ་བབས་
|author='jam dbyangs mkhyen brtse'i dbang po

|authortib=འཇམ་དབྱངས་མཁྱེན་བརྩེའི་དབང་པོ་

|tibgenre=Vajra Songs - rdo rje'i glu
|terma=No
|transmissiontype=bka' ma - Oral Transmission
|language=Tibetan
|volumenumber=002
|volnumtib=༢
|volyigtib=ཁ་
|totalvolumes=22
|textnuminvol=018
|pagenumbers=109-111
|totalpages=3
|beginfolioline=1a1
|endfolioline=2a2
|totalfolios=2
|multivolumework=No
|versonotes=mkhyen brtse'i bka' babs
|pdflink=File:JKW-KABAB-02-KHA-018.pdf
}}
{{Header}}
<h1 style="font-size: 24px !important;">Tibetan Text</h1>
<onlyinclude>
{{TibP|༄༅།  །སྤྲོས་བྲལ་ཤེས་རབ་ཀྱི་ཕ་རོལ་ཏུ་ཕྱིན་པའི་རྡོ་རྗེའི་ཐོལ་གླུ་འོད་གསལ་དབུ་མའི་སྒྲ་དབྱངས་ཞེས་བྱ་བ།  ཨ་ཧོ།  མཐའ་བྲལ་མི་གནས་ཡེ་ཤེས་ཞལ།  །ཟུང་འཇུག་རྣམ་ཐར་སྒོ་གསུམ་དབྱིངས།  །འདུ་འབྲལ་སྤངས་པའི་ཆོས་ཉིད་ཆེ།  །ཤེས་རབ་ཕ་རོལ་ཕྱིན་ལ་འདུད།  །རྒྱལ་བས་གསུངས་པའི་དམ་ཆོས་ཀུན།  །བདེན་པ་གཉིས་ལ་ཡང་དག་བརྟེན།  །ཇི་ལྟར་རབ་རིབ་མཐུས་བསྐྱེད་པས།  །སྐྲ་ཤད་སོགས་སུ་སྣང་བ་ལྟར།  །འཁྲུལ་ངོར་སྣང་བའྀ་ཆོས་ཇི་སྙེད།  །འཇིག་རྟེན་ཀུན་རྫོབ་བདེན་པར་གྲགས།  །གཟུང་དང་འཛིན་ལས་རྣམ་གྲོལ་ཞིང༌།  །སྤྲོས་པ་ཀུན་བྲལ་ཆོས་ཀྱི་དབྱིངས།  །རྣམ་པར་རྟོག་མེད་ཟུང་འཇུག་དོན།  །འགྱུར་མེད་དོན་དམ་བདེན་པར་བསྟན།  །དེ་ཡང་གཟུགས་སོགས་ཕུང་ལྔ་ཡི།  །འཁྲུལ་རྒྱུན་ཟད་པའི་འོད་གསལ་དོན།  །བདག་དང་བདག་གིར་འཛིན་པ་ལས།  །རྣམ་པར་གྲོལ་བའི་སྟོང་པ་ཉིད།  །རྟོག་གེའི་བློ་ཡིས་མ་རིག་ཅིང༌།  །རང་བཞིན་ངང་གིས་གྲོལ་བའི་ཆོས།  །ཁས་ལེན་དམིགས་གཏད་མཚན་མ་ལས།  །རབ་འདས་གདོད་མའི་གཤིས་ལུགས་ལ།  །སྒྲོ་བཏགས་སྐུར་འདེབས་ལས་གྲོལ་ཞིང༌།  །སངས་རྒྱས་སྤྱོད་ཡུལ་ལྷུན་གྲུབ་ཆོས།  །རང་འཞིན་འབྱུང་ཕྱིར་སྨོན་པ་ཡི།  །དངོས་པོ་ཀུན་ལས་ལྡོག་པའི་དོན།  །ལྟ་བའི་གནས་ལུགས་རབ་ཤེས་ནས།  །སྦྱོར་བ་བྱང་ཆུབ་སེམས་བསྐྱེད་པའི།  །ཚུལ་ལ་བསྟེན་གོམས་བྱས་ནས་ཀྱང༌།  །དངོས་གཞི་ཆོས་རྣམས་ཐམས་ཅད་ཀུན།  །སློབ་དཔོན་ནཱ་ག་རྫུ་ན་ཡིས།  །གང་གིས་རྟེན་ཅིང་འབྲེལ་བར་འབྱུང༌།  །འགག་པ་མེད་པ་སྐྱེ་མེད་པ།  །རྟག་པ་མེད་པ་ཆད་མེད་པ།  །འོང་བ་མེད་པ་འགྲོ་མེད་པ།  །ཐ་དད་དོན་མིན་དོན་གཅིག་མིན།  །སྤྲོས་པ་ཉེར་ཞིའི་ཆོས་བསྟན་པ།  །ཞེས་པའི་དོན་ལྟར་ཐག་བཅད་དེ།  །སེམས་དང་སེམས་བྱུང་སྤྲོ་བསྡུ་ལས།  །འདས་པའི་ངང་དེར་མཉམ་བཞག་བྱ།  །དེ་སྐད་དུ་ཡང་ཞི་བ་ལྷས།  །གང་ཚེ་དངོས་དང་དངོས་མེད་པ།  །བླཽ་ཡི་མདུན་ན་མི་གནས་པ།  །དེ་ཚེ་རྣམ་པ་གཞན་མེད་པས།  །དམིགས་པ་མེད་པར་རབ་ཏུ་ཞི།  །ཞེས་གསུངས་ཚུལ་དེར་གནས་ཀྱི་བར།  །བསྒོམས་ནས་རྗེས་ཐོབ་དགེ་བ་བསྔཽ།  །དེ་ཉིད་དོན་དམ་བདེན་པ་ཆེ།  །ཉམས་སུ་བླང་བའི་ཚུལ་ཡིན་ནོ།  །མཉམ་བཞག་དེ་ལས་ལྡང་མ་ཐག  །རྨི་ལམ་སྒྱུ་མ་ཆུ་ཟླ་དང༌།  །དྲི་ཟའི་གྲོང་ཁྱེར་བྲག་ཅའི་སྒྲ།  །སྨིག་རྒྱུ་འཇའ་ཚོན་ལྟ་བུ་རུ།  །བདེན་མེད་དག་ཏུ་རྟོགས་བྱ་བ།  །ཀུན་རྫོབ་ཉམས་སུ་བླང་ཚུལ་ཏེ།  །མདོར་ན་གཞི་དུས་དབུ་མ་ནི།  །བདེན་གཉིས་ཟུང་དུ་འཇུག་པ་སྟེ།  །ལམ་དུས་ཚོགས་གཉིས་ཟུང་འཇུག་དང༌།  །འབྲེལ་བའི་སྤྱོད་པ་སྤྱད་བྱས་ནས།  །མཐར་ཐུག་སྐུ་གཉིས་ཟུང་འཇུག་པའི།  །འབྲས་བུ་དབུ་མ་ཆེན་པོ་འཐོབ།  །རྣམ་ཐར་སྒོ་གསུམ་རབ་སྟོན་པའི།  །འཁོར་ལོ་བར་བའི་སྡེ་སྣོད་དོན།  །ཀླུ་སྒྲུབ་ཡབ་སྲས་ཀྱིས་བཀྲལ་ཞིང༌།  །གངས་ཅན་ལྗོངས་འདིར་ཀུན་མཁྱེན་མཆོག  །རྒྱལ་སྲས་དྲི་མེད་འོད་ཟེར་སོགས།  །མཁས་གྲུབ་ཀུན་གྱི་དགོངས་པའི་དོན།  །ཉམས་སུ་ལེན་ཚུལ་ཅུང་ཟད་ཙམ།  །བླཽ་གསལ་ཐར་པ་འདོད་པ་ནི།  །རང་ངམ་གཞན་དག་ཡིན་ཡང་རུང༌།  །དེ་དོན་དམིགས་ཏེ་གང་ཤར་དུ།  །རྡོ་རྗེའི་གླུ་རུ་བླངས་པ་འདིས།  །འགྲོ་རྣམས་མ་ལུས་སྒྲོལ་བར་ཤོག།  །།

}}
</onlyinclude>
{{TsagliCall}}
<headertabs/>
== Footnotes ==
<references/>
==Other Information==
{{Footer}}
[[Category:JKW-KABAB-Volume-02-KHA]]
[[Category:Khyentse Lineage Project]]