View source for JKW-KABUM-08-NYA-003-001

{{Khyentse Metadata
|classification=Tibetan Publications
|subclass=Tibetan Texts
|fulltitletib=གྲུབ་ཆེན་མི་ཏྲ་ཛོ་ཀིས་མཛད་པའི་སྙིང་པོ་དོན་གསུམ་གྱི་མན་ངག་གི་རྩ་བ་རྡོ་རྗེའི་ཚིག་རྐང་།
|fulltitle=grub chen mi tra dzo kis mdzad pa'i snying po don gsum gyi man ngag gi rtsa ba rdo rje'i tshig rkang
|citation=[['jam dbyangs mkhyen brtse'i dbang po]]. ''grub chen mi tra dzo kis mdzad pa'i snying po don gsum gyi man ngag gi rtsa ba rdo rje'i tshig rkang''. In '''jam dbyangs mkhyen brtse'i dbang po'i bka' 'bum'', Vol. 8: 61-66. Khams sde dge rdzong sar dgon: Rdzong sar blo gros phun tshogs, 2020.
|collectiontitle=mkhyen brtse'i bka' 'bum
|collectiontitletib=མཁྱེན་བརྩེའི་བཀའ་འབུམ་
|author='jam dbyangs mkhyen brtse'i dbang po
|editor=rdzong sar blo gros phun tshogs
|associatedpeople=Mitrayogi
|authortib=འཇམ་དབྱངས་མཁྱེན་བརྩེའི་དབང་པོ་
|editortib=རྫོང་སར་བློ་གྲོས་ཕུན་ཚོགས་
|associatedpeopletib=མི་ཏྲ་ཛོ་ཀི་
|tibgenre=Lineage Supplications - brgyud 'debs, Pith Instructions - man ngag
|terma=No
|sabcadcategory=Five
|deity=thugs rje chen po
|cycle=phyag rgya chen po sems nyid ngal bso
|cycletib=ཕྱག་རྒྱ་ཆེན་པོ་སེམས་ཉིད་ངལ་བསོ་
|language=Tibetan
|dnzlink=grub chen mi tra dzo kis mdzad pa'i snying po don gsum gyi man ngag gi rtsa ba rdo rje'i tshig rkang
|volumenumber=008
|volnumtib=༨
|volyigtib=ཉ་
|totalvolumes=25
|textnuminvol=003
|textsubnumber=001
|pagenumbers=61-66
|totalpages=6
|beginfolioline=1a
|endfolioline=3b1
|totalfolios=3
|multivolumework=No
|rectonotes=sde tshan 3
|versonotes=mkhyen brtse'i bka' 'bum
|colophontib=།ཅེས་པ་འདིའང་རིས་མེད་པའི་བསྟན་པ་ལ་མཆོག་ཏུ་དད་པའི་བློ་གྲོས་ཀྱི་ཨུཏྤལ་ཁ་ཡོངས་སུ་བྱེ་བ་ཤཱཀྱའི་དགེ་སློང་གཞོན་ནུ་མཁྱེན་བརྩེའི་མིང་ཅན་གྱིས་གསོལ་བ་བཏབ་པ་སིདྡྷི་རསྟུ།།
|colophonwylie=ces pa 'di'ang ris med pa'i bstan pa la mchog tu dad pa'i blo gros kyi ut+pal kha yongs su bye ba shAkya'i dge slong gzhon nu mkhyen brtse'i ming can gyis gsol ba btab pa sid+d+hi rastu
|pdflink=File:JKW-KABUM-08-NYA-003.pdf
}}
{{Header}}
<h1 style="font-size: 24px !important;">Tibetan Text</h1>
<onlyinclude>
{{TibP|༄༅།  །གྲུབ་ཆེན་མི་ཏྲ་ཛོ་ཀིས་མཛད་པའི་སྙིང་པོ་དོན་གསུམ་གྱི་མན་ངག་གི་རྩ་བ་རྡོ་རྗེའི་ཚིག་རྐང་བཞུགས་སོ།།
ན་མོ་གུ་ར་ཝེ།  གདམས་པ་འདི་འཆད་པ་ལ་དོན་གསུམ་སྟེ།  དང་པོ་མདོར་བསྟན་པ་ནི།  ཚེ་འདིར་རྒྱུན་གྱི་ཡི་དམ་བསྒོམ།  །འཆི་ཁར་འཕོ་བའི་གདམས་ངག་བསྒོམ།  །བར་དོར་བསྲེ་བ་བསྒོམ་བྱ་སྟེ།  །རྒྱུན་དུ་བསྒོམ་པ་ཀུན་གྱི་གནད།  གཉིས་པ་རྒྱས་པར་བཤད་པ་ལ་གསུམ་སྟེ།  ཚེ་འདིའི་ཉམས་ལེན་གྱི་སྙིང་པོ་རྒྱུན་གྱི་ཡི་དམ་བསྒོམ་པ།  འཆི་ཁའི་ཉམས་ལེན་གྱི་སྙིང་པོར་འཕོ་བ་བསྒོམ་པ།  བར་དོའི་ཉམས་ལེན་གྱི་སྙིང་པོ་བསྲེ་བ་བསྒོམ་པའོ།  །དང་པོ་ལའང་བཞི་ལས།  དང་པོ་རྐྱེན་སྐུལ་མ་གདབ་པའི་མན་ངག་ནི།  མི་རྟག་སྡུག་བསྔལ་དྲན་བྱས་ནས།  །གཉིས་པ་རྒྱུ་བྱང་ཆུབ་མཆོག་ཏུ་སེམས་བསྐྱེད་པ་ནི།  སྙིང་རྗེ་ཆེན་པོ་རབ་བསྐྱེད་དེ།  །གསུམ་པ་ཐབས་བླ་མ་ཡི་དམ་ལ་གསོལ་བ་གདབ་པའི་མན་ངག་ནི།  སྤྱི་བོར་བླ་མ་སྙིང་གར་ལྷ།  །བཞི་པ་ངོ་བོ་རང་སེམས་སྐྱེ་མེད་དུ་བསྒོམ་པའི་མན་ངག་ནི།  རང་སེམས་སྐྱེ་མེད་བསྒོམ་པར་བྱ།  །གཉིས་པ་ལའང་བཞི་ལས།  དང་པོ་སྒྱུ་ལུས་ཚོགས་སུ་འབུལ་བ་ནི།  རང་ལུས་མཆོད་སྦྱིན་བྱས་ནས་ནི།  །གཉིས་པ་ཡིད་ཀྱི་འབྲེལ་ཐག་བཅད་པ་ནི།  ལྟོས་པ་ཐམས་ཅད་རབ་སྤངས་ཏེ།  །གསུམ་པ་ཐར་པའི་ལམ་ཆེན་དབྱེ་བ་ནི།  འོད་ཀྱི་སྦུ་གུའི་སྦྱོར་བ་ཡིས།  །བཞི་པ་རྣམ་ཤེས་གོང་དུ་འཕོ་བ་ནི།  སེམས་ནི་དགའ་ལྡན་གནས་སུ་འཕང་།  །གསུམ་པ་ལའང་བཞི་ལས།  དང་པོ་བར་དོ་ངོ་མི་ཤེས་པའི་གཉེན་པོ་ཡིད་ལ་བྱ་བ་ནི།  འདི་ཉིད་བར་དོར་ཤེས་བྱས་ལ།  །གཉིས་པ་བར་དོ་ཐ་མལ་དུ་ཞེན་པའི་གཉེན་པོ་ཡིད་ལ་བྱ་བ་ནི།  ཕྱི་ནང་གསང་བ་བསྒྱུར་བྱས་ཏེ།  །གསུམ་པ་ཆགས་སྡང་གིས་ཉིང་མཚམས་སྦྱོར་བའི་གཉེན་པོ་ཡིད་ལ་བྱ་བ་ནི།  སྟོང་ཉིད་སྙིང་རྗེའི་རྣལ་འབྱོར་གྱིས།  །བཞི་པ་སྐྱེ་བ་ངེས་པ་མེད་པའི་གཉེན་པོ་ཡིད་ལ་བྱ་བ་ནི།  མཁས་པས་ཉིང་མཚམས་སྦྱར་བར་བྱ།  །གསུམ་པ་ལྟ་སྒོམ་སྤྱོད་གསུམ་གྱི་མན་ངག་གིས་མཇུག་བསྡུ་བ་ནི།  གང་ཤར་ངོས་འཛིན་ལྟ་བའི་གནད།  །དེ་ལ་མ་ཡེངས་སྒོམ་པའི་གནད།  །དྲན་པ་རོ་སྙོམས་སྤྱོད་པའི་གནད།  །གྲུབ་ཐོབ་ཆེན་པོའི་གདམས་ངག་གོ།  །ཞེས་གདམས་པའི་བྱུང་ཚུལ་དང་བཅས་ཏེ་སྟོན་པ་ཡིན་ནོ།  །འདིའི་ཤློ་ཀ་དང་པོ་གྲུབ་ཆེན་གྱི་གསུང་དངོས་ཡིན་ལ།  ལྷག་མ་རྣམས་ཁྲོ་ཕུ་ལོ་ཙཱ་བ་གནུབས་བྱམས་པའི་དཔལ་གྱིས་དོན་འགྲེལ་གྱི་ཚུལ་དུ་མཛད་པའོ།།  །།སྙིང་པོ་དོན་གསུམ་གྱི་བརྒྱུད་འདེབས་བྱིན་རླབས་མཆོག་སྩོལ་ཅེས་བྱ་བ་བཞུགས་སོ།  །ཐུགས་རྗེ་ཆེན་པོ་བློ་གྲོས་རིན་ཆེན་དང་།  །གྲུབ་ཆེན་ཏཻ་ལོ་པ་དང་ལ་ལི་ཏ།  །མི་ཏྲ་ཛོ་ཀི་ཁྲོ་ཕུ་ལོ་ཙཱ་བར།  །གསོལ་བ་འདེབས་སོ་དངོས་གྲུབ་རྣམ་གཉིས་སྩོལ།  །བསོད་ནམས་དབང་ཕྱུག་བསོད་ནམས་སེང་གེ་དང་།  །རིན་ཆེན་སེང་གེ་ཀུན་མཁྱེན་རིན་ཆེན་གྲུབ།  །བྱང་ཆུབ་རྩེ་མོ་གྲགས་པ་རྒྱལ་མཚན་ལ།  །གསོལ་བ་འདེབས་སོ༴  ཕྱོགས་ལས་རྣམ་རྒྱལ་འཇམ་དབྱངས་གྲགས་པའི་ཞབས།  །ཟླ་བ་རྒྱལ་མཚན་མཁྱེན་རབ་ཆོས་ཀྱི་རྗེ།  །ཀུན་སྤངས་ཆེན་པོ་བློ་གསལ་རྒྱ་མཚོ་ལ།  །གསོལ་བ་འདེབས་སོ༴  མཁྱེན་བརྩེའི་དབང་ཕྱུག་བྱམས་པ་སྐལ་བཟང་དང་། །དབང་ཕྱུག་རབ་བརྟན་ཁྱབ་བདག་ཞྭ་ལུ་པ།  །འཇམ་དབྱངས་གྲགས་པ་དགེ་ལེགས་རྒྱ་མཚོ་ལ།  །གསོལ་བ་འདེབས་སོ༴  བྱམས་མགོན་བླ་མ་ཀུན་མཁྱེན་འཇིགས་མེད་དབང་།  །དཀོན་མཆོག་རྒྱལ་མཚན་བསྟན་པ་རབ་རྒྱས་ཞབས།  །བཀའ་དྲིན་མཉམ་མེད་རྩ་བའི་བླ་མ་ལ།  །གསོལ་བ་འདེབས་སོ་དངོས་གྲུབ་རྣམ་གཉིས་སྩོལ།  །ཞེས་པའམ།  ཡང་ན་རིན་ཆེན་གྲུབ་ཀྱི་རྗེས།  གཞོན་ནུ་བསོད་ནམས་འཇམ་མགོན་ཡབ་སྲས་ལ།  །གསོལ་བ་འདེབས་སོ༴  ཆོས་ཀྱི་རྒྱལ་མཚན་ལེགས་པ་ཆོས་འབྱོར་དང་།  །དགེ་འདུན་རྒྱ་མཚོ་བསོད་ནམས་གྲགས་པའི་སྡེ།  །བསོད་ནམས་རྒྱ་མཚོ་བསོད་ནམས་དཔལ་བཟང་ལ།  །གསོལ་བ་འདེབས་སོ༴  ཆོས་དཔལ་བཟང་པོ་དཔལ་འབྱོར་ལྷུན་གྲུབ་དང་།  །ཕྲིན་ལས་རབ་རྒྱས་བློ་བཟང་རྒྱ་མཚོའི་ཞབས།  །འཇམ་དབྱངས་གྲགས་པ་མན་འདྲ།  གང་ལྟར་ཡང་མཐར།  མི་རྟག་སྡུག་བསྔལ་དྲན་པའི་ངེས་འབྱུང་གིས།  །སྐྱབས་སུ་འགྲོ་དང་བྱང་ཆུབ་སེམས་བསྐྱེད་ནས།  །ཟབ་གསལ་བླ་མ་ལྷ་ཡི་རྣལ་འབྱོར་དང་།  །སེམས་ཉིད་སྐྱེ་མེད་གནས་ལུགས་མངོན་གྱུར་ཤོག  །ཟག་བཅས་ཕུང་པོའི་མཆོད་སྦྱིན་བྱས་ནས་ཀྱང་།  །གཉེན་འཁོར་ལོངས་སྤྱོད་ལུས་ཀྱི་ཞེན་པ་སྤངས།  །འོད་ཟེར་ལྕགས་ཀྱུས་རང་སེམས་སྤྱན་རས་གཟིགས།  །མ་ཕམ་མགོན་པོའི་ཐུགས་ཀར་འཕོ་བར་ཤོག  །འདིར་སྣང་རྨི་ལམ་བར་དོར་རྗེས་དྲན་ཅིང་།  །སྣོད་བཅུད་རྣམ་དག་སྣང་སྟོང་ཆེན་པོར་ཤར།  །སྟོང་ཉིད་སྙིང་རྗེས་ཆགས་སྡང་རང་གྲོལ་ནས།  །མྱུར་དུ་ཟུང་འཇུག་གོ་འཕང་ཐོབ་པར་ཤོག  །ཅེས་པ་འདིའང་རིས་མེད་པའི་བསྟན་པ་ལ་མཆོག་ཏུ་དད་པའི་བློ་གྲོས་ཀྱི་ཨུཏྤལ་ཁ་ཡོངས་སུ་བྱེ་བ་ཤཱཀྱའི་དགེ་སློང་གཞོན་ནུ་མཁྱེན་བརྩེའི་མིང་ཅན་གྱིས་གསོལ་བ་བཏབ་པ་སིདྡྷི་རསྟུ།།    །།  ༈ }}
</onlyinclude>
{{TsagliCall}}
<headertabs/>
== Footnotes ==
<references/>
==Other Information==
{{Footer}}
[[Category:JKW-KABUM-08-NYA-003]]
[[Category:Khyentse Lineage Project]]
[[Category:JKW-KABUM-Volume-08-NYA]]