SPCD-KABUM-01-KA-001

First text in volume. Back to Volume Page Next Text

Wylie title
Location	'phags mchog bka' 'bum Volume 1, Text 1, Pages (Folios to )
Author	འཕགས་མཆོག་རྡོ་རྗེ་
Less details More details
Citation	'phags mchog rdo rje. '*. In Mtshungs med grub sras 'phags mchog rdo rje mchog gi gsung 'bum rin po che* , Vol. : . Kathmandu: Khenpo Shedup Tenzin & Lama Thinley Namgyal, 2004.**
Genre

[edit]

མཚུངས་མེད་གྲུབ་སྲས་འཕགས་མཆོག་རྡོ་རྗེའི་ཞབས་ཀྱི་རྣམ་ཐར་དད་པའི་རླབས་ཕྲེང་ཞེས་བྱ་བ་བཞུགས་སོ།།

ན་མོ་གུ་རུ་བྷྱ། དེ་ཡང་མཁྱེན་བརྩེའི་ཡེ་ཤེས་བསམ་གྱིས་མི་ཁྱབ་ཅིང་སྒྲུབ་པའི་རྒྱལ་མཚན་སྒྲེང་བཞིན། གྲུབ་པའི་དབང་པོ་ཤཱཀྱ་ཤྲཱི་ཛྙཱ་ནའི་རྒྱལ་ཚབ་ལ་ངང་གིས་བྱོན་པའི་ལྷ་སྲས་འཕགས་མཆོག་རྡོ་རྗེ་ནི། གྲུ་རི་གསོལ་སྡེར་ཁ་ཞེས་པའི་གདན་སར། ཡབ་གྲུབ་ཆེན་ཤཱཀྱ་ཤྲཱི་དང་། ཡུམ་ཐོ་ཚ་བ་ཚང་ཆོས་བཟང་སྒྲོལ་མ་གཉིས་ཀྱི་སྲས་སུ་རབ་བྱུང་བཅོ་ལྔ་པའི་ཆུ་མོ་སྦྲུལ། སྤྱི་ལོ་ ༡༨༩༣ ལོར་ངོ་མཚར་བའི་ལྟས་དང་བཅས་སྐུ་འཁྲུངས། འཇམ་དབྱངས་མཁྱེན་བརྩེའི་དབང་པོ་པདྨ་འོད་གསལ་མདོ་སྔགས་གླིང་པ་ལ། སྐུ་གསུང་ཐུགས་ཡོན་ཏན་ཕྲིན་ལས་ཀྱི་སྤྲུལ་པ་ལྔ་ཡོད་པ་ལས་མཁྱེན་བརྩེའི་ཐུགས་ཀྱི་སྤྲུལ་པ་ཡིན་ཞེས་མཚུངས་མེད་ཀྱི་སྐྱེས་བུ་དམ་པ་འགའ་ཡིས་གསུང་། ཡང་སྐུ་ཕྲེང་བརྩི་སྲོལ་གཅིག་ལྟར་ན། སྐུ་ཐོག་དང་པོ་ཀུན་མཁྱེན་འཇིགས་མེད་གླིང་པ། གཉིས་པ་འཇམ་དབྱངས་མཁྱེན་བརྩེའི་དབང་པོ་པདྨ་འོད་གསལ་མདོ་སྔགས་གླིང་པ། གསུམ་པ་རྒྱལ་སྲས་འཕགས་མཆོག་རྡོ་རྗེ་སྟེ་མཁྱེན་བརྩེའི་ ཡང་སྤྲུལ་གྱི་གྲས་སུའང་ངོས་བཟུང་། སྐུ་ན་གཞོན་པའི་དུས་འབྲི་ཀློག་སོགས་སློབ་གཉེར་རྒྱ་ཆེར་མ་མཛད་ཀྱང་། རང་བྱུང་གི་དགོངས་པ་ཀློང་དུ་རྡོལ་ཏེ་མཁྱེན་རབ་ཀྱི་རྩལ་ཕྱོགས་མེད་དུ་འབར་བས། འཆད་རྩོད་རྩོམ་གསུམ་སོགས་མཁས་པའི་བྱ་བ་ལ་མཐོང་ཐོས་ཀྱི་སྐྱེ་བོ་མཆོག་དམན་ཀུན་གྱིས་མངོན་པར་བསྟོད། དགུང་ལོ་ཅུང་སོན་པའི་ཚེ་ཡབ་ལས་རང་གཏེར་བླ་སྒྲུབ་གུ་རུ་བདེ་ཆེན་དང་། ཆོས་ལོངས་སྤྲུལ་གསུམ། བླ་མ་ཞི་དྲག །གྲུབ་ཆེན་གང་གི་དག་སྣང་སྙན་རྒྱུད་ཀྱི་སྐོར་སོགས་ཀྱི་སྨིན་གྲོལ་ཆ་ཚང་དང་། སྔོན་འགྲོ་སེམས་ཀྱི་སྣ་ཁྲིད་ནས། དངོས་གཞི་ཕྱག་རྫོགས་དབུ་གསུམ་གྱི་བར་ཉམས་ཁྲིད་སོགས་ཞིབ་ཆ་མཛད་དེ་བསྩལ་ནས་རྟོགས་པ་དོན་གྱི་རྒྱལ་ཚབ་ཏུ་མངའ་གསོལ། ཤར་ཀཿཐོག་པ་སི་ཏུ་ཆོས་ཀྱི་རྒྱ་མཚོའི་དྲུང་ནས་བསྙེན་པར་རྫོགས། ཀཿཐོག་པ་ཆེན་པོས་ཀུན་མཁྱེན་གསུམ་པའི་བྱིན་གྱིས་བརླབས་པའི་རྒྱལ་སྲས་འཕགས་མཆོག་རྡོ་རྗེ་ཞེས་སྔགས་བརྗོད་དང་བཅས་སྤྱི་བོར་བསྐུར་ནས་ཕན་ཚུན་བླ་སློབ་རེས་མོས་སུ་གྱུར། ཁམས་སྤྲུལ་དྲུག་པ་བསྟན་པའི་ཉི་མ་དང་། ཆབ་མདོ་རྒྱལ་དབང་འཕགས་པ་ལྷ་ཕྲིན་ལས་རྒྱ་མཚོ། གཏེར་ཆེན་ཉི་མ་གྲགས་པ། ༧གོང་ས་ལྷ་མིའི་རྣམ་འདྲེན་རྒྱལ་དབང་སྐུ་ཕྲེང་བཅུ་གསུམ་པ་ཆེན་པོ་ཐུབ་བསྟན་རྒྱ་མཚོ། འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས། ཟེ་ཆེན་རྒྱལ་ཚབ་རིན་པོ་ཆེ། སྐྱབས་མཆོག་འབྲུག་ཆེན་སྐུ་ཕྲེང་བཅུ་པ། ཨ་འཛོམ་འབྲུག་པ་རིན་པོ་ཆེ་སོགས་གསར་རྙིང་རིས་མེད་ཀྱི་དམ་པའི་སྐྱེས་བུ་མང་པོ་བསྟེན་ཅིང་། རང་རིག་དོན་གྱི་ངོ་སྤྲོད་སོགས་གདམས་ཟབ་གསང་ཆོས་མང་དུ་གསན། ཡབ་རྗེ་དམ་པའི་དགོངས་བཞེད་བཞིན་རབ་བྱུང་བཅོ་ལྔ་པའི་མེ་སྦྲུལ། སྤྱི་ལོ་ ༡༩༡༧ འཕགས་མཆོག་རྡོ་རྗེ་དགུང་ལོ་ཉེར་ལྔ་ལ་སོན་པའི་ཚེ་འཛམ་གླིང་སྤྱི་ཡི་རྟེན་སྐལ། བསོད་ནམས་བསགས་པའི་མཆོད་སྡོང་བླ་ན་མེད་པ་བལ་ཡུལ་མཆོད་རྟེན་རྣམ་གསུམ་ཉམས་གསོ་མཛད་པར་ཕེབས་པས། བལ་ཡུལ་རང་བྱུང་གི་མཆོད་རྟེན་གོ་མ་ས་ལ་གནྡྷའམ་འཕགས་པ་ཤིང་ཀུན་ཏུ་གྲགས་པ་དེ་ཉིད་ཀྱི་ཉམས་གསོ་ཁྱད་དུ་འཕགས་པ་གྲུབ་ཅིང་། རབ་ཏུ་གནས་པའི་མེ་ཏོག་འཐོར་བ་སོགས་ལེགས་པར་གྲུབ་རྗེས། ཡབ་རྗེ་གྲུབ་དབང་མཆོག་སྦས་གནས་དཔལ་གྱི་ཙ་རིའི་ནུབ་སྒོའི་གནས་ལག་སྐྱིད་ཕུག་སྒྲུབ་སྡེར། གཞན་དོན་དུ་དགོངས་པ་ཆོས་ཀྱི་དབྱིངས་སུ་ཐིམ་ཚུལ་བསྟན་པའི་ཕྱིར་ཉིན་ནས་བཟུང་། རྒྱལ་སྲས་འཕགས་མཆོག་རྡོ་རྗེ་ཉིད་དང་། སྐུ་མཆེད་ཚེ་དབང་འཇིགས་མེད་གཙོས་ཐུགས་སྲས་བུ་སློབ་རྣམས་ནས་བཀའ་བགྲོས་མཛད་དེ། ཁྱབ་བདག་བཀའ་དྲིན་འཁོར་མེད་རྩ་བའི་བླ་མ་གྲུབ་དབང་རིན་པོ་ཆེའི་ཐུགས་བཞེད་ཕྲིན་ལས་ཀྱི་ལྷག་མ། བསྟན་འགྲོར་སྨན་པའི་རྡོ་རྗེའི་གསུང་། སྐྱེ་འགྲོའི་བདེ་སྐྱིད་ཐམས་ཅད་ཀྱི་འབྱུང་རྩ། སྔོན་མཁན་སློབ་ཆོས་གསུམ་ཕ་བྱ་རྫི་གསལ་བ་དང་། མ་བྱ་རྫི་མ་པུརྣ་ཞེས་བྱ་བའི་བུ་མོ་བདེ་མཆོག་གི་བུར་འཁྲུངས་པའི་ཚེ་ཐུགས་བསྐྱེད་དང་སྨོན་ལམ་གྱི་རྟེན་དུ་བཞེངས་པ། སངས་རྒྱས་འོད་སྲུང་གི་རིང་བསྲེལ་གྱིས་གཏམས་པའི་མཆོད་རྟེན་བྱ་རུང་ཁ་ཤོར་དུ་གྲགས་པ་དང་། སྟོན་པ་རྫོགས་པའི་སངས་རྒྱས་ཤཱཀྱའི་རྒྱལ་པོ་སློབ་པ་ལམ་ཞུགས་ཀྱི་སྐབས་སུ་སྟག་མོ་བཀྲེས་སྐོམ་གྱིས་ཉེན་པ་ལ་སྐུ་ལུས་སྦྱིན་པ་བཏང་བའི་རུས་བུའི་མཆོད་རྟེན་སྟག་མོ་ལུས་སྦྱིན་དུ་གྲགས་པ་གཉིས་ཉམས་གསོ་མི་བསྒྲུབ་ཐབས་མེད་ཀྱི་གྲོས་ཐམས་ཅད་མགྲིན་གཅིག་ཏུ་འགྲིགས། དེ་ལྟར་ཉམས་གསོ་ཞུ་ཆོག་མིན་གང་འགབ། ༧གོང་ས་ལྷ་མིའི་རྣམ་འདྲེན་བཅུ་གསུམ་པ་ཆེན་པོར་སྙན་ཞུ་ཕུལ་བས་ཉམས་གསོ་བྱ་དགོས་ཀྱི་བཀའ་བཟང་དང་། ཞལ་འདེབས་སློང་ཡིག་དོན་འཐུས་བཅས་སྤྱིར་སྨིན་བྱུང་འཕྲལ། ཞལ་སློབ་ཚེ་བརྟན་རྡོ་རྗེ་དང་། འགྲོ་འདྲེན་མི་འགྱུར་སྤྲུལ་སྐུ། ཐུགས་སྲས་ཆུང་བ་གསུམ་དང་། ཆོས་སྤྲུལ་སོགས་བུ་སློབ་རྣམས་རྒྱ་བལ་དབུས་གཙང་མདོ་ཁམས་བཅས་སུ་སློང་མོ་སོ་སོར་བཏང་བས་ཞལ་འདེབས་ཕྱི་སྒོར་དྲུག་ཁྲི་ལྷག་ཙམ་དང་། བོད་དངུལ་རྡིལ་ཚད་གྲངས་མང་། གསེར་ཕྱེ་དང་། བོད་ཊམ། རྒྱ་དངུལ་སོགས་བགྲང་ལས་འདས་པ་འབྱོར། ལྷོ་འབྲུག་ཆོས་རྒྱལ་ཆེན་པོ་ནས་ཕྱི་སྒོར་ཆིག་ཁྲི་སུམ་སྟོང་བདུན་བརྒྱ་དང་། འབྲུག་ཡུལ་དུ་སློང་ཡིག་བཅས་གནང་ནས་ཞལ་འདེབས་རྒྱ་ཆེར་བསྩལ། གྲུབ་དབང་མཆོག་གི་སྐུ་ཆས་དང་རྫས་གང་ཡོད་བསྡོམས་ཕྱི་སྒོར་ཁྲི་ཕྲག་གཅིག་བཅས་ཡོད་པའི་ནང་། ཕྱི་སྒོར་ཉིས་ཁྲི་སུམ་སྟོང་བཞི་བཅུའི་གསེར་རྐྱང་བསྒྲུབས། གཞན་ཡང་དངུལ་ཆུ་དང་། ཟངས། ཤིང་། རྡོ། ལྕགས། ཟ་ཆས། ཁྲུས་རྫས་སོགས་ཀྱི་རིན་དང་། ལྕགས་བཟོ། ཤིང་བཟོ། རྡོ་བཟོ། ལྷ་བཟོ། བརྩིགས་མཁན། ས་རྡོ་སྐྱེལ་འདྲེན་བྱེད་མི་སོགས་བསྡོམས་མི་གྲངས་སུམ་བརྒྱ་དང་ང་བཞི་ཙམ་ལ་ཉིན་བཞིན་གླ་ཆ། ལྟོ། གསོལ་རས་སོགས་ཕངས་སེམས་མེད་པ་ལེགས་པར་བསྩལ་བཞིན། རབ་བྱུང་བཅོ་ལྔ་པའི་ལྕགས་སྤྲེལ་སྤྱི་ལོ་ ༡༩༢༠ ལོར་དབུ་འཛུགས་ཏེ་གཞུང་ས་མཆོག་ནས། ཤར་བྱང་གི་ཆོས་རྗེ་དང་། རྒྱུད་སྟོད་སྨད་ཀྱི་བླ་གྲྭ། དོ་དམ་པ་རྩེ་དྲུང་བཅས་ཕེབས་ཏེ་ཆོས་རྗེ་སྟོན་འཁོར་ནས་ཨརྒྷའི་སྤོ་ཆོག་དང་རྒྱབ་རིམ་ཉིན་བཞིན་བར་མེད་དུ་གསུང་བ་དང་། མཆོད་རྟེན་ཆེན་པོ་ལ་ཉམས་ཆགས་དང་། འཐོར་བརླག་སོང་བའི་སྐྱོན་གང་ཡོད་རྣམས་ཕྱིར་ཞུས་ཏེ་ཉམས་གསོ་གང་དགོས་རིགས་ཕུལ་དུ་བྱུང་བ་བཟོ་བྱད་མཛེས་པར་བྱས་པ་དང་། བུམ་པ་ནས་ཆོས་འཁོར་རྩེའི་གཉྫི་ར་གོང་མའི་བར་ཐོག་བརྩེགས་ཉེར་བརྒྱད་ཡོད་པ་དེར་ཆར་བརླན་གྱིས་ཕལ་ཆེར་འཇིགས་ལ་ཉེ་བ་དེར། རྡོ་སྦྱོར་རྩི་དཀར་གྱིས་སྲ་ཞིང་བརྟན་པའི་ཉམས་གསོ་དང་། བྲེ་ཐོག་བརྩེགས་གཉིས་ཀྱི་ངོས་རེར་སྤྱན་དཀྱུས་འདོམ་ཕྱེད་གཉིས་རེ་ཡོད་པ་རྣམས་ལ་སྤྱན་འབྱེད་གསར་དུ་ཕུལ། བྲེ་ཡི་ཁར་སྔར་མེད་ཟངས་གསེར་གྱི་ནོར་བུའི་དྲྭ་ཕྱེད་འབུར་དུ་བརྐོས། ཟ་ར་ཚག་འདེགས་བྱེད་ཀྱི་ཀ་ཆེན་བཅུ་དྲུག་ཡོད་པ་སྲ་བརྟན་གང་དྲག་གི་གསར་བཟོ་དང་། གསེར་ཟངས་ཀྱིས་སྦུབ་ཤན་བྱས། དབུ་གདུགས་ཀྱི་འོག་པད་འདབ་ནང་མ་ལྔ་ལ་རིགས་ལྔའི་ས་བོན་ལཉྫ་དང་། ཕྱི་ཡི་པད་འདབ་ལ་བཀྲ་ཤིས་རྟགས་བརྒྱད། དབུ་གདུགས་ཀྱི་མཐའ་སྐོར་ཀུན་ཏུ་ཟངས་གསེར་གྱི་ཤམ་བུ་ནོར་བུའི་དྲྭ་བ་དྲྭ་ཕྱེད་ཀྱིས་མཛེས་པར་སྤྲས་པ་དང་། དབུ་རྩེའི་ཐོག་ཟངས་གསེར་གྱི་གཉྫི་ར་ཐོག་བརྩེགས་ཕྱེད་གཉིས་ལང་པ་བཅས་གསར་བསྐྲུན་བྱས་ཏེ། གཞུང་ས་ཆེན་པོ་ནས་གནང་བའི་སྐུ་གསུང་ཐུགས་རྟེན་བྱིན་ཅན་དང་། གཞན་ནས་རྟེན་རྩ་ཆེའི་རིགས་དང་། ཞལ་འདེབས་རྟེན་བཞག་ཇི་སྙེད་བྱུང་བ་རྣམས་ལྷག་ལུས་མེད་པ་ཕྱུར་བུར་བཀང་ཞིང་། མཆོད་རྟེན་གྱི་ཉེ་འཁོར་ཀུན་ཏུ་མཛེས་ཤིང་བརྗིད་ཆགས་པའི་ཡུལ་གྱི་བཀོད་བསྒྲིགས་ཚར་དུ་དངར་བར་མཛད་དེ། ཉེ་འཁོར་གྱི་གྲོང་པ་རྣམས་གཞན་དུ་སྤོ་རུ་འཇུག་པ་དང་། དེ་ཡི་མལ་དུ་སྒོ་ཆེན་ཤིན་ཏུ་ཆེ་བ་ཞིག་བསྐྲུན། ཆུ་མིག་རྣམས་རྒྱ་ཆེ་རུ་བཅུག་སྟེ་དྭངས་ཤིང་གཙང་བ་གསར་བསྐྲུན་མཛད་པ་སོགས། རྒྱུ་དངོས་དང་ས་རྡོ་ཚུན་ཆད་ཆུད་ཟོས་ཀྱི་ཉེས་གོས་མེད་པ་མཛེས་བརྗིད་སྲ་བརྟན་གྱི་ཉམས་གསོ་ཡོངས་རྫོགས་གྲུབ་པར་མཛད་ནས་དུས་ཚེས་དགེ་བའི་ཉིན། ༧གོང་ས་བཅུ་གསུམ་པ་ཆེན་པོ་ཐུབ་བསྟན་རྒྱ་མཚོའི་གསེར་སྙན་དུ་ཐུགས་དམིགས་སྒྲོན་བསྐུལ་གྱིས་རབ་གནས་དགོངས་གཏད་ཞུས་ཤིང་། ཤར་རྩེ་ཆོས་རྗེ་རིན་པོ་ཆེ་དང་། རྒྱུད་གྲྭ་འཁོར་བཅས། སྲས་སྐུ་མཆེད་རྣམ་པ་བཅས་ནས་རབ་ཏུ་གནས་པའི་མེ་ཏོག་འཐོར་བ་དང་། ཚོགས་འཁོར་མཆོད་འབུལ་རྒྱ་ཆེར་མཛད་དེ་བསྟན་འགྲོར་འཕྲལ་ཡུན་ཀུན་ཏུ་དགེ་བའི་ཐུགས་སྨོན་ཟབ་ཅིང་རྒྱ་ཆེ་བ་མཛད། དེ་སྐབས་ཧོར་ཟླ་བཅུ་གཉིས་པའི་ཚེས་བཅུ་ཉིན་འཕེལ་གདུང་གི་ཆར་བབས་པ་གནས་བསྐོར་བ་ཀུན་གྱིས་མཐོང་བ་སོགས་ངོ་མཚར་ཁྱད་དུ་འཕགས་པ་བྱུང་ངོ་། །དེ་ལྟར་མཆོད་རྟེན་བྱ་རུང་ཁ་ཤོར་ཉམས་གསོ་གྲུབ་ནས། རྒྱལ་སྲས་རིན་པོ་ཆེ་ལྕམ་དྲལ་རྣམས་དང་། ཞལ་སློབ་འཁོར་དང་བཅས་པ་ཐུགས་བསྐྱེད་རྒྱ་ཆེན་པོའི་ངང་སྟག་མོ་ལུས་སྦྱིན་དུ་གྲགས་པའི་མཆོད་རྟེན་ཉམས་གསོ་མཛད་སར་ཕེབས། བལ་པོ་ཛ་ག་དྷ་ར་དང་། དྷརྨ་སའུ་སོགས་ནས་ཉམས་གསོ་མཐུན་འགྱུར་གྱི་རོགས་རམ་རྒྱ་ཆེན་པོ་མཛད། དེ་བཞིན་ཕྱག་ཁར་ཞལ་འདེབས་བྱུང་རིགས་རྣམས་ཕྱོགས་གཅིག་ཏུ་བསྡོམས་ནས་ཉམས་གསོ་མཛད་ཚུལ་ལ། མཆོད་རྟེན་གྱི་ཆོས་འཁོར་ཕལ་ཆེར་འཐོར་ནས་སྲོག་ཤིང་རྩ་རུལ་སོང་འདུག་པ་དེ་དག་ཐམས་ཅད་གསར་དུ་བརྗེས། བང་རིམ་དང་བུམ་པ་སོགས་འཐོར་ཞིག་སོང་བ་ཀུན་དང་། ཆག་གས་སོང་བ་གང་ཡོད་ལ་རྡོ་སྦྱོར་གྱིས་གསར་དུ་བསྐྲུན། བྲེ་ཆོས་འཁོར་བཅས་སོ་ཕག་དང་རྡོ་སྦྱོར་གྱིས་སྲ་བརྟན་ཡོང་ངེས་མཛད། ཁར་ཟངས་གསེར་གྱིས་གཡོགས། དབུ་གདུགས་འདེགས་བྱེད་ཀ་བ་དང་། ཀ་རྒྱང་། ཟ་ར་ཚག་སོགས་གསར་བསྐྲུན་མཛད་དེ། བཟོ་དབྱིབས་ཁྱད་དུ་འཕགས་པ་བཞེངས་གྲུབ་རྗེས། ཤར་རྩེ་ཆོས་རྗེ་སྟོན་འཁོར་དང་། རྒྱལ་སྲས་རིན་པོ་ཆེ་འཁོར་དང་བཅས་པས། རབ་གནས་མཆོད་འབུལ་གྱི་མངའ་གསོལ་བས། དགེ་ལེགས་ཀྱི་སྣང་བས་ས་གསུམ་ཡོངས་སུ་ཁྱབ་པར་མཛད་དོ། །སླད་ནས་ཀྱང་ཉམས་གུད་སོགས་འབྱུང་དོགས་གིས། ཕྱི་རིམ་དུ་ལྕགས་རི་དཔངས་མཐོ་བ་ཞིག་གིས་བསྐོར་ཞིང་ཤར་ལྷོ་གཉིས་སུ་སྒོ་ཆེན་རེ་འཛུགས་ཏེ་དོ་དམ་བྱ་རྒྱུ་དང་། གཞན་ཡང་འགྲིམ་ཁང་དང་ཉམས་གསོ་བྱ་རྒྱུ་སོགས་བལ་པོ་ཛ་ག་དྷ་ར་དང་། དྷརྨ་སའུ་ལྷན་འཛོམ་ཐོག་ཏུ་ལས་སྒོའི་གཏོང་ཐེབས་སུ་འཕྲོས་ལྷན་ནས་ཕྱི་སྒོར་བདུན་བརྒྱ་ཐམ་པ་ཕྱི་རྗེས་སུ་བཞག་ནས་ཉམས་གསོ་ལས་སྒོ་བགྱིད་ལུགས་སོགས་ཞིབ་པར་བསྩལ། དེ་ལྟར་ཡབ་རྗེ་གྲུབ་དབང་ཆེན་པོའི་ཐུགས་ཀྱི་དགོངས་བཞེད་ཐམས་ཅད་ལྷག་མ་མ་ལུས་པ་དོན་གཉེར་ལྷུན་གྱིས་གྲུབ་པར་མཛད། འཕྲོས་ལྷག་གསེར་གྱི་པ་ཊ་སྒོར་ལྔ་བཅུ་ང་དྲུག་གི་ལྗིད་ཡོད་པ། སྐྱབས་མགོན་རྒྱལ་དབང་ཐམས་ཅད་མཁྱེན་གཟིགས་ཆེན་པོས་རྒྱལ་བའི་བཀའ་འགྱུར་རིན་པོ་ཆེའི་སྤར་གཞི་གསར་བསྐྲུན་དང་། ཆོས་འཁོར་རྣམ་གསུམ་གྱི་ལྡེབ་བྲིས་གསར་བཞེངས་གནང་བའི་སྐབས། ཞལ་འདེབས་འབྲེལ་འཇོག་ཏུ་ཕུལ། ༧གོང་ས་ཆེན་པོ་སྐྱབས་མགོན་ཐུབ་བསྟན་རྒྱ་མཚོ་མཆོག་དང་། ཐུན་མོང་མ་ཡིན་པའི་བླ་སློབ་ཏུ་གྱུར་ཏེ་ཐུགས་ཡིད་ཆུ་བོ་གཅིག་འདྲེས་སུ་གྱུར། དེ་ནས་ཡབ་རྗེ་དམ་པའི་དགོངས་རྫོགས་སུ་བལ་ཡུལ་དང་འབྲས་འབྲུག་རྒྱ་གར་བཅས་ཀྱི་གནས་ཆེན་རྣམས་དང་། དབུས་གཙང་མདོ་ཁམས་སོགས་བོད་ཡུལ་གྱི་གནས་ཁྱད་འཕགས་རྣམས་སུ་ཆོས་མཇལ་མཆོད་འབུལ་དུ་མ་ཕེབས་པ་མེད་པ་ལྟ་བུ་མཛད་དེ། རང་གཞན་གྱི་དངོས་པོ་ཀུན་ཀྱང་ཆུད་ཟོས་མེད་པ་བསོད་ནམས་དང་ཡེ་ཤེས་ཀྱི་ཚོགས་རླབས་པོ་ཆེ་གོང་ནས་གོང་དུ་འཕེལ་བར་འགྱུར་བའི་ཐབས་ཁོ་ན་ལ་བརྩོན་པར་མཛད། ཙ་རིའི་གནས་ལག་སྐྱིད་ཕུག་དང་། སེར་བཀྲ་ཤིས་སྟེང་བཅས་ལ་གཙུག་ལག་གསར་བཞེངས་དང་། སྒྲུབ་སྡེ་གསར་འཛུག །གྲུབ་དབང་མཆོག་གི་འདྲ་སྐུ་ཟངས་གསེར་ལས་བསྐྲུན་པ་གཟུངས་གཞུག་རབ་གནས་ཁྱད་འཕགས་ཅན་དང་། གདུང་ཁང་གི་མལ་དུ་བྱང་ཆུབ་མཆོད་རྟེན་ཐོག་བརྩེགས་ཕྱེད་གཉིས་ལང་པ་བཅས་བསྐྲུན། དེ་ནས་མདོ་ཁམས་གྲུ་གུ་གསོལ་སྡེར་ཁར་ཕེབས་ཏེ་གཙུག་ལག་ཁང་གསར་བཞེངས་དང་། གྲུབ་དབང་རིན་པོ་ཆེའི་གདུང་རྟེན་ཟངས་གསེར་གྱི་མཆོད་སྡོང་གསེར་དང་རིན་པོ་ཆེའི་ཕྲ་རྒྱན་ཅན་དང་། ཟངས་གསེར་ལས་གྲུབ་པའི་གྲུབ་དབང་ཉིད་ཀྱི་འདྲ་སྐུ་གསར་བཞེངས་མཛད་པས། ཕྱིས་འདྲ་སྐུ་ལས་དབུ་སྐྲ་ཉག་མ་མཐོ་གང་ལྷག་ཙམ་འཁྲུངས་པ་ངོ་མཚར་ཁྱད་དུ་འཕགས་པ་ཅན་བྱུང་། གསོལ་སྡེར་ཁར་ངེས་གསང་སྙིང་པོའི་སྒྲུབ་སྡེ་འཛུག་པ་སོགས་མཛད་པ་རྒྱ་ཆེར་གནང་། དེ་ནས་ཨ་འཛོམ་འབྲུག་པ་རིན་པོ་ཆེ་དང་། ཟེ་ཆེན་རྒྱལ་ཚབ། རྫོགས་ཆེན་རིན་པོ་ཆེ། ཀོང་སྤྲུལ་ཡོན་ཏན་རྒྱ་མཚོ་བཅས་ཀྱི་མདུན་ཕེབས་ཏེ་མན་ངག་ཟབ་དོན་གྱི་བདུད་རྩིས་ཐུགས་ཀྱི་བུམ་པ་འགེངས་པར་མཛད། རྫོང་སར་དུ་ཕེབས་སྐབས་འཇམ་དབྱངས་ཆོས་ཀྱི་བློ་གྲོས་དང་། དིལ་མགོ་མཁྱེན་བརྩེ་བཅས་ལ་གྲུབ་དབང་དགོངས་གཏེར་དང་། མན་ངག་སྙན་རྒྱུད་ཀྱི་སྐོར་སོགས་རྫོགས་པར་ཕུལ། དེ་ནས་ལྷ་བྲག་བདེ་མཆོག་འཁོར་ལོའི་ཕོ་བྲང་། རིག་འཛིན་མཁའ་འགྲོ་འདུ་བའི་གནས་ཆེན། རིགས་གསུམ་སྒྲུབ་ཕུག་ནམ་མཁའ་ཀློང་ཡངས་སུ་མི་ལོ་བཅུ་གསུམ་བར་ངེས་དོན་སྙིང་པོའི་སྒྲུབ་པ་ཁོ་ནར་བརྩོན་པས་རྟོགས་པའི་རྩལ་ཆེན་གཅིག་ཆར་དུ་རྫོགས་ཤིང་སྒོམ་སྟོབས་ཀྱི་ཤེས་རབ་ཟབ་མོའི་ཀློང་རྡོལ། ཉིན་ཞིག་སྐུ་ཆིངས་གསོལ་སྐབས་སྐུ་རྩེད་ལྟ་བུའི་ཕྱག་མཛོད་རྒྱ་གར་བ་བློ་གྲོས་རྡོ་རྗེ་དང་། སློབ་བུ་གཉིས་ལ་སྐུ་ཆིངས་དམ་པོར་སྡོམས་གསུངས་ནས་སློབ་བུ་གཉིས་ཀྱིས་ཕར་ཚུར་འཐེན་སྐབས། སྐུ་སྣང་ལ་རང་བཞིན་མེད་པ་མེ་ལོང་ནང་གི་གཟུགས་བརྙན་ལྟ་བུར་གྱུར་ཏེ་བར་སྣང་ལ་སྐུ་ཆིངས་མདུད་པ་ཐེབས། དེ་ལ་སོགས་པའི་རྟགས་དང་མཚན་མ་བསམ་ཡུལ་ལས་འདས་པ་རྣམས་རང་རེའི་བྱིས་བློས་གཞལ་བར་དཀའ། རྗེ་འདི་ཉིད་ཀྱི་མདུན་ནས་ཆབ་མདོ་རྒྱལ་བ་འཕགས་པ་ལྷ་ཧོ་ཐོག་ཐུ་སྐུ་ཕྲེང་བཅུ་པ་ཕྲིན་ལས་རྒྱ་མཚོ་ནས། ཕྱག་རྒྱ་ཆེན་པོ་ལྷན་ཅིག་སྐྱེས་སྦྱོར་གྱི་ཟབ་ཁྲིད་རྫོགས་པར་གསན་པ་མ་ཟད། ཕྱག་རྒྱ་ཆེན་པོའི་ཁྲིད་ཡིག་ཅིག་འབྲི་དགོས་ཞེས་བཀའ་ཡི་བསྐུལ་བ་ལྟར། ངེས་དོན་ཕྱག་རྒྱ་ཆེན་པོའི་ཁྲིད་རིམ་གྱི་ཟིན་ཐུན་རྒྱལ་ཀུན་དགྱེས་པའི་གསང་མཛོད་ཅེས་བྱ་བ་གསར་རྩོམ་མཛད། མ་ཟད་ཕྱག་རྫོགས་དབུ་གསུམ་གྱི་ཟབ་ཁྲིད་གདུལ་བྱའི་ཁམས་དང་བསྟུན་པའི་མན་ངག་གི་རིགས་མང་པོ་གསར་རྩོམ་མཛད་པས་བོད་གངས་ཅན་གྱི་མཁས་གྲུབ་ཀུན་གྱིས་མངོན་པར་བསྟོད་ཅིང་བསྔགས་པའི་མེ་ཏོག་འཐོར། དེ་ནས་ཁམས་སྒར་དུ་ཕེབས་ཏེ་མདོ་ཁམས་བདུན་པ་སངས་རྒྱས་བསྟན་འཛིན་གྱི་ཡང་སྲིད། མདོ་ཁམས་བརྒྱད་པ་བསྐལ་བཟང་དོན་བརྒྱུད་ཉི་མ། རབ་བྱུང་བཅུ་དྲུག་པའི་ལྕགས་ལུག །སྤྱི་ལོ ༡༩༣༡ ལོར་ཁམས་ནང་ཆེན་དུ་སྐུ་འཁྲུངས་པ་དེ་ཉིད་དཔལ་ཕུན་ཚོགས་ཆོས་འཁོར་གླིང་གི་གདན་ས་ཆེན་པོར་མི་འཇིགས་གསེར་ཁྲིའི་སྟེང་དུ་མངའ་གསོལ་ཞིང་གདན་སར་བཀོད། མན་ངག་ཟབ་ཁྲིད། སྐུ་ཚེ་དང་འགྲོ་དོན་ཕྲིན་ལས་རྒྱས་པའི་བཀའ་དབང་ཕུལ་བ་སོགས་རྟེན་འབྲེལ་མཛད། ཕྱིས་དོན་བརྒྱུད་ཉི་མ་སྐུ་ནར་སོན་སྐབས་བཀའ་དྲིན་ཅན་གྱི་བླ་མ་ཡིན་ཞེས་གསུངས་ནས། འཕགས་མཆོག་རྡོ་རྗེའི་བླ་སྒྲུབ་ཞིག་ཀྱང་མཛད་པ་ད་ལྟ་བཀའ་འབུམ་དུ་བཞུགས། དེ་རྗེས་རྫོང་སར་མཁྱེན་བརྩེ་རིན་པོ་ཆེ་འཇམ་དབྱངས་ཆོས་ཀྱི་བློ་གྲོས་མཆོག་གསོལ་སྡེར་ཆོས་སྒར་དུ་ཕེབས་ནས་རྗེ་འདི་ཉིད་ལས། ཡབ་རྗེ་གྲུབ་དབང་རིན་པོ་ཆེའི་དགོངས་གཏེར་བླ་སྒྲུབ་གུ་རུ་བདེ་བ་ཆེན་པོ་གཙོས་པའི་ཆོས་ལོངས་སྤྲུལ་གསུམ་དང་། བླ་མ་ཞི་དྲག །སྙན་རྒྱུད་ཀྱི་སྐོར་རྣམས་གསན་བཞེས་མཛད། མཁྱེན་བརྩེ་རིན་པོ་ཆེས་ཞབས་ཏོག་ཡིན་གསུང་སྟེ། གྲུབ་དབང་རིན་པོ་ཆེའི་བཀའ་འབུམ་གྱི་དཀར་ཆག་རྡོ་རྗེ་ནོར་བུའི་ཕྲེང་བ་དང་། འོད་དཔག་མེད་ཀྱི་དབང་བསྐུར་བའི་ཆོ་ག་བདེ་ཆེན་འདྲེན་པའི་ཤིང་རྟ། འཕགས་མཆོག་རྡོ་རྗེའི་བཀའ་འབུམ་གྱི་ཆེ་བརྗོད་དཔར་བྱང་སོགས་གསར་རྩོམ་མཛད་ཅིང་ཐུགས་ཡིད་འོ་ཆུ་གཅིག་འདྲེས་སུ་གྱུར་ཏེ། གདན་ས་གསོལ་སྡེར་ཁ་ལ་ཡང་ཐུགས་བརྩེ་བའི་གཟིགས་སྐྱོང་མི་འདོར་བར་རྒྱུན་དུ་མཛད་ཅེས་ཞལ་བཞེས་གནང་། དེ་ནས་གསོལ་སྡེར་བཀྲ་ཤིས་པའི་ཆོས་སྒར་གཟིམ་སྤྱིལ་འོད་གསལ་ཀློང་ཡངས་སུ་བཞུགས་ཏེ། སྐལ་ལྡན་སྨིན་གྲོལ་ལ་བཀོད་པར་མཛད་པའི་ཞལ་སློབ་མང་དུ་བྱུང་སྟེ། གཙོ་བོ་མདོ་ཁམས་བརྒྱད་པ་དོན་བརྒྱུད་ཉི་མ། འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས། དིལ་འགོ་མཁྱེན་བརྩེ་རིན་པོ་ཆེ། གྲུ་གུ་ཆོས་རྒྱལ་རྒྱ་མཚོ། ཁམས་སྲས་ངག་དབང་བདེ་ཆེན། འབྲུག་པ་ཐུགས་སྲས་རིན་པོ་ཆེ། གཏེར་སྟོན་རིན་ཆེན་གླིང་པ། གྲུ་གུ་བླ་རྒན་སྤྲུལ་སྐུ། ཁམས་སྒར་ཡོན་དགེ་སྤྲུལ་སྐུ། གནས་མདོ་ཆགས་མེད་རིན་པོ་ཆེ། ཆབ་མདོ་རྒྱལ་དབང་འཕགས་པ་ལྷ་སྐུ་ཕྲེང་བཅུ་པ་ཕྲིན་ལས་རྒྱ་མཚོ། འཇམ་མགོན་པདྨ་བདེ་ཆེན། རྒྱ་གར་བ་བློ་གྲོས་རྡོ་རྗེ། སྔོ་ཤུལ་ཀུན་དགའ། ཨར་རྩ་སྤྲུལ་སྐུ་འཇིགས་དགའ་སོགས་དམ་པའི་སྐྱེས་བུ་བགྲང་ལས་འདས་པ་བྱུང་། བླ་མ་བསོད་ཚེའི་སྲས་ཨོ་རྒྱན་རིན་ཆེན་གླིང་པས་སྟག་ཚང་རི་ཁྲོད་དེར་ཆོས་སྡེ་གསར་འཛུགས་སོགས་གནང་ནས་གདན་ས་རྒྱ་ཆེར་བཏང་བ་མ་ཟད། བྲག་གཡབ་མངའ་རྒྱུད་ཁུལ་དུ་གོ་འདེ་རི་ཁྲོད་ཅེས་པ་དང་། ཡང་འབུས་ལྕོག་ལོ་ཞེས་པའི་ཇོ་དགོན་སོགས་ཆག་བཏབ། ཉེ་གནས་བླ་མ་སངས་རྒྱས་རྡོ་རྗེས་གོ་འཇོ་ཧ་ཚ་རུ་ལྷུ་ཆུ་དགོན་ལྷུན་གྲུབ་བདེ་ཆེན་ཆོས་གླིང་ཞེས་པའི་གྲྭ་དགོན་ཆག་བཏབ། སྐུ་ཚབ་ལ་རྡོ་ཤུལ་མཁའ་འགྲོ་པདྨ་ཆོས་མཚོ་ཞེས་པས་གོ་འཇོ་གསེར་ཁ་རུ་ཀོམ་ཆེན་ཇོ་དགོན་ཆག་བཏབ། འཕགས་མཆོག་རྡོ་རྗེ་སྐུ་ཉིད་དངོས་ཕེབས་ཀྱིས་ལྷ་ཐོག་རྒྱལ་པོའི་མངའ་ཁོངས་སུ་དངོས་རྫོང་རི་ཁྲོད་ཅེས་པའི་དགོན་གནས་གསར་འདེབས་མཛད་དེ། སྐུ་ཡི་ཚ་བོ་སྲས་ཨོ་རྒྱན་ཞེས་པ་དེར་གནང་སྟེ་འགྲོ་དོན་སྐྱོང་བར་མཛད། གཞན་ཡང་རྟོགས་པ་མཆོག་ལྡན་དང་། གཞན་དོན་ནུས་པའི་སློབ་ཚོགས་བགྲང་གིས་མི་ལངས་ཏེ། རྒྱ་བལ། འབྲས་འབྲུག །དབུས་གཙང་མདོ་ཁམས་སོགས་སུ་ས་དགེ་བཀའ་རྙིང་གི་བླ་མ་སྐྱེས་མཆོག་དུ་མ་དང་། གྲུབ་ཐོབ་རྣལ་འབྱོར་ཕོ་མོ། འདུལ་འཛིན་གྱི་དགེ་སློང་། གཞན་ཡང་ཁྱིམ་བདག་སྐྱེ་བོ་ཕོ་མོ་སོགས་ཤིན་ཏུ་མང་ཞིང་། དེ་དག་གི་ནང་ནས་རང་གཞན་གྱི་དོན་ནུས་པ་བརྒྱ་ཕྲག་དུ་མ། ཐར་པའི་ལམ་སྣ་ཟིན་པ་སྟོང་ཕྲག་དུ་མ། གསུང་གིས་འབྲེལ་པ་ཐོགས་པ་ཁྲི་ཕྲག་སོགས་བརྒལ་ཞིང་། ཆོས་སྣ་རེ་ཐོབ་ནས་བཟུང་མཆོག་ཕལ་སུ་འདྲ་ཞིག་ཡིན་རུང་། འཆི་ཁར་མི་འཇིགས་པའི་གདེང་དང་། ཐུགས་དམ་ཟིན་པ་སོགས་རྟགས་མཚན་བཟང་པོ་སྣ་རེ་མེད་པ་སུ་ཡང་མེད་པ་ཀུན་གྱི་མཐོང་ཆོས་སུ་གྱུར། སྐུ་ཚེ་གཅིག་ལ་གཙོ་བོ་ངེས་དོན་སྒྲུབ་པའི་རྒྱལ་མཚན་བཙུགས། མཆོག་དང་ཐུན་མོང་གི་དངོས་གྲུབ་བརྙེས། གསོལ་སྡེར་ཁར་བཞུགས་སྐབས། མཚན་མོ་ཟླ་བའི་ངོས་སུ་ཞབས་སྐོར་ཕེབས་སྐབས་སྐུ་ལ་གྲིབ་མ་སྐྱ་ཡམ་ཙམ་ལས། གཞན་གྱི་གྲིབ་མ་ལྟ་བུ་ནག་ངམ་མེ་བ་སོགས་གཏན་ནས་མེད་པ་ཞལ་སློབ་གྲོགས་མཆེད་རྣམས་ཀྱིས་མཐོང་བ་སོགས་མཛད་པ་ལ་དཔྱད་ན། ངོ་མཚར་ཆེ་ཞིང་ཉམས་སྣང་དང་གཟིགས་སྣང་ཡང་བརྗོད་ཀྱིས་མི་ལང་། སྐུ་ཚེ་དེར་སྒྲུབ་པ་ཁོ་ན་ལ་བརྩོན་ནས་བཞུགས་པ་ལས་དཀོར་སྡུད་སོགས་གཏན་ནས་མི་མཛད་ཀྱང་། དགུང་ལོ་ལྔ་བཅུ་ཐོག་མདོ་སྨད་གོ་བྲག་ལྷ་ཆབ་སོགས་སུ་གདུལ་བྱ་རྒྱ་ཆེར་མཛད། ཁྱད་པར་དུ་གོ་འཇོ་སྤམ་མདའ་དཔོན་གྱི་ཡོན་སྦྱོར་གྱིས་མཁར་ལེར་རི་ཁྲོད་དུ་སྒྲུབ་ཆེན་བཙུགས། སྤོམ་མདའ་ལྡིང་འོག་གི་དུད་གྲངས་སུམ་བརྒྱ་ཙམ་གྱིས་ལོ་གཅིག་ལ་སྒོ་བཤས་སྤངས་ཏེ་དགེ་བའི་ལམ་ལ་འགོད་པར་མཛད། གཞན་ཡང་མདོ་སྨད་ཀྱི་སྐྱེ་བོ་བགྲང་ལས་འདས་པ་ལ་ཆོས་སྦྱིན་དང་། རྗེས་སུ་འཛིན་པའི་ཞལ་བཞེས་དང་སྨོན་ལམ་རྣམ་པར་དག་པས་མཚམས་སྦྱར་བ་སོགས་བསྟན་འགྲོའི་དོན་མཛད་པ་དང་བཀའ་དྲིན་མཐའ་ཡས་པ་བསྐྱངས། དད་ལྡན་གྱི་འགྲོ་བ་ཁྲི་ཕྲག་མང་པོ་སྨིན་གྲོལ་གྱི་ལམ་ལ་བཀོད། དེ་ནས་རབ་བྱུང་བཅུ་དྲུག་པའི་ཆུ་རྟ། སྤྱི་ལོ་ ༡༩༢༤ ལོའི་ལོ་མཇུག་ནས་ཁྲག་རླུང་ལྟ་བུའི་བསྙུན་གཞི་ཞིག་གིས་སྐུ་ཁམས་མ་བདེ་བའི་སྐབས། ཉག་བླ་བྱང་ཆུབ་རྡོ་རྗེའི་སྲས་མོ་རྟ་མགྲིན་ལྷ་མོ་ཞེས་མཚན་ལྡན་གྱི་ཌཱཀྐི་མ་དེ་ཉིད། གསང་བའི་ཡུམ་དུ་རྟེན་འབྲེལ་བསྒྲིགས་ན་སྐུ་ཚེ་མཐར་ཕྱིན་ཏེ། དོན་གཉིས་ལྷུན་གྲུབ་ཏུ་འབྱུང་ཞེས་སྐྱེས་བུ་དམ་པ་འགའ་ཡིས་གསུངས་ཀྱང་། ཁོ་བོ་ནི་ལུས་རྟེན་འདིར་ཚངས་སྤྱོད་ཀྱི་སྡོམ་པ་སྲུང་བ་ལས། དེ་འདྲའི་སྔགས་སྤྱོད་སོགས་རང་འདྲ་བས་ཡོང་མི་ཐུབ་གསུངས་ནས་ཞལ་བཞེས་མ་གནང་། དེ་ནས་དགུང་གྲངས་ལྔ་བཅུ་ང་གཅིག་པ་རབ་བྱུང་བཅུ་དྲུག་པའི་ཆུ་ལུག་སྤྱི་ལོ་ ༡༩༤༣ ཧོར་ཟླ་བཅུ་གཅིག་པའི་ཚེས་སུམ་ཅུ་ཉིན། ངོ་མཚར་བའི་ལྟས་དུ་མ་དང་བཅས་ཏེ་གསོལ་སྡེར་ཆོས་སྒར་གྱི་གཟིམ་སྤྱིལ་འོད་གསལ་གླིང་དུ་སྐུ་ཞི་བར་གཤེགས་པའི་ཚུལ་བསྟན། སྐུ་གདུང་བཞུ་སྐབས། དུ་བའི་རྩེར་འོད་དང་། ཐིག་ལེ། ཐིག་ཕྲན་བལྟར་མི་བཟོད་པ་དང་། འཇའ་འོད་ཀྱིས་ལྷ་ལམ་ཡོངས་སུ་འགེངས་པ་དེར་འདུས་ཀྱི་སྐྱེ་བོ་ཀུན་གྱིས་མཇལ་བ་དང་། གདུང་རུས་ལ་ཀུན་མཁྱེན་ཀློང་ཆེན་པའི་སྐུ་རང་བྱོན་དང་རིང་བསྲེལ་ཁ་དོག་སྣ་ཚོགས་པ་སོགས་དཔག་མེད་བྱོན་ཏེ་རྗེས་འཇུག་འགྲོ་བ་ཀུན་ལ་དད་རྟེན་དུ་འཇོག་པར་མཛད་དོ།། །།དེ་ལྟ་བུའི་སྐྱེས་ཆེན་དེ་ཉིད་ཀྱིས་གདུལ་བྱའི་ཁམས་དབང་དང་འཚམ་པའི་གསུང་རྩོམ་ཇི་སྙེད་ཅིག་ཡོད་པ་ལས། གྲུ་རི་གསོལ་སྡེར་བཀྲ་ཤིས་སྒར་ནང་དཔར་དུ་འཁོད་པའི་གླེགས་བམ་ཐབས་ཤེས་མཚོན་བྱེད་ཨེ་ཝཾ་རྟགས་ཅན་གྱི་པོད་ཆེན་གཉིས་བཞུགས་ཡོད་འདུག་ཀྱང་། འདི་ཕྱོགས་སུ་དཔེ་རྒྱུན་ཤིན་ཏུ་དཀོན་པར་བརྟེན། སྨན་ལྗོངས་ནགས་མའི་ཚལ་གྱི་༧གྲུབ་དབང་བསོད་ནམས་བཟང་པོ་རིན་པོ་ཆེ་མཆོག་གི་ཐུགས་ཀྱི་སྲས་མཆོག །རྒྱལ་མཚན་སྤྲུལ་སྐུའམ་ཀུན་བཟང་བསྟན་པའི་རྒྱལ་མཚན་རིན་པོ་ཆེ་ཞེས་ཡོངས་སུ་གྲགས་ཤིང་སྒྲུབ་པའི་རྒྱལ་མཚན་འཛིན་པ་མཆོག་ནས། འབད་རྩོལ་ཆེན་པོས་གསུང་འབུམ་རིན་པོ་ཆེ་ཡོངས་རྫོགས་གསར་བཞེངས་དང་འབྲེལ། ཞུ་དག་དང་པར་བསྐྲུན་སོགས་ཁོ་བོ་ལ་བགྱི་འོས་ཀྱི་བཀའ་བཟང་སྤྱི་བོར་ཕེབས་པ་ལྟར། ལེགས་སོ་ཞེས་དང་བླངས་ཞུ་ཁུལ་བྱས་ཀྱང་། ཟིན་དུ་མེད་པའི་བྱ་གཞག་ཆུའི་གཉེར་མ་འདྲ་བས་མགོ་བོ་འཁོར་ཅིང་དེ་མུར་རྒྱུན་རིང་ཐལ་ཡང་། བར་ལམ་ནས་འཕགས་ཤིང་འབྲུག་དཀར་དགོན་གྱི་བླ་མ་ཕྲིན་ལས་རྣམ་རྒྱལ་མཆོག་གི་ཐུགས་བསྐྱེད་རྨད་དུ་བྱུང་བ་ལས་བལྟམས་པའི་ཤྲཱི་གཽ་ཏམ་བུདྡྷ་ཝི་ཧཱ་རའི་གསུང་རབ་རྒྱུན་སྤེལ་ཁང་དུ། དཔེ་ལུང་གི་རྒྱུན་དཀོན་རིགས་རྣམས་ཕྲན་བུ་རེ་བཞེངས་སྤེལ་བགྱི་བའི་མུར། ད་ལམ་ཡང་རྒྱལ་སྲས་འཕགས་མཆོག་རྡོ་རྗེ་མཆོག་གི་གསུང་འབུམ་རིན་པོ་ཆེའི་གླེགས་བམ་སྐུ་གསུམ་གྱི་གྲངས་ལྡན་ འདི་ཉིད་ཀྱང་། གློག་ཀླད་ཀམ་པིའུ་ཊར་ནང་གསར་དུ་བཙུད་དེ། འབྲེལ་ཡོད་རྣམས་ལ་ཆོས་སྦྱིན་དུ་སྤེལ་བའི་མཛད་པ་བདག་གིར་བཞེས་པ་ལ་ལེགས་སོའི་བསྔགས་བརྗོད་ཞུ་བ་གྱི་ཡིག་ཆ་ཞིག་ཕྲན་གྱི་སྤྱི་བོར་བསྩལ་གནང་བཀའ་དྲིན་ཆེ་བ་ལས་ཇི་ལྟར་བྱུང་བ་བཞིན་བཀོད་པའི་ཁུལ་དང་། དཀར་ཆག་དང་གོ་རིམ་སོགས་ཀྱང་མཚུངས་མེད་རྒྱལ་མཚན་སྤྲུལ་སྐུ་རིན་པོ་ཆེ་མཆོག་ནས་བསྡེབས་གནང་མཛད་འདུག་པ་ལྟར་སོར་བཞག་ཐོག །ཞུ་དག་སོགས་གང་ཐུབ་ཞུས་པའི་ཁུལ་ལགས་ན། འདི་དང་རྗེས་སུ་འབྲེལ་བའི་ཡིག་འཇུག་གི་ལས་བྱེད་པ་ལྷ་མོ་དང་། ཡོལ་མོ་བ་སེངྒེ་རྒྱལ་པོ། ཕྱག་དཔེའི་བཟོ་བཀོད་དང་ཞུ་དག་གི་འགན་བཞེས་པ། འཛི་སྒར་མཁན་པོ་འཇམ་དབྱངས་ཉི་མ་མཆོག་དང་། ཕྱག་རོགས་བླ་མ་རྡོ་རྗེ། གྲྭ་ཚེ་རིང་དབང་རྒྱལ་སོགས་ལ་ཡང་ལེགས་སོ་ཞུ་རྒྱུ་དང་། དགེ་རྩ་རྫོགས་བྱང་དུ་བསྔོ་བ་བཅས། རྣམ་དཀར་གྱི་འདུ་བྱེད་པོ་མཁན་བཤད་སྒྲུབ་བསྟན་འཛིན་མིང་པས། རབ་གནས་ཆུ་ལུག་ལོའི་ཟླ་བ་་༨ པའི་ཚེས་་༢༥ ཕྱི་ལོ་་༢༠༠༣ ཟླ་བ་་༡༠ ཚེས་ ༢༠ མཚུངས་མེད་འགྲོ་བའི་དཔལ་མགོན་ཆོས་རྗེ་རྒྱ་རས་པ་ཡེ་ཤེས་རྡོ་རྗེ་ཞེས་ས་གསུམ་ན་སྙན་པར་གྲགས་པ་དེ་ཉིད་དགོངས་པ་ཆོས་ཀྱི་དབྱིངས་སུ་ཐིམ་ཚུལ་བསྟན་པའི་དུས་ཆེན་ཁྱད་པར་ཅན་གྱི་ཉིན། ཤྲཱི་གཽ་ཏམ་བུདྡྷ་ཝི་ཧཱ་རའི་གསུང་རབ་རྒྱུན་སྤེལ་ཁང་ནས་དཔེ་བསྐྲུན་སྔོན་བརྗོད་ཀྱི་ཚུལ་དུ་བཀོད་པ་དགེ་ལེགས་སུ་གྱུར་ཅིག། །།པར་ཟིན་པ་ཡིན་ལགས།