འདྲེ་མོ་ལྟས་བརྒྱ་མ།

Previous Text Back to Volume Page Next Text

Wylie title	'dre mo ltas brgya ma
Location	dpal sprul bka' 'bum Volume 6, Text 32, Pages 333-334 (Folios 1a1 to 1b4)
Author	དཔལ་སྤྲུལ་རིན་པོ་ཆེ་
Less details More details
Citation	Dpal sprul rin po che. 'dre mo ltas brgya ma. In Dpal sprul 'jigs med chos kyi dbang po'i gsung 'bum, Vol. 6: 333-334. Kathmandu: Tsadra Foundation and Shechen Publications, 2026.
Genre	Letters - springs yig
Colophon	རྒྱལ་བསྟན་བཤད་སྒྲུབ་གཉིས་ཀྱིས་སྐྱོང་བའི་ཆོས་སྡེ་ཆེན་པོ་ནས་མཁས་པ་དཔལ་སྤྲུལ་རྒྱལ་པོས་སྤྲིངས།
Colophon	rgyal bstan bshad sgrub gnyis kyis skyong ba'i chos sde chen po nas mkhas pa dpal sprul rgyal pos springs/

[edit]

༄༅། །འདྲེ་མོ་ལྟས་བརྒྱ་མ་ཞེས་བྱ་བ་བཞུགས། ཇི་སྐད་དུ་རྒྱལ་སྲས་ཆེན་པོ་ཞི་བ་ལྷས། ཕོ་ཉ་ཕོ་ཉ་མོ་ཡིས་སྔོན། །གང་ཕྱིར་དུ་མར་གསོལ་བཏབ་ཅིང་། །སྡིག་པ་རྣམས་སམ་གྲགས་མིན་ལ། །གང་གི་དོན་དུ་མ་འཛེམ་པར། །འཇིགས་པ་ལ་ཡང་བདག་ཞུགས་ཤིང་། །རྫས་ཀྱང་ཟད་པར་བྱས་གྱུར་ཏེ། །གང་ལ་ཡོངས་སུ་འཁྱུད་པ་ན། །མཆོག་ཏུ་དགའ་གྱུར་དེ་དག་ཉིད། །ཀེང་རུས་ཉིད་ཡིན་གཞན་མིན་ནོ། །ཞེས་གསུངས་པ་ལྟར། འཇིག་རྟེན་གྱི་སྐྱེ་བོ་ཤིན་ཏུ་རྨོངས་པ་འདོད་པའི་དབང་དུ་གྱུར་པ་བུད་མེད་ཀྱིས་བྲན་དུ་བཀོལ་བ་རང་དབང་ཅུང་ཟད་ཀྱང་མེད་པ་དག་གིས་བུད་མེད་ཀྱི་ལུས་ཀེང་རུས་རྒྱུས་པས་སྦྲེལ་བ་བཤང་གཅི་དང་མི་གཙང་བས་གང་བ། དྲི་ང་བ། ཡིད་དུ་མི་འོང་བ། བྱུར་ཐམས་ཅད་ཀྱི་སྣ་འདྲེན་དེ་ལ་འདོད་བྱ་ཡིད་འོང་གི་དངོས་པོ་ལྷའི་བུ་མོ་ལྟར་བལྟས་ནས། སྲིན་མོ་གདོང་དམར་མ། འདྲེ་མོ་འགོ་ཁྲ་མ། འཕུང་མོ་གཤིས་ངན་མ་དེ་བདག་གིར་བྱ་བའི་ཆེད་དུ། གསེར་དངུལ་རྟ་མཛོ་གནག་ལུག་སོགས་གཅེས་པའི་རྒྱུ་རྫས་མང་པོ་བཏང་། འདྲེ་མོ་ལྟས་ངན་བརྒྱའི་ཐོག་མ་ཉིན་པར་གྱི་འུག་རྒན་ལྟ་བུ་དེ་ཁྱིམ་དུ་འོང་བ་ལ་དགའ་བའི་སྟོན་མོར་བྱེད་པར་རློམ་ཤིང་། སེམས་ཅན་མང་པོའི་སྲོག་བཅད་རང་གཞན་གཉིས་ཀ་དམྱལ་བ་བསྡུས་འཇོམས་ཀྱི་ཡུལ་ནས་བར་བསྐལ་མང་པོར་མི་ཐར་པའི་རྒྱུ་དེ་འདྲ་ཤེས་ལྡན་བསམ་ཡོད་ཀྱི་མི་ཞིག་ཡིན་ཕྱིན་ཆད་གཏན་ནས་བྱེད་ཐབས་མི་འདུག་པས་དཔོན་གྱི་ངག་བཀོད་བཞིན་བྱ་ངན་དེ་འདྲ་ཕྱིན་ཆད་རྒྱུན་ཆོད་ངེས་བྱས་ན། སྣ་ས་ཕ་མིང་ཁྱོ་ཤུགས་གྱོས་རྒྱུགས་སོགས་ཐམས་ཅད་ལ་འདི་ཕྱི་ཀུན་ཏུ་དགེ་བ། རྒྱལ་བའི་བཀའ་བླ་མའི་གསུངས་མཐོང་ཆོས་མྱོང་བ་ཐམས་ཅད་ཀྱིས་ཚད་མ་ཡིན་པས་དེ་ལུགས་སྡེ་སྤྱིའི་སྐྱ་སེར་ནས་ཡིད་འཇགས་ཡོད་པར་གྱིས། ཆུ་བྱ་ཟླ་ཚེས་ལ། སྐྱབས་མགོན་བླ་མ་མཆོག་གི་གདན་ས། ཡུལ་སྐྱོང་ཟླ་རྒྱལ་འཕེན་པོའི་མདུན་ཞོལ། རྒྱལ་བསྟན་བཤད་སྒྲུབ་གཉིས་ཀྱིས་སྐྱོང་བའི་ཆོས་སྡེ་ཆེན་པོ་ནས་མཁས་པ་དཔལ་སྤྲུལ་རྒྱལ་པོས་སྤྲིངས།