བླ་མ་བཀའ་དྲིན་ཅན་འཇིགས་མེད་རྒྱལ་བའི་མྱུ་གུའི་གསོལ་འདེབས་སྨོན་ལམ་དང་བཅས་པ།

Previous Text Back to Volume Page Next Text

Wylie title	bla ma bka' drin can 'jigs med rgyal ba'i myu gu'i gsol 'debs smon lam dang bcas pa
Location	dpal sprul bka' 'bum Volume 6, Text 6, Pages (Folios to )
Author	དཔལ་སྤྲུལ་རིན་པོ་ཆེ་
Less details More details
Associated People	འཇིགས་མེད་རྒྱལ་བའི་མྱུ་གུ་ ('jigs med rgyal ba'i myu gu)
Citation
Genre	Prayers - smon lam · Supplications - gsol 'debs
Colophon	།བླ་མ་བཀའ་དྲིན་ཅན་གྱི་གསོལ་འདེབས་འདི། ཁྱི་རྒན་དཔལ་དགེས་གསང་ལུང་དུ་བྲིས་སོ། །དགེའོ།
Colophon	/bla ma bka' drin can gyi gsol 'debs 'di/_khyi rgan dpal dges gsang lung du bris so/_/dge'o/

[edit]

༄༅། །བླ་མ་བཀའ་དྲིན་ཅན་འཇིགས་མེད་རྒྱལ་བའི་མྱུ་གུའི་གསོལ་འདེབས་སྨོན་ལམ་དང་བཅས་པ་བཞུགས་སོ། །

རྒྱལ་བའི་གསུང་ངག་ལེགས་བཤད་རིན་པོ་ཆེ། །ཟབ་དོན་གདམས་པ་འཆད་ལ་དབང་འབྱོར་བས། །སྙིང་པོའི་བསྟན་པའི་དམ་ཆོས་སྤེལ་མཛད་པ། །དྲིན་ཆེན་བླ་མའི་ཞབས་ལ་གསོལ་བ་འདེབས། །གཞི་འབྲས་དབྱེར་མེད་གཉུག་མ་སེམས་ཀྱི་གཤིས། །ལམ་ཟབ་ཡང་དག་རྟོགས་པས་མངོན་བྱས་ནས། །མ་ནོར་ཇི་བཞིན་གཞན་ལ་སྟོན་མཛད་པ། །དྲིན་ཆེན་བླ་མའི་ཞབས་ལ་གསོལ་བ་འདེབས། །སྙིགས་མའི་དུས་འདིར་རྡོ་རྗེ་རྣལ་འབྱོར་གྱི། །ལམ་བཟང་བརྒྱུད་པའི་ཆུ་བོ་ཉག་ཕྲ་ཚེ། །རང་གིས་སྒྲུབ་དང་གཞན་ལ་འཆད་པ་ཡིས། །བསྟན་པའི་སྲོག་ཤིང་མཛད་ལ་གསོལ་བ་འདེབས། །དང་པོ་སྨིན་བྱེད་དབང་གིས་སྒོ་ཕྱེ་ནས། །བར་དུ་ཉམས་ལེན་གདམས་པའི་ཁྲིད་ཀྱིས་བསྐྱངས། །ཐ་མར་ཉམས་མྱོང་གནད་ཀྱིས་གེགས་སྐྱོན་བསལ། །མ་ནོར་ཐར་ལམ་སྟོན་ལ་གསོལ་བ་འདེབས། །བསལ་བཞག་བྲལ་བའི་སེམས་ཉིད་རིན་པོ་ཆེ། །རང་ངོ་མ་ཤེས་འཁྲུལ་བས་བསླད་པ་ལ། །ཐབས་མཆོག་ཟབ་མོའི་གནད་གསང་ལ་བརྟེན་ནས། །གནས་ལུགས་ཇི་བཞིན་སྟོན་ལ་གསོལ་བ་འདེབས། །རྒྱལ་བ་ཀུན་གྱི་རྣམ་འཕྲུལ་རིན་པོ་ཆེ། །རྒྱལ་བ་ཀུན་དང་དབྱེར་མེད་ཆོས་ཀྱི་རྗེ། །རྒྱལ་བ་ཀུན་ལས་ལྷག་པའི་བཀའ་དྲིན་ཅན། །སྙིང་ནས་བཀའ་དྲིན་དྲན་པས་གསོལ་བ་འདེབས། །བདག་སོགས་སྐྱེ་དང་ཚེ་རབས་ཐམས་ཅད་དུ། །མགོན་པོ་ཁྱེད་ཀྱིས་འབྲལ་མེད་རྗེས་བཟུང་ནས། །ཆོས་སྐུའི་ཀློང་དུ་རོ་གཅིག་མ་གྱུར་བར། །ཐུགས་རྗེ་མཆོག་གིས་བྱིན་གྱིས་བརླབ་ཏུ་གསོལ། །སྟོང་གཟུགས་འོད་ལྔའི་སྣང་བ་བླ་མའི་སྐུ། །འཛིན་མེད་རང་རིག་ངང་དུ་རྩལ་རྫོགས་ཏེ། །མ་དག་ཤ་ཁྲག་རྡོས་པའི་ལུས་སྤངས་ནས། །ཉམས་ལེན་སོར་སྡུད་བསམ་གཏན་མཐར་ཕྱིན་ཤོག །མི་གཡོ་ཡེ་ཤེས་རླུང་རྩ་བླ་མའི་གསུང་། །རྩོལ་མེད་མཉམ་བཞག་ངང་དུ་རྩལ་རྫོགས་པས། །ཉི་ཁྲི་ཆིག་སྟོང་རླུང་གི་རྒྱུ་བ་དག །ཉམས་ལེན་སྲོག་རྩོལ་འཛིན་པ་མཐར་ཕྱིན་ཤོག །བདེ་ཆེན་དངས་མའི་ཐིག་ལེ་བླ་མའི་ཐུགས། །སྤྲོས་བྲལ་ཆོས་སྐུའི་ངོ་བོ་རྩལ་རྫོགས་ནས། །འཛག་བདེའི་སྙིགས་མ་འཕོ་བའི་བག་ཆགས་བཅོམ། །ཉམས་ལེན་རྗེས་དྲན་ཏིང་འཛིན་མཐར་ཕྱིན་ཤོག །བདེ་ཆེན་ཡེ་ཤེས་གཏུམ་མོའི་འོད་སྣང་གིས། །ཕྱི་ནང་སྣོད་བཅུད་སྒྱུ་ལུས་སྤྲུལ་སྐུར་འབྱོངས། །རྟོགས་པའི་འོད་གསལ་དོན་གྱི་ཡེ་ཤེས་མཐོང་། །ཉམས་ལེན་སྙིང་པོའི་གནད་ལ་དབང་འབྱོར་ཤོག །རྨི་ལམ་འཁྲུལ་སྣང་འཛིན་མེད་ངང་དུ་གྲོལ། །བར་དོ་ཡིད་ལུས་རྒྱལ་བ་ལོངས་སྐུར་འབྱོངས། །མ་དག་རྣམ་ཤེས་ཆོས་སྐུའི་ཀློང་དུ་འཕོ། །ཉམས་ལེན་ཟུང་འཇུག་ལམ་མཆོག་མཐར་ཕྱིན་ཤོག །བླ་མའི་ཐུགས་དང་རང་སེམས་དབྱེར་མེད་པ། །དོན་དམ་ཆོས་སྐུའི་དགོངས་པ་མཐར་ཕྱིན་ནས། །ཁམས་གསུམ་འཁོར་བའི་རྒྱ་མཚོ་མ་སྟོང་བར། །རང་གཞན་དོན་གཉིས་ལྷུན་གྱིས་འགྲུབ་པར་ཤོག །བླ་མ་བཀའ་དྲིན་ཅན་གྱི་གསོལ་འདེབས་འདི། ཁྱི་རྒན་དཔལ་དགེས་གསང་ལུང་དུ་བྲིས་སོ། །དགེའོ། །